قضية لم الشمل الفصل السادس وثلاثون 36 - بقلم نهى

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
اسعد الله مساءكم ❤️

اليوم اعتذر منكم على الخلل الي حصل في الصبح بتنزيل البارت الخامس
بس صادف اختكم اليوم كاعدة
كاعدة تكتب بالبارت على الميز وانگلب كلاص الماي عالنقال واني بسرعة كعدت امسح بالشاشة حتى لايصير بالنقال شي وما اشوف روحي الا وانا ناشرة البارت بدون ما انتبه
فهاي المرة مسحوها بوجهي عالخلل الصار

🌹🌹🌹🌹🌹🌹🌹🌹🌹🌹🌹🌹🌹🌹🌹

جلال
ظلام وضياع
كلمتين تلخص كل حياتي الماضي والحاضر والمستقبل
حياتي مالها طعم ولا لون
كاره كل شي بحياتي حتى روحي

مر شهر عالصار وانا كل ليلة اتصارع وية عقلي واعصر ذاكرتي احاول اتذكر بذيج الليلة شسويت
وشنو حجيت وية حور

بس مع الاسف ماكو شي
فقط يمر مجرد صور خيالات مثل الحلم بس غير مفهومة ولا واضحة

احس بروحي نكرة مالي وجود بالحياة
كلما اكبر يزيد حقدي على امي وابوي ليش خلفوني اذا كانت نيتهم يشمروني بين مخالب الزمن حتى تمزق احلى سنين بحياتي وتشوه روحي
انا حتى ما عندي هدف بالحياة مثل الخلق والعالم

اباوع داير ما دايري كلها مكائن وسلفان ومواد غذائية
صار المعمل هو كل عالمي
قطعت صلتي بالعالم الخارجي لا اصدقاء ولا اقرباء
حتى عناد رجع من العمرة قبل كم يوم وانا ما رحتله خليت مهيمن يروحله لوحده

اتصل علية يعتب بس ما كلفت نفسي اعتذر منه عن التقصير وهو هم شكله يعرفني ما لح علية

اما مهيمن فهذا بحثاً اخر هذا صار مثل السكين الحادة الي تمزق بضميري كلما اشوفه

اباوع عليه طول هاي الايام الي انا بتت بيها بالمعمل
هو يحوم فوك راسي
راح ينجن حتى يطيح على علتي ويعرف شنو بية

كل مرة يسألني انت شنو قصتك ليش ما تقبل تجي وياي للبيت امي تسأل عليك شنو اكو واحد مسمعك حجاية

من بيت خوالي انت بس كولي والله احرك بيوتهم عليهم

جاوبته وانا ما اتجرأ احط عيني بعينه
.. لا يابة محد مسمعني كلمة وخوالك واولادهم والنعم منهم ناس خيرين ما شفتهم منهم بس الطيب

شكله مهيمن بعده ما ناسي كلام سجاد بيوم عيرني بوجودي ببيت مهيمن

صار مهيمن يتخذ الاعذار حتى يحجي وياي
ويلح علية ساعة يكلي وجهك صاير اصفر وشاحب
هاي يمكن لان تنام بالمعمل وما تاكل عدل

انا ما خايف عليك بس تبقى انت محسوب علية
لاتوكع مريض وتعال مهيمن اركض للدكاترة
كان يحاول بقدر الامكان ما يبين مشاعره اتجاهي

بس رغم محاولاته انا ارفض مو عناد بي وانما
مستحي منه ومن اهله ومن الصار كله
انا حتى خجلان من نفسي
ما عرفت اصون عرض اخوي
انا ما استحق خوفهم وحرصهم علية

كنت كاعد لوحدي سرحان
واتفاجئت سمعت صوت باب المعمل جاي ينفتح
نهضت من مكاني ونزلت البطل بالگاع

اريد اشوف منو الي اجة بهالليل للمعمل
باوعت وكان اشوف عناد

.. عناد هاي شجابك بالليل خوما صاير شي
باوع علية ورفع حاجبه بعتب

.. يعني بشرفك هيج يستقبلون الجاي من بيت الله

اقتربت منه وانا اعدل بملابسي وشعري وجليت صوتي وسلمت عليه وكلت

.. عمرة مقبولة عناد
سحب ايدي واخذني بالاحضان وكال
.. قبل الله اعمالك يوم الالك

بس تعالي كلي يعني انا صارلي فترة من رجعت
حضرتك ما تعرف تكلف روحك وتجي تزورني للبيت وتسلم علية
يعني بشرفك كلتلك راح اسافر للعمرة وارجع

