رواية قضبان الجنوب ( فصلية ) الفصل الرابع 4 - بقلم Hend_AlBoor

و ما ذنب القلب ...!؟
الذي ذاب فيكِ عشقا
حتى نسيَ أن يبوح بعشقهِ
ـــــــــــــــــــــــــــــــ
حياة : رفعت راسي عليه .. شفت عيونه غركانات .. بالموت لازم دموعه كبالي .. حسيت من نبره صوته اكو عبرة

شنو ..

صفوان : اجتي ع لساني اكوللها احبج من رفعت عينها بعيوني .. بس بعد الكلمة ماتت .. شنو فايدتها و هي رافضتني ..

حياة : عكد حواجبه .. معالم وجهه تتغير بالثانية. . كله حتى يخفي انكسار بداخله او شعور .. بقى ساكت ..

نكسر خاطري عليه بس شنو ذنبي .. اني منطيته امل او شي ..

اعتذر استاذ .. اني ع ابواب ارتباط لهذا السبب رفضت

صفوان : من كالت هيج .. كتلت كولشي بية .. راحت لغيري ..

اتاخرت ..!

حياة : لا .. بس هي قسمة .. و انت خوش ولد اكيد تستاهل الاحسـ...

داكمل كلام عافني و مشى .. فشلني والله

صفوان : متحملت حرف بعد .. مشيت و داخلي متملخ .. كولشي بية مهدوم .. كمت امشي و من كبريائي حسيت راح اهدم الكاع جوايا .. مايلتمن الجرح و الكبرياء الا ما يدمرن صاحبهن ..

ذنبي .. اي اتاخرت .. الذنب ذنبي .. غيري سبقني الها .. غيري اتنازل عن كبريائه في سبيل يحصل عليها .. هذا كبريائي .. هاي النتيجة .. خسرت كدامه

ريمان : شبيج؟

حياة : مادري ..

ريمان : شكالج ..؟ شكلتيله ..؟

حياة : كسر گلبي .. رغم اني مالي ذنب .. مانطيته امل و خنت .. هيج فجاءة ظهر ريمان .. فجاءة بدون ماعرفه قبل او احس بالجان يحس بي تجاهي ..

الي ذنب ...؟؟؟

ريمان : لا اكيد گلبي .. هو ارزاق لتلومين حالج ..

حياة : يمكن واستني ريمان .. بس ردة فعل صفوان و القهر الـ شفته بوجهه و الغضب .. ترك اثر بية .. انقهرت عليه رغم اني ماعندي اي شعور تجاهه ..

بس يبقى انسان و انجرح ..

خلص الدوام .. طلعت انتظر دانيال .. اتاخر علية .. وكفت سيارة ..؟

معاذ : من صارحتها لليوم سحبت روحي و بقيت اراقبها من بعيد .. مردت اضايقها .. گلبي تطمن

كطعت علاقتي بكل بنية جنت احجي وياها .. حتى بالكلية صرت حدي وية البنات .. اخذت الجوهرة بعد شسوي بالباقيات

جاي اروح للبيت بسيارتي .. شفتها واكفه تنتظر ع الشارع .. وكفت و نزلت الجامه

اصعدي ..

حياة : شفته معاذ .. انصدمت ..

لا شكرا .. انتظر اخوية

معاذ : اصعدي بين ميجي .. خما تبقين بالشارع ..

حياة : تسلم هسه دقايق و يجي ..

معاذ : و تالي وية العناد ..؟

حياة : بقيت ساكته .. دمي نشف ..

معاذ : راح انزل اسحبج من ايدج و اصعدج ها

حياة : من كال هيج رجعت خطوتين ليورا .. من صدوك خفت منه

معاذ : ههههه فدوة للخوافه .. راح اركن صفح انتظر لما يجي اخوج .. ماريد اعوفج وحدج .. اخاف عليج

حياة : دنگت و ابتسمت .. لان حسيته يخاف علية .. مادري .. احساس ماكدر اوصفه بس يكفي طيرلي گلبي

دقايق و اجا داني .. صعدت وياه .. مرينه من يم معاذ .. انتبهتله يباوع و مبتسم ..

