رواية قاع الشياطين الفصل الأربعون 40 - بقلم اسماء ديمير

..............☆البارت الخامس والثلاثون  ☆...........

#قاع_الشياطين(البصر والبصيره)

#بقلم_أسماء_ديمير

صفن بوجه بيبرس و ابتسم  كول عزوتي ..

ضحك مادامني عزوتك نفذلي هالطلب ..

دنج صافن على الارض :- اذا اكدر عليه اعتبره تم ،

رد ذاك يكله :-  مو صعب بيبر تكدر تسوي ، لا تنسى اني راح اخلي كل الي عندي وياك حتى تسد الخساره واروح بنفسي للمعبر اتفاوض ويه الجماعه حتى اعبر الشحنه ، داخاطر بروحي وفلوسي كلها لاجلك تعرف انته ..

من حقي اطاب بالمقابل تامين لوضعي و اخوك يطلع من الشغل نهائي حتى الجانو يشتغلون جوه ايده انقلهم  ،

و يكون افضل تفصلهم نهائي حتى عواد ماله اي ايد او عين بنص شغلنه ..

نشتغل على نظيف بدون ماورانه احد يهجم لو يوصل خبر لاعدائنه..

رد بيبر داكلك عو.. قاطعه عدي :- فرات من الاخر اي لوو لاا ماد ايدي اني داخلصك من كارثه اخوك سببها الك ، 

خوتك انته وياه خليها على صفحه ، خوتك هاي مانفعتك هسه ، وينه عواد كلي ذاك وينه ماخذ صاحبته و ساكن الشقه مرتاح وانته هنا تتلاطم لوحدك …

جر جكاره شغلها و صفن ، نفخ دخان والتفت على عدي ، ابتسم كتلي فرات موو ..

ضحك عدي اي فرات ، ما يحلها غير فرات ..

هز راسه نتوكل لعد …

رد علي عدي بضحكه اقوى .  هلا بيك يالحبيب ..

ميرال .. 

كلنه كاعدين على العشه ، و وسن تنقل بالاكل ، جانت ريحه الاكل طيبه كلش جو هادئ ، نادرا مانكعد ناكل كلنه سوه ، بالاغلب كلمن بغرفته ، نزلت ايدي جوه ميز لزمت جف بيبر ، ايده دافيه مثل العاده ..

ابتسمت ، ضغط عليها ، قرب كرسيه مني و لزك بجتفي ، حجه شاورما دجاج لو لحم ..

شتاكل ..

لحم ..

مثلك ، وفوكاها صلصه ، جر الماعون ، حجت خالته تخفي نبره صوتها الي باين عليها الغيض :-  حتى اكل ماتكدرين تاكلين لوحدج حبيبتي ؟؟!

-رد هو لا تعرف ضحك قابل شبيها ماتعرف ، بس دلال ..

ابتسمت ، ردت دكل ياامي اكل اشبع بطنك ..

حسيت بكرصه من فخذي الايمن بجهه ديما دنجت مبتسمه ..

توه اكل و انربدت باب الكراج حيل فززتنه كلنه ، ام زياد صاحت اسم الله شكوو ..

كام بيبر وكف ، دخل عواد يصيح بيبررس ووينك  ، دفر الباب ودخل يعيط خالته صاحت شبيك ولك خرعتنه شكوو …

تقدم على بيبير يخنكه عاطت ديما و خالته ، قبل لايوصله ، بيبر نطا دفعه و نتر محترمك لان اخوي جبير لا تخليني امد ايدي عليك عواد .

-ووولك تطردني من الشغل وياااكم اناا تطردني وتفضل علي عدي ، اخوووك تطرد اخووك ..

-ماطاردك نقلتك لمكان افضل ، سالفه الشحنات بعدتك عنها لان خطره ..

-تضحك عليك بيبرس ولك ضحكت الشباب عليه اخلي مفتاح بالمخزن ماايفتح الحارس عنده نسخه واني لاا ليش شنو سبب ..

-كتلك ياخوي شحنات شغلتها متعبه الك وخطره ، ماريدك توصل لهناك بعد خليك هنا مستريح ..

وكف يلهث رفعه اصبعه:-  اعرف منو وره الساالفه اعرررف منو خالها بالك تبعدني بس وووالله والي اسمه الله ماااسكت ولك اني عووواد عووواد سويتك انته وياه .

