للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه مع اصدقائكم حتى نستمتع وي الهَيْصَم مع بعض.
هَيْصَم
(الكاتبة زهراء احمد)
_______
تدرون شيگولها؟!
شيگول؟!
عيونِچ الدّيرة الصِغيرة العايِش بسِدها وَطن ،
اخذ السويج مالت السيارة وطلع بسرعه بدون مينطق حرف واحد بس وجهه انگلب تماماً وكأن صاير مصيبه خليت ايدي على گلبي وبقيت ادعي ماكو شي خطر ويرجع سالم هو وفريقه بدون ميتأذون.
هَيْصَم: سولفلي بالتفصيل شلون صار كل هذا مصار ساعه من اتصل بيه مبيه شي!!
هَمَّاس: طلع يشتري عشا اشويه واجانه اتصال انو متعرض لأطلاق نار وناقليه للمستشفى اجينه لهنا واتصلنا بيك بسرعة.
هَيْصَم: عرفتوا منو؟
هَمْهَام: بالمظاهرات صعب نعرف بالتحديد سيدي.
هَيْصَم: الرصاصه وين صابته؟
ضَرْضَم: منعرف لحد الأن مطلع احد من العمليات ونسأل محد ينطي جواب.
هَيْصَم: اني ما اثق بالأطباء اهنا شوفوا اذا نگدر ننقله لغير مستشفى.
هَمَّاس: اغلب المستشفيات مليانه تعرف الوضع الحالي اللي يمر بيه البلد.
هَيْصَم: واني مقصدت مستشفى حكومي وانما المستشفى اللي يشتغل بيها الدكتور أرفد، خلي يطلع الدكتور ويطمأنه بالأول بعدين نتخذ الأجرائات اللازمه لنقله لغير مستشفى.
بقينه منتظرين ساعتين يلا طلع الدكتور وعلى رغم أسلوبه المحترم بس هَيْصَم معاجبه الوضع ابداً واحنه نعرف سبب عدم ثقته بالأطباء.
هَيْصَم: شنو وضعه دكتور؟
نوح: الرصاصه جايه قريب الكتف بالصدر الأيسر گدرنه نطلعها بصعوبه وهسه هو تحت المراقبه حتى يستعيد وعيه لكن اگدر اطمأنكم انو وضعه تعده مرحله الخطر الحمد الله على سلامته.
هَيْصَم: اريد انقله لغير مستشفى.
نوح: ميحتاج بكل الاحوال بس يصير وضعه افضل بشويه تگدرون طلعوه للبيت في حال تأكدنه من المؤشرات الحيويه مالته.
هَيْصَم: تمام شكرا الك.
نوح: واجبي هذا.
هَيْصَم: اريد اشوفه.
نوح: خلي يفتح اعيونه بالأول بعدين تدخلون.
هَيْصَم: هذا الوضع ميعجبني ما اتحمل اخليه وحده يمهم الله اعلم شنو يسوون بيه هسه!!
هَمْهَام: من هاي الناحيه كون مطمأن يطيح حظهم حتى لو جان تحت تأثير البنج.
ضَرْضَم: الله يشافيه بسرعة هاي النومه ملايگتله ابد.
هَمَّاس: اي والله اتعودنه على سوالفه ماعرف شلون ارجع للمركز وهو مموجود بيه.
هَيْصَم: لتحسسوني بعد ميرجع هي كم يوم حتى يصير زين بطلوا مناحه وكأن احنه بعزاء.
مرت ساعتين ثانين واحنه منتظرين حتى يفتح اعيونه ونگدر نشوفه.
هَمْهَام: لشوكت لازم نبقى منتظرين؟
هَيْصَم: گلت ماعندي ثقه بيهم الله اعلم شنو سووله حتى مگعد لسه!!
ضَرْضَم: اي وشلون نتأكد مسووله شي؟
هَمَّاس: ترة مستشفى مو جبهه ليش هيج خايفين؟!
هَيْصَم: لان اكو اطباء مو شرفاء يسرقون اعضاء المرضى مقابل كم فلس.
