للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
شاركوا القصه حتى تكبر عائلتنه ونستمتع وي الهَيْصَم مع بعض.
هَيْصَم
(الكاتبة زهراء احمد)
_________
ما يجعلني أراهن على إنكِ معجزه ، هو إنكِ الغرق والنجاة في آن واحد .
سمعت فتحت الباب القويه التفتت اله وهو شغل الأضويه شفت نظرة مليانه خوف استغربتها بعيونه التنتقل من وجهي لأخر جسمي اخذ نفس وغمض بقلة صبر وگال.
هَيْصَم: فكرت صار عليج هجوم مسلح اكو شخص عاقل يصيح بهاي الطريقة بهيج وقت متأخر؟!
كمت من مكاني ورحت يمه وگفت مقابيله رفعت أيدي وأشرتله على الشباك اللي يصير قريب من الجربايه وحجيت بتلعثم:
خ.ي.ا.ل.
قاطعني وهو يگول.
هَيْصَم: اخذي نفس شهيق احبسي بداخلج وعدي حتى ثلاثه بعدين زفير بنفس الطريقة يلا.
سويت مثل ميگول حسيت اعصابي هدأت وگدرت اسيطر على خوفي رفعت عيني اله وحجيت بسرعه:
اكو خيال جان يم الشباك لهذا السبب صحتك.
تركني وراح بسرعة يم الشباك فتحه وبقى يعاين يمين وشمال بعدين سده مجان اكو بردة عليه فجان الخيال واضح رجع وگف كدامي وگال.
هَيْصَم: مجان اكو شي غير بزونه شفتها جوه بالحديقه الخلفيه واصلاً ماكو بلكونه يعني اطمأني ماكو احمار يخاطر بحياته بهذا الشكل بس حتى يخوفج ارجعي كملي نومتج ولتخافين بما إني موجود محد يقتحم هذا المكان.
فيروز: متأكد؟
هَيْصَم: مخلفت بكلامي وياج سابقاً.
طلع من الغرفه واني رجعت لفراشي غمضت عيوني غصب وحاولت انام طردت الخوف من داخلي واني أطمأن نفسي بوجوده بصعوبه يلا دخلت للنوم مره ثانيه،
اشعة الشمس اللي تضرب بعيوني من خلال الشباك جبرتني اگعد من نومي ماكو ساعه اشوف بيها الوقت فتحت الموبايل شفتها عشره الصبح طلعت بسرعة ورحت للحمام ايصير مقابل الغرفه و قريب عليها دخلت غسلت وجهي وتوضيت صليت الصبح قضاء ونزلت ادور عليه عبالي موجود بالصاله بس خاب ظني من ملگيته طلعت للحديقه اشوفه هم ملكيته موجود رجعت واني الأفكار تلعب بعقلي وين راح وعافني وحدي بهذا المكان؟
هاي ثاني مره ايسويها بدون ميفكر بيه، لو صار شي وياه؟
رجعت دخلت للبيت وسرقيت الباب حتى اطمأن محد يدخل بدون ماعرف گعدت على القنفه دقايق وسمعت صوت رساله على الموبايل فتحته جانت من عنده.
هَيْصَم: صار عندي شغل ضروري، راح احاول ارجع قبل المغرب لتخافين هاي المره البيت عليه حراسه اشويه وراح يجي شخص ينطيج اكل وبعض المستلزمات خلصي وقت بالتنظيف ومن ارجع نكمل سوا.
من طلع شويه وندك الباب عرفته نفس الشخص اللي حجه عليه، رحت يمه وفتحته او وكفت وراه، دخل شخص ميشبه اللي شفتهم من اجينه، ترك مكناسه ومنظفات وعلبه مربعه عرفتها بيتزا حجم عائلي مفكر بأكلي ليوم كامل، عافهم على الكاع وطلع واصلاً ملتفت ابداً وحتى منطق ولا كلمه أصدقائه محترمين حيل،
دخلتهم للداخل اكلت كم قطعه وسويت حملة تنظيف على البيت بديت من المطبخ الأجهزة الكهربائية كلهم شغالين الشغله الوحيده الصح ،تركت الأكل الموجود بالثلاجه ونظفت كل المطبخ الأرضيه سيراميك لكن من التراب ممبين من عدها شي شغلت الماطور ودخلت الصوندة وغسلته كله بعد مشلت الفراش ارتاح اشويه وارجع اكمل حتى صار وقت الأذان كملت صلاتي ورجعت كملت تنظيف بقيت للساعة سته المغرب مابين تنظيف وشويه راحه صار البيت شكله حلو ومكان مناسب للسكن اخذت نفس عميق من ريحه المنظفات الترست البيت، شمرت نفسي على القنفه ومن التعب غفيت بسرعة.
