رواية قاع الشياطين الفصل الثامن والسبعون 78 - بقلم اسماء ديمير

االجزء الثاني ،، البارت الثالث

قاع الشياطين

بقلم ، اسماء ديمير

ياحيوووان يالحقير .. التفتت دافتح الباب البصفي دانزل وانهزم ..انجريت من شعري من ورة .. وتخلت قطعه قماش على وجهي ، رفست  برجليه الكشن واهامش بيدي اريد افتح الباب .. لحد ماعمت عيوني اديه خدرن .. وفقدت الوعي ..

صوت رجه وهزه بالمكان ،، ريحه غريبه مااعرفها ،  اريد افتح عيوني بس مااكدر اثكال حيل  ، ونيت بدوخه ، حاولت اتحرك ماكدرت دايخه حيل حيل حتى واني مغمضه احس دنيا تفتر بيه ، حاولت افتح ماكدر صوت سيارات ، وريحه. بانزين ،

وكفت الحركه وجسمي سكن ، سمعت صوت  يكول لا بس اني وزوجتي نفس مدشوف زوجتي تعبانه من طول الطريق وصار عدها لعبان نفس من ريحه البانزين ..ضحك.. ورجع حجه لا جنه بشهر عسل باربيل …

ورد شخص الف مبروك توكل يله .. تحركت السيارة ومشت ..

حاولت احرك اديه ، مابيه مهدود حيلي حصت شوية ونيت ، حجه هاا صحيتي بعد وكت ولج .. تخلت قطعه قماش على وجهي ريحتها قووية قووية بحيث من تستنشفها عبالك قطع كزاز  تدخل من خشمك لجسمك كله ، .

دمعت عيوني من الالم ، رجعت نمت ..

ماعرف شكد مر ، بس اول ماكعد الم فضيع براس ، جسم منعنع .. شلون عبالك جنت مريضه بالافلاونزه ماعندي لاسيطره على راسي ولا جسمي تركيز صفر ..

كعدت لحيلي دايخه حيل حتى مااكدر اشوف زين ..

تحركت من مكاني جنت نايمه. على جربايه نفر ، ماشوف تفاصيل .. وين اني ..

شجابني هناا ، هاي مو غرفتي.  كمت لحيلي ودخت بسرعه . كعدت بالارض مهدود حيلي ..

زحفت لحد الحايط حتى استند علية .. ملابسي مغيره لو شنو .. تلمست ملابسي .. هاي شنوو..

كنت لابسه بنطرون وجاكيت ، غمضت عيوني حتى اركز بنفسي دافتهم شبيه ، تذكرت الحيوان عدي ، اي هذا وينه ..

لزمت ملابسي مخترعه لابسه دشداشه كصيرة هاي شلون بدلت ، شبيه ..

لزمت الحايط ومشيت لحد الباب ، درت ظهري  وراي خاف موجود بالغرفه ماحسيت بي ، ماكو الغرفه فارغه ، لزمت يده الباب وحاولت افتحها .. ماكوو

حاولت مره ثانيه بهدوء ماكوو متفتح .. لزمتها باثنين اديه ونزلتها ماكوو جنها مقفولة ..

لزمت راسي اااخ يايمه راسي حمووت ، رجعت للباب ماتفتح . عفتها ووتوجهت للغرفه دشوف بالكت اكو مفتاح اي شي افتح بي حتى لو مبرد ، مقراضة .. مشيت بهدوء ادور على ميز او بالجرار ..

الغرفة شبه فارغه من الحاجات ، بس اكو اثاث عبالك جديده ، مو جبيرة الغرفه واثاثها مال نفر واحد .. بيها حمام هم دخلت .. صغير .. هو حمام هو تواليت بينهم بس فاصل زجاجي …

درت وجهي على المراية فوك المغسلة .. فرشه اسنان وحده ومشط وكريم مرطب ، تقربت من مغسلة فتحت جرار جواها ، صابون منظفات ، ماكو غيرهن .. رفعت راسي تعبانه محتارة. ..

دخلت للحمام  اكو علب شامبوات .. وفوكهن اكو فتحه مال شباك .. تقربت عليها كبل ، عالية مالوحها .. وكفت على طرف اصابعي مسدوده ماتفتح ..

جسمي مهدود ، رجعت اتسند على حايط ، امشي بطى ،  كعدت على جربايه تعبانه .. حتى مااعرف وين اني ،يم منو ، ليش هنا ، خاف حتى اطلع صوت ، وحتى لو طلعت صوت منو يجيني ..

