تحميل رواية «كان صديقي» PDF
بقلم Shaqraa
جارٍ تجهيز التحميل... برجاء الانتظار
سيظهر زر التحميل خلال 10 ثانية
جارٍ توليد الملف...
التحويل يتم بالكامل داخل متصفحك — لا يُرفع أي شيء للسيرفر.
اختر مجموعة الفصول للتحميل (كل ملف حتى 10 فصول)
عن الرواية
الاسبوع الجاي تنزل القصة، وإن شاء الله تستمتعون بيها. بس من هسه ما أريد غلط على الأبطال، كضوا لساناتكم. وكذلك القصة بيها شرح لمواقف، ضروري أشرح وأوضح، مو يجيلي متصوف لو تجيلي قديسة ويكولون أووه عيب وحركات خضرة الشريفة ما أحبها. فديت اللي يعلقون وما ينتقدون. انتظروني قريبًا....
رواية كان صديقي الفصل الحادي والخمسون 51 - بقلم Shaqraa
فتحت عيوني مستغربة: شنو؟ زوجتك الأولى منو؟ مو أني زوجتك الأولى؟
يحجي بابتسامة ويستفزني: لا أنتِ زوجتي الثولة.
شنو شبيك قيس؟ ترى هواي طوّختها. أنت متزوج قبلي وأني ما جنت اعرف؟
جر المخدة حطها على راسه كال: يزوجتي الثولة، مرة ثانية من تفتشين، اقري الوصل اللي بالعلاقة وتفتهمين.
وغطا راسه ونام.
أني قمت للكنتور ركض، فتحت العلاقة وشفت الوصل. يااا، شفت التاريخ قبل سنة.
يا هذا اللي جابه من أوكرانيا قبل الطلاق، وأني أكول وقتها الوحيدة ما جابلي وحقدت عليه.
بس ارتاح قلبي كلش، يعني اللي وحتى ما انطاه لخطيبته، ولو حاقدة عليه من انطاها الحجل ومقهورة.
رجعت نمت وكعدت ويا الصبح، راح للدوام وأني التهيت بالبيت وي وجد ومر اليوم عادي.
للفجر الباب مالت الغرفة يندك حيل ومهند يصيح باسمي!
فزيت مرعوبة، بسرعة لبست إحرام الصلاة ما لحقت أبدل.
طلعت كتله: سلامات، شصاير؟
كال: عفية علياء عدها ولادة، فدوة امشي ناخذها للمستشفى. عذريني ما كدرت أكعد أمي لأن الحجي تعبان، وما أريد أخوفهم.
كتله: تدلل بس ألبس ملابسي، بس كعد محسن يجي يم وجد أخاف يكعد ما يلكاني وينزل من الدرج ويوكع.
عاد صدك بس راح بدلت بسرعة وطلعت ومحسن إجه يم وجد.
نزلت لكيت علياء كاعدة بالسيارة خطية تبجي، وأصلاً شهرها مخلص صارله يومين وناطيها فرصة.
إذا ما جابت هالاسبوع تولدها عملية.
واسمعها تلغي على مهند: كله منك أنت السببببب وتعيط.
وأني أسكت بيها وهي تكلي: ما تعرفي هو خبيث، لزكلي الليل كله لحد خلاني أولد هسة.
ومهند ما يعرف وين يودي نفسه، وأني خنكتني الضحكة، شنو سالفتهم الرياجيل هههه.
تذكرت سالفة ليلى وزادت ضحكتي.
وهي تكلي: أنتِ أنجبي تتضحكين عليه، على أساس رجلك مقصر طيح طفلك بأول يوم!
صخااام تخبلت علياء رسمي، لزمت حلكها بيدي كتله: انلصمي حتولدين لو تخبلتي!!!
ومهند هذا الثكيل طكها ضحكة.
أني صرت بكد السمسمة من الخجل، خرب يومك علياء على هالسالفة.
لحد ما وصلنا يلا خلصنا من لسانها وفوتوها كالو اكو ولادة عدها.
وبقيت وياها من ٣ ونص الفجر للخمسة ونص يلا ولدت، الله يساعدها.
أني من يمي تعبت ومتت.
ومهند خطية فرحان وطلعونا الطفلة تجنن، هم من الخاصكي، كلت بقلبي الله يساعدك وجد حتكون عندك هيج بت عم.
بعدين كملنا كلشي وطلعناها تقريباً ساعة بالسبعة الصبح وخطية تتعذر مني لأن جفصت.
كتلها: معذورة، هو ألم الولادة ما ينحمل ويخلي الوحدة تمسلت ههه.
رجعنا للبيت وفتحنا محسن الباب. نزلت علياء بالكراج ومهند فوت الطفلة جوه.
الظاهر أمه كاعدة لأن كال: أخذتها أمي.
وسند علياء وياي دخلناها جوه.
أم قيس حاطة الطفلة بحضنها وأبو قيس يمها وتحمدو لعلياء السلامة وفرحانين لأن ما عندهم بس بنية وحدة وجبيرة ومتزوجة بالكويت.
كال مهند: يابه أنت سميها.
كال عمو: نسميها غلا لأن هاي راح تاخذ غلاكم كلكم.
وشوية ودخل علينا قيس راجع من الدوام، وتونس بيها أباوعله فرحان وباسها وشمها.
كتلهم: خلي ترتاح تعبانة خطية والطفلة ما يصير يمها أنفاس هوايه.
طلعنا وسويت ريوك لعلياء وتريكت هي ومهند وصعدت لكيت قيس نايم.
مبين تعبان كلش، سديت الضوا وحضرت ملابس وجد حتى بس يكعد أبدله وأنَزْله.
شوية وكعد وجد بدلتله ونزلنا جوه.
وشاف غلا ومتونس يباوعلها ويكلي: ماما أريدها، عباله لعبة وبقى يبجي يريد يشيلها.
وجده ناصب عليه يكله: مثل أبوك لو لزكت بشي بعد ما تتفاهم.
أمه تباوعلي بطرف عين تكول: يا ريت يلزك بشي يسوا.
سويت نفسي ما سمعت أصلاً.
بعدين أجو أهل علياء أمها وأبوها وخواتها.
والتهيت وياهم وتغدو يمنا.
قيس كعد راح للشغل وما التقينا.
لأن مهند بقى بالبيت.
رادو ياخذون علياء وياهم بس كتلهم: أني يمها خليها ما عليها شي.
وخالتي كلتلهم: هم احنا وياها.
كالت أم قيس: خلو أريج يمنا.
وأريج كيفت لأن حتبقى يم الحب بعد.
خلص اليوم وأني كل ساع أمر لعلياء وأساعدها.