اريد الكة صاحبي جلال الاولي راجع وصاير احسن من قبل
اشو ارجع الكاك صاير فارة وعايشلي بالظلمة

كان يحجي ويباوع للاضاءة المخنفسة مالت المعمل انا
بالحقيقة ما اشغل كل الاضوية بس ضوة واحد
لذلك المعمل صاير عبارة عن مكان مظلم كئيب

.. صدگني احب اكعد بالظلام اصلاً صار جوي المفضل

.. ما تكلي انت شنو سالفتك صاير كلش زفت
شما اجالك تزيد بالبؤس

رجع للخلف يعاين شكلي وعفس خشمه وسألني بشك
.. جلال شنو هاي الريحة الكريهة

كان يحجي وياي وعيونه تدور داير مادايري
عن شي

.. زين انت ليش هيج هامل روحك
.. كلشي ما بية هذا واكف كدامك جني صل

.. دباوع لروحك وشوف شكلك وجهك شاحب ولحيتك طولانة وحالتك حالة
.. صدگني مالي خلك اهتم بنفسي واصلاً المن اعدل بروحي

.. يا اخي ما يصير الي كاعد تسوي ترة كلنا راحولنا اعزاز مثلك بس محد سوة سوايتك هاي
بس الظاهر شكلك انت ....

كان يحجي لكن فجاءة قطع كلامه واتسعت عيونه على المكان الي كنت كاعد بي قبل شوية
كان مصدوم

مشى من يمي واتوجه لمكاني واشر على البطل باصبعه متقزز ومستنكر

وكال بغضب .. ولك جلال هذا شنو معقولة انت كمت تشرب

.. شنو يعني ترة انا لا اول واحد يشرب ولا اخر واحد

.. ليش ولك جلال احجي كول شنو الي وازاك ودفعك شرب هذا السم اصلاً ليش تمشي بهذا الطريق الاظلم

مو كافي الي صار بيك وبعائلة خالك.
هاي بدال ما تعقل وتتعض وتتقرب لله
تروح تكعد تصيع
والله ما كنت متوقع هذا الشي يطلع منك

كان عناد يحجي بغضب ولوم ويتحرك بالمكان
يجمع بالبطالة ويخليهم بالعلاگة

.. انت شكاعد تسوي
عناد جاوبني وهو يتجه بعلاگة الشرب برة المعمل

جاوبني .. هسة تشوف بعينك شراح اسوي
طلعت وراه برة المعمل
وكلتله.. عناد رحمة على والديك رجعهم
هالشي خاص بية اشرب سم احرك روحي اكل تبن انا بكيفي محد له دخل بية

ما جاوبني اباوع عليه شمر العلاكة بالحاوية مالت الزبل
سمعت صوت تكسر البطالة
بعدها طلع من جيبه جداحة
وشغلها وشمرها. بالحاوية واحتركت مخلفات الحاوية ومن ضمنها المشروب

بقيت اباوع للنار شلون تلتهب احس بيها تشبه روحي
اقتربت عليه بغضب وحجيت
.. انت شسويت
عناد ترة انت هواي اتعديت حدودك

وكف بوجهي بتحدي وكال
.. لمن تشوف صاحبك الي قاسمته الزاد والملح
جاي يروح بنفسه للتهلكة بساعتها مستحيل تكدر تبقى
تباوع عليه وما تسوي شي

وانا يا صاحبي لا تتوقع مني اشوفك تدمر نفسك وابقى
مكتف ايدي واباوع

انهى كلامه ولزمني من ذراعي وسحبني وراه
حجيت وياه معترض

.. عناد شنو وين ماخذني بالله شو عوف ايدي
.. تعال وياي وانت تعرف

اتجه بية للحمامات مالت العمال وفتح الدوش ودفعني
جوة الماي وكال
.. شوف كدامك ربع ساعة تسبح وتزين لحيتك

سألني وين مخلي ادوات الحلاقة وملابسك النظيفة
اشرتله على غرفة المكتب لان انا هناك انام
وبيها كل اشيائي

.. تمام انت اسبح وانا راح اجيبهم الك
طلعت من الحمام وعلى راسي المنشفة

باوع علية يعاين شكلي
.. اي هسة صرت بشر هاك الزم
شمر علية المعطر الرجالي لكيته

وكعدنا انا وياه بالمكتب
باوع للمكتب وكال .. انت تنام هنا
.. اي
.. زين شلون بعشاك وغداك وريوكك يعني ما جاي اشوف اي اثر للاكل شلون مدبر امورك
زين شعجب مهيمن ساكت عنك