غفيت بمكاني ، سمعت صوت قريب صحيت .. بين مافتحت عيوني اختفة الصوت …

كعدت على حيلي نايمه بالعرض على جرباية ، رفعت راسي اااخ ياايمه على الالم.. صوت برة .. درت وجهي الباب ؟؟!

الباب مفتوح ؟؟؟

كمت بسرعة داكوم عثرت لزمت الجربايه اوكف ، مشيت الها بسرعة لزمت الباب بخوف اباوع . المفتاح موجود بيها ، منو خلاه ، منو فتحه اصلا ..  خايفه حيل حتى جسمي مشنج ..

اكو درج نازل ليجوه واكو درج صاعد ليفوك .. طلعت امشي على طرف اصابعي ، صوت اجاني صوت خلاني افتح عيوني على وسعهن ..

مما .. هاااااا ياايمه ياعيوني التفت وين صوت .. وصوت خرخاشه .. نوب صوت ضحكتها !!!

التفتت يمنى وين صوت .. مشيت بسرعة .. اكو غرفه مفتوح بابها قريب الدرج .. وكفت عدها ..

مديت راسي بخوف على كيف اتاكد .. جمدت بمكاني من المنظر  ، كلبي دكاته سريعه ، دخلت للغرفة ارجف ..

واكف و منطيني ظهرة وشايل بيده هيف .. كباله كاروك لونه اخظر جبير …

اريد اتنفس ماكدر من خرعه انكتم نفسي ، حجه صح نوم ، الي يشوفج يكول ميته مو نايمه …

مانطقت ، هيف تحجي وياه ، عيوني دمعت ،  والله كلبي يرجف يرجف حتى حلكي يبس ، غمضت عيوني ونزلت دموعي ..

ياارب حفظك وسترك ولطفك بينا …

بلعت ريك اباوع عليه شايلها بيد والايد ثانيه لازم لعبه .. التفت عليه رفع حواجبه ..

ضحك هاا ام هيف ، شلونج صار هواي ماملتقين  ..

ماحجيت بس حلكي يرجف ..

غفس وجهه بس شنو ام هيف ؟؟ هيييف ؟؟؟ اسمه خرائي هذا ، لازم اغيرة شتكولين ..

مانطقت بس ارمش بعيوني مصدومه وخايفه عليها ، بؤبؤ عيوني يتحرك بارتباك ، ماعرف حتى اضبط نفسي ، عيوني عليها هيه ماانتبهت عليه اصلا بيدها لعبه ملتهيه بيها ،،

دار ظهرة ورجع خلاها بالكارور ، مدري شكال الها باسها من راسها ، درت وجهي ليورة متوترة .. صوته طلع التفتت بسرعه علية اباوع عليها منو يلبسها منو موكلها شلون ساكته هيج .. شعرها مشط صح مابي قراصات بس باين نظيف ومرتب ، عيوني متوترة وخايفة .. ندار عليه مبتسم ..

وكف ثواني مايحجي يباوعلي بهدوء ،  متشفي بخوفي ورعبي ، مستفزز والله يجلط من حقارتة ، عدي من نوع الئيم ومؤذي حتى بنظرته و شكله مو بس بافعاله الشنيعة …

رفع حواجبه مبتسم بهدوء. ،، عندي هواي وقت تشوفيها .. بس هم عندي وياج حجي تعاي نطلع ..

فات من يمي بهدوء يمشي بثقه ، التفتت عليه مشى شوي و واكف قريب الدرج يريد ينزل ، اشر باصبعه
..  تعاي ..

ماحجيت .. حجه ماتجين ؟؟؟! .. هم سكتت  مارديت عليه ..

نزل كم درجه هو ، واني ركضت بكل سرعتي لهيف شلتها بحيث هي اخترعه .. عاطت خايفه ..

بين مالتفت وانتبه عليه ، صعد ركض ،، اني طكيته ركضها للغرفه جنت بيها جريت المفتاح .. توه اسدها خله ايده يدفعها …

عطت خايفه  حاولت ادفع الباب مااكدر ، ضاغطه عليها بتك ايد وبجتفي ارجف ، حاظنه هيف بيدي الثانية تعيط و ترفس ،  .. لازمه الباب بيد وحده .. رفع حواجبه بتحذير افتحيها …

تك عين طالعه مني اشوفه بيها بينه بس الباب ، وخررر عني وعن بنتي …

كلت افتحيهااا لج خرعتي البنيه ..

بجيت وخرر عنااا طلعنا مناااا شتريد من عدنا شسويت الك …

مخبله انتي مو عاقله ، وين تردين تحبسين الطفله بهل غرفه …

عوفنااا كلت مااحجي شي والله بس اطلع منا انسي كلشي بس طلعنا ..

