رواية قاع الشياطين الفصل الثاني والأربعون 42 - بقلم اسماء ديمير

................☆البارت السابع والثلاثون ☆.............

#قاع_الشياطين(البصر والبصيره)

#بقلم_أسماء_ديمير

هزيت راسي ، منو هذا ذواق الي هداها الك ، باين يحبك هواي ..

فعلا اني هم احبه كانو ابني .. رد عدي : بيبر هداها اله ، من ممتلكات بيبر هاي …

رمشت بعيوني ، نزلت اديه جوه طاوله ترجف ماكدر اسيطر عليهم هزيت راسي بالعافيه ..

كمت لحيلي اعذروني ، بدون وعي جنت بعدني مجلبه بالساعه ، توه اندار اجاني صوت الحجي الساعه بنتي ..

التفتت برجفه ، العفوو ، كوه مديت ايدي ونطيتها اله جان بدي اخذها واركض منهزمه اصيح ريحه بابا هااي ..

حجه بيبر فززني من صفنتي ، اوصلج ..

دفعت ايده بهدوء .. خليك ..

مشيت ولشتي ترجف ، عبالك بشهر الواحد ثلجت اطرافي ، عيوني غوشت ،  وعثرت باويتر لزمت اسفه اسفه ..

دنجت راسي داخيه مشيت ماعرف وين ابتعظت ، لزمتني تالا حجت شبيج ميرال ..

لزمتها من ايدها حيل حنيت جسمي بجيت ، شكوو ميرال ..

طلعيني مناا اريد اطلع ..

راسج يوجعج شنو هزيت راسي اي طلعيني ..

جرتني وابتعدنه عن صوت الموسيقى وكعت بالارض رجليه بعد ما كدرت تعيني اوكف لزمتها حجيت مابيه امشي تالا مابيه ..

دنجت عليه تساعدني حجت شكوو شكلتي يمعوده ..

خليت اديه على وجهي وبجيت حجت شكوو هبطتيني شبيج ..

هزيت راسي مابيه احجي ، لزمتها كوميني ، جرتني كوه تلهث .. ضليت اردد ، ساعديني طلعيني منااا ..

طلعنه بره القاعه كوه اجر بنفسي والله بذاك اليوم جسمي انشل ، ماتحرك سحلتني تالا سحل وتلهث عافتني كاعده بره وركضت تصيح ديما ..

طلعت ديما شبيج خيه هم تخربطتي ..

تعاونن عليه يساعدني رادن يرجعني للقاعه عطت لااا اريد نانه ودوني يم نانه ..

شالني كوه صاحت ديما ستار وينك تعال .. اجه يركض حجه شكوو شبيها ..

مادري يمكن صعد ضغطها تعال ساعدنه ..

لزمني وياهن وصعدني للسياره ، حسيت شي نزل على حلكي حار ، وطعم دم ، غمضت عيوني وكع راسي بحظن تالا ..

تالا …

مثل اوراق شجر الخريف وكعت ميرال ، مثل ذوبان ثلوج بالقطب ذاب وجها ولونها ، اديهها ثلج وجها شحب حيل نوب فلت خشمها دم ..

عطت ديماااا ، لج شبيها مدت راسها ديما بالسياره و شهكت عزاا ولج ، ستار الحك صيح بيبر مدري شبيها دخلت للسياره تهز بيها ..

حاطتها بحظني ولج ميرال شبيج ، شلون جثه صارت ، ديما تعيط وتهز بيها ماتتحرك .

ابنها صرخ من صوتنه ، هزيتها حيل ولج ميررال شبيج عيوني اكعدي خيه شجااج ..

طلعو يركضون ام زياد صاحت شكوو خبصتونه دارت وجها شافت ميرال نترت ودوها للبيت ..

دبما عاط لا بيت شنوو مستشفى تعال بشاار ودينه ..

طلع بيبر يركض حجه وجه باهت شكووو مد راسه لداخل سياره ، وشاف ميرال لزمها ميرال شبيج هزها عاط شبيها صعد بصفنه ونزلت ديما ، صاح حرك حرررك ستارر ..

للمستشفى كبل رفع راسها لكاه كله دم فتح عيونه شكووو شبيج ولج ميرال ، طلع جفيه يمسح بوجها شبيج يااعيني شجاج نزل راسه لوجها يشوفها اتنفس اني خليت اديه على حلكي ابجي مخترعه..