هَمْهَام: من هاي الناحيه كون مطمأن محد يتحمل يعيش بأعضاء لائِث.
واخيراً واحد من الممرضين تگدر تگللنه المريض بالعنايه شنو وضعه هسه؟
بدأ يصح من البنج راح انادي الدكتور حتى يجيك وضعه.
راح اشويه واجه هو ونفس الدكتور دخلوا للغرفه بقوا فترة مو طويله انفتح الباب وطلعوا السدية اللي نايم عليها وجهه ذبلان واعيونه يفتحهن ويسدهن حجزناله غرفه خاصه ودخلنه يمه بعد مطمأنه الدكتور على وضعه اشويه وبقى يهذي.
لائِث: احبهااا.
هَمْهَام: منو هاي ولك؟
هَمَّاس: لتفضح بنات الناس لائِث لتحجي.
ضَرْضَم: على اساس راح يسمعك خلينه نتونس ونعرف وي منو واگع الحلو؟!
هَيْصَم: كافي انتوا الثنين يهذي ميعرف شنو يحجي لتنتبهون على كل كلمه يگولها.
هَمَّاس: لحظه اسكتوا د يحجي.
لائِث: هَيْصَمم.
اتقرب من عنده نزل راسه يم وجهه وگال بحنيه.
هَيْصَم: محتاج شي لائِث؟
لائِث: زوجني.
هَيْصَم: صير زين ودلل.
هَمْهَام: مستعجل المحروس حتى وهو مريض يفكر بالحب و الزواج.
ضَرْضَم: اموت واعرف على منو كاتل نفسه هيج؟!
هَمْهَام: هسه تطلع تشبه جبار ابو المولدة.
هَمَّاس: لتاخذون غيبه حرام.
ضَرْضَم: حجه الصافي.
هَمَّاس: احسن تدخل نار جهنم على شي ميسوه بعدين بمكان متفكر ابنات العالم فكر بخطوبتك شو لسه محد انطه جواب؟!
ضَرْضَم: هسه تلگيها صارت حامل بقت منتظرته.
هَيْصَم: شنو رأيكم طلعون اسلحتكم وتصير بالدم اهنا؟
هَمَّاس: نعتذر سيدي.
هَيْصَم: احنه فريق واحد ما احب اتكون بيناتنا اي نزاعات او مشاكل لابسبب مرأه ولا شيخ عشيره ولا اي طرف ثالث واضح؟
ضَرْضَم: اكيد طبعاً احنه فريق واحد للموت لكن حبينه نغير جو بسبب الظرف الحالي اللي احنه بيه.
هَيْصَم: غير جو لكن مو بهذا الكلام تعرفون عدل هَمْهَام حساس بهذا الموضوع.
هَمْهَام: ماكو داعي سيدي كلامهم صحيح الواضح هم اصلاً رافضين يعني ميحتاج نبقى بنفس السيره مالته الخطبه.
هَيْصَم: اني اتصلت بأبو البنيه قبل اسبوع صحيح هو منطه موافقه لسه بنفس الوقت مرفض طلبنه حتى لو جانت عنده غير نيه بس لحد الأن مصرح بشي واني وعدتك متصير لغيرك أو وعدي بصمه وشاهد.
هَمْهَام: شكراً سيدي بس لعبت نفسي من هذا الوضع ماكو واحد يخطب ثلاث اشهر وميرجعون جواب حتى لو اسير هم وصل خبر لأهله.
ضَرْضَم: لتگول هيج كلنه وياك هَمْهَام.
هَمْهَام: مليت من هذا الوضع ليش متفهمون؟!
هَيْصَم: صوتك احنه بالمستشفى اغلقوا هاي السيرة هسه وصيحوا الدكتور ليش بعده مصحه من البنج بالكامل؟!
ضَرْضَم: اني راح اصيحه.
أرفد: خير هَيْصَم منو مسوي حادث هاي المره؟
هَيْصَم: لائِث.
أرفد: والعباس ما اسويله عمليه من الأخير اخذه للمستشفى واذا صار زين طمني.