مادري ليش هلكد احبه ..؟

دانيال : ها صافنه حيوت

حياة : لا بس اشوي تعبانه ..

دانيال : سلامتج عيوني

حياة : الله يسلمك ..

معاذ : وصلت للبيت لكيت امي و ابوي جايين .. انا بلغت امي بسالفه حياة

هلا بالحبايب ..

ام معاذ : هلا بوليدي ..

ابو معاذ : شني هالموضوع الـ امك كالته الي ..؟

معاذ : اي يابة .. انا لكيت بنت الحلال

ام معاذ : يمة و زينة ..

معاذ : يمة انا خما ابقى ع حجي صارله دهر .. انا ماختاريت

ام معاذ : بس عيب من جدك .. شيكول طاف بنتنا و اخذ غريبة

معاذ : هاذ جهاد هم اخذ غريبه .. و محد مات يمة..!

ابو معاذ : ام معاذ خلي الولد ع راحته .. صار زلمة

ام معاذ : ليش انا اكدر اغصبه و وراه ابو .. انا اطول اصلا

ابو معاذ :  لا لا انا اخبرج عاگله ماتسويها

ام معاذ : اويلي راح تبالشوني وية ابوي ..

معاذ : الشيخ زوج ابنه ع حب .. مايتحكم بحياتي يمة

ام معاذ : كافي ابو لسانين .. نخطبها الك و اسكت ..

حياة : وصلت للبيت اريد بس انام .. مادري دايخه من الدوام .. مادري اريد انفرد بروحي و امتلك معاذ و تقربه الي لوحدي امتلكه ..

ام حياة : هلا يمة الله يساعدكم دقايق و اجهزلكم الاكل

حياة : الله يساعدج يمه .. لعد خلي ابدل و انزل اعاونج انتظري

دانيال : شنو ابوية موجود ..؟

ام حياة : لا يوو نسيت طلعت كال شغله ساعه و ارجع

دصعدوا ارتاحوا بين ما يجي ابوكم

حياة : تمام يمة ..

صعدت بدلت و سبحت و طبيت اتمددت بالغرفه .. يمة من التعب بعد مابية

هففف اشوكت اتخرج .. هلكت

ام حياة : صعدت لغرفة حيوته .. دكيت الباب و طبيت

حياة : يمة .. هلا بيج

ام حياة : شلونها صغيرتي

حياة : الحمدلله ..

كعدت يمي ع الجرباية .. تباوعلي و مبتسمة .. لزمت خدودي بديها الاثنين

ام حياة : بعدني اشوفج طفلتي لو شكد ماكبرتي .. جنت انتظر يوم الاشوفج بي عروسه ..

حياة : فدوة لگلبج يمة ..

حضنتها .. حيل نهميت اليوم .. صدك حضن الام وطن .. كل هم ينزاح مني

ام حياة : شبيها صغيرتي .. مهمومة ..؟

حياة : مادري يمه ..

ام حياة : فضفضي لامج حتى ترتاحين گلبي

حياة : يمة اتقدملي واحد و رفضته

ام حياة : ليش رفضتي ..؟

حياة : شلت راسي من حضنها ..

يمة هواي شغلات خلتني ارفض يمكن لان من غير مدينة

ام حياة : يمة لتخلين اهداف غلط بحياتي و لتؤمنين بمبدا انتي خلقتي بسبب ضروف .. لان يجي يوم و تتنازلين .. و التنازل عن مبدا يكلف حبيبتي

حياة : لا يوم مو غلط دتشوفين الوضع و سالفة الاقاليم .. اني ماريد ابتعد عنكم و انغصب ع شي ماريده

ام حياة : هاي حياتج مو حياتنا .. و انتي حرة بنتي .. كلامي الج عن خبرة بالحياة

حياة : الله يخليج الي ..

ام حياة : و يخليج الي صغيرتي .. ابوج البارحه العصر راح سال

حياة : صدك يمةة ...؟؟

ام حياة : و الولد ذهب و ماعليه شي و شينه .. بس عايش يم عمه

حياة : ليش و اهله ..؟

ام حياة : يمة الولد بصراوي

حياة : يعني شنو ..؟

الف سالفه و حيرة افترت بية .. انصدمت معناها يرجع لاهله .. زين اشلون ..؟ يعني اروح اعيش وياه ..؟

ام حياة : وجهج تغيرت معاني يمة .. احسج ضجتي

حياة : لا يمة .. بس اشوي استغربت عبالي من ديالى

ام حياة : يمة ماكو فرق .. و بعدين الولد مستقر بديالى .. هذا الكالوا لابوج

حياة : اها يعني يتزوج هنا

ام حياة : اعتقد هيج ..

ابو حياة : ووين الحبايب ..؟

ام حياة : هاا ابوج اجة .. يلله انزلي حتى نتغدا

حياة : كعدنا نتغدا .. من جهة حبي له .. و من جهه اخاف ميسكن بديالى و يرجع للبصرة .. و بهذا يعني اني ابتعدت عن اهلي .. حرت .. بس الثابت انو اني احبه ..

ابو حياة : يابة حياة ..

حياة : عيوني ..

ابو حياة : الله يسلملي عيونج گلبي ..

اني سالت ع معاذ .. و بلغت امج

حياة : دنگت راسي .. حيل استحيت منه و من داني

ابو حياة : الولد ذهب .. اني ناقشت دانيال حتى يكون عنده علم .. بس كل الامر يرجع الج بنتي ..

حياة : الله يخليك النا يابة

ابو حياة : الله يبارك بيج ..

فـ ياگلبي اذا موافقه خلي يتقدم .. عيب نخلي الناس تنتظر هلكد ..

حياة : ان شاء الله يابه

رغم المعلومات العرفتها عن معاذ و القلق منها .. بس حمدت الله هواي عندي هيج اهل ..

شنو اجمل من انو اني اقرر حياتي .. اني اختار .. و الاجمل انو اختار الاحبه و بدون اي معارضات ..

احبه حتى لو من ورا الشمس .. ميهم وين نعيش .. المهم وياه اعيش باقي عمري

كعدت الصبح بدلت و رحت للكلية .. طايرة من فرحتي ..

ريمان : صباح الخير

حياة : صباح النور .. هلا حب

ريمان : هلا بيج گلبي ..

حياة : شبيج ..؟ احسج تعبانة

ريمان : دزيني احارب و لتكعديني من الصبح ..

حياة : هههه امداج عبالي اكو شي

ريمان : هو هذا كولشي بحياتي ..

حياة : و لا ايهمج نتخرج و نشبع نوم

ريمان : لا عيني نحير بالرجال تريكي .. توصلي للباب .. منشوف نومة الصبح

حياة : اي احلى حيرة عادي

ريمان : صدك شصار .. شكال ابوج ؟

حياة : ماكو اي اعتراض

ريمان : هلا .. عمي ايدج بالدهن

حياة تضحك : وراج الحية

ريمان : قصدج وراية معاذ

حياة : ولييي عابت

ريمان : اووي فدوة متقبل.. لا جذب اتشاقه گلبي بالخير عليج الله يتمملج

حياة : تسلميلي .. نسيت اكولج طلع اصلا مو من ديالى

ريمان : دادا .. لعد من وين ..؟

حياة : بصراوي ..

ريمان : يااا .. و انتي شنو رائيج ..؟

حياة : يعني شنو رايي ..

ريمان : يعني .. الاعرفه انو متريدين بعيد عن اهلج ..!

حياة : لا يمكن يستقر بديالى

ريمان : يمممكن .. يمكن .. حياة طول عمرج تكولين ماخذ من غير مذهب و ماطلع خارج حدود بعقوبة ..

حياة : احبه ريمان .. حتى في حال انتقل للبصرة انتقل وياه

ريمان : يعني قدمتي تنازل ..!

حياة : اي ..

ريمان : و مذهبه مسألتي عنه
انتي مو تخافين من سالفة المذاهب و المشاكل ؟

حياة : مادري مگالت امي ..؟

ريمان : طبعا خالتي و رجل خالتي ميگولون .. لا اصلا ميسألون لان ميهتمون للمذهب ..

حياة : اي و اني مفكرت بهاي

ريمان : الي اعرفه معاذ شيعي

حياة : صفنت ع كلامها ..

يبقى هالشي قالقني بسبب الاوضاع هسة القتل و الطلاقات كثرت بسبب المذهبية بس ماخلي يصير حاجز بيني و بين زواجي من الانسان الاحبه

الحب اعظم من هالشي .. مو يكولون حتى نحب بصدق لازم نضحي و نتنازل .. و اني ماتردد بهالشي

ريمان : طول عمرها خابصتني .. شيبت راسي .. اتزوج قريب .. لا عيني من مذهبي اخاف اتطلگ .. اوي فدوة و شلون اذا صارت اقاليم

حياة : انتبهت عليها تحجي و منطلقه .. ابتسمت ع انفعالها

شبيج كافي ..

ريمان : تاليها انتي راح تعلنين الاقاليم ..

حياة تضحك : يبووو

ريمان : اني اكيف تشيلين الخوف من هالشي و لمن اتنازلتني من راسج اليابس ..

لعد صفوان اشبي ها ..؟

حياة : هم رجعت ع صفوان .. داكولج احبه احبه .. و منو كلج اني مخايفة

ريمان : انتي .. وافقتي ع معاذ ..؟

حياة : هاي تنازلات الحب .. معليها

ريمان : يعني لو ماكو معاذ .. همين ترفضين صفوان

حياة : اي

ريمان : ثوولة مو بيدج ..

حياة : زين شبي معاذ .. شبيج وياه والله حباب

ريمان : صفوان اثكل و ارزن .. ولج معاذ احسه لسان نسوان شايل .. 24 ساعه يسولف هنا و هنا

حياة : و شكو بيها .. روحه مرحه .. و همين احبه و اي عيب بي اشوفه جمال

ريمان : اني اعرف هذا .. اي عناد و مالومج هذا عرج التركمان

حياة : ووووين هي بس امي .. دكولي لروحج انتي التركمانية

ريمان : و اني عناد تربيع شبيج

حياة : اعرفج

صفوان : من الهم السكن بية .. كمت ماحس بلا نهار و لا ليل .. الكلية الجانت روحي تفرفح عليها .. صارت تخنكني

اريد ابتعد عن الدنيا كلها .. ميت الـ ما كدر ياخذ حبه .. اتهاونت بيها و راحت لغيري .. متت

معاذ : ماردت خبر .. بقيت ع اعصابي و خصوصا اهلي اجو .. معقولة مو ابالها انا .. لا شلون احس بشعورها المتبادل

قبل جانت ماتشوف من تمشي لحد ما رسمت و رسمت و انتبهت لاهتمامي و مشاعري الها

ما رسمت بخبث .. انا رسمت بحب .. لحد اليوم الـ خليتها تشيل عيونها بعيوني و تستسلم و تتنازل عن كبريائها

كبريائها الـ صفوان ماكدر يكسره بحبه ..
و من هذاك اليوم لليوم هي تبادلني نظراتها .. احس تبادلني مشاعري هم

خلصت المحاضرة بقيت افتر بالممر انتظرهن يطلعن .. لان كاعدات يم طالبات استحيت اروح اسالها كدامهن

حياة : بقى بالي يم معاذ .. شلون اكوله ..؟
ريمان ملتهية بالسوالف وية البنات
ريمو ..

ريمان : ها ..

حياة : كومي نطلع اشوي

ريمان : مو دانسولف ..

حياة : دكوومي عاد .. اعتذر بنات بس اختنكت اشوي

زميلاتهن : عادي عمري .. سلامتج

ريمان : شبيج ..؟

حياة :طلعنا برا

ولج حايرة ..

ريمان : بشنو ...؟

حياة : ابوية كال كولي لمعاذ يتقدم .. حايرة اشلون اكوله استحي ..

ريمان : عادي هو مو اجا و فاتحج هاي مثل هاي

حياة : اي هووو ولد اني بنيةةة

ريمان : قابل هو شكو حتى صارت بيها ولد و بنية .. ولج بابة اني وياج اجي

حياة : لا لا ..

معاذ : هاا حيااة ..!

حياة : طلعنا دنمشي بالممر صار گدامي فزيت من صاحني

هاا ...!!!

معاذ : اسف .. ماقصدي اكببج.. بس قلقان

حياة : لا عادي ..

دتنحسب ريمان لزمت ايدها بقت واكفه و دايره وجهها صفح .. طبعا ادري واكفةةةة غصب 

معاذ : ها .. شصار ..؟ اتاخرتي علية بالرد ..!

حياة : مو شاورت اهلي ..

معاذ : اي بشري ..؟

حياة : شال ايده ع گلبه خلاها من حجى .. اني دنگت راسي ماعرف اشلون اكوله

ابوية يكول خلي يتقدم ..

معاذ : مثل الميت و ردتله الروح من نطقت.. من اروح فدوة لربها

صدددك .. الله يبشرج بالخير .. من باجر الفجر انا و اهلي ابيتكم

ريمان : كمت اعوج بحلكي .. وايواي والله مابي ذرة ثكل .. خرب بيج حياة

يلله حيوته .. يادوب نلحك ع النادي

معاذ : من فرحتي بقيت واكف ماتحركت .. نسيت الدنيا

اخذوا راحتكم .. اسف عطلتجن

ريمان : عادي ..

حياة : عن اذنك

معاذ : مرخوصة عيوني

حياة : امشي و الابتسامه مفاركت وجهي .. ابالي اعيد كل كلمة كالها و افرح بيها .. سرحت جان اعثر لزمتني

ريمان : الله .. شبيج شنو سكرانه

حياة : خرب شكد عيب مو بنص الكلية

ريمان : اي دخلي عقلج براسج .. هسه هو كله معاذ لو الامير جان شصار بيج

حياة : مو بيدي .. و بعدين انتي ليش هيج تضوجين منه هااا .. تغارين من معاذ

ريمان :  اي و ويع همين .. ولج اخذج مني ..

حياة :  فديت .. محد ياخذني منج ضلعتي

ريمان : خلي يولن ..

حياة : اخذنا لفات و ببسي و كعدنا ناكل ..

برائيج اني داخطوا غلط..؟ عوفج من انو انتي تضوجين منه ..؟

ريمان : لا گلبي .. اهم شي الانسان يعيش وية بشر يحبه .. و يكفي انت تحبي كولشي يهون بعد

حياة : و الطائفية .. تكولين اهله عادي عدهم ..؟

ريمان : هو لو يعرف اهله ميقبلون ع سنية ليش يفتح موضوع .. گلبي اكيد اهله ماعدهم اعتراض ..

حياة : اي صدوك ..

ريمان : و افرضي اهله طائفيين .. حيوته انتي الراح تتزوجي معاذ .. اول و تالي راح يبقالج بس هو .. شعليج بالباقي

حياة : ان شاء الله يطلع مثل الانسان الرسمته بداخلي .. و مابي عوج

ريمان : ان شاء الله گلبي

حياة : كملنا محاضرات .. رجعت للبيت .. لان خميس و نهاية اسبوع .. احس جسمي متكسر .. بس اليوم بالذاب ماحس بشي بسبب فرحتي .. و حبي لمعاذ

ماصدك و اخيرا راح نرتبط بعلاقه رسمية ..و نصير لبعض

ام حياة : ها ماما شنو الاخبار .. شصار ويا معاذ ؟

حياة : خير يمة .. كلت له .. كال باجر ان شاء الله نجيكم ..

ام حياة : لعد لازم نتحضر منا لباجر و ماريد نواقص باي شي ..

حياة : ان شاء الله يمة ..

اتغدينا و كملنا .. صعدت نمت اشوي .. كعدت العصر ع صوت امي

ام حياة : حياة يمةة اكعدي .. يادوب نلحك

دانياااال .. دااااني

دانيال : اويلي الواحد ميعرف ينام بهذا البيت ..

هاا يمةةة ..

ام حياة : كووم نحتاج شغلات من السوك

دانيال : مو تسووكنا البارحه .. يا يمة هو كل يوم

ام حياة : ولك كوم باجر الناس جاية

دانيال : بلوة .. بلوة المشاية .. كله براسي

حياة : متت ضحك ع داني .. عيونه ملزكات من النعاس و يمشي كدام امي و يتذمر

ام حياة : يا يمة هي بس وحده و فرحتي بيها ..

دانيال : الحمدلله بس وحده .. هاي اعتبره احس شي سويتي بحياتج جبتي بس وحده .. جان شيبت اني يوم

ام حياة : لزمته من اذنه و سحبته

يااا .. احسن شي سويتوا من جبتك للدنيا يروحي

سحبتها من اذنه و بسته ..

دانيال : الله يحفظج الي .. و انتييي اضحكي شكوو عليج ع الحاضر يجوج المشاية .. كولشي ع الجاهز

حياة : ههههه و انت ليش مضغوط

دانيال : اني اعلمج من ارجع

ام حياة : عووفي اخووج ..

حياة : تعبتنا امي بالشغل .. رغم البيت مرتب و مابي شي .. ماخلت شي غيرت الديكورات .. البردات .. و خطية داني 3 مرات دازته للسوك ..

يمكن امي فرحانه بية اكثر من فرحتي بروحي .. ام و بعدني ماعرف احساسها ..

نمت بالليل هلكانه من التعب .. كعدت ثاني يوم الصبح سبحت و طلعت ..

ام حياة : يمة بعدج هيج .. سوي شعرح رتبي روحج ..

حياة : ليش يمة .. شكو

ام حياة : دادا تكوول شكوو ..؟؟ مو الناس جاييج اليوم

حياة : هههه يا گلبي يا عمري انتي .. بعدنا الصبح حتى ريوك ممتريكة يمة

ام حياة : ميخالف .. ميخالف .. اتريكي و يلله جهزي روحج الناس باي لحظة يجون ..

حياة : صار تدللين ع امرج

ام حياة : دااانياااال ..

حياة : طلعت ركض من غرفتي تصيح طبت لغرفة داني، فديتها اليوم خابصه روحها ..

دانيال : يمة يمة نايم .. نااايم

ام حياة : ادري يمةةة اكعد ..

دانيال : شكوو يووم مو عطله ماعندي دووام

ام حياة : يمةة ع اي دقيقه الناس يجوون عيب اكعد

دانيال : حياة تعرس و اني ابتلي .. يا يمة فدوة بس دقيقه اكمل الغفوة

جريت اللحاف و لفلفت روحي بي

ام حياة تسحب اللحاف من عليه

كووم .. ماكو نوم

دانيال يكعد ع حيله

اويلي ع حياة .. هاي فوائد الخوات بس ازعاج

ام حياة : عيب .. اختك هاي

دانيال : هففف هي هنا المصيبه .. اختي

حياة : مديت راسي من باب غرفته

هههه سمعتك دندن ..

دانيال : تعاااالي اليوم اشويج

حياة : شردت ع السريع اركض ع الدرج و يركض وراية

يمةةة .. ولللك والله الي همين كعدتني بالدفراااات .. عوووف

دانيال : ديلله اطلعي هيج للمشاية .. حتى يشردون

حياة : لزمني و هلس شعري خربطه

مكروووه

عباس : صفوان ..! شنو بعدك ع كعدتك هنا من الليل ..

صفوان : تعبان

عباس : شبيك خوية .. شنو السالفه حتى نوم مانمت

صفوان : داموت عباس .. اني داموت .. بقت ع النوم ..