رواية هذيانٌ بين جمرٍ وجليد ..(ارملة اخي المجنونة) الفصل العشرون 20 - بقلم نورا ناصر

السلام عليكم
رواية هذيان بين جمر وجليد
بارت ١٥
نورا ناصر

امسك بيدي ...
أخرجني من الظلام الحالك الى اشعة النور ..
انظر لي كاليسر الوحيد في عسر العالم ..
انظر الي ك لؤلؤة في البحر صعبة المنال ..
ابحرت الى قاعه للحصول عليها ..
فأنا أنثاك الوحيدة المحطمة اود ان تحمل على عاتقك احزاني وجروحي لتضمدها امثل القوة والصلابة على عكس قلبي الهش فلم يتبقى من مشاعري سوى رسيس منها
ضمد جروحي واحتويني في فؤادك
وعوض حرماني وايامي الحالكة بشجنك .
بقلم rawan9090

فرح ..

أأأأأه يا وجعي منو يكدر يهدهده ويخلي يغفى ويتركني ؟ شون اكدر اتخطى جحيم الساعات الي اعيشها هنانه ! احس بنفسي مثل روح معذبة بقعر الجحيم روح تمتلك من الذنوب ابشعها لحتى تتعذب كل هذا العذاب ..

تعبت وتعبت روحي مرتجفة ومرتعشة بكل كياني وجنيت مر عمري مابين تعب والم ومرض ، خيانة خذلان وقهر ، احس اليوم الرماد الخابي باعماق صدري تحرك ورجعت النار تحركني وتجويني ، كرهتهم كلهم واولهم علي .

جاوبني احمد بصدمة : شنووو فرح شتكولين ماداافتهم عليج والله شبيج ؟

صكيت اسناني : تعال عليه هسه ..

جاوب بحنية : شبيج حبيبتي فروحة مبينه تعبانة منو وياج كوليلي والله اطيح حظه .

جاوبته اني اطيح حظهم انته معليك بس تعال عليه هسه اريد اروح للمقبرة نطلع حمدان من القبر مالته ندفنه بغير مكان لان حيكصون الشارع وهو مدفون بالتجاوز .

جاوب وانتي شعليج واحنه شكو ليش تحملين روحج هالمسؤؤلية خليهم هم مو اهله هم ينقلوا لا تدخلين نفسج وياهم .

_ ليش هو من شوكت صرتلي حزام ظهر انته طيح الله حظك هم اخو وبيك خير امداك .

_ هاي شبيج ووثول اكبر منج اني احترمي فرح شصاير لعقلج اليوم ؟

_ هذا منو يمك سالم ابن عمي ؟ انطينيا احاجي .

_ شتريدين من سالم يولي معليج بي واحنه طالعين ندور شغل بطلنه من الشركة الي جنه نشتغل بيها وصار اسبوع كاعدين .

_ اني عندي الكم خوش شغل دنطيني سالم احجي وياه ..

الظاهر سالم سمع الكلام بي اسمه وخمط الفون من ايد احمد وكال بضحك : هلا بنت عمي هلا تاج راسي فرووحة شونج مشتاقلج وربي .

_ هلاو سالم شونك سمعت محتاجين شغل انته تعال عليه والكم الصافي ..

_ ثواني اسحل الطلي اخوج واجيبه لحد عندج زحف .

سديته منهم ، وصعدت شفت هدى واكفة يم الباب
بس خايفة حيل ، اخذت منها دانيال
هي ترجف وتحجي : خابر عمو شرار يسأل عنج ؟ يكول ضروري تردين على الموبايل يتصل بيج وميحصلج .

هزيت راسي الها دااطب الغرفتي وكفني صوتها
_ انتِ زينة مابيج شي ؟ وجهج مخرمش بي دم شبيج شنو صارلج اني كعدت على صوتج تبجين !

رديت ببرود : مابيه شي واي احد يخابرج كوليلهم مابيها شي موجودة بالبيت بس تعبانة شويه ورجعي على نومتج .

_ لا بعد هسه كعدت ماكدر ارجع انام .

تجاهلتها وطبيت للغرفة ، طلعت فلوسي كلهن وذهبي خليتهم بجنطة ، سويت ممة لدانيال ووخليته على السرير يشربها واني رحت لبست صاية وشال وطلعت قمصلة لدانيال حضرتها وبقيت انتظر احمد وسالم يجون .

*****

هدى ..

بعد العركة ويه فرح سحبني لهيب من ايدي قوي حتى حسيته حيخلعها الي من كتفي عزاا بعينه شكد قووي ..