هَيْصَم: بلا منيتك خبرني شگد يستغرق المريض حتى يصحه من البنج؟
أرفد: حسب العمليه ونوع البنج و المريض.
هَيْصَم: والتسلسل العائلي من ضمنهن هم؟
أرفد: والبطاقه الموحده ضروريه للكشف.
هَيْصَم: خليك واقعي وياي بدون مهزله الوضع ميتحمل خفة دمك.
أرفد: بشرفك اني شلون اعرف صديقك شوكت يصحه تره الف مره گلتلك اني جراح قلبيه هذا اختصاصي غير مرضاي و الأمور اللي بأشرافي ما اعرف بيها وحتى لو عندي معرفه ما ادخل لان كل واحد وشغله ما احب اتجاوز على عمل غيري.
هَيْصَم: أرفد انت گلتها دكتور يعني مو بنجرجي عندك معرفه ب العمليات والوقت اللي يستغرقه المريض حتى يصحه من البنج لتبيعهن عليه وگول الوقت المحدد.
أرفد: لو الله خالقني بنجرجي صدگ ولا مخليني مبتلي بيك.
هَيْصَم: أرفدد.
أرفد: افتح كاميرا.
هَيْصَم: ليش؟!
أرفد: حتى اشوفه غير،
ملعون مو هذا الدكتور يجيك وضعه ليش متصل بيه لعد؟!
هَيْصَم: ماعندي ثقه بيه صار ساعه نفس الكلام اشويه ويصحه ولحد الأن ماكو شي.
أرفد: الواضح مراح يطول هواي.
هَيْصَم: ليشش؟!
أرفد: يرجع وعيه ليش متريد؟!
هَيْصَم: ليش انت گلتها بطريقه عدله فكرت مراح يطول ويتركني.
أرفد: وليش محسسني هو صاحبتك.
هَيْصَم: وصاحبتي بيش كيلوها؟!
أرفد: اي صح صدگت، اني راح ارجع للبيت وما اوصيك ارجع اتصل بيه اذا مفتح اعيونه.
هَيْصَم: هذا طبيب العائله لازم يتحمل.
أرفد: تدلل انت بس حاول مياخذك الواهس.
فيروز: گاعده على اعصابي صار اربع ساعات من طلع واني اكل بنفسي شنو صاير وليش هيج تأخر؟
بعد حادث خالتي صارت عندي خوفه من ابسط الأشياء قررت اتصل بيه بس ترددت خفت يكون يم واحد من جماعته او بمهمه واني احرجه امامهم بس الوضع ميتحمل انطي تخمينات اخذت الموبايل وتصلت بيه شويه وجاوبني بأسلوب غريب.
هَيْصَم: الو حبيبي.
توترت وحسيت رجليه خدروا جاوبته بأرتباك.
فيروز: ردت اطمأن عليك لان من طلعت مجان وضعك زين طمني ان شاء الله ماكو شي.
هَيْصَم: لائِث تصوب واني هسه يمه بالمستشفى افرغ واتصل بيك.
فيروز: تمام اخذ راحتك.
هَيْصَم: انتبه على نفسك ابني.
ضَرْضَم: سيدي.
هَيْصَم: صحه؟
ضَرْضَم: اي وصحت اخبالاته هم.
هَيْصَم: الحمد الله.
لائِث: متت لو بعدني؟!
هَمْهَام: شنو اشوف؟
لائِث: انت تشبه الجني يعني متت.
ضَرْضَم: الحمد الله على سلامتك خويي.
لائِث: ليش عندي ولادة شكو تتحمدلي؟!
هَمَّاس: تصوبت ليش متذكر؟!
لائِث: منو گال شو اني ماعندي علم!!
هَيْصَم: شنو تحس هسه؟
لائِث: نفسي لعبانه ودايخ ومشتهي حوامض.
هَمْهَام: هاي اعراض حمل الف مبروك حبيبي.
هَيْصَم: تذكر شلون صار الحادث؟
لائِث: طلعت اشتري زقنبوت لذولي الثولان تاليها اجتني رصاصه تايهه تعرف المطعم قريب من المظاهرات.
