قضية لم الشمل الفصل السابع وثلاثون 37 - بقلم نهى

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
اسعد الله مساءكم ❤️

جلال

طلعت من المطعم

كنت اسمع صوت عناد طلع وراي وهو يسب ويغلط ويلعن بعدنان

كانوا جماعة عناد يهدونه برة المطعم
اسمعه يكللهم رجعوا كملوا عشاكم انا اهم شي بردت گلبي بالناقص بعد ما عندي شي وياه روحوا دخلوا للمطعم

كنت منطيهم ظهري وواكف عالشارع العام
اجة اقترب مني

وانا التفتت عليه وزنكته من قمصيه
وحجيت بغيض .. انت شلون تتعارك وية عدنان
وتحاسبه علمودي انا مو طفل وواحد يقشمرني ويضحك علية

عناد ترة انا وصل حدي
وبعد ما اتحمل تدخلاتك بحياتي لهنا وتنتهي يا اخي كافي

نتر ايدي ودفعني وكال .. اي انت طفل لان تصرفاتك ثبتت هالشي مو انا

.. شوف عناد. حدك لهنا وكل شي ينتهي انت لو عندك ذرة كرامة بعد ما توصل يمي ولا تدخل باي شي يخصني فاهم يا اخي كافي خنكتني من يوم الاكشر الي اتعرفت بي عليك وصاحبتك

ما اشوف الا عناد ضربني على وحهي ببوكسي ووكعني بالكاع

.. انت واحد حيوان وغبي وما تستاهل الواحد يطلع
يتعارك وراك لان انت مو كفو وما ينشد بيك الظهر

انت ضايج لان تدخلت بحياتك
عاد هي شلون حياة حلوة الي انت عايشها وانا اتدخلت بيها خاب من نارك تاكل حطبك
وعساك بأبو زايد متكلي انا على شنو حارك دمي ومقهور

جاوبته وانا امسح بطرف شفتي .. اني ادري ماتكول لروحك
انت الي لاطش على عمري وتفتر وراي

.. هاي جلال بعد انتهت وياك لو اشوفك تموت كدامي ما يرفلي جفن

تركني عناد واكف بنص الشارع ومشى وهو معصب
صحت وراه بصوت عالي حتى احرك جميع الجسور الي بيني وبينه

.. اريدك تكون بكد كلمتك مو باجر تجيني وترجع تحجي وياي وكأنه شيئاً لم يكن

صاح بصوت عالي بكل غضب وهو منطيني ظهره وجاي يمشي

.. اكل تبن عااااااار لا اجي اكسر سنونك

وهذا اخر كارت احترك وخسرته حاله حال البقية

حوراء

احبه واخاف من قربه هذا حالي وية جلال
بعد الصار بية وياه حالتي النفسية اتدمرت

واخذت لي شهر لا ليلي ليل ولا نهاري نهار
ما اعرف شبية لا اني مريضة ولا اني صاحية
جلال من يوم الحادث بعد ما شفته ولا سمعت عنه خبر

مرت علية الايام وبدت فسلجية جسمي وعقلي يتأقلم ويرجع لتوازنه الطبيعي حتى يمارس الحياة

بعاد جلال عن البيت ساعد بشفائي
ولكن بعدما مرت فترة طويلة فاجئتني نور بكلامها عن جلال
وعرفت ان نور يوم ثاني حجت وياه
المفاجئة الاكبر ان جلال طلع ما يتذكر اي شي من هذا الصار كله

يمكن عدم معرفته بالسواه وياي
خلة جزء من گلبي يلين ويتخذله الاعذار
اما عقلي بعده مجهز دافاعاته ورافض فكر السلام
نهائياً. وصار الشهر شهرين وثلاثة

ويوم عن يوم المساحة الي بگلبي بدت تتوسع لحدما
فاض بية الحنين لشوفة جلال
طال الفراق وزاد الحنين لكيت نفسي اتسمع اخباره من مهيمن ونور
كنت مرات اكعد وية نفسي واتسائل شنو راح تكون ردت فعلي اذا التقيت وياه

ارتعد جسمي وخفق گلبي معقولة بعدني اخاف منه
اريده واخاف منه ياربي شنو هاي المعادلة الغريبة
الي كاعد اخوض بيها

انتبهت نور جاي تتمشى بالهول تروح وترجع وتحجي بالنقال وية خالتها

خلصت الاتصال وباوعت علية
وسألتني .. خوما زعجتج بتلفوني وانتي جاي تدرسين

.. لا عادي اصلاً بعدني ما بلشت بالقراءة
المهم انتي طمنيني خالتج شلونها
جاوبتني نور .. خالتي زينة اتعودت عليها مثل كل مرة تتصل علية تسألني عن اخواني وبنت عمي

