رواية حين يزهر الحجر الفصل السابع والثلاثون 37 - بقلم Shaqraa

مساء الخير

حين يزهر الحجر
الجزء ٣٢

تفاجأت برحاب  اشو الصبح مابيها شي!
انتظرت خلص العشا وصبينا...
ردت اساعدهم بغسل المواعين ماقبلت سماح وهم ميسون وياها...
ووحتى لرحاب كالو روحي ارتاحي...
هم متجمعين بصالة كلهم..
اني اخذت زيوني كلت لرحاب اريد ارضعه بغرفتكم...
اخذتني وفتنا للغرفة...
حطيت زيوني بحضني وهي قفلت الباب...
اجت كعدت يمي ومعبسة..

احجي شبيج ولج خرعتيني ترى؟
شحجي يمعودة متكليلي ..
احجي شبيج قافلة ووجهج مايكصه السيف...
اوف اوف..ولج دك بيه الناقصة ارفد ..
عزا شنو!
ولج كتله ماريد طفل لحد ميكبر جعفر..
ماجاي الحك عليه حرك ومايكعد ...
خرب يومج هبطتيني عابت هالوجه..
باوعتلي بنص عين ..سكتي مهرة لا اكوم املخج...

يابه دطيري رافسة النعمة..
هذا رزق ربج لا تدلعين..
ولو مرايده حمل جان اخذتي احتياط...
مو هو معتمدة عليه اني ...
هو تعرفين بي يريد يخلف..
بعد شكو تعتمدين عليه..
ههههه بس حيل يسوي بيج ههههههههه ضحكتيني....

تسكتين لو اكوملج...
ولج لاوية بوزج والرجال يجيب ويحط كدامج بالاكل ..
وانت معبسة ع ابو حامل وماتردين وهو غدرج..
اكول انجبي احسن وكومي نيمني ابنج ع وكت وتصالحو...
يبووو اني شاردة ماريد اصالح هسه...

شكد متعافية..دنيمي جوجو وفوتي غسلي وبدلي وتعطري...
وهو يجيج مثل الورد ويعتذر ويكول (حئي برئبتي)هههه....
باوعت بعصبية...شجاع شكد مسكين من طاح بيج...
يابه اكول الرجال ضعفان ..
انت شنو فلمج ماينلام من يكول فلفل عجم...
عجم وهندي وصيني المهم زوجي واحبه واريد راحته ..حجيتها وغمزت...

خرب قنعتيني ..هسه شوية وانوم جوجو..
لعد اكوم اني مدام زيون نام اناملي شوية...
اي تكسحي خل اشعل شموع معطرة...
اوييلي ...منو قبل شوي تتعيقل اشو صار بيها شموع...
ههههه مضغوطة لان متكدرين تشعلين شموع وتسوين جو...
كمت واحجي بصوت ناصي حتى لا يكعد زيوني...
احنا شموعنا دومها منورة رحوب ام جعوب..
ههههه ياحقيرة...

طلعت واني امشي ع كيف...
شافني شجاع واجه..
ها نام انطيني عنج اخذه...يحجي بهدوء...
لا حبيبي شايلته اكدر عادي...

يلا لعد جاي وياج...
ترخصنا وصعدنا...
حطيته بفراشه ورحت للحمام...
طلعت ونمت بحضن شجاع بقى يلعب بشعري وفونه بيده يراسل...
غفيت بسرعة ...

ورا اسبوع قررنا نسوي حفلة طهور زيوني ...
عزمت اهلي وسويت ترتيبات للطهور...
لبست كلابية بيضا ومكياج وشعري رفعت قليل منه...
نزلت زين بالعش مالته وهو لابس دشداشة بيضه وزغنون يخبل...

واني انزل يطشوو علينا جكليت ويغنون ويصفكون...
خليته يم الحجية ورحت تاكدت من كلشي جاهز وترتيبات الميز...
سماح ونهاد وياي وساعدوني ورحاب اكيد...

ورا شوية اجه شجاع..كال جيبي يريد يشوفو..
اريد انطي وقلبي واجعني افكر شلون يتحمل الم الطهور...
كتله صدك يشوفو لو يطهرو..
لا يريدونه الزلم بالديون...
اوكي لعد...
انطيته اله واوصي عليه..رغم هو حذر من يشيله كانه شايل تحفة ويخاف تنصدع ...

شفتهم طولو ماكو ..صارت نص ساعة واجه جايبه الي ومفرفح بجي...
ركضت بلا وعي لباب المطبخ وفتحته...
شفته جابه شايله بس فتت بسرعة لان برا كومة زلم..
فتح الباب كال لحكي رضعي ..شطلج برا شمنبهج اني...
ماهتميتله اخذت زين واباوعله مفرفح..
طهررته مووو ...
اي الحمدلله خلصت ولج شبيج انخطف لونج..
سودة عليه يماا ..اخذته وركضت لغرفه رحاب...

كعدت ارضعه وعماته يمي وفرحانات...
هدأ شوية واستقر ...
بعدها اخدناه وسووله اجواء حفلة تخبل...
والاطفال حواليه يصفكون ويغنون...
بعدها حطيته بحضن امي وكمت وي البنات...

بلشنا نوزع العشا ..كملنا للنسوان..
اما الرياجيل..تعشو قبلهم واحنا حضرنا الجاي...
الكل كاعد ياكل بقينا اني وسماح ورحاب وزهرة ...
بلشو يجيبون المواعين...
زهرة كالت خل يرحون وارجع لان حسين مايقبل...
فاتت جوا واجت نهاد ومرت مؤيد وي سماح ..
واني ورحاب فتنا للمطبخ الحار لان ممنوع نطلع...

