رواية هذيانٌ بين جمرٍ وجليد ..(ارملة اخي المجنونة) الفصل التاسع عشر 19 - بقلم نورا ناصر

السلام عليكم
رواية هذيان بين جمر وجليد
الفصل الرابع عشر
نورا ناصر

كيف دخلتي عالمي واستوطنتي به؟
من اي باب دخلتي ..!
فأبواب قلبي كانت مغلقه_ بسلاسل من حديد مجمره #
كنت جبل شامخ لا انحني يا مجنونتي !
قواكي جعلتني انحني لحبكي بكل جوارحي ......
فأنتي جمر وانا جليد #
منذا ان وضعت الرداء عليكي _فاصبحتي احد
ممتلكاتي الثمينه واجملها''
اسمحي لي بالاقتراب منك يا لبوه في عين الاسد !
لاتتهوري وتمهلي وقفي عند كلامي يا لبوتي السليطه !#!بقلم الكاتبة haneenali422

*****

باوعتلها بتفحص زين هاي منو هيام لو ريلام !! ياالله شكد يتشابهن لالا هاي هيام مبينه من تصرفاتها
عابت شبيها هاي وشكو تطل هيجي شكد مكروهة .

طلعت من الغرفة وخليت الباب مفتوحة ، وسمعته
يكوللها : ها شبيج تباوعين ؟ تردين اعمي عيونج
هسه ؟

اني نزلت جوة رأسا وهو اجه فات من يمي
همس امشي للاستقبال محد بي هسه ..
وراح قبلي ..

تبعته للاستقبال .. شفته كاعد ع القنفة وبيده موبايله
وكفت يم باب الاستقبال هو حس بوجودي التفت
اشرلي براسه رحت كعدت على القنفة مقابيله .

باوعلي ركز بعيوني ثواني وبتساؤؤل : ها كلتي عندج موضوع وياي ، احجي اسمع شبيج صافنة ..

جريت تنهيدة ؛ اوس اقاربك مدري صديقك ترى هواي مضوجني هواي وين مااروح يطلعلي ومتقصد يسوي هيج ترى بزعت منه حاجي وكوله خل يبتعد عني .

كال باستغراب ؛ هاي شنوو بعده يتعرضلج ؟

بملل جاوبته واني ادير وجهه منه : اي بعده وبصراحة كلش مأذيني شوفلي حل سويلي جارة ترى انته السبب بهذا كله .

_ كافي كافي منين يطفوج انتي ؟ افتهمنا عاد لا تظلين تلحين ، هسه اخابره واطيح حظه وحظج وياه .

_ اني شكو تطيح حظي هو هذا صاحبك قوس قزح تجرحت رجليه من الزحف كوله لا يحلم وخلي يقطع الامل ويجوز مني .

_ هسه اكطع النعال على رأسه مو بس اخلي يكطع الامل .. اصلا شنو ذنبها امل يكطعها ..

ظليت افر بيدي وهو ظل يخابر دقيقة
والظاهر اوس رد عليه وجاوبه شرار بعصبية ..
_ ولك نعل قنادر مكطعة شعندك تركض ورى البنية ؟ مو اطيح حظك والله اذا سمعت بيك متعرض الها عيب عليك حس خلي عندك غيرة وشرف شوية ..

ابتسمت بسخرية وتمتمت: هه غراب يكل لغرب وجهك اسود ..

باوعلي وكال : لا يا بوومة ..

درت وجهي سمعته يكول : مو عليك مو عليك خاب انته عار ترووح فدوة للبومة .. ولك لو تحبل ما اقنعها الك وحط بحضنك طابوك واثكل بلكي تنمرد ونخلص منك .

سكت شويه وعود يسمع شيحجي اوس شويه وصيح
فززني من مكاني كمت مخروعة وكعدت ..

_ ولك شتتزوجها هذاك اليوم طلكت انته ، ومرتك فلتت منك بروحها العزيزة ترى هاي مو نفس مرتك الاولى هاي تشبعك بوكسات وربك .. وكول ماكال شرار .

اني فشلة من الخرعة الاكلتها كعدت محتارة واعدل بشعري ..

ظل يتعارك ويا ويفشر عليه ، ويهدده
_ ولك والله بكتبه برسله بانبيائه بسماواته اذا ماجزت عنها ادفنك وانته عدل ..

كمل بغضب : ولك محظور هسه جان نكعتلك .

بعده ديحجي ويعاركه واني التفكير تغلب عليه وصفنت يا الله شكد غبية اني ، مالكيت غير شرار اجي اشكيله هو شرار هم اكبر زاحف !

دا اكوم اطلع اشرلي وهو يسد المكالمة : اكعدي خلي نفكر ونشوف حل .

كعدت تأفأفت وبضجر كلت : يعني شنو افهم من كلامك ماوصلت لحل ويا ؟ راح يبقى ملاحكني ترى اشتكي عليه والله .

ظل صافن هو واني بقيت كاعدة
ع القنفة واديه على ركبتي وكفوفي جوة حنكي واباوعله ، لابس سترة كاوبوي وجواهه بدي ابيض ، مدد ايده على طول القنفه ويباوعلي بنظرات مستفزة .

تنفست بعصبية ودرت وجهي منه وحجيت وهسه شراح نسوي ؟ اظل اني هيج والله تعبت والله ..

