هيلانه الاسر الفصل السادس وأربعون 46 - بقلم زهور ال سلطان

#هيلانه_الاسر
بين لفحات أُوَرا و الزَّمْهَريرُ .

(بارت معدل فقرة رسيل)

ملاحظة " اتمنى منكم بنات تتفاعلون بالبارت حتى
يرجع يوصل التحديث لكل البنات

.
هـيـلانـه

بعد كم يوم بالمستشفى حددو اليوم يطلعون
اخواني

جنت گاعده اني واحمد وبارق متمدد على سرير
المستشفى الكل جان متوتر وساكت بنفس الوقت

اروى و أزاد راحو لفراس

شوية و دخلت علينا مفزوعه
همست بصوت متردد _ مموجود

الاستغراب خيم علينه كلنا سألت ميس
_ ابويه !

ازاد _ كل الي عرفنا انو جاي شخص مكمل اوراق
الخروج و طلع من الصبح

بارق رد وتعب مالي صوته
_ لتهتمون مثل ما اجة راح و يرجع هم
ششتتوقعون منه !

محد رد عليه بعدها رغم جنت اريد اضحك
لأن توقعو راح يجي يلمهم بحضنه ههههه

طلعنا للبيت بعدها
استقبلتهم خاله لجين و تالين رسيل وياهن
وزوجه ايمن ...

مارين و ميس بقن حاضنات بارق و أحمد لوقت
طويل گوه هدئن لزمتهن نوبه بچي

بدت الناس تجي تتحمد الهم بسلامه

جدي وعائلته من العمارة اجوي و رائد و سامح
بقو يم اخواني معافوهم

سامح گال راح ابقى ورا الي سوه الحادث
لحد مالگاه

اجيت احچي واگول منو

بس أزاد قاطعني

ازاد _ سامح تعال عندي موضوع وياك

طلعو و اني بقيت اكل بروحي هذولي ليش
ساكنين عنه ساعة تقريبن و اجتني رسيل

رسيل _ هيله

_ نعم رسيل

_ أزاد رايدچ جوة بالحديقة و يگول محتاجها
بشغله سريعة

نزلت آلة
_ ها بومة خيرك
_ تعالي

_ ما اريد احچي وياك مساع كل ما اريد انطق تسكتني

_ لان ما اريد احد يعرف بموضوعچ فاهمه
_ و ليش متريد ناخذ حقنه منه

مسح ع وجهه وراهه جاوب و هو يفتر گدامي

_ الي يصير ورا سالفتچ قليل بحقها تتسمى
مذبحة حقچ اخذه ما اسكت عنه بس اخوانچ
ما اريد توصلين الهم حرف فاهمه
_ وليش اقنعني انطيني سبب معقول

_ كلمه مذبحة عادية ؟

شيرضيچ هسه و اني اسوي

_ اقل شي اتمنى هو اشوفه مذلول لو مذبوح

_ منعولك يشيطان يلا روحي ادخلي هسه
يصير خير

بعد اسبوعيين تقريبا يوم رجع كل شي
الوضعه الطبيعي اخواني تحسنو و بدو يطلعون

اليوم صادف خميس اجوي اهل قسور قبل الغده

انصلت بأاحمد يجيب اكل جاهز وياه
لان محاسبين حسابهم

امه گالت بس نطمن ع الولد و نروح
لتزحمون نفسكم بشي

بس بارق خجلها اصر عليها تبقى .... فقبلت

اجتي هي و عدي و افنان

گعددنه سوية ع الاكل بعدها راحو الولد ورا
مشربو چاي للاستقبال و ام دريد بقت بصالة

صارت سوالف عاديه وضحك لحدما صار
العصر اجه بارق بلغهم انو عدي يگول
حنروح وحضرو نفسكم

هي قبل لتطلع گالت للبارق
_ يمه نسيت اگلك اختي اليوم تجي من البصره
وهي جيتها من سنه حسنه و اني اريد هيلانه
تجي يمنى باجر

_ يي مابيها شي أن شاء الله خير

بقيت صافنه وبگلبي مراضيه هفف
بليل گعدت اختار شي اللبسه وملگيت شي

رحت الملابس مارين شفت فستان ابيض عدها
وبي كرز بكل مكان بي تخصيره بسيطه حسيته
متاسب أخذته من بعد أذنها طبعا والي مااهتمله

بالحالتين اخذ الي يعجبني ، تلفوني بوقتها
طفه شحن الشاحن مالتي ضايع وتعاجزت أخذ
واحد من البنات

للصبح سحلتني اروى حتى اتريگ و خليت
تلفوني ع شحن اكلت وكملت وصعدت ابدل
لأن عدي حيجي ياخذني خابر احمد وبلغه

لمن نزلت باوعلي البنات بااعجاب و مارين
عاطت
مارين _ لااا هالفستان احبه مشفتي غيره

هيلانه _ مشكلتج كتلج راح أخذه بقبتي ساكته
وسكوت علامه الرضا

باوعتلي بتعجب
_ يمته گلتيلي
_ وانتي نايمه

_ ولججج هيلااا
عزااا ركضت عنها واني اضحك لحدما نضربت
بقوه بشي منتبهت منو لحد مرفعت راسي
_ يا احمد اسفه

_ ولج يمته تكبرين
_ ما ماريد اكبر

_ ديلا روحي اجه عدي
_ يا يلا باي ،اروى اريد تلفوني

_ لحضه
انتضرت شويه وجابته الي

احمد
باسني براسي وطلعت هو بقى واكف بالباب
دخلت سيارة عدي مصار بينه حديث ابد
غير السلام لحد موصلنا لبيتهم

لمن دخلت استقبلتني ام قسوره و افنان
و زوجه عدي وسلمت ع هوايه نسوان
حسيت حلگي يبس نوب متكفيهن بوسه
بوستين رحت يم افنان

جيبلي ماي احتنگت
ضحكت وجالبتلي كاسه
البنات نشغلن بالمطبخ فأشرتلي أجي يمها

جنت مندمجه وياهن الي تريد اساعدها اروح
رغم مقبلن بالبدايه بس اصريت عليهن لحد
ملفتت انتباهي وحده سمعتها تگول