هَيْصَم: الحمد الله على سلامتك مره ثانيه.
لائِث: وين المره الأولى ما اذكرها؟
هَيْصَم: شباب امبين صار زين ارجعوا للمركز واني ابقى يمه بس يصير احسن اطلعه والتحق بيكم.
لائِث: وين تعيفني وحدي؟!
هَيْصَم: بالشارع اكو هواي ناس ينتبهون عليك لتخاف.
لائِث: خاين اعرفك.
هَيْصَم: مرتك انا ولك وتريد ابقى يمك طول الوقت؟!
لائِث: اسكت عني تعبت اصلاً اني زعلان عليك.
هَيْصَم: نام باجر الصبح نسولف.
لائِث: وانت زين تروح؟
هَيْصَم: راح ابقى يمك يعني وين اولي!!
لائِث: هَيْصَم موبايلي وين؟
هَيْصَم: يمك على الميز.
لائِث: تعال شوف منو متصل عليه.
هَيْصَم: متصله بيك عشر مرات.
لائِث: انطيني الموبايل خلي اتصل بيها خطيه هسه بالها يمك.
هَيْصَم: مريض انت متگدر هسه خليها الصبح.
لائِث: ازعل عليك من صدگ هاي المره اتصل بيها ونطيني الموبايل خليني احجي وياها بالها يمك ليصير بيها شي.
هَيْصَم: تگدر تلزمه؟
لائِث: ايدي اليمين مبيها شي عادي يعني.
هَيْصَم: اخذه.
لائِث: الو،
طايح الحظ من اشوكت اتصل بيك ليش متجاوب تعرف رادت تصيبني جلطه بسببك واني الف فكره براسي وذلك الرافع خشمه ميجاوب على اتصالي ابد.
لائِث: على كيفج زعطوط انا وتحجين هيج ازعل عليج تره فوگ متگولين الحمد الله على السلامه شنو صار بيك مو عوايدك متجاوبني؟!
ليش انت خليتلي مجال اسأل قاطعتني بسرعة.
لائِث: غلطج بس عليه وي هَيْصَم عكس بس حقج اذا اني ابن البطه السودة.
لاتحجي على امك خوش مرأه وگولي شنو صاير وياك ليش اتصل متجاوب.
لائِث: تصوبت اسم الله عليج وهسه نايم بالمستشفى ويمي الحلو اللي تحبيه.
جايتك.
لائِث: وين يمعودة تجين الدنيا ليل وبيتج بعيد واني الصبح طالع ان شاء الله ميحتاج لتعذبين نفسج.
واني گلت جايه جواريني عنده سيارة راح أأجره واجي واي كلمه ما اسمع ولتگول لهذا اليمك لأن حتى لو اعترض هم اجي وعلى عنادة وهاي المره محد يمنعني.
لائِث: يروحي ليش متحسين بخطورة الوضع الدنيا عالگه وسادين الطرق شلون تگدرين تعبرين؟!
ولك كأن نسيت اني منو؟!
لائِث: عفا معقولة بنت الدواوين انتِ.
لعد خصم الكلام الصبح اني يمك وريوگك من تحت ايدي.
هَيْصَم: جايه؟
لائِث: وراح تسويلك مصيبه هم خاصتاً لو شافتها ينگلب بيتك عزاء.
هَيْصَم: وهذا بسبب منو؟
لائِث: واني شنو عرفني راح يصعد عدها الحماس وتجي بنص الليل.
هَيْصَم: افهم لائِث ما اريدها تجي اني بصعوبه يلا محافظ على لَّباءَة شلون اگدر احميها هي هم؟!
لائِث: لتخاف متبقى فتره طويله اني ارجعها بأيدي وعد خليك مرتاح.
هَيْصَم: لقائهن ما اريده يصير.
لائِث: هذا الشي ما اگدر اوعدك بيه.
محمد: سرگي گلبي ليش مشفتج اليوم؟!
حوري: أرفد موجود بالبيت وبعد متزوجت أيفلين صارت اعيونها عليه هم مو مثل قبل اگدر اخذ راحتي.