-رد ماسويتنه بديك احنه صرنه بتعبه عواد لا تمن عليه بشي مموجود ، جر نفس حجاه بنبره غريبه اشر على صدره بتعبنه و بتضحياتنه …

بالكوابيس الي تمر علينه كل ليله صرنه الفضل مو الك ، 

سكت صافن على اخو جرته خالتك تكله نطاك غير شغل شجلبت بشحنات انته ..

-رد بيبر المطعم و بار الك اخذهم ، نطيت خبر لستار يسلمك مفاتيحه وادارته  .

-نتر ماارضه بهل حجي اني ماقبل تخلوني على صفحه فجأءه  .. 

تخصر بير ورد هذا قراري خويه خليك بعيد لاضطر ابعدك بالقوه ..

-عاط ولك اخوووك اني تفضل علي عدددي ..رفعه رجله و ضرب ميز الاكل و تطشر النعمه رجعت ميرال ليوره خايفه ديما سحبتها و ابتعدن ..

خالته لزمته تهدي وابو زياد جره على صفحه يكله ، خلي يمر فتره عود نكعد و نحجي هسه ثنينكم معصبين ، ماتحصل نتيجه مرضيه ..

نطا ابو زياد دفعه وعاط والله مااسكت سمعت بيبرس ماااسكت مو عواد تشمرو على صفحه بعد كل هالتعب ، افتهمت عليه وعلى اعدائي تحملوو ..

طلع معصب و غضبان و يتحلف ، بشار واكف بنص حديقه مجتف اديه ، يتفرج على عواد الي صعد سيارته و شخطها حيل ،  اندار على ستار اشره بحواجبه بابتسامه ساخره  ..

ضحك ستار كاله صار اكسباير بعد ميفيدنه ..

-بشار رد وجهه باهت مو كتلك عدي يريد يطلعه من اللعب ، واجت فرصته ليمه خله بيبر يطلعه بيده ، 

-رد عليه ستار لان سمعت عواد عنده تواصل ويه ثروت ..

-ماعتقد صار فتره دانيال مراقبه ماعنده اي تواصل ممقابل احد من جماعه ثروت ..

-عنده تواصل متاكد وحتى عدي كال بس شلون ومنو مانعرف ..

-رد اليوم الخبر بافلوس باجر بلاش تفوح الريحه مااضل ..

-رد يضحك مو بالله .. 

ثواني وطلعت غزل لابسه صايه خليجي مفتوحه و جواها بنطرون الاستيك و تيشيرت طافر و بيدها جنطه ..

حجت وديني للبيت عواد يريدني ..

عوج حلكه بشار حجه هااك استلم الكراوي تعباانه ..

-نترت توديني لو لاااا ..

-وقزرقط اي اوصلج ..

مشه يشغل سياره و ركضت وراه تهفي بالصايه …

ضل بيبر واكف صافن ، و ام زياد صاحت على وسن تشيل الاكل ، ابو زياد حجه زين ماسويت من زمان ردت اكلك بس خفت ماترضه وتنزعج ..

ردت ام زياد ، لو كايلي اني اوصله خبر بطريقتي ليش هيج مفشله كبال الشباب ، و يتفاجى بقرارك ..

-رد اسالي شجان يسوي عند المخزن هااا شوداه هناك رفع حواجبه هااا شيسوييييي ؟؟!

بضائع ماخذها بملايين و حاط عليها حراس هو شعدنه بالمخازن ، ادري بضائع تتصرف بسوك لو تصير جوه اديه يصرفها هو على نفسه  ؟؟؟!

كليلي ، ؟؟! اخوي اعرفه ام زياد بس مغمض عيوني عنه بمزااجي بس بلش يستغبي و بده ياثر علينه كلنه لازم نخليله حد لايضيعنه ..

سكتت خالته ، ديما جرت ميرال و صعدن ، تهمس يم اذانها طكوله سفن رجل الرقاصه هههههه ..

شفتي رجلها رجل فكر تزوجها منا طرده رجلج من الشغل منا ..

-ياطرده ديما مو كله المطعم الك ..