صاح بستار بسرررعه شبيك استعجل ..

مو دشوف سيارات كبالنه اهدء .. 

ولك شهدء مجاي تتحرك استعجل دك هورن ..

سحب سلاحه من ظهره و طلع ايده من جامه و رمه بالجو .. 

 عطت دنجت راسي على ميرال حظنتها ..

صيح بعلو صوته ، افتحح الدرررب افتتتح .. الناس فتحت وناس انحصرت ماكدرت تفتح الطريق زابك بينهم ستار و طلع بسرعه لمستشفى قريبه ..

شخطت سياره كبال المستشفى نزل ستار قبلنه يصيح و يجيب سديه ، نزل بيبر وجرها شالها شيل وركض لداخل تلكاه ستار و دكاتره اخذوها ..

دخلوها للقسم الطوارئ  وراهم بيبر اجه يدخل دفعو ماقبل ..

صاح مررتي مررتي هاي ..

ميصير .. انسدت باب القسم بوجهنه و هيه السده ، وكعت بين كراسي كارصه ، رفعت اديه دمها بجف ايدي بعده ، شبيج خيه شجاج ..

شنو الزعلج ، ماسويت شي اني والله ، صار فتره ملتهيه بدراستي مازعلتج بشي ، تقرب عليه بيبر وجه احمر فزيت من رفعني من جتفي عاط بوجهي شبيهااا منو وياهاا انتي ؟؟؟!..

هزيت راسي خاايفه ماادري والله مو اني مو اني .. 

لعد شبييييها هيج من حالها وكعت .. 

بجيت مرعوبه وداعت اهلي مو اني مالي شغل ، …

جره ستار حجه اهدء بيبرس بالمسشتفى احنه شبيك ،  طلعت من يمكم هيج ، جوز ضغطها صعد طبيعي .. 

دفعني وكعت بالارض لميت نفسي على حايط ابجي ، كعد هو مقابيلي لزم راسه ، طولو جوه محد طلع ..

ضرب الباب دفره بيبر عاط يطلع واحد بيكم يكلنه شبيهااا ، طلع ممرض ودفع بيبر بهدوء رد رجاءا اخي هاي مستشفى  ونفس ماعندك مريض جوه ، غيرك هم عدهم مايصير هالتصرف ، ومريضه جوه ودكاتره يمها دنفحص بيها ..

-ضرب بيده . بيبر شبيهاا شبيها غير اعرف ..

-ضغط عدها هيه ..

-لااا ..

هز راسه ضاربتها جلطه خفيفه بس عدت سلامات بس انريد نكمل الفحص اخي رجاءا حافظ على هدوك لو نضطر انطلعكم بره رجاءا ..

رجع دخل و بيبر صاح جلطه شنوو وينها وين الجلطه هيه ، اندار عليه نوب وعاط بيه خرعني :- عمتي جانت يمكم حجت وياها هيه او غزل اي واحد عووواد مثلا ..

هزيت راسي لا والله ، شفتها اتجهت بعيد عن طاولتكم خفت لا تيهه لحكتها ، من لزمتها اديها جانت ترجف كالت وديني لنانه راسي يوجعني وبس ، ضلت تلح لحد ماطلعتها بره القاعه حتى يرجعنه ستار هيه وكعت لحالها ..

لزم راسه وضل يفتر ، دخل عدي وياه نانه يركضون حجت نانه شبيهاا شببها ولج اختج ..

- بجيت جلطه  .. ضربت على خدها ياااا جلطه شنوو شجاب الجلطه عليها ولكم اندارت على بيبر شبيها بت عيوني ، صبح مابيها شي مثل الورد جانت يمي..

- حجه عدي :- جلطه شنو متاكد ..

بيبر مايرد بس يفتر لازم راسه ، رد ستار توه الممرض طلع وكال جلطه..

دنج راسه عدي وكعد على صفحه ، وجهه انكلب احمر ، رفع راسه صفن على بيبر …

دقااايق و دقااايق تمر وصوت عقرب الساعه يدك وكانو ناقوس خطر ..

كل شوي يطلع واحد بس محد ينطي جواب مريح ، لحد ما نفذ صبره لبيبيرس سحب  سلاحه ودفر الباب ودخل عليهم وكبت العيطه جوه ..