وشنو سويتي وويامن حجيتي وشوكت نمتي وين طلعتي
ولا وهسة تسألني عن جلال ليش طالع من البيت

.. وهي شمدريها بجلال مو بالبيت

.. مو هي الله يحفظها ما تخلي سؤال ما تكوله وتظل تسحب بلساني واني مثل الغبية انسى روحي واكعد احجيلها عنهم

.. هاي خالتج داهية
.. لا خطية حبابة بس انا اعرف منو وراها ويلقنها الحجي لا ونوب تسألني عن مهيمن وريم تكلي تزوجوا لو بعدهم

.. يالله هاك استلم وتكلي لا خطية خالتي
عمي ماكو خطية الا انتي

نور خلي اكلج شغلة ترة انتي هواي على نياتج
.. ليش تكولين هيج
.. لان انا الي ما اعرف بيت خالتج ورجلها
هم دك جرس عندي وعرفت سبب مداومة خالتج بالاتصال عليج وسؤالها عن اخوانج ووجودهم يمج

.. ما افتهمت قصدج
.. انا اكلج لان خالتج ورجلها بيوم الي اجوي وحجوا
وية مهيمن عن الامانة وان هم يخافون عليج خاف تعيشين لوحدج بوكتها

مهيمن وعدهم وكال اختنا تعيش يمنا مادام احنا موجودين نشم الهوى وعود من تشوفونها عايشة
بالبيت لوحدها بدون ما انا لو جلال موجودين عودك بذاك الوكت الكم الحق تخافون عليها وتجون تاخذونها تعيش يمكم

فما تشوفيها كلما تتصل تسأل عنهم
.. اي صحيح اتذكر هذا الحجي صار
بس الله لا يكولها ان شاء الله يطول بعمر اخواني وما يحوجني لبيت خالتي

جلال

الساعة عشرة بالليل
لازم النقال واتصل على جماعتي الي بالموصل
وانا اتعشم ان يكونون سمعوا خبر عن سلوان حتى اهله
جاي يدورون عليه

كنت احجي وياهم ولازم معدتي احس سكاكين بمعدتي
الم موطبيعي صارلي ثلاث ايام على هالحال
ما اعرف شكاعد يصير بية شربت مسكن وحبوب للمعدة بس ماكو نتيجة

رحت دخلت للمكتب واتمددت بفراشي بلكي من انام
ترتاح شوية

دك نقالي وكان المتصل مهيمن
سألني عن عدد الحبوب المخزونة بالمخزن لان يريد
يجرد

.. شنو جلال شبي صوتك تعبان ؟؟
.. ما بية شي بس شوية مغص لزمني اخذت دوة
وهسة ترتاح

.. اكول جلال شنو انت وعناد متعاركين
.. ليش منو كلك
.. الحجي ابو حيدركال عناد وجلال متعاركين وما يتحاجون
.. اي صحيح
.. اكدر اعرف شنو سبب زعلكم وانتوا اصدقاء

.. هيج موضوع تافه وكبر وانا دست زايد على عناد بالحجي
.. والله يا جلال حتى عناد ما خلص منك
صدك شجاك ولك ما ناوي تنعدل لو شنو

حسيت بلوية قوية بمعدتي خلتني انكمش على نفسي من الالم جاوبته وانا موجوع

.. الله كريم مهيمن لا تشيل همنا انا وعناد متعودين عالزعل مو جديدة علينا

كنت احجي وياه واتذكر كلامي الجارح وية عناد بذاك اليوم وفعلاً هاي اول مرة يطول الزعل بيني وبينه

انهيت الاتصال وصرت اتلوى من الالم لازم معدتي
ساعة اغفى من الوجع وساعة افز
اخير شي بعد ما اتحملت نهضت على حيلي

اروح للمستشفى احسن
انا كمت وانا معدتي كلبت
وصرت اتقيء

عرك كل جسمي. سمعت صوت بالمعمل
التفتت بالكوة ولكيت حيدر وعناد واكفين وراي

وكعت على ركبتي وكلت .. عناد الحكلي راح اموت
ما لحكت اكمل الجملة
ولكيت عناد يمي يرفعني من الكاع

واجة وياه حيدر
يسندني

حيدر.. ولك جلال احجي شبيك شصابك
عناد جاوبه.. عوفه هذا واحد غبي شكله يحاول ينتحر
حجة وياي بغيض

ولك بختك بسيارة الحمل الي وصلت من الميناء
هي الي خلتنا نجي للمعمل والا جان هسة انت ميت مثل الجلب

حيدرفتح باب السيارة وعناد صاح على سايق سيارة الحمل بصوت عالي وهو يصعدني بالسيارة

.. حيدر انت ابقى يم ابو كاظم انتظر العمال ينزلون البضاعة
وتعال ورانا

شغل السيارة وراح بية للمستشفى
التفت يباوع علية وكال .. تستاهل كله من ايدك

ما رديت لان انا مو بحال اكعد اجاوبه
وصلنا للمستشفى واستلمني دكتور مقيم وبعد الفحوصات والتحاليل والسونار.