دفعني بالغرفة وظل يصيح عليه
_ ولللج انتي شون تحجين هيج ويه فرح هاا مو اكبر منج شنو هالهمجية هاي ؟ كلما اريدج تنعدلين ماكو تظلين عوجه يعني .

واني كاعدة على السرير افرك بيدي واباوعله بخوف وداخلي يرجف : شدعوة عليها ترى لا تجاوزت ولا غلطت بس هيه مدري شبيها ..

_ مدري شبيها موو ؟؟ لج تعلميني بيج تعلميمدني بسوالفج ؟؟

كمت على حيلي متعصبة : وانت شدعوة عليك هيج محروك كلبك عليها لا يكون مخلي عينك عليها اذا رايدها شكو تزوجتني جان كسبت بيها وبابنها اجر وتزوجتها .

صار يباوعلي ونظرات عيونه تحولت من غضب الى شرارات من جحيم ، بخطوة وحدة صار يمي .
رفع ايده القوية والضخمة ونزلها على خدي بقووة من حديد .

حسيته صفحة خدي انشلعت ومابقى بمكانها بس الالم والوجع ، تخربطت خصلات شعري الي مخليتها صفح ووكعت على وجهي ، كعدت على السرير ودموعي صارت متجمعة بعيوني وبللت خصلات شعري.

بس هو ما اكتفى بهذا الراشدي ، اجه ورفعني من زندي
وظل يهز بين واني اباوعله من بين خصلات شعري الكثيفة وخدي الي ضربها مشتعلة بنار الوجع .

جان يهمس بفحيح مرعب : ولج حمارة ادبسسسز شنو هالحجي هذا هااا شنو هالحجي ؟؟؟ ماتستحين ولج انت شون تكولين هيج ؟ فرح مرة عمي اخلي عيني على مرة عمي .

خليت ايدي على صدره دفعته حيل كرهته شون هيج يضربني ماله حق والله ، طرفت من الجهة الثانية للسرير ووكفت اوخر شعري عن وجهي واحجي ويا بخوف ..

اي ليش لا كلشي جايز حلوة وتخبل ليش ماتخلي عينك عنها يعنيي ليش هاا واشوفك كوة متحملني كوة عليك حتى كدامهم حجيت هالحجي لا عبالك اني هينة وتكدر تذلني تحلم والله تحلم .

يباوعبي مصدوم ومعصب وعداد غضبه بأعلى مستوى
اجه يريد يضربني داانهزم منه لحكني ولزمني من خصري حيييل تأووهت من الوجع وشمرني على السرير
وكعت على بطني .

اجه هو لزم شعري وسحبه وبيده اللخ قيد معاصم اديه
قرب من اذني وصار يحجي بحدة وبصوت مصرور
_ والله ولخلقج وروحها لامي اذا ماتضبين لسانج اكصه الج من عرگه والله وهاي اني حلفت بروح امي وما احلف بروحها جذب واذا صار وتكرر هذا الحجي
اذذذذبحج ذبببح ررررعنة .

كام مني واني عدلت نفسي افرك بمعاصم ايدي الي جان قابض عليهن بقووة وجعتني واعدل بخصلات شعري الي تخربطت .

اباوعله بعناد وتحدي صررخ بوجهي لا تباوعين هيييج ولج صللفة ..

شفته اجه باتجاهي مثل حيوان مفترس متوحش يريد ينقض على فريسته واني متت من الوجع وماريد بعد يضربني كافي ، دنكت راسي وحميت وجهي بكفوف اديه .

هو نصى لمستواي وصوت انفاسه الغاضبة بعدها تملي اسماعي ، لزمني من إذني وقرب راسي عليه ..وتكلم بنبرة أمر وعجرفة ..
_ سمعي وللج اليوم كله تبقين هنا بهاي الغرفة وألله اذا طلعتي منها اكص لسانج واكسر رجليج فااااهمة ؟

غمضت عيوني ماريد اخليها بعيونه التخوفني
و هو بعده لازم إذني وظل يهز راسي حييل
توجعت وهو يأمرني : سمعتي لووولا ؟ تبقين هنانه !!

انتفضت وصرخت : اي اي اي سمعت بس وخر عنييي وووخر .. وكملت باقي كلامي ببجي ونحيب هو من شافني هيج ابتعد عني وظل يتمتم ويستغفر وعرفت نقطة ضعفه "البچي" .

بس ماريد اصير ضعيفة كدامه ولا راح استغل هاي النقطة يحلم يشوفني ضعيفة يحلم ..