وهي هم نشطة تتحرك عادي ومو كلش متأذية.
رجع قيس بالليل وهو خطية تعبان من رجع الصبح وإنوب راح للشركة.
حضرتله الحمام وترستله البانيو وحطيت بي شاور وطفيت الضوا مالت الحمام.
وأخذت تبلامب مالت وجد صغير نحطه يم راسه.
حطيته بالحمام وصار جو الحمام كلش حلو.
بس فات قيس للغرفة نزع ملابسه.
كتله: الله يساعدك، أحضرلك أكل؟
لا أكلت شبعان بس تعبان أريد أسبح ما سبحت من رجعت الصبح.
إي يلا، حضرتلك الحمام وأني نازلة هسة أجي.
رحت قبله للحمام نزعت بقيت بقطع خفيفة.
وهو فتح الباب ووكف، تالي فات ورد البردة.
دخلت لكيت جاي ينزع باوعلي ابتسم.
اجيتله ودلكت ظهره وهو واكف وبوسته بظهره.
تالي أخذته للبانيو.
و أحممممممممممممممممممممممممممممم، قضيت ويا أحلى لحظات ومتعة لا تقاوم.
بقيت بحضنه بالبانيو وهو مسترخي.
كتله: قيس حبيبي.
كال: همم يا عيون قيس.
تكوم حتى ترتاح بالغرفة أخاف تغفى هنا؟
جرني وصرت كدامه.
لا، أرتاح بالغرفة وأني ما شبعان، تعالي أريد أشبع.
رجع تقربلي مرة ثانية بس ما تعبت ولا اختنكت.
يمكن الاسترخاء بالماي إله دوره.
تالي كملنا وطلعنا سوا ورحنا للفراش. نمت بحضنه وفزيت بـ ٣ جوعانة كلش.
لأن الغدا أكلت قليل وما تعشيت.
جريت نفسي من حضنه فتح عينه كال: وين رايحة بيبي؟
ها حبيبي جوعانة، أقوم أكل.
ههه روحي بس لا تطولين.
بسته بخده ورحت للمطبخ.
أريد أفوت للمطبخ والأضوية طافية يعني باقي ضوا خفيف كلش.
أسمع صوت حركة بالمخزن اللي بالمطبخ!
يبست بدمي بقيت متجمدة أخاف أتحرك.
بس قويت نفسي كلت: أني أم ما يصير أخاف هيجي.
لازم أكدر أتصرف بكل شي يواجهني، يمكن باجر يواجهني وابني وياي ولازم أدافعله.
مشيت على طرف أصابعي وصلت ومديت راسي يبووووووووو.
صخام ذولة شيسوون!!!!
لكيت أريج ومحسن وناسين نفسهم!
يعني ما أعرف شنو أحجيها بس الدشداشة مالتها من فوك مفتوحة وهو مخلي راسه ويبوس وهي أيده لازمته وأيد تدفعه.
يعني مبين ما تريد هالشي بس تريده وما تتحكم بمشاعرها.
رجعت وهم ولا يدرون.
وما كدرت أحرجهم.
بس لازم باجر أرزل محسن على هالسالفة، إذا يريدها يخطبها وينجب بعد ليش هالتصرفات.
نزلت للمطبخ الجوه لكيت عمي كاعد يريد يصلي.
كال: ها بابا خيرج؟
كتله: لا عمو جعت وأريد شي أكله.
لعد ثلاجة الفوك فارغة؟
ها إي يعني بس شفت مساع هنا جبن عجبني.
بالعافية بابا بس شلون الثلاجة الفوك تفرغ!
أني موصي الحجية تدز القائمة وتحسب حساب فوك وجوه، شنو وين كاعدين ثلاجتنا تفرغ.
الله مفضل علينا ونبقى بلا أكل وأنتِ تنزلين جوه وحت
ما تأخذين راحتج.
لا عمو شدعوة ترى بيتي هذا.
طبعاً بيتج بابا بينتنا أنتِ.
راح جوه وأني استحيّت كعدت أكلت لفة وسويتلي حليب.
كملت أكل ودخلت. علياء ما لهم صوت الظاهر غلا نايمة.
صعدت للغرفة صليت وكعدت قيس صلى، عين فاتحها وعين سادها هههه.
كمل صلاة ورجع نام.
كعدت الصبح هو راح على وقت للشركة وأني نزلت. خطية علياء كاعدة وأريج يمها.
كتلها: نامي احنا يمها وإذا بجت ننطيها منه.
بس تريقي ونامي.
وكلت لأريج: تعالي نحضر ريوك.
خالتي جانت يم علياء ومهند نايم.
طلعت أريج وياي للمطبخ.
من فتنا استدرجتها بالكلام.
تالي كتلها: أريج ترى البارحة شفتكم أني.
هي شهكت حيل وغطت وجهها بيدها.
كتلها: أريج الجاي تسوو غلط والغلط بعينه.
ترى حرام وأنتو كبار مو صغار.
يعني يكدر يخطبج محسن، أشوف تخرج وجاي يشتغل وما ناقصه شي.
كالت: صح غلط بس ساعة شيطان وما أعرف نسينا نفسنا.
أريج ترى أني ما جاي أحاسبج لأن أصلاً ما يحقلي وما يصير أتدخل بخصوصياتج.
بس لأن أخت علياء يعني أختي الصغيرة ومحسن أحبه من إخواني.
وما أريد الكم الأذية.
أعرف بيج أني وكلامج كله صح.
بس أني كتله ما أريد زواج إلا أتخرج.
ليش؟ هسة أني مو تزوجت وكملت دراستي.
إي أنتِ تزوجتي وكملتي، بس محسن ما يقبل أكمل.
يكلي: تبطلين من نتزوج.
ويومية معاركني بهالسالفة، بس أني ما أريد أفرط بدراستي وبقت بس سنتين وأتخرج.
معقولة محسن هيج يفكر شعجب؟
يغار محسن كلللش.
ما تشوفيه خانكني باللبس كأني لابسة حوامل.
هههه بعد رجال وحقه.
بس ليش ما تنخطبون وتبقون الزواج ورا التخرج؟
إي هو اقترح هيج بس ما أثق بي أخاف يحطني كدام الأمر الواقع تالي.
لا، خليج قوية وواثقة بنفسج وإذا سواها زعّلي، لحد ما يقبل بالتردي.
لا تنطيه وجه زيادة وتصيرين هبلة ماشي؟
هههه مشكورة حبي. وباستني.
كملت الريوك وأخذت لعلياء وصحت خالتي وعمي يتريكون ومحسن خابرته ما جاوب عفته نايم.
وخالتي كالت: عمي ما يريد بس جاي.