محمد: وأيفلين شنو تريد من عندج ليش عينها عليج؟
حوري: اعتقد تعرف لذلك تراقبني حتى تتأكد.
محمد: اي من حقها تتأكد ليش لا بعدين انت اخت زوجها واجبها هذا تحمي العائله.
حوري: تسهتزأ حضرتك؟
محمد: ليش يروحي اني اريد اخلص من اخوانج صايرين عقبه بطريقي وياج ربي العالمين ضافلي خواتي اكثر من هيج حظ ونعمه ما اتوقع اكو ابداً.
حوري: هم جاب سيرة اخواني اتركهم الله يوفقك بس مره وحده اتصل بيه بدون متحجي بيهم صارت حسرة بگلبي والله.
محمد: يلا ماشي شنو متعشيه؟
حوري: صدگ والله محمد؟!
محمد: شلابسه؟
حوري: احترم نفسك مو لهاي الدرجه عاد.
محمد: والله حيرتيني بشنو احجي مثلاً؟!
حوري: گولي شگد مشتاقلي؟
محمد: ااه وگعتي على الجرح مشتاقلج بگد اشتياق السجينه لجف أيد أرفد وهو يفتح قلوب المرضى.
حوري: تصبح على خير وياويلك تتصل بيه مره ثانيه.
محمد: تعالي ولج اشاقه ايع شگد دمج ثگيل ولا يتحمل لطافة شخص مثلي،
تعرفين شگد احبج؟؟
لو ابقى يومين اشرح واعبر بأحاسيسي اتجاهج ما اگدر اوصف مقدار حبي ، احبج يمصگوعه.
حوري: مصگوعه شنو؟
محمد: وتلوميني ليش ما اتغزل بيج.
حوري: هسه شنو حجيت هو مجرد سؤال!!
محمد: احبج سرگي گلبي.
حوري: واني هم.
محمد:وانت شنو؟
حوري: احبك.
محمد: ول يابه اموت على ربج طرگاعتي جعل محد غيرج ايگول احبك.
حوري: وجعل ما تسمعها من وحده غيري لان تعرف شنو اسوي بيك.
محمد: عنيفه حبيبتي.
حوري: اعجبك.
محمد: طالعه على اخوانج اكيد تعجبيني وقبل متگولين راح اسده اني استأذن يروحي اجاني اتصال من موكل.
فيروز: دخلت غرفتي وماعندي شي اسويه فتحت الموبايل وبقيت اباوع على صورة اللي ناشرهم انستا ومن باب الأعجاب انطيته گلب لكل الصور شويه وصلتني رسالة من عنده طفرت من مكاني واني اقرأ شنو مكتوب.
هَيْصَم: ليش منايمه لحد الأن؟!
فتحت اعيوني شلون عرف اني منايمه كتبت بسرعة،
فيروز: وانت شلون عرفت؟!
هَيْصَم: لان انطيتي لايك لصوري قبل دقيقه.
يافشلتي بقيت اضرب على جبيني على حجم غبائي اني نسيت هو نفسه الحساب مالته يعني شنو نوع الثول العندي ليش دائماً انحط بمواقف محرجه وياه؟!
حاولت ابرر موقفي فجاوبته،
فيروز: بالغلط مجان قصدي انطي اعجاب.
هَيْصَم: اي اعرف بالغلط لذلك اني مسألتج ليش انطيتي اعجاب گلت ليش منايمه.
فيروز: وحدي بالبيت ومجايني نوم.
هَيْصَم: بس هاي مو اول ليله تبقين وحدج شنو الفرق اليوم؟!
فيروز: صحيح مو اول ليله بس بهاي الأيام تعودت ما ابقى وحدي اني انسانة سريعه التعود اذا متعرف.
هَيْصَم: تردين ارجع؟
فيروز: اذا گلت اي تجي؟
هَيْصَم: لَّباءَة الهَيْصَم متگدر تبقى وحدها معقولة اكسر خاطرها وهي غاليه على گلبي؟!