كمت فتحت شعري ولميته رحت ع المراية باوعت اصابعه عبالك مطبوعة طبع على وجهي ، هزيت راسي باستنكار وروحي مشتعلة ، ضجت من فرح حيل وكرهتها .

بقيت للعصر محبوسة بالغرفة وهو مابين ..
ضجت حيل كلش حيل .. عندي تليفون جابه الي عمو شرار هدية ، ظليت اتصفح بي ..

انفتحت الباب عرفت بي دخل مارفعت عيني ولا باوعتله ، طب للحمام سبح وطلع ..
شمرت الفون ووكفت مقابيله وحجيت بنتر ..
_ اسمحلي اطلع من الغرفة يله ترة ضجت .

لزمني من فكي حيل : لاتحجين بنتر هيجي احجي عدل وطلبي بأدب افتهمتي لوو لا ؟

_ اي زين بس وخر ايدك عني دتوجعني تره ..

وخر مني بس دفعني دفع .... دااطلع من الغرفة
لزمني حيل من ايدي ورجعني يمه
_ اخخخ انته شكد عنيف تره تأذيني هيج تأذيني...

وخر ايده وانتبه لملامحي شلون مخبوصة لان متوجعة
قرب مني وكال انت منو يملي راسج ولج .

ظليت اعصر باصابعي : انته شنو تقصد لهيب ؟؟

كعد على السرير ينشف شعره .. رحت وكفت يمه
وسألته بألحاح : انته شنو تقصد هاا ؟ لهيب لهيب .

ضربني بالخاولي وعاط : اووو سدي حلكج شويه صبري هسه اجاوبج .

وكفت متكتفة واباوعله ، غرس اصابعه بشعره المبلل
وباوعلي بشك : هيام تقرا براسج وتحشي نعل موو ؟
شكالتلج على فرح وهيج دخلتي حامية عليها ؟

صفنت بوجهه مفتهمت شي شبيها هيام طيبة وحبابة هيج اشوفها .

رفع ايده بتهديد : سمعي ولج هدى لا تصيرين زعطوطة حجايه تجيبج حجاية توديج وخاصة هيام لاتخلينها تسيطر على عقلج وتملي بجذبها وتسفيطها تره الزمج انت دك وين اليوجعج وماألزمها هيه معليه بيها وهاي اني حذرتج وانت كيفج بعد.

درت بتحدي ودااروح ، لزمني حيل رجعني عليه وكعت بحضنه طوقني من خصري لف ايده وصلها لنص بطني والايد الثانية خلاها على فكي جعصه جعص .

وعيونه بعيوني وقلبي دكاته صار سريعة ..
بفحيح كال : من اامرج امر تكولين صار حاضر تمام خوووش لا تنطيني ظهرج حركات الصلافة والرعونة بطليها ..

ظليت اهز براسي واكول اي اي بس اتركني
وخليت ايدي على كتفه ودفعته ، وخرت منه واخذت شالي وطلعت من الغرفة اتنفس بصعوبة .

رحت يم ريلام وهيام ظلينا نسولف بس اباوع لهيام واحس گلبي مكروص منها ، خاف صدك ظلمت فرح خطية .

صفنت تذكرت لمن اجت باركتلي واني حجيت وياها من ورى خشمي انقهرت حيل عليها بس هيه كلش عصبية وبسرعة ثارت بوجهي .

بعدها اجتي عمة بلقيس كالت تعالي هداوي عندج خطار بالاستقبال اجوي يباركولج .

كمت كتلها ان شاءالله خالة بس ارتب نفسي واجي ..

رحت للغرفة شفته لهيب واكف ع المراية وديرش العطر عليه يمكن يريد يطلع .

رحت للكنتور طلعتلي فستان بنفسجي قماشه شتوي حلو لبسته وطلعت شفت لهيب ماكو .. بس باوعت ع الميز شفت جواز سفر ومستمسكاته .

كرصني قلبي معقولة حيسافر ؟ شبسرعة رجعوهن اله ؟ خاف طلعهن اله بدل ذنيج الي يم عمو ! كل شي يصير !

خليت مكياج ولفيت الشال عدل ونزلت جوه للاستقبال شفت الحجية ويمها بنية كلش حلوة ، سافرة وشعرها يجنن طويل وصحي ، بشرتها سمرة وصافية جنها بشرة الطفل ومكياجها نازك حيل ، لابسة جاكيته رصاصية وجواها بلوز ابيض وجينز .

الحجية قدمتها الي كالت هذي موج اخت فرح تعالي يمه سلمي عليها .

نفس دم فرح بس الملامح تختلف ، فرح بيضة بلون ثلج القارة القطبية واعصابها نار هههه بس هايه لا سمرة برونزية ..