ولج يامطعم هذا ، مطعم يديره بس المغضوب عليهم والا الي يثق بيهم رجلج وياه وياه بكل سفره وبكل نقاش عواد طلع من دائره الثقه بعد …

-بس يخوف عواد والله شفتي يهدد ..

جرتني وكعدنه بصاله فوك ، ردت هو النذل نذل صح كلشي يسوي ، بس شماتي بغزيلان ام صدر عريان شحالها هسه ..

-تتوقعين وين راحت ..

-لحكته اكيد للشقه ينكبرون بيها هم هذول مستواهم .. 

رفهت حواجبي بردا وسلاما ان شاء الله ، الله يبعد شر عنه ان شاء الله ..

صعدت وسن العشه الهن مره ثانيه ، حجت ميرال وبيبر اكل ..

ردت لا ويه شباب بره ديشربون نركيله ..

سممنه العشه الحقير ..

ضحكت ديما فلش الطاوله مال ام زياد الثمينه ، 

خلصت عشه ويه ديما ودخلت غرفتي القديمه على حطتها هيه وغراضي ، صح نقلت جزء من غراضي بذاك البيت بس ضل جزء هنا ..

سبحت ولبست بجامه ستن توجهت على ميز المرايه ، اخلي عطر ..

مديت ايدي جريت علبه ، لزمتها مو عطر هاي ، خليتها على صفحه ، خليت عطر ومرطب لاديه و وجهي ، ورجعت لزمت علبه هاي شنوو ..

دائري شكلها اسطواني ، ملمسها قديفه ،  حاولت افتحها ماعرفت ، ضليت اتلمس بيها ابتسمت من انفتحت ، مديت اصابعي اتحسسها ..

كانو ساعه ، لزمتها ساعه تجنن ، دأئريه ، و سيرها صلب مرصعه بشي ..

باين حلوه .. خليتها على صفحه …

 وكفت  نتظر بيبر ، تاخر ماجه كمت فتحت البرده وكفت اتسمع اله ، بس صوت  نركيله  وصوت كلام هادئ ، مامفهوم ، 

بينما كانت تنتظر رجلها على شباك ، كانو شباب مسوين جو الهم بهل هوى و الطبيعه خظره و صوت نافوره ماي ..

نراكيل و ميز متروس كرزات و ليمون و فواكه بانواعها ، اجاهم دانيال اخر شي يلولح بيده دايخ من كثر شرب الي شربه ..

حاجاه بيبر هاا ..

رد اخوك بالبيت ماراح للشقه و مرته يمه …

وعدي ..

فرغ المخزن و نقل الشحنات لغير مكان مايامن باخوك بالمره هذا ، جر الكرسي وكعد يلهث تعبان حجه ياااا يابه تعبان ، صبلي ولك صبلي دفوخ راسي شوي ..

دنج ستار يصب اله ، حجه بيبر باجر لا تطلع للشغل مطعم راح يستلمه عواد .

توه يشرب حجه لاااا ليش اني وين اولي شفت عليه شي ..

-رد لاا خليك ويه ستار على للمخازن و مطعم عوفه لعواد .

-رد.معناها اخوك راح يشرب مخزون البيره كله يكعد المطعم على حديد ..

ضحك بشار على اساس انته مقصر ولك انته حتى بول* مو ماي بول* يطلع  بيره معتقه ههههههه ..

-اندار على بيبر سكت هالمطي لا افتح راسه بالنركيله ..

-كامله بشار ياهو مطي هذا يالكلب …

كام دانيال منو كلب اني تكامشو و صاح بيبر كاافي لك انته وياه ..

رفع راسه يشوف شباك غرفته ، لكاه ضاوي وباين جسم ذيج الرشيقه من عليه ..

ابتسم ، حك راسه ، كام لحيله  حجه ، يله فضوها و كلمن يولي لبيته ، لا اطولون ،  بربي اذا سمعت الكم صوت انزل الكم برماتين اعبيها بناطير مالتكم ..

اثنينهم لزمو بناطريهم من جوه وهزو روسهم توكل توكل ..

عافهم و مشه ، يهز بيده ..

اندار بشار  على دانيال و نتر :- ، هي حيووان كول جذب ماتشرب ولك شراب اكشر انته ، لو ماطول اليوم انته مسطور نسيت شسويت بعرسي لو اذكرك ..

