رواية قاع الشياطين الفصل الحادي والأربعون 41 - بقلم اسماء ديمير

.............☆البارت السادس والثلاثون  ☆..............

#قاع_الشياطين(البصر والبصيره)

#بقلم_أسماء_ديمير

عاطت بوسن مفزوعه :- وين راحت طلعي شوفها بالحديقه،  ركضت ام زياد تشوفها فوك ، و سن راحت تشوف الحديقه ..

نزلت ام زياد تعيطهااا لكيتيها لو لاا،  دخلت وسن تلهث لا ست ماكو والله …

- لطمت على وجهاا عزااا العزاااج ياايلاف صخمتينه .. 

اني جفلت عزا وين راحت ، كعدت على صفحه خايفه همست دوروها بالبستان ، طلعت ام زياد تركض وتصيح لابو حمد يشوفها وين يم الشط لو بالبستان ..

اجه بالي يوم الي شردت تالا وهبطتني عليها ، ديما خنست حجيت ديما وين ..

ماكو رد كلها بره تفتر ادور على ايلاف ، طلعت اشوف وين راحو ..

اتجهتت للمطبخ اسمع غزل بصاله داخليه تحجي ، تكول ااي اكله شردت بت خالتك لاا ماكو بالبيت .. البارحه شوف عيني شفت ديما بالحديقه تفتر خايفه اكيد هيه هزمتها ..

وكفت لزمت حايط استند عليه يااا ديما خرب بليسج ، اذا صدك ، 

ابتعدت عن الصاله ودخلت للمطبخ ستار دخل يركض يكول شوفوها خاف بالسطح و ام زياد ترد مفزوعه ،مااكو داكلك مااكو شررردت البت شرردت ..

صاح بابو حمد شفت بستان ، رد :- اي ماكو حتى يم شط ماكو ..

صعد ستار يشوفها بنفسه ويدورها بالبيت وبالغرف ، ام زياد ضلت ادك على رجليها وتعيط مخبوصه ..

هرجت البيت خلت الكل يركض و يدور مثل المخبل ، كلبي زادت دكاته ،

عاط ام زياد ، انعل ابوكم لابو شلون ماشفتوها من طلعت ، ولكم دكوو على بيبرس دكوو يااافضيحتج سووده اي والله ايلاف ..

شراح يخلصنه متكليلي ، وعرسها نوب هالاسبووع شكوول للعالم هاا شكوول اكللهم شرردت و طينت راااسي ..

اجه ابو زياد متخبل يصيح شلون طلعت حرراس وين من طلعت لعد ، كلبو الفله و بستان وماكو فص مح وذاب ..

الي خلاني اخاف واتوتر ديما الي هم اختفت ماكو  ..

مشيت دكيت باب غرفتها صاحت منوو  ..

افتحي هاي اني  .

فتحت حجت هاا ..

ديما صدك تحجين دفعتها ودخلت حجيت سدي الباب ،  سدتها حجت شكوو .

صدك ماتعرفين شكوو ..

جنت نايمه تعبانه البارحه امير ماخلاني انام ..

ايلاف شردت ..

حجت بهدوء هاا ..

جنج ممصدومه ولج ، 

شعلينه ..

ديما ترى حسيت عليج البارحه تفترين بالطابق الثاني ومتوتره و غزل شايفتج بالحديقه هم و نطت خبر لعواد بهل حجي ، ليش ورطتي نفسج انتي عايزه وجع راس واذيه ..

سكتت ..

مو وياج ديما احجي ..

حجت مقهوره :-هددت تنتحر اذا تزوجته شسوي قابل اتفرج عليها وهيه تنظلم مثلي واصير ضحيه صفقاتهم مثل ماصرت اني ..

-دخلتي نفسج بمشكله انتي بغنى عنها ياا ديما ، اذا تاكدو الج يد عبالج عواد يرحمج لو بيبر والله محد يشفعلج المصيبه نوب ام زياد بالنص ..

-كعدت بصفي محد يدري انتي اذا سالوج كوليلهم جنت يمها باليل ماكو هيج شي  ..

-تردين اجذب ديماا ..

-تجذبين لو اطير ركبتي خيه ..

درت وجهي ضايجه معصبه ، تنهدت بس لا بالج قاسم بعده ..