رحت سلمت عليها وكعدت على مقربة منها ..
انطتني هدية مغلفة ، اخذتها منها ..

دقايق كالت من رخصتكم اصعد اشوف اختي ..
الحجية كالتها مرخوصة يوم ..

هي طلعت واني وراها ، على الدرج كلتلي ..
يصير اشوف غرفتج ؟ لو متقبلين ، احب اشوف غرف العرايس هههه فضول ..

ابتسمت الها : اي طبعا تفضلي ..

وكفت ع الباية كالت خاف زوجج هنا ؟

جاوبته بسرعة : لالا توه طلع ..

اخذتها لغرفتي دخلت كالت الله كلش حلوة تتهنين بيها ان شاءالله ..

جاوبتها تسلمين .. تفضلي كعدي ..

كعدت على السرير ، واني كبالها باوعتلها ابتسمت ابتسامة لطيفة وكالت : ماشاءالله اكيد ترتيبج مبينة انت كولش مرتبة ..

هزيت راسي وبقلبي اكول فدوة شون ترفع المعنويات هاي عود صدك اخت فرح ماصدك .

كالت شونها فرح وياج ؟

سكتت وبس اباوعلها ..

كملت : شوفي هيه اختي فرح عصبية وبس والله قلبها طيب ، الي يحبها تشلع عيونه تنطيهيا بس من تعصب واكيد بسبب تثور ومحد يسكتها وهيه شويه مو زينة ويه هيام لان هيام تطلع عليها حجي هيه فرح مكايلته وتصير مشاكل .

عجيب!! اليوم ثاني واحد يحجي على هيام لهاالدرجة هيه مؤذية!! خاف صدك فرح ماحجت عليه وهاي تأليفة من هيام واني ظلمتها! شلون يربي!

ظلت موج تحجيلي على فرح ومقتل زوجها وبعدها شون طلع متزوج هاي الي اسمها سحر من وراها
انقهرت على فرح وقررت ابدي ابدي وياهه من جديد
واحاول اصلح الغلط الي ارتكبته بحقها .

طلعت موج واني بقيت افكر بكلامها ..

وراها كعدت على صوت مثل الونين او الصريخ
كعدت مخرووعة باوعت لهيب ماكو بالغرفة ...
فتحت الباب وطلعت ...

منعسة وامشي والف الروب عليه بردت توي كاعدة حتى ممغسلة ، سمعت الصوت يجي من غرفة فرح
ركضت عليها شفتها مفتوحة طبيت انصدمت بفرح
واكعة بالكاع اطرافها تتحرك وعيونها بيضه ..

شهكت خليت ايدي على حلكي والطفل يبجي بصوت عالي وحيوكع من السرير مالته واني وكفت متصنمة وميتة خوف .

ثواني ووسكنت عن الحركة مادري شصار بيها
صحت عممه بلقيس صحت للبنات لهيب لعمو شرار محد يجاوبني واخاف افوت . تذكرت بعد ثواني انو هم راحوا لزيارة الامام الكاظم والبنات بالدوام .

بس الطفل حيوكع خطية وفرفح من البجي ، تشجعت ودخلت للغرفة ، باوعت شفت كف ايدها يتحرك مثل ترجف معناهه ماميتة .

اخذت الطفل من السرير وبلا وعي ظليت ابجي اول مرة اشوف هيج حالة تصير كدامي ..
بعد دقايق صحت ، عيونها حمرة تخووف .. وجهه مليان خراميش وشفتها بيها دم .

من كعدت شعرها طخ بالكاع على كد ماطويييل ..
لزمت راسها متوجعة ، ثواني ظلت تباوعلي وطفلها يبجي عليها ، يمد ايده الها يكول ماما يأشر ويريدها بس هيه عبالك جايه من غير عالم .

مثل فاقد ذاكرة وجاي يحاول يتذكر .. ورى مستوعبت ظلت تبجي وتمتمت كلام شي افهمه شي لا ، جانت تندب حظها ، طلعت من الغرفة واني بقيت بمكاني اسكت الطفل ، سمعتها تصيح وصوتها يجي من غرفة ريلام .

معقولة هاي صاحية شبيها ياربي يومية مو هيج ابد اليوم حظي لأن وحدي بالبيت ياربي بقيت خايفة
بعدها هم اجت دخلت تخووف وجهه شاحب عيونها اكتست بالحمار بدل البياض الي يحوط سواد عيونها
وجهه متعوب .