دخل عدي وراه بسرعه و ستار حظنت نانه ابجي ، كتلها اخر شي كالته ودوني لنانه ..

-يااعيوني ياابعد حيلي ياارب من صحتي على صحتها ياارب ،..

طلعو الدكاتره من جوه يعيطون و دخلو الامن يتراكضون للقسم ، طلع بيبرس ويجر بي عدي يكله موو هيج يااخي شجاك ..

دكتور يصيح الا اشتكي عليك ولك شنو تايهه تدخل علينه بالسلاح رد عليه بيبر يريد يضربه جره عدي و جتفه طلعو بره ، ستار وارهم يحجي ويه الامن يهدي بالوضع ..

دقايق ودخل عدي لوحده حجه دكتور اقدملك اعتذاري ، سحب بطاقه من جيب سترته و قدمه اله كلها اني محامي عدي ال**** اعتذر جدا بس مرته وحالتها خطره وانتو اهملتونه شلون تريد وضعنه قدرو حالتنه ..

دكتور لزم بطاقه قراها رفع راسه يهز بي ، جر نفس دكتور .. حجه حالته حرجه صراحه وبهيج حالات مانطلع نعلن عن وضع لا نتريث شوي على امل يتحسن الوضع ..

رد عدي متوتر شنو يعني ..

- البنت مرتفع ضغطها سبب الها جلطه ، وكانت حامل واجهضت ..

- رفع حواجبه حجه مصدوم :- حامل ؟؟!

- اي نعم للاسف ، ننتظر لمن تصحه حتى نكمل فحص واجرائات ..

نانه دكت على رجلها ياحظج المصخم ياميرال ،  جانت امنيتج بجااهل وهسه ربج اخذهه يااحظج المصخم اي والله يااميرال ، 

دموعي نزلت ، مصدومه ، عدي هز راسه مدنج وجهه انطعن احمر ، دار وجه ومشه طلع بره ..

بس صوت بيبر وصل يمنه يصيح ، نوب ركب سيارته و طلع وين ماعرف ..

درينه بعدين رايح لام زياد يتعارك  وياها و يريد يعرف شبيها شنو زعجها .. رجع خاوي ما مفتهم شي ..

عدي ضل يمنه كاعد ، دز ستار يجيب شي نشربه ماقبلنه ..

حاجه دكتور على صفحه يكله يصير ندخل نشوفها ، رد لا والله بالعنايه حاليا ..

جر اليوم يومين ، و ميرال فاقده ، يومين نانه ماتحملتهم وكعت ونامت بصفها ، ساري اجه رجعني كوه ماقبلو اروح بعد ، ديما تروح كم ساعه وترجع تكلي شنو الاخبار ، طلعت نانه من المستشفى ..

وميرال ماصحت ، لا اليل جان ليل ولا النهار جان نهار ، كان بس وقت يمر نريده يعدي حتى تجينه اخبار صحت ..

طلعت نانه و كعدت بالبيت بس تبجي عليها متخبله شلون ميرال مالها حس ونايمه بالمستشفى وهيه طلعت صاحيه ..

الي رعبنه مو اجهاضها ، فدوه الها يصير غيره بس الرعب مجاي تصحى ، خمس ايام متواصله ماكو اي نتيجه ايجابيه ، نانه مااتحملت كعدت باب الملحق تبجي ودوني للبت اريد اشوف البنت ياعيني راح تموت واني مو يمهاا ..

هاي امانه عود ياارب عونك ياارب امانه عندك هالبنيه لا تضرنه بيها ، كعدت بعيد عنها ابجي لامه جسمي باديه ، 

اندارت عليه حجت اذا راحت اخيتج معناه راحت الحنيه والبركه من البيت ، رفعت راسها للسما ورافعه اديها ، ياارب عود البنت تحجبت و بلشت تصلي لوجهك ، لا توجع كلبنه بيها …

ساري داير وجه احمر ويبجي ، هيه تدعي واحنه ماتحملنه صدك كلبنه توجع عليه الانتظار موت بطيى  ..

اخذنه ساري اني وياها و مشينه للمستشفى شفناها ..