-اكلك بشار لو ما اني جان عرسك فاهي مابي طعم الا انته واهلك وكل ناسك كلكم مابيكم واحد بي خير يسوي جوو حق تبوس ايدي على هالفضل الي سويته الك ..

اندار بشار على ستار  فاك حلكه ، النذل يحجي على اهلنه ولك ليش ساكت اله .. 

-رفع حواجبه ستار مخصر ، اكول دانيال امك عدها ولد غيرك ..

-اي صغار ..

-اكبر ماعدها ، 

-اي اخوي جبير بس مهاجر …

-خوش ..

-ليش ..

-حتى من اخلي طلقه براسك و اكتلك اكو من يداري امك ليش ايضل بالي عليها ..

-زين والله من حظرتك تكلف نفسك و تحير بامي اشكرك ..

-اي شلون لعد ..

-بس اخوي مهاجر اني ..

-شبيك ماطفرا انته ضال بهل لبلد عليش ..

-اشوف وجهك لهل سبب ..

-لا انته كتلك حلال تعال دخنكك و الله ، جره بشار وكله لا عوفه عووفه تعال دنشرب دانيال و نعقد هدنه ، مادامنه بيت بيبرس مانكدر نتصرف براحتنه .. كعد بينهم دانيال حاظن جتفهم يشرب ، و لا كانو توه تعاركو .. 

شباك ميرال كان ضواه مشتغل ، بس من صعد الحبيب دقايق و طفوه .. 

همست وهيه بحظنه اكو علبه على ميز شنو هاي ..

هاا لزمتيها عرفتيها ..

ابتسمت ساعه ، حلوه ..

عجبتج ..

كلش ، 

رد ذهب ٢١ هاي ، مرصعه بجواهر ، 

شنو نوعها .

ابتسم ماعرف بسوالف هاي لا تفشليني ..

ضحكت ، عيد زواجنه بعد يومين هديه مبكره هاي ..

همس دنيا لو تنهدي اهديها الج ، ردت شتريد هديه ..

مد ايده على اذانها تلمسها وتقرب همس  قريب منها ، لا تصدكين ولا تسمعين كل شي ينكال الج ، ثقي بيه وبكلامي وبس..

رخت ملامح وجها ، رفع وجه يشوف وجها ، تلمس ملامحها بهدوء ، ميرال ؟؟
همست هاا ..

لزم جف ايدها خلاه على  كلبه ، اذا ماتصدكين بكلامي صدكي بدكات كلبي ، دكات الكلب ماتكذب ..

ابتسمت وعيونها حزنانه ، لخاطر هيج اني متمسكه بيك بيبر ، اعرف الي بداخلك شنووو..

سامع بجمال الروح بيبر …  سكت ثواني ..

كلها تحجي بجمال الروح بس محد يشوفها ..

احنه ضريرين نشوف جمال الروح ، محد يعرفها غيرنه ..

متشبع ب جمال الروح انته ، ماشفت نبره مثل نبره صوتك ، والله كانو بيك حنيه صوت من بابا ..

رفعت ايدها لزمت ركبته تلمستها بهدوء ، رمشت على كيف، همست اعرف نوبات تتصرف  بطريقه غلط ، بس مو معناها انته انسان سيئ ، الانسان سيئ مايحب بيبر مايعرف يحب ..

وانته تحبني متاكده ، لخاطر هيج غضيت السمع مو بس البصر عن هواي امور ما مقتنعه بيها ..

دنج دفن راسه بحظنهاا ، حظنها حيل وكانو لكه ملاذ الدنيوي ، جنه الارض  ، 

الي الله بعثها لتطهير الارواح من خطايا …

طفت الاضويه عن كل الغرف ، وكلمن راح يستراح من فوضى اليوم ، و ازعاجاته وتعبه ..

الا عواد جان كاعد بصاله و مطشر بطاله الشرب بالارض و بعض حبوب كبسله مشموره قريب منه …

رمش بهدوء وغزل كاعده كباله خاله رجل على رجل كالبه وجها مزعوجه ، ردت مامتنااام ترى طفيت اني ..

رد بحزن اخوي بااعني غززل كلها باعتني ليش ..

رفعت حاجبها انته هم بيعه ..