_ افنان هاي مرته لأخوچ

هزت افنان راسها
افنان _ يي!
اني متدخلت واضح من
نظراتها شگد حابه وجودي هنا والعكس صحيح
طبعا

_ مينعرف شيريد ساعة ما اتزوج غير سما
و هي مطلگه و عندها طفل و هسه هاي

افنان _ اسمها .... هيلانه اوكي

_ شلون اسم ع اساس

جنت مجهزه حتى اعارك كلش الي واهس لهلشي

_ معجبج اروح للنفوس نغيره الها بنت خالتي ؟

لتفتنا لمصدر الصوت جان هو وويا ولد شاب
_ ههههه شدعوه قسور داشاقة وياهه

سلم عليهن واني افنان جرتني وراها وطلعنا
هو سلم ع خالاته گعد خمس دقائق واضح

انو هستوه جاي من الدوام كل هذا وهو احس
گد مباوع ع جهه الي واكفه بيها خالاته وأمه
هم صارو يباوعون لمن گام اجه علينا

اني وافنان سلم عليها وباسها بعدين التفتلي

هيلانه _ الحمدالله ع سلامه

قسور _الله يسلمج إي شلونج

_ تمام اني وانت

_ دومج

ندار ديروح محسيت آلة ع گرصه بمتني
گوه كمشت نفسي ومعطت

_ وسم شبيج
_ نجبي سلامج لعدي لحلى من سلامج لقسور
ترا هذا رجلج

_ انتي نجبي خو مالاكيه بالاحضان بنصكم
غمزت وضحكت
_ ها يعني احنا مانعيچ عن الاحضان

_ يااا نجبي موقصدي يلا خلروح موصوجج

مشينا للمطبخ وهي تضحك عليه استغربت
قسور بعد هنا
جانت الحيه الي شمرت عليه كم كلمه تحجي
ويا وهو مطنشها اخذ المي الي ع السنگ و طلع

گلت بگلبي موتي بغيضچ يا حية

طلعت اني همينه رحت يم عمه ام دريد

الوضع يمهن چان اكثر ملل شوية و اطيح عليهن
من النعاس

خلص الوقت بسرعه وتغدينا وبقيت گاعده
يمهن لحدما اجتي .....

_ هيلانه هيلانه

نداريت لجهه الباب الخلفي لان صايرة وراية
شفتها افنان اشرتلي بيدها أجي

گمت من يمهن رحتلها _ ها حبي

_ دريد دزني عليچ يگول ليش متفتح خط
_ مسويته صامت هسه أتصل بي

_ لا روحيله منتظرج بيتكم
_ دروحي انتي و اخوچ

جيت ارجع بس سحبتني
_ علمودچ لان اذا وصلت الماما تاخذج سحل
_ عزاا هسه شلون

_ روحي هههههه احضني عود
_ وخري حنتحر بيج هسه

طلعت من البراني ورحت ع لبيت الخ جان
هو گاعد ع القنفه بالصالة

بقيت اباوع بي ثواني وهو هم ساكت
ورا فتره دقائق اشرلي بعيونه و گال
_ اگعدي

_ لا هيج احسن مرتاحهه بشنو ردتني
_ سلامتج اگعدي

گعدت هو مغير ملابسه لابس تراك لونه ازرق
وابيض ومفتوح السحاب شويهه من جهه صدره
ومنشفه ع رأسه ونايم ع ظهره

اجه بالي اسألة بس ترددت هوايه يلا گدرت اكمل

_ دريد ؟
_ همم

_ اگولك
_ گولي

هو گعد عدل أخذ صحن فواكه من الميز وصار ياكل
_ صار كم سنة تعرف سما ؟

لتفتت يباوع عليه ركز انظاره على عيوني
ما اخذ وقت طويل يتأمل بيهن و رجع التفت

مره لخ و بعدها سمعت تنهيدته
و بهدوء رد _ 10 سنوات

_ عششرهه !
_ امم

_ ليش متزوجتها

شال صحن الفواكه بعد مكمل من تقطيعه
و ندار رجع بخطوات ثابته گعد گدامي
رد برود اكبر _ مچنت گد المقام

_ مفهمت عليك
_ هذا المطلوب

_ اني سألتك حتى افهم مو حتى احير

_ وليش الحيره

_ راح اربي ابنها ترا
_ و شنو يعني حبيتيني وراح تغارين و تعتقدين كل
ما اباوعله اذكرها

رده چان ببي انفعال زعجني كلش

رديت بنفعال اكبر
_ شدا تحچي انت مچان قصدي هشكل وليس
حتى اغار تعرف كلش زين انت ماتهمني

_ و شنو قصدچ عيني ؟

_ مو مهم خلص

گمت من يمهه دا اعبر مستحيل اتحمل اگعد اكثر
مدااخذ منه لا حق و لا باطل

بس قبل لا اتقد خطوه بعيد عنه حاوط كف ايده
مرفق ايدي

بقيت اباوع لگدام وملتفتت عليه حجيت مستهضمه

_ عوف ايدي
_ ارجعي لمكانچ

_ معندي شي اگوله بعد
_ بس عيونچ بعد بيها فضول !

_ معرفت شي اني حتى اكمل نقاشي و اروي فضولي

_ رخه قبضته عني فنترت ايدي منه

وتحركت حسيت بي بعد ورايه ابتعد بمسافة
صغيره لتفتت عليه

هيلانه _ بعد كل الي مريت بي بحياتي و العانيت
منه و الامراض الي تلاحگني من كل صوب وناحيه
الزواج اخر شي ممكن افكر بي انت

عبست شفايفي وبلعت رييقي وحس بمراره
غريبه وحزن ما اكدر اعبر عنه لا هسه و لا من قبل

لكن فاجأني برده عليه

قسور _ استغليت وقت كسرتچ و ضياعچ اجيت بهدوء مستغل كل ثغره تركوها اشخاص غيري بيچ

هيلانه _ حتى اكون بزاوية و انجبر اوافق عليك
زين تعرف شسويت

قسور _ مو نادم عليه

هيلانه _ ها!

قسور _ بمرور الايام راح ننسى الماضي گدامنه
بس المستقبل

_ بس مو وياك

زفر انفاسه بغضب و تقرب بخطوات بطيئ مني
_ اكو شخص مصارحچ ؟ واعدچ ليش مصره على
انو مو وياي !

