رواية هذيانٌ بين جمرٍ وجليد ..(ارملة اخي المجنونة) الفصل الثامن وثلاثون 38 - بقلم نورا ناصر

رواية هذيان بين جمر وجليد
الفصل ٣٢
نورا ناصر

*************

الحب المزيف كالطيور المهاجرة ، كلما ساء الجو اعلنت الرحيل ، فمن يريدك في حياته لن يتركك ولو توفرت اسباب الرحيل ، لايوجد حب اول بل يوجد حب قوي ، يمحوا كل من كان قبله ، بل هو صدق واهتمام واكتفاء بشخص يغنيك عن الجميع ، الحب الحقيقي هو ان تزرع في طريق من تحب وردة حمراء ، وتزرع في خيالهم حكاية جميلة ، وتزرع في قلوبهم نبضات صادقة ، ثم لا تنتظر المقابل ....

**************

باوعت للكاع وباوعتله هو انتبه مثل المفزوع ع الصوت الي سوا ضجة .. فاتح عيونه ونظراته تنبئ بالخطر .

خليت اديه على خدودي وتصنعت الصدمة وكلت
يااااا خطية انكسر العطر مع الاسف ماعندك حظ ويا الهدايا .

ظليت اباوعله وادور وجهي واعض على شفتي واكتم ضحكي
سمعته كال فدوة الج يل....بلوووووووة .
ويشدد على أحرف الكلمة ..

درت عليه ، ابتسمت وصاكة سنوني اريد احرك رجلي
عاط ووولج جواج كزاز لايدخل برجلج ظلي بمكانج ظلي .

خليت اديه على قلبي عبالي راح يرزلني
وكفت بمكاني واباوعله بس رجليه تضرب ببعضها أسوي بلاوي وأرد اخاف منها وهم ما أتوب ..

كال شيلي رجليج خليهن ع الكنتور الكزاز جواج راح يفوت برجلج .

شلت رجليه بطاعة وأني أباوعله ، صعدت ببطن الكنتور
وهو دنك ع الكاع يشيل بالكزاز ويخليهم بيده الثانية .

خلص شاله كله وكال تعاي اشيلج اخليج ع سرير ومناك عبري جيبي شي ونظفي بي الكزاز الناعم .

كتله ليش تشيلني اني اعبر

كال لا .. لا جواج كله كزاز ناعم

جاوبت : يعني اذا انت تجي يمي هم راح يفوت برجلك الكزاز

كال : لا انه اعرف وين اخلي رجلي انت ماتعرفين تجين وتدوسين بلا ما تنتبهين واخاف عليج بويه يتأذن بطالة الحليب .

بضحكة سألته : شنو همه بطالة الحليب ؟

ابتسم وهو يشد اديه على جسمي
كال رجليج .

ضحكت خليت اديه على صدره كتله بدلع
لاتزعل كسرت العطر مالتك ترة والله مو قصدي واني راح اوصيلك على عطر احلى منه وعلى ذوقي .

رد وهو يخلي اصبعه على شفايفي ويباوع عليه بتفحص وذوبان ..
_ لاتحلفين جذب مايجوز وشي ثاني ترة العطر فراك
وانت كسرتيه ..

وخرت منه ونزلت معصبة
كلت بقلبي شيقصد شييقصد يعني ميتفاركون هو وختام .

فتحت الباب وطلعت برة معصبة ، رحت جبت مكنسة ومكرافة ، اول مادخلت هو يم الباب جان
اخذهم مني ..

كال جان لبستيلج شي برجليج لا تتعورين .
مديت ايدي اريد اسحبهم منه
كتله بعصبية خل اتعور يطبني طووب أستاهل.

شمرهن ع الكاع و لزمني من اكتافي ودارني عليه
كال شبييج بعد شبيج العلاكة وعرفتي شنوو بيها
العطر وكسرتيه شنو تردين بعد شنو الي يرضيج ؟

فلتت منه واني امسح على طبع اديه الوجعني
واني احجي بقهر وعصبية : ماريد شي بس شنو المناسبة تجيبلك عطر ختام خاتون هاا شنو المناسبة؟

سحبني من ايدي ورجعني يمه لان جنت راح اوصل يم المكان الي انكسر بي العطر وبعده مليان كزاز ناعم مينشاف .