ماخلونه ندخل الها جانت بعدها بالعنايه ، من بعيد من الجام شفناها ، الاجهزه على صدرها وبحلكها ، والله شكلها يجنن ولا عبالك مريضه بين حياه والموت ابد ..

وجها مو باهت لا بس نايمه و شعرها على جنب ، ماعرف شلون دخلو رجلها يمها وقبلو ..  كاعد بيبر كبالها ومجتف اديه صافن عليها ..

نانه كعدت كبالها ورافعه اديها تدعي ساري لازم جامه صافن عليها ، كلها تحبها لو اني بمكانها هم هيج لو هيه غير عني …

رمشت بعيوني ياارب اخذني اني وخليها هيه عدها من يحبها وينتظر كومتها بسلامه بس اني لاا ، رجعها واخذ روحي راضيه …

دخل عدي سلم ، التفتت عليه  رد ساري ، ركزت بي وجه اصفر لازم جكاره يدخن حجه شوكت اجيتو ..

همست توه ..

هز راسه ودنج ، دار وجه لحيته عاليه و مبهذل شبي هذا ، شنو هاي حالته كلت خاف جاي سكران لهنا شبي وضعه هيج كبر اذا صدك سكران شبي مخربط  .. 

راح يفتر و جكاره بيده ، لابس قميص و بنطرون ، والقميص بره البنطرون والردن مكفوف شلون ماجان ..

وشعر طه اول مره ماشوف بي لمعه ، كل مره يرجعه ليوره بطريقه محترفه و يلمع ، ضلت عيوني عليه خفت لاشارب و يفضحنه بالمستشفى ،و كلنه ننطرد ..

ضلينه يمها ساعتين ورجعنه ، ضل بس رجلها يمها وعدي ، مرت ايام ثانيه وعزيزه كلب نانه ورجلها ماصحت ...

ميرال …

ما ضَرَّ مَن رحلوا لو أنَّهُم أخَذوا

‏قبلَ الرّحيل الأسىٰ والهَمَّ والألَما؟

‏لٰكنَّهُمْ أخَذوا أرواحَنا، ومضَوا،

‏وخلَّفونا جسومًا تشتكي السَّقَما

 راسي ثكيل ، ثكيل من تفكير ماعرف من صدمه مادري من ذكريات ..

عيوني شلون غارسين بيها جمر والالم يصعد لراسي ، صوت امي توبخ بنانه وتكللها مو كتلج خلي بالج عليها شنو انتي على شنو دنسلمج راتب مو هذا شغلج .

وتالا ترد ودافع عن نانه ، فتحت عيوني اشوف امي ، بعدها ذيج الخانم ..

شعر بني قصير كاري ، ولابسه كوستم تنوره و جاكيتها …

 بابا من دونهم واكف يم راسي يمسد عليه ، دنج باوعلي و يبتسم ..

بجيت .. بابااا … زادت ابتسامته  يباوعلي  ، 

همست صدري يوجعني ، بجيت يوجعني حيل  رد بهدوء عارم :- كلنه نتوجع بالدنيا بابا ، 

باسني بهدوء ورد .. حنطيج هديه بابا و راح اخذ منج هديه هم ..

رمشت بعيوني خله بيدي محبس على شكل شمس ، رفعت عيوني عليه ، ابتسمت شتاخذ ..

مسح على راسي ورد بابتسامه :-  اخذت اخذت .. 

درت وجهي على امي واكفه مجتفه اديها بعصبيه ، بعدهم شباب ماكبرو ، ملامحهم ملامح الثلاثينات ماتغيرت ، وجه صافي من تجاعيد بملابس راقيه …

ايده مستمره تمسح على راسي ، رفعت راسي اشوف بابا مره ثانيه ، تفاجأت بيبر مو بابا ..

فزيت .. شهكت بقوه …

صوت اسم الله الرحمن اسم الله  ..

صوت جهاز عاط يم اذني ، واصوات تركض وصلت ليمي ،. صوت نانه البعيد حيل تعيط .. تكله شبيهاا عيوني،شبيها …

كولو مابيها شي وتالا تبجي ، شخص حركني وكلبني على صفحتي و خله جهاز بارد جوه ملابسي كزبر جسمي  ..

ردوني على ظهري شخص فتح عيوني وضوه دخل بؤبؤ عيني ..

ونيت باسم نانه ، واحد يمس يم اذني يرووحي اني هناا اني هناا …

بيبر ..