-اخوي الصغير ربيته على جتافي فضل عليه نغ* عددي ، عدي دخل بينه هدم كلشي ، بيبرس جان يثق بيه ثقه عميه من دخل عدي خرب كلشي ..

تقربت منه وكعدت بصفه وحجت بطريقه ملتويه يااعمرري انته يااحبيبي مو كتلك جيب الفلوس ضمهم عندي ، لو تشتري بيهم شقه وسجلها باسمي محد راح يعرف انته اخذتهم دتكمل قاطعها يدرري بيبرس يدري اني اخذتهم ترى هو مو غبي وتعبر عليه سالفه سكران مادري ..

بهت وجها وبلعت ريك وشنو يعني السالفه تنسي وتجي غير هالارباح قابل يضل يدور وراك بيبرس ..

لزمها من شعرها وعتها حيل معصب كله منج انتي كحب* انتي زنيتي بررراسي كله منججج اخووي جان مايستغني عني ، طردني بسببج ، هو هذاا الي يسمع حجي الكحا* كام عليها سحلها من شعرها وهيه تعيط ..

الله لايوفقك وخرر يالنذل و خررر يااكلب ، بصفه بطل هفها بي على رجلها وعاطت تصرخ ..

هو سكران وشارب حب دفعته برجلها و ركضت منهزمه منه للغرفه شمر وراها البطل وكعت على وجها ، رجعت كامت تكمل ركض للغرفه سدتها تبجي وتغلط عليه ..

ركض وراها دايخ ، وكف يم الباب يصيح افتحي الباب ولج بربو* ام ملاهي ..

-الله ياخذك يالعارر ردت اسوي براسك خيير بس انته تحب الذل تحب اضل تشتغل جوه الادين تحب تبوس قند** اخوك .

هف الباب دفره وكع ليوره دايخ صاح منو يبوس قنادر ولج عاااهر* لفيتج من الباراات جنتي مداااس اني سويت براسج خير وخليت يصيحولج هااانم وست نسيتي نسيتي بوس الاياادي وفتحت البطااله ولج ..

نسيتي باااجي ورد شجانت تسحل بيج جوه رجلين ..

خلت وجها على الباب تبجي ، لزمت راسها مقهوره ..

جهازها يدك ، تشوف الشاشه تضوي ماكامت ردت ، رجلها ورمت ولونها كلب ازرك لزمتها توجعها ، اديها مخرمشه لو شعرها كطعه ..

ذاك بعده يعايرها ويغلط عليها من وره الباب ، كامت تشوف نفسها بالمرايه ..

شعر ملخ و الوجه احمر من ضرب لو كحل سايح ، جهاز يدك ماسكت ..

رفعته امي تتصل  ..

مسحت ادموعها و ردت شعرها ليوره وردت بابتسامه هاا يمه ..

ردت هاا ولج عبير ، يمه ضل بالي عليج من الصبح ادك شجاج ماتردين ..

مابيه جنت بالحمام اسبح ..

رجلج وين خما يمج ..

لا شكوو خالد خما بي شي ..

انتي شوكت تجين النه  ..

ماعرف خالد بي شي محتاجين شي اذا على الفلوس كتلج يمه بس انطيني كم يوم اخذ من عواد واجيبهم الج  …

لج اخوج جرحه مديطيب وكاله دكتور الا عمليه ديون منها والله ماشوفيني دكيت عليج بهل الساعه مجاي ينام ..

دمعت عيونها دنجت راسها حجت بااجر يمج هنه لايضل بالج ، انهبدت الباب دفره وفزت ، حجت باجر ادك عليج . سدت جهاز و كعدت تبجي منهاره ..

بين هذا خبل و بين اهلها ، مسحت وجها ورتبت شعرها و توجهت للباب تعرج فتحتها لكته مدد بالارض على ضهره مفتح عيونه حجه هاا كحب** 

غمضت عيونها ثواني وفتحتهم ابتسمت هههههااي اكو وحده تزعل من اصلها ياعيوني دكوووم كوم يااكلبي شجااك عصبت عليه ليش اني شعندي غيرك ..

دنجت تشيله هو كام مثل طينه لزمها من شعرها ولج غزل انعل والديج ..

-ضحكت انعل عيووني انعل فدوه الك اني وعشيرتي ..