أخذتله الجاي جوه.
كملنا ريوك واجت المرة التنظف وكملت البيت ولحد ورا الغدا راحت.
ومحسن ماكو سألت أريج كالت: يمكن طلع للشغل قيس يحتاجه.
لفت نظري هو أصلاً لازم ما يطلع شعجب طلع.
ومنا عمي أكل لكمتين وكام، وسكره صاعد وماله مزاج.
بس أخذ وجد يمه للغرفة ودخل.
لليل إجه قيس وويا محسن.
صعدت ورا قيس ودلكته شوية وتوكّح.
نمت بحضنه وأحسه نزع قناع الجان لابسه.
قيس بعده يموت علي ويريدني.
ويمكن جان يتصرف بحقد حتى يرد اعتباره.
جنت العب بصدره كتله: حبيبي أسألك شي؟
إي أحبج بس ردت أعاقبج، خبيثة وما كدرت، قلبي ابن زمال ما يتحمل بدونج.
درت عليه ونمت على عكسي وباوعت بوجهه.
شمدريك بسؤالي؟
لأن أعرف شنو شاغل بالج.
وأعرف تحطين إصبعي وتفتحين الفون وتباوعين وتدورين وراي.
وحتى تطبيق الخرائط تفتحيه من الخبال مالتج.
ذبيت نفسي عليه وحضنته حيل.
أوووف أحبك قيس أحببببك.
ولني روحي بيج بيبي.
ما تتوقعين شكد فرحان أني كسبت قلبج، هذا كل مناي.
جنت أتمنى تحبيني من ذاتج.
وشكد حاولت وياج قبل بس فشلت.
بس كلشي يصير النا بي حكمة.
طلاقي الج صح مر وشفت الويل بي، بس رجعج اليه أفضل وتحبيني.
وهو يحجي بسته بشفته وجرني صرت فوكه.
غمزلي كال: يا حلو صاير تتحرش وأني رجال كريم ما أكدر ما أضيفك.
أني حطيت راسي بركبته وخبلته أكثر.
عشنا لحظات تجنن سوا.
تالي كال: أريد أنزل أشوف أبوي تعبان اليوم.
راح سبح ونزل وأني سبحت وطلعت للمطبخ.
شوية وإجه محسن يمي.
كال: عندج شي أريد أحاجيج؟
أباوعله ضايج وجهه كلش.
لا ما عندي، اكعد شنو صاير وجهك ما يبشر بخير؟
يا خير يمعوده يا خير.
أبوي البارحة شايفني أني وأريج بوضع...
رواية كان صديقي الفصل الثاني والخمسون 52 - بقلم Shaqraa
شهقت: شنووو؟ ولك شلون شافكم؟ صخام، زين ما جلطت الرجال. اني نيتي أرزلك بس ما حصلتك اليوم كله.
فتح عيونه محسن متعجب: لعد شدراج انتِ؟
شدراني غير انت فاتح بث مباشر النا بالليل ومامحسب حساب لا عيب ولا حرام.
ضرب ايديه ببعض كال: خرب عمي، طلعت اني البارحة بطل فلم السهرة وما أدري.
ضحكت كتله: هسه عمك شعليه دعوفه بحاله وحير بمشكلتك وفهمني. عمو شلون شافكم وشصار لان الظاهر أريج متدري، لان تتصرف طبيعي.
أي طبعًا أريج غير ربج ستر وجان الوضع بصالحها، همزين أبوي ماشافها بوضع هي قابلة.
لعد شلون شافكم؟
ما أدري شمصعده بالليل حظي بس جان يدور بالفريزر وسدها قوي.
جنا اني وأريج بغير عالم بس من سمعت الصوت دفعتني.
اني ما قبلت أتركها، كتلهه محد، شبيج؟ وهي تدفع بيه واجر بيها والظاهر شايفنا بهالوضع بس احنا ما انتبهنا.
ورا ما عفت أريج وراحت.
طلعت رحت لغرفتي لكيته كاعد، فزيت من شفته.
كام وجان عصبي كلش وتعرفين الحجي من يعصب يكلب شوندر.
هههه، خرب هسه وكت نصبتك، كمل اني من يمي خفت.
بعد شحجي شكلج، اجاني لزكني راشدي فر وجهي، بعدني مجار نفس اجاني الثاني.
وياه تفو وفشار من ذني التمام.
ضل يرزل بيه عباله اني جاي اتحرش بأريج وماذيها وانطاني محاضرة طويلة عريضة.
كال اني اكدر اكتلك كدامها وافشلك بس حسبت حساب البنية ما ردتها تدري اني شفتكم.
وقتها تنحرج وتضوج.
بقى يرزل ويحجي الى أن ختمها: نفوت هالاسبوع ونروح نخطبها.
أيي أحسن قرار هذا، كافي لعب لان هواي تماديتو. بس فعلًا من صالح أريج ماشاف الي اني شفته.
جان دفنكم ثنينكم بالمطبخ.
ههههه ستري علينا خويه لعد اشايفه أنتِ؟
استر ع نفسك ولتعرف شنو شايفه اني.
وانت اعتذر من عمو واستسمحه.
لان تعبان ومتخربط.
اي رحتله بس ما قبل، طردني.
مو هسه، تركه يهدا شوية.
واني خليني اروح اشوف زوجي أحسن ممكابلة الكفار.
ضل يضحك عفته ورحت للغرفة.
فتت لكيت قيس متمدد بالفراش، تمددت يمه وبقينا نسولف.
تالي كال: تكدرين تكومين؟
أي طبعًا، شنو تريد؟
انطيني جزداني ع الميز.
كمت جبتله الجزدان وأخذه مني وكعد ع النص.
طلع الحجل مالتي كال: جيبي رجلج ألبسه الج.
اني صافنة عليه باستغراب ما اعرف شنو اسأله. تالي كتله:
مو أخذته لخطيبتك؟
ضحك كال: بعدج منصوب عليج؟ يابه أهلج ذهب ماكو منهم.
لهسه ساكتين وما كشفوني.
شيكشفون؟ وأهلي شعليهم؟
بيبي انت مضحوك عليج للأسف.
جذب اني ما خطبت. بس طشيت الخبر حتى ذاك الجبنات يتركج.
لان ليلى باستمرار تسألهم هي ومصطفى عم وضعج.
وحجتلي الي صار وعن أخير مشكلة بينج وبينه ومقبل يطلك.
كلت لليلى ومصطفى نشرو خبر خطوبتي.
ووصلو لجراح اني خاطب من زمان وزواجي كلش قريب.
فعلًا ورا فترة طلكج.