اي اي يكلبي شبيج ليش هيج ميرال تردين تعوفيني ..

دموعي نزلت مابيه احرك شي بس عيوني تفتر و تتحرك بعشوائيه بيااض على صوت اجهزه و صوت بجي ..

والم بداخلي ماعرف شنوو .. ايد دافيه لزمتني عرفت صاحبها منزل راسه يبوس بجف ايدي حجه شبيج ياعيوني شتحسين ..

درت وجهي عنه بتعب ، ناانه وين .. 

رجعت للظلام وفقدت حاسه الشعور ، غمضت عيوني تعب هد جسمي وعقلي من شنو ماعرف ..

مر و قت حسيت بعدها باصواتهم ، لمسات ادين بحنيه تمشي على وجهي وخدودي ..

فتحت عيوني كبالي نانه تعدل بالجرجف رمشت بهدوء ، ممرضه تكللها اي رده فعل انطيني خبر ..

ردت نانه اي ، دارت وجها نانه تنظف بالغرفه و تعدل بيها بتعب ، ابتسمت سمنانه نانه ، كوه تتحرك بتعب ولابسه حجاب جوزي و جبه سوده ام سحاب ..

دمعت درت وجهي الغرفه فارغه بس نانه ، التفتت على الباب مفتوحه عرفته مفتوح من الضوه الابيض داخل للغرفه ، الممرضات ديمرن من يمها اصوات كعب ..

درت وجهي على نانه همست نانه  ..

التفتت عليه فازه هاا يمه هااا ، تقدمت تمشي بسرعه تلمست وجهي هاا يمه ميرال هاا عيوني دنجت تبجي تعاتب بيه شعملتي بيه ياايمه ليش هيج موتنيه عليج  .

اخذيني يمج ، امي زعلانه عليج ترى ..

لا ياايمه ليش ليش ، قصرت وياجن اني ..

دنجت راسي رمشت حشه ماقصرتي بس اخذني يمج …

من عيوني من عيوني هسه اخذج ياهو وياج ام زياد موو ..

خليت راسي على صدرها وسكتت ، 

دقايق ودخل شخص يلهث متوتر ، ضليت ارمش بعيوني داشوفه زين بقاط بدون رباط تقرب و ضحت صورته حجه ميررال يروحي .

تقرب بسرعه عليه لزم وجهي و نزل يبوس بكصتي وخدودي و يحظن براسي .. 

غمضت عيوني حيل ، ابتعد عني يباوع بوجهي ميرررال شبيج ..

رمشت بعيوني اسمر بملامح عربيه ، همست .. تعبانه .. درت وجهي ..

لزم وجهي ودارني عليه من شنو كولي ميرال حتى اعرف ..

ماحجيت ، التزمت الصمت ، وصمتي طال حظن راسي يردد شنو الاذاج شنو زعلج كوليلي ..

صمتي طول وكلماتي قلت ، طلعوني من المستشفى لبيت نانه كبل ، ضليت مجلبه بيها حيل ماريدها تهدني ..

فرشت الي بالغرفه و مددت هو ضل واكف باب الغرفه اني منزله نظري عنه بس المح طوله واكف مجتف مو عاجبه ..

همس خما اضل اهنا مارتاح تجي يمي افضل ..

رد نانه تتوسل :- كم يوم ان شاء الله و هيه تجي خليها على راحتج فدوه لعينك ..

-هز راسه و تقرب علي باسني رايح اني تردين شي ..

-هزيت راسي لاا …

حظني وطلع ، خليت راسي على المخده ، درت وجهي اجت تالا ، خلت صينيه الاكل دنجت تخليها على طبله ..

شعرها نزل على جتفها كبرانه عود صايره مره  مديت ايدي على شعرها وجريته همست طولان شعرج ..

ضحكت من زمان توه عرفتي ، رمشت بعيوني كبرانه تالا حيل ماتوقعت هيج صايره ..

ضحكت شبيج ميرال اخذتي دواج مو ، هزيت راسي اي .. 

دكومي اكلي كومي ...كعدت توكل بيه حجيت تركي الخاشوكه اني اكل ..

لا توكعي ..