كال اهدي شوي .. مو اجت من السفر وكالت جايبتلك هدية بس تنسى تننطيناهه وبذاك اليوم المصخم انطتهه الي جبتها وشمرتها بالكنتور شفتيني مستخدمها ؟ شفتي مهتم بيها ؟ بعد ليش خابصة روحج ؟

رديت بقهر ونتر : وليش ماكتلي ليييش تضم عليه ؟

لزمني من خدودي اصابعه على اذاناتي وابهامه جوه عيوني ، يباوع لي ويحجي ...
_ انتِ يمته تبطلين هاي اللهجة ماتعرفين تحجين عدل ابد!!! شجاج بويه شجاج مو جاهلة انتي تعلمي شون تحجي مو كله نتر.

رديت وأني ابتعد منه : اي جاهلة جاهلة يله طلكني وتزووجها ..

عصب حيل عصر ايدي : ولج انه لو اريد اتزوجها ماجان تزوجتها من زمان!!!

بس انتي ماتشغلين عقلج ولا تفكرين كبل تتهجمين بس تردين تخلقين شيء من لا شيء وانه مطول خلك وياج واشوف تاليها شلون راح تصفى.

طلع بره وسد الباب حيل ، لطمت على رجليه
واني ادردم انوب راح زعل كله منج ختام
ختموا على عمرج ان شاءالله .

اندكت الباب فتحتها شفتها ريلام بيدها دانيال نايم
اخذته منها وخليته بجربايته ، رحت دانظف الكزاز
امشي بلا ماانتبه ودخلت برجلي كزازة .

عضيت شفتي حسيت تألمت ، اله يعوفني ويروح اله يعوفني كله منه فاتت برجلي الكزازة كله منه بس يعاركني ، عباله لعابة اني ويريدني مثل ميعجبه .

كعدت ع السرير متألمة ، تليفوني يمه جريته ودزيتله مسج كتبتله ارتاحيت هسه ضربتني كزازة شورت بيه عصبتك ارتاح هسه .

ظليت كاعدة ع السرير بس رجليه مانازلات بالكاع باقيات معلكات واهز بيهن ومكتفة اديه ، ومعصبة
مرات اتندم ع تسرعي بس شسوي وارجع وهم اتسرع .

ورة دقايق انفتحت الباب ودخل هو ، باوعتله
ودرت وجهي واسمعه يتحسر .

كعد بالكاع كبالي
ولزم رجلي بيده وكال لا تحوسين خل اشوف الكزازة طلعتيها لوبعدج ؟

بعدت شعري بغرور جاوبت بدلع : ها لا ماطلعتها اخاف .

هز راسه ورفع كعب رجلي ووبقى لازمها بايده الدافية .
لحظات .

كال يله صغيرة كلش وبس وحدة ، لبسيلج شي يله تنظفينه وانتبهي زين ونظفي عدل خاف يتأذى جاسم خطية طفل ماينتبه.

كمت توجهت للزاوية طلعت الشبشب لبسته
وهو يريد يطلع كتله وين رايح
كال بثكل عندي شغل بالمكتب نظفي ونامي وهم انتبهي على ايدج تمام .

خلاني وطلع ، يوووه بعده مطنكر وزعلان شوون يربي يمكن الليلة يبات بالمكتب .

اله تجفصين فرح اله تجفصين هسه العطر وانكسر شتردين بعد شتردين .

مااجاني نوم رحت طلعت الكتب وظليت اكلب بيهم
وافتش بالاورق ، واحد منهم شفت مكتوب عليه
خاطرة ..