ظلت تدور ومن لكت تليفونها عرفت جانت تدور عليه
اخذته ونزلت مرة ثانية ، اخذت الطفل ورحت لغرفتي سمعت تليفوني يررن اخذته شفته عمو شرار
جاوبته بسرعة وهمزين الطفل سكت وغفى على كتفي جان ماراح اسمع من صوته شي .

جاوبته بتوتر ها عمو صباح الخير ..

كال صباح النور هداوة فرح يمج ؟ دتشوفيها بالبيت ؟

جاوبته اي عمو يمي بس ما ادري شبيها ..

_ شبيها هداوة ؟

_ ما ادري عمو ما ادري حالتها غريبة ومعصبة حيل عفية تعالوا للبيت محد واني اخاف ولهيب هماتين ماموجود .

_ وين ولى من الصبح ؟ لا يكون كاتلته طاردته مامنطيته حقه ولج هداوة ؟

_ ها عمو لا والله والنبي اصلا اخاف منه هو يضربني مو اني .

_ اكسر ايده واعلكها بركبته بس كليلي عليه ..

ضحكت : اي والله عمو انوب اكولك تاخذلي حقي منه .

_ شوووف الثولة كيفت ولج لا تبليني وتدوخين راسي حلوا مشاكلكم بيدكم صيروا مثلي حليت مشكلتي برجلي شردت من مرتي وجيت هنا عاد انتي استخدمي ايدج وكلبي الغرفة حلبة ودك بوكسات وجلاليق واي شي تحتاجي بخدمتج اعرف بنية صاكة مدربة رياضية تعلمج كم حركة .

_ هههههه مشكور عمو خوش نصائح بس منو هاي المدربة الرياضية ؟

_ ماتعرفيها ؟ لهسه ماشفتيها ؟

_ لا والله عمو ماعرفها ..

_ من يصير النصيب ان شاءالله تعرفيها اكيد ..

_ ان شاءالله عمو الله يسهلك ويرزقك كل خير ..

_ هداوي ديري بالج على فرح مو تخلينها تطلع من البيت ؟

_ لا عمو هسه رايحتلها ..

_ اي ولج شيفكنا من عمج الشيخ هاي وصيته خابرني ووصاني عليها مخابرته مدري شبيها وان شاءالله ازور الحجيات ونجي .

_ اي عمو فدوة استعجلوا ..

كال .. ان شاءالله هداوي وختم المكالمة .

فرح ..

رن مو بايلي رقم غريب فكرت خاف هذا سالم لان ماعندي رقمه خلي اجاوبه ، جاوبته ها سلوم وصلتوا شبسرعة ؟

اجاني صوت اقوى من صوت سالم بلحظة خفت وارتعشت واجيت اسده بس ما سديته تنفست بقهر واني اسمع صوته
يلتصق بطبلة اذني وهو يحجي بحدة وعصبية
_ منو سلوم هذا ؟

_ ءء ابن عمي ..

_ شعنده يخابرج من الصبح وانتي شبيج من صباح الله يا هو وياج ليش تصيحين ...

اجيت انفجر بوجهه واكوله بيه انته عجرفتك غرورك وتكبرك تسلطك وقراراتك المقيتة .... بس تراجعت خلي ابين اله اني هادئة ..

جاوبت ببرود مصطنع : ما بيه شي ، احمد اخويه مخلص رصيده وخابرني من رقم ابن عمي وهسه رن مرة ثانية عبالي هو لان ماحفظته .واني اسفة حلمت بحمدان وكعدت مزعوجة وانفجرت بوجهك أسفة ما تتكرر .

كال بحدة : فررح كولي شبيج واحجي لا تلعبين عليه منو وياج ؟ سحر بالبيت لوولاء؟

غمضت عيوني وجريت نفس وحجيت بقلبي مدام تدري بيها تأذيني ليش تخليها ويايه بالبيت ليش تخليها تأذيني وتطلعني من طوري!

جاوبت : لأ ماكو سحر بس كتلك حلمت بأخوك الله يرحمه وانفجرت ولأن انته ماتقبل تكلي منو كتله عقلي الباطن يخليني احلم بي هوايه لان افكر هوايه .

كال بهدوء : تمام العصر راجع انه وعود اشوفج ونحجي بهالموضوع ..

بتلكأ جاوبته : اني راح اروح لأهلي لأن تعبانة شوية
ومخنوكة ..

_ لاء لاترحين من اجي يله ... مامرتاح لاتصالج مال قبل شوية ...

_ مو كتلك جنت حلمانه وفقدت وانفجرت ماتحملت انت ليش ماتفهم عليه ؟ تره هيج ميصير اني داانفجر بسببك انته مثل الي يجرح ويشمر على الجرح ملح تره اني ما اتحمل اتركني لخاطر الله .