.. اسكت لا تذكرني بي هذا اللاخ هم لزكة بس مو حشري مثلك كل يوم يجي يزن على راسي مثل المرة العجوز ومن يشوف ما مني فايدة ولا يحصل مني جواب يدور وجهه ويروح وهو يدردم ومعصب

باوع علية وكال .. انت ليش هيج تسوي
تصد اقرب الناس الك شنو غايتك

.. ما اريد اتعلق بأحد ولا اريد الناس تبني علية امال وتتعلق بية وانا اعرف بروحي راح اخذلهم
مثلما خذلت الي قبلهم ادري بروحي مو كفو
ولو تدري انا شسويت من مصيبة بحق اخوي واختي
جان ما باوعت بوجهي ولا كلت علية هذا صاحبي

بقى عناد وياي الليل كله يستمع لمخاوفي واخطائي وذنوبي كنت احجي وياه من غير ما احس
بعدما خلصنا كل كلامنا

باوع لساعته ونهض من مكانه وكال .. حيييل صارت الساعة ب١ ونص هسة الكة الوالد حارك الدنيا وانا عايف النقال بالسيارة

طلع من جيبة سلسلة معلقة بيها سبيكة مستطيلة وشمرها علية وگال
.. هاك الزم

لكفتها من عنده .. هاي شنو
.. هاي الك جبتها من العمرة اية الكرسي نقشت عليها اسمك علكها برگبتك احتاريت شجيبلك مناك وصارت هاي بوجهي اخذت وحدة الك وحدة الي

رفعت السلسلة كدام عيني اعاين عليها واسمي يلمع على سطحها الفضي

ريم

بالسيارة بالطريق للكلية
مثل كل مرة مؤمل يوصلنا

من صعدنا بالسيارة ومؤمل حاطه عالصامت وكل شوية يجلي صوته مثل الضايج شكله عنده شي يريد يكوله

حور همست يم اذني .. هذا شبي اليوم
.. ما اعرف شكله مصبح على عركة ببيتهم

لكن فاجئنا انا وحور بسؤاله الي

.. ريم ممكن اسألج سؤال
..اتفضل

.. بالحقيقة انا ما اريد اسببلج احراج بس انا ما اكدر ما اسألج

.. كول مؤمل اسأل اني اسمعك
.. قبل فترة. اني والوالد حجينا وية مهيمن طلبت ايدج .
وطول هاي الفترة احنا كنا ننتظر الرد

بس مهيمن الله يحفظه طول علينا وما بين منه شي

بس البارحة ابوي سأله وذكره بالموضوع
ومهيمن بلغنا بالرفض

بس حبيت اعرف شنو سبب رفضج الي
يعني انت سامعة شي عني او عندج شروط
احب اسمع منج

كان مؤمل يحجي وانا مصدومة
لكن صدمتي مو من طلب مؤمل وانما مصدومة من تصرف مهيمن الغريب وهالشي زاد غيضي وشعل النار بگلبي

رفعت راسي وباوعت لمؤمل الي كان يباوعلي من مراية السيارة وكلت

.. شوف مؤمل بالحقيقة انت فاجئتني بكلامك
اصلاً اني ما عندي علم بالموضوع كله ولا احد سألني اواخذ رأيي بالموضوع

كنت احجي وحور تكرص بية وتهمس بصوت ناصي
.. عزة بعينج لج ريم شخبصتي سكتي

لكن مؤمل فجأءة وقف السيارة والتفت علية متعجب من كلامي وكال

.. ريم انتي متأكدة من كلامج ؟؟؟
رادت حوراء تجاوبه لكن اني سبقتها

حوراء.. ها لا ريم مو قص.....
قاطعت كلامها وكلت
.. اي نعم مؤمل اني متأكدة من كلامي
مؤمل جاوبني وهو متفاجئ وهو يراجع بكلام مهيمن
.. اي بس مهيمن كال ....
لكن شكله انتبه لفقرة كانت فايتته
وقطع كلامه ورص على اسنانه بغيض

وكال وهو يشغل السيارة
.. الظاهر اكو كلام لازم ينحجي وية ابن عمتي

هو يحجي وحور تضرب على كيف على خدودها

وصلنا للدوام وراح راسا والنية واضحة من عيونه

حوراء.. عزة بعينج ريم شسويتي من مصيبة
هسة مؤمل راح يروح لمهيمن وتصير مشكلة الله يعلم بيها