اضطرب نفسها و خنست ، ديما لا تشوفين كل الناس مثلج ، و تقدمين ايدج الهم عبالج كلها مرت بتجربتج انتي،غير ..

-حجت بستهزاء صح اني غير ، سامعه الي،يكلج لا حضت برجيلها ولا بسيد علي ، حتى قاسم مادري وين صفه بي دهر …

-الي يريد مره مزوجه و يسوي وياها علاقه ، و يحرضها على الطلاك تتوقعين منه خير ..

-جان شمعه ضويت بيها ظلامي ميرال استخصرو بيه  ..

-صعب تفهمين ديما واني هم صعب افهمج ، مدامنه ماعشنه تجارب بعض ، محد عاش معاناتج اعرف بس بنفس الوقت انتي مجال تفهمين الدرب المشيتي بي غلط  ..

سكتت ماردت عليه بعد  … شهل ورطه هاي ياديماا ..

اجه بيبر للبيت و عرف ايلاف شارده ، دز بشار لاخوها زياد الساكن بالبصره وكله اختك الي شردت جيبها وتعال ..

ردت ام زياد .. زياد شعلي شوف جوز عد وحده من صديقاتها ..

رد لاا عند زياد ، قبل فتره زياد دك و تدخل بسالفه زواجها طول عمره بعيد شذكره هسه بينه ، لو ما هيه داكه عليه و حاجيه وياه ، بشااار سمعت لو لاا اطلع هسه كبل عليهم للبصره ..

 
لثاني يوم البيت متوتر عرسها قرب بعد كم يوم وهيه ماكوو ، ام زياد تخبلت رسمي علينه وعلى ابو حمد ومرته عبالك هم شردوها ..

ابو حمد هم لاحظت عليه كوه يحجي من القهر ، اول شي عبالي انقهر من ام زياد بس عرفت بسبب ابنه المريض ..

سالته شلونه ..

رد بتعب يم رحمه ربج الله لو ياخذ امانته هو يرتاح واحنه هم ..

الاعمار بيد الله ابو حمد كول يالله ..

رد يالله الف مره يالله …

كعدت يم بيبر ، رفع ايده وحظن جتفي جرني عليه ، حجيت شراح تسوي اذا صار العرس بلا عروسه ..

ضحك ، نلكاها ماتروح …

بلعت ريك همست بيبر حبيبي ..

طيبه ورحمه كلبه كولي .. 

ليش تغصبها على الزواج ترى حقها تنهزم ، مو من حق اي شخص يجبرها تعيش ويه واحد.متريده ..

-بنت بالغه سن الزواج وهاي السنه تتخرج .

-اي صح بس مو الا هذا الاربعيني تكول نوب شكله محلو .. عفست وجهي تكول مكرش .

-ضحك ترى اني هم مو حلوو ليش عايشه وياي ..

- مو هيج بيبر اقصد هو ماعاجبها من كل النواحي ، لا عمر لا شكل لا مبادى من كلهن ممقتنعه هيه …

-باعي ميرا ، هالحجي اني ماكيله لاحد لان هيه عرضي ، احجي الج لان انتي قطعه مني وحتى لا ضلين تفكرين بالقصه عبالج اني ظالم ، ازوجها واستر عليها ، لو اعوفها تصرف على حبيبها مدري صاحبها المستغلها احسن ..

بهت وجهي همست هيه كالت تقدملي واحد هو هذا نفسه ..

- بالضببببط هو ، عرف هي بنت خير ،  هو واحد منتف ربع مابجيبه اني مو مستصغره لان فقير ماده ، لا هذا فقير اخلاق هم ، دخل من باب الطمع الي ياخذ من بنت كل شهر الف دولار وهيه تدفع ايجار شقته و رصيد موبايله مامن بي على دجاجه ، مو عاد على عرضي ..

اريد نسب يشرف و يلم و يحافظ عليها لو اخليها بيد هذا المهتلف ، الي اذا ازوجها اله مو بس ياخذ فلوس منها كل شهر لا جوز يشتغل عليها هم ،  لان مو رجال الي ياخذ فلوس من مرته كلشي اتوقع منه ..

- ليش ماكتلها ديستغلج ونبهتها ..