وخر ايده عن الباب جر نفس بعصبيه .. اريد اسد الباب خله رجله بين الباب والحايط .. لاتتصرفين مثل الاغبياء ، لمره وحده فكري بمنطقيه شراح اسوين هناا بالغرفه وكلشي ماعندج ممتوفر بيها شكد راح تحبسين نفسج. وياج طفله هم ..

ماحجيت بس ضليت ضاغطه على الباب بجتفي وايدي ،وهاي موتت نفسها تبجي وتحوص تريد تنزل ..

وخر هو واني سديتها حيل وكعت على الباب .. سديتها وقفلتها خايفه .. سندتها بظهري مخترعه وهيف تبجي …

توقعت يعصب او يركعها دفره لو شنو يسوي رده فعل قوية .. بس الحيوان هادئ حيل رعبني نوب ..

ذبيت هيف بالارض وجريت الميز خليته وسديته الباب بي ، خفت لا عنده مفتاح ثاني ويفتحها علينه من هاي مامن وهادي ..

هاي تصرخ تصرخ .. شلتها هاا ماما هااا هاي اني حبيبي وخرت شعري من وجهي .. باوعت بوجهي تبجي فازه .. بوسها من وجها من خدودها وعيونها وحلكها ، ابجي وياها ،  يااروحي هاي اني يمااا اني يانظر عيوني شبيج شكو …

خايفه خرعتها من شلتها حيل فزت سوده عليه حظنتها حيل خايفه عليها كون احطج بصدري واقفل عليج ، ماله صوت ذاك .. شوو ماكو ..

اندكت الباب بهدوء .. وحجه ..

حجه بصوت خشن جدي ،، لاتتصرفين بتهور ميرال .. خلال ساعتين بنتج اذا ماشربت حليبها تبجي وانتي تعرفيها…

كتلج تعاي نحجي حتى تتوضح الامور بس باين انتي بعدج نفس العقل المحجر ، ماكبرتي .. 

دائما تثبتين الي . ان العين والاغاتي والكلام الهادي مايجيب نتيجه وياج ، اتركج تفكرين ، بنتج بحظنج اطلعي شوكت مايعجبج مااجبرج .. بس خلي بالج شكد تردين تظلين ساعه ساعتين .. يوم قابل بنتج ماتتحمل لاجوع و لا ملابسها ، كلشي ما عندج جوه للطفله  …

هم ماحجيت ضليت حضنتها حيل لصدري .. حجت ممااا .. التفتت عليها رافعه راسها تباوع بوجهي ، ابتسمت من بين دموعي .. خلت ايدها على صدري مماا ..

ياعيون مماا ياروحها صدري يبس من فراكج ياامي .. طلعت الها صدري ارضعها ..

بس خليته بحلكها ورضعت شوي شاغت روحي متت ..

يابس يااابس ، بكل مصه منها تسحب روحي الم صدري كلها يوصل للام للابط …

بجيت بالم صكيت سنوني ، اصبر بروحي ، شوي رضعت وعافته تباوعلي ، ضميته متاذيه .. حظنتها لصدري حيل ..

ياتعبي وجعي ، ياهمي والله ، ريحتها شكد طيبه ، لابسه ملابس ولد ، شورت و فالينه ..

حاجيتها شلونج .. هاا لزمت خدودها شلوونج ولج هاا بوستها ماشبع منها .. متت بفراكج يااعيوني ..

ماتحجي بس ممده بحظني .. اني كاعده على جربايه ، ضليت خالتها بحظني واهز بيها لحد ماغفت ..

خليتها على جربايه وخرت عنها ، جريت ميز الي بصف جربايه صغير ..

شلته وتوجهت للحمام .. خليته جوه شباك وصعد اشوف ينفتح لاا ..

شباك مو جبير صغير يطلع عرضه ربع متر وطوله نص متر .. حاولت لفتحه ماينفتح جام شفاف ، اكو حايط مقابل الشباك .. مااكدر اشوف اي شي .  زين اذا كدرت كسرته شلون ..

بيش اكسره اصلا .. خاف تفزز هيف اذا بجت شيسكتها . التفتت بطل شامبور قريب مني ، منو كال البطل يكسره ، بعدين باين اني بطابق الثاني اذا كسرته شلون اطلع منه وانزل ..

صفنت يااربي سهلها ، طلعت من الحمام  حايرة رجعت الميز لمكانه اني ومدنجه شفت شي وره كنتور ..

استغربت تقربت منه ضوة .. هاي شنو .. حاولت ادفع الكنتور مايندفع ..