بهذا البيت الخالي من الشُبهه وفي مكان نائي وبعيد عن المدينه، في حي سكني بسيط وقف سيارته ونزل لابس مناظر شمسيه والكمامه مغطيه نصف وجه يقال انو الجميع يرغب برؤية هذا الشخص الغامض والغريب دخل بينهم عنوه وخلال فتره قصيرة عرف نقاط ضعف الجميع واصبح المسيطر بينهم محد يعرف هو منو وشنو ومنو الواقف خلفه ويدعمه لكن المعروف انو مو بأستطاعتهم مخالفته تحت اي ظرف كان والشيء اللي يرغب بيه شرطاً وبدون نقاش لازم يكون بين أيدة، مشتغل وياهم بالتهديد فكلها تخاف منه، اول ماوصل للباب حاجيته: السيد الأسود بأنتظارك بغرفته.
لّهيم: كله لّهيم ميلتقي بأحد وره ابواب مغلقه اني مو احد نسوانه.
:تأمر حضرتك.
دقائق قليله وسمعت صوته من جوه وهو يحجي وي تصفيك ونبرة سعادة واضحه.
الأسود: عفيه عليك گدرت تخلصنه من هذا الضابط المزعج مبقى غير تنفذ الخطه ويموت نهائي وهو بالمستشفى.
لّهيم: مو قاتل تحت امرتك لتنسى اني منو قبل ما انتزع روحك من عندك وانسيك منو تكون.
الأسود: مو مشكله اندبر شخص يقتله لكن كُلي سبب زيارتك لبيتي المتواضع بهذا الوقت مو بالعادة اتنورنا بهيج وقت من النهار؟!
لّهيم: طرح الأسئلة من حقي وانت عليك الأجابه فقط.
الأسود: اسمع.
لّهيم: ليش لحد الأن مگدرت تعرف مكانها؟!
الأسود: دورت عنها بكل المستشفيات بغداد ملگيت عنها اي معلومه بس آخر مستشفى العرفته هي انتقلت الها بسبب جرح بطنها وجان عميق جداً وتوفت اثناء العمليه، شهادة الوفاة جانت موقعه من قبل أدارة المستشفى وهذا دليل يثبت هي ميته من صدگ.
لّهيم: الجثه.
الأسود: غير موجوده منعوا احد يستلمها غير اقاربها وفي حالتها اتكفلت المستشفى بدفنها بأحد المقابر.
لّهيم: غبائك هو سبب بقائك وره ومتقدمت.
الأسود: مفهمت؟
لّهيم: بعدها عايشه والنقيب هو اللي يحميها والخبر الصادم الك هو مبيه شي حي يرزق ويدور عليك بهاي المدينه، اخذ الحيطه والحذر لأن مستحيل انقذك اذا صرت بقبضته والأعلى من عندي راح يقتلوك تعرف اني ما الوث أيدي بدماء قذرة.
الأسود: مو جماعتك اللي هجموا على البيت وهو تصوب وهسه بالمستشفى من وين جبت هاي المعلومات؟!
لّهيم: بعدك ماعرفته عدل فمستحيل تگدر تغلبه بهذا عقلك الفارغ، النقيب نشر معلومات عن وجودها يمه وجان يريدنه نعرف حتى تكمل خطته بعدها انتقل للخطوة الثانيه وخله جماعته يشمرون سيارة ثانيه على انو هي سيارته وهو صعد بسيارة شبيها الها وانتقل للبصرة و الحادث اللي صار جان مدبر من عنده ولعلمك الموجود بمكانه هم مبيه شي وفريقه يحتفلون بنصرهم وهزيمتنه بعد معتقلوا خمس اشخاص من عدنه الشاركوا بالهجوم على البيت،
هاي جانت خطتك وانت قيس مدا غبائك من هذا الفشل الذريع والما أله مبرر.
الأسود: مو دائماً تسلم الجرة لابد يجي يوم وينهزم بيه ويصير ماضي.
لّهيم: هاي المره ما اوافقك الرأي هو رجع وكلبه مليان حقد وانتقام انصحك خاف لأن جروحه تطالب بالشفاء وهذا ميتحقق حتى يوصلكم لحبل المشنقه.
الأسود: انت واحد من عدنه لتنسى.
لّهيم: عرفتك من جديد وملطخت أيدي بالدم والتعرفه عني معلومات قليله فشنو هاي الثقه التخليك تگدر تهددني بهاي الأمور؟
وبعدين انت مگدرت للهَيْصَم تگدر عليه؟!
