رواية حين يزهر الحجر الفصل السادس والثلاثون 36 - بقلم Shaqraa

مساء العسل

حين يزهر الحجر
الجزء٣١

احس نسيت الالم والتعب كله..
تركيزي وي صوت ابني اليعيط وصوته يرن باذني...
دموع الفرح تنزل من عيوني واني احمد ربي واشكره....
سوولي اللازم ونقلوني لغرفة ثانية..
رحاب دخلت مبتسمة والطفل بيدها...
يبعد اختج مبروك حبيبة...

تقربت بوستني وسمت بالله..
حطت الطفل بحضني..
ماشاء الله تبارك الرحمن..شنو هالجمال والحلا..
ولج هذا مدبدب مثلج شوفي الخدوود...
اي فديته يومه حياتي شوف العيووون...

جاي نحجي وفاتت امي ..
صلوات صلوات بعد عمري يما بالمبارك...
فاتت بوستني واخذت الطفل من ايدي..
سودة عليه يما شجابج بهالليل..
يما رجلج خابر اخوج كله مهرة عدها ولادة..
وكله ارفد بالباب ينتظر الحجية..
عاد اجيت ويا الله يحفظه..
تونا راكبين وخابره شجاع كال جابت...

يابعد عمري سودة عليه كعدتج وانت تعبانة...
لا يما تعرفيني اكعد بعد شوي اصلي ..
الله يحفظج النا بعد عمري...
شنو يمتى نطلع..
كالت رحاب هسه اشوف واجي...
بعدها فحصتني الدكتورة وكملت كلشي...

امي اخذت الطفل وطلعت كدامي..
جابولي الكرسي المتحرك ورحاب كعدتني واخذت الجنطة بكتفها...
طلعنا واباوع لشجاع شايل الطفل..
باوعلي مبتسم وعيونه حمر ...
الحمد لله مريتي غدا شرج انشالله..حجاها وتقدم باسني براسي...
الله يسلمك حبيبي...
شلونه النونو حلو..؟
يكتل كتل مثل امه..بس ها مو نونو زلمة من هسه..
واسمه زين العابدين ..

كالت امي ونعم الاسماء يحفظه الله..
وصلنا للسيارة ارفد واكف سلم عليه وتحمدلي السلامة...
صعدت امي كدام وزيوني بحضنها...
ورحتب صعدت وياي وعدلت كعدتي...
احنا مشينا وارفد ورانا...

شجاع يسوق وكل شوي يصلي على محمد وال محمد...
امي كلتله اخذها يمي..
كلها حجية انت تعبانة ..
ورحاب كلتلها اني وياها واداريها خالة انت تعبانة...
شجاع كال..ابقي يمنا حجية ..
اني كتلها اي ابقي يمنا احسن...
اقتنعت وبقت يمنا ..

للعصر اجتلي زهرة ..مخابرتني وجنت نايمة مجاوبتها...
امي مجاوبتها وعرفت بيه ولدت...
جابها سيد حسين وهو وشجاع صنف..
كلش واحد يرتاح للثاني ..
بقت يمي شوي وكالت حروح علاوي بقى يم بيبيته...
اجيلج غير مرة..
بس ماوصيج كشخي وتعدلي ومكيجي...
لتحسيي انت جايبة وشكلج يتخربط ترى مجربة قبلج واعرف...
كتلها اي حتى رحاب كلتلي ..وهي ساعدتني وعدلت وجهي وحطتلي مكياج...
اي عفيه هيج اريدج...
شوية وراحت...
اني بس ينام زيوني انام....

شجاع بيومها ذبح ذبايح ليوم ثاني...
هم طبعهم يعزمون وديوانهم عامر..
ويوم الثاني سوو العزيمة...
والاقارب والعمام كلها اجت..
وبيبي فليحة اول مادخلت هلهلت وتلوح بعبايتها..

اجت يمي وتسمي على زيوني وفرحانة وتمسح دموعها بشيلتها...
طلعت من جزدانها جنكال اطفال ذهب كبير وبين عين بيها ازرق...
خلته بكماطه وحطته بحضنها وتسولف وياي...
شلونج جدة مانج مالومة ..
لا الحمدلله قليل الم ..
كون حطن بيج خياط..
ها بيبي بعد لازم ..

مدري شسالفتجن يجديدة هسه بايدات..
كبل احنا نجيب ونكوم لا نكول اخ ولا نتعور..
زمنا جان احسن يجدة كلشي زين...
الحمدلله بيبي المهم كمنا بسلامات اني ويا...
اي الحمدلله جبتلج دوا وياي..
بعدين افهمج عليج هذا الملح بعد جدتج يفيدج وترتاحين عليه...
وهي تحجي بجه زيوني..
حطيته بحضني ارضعه..

امي كاعدة يمي ع جهة وبيبي فليحة بصفها..
فات شجاع اني جريت الشال حطيته صدري..
هلا بالفحل كواك الله ..
كوة حيلج جدة شلونه زيوني..
بالمبارك عليك بعد جدتك يفك الكلب زيوني...
يوم التشوفه عريس وتشوف ولد ولده...
بوجودج جدتي ..
كعد يمها وباس راسها...

هي باوعتلي وكالت..شبيج مكبعة جدة رجلج خو مو غريب...
خليها جدة هي تستحي..
يومه عليش خو انت شايف الماينشاف..
امي اباوعلها حاصرتها الضحكة...
بيبي فليحة مال زمان اول كلش ..حجيها طك بطك...
وشجاع ناطيها ع مايها...
بقى يمنا شوية واندك الباب...

دخلت مرت مؤيد وامها...
اختها وراها وبيدها علاكة كبيرة ..
لان وحدة منهم تزوجت بقت بس وحدة...
كام شجاع وهن سلمن عليه..
كال هلا عمي تفضلن وطلع...
اجو بوسوني وكعدو ..
كالت مرت مؤيد ولج مهرة نيالج عود جايبة وهيج متفحة ..
بيبي فليحة كلتلها طفري طفر بصوت عالي..هي كامت مخروعة شكووو..
وراج عگرب عاب هالحلك..
يا جدة خفگتيني وكلبي راح عبالي شي..

كالت اختها ترى مكياج مخلية ههه مهرة عدها واهس..
كتلها حقي غير ماخذة شجاع فديته شلون ماكو واهس..
اي الله يسعدكم ..كالتها بابتسامة صفرا...
امي اشرتلي بمعنى غلسي..
بس اني ماعرف الزم لساني...

ورا شوية اخذتهم بيبي فليحة وطلعت كالت خل ترتاح الفرخة...
بس طلعو دخل شجاع..
امي كامت كالت رايحة اتمدد شوية..
احنا عدنا غرفة مال خطار فوك ..امي من يجي شجاع يمي تبقى بيها...
بس طلعت امي قفل الباب..
اجه يمي ع السرير وحضني..مشتاكلج ولج ميت شوك...
اوف حبيبي مو بكدي ...

رجع ليورا وباوعلي..
خو مامتأذية فادج العلاج؟
اي حبيبي شربت واستخدمت الكريم لتخاف عليه ...
لا كفو ماينخاف عليج لعد ليش اختاريتج لان اعرفج كدها...
شنو رايج نجيب اخو لزيوني..حجاها وغمز...
هههه ياستار بعدني ماصارلي ثلث اياااام...

جاي نحجي واندك الباب كال منو ..
كلتله سماح جبتلكم غدا...
كام فتح الباب وفاتت تضحك..
ابو زيوني دربالك خوية المرة نفسا ههه...
بعد اخوج تشوتين علي ..بس عاشت ايدج كلش جوعان...
الف عافية ...
اكلي خية خوش مفطح صار والسوب حار يفيد بطنج يدفيها...
تعيشين ونردها الج بالافراح ام علي مشكورة...
بعيني حبيبة ..
كلها شجاع ابقي تغدي ماقبلت كالت جوا ناكل...

كملنا اكل وصاح ع بت نهاد اخذت الصينية ورا شوية نزل...
اني غفيت لان تعبانة والنوم بالليل معدوم ...
وامي ورحاب يتناوبن..
وراها سماح بقت تساعدني..
لان بقت يمنا ع مودي...
امي ورا اسبوع شافتني تحسنت..
كالت راح اروح يما تعذريني...
كتلها روحي الله وياج ولو ماودي..
بس اعرفج ترتاحين بس ببيتج...

بيومها اجه عاطف وصبا..
طبعا صبا ولدت والاطفال طبيعيين مابيهم شي..
بس مناعتهم حيل قليلة وضعاف..
بس صحتهم زينة ومابيهم شي خطر...
اما تماضر باقية فوك وماتقبل تعوفهم بحالهم ...
كل يوم مسوية فلم بس صبا ذكية وتعرف تكسب عاطف...
وعاطف اصلا يحبها ويسمعلها...

اليوم اجو تباركولي واخذو امي وراحو...
شجاع سلم عليهم وصعد نام لان تعبان..
توة جاي من الشغل...
ورا شوية بجى زيوني..شلته من سريره وشجاع كعد بسرعة..
ليش يبجي شيي شيوجعه...
ههه حبيبي ميوجعه شي بس جوعان...

فرك وجهه وكعد...
اوف حتى اني جوعان يابه...خيعونك زوين قابل ابوك المسكين...
هههه منو مسكين هذا..حجيتها واني اخلي زيوني ع صدري...
اني محد مفكر بيه اسبوع صارلي...
لااا عيني محد مفكر بيك شلون انت الاصل حياتي...
لعد مشتاكلج ولج..حجاها وباس ورا اذني...
اصبر بس ينام الطفل...
يلا اصبر ميخالف...

نام زيوني ورجعته بفراشه...
وكف وراي وجرني بحضنه...
حضني حيل من ظهري...
تالي دارني واخذ شفايفي بلهفة وشوق..
ذوبني وذاب وياي...
فقدت بيده وهو اكثر...
اخذني للفراش ويبوس وينزع...
لزمت ايده..
حبيبي بعدني ترى...
اعرف اعرف بس هيج وارتاح...
انقهرت عليه ولازم انطي حقه لان صارله هوايه صابر...
بقيت ابوس بي واهمس باذنه بكلام يحبه...
ورا شوية تمدد بصفي وحضني...

مشتاق لبطولاتك يحلو...يحجيها بصوت هامس وناعس...
هههه رجعت للساحة وكل يوم بطولات بعد...
اييي هيجي اريدج...حجاها وجرني لحضنه حيل ...
واحنا نتهامس غفينا...
فززني صوت زيوني كمت اله...
وهو بقى نايم لان تعبان...
ورا المغرب اخذته ونزلت..
كاعدين الحجي والحجية...
وبيبي فليحة كالت حطي بحضنج...
مدام غروب وجاي يوذن ..

كعدت وحطيته بحضني ونسولف وياهم...
جعفر اجه يمي يمشي..
دادا ويباوعله...
كلتله بيبي فليحة ..اي دادا مثل البطن ماما...
اني استغربت ..لعد شوكت مكالت حامل رحاب..
كالت بيبي فليحة..
كبل شوي رحاب حللت وطلعت حامل ..
العاجبة الها وتكوم بالسلامة...
انشالله ربي يكومها بسلامة وينها لعد...
بالمطبخ موجودة يم سماح يزهبن العشا...

حطيت زيوني بحضنها وكمت...
رحت للمطبخ لكيتهم يسوون عشا..
ها الله يساعدكم..
اندارتلي سماح..
هلا خية شجابج ليش نزلتي..
مليت من الغرفة تكسرت...
بعدج نفسا جسمج مفكك لا يصربج الهوا...
طلعي اربعين ويغدي الشر انشالله...
انشالله راح الشر بعد...
انشالله راح وتعداكم وانكشع عنكم...
هالحجي رحاب واكفة تثرم بصل ولا اندارت...

حاجيتها اني..ولج رحاب اليوم خانسة شكو...
ماكو شي شنزلج لزمي روحج شوية...
وكفت يمها وعيونها تصب ..بس اعرف مو بسبب البصل اخيتي واعرفها...
ولج متوازية عليه عيونج راحت دثرمي بالثرامة...
كالت سماح ..كتلها بالثرامة ماقبلت الا بيدها....
همستلها شبيج شصاير؟
مسحت عيونها وكالت بصوت ناصي...
ماكدر هسه بعدين نحجي ...

للحكاية بقية
بقلم شقراء(قمر كانون)