" كل خلافتنا تنذر أننا على شفاة حفرة من الفراق
فلماذا لا نفترق قبل السقوط في الحفرة؟
فحكايةٌ رائعةٌ كحكايتنا لا تليق بها (الحفرة)
كنهاية"

ويم الخاطرة مكتوب ختام!!! انصدمت ...
ورجعت معصبة وضايجة واحس عيوني
راح تطلع من مكانهم وايدي ظلت تنكت وحدها ...

شون ياربي شلووون ارووح اتعارك وياا ارووح!!!

ظليت رايحة راجعة بالغرفة اعيد خطواتي
ومااهتميت لمكان الكزازة الي برجلي واني ادوس ع الكاع .

نزلت جوة ركض للمكتب مالته ، مديت ايدي للقبضة
مالة الباب داا افتحها مقفولة متنفتح ، دكيت الباب ماكو إجابة ولا كام ولا فتحه إلي !!

معقولة طلع ؟ تذكرت حمدان لمن جان يطلع بالليل والظاهر جان يروح لسحر ، تخبلت تخبلت....

اصعد بكرامتي احسن ، صعدت للغرفة بسرعة
ودخلت بالفراش بس اريد انام مايجيني نوم
وبس افكر بالخاطرة.

وكلساع افتح الضوه واقراها واركز بكلماتها
معقولة جان يحبها وصار بينهم خلاف وتركوا بعض!
وتزوووووجني!!!!

موج ...

جانت بوسة عنيفة بأولها بعدها بده يرقق بيها ، واني اقاومه ..

احاول ابعده عني بكل قوة ، بس هو اقوى مني وأحسه حيل متلهف ومتعطش .

ابتعد عن شفايفي واحتركت بجمر انفاسه .

لزمني من راسي ويلهث ومخلي خشمه على خشمي وكصته على كصتي .

همس بأنفاس مسحوبة : من أول ماشفتج وأني عيني على شفايفج ماشفت مثلهن مامصدك صرتي حلالي
وكدرت اخذ حصتي منهم .

دفعته من صدره واني اتنهد وامسح على شفايفي
وحجيت بأنفاس مخطوفة : عزا بعينك متستحي انت هو مو زواج لستر الفضائح لو شنو ؟ لاتروح زايد احذرك ها تره .

ابتعدت من يمه اريد افتح الباب واطلع ، هو لزم ايدي ووخرها من الباب ، قبضته عنيفة وجع كفي .

كال بضحكة : لا يابه طكطكه وجيب الشيخ وودي الشيخ وتعال اعقد واختم القران ومأخر ومقدم وتاليها اطلع من الحصه بدون عدس لازم اخذلي بوسه حضنه.

عضيت شفتي دا اريد احاول اطلع ، بس هو هم رجعني
كال وووين ترة مخلصت كلامي ترخصت من اهلج حتى احجي وياج.

تنفست بضيق واني اباوعله ، عيني بعينه ، مد ايده وخر الخصلة من على عيني وظل يتفرس بملامحي ويباوع لعيني المضروبة بقهر ويتأفاأف .

صك سنونه كال انكسرت ايده ...

وخرت ايده وبعدت نظراتي عن نظراته ورجعت خليت شعري على وجهي ، ماريد شفقة منه ولا من أي أحد .

كتله اسم الله عليه هو رجال وحقه بلي سواه اي واحد مكانه مستحيل يتحمل ..

كال " عووفج منه" ولزمني من ايدي واخذني للتخم ، سحبت ايدي منه وكعدت ع القنفة اجه وكعد بصفي .

اجاني صوته بجدية : اسمعي موج سابقا لمن تقدمت الج ، كتلج علاقتي بزوجتي شبه منتهية صح ؟

يا ألله راح يحجيلي عن مرته ، غصة شكبرها تكونت بحلكي ، دعيت الله بسري ما اضعف وادمع عيوني تذلني وتخذلني .

باوعتله دااحجي ويا كتله شرار أني ...

بتر كلامي وكال بنبرة اقناع إسمعيني هسه خلي اكمل وبعدين شنو تردين تحجين احجي .