- جر نفس بضيك ، لان اكو بشر ذكي اكو الغبي ، هيه لو تفهم بالحجي جان انتبهت عليه هو يمص بفلوسها ومصروفها ، بت خالتي مطي ومربوط حشاج …

سكتت مقهوره عليها …

عله صوت وحجه بضوجه :-  حتى سالفه شردتها هاي اعرف مو من راسها ،  ولا تخططيها واحد مساعدها بس حجاوز سالفه بمزاجي  ، لزم حنجي .. تمااام ..

رفعت حواجبي بيبرر يااا وداعت اهلي اني مالي علاقه ..

- خووش خووش ..

-ياا ماصدكتني ..

- كتلج هاهيه حمشيها الج ميخالف ..

ياا بيبر والله مو اني ، هاي ديم…  سكتت فكيت عيوني على جفصتي  ..

تقرب باسني من كصتي فدوه لحلكج ولا تعبين الواحد انتي و تخرطين كلشي ...ضحك …

-بيبر هاي الاساليب عيب تتبعها ويه مرتك .  رفعت ايدي ضربته على رجله ..

حظني يضحك بيبر لا تحجي ويه ديما بروح غواليك .

ماحاجيها هاهيه ..

بيبر ؟؟؟

وداعتج هاهيه … دك بشار ، وكله يكول مو عندي ولا يوصل يمي بعد لا اشتكي للشرطه عليه ..

رد خوش ، دك على ستار و دانيال ودخلولهم باليل ، وبين مايوصلك الشباب انته ممنوع تتحرك من كبال الباب خاف يطلعون يغير مكانه ..

سد جهاز همست راح تدخلون كوه لبيته عيب حبيبي عدنه مره واطفال البيت اله حرمه ..

هاا هيج كولتج ..

اي يروحي ..

اندك الباب لعد ..

يكون افضل حتى الاطفال ميفزعون هم كلشي بالهدوء ينحل ... رفع جاهزك ودك على بشار كله اكلك هاي ميرال تكول البيت اله حرمه عيب فدكو الباب ودخلو ..

رد ذاك ابوري ندكها لو بالمسدس ، بيبر سد السبيكر فكيت حلكي عااا بشار ..

رد لا ولك لااا يله فض السالفه عاد سدها ..

انداريت عليه بيبر سمعته ..

- ذيشاااقه يااعيني شبيج …

بنفس اليوم بيبر حجه لام زياد بلشي بالتجهيزات باجر يجيبوها الج ..

ردت يومين ضل للعرس بيبر شلحك ..

اخذي البنات وياج كلمن تخلص شغله شرادلها ، وباجر ادز على عاملات من المكتب يساعدون وسن ، كامت لحيلها توجهت لوسن ، تكللها …

ثاني يوم ، جابوها للمسكينه ، تعيط وتصرخ اباب الفله الخارجيه ونسمع صوتها والله قشر جسمي من الخوف ..

نوب نزلوها من السيارته كوه ، وكفت تكامشت ويه بشار دفرات وتفل ، هو يحامي بروحه ..

تلكها عواد سحلها من شعرها و هيه تعيط ، ردت غزل الله يعين طارق شلون راح يكدرلج وياخذج مادري ..

ديما تبجي عليها واكفه على صفحه ، نوب عواد جر ايلاف من شعرها ودخلها للبيت كتل ،

ديما تبجي بصوت وتكله دعووفها بيش طالبيها مو جبتوها شتردون بعد ..

اخذتها امها منه تهدي بيها وتحاول وياها ، جرتها للغرفه تحجي وياها مانطتهم مجال دفعت امها ،

توجهت للمطبخ ركض تكللهم دحرك روحي والله وابليكم بيه ...

وهم  كلهم ركضو وراها يصيحون بيها ..

غزل تضحك تكول شوف العرمه دافره نعمه  ..

بجيت عليها صوتها يوجع الكلب ، عفتهم بعركتهم توجهت لنانه جسمي يرجف ، شهل عايله هذول ، دخلت نانه واكفه يم شباك تكول جابوها للمسكينه يااعيني عليهاا ..

ساري يرد خلي تولي عرمه شلون انهزمت وعبرت محافظات بحالها ماخافت بهل ليل ، لو صاير عليها شي ..

نانه خلت الي كرسي ، كعدت عليه رديت باين اخوها ماخذها ليش نظلم بختها خطيه اخوها هو ماخذها ليمه ..

حجت نانه شوكت عرسها ..

يوم الخميس و اليوم يله اثنين ماعرف شلون راح تقنع ..