ضليت يمهم يومين ، عندي الالم بكل جسمي ، نانه كالت صعد ضغطج و انضربتي جلطه بس ربج ستر ، جريت نفس ربي ستر صح ربي ستر …

وستر على بيبر ماخلاني اشوف افعاله ، 

مو اكول الستر نعمه ، الله رزق بيبر بهل نعمه وكثر هم ..

كاعده بالغرفه واسمع صوت امير من بعيد ، شوي صوت ديما يكول لنانه هاا كاعده ..

ردت اي بالغرفه ، دخلت شايله ابنها ضحكت ياا هلا بالكاعد ..

ابتسمت تعاي ، تقربت بوستني ولج الج وحشه والله البيت فارغ عليه ..

- كولي مالكيتي واحد تضحكين عليه  من بعدي ..

- لاولج ضربتني على جتفي التهيت بغزل وايلاف ..

- ايلاف شلونها .. 

ضاربه رجلها بالمزهريه و شاكه راسه بليله عرسهم ..

-صدك  ..

-اي والله احنه نتراكض بيج هنا وهنا ، و عريس يدك على رجلج يكله تعال اخذ هاي بت خالتك ماريدها بعد ..

رايح ابوها وعواد حالين السالفه ، قبل يومين السبعه مالتها راحت امها محمله هدايه اني مارحت مابيه حيل وجع كلب ..

دفعت الفراش وحجيت طلعيني منا اختنكت اخذيني للحديقه لو للاسطبل …

رفعتني وساعدتني اطلع .. ضلت تجي يوميه شوي ، بلش دوام تالا وامتحنت ونجحت و دخلت الثالث بالدفعات ..

لاحظت لا ام زياد مرت عليه وحجت حمدلله على سلامه ولا غزل ، ممحتاجه جيتهن ، بس عرفت لاي درجه مسترخصتني و شايفتني بعين صغيره ..

برغم الله شاهد علي ماضريتها بيوم ولا حتى بكلمه ،

بيبر اجه كم مره عليه رادني ارجع اتحجج بالتعب مابيه ونانه تايدني ..

كاعدين بالصاله دك الباب ابو حمد ، هلات بي نانه وكالت تعال تفضل ابو حمد توه سويت جاي تفضل …

سلم ودخل علينه تقرب عليه باسني حمدلله على سلامه ابنتي ماعليج غير العافيه بالله كريم زعلت من سمعت بيج مريضه ، دعيت الج من كل كلبي ..

ابتسمت بتعب اشكرج الله يحفظك ..

شخبارج شبيج يااعمي جنج الورد شطيحج ..

سامع بالتايهات عمو هاي تايهات الي لا على البال ولا على خاطر ..

صدكتي اي والله ، اهم شي انتي بصحه وعافيه  ورديتي لاهلج ولرجلج الحمدلله …

كعد يمنه يشرب جاي و ساله ساري عن ابنه ، كعد يحجي عنه ، اشبع قهر من اسمع يكول ماينام اليل وبس يون و يصيح من الالم ..

احنه هم ماعندي سالفه، كل ما شفناها سالنا على ابنه ، على امل يكول زين حتى نرتاح .. بس جذب هو العليل شعالجه ..

شوي وسلم وكام طلع ، طلعت للحديقه شوي ، كعدت اشوف بهل خضار ، يمكن وكعتي بيها صالح ..

و منفعه الي ، خلتني افكر و استعيد وعي زين ، نظري الحمدلله احسن ، صح ماشوف البعيد بس اشوف ..

هم نعمه من الله ابتسمت جوز هاي شمس الي بابا خلاها بيدي ، تقرب صوت عليه التفتت رجال ، من تقرب بين عندي منو .. النذل المنافق  .. 

زحت نظري عنه حجه حمدلله على سلامه ..

مارديت ..

جر نفس ، من الاخلاق تردين ..

- تعرف الاخلاق ابو بحر ؟؟!

ليش لا ..

-الي يحفر جوه صاحبه ويغدر بي ما يعرف الاخلاق ..

-ضحك لا وشلون هاي ..

-ساعه بابا شجابها عند الحجي عدي ..

#يتبع ..

برتوت هديه . هذا الي كدرت عليه يروحي انتو ..

كروب الفيس .. ( كتابات اسماء ديمير )

الانستا ..  asmaa_demer

كروب الفيس  ...  كاتبات وقارئات العراق