-حيووانه انتي غزل كلجن نسووان سافلا*  و خاينات ..

-فداك كلنه من اكبر وحده لاصغر وحده ، دتعاال ارتاح دفرلك جسمك تعااي ويه غزل هنوممم تنسى الهموووم هههههاااي    

(ملامحِيِ بدأت تَتحدث عن التَعب الذي أحملُه بداخِلي  لكني قاااومت قااومت طويلا بقلم شفاه )

كلنه نتعب كلنه نبجي كلنه نمر بفتره حزن و جهنا يذبل ، الا امثال غزل او عبير الاسم الحقيقي ، مامسموح الهن الحزن ..

سعرهن يقيمه وجهن والابتسامه مرسومه عليه ، حتى لوكانت تعاني من هموم دنيا ..

لازم ماتبين، هنه عدهن مثل يكولنه بينهن (، داده هو قلم حمره سحري و كحل قصر وياجن بشي  .. خطه منا وخطه منا ترجعين بت ال١٤ ، والعلج هااا والعلج رفيق المغامرات .. 

لازم يكونن مصدر فرح و فرفشه ، مايدفعون الهن بالالف حتى تحزن ، حززن ممنوع وخطيئه بحياتهن ..

يجي شخص يدفع حتى يبعد الافكار سلبيه عنه ، ويدفع حق كلشي ويطلع ، يدفع حق الحزن الشمره عليهن حق الفرح الؤقت الي يمنحنه الهم ...

الا نسوو هم الي يبيعن الفرح هذني من وين يشترن الفرح اذا حزنن ، محد يفكر باحد ، كلمن حاير بروحه وهمه نفسه    ...

ياابياعين الفرح عدنا كلوب ملياانه حزن تشترون .. 

ميرال … 

مشيت لبيت نانه اشوف تالا ، طلعت لساتها نايمه ، رحت كعدت يم ساري سالته هاا شسويت على كتلك عليه ..

رد لابتوب مالتها نظيف مابي شي ماخليت ملف مابحثت وبحوشت بي ، بس موبايلها ماكدر اوصله طول اليوم بيدها من دخلت الحمام لزمت شوي طلع بي رمز ماعرفته ..

صفنت ميرال ، همست مممقتنعه بكلامها ذاك اليوم وهسه تاكدت دجذب عليه بس شلون اعرف اذا جهازها قافلته ..

-رد اصبري علي شوي اسال على هاي رناا واعرف شنو قصتها واردلج خبر ..

-رديت منو تسال خاف يوصلون سالفه لتالا ويكلولها اكو من سال ..

-رد لا اسال ناس موثوقه ..

-ابتسمت غدير موو ..

دنج راسه ماحجه ..

-تمام سوي الي تشوفه صح وردلي خبر فدوه ..

طلعت من يمه توجهت للفله ، فتره ورجع عواد يمنه ، استغربت هدوءه بس يم ام زياد يحجي وينتر ..

بس من يجي بيبر يطلع من البيت مايواجهه عود زعلانه ..

غزل وياه على كولت ديما جابته واجت هو مايتصرف من كيفه هيه ام الانه ..

كعدو بالغرفه الي بصف غرفتنه ، ونزلوا ديما جوه برغم اكو غرف فوك خمسه بس ماخلوها ، ماعرف ليش ..

غزل تركض جوه ام زياد ماتكللها شغله وكالت لا ، اني جنت معتزله مو نحاسه بس اكو مايحبوني واكو مطنش عليه كانو مزهريه .

مثل ايلاف صباح الخير ماتكولها الي ، بس ويه ديما عادي ، حتى من تكعد وتسولف ماتوجهي حرف و يه ديما بساعات تحجي ..

اني اي شي يخصها مادخل بي ، اسمع واسكت اعرف البشر من نبره صوته لو تنفس مالته مطايقني ..

تحجي تكللها احجي ويه امي ماريده ابن الحجي والله ماتحمل ازوج واحد.مااريده ..

ديما ترد شلج بالعيشه هنا سمعت بيت الحجي يدللون نسوانهم ، والي راح تاخذي هو جبير يعني عين الله عليج ..

-بس مزوج ومطلك وعنده خلفه واني توه يله بنت ، شنو جابرني ازوجه بس لان بيبر يريد هيج ..