ضحك ساري هاي  مادام ماكدرت تشرد منا ، راح تشرد مناك من يم رجلها …

هزيت راسي متحسفه عليها ، طلعت تالا تتثاوب حجت هاا انتي هنا ..

ساعه ب١٢ ترة اكو نوم لحد هسه ..

جنت اقره ..

ابتسمت شوكت امتحانج ..

يوم الاربعاء ، رديت الله يسهل عليج ، بس اخذت لفه اكل ورجعت دخلت للغرفه .

وكف ساري بصفي همست اله .. ها  بشر …

دنج قرب راسي و همس سمعت صاحبتها زفت ، تخيلي من سالت بمدرستي عليها عرفوها  الولد نصهم ، اصلا اكبر من عمرها هيه ماعرف شلون قابيلن ادوام متوسطه لحد هسه …

هزيت راسي و هسه ، 

رد تنبهين اختج ، ماتمشي وياها وحده اخلاقها بالحضيض ، 

هزيت راسي ، يصير خير ..

وراها بدينه نجهز على عرس ايلاف العروس التعيسه ، اجه اخوها هداد شلون تدخلون بيتي و تاخذوها غصب ، من الباب طرده بيبر ، ماخلاه حتى يدخل الفله ، 

ام زياد من الاصل غضبانه على ابنها ماتحاجي ، وابو زياد واحد استغفرالله على كولت ديما خيخه ..

الحنه سووها بالحديقه ، عزمت ام زياد كل المعارف والاصدقاء ، جانت حفله ضخمه حيل ، اكبر مماتصورت ، 

كوافيره و ماكيرا جابوهن للبيت ، منا ايلاف ماترضه تروح منا ديما ممنوع تطلع ..

جانت الحنه عباره عن ناس مصطنعه ، ماتحس اكو فرح لو ضحكه من الكلب كلها جايه تادي دور وخلص  .

احنه الجناين جنه كاعدات سره واحد نكول جمله يااهلا وسهلا شرفوتنه ، ام زياد حفظتها النه غصب ياويلنه نزود عليها ..

تريد تكون هي صاحبه الوجه وام الانه صاحت غزل تعاي خلي طبله هاي هنا ..

ردت خلي ديما تكوم مابيه اني ظهري يوجعني ..

مو شوفيها شايله ابنها كوومي عاد ..

واذا صار شي علي بيبي …

رفعت راسي اني درت وجهي عليها بيبي؟؟؟!

ضحكت اي جاي الي يشيل اسم عواد من صدووك ..

رخت ملامح وجهي ردت ام زياد تحجين صدك لو جاي اجذبين ولج ..

-لا والله احجي صدك ، صاحت يااا على مببارك ياعواد على مبارك يمه ، صاحت ولج وسن عصير لغزل بسرعه ..

صاحو عليها تتلكه المعازيم وراحت ، ديما جمدت ماحجت واني اضرب منها حتى نسيت الحجي ..

حجت غزل ماكو مبروك شنو شبيجن تصنمتن نحسات..

ابتسمت همست الف مبروك تكومين بسلامه ..

ضحكت وكامت لحيلها الله يسلمج حقج ازعلين لان صار فوك السنه ولحد هسه ماحبلتي بس خلي عندج امل بالله ، وانتي ديماا فدوه لعينج لاضوجين ترى الي بطني اخو لابنج جوز من يكبر يداري ابنج و يشيل عجزه  ..

ديما ردت ليش اني وين رحت من ابن رقاصه يداري ابني …

ضحكت بذاك الوكت انتي بباااي ما موجوده عافتنه ومشت ..

حسيت حموضه صعدت لبلاعيمي ، همست ديماا الي :- تسممتي انتي هم لو بس اني ..

جريت نفس :- دخت من كثر المغثه مو بس تسممت ، شراح يخلصنه من السانها ولسان ام زياد ، خاف جانت تكلي العميه هسه اضافت عليه تعلوكه جديده عاقر ..

-همست هيه مغثوثه محدعاقر غير اخلاقهم برابي*

لحد مغرب اني خلص قفل بيه كلشي .. كمت توجهت لنانه ، دخلت حجيت وينج نانه راسي دياذيني الحكيني ..

اجت جرتني خلتني بحظنها تفرك الي،راسي و اسامه جوه رجليه ينزعني حذاء ويفرك برجليه .