رفعت حاجبي وكلت .. يستاهل محد كله يقرر هيج شي مهم عني
تركتها ورحت لدوامي ماريد اتاخر على محاضرتي

مهيمن

كاعد بالمحل واذن الظهر والعمال بعدهم جاي
يحملون بالبضاعة للزباين

كنت كاعد عالمكتب اسجل بالقوائم
ودك نقالي والمتصل الحجية

رديت وجان اسمع صوتها يرعد من القهر
.. الو ها يمة خيرج ليش تصيحين

جاوبتني .. شوف ولك هسة تعزل محلك وتجي للبيت
اليوم لو انا لو انت بالبيت

.. شكو شصاير هسة غير تفهمني شنو الصار
.. تجي وانا اعلمك وافهمك شصار

ياوعت للساعة .. صار انتظريني فد ساعة اخلص شغلي واعزل المحل واجي لان عندي مشترية

انهيت الاتصال وانا اضرب اخماس بأسداس شكو
امي مو من عوايدها تعصب وتصيح علية

رحعت لشغلي بالمحل واتصالات وية جلال حتى انقله القوائم ويحملها من المعمل ويجيبوها للمحل

وقبل لا انهي الاتصال وياه سألته
.. شنو شلونها معدتك اليوم ما صارت احسن
.. لا والله شما كلما جالها تسوء بس اتوقع الالم بسبب اكلة غريبة خربت على معدتي

..والله يا جلال حيرتني بزماني ما جاي اعرف راسك من رجليك انت ليش ما تسمع الكلام وترجع للبيت وتخلي امي تدير بالها عليك مو احسن من هاي اللطلطة

..مهيمن خليني براحتي
بعدها غير الموضوع على شفل المكاين والمواد الغذائية

وهذا حال جلال كلما احجي وياه هيج يتهرب مني
بالبداية كلت خليه يروح يكعد بالمعمل يمكن يريد ينسى
او يكعد لوحده يقضي فترة حزنه كل واحد بينا عنده طريقة يعبر عن حزنه

بس اشو هذا فترة حزنه طولت وساءت حالته
والمشكلة هو رجال ما اكدر اجبره على شي
وهذا انا ظال ما جاي اكدر اوكع على علته

خلصت شغلي ورجعت للبيت ولكيت امي خابصة الامة والوجه ما يكصه السيف

.. ها يمة الله يساعدج
.. الله لا يساعدني ولا يخليني على هاي المصيبة

.. ها يمة خيرج شنو سامعة شي
.. اي والله يمة تعال كلي انت شحاجي وية خالك حسن وابنه البارحة

.. كل شي ما حاجي ليش شنو سامعة

كانت لا بسة عبايتها وكالت
.. هذا انت ما اكدر اخذ منك لا حق ولا باطل
تلوع گلبي بالكلام وما راح تكولي الصحيح

.. هسة انا غير اعرف خالي شنو حاجي وياج حتى اجاوبج

.. شوف ولك هسة تكوم تروح وياي لبيت خالك وهناك
يصير كلشي كدامي

.. يالله امشي بس انت اهدي شوية لا يرتفع ضغطج
وتوكعين علينا

عدلت عبايتها على راسها ومشت من كدامي وكالت ..
من عساني بالموت شنو قابل انت تخاف علية

مشيت وراها وجاوبتها وانا اباوع لنظرات نور المتسائلة
.. اسم الله عليج يمة بية ولا بيج

وصلنا لبيت خالي حسن كان بيتهم قريب علينا
ودكينا الباب وطلعلنا مؤمل

وهذا الثاني كالب الخلقة علية شكو شبي هذا منو دايس على ذيله

سلم على امي وما سلم علية
عاد منا انا شلون احبه ومنا هو يسوي هيج حركات
لبسته ودخلت
للبيت لكيت خالي حسن نفس الوجه الثكيل الزعلان

سلم على امي وحجة وياي
.. سالفتك اليوم ما تتسولف اطلب بت عمك من عندك لابني تجي وتكلي ماكو قسمة ونصيب يم بنت عمي
وانا الغشيم بكل ضني الرفض صدر من البنية

اثاري البنية اي علم ماعندها بالموضوع انت حتى ما مبلغها ولا ماخذ رايها انت من يمك رفضت ابن خالك