بقيت اقرأ بالرساله اغمض اعيوني وارجع اقرأها من جديد حتى اتأكد من المكتوب،
غاليه على گلبي، اني غاليه على گلبه ضحكت وبقيت اگمز بمكاني من الفرح رجعت ضجت هسه يگلي ما احبج،
سمعت صوت اشعار فتحته،
هَيْصَم: نمتي؟
جاوبته بسرعة.
فيروز: لا.
هَيْصَم: وينج لعد؟!
فيروز: سرحت شوي.
هَيْصَم: لتفكرين انتِ صدگ غاليه على گلبي.
فيروز: وليش فكرت اني سرحت بهاي الكلمه؟!
هَيْصَم: هيج خمنت مو صح؟
فيروز: لا صح.
ابتسم وبانت اسنانه لذلك النايم بس عينه عليه ورافع حاجبه فززه وهو يگول.
لائِث: ناس الله ربها قابل مثل حظي لا مرأه لا صخام الك الله يافقير.
هَيْصَم: عجوز ماكول عشاها شبيك تلطم؟؟
لائِث: ليش مرحت لو گاعد حتى تغثني؟!
هَيْصَم: ليش متنام مو احسن؟
لائِث: بشرفك خليني گاعد اكره النوم يكفي كل ساعه جاي واحد ضاربني مهدأ.
هَيْصَم: اي افضل حتى متحس بألم.
لائِث: ليش متنام انت؟
هَيْصَم: باقي حتى انتبه عليك نام ولتخلي بالك يمي.
لائِث: والعباس جذاب تريد تراسل بيها.
هَيْصَم: عندك مشكله؟
لائِث: عبد فقير اني ويني وين المشاكل؟!
هَيْصَم: صحيح انت ادور حب قابل ادور مشاكل!!
لائِث: حب شنو اعوذ بالله؟!
هَيْصَم: اللي تريد تزوجها وگلتلي اخطبها الك.
لائِث: بشرفك هاي اني هيج حجيت؟؟
هَيْصَم: لا ابوي،
احبها،
زوجني.
لائِث: افا هيج هنت عليك واني صديقك تبتزني وانت تعرف عدل اني جنت تحت البنج وكلامي مو صحيح!!
هَيْصَم: منو گال مو صح؟!
لائِث: وين صحته جنت غايب عن الوعي يعني اهذي مثل المصخن هذا هم تمشي بكلامه؟؟
هَيْصَم: لا حبيب اكو فرق بين اليهذي وتحت تأثير البنج صحيح مدرست طب بس عندي معلومات طبيه كل اللي گلته جان صحيح ميه ميه ونابع من گلبك ومنتظرك تتشافى ونتناقش بهذا الموضوع بالتفصيل وهسه نام يلا گدامي.
لائِث: طفل اني وتأمرني هيج؟
هَيْصَم: اي انت ابني المدلل.
فيروز: وين رحت؟
هَيْصَم: لائِث جان عطشان شربته ورجعت.
فيروز: فكرتك مشغول گلت تگدر تاخذ راحتك.
هَيْصَم: بالعكس هاي أكثر ليله فارغ بيها.
فيروز: ليش بالعادة شنو جنت تسوي هيج وقت؟
هَيْصَم: اغلب وقتي بالمركز اراقب القضايا واطلع وي فريقي مداهمات او نراقب الوضع العام لو نشتغل بقضيتنه.
فيروز: هوايه تحجيلي عن قضيتك متخاف يعرفون؟
هَيْصَم: ليش هي المخدرات سر؟!
بعدين تركيني من المركز والقضايا وسولفي شنو تسوين هسه.
فيروز: اسولف وياك.
هَيْصَم: گاعد تتعلمين اسلوبي عفيه.
فيروز: ليش تريدني اتعلمه؟
هَيْصَم: اي حتى محد يگدر ياخذ من عندج لا حق ولا باطل بمعنى ادق احنه نسميه اسلوب مراوغه يخلي الفريسه متصطاد ابد.
فيروز: واني مخايفه وانت موجود يمي.