_ لا ماجنتي حلمانة اكو شي صاير انه اعرفج من نبرة صوتج تجذبين ، كتلج جاي العصر ونحجي ويصير خير .

_ هه مدام كلت يصير خير يعني ماراح يصير خير اودعناك شيخ اخويه اجه عليه اروح وياه لبيت اهلي ..

بصوت لاسع : لا تتمردين كافي هيج راح اخليج تندمين ، انتي اطلعي من البيت شوفي شراح يصير الج . وسداه بوجهي ..

غمضت عيوني واني ناويه هالمرة من صدك اكسر كلمته واعلمه فرررح منو الي يدوسون عليها ..

اخذت دانيال والجنطة وطلعت من البيت
تبعتني هدى تصيح وراي .. فرح فرح وين رايحة ؟

باوعتله والشمس طخت بعيوني ؛ رجعي انتي اني رايحة لبيت أهلي اجوا عليه اخويه وابن عمي ..

بس عمو شرار كال لاتخلينها تطلع ..

هاي شبيج ترى اني حرة محد مسؤؤل عني واخويه جاي عليه ماطالعة وي غريب رجعي رجعي للبيت كملي نومج عرووس..

تجاهلتها التفتت عليها ، شفتها لازمة الموبايل دتخابر
رجعت عليها اخذت الفون منها جانت دتتصل على شرار
سديت المكالمة وقفلت الفون مالتها وخليتها بيدها وهيه ظلت تباوعلي مصدومة.

خزرتها هيه ابتعدت خطوات كتلها لااتدخلين انتي مفهوم ؟ هيام نمبر توو .

ظلت صافنة ، رحت للسيارة وصعدت كلت سلام عليكم ..
ردوا اثنينهم واحمد جان يباوعلي معصب لأن غلطت عليه بس اني ممتعودة اغلط عليه بس حاليا عقلي مو براسي ...

هو من شاف اثار الضرب على وجهي تغيرت ملامحه
وصارت ذهوول وحزن ..
كال شكوو شبيج ؟ من هيج ضاربج ؟

ابتسمت بسخرية وقهر : عركة نسوان لا تتدخل المهم خابروا على دفان خلي ننقل حمدان لغير قبر لايروح قبره بالكص ..

جاوب احمد باقتضاب : وانتي شعليج تدهلين نفسج بهاي السوالف خلي اخوته

بترت كلامه ووجهت كلامي لسالم
_ فدوة سلوم بلكي تخابر للدفان يطلع حمدان من القبر خطية وندفنه بغير مكان ..

هو ابتسم وكال صار تدللين بس ديري بالج علينه ويأشرلي بأصبع السبابة والابهام بمعنى فلوس .

بغنج رديت تدلل ..

احمد : انت راح تطيحين حظج بيدج فرح ..

جاوبته باقتضاب : شبيك احمد الشيخ مسافر واخوته كلمن ملتهي بملذات الحياة ومشاغلها ومالهم خلك اخوهم .

سالم كاله ترة حقها هيه مرته وهسه سكتوا خلي اخابر واحصل الدفان مالتهم ....

ظل سالم يخابر واحمد يخوزر بيه كلساع خله دانيال يبجي وسالم جان يسوق .. نزلنا يم بيت اهلي .

موج جانت توها جايه استقبلتنا متفاجأة شكو شبيج ليش هيج وجهج ؟

خلي دانيال يمج اروح ننقل قبر حمدان خطية حيكصوا ويه الشارع ..

جاوبت وانتي شعليج ترحين ...

انطيتها دانيال اخذته جاوبته : غير زوووجي ..

ورجعت للسيارة .. وانطلق بينا سالم للنجف ... واني جنت محضرة كلام عتاب وقهر كوومة اكوله لحمدان
اتمنى يطلع من قبره عايش حتى عتابي يصير اله طعم ولذة اكثر مثل كل مرة جنه نتعاتب وهو عدل بس هيهات مايرجع الزمن .

وصلنا للنجف ورحنه لمكتب الدفان وظل سالم يعامل ويا وهو رفض كال انه اخذ اوامر من الشيخ شعليه بيكم ..

وخرت سالم وطلعت الفلوس خليتهه على المكتب مالته
عيني ترى الشيخ مسافر واني مرة المرحوم وهذول اخوته هو من شاف الفلوس كثرت ظلت عيونه تلمع
اخذهن وهز راسه وصاح على العامل مالته وانطلقنه للقبر .