ليش بوية شنو سامع عنا
شنو حضرتك ما تتشرف تزوج بنت عمك لابني
لو مو من المقام احنا

امي كالت .. لا حشاك خوية انت وابنك والنعم منكم انتوا اهل الخير والاصل بس مهيمن ما جان يقصد

قاطعت كلامها وكلت
.. لا يمة انا جنت اقصد فعلا انا اشوف
ان بنت عمي ما تصلح لمؤمل مرة ولا هويصلح لبنت عمي. يعني هواي فرق بينهم

مؤمل جاوبني بغضب
.. مو انت الي تقرر عني
انا راضي بيها واعرف شنو الي يصلحلي

هديت عليه وامي صارت كدامي

حجيت بغضب .. اكل تبن انت شلون تتجرأ تروح تحجي وية بنت عمي من وراي ها ولك

.. مهيمن لا تكعد تصيح وتاكلنا بلسانك
انا ما سويت شي غلط ولا اتجاوزت حدودي
انا رجال جبير وهي بنية جبيرة يعني احنا الثنين ناضجين وحبيت اعرف واسمع منها شنو سبب رفضها

بس بنت عمك اتفاجئت بكلامي وطلع ما عندها علم بالموضوع يعني الرفض صادر من عندك وهالشي مو من حقك الا اللهم انت ما تتشرف بنسبنا

خالي كمل على كلام ابنه .. اكيد ما يتشرف بنسبنا
والا شنو تفسير سوايته هاي

اباوع لامي شهكت وضربت على صدرها
.. يمة صخام شلون ما يتشرف بنسبكم وين كاعدين
ليش خوية تحجي هيج مهيمن ما جان هذا قصده هو
بس يعرف بنت عمه ان هي مو كفو زواج

قاطعت كلام امي ضايج ما احب احد يقلل من قدرها
كدام الناس حتى لو جان خالي

.. يمة ماله داعي تكعدين تحجين بعيوب بنت عمي هذا الشي ما ارضى بي

باوعت لخالي وكلت
.. وخالي حسن يعرفني كلش زين مو من طبعي اقلل من مقدار احد وخصوصا خوالي

والحليم تكفيه الاشارة وبقت يمهم بعد هم بكيفهم
كلمن يفسر الموضوع على هواه

كام خالي حسن وكال
.. هاي هي كلامك كله مفهوم ومثل ما كلت كل شي
قسمة ونصيب ومثل ما حضرتك رديت طلبنا ورفضت تزوج بنت عمك لابني
انا هم نفس الشي اكلك ما عندك مرة يمي ولا عندك يمي نصيب

جاوبته وانا رافع راسي .. هذا هو خالي صار خالي يجرالك الي تريده.

هو كال هيج وامي شهكت ولطمت على صدرها
وكالت .. عفو عليك خوية شلون تحجي هيج
شجاب موضوع زواج بنت عمه على زواج بنتك وابني
ترة ماكو اي ربط بالموضوع
بس خوية كول انت ما تريد تنطينا مرة وتزوجنا بنتك
والله زعلتني عليك

كام خالي من مكانه وكال.. زهرة مالها داعي تزعلين
اتقبلوا موضوع رفضنا مثلما احنا تقبلنا موضوع رفضكم

امي جاوبتها .. يعني صارت وحدة بوحدة هاي هي

اباوع لأمي عدلت عباتها على راسها وكالت
.. هاي هي كوم يمة مهيمن امشينا مالي كعدة بهذا البيت بعد

اباوع لخالي حسن وجهه كام ينطي الوان
انا اعرف خوالي كلش زين عندهم زعل امي كلش جبير وما يهون عليهم يزعلوها

من فتحت عيوني عالدنيا ما يوم احد سمع امي حجاية تزعلها

نور

كاعدة بالبيت لوحدي كانت الساعة تقريباً بالوحدة ونص الظهر ومهيمن وامه صارلهم فترة من راحوا لبيت اخوها حسن من كلام ام مهيمن مبين اكو شي صاير
سمعت اسم ريم بالموضوع
ملتهية احلل بكيفي
ودك نقالي وكان المتصل صديقتي اسيل

وبشرتني بخطوبتها وكلش فرحت وسألتها
.. لج اسيل وابن عمج الي كان ناهي عليج شسوى من سمع بخطوبتج من واحد غيره

.. اهوو سكتي حرك الدنيا بس بابا الله يخلي حطله حد
وكله اعلى ما بخيلك اركبه بنتي وافقت وانا وية بنتي
وصارت لخة بين عمامي وبابا بس بابا