هزيت راسي ورفعته بشموخ و بعدت نظراتي منه وثبتت خصلة شعري على عيني المصابة .

ظل يحجي كال اي اكملج المهم انت رفضتيني بوقتها رفض قاطع اني عانيت هواي ويه زوجتي تعرفين التقاليد تختلف والدين ومن هالكلام وغيرها مشاكل ماريد ادوخج بيها ..

ابني جان مريض سافرت تبرعت اله بنخاع العظم .
ابني جبير ويفتهم عمره خمس سنوات ..

ومايريدني ابتعد عن امه ، حاولت اوصل اله فكرة انو احنه اني وأمه مانرهم لبعض بس جنت خايف عليه حيل يحتاج جو ملائم بعيد عن الحزن لحتى يتشافى .

لمن سمعت بيج انخطبتي لأوس ، هنا انكسرت أني موج ، جنت حيل معجب بيج ورايدج .

التفتت عليه وجاوبته بغصة : وأعتقد انته هسه صرت تعرف الظروف الي جبرتني أقبل بأوس .

كال اني ما اعترف بيها هاي الظروف كل الي صار من أيدج .

رفعت ايدي بالهوا برفض قاطع وبحزم : مااحتاج نصيحة منك ولا شي واعتقد هسه رسالتك وصلت انته ماتكدر تطلك مرتك وهذا الشي اني مرايدته خلي يكون عندك علم .

خلي هالتمثيلية لفترة معينة وكلمن بعدين يروح لحاله افضل الي والك ولطفلك ولمرتك لان اني اصلا ممقتنعة واي شي ممقتنعة بي مستحيل أستمر بي .

كال معصب : وعبالج اتركج لقمة سهلة لحلك اوس الاعوج لو عبالج اوس راح يتركج ؟

انتي غلطانة لج داكلج ابني مريض وهالفترة مؤقتة بعدها نشوف شنو نسوي ليش تفسرين بكيفج .

كمت على حيلي وهو هم كام وكف مقابيلي
كتله بقهر : شرار اني ماريدك تبتعد عن ابنك ولا اني الي مقتنعة بهذا الزواج وموقفي هو هو نفسه قبل ما توكع مصايب أوس على راسي ماشي!!
خليها هاي ابالك وكتلك رسالتك وصلت ممكن أطلع هسه!

وكف مقابيلي لزمني من رسغي ، صرت قريبة منه
لدرجة انفاسنا اختلطت ..

وحسيت قلبي حيطلع من سجنه ويشرد مني على كد النبض العنيف الي يضرب على أضلاعي .

واكف كدامي اباوعله بعين وحدة لأن العين الثانية مغطيها شعري ، رافعة راسي لمستوى طوله الشاهق .

همس وهو يباوع لعيوني : موج أني أريدج ليش ماتفهمينها هاي! بس ظروفي أقوى مني.

رديت بمرارة : شرار أني ما اكَدر اتقبل رجال تشاركني بي مراه ثانية ، ماكدر افهمني الله يخليك .

سحبت رسغي من قبضة إيده ، وابتعدت عنه
طلعت من الاستقبال بسرعة .

وركض لغرفتي حتى ماشفت أحد ، بقيت الليل كله بغرفتي ماطلعت ، اندكت الباب وانفتحت ، شفت أنين جايبة بابا لازمته من ايده وهو مجلب بكتفها بتعب .

كمت ع حيلي ورحت اله ، لزمته من ايده واخذته للسرير مالة أنين وكعد عليه تعبان وكوة يتنفس ويخلي أيده على قلبه .

كعدت بصفه أنين ولزمت ايده تبوس بيها ، هو باوعلها وابتسم بتعب ووهن ، باوعلي مبتسم عيونه تلالي بالدمع .

وكعت دمعة من عيني على خدي ..
كال بنتي شلونج هسه مرتاحة ؟
رديت اي بابا لاتدير بال الحمدلله على كل حال اهم شي راسك مرفوع بابا والله اني ماسويت شي .