-رايد مصلحتج هو قابل كارهج .

-لا والله مصلحته ومصلحه شغله وشراكه مو ميت عليه ..

-ردت امج راضيه وابوج على شنو ماعترضو ..

-يخافون منه ، كلت لزياد بس مايكدر يسوي شي ، هسه فتهمت ماقبلو بالي تقدم الي بحجه مو من مقامنه بس خما هذاا والله شكله مقرف ..

-اذا على كرشه عود خلي يضعف ..

-ولج عمره اربعينات عجووز عجووزز تعرفين شنوو وشعر ماكو و كرش والله من شفته قرفت شلون راح يحظني هذا ..

سكتت ديما تكللها هو حقج باين من جماعه ثريد ، بس انته غيري خلي يلعب رياضه يزرع شعر ..

دارت وجها مقهوره همست مادامه عراقي غاسله ايدي منه ، واحدهم بس يطخ الاربعين كرش و اصلع مابيه حيل يركض هم ..

ضحكت ديما حجت عيوني هم اهل العشرينات صارو هيج ضلت على الاربعينات يله اسمه رجال وخلص ..

دمعت عيونها شنو رجال وخلص ، اني اهتم بروحي وصالونات و لبس ومكياج لمنوو للحايط غير اكابل جهره براسها خير ..

-هسه انتي همج جهره وبس ..

-نترت اكبررر مني شبيج ، لاعقله مثلي لا مبادءه لا هتماماته ،  واخلاقه ليش هو الي يشتغل ويه رجلج و بيبر هذا شلون اخلاقه .. ماسكتين رحمه لاهلج ..

كمت من يمهن اني مو عاجبني تجيب سيره بيبر بالموزين ، اذا ماعاجبهم بيبر على شنو ساكنين وياه وياكلون من خيره ..

عجيب هالبشر والله يريد فلوس و عيشه مرفهه وكت الغلط هم ملائكه وبيبر شيطان ..

ماجبر احد يعيش وياه لو ياخذ من فلوسه ، شكد اكره بشر منافق ..

همست هااج استلمي جن زعلت هسه توصل الحجي لرجلها ..

ردت ديما ماتسويها لاا اعرفها ..

ضلت ايلاف تمشي وتشكي يوم لابوها يوم لاخوها بس محد نطاها اذنه كلها ترد خوش قسمه وبيها دلال وانتي تحبين دلال ارضي واسكتي ..

اجه هو الي اسمه خطيبها ماعرف رجلها هو عاقد عليها ..

والله تسولف ديما تكول باقه الورد ماتنشال من كبرهاا ، و جاب الها سيت ذهب كامل هديه من عدا هدايه القديمه كل مايجي يجيبهم ..

هيه صح مو بالهدايه بس مادام ذكرها وتعب نفسه لاجلها معناها طالب خير و الود ..

يعني نيته حلوه ونظيفه وناوي يسعدها .. ام زياد شالت الذهب و طلعت بسرعه و خلت ايلاف يمه لوحدها ..

اندار على ايلاف يااهلا يااهلا بهل طله الزينه .

اكول طارق …

عيونه ..

ابتسمت اكول والي لامان لو تروح تحجي ليبير ..

بهت وجهه وكعد عدل ، سكت ثواني هو صافن بوجها ..

هز راسه كولي ..

باوع اني والله جبروني اهلي صح كلت موافقه بس ضغطو علي ماريد اضلمك وياي يابن الناس ، قاطعها و شنو لازمته هل حجي ايلاف ..

بهت وجها وخافت ، صار شكد مخطوبين ماكدرت اخذ عليك ولا تعودت معناها سالفتنه ماترهم خلي نعبر نهر مادامه ضيك ، حتى كل الحاجات والهدايه الي جبتهم ارجعهم ..

ضحك شايفتني اني من نوع الي بعيني هدايه وحاجات ولج ..

بلعت ريك متوتره ..

رد زواجنه اني وياج مو محبا يابنت ناس اكولها الج من الاخر ، اني هم مو عاشق الولهان اصلا ماعرفج ، وانتي تعرفين مناسبه زواجنه شنو سببها ..