_ دريد

اقترب مني بسرعه وصار كلش قريب عليه بحيث
ميفصلنا شي انفاسه جانت تضرب ع وجهي
رفع اصبعه الشهاده وحركاه وهو يگول بوعيد
_ اسمي قسووور اذا تگولين دريد حشوفين شي
مشايفته طول عمرج

رديت برود مجاهله غضبه
_ اسم دريد وحدة يخليك تعرف ليش مو ويا
متتخيل شگد اكرهك

ابتسامه خبيثه لاحت طرف شفته رفع أيده خلاها
ع شعري وصار يحركه بهدوء جيت ابتعد بس .. رد

بصوت مستفز الكره هم مشاعر عزيزتي .... يعني مو
شرط تبقى على حالها

_ شقصدك

_ ما قصدي ، يلا نروح يم امي
_ مو قبل لا افهم

_ تلعبين ؟
_ شلعب لتغير الموضوع

تحرك بكل هدوء وسحبني وراه خلاني اگعد
ع القنفه وراح جاب صندوق لمن فتحه جان
عباره عن شطرنج واكو ورق وصندوق ع جهه
اشر عليها وگال هاي طاولي

مگدرت اخفي ابتسامتي هاللعبه جانت انيستي
بأيام جان الظلام ياكل بيه

_ هاللعبه تعرف بشنو ذكرني
_ اعرف

_ تعرف تلعب ؟
_ يي

بدينا نلعب واني اندمجت أحاول أضيع الاحراج الي
صار

_ يلا دورچ حركي البيدق

حركته و باوعلي بندهاش
_ شوكت متعلمه

_ من زمان
_ بيدق حربي اصيل انتي

لعبنا بتركيز ساعات لحد معطت فرحانه
_ كش ماااات فززززتتت
_ بعد مرة

_ خسرت اربع مرات متتعب
_ لا و هالمرة البيادق السود الي

_ ما ، ماانطيهن احبهن اني
_ شمعنى

_ يشبهني
_ ماكو وجه مقارنه شوفي كل زار (نرد) و كل بيدق
نحركه لازم تكون حسب خطة بغض النظر مو مهم
الون الي نختاره باللعبه يصير يكونن كلهن
بيض او سود ؟

_ لا

_ تماما الحياة هيج كل من يظن جهته هي البطلة
و كلاهما عدو

_ مثلنا

_ ههه مثلنا

_ على شنو تضحك

_ ممكن اعادي كل شي الا انتي
_ نلعب بعد مره ولو انت خسرت اربع مرات
واني بس مرتين

_ خوش شرده يي نلعب بس هالمره تحدي
_ اوكي

_ اذا فزتي شنو تريدين
_ اريد اسوق سيارتك ومو مهم اذا صار بيها
شي او تفلشت

_ اخ گلبي
_ ههههه وانت شنو تريد

_ اطلب منج طلب وتسويته
_ شنو ؟

_ لا ميصير تعرفين هسه
_ صعب لو سهل
_ سهل
_ اوكي مو مشكله

لعبنا هالمره وجان يتحرك بمهاره أكثر مني
وبعد فتره باوعت مصدومه لمن رجع نفسه
ع القنفه بهدوء

_ شعور الفوز إلا بشده
_ شنو هاي غشيت

_ لا حبيبتي خسرتي
_ حبيبتي بعينك لتگول حبيبتي

_ يلا ميخالف عود اخليج تسوقين
_ صدوگ

_ يب يلا هسه فزت گومي
_ وين

_ ابقي واگفه هسه اجي
_ ماشي

بقيت واكفه خمس دقائق تقريبا رجع نزل هو وكف
ع بعد خطوات مني

وسحب ايدي جنت اباوعله مستغربه
لحدما لبسني حلقه حلوه جانت كولش

ساده وبيها شكل قلب صغير كولش بنص
حيل نعومتها تجنن مگدرت اخفي ابتسامتي

قسور _ كل مره تتحججين بشي لمن اطلب منج
تلبسين الحلقه هسه هاي احلى مو ابقى لابستها

هيلانه _ استغليت اللعبه حتى هيج يصير
شرط فوزك

قسور _ لا مو هذا

قبل لا اسألة شنو لعد سحبني من ايدي أكثر
عليه لحد ما نصدمت بصدره واديه طوقني
حاولت اتحرك بس جان مثبتني كلش بقى

حاضني لوقت مگدرت أحسبه شكد انو ثواني
دقائق أو ساعات هيج حسيته طويل حيل
ولمن رخت أيده ابتعدت اني جان يباوعلي

مبتسم دنگ راسي خجلت من هالنظره رغم
خططت اتعارك ويا لمن يعوفني بقيت ساكته

_ راح انام بس قبلها تريدين اوصلج لو تبقين
_ لا ابقى نام اني يوصلني عدي

_ لا شلون يصير تعالي

مگدرت احجي شي راح گدامي واني ورا
سلمت عليهم وطلعت

صعدنا بالسيارة وهو ساق بلحضتها ذكرت
بنت خالته

_ مساع الصبح تدخلت بوقت مناسب جيت
اتعارك وياهه
_ لاحضت هالشي لهذا دخلت

لتفتت عليه
_ ليش انت جنت موجود قبلها
_ يي جنت اباوع عليج واكفه گدامي فيت
بس بعدين سمعت الكلام ودخلت

بقيت ساكته محجيت شي لحد موصلنا
_ شوف وقت فراغ حتى نروح لبن سما
_ يي اكيد

_ باي
_ بأمان الله هيله

نزلت واني عقلي شويه ويهج بسبب تفكيري
كل ما حاولت ادفع قسور بعيد الگاه يمي

لمن رجعت للبيت الوضع جان هادئ كلش
صعدت الغرفتي بدلت وليست شي خفيف
اكدر أنام بي واخذت علاجي اجتني مارين

حجيت عن الصار بيومي وفاجئتني لمن گالت
اروى وبارق راحو يخطبون آلة الموضوع يوتر
واني احجي بدء تلفوني ينخبص بصوت

الاشعارات بي ومستمره فتحته وانتبهت
الاشعارات جايه من الواتساب رقم غريب جانت
مقاطع وصور فانتظرتها تحمل .......