اعرف تماماً شنو مخططك في حال سمعت او لمحت احد اكلابك مقترب من شي يخصني وقتها صلي على روحك لأن راح اقدم كل الأدلة اللي املكها اله وادس السم وانت داخل السجن صح اني ما اقتل لكن من يصير الموضوع يخصها ارتكب مجزرة مو جريمة قتل وحدة وانت تعرف منو لّهيم.
: مر كم يوم على وجودي بهذا المكان من صدگ غيرت جو ونسيت اجواء السادس نزلت جوه يمهن حتى انحضر العشا صارت بوجهي ريهاف ابتسمت بادلتني عيونها بيهم كلام بس محجت حسيتها خجلانه بعدت عني ودخلت للمطبخ اني هم رحت وراها شفت آمندا و آريا يشتغلن سوا، اتقربت من آمندا وسحبتها ويايه خارج المطبخ وصعدنه للغرفه فوگ غلقت الباب وانطلقت بأسئلتي:
ريهاف شنو بيها؟!
آمندا: خبله انت؟!
حوري: احجي صدگ والله ليش دائماً منعزله ومتحجي واقرأ بعيونها اسأله هوايه من تباوعلي؟!
آمندا: ومنو گلج اني ام عباس حتى اشوف شنو داخل الناس؟!
حوري: مدا اضحك احجي جد.
آمندا: شوفي بهذا البيت مستحيل تلگين جواب لأسئلتج صفه الغموض تمشي بدمهم كلهم اخذيها نصيحه ولتعبين عقلج الجميل وامشي حتى نكمل عشا قبل متسوي آريا حرب عالميه ثالثه.
حوري: زين هسه اني اشلون اعرف دائماً اكبح فضولي بس نظراتها تجبرني مو بأيدي والله،
نزلنه وبدت حرب آريا و آمندا الكلاميه.
آريا: اي يحلوه وين اخذتي وجه البومه وشردتي؟
آمندا: عرفتني على جحرج.
آريا: محجيت وياج لتدخلين.
آمندا: رهوف اضربيها على راسها ورجعي عقلها لمكانه قبل ما أجرب آخر حركه شفتها من جاكي شان بيها.
آريا: بيج حيل؟!
آمندا: كلاثم سكتيها.
كلاثم: خلص انتِ وياها عوفن سوالف الصغار وشتغلن بدون صوت وانتِ آمندا احترمي نفسج مو بنتج أني.
آمندا: اي يوجه العافيه هو اكو احله من اسمج لتزعلين من عندي نبع الحنان.
كلاثم: لتضحكين عليه بهاي الطريقة ما احب هذا الأسلوب لو اخوج اهنا.
سكتت مگدرت اتكمل كلامها بسبب ادموعها اللي خانتها ونزلت بسرعة ركضن وحضننها كلهن منظرهن كسر گلبي وخلاني احقد عليه ليش يسوي بيهن هيج وهو يعرف ماكو احد الهن غيره؟!
كلاثم: اخوجن ناوي على موتي هاي المره ميرتاح گلبه حتى يشوفني بصف ابوه.
ريهاف: اسم الله عليج عمري قبل عمرج لتحجين هيج انتِ تعرفين هو ميگدر يخاطر بجيته لو ميخاف علينه مسوه هيج.
كلاثم: على الأقل يتصل مو يخليني اقلق عليه صار ثلاث اشهر مشايفته وحتى حارمني من صوته هذا معند وذلك مغترب ياريت مخلفت ولد مجان عشت بهذا العذاب.
آمندا: اي والله اتخيلن هَيْصَم ابنيه واني وياه نتعارك على الطبخ لا شلون اكيد هو متزوج ويجي كل شهر وياه خمس اطفال وكلهم لازمين بيه وهو لا هي اتصيح بيها ،
ملعون اگعد احترگ ابوك على هيج خلفه.
كلنه ضحكنه على كلامها بعدين ضربتها خالتي على متنها وهي كملت بضحكه.
آمندا: اي هيج واضحكي بما انو مبيه شي أو لائِث ايطمنج عليه ليش حتى تخافين وتنقهرين ادعليه ربي يحفظه ويوفقه ويرجع سالم.
كلاثم: واني شنو اريد غير الله يوفقه ويحفظه النه ابني ممرتاح بحياته خلصها بس قهر وتعب الله يعوضه خير ويبدل حزنه فرح وراحة بال.
آريا: آمين وهسه خلصتن نكمل عشا راح اموت جوع تره؟
آمندا: سكتوا بطنها اللي يسمعج ايفكر احنه بمجاعه مو كأن قبل ساعتين اكلتي.