بقى ثابت ومعند على قراره لج نور ما تشوفيني شكد جنت خايفة وحاطة گلبي بشيشة لا بابا يضعف ويتأثر
بكلامهم ويغير رأيه

.. الحمدلله عدت على خير هسة عوفج منهم وكوليلي. شنو سويتي من تحضيرات العرس
وبدت اسيل تحجيلي واني كلش فرحانة

وصرت اساعدها بالاختيارات مال بدلة العرس
وشكو شي كنت احب اسوي وافكر اسوي بعرسي
اكولها عليه لان اني واسيل واحد احب لها الي احبه لنفسي
خلصت المكالمة واني فرحانة لاسيل وصرت ادعيلها من كل گلبي اسيل وامها كانوا اصحاب فضل كبير علية ما انساه الهم

سمعت صوت الجرس ورحت فتحت الباب
ودخلوا البنات حوراء وريم

سلموا علية
حوراء .. نور شنو امي وين ؟؟

باوعت لريم وكلت .. امج ومهيمن صارلهم تقريباً ساعة من راحوا لبيت خالج حسن ولحد الان ما رجعوا
ما اعرف شنو صاير

حوراء التفتت على ريم وكالت
.. ها ريم شفتي مو كلتلج مؤمل وخالي اذا عرفوا بالموضوع ما راح يسكتون وراح يعتبرون رفض مهيمن اهانة الهم

سألتها وانا اباوع لريم .. ليش هو شنو صاير
جاوبتني ريم وهي تدخل للغرفة
.. خلي حوراء تكلج الموضوع انا داخلة اغير ملابسي

ريم دخلت للغرفة وحوراء كعدت تحجيلي عن الموضوع وانا ما متفاجئة من تصرف مهيمن اصلا
هذا التصرف الوحيد الي متوقعته من مهيمن

اني وحوراء واكفات بالمطبخ
كنا نحجي ودخلت ام مهيمن ومهيمن عبارة عن عاصفة ترابية

هي تحجي وهو يحجي وراها شكلهم صارت عركة ببيت خالهم

راحوا للهول واني وحوراء رحنا وراهم والفضول يقرة الف

ام مهيمن .. هسة ارتاحيت يمة من خربت بيني وبين اخوي علمود بنت عمك

جاوبها مهيمن .. ريم مالها دخل انا الي رفضت لا تكعدين تلومين بيها

.. زين گلي فهمني ابن اخوي شنو ناقصه حتى ما تزوجه بنت عمك. يعني اخوي حسن حقه من يزعل
هسة هيج احسنلك
خسرت خالك وبنت خالك علمود بنت عمك
وقسمتها

دخلت ريم للهول وقاطعت كلام ام مهيمن وجانت هي الثانية هم نار من الاعصاب ووكفت كدام مهيمن

ريم.. انت بأي حق تقررهيج امر مهم
عني بدون ما تاخذ رأي

ام مهيمن .. احجي كول جاوبها انت ليش سويت هيج

التفتت على ام مهيمن وكلت .. خالة احجي وية ابنج وفهميه ماله حق يتدخل بحياتي

مهيمن كال .. انا الي كل الحق اولاً انا ابن عمج
واعرف مصلحتج

.. حتى لو ابن عمي هالشي ما ينطيك الحق ترفض الخطابة بدون علمي ترة انا كبيرة وعمري يسمحلي
اقرر مو انت الي تقرر عني

.. شوفي يابت عمي انتي ما دامج عايشة ببيتي وتحت ظلي ابقى انا صاحب الكلمة الاولى والاخيرة. وهنا انا القانون والمسؤل عنج

ريم وجهة صار احمر من الغيض
.. انت ما تذلني ببيتك ولا تحكمني
لا عبالك تحكمني والله اعوفلك البيت واطلع وارض الله واسعة مستحيل اخليك تتحكم بية وتسلب مني حق الاختيار

مهيمن هد عليها امه صارت كدامه تهدي بي
.. كون انتي صدك مرة سويها وعتبي الباب والله رجليج احشها فاهمة

رحت لريم الي كانت تتقاتل وية مهيمن مثل الند
ولزمتها وسحبتها من ايدها اريد اطلعها من الهول لان
الموضوع كلش اتأزم وخاف يصير ما لا يحمد عقباه وهي تحجي بكلام ساعة غضب خاف بعدين. تتندم عليه

ريم .. نور عوفيني خليني افهم ابو راس اليابس ان
هو ما يكدر يخوفني بصوته العالي

اخذتها دفع ودخلتها للغرفة
وقفلت الباب
.. لج ريم بس كافي

سمعت صوت مهيمن يدك على باب الغرفة ويصيح
.. ولج غضب انا اعلمج على منو تكولين ابو راس اليابس