.

مـاريـن

بارق _ روى يلا نمشي

مارين _ وين رايحيين و شدعوه هالگد طالع حلو

_ يمته طلعت مبهذل ولچ

_ لا مو ههيج بس مامرتاحتلكم

_ السالفة تبقى مچلبة مثل العلچ بينجن اخلص
البالي ويصير خير

اروى _ انت بس اسكتت

_ ساكتتت يبوي

اروى _ رايحيين نخطب آلة

مارين _ و منو ؟

بارق _ بنت صگر

_ ها اااا !

.

رسـيـل

دخلت للحمام اسبح أزاد متمدد يلعب بتلفونه
مطولت وطلعت لگيت الضوه مطفي

_ أزاد
_ ها حبيبتي
_ عبالي نمت
_ لا منتضرچ
_ اذا نعسان نام عندي شغل هوايه اليوم
_ تصبحين ع خير
_ وانت من اهله حبيبي

شغلت ضوه خفيف و گعدت اسرح شعري
فكري مشغول بتالين ! شلون تريد اگوللها
أسرار اخويه شلون ابدي ولأهم هل
راح تبقى وياه بعد متعرف لو تتركه مثل

ما تعود محد يبقى وياه ، رغم ما جينه من
ام وحدة بس چان دائماً اكثر شخص ممكن
اعتمد عليه

بكل حياتي ، تنهدت لمن اجة بالي اول مره شفته
بيها

قبل اكثر من 11 سنه واكثر ....

چان الشتاء ومنطقتنه غرگانه بمي المطر شبابيك
البيت المكسور أمي تخلي بمكانهم كارتون بس مفيد
يبقى الهوى البارد و الرطوبة محتلين جو البيت

بوقتها اخويه صغير عمره سنه و كم شهر

گاعده يمه قريب ع صوبه النفطيه احس اعضامي
جامدات اباوع على اخويه منكسر خاطري عليه
شنو ذنبه يتحمل كل هالبرد
فزيت لمن ماما صاحت بيه

ام رسيل _ انتي

رسيل _ ها ماما

_ گومي جيبي المواد نلف الدولمه

_ بس ماما مااريد اسوي

_ وشنو عيني تاكلين براسي هيج اتعبي شوية
مشوفيني حامل ؟

سكتت ما اگدر اجادل وبگلبي غصه رغم صغري
بس ماما طول الوقت معاديتني كل هذا لان اسمي
رسيل لو اكو شي لاخ مااعرفه
مرات انسى اسمي لان مينذكر بالبيت

بس بابا الي نادرا ميجي يسميني بأاسمي
ويجي بس حتى ياخذ فلوس من أمي ويروح
أمي تطبخ للناس ومو دائماً نحصل فلوس من

هاي شغله لان وضع العراق تعبان والناس حياره
بوضعها واستقىرارها كثر من كل شي

لكن وبيوم

دخلن خالاتي لبيتنه حسيت صار بي دفو حلو
سلمت عليهن وگعدت العب وي جهالهن

دائماً يحچن يمي ما تخليني اطلع من الغرفه
او تحرص ما اسمع كلامهن و اني همينه چنت
ما أهتم لشنو يحچون اكعد العب وي جهال

كلن هالمره غير حسيت نفسي كبرت اكثر من
للازم وكبر فضولي وياي سمعت أمي تگول

ام رسيل _ يي داده لا يوصل ولا شي صاير قد نوب

_ زوجج مسويلي عله شلون متحملتي

_ عاد احسن من ما اگعد وي نسوان اخوانچ

_ و انتي صادگه ، بس اگلج شغله مو زعلين

_ گولي

_ اخاف مزوج عليج يمعزاية

_ لا وين يزوج الفگر مالته واصل لمواصيل
مالهن تالي

ردت خالتي الثانية
_ لو اهله ما متبرين منه مصار هيج بيچ

_ غير من بنت عمه الساقطه الله ليرحمها

.... استغفرالله

_ اسكتي انتي دومچ هيج ممچذبه اختج
هي لو ما ساقطة چان ما چابت حملت بالحرام

_ ابن عمها و خطيبها شنو حرام

_ گتلج سمعت من اخواته بس چان حاجزها
يا خطيبها

_ استغفرن ربچن ان بعض الظن اثم

_ يا ظن لعد ليش شمر ابنه ما يعرف ارضه وسماه
يمكن ميت

_ و هي عروس ما صار الها سنه وصغيره وتموت
تلگيهم كاتليها

_ حرام عليج داده هو أكيد المعتدي عليها
انتي مسامعه بنات الجنوب شلون عاداتهم
حماتي مزوجه هناك لا يختلطن و لا بناتهم

و شبابهم حتى يزوجن و هن ميشوفن منو
زوجهن هنا بغداد ارحم و ارحم و كافي كل
ما نجي نحچي بهاي السالفة تعبت منها

_ و اني شتگولين عليه زوجي يجي بين فترة
وفترة و امة الي ما راح اسامحها طول عمري
سمتلي بنتي ع اسم ذيچ الماتسمى !!!

_ ارحمي روحچ وبنتچ كارهتها ع سالفة متسوى

حاولت اركز بكل كلامهن عن منو چانن يحچن
و منو الي شمر منو بس مافهمت

سالفة بقت بالي ليالي وايام و ما گدرت اعرف
اكثر عنها لا اگدر اسأل أمي و لا اتناقش وي ابويه
اكتفيت بسكوت ، ولدت ماما بسلامه و چانت

بنيه تشبهني بملامحي بس چانت بشرتها لونها
أفتح من لون بشرتي بس هم سمره أمي طارت
بيها و هنا بدءت الحرب النفسية تزيد ندفعت

بعيد صرت مجرد بنيه تساعد بشغل و حتلو
أنام بدون اكل او مريضه او حتى ابچي محد
يعرف ومحد مهتم

لكن ضنيت هذا الاسوء بس چنت غلطانه

بنهار يوم صيفي حار الوقت عصر تقريبا
سمعنا صوت دگ قوي بالباب كنما راح
يوگع كد ما ندگ گلبي صار يرجف من