آريا: عاشت ايدج قبل ساعتين مو دقيقتين هذا شغل المعدة يروحي تهضم الأكل حتى ناكل مره ثانيه.
آمندا: لو يفتحون مخج ميلگون بيه غير الأكل ماعرف شنو الفايدة من وجودج بهذا العالم بس تستهلكين بدون انتاج.
آريا: لتخليني ابدي بيج هسه كملي شغلج وانت ساكته على الأقل اني اصرف جهد على معدتي مو شي ثاني.
آمندا: لشنو تلمحين؟!
ريهاف: كافي اشتغلن على الساكت بدون ازعاج.
حوري: خلص اليوم جميل آخر بهذا المكان وحان وقت النوم الكل يصعد لغرفته واني رحت يم آمندا اللي جانت تراسل اول مشافتني تركت موبايلها ماعرف ليش خطر على بالي محمد بهاي اللحظه ياترى لساته يتذكرني لو اصلا اني مو مهمه عنده؟!
جاوب على هذا السؤال الأشعار اللي وصل لموبايلي فتحته جانت رساله من عنده.
محمد: وعدتج ما أراسلج طول هاي الفتره واخليج تاخذين راحتج بالتفكير بس گلبي المشتاق مخلاني واتمرد وأصر احجي وياج هسه ياترى أگدر اتصل بيج واسمع صوتج اذا مشغوله وزعجتج اعتذر مره ثانيه اخذي راحتج حوريه.
حوري: شي داخلي منعني اتجاهل رسالته ماعرف شنو بس لوهله حسيت كلامه صادق دزيتله رسالة ،
هسه ما اگدر خليها غير وقت،
رجع دزلي.
محمد: تمام سرگي گلبي.
حوري: ابتسمت رفعت راسي شفتها گاعده على سريري ورافعه حاجبها وبأنتظار اجابه.
آمندا: راح اكبح فضولي بس باجر انت مجبرة تنطيني معلومات كامله عن هذا محمد.
حوري: كامت من يمي وراحت لفراشها اني ايضاً خليت راسي على المخدة واداخلت افكاري مع بعض حل النزاع اللي صار بعقلي النعاس اللي احتل خلايا جسمي فجأة ودخلت بنوم عميق.
: فزيت على حركه وصوت ضربات على الباب نهضت من مكاني بسرعه وفتحته صار بوجهي و بأيدة اكياس انطاني واحد واخذ البقيه للمطبخ تبعته واني احجي وياه ،
وين جنت؟
جاوبني برود وهو يرتب الأغراض بالثلاجه.
هَيْصَم: هوايه عايشه الدور انتِ ملاحظة؟!
فيروز: من تخليني بمكان ومنطقه غريبه لازم اعيش الدور هَيْصَم افندي.
هَيْصَم: اعتقد كتلج البيت محمي وماكو اي خطر بالأضافة جان عندي عمل مهم جبرني اطلع صحيح مرجعت مثل موعدتج لكن بالنهايه رجعت قبل ميتأخر الوقت أكثر.
فيروز: كلامي ميفيد نتيجه راح تسوي اللي يعجبك دائماً.
هَيْصَم: عملي يطلب من عندي هذا الشي كلما اعتاديتي اسرع كلما كان افضل.
فيروز: مخبرتني شنو اللي بهذا الكيس؟
هَيْصَم: ملابس ومجانوا من اختياري الموظفه بالمحل هي اللي خلتهم.
فيروز: وليش تخبرني بهاي التفاصيل؟
هَيْصَم: حتى متصير اخدودج حمر وتسبيني بالخفاء اذا شفتي داخلهم.
فيروز: وشلون عرفت شنو داخلهم؟!
هَيْصَم: ميحتاج اشغل مخي بهيج موضوع بسيط شنو يكون غير ملابس نسائية.
: تركته يرتب الأغراض وصعدت حتى اخذ دوش، خلصت بعد وقت غيرت ملابسي ولفيت المنشفه على جسمي وطلعت طبعاً مشتري كل الأحتياجات النسائية بالأضافة لتراكين وقميص وبنطلون وكلهن باللون الأسود ومناسي حتى المشط، دخلت للغرفه ورتبت اغراضي بالكنتور نشفت شعري ومشطته وظفرته لأن ماعندي شسوار كملت كل شي ونزلت حتى احظر عشا،
شفته يطبخ وگفت بصفه واني اباوعله شلون يقطع الزلاطه، اتذكرت أيدة و الجرح حجيت بصوت عالي واني اقترب حتى اخذ السجين من عنده.
انت مصاب راح تتأذه خليني اكمل اني.
بعدها عني وهو يگول.