اباوع لريم فتحت حلكها تريد تجاوبه
واني گبل رحت عليها وسديت حلكها

ريم .. اكيد علي........
ما خليتها تكمل

.. ولج ريم ستري علينا ما جاي تشوفينه معصب
بعدت ايدي عن حلكها وكالت

.. واذا معصب وشنو يعني
يعني حضرة السلطان مهيمن اذا يعصب لازم احنا ننحني ونگله سمعاً وطاعة

خلص اليوم والجو متكهرب
ريم بغرفتها. ومهيمن طلع من البيت وام مهيمن خلصتها اتصالات وكل شوية يندك الباب ويدخل واحد من اخوانها او وحدة من نسوان اخوانها

ويكعدون يستفسرون عن الصار اخوها كللها
ما صدكت فهيمة
من كالت اخوي حسن متعارك وية زهرة
وهي طلعت من بيته زعلانة
شنو شجاكم

وبدت ام مهيمن تحجي وتشتكي لاخوها ابو سجاد
كل الصار بينها وبين حسن

حتى اني حفظت المقتل من كد ما كل ساعة تعيده وتحجي بي

صار الليل واتصلت على جلال اتعودت اتصل بجلال
كل يوم بالليل اسأل عنه وعن احواله
من بعد سوايته بحوراء اني قاطعته
بس غصب عني من طال الفراق وما شفته بعد
لكيت نفسي اتصل عليه واسأل عنه

مرات اتمنى اسأله واكله انا مشتاقة لشوفتك
بس الحواجز والقيود بعدها موجودة بينا اني واخواني

وفوك هذا كله جلال وحزنه زاد الامور صعوبة
كان يحجي وياي على كد السؤال
هواي حاولت افتح وياه موضوع ان يرجع للبيت
بس ارجع واتذكر موقف حوراء وابطل

انهيت المكالمة من جلال وكمت من مكاني وطفيت التلفزيون كان الكل نايمين
بس مهيمن بعده كاعد بالحديقة

باوعت للساعة مستغربة شعجب ما نايم هو طبعه ينام من وقت علمود شغله

رحت يمه .. هاي شنو اشو كاعد بالحديقة لوحدك والوقت متأخر

باوع علية بتعب
.. اليوم انام بالحديقة خاف هاي المخبلة تسويها وتغافلنا
وتطلع من البيت

كان يقصد على ريم وبكلامه
طبعا مهيمن بهذا موقفه فضح روحه بحب ريم
وخوفه عليها بس المشكلة

شلون راح يتراهمون اذا كل واحد منهم اعند من الثاني
هاي يحتاجلها معجزة

جاوبته .. اي مهيمن بس هذا مو حل يعني اذا على هالحسبة معناها راح تبقى طول عمرك تنام بالحديقة
لان ريم ما راح تغير قرارها

مهيمن انت لازم تغيير شوية اسلوبك وياها
.. يعني شنو الي بيدي واسوي هذا انا وهاي تصرفاتي
مو بس وياها انا وية الكل هيج

.. اي بس ريم تختلف
ولا تنسى انت الي بديت بكسر گلبها وخذلانك لها
خلي ببالك ترة اغلب تصرفات ريم نابعة من غيضها وغضبها منك فلا تتوقع منها تكعد تطيعك وتسمع كلامك وخصوصا بمثل هيج موضوع الزواج

جر حسرة بتعب وباوع علية وكال
.. شنو الحل برأيج

.. الحل كلش بسيط خليها تسوي الي تريده

.. مستحيل لا تتوقعين مني اخليها تطلع من البيت
كوليلي اسوي اي شي الا هالسالفة مستحيل اقبل اوافق عليها لو على كص رگبتي

ابتسمت وكلت .. هو منو حاجي على طلعتها من البيت
انا قصدي لا تكعد تتحكم بيها

يعني بيني وبينك هي هم من حقها تختار شريك حياتها مثلما انت اختاريت شريكة حياتك
يعني حالها حال اي بنية تنطيها الفرصة هي تقرر

.. هاي هي
بعد منا ورايح اذا احد تقدم لخطبتها اخذ رأيها لست ريم
روحي كوليلها

كمت من مكاني واني ابتسم على شكله
شكد يحاول يكابر بس والله هالرجال مفضوح ياناس

وقبل لا ادخل للبيت كمل كلامه
.. وكوليلها بعد وياج
مهيمن يكول ماكو طلعة من هذا البيت الا على جثته