الخوف واخوية يبچي بلوعه بحضني
راحت أمي و فتحت الباب ومنو دون
توقع چانت الشرطه

ام رسيل _ سيدي فهمني شكوو
حجتها بخوف

الضابط _ ابتعدي ع جهه خلونا نفتش ونروح

هالفتره جانت الشرطه تفتر ع البيوت علمود
الاسلحه الي ممرخصه

ام رسيل _ سيدي اذا ع سلاح الله يشهد معدنا

تجاهل كلامها فهي اردفت

_ دخيلك لعد شكو

الضابط _ زوجچ نللزم بقضيه مخدرات يتاجر بيهن

لطمت أمي صدرها و صارت تبچي اما الشرطة
فلشو البيت اكثر مما دوروه وراحو

مگدرنا نسوي شي او حتى نروح وراه ونشوفه
انتظرنا يومين واجة عمي من البصرة مو دائماً
يجينا بس هو أكثر شخص قريب النا من بيت

گعد مقابيل أمي يباوع برود و ملامحه
غاضبه

عم رسيل _ رجلج احتمال ما يطلع من سجنه
شچم سنه ليچدام

بچت أمي وردت
ام رسيل _ وشلون بيه اني وجهالي

_ مرت اخونه ما نعوفچ بعينه نشيلچ و اذا تردين
من الصبح نحمل واخذنكم هناك لينه

_ لا خويه ما اگدر
بعد ماعجز من اقناع امي بالطيب گال

_ ما ترهم نعوفچ وحيدتچ بلايه رجال اشوفن حل
و ردلچ خبر

_ براحتكم

راح هو وامي ظلت تدعي على ابوية و اعمامي
و تخاف لا تجي جدتي يمنه و هي وحدة متحب
الثانية مثل ما اعرف .

توقعت عمي راح يجي يسكن يمنه لان ما مزوج
و ما عنده شغل هيج فكرت بس صار شي غريب
فچاة دخل شخص جديد بحياتي
ويكون راحة بال الية

بعد اسبوع من جيات عمي النه بس يعوف المسواگ
و يسلم ميبقى

هالمرة بقى و أمي سوتله عشه اما اني گعدت يمه
فرحانه بوجودة يمكن لان متعودت على احد يستمر
بجيته النه كل يوم .

تعشى و خلص صاح بأامي تجي يحچي وياهه

وگعدو صدگ

_ اسمعي ام رسيل

_ تفضل خويه گول

_ انتي تعرفين رجلج عنده ولد

هزت راسها امي بأايجاب والاستغراب
مله ملامحها

مسح عمو ع لحيته و رفع راسه الها و حچة بكل راحه
صارله سنوات ساكن بدار بعيد عن ابوه و...

علت امي نبرت صوتها
_ لحضه شعليه وين عايش

_ لان راح اجيبه يعيش وياكم

_ اخويه عادل لا مستحيل ادخل هيج واحد
عندي بنيه ؟

_ احترمي روحچ ترا اخوها

_ اخويش ابن ح... استغفرالله

_ شنهييي كملي ليش سكتي ؟

_ تعرف ابن شنو ما اريد ادخله بيتي

_ منين سامعه هالخرط

_ كلها تعرف بي اني مو غشيمه

_ بس مو بكيفج بيت ابوه وحقه

_ هو ابوه ما يريده

_ لا يريده غصب عنه تريدين أهلا وسهلا
ما تريدين اخذ فروخنه و انتي تاني رجلج
يم اهلج

_ اخذو رسيل هذوله بعدهم جهال

رفع حاجه بغضب وگال ، لو كلهم لو ماكو

_ انت تريد تجبرني

_بكيفج احسبيها مثل ما تريدين

عافنا وطلع وهي گعدت تعيط وتتحسب عليهم

" الله ينتقمم منككك عادل تاااليي عمري يگعد
واحد قذر بيتي

واني كل فكري أمي هستوها شمرتني صحيح
عمري ميجاوز 9 سنين بس اكو شغلات عمرها
متنمحي من ذاكره مثل هذا اليوم الحرگه الصارت

بگلب طفله صغيره مستحيل تطفئ للموت من تقدم
كل شي للأشخاص المقابيلك بالي تگدرله و نشوفهم
ميريدوك بكل مره و مره هذا عقاب اخس من الاعدام

انتهى هذا اليوم على عياط أمي و دعائها ع كل
شخص يجي بالها

ثاني يوم بليل اجة مره لخ بس هالمره
وياه ولد يشبه عمو هواية شعره البني وعيونه
الواسعه الي بنفس لون شعره وجهه ابيض

هواية ماخذين منه اني واخواني بس بنفس الوقت
چان هزيل بشكل مو طبيعي وعيونه جاحضه
مگدرت اسستوعب الموضوع لمن عمو گال هذا
اخوج ولازم تعتمدين عليه منا وجاي

حسيت بالغرابه و نفور خاصه معامله امي آلة
كأنما تتعامل ويه شخص بدون احساس ، كل
هذا وهو ساكت صوته قليل ينسمع

عمره بهذا الوقت چان 17 تقريباً

بيتنه بي غرفتين وحدة انام بيها اني و الثانية
غرفه أمي بالصيف ننام فوگ السطح اغلب شي
لان الكهرباء مقطوعه ، اما بشتاء اكدر أنام براحه
رغم البرد .

چان صهيب يرجع من دوام و يروح يشتغل ما اعرف
شنو بس يحاول يسكت أمي عنه و يرضيها . او يمكن
يسوي هيج لان عمو موصي !

علاقتنه اني وياه عبارة عن اكل يمتة ما اشوفه راجع
اصبله من الاكل الموجود و اخذه للصالة ...