ظل الدفان يحفر واني كاعدة واعض شفتي حيل
وماحس بالالم ، رغم شفتي مجروحة ظليت اضرب على فخذي كلما يتعمقون بحفر القبر
واحمد وسالم وياهم ، احس قلبي صار حجر بهاللحظة
لا خوف ولا حزن بس عتب عتب وزعل اي والله حيل زعلانة عليه حييل ..

المقبرة جانت باردة بس احس اني ابرد منها
...ماكو ذرة من الخوف بيه ابد ...
واخيرا طلعوه رحت ركضت عليه وظليت اتلمس بي
واصرررخ ولك ليش حمدان لييييش جانت ايدي تضرب على عظامه وتسوي صوت
والكفن جان مهتري ولونه شويه وحيصير اسود .

اجه احمد رفعني منه هديته ورجعت .. اصيح
ولك حمدان دتشووف وجهي دتحس بوجعي
ها حمدان ليش ليش تتزوج عليه ليش تخذلني ليييش تخوني جان طلكتني ميخالف قابلة قابلة بس مو تسوي هيج من وراي

لك حمدان تدري هسه هي وياي بالبيت واليوم اجت ضربتني هي وامها ، لك حمدان ليش كلت اسرارنا الها انته مووو رجال
ها بس كولي موووو رجااال شنو تكول اسرار مرتك الها ...

حضني احمد حيييل ووخرني منه احس ناري بردت هسه وطفت وهم اخذوا حمدان خلوا بتابوت ووخلوا فوك السيارة واني احس غفيت بحضن احمد ...

كعدت بالسيارة خشمي مسدود وبلاعيمي احسها مورمة يمكن من كد البجي والصريخ ... شفت احمد كاعد يمي سألته بفزع : وين حمدان ؟

غمض عيونه وجاوبني بقهر : دفناه ارتاحي انتي ..
حضني وباسني على راسي مبين حيل مقهور عليه ..

همس هاي مرته ضربتج ؟

هزيت راسي على صدره ، حوط كتفي بيده
تمتم بقهر .. تهون عمري فرح تهوون والله ..

كتله ما ارجع لبيتنه وديني لبيت عمتي معاني بسلمان باك ..

شسوين ؟

اريد ابتعد عن بيت الشيخ هالفترة احسن واذا سألوكم كولولهم مانعرف بيها وين ..

مهيب...

طلعت من بيت عمي حسان ومتوجه لبيتنا توني واصل شفت ابوي الشيخ طلع من باب القصر جان شويه هوا عالي وبارد البشت كل شويه ويطير ..

حسيت صاير شي ركضت عليه وهو يريد يصعد السيارة لزمت باب السيارة وحاجيته بذهول مصحوب بفضول : الله يساعدك يابه شلونك ؟

جاوبني بسرعة : هلا مهيب ..هلا ابني ..

سألته : خيير شكوو شيخنا اشو طالع بهمه...

ركب السيارة ولبس نظارته الشمسيه ونزف شماغه باناقه...عندي شغله بالنجف تخص المرحوم تروح وياي ؟

باوعتله باحترام : اي اروح يابه ليش لا ..

هز راسه : لعد يلا اركب بالعجل ..

ركبنه بالسياره والسايق ساق بسرعه والشيخ خلص الطريق كله مخابره وخلصها عليه ...هلا بالطيب هلا بالغالي هلا بشيخ فلان وشيخ علان ...وجيب الفصل و ودي الفصل...

وصلنه للنجف من وصلنه كتله بمزح :شيخنا بلا زحمه يعني شنو المشكله الصايره حتى جبتنه للنجف بس لا تريد تتزوج نجفيه

ابتسم بطرف شفته باستهزاء ورد عليه
_ زواجيش وليدي عمك حمدان الله يرحمه القبر مالته طالع بالكص مالت الشارع ولازم ننقله لغير مكان الدفان منطينه قطعة بالتجاوز انه وصلتني رسالة من دفانه بس من كثر الرسائل ما انتبهت الها لو ما شرار نبهني .

غمضت عيوني اتذكرت من مات عمي حمدان جانت فاجعة بالنسبة النه واكيد اذا طلعناه من كبره راح نعيد نفس المأساة
من الشيخ كال انطلع حمدان من كبره حسيت نفسي ارتعدت واهتزييت بس امتثلت للأمر الواقع .. خطية نايم بقبره بسلام نروح احنه نطلعه مرة ثانية ..

وصلنه للقبر مالته غلبنه الحنين واهتزت النفوس ضلينه اني والشيخ اندور على القبر اتفاجئنه ماكوو...