همست تالا وين ..

بالغرفه تدرس ..

ساري ..

يم ابو حمد ..

غزل حامل نانه واني بعدني ..

رزقج بالطريق ماوصل …

شوكت يوصل …

الله  يحدد شوكت   .

كلنه الله نطانه رزق ، بس اكو رزق ونعمه نحس بيها واكو لاا ،

واكو الله قسملنه بهل رزق بس بعده مااجه وكته ، لان لو ناطي بوكت منرضى و لا نحمده ، لذلك كلشي مكتوب وكلشي بوقته حلو ..

الارزاق هواي ونعم هواي ..

النظر نعمه ..

العقل نعمه ..

الصحه والعافيه نعمه ، الستر و الحفظ نعمه وووو رحمه الله واسعه و ماكو مثل كرمه ابد  ..

ضليت يمها نايمه لحد ما دزو عليه وره مافضت الحفله ، رجعت ، ثاني يوم سوو الحفله بقاعه ، قبل لا يجون ياخذونه للقاعه …

ايلاف بين تبجي وبين ساكته وامها تحجي وزن يم راسها وابوج يتفشل ترى ابوج يطلع بوجه الكباحه ..

تردين على تالي وكت ينقهر لو ينجلط بكيفج بعد ، محد راح يسكت كلها راح اضل تذكر سوايتج ..

تقبلي وعيشي حياتج هو اصلا رجلج دومه مسافر يعني نادرا ماراح تشوفي ، وراح ياخذج سفره لايطاليا شهر شتردين بعد ..

طلعت الي ديما فستان اسود مستور طويل واردان هم ، تلمسته صدره بي نقشه ، ومخصر وبعدها كلوش بسيطه ..

 همست الها شال ..
شنو ..

طلعي شال وياه ..

تلبسين حجااب ..

اي اذبه على راسي ..

ميرال حفله لناس مستوى راقي وتلبسين حجاب اضمين جمال شعرج صدك…

ابتسمت قررت البس حجاب خلص من اليوم والتزم بي ..

صدك تحجين ..

اي والله ، 

شلون لون تردي ..

اريد لون بيج فاتح ، لبستهم و مكيتجت النه الماكيرا ، خلت الي عدساتي ، ماواضح شي بس من بلشت اتحرك تبين عندي شغلات على الخفيف .. لبست ساعتي الذهب وياها تراجي ناعمه ، ماكيره لفت حجاب بساطه وبطريقه تلوك للحفلات ..

ديما ، حجت والله يجنن حجاب طالع ولا توقعته هيج شكله مرتب ..

ضحكت تحجبي ..

ردت ادعيلي بالهدايه الي بصدرج الله يرزقها الي .. 

خلصت وكفت انتظر تالا تجي وياي ساعدني ، لان ديما راح تحير بابنها ، سالفه الي صارت بعرس بشار ماريدها تتكرر …

اجت السيارات اخذتنه ، بيبر و عواد سمعت بالقاعه ينتظرونه هناك ..دخلنه و تالا وياي لازمتني خطيه  ..

بس اسمع كلمه ووااوو منها ، ياااي شنو هاي..

صوتج الي يسمعج يكول مشايفه ..

قاعه مبهره ميرال كلش راقيه وفخمه ..

سمعت ابو طارق يصيحوله  الحجي سيد اعمال  ملياردير ..

الله يهنيهم ..

حسيت بلمسه ايد على خصري و همس يم اذني الاسود يليق بك سيدتي ..

ابتسمت انداريت عليه حظني ، شهل لوك مميز الي مطلج مميزه بين الحظور ..

- وربي اخجل ضحكت مدنجه ..

لزم جف ايدي يتلمسه ، مديت ايدي على بذلته رفعت نظري اركز بذلته ، بين عندي رباط ، لزمته ، رباط و قاط كامل ..

لون مواضح كانو ازرك لو بنفسجي ماعرف .. شنو لون الرباط …

بنفسجي ..

شمعنه مو اسود ..

شدراني رحمه كلبي راح تلبس اسود ..

صاح عواد .. بيبر تعال اجه الحجي ..

رد اكعدي هنا ماطول واجي  ..

كعدت على الطاوله ، بلشت حفلتهم ، وضحت عندي بس ديما الي بصفي وام زياد كبالي والباقي فوضى من االالون ماكو اي هيىه او اشكال ..