بقت علاقاتنه بهالمنوال لحد ما بيوم

چنت اللعب بصف وي صديقاتي و بصدفة تلبيستي
كمشت بمسمار و خلاها تنشگ خاصه هي قديمة
فبسرعه نشگت بچيت هواية بيومها و المدرسات

گوه خلني اهدء كل ضنهم عمودها بس اني گلبي
يرجف خوف من أمي

ومثل ما توقعت اول مرجعت شفتها بالمطبخ تتغده

شافت وجهي أحمر و ابچي

ام رسيل _ شبيج يمعزايه اكو واحد تعرضلچ ؟

رسيل _ لا

_ المدرسة ضربتج

هزيت راسي بنفي

اردفت هي
_ شبيج لعد

شهگت بچبه وگلت
_ تلبيستي ،گلتها و شوفتها الشگ

گبل گامت كفختني ع راسي و گرصتني

_ و لج منين نجيب تردين نگدي و ابوچ عافانه
بالفگر بنت الفگور شورطت روحي بيكم

چنت ارچف وهي دور بعيونها عن شي تضربني بي
وكامشه ايدي بقوه ما گدرت بهذا ضعفي افلتها

بهالاثناء دخل علينه صهيب عن غير العادة اجة
من وقت صفن علينه ثواني واجة سحبني من يمها

كمشت بكتفه وتحاميت بي
وصارت الرزايال عليه

ام رسيل _ دميل عنها بس عوزي ابن الشوارع يوگف بوجهي

تجاهل الي گالته لأن اصلا تعود عليه
صهيب _ شسوت !

_ معليك داگول وخرر
_ دفعته ورجع عوضعه واگف گبالها

حچيت بصوت مخنوگ و دموعي ماخذه مجراهه
_ نشگت تلبيستي

اردف هو يباوع لماما
_ اشتريلها غيرها
_ ابن الفگور اني خوما الگي الفلوس ع شجر

_ كل يوم انطيچ غير مصرف عمي ليدزه
_ ووشنو تحاسبني ع تفاليس هاي

_ يعني متشتريلها
_ لا انت حير بيها مو امنك عمك علينا

حچتها بأستهزاء وضحكه ما اعرف اوصفها غير
انها حيل تضوج خاصه من شفت صهيب يعض
شفته بقوه وقابض ع كف ايده

_ جيبلي إبرة وخيط
گالها وابتعد عني طلعت وراه شفته راح للغرفة
الي أنام بيها

لحگته و طلعت من جرار بكرة الخياطة وابرة
_ شسوي بيهن

_ اخيطلچ
رمشت بعيوني اكثر من مره مداستوعب
لحد محرك ايده يأشرلي ع الحمام

لفتت مره الحمام ومره عليه وگمت اخذت
ملابسي و دخلت بدلت وبگلبي اگول _ وين
اكو ولد يعرف يخيط

هيج فكرة ما خذتها يمكن لان چنت اشوف
ابوية لا شغله ولا عمله ممتعوده اشوف هشكل

طلعت وخليت ملابسي بين اديه أخذها گلبها
ع البطانة وصار يخيط واني اباوعله

رفع راسه اليه وهو ديسوي بيها بعده
_ البسيها كم يوم اني اجيبلچ غيرها

ابتسمت وهمست
_ شكراً
_ بعدچ بلايه غده روحي اكلي

هزيت راسي بنفي و اردفت
_ مو جوعانه
_ سوي حتى اكل وياچ

سكتت ثواني و رجعت جاوبته
_ ماشي
من هذا الموقف تحسنت علاقتنه يعني
صرت اسألة او يكون بينه حديث قصير

وبقى كم يوم يشتغل وميجيب الامي فلوس
وهي تخبلت عليه

وفترة وجابلي ملابس جديدات بچيت گد
مفرحت بيهن بس أمي كل الگدرت تسوي
هو تتغلط عليه هو وامة و اهلنا يسكت

هو و تبدي مثل الجمرة بگلبي عجيب
شلون يگدر شخص ينهان وهو ساكت ،
مرت الايام وهو چان كل وقته يدرس

لو يروح يشتغل بكافي قريب علينا
ومره صادفت طلعتنا سوة الظهر
بس اني دوامي قريب عكسه يروح

المنطقة بعيده لمن طلعنه من الفرع
مرت سيارة كولش حلوة وراقية
كل يوم هي بنفس المكان ....

نزلت منها بنيه بعمري لكن جميلة
بشكل جبير شعرها الاشگر وعيونها
شكلها يختلف عني درجة كبيرة

ملابسها و حتى حياتها
دائماً من تجي اسأل نفسي سؤال
ما اعرف جوابة شگد اهلها يحبونها

يهتمون الراحتها بيتهم فرق فرعين
لكن تجي بسيارة

صار دائماً صهيب يجي وياي ومرات
يبقى واگف واني ادخل ،

چنت احسهه ينتظر السيارة والي ثبتلي
هو مرة دانمشي اني وياه وبمسافة بسيطه
لمحتها هي واثنين ولد يمشون سوه

واحد منهم اخوها شايفته اكثر من مرة
بس الثاني معرفته يمكن اخوها الخ هيج
فكرت واني امشي لاحضت صهيب

ماكو لتفتت لگيته بعده بمكانه وعيونه عليهم
صحت بأاسمه اكثر من مرة بس مسمع

_ صهيب

انتبه و رجع عينه عليه

_ هاي الطالبة وياي اسمها تالين وهذا اخوها

حچه برود
_ وشعليه

_ ها اوكي يعني متدريد تعرف عنها شي

_ شي مثل شنو

_ بيتهم فرق شارعين منا سمعت من صديقتي
ابوها يشتغل بداخلية ما اعرف شنو نسيت شغله

ردت بسرعة واني ليومي هذا أتذكر نضرات الخيبه
بعيونه _ ادخلي تأخرتي

_ وين رايح هذا مو طريقك

_ منا اقرب

گالها وندار ابتعد اميال وميال ، من يومها صار
يطلع قبلي ميروح وياي او يوصلني نص الطريق
و يتحجج بشي ويروح

مرت ايام و اشهر و سنوات وصهيب راح قدم
ع جيش وصار يروح اشهر تدريب منشوفه بس
مره ولا اكدر اخابره عشت بوحده چبيره اخوني

بدو يكبرون و معتمدين عليه اما أمي طول الوقت
مهتمه بنفسها وبس وقسوتها وصلت لخواني تمنيت
تبقى بس عليه لكن هم اضعاف حصلو كل مره احميهم

چانت تضربني ما حترمت انو صرت مراهقه حتى لمن
اجتني الشهرية معلمتني شي عنها ولا شسوي بقيت
ابچي عبالي صارلي شي لكن بصدفة خالتي موجودة

عدنا وهي و صهيب حاولو يهدوئوني ولمن راح فهمتني
عليها بوقتها متت من الفشلة لأن خبصت صهيب وابچي

واگول دم ، شلون راح اشوفه وجهي صرت اگول هشكل
وخالتي تضحك عليه .

