رواية حين يزهر الحجر الفصل الحادي والثلاثون 31 - بقلم Shaqraa

مساء الخير

حين يزهر الحجر
الجزء ٢٧

اني طلعت من المطبخ ورحت يم بيبي فليحة...
شجاع يم خاله وعدهم خطار بالديوان...
بقيت اسولف وياها وتحجيلي عن طليقة شجاع...
كالت جدة داري وريحي افاده..
ذيج المنعولة موتته وشلعت گلبه...
هو يكره المرة الماتحسبله حساب...
وهي جانت ضاربته عرض الحايط..
تطلع بلا ماتكله ويجي ويسمع طالعة ويتخبل...
وصلفة وماتحشم احد ..
شما احجي عنها مايكفي...

كتلها لا بيبي تطمني حاطته بعيوني...
غير زوجي وابو بيتي واريد راحته...
اي عفية بيج بنيتي الله يرحم ابوج على هالرباة...
واني احاجيها اجو البنات فرشو وكمت وياهم...
ساعدتهم وانقل الاكل وهن يتغزلن بيه ويحرگن بمرت مؤيد ورهام...
ماعرف ليش هيج رغم منعرف بعض بس ع اعصابها تباوعلي....

كملنا عشا وساعدتهم بالتعزيل ماقبلو...
صار وقت اذان العشا رحت صليت ونزلت...
الحجية مرت ابوه كلتلي ليش صعدتي لو مصلية بغرفتي...
كتلها لا خالة تسلمين ماكو فرق...
مرت مؤيد كالت يبي كلساع تصلون ..
كتلها الله يحب يسمع صوت عبده شكد مانصلي يتقبل..
لا خو صلوها مثلنا...
صلاتكم وصلاتنا وحدة ماكو فرق...
يبقى الفرق الانسان وصدقه وي ربه اذا توصل صلاته او تنرد...
ضحكت بضوجة كالت..
شكد متعصبة...

ردتها سماح..غلطانة خيه لان ماتعرفيها بعدج...
وجرتني من ايدي..
امشي خية وياي عندي امانة اريد انطيج ياها..
رحت ودخلنا لغرفة...
جابتلي من الكنتور علبة ملفوفة بوصلة...
فتحتها وطلعت منها ملاوي ثنين..
راسهم بي حية متخالفات ..

كالت ذني ملات المرحومة..
ذهبها وزعو علينا وهاي حصة شجاع...
وشجاع انطاهن الي ..
بس اني كتله خليهن يمي ومن تزوج انطيهن لمرتك...
ومن تزوج ماهان عليه انطيها لذيج الحقيرة...
بالعافية عليج حبيبة تستاهلين..
حبيبتي مشكورة وربي يرحمها وينور قبرها...

رجعت بالعلبة وانطتنياها...
اخدتها وطلعت لاكاني شجاع...
حط ايده ورا ظهري وصعدنا...
واحنا ع الدرج اتدلع عليه حتى اغثهن..
وهو يكلي اليوم مستعجلة لازم صرتي زينة ههه...

دخلنا اخذتلي سيت اسود وفتت للحمام...
طلعت لكيته متمدد ومطلع فلم اجبني ..
باوعلي كال..اروح فدوة يابة شلون طالع يخبل عليج...
فتحلي ايده وتمددت...
كتله عاش ذوقك حبيبي كلهم حلوات..
بس ليش جايبهم مستورات هلكد...
رفع شعري ع وجهي ..كال...
لا تدورين ستر وانت بحظني.؟
تعري واني اكون سترج ..
اخذت ايده وبستها من داخل..
ربي مايحرمني منك...

بس عندي سؤال اريد اسأل وخايفة متجاوب...
طفى ال T.V وتعدل..
احجي شنو ...
حبيبي مو احجي وتكلي سدي السيرة وابد لتحجين بيها...
تنهد وكال ...
شنو سؤالج؟
انت من اخذت ذيج ضاربها وصايرة مشكلة؟
مهرة شنو هالسؤال؟؟؟حجاها بخزرة...
حبيبي ماقصدي شي بس هم هيج كالو..
وردت اتاكد...
كعد واندار عليه،..منو كال؟؟؟
سمعت بالعزيمة هيج كلام..وكالو انت تدكلي ناعم وبعدين تبدي تضرب...
وانت اخذتها بصياح وكلها التمت...

شوفي مهرة اخر مرة اكلج لتجيبين هالسيرة..
غير مرة يكون حسابج غييير...حجاها وزمخ...
واذا خايفة مني اضربج فاحترمي نفسج حتى لا تنضربين...
عافني وكام طلعله جكارة واخذ الجداحة وطلع...

بقيت اغم بنفسي هسه شكو فتحت الموضوع شبيه خبلة...
بقيت كاعدة انتظره..
ورا شوية دخل...من سمعت صوت مشيته..
ذبيت الروب وتمددت ونطيت ظهر...
فات وقفل الباب.. وتمدد يمي اني مغمضة...
مد ايده ع وجهي ويحرك بشعري...
فتحت عيوني كتله ها بعدك متضايق!
حط اصبعه ع شفايفي..
اووش ..
اني بست اصبعه وهو جرني لحظنه...

صرت فوكه واباوع لحواجبه المعقودة..
تلمستها وكتله..
شكد كنت اقلد ع حواجبك...
گلبني وصار فوكي...
بس حواجبي ها..ولقب الصومالي منين جبتي ولج؟
ههه قابل مكذبة هو انت صومالي..
بسيطة تردين تشوفين الصومالي شيسوي موو..