هَيْصَم: ما اريدج تخافين لان انت انثى الأسد مو لان اني موجود.
فيروز: حلوه هاي الجمله بس اني افضل اللي تگولها دائماً.
هَيْصَم: لَّباءَة الهَيْصَم؟
فيروز: اي.
هَيْصَم: اثنينهم نفس المعنى بكل الاحوال اني الأسد وانت لَّبوتي وبأختلاف اسمائنا.
فيروز: هوايه تشبهنه بالحيوانات ملاحظ؟
هَيْصَم: ملك الغابه الأسد بعدين الأمام علي عليه السلام لقبه أسد الله الغالب وين المشكله اذا سميتج لبوة الأسد؟!
فيروز: مراح اگدر اجادلك سميني مثل متحب.
هَيْصَم: صايره مطيعه.
فيروز: يمكن لأن نعست ومابيه حيل اناقش.
هَيْصَم: اذاً روحي نامي لتعبين اعيونج بالسهر.
فيروز: ما اريد انام صار يومين بس نايمه.
هَيْصَم: شنو تردين اذاً؟
فيروز: اذا ماعندك شي نبقى نسولف.
هَيْصَم: شنو جان حلمج تصيرين من تكبرين؟
فيروز: مُعلمه.
هَيْصَم: شنو السبب؟
فيروز: ماعرف الأغلب بالأبتدائية هيج يحلمون.
هَيْصَم: وبعد شنو هي باقي احلامج؟
فيروز: والله ولا وحده من احلامي تحققت كل اللي صار رب العالمين كاتبه.
هَيْصَم: وفارس احلامج؟
فيروز: ميعرف يمتطي الفرس مالته.
هَيْصَم: شنو رأيج نعلمه؟
فيروز: اذا متجي من الفطرة مبيها طعم.
هَيْصَم: ممكن تكونين فارسة بأحلام شخص ثاني.
فيروز: وهذا متأمل بيه اني اخطبه؟!
هَيْصَم: ههههه مو رجال اللي ينتظر من المرأة تبادر بالأعتراف بس احتمال يريد يتأكد من مشاعرة.
فيروز: وين تريد توصل بهذا النقاش هَيْصَم؟
هَيْصَم: مو لمكان مجرد حديث عادي.
فيروز: اليوم حاسستك مختلف عن كل يوم.
هَيْصَم: ليش؟
فيروز: لطيف وعندك خلگ ومو دبلوماسي بجوابك.
هَيْصَم: گلتلج سابقاً قواعدي تُكسر من اكون وياج غيرتي بهَيْصَم هوايه صفات بدون متدرين.
فيروز: وانت هم غيرتني هوايه لتفكر ابداً اني نفسي فيروز قبل ما اعرفك.
هَيْصَم: بأي طريقه صار التغيير؟
فيروز: مجنت اثق بالرجال ابد وما اخلي اي تواصل وياهم واخاف من عدهم هم حتى جان بالجامعه هوايه طلاب يفتحون ويايه احاديث اني اتركهم وابتعد صح اني منعزلة وما اكون صداقات وي الجنسين بس الرجال الهم نصيب اكبر من نفوري بالعلاقات.
هَيْصَم: كل سنين حياتج ال 25 محبيتي ولا مرة!!
فيروز: ولا دگ گلبي حتى لبزونه.
هَيْصَم: اني شخص محظوظ جداً اذا هيج.
فيروز: ليش انت شنو الك علاقه؟!
هَيْصَم: اول حب بحياتج.
فيروز: واثق حيل سيد افندي؟!
هَيْصَم: تنكرين لَّباءَة؟؟
فيروز: ننكر اذا اكو شي من الأساس.
هَيْصَم: تدرين شنو احله شعور بالكون؟
فيروز: شنو؟
هَيْصَم: تحجين وي شخص گلبج مرتاحله.
فيروز: وهسه انت گلبك مرتاحلي؟
هَيْصَم: والا بقيت اسولف وياج كل هذا الوقت.
فيروز: تعبت؟
هَيْصَم: بسوالفي وياج لا.