وهنا صار شي متوقعته ابد

رسمت كم رسمه اني واخويه الصغير وفرحانه لان
ما باقي بس أقل الأسبوع ويجي صهيب صرت
احسب آلة مثل الاشهر المضت لهذا هيج عرفت

كل أقل الشهرين يينزل چان مجرد تخمين بس
مفرحني .

للعصر اجتي أمي تضحك ووفرحانه

_ رسيل
فزيت اول مره تصبح اسمي عدل بدون شتيمه

_ نعم ماما
_ البسي شي حلو وعدلي شعرج خليلج حمره
كحله

_ ليش خالاتي حيچن لو نروح عرس

غلست مجاوبت بوضوح بس گالت
_ يي استعجلي

گالتها وفاتت لكتتوري دور بي طلعت كوستم شتررته
الية خالتي ويمكن محد يصدگني اذا اني ممصدگه
الي اشوفه أمي تختارلي ملابس !

لبسته ومشطت شعري سمعت صوت أمي ترحب
و تضحك طلعت بحماس لكن تفاجئت بخالتي و بناس
ما اعرفهم

مراة مبينه بالاربعين وياهه اثنين بنات شبابات غير
خالتي

عاطت بيه اجيب الضيافة اخذتها ودخلت سلمت
ردن وشوية وباوسني

بس ضيفتهن وطلعت مبقيت بس فضولي چان أقوى
فگعدت اتسمع و تفاجأت

_ يي داده مثل مگتلج هو ابني الوحيد وحابه ازوجه
19 مو شوية و ابوه ميقصر وياه من ناحية مصرفهم وهالامور

_ و نعم منكم وان شاء الله خير بس لازم نبلغ عمامها

ضحكت خالتي وردت
_ شيريدون يگولون وانتي راح تناسبين ناس
صيتهم معروف

_ ههههه ونعم منچ ام دلال ,اشربو عصيركم

ورا فتره مشن فگمت أرتب المكان وفززني صوتها
جانت طالعه ورا النسوان الباب ورجعت

_ لا ماريد ندارتج الخميس الجاي يجي الولد يشوفج
_ ياولد

_ انتي ثوله مافهمتي النسوان اجن يخطبنج
_ مااريد ازوج

_ مو بكيفج
_ صهيب يدري ؟

_ الدرا او لا طسيس قابل اسمع حكايتهم
بقيت صافنه لا اخذ ولا انطي وصرت احسب
شكم يوم ويجي صهيب توقعت الاربعاء مثل
ذاك الشهر وبقيت طول الأسبوع ع هذا الامل

بهالاسبوع صار اهتمام أمي بيه يخليني مخنوكه
لان اعرف مو علمودي بس تريد تتخلص مني

واجه الاربعاء خلصتها بالحديقه اگول هسه يجي
هسه وماكو ابد مااجه فگمت واني محترگ گلبي

فتت ع المطبخ اباوع لوجه أمي

_ خير

_ يمهه أني ماا اريد اشوف احد باجر والله مااريد

_ غصباً ماعليج ياالله ولي

_ مااااماااا ماريد مو جبر هي

استمر عياطنا لحد ما كمشت الماسحه الي يمنا وزمخت

تعلين صوتج بوجهي بعدني مامبتعده اجتني ضربه لدرجه
العوده تكسرت صرخت بصوت عالي وهي بالنص البقى
عندها اجتي تكمل الكتله بس لحگت اشرد واقفل باب
الغرفه هم زين خله قفل بيها صهيب

ثاني يوم من الخوف والسهر بسرعه فتحت الباب
من دگت انطتني ملابس واني إيدي گوه احركها
من الألم

العصر اجت خالتي وبقت تبوس بيه وتگولي طالعه
تخبلين واني بالي مو يمهن وجسمي رعش لمن گالت
بعد شي ساعه ويجون

ورا عشر دقائق اندگ الباب راحت خالتي تفتحه
واني أمي دخلتني المطبخ وكلي هَم

بس كل همي راح من سمعت صوتهه يصبح بااسمي
احس روحي ما ركضت لا طرت من شافني بقى
صافن ع شكلي واني بسرعه حضنته وابچي

صهيب _ صاير شي ؟

خالتي _ لا ابد ، ماما خربتي مكياجج والناس ع جيهة

صهيب _ ياناس

بقن ساكتات _ مو اگول يانعل جايين

أم رسيل _ ناس تخطب بنتي عندك شي ؟

بعدني عن حضنه ويمسح بدموعي
_ معليج امج خرفت لا أحد يخطبج ولا هم يحزنون

_ هيي انت تطلع من بيتي هسه وبنتي ازوجها

صهيب _ لو تموتين اشگگه اليگرب منها

رادت تسحبني منه بس هو دفعها حيل

_ غيري ملابسج وتعالي

سويت مثل ماكال واول ماطلعت من الغرقه لاگتني
أمي سحبتني من شعري تريد ارجع للغرفه

اخخ شعري عوفينييي

لمن صرت اعيط اجهه صهيب مره ثانيه وهالمره
راد يكتلها بس خالتي وگفت بوجهه تهدده انو راح
تشك ثوبها اذا ماابتعد

ضحك بااستهزاء بوجهن
واني بچيت بنحيب وهو يعيط بيه مانعني من البچي

اشش لا انعل والديج بهالظهريه .....

مشيت وهو يجر بيه احس ايدي نخلعت لحد مو صلنا
للكراج وشاف كيه صعدنا بيها

كل هذا وانا ما اعرف وين رايحيين
وبعد وقت نزلنا بمنطقة قريب بغداد الجديدة

اتصل اخوية بشخص و ستعجله بالجية
أقل الربع ساعة واجة ولد شاب يعمر صهيب يبين

- ها ولك
_ ابقى هنا اكو موضوع أحله وارجع اختي 9
دير بالك

_ تم روح بس تحتاج شي اتصل ثواني اصير
يمك
_ متقصر

بقيت گاعده بهالمكان لليل مليت كلش ومن
بدت تضلم اجاني نفس الولد

_ خويه تعالي وياي
_ وين صهيب ، وين نروح !