هَيْصَم: شنو رأيج تبتعدين وتخليني اشتغل براحتي شوفي شي ثاني تنشغلين بيه.
فيروز: بهذا الوقت ماكو اهم من أيدك.
هَيْصَم: وانتِ ليش مهتمه بيه لهاي الدرجه خيرج لَّباءَة ؟!
فيروز: لتفهم مثل متحب، افكر اذا تأذيت اكثر متگدر تنقذني في حال صار هجوم على البيت مثل المره السابقه.
هَيْصَم: بريئة جداً انتِ.
فيروز: وضح مفهمت؟
هَيْصَم: برأيج هل من السهوله يهجمون على بيت داخل منطقه سكنية هي الأقرب من الدوريات مالت الشرطه بالأضافة هذا المكان مأمن اكثر من غيره يعني مستحيل يگدرون يوصلوه حتى ب GPS او اي وسيله ترقب ثانيه.
فيروز: افهم من عندك الهجوم مدبر؟؟
هَيْصَم: على الأقل مراح يحاولون يقتربون من عندج واني موجود.
فيروز: لهاي الدرجه انت تخوف؟!
هَيْصَم: ليكون مو بعينج ست لَّباءَة؟!
فيروز: ضخم انتَ عيني متكفيك سيد افندي.
هَيْصَم: طلعي البيتزا من الثلاجه حتى نخليها بالفرن.
فيروز: صدگ عندي سؤال ليش الأجهزة الكهربائية شغاله ولا كأن بيت مهجور؟!
هَيْصَم: ومنو كلج هذا بيت مهجور؟!
فيروز: ممبين اكو احد ساكنه قذر والتراب ماليه اول متدخل اله بسرعة تخطر على بالك انو ممسكون لفتره طويله.
هَيْصَم: اجي لهنا بين فتره والثانيه لكن ميكون عندي وقت حتى انظفه بالأضافة عاصفه وحده من عواصف هذا البلد الجميل تخلي البيت مو فقط مهجور وانما صحراء.
فيروز: سؤال ثاني بس لتفهمني خطأ ياترى انت مصاب بالوسواس القهري؟؟
هَيْصَم: هاي المره اني فضولي اتفعل من وين اتجيبين اسئلة مثل هاي؟!
فيروز: لأن هوايه ترتب ودقق بأبسط الأشياء ونظيف على غير عادة الرجال اللي اعرفهم.
ترك السكين وباوعلي بخزرة مع رفعت حاجب وگال.
هَيْصَم: وانتِ كم رجال تعرفين ست؟!
فيروز: لتفهمني خطأ اقصد اللي بالمجتمع المتعارف عليهم بين الناس.
هَيْصَم: لتعممين مو كل الرجال مثل بعض لكل قاعدة شواذ وهذا ايضاً ينطبق علينه اني رجل احب الترتيب ويكون كل شي نظيف وانيق وما احب احد يخدمني او يقدملي شي وهاي عادة من الطفوله ما الها علاقه بمرض نفسي او تعنيف جنت المدلل بين اهلي ومازلت وهذا جواب مسبق لسؤال راح يدور بمخج لاحقاً.
فيروز: التزم الصمت اشويه ورجع كمل.
هَيْصَم: عرفت البقاء وياج ينطي طاقه غريبه تخليني احجي هوايه على غير العادة كسرت هوايه قواعد التزمت بيهم اسنين طويله ياترى شنو السبب؟
فيروز: قوة تأثيري اعترف.
هَيْصَم: ما اريد اعقد وياج اي علاقه غير اللي حتمها علينه القدر هذا افضل النه اثنينه بعد متكمل هاي المهمه كل شخص يرجع لحياته الطبيعيه لَّباءَة.
فيروز: تقنع نفسك لو تقنعني؟!
هَيْصَم: ممكن الثنين.
فيروز: سكتنه وكان صوت التقطيع هو الوحيد المسموع بالمطبخ ابتعدت عنه وفتحت الثلاجه شفت شنو مشتري فواكهه وخضروات ولحم تاركه بالفريز واجبان وبيض ايضاً ومناسي الخبز والصمون يعني ماليها بكل الأشياء الضرورية طلعت البيتزا وقطعت هذا الصمت بسؤال،
عندك شغل بالليل ؟
هَيْصَم: لهذا اليوم لا.
فيروز: شنو رأيك نلعب بعد العشا البقاء اهنا ممل بدون وجود أنيس يضيف نكهه لأيامك الوحيده.
هَيْصَم: لَّباءَة شلون تقتنعين اني مو طفل بعد كل هذا العمر ترديني العب!!!