رد باستفزاز ؛- اممم اني اكلج شراح نسوي اذا انتي هيج خايفه اشوفلج واحد من اصدقائي نزوجج ونستر عليج

عطت ؛- شنووووو ؟ وكفت على حيلي معصبة باوع شرار مثل ما جبته عليه تخلصني منه افتهمت ..

كام متعصب دنجبي جبته عليج شنووو ؟ شكالولج عني ك***د ..

بلعثمة جاوبته واني اكتف اديه ؛- قصدي مثل مادخلته لحياتي طلعه منها وخلصني ..

_ باعي اني راح اساعدج ولو متستاهلين بس يالله ناس تضل دومها ناكره للجميل هاي نقطه ببحر من افضالي عليج ..

انتفضت بعصبية : افضالك شنو ليكون عبالك انت علي عذاب واني ما ادري بنفسي...لك كووول مشاكلك وياي مصايبك وياي بس مال افضالك لا هااااي ممقبوله منك اتقبل مشاكلك ولا افضالك...

_دكافي كافي هسه من افضالج المتراكمه عليه
اجه يمي سحبني ودفعني بخفة على القنفة وكعد يمي طلع موبايله ودخل على الأستوديو...
وطلع صور ولد وظل يدور بيهن
كال ؛ يالله هذا مشروع افضالي المتواضع عليج اختاريلج رجل...

رفعت حاجبي واتسعت نظراتي واباوعله بشراسة !!!

عينه على موبايله ويأشر عليه ويشوفني ؛- باعي هذا صح اشكر وكصير وملقبه تويتي واحتمال ما ينطيج حقج الشرعي بس يفيد اسمه رجل...

كمت بغضب ؛- شوووف لك شرررار اني اريد واحد نار وشرار مو فاهي وملقبه تويتي شلون حيحميني تويتي هذا بالله ..

حطيت ايدي على حلكي وانصدمت بنفسي ااا بس لا عباله عليه واني اريده ..

بقيت واكفة سحبني بقبضة ايده العنيفة على اثرها ارتميت ع القنفة ورجعت كعدت بصفه

كال...افااااا ترديين نار وشرار ، هسه عندي لج موبايلي موبايل لا بشرفج المصباح السحري

طلع صورة واحد اسمر سمين خشمه كبير اصلع من كدام .

‎...هذا حمش اخو اخيته ولو اخيته لسانها اطول من لسانج وهو ما عرف يكصه الها بس شكله مرعب
ولقبه مخيف...لان اني ملقبه ابو جمر ‎وان شاء الله انت تصيرين ام جمرة

انتفضت ما ما اريييد اتزووج ما اررريد كوه...

بعصبية ...وطبج مرض لتزوجتي ولضليتي قابل جاي ادفع مهرج. ضلي مصكعه لاوس هو اوووس وزايد عليج...

كمت متعصبة : أني صوجي اجيت اطلب وكفتك اصلا انت موكدها خاف اكولك انت ويا صنف لا والله خاف متفقين عليه ..
عفته وطلعت من يمه واني بالصالة دامشي اصعد فوك
شفت بلقيس ووحدة من التوأم يم الدرج يباوعلي بنظرات شك .

بلقيس سألتني بنبرة مستفزة : وينه شرار ؟
ارتبكت بلعت ريك ووخرت شعري خليته ورى اذني
هزيت راسي بتوتر وركض صعدت فوك ..

فرح .. صار كم يوم الحمام الفوك مابي مي حار مايوصله مدري ليش واني متعذبة انزل بالحمام الجوة اسبح واختار فرصة محد موجود يله لان استحي ممتعودة اطلع كدامهم سابحة .

طلعت من الحمام صارت كبالي سحر يم المغسلة واكفة صارت مقيمة هنا ويومية اسمع منها كلام يسم البدن ..
ومرات اسكت انتقلت الي عدوى علي الدر ومرات لا والله اتصب و اطيح حظها .

لفيت الروب عدل واباوعلها لابسه بدي ردن طويلة بس الزنود عليهم كصة وطالعات شكد تحب المشلتح واحنه هسه الجو بارد حييل ..

انتبهت على زندها اثر مال الضربة مالتي ، ابتسمت بانتصار ونشوة ، ابتسمت بمكر وخباثة ..
كالت ها اشو هنا تسبحين اليوم مبين مالحكتي تصعدين لغرفتج ؟

خزرتها وتقربت منها : شتقصدين ولج ؟

دارت ظهرها وباوعت لجهرتها بالمراية الي على المغسلة
_ مااقصد شي بس هو الجواب واضح من عنوانه .

_ حقيرة رخيصة عبالج الكل مثلج مو ؟ ترخص نفسها للزلم لا وهه لابسة مشلتح بعز الشتا والبرد دنتظري الصيف ع الاقل وسوي اغراءات .

تقربت مني : لا عيني اني جسمي حار ما اتحمل الملابس الشتوية ، متشوفين حمدان جان كله يمي وخاصة بالشته ؟ كوووله يسميني الصوبة تدفيني .

واردفت بنبرة اشبه بفحيح الافاعي
:- انتِ جنتي ملاحظة غيابه عنج بالليل لو جنتي مثل الاطرش بالزفة .

ضغطت ع اسناني بحدة وعصبية اتمنى اموتها بهاللحظة ، حمدان الي عايشة على فتات ذكرياته
وآلم خذلانه وقهره ، كل يومية اكتشف بي شي يخليني اقترب من درب الجنون لخطوات معدودة .

حاولت اصير طبيعية بس ماكدر ، حاولت اتنفس
احس انفاسي مسحوبة مني ، عضيت على شفايفي بحنق ، طلعت من يمها بسرعة مو لأن غرت عليه لا بس انقهرت على حالي وكرهت نفسي بنفس اللحظة .

اذا ظلت سحر هنانه اني افقد واتخبل والله ويمكن ارتكب جرائم والي زاد الطين بله طلعت من يم الحمام
وفتت بالممر الي يطلع ع الصالة ومنه للدرج دا اصعد
فوگ وسمعت ام الشيخ تحجي وياه ..

_ يمه لاتنسى الاثاث مال غرفة سحورة خطية يمه البنيه هواها كلبي احسن من ام لسان وبلكي الله يهديك وتاخذهه مرة الك والله رزنة وعاقلة وتسعدك وتدللك وتقدرك .

جاوبها : الله كريم حجية يصير خير خليها تظل هنا علا بيها احنه بيت شيوخ مانطرد احد ، بس حذريها لاتقترب من يم فرح مشاكل ماريد بهالبيت وصوت عالي ودوخة راس ..

جاوبته : هيه فرح مرعوصة بس واحد يسولهه طخ تكلب الدنيا وتظل ترعص مثل المرعوصة ..

يربي شسوتلهم سحر حتى هيج يحبوهه سحرتهم اكيد او هاي اللواكة تجيب نتيجة ..

قطعت كلامهم ودخلت بقلب محروك وروح مشتعلة ..
دنكت وحجيت لان من بعد ماتقدملي من صدك صرت استحي احط عيني بعينه واني اشوف نظرات رجل ذكي داهية متملك يحب السيطرة والتصلب برأيه وتمسكه بي .

بحدة وصرامة وحزم : شيخ انته لازم تختار وحدة من عدنه تبقى هنانه لو اني لو هيه والله ما اتحمل ابقى وياهه ببيت واحد كل شوية طالعة بوجهي تحجي حجي يسم البدن مصرة تخبلني .

الحجية كالت ولج مو عيب عليج تتصنتين علينا ؟

كتلها ما احتاج اتصنت اصلا صوتج جان عالي خالة واني فايتة سمعته ومدام موضوع يخصني لازم اتدخل واشارككم بالكلام اني ممتعودة احد ياخذ عني قرارات .

كالت معصبة : ولج هو انتي مخبلة محد محتاج يخبلج من يوم يومج مخبلة ليش تذبينها براس المسكينة .

الشيخ كال : مشاكل نسوان وقال وقيل لاتدخليني بيها حليها انت بنفسج وهيه حالها من حالج مثل ما انتي مرة حمدان هيه هم مرته انت ام ابنه هيه ام بته
حاولي تتقبلين الوضع وتعيشين بسلام احسن الماضي إنسي (( وركز على احرف هالكلمتين ))
وكمل : خلي ثقتج بنفسج عاليه ولا تهزج حجاية ولاتصيرين رچيچة مثل شجرها وعودها يابس.

حسيته يحجي بقسوة ونتر اكثر من السابق ، يمكن لان رفضته !!

.. كرهته عباله اقبل بي المغرور لووو اموت هسه .
والله على ساعة اتخبل واسويلهم سالفة وبعد مايهمني شي .

درت ظهري ومشيت صعدت فووك واني اقلد صوتها والله خوش مدللة تريد تجيبلها اثاث للخاتونه واني اكول لبلقيس كولي لواحد من الولد خلي يسويلي المي الحار بحمامي تكولي نزلي جوة اكو حمامات اثنين كبار هو الشته راح يخلص شيخلصه واحنه هسه بشهر
الثاني ٢٠١٤ ..

دخلت للغرفة شفت موج واكفة يم ميز التواليت
كالت شدعوة هلكد تأخرتي يله دنروح .

مشيت لنص الغرفة ورفعت الخاولي من على راسي
وبديت انشف بشعري : ترى انت الي جايه وكت وشعري طويل يتعبني بالغسل جاي ع بالي اكصه واخلص منه .

كعدت على السرير صافنة باوعتلها بتفحص
_ صلوات موج ام الكركة واللوكللووك ساكتة لاول مرة بالتأريخ شنو الي مسكتج شنو الي مصفنج ؟

ابتسمت بسخرية : ماتكولين لروحج من جيتي لهسه وانتي رجفين .

درتلها ضهري واني الف شعري على طوله
_ غير توة طالعة من الحمام والجو بارد ..

_ اصلا بيتكم دافيء ماشاءالله وبالعكس الي يسبح يدفى بس انت حتى عيونج مغوركة وكأنو متعاركة وجاية .

التفتت عليها ، ثبتت جسمي ع الميز
جريتها تنهيدة وحجيت بنبرة سريعة
_ علي الدر خطبني!

شهكت واجت يمي : عزاا بعينج وتعاركتي ويا لان خطبج وجيتي يمصخمة ولج عيب .

بنبرة استنكار : ولللج لاااء مو هسه قبل كم يوم .

_ اي يعني خطبج شكالج ..

_ لاء عرض عليه الزواج ..

_ وشنو الفرق ؟

_ ما ادري مادري مووج بس دخت ..

_ شكتيله ؟؟؟

_ ماكلت شي

_ وانت شنو ابالج ..

_ هه اني حمدان فرق تسع سنوات ماتوفقت ويا انوب رجال مثل علي اكبر مني بأربعة وعشرين سنة ، اولاده اكبر مني ، صارم وقوي احس بيننا فجوى كبيرة وحتصير مشاكل اكثر وتتعبني اكثر ويمكن تجيب اخرتي لو اخرته ههه وحدة من الاثنين .

زائد بعد شغلة ما اظن انو طلبني للزواج لغير انو يريد يسيطر عليه بطريقته ويتملكني .

بتوتر ولعثمة : خ خاف حابج عجبتي او أنت ششوفين بعيونه فرح دتشوفين الحب ؟

_ ماكو غير نظرات رجل مغرور متسلط متملك متعجرف يتعامل وياي وكأنو يملكني او يعتبرني شي من املاكه الخاصة اله السلطة والحرية للتحكم بي .

صفنت موج سألتها بباتسامة : ها ست موج شنو رأيج بهاي الخطوبة وشنو رأيج بعلي الدر .

ردت بجدية : شوفي هو من جهة العمر والشخصية فجوة كلش كبيرة ، بس هو رجال قوي ومسيطر زواجج منه حيخليج تكسبين مركز وقوة وحماية ، الكل حيحترمج ويحسبلج الف حساب وهو حياخذ حقج بدل ما انتي تدافعين وتهومشين وتبسطين هذا وذاك .

_ هه وهسه ليش مياخذلي حقي ويكون عادل ومنصف .

_ لا أنتي مضيعة حقج ان جان قبل بلسانج هالايام بيدج ولسانج أكيد لم تصيرين مرته محد تكدر بعد تفتح حلكها وياج وانتي مرة الشيخ .

_ بالعكس اذا قبلت بي معناهه حفرت قبري بيدي واني الممنونة لرووحي .

لج موج هاي سحر مخليه عينها عليه وختام هماتين مبينه غركانة بحبه والله يعلم منو بعد .

لج هايه ختام ثلاثينيه جادة هههه اقصد صاكة محامية والكل يتمناهه اكيد اذا شتلها الشيخ واخذني حتصير هالمرة بالسحورة .

موج اني يله اريد اطلع منا واخلص من هذا البيت ولو يرجع بيه الزمن مستحيل اتزوج حمدان واورط نفسي ويه واحد ضعيف شخصية هالشي اكتشفته متأخر للاسف بعد ما اكتشف مرضي ورى الزواج تظاهر بالشفقة عليه وهو متزوج متعة ومونس نفسه ولا منو حبيبته القديمة ماخذ حصته مال الورث من علي الدر ومسجللها بيت باسمها وهماتين اخذ مؤخري ومخلي الها بالبنك وهذا كله واني مادري .

لج خذلانه وخيانته تدك بعظمي والله زين ومني بعدني محافظة على سلامة عقلي لحد هاي اللحظة محد يدري شدا يصير بيه لان اني انعدمت انتهيت والله ولو ما دانيال اني متماسكة على موده وبس اضمد روحي المخدوشة بي .

_ عوفج من حمدان هسه ماضي صار وراح واخذ جزاءه فكري بمستقبلج ، الشيخ يمكن يريد يحميج من اخوه حسان وهذا حسب كلام مهيب وحتى زواجه منج هم لحمايتج منه .

_ لج حتى لو كاتله ابوه حسان هم جان خلص انتقامه هسه ، وبعدين هو حسان گالي خلص انتقامي وياج سويتها وحدة بوحدة وبعد مالي علاقة بيج ونرجس رجعت علاقتهم سوى واني مالي دخل بيهم بعد .

_ بس الي اعرفه حسان ماكر مثل الثعلب وعلى ساعة يغدرج ومحد يعرف حسان بكد علي الدر هو اخوه ويعرف كل سوالفه .

_ ولج شمدريني المهم علي الدر لو يتزوجني مااتزوووجه هههه ..

_ هاي شون صايرة بعد ؟

_ انتي فسريها يعني ماريده خير شر من غير شي هو ضم عني كل تفاصيل قتل حمدان واني متأكدة هو يعرف منو قتله وساكت .اني اريد اطلع منانه واجي يمكم اعيش حياتي هنا تعبت والله كلهم يكرهوني .

_ ياعمري ديالله هسه اخذج نشمر داني على انو واخذج للجم تونسي والله البنات حبوج هواي .

هزيت راسي موافقة وهي راحت يم سرير داني بين ما نشفت شعري ومشطته واحنه دنحجي رحت للحمام
جففته بالمجفف مال الشعر هيه اجت وراي
كالت هذا ابنج ماتكعدي نايم ونطلعه دافي خاف يتمرض .

طفيت المجفف : يمعودة عوفي بس تكعدي وهو مشبعان نوم يتعكر مزاجه ويظل يبجي وبعد مايسكت
عود نلفه ببطانية من نطلع .

مهيب ...

جنت لازم دانيال واجت ريلام تريد تاخذه ، باوعت لوجهه ، نظراتها مختلفة ، ابتسامتها تشع مثل شروق الشمس ، ياربي ما اتحمل انطيتها ظهري وبقيت واكف يم غرفة فرح .

اجت صارت كدامي سلمت عليه : ها مهيب شلونك شوكت جيت هم راح ترجع لو باقي هنا علمود عرس لهيب ؟

باوعتلها مخوزر ياربي ابتسامتها تسلب لب عقلي ...
ماكدرت مابتسم الها وكرهت ضعفي ..
سألتها : شتردين ؟ جايه على مصلحة مو ؟ احجي شنو تردين ؟

ضحكت بصوت عالي وكملت كلام : لا والله بس مشتاقتلك اني اسفة لان ضوجتك بالكلام لا والله لاتتوقع هيج بس مشتاقة للحجي وياك وانته هالايام رافع خشمك .

رفعت تك حاجب وسألتها : زين ريلام سين جيم ..

رجعت ضحكت : سين جيم شنو هاي هناك عدكم بالتحقيق بالجنايات مو هنانه بالبيت متوهم .

_ المهم انت حمارة لو حمارة جاوبي على وحدة منهن ؟

_ ههههه ولا وحدة ليش هالسؤال .

_ لا انتي حمارة يعني ماتمشين اله باللبس من لبستج صرتي ادمية عود ؟ امشي ولي من كدامي يله .

بعدها تضحك لا والله مهيب مو هيج بس ميصير تارك البيت بسببي والكل محتاجك .

منو كال تاركة بسببج بلله ؟؟

لعد ليش ماترجع ؟

بكيفي شوكت ميعجبني ارجع اطلع بس تعاي سؤال انتي مو اخر مرة كتيلي بعد ماريد احجي وياك واكرهك ؟ شنو الي تغير هسه ؟ وبوقتها كتلج تقبليني ابن خال مو اخ شصار على هالموضوع ؟

غمضت عيونها ودنكت وبعد ثواني صمت رفعت
راسي واجت عيني بعينها ..
_ مهيب انته الكلام وياك ضايع انطيني دانيال خلي اروح .

اخذته ودتروح ، لزمتها من ايدها حيل ورجعتها عليه
قلصت ملامحها بوجع ، عرفت اني اذيتها ، رققت من قبضتي على ساعدها جان هواي اكو حجي بعيونها وبگلبي ..

كتلها اذا كدرتي تنطشين كلام امج وحبوبتي وتعتبريني موواخو وانما ابن خالج بعيدا عن مشاعري الي صارحتج بيها كوليلي بدون لف ودوران ماشي؟

فلتت ايدي حسيتها خايفة همست : اعذرني مهيب ما اكدر .
كلامها اخترق قلبي بسهام مسمومة وحسيت بوجع ماينطاق ، شوكت اكدر اتخلص من هالحب ، اتمنى انتزع قيوده واغلاله من قلبي واعيش حياة طبيعية بس مدا اكدر .

هدى ..

بالليل هو نام ع القنفة واني نمت على السرير
نزع ملابسه وظل بفانيلا كيمونه وراحت عيوني
تتأمل جسمه الرياضي بشرته البرونزية .

سرحت فكرت بكلامه نصير اصدقاء هه ماتوقعته هيج توقعت اليوم راح تصير معارك واحنه بغرفة وحدة .

حجيت بقلبي الله يهدي ويتقبلني هالمغرور الغاضب اللعين القاسي .

يوم ثاني حسيت اصابع ايده الخشنة مغروسة بايدي كعدت مخروعة اباوع وين اني ؟ توه تذكرت اني عروس هه ضحكت على نفسي بداخلي .

باوعتله منعس بس مغسل وجهه والخاولي على عنقه
كال بنبرة ناعسة : يلا كومي نتريك حتى نطلع نروح للبيت راح يجون علينه .

حسيته حزين وضايج اكيد بعده ميكدر يتقبلني هو هم انغصب عليه واني انفرضت عليه . حقه كمت من السرير وهو راح بدل ملابسه وطلع من الغرفة .

غيرت ملابسي ورتبت نفسي وجمعت اغراضي
وهو اجه جايب الريوك خلاه على الطاولة
وكعدنه ناكل بس ساكتين .

ترددت هواي اسأله احجي وياه زين ليش تغير من البارحة لليوم ؟ معقولة جان مقهور عليه لان جنت ابجي ؟ يعني لحظة شفقة وبس وهسه لمن سكتت كل شي انتهى ؟ زين ارجع ابجي مرة ثانية ؟

اووو اعوفه يولي مبين طكة ونص واني مستعدة للحرب شيريد يسوي خلي يسوي .

طلعنا من الفندق جانت الارض مبللة مال مطر البارحة
هو يمشي خطوات عملاقة واني وراه امشي وبردانة
وكلساع التفت عليه يأشرلي يله ..

اجه يمي يله بسرعة شبيج تمشين على كيف ؟

همست من بين رجفاتي : بباردة شوكت نوصل للسيارة ؟

_ هو هذا هم حاسبته برد الله ليشوفج برد روسيا اي والله الله ليشوفج بردهم والله مشتاقة له .

باوعتله بحزن وتمنيت ماينتبه ولا يحس بحزني
سألته : وشوكت ناوي ترجع لهناك ؟

جاوب بنبرة سريعة ؛ بس يرجع ابوي المستمسكات ارجع .

سألته بغصة : ليش اخذهن منك ؟

باوعلي بشفقة ودار وجهه وكال بحدة يله امشي .

وصلنه لبيتهم تلكونه كلهم وباركولي ورحنه كعدنه يم الحجية بغرفتها جانت وحدها .
سمعتها همست اله ها يمه شصار من ليلة عرسك اخذت مرتك لو لا وينه نيشانها .

متت من الخجل تمنيت اختفي واتبخر ..

كاللها بصوت مصرور : حجية شنو هالعادات هاي ترى ميصير تسألين هيج سؤال .

كصرته بفخذه : عوايدنه وتقاليدنا وماتغيرها لو مو رحت لمدري وين هاي الجنت بيها لو رحت للمريخ هم تبقى مثلها وهسه كلي يله وين نيشان البنية .

كاللها بملل : ما صار بيننا شي .

_ ليش ولك كوم يله ارتاح وورى الغدة اخذهه عيب من اهلها شنكللهم ابنه مابي خير لو شنو .

جاوبها باقناع : حجية البنية بعدها صغيرة مايصير اغتصبها .

بعصبية ردت : ولك هاي مرتك تغتصبها شنو بعد .

_ حتى لو مرتي عمرها صغير مو زين عليها تتأذى خلي تكبر يله اني ثقافتي غربية وهذا عند الغرب يعتبر اغتصاب اذا تقربت للبنية بهيج عمر .

ظلت بيبيته تعلي صوتها وتحجي عليه واني كلش خجلانة وضايجة ..

كاللها بعد بعد علي صوتج افضحينا حجية عيب الله يخليج خلينا على راحتنه ..

كالت ولك والله اذا ماتممت زواجك ما اخلي ابوك ينطيك جواز السفر لو تموت .

كال اووو شون سالفة هاي وطلع من الغرفة ..

بقيت متصنمة بمكاني معناهه قبل و تزوجني بس لحتى ابوه ينطيه المستمسكات ويرجع يسافر
شون حظ عليه يربي شكد اكرهه اكررررهه .

دخلت بنت خالة كالت تردين تصعدين لغرفتج ؟

هزيت راسي بمعنى أي ..

الحجية كالت لا خليها هيومه اريد احجي وياهه
تعاي يمي

رحت يمها .. وهيام كعدت يمنه ..
كالت شوفي بنيتي عندج مرة حمدان الله يرحمه هاي مخبلة ديري بالج منها خوش ؟

تفاجئت ماعرفها مشايفتها ..

هيام كالت لا هي شافتج من جيتي بالخطوبة وبصراحة عيبت عليج وكالت اووع هاي شكد مبهذلة شكد بيئة هذا لهيب شون قبل بيها ..

اني متت من القهر هاي ليش تحجي هيجي عليه شكد متعجرفة عبالها هيه مخبلة اني اخبل منها ..

الحجية خزرت هيام وسكتتها .. وخلت بيدي فلوس وكالت صعدي يم رجلج لغرفتكم وخلصوا شغلتكم اليوم خاف يجون اهلج يسألون .

هزيت راسي بس اني مو بيدي هالشي اذا هو ممتقبلني
تبعت هيام بذهن شارد ومقهورة ، صعدت شفته متمدد على السرير وصافن بموبايله ، معقولة عنده حبيبه بروسيا ؟ وهيج يريد يلحك يروحلها .

انقهرت حيل حتى ما انتبهت للغرفة وتفاصيلها .
رحت وكفت يم راسه وبمرارة سألته : انت تزوجتني حتى بس ابوك يرجعلك مستمسكاتك ؟

عدل كعدته و شمر التليفون على السرير وكع على الحافة : ولج هو ابوج انطانه فرصة اشو..
كال هيج وسكت يمكن مايريد يقهرني ..

ررن موبايله اخذه وفتح خط وحجه
_ ها مهيييب ؟ لك والله لعبتوا نفسي خطار وخطار هسه جاي نازل جااي ..

طلع من الغرفة وتركني وحدي كعدت ابجي
.....

موج ...

صاحني سلام الولد الي اشتغل عنده بالجم ..
كال موج البنات زاد عددهن والقاعة مساحتها صغيرة اني حصلت قاعة مساحتها ممتازة وان شاءالله اشتري اجهزة رياضية جديدة بس محتاجين كم فلس ..

هزيت راسي : ووين القاعة الجديدة صايرة ؟ هم هنا ؟

_ لالا مو هنانه بس قريبة مو بعيدة ..

كيفت وفرحت اي والله واخلص من اوس الحقير ومطعمه ومطاردته الي بلكي بعد مايلحكني للقاعة الجديدة .

سلام كال بس اكو رجال كال يداينه كم فلس للايجار وللاجهزة الجديدة الي راح نشتريها لان القاعة الجديدة ايجارها اغلى شويه .

اي ميخالف استاذ سلام يعني هذا الرجال انته تعرفه ؟ ثقة ؟

اي اي اعرفه عز المعرفة وثقة بس محتاجج وياي يعني نروحله اني وياج هو هم حجيتله عنج حتى هم يطمأن ونرجعله فلوسه بوقتها ان شاءالله .

وافقت على عرض سلام واتفقنا نروح بعد كم يوم للرجال الي راح ينطينه فلوس عمود القاعة الجديدة .

...

فرح ...

رجعت للبيت ورى عرس لهيب باسبوع ، بس العروس الجديدة مادري شبيها ، اني مااحتكيت بيها ابد بس باركتلها وانطيتها هدية زواجها شفت وجهه ثكيل عليه ..

وحجت من ورى خشمها : ليش كلفتي نفسج ميحتاج وظلت تخوزر بيه عبالك ناقصة اني . رجعت لغرفتي .

ظليت اشوفها دائما ويه هيام وريلام ذابه ميانه
حتى ريلام مو هلكد تجي يمي ومتونسة وياها
يمكن لان عمرها قريب لعمرهم .

غلست منها وماكول مااهتميت صح اهتميت وضجت حيل ، بس شسوي هذا حظي اني متعودة على طيحان الحظ .

نزلت جوه وداروح للمطبخ ، شفتها كاعدة بالصالة
وتعصر رجل الحجية وتسولف وياهه وتضحك .

باوعتلها خزرتني همينه اني عوجت حلكي
وتمتمت بداخلي عشتو خوش تتلوك وتسوي
لروحها مكان ، اني والله ولا اعرف اتلوك لاحد .

طبيت للمطبخ ، اخلصلي كم شغلة
اغسل الممات افورهم بمي حار واسوي اكل واصعد فوك ، دااطلع من المطبخ وبيدي مميات دانيال
هي هم داتفوت جان تطخني بكتفي حيل عبالك
حاقدة عليه مدري شبيهه .

وكعت الممة من ايدي وهي فاتت
ولا كأنه مسويه شي
التفتت عليها وبعد احس ابد ما اتحمل .
كتلها شبيج ولج ؟ شنو مشكلتج وياي ؟

التفتت عليه بصلافة : عفوا هاي عليه ويايه تحجينن .

تخصرت كتلها بعصبية : لا ويه امي ..

هي ضحكت : عبالي عليه ..

تقربت عليها معصبة : شوووفي ولج لاتندكين بيه ترى اني من اعصب ابووووويه مااعرفه .

هي كالت ابوج ماتعرفينه على نفسج شعليه بيج اني .

سمعت صوت ضربه ع الباب مالة المطبخ انداريت شفت لهيب

كال شنووو هالصووت العالي شبيجن تصيححن تافهات طيح الله حظجن .

صررخت بصوت عالي : لهييييب احترم نفسك على منو هالكلااام .

كال : سوووري فرح بس انتن تطلعن الواحد من طوره شبيجن تتعاركن وصوتجن شعلوة وزلم طابه طالعة للبيت شيكولون علينه .

صيحت : شسويلهن اذا مسويات حزب عليه عبالك كاتلة امهن وماخذة حلال ابوهن .
دنكت واخذت الممة من الكاع وشمرتها بالسنك .

وهدى كالت هو منو الي مسوي عليج حزب اشوو انت مدري شلوونج .

سكتها لهيب بعصبية : انتي اخت ابليس ولااا حجاية افتهمتي لو لا لاتخليني اجي ادفنج بأرضج هسه كوووة متحمل وجودج كوووة لاتخلين اطلع ضيم الله كله بيج .

هي جاوبته بنتر وعليمن تتحملني ؟ خو ذيج المحكمة وروح طلكني .

طب اخذها من ايدها معصب وطار بيها فوك ..

باوعت لهيام الحية جانت دتضحك ، رفعتها تك حاجبي وخزرتها ، دخت راسي لزمته وامشي وادعي الله ما اوكع لان من صدك دااتعب .

طلعت من الصالة شفت الحجية انهدت بيه
ولج انوب حطيتي عقلج ويه هاي الطفلة الجاهلة
شجاج ماتكليلي ناويه تخبلينه كلنه وياج ؟

بالله هسه هاي شجاوبها حقها ماتدري ولا تعرف شصار
وجاي تكرك على راسي والله ماراح اتحمل بعد
شكول عليك العرندس علي الدر من حبستني هنانه هسه اني شسوي باقية هنا ياربي بس للمغثة والمشاكل .

صعدت للغرفة ... صعدتلي ريلام فتحت الباب
هاا فرووحة شبيج ليش عصبتي ترى والله هدى حبابة .

جاوبتها بعصبية : اي هدى حبابة وسحر ملاك منزل من السماء ماكو غيري اني المخبلة الوحيدة بهالبيت والي موو ادمية واسويلكم المصايب .

ظلت تضحك بصوت عالي : والله عليج سوالف فرح ..

كتلها طلعي برى خليني بحالي انتي همين صارلج كم يوم ولا تقلدين الي من صارت عركة وياهه جيتي تدافعين الها انت ينطبق عليج المثل من لكى احبابه نسى اصحابه .

لا والله مو هيج فرح بس صدك هدى حبابة بس يمكن ممتقصدة تسوي وياج هيج .

اي واني هم مكايلة شي اني مخبلة وحقيرة ومأذيتكم روحي كولي لخالج خلي يطلعني منا وارتاحوا مني .

عزااا فرح شكتلج هسه اني ..

امشي طلعي بره ريلام امشي ولا احد يجي يمي مفهوووم ؟

طلعتها برة من الغرفة وسديت الباب وكعدت ابجي والله اني ابد ماعندي حظ شهالعيشة شهالحياة ليش هيج ياربي معقولة اني هيج ما انحمل لعد اهلي شون جانوا حامليني ليش الكل مايريدني هنااا ليش !

بقيت بالغرفة يوم ونص ماطلعت وحتى اكل كتلني الجوع يله اكلت بسكت من مالة دانيال ..

بس تندمت لان تهجمت على ريلام اني اعرفها هيه طيبة وحبابة ، كعدت ابجي بقهررر ، خابرتني موج وحجيتلها ..

كالت .. خاف هيام منطيتها خبطة من خبطاتها المسمومة وهيج وياج ممعقولة بدون سبب!

كتلها مادري ومالي خلك شي هسه موج عود خابريني غيرة مرة تعبانة .

حبيبتي خلي اجيج اشوفج وهم اشوف البنية واسلم عليها .

اي روحي انت هم ضدي كللكم ضدي بس اني نذلة واستاهل لي يصير بيه .. سديته بوجه موج وحتى من اجت للبيت هماتين ماطلعت الها شكد دكت الباب ماطلعت احس كلش تخبلت كللش ..

ورى تلث ايام نزلت جوة الصبح ساعة ب بثمانية .. شفت بلقيس والحجية وشرار بالصالة ..

شرار يكللهم القطعة الي اشتريناهه بالمقبرة طلعت تجاوز خاف تجي البلدية وتجرف القبور ويروح وياهه قبر حمدان وينمحي شاهد قبره .

الحجية كالت عزاا حتى الموتى مافكوا روحهم شسالفة

شرار : اي شنسوي خابرت علي الدر وكال هو راح يجي العصر من اربيل وباجر من الصبح نروح نطلعه وندفنه بغير مكان .

بلقيس بصدمة ؛ عزااا شرار صدك تحجي ؟ شون تطلعونه من قبره خطية ؟

شنسوي بعد خو مانخليهم يهدمون القبر ويسوونه شارع ننقله احسن والدفان نرفع عليه دعوة قضائية لان انطانه قطعة بالتجاوز .

بلقيس : بس هيج حرام والله حرراام ..

جاوبها : لا مو حرام احنه سألنه يصير نطلعه كالوا اي يصير مدام الارض تجاوز واصلا صديقي قبل فترة هم نقلوا القبر مالته من رادوا يكصون شارع بالمقبرة هم نقلوا جثته وسبحان الله طلعوا كل شي مابي وجسمه ترف حسب مايكول اخوه .

_ سبحان الله هذا شوف شنو مسوي من اعمال صالحة والله هيج نطاه كرامة ..

_ الله اعلم .. يله كومن مو تردن اوديجن تزورن فضوها كبل لايجن البنات من المدرسة ..

_ احنه مخلصين ننتظرك تكعد وتودينه ..

_ سحر مدري شسمها خو مو وياكم ترا مارتاح الها ..

_ لالا اجت امها وراحت يمها صارلها ليلتين ماجايه .

_ اي انتبهت البيت مريييح هه ..

خليتهم راحوا واني رتبت البيت ونظفته صرت نادره عشتو ، العروسة هدى بغرفتها مانزلت ، قررت بس تنزل اصعد بغرفتي واقفل الباب اتجنبها .

للساعة ثمانية ونص صعدت لغرفتي حبيبي دانيال نايم
انفتحت الباب وطبت سحر وامها شهكت من الخوف ..

قفلن الباب ودخلن لزمني ودك كتل وين اليوجعني انتقمت مني اريد اصرخ ماكدر امها كتمت نفسي وهي شلعت شعري .

حسيت راح اموت جوة اديهن ودانيال يبجي
والبيت فارغ علي مسافر البنات بالمدرسة ..

من طلعن اجتني نوبة صرع كعدت شفت هدى واكفة يمي تبجي وتسكت بدانيال ومصدومة ..

وعيت على حالي وعلى الي صار بيه كله من علي كله منه كتله ماابقى هنا مااابقى بس هو اصر ليش هيج يصير بيه يربي ليش ..

رحت ركضت لغرفة ريلام اخذت تليفونها طلعت رقم علي وخابرته ماعندي رقمه بتليفوني .

اجاني صووته : ها بويه احجي ؟

صرخت بوجهه اني فرررح والله انت مسؤؤل عن كل الي يصير بيه انته حتدمرني بس اني راح انتقم منكم كلكم وتحلمون تلكووني بعد .

سديت التليفوني ورحت لغرفتي شفت هدى لازمة دانيال وتباوعلي مرعوبة وعيونها حمرة

اخذت تليفوني واتصلت على احمد اخويه وطلعت من الغرفة حتى لا تسمعني هدى شراح اكول .

خابرت احمد اجاني صوته الو ها فرح
كتله تعال عليه وديني للنجف دنطلع حمدان من القبر مالته ..... !

يتبع ..

القفلة صارت سريعة شويه واكو احداث قبلها
تخص موج هدى فرح .. بالبارت الجاي اسويها
فلاش باك ..

الحدث هذا حقيقي مال المقبرة ومو اضافة مني
تحياتي الكم ❤😘

البارت اهداء للمتفاعلات بكروب الفيس والكم كلكم حبايبي

ZH__16

AbrarAli2000

هاي الصورة نشرتها مهاوي بكروب الفيس 😂حبيت اشاركها وياكم ..

واشكركم على كل مشاركاتكم خواطركم الحلوة والاغلفة الجميلة 😍😘

اذا ممكن متابعة لحسابات الكاتبات Sab_oo_sh

EnasIbrahem2

الكاتبة Zahra036 عدها كتاب لدعم المواهب الجديدة اتمنى تتابعوه 💚