صدك الغرفه ليش مابيها شباك ؟؟؟

دنجت للكاع مددت داشوف شكو جوه ، ماكو شي بس اكو ضوء خفييف ..

كمت لحيلي بسرعه .. فتحت الكنتور فارغ فتحت الباب ثانية اكو قطع ملابس نسائيه .. الكنتور ثلاث بوب ، فتحت الثالثه عباره عن قطعات بيهن ملابس ،، دفعت ظهر الكنتور قوي مو مال ينكسر ..

سديت الكنتور كلت ادفعه شبيه .. بس المشكله اني ضعيفه نوب مماكله ولاشاربه طاقة عندي ضعيفه حيل ، شلون راح احركه .. والله بالموت بالموت حركت منه شبير بالموت .. سندت ظهري على الحايط وبرجليه واديه اثنين ادفع .. حركته شبر شوي واطك صرتي ..

تقربت منه شوي شباك هم يطل على حايط عفيه شبابيك شنو فايدتجن اذا الاطلاله هي الحايط .. حاولت اشوف شكو جوه عبالك منور ، لان اكو شباك ثاني بالجهه الثانية ..

رجعت يم هيف مابيدي اي حيلة او سبيل للطلعه منا  .

شلون هسه شاسوي ، اذا طلعت منو يكول ماياذيني وياذيها ، شنو الي يضمن ماياخذها مني مره ثانيه اني ماصدكت جلبت بيها ، زين شنو يريد ، فلوس ؟؟ مو معقوله ليش هو محتاج قابل ..

لو يريد ينتقم ؟؟ اني شعليه ، هيف شعليها ، اذا حاقد على بيبر هو وياه يتصافون اني وبنتي شكوو …

التفتت عليها نايمه وفاتحه حلكها , دمعت عيوني نزلت وجهي عند وجها بوستها يروحي تبهذلتي وانتي مالج علاقه بهذول المخابيل الي الله شمرهم علية ..

زين بيبر وين ، شراح يسوي ، معقوله يلكانه ..

اكيد يلكانه ماتصعب عليه بس شوكت شكد اريد اقاوم اني واصبر ، شكد قابل اضل حابسه نفسي هنا والله هيف اذا كعدت ومالكت اكل لو العاب لو تفتر الا اطك بجي ..

لا لاا صدري موجود احاول ارضعها واذا رادت تغير حفاظه موجود الحمام اشطفها هناك ..واذا تريد تلعب العبها اني شبيه …

خليت راسي يم راسها ونمت دمعتي على خدي والله ، ماخايفه على نفسي بكل ما خايفه عليها  ، خليت ايدي فوكاها حتى امن ماتنوخذ مني … غفيت بصفها من الملل وتفكير ..

نومتي خفيف ، مادري شكد غفيت بس حسيت على صوت كعدت لكيتها كاعده مدده بمكانها. مامتحركه تباوعلي …

ضحكت ، كعدتي يعمري .. ابتسمت .. عين الرحمن تحرسها حليوه والله .. تموت ماعرف لان بنتي واحبها  اشوفها هيج ..

ملامحها عاديه مثل ابوها بس حلوه وجها بي قبول خاصه من تضحك .. الحمدلله يارب ، الحمدلله نعمك عليه هواي ، صح ماشوفها بوضح وبتفاصيلها مثل رمش او شامه او شي .  بس اشوفها عندي صوره الها بعيوني ، حاصت تريد تكوم .. كومتها وكعدتها ..

طلعت صدري ارضعها تريد جوعانه .. اثنينهن يابسات بسبب قله اكلي ..

وهي اصلا مو هالكد وياه رضاعه من صدري ، تريد ممتها الجبيره كون هيج تفلت عليها ، وين هذا يقطر تقطر عليها ..
رضعت شويه ودارت وجها ماتريده ..

هااا دخذي يله ..

هزت راسها ما تريد ماقتنعت بي ، مالت تريد تنزل .. نزلتها للارض ، تمشي تتحرك .. اخذت الغرفه طول بعرض تمشي لو تنمام بالارض تتكلب …

حارت شسوت جرت الجرجف من جربايه وشمرته بالكاع ..  فتحت جرارات ، تبحوش بيهن اصلا فارغات ، جرت مخاد صعدت عليهن نوب سوتهن مثل الحصان .. لحد ماملت اندارت عليه  مبرطمه تريد تبجي ..

عرفت حتبلش الحفله مال الحصره ،طفل بطبيعته ابد مايحب ينحصر ، يريد ينطلق هيج ، ويصير حرك حيل خاصه بالسنووات الاولى لمن يبلش يستكشف البيت والحوالي والبيئه وكلشي ..

راحت للحمام لزمتها لا اوواا …  توكعين هناك تعاي نلعب بالمخاد تعاي نسوي تووت تووت …

صعدت على مخده وكتلها تعااي وراي توووت تووت ..

مارضت ضلت تمشي ضايجه ادك الباب ركضت عليها يماااا يمااا دصحين علينا هذا المريض تعااي ..

مقبلت ضلت تبجي شلتها اسكتها ماتقبل تريد تنزل ، تحوص بيدي وتعصر بنفسها حيل  ..

شلتها من بين اباطها وشمرتها بالجو دالعب وياها عاطت مخترعه صخااام .. اسم الله اسم الله دالعب وياج ..

شبيج عاطت مخترعه خرب .. اندكت الباب حيل صاح شبيها ؟؟؟!

ماحجيت بس هاي تبجي اخذتها كبل للحمام احاول وياها شغلت الماي بالحمام وخليتها تلعب بي نطيتها علب شامبوات هاج يمعوده شبيج .. ماترضه .. فتخت شامبو وسويت وغف بيدي هاااج شوفي .. هاي شنوو فقااعه  اللله شكد حلووو واووو …

خليت الوغف بيده بااعي اللله .. حلوو ..

تهز راسها ماترضه .. اجت صيحه من يم الباب .. مو جااي احجي شسويتي الها ؟؟؟ . طلعت من الحمام اتلفت مرتبكه رديت  .. مابيها شي شعليك ..

صوت بطل شامبو وكع ركضت دخلت عليها ملغمطه راسها وجسمها رفعت ايدها تفرك وجها لان تحط جف ايدها الي كله شامبو بنص عينها ،، شامبو صار من راسها لبطنها عاطت تبجي ..

من خرب اي والله .. خليت راسها جوه الماي اغسل الها الشامبو حرك عيونها ..

صارت كتله من الوغف ،نوب اغسل بي ويزيد شكد ماافرك يفور بالزايد ويكثر ، كامت ماتنشاف تحولت الى  كتله من الفقاعات اختنكت ، واني منا ثوله ماشوفها زين  .. وغفت البنيه وتصرخ ..

مختنكه من شامبو وعيونها راحت دخل بيهم .. بجيت مخترعه دكفي دااغسلهم الج انطي مجال الله عليج …

تعصر بنفسها وترفس بيه ، ماسيطر عليها .. عاطت وعطت وياها داوكفي يااامي  بس انطيني مجال يماماااااا ..

شلتها داسيطر عليها داغسلها زين .. الله يشهد لزمتها زين بس هي كويه تعصر وترفس بيه نوب كلها شامبو وزلكت من اديه  ، وكعت للارض وتجيها الوكعه على راسها وين ببوري الماي سوده عليه ياايما …

والله بس صوت الهبده تخرع لوحدها تكون بطيخه وكعت بالارض وبوري الماي صب على وجها وحلكها خنكها .. عاطت وفغرت فجأه وجها صار ازرك وسكتت مالها صوت بس فاكه حلكها ومزركه .. عطت عياط ، .. يماااااا ..

لزمتها فاكه حلكها ضربتها على وجها اعيط اهز بيها ماكوو يبووووو ، يااامي الحكووولي .. شلتها داركض انربدت بجسم وكعت بالارض …

دخل للحمام  جرها مني حيل ياااحيوووانه شسويتي الها .. انعل اهلج خبله انتي خبله مريضه ، شبيهاا … دخلها جوه فك الماي يغسل الها ويهفي بوجهي ..

اني وراه والله وكعت مني مااقصد وكعت زلكت .. ضربها على ظهرها اكثر من مره ويهفي بوجها على كيف.. ويله طلع صوتها عاطت وشهكت الهوى…

كعدت بالارض ابجي خايفه مهبوطه وهي تبجي عمت عيوني اي والله ، خلاها على صدره يمسد على ظهرها بهدوء ..

التفت عليه بعصبيه وبشمىزاز .. فعلا انتي مو صاحيه ماتستحقين تكونين ام لا انتي ولا ابو تستحقون والله .. نتر حيل … مريضه مو صاحية   ..

جرها دياخذها ويطلع ..

جلبت بي ووووين رجعها ، دفعني وخررري لا انعل والديج ..

جلبت باديه ماتاخذها والله منوو انت جيبيها اني امها ..هي بجت خايفه دفعني حيل وكعني بجيت الله لايوفقك رجعها خلينا نرجع لادهوك  شتريد من عدناا ..

طلع ماحجه ركضت والله اعيط عليه .. التفت بسرعه عاط بيه جفلني قسم بالله اذا ماحترمتي نفسج مثل الاوادم الا اشوفج الوجهه الثاني ، لاتتصرفين مثل الحيواان ، صوتج نصي ورعونه بطليهاا .. عافني ومشه للغرفه الثانية  .. مشيت وراها على كيف ابجي ، والله جسمي يرجف يرجف حتى بردت حيل ..

دخل  الغرفه الي جانت بيها .. جر بطانيه من الكاروك ، لفها بيها اخذ لعبه خلاها بحظنها يسكتها .. واني واكفه على صفحه ملابسي تنكط مي ، لميت اديه لصدري جحلت  اراقب بي ..

ماعبرني جان وجهه وجه القرد ، مدلغم عوذه منك ومن اخلاقك .. نزل جوه واني وراه امشي صاله جبيره وعلى اليسرة  توجه هو  ، ملابسي كلها ماي تنكعت لطشت علية ، دخل لمكان دخلت وراه .. طلع مطبخ ،

جر كرسي مال اطفال ، بصف الكاونتر .. فتحه. وكعدها علية خلالها اللعبه ، لف البطانيه زين عليها .. ورفع نظره عليه بخرزه .. يحذرني

.. شيلها وانهزمي او تقربي منها وشوفي رده فعلي ، لا تلوميني بعدها على الي يجرالج ..

ضلت عيونه عليه بتحدي يريد اسوي رده فعل ، ديحقر وياي ، درت وجهي عنه مقهورة ماسويت شي ضليت ساكته مدمعه ..

تحرك مشة ..التفت بسرعه عليه ، راح للثلاجه فتحها واندار عليه يشوف شسوي  .. ماتقربت منها ضليت واكفه بمكاني بصف الحايط بعيد عنها …

حجه حذرتج اني …

مارديت طلع قوطيه حليب رقم ٢ لونها اخظر ..

حجيت ماتشرب هذا نوع  ..

رد هو مدنج يفتحها شمفهمج انتي يالثوله …

فعلا انت مو محترم والله ، الفاظك بالحضيض ..

رفع نظره عليه وهو يسوي الحليب ابتسم ام الحضيض اسولفلج عن الحضيض الي انتي وابوها  بي ..

ماعدها اب ، اني امها وابوها اما ذاك الرجال بس اسمه موجود بظهر هويتها وهاهية ، لا تاخذنا بذنبه ..

ضحك .. خله مكيالات ٣  ، فوكهن ماي وسد الممه يخظها ، هذا بس الاسم ابوها  ، ويندلكم ويعرف رقمج .. بس الاسم ابوها وانتي بس اختفت خابرتي تستعينين بي ،

لعد المن اروح والبنت ماعرف بيد ياظالم ومجرم ، اذا شرطه ماسوتلي شي ، واني مااعرف شتصرف .. انداريت عليها اباوع ، عمرها سنه ونص ماخفت الله من اخذتها …

خله الممده بيدها ورفع اديها يوصلهن لحلكها .. وكف يتلمس راسها يشوف راسها شبي ، بجيت كبل لان ماخلاني اتقرب منها ، اديه ترجف اريد اشيلها دافحصها ، حجيت انطينياها ، اشوفها اني افرض بيها منك ..

-بالعكس عندي امن الها ، انتي غبرة ، وابوها راعي مشاكل ومشاكله ماتخلص وعن قريب ينقضي عليه لو يتنفذ عليه بالسجن ، لو ينقتل  بشارع باي مكان .. جوز هو واكف يعبي بانزين لسيارته ينقتل او هو نايم بفراشه وديحلم . ابتسم مستهزء ..  او يمشي بالشارع او سايق سيارته وتنفجر بي مايبقه منه شي حتى يندفن ..  كلشي جائز ..

عقدت حواجبي مستغربه حقده وكرههه بدون سبب ولا مبرر خاصه ويه بيبر ..

صدري اذاني وهو يحجي بالموت عنه ويفاول علية ، شنو سوالك حتى تحجي هيج ، ليش تنكر زاد والملح الي بينكم ، العشرة ماتهون بس على قليل الاص … عاط بية اكلي خرااااا ..

جفلني رجعت ليورا … دااافعي عنه دااافعي .. بعد كل الي عرفتي ادافعين عنه ، شكد صلفه انتي ، يابنت الاصل مزوجتلج حرامي قاتل نصاب بياع مخدرات وملاهي وتحجين بالاصل .. يابنت اصل. ترضى تخلف لهيج واحد ..

نزلت نظري على هيف وخرت ممه من حلكها برطمت تريد تبجي .. رفع ممه لحلها يكللها اااش بابا اااش ..

والله كلبي يرجف رجف ماصار ، باوعلي تردين ترجعين لادهوك ارجعج ماعندي مانع بس البنت تضل عندي ، هاي بنتي عوض عن الي راح والي خسرته بسببكم .. تردين تضلين هنا ضلي بس بحترامج ، اي حيوانه قسم بالله افعل بيج فعله ماتسولف ولشمرج باقرب مزبله …

سكتت امسح بدموعي وتنزل غيرهن  .. بلعت ريك مااكدر احجي حتى بلعومي جف ، السانه متبري منه ماعنده ذره احترام ولااخلاق ، محد غالط عليه هيج هايني بكدهذا ..

حجيت اريد اخذها ابدل ملابسها ، راسها يمكن بي دم ..

عوفيها حيري بنفسج باوعلي من فوج ليجوه بشمئزاز مو على اساس تحجبتي وانسترتي شو شحلتي شنو القصه ..

ملابسي انت اخذتهم ..

فوك بالغرفه جنتي مطمورة بيها  تلكين ملابس اخذي منهن .. دار ظهره عافس وجهه مقرف ..

يرجع ضمادات لمكانهم ..

درت ظهر حتى اصعد باوعت عليها اخر مره خايفه عليها .. جاي ترضع ساكته .. رافعه اديها بيهن ممه وتمص ، وخدودها تصعد وتنزل ويه كل رضعه …

برطمت حقير نذل ، يحرمني منها ، والله مااخليك .. صعدت بسرعه للغرفه ، طلعت تراك طويل شلون ماجان ، اي شي اجه كبالي جريته .. لبسه ، وذبيت ملابسي المبلله بالحمام ورجعت بسرعه عليهم للمطبخ ، شعري صاير كوشه ممشط جني خبلة ، لكيته يسوي اكل ..

واكف على سنك وخال التخته ويقطع طماطه وفلفل ..

جريت كرسي وكعدت كبالها ..

التفت عليه شايل سجينه يريد يهدد  ، حجيت كبل ، نترت بضوجه ..ماتقربت كاعده هنا وين اروح قابل ، 

فر بيده واندار يكمل … طاح حظج ثولة …

همست نكس لعنت الله عليك …

التفت علي …شكلتي ..

داذكر الله حرام يعني ..

تبره منج الله ، انتي اعرفج من اي نوع ، من نوع الي يذكر الله بكل كلامه ..وهو افعاله افعال شيطان ، وين صلاتج وصومج وانت تنامين ويه بياع مخدرات وتدرين بي انتي ..

نتر ورفعت اريده انتر ،، انت مو انظف منه .. انت  وياه نفس الشي ، نسيت نفسك وشغلك وياه ، ايد بيد جنتو ، اضيعه الكاه وياك ، مايسوي شغله هو اذا ماانته وياه وايدك ورايك بيها  ..

عض على سنونه ولزم سجين بقوة باعي دكلج تقرب هو وسجينه مالته .. حجيت اقاطعه ،امتمت ، رجف حلكي .. شبيك وياي كدرتك عليه ،جوز مني ، الطفله خوفتها ،

الزمي السانج لا اكصه والله ، طلع الج السان يالخرسة المكفخه ،

ماحجيت ضلت الغصه بكلبي ، والله بنفسي اتفل عليه ، المشكله كلامه ماينسكت عليه كله اهانه وتقليل قيمه ولازم اسكت ، ويعير بيه ويقلل مني ،

والله غصه بلاعيمي وكفت ، دمعه واكفه بمحجر عيني كوه لازمتها ماتوكع ، داحاول الملم الباقي من كرامتي ،

صفنت على هيف ، خلصت ممه وشمرتها ، وحارت باللعبه مدت اصبعها تريد تشلع عين اللعبة من مكانها ،

حجه هو يخلي طماطه بالطاوه ماتعرفين تكومين تغسلين ممه ، لو الا اني احجي لو متعوده على خدم ، ماسوين شي بيدج ..

شلت ممه بعصبيه ومشيت ضايجه ،نار تطلع من عيوني من القهر والله بس يكلي بز انهار واضل ابجي ،  داغسلها فتحت البوري حيل عاضه على اسناني  ..

حجه وجع على كيف. بيت الخلفج تريدن تهجمي ،

بجيت كبل ، اديه ترجف وتغسل بالممه حسبي الله عليك اي والله ، مسلمتك بيد الله هو ياخذ حقي وحق قهري هذا ، كدرتك على مره وطفلة هم …

احجي مقهوره وابجي واجلف بالممه حيل كلت والله بس يحاول ياذيني الا اهبده بالممه الكزاز على راسة ، شيصير خلي يصير ..

ماحجه ، ولا نطق ضل ساكت ، غطه طاوه طماطه ، وجر كرسي وكعد يحاجي هيف ..

ها بابااتي شبعتي ، هاااا ترسي بطنج  ..

وهي ترد ادردم ،

المطبخ مو كلش جبير ، يطلع ٤×٥ كاونتر و ثلاجه بابين و ميز طعام صغير ، واكو باب خشب تطلع على الحديقه وراها باب محجر حديد ، وحتى الشباك بي محجر حديد ، هذا سجن مو بيت ،   وباب على المنور وباب على الصالة داخليه ..

الحديقه مقسمه قسمين ، حديقه صغيرة ثيل و زرع سندانات ماشوفهن زين شنو هنه ، و بيها كراج حق سيارة وحده موجوده هالسيارة ،بس مو الي شفتها سوده مضلله لا ، جانت بيضه ..

وطرمه بيها سقيفه ، يعني ماتشوف. لاجوارين ولاشارع ولا اي شي .. حتى لو اعيط محد يسمعني ، شلون اوصل لباب البيت اذا ردت اطلع منا ،،

فزيت على صوت قوي ، التفتت طلع هو شامر القبق حيل  جان مغطي بي الطاوه على سنك حجه غسلي ..

لزمته حار جواني ،  ذبيته بسرعه ..

وين بالج .. عوج حلكه ..

مارديت ..

وكفت اغسل الي شمرهن على سنك .. هو راح للثلاجه يطلع عصير و شغلات ثانية ..حط الاكل والصمون ، على ميز وصب عصير من البطل بكلاص واحد وعاف كلاص الثاني بلا مايصب بي ..

حجه ما تجين تاكلين لو يراد الج عزيمه وتقديم طلب لحظرتج ..

مااريديت …

شايفه نفسج لو لااا بالمراية جنج ميت طالع من الكبر ..

ماحاجيته ،  لعبانه روحي ، ماريد اطلع من المطبخ اعوف بنتي يمه ، حجه لاتباوعيلي اريد اكل براحتي لااغص ..

درت وجهي كوه متحمله والله ضغط ضغط مو طبيعي .  استفزاز ولعب بالاعصاب …

ضل يطكطك بالبالمواعين ، سمعت صوت لوك اكل .. بلعت ريك والله جوعانه ..

صار ايام مماكله يادوب عصير اشرب شوي ، وهذا ياكل ريحه طماطه الحمس طلعت ، سمعت صوت العصيل يملي بالكلاص ، رفعت حواجبي بطني قرقرت …

صوت الكرسي تحرك .. التفتت علية ، كام من مكانه وطلع من المطبخ ، التفتت على الاكل عايف نص طاوه طماطه مماكلها ونص بطل العصير مبقي من كل ماعون نص مماكله .. والله طلعت منه شغله زينه ..

والا شغلاته كلها عوج ، سمعت صوته يغسل ، ويكح ماتحركت ضليت بمكاني احوص ، من سمعت خطواته على الدرج مشيت لحد الميز كعدت عليه بس مامديت ايدي من اختفه صوت وصار هدوء ،

مديت ايدي كبل اكل جوعانه ميته جوع .. كصيت ربع الرغيف من الجوع والله لغمطت بي طماطه وخليته بحلكي مثل الملهوكه المفجوعه ..

لكته بسرعه ولا توقعت عندي هيج قابلية ، وسرعه بالمضغ ، بعدني اكل بالكمه الاولى كصيت قطعه الخبز ثانيه و ترستها اكل ولفيتها احطها بحلكي عيني على العصير اصب بالكلاص وعين على هيف تباوعلي صافنه مستغربه .. دعست الكمه بحلكي وشربت عصير..

صوت يكلي .. لا لا بالعافيه بس على كيفج ..   بعدني العصير مابلعته طلع من خشمي … هيف فغرت ضحك من بزيت العصير ومن طلع من خشمي ترس الميز والخبز ، نوب لكمه وكفت ، غصيت بيها كحيتها ماتطلع .. وهيف تضحك عبالها دالعبها  ..

اسم الله اسم الله تقرب يضربني على ظهري ، ضربت على صدري واختنكت حتى الهوى انكطع وجهي يريد يطك من ضغط.. وكف وراي يضربني على ظهري ، وكفت لحيلي اريد اتنفس واساعد نفسي ماكو ، وكفت بين بلعومي وبين صدري ، لحد مادخت .. حظني من وره وضغط على بطني حيل مردها الي ، ..

يتبع ……..

نسخه من هيف والله 😅😅😅😅💜