فيروز: وليش بس الأطفال يلعبون منو الغبي اللي خله هاي القاعدة ما الضير اذا احنه لعبنه اني وانت نتعرف على بعض اكثر ونغير جو ونطلع من مود الوحدة.
هَيْصَم: ميحتاج نلعب حتى نتعرف على بعض اني اعرف عنج كل شي وانت اذا حبيتي تعرفين شي عني خارج عملي اسألي واني اجاوبج.
فيروز: معقد.
كملنه تجهيز العشا اكلنه وغسلت المواعين هو طلع للحديقه واني بقيت گاعدة بالصاله ماعرف شنو اسوي اصلاً ماكو عمل أگدر اسويه عصفت بيه الذكريات لأيام زمان من گد مجنت مشغوله بحياتي مفكرت يجي يوم واگعد بيه بدون عمل سبحان مغير الاحوال بهاي الطريقة العجيبه.
ضَرْضَم: سيدي عرفوا بالخطه شنو الخطوة البديله؟
هَيْصَم: ننتظر بكل الاحوال اني هسه مصاب وما اگدر اطلع من المستشفى وعملي اهنا مخلص.
ضَرْضَم: لكن صارت مشكله بس متوقعه من عدهم يقبلون على هاي الحركه حتى يخلصون من عندك ويتنفذ مرادهم.
هَيْصَم: قدموا أمر بنقلي لغير مركز.
ضَرْضَم: صحيح وبهاي الحاله شنو راح تسوي سيدي؟
هَيْصَم: منسوي شي خليهم يلعبون على راحتهم بالنهايه ميصير غير اللي يريدة القدر.
ضَرْضَم: معقولة تستسلم الهم بهاي السهوله؟!
هَيْصَم: لتستعجل الأكلة الطيبه اللي تكون على نار هادئه ضَرْضَم.
ضَرْضَم: صحيح اتذكرت اتصل ب لائِث وخبره ليسوي شي يندم عليه بعدين هو ميسمع من عدنا لذلك حلها بطريقتك.
هَيْصَم: ليش شنو صاير بدون علمي؟؟
ضَرْضَم: هوايه امور محد نقلها لأن مشغول ومحبينه نزعجك بهذا الوقت وانتظرنا عودتك حتى نخبرك وانت تقرر شلون نتصرف.
هَيْصَم: راح نتفاهم من ارجع واني اشوف شنو مشكلة لائِث.
لائِث: واخيراً سمعنا صوتك للحظة فكرتك مرتاح وانت بعيد عنه.
هَيْصَم: شنو هذا الأسلوب الجديد كأن نسيت اني مديرك او واجبك تحترمني؟!!
لائِث: مديري السابق اكو غيرك احتل المنصب وقدم بنقلنا جميعاً مو فقط اتفكك الفريق وانما راح يتفكك شملنه.
هَيْصَم: وليش ماعندي علم؟
لائِث: ضَرْضَم مقبل نحجي حتى متشتت بينه وتنتبه لعملك بس اذا ابقى ساكت تصيبني نوبة قلبيه واني اشوف الثعالب ماخذه مكان الأسد وقبيلته.
هَيْصَم: العرين مخصص للأسود والثعالب مكانها اوكارها اربع ايام مو اكثر وشوف شنو اسوي بيهم خلي يكون هذا عزائك.
لائِث.
لائِث: سيدي.
هَيْصَم: اعتاديت على فكاهتك بالمركز اريد ارجع واشوف نفس لائِث اللي تركته واعتبرة هذا أمر من مديرك في حال عصيته تتنفذ بيك عقوبه.
لائِث: أمرك سيدي شنو عندي غيرك احبل اجيب.
هَيْصَم: على آخر علمي سويت عقد ابو الجهال ميقبل تخلف بعد.
لائِث: غير انت جبرتني شفتني ما اهتم بيك حرمتني اسمع كلمة ماما من ابنه.
هَيْصَم: متنطي مجال بسرعة تاخذ ميانه، كمل اللي متفقين عليه اريد كل شي جاهز.
لائِث: تدلل سيدي.
: دخل بعد فتره طويله خلصها بره كتف أدية لصدره وبقى يراقب بيه اني ايضاً سويت نفس الشي ومبعدت عيني من عنده زعجني هذا الوضع أشرتله براسي بمعنى شكو، صغر عيونه وگال.
هَيْصَم: مو ردتي نلعب؟
فيروز: اي.
هَيْصَم: كومي ويايه مرتبلج لعبه تعجبج اني متأكد.
فيروز: وين تاخذني بهذا الوقت؟
هَيْصَم: اتخافين وانتِ بحمايتي لَّباءَة؟!