واستمريت بالكذبة، هم ردت اعرف شنو إحساسج تجاهي.
لان الأعرفة ما ارتاحيتي وي جراح ولا بادلتي مشاعر.
وهم بكل الأحوال مجان رايدج.
حسب السمعته والي وصل إلي.
انت متحبي وبعدج وفية إلي. وبدليل متعارك وياج ومادحتني كدامه.
هالشي انطاني أمل بسيط.
عرفت انت ردتيني أو بالأحرى تحبيني ومتدرين.
بقيت ألاحظج وألاحظ تصرفاتج من نلتقي. صفناتج عليه وخجلج مني.
رجفتج بيوم الي انجرحت رجلج.
وأكثر وحدة ضحكتني من نمتي ببيت مصطفى ياااابه.
واني جنت مفول. بس فكرت كلت أثكل وأتحمل حتى أتأكد منج.
أووي اسكت من أتذكر هالموقف ودي الزم روحي واكتلني.
هههه اكتلني شلون صايرة.
أكفخ روحي يعني. زين حبيبي فد سؤال يعني. انت منين تعرف هالمعلومات الشخصية عن حياتي قبل؟
ماكو شي ينضم. خصوصًا من الانسان هو نفسه يفضح نفسه.
وذاك جان بوضع الورطة. أخذج وتورط. انت تعرفي يكرهني وجان قصده ياخذج حتى يفوز.
بس هو الخسر لان فشل نفسه.
وشاف تعاملج ويا وبرودج. أثبت لنفسه شكد هو غبي وفاشل.
هسه سدي سيرته وتعالي بحضني.
لبسني الحجل ونمت بحضنه كتله: يعني أهلي كلهم يدرون ونصبتو عليه؟
أيي واصلًا هم أيدوني. كالو احنا نساعدك.
امداني واني اجيت أموت من وراك تالي طلعتو تلعبون عليه بسيطة.
انطيته ظهر وهو يجر بيه ويدغدغ واني أدفع بي.
الى أن صرت بحضنه وغفينا.
يوم ثاني صادف جمعة خطوبة آية.
رحنا اني وقيس ولبست الفستان الجابه قيس المشبك. وماخليته يشوفني لان يتوكح وميخليني اروح بالموعد أكيد يأخرني.
وصلنا وسلمت عليهم وعضيت ليلى حيل خليتها تطفر.
كتلها تنصبون عليه بسيطة.
حسابكم بعدين من ننجمع شلون أهل حاجه بربع يتفقون عليه.
وآية تكلي اني ساعدتج معلية وتضحك.
تعرفت ع أهل زوجها ومبينين ناس ملتزمين وخلوقين كلش.
يعني لسان آية أبد ميرهم وياهم.
تالي دخل خطيبها وفعلًا هيبة ووقار ومرتب. أحلى من وصفها بعد ورزن كلششش.
خلصت الخطوبة وأخذني قيس وصلنا ساعة عشرة ونص تقريبًا.
جانو نايمين كلهم.
دخلت يم علياء لكيتهه كاعدة.
وأريج راجعه لبيتهم جاي أخوها ماخذها.
صعدت للغرفة ووجد نعسان بدلتله ونيمته.
نزعت العباية وقيس جان يبدل.
أشو هذا ضل يصفر.
اجه حرني ويباوع من فوك لجوا.
أوييلي اني كلت هذا ميلوك بس الج. لج شنو هالترافه هاي اني شلون بيه؟
أخذني للسرير وأحمممممممممم.
اني عجبني أبقيله أثر وهو تونس.
الفجر من راد يروح للدوام شافه ضل يضحك.
كال اليوم جماعتي يمزقوني.
اني حضنته من ركبته كتله: تريد بعد؟
أشو هذا ما صدك! ياا شكد طماع انت.
وكوة تركني وراح.
طبعًا لاحظت الشهرية تأخرت هواي فوك الـ 15 يوم.
وما اعرف يمكن حامل أو لا.
لان ما عندي أعراض أبد.
غلست كلت انتظرها.
مرت كم يوم وفعلًا حجو وي علياء تحاجي أهلها بخصوص أريج.
وراحو خطبوها واني كتلها شرطي عليهم بالعقد تكملين.
وقتها محسن موقفه ضعيف.
لان ممتفقين ع خطوبة وصارت بسرعة.
يعني ميكدر يرفض أو يعترض اصلًا مو بصالحه. اذا عرف بي أبوه تصير مشكلة.
وفعلًا شرطت عليه تكمل وماكدر يعترض.
واتفقو من يخلصون أمورهم يتزوجون.
حيل فرحت لمحسن وتمنيت يوم لأكرم.
كل ما أريد أسأله ليش ميتزوج أتردد.
ما اعرف ليش مو خجل بس شي يمنعني.
كلت اسأل قيس لان هو مقرب منه.
من حاجيت قيس وخلال السوالف سألته.
كال: أكرم يحب بنية أرملة.
من ضمن الشركات النتعامل وياها.
التقى بيها هناك وحبها.
وراد يخطبها بس أهلها ميقبلون تتزوج.
وليش ميقبلون؟
لان زوجها المتوفي ابن عمها. ويريد يزوجوها لأخو وهي متريد.
وميقبلون يزوجوها لو ابن عمها لو ماكو زواج.
وأكرم كلش متدمر من هالموضوع.
خطيه تحبه ويحبها.
يا يمه سودة علية أخوي هيجي متأذي وضام بقلبه.
وأبد ميحجي يمنا حتى واحد يشيل همه لو يساعده.
لا حاجي كدام ليلى تدري.
ياا هو أكو شي متدري بي ليلى ماشاء الله المختار مو ليلى.
هههه لا بيبي بس انت تعبانة ومايكدر يحجي كدامج تنقهرين.
شبيه تعبانة مو مثل الغزال كدامك مابية شي.
فدوة اروح للغزال اني أشو تعالي يا غزال.
ههه لا عيني ما أريد نعوسه كلش.
ميخالف اني قصدي شريف بس أنيمج.
جرني لحضنه وأحمممم.
فكرت أحاجي ليلى حتى نشوف وضع أكرم وبلكي نكدر نساعده.
خطيه اذا يحبها ويريدها نحاول بلكى نلكى حل.
خابرت ليلى واتفقنا نتجمع ببيتنا وكال قيس يوديني.
اجه قيس وكالعادة سولفنا وتشاقينا.
وتقربلي بس هالمرة تعبت.
حسيت كوة اجر النفس.
هو وجهه انخطف واحتار شيسوي.
بس يفرك بجهة قلبي وبايدي اليسرى الي ثارت خشبة.
تالي كال كومي للمستشفى.
أخاف تنتكسين ما نجازف مروة كومي.
فتت سبحت بسرعة وكوة اجر النفس وهو هم سبح ونزلنا.
جان وجد يم أجداده قيس انطاهم خبر وطلعنا.
من وصلت سوولي فحوصات ورادو أسوي تخطيط قلب.
كال قيس نروح لأخصائي أحسن. مدام يحتاجون تخطيط.
نسوي التخطيط ونطلع.
طلعت الأوراق وجابها قيس واجه وجهه مخطوف وعيونه ذابلة.
كمتله: ها قيس؟
رواية كان صديقي الفصل الثالث والخمسون 53 - بقلم Shaqraa
الجزء الأخير
قيس: ضابط بحري وحالتي مرتاحة. عرفت بنات أشكال وأصناف. صادقت وسويت علاقات، وكنت أتوهم هذا حب. بس من شفت مروة اكتشفت إني شكد فارغ. يعني اللي عرفتهم هم بنات وهاي بنية؟ سبحان الله طولها ومشيتها تفزز قلبي. من أول مرة شفتها حسيت هالبنية إلي. وسألت عنها ومشيت وراها خطوة خطوة. وعرف بيه جراح وأخذها مني. حسيت مثل طفل اللي أخذوا منه أمه. هيج أني تعلقت بيها ورغم صدها إلي. بس الصدمني جراح مصارحها وهي قابلة. بالأول قلت أدافع عن حبي، بس اللي خلاني أتراجع مروة وحبها لجراح. معناها ما راح تحبني وأصلاً تكرهني هي من أول. قلت يمكن أنساها والله يسعدهم. بس اللي سواه جراح خلاني أعيد حساباتي وآخذها من أيده لو كلفني الثمن حياتي.
جراح من صدمته بحبه الأول صار ما يثق بأي بنية. لو تنطيه لعبة بلاستيك هم يشك بيها ويقول تخون. وهالشي طبّقه على مروة. ورا ما خطبها وكتله أني أختبرها إلك قبل بسهولة. هذا الشيء جان مثل الضوء الأخضر اللي انطاه إلي جراح حتى أعرفه صدك رايدها لو جذب. وبعد الصار ورغم هو دز أهله خطبوها بس تغيرت نيته. صار هو يريد يختبر مروة، يعني يطلب يلتقون بمكان، يطلب أمور تكشف معدن البنية. عرفته مو محب إلها، واللي كمل هالشي، جان يتباهى بين الضباط:
"اليوم طلعت وي حبيبتي وأخذتها لفندق". "لو طلعنا بالسيارة وسوتلي هيج شي".
ومن يكلوله:
"شلون تقبل تسوي هالشي؟"
يكلهم:
"أني صاكرها ما تكدر تعترض".
هذا كله وضحلي جراح بايع مروة.
شنيت الحرب عليه لحد ما أخذتها. واتبعت أساليب ملتوية ونذلة صح. بس أحبها وما أريدها تروح لغيري وبالأخص جراح. اللي جان واهمها أني أخذتها منه وغدرته. تعلقت بمروة إلى حد فظيع. أدمنتها هالكلمة قليلة بوصف وضعي. ما أريد أقول أحبها لأن اللي يحب ممكن يكره، ممكن يحقد، ممكن يتخلى. بس أني اللي أعيشه هيام أو ولع. حبيتها بكل صفاتها. واللي حببني بيها أكثر شريفة وما انطت نفسها رغم محاولات جراح وياها. وما جذبت عليه بشي أبد. وحدة غيرها تتصنع المشاعر حتى تعيش وتكمل حياتها. هي رفضت هالشي ونهت حياتها وياي. بس ما تصنعت شي مو بيها. ودائماً قنوعة وعينها مليانة، مو طماعة ومشايفة. اكتشفت هالشي من جانت تطبع الوصولات والوثائق وبيها مبالغ ثكيلة وتغري. ما يوم حسيت هالامور أثرن بيها. وحتى من طلكتها تمنيتها ترتاح وأرجعها. بلكي تعيد حساباتها. وبلكي البعد يفهمها حبي إلها. بس للأسف ارتبطت بجراح. اللي من سمع بيها تطلكت رجع للبلد. ورا ما رميته وراح يتعالج. خلت بقلبي غصة. ضليت أشرب على طول. شغلي هملته وخلصتها إجازة، ولو ما مسنود جان انفصلت. الشركة عفتها. أهلي نسيتهم أصلاً. يعني مروة دمرتني. واللي زاد عليه بعد وجد عني، بس مرضها خبلني وقلت لو يكلفني حياتي أقبل المهم صحتها. وخليته يمها وجان من يجي منها أحضنه وأبجي مثل النسوان. بس بعدين مشاكل مروة وكلام جراح اليوصلني خلاني أرجع بأمل مروة ترجعلي. جان يشكي منها ويكول باردة وبعدها تحن لقيس وهو تورط. من سمعت صح حقدت عليه شلون يحجي خصوصياته وياها. بس ارتاحيت. ومن خبرتني ليلى بخصوص طلاقها ونشرت الإشاعة فعلاً طلكها. واستمرت بالكذبة ردت أعرف غلاتي عندها. وآخ منها. متغيرة وصايرة تعبر عن مشاعرها إلي. وهالشي جنني أكثر وأكثر. جنت مصدوم وممصّدك. عجبني هالشي منها بس ما خليتها تحس. ردت أتأكد هالشي صح لو أني أتوهم. بس عرفت من بعد طول الرحلة مروة حبتني. والمشكلة اللي صارت بالشغل فتحت المجال كدامي حتى أرجعها. والحمد لله كسبت حب عمري وأم أولادي اللي ربي رزقني منها وجد ومجد. أما جراح، كان صديقي واليوم عدوي.
مروة:
قمت له.
"شبيك حبيبي وجهك مو على بعضه؟"
جر إيدي باسها. قال:
"مبروك يا روحي أنت حامل".
أني ضحكت. قلت له:
"فرحانة حيجيب لوجد أخو أو أخت. بس أنت ليش ضايج؟"
"ما ضايج بس أفكر شلون تولدين وأنت عندك خفقان. الحمل والولادة متعبة إلج، وشكد ما متمني هالطفل بس ضجت من عرفت".
"أوووه قيس ليش تخرب فرحتنا. أني وياك قلبي قوي وما أموت لتخاف على قلبك اقعد".
"ههههه هو أنت كاعد بنص قلبي ومتربعة وحتى ورجليج طويلة وطالعات برا".
"هههههه فديت دمك يا عمري".
هو يباوعلي ويغمز. أخذني للدكتور. قال الحمل بي نسبة خطورة بس مو موت. يعني يراد له مراعاة وماكو ضغط مطلقاً. ولا قهر ولا بجي زايد. حاجيت قيس وحاولت أطمنه لأن الخوف بعيونه واضح كلش. بشرناهم من رجعنا وعمو كلش تونس وخالتي ما باركتلي.
قيس كلها:
"حجية على الأقل باركي كولي الله يكوج بالسلامة. معقولة لهالدرجة كارهتها؟"
قالت:
"لا أني ما أكرهها بس هي ملسونة وترادد ودومها تحجي عليه".
كلها عمي:
"مروة من دخلت لليوم ما شفت صوتها على عليج ولا غثتج. والسويتيه بيها لو وحدة غيرها جان صارت فصول. بس البنية متربية وعاقلة".
الظاهر عمو يعرف بسوالفها.
رحت لبيتنا أني وقيس. واجت ليلى ومصطفى. وحاجينا أكرم وقلنا له نروح نخطبها إلك وإذا رفضها ندز ناس خيرة. ومصطفى وقيس قالوا نجيب ناس كبار وقيس قال ناخذ أبوي. ومصطفى كذلك. وإذا ما قبلوا نخطبها من شيخ العشيرة مالتهم. اتفقوا أمي وليلى يروحون لأهل البنية اسمها مها. راحوا وقالت أمها نسأل الزلم ونشوف. ورا أسبوع يلا ردوا ومموافقين. قرروا الولد ياخذون مشية زلم الهم. وخطيب آية من سمع هم قال أجي. راحوا تقريباً عشرين واحد. رتب وشيخ وسيد وناس واصلة. قالوا ابن عمها يريدها وهو أولى من الغريب.
"كلوله البنية قابلة لو لا؟"
"أي البنية أكيد تقبل بابن عمها سترها وغطاها".
أنطوهم محاضرة على الزواج الغصب ويعتبر حرام هالشي لأن الشرط القبول بالزواج. من بعد كلام الخيرين، الناس وافقوا. بس شرطهم تتزوج بلا عرس. مجرد عقد وياخذوها. لأن هي أرملة وسبق وعرست قبل شتكول الناس عليها. كل يوم تعرس.
وزوجها مو غريب، هذا ابن عمها، وحزنهم عليه مينتهي، ومن هالكلام الماله كل صحة وكله نفاق.
ورا فترة قليلة أكرم حضر كل شي وجهز وعقد عليها وجابها للبيت. وبلا علم أهلها لبست بدلة وسوينالهم حفلة بيناتنا وأخذوا صور. فرحت كلش من شافتنا مسوين حفلة وكيكة مرتبة وحنة هم بيها. البنية مبينة هادئة ومتواضعة، هي مهندسة وتشتغل بشركة بس أكرم كلها تبطلين. وهي هم ضايجة من الشغل الظاهر كانت مغصوبة عليه.
خلال هالفترة الحمد لله وضعي زين ما أتعب كلش. لأن وجد أغلب الوقت يم أجداده متخبلين على سوالفه لأن لوتي عكس ما كان هادئ عند أهلي وفقير. يم أجداده خبلهم بسوالفه. ولسانه طويل. وما يكلي ماما، يكلي مروة. بيبته تكله كلي ماما وهم يصيحها باسمها من يسمع عمي يصيحها.
آية من بعد ما تطمنت على أمي ومها مبين عليها زينة ومدارية أمي. كملت كل شي حتى تتزوج لأن خطيبها أصلاً مستعجل. سوينا لها حنة مرتبة وتونسنا وياها وتوسلت بقيس أبات وهم لطش ما يقبل. يكول أبات يمّج ما أروح وكوة زحزحته.
يوم الثاني صار العرس ومتحضرين. لبست فستان أبيض مخصر وبأطرافه نقشة أسود. وياه حذاء كعبه وسط أسود وشال أبيض وأسود مقسوم. حضرنا العرس وحذرني قيس ما أركص ههه بس ركصت شوية. تالي خلصوا وطلعنا للزفة ووجد بإيدي وقيس خابرني كال:
"جاي أدور عليج."
كتله:
"أني واقفة ورا سيارة العرس."
"أي ماشي أني جاي."
واقفة أباوع من ورا السيارة على قيس وكانت خبصة لأن بعد ناس كلها تطلع. ما أحس إلا رجعت سيارة العرس علينا أني ووجد. عطت حيل ودفعت وجد. ضربني ولزم بريك بسرعة كلش بحيث الصوت صار كلش يخوف. وكفت السيارة وكلها التمت وصار عياط. ووجد فوقي يبجي. أني اختنقت كلش.
نزل علاء ويحاجيني خطية انهبط وهو عريس بسببي أني ما انتبهت. من بين الزحمة فاتت ليلى وخطية كانت حامل وتعبانة أجت مرعوبة. وكلتله:
"روح طمن آية انهبطت. مروة ما بيها شي روح لا تتأخرون."
بس أني رجلي تأذيني من الضربة واختنقت.
وعلاء ما قبل كال:
"ناخذج مستشفى."
أجه قيس ووجهه ينطي ألوان ويرجف. علاء يتعذر ومقهور، كله قيس:
"ندري مستعجل مو تمرد مرتي."
ومن كل عقله معصب. ويدور بيه ويسأل:
"شلونج؟ شتحسين؟ خو اختنقتي؟ الطفل شلون؟"
علاء ضحك كله:
"أبو وجد حلال عليك حرام علينا."
عاد قيس فك شوية من كتله:
"زينة بس اختنقت شوية ورجلي توجعني."
وحاجى علاء كله:
"روح فكنا ما مصدق يعرس."
وتسالموا وتعذر منه علاء وراح. راد ياخذني للمستشفى كتله:
"ما تسوى."
دق فونه آية تخابر خطية كال:
"طمنيها."
حاجيتها وطمنتها وهي تبجي. كتلتها:
"كافي مخبلة ما أموت بزون أني."
ضحكت شوي وطمنتها وسديته. رجعنا للبيت وأمي تخابر خطية وأكرم ومرته كل ساع واحد. كتلتهم:
"ما بيه شي."
بقيت شوي رجلي ما أكدر أمشي عدل لأن تأذيني الظاهر انرضت. بس الحمد لله وجد ما بيه شي.
علاء اتصل ويتطمن ويتعذر. كله قيس:
"دير بالك على مرتك وعوفنا بحالنا."
ويضحك وياه. مرت الأيام والحمد لله تحسنت رجلي. بس الحمل متعبني. لأن المشيمة انفطرت ولازم أنام ما أتحرك. وعلاجات وإبر جاي آخذ.
كانت دنيا ظهر وخابرتني أريج. ورا ما انخطبوا علاقتي كلش قوت بيها. لأن اكو أمور تستحي تحجيها لأختها علياء لهذا تحجيلي. فكالت:
"أريد منج خدمة."
كتلتها:
"يا ساتر أكيد وراج مصيبة من صوتج الناصي."
كالت:
"ولج خايفة أريد اختبار وما أكدر أشتري."
"عزا العزاج اختبار شنو ولج أنت وهذا المفلفل شلون بيكم؟"
"عفية عفية مروة ساعديني ولج ما سوينا شي بس أني شاكة."
"ما سويتو؟ لعد المن شاكة بلا؟"
"لا قصدي يعني سوينا."
"أكول أريج انطمي وتعالي خلي محسن يجيبج خل أفهم منج. وأني أوصي قيس يجيب اختبار وأنطيج."
خابرت قيس كان بيومها بالشركة زين مو دوام. كتله:
"جيب اختبار شكله محسن مصخمها."
ظل يضحك. كتله:
"أنتو كلكم هيج عدكم فولتية زايدة؟"
"هههه أنتو حلوات واحنا ما نتحمل."
"أنتو فلفل احنا شعلينه تدري أني شاكة بيكم صرتو بالخطوبة لأن عمو مبين حامي."
"هههههههه أم لسان إذا تسمعج أمي تمخلخ."
"أي صدق هههه."
"يلا بيبي أني قبل المغرب أجي ما أطول."
"هلا بيك حبيبي."
سديته وانتظرت شوية وجابها محسن. كانوا نايمين محد موجود. أخذتها وصعدنا لغرفتي. وجد نايم وهدوء. كتلتها:
"احجيلي شنو هالاستهتار ما تخافين يموت يروح تبقين بورطة مالها حل؟"
"يا اسم الله ولج بس ما أدري أني يصير هيج حمل ما متوقعة."
"ماشي فهمينا شلون؟"
"باعي هو أني بعدني بنية ما أخذني. بس مداعبة ووو بس."
"أي ما أخذج بس اكو شي نزل على جسمج؟"
"أي أي صح."
"أي يا رعنة هيج يصير حمل يا ثولة. شكد صارلها الشهرية ماكو؟"
"اليوم صار سبعين يوم."
"يبوووو وساكتة ومنطمة شمنتظرة؟ تاخذين سونار يعني! لا حتى فد مرة يركص بعرسكم."
"عفية مروة مو ذنبي ترى."
"ولج من شفتج تصيحين مو ذنبي أكبر لوتية وماكو بوقاحتج. وذاك الـ... أخ منك يلساني عود أني حذرته. باعي هو أنت هسه مليون بالمية حامل. بس إذا سويتي اختبار وتأكدتي هالاسبوع تتزوجون فاهمة؟"
"يااا مروة خل أخلص امتحاااان."
"انجيبي تخلصين امتحان يوم الثلاثاء أنتو الجمعة عرسوا. استري على نفسج وادعي ربج يعديها على خير. صح أنت حلاله وعاقدين سيد ومحكمة وماكو حرام بالموضوع. بس صار ما صار حيعتبروج مو زينة ويمكن تفقدين حياتج. هذا من غير ذنب البطنج حتشيليه. فكري بعقلج وإن شاء الله يعديها سلامات. لأن حملج حسب المدة جبير وما ينسكت عليه."
بقت يمي إلى أن أجه قيس وأنطيتها الاختبار سوته وفعلاً حامل. كتلتها:
"أني أحاجي محسن بكل شي. وأنت من اليوم تجهزين أمورج. ومحسن خليه يمي."
صحت محسن للغرفة وكان قيس موجود. كعدته وحاجيته. كتله:
"استعجلوا مرتك يمكن عليها 3 أشهر وما تعرف شنو الوضع. تتقبلها أنت لو صار بيك شي تتأذى بسببك وابنك الجاي بالطريق هم الله عالم شنو مصيره؟"
طبعاً قيس صافن عليه ما حكى. رزلت محسن بس بنزاكة وحاجيته كال:
"لا من اليوم أروح أدور قاعة وأحجز وأكمل كل شي. قدامي تسع أيام أدبر أموري بيها."
وتشكر مني هواي وطلع.
من طلع قيس حاجاني:
"مروة أسألك شي؟"
"كول حبيبي."
"أريد أعرف من أخذتج بالخطوبة شنو كان شعورج وما خفتي أتركج؟"
"بصراحة شعوري كان لا يوصف. كل الأحسه بي وقتها انكساااار... حقد... كره... اشمئزاز. بس تتركني لا أبد ما فكرت بيها لأن أعرف ما تتركني. أني صح كنت ما أريدك بس أعرفك تحبني. واثقة من هالشي كلللللششش. تعرف كد ما واثقة بيك كنت متوقعة ما تفرقني عن وجد أبد. لأن تعرف ما أكدر بدونه."
"أي بس خنت ثقتج وقتها."
"لا كلش يكفي جبته بيدك للمستشفى. وعود تريد تبوسه وتشمشم عبالك ما أعرف."
"هههههههه ياابه شلون أيام كلها حزن وضيم."
"تعرفين بيبي فد مرة من أجيتج ورا الطلاق. ووجد يدور بصدرج يريد يرضع. وجر العباية يااابه... ردت أكوم أبوس..."
"ياا شتبوس؟"
"أبوس وجد لأن جر العباية ليش قصدج دائماً مو راحة؟"
"ههههه دخيلك بركاتك يا قديس. محد حرفني غيرك."
"بمناسبة الانحراف رحمي بحالي ترى رجال تعبان ومسكين."
"هههه وابنك مدري بنتك ما يقبل أني شعليه."
"دتعالي أني محد يحرمني منج لا ابني ولا بنتي."
جرني بحضنه ويبوس بلهفة. لهفة قيس عليه وشمته إلي. تزيد حبه بقلبي أكثر وأكثر. بقينا سوا لحد ما ارتاح. صح ما أكدر أنطي حقه بس لازم ما أخليه بحاجة. لأن أني مرته وهذا واجبي زوجي ما يحتاج. وكل مرة هيج إلى أن تحسّن وضعي وصرت زينة.
فززني من صفنتي صوت الفون أباوع قيس يدق.
"ها حبيبي؟"
"ها مرو أكلج مصطفى يمكم؟"
"لا قبل شوية طلع."
"ماشي عبالي يمكم كلت تنطيه الفون لأن ما جاي أحصله."
"هسه أكول لليلى تتصل بي."
"ماشي بيبي... باي."
كمت يم البنات وبطني مأذيتني كلش ثقيلة صايرة ومورمة. مكملين الزينة وكل شي. ليلى ابنها عمره أسبوعين وسوت الطهور ببيتنا لأن أمي رادت هالشي. وكلنا متجمعين آية وعلاء زوجها وأني وقيس ووجد بعدين يرجعون. لأن بايتة يم أهلي وعمي مشتاق لوجد ما يقدر يوم بدونه أبو لسان. وأخذه الهم قيس. مها مرت أكرم ومرت هشام هم موجودة.
كملوا البنات كل شي ورا فترة أجه مصطفى ويا قيس ووجد. وعلاء زوج آية هو يطهر ابن ليلى سمته إياد. حضرنا الشمع وكل الأشياء بالصالة وعلاء طهر إياد بالغرفة وليلى خطية مهبوطة عليه حقها ابنها. تالي جابوا وطفوا الشمع وهلهلوا البنات. الأجواء تخبل وكلنا ملمومين وأمي حيل فرحانة بمناسبتها. وهم يموتون عليها وكلهم يسموها يمه. لأن أمي مو مثل بعض الأمهات اللي توز وتحشي براس بناتها. بالعكس دوم تنصحنا بالزين.
رجعت للبيت وحددتلي الدكتورة موعد العملية. بس قيس خايف أحسه وما يريد يهبطني. دائماً من أنام وهو يبقى كاعد وأفز مرات ألكاه لو صافن لو يبكي. بس ما أحسسه شفته. ولا خايفة لأن عندي إحساس ما راح أموت. وإحساسي أثق بي.
أجه يوم عمليتي ودخلت. من بعد عناء وتعب واختناق. وقيس كان منهار وأمي أكثر منه. شرف مجد للدنيا. ضعيف أبيض بياض رهيب. عيونه سود وحيل يشبهني من كنت صغيرة حسب قول أمي. أول أيام عانيت هواي. بس الحمد لله شوي شوي تحسنت. حالياً مجد عمره 3 أشهر. محسن صار عنده ولد. ولدت أريج وراي بيومين. وهسه حامل على الأربعين. محسن وأريج اثنينهم نفس الخبال وشي كلها تكله أي. عمي متونس بالأطفال وأشوفه كلش فرحان. صار البيت بي حس ودوم حركة لأن علياء أطفال اثنين وأني اثنين وأريج واحد. والبيت انملى حياة الحمد لله.
بالنسبة للقضية مالتي الحجي انسجن وما أعرف حالياً طلع لو لا. لأن قيس يتخبل من سيرته ما يقبل أحجي بي. وكعدوا عشاير وصار فصل. أما جراح الأعرفه صار عنده بنات اثنين توأم وابنه خطية صحته تعبانة. ويريد يسووا له عملية وربي يشافي لأن طفل ماله ذنب أبد. ما شفته بعد ولا أعرف عنه إلا الشي القليل من ليلى تسمع من مصطفى. هشام عايش وي مرته وبناته بس دوم تشكي منه تكول ما ينطي مصرف ويصاحب بنات. وهو يحجي عليها وما ندري شنو القضية. مرت أكرم وردة وفقيرة ومطيعة بشكل. وأمي حيل مرتاحة وياها.
وأني عايشة وي قيس هو سعادتي ومايسترو راحتي وأبو أولادي. الحمد لله. دائماً وأبداً. وإن مع العسر يسراً.
تمت الخميس... الساعة العاشرة وخمس وخمسون دقيقة مساءً.
29-3-2018
رواية كان صديقي الفصل الرابع والخمسون 54 - بقلم Shaqraa
صباح الخير أصدقائي الأعزاء.
حبيت أسولف وياكم بخصوص موضوع مروة.
الصراحة مروة أكثر قصة لاقت سب وفشار وقذف واتهام.
هذا من غير التعليقات اللي أحظى بيها وأحذفها، هاي اللي تقول مروة... كلمة بذيئة ومقززة، وأخرى تقول ساقطة ومبينة عدها علاقات وشبعانة لهذا باردة!
وحدة تقول ملعبة... وهواي كلام.
عوفوا العتب أحلفكم بالله.
أنتِ بنية وعندك علاقة بولد وحبيتي، وتعرفين بصديقة حاطة عينها عليكِ.
وتالي هالصديق يفرقكم ويتزوجكِ غصبًا عليكِ.
ويأخذكِ بالخطوبة وتصيرين حامل حتى ماكو مفر وتخلصين منه.
راح تحبيه بسهولة؟ تسامحيه وخلاص؟
حطوا نفسكم مكانها واحكموا، ترى القصة وصلت لكم كاملة مو مثل ما هي عايشة بيها ومتأثرة.
وأنا وصفت لكم جراح شلون كان وياها، وحتى قصته كتبتها حسب ما هو حكاها إلها.
تعرفون ليش؟
لأن ردتكم تصيرون مكان مروة، وفعلاً حبيتو بالاول.
بس بعدين انكشف لكم.
وحبيتوا قيس لأن أنتو طرف محايد مو صاحب المشكلة.
صح كل السواه قيس لصالحها وحبًا بيها.
بس ما ننكر اتبع طرق ملتوية وتعبانة.
وهم غلط واستحق العقاب.
ما أنكر مروة غبية وما تعرف تتصرف، هذا بسبب عنادها وعنفوانها.
تريد تبقى قوية كدام الناس وما حد يهزها، وهالشي ع حساب حياتها ومصيرها.
هواي غلطت بسبب تسرعها وعنادها، بس مروة شريفة وصادقة مثل ما قال قيس بالضبط، هذا كلامه.
وطبعًا هي دزت لكم سلام، وبصراحة انقهرت من بعض الكلام.
بس ع العموم هي قصة ولازم تتحمل نقد.
وأشوفكم إن شاء الله بعد فترة استراحة.
نلتقي بقصة شتاء.
أختكم شقراء.
رواية كان صديقي الفصل الخامس والخمسون 55 - بقلم Shaqraa
عزيزتي القارئة، النص الذي قدمته هو مقدمة للكاتبة وليس جزءًا من الفصل الروائي. بناءً على التعليمات الصارمة التي قدمتها، يجب ألا أقوم بمعالجة أي محتوى خارج نص الفصل نفسه.
ولأن النص الذي قدمته لا يحتوي على أي جزء من الفصل الروائي، ولا يحتوي على حوار أو سرد قصصي، وبما أن جميع محتوياته تندرج تحت "محتوى خارج نص الفصل" (مقدمة الكاتبة، عبارات المتابعة، والحديث عن النشر)، فلا يمكنني معالجته وفقًا لقواعدك.
إذا كان لديك نص الفصل نفسه، فيرجى تقديمه وسأقوم بمعالجته بكل دقة.