.. اسم الله عليك ما يحتاج تكول هذ الكلام ريم بنية
عاقلة وواعية. وان حجت بهذا الاسلوب بس علمود تبرهن لك ان هي حرة ومو بعازتك ومتخليك تتحكم بيها

دخلت للبيت واني متعجبة من الموقف
شكلها ريم كدرت تأثر عليه بهذا كلامها وتخلي خايف تنفذه
والدليل كعدته بالحديقة لهذا الوقت

جلال

حاسبت العمال ورحت كعدت بالمكتب
عالكرسي بتعب ما اعرف شجاي يصير وياي
حيل متأذي وتعبان نفسياً وجسدياً

رفعت السلسلة الي بصدري الي جابها عناد قبل ٣ اشهر
وگلبتها على ظهرها

وباوعت عالاسماء الي حفرتها بظهرها
وابتسمت حفرت اجمل اسامي مرت بحياتي
غمضت عيوني وانا اتذكر ابتساماتهم ولمعت عيونهم

انفتح الباب ودخل عناد وهو معصب
طبعاً علاقتي انا وعناد مثل المد والجزر ساعة متصافين وساعة نتعارك واغلب مشاكلي وياه على
الشرب

صاير هواي يفرض نفسه ويتدخل
بس رغم مشاكلنا يرجع من جديد يوم ثاني يحجي وياي ولا كأنما صاير شي بينا واليوم نفس الشي

وكف يمي وكال .. كوم اتحرك
باوعتله .. وين اكوم
.. تعال وياي انا ضايج واريد اتعشا برة

.. وانا شكو جاي علية شنو قابل انا امك واكعد اوكلك
.. بدون لغوة زايدة كوم وانت ساكت عدل جهرتك
حتى ما يطردونا من المطعم

.. ليش هم يطولون جلال يدخل عليهم
.. اسمع منو اليحجي خاب ما تشوف شكلك بالمرايا
بالاول

دخلنا للمطعم وانا يمكن للمرة الالف انافخ بضجر

عناد دار وجهه علية وكال
.. انت ظل انفخ بيك ما بيك لحد ما تطك وتطير
سلم علينا ابو المطعم شكله يعرف عناد ورحنا
كعدنا عالميز

وعناد طلبلنا اكل ضربتني ريحة الاكل ومعدتي صاحب بية زعلانة مثل المهضومة ما زايرها الاكل الحقيقي صارلها فترة طويلة يمكن من يوم الي طلعت من بيت مهيمن

كعدنا ناكل ونسولف انا وعناد
عناد .. جلال شوكت ناوي تبطل من هالسم
تركت الخبز من ايدي ورجعت بگعدتي اتكأت عالكرسي وكلت بضجر

.. اهووو هم رجعنا لهذا الموضوع شنو سالفتك انت ما تتعب

.. لا ما اتعب وراح ابقى وراك وراك لحد ما اشوفك
تترك هالزفت الي جاي تهلك روحك بي

غمضت عيوني وما جاوبته
.. عليك الله شوف روحك شلون شاحب
ارجع شوف حياتك وانهض بروحك من جديد

انت ليش ما تباوع للجانب الحلو من حياتك
ان الله انطاك اخ واخت يحبونك ويخافون عليك
ليش ما تلتفت الهم وتبدي ترجع علاقتك وياهم تحافظ عليها

جنا نحجي
وصادف مر من يمنا جماعتنا ومن ضمنهم عدنان
سلموا علينا

ما حسيت الا وعناد طفر من مكانه وراح
زنك عدنان من قميصه وانطاه كلة براسها

اسمعه يكله .. ولك عدنان العار انا امنتك على صاحبي
ارجع الكاه ضايع بشرب السم

عدنان بصياح وهو يتلاوة وية عناد
.. شنو صاحبك قابل هو جاهل وانت تحاسبني عليه ترة انا ما ضربته على ايده ولا جبرته هو راح برجليه وبرضاته

يتبع

احداث البارت القادم
حوراء
خايفة وكلبي يرعد اباوع عليه
صرت اتلفت منا ومنا ماكو احد موجود بس اني وحدي بالبيت
وهزيت راسي بخوف
وغصب عني نزلت دموعي

وحجيت بتحذير.. اياني وياك تقترب مني

اتمنى لكم قراءة ممتعة
مع تحيات اختكم نهى الحسون