الشيخ لف عباته بكل غضب مثل اسد هائج وباوعلي بعد ما كانت ملامحه هادئة واحتلها التعصب
زمجر وعداد غضبه بأعلى مستوياته
_ حمدااااان راااح بالكص لوو انتقل بغير قببببر...

باوعت للحفره بذهول وصدمة :...هذا محفور مو كص لان لحد الان الدولة ممتخذه اجراءات ، عمي حمدان منقول بغير قبر

ركز بنظره على الحفرة الضلمه

تسطرت إلاهات وتبعثرت المشاعر بلا مأوى واختنكت العبرات كدام ظلمة القبر الحالكة هذي هي نهاية الانسان يا اما تكون حفرة من حفر النار ياما تكون روضة من رياض الجنة ..

رددت بهمس : اللهم احسن خاتمتنا باحسن القبول...

باوعت الابوي الالم ينهش فؤاده بس لحد الان صامد ويقاوم بكل جبروت ..

لف البشت بغضب وقبض على سبحته بحدة
وبنبرة خطرة اردف :-منووو الي يتجرء يتعده على حدودي منو الي يتجرأ يطلع حمدان من كبره بدون اذني ؟

كمل بصوت عالي غلب عليه الغضب
_ اليوم النجف احركها باهلها اكلب عاليها واطيها انا شيخ علي يحفرون كبر اخووي ويطلعونه بدون علم ولا اذن مني واسكت ...

لا والله وحق عزته الله وجلالة ما عاش ولا جابته امه اليدوسلي على طرف

حاولت امتص غضبه لزمت ايده باطمئنان
يابه كوول يالله اكييد اكو سوء تفاهم او صاير شي مو معقولة يطلعون عمي حمدان من قبره قابل احنه شعدنه ويه العالم

حط اديه ثنينهن بقسوة وغضب على صدري ودفعني
وضربني على كتفي : اسسسكت مهيييب اسسسكت الطلع حمدان متقصد يكسر كلمتي ويبين هو الي اله كلمه عليه وكسر كلمتي

تنهد بقهر : حسبي الله ونعم الوكيل خلينه نروح للدفان واكيد هو يعرف منو الي نقل قبر حمدان ..

هزيت راسي بموافقه ..

تركني ومشه وعيونه مشتعلة بلهيب مرعب ركب السيارة واني وياه ..
كال...امشي بسرعه المكتب دفانه اسمه............

السايق بكل احترام اتجه لمكتب الدفان تقريبا عشر دقايق و وصلنه

نزلنه من السياره وهو دخل بكل جبروت واحتل مكتب الدفان وكف الدفان مذهول من اقتحام ابوي المكتبه

صاح بحنق ونظراته اخترقت كل ذره بجسم الدفااااان....حمداااااااااااااان وييين

بلع ريكه الدفان ورد عليه بهدوء مليان ارتباك
_ وين يعني غيير بقبره

تقرب منه ابوووي الشرار يتطاير من عيونه سحبه بقوووه من ياخة قميصه...بقبره لك سااافل انت المسؤؤل عن اختفاء حمدان انت

الك خمس دقائق اذا ما كلت حمدان منو نقل قبره واخذ جثته هذا المكتب تشوفه شكبره افلشه على راسك وراس عشيرتك ...

تمتم برعب..شش شيخنا

صرخ بي بصووووت مليان غضب.....اسسسسكت اذا تريد تبرر اسكت وغصبا ما عليك تحجي منو الاخذ حمدان...

نزل راسه بخوف وجاوب : والله يا شيخنا انه خابرت عليك اكثر من مره انت ما جاوبت ، خابرني واحد واتفق وياي وبعدها اجه هو و بنيه وياهم ولد وطلبت نطلعه وهي اخذت الجثه

رجع ابويه يصرخ بصوت عالي هز ارجاء المكتب...ليش ما كتلي ليش ما خابرتني لييييش انت شلون تسول نفسك الها وتنطيها الي تريده ؟

رجع نزل راسه باسف وخجل : هي طلبت مني ما اكول وانطتني مبلغ مالي جبير

دفعه ابويه بكل قسوووووه وكعه على الكرسي وبعدها هو وكع بي الكرسي وارتطم بالحايط...

طلع ابوي من المكتب واني امشي وراه سريع وويوصلني صوته وهو يتوعد ويكول
_ عقلي عاجز عن الاستيعاب ولساني نربط من هول الخبر هاي فرح ماكوو غيرها اذا ما سودنتج فوك سوادينج ما اطلع شيخ علي !!

يتبع ..

باجر اذا وصلت ٥٠٠ الف انزل بارت 🙈😁