_ لصهيب
_ ها ماشي

حجبتها ورحت ورا صعدنا تكسي لحد موصلنا
لمنطقه ع أطراف بغداد تقريبا جانت حلوه

وجبيره مشينا شويه والولد دخلني لبيتهم
لاگتني امه واخواته سلمن عليه وتعشيت
وحده منهن قريبه على عمري اجتي انطاني

ملابس منها علمود اسبح رغم جان كل شي
طبيعي بس ماكدرت ماابجي من الوضع
الي خلتني أمي بي يومين واجه صعيب

دخل سلم على كل العائلة والبنات واگفات
يمهه عادي استغربت

_ هي كم يوم ارتب وضعي واخذها خالة

_ اسمع مني وابقوا يمي وين تريد تهجول اختك
أمي

_ لا تخافين اعرف شسوي

_ كلام أمي صح يوم حاولت اقنعه بهواي حلول
بس هو عاجبه وضعه خلي نسكن

_ معليك ، تالين تعالي وراي

_ شتريد منهاا

_ كافي خاله

گام ديطلع واني رحت وراه وگفنا بالحديقه
_ تالين اني عندي دوام راح ارجع الاحق

_ وابقى هنا يم ناس مااعرفهم

_ أذوچ ؟

هزيت راسي بنفي _ لا

_ مرات ناس مانعرفهم بيهم خير النا اكثر من النعرفهم
وام حسنين خالتي تصير مو غريبه يعني

بقيت ساكتهه محجيت وهو راح بقيت يمهم
ايام كلش هواية درست لعبت وتصرفت كبنيه
طبيعية لحد ما كمل بيت صهيب وعبالي راح

ترتاح وي اخويه بس تفاجئت بأانو خالته
مقرره تزوجه هذا جان جحيم ثاني لازم
تعرفه تالين مااريد افكر بي تتعب روحي ..........

وبيوم جنت ناويه ابقى بغداد بس شي غير
رائي لمن سمعت صديقاتي يگولون المحافظات
الي حابين يروحون الها بصدفه سمعت تالين

حنروح الموصل اجتني رغبه قويه اروح لهناك
مااعرف بشنو جنت افكر بوقتها بس لروحه
للموصل استهوتني

صهيب نشغل فتره تدريب وصار نادرا يجي امي
معارضت اصلا أو مهتمت هيج اصح كملت كل
شي بمساعده عمي وصهيب كل ميتواصل وياي

أتجنب اگوله وبسرعه اغير الموضوع
وفعلا رحت للموصل وداومت واول صديقه
مقربه لگيتها بوجهي هي تالين هالشي خله

بگلبي سعاده جبيره ، چنت اتمنى اتصل بصهيب
حتى بس اگوله انو البنيه الي جنت يوميه تراقب
روحتها ورجعتها من المدرسه حتى أكثر مما تهتم

بدروسك صارت يمي كلش قريبه هم مني ....

گطع خلوتي صوت ازاد وهو يگولي

ازاد _ حبيبي

رسيل _ ها عيوني

ازاد _ بشنو تفكرين صار ساعه اعيط

رسيل _ اااا افكر بكلام الدكتوره انو صعب
اصير ام

_ لتفكرين بالموضوع الدكتورة گالت انتي سلميه
بس مجرد وقت

_ بس اخاف فعلا .....

اخذ كف ايدي ورفعه قريب وجهه وباسه
وبعدين نزله وخلاها بين اديه وهمس

_ اش لتخافين من شي بعدين بعدچ صغيره شورانا
يعني

_'مرت أيمن گالت ...

_ اش معليچ بيها هاي بذات لا تسمعين منها كلام
فهمتي

_ أن شاء الله

.

تـالـيـن

صهيب _ بوچ ضالم

تالين _ تحچيي عليه شنوو ضالم شسوه

_ وين أكو واحد يطلب مهر بنته هالگد

_ شگد يعني

_ ليش متعرفين

_ لا

_ 50 مليون حاضر

_ ههههههه

_ تضحك الفاهيه مليون ينطح مليون ماكل شارب

_ ميخالف اني استاهل

_ ناصبه عليه ؟

_ يااا لعد شگلك

_ اشو مهر اختي مو هيج

_ رسيل و اخوية شي و احنه شي مو

_ تستاهلين ماي عيوني سهله الفلوس بعدين
اطلعهن بيچ

_ شلون تشغلني مثلا ههههه ؟

_ أمور علمية بعدين اعلمچ

_ ههههههه باي حروح

ثاني يوم اجوي الزلم ونقرت الفاتحه رسائل جانت
تگلي تصرفي طبيعي بس ماكدرت آمنع ابتسامتي
بليل گعدنا اني وامي ورسيل واكيد لمن تشوفنا
مرتاحين تذب سمها مرت اخوي العزيز

_مبروك انخطبتي

_ الله يبارك بيچ

_ اگول عمه

_ گولي يمه

_ انتي مو لازم تسوين فحص التالين قبل لتزوج

باوعتلها ماما مستغربه
_ فحصيش هذا

_ عذريه

_ وليششش يعني

_ لتفهميني غلط بس هي چانت مخطوفة شدراكم
شصار مصار و بعدين انتو منطينها الناس معروفة
خو ما تفشلون

_ نعرف الصار منو گلج مانعرف هالموضوع تنسينه
لان اخوانها اذا سمعو ميسكتون

_ امها موجودة و ابوها فنصايحچ احتفضي بيهن
نفسچ

كالتها رسيل بستهزاء كأنما تقصد شي وقبل لترد
حنان

كافي سدو الموضوع بعد ما اريدة ثنفتح بنتي
و مبيها شي عوفي عنچ هسوالف

تنهدت بضيق و طلعت من يمهم مااعرف شوكت
اخلص من كل هذا ....
يـتـبـع فـي مـا بـعـد .... 👿♟️🎭

الباقيات الصالحات
سـبحـان الله
الـحـمـد الله
لا الـه الا الله
الله اكـبـر
لاحـول ولا قـوة الا بـالله
اسـتغـفـرالله
سـبـحـان الله و بـحـمـده
سـبـحـان الله الـعـظـيـم
الـلـهـم صـلـي عـلـى مـحـمـد والـ مـحـمـد