كلشي مشووش  .. تالا واكفه يم راسي و ماده وجها يم اذني تحجيلي عن الاجواء ..

همست مقهوره :- خما تبجي ايلاف ..

لا بس صافنه عبالك بامتحان كاعده …

هزيت راسي ، وغزل شو مالها صوت ..

ردت ديما مزعوجه ، دتركص بزاويه الله يعينها على البيها ماتكدر اذا ماتتحرك تنكرص اذا وكفت مثل الناس المحترمه  ..

ام زياد نترت صووتجن ، على الاقل احسن منج كدرت تحوي عواد وانتي ثانيه احسن منج هم كدرت تحبل صيرن احسن منها واحجن بيها ..

ردت ديما تتأفف حظ العواهر شجابنه عليه احنه ..

دفعت الميز ام زياد و زمخت بينه ماتالي ليل انتن هم عوا** 

فكيت عيوني ياااا ام زياد شهل حجي مو اختي واكفه عيب هالكلام  ..

ردت اختج مفتحه بالبن يااماما لوشوفين عيونها شلون تتطاير على الشباب بالقاعه ماحجيتي بس حقج لا نظر ولا رؤيه  .

عافتنه ومشت خلتني بصدمتي بردها القاسي ، نار واستعرت بيه ، مديت ايدي على ايد تالا، لزمت جفها مردته حيلل ، صاحت ااخ ..

عيونج ادب سزز ..

جريت نفس مختنكه مهضومه ، حجت ديما من قهرها و من دودتها ترى حجت هيج لا تاخذين بكلامها حقها تضوج من تشوف احد مرتاح ..

خنست بمكاني مدمعه شبعت قهر شلون غثتني بحجيها ، علت الموسيقى بلشت الناس تدبك ..

نهايه خلوها رقصه السلوو ، كومو العرسان يختتمون العرس بفعاليات كص الكيك و ركص فردي ..

اجت ايد عليه بيبر حجه ممكن رقصه ياجميله .

رفعت وجهي باتجاه صوته :- افشل انسانه اني بالركص ابد ابد لاتفكر ..

كومي جرني ، حجه مادامني حاظر ماقصر اعلمج كلشي ..

لزمته حاظنه ايده حتفشل بيبير ، همس مقاطعني :- بايه كبالج انتبهي ، اصعدي …

صعدت بايتين .. همست خما لوحدنا بنص ساحه ..

لا ضايعين بين الناس ..

بيبر …

وداعت عيونج ،،  حظن خصري بيده ولزم جف ايدي بايده الثانيه ، حجه اصعدي ..

ضحكت وين ..

على رجليه يله ..

لا عزااا هههه ..

يله ولج مو يوميه نغير جو نتونس من صدك .. 

اخاف..

تخافين وياي افااا ..

خليت رجل وحده وحجيت يتلوخ حذائك ..

فداج ابو حذاء..

ههههه ..

صوتج ولج   

صعدت رجلي الثانيه …وزني خمسين ترى انته تتحمل مسؤليه ترى ..

فدوه لعينه اي والله ، ماجنت ضاغطه حيل اخاف اوكع طرف حذاء صاعد على طرف حذائه ، حاظني حيل خاف اعثر هو يتحرك واني وياه …

حظن بتك ايد وحده حسسني بمتلاك دنيا والله ، اني موجوده لوحدي ، كانو انخلق لسعدني ويزرع فرح بصدري و يروي بتصرفاته …

ماحسسنني بأعاقتي ، حسسني ضرر عيوني هو شي مميز و شي مبهر ، يتباهه بيه كبال ناسه ومجتمعه ..

الايد جانت حاظنه خصري بخوف وحذر شلون ممكن تكون قاسيه ويه غيري مادري ..

الصوت الدافي الي يحظن مسامعي بحب ورقه ، شلون يفزع ويخوف غيري ماعرف ..

الكلب الي حبني بهدوء وخوف ولبه الي كلشي اريده، الكلب جان مطوول وياي ومتحملني شلون ممكن يكون قاسي بقساوه الحجر ..

بعد الرقصه وصلني للطاوله اجانه صوت عدي ..

بيبرس الحجي يريد يتعرف على زوجتك ..

رد بيبر عليه ، تعبانه ..