فيروز: الغريب بالموضوع والسؤال اللي ابحث عن جوابه هو وعلى الرغم من الصدفه اللي جمعتنا والوضع اللي التقينا بيه مع كل هذا جنت دائماً احس بالأمان من اكون الى جنبك گلبي يجبرني دائماً على الثقه بيك ولتسأل عن السبب لأن اني ماعرف جواب مناسب.
هَيْصَم: شنو مكان هو اكيد مو حب لتسمحين لنفسج تقعين بهيج مصيدة لا للهَيْصَم ولا لأي أحد ثاني اعتبريها نصيحه مجانية من رجل يكبرج بعقد.
فيروز: كسرك الحب سابقاً؟
هَيْصَم: كومي راح نتأخر.
: تركني وطلع بدون مينطي جواب لسؤالي صعدت للغرفه غيرت ملابسي لبنطلون وقميص اسود ونزلت لگيته منتظرني اول مشافني طلع بره واني تبعته صعدنه بالسياره وبقى يسوق بصمت بعد فتره مو قصيرة وصل لمكان شبه معزول صحراء وماكو حتى حايط بيها وقف السياره ونزل واني سويت المثل أو وكفت بصفه،
شنو هذا المكان هَيْصَم؟؟
هَيْصَم: المكان اللي راح نلعب بيه.
فيروز: شنو نلعب بهيج منطقه معزولة؟
هَيْصَم: لعبة الضباط.
فيروز: عدكم لعبه خاصه بيكم؟!
هَيْصَم: نوعاً ما نلعبها مع المجرمين والخارجين عن القانون واني حاب اعلمج اياها بما انو الفرصه سنحت وعدنا وقت فراغ.
فيروز: شنو هاي اللعبه؟!
هَيْصَم: حمل السلاح وشلون ترمين على شخص في حال صار عليج هجوم وتردين تنقذين نفسج لذلك لازم تتعلمين على رغم اني عازم بكل الاحوال ادربج لكن لاضير اذا عرفت رأيج حابه تتعلمين؟؟
فيروز: اي اصلاً اني احب سوالف الشرطه من جنت اصغيره العب وي بابا شرطي وحرامي تعرف ماعندي أخت او اخ العب وياهم لذلك جان ينزل لعقلي ويلعب ويايه،
سكتت واني اذكر ايامنه نزلت ادموعي وهو قاطعني من گال.
هَيْصَم: الموت هو نهايه كل المخلوقات على الأرض لذلك انزعاجج من أمر ألاهي شيء مو صح اعرف من الصعب تحمل خسارة انسان عزيز لكن لازم تكونين اقوة، هو اكيد ممات حتى يشوفج هيج حزينه ومدمره جميعنا في يوم ما خسرنه لكن خلينه هاي الخسائر مصدر قوة ونهضنه من جديد أطلب هوايه وقت وجهد لكن بالأخير گدرنه نتجاوز بشكل أو آخر.
وهسه لازم اشرحلج الطريقه بشكل نظري بعدين نطبقها عملي واضح؟
فيروز: دائماً تغلق النقاش مثل ميعجبك ومتنطيني مجال أجاوب ياترى من حقي اسأل عن السبب؟
هَيْصَم: ربما اعرف شنو راح تسألين لكن مو بالسهوله اكشف اوراقي كدامج،
اما الكلام اللي گلته ماهو الا نتيجه خبرتي بالحياة بعملي الخسارة اكثر من الربح واذا بقينا نحزن على كل شخص فقدنا وقتها نكتب على نفسنه الموت واحنه عايشين وهذا الشي اللي ميردوة لو جانوا موجودين مقبلوا على حزنه عليهم لذلك ملازم نزعلهم وهم ميتين.
فيروز: وكأن اتريد تسمع نفسك هذا الكلام؟!
هَيْصَم: شنو رأيج نترك هذا النقاش و نكمل اللي اجينه علمودة ؟
فيروز: اخذت نفس، يلا حلو الأنسان يتعلم شي جديد.
هَيْصَم: شوفي وانتبهي على الشرح تلزمين المسدس بهاي الطريقه لازم اتكون اديج ثابته مترجفين وبدون خوف وانتِ مركزه على الهدف،
الأيد تنقسم الى قسمين الراحة مالت الأيد والأصابع ، راحه أيدج تخليها على جهة من المسدس والأصابع خليهم على الجهه الثانيه وبكل قوتج تسحبين اقسام هذا كله بعد متتأكدين المخزن بيه رصاص واضح،
وبعدها ترجعين على هدفج وتضغطين على الزناد وترمين الرصاصه هذا على شكل مبدأي وهسه خلينا نطبق عملي حتى تستوعبين أكثر.
فيروز: سحبني اله ظهري على صدرة سحب أيدي اليمين وخله بيها السلاح وثبته بأيدي اليسار خله أيده على أيدي وسحب أقسام حجيت بتوتر من هذا القرب،
هَيْصَم شنو تسوي؟
جاوبني واحنه على نفس الوضعيه.
هَيْصَم: لازم تتدربين مو دائماً راح اكون حواليج وفي حال صار شي سيء اليه تگدرين تنقذين نفسج لَّباءَة.
فيروز: ارتعدت اطرافي فقط من سماع هذا الكلام من عنده و شعور خوف داخلي اتولد من ذكر سيرة الموت فجأة لذلك حجيت بسرعة ،
من وين طلعت بهذا الكلام هسه؟؟
لتنسه انت وعدتني راح تبقى يمي وتحميني من كل خطر مهما صار ليش تريد متنفذ وعدك شنو صاير؟!
هَيْصَم: احنه منكتب يوم وفاتنه هذا الشي القدر يحدده مو اني لَّباءَة.
فيروز: الله يوفقك لتخوفني مراح يصير شي مو زين راح تنجح بمهمتك وكل واحد بينه يرجع لحياته الطبيعيه انت هيج وعدت.
هَيْصَم: او وعدي بصمه وشاهد ومع ذلك لازم ادربج في حال مخططي منجح وصار شي غير متوقع فجأة مو فقط الموت.
: دام صمت ثواني بعدين صار هوه قوي همس قريب أذني.
هَيْصَم: من اگول رقم ثلاثه تطلقين رصاصه ماشي،
واحد ،اثنين، ثلاثه ،يلا
فيروز: غمضت عيوني من طلعت الرصاصه من المسدس بلعت ريگي واخذت نفس عميق جنت دائماً احب اتعلم هاي الأشياء بس لأن صار كل شي فجأة اتوترت،
بقينا على نفس الوضعيه لساته حاضني على رغم رميت وخلص، حجيت بصوت ناصي،
مو على اساس تكره لمس الجنس اللطيف؟!
انفاسه تلفح رگبتي يحجي بهمس قريب أذني خلاني افقد شعوري بجميع اعضاء جسدي واختل توازني بالكامل.
هَيْصَم: احد القواعد اللي كسرتها وياج برأيج كم قاعده لسه راح تنكسر لَّباءَة؟
فيروز: حاولت اسيطر على نفسي وجليت صوتي
وحجيت ،
والحرام اللي جنت تحجي بيه سابقاً سيد هَيْصَم؟!
جاوبني بنفس النبرة.
هَيْصَم: هاي مو اول مره ما اندم على ذنب ارتكبه وياج ولتسألين عن السبب.
: ابتعد بعد آخر كلمه مثل الشخص اللي صحه على نفسه فجأة بقى ينظر للمكان فتره قليله بعدين اقترب من عندي وگال.
هَيْصَم: لازم تدربين هاي الرصاصه لا شيء اتعلمي أكثر واني راح اشرف على تعليمج بنفسي.
فيروز: ليش مُصر تعلمني كون واضح ويايه ولو لمره وحده ولتخليني اصنع افكار من مخيلتي.
هَيْصَم: الأعداء ناوين قتلج بأي لحظه ،يردون ايشوفج ميته والسبب تعرفيه لذلك في حال مگدرت اكون متواجد لأي سبب كان بوقتها تگدرين تدافعين عن نفسج.
فيروز: وادافع عن نفسي بهاي الطريقة؟!
هَيْصَم: راح ادربج على بعض الحركات المهمه اللي تستفادين من عدها بالأضافة اعلمج على بعض الخدع في حال تعرضتي للأختطاف اتسويها ،
وهسه خلينه نكمل تدريب لكن هاي المره طبقي اللي علمته ألج قبل قليل أريني مدا براعتج.
فيروز: حاولت ارجع الزم المسدس بأيدي بس والله ثگيل اجيت احجي وياه شفته صافن لمكان ما اتقربت من عنده وقبل ما احجي اي كلمه سحبني وخلاني وره ظهره بذات الوقت اتقربت من عدنه سياره گدرت اشوفها بسبب الأضويه مالت سيارة هَيْصَم اللي تركها شغاله حتى تضوي المكان،
صاحبها يسوق بشكل جنوني وصلت يمنه وتوقفت ونزل من عدها ثلاث اشخاص ملثمين.
يتبع..
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه.
تصبحون على الف خير شمعاتي انتوا.
حسابي الأنستا شمعاتي نسولف بيه عن القصص.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!