طلب منا يسولي ناظور للمعدة
وعناد اخذني لعيادة خاصة وهنا سوولي الناظور وطلع عندي قرحة مزمنة. والدكتور كال راح انطيك علاج مؤقت ونشوف اذا ما جاب نتيجة لازم نسوي عملية

وبهاي الاثناء دخل علينا مهيمن وجهه مخطوف
شكله حيدر متصل عليه وبلغه
وكعد يستفسر من الدكتور عن حالتي واخذ منه التعليمات
انطوني ابرة مسكنة. وكومة علاج

مهيمن.. شوف جلال بعد ماكو مبيت بالمعمل هسة ترجع وياي للبيت

عناد.. والله احسن شي تسوي تاخذه وياك للبيت
لان هذا اخوك غبي يهلك روحه ما يعرف مصلحته

ماكدرت اناقشهم او اعترض
كان مفعول الابرة بدة يبدي وبديت احس بالنعاس
لان تقريباً صارلي ٣ ايام ما نايم زين

حوراء
كعدت اتمغط بالفراش واني ما مصدكة روحي اليوم ماداومت لان عدنا سفرة فما رحت فضلت ارتاح بالبيت لان تعبت من كثر الدوام

باوعت لسرير كناري شفته فارغ اكيد داومت
باوعت للساعة لكيتها بالعشرة
حيل اني باقية للعشرة نايمة شعجب محد كعدتني

نهضت من فراشي وغسلت وجهي ورحت عالمطبخ شنو السالفة البيت هدوء وين نور وامي

فتحت الطباخ وحطيت قوري الجاي عالنار
سمعت صوت واحد يجلي صوته

اخترعت والتفتت بسرعة
وجان عيوني توكع على جلال گلبي ارتعد
وارتديت للخلف من الخوف واني اباوع لجلال

او بالاحرى شبح جلال
حيل ضعفان

شفته اتقدم يريد يدخل للمطبخ وفتح حلكه يريد يحجي

صرت اتلفت منا ومنا ماكو احد موجود بس اني وحدي بالبيت
وهزيت راسي بخوف
وغصب عني نزلت دموعي

وحجيت وياه بتحذير .. اياني وياك تقترب مني

مد ايده للامام برجاء وكال
.. حور احلفج بالله لا تخافين مني
ومسحي دموعج لاتبجين
والله ما راح ااذيج

كان صوته بي نبرت تعب
غطيت وجهي بكفوف ايدية واستمريت بالبجي
بس هالمرة صرت ابجي مو خوفاً منه وانما ابجي
على حاله لان بصوته الدافي هديء كل مخاوفي
واتحولت مخاوفي الى حزن عليه

.. حور مسحي دموعج اذا تردين هسة اعوف البيت واطلع حتى تتطمنين ويهدي بالج
انا ما عندي نية بأذيتج والصار اعرف ما ينغفر
بس ثقي بالله انا لحد هذا يومي ادفع ضريبة افعالي

دار وجهه والتفت وانطاني ظهره وكال
.. انا رايح ما راح ابقى بالبيت

اتوجه للباب يريد يطلع
ما حسيت على نفسي من صحت وراه انادي بأسمه
من بين دموعي
.. لحظة جلال لا تروح ارجع
ما اكدر اخليك تطلع من البيت علمودي
واكون سبب بفراقك عن اخوانك وانت مبين عليك من شكلك بأشد الحاجة الهم ولرعايتهم
فابقى هنا بالبيت

واني راح اعتبرك ماموجود

باوع علية وعيونه الخضرة ذبلانة للحظة اتمنيت
اخذه لحظني وامحي نظرة الالم من عيونه
رجف گلبي مو بيدي رغم السواه ابقى احبه
وابقى احن عليه

وكال .. حور اعرف بروحي ما استحق السماح
بس اترجاج تسامحيني
صدگيني برضاج وبمسامحتج الي راح توهبني بصيص امل ينور حياتي الظلمة

باوعت عليه بتفكير وجريت حسرة وكلت
.. اسامحك لكن بشرط
.. گولي اي شي تطلبينه يجرالج عسى تطلبين الروح ترخصلج

.. جلال اذا تريدني اسامحك وراح ارجع مثل ما كنا قبل
بس اريدك بالاول توعدني ان تبطل تشرب
وتحلفلي واعتبر روحك طول هاي الفترة انت بأمتحان

وكف كدامي وباوع علية .. اوعدج ووعد الحر دين
اوعدج يحرم علية الشرب منا للