رواية كان صديقي الفصل التاسع عشر 19 - بقلم Shaqraa

ماعندي ألم، حيل خفيف صار بس نزيف. بس دم أحس ينزل. بقيت محتارة وين أروح، شسوي، دورت ع فوني مالكيته، يمكن قيس ماخذه. بلشت أدوخ، لبست عباية وذبيت الشال ع راسي وكعدت، خابرت ع الريسبشن كتله: ساعدني. فدوة زوجي طلع وماعرف وينه. كال: أخابر الإسعاف أحسن. صدك شوي واجت الإسعاف، أني جنت شبه واعية ماعرف شلون صمدت. أخذوني للمستشفى وماعرف لغتهم بس اجه وياي واحد من جماعة الفندق عراقي هو. سوولي فحوصات وتحاليل ودوني سونار.

الطفل بعده عايش بس حالته مو زينة، احتمال ضعيف يبقى. طبعًا تعاملت ويا الدكتورة بالإنكليزي لأن لغتي زينة تفاهمت وياها الحمد لله. أنطتني إبرة وأني متمددة، شوية ودخلي قيس. وجهه أصفر ومثل الضايع يتلفت. اجه بسرعة بدون حتى كلمة شبكني وخله راسي ع صدره. يبوس براسي ويتعذر. بيبي شبيج؟ شتحسين؟ أني السبب موو؟ أني أذيتج وأذيت ابنا. إن شاء الله مابي شي، لا أكيد مابي شي لتخافين.

لا بس صار نزف وأنت مو هنا، خابرت الريسبشن وجابلي إسعاف. أي أني أثول عفتج وطلعت بس ما جنت أعرف نزفتي، عفتج مابيج شي. بعد صارت. رجعني ع المخدة ووكف يمي. شنو كالو؟ تبقين لو نطلع؟ شنو أريح لج أنت؟ ماعرف ما حجو كدامي. لعد أروح أسألها وأجي. راح شوية ورجع كال: شوية ونطلع. كلت لازم أوضحله أني صح ماريده بس ما تخيلته جراح أبد لازم يفهم هالشي. طبعًا هو كاعد ومخلي إيديه ع راسه وعاقد حواجبه ومدنك. حاجيته كتله: قيس أريد أحاجيك.

ها بيبي شبيج؟ موجوعة لو شنو؟ لااا مابيه شي بس ردت أوضحلك ع مساع. أرتاحي هسه بعدين نحجي. لا إذا ما حجي مارتاح. قيس أني من جنت بحضنك بالي وياك وأعرف أني بحضنك ما تخيلتك جراح. سدي سيرة زبالة ولتلفظين اسمه ميستاهل. أوكي ماكول اسمه بس أنت فهمتني غلط. بس أني جنت راغبتك الك. مجبورة أكذب عليك أو أنكر تعرفني شنو أنت. أي أعرفج وواثق بيج. أني من شفته قريب منج بالفندق ما أذيتج لأن أعرف نيتج شنو وأعرفج بريئة.

بس من شفتج مقربة الصورة مالته وتباوعين وتالي لفظتي اسمه وإحنا سوا انجنيت. مروة أنت إلي، ملكي أني وبس. مستعد أخسر نفسي وما أخسرج. ما قصدي أخلي صورته وأعتقد أنت قريت محادثتي وي ياسمين وعرفت شنو موضوع حديثنا. أعرف قريت كلشي. وهو يحاجيني فاتت الممرضة كالت: تكدرون تطلعون. شالت المغذي مني وساعدتني وهو وياها. رجعنا للفندق، أني دخت كلش يمكن من الإبرة ونعست هواي. بس دخلنا نمت ما حسيت بنفسي. كعدت أحس نفسي أحسن.

فتحت عيوني، قيس متمدد يمي ونايم، أباوع للساعة بتسعة بالليل، أففف شكد نمت من العصر. باوعت ملابسي مغيرها قيس ولا يكعد راحة هالبشر هذا. كعدت لأن أريد أسبح بس كمت فز هو. ها روشة وين رايحة؟ أريد أسبح مضايقة أحس نفسي وسخة. لتعبين نفسج أني أسبحج تعالي. كام لزمني من جتفي ويفرك بي. قيس أني أسبح، أكدر ترى لتنسى الأطباء كالو ممنوع تتقرب شهر كامل. أوف شيصبرني يله لعيونج أنتِ وابني أصبر المهم تكومين بالسلامة.

عفته ودخلت سبحت وخلصت أحس ارتاحيت. من طلعت مالكيته بالغرفة. مشطت ولبست شورت كابوي وبدي ينلف ع الركبة أسود. كعدت أجمع أغراضنا لأن باجر نرجع. دخل قيس بيده علاكات شافني ضل يصفر. أويلي ع الكابوي، أخ يابه ما أتحمل، لج شنو هالجاذبية. قيسسسس الأطباء شكالو؟؟؟ ...... بالأطباء حرموني منج. ولو لخاطر ابني لو بنتي أتحمل ميخالف. تعالي عوفي الجنطة جبتلج أكل تحبيه. رحت كعدت أكلت وخلصت وقيس يريد يببض بس يحوس.

بس كمت خلصت أكل اجه وراي. بيبي ماتحمل أني شوفيلي حل. حل إيش يعني؟ ماعندي حل. بس أني عندي حل يلا ترى ماتحمل أنت يمي ومحروم منج. حضني وضل يبوس بيه ويشم. الحضنة والشمة مالت قيس كل مرة نفسها وأكثر لهفة!!! يمكن إذا اكو شي يدل ع حب قيس إلي من صدك هو شمته وحضنته. ضل يتلمس وأني أدفع بي. قيس ميصير شبييك. معليج ماراح أأذيج بس مداعبة بيبي شبيج. المهم ضل يداعب ويسوي حركات إلى أن ارتاح وكعد.

مثل المدمن يضل يدور إلى أن ياخذ الجرعة. هو تمدد وأني كملت أغراضنا كلها. هو اشترى هدايا لأن أني ما طلعت مالي خلك ومابيه وماريد. عزلت هدايا أهلي ع جهة. جايب لهم كلهم حتى الولد ونسوانهم. من ضمن الهدايا جانت مجلة مالت فساتين. استغربت من شفتها لأن ملفوفة بشريط وشكلها مرتب. سألته: قيس المن هاي البردة؟ أخذتها لليلى أختج رادتها. يمتى وصتك؟ أشوو ما حجت كدامي؟ لا أني راسلتها كتلها شنو عاجبكم أنتِ وآية وخالة.

كالت أريدها لأن عاجبني أخيط فساتين وما تتوفر عدنا هيج أشياء للتصميم. أنت راسلتها لعد منين جبت رقمها؟ ها.. عندي من زمان من خطبتج. اها وشلونهم هم زينين؟ أي سلمت عليج هواي ووصتني بيج. الله يسلمها. ......... رجعنا يوم ثاني الصبح تقريب بالعشرة إحنا وصلنا. جانو الكل متجمعين ومسوين حفلة صغيرة. وعزيمة والأهل كلها موجودة. سلمنا وكعدنا شوية وأكلنا. بس أني كوة متحملة لأن رجع ظهري يأذيني كلش. كلت لقيس ظهري، كال: أمشي نصعد.

شافتني أمه كالت: شبيج ضايجة؟ لا خالة بس تعبانة ظهري يوجعني. ياا خاف الشهرية تريد تنزل؟ أي يمكن هي. أي مبارك أول جيتج جبتيها وياج. ما حبلتي. ولو هي اللي ما تحبل من ليلتها مابيها خير. روحي صعدي هم جايين من سفر تعبانين. ههه شبيها هاي المرة متحلفة بيه؟ المهم ماهتميت صعدت لغرفتي لأن وجع خدر ظهري. بدلت ملابسي وتمددت ردت أنام وأرتاح حتى أقرا شوية لأن باجر امتحان. صعد قيس هم تعبان مبين بس بدل اجه تمدد يمي وحضني ضل يحاجيني.

لتهتمين لكلام أمي وإذا غثتج أحجيلي لتسكتين. خلال ما يحجي نمت. فزيت ع الألم قوي كلش لكيت فراشي رطب. أباوع دم هواي. كعدت قيس فز مرعوب كلش. شافني هيج طفر محتار شيسوي. أني أبجي من الألم. طلعلي ملابس لبسني ونزلنا. أهله كاعدين جوا كامو متفاجئين كلهم صار عدها نزيف. رحنا للمستشفى خف الألم شوي أحس مو مثل أول قوي وكعدني من نومي. خلال الفحص كالت الدكتورة: الطفل ميت. أنطتني إبرة حتى ينزل. وإبرة مسكن لهذا بالأول ما حسيت.

تالي من كعدت لكيت قيس يمي بس عيونه حمر وتعبان. لازم إيدي ويبوس بيها كال: الله يعوضنا. لتضوجين حنجيب غيره مو واحد ثنين بس كومي بسلامة. المهم سلامتج. انقهرت كلش صعب هالشعور. وصارت عندي كآبة. أهله ما يدرون لأن من رجعنا كلهم قيس الشهرية اجت قوية ولأن متخربطة هرموناتها هيج مسألة طبيعية. ضليت فترة كئيبة وممرتاحة والامتحانات راحت علية. حتى جوا ما أنزل. أهلي اجولي وأنطيتهم هداياهم. أمي شكد تشكرت من قيس وهو فرحان بيها.

أنطيت ليلى المجلة كتلها: لعد قيس جابها الج مخصوص. واستغربت منين اله رقمج، طلعتو أصدقاء، هي ارتبكت!! للحكاية بقية