سلام و تروح عيب ماتسلم ، خاصه هو سمع بيها حاظره ..

كومني بيبر همس يم اذني ترى هو رجال عمره بالسبعين ، شلونك حجي شخبارك و خلص تفض تمام ..

تمام …

جرني وكفني حجه كبالج هو  ، حجه بيبر حجي زوجتي ميرال ..

ياهلا عموو تشرفت  . ابتسمت ، رمشت بهدوء من تقربت لاح عندي هيئه بشر مديت ايدي ياهلا وسهلا حجي ..

رد سمعت زوجتك حلوه بس ماتوقتها لهل درجه ..

ضحك بيلر جوهره موو ..

بالضبط جوهره نادره ، حجه ضريره مو انتي ..

رخت ملامح وجهي بعدها الابسامه حجيت ..اكو ايه تعجبني جدا تكول ، فانها لا تعمى الأبصار ولكن تعمى القلوب التي في الصدور )

ضحك لاقووويه زوجتك قوويه بيبرس حيل ..

مد ايده بيبر فعلا ذكيه هم ..

محظوووظ من يومك ..

على نيه حجي على نيه .. 

حجه عدي  ، ازيدك من شعر بيت ، حجي بنت هاي بنت صايغ ، 

هااا اكعدي بابا اكعدي ، بصفي تعاي هنا ، جرو كرسي وكعدت ، درت وجهي باتجاهه رجل بدين وبيده جكاره كوبي يدخن بيها ..

جر نفس حجه بصوت الخشن :- شنو اسم ابوج بابا جوز مار على ذاكرتنه ..

-رديت بخجل :- الصايغ صباح ال*** 

عوج حلكه ودنج ممممم ، حجه عدي الحجي لابس ساعه تعرفين بساعات لاا ؟ ، شوفيله ساعته وقييميها ..

همست اعرف ذهب لو كوبي واعرف مرصعه وشنو رقمها هم  ..

حجه الحجي تعرفين تقيمين يعني  ..

-حسب ..

-مد ايده شوفيلي هاي .. ضرب الضوه عليها وبانت الونها ، كانت مرصعه بلون مميز ، صح ما واضح الون بس لمعه قويه ويه اضويه المطعم ..

مديت ايدي عليها ، تلمستها ، اصابعي دارت حواليها ، لثواني قليله ، بهت وجهي ، رولاكس جانت ..

مرصعه بالماسات اربعه بكل جانب وحده ، احس،دكات كلبي زادد ، لزمتها زين حجيت ذهب ..

رد حجي ااي عفيه وبعد …

رمشت بعيوني متوتره ، راسي بلش يصدع ، بلعت ريك مرصعه باربع الماسات ظاهريه ..

-ضحك برافوو ..

-انزعها بلا زحمه ..

- رد :- عفوا  ..

- دمعت عيوني ، ابتسمت بريبه :- انزعها دشوف رقمها اذا ممكن ، نزعها اخذتها كلبتها على وجها ، جان بيها نقش ؛ درت على بيبر شمكتوب ..

رد عدي ٢١k , غمضت عيوني جريت نفس كوه وبعد .. نطق رقمها مال تسجيل ، دنجت راسي مديت ايدي للحجي ايدي ترجف .

دمعت كوه لزمت نفسي مابجي ، حجيت بهدوء و كلبي نار استعرت :- رولاكس ذهب مرصعه بالماس خارجي عدد القطع اربعه و قطع الالماس داخليه ١٢ قطعه ، ذهب واحد وعشرين سعرها فوك ال٤٤ الف دولار هذا قبل كم سنه حاليا مادري شكد تتقيم ..

رجعت ظهري على كرسي انهد حيلي ، ضحك حجي و صفك بيده براافوووو برافووو ، 

حظن جتفي بيبر حجه مو كتلك ذكيه حجي ..

لا راديا وكعت دمعه مني دنجت مسحتها بسرعه .. جريت نفسي بالعافيه حجي بس بيش اخذتها انته..

رد بفخر :- اجت هديه والله …

-هزيت راسي منو هذا ذواق الي هداها الك باين يحبك هواي ..

فعلا اني هم احبه كانو ابني حجه عدي بيبر هداها اله ، من ممتلكات بيبر هاي …

#يتبع ...

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق

اكو من يسمي ام زياد ، عاليه انصيف 😅 لقب جميل