فيروز: مع هذا لازم تنام باجر اكيد عندك شغل وراح تتعب هوايه.
هَيْصَم: تدرين صار شگد مفتقد هذا الشعور؟
فيروز: أي شعور؟
هَيْصَم: شخص يخاف عليه من گلبه ولهذا السبب ما اريد اكسر گلبج واني اعرف عدل شگد انت انسانه نقيه وطاهره ومتستاهلين من عندي غير الحب والأحترام بس مع هذا ماضي مقيدني بسلاسل مخليتني ما اگدر اخطو اي خطوة للأمام.
فيروز: اني ممطالبتك بشي هَيْصَم لتخلي هاي العوائق بيناتنا واحنه اتفقنه انكون اصدقاء لو نسيت؟
هَيْصَم: لسه تذكرين؟
فيروز: اكو اشياء تنحفر بالذاكرة نسيانها صعب.
هَيْصَم: يسعدني اكون بجزء من ذاكرتج حتى متنسيني يوماً ما.
فيروز: ليش برأيك انت تنسي بسهوله؟!
هَيْصَم: ماعرف ممكن.
فيروز: ما اعتقد.
هَيْصَم: ليش؟!
فيروز: لان تترك بصمه داخل كل شخص بحضورك ميگدر يتخطاها.
هَيْصَم: كل شخص لو تقصدين نفسج لَّباءَة؟
فيروز: اعرف وين تريد توصل ريحلي عقلك مستحيل تاخذ من عندي جواب.
هَيْصَم: جوابج واصلني اصلاً لكن عبثاً المراوغه.
فيروز: بما انو مطلع من شفايفي متگدر تمشي بتخميناتك سيد افندي.
هَيْصَم: الضباط ميمشون بالتخمينات كوني واثقه.
فيروز: بالأدلة او الشهود وثنينهم متمتلكهم حتى تثبت صحة كلامك اليه.
هَيْصَم: الأدلة موجوده عندي وملموسه هم والشهود نفس الشي.
فيروز: شنو هي أدلتك؟
هَيْصَم: اعيونج ورجفة أيدج اذا لامستها أيدي.
فيروز: وبعد.
هَيْصَم: تردين ندخل بالعميق لَّباءَة؟
فيروز: عميق شنو اسم الله ماكو بيني وبينك اي علاقه.
هَيْصَم: بس ممكن تصير متدرين الحياة شنو مخبيه.
فيروز: لشنو تلمح؟
هَيْصَم: لعرس قريب ممكن.
فيروز: تأخر الوقت وصرت تحلم احلام يقظه تصبح على خير سيد افندي وحاول تنام لتبقى سهران.
خليت راسي على المخده وحاولت انام وما افكر بكلامه بس صعب شنو جان يقصد بعرس قريب؟؟
بهاي الليله هوايه اخذت راحتي بالحديث وياه يمكن لان بالموبايل ما استحي من عنده مثل بالواقع وجه لوجه بس تركني بحيرتي وستحيت اكمل أو بالأحرى خفت لاياخذني الحديث لغير منحدر متحمد عواقبه وک العادة يختمها بكلمة ما احبج اللي صارت اكثر كلمة امقتها وينزلني لسادس أرض مثل كل مره،
مضت الليله مثل سابقتها من الليالي فتحت اعيوني على طرقات قوية على الباب والجرس زرفوا طبلة أذني نهضت من افراشي واخذت حجابي بأيدي لبسته فتحت الباب ونصدمت من اللي شفته،
انتِ منو؟!
يتبع.
بارت قصير ثاني بس مو قصير كلش ان شاء الله اعوضكم بالأيام القادمه أو اول تعويض حيكون هو تغيير موعد التنزيل ويصير بين يوم ويوم ان شاء الله،
شكراً لتحملكم ودعائكم وصبركم عليه غاليني و اعتذر على التأخير كل هاي الفترة بسبب مرضي احبكم كلش هوايه وعسى ربي ميحرمني من عدكم حبايبي انتوا.
تصبحون على الف خير و احلام سعيدة أو واقع أجمل بأذن العليم.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!