ورا شوية خلصو وصاحو علينا البنات طلعنا...
اكالت نهاد اروح ابدل واجي ..
وسماح ورحاب راحو يجيبون المواعين مالت النسوان...
بقيت اني جهزت الجاي وحضرت الاستكاين ..
واحت يمي توتة الي هي تقى اخت مرت مؤيد...
جايبة بيدها ماعونين وتمشي صفح جنها لعبة مخلص باتريها...

حطيت المواعين وطلت من الباب...
اني انظف المواعين من بقايا الكل واذب بالكيس..
بس عيني عليها...
دخلت نهاد اخذت صواني حتى يجيبون بيها المواعين...
جانت تقى توها سادة الباب مانتبهت نهاد ...
طلعت ورحعت تقى تباوع..
ودخلت بسرعة وكفت قريب مني...

اندك الباب واندفع ..فات ولد شاب مكنف ردانة..
ومتحزم بدشداشته ..
بس دخل عصبي..
انا جنت مرفعة رداني بحساب محد يدخل اله ينطي خبر...
بس هذا دخل بسرعة وصاح بيها ولج هييي...

اني ركضت للمطبخ الحار وانزل برداني..
سمعتها كلتله ها ها خوية ماهر...
انجبي طايحة الحظظظ..
اذا مديتي راسج من الباب اكصة..
يلا ولي جواا...
سمعت طكة الباب..
طلعت اتخنس وهي ماكو داخلة...

رجعت اشتغل ورا شوية اجو البنات نقلو الصواني...
اني وكفو يغسلون وياهم كم وحدة من اقاربهم وطلعوني...
رحت اني جوا واسولف وياهم...
اهلي ترخصو وطلعو...
واباوع لمرت مؤيد غفران واختها يخوزرن ويبسبسن...
بس هم شوية وطلعو ...

والناس راحت بالتدريج..
حتى اخوات شجاع هم راحو...بس بيبي فليحة بقت...
اني اخذت زيون وصعدت...
بعدين صعد شجاع وهم تعبان..
سولفنا شوية ونمنا...

مرت كم يوم وزيون تحسن الحمدلله...
اني ماكدر اداويه ماتحمل...
الحجية تاخذه تشطفه وشجاع يداوي ...
لحد ماطاب يلا ارتاحيت...

ورا يومين اجه شجاع ضايج...
فركتلهزظهره واسولف ويا..
شبي حبيبي ضايج ...
اوف مهرة عندي سفر ضروري لدبي ومحتار...
ليش مو كل مرة وسام يسافر...
مايكدر امه هالاسبوع عدها عملية مال عينها...
لعد حبيبي شلون..زين شكد تبقى؟
يعني اقل شي اسبوعين...
بعد شبيدك سافر وتوكل على الله...
والنعم بالله بس شلون اعوفكم...
كول يا الله وين عايفنا بغابة..
اهلي واهلك وياي لتخاف علينا ...
يابعد عمري فراككم صعب...
ولا بعدك ينحمل بس شنسوي بعد هم رزقك هذا ...

جر ايدي الي اعصره بيها من كتفه وحطني بحضنه...
مهرة واسمها عليها...
باوعتله بدلع وعضيت شفتي...
تفداك مهرة يا كل عمرها..
قبل ما اكمل كلمتي..
جرشفتي وبلش يبوس بلهفة...
بادلته واني اريد اشبع منه ...
بدا يعزف باصابعه واني ضايعة بين ايديه...
بعدها كمت للحمام ..

سمعت زيوني بجه غسلت ركض وطلعت ..
لكيت شجاع شايلة ويفتر...
اخذته رضعته وشجاع فات للحمام...
نومت زيوني ورحت تمددت..
شجاع يسولف وياي عن السف اي لازم بعد يومين...
كال لو زيون جبير اخذكم وياي...
كتله ع الجايات انشالله...

يوم ثانيمن بعد ما راح للشغل واني بلشت انظف...
طلعت رحاب وياي ونسولف...
جنا نطبخ الغدا واجت غفران مرت مؤيد...
بيومها الولد رجعو من وكت ع مود سفر شجاع..
تغدينا وودينا الجاي وكعدنا...

بدت السوالف والكلام...
كالت غفران تدرون ماهر ذاك اليوم اجه لامي ..
حبوبة خطبيلي شفت خوش نثية بطهور زيوني...
كلها ارفد ..اي شكو بيها يستاهل ماهر.،
يا خوية هو غير شايف مهرة عباله من بناتنا...
اني كبل باوعت لشجاع الاحسه تحول وحواجبه تربعت ...

شنوووو ووين شايف مرتي هو؟؟؟؟؟حجاها بصوت عالي...
ها خوية لا هو بس شافها بالمطبخ تاخذ المواعين منهم
شجاع طكني خزرة ونظرة مال بسيطة اليوم اسويج طحين...
الكل سكت وشي بقت تباوع بوجه شي..
لان عدنا الجنة ماتطلع بهيج مناسبات لو تختلط...
كال شجاع..خوية هالسيرة لا تفتحينها كدام احد بعد ترى مايصير خير...
لا لا خوية بس حبيت اضحككم اني ...
ضحكي ع نفسج لان تحجين بمرة متزوجة هيج حجي...

كام طلع وكام ارفد وراه...
هي كالت..بس لا زعل يا مو قصدي بس اضحككم ..
لان ماهر كل يوم يشوف وحدة يكول خطبوها...
ردتها بيبي فليحة...
خفه هالحلك شيشتي الرجال على مريته شجاج...
يابيبي هو شجاع هيج مايتحمل...
بعده متخيل هو بالسجن وكله اوامر وكلشي ممنوع ...
عبالك بس هو انسجن...

للحكاية بقية
بقلم شقراء(قمر كانون)