كال ادري بيج بنيتي ادررري واثق منج اني وماراضي على اخوج شسوي بعد اني ايامي بهالدنيا معدودة .

شهكنا أني وأنين ، هي خلت ايده على قلبها وتبجي وتبوس بيده واني كعدت يم رجليه وراسي على ركبه
واتوسل بي " بابا الله يخليك فدوة اروحلك من عمري على عمرك لا تكَول هيچ"

كال هاي سنة الحياة ابويه كلنا على هذا الطريق واني مشتاق لأمج يا بنتي مشتاقلهاااا الغالية الحنينة الطيبة تعب قلبي كله من وره فراكها هاي سنين مرت واني ماكدر انسى منها شي ماكدر بابا ماكدر .

زدنا بالبجي اني وأنين ، وهو يحجي ..
كال اريدكم ايد وحدة أني كلت لأحمد ووصيته والدور الكم اوصيكم ابد لا تفترقون .

وديروا بالك على فرح يا بابا هاي وصلة قلبي ماخيرها عليكم بس حالتها خاصة مريضة ومكسورة ، بنتي موج
فرح مسؤؤليتج .

لا تكولين هيه متزوجة شيخ ومن هالكلام ، لا هم تحتاجج مرات ماتعرف تتصرف وخاف الشيخ يقسى عليها انتي وجهيها خليها تتصرف صح ادري بيكم ماتكلولي كل مشاكلكم تخافون عليه بس اريدكم تسندون بعض .

وانتِ بويه أنين انتِ نبضة من قلبي لا تغلطين غلطة اختج عافت دراستها وتزوجت واخطاء موج هم اخذي عبرة منها خاف كل شي يصير وديري بالج على دراستج .

ظلت تنحب وتبجي كلتله بابا لتكول هيج اني من بعدك ماعيش .

رد لا ابويه لاااا امج ماتت وشوفيني هاي عشت من بعدها سنييين سنيييين انتظرها تخلص وهم مدا تخلص .

موج انتي نظر عيني ادري بيج غلطتي بس انت مثل العنقاء اريدج تبنين نفسج من جديد وطموحج تستغلينه صح وانتي كدها .

ماعرف شكد بقينه يمه نبجي منشبع من ريحته
نبوس بأيده وراسه ، الى ان هو كال ودوني لفراشي
تعبت .

اخذته أنين ودته واني بقيت بفراشي يائسة وبس ابجي وادعي الله يطول بعمر بابا .

تمددت وخليت راسي ع المخدة ، وكلساع يتبادر الذهني كلام شرار ومجاي يطلع من بالي .

نمت على فد دمعة تجري على خدي ، كعدت الصبح مدري الفجر على صوت تليفوني ، حتى بدون ما اشوف الرقم رديت واني نعسانة .

واجاني صوته : صباح الخير ...
اني منعسة كلت منووو ؟

كال خالة خالة ماعدكم خبز يابس للهوايش ؟

حبست الضحكة كتله شرار شتريد مخابر من الفجر مدري شكد الساعة هسه ؟

كال ماعدكم نسوان نتريك بيهم ؟

كمت كعدت على حيلي وكتله بتساؤؤل نسوان ؟

كال بس نسوانه وحدة .....

صكيت اسنوني وسديته بوجهه تافه من الصبح متصل مدري شعنده .

سمعت صوت مسج فتحته كاتب ..
الواحد لو يصير مطي احسله متصل بيج اريد اودعج لان راح اسافر تسدينه بوجهي طاح حظج وحظ الي يخابرج .

عصرت الفون بيدي وحظظظ الي ينطيك رقمي
فرررررح جيبووولياههه اخنكها .

فرح ...

نزلت هو وجهه ثكيل صارله كم يوم بس اني احوس احوووس والكتب الي جابهم كارهتهم وبس تجي ختام اله اطيح حظها .

سمعته يحجي ويه أمه
يكوللها على هدى ماتكدر ترجع ابوها مريض واخوها واكع ومتعور ومرة ابوها عايفتهم ورايحة .

ولهيب لاطش بروسيا ويفكر يقطع عنه المصروف حتى يرجع لان اصلا هسه مو وكت جامعات بس هو سمح اله بالسفر حتى يراجع حساباته .

خطية هدى والله انقهر عليها ....

للعصر الحجية تخربطت سكر على ضغط
مكثره اكل واثر بيها ...

وبقت كم يوم مريضة وهو محتار بيها جايبها من دكتور ومرجعها من مستشفى ويبوس بأديها .

ورة كم يوم نزلت ادور دانيال وينه وطبيت بغرفة الحجية واشوف سحر كاعدة يمها .

عضيت شفتي ووكفت ، جان الحجية عضت اصبعها واشرتلي : تعاي سلمي ...

بقيت واكفة عليمن اسلم على سحر الحيوانة
حجيت بقلبي وهيه سحر كامت طاحتلي بوس
دفعتها ودااطلع شفتها غمتني .

رحت للمطبخ وطبيت ، شفت بلقيس تطبخ
سألتها عن دانيال كالت يم ريلام ..

بقيت يمها لشوية دخلت سحر رفعت تك حاجبها الي خزرتها ، عود مسويه روحهه حنينة وجايه تشوف الحجية عود لأن مريضة ، بلا كرامة يطردوها وترد تجي .

سحر كالت بدلع اكول ام رحوبه منو يم الشيخ بالمكتب دا اريد اروح اسلم عليه بس الحجية عمتي كالت خوخه يمه عدهم شغل خوخه منو خوخه .

تخصرت واباوع الهم وعيوني مفتوحة على أوسعها
ام رحاب ضربت الجفجير ع الجدر وجاوبتها مبتسمة
هاي ختام بنت عم ابوي تشغل ويه الشيخ علي بالشركة.

كالت هاا هنا الحجي عرفتها المرحوم حاجيلي عنها

كالت هيج وظلت تباوعلي وردت تباوع لام رحاب
حلو والله صدك خوخة شفتها بسنوية المرحوم بعد عيني .

ام رحاب ردت كالت اي هو الشيخ جان يسميها خوخة .

اني اريد اكول بقلبي بس لساني فلت وصار من الصعوبة السيطرة عليه
_ خوخة خايسة ومعفنة لا ومشمورة بسطل الزبالة بعد .

سحر طكتها ضحكة وام رحاب خلت اديها على حلكها وتحجي لااا عيب فرح يمعودة فشلة لا تروح تسمعج .

رحت يم الطباخ فتحت الجدر وشمرت القبق بعصبية
جان بي مركة تفور بس اني احس افووور اكثر منه .

اليوم جمعة شعدها الخوخة الخايسة يمه حتى الجمعة هم شغل وهم مانفك منها ، ظليت احوس بالمركة وادردم ..

ام رحاب طلعت على صوت الحجية صاحتلها وسحيلة المسحولة كرامتها ذهابا وأيابا بقت يمي جنها غراب البين .

اجت ظلت تهمس يمي تغارين منها ؟؟؟

درت عليها كتلها وجع حتى وجع وخري عنيييي .

كالت اني سامعة من حمودي حبيبي الله يرحمه الشيخ جان عنده حبيبة وهي بنت عمه وناوويين يتزوجون بس تكمل دراستها .

بس هو من تزوجج انتي وشتل اختها هي تضامنت ويه اختها وعافت الشيخ .

كالت هيج وخلت رجل على رجل واني صيحت
جذابة جذاااابة كوومي طلعي برة .

كامت وهم اجت يمي واني ع طباخ
تهمس بمكر وحقد
انتي المخبلة هاي شغلتج تاخذين رياجيل من حبيباتهم
اخذتي حمدان مني ومن اختها واخذتي الشيخ هسه منها خطية .

انهاريت جاوبتها وأني افور ولي عني اني مووو هيج موو هيج ولي الساقطة ام المتع .

رفعت ايدها وصفكتني راشدي .

دفعتها من صدرها ع طباخ ، دتسند نفسها غطت ايدها بجدر المركة المكشوف ، طلعتها وهي تصرررخ .

على حسها اجو ام رحاب وهيام يسألن شكووو .

اني خليتها وطلعت من المطبخ ، وافكر بكلامها

صعدت لغرفتي طلعت كتب المفلوكة ختام ونزلت
جوة .

فتحت الباب مال المكتب ماشفتهم همَ الاثنين .

لا العرندس المحروس ولا الخوخة الخايسة المعفنة ..

اليوم يصبرووولي اني اعلمهم انيييي .

صوت سحر جاي من المطبخ تتألم .

واني شمرت الكتب بباب المكتب وصعدت جبت الصاية مالتي لبستها ونزلت .

اخذتهم من الكاع وطلعت برة القصر ، متوجهة لبيت ختام .

بيتهم يبعد مسافة عنا ، مشيت واني الهث وميتة من القهر ، دمي يفور وأثار كلام سحر ينهش بروحي .

اذا مابينهم علاقة ليش يسميها خوخة ليش يدلعها ليش
تزوووجني ليييش ...

وصلت لبيتهم عالي كلش وهم عبالك قصر ، هي ابوها لواء بالجيش واخوتها واصلين كلهم ، دكيت الباب
فتحلياهه واحد من الحماية واني فتت وبيدي الكتب .

لابسة صاية سودة عريضة طويلة ، تخط بالكاع ، ولابسة نعال اصفر بي كركوشة مليانه الوان احسه نترس تراب من الطريق .

دكيت باب الاستقبال ، طلعتلي وحدة شكلها الخدامة ومبينه هندية او من بنغلاديش هيج شي .
كتلها اريد ختام .
هي هزت راسها وطبت .

ورة دقايق طلعت ختام ، باوعتلي متفاجأة .

فتحت اديه ووكعن الكتب جوة رجليها ..

فتحت عيونها مصدوومة وتباوعلي
وكالت مستغربة : هاي شنوو ؟

رديت عليها بعصبية شنوو حبيبتي بعد شنووو ؟ هاي الكتب الي دزيتيها اليه ممحتاجتها .

دنكت لمتهم من الكاع وباوعتلي معصبة
واستقامت بوكفتها وهيه تخزر بيه

كالت اني مدزيتلج كتب شعندي وياج حتى ادزلج كتب هااا

مادري سألي نفسج والله ......

ظلت تباوع للكتب كالت هاي كتب علي الدر هو انطاهم الي من سنوات وهسه رجع طالبني بيهم ورجعتهم اله مدزيتهم الج .

اخذت منها الكتاب الي جان بي الخاطرة وطلعت الورقة الي كاتبة بيها الخاطرة

كتلها ومدام كتبه ليش كاتبة بي هذا الكلام هاا ؟

دارت وجهه كالت كتبتها اي مجنت متوقعة حرجعهم اله وهسه شنو تردين !

رفعت تك حاجبي ماريد شي بس اللتزمي حدودج افتهمتي وخلي هداياج الج ترة العطر الجبتي صفى بالزبل .

كالت والدموع صارت بعيونها ..
اني اخلي علي يأدبج انت الظاهر ابد ممحترمة اصلا انتي موو صاحية تتهجمين ع العالم ببيوتهم .

مديت ايدي واخذت الكتب منها ..
كتلها جيبيهم مدام مالات علي ، وفتحت الكتاب الي بي كاتبة خاطرة شكيتها وخليتها بيدها .

ظلت تباوعلي باستنكار وتهز براسها ..

خزرتهة ودرتلها ظهري وطلعت من بيتهم ورجعت للقصر ، الطريق كله اني افور وأغلي اريد ارتاح
احس اختنكت .

رجعت للقصر طبيت وصعدت فوك ، ظليت بالغرفة وماطلعت منها بعد ومادري عن سحر شي .

للظهر كلش انفتحت الباب ودخل علي الدر
وكفت على حيلي اعصر بأصابعي واباوعله بخوف وبلعت ريك بس احس لهاتي ناشفة.

ظليت ارجف بسبب ملامح التهديد الي ظهرت على وجهه .

واكف بالباب صاح ريلااااام ...
كمت اخذت دانيال وحضنته وهو يهومش عليه يريده .

اجت ريلام كالت نعم خالو .
اشرلها على دانيال وكاللها بنبرة أمر اخذي الولد يمج .

حضنته حييييل اجت ريلام تريد تاخذه
كتلها رووحي ريلام خلي يمي
هي التافت باوعت له .

خزرها وكال بنبرة استبداية : اخذي بووويه اخذي كتللللج .

تريد تاخذه اني حاضنته حييل وهو ظل يبجي
اجه علي اخذه كوة وانطاه لريلام

اريد احجي هددني بنظراته الي تنذر بالشر ...

طلعت ريلام هو سد الباب بعصبية ..

اجه يمي عيونه تبث شعاع من وعيد ..
كال بنبرة بيها كل الغضب وين جنتي اليوم ؟ وين رحتي ؟؟ طلعتي بره القصر بدون إذني .

ظليت اعصر بأصابعي ...

لزمني من ركبتي خنكني وظل يهمس بفحيح مخيف ..
ولللج مووو اكووول مريضة وماريد أذيج ليش تتمادين وللللج ليش ؟

دفعني وكعت ع الكاع باوعتله كتله انتتتته السببب انتتته .

دنك وضربني على وجهي ولزمني من شعري حيل
حسيت توجعت عطت اخخخ علي اخخخخ

لزم خدودي بأثنين اديه عصره حيييل بكل قووته ...
ويهز براسي وشعري يجره
كال ولج ترحين لبيت اللواء وتهجمين عليهم تفشليني كدامهم تنزلين راااسي انت شنو هالتمادي هذاااا شنوووو هالخبال وللج انتي شنووو وشون وياج ؟

لج مو صوجج صوووجي انه منطيج مجال هووواي بس منا وهيج لاااا راح تشوفين وجهي الجديد .

وخر عني ودفعني حيييل
ظليت امسح بخدي واحك راسي متوجعة
وهو يستغفر .

كال سمعي راح اخابر على ختام واخليج تعتذرين منها افتهمتي لوو لا .

كتله واني أرجف تضربني على مودها وتريدني اعتذر منها .

عاط ولججج انتي بس طلعتج من البيت المفروض اكسر رجليج تكسسسر حتى ماتعيديها وغصبا عليج تعتذرين .

كتله مااعتذر ماااااا اعتذر اصلا اني تسرعت وتزوجتك تسرررعت .

اجه يمي خنكني من رقبتي وكال بعصبية وعيونه نار
دفعي ثمن تسرعج .

هزيت راسي ميتة خوف منه عيوني بعيووونه المرعبة
تركني بعنف ملت ع الكاع .

حسيته يفوور ويغلي ويريد يضربني بعد اكثر
كلساع يجي يمي مشدد على اسنانه وقابض كفه حيل
محتار شيسوي بيه وشون يعاقبني .

تندمت بلحظتها ع تسرعي بس شسوي الكلام الي سمعته مااتحمله .

رجع كرفص يمي صاك سنونه ونظراته لو تقتل جان قتلتني .
كال سمعي ولج تردين اخفف عنج العقاب تعتذرين لختام .

هزيت راسي واني ابتعد عنه
واتمتم : مسووويت شي ممممسويت ماكتلها شي شدعوة عليها ومااعتذر .

ضرب الكومدي الي ورايه بقبضة ايده ، جفلت وخفت منه واهتزيت كلي .

راح للباب سحب المفتاح منه وفتحه
كال ابقي هنانه لعد .

عزااا راااح يحبسني ؟؟

كمت على حيلي كوة عليه امشي رجليه بايدة
وكفت مقابيله ... تمتمت اريد ابني جيب الي .

كال ماكو تعودي على فراكَه ....

يتبع ...