حط راسه جوا ركبتي ويستنشق..
حركة صغيرة منه تذوبني وتدوخني..
بسرعة استسلم واتفاعل ..
حط ايده جوا راسي ورفعه ..طخت شفتي بشفته...
جرها وباسني..
بادلته البوسات واني ذايبة برومانسيته...
شكد ماهو عصبي بس رومانسي وحساس بشكل....
يكدر يخليني اتغلب ع الالم واحس بداله بالمتعة...

بعدها نيمني ع صدره ويمشي اصابعه ع زندي...
شبي الحلو بس لا متوجع؟
شوية حبيبي مو هواي..
يلا شوي شوي يروح ..
بس من يروح اخذ حيفي واطلعها من عيونج هههه....

صدك كتلي حاجيت الدكتور وحددلك وقت؟
اي من وديتج اخر مرة ..
استقسرت عن وضعج...
كتله احنا ع وشك زواج وخطيبتي هيجي حالتها...
شلون اتعامل وياها بلا اضرار...
كال لازم تكون العملية بهدوء ونفس الوقت دقة...
ابتعد عن العنف والقوة كلش...
لان هالحالة اكثر عرضة للنزف...
وبالتالي راح تتاذون ثنينكم وانتو عرسان..
هي تتعب وانت تنحرم ههه..

هذا الدكتور مثلك طلع ..
مهرتي احنا الزلم نتقاطع بعض بهواي نقاط ...
اممم صح...
زين شنو حددلك؟
اي المفروض بين فترات متباعدة اقل شي ست ساعات...
هههه لو تسمعه بيبي فليحة ًوهي تكول فوكة فوكة...
اي جان كلتله هيج من اهلك ع هالنصيحة..
ههههههههه صدك...

مرت كم يوم والخطار خف ...
اهلي عزموني الجمعة...
وعزمو اهله هم...
بس الحجية اجت ويانا..وبيبي فليحة رجعت لبيتها ..
شكد توسلتها مقبلت تبقى....
كاعدين وجابت صبا الصينية وسلمت...
وراها اجه عاطف كعد يمنا...
خليتهم يسولفون وكمت للمطبخ...

لكيت الجدور ع النار وخطية مسوين شكد انواع...
واعرف بس صبا وامي تماضر كلش متفيد...
سالت صبا عن وضعها كالت زين ...
بس هالكني النوم..
ماجاي اكغد هواي ..اغلب وقتي نايمة...
اي عادي اغلب الحوامل سامعة هيجي...
هههه خية عبالك غيبوبة اني...
وجسمي مكسر ونحلان..ولو نمت مااكعد...
تخيلي عاطف ذاك اليوم راد يكعدني بالليل...
كد مامحاجيني ومامجاوبته عباله ميته...
طش بوجهي ماي مثلج يلا انتبهت...

لعد اذا هيج لو مراجعة طبيب وتاكدي يجوز صاير عندج خلل بالغدد...
اي كلت اروح بس خل اكمل الثالث ..
الله يعديها عليج ع خير...
شخبار عمو وخالة والولد...
ابوي زين بس امي تعبانة...
سلامتها ليش...
ع مود براق سافر بس ابنه بقى ماخلته ياخذه...
كلتله اني اربي اخاف تاخذه وماترجعون...
عاد مدام ابنك يمي بيك امل ترجع...
يعني شنو رح يستقر هناك؟
لا فترة كال عنده مشروع...
وهم نفسيته تتغير تعرفين بعد...
الله يوفقه انشالله...

بقيت افكر براق انكلب غير شخص...
معقولة انسحب بيوم وليلة ومارجع زعجني ولا حاول...
يعني خله اخته تتزوج اخوي عادي...
رغم اني مقبلت بي...
احس وراه السر..وياخوفي شجاع...
بس شنو مسوي لهالدرجة خلاه يصيرادمي ...
الا مسويله سحر هه...

صبينا الاكل وكملنا وتماضر ابد مانزلت...
ورا الغدا راح عاطف جاب الجهال...
بقو يمنا واحنا نشرب جاي...
كالو جوعانين ..
اخذتهم صبا للمطبخ صبتلهم واكلو...
كالت امي سودة عليه جواعه...
شوفي شصاير بيهم..متسويلهم اكل ومخليتهم بحسرة اللكمة....
الله يهديها شنكول...
الله يهديها يما هي مو حامل ونايمة مو بعد حامل...
ع كولتج صدك هههه...

بقينا للعصر ورجعنا ...
كتله شجاع اريد موطا..
كال هسه اخذلج بطريقي ...
اي فدوة كلش كلش عاجبني...
باوعلي بالمراية بنظرات ساكنة متت ضحك...
وماكدر احجي لان الحجية كاعدة كدام...

وصلنا للبيت..
شفت رحاب تغسل ممه جعفر..
ها كاعد جوجو..
لا نايم بس اريد احضرله الممه من يكعد نسكته كبل..
ليش امبين مشغولين...
اييي تعرفين بعد مشاغل هههه...

دخل شجاع لان جان يصف السيارة...
رحت وراه واني متحمسة اريد اكل الموطا...
هم مخلين وياها كبوس بس اني احبها هيج...
كعدنا ناكل وهو يتحرش...
تذكرت سالفة براق ..
ترددت اسئله لو لا؟
اخاف يعصب...
يلا مدام الجو مفرفش خل اسأل واذا عاط اسكت...

حبيبي اليوم عرفت شغلة...
شنو ؟
ابن عمي رح يسافر..بس استغربت انت قبل فترة كلت سافر مدري مسافر!!
اي سافر وهسه رجع حتى يكمل اموره ويسافر مرة ثانية..
زين شمدريك؟
غير اني الطفرته ههه...

للحكاية بقية قليلة
(بقلم شقراء)قمر كانون