اني من احسن الج  واقدرج بس لان تسجلتي باسمي انا من نوع احب ادلل المره واحترمها لان قيمتها من قيمتي ، بس اذا انتي عندج غير رأي فهذا تحجي لاهلج و شنو يامرون بي اهلج اني حاظر ..

- حجت بخيبه ، يعني ماتفسخ الخطوبه  من يمك ..

-كام لحيله و عدل سترته وحجه فسخ العقد يجي منكم مو مني ، هاي اتفاقات بنتي مو لعب جهال اذا بالج سالفه على كدج غلطانه ، احجي للكبار هذا الحجي وهم ينبهوج على غلطج ..

عافها وطلع ماضل ..

امها دفعت الباب ودخلت مخترعه ياا ولج شوو طلع ليش مااضل ..

-بجت يمااا مااريد هيه كوووه ..

-عزاا العزااج يايلاف اذا كلتيها بوجهه ..

-كلتها وطلع حيوان ماعنده احساس داكلللكم ماااريده ماااريده ..

ضلت على كلمه ماريده اسابيع هم متحمليها ، لحد ما بيبر وصل اله خبر وسمعها تردد هالحجايه ، دز خبر لطارق انو يستعجلون بزواج ويحدد ..

هيه سمعت تحدد اليوم ولو تخبلت ، صدك من سمعت صوت صياحها وعياطها بالغرفه وتتعارك ويه امها ضنيت كرصها شي ..

ديما واكفه بصفي تكول مسكينه ، هزيت راسي حقها تختار الي تريد تكمل حياتها وياه …

حجت ماتحجين ويه بيبر ، سكتت ..

مو وياج ..

رفعت حواجبي خاف يهيج عليه ، اجت غزل حجت شبيها هاي مكروصه ..

ردت ديما دحيري بروحج بالاول مالج شغل بغيرج …

عووع هم انتي تسدين نفس من صبح جهرتج و صووتج ، فزينه ثلاثتنه من صوت  ايلاف و هيه تصرخ احررك روووحي والله ماازوجه لو تموتون شنو مصالحكم اسوها برراسي ..

-ردت غزل ياااا ناس دافره نعمه شهل عقل هذاا رجال ميت عليها وهيه مثل البومه …

-ردت ديما وهيه تباوعلها بطرف عينها ميييته عليها مووو ، شداارج ولج يارقااصه  عندج علاقه بي مو ..

-اكول انجبني عواد كالي  

ردت ديما ممممم عواد كال تشمشمين انتي كلشي بي فلوس تشمشمي انتي ..

انركعت الباب حيل ورجعنه ليوره خايفات ثلاثتنه  ، حجيت ديما تعالي ننزل ، 

يومين السالفه ماهدأت ، ام زياد بلشت تجهز ليلاف وذيج حبست نفسها بغرفتها حتى ماتنزل تاكل ويانه ..

ديما ضلت فتره متوتره على ايلاف مقهوره عليها ، سمعت صوت ابنها يبجي باليل ، طلعت لفيت روب عليه وكلت انزل اشوفه وين امه عنه ..

توه انزل وانربدت بديما توه نازله ..

لزمت كلبي ديماا انتي ..

ردت اي اي ..

شصعدج ولج ابنج جوه ديبجي ..

نازله نازله ، 

نزلت تركض عليه درت وجهي باتجاه غرفه ايلاف هدوء طابق الثاني هدوء …

جريت نفس ورجعت لغرفتي ، ثاني يوم كلها بالشغل حتى شباب مامرو للبيت ..

حجت ام زياد وسن صعدي ليلاف وكليلها امج تكول خلي تحظر نفسها حتى نجهز  البدلات لازم تختارهم هيه ..

صعدت وسن ورجعت وره عشر دقايق .. ردت ماكوو ايلاف ام زياد ..

ام زياد جانت مدنجه تكلب بالحاجات فزت من جمله وسن ذبت الشغلات من ايدها وحجت شنوو ..

-ماكو بغرفتها خانم ..

وين راحت طلعي شوفها بالحديقه ركضت ام زياد تشوفها فوك ، و سن راحت تشوف الحديقه ..

نزلت ام زياد تعيط  لكيتيها دخلت وسن تلهث لا ست ماكو والله …

لطمت على وجهاا عزااا العزاااج ياايلاف صخمتينه .. 

#يتبع ....

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق