قضية لم الشمل الفصل الخامس وثلاثون 35 - بقلم نهى

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
اسعد الله مساءكم ❤️

حوراء
كنت مكابلة الكتب والملازم وغركانة بالدراسة لراسي
هواية جاي اعاني من المواد واذا اريد اسيطر لازم اقرة واتعب
والي زاد علية الصعوبة الدراسة كلها بالانكليزي

وين جانتلج هاي ياحوراء
باوعت للساعة الوقت اتأخر وانا بعدني ما مخلصة
وفوكاها باجر وراية امتحان شلون ورطة هاي ياربي

رجعت دنكت على الكتاب اقرة.
حطيت شعري ورة اذني كنت اقرة واكتب بدفتر الملاحظات المصطلحات الانكليزية الطويلة

مرت من يمي باربي لابسة بجامة والنعال الارنوب
شكلها راح تنام شافتني

كنت كاعدة بالهول ادرس لان البنات وامي ما يقبلون افتح الضوة وادرس يمهم يردون ينامون

ريم .. ها بعدج جاي تدرسين
باوعتلها بحسد .. اي والله بعدني وراي حصبة وجدري
يالله اخلص

.. الله يكون بعونج بس انتي سباعية كدها وكدود
ما ينخاف عليج تربية ايدي

ابتسمت .. اي والنعم منج هو لو ما انتي جان اني
بعدني بالصف الاول ابتدائي ادرس دار دور

بالله ما ترحين من كدامي وتخليني ادرس لا ابتلش بيج واطلع قهر هذا الكتاب براسج

.. لا اله الا الله البنية عقلها فصل
خلي اروح استر على روحي لا تعكرين مزاجي وتعصبيني وتالي تتعب بشرتي وتظهرلي تجاعيد من وكت

كانت تحجي وتتلمس بخدودها
خرب يومها هي هي ولا تغيرت
نفس اناقتها وولعها بشكلها وبالموضة كارثة

بس الشي الوحيد تغير بيها ان هي صارت مدبرة من ناحية الصرف والتلف

لكن كلمة حق تنكال هي عسى ما تلبس كونية راح تحولها موديل غريب وتلوك عليها

.. يالله حبي تصبحين على خير على عنادج راح
انام قبلج

.. دروحي نامي عوبة من نامت عليج طابوكة

راحت وهي تبتسم واني رجعت اكمل دراستي
ورة ساعة سمعت صوت الباب الخارجي جاي ينفتح

يمكن هذا جلال ياربي والله خطية هالولد
فوك قهر بيت خاله كملها صاحبه
الله يساعده وين ينطي وجهه

كنت كاعدة بمكاني باوعت عليه مر من يم باب الهول
بس من غير ما ينتبه على وجودي وكمل طريقه بأتجاه الدرج

كمت من مكاني حتى اشوفه شلونه واسأله عن صديقه
بلكي سمع عنه خبر

حطيت شالي على راسي ورحت وراه
لكيته جاي يصعد الدرج
وواصل للنهاية

باوعت عليه اتعثر على الدرجات الاخيرة. وكان راح يوكع لو ما الله ستر
ولزم بسياج الدرج بقوة

شهكت ورحت عليه ركض صعدت بسرعة
.. اسم الله الرحمن هاي شبيك جلال شبيك متشوف كدامك همزين ما وكعت على وجهك

ما جاوبني كان بعده منطيني ظهره عدل وكفته
اتكأ على سياج الدرج وكمل طريقه
وهم وصل يم باب السطح.
واتعثر مرة الثانية

لحكت عليه ولزمته وسندته قبل لا يوكع على وجهه بالكاع
كنت مستغربة عدم اتزانه بالمشي

كنت ساندته ومشيته وطلعته للسطح وسألته وانا خايفة علية
.. عفية جلال جاوبني شبيك شكاعد يصير وياك

كان بعده مستند علية وذراعه على كتفي التفت وباوع علية مستغرب وجودي
حجة بصوت كلش ثگيل وكال

.. لج انتي شتسوين ... هنا
اني موكلت سمعي الكلام

.. جلال عفية احجي شبيك وليش لسانك ثكيل
مريض انت لو متعارك فهمني ترة اكعد مهيمن واخلي يحجي وياك ويفتهم منك
شنو الي جاي يصير وياك انت
حالتك كلش غريبة

نتر بية وكال .. اششششششششششششش
دخيل .. الله .. انتي شنو بالعة مسجل

.. لا والله انت المو طبيعي راح اصي.....

قطع كلامي وكال
.. الظاهر هذا السانج ما يسكت الا انا اسكته

سحبني عليه وباسني من شفايفي
حركته وياي كانت على غفلة لدرجة ما كنت حاطة ببالي واحد بالمية ان جلال يتجرء ويتحارش بية
ردت فعلي كانت صدمة على فزع وخوف وخذلان كل المشاعر السلبية اتجمعت بداخل صدري

.. لك حيوان انت شجاي تسوي
كنت احجي واقاوم خمشت وجهه
وهو طوقني بذراعه. وقيد حركة ايدية
ودنك راسه على رگبتي وانفاسه الحارة لفحت رگبتي
وارتعد گلبي من الرعب والخوف من جلال

كنت كلي ارجف وكمت اقاومه بكل مااملك من قوة حتى ابعده عني
حركته ولمساته صارت اكثر جرأة وكأن مقاومتي زادته قوة

كان جسمي كله ينتفض من الخوف جوة لمسات ايد جلال
بجيت .. لا لا مستحيل هذا مو جلال هذا الوحش جلال

صرت ابجي واتوسل يبتعد عني

لكن فجاءة ما حست الا على واحد دفع جلال بكل قوة
وبعده عني باوعت بأمل

وشفت نور كانت عبارة عن كلتة من الغضب
وسحبتني من ذراعي وبعدتني عن جلال

كانت نور بعدها واكفة كدام جلال لكن فجاءة وما اشوف الا نور انطت لجلال راشدي

ارتد للخلف وكعد بالكاع

نور بصوت بي رجفة البجي
.. انت الظاهر انجنيت رسمي وصار لازم واحد يسويلك حل هاي تاليتك كمت تشرب وترجع سكران للبيت مع الاسف عليك يا جلال صدك خذلتني

نور جانت تحجي وانا شهكت لا ياربي دخيلك يعني جلال كان سكران هزيت راسي مستنكرة الي يصير كدامي صرت بلحظات اتگلب من صدمة لصدمة
كانت اصعب لحظات مريت بيها بحياتي عمري ما راح انساها

كان جلال يترنح مثل الدايخ
جاوبها بنترة و بلسان ثكيل كوة يطلع الكلمة
.. ااااششششش بلا حجي زايد. ووخري عني لا ابتلي بيج انتي الثانية

.. ما راح اتعب نفسي واكعد احجي وياك
حسابي وياك بعدين من تصير بشر وترجع لوعيك

سحبتني من ايدي وراها ونزلت الدرج عالسريع
واني انزل وراها واتعثر بالدرج
كنت بعدني مصدومة من الصار ومرعوبة وما مستوعبة الدوامة الي اني بيها
لازال جسمي يرتعد ورجلية بادت وصاروا خيوط ما بيهم حيل يحملوني

يعني لو ما نور اتدخلت وخلصتني منه الله يعلم شنوكان مصيري

دخلتني للهول ودفعتني كدامها بغضب وكالت بصوت ناصي حتى محد يسمعها

.. انتي شنو غبية شتسوين صاعدة ورة واحد سكران

هزيت راسي اريد احجي
همست .. نور صدگيني ما كنت اعرف بجلال سكران بكل ضني ان هو مريض اني عمري وحياتي ما شايفة واحد سكر.....

قطعت كلامي ولزمت معدتي
شكلي راح اتقيء

وفعلاً كلبت معدتي وتركت نور وركضت للحمام
وكعدت بمكاني بالحمام اجتي نور وساعدتني حتى انهض وغسلت وجهي

واخذتني للمطبخ وانطتني كلاص ماي
نور .. طمنيني خو ما سوالج شي

هزيت راسي وحطيت ايدية على وجهي وانهاريت بالبجي
كنت ابجي من كلشي من الخذلان .. من الخوف .. من الصدمة
احس بجرح عميق بگلبي جاي ينزف
جلال انتهك برائتي واستغل طيبتي وثقتي بي
وكسر شي عزيز بداخلي

نهضت من مكاني وتركت نور تتبعني
رحت دخلت للحمام واني روحي خاوية .. ضايعة

نور.. حور شنو راح تسوين كانت تسألني بقلق
.. اريد اسبح

اي اريد اغسل لمساته عن جسمي وابعد بصمات
اذيته عني دخلت جوة الدوش كنت ابجي واغسل
بوجهي وشافيفي وجسمي كنت مثل المجنونة اريد امحي اي اثر من لمساته

بس مع الاسف موقف جلال ترك اثر مو بس على جسمي
وانما اثره بكلبي المسكين الي حبه وكسره
انحفر بعقلي ومستحيل ينمحي

سمعت صوت نور تدك الباب
شكلي اتأخرت بالحمام وظل بالها علية

طلعت من الحمام كانت واكفة تنتظرني
رحت دخلت للغرفة وتقريبا وكعت بفراشي مثل الجثة الهامدة
ما اريد افكر ما اريد اتذكر كلشي ما اريد
اريد بس انام

نور

نامت حوراء وهي بحالة صدمة
ما اعرف شنو اسوي بالحقيقة صدمتي بجلال ما تنوصف

كنت مثل كل يوم ما انام الليل الا يرجع يالله خصوصاً اليوم
بالذات ما كدرت انام لان كان بالي مشغول عليه
خايفة عليه من موقف فقدان صاحبه سلوان

بقيت انتظره لكن شكلي غفيت وفزيت على صوت حركة اكيد هذا جلال وصل

نهضت من فراشي حتى اشوفه اتطمن عليه
طلعت من الغرفة وسمعت صوت مكتوم جاي من السطح صعدت فوك واني انادي بصوت ناصي جلال ؟؟

وانصدمت من اللي شفته بساعتها
ما اعرف اي صدمة بيهم اشد على عقلي
صدمة معرفتي بجلال صاير يسكر مدري صدمة اعتداءه على حوراء

والمسكينة. كانت تجهل جلال سكران حقها شلون تعرف بي سكران وهي بعمرها ما شايفة واحد سكران

منظر جلال واعتدائه ذكرني بصابر رجل خالتي من كان يسكر ويجي يتحرش بية

يمكن ثلثين غضبي من جلال كان غضب دفين
ما ردت حوراء تمر بهيج مواقف اني مريت بيها قبل

بس لا لا جلال مو مثل صابر قذر
صابر كان يحاول يعتدي علية حتى وهو صاحي
مو بس لان هو بحالة سكر بكل الاوقات كان يمثل تهديد الي

لكن اني متأكدة جلال مو بوعيه ولا عارف هو شنو جاي يسوي كنت احاول ادور بعقلي عن بقايا جلال الطيب الي اتعرفت عليه

نزلت دموعي غصب عني
واني اتذكر ذاك جلال الطيب والمرح الشهم
وين راح

اليوم الي شفته ما يمت بأي صلة لجلال
جلال اخوية الشهم الي دك على صدره
وكال اني اخوج وان شاءالله تعيشين بأمان طول ما بي نفس واشم الهوا

بقيت الليل كله اعاتب الزمن ليش اخذت مني اخوية فرحتي بالدنيا الي حصلت عليها بعد ما شفت الهوان
واطلب منه بتوسل ان يرجعه مثل الاول محتاجته يرجعلي سند ويلون حياتي بروحه الطيبة المرحة

جلال

كعدت يوم ثاني الصبح اباوع لروحي نايم عالكاع بنص السطح وملابسي كلها متربة
انا شلون وصلت هنا شجابني

حاولت انهض من الكاع احس عظام جسمي كلها منخرة
ومكسرة من التعب كمت على حيلي وحسيت الدنيا افترت بية عبالك صاعد بمصعد

هالسم صحيح ينسيني ضيمي وقهري بس سلبياته بعدما تصحى يوم ثاني
تلكة روحك دايخ على مصدع على معدتك مكلوبة
دنكت اريد اعدل قميصي عكدت حواجبي مستغرب

هاي شنو نص دكم قميصي مكطعة شكو شصاير
ووكعت عيني على شخطة على صدري بيها دم خفيف

عفست وجهي وغمضت عيوني احاول استجمع افكاري
معقولة انا متعارك البارحة وما ادري بروحي

طلعت نقالي من جيبي وباوعت بأمل بلكي واحد من جماعتي بالموصل متصل علية. يبشرني بمكان سلوان
بس مع الاسف ماكو شي

ما اعرف شنوي اسوي ما بيدي شي غير بس انتظر رحمة الله تنزل ويبشروني سلوان
زين اخاف الانتظار مو بصالح سلوان يمكن هو هسة بحاجتي بس انا ما عندي علم

يمكن هسة داعش جاي يعذبون بي
لالالا ياربي كلشي ولا سلوان اتخبل اذا صار عليه شي

جماعتي كالوا اصبر وانتظر ولا تجي لان انت هم اسمك من ضمن قائمة المطلوبين

بس ياناس لحظات الانتظار حيل صعبة. وتلعب بالاعصاب

مسحت وجهي بكفوف ايدية
جريت حسرة ااااخ وكأن عقلي ما صدك اني صحيت
واعلن الهجوم ونزل علية نزلة وحدة بالافكار والوساوس

رفعت راسي وحجيت .. ياربي شوكت بالي يرتاح
نفضت راسي

ونزلت من الدرج لكيت الكل كاعدين
ريم شافتني وابتسمت كانت لابسة زي الكلية. وشايلة
ملازمها على ايدها

ريم.. صباح الخير صح النوم

مرت من يمنا ام مهيمن وشافتني وكفت تحجي وياية وكالت
.. هلا خالة جلال صباح الخير طمني
ماكو خبر عن صاحبك

.. لا والله خالة ماكو خبر لحد الان بس جماعتي جاي يدورون ويسألون

.. يارب يخلصه من هاي الشدة بجاه الحبيب المصطفى

.. امين يارب
تركتهم واتوجهت للحمام وام مهيمن كالت من وراية
.. اي خالة قبل لا انسى مهيمن كال خلي جلال اليوم يمر علية للمحل وراح قبلك

.. ان شاء الله خالة
دخلت ونزعت ملابسي
كانت اكو مرايا صغيرة معلكة عالحايط مالت الحمام
خالين بيها فرش الاسنان والمشط ومعجون الحلاقة ومعجون اسنان

باوعت لوجهي وانصدمت بشخطة ثانية على خدي
اتلمستها .. هاي شكو انا بس لا واكع على وجهي
البارحة

اخذتلي حمام وطلعت بسرعة. ودخلت للمطبخ ولكيت الكل كاعدين

ريم جاي تتريك وام مهيمن لبست عبايتها وطلعت للسوك
ونور كانت ناطيتني ظهرها وواكفة عالسنك تشتغل

وحور كانت لازمة كتابها بيد وكوب جاي بالايد الثانية

واول ما دخلت وشافتني شهكت ووكع كوب الجاي من ايدها كانت عيونها واسعه لدرجة البؤبؤ يريد يطلع من
مكانه. ووجها انخطف لونه وصار شاحب
هاي شبيها عبالك شايفة شبح

نور التفتت على وكعت الكوب وباوعت لحور وعيونها الخايفة والتفتت تباوع
على اتجاه نظرات حور

وشافتني وهاي الثانية هم باوعت علية بغضب وخزرتني
شكو شصاير هذولي شبيهم

راحت نور وبعدت حوراء عن مكان قطع الكزاز والجاي وكعدت تنظف المكان وحوراء

بقت واكفة جامدة بمكانها
وبهاي الاثناء دك هورن سيارة

كامت ريم وكالت .. هذا مؤمل وصل
حطت سير الجنطة على كتفها وشالت سجلاتها وكامت

اباوع لنور شالت غراض حوراء وجنطتها وحطتهم بيدها وكالت

.. حوراء اتحركي السايق اجة لا تتأخرين ترة وراج امتحان صيري قوية وشدي حيلج

كانت تحجي وياها بصرامه
حوراء هزت راسها بموافقة واخذت جنطتها من ايد نور وراحت
من غير ما توجه اي نظرة الي
وهاي مو من عوايدها ما اعرف ليش گلبي انقبض

طلعوا البنات وبقينا بس انا ونور بالبيت
التفتت علية وانطتني نظرة تأنيب وزعل

وكالت .. الحمدلله على سلامتك استاذ جلال
جاوبتها وانا مستغرب نبرة صوتها المستهزئة
.. الله يسلمج بس ما گلتي على شنو تتحمديلي السلامة

.. اتحمدلك السلامة على مصيبة البارحة
.. شنو نور احجي عدل ما جاي افتهم عليج شنو تقصدين

.. حقك ما تفتهم الظاهر عقلك بعده ما مصحصح من تأثير الشرب والسكر

نور كالت هيج وانا جمدت بمكاني بالكرسي الكاعد عليه
عركت كصتي وبلعت ريكي مثل الطالب السيء الخارج عن القانون

جليت صوتي .. نور اترجاج لا تكعدين تلوميني وتحاسبيني ادري هالشي ما يص....

قاطعت كلامي بصرخة غضب و اعتراض وتهجم
وكالت .. لك جلال. تدري انت البارحة بالليل شنو صخمت ولك انا قهري وعتابي وياك مو بس على السم الي جاي تشربه ولك جلال البارحة انت
اعتديت على حوراء والطامة الكبرى انت ما جاي تتذكر شخبصت البارحة

كلامها كان مثل الضربة عالراس نهضت من مكاني مفزوع وانقلب الكرسي بالكاع
همست بجزع .. لا نور اترجاج كولي اي شي بس لاتكولين انا اعتديت على حور انا مستحيل ااذي حور

كنت احجي بتوسل
نور بقهر .. كنت اتمنى اكلك انت حامي عرض حور بس مع الاسف هاي الحقيقة اني صعدت فوك وشفتك
بعيني شلون جاي تتهجم وتتحرش بيها

احمد الله اني اتدخلت وبعدتك عنها والا كان صارت مصيبة

نزلت دموع نور وكامت تبجي بقلة حيلة وكالت بصوت
واهن .. ولك ليش هيج سويت جلال ليش

ارتديت للخلف مصدوم ومهزوز لابعد الحدود
وكأنما ضميري ناقص تأنيب وقهر وانضافت على
عاتقي ذنوب حسيت بروحي غركان بالظلام والخطيئة لهامة راسي

.. شلون انطاك گلبك تسوي بعرض اخوك هيج
فهمني كول شلون راح تحط عينك بعين مهيمن وخالة وتاكل من زادهم وتنام ببيتهم وانت خنت العشرة والزاد والملح

حطيت ايدية على اذاني ما اريد اسمع
نور اترجاج ابوس ايدج كافي
كااااااافي نور انا ضعت وضيعت نفسي بالزايد

اجيت اطلع من البيت
وركضت وراي نور .. جلال وين راح تروح

جاوبتها وانا افتح الباب بسرعة .. لجهنم
منو اني ما جاي اعرف نفسي معقولة انا اتجاوزت على حشمة حور ولوثتها بقذارتي
ياربي رحمتك ربي المن اني عايش

ريم

اجواء البيت متكهربة ما اعرف شنو جاي يصير بالبيت
حوراء صارلها اسبوع مريضة وضاربتها على الصامت
لو تدرس لو نايمة بالفراش معقولة الي يدرس الطب يتعقد

لو شنو الموضوع وحتى نور هي الثانية ما اعرف شبيها
شكلها عندها هم وكاتمته بگلبها وما ترضى تحجي

وجلال راح يصيرله اسبوع ما لافي للبيت
حسب كلام مهيمن جاي يبات بالمعمل
يكول جاي يسوي صيانة كاملة لمكاين المعمل كله
حتى ملابسه مهيمن يوديهم له هو ما وصل البيت نهائياً.

بهاي الايام
مهيمن جاب الاسطى واتفق وياه يبلش يبني الطابق الثاني
وصار يخطط هو وياه على الخريطة

وبلش الاسطى والعمال بدوا شغلهم
مهيمن حطلهم درج خارجي يصعدون منه وينزلون للسطح حتى ما يدخلون علينا للبيت

كان البيت خبصة وهوسة.
واني التهيت بدراستي واجواء الكلية والحياة هناك عالم ثاني مغامرات وقصص واحلام الشباب

كل يوم اكتشف واعرف شي عن الحياة عن طريق
اختلاطي وية طالبات وطلاب مرحلتي
احس حتى شخصيتي بدت تتغير

ابتسمت وانا اتذكر كلام مهيمن عن الساني المزروف
حتى لساني صرت اعرف شوكت استخدمه
واهم شي بهذا كله اهتمامي بدراستي
كنت حيل حريصة عليها

انتبهت من صفنتي على لكزة دعاء صديقتي
.. شنو وين صافنة صارله ساعة الولد يشرح وانتي حضرتج سرحانة بغير وداي

جاوبها حازم .. عوفيها هسة هاي السرحانة الي ما عاجبتج
تالي تجيب درجة اعلى منج ومني

انا اتعلمت اشرح واتعب وهي تنجح على الجاهز

جاوبته.. بالله رحمة على اهلك حازم لا تكعد تمن
علينا وتذلنا والله لان انت تدرسنا

شنو نسيت ذاك اليوم منو شرحلكم مبادئ احصاء

حازم ابتسم .. عمي انتي الي شرحتيلنا وانعم الله عليج
بس انا من تشرحين ما اكعد اصفن ولا اخليج تكعدين كل شوية تعيدين الشرح مثلما انتي تسوين بية
هسة هاي دعاء وياج شحلاتها من اول شرح تفهم

جاوبته .. يالله عاد لاتكعد تاكل كلبي قبل شوية اشتريتلك لفة وبيبسي عربون دراستي

حازم .. اكلج دعاء خلي صاحبتج تسكت احسن
لا والله اكلب عليها البيبسي

اتعودنا انا ودعاء كلما يصير عندنا امتحان وتصعب علينا مادة
نروح انا وياها لحازم كان هو اشطر واحد بالقسم
ويشرحلنا انا ودعاء وكم واحد من طلاب القسم

دك نقالي وكان المتصل حوراء
.. الو ها حور
اجاني صوت بنية مو صوت حوراء

وكالت عفية ريم حوراء اتخربطت تكدرين تمرين عليها للكلية
كمت من مكاني .. شنو شبيها حوراء ليش اتخربطت

.. ما اعرف بس يمكن بيها تايفوئيد لان حرارتها كلش مرتفعة واغلب طلاب القسم واكعين بالتيفو
خاف انتقلتلها العدوى

كانت صديقتها تحجي واني اجمع بملازمي وسجلاتي وحطيت جنطتي على كتفي ورحت ركض

بالسيارة
كاعدة وحاطة راس حوراء على كتفي وراجعة بيها للبيت كانت ما بيها حيل تحجي

مؤمل التفت علينا وكال
.. خلي ناخذها للمستشفى لو للدكتور

هاي المرة الرابعة يكرر طلبه حتى ياخذها للدكتور
جاوبته.. لا مؤمل حور ما تريد دكتور تريد ترجع للبيت ترتاح وهي خالة تسويلها خلطة من اعشابها للعلاج هي تعرف شلون تداريها

وصلنا للبيت وكالعادة ترابة البناء والعمال جاي يشتغلون نزلنا من السيارة وسندتها ودخلنا للبيت استقبلتنا ام مهيمن ومرت اخوها حسن وبناتها

والبيت صاير خبصة شكلها ام مهيمن عازمة
شافت حوراء واستلمتها اسئلة

ام مهيمن .. يا يمة سودة علية شجاج حويرة اكيد
هاي من ورة الدراسة هلكتي روحج

اخذتها ودخلتها للغرفة واني بدلت ملابسي ورحت يم نور الي كانت غركانة لراسها بالشغل تطبخ منا للعمال
وللبيت

.. شنو اليوم ام مهيمن عازمة
.. لا ما عازمة بس اليوم السنوية مال ابو حوراء
ومسوية ثواب

.. اهااا اشوف حور وكعت مريضة اثاري اليوم ذكرى وفاة ابوها

ذكرتني بسنوية عمو بذاك اليوم هم هيج اتأذيت
رغم وفاة عائلة خال جلال بس ما نسيت ذكرى وفاة عمو مؤيد

وبوقتها مهيمن رغم مكابرته سوى ثواب وزعه عالفقرة
وحتى جلال حضر بوكتها كان متأذي على فقدان بيت خاله

نور .. ريم عفية محتاجة تساعديني بالمطبخ

عفست خشمي .. اوك اساعدج بكلشي الا غسل المواعين دير بالج تكليلي اغسلهم

رفعت حاجبها .. ليش عيني وشبيج مشلولة
.. لا حبيبتي بس اخاف على اظافري حبيباتي يتكسرون

كنت احجي وية نور ودخل مهيمن
شكله سمع كلامي عيونه نزلت على ايدية وما حجة شي
سلم علينا ودخل للبيت وجمدت بمكاني من شفت نغم
دخلت وراه

ام مهيمن شافتهم وكالت .. ها يمة مهيمن جبت بنت خالك من الكلية

جاوبها وهو يكمل طريقه للغرفة .. اي يمة

ونوب شافت نغم وسلمت عليها
وكالت بترحيب هلة بجنتي

احس عبالك جنت نايمة وشمروا على وجهي سطل ماي بارد وصحوني من نومي الغافل
ورجع بية الزمن واتوقفت عقارب الساعة
وكلشي من حولي اتوقف

لحظة ريم انتي ليش متفاجئة من وجود مهيمن ونغم سوية ترة مالج حق تغارين اصلاً

ريم اصحي مو هو نفسه مهيمن الي فضل بنت خاله عليج بعدما رفض حبج الي قدمتيه له على طبق من ذهب مو هو نفسه الي كسرج وخذلج
شنو معقولة نسيتي

اي صدك صحيح لوما حادثة وفاة بيت خال جلال الي صارت
جان هسة مهيمن متزوج نغم
هو صحيح ما صارت خطوبة بس مو معناها انلغت
لا كل ما بالموضوع هو تم التأجيل وكلها مسألة وقت
ويخطبها ويتزوج

رفعت راسي بكل ثقة
ومعاني وجهي ما تبين اي شي من النار الي تسعر جواية
طلعت من المطبخ وصاحتني نور كانت تمشي وراية

التفتت عليها حجت مثل الي تريد تبررلي
.. ريم ترة ام مهيمن كلتله روح جيب نغم من البيت لان رجعت من الكلية للبيت ومحد موجود يجيبها

جاوبتها .. واني شكو جاية تكوليلي قابل انا امه لو ولي امره.
شوفي نور خلي اوضحلج شغلة
ترا لا على بالج انا بعدني ميتة بحب اخوج
لو على بالج انا اهتم لو اتأثر مثل قبل اذا اشوفه وية غيري

صدگيني مهيمن ما يهمني ولا يأثر بية ولو بقيد شعره
ووجوده بحياتي مجرد صلة قرابة ابن عمي فقط لا اكثر ولا اقل

كنت احجي وية نور وسمعنا صوت مدوي لباب انسد بكل قوة

التفتنا اني ونور عالصوت ولكينا مهيمن واكف يم باب غرفته و الشرر يتطاير من عيونه
مشى بأتجاه الاستقبال
وباوعلي بنظرات ترعد وفات من يمنا مثل الاعصار

نور .. عزة مبين من شكله سمع كلامج عنه

هزيت كتفي بعدم اهتمام وكلتلها.. واذا سمع وشنو يعني
عادي اني ماحجيت شي غلط

نور.. يا برودج يا ريم
تركتها ودرت وجهي ورحت للغرفة

والله يانور لو افتحلج گلبي بهاي اللحظة وتشوفين
الناااااااار الي تسعر بوسط گلبي
جان ما كلتي كلمة برود طول عمرج

رحت غسلت وجهي اكثر من مرة. اريد ابرد ناري
واهيء نفسي للقادم الاتي ما اريد. احد يشوف ضعفي

طلعت اساعد نور بالمطبخ وحوراء امها سوتلها علاج
من الي عندها وشربتها بس بقت مسنحة بفراشها

انشغلت بالهوسة ورة ساعتين دخل مهيمن جايب علاليك فواكه ومسواك
وكف يمي وحط عالكاونتر شي لونه وردي مسلفن

حجة من بين اسنانه .. هاج هذا الج

بعدها ابتعد من يمي وراح حجة وية امه وكال
.. يمة بلشي صبي الغدة خوالي كلهم وصلوا

ام مهيمن .. اي صار هسة نصب بس انت اخذ السفرة وياك وافرشها بالاستقبال

همة جانوا يحجون واني كنت اكابر واحاول ما امد ايدي عالشي الي جابه بس بالاخير الفضول انتصر
استغليت انشغاله وية امه

مديت ايدي وفتحت العلاكة واريد اشوف هذا شنو
هاي شنو جفوف بلاستك

هاي المن الي .. ؟ نور شافتني وكالت
.. هذني منين جبتيهم
.. مهيمن جابهم وكال هاي الج

نور ابتسمت وكالت
.. خرب هههههه لج هاي كفوف تلبسيهم من تغسلين مواعين تحافظ على اظافرج لا تتكسر
هههههه والله مهيمن فلم كام يخاف على اظافرج

رفعت حاجبي ببرود .. لا قصدج يريد يبطل الحجة
حتى ما يكون عندي سبب يمنعني من غسل المواعين

كعدت البس الكفوف بيدي واني اعاينهم
وكلت.. شكل اخوج عنده ذوق لان اني احب اللون الوردي بس لا تكليله انا احب اللون الوردي لان اذا
عرف احتمال يروح يبدلهم بلون اسود
بس هيج قسطاً بية

خلص الغدا وهوسته وراحوا بيت خوالهم ونسوانهم
ولليل حوراء شوية بدت تصحصح وكعدت ويانا على العشا

كان الكل موجود بس جلال ماكو
مهيمن ياكل وهو معصب وكالب الجهرة
وام مهيمن تحجي وية حوراء علمود تاكل

ونور بغير وادي هي الثانية ما اعرف شبيها
ام مهيمن كالت .. اكول يمة مهيمن شوكت
نروح نخطب نغم يعني اني اكول صار هواي على وفاة بيت خال جلال وانت حتى لو بس خطوبة بالبداية من تدور السنة نسوي العرس احتراماً لجلال

باوعت لمهيمن جمدت معالم وجهه

انعصر گلبي وابتسمت
وكلت اعاند جروحي
.. اي صدك خالة اجيتي بوكتج شوكت موعد العرس صارلنا شكد ما فرحانين نريد نشوف عرس ونفرح
تعبنا من الحزن والكأبة

يتبع

احداث البارت القادم

ريم.. مهيمن انت بأي حق تقررهيج امر مهم
عني بدون ما تاخذ رأي

ام مهيمن .. احجي كول جاوبها انت ليش سويت هيج

التفتت على ام مهيمن وكلت .. خالة احجي وية ابنج وفهميه ماله حق يتدخل بحياتي

اتمنى لكم قراءة ممتعة
مع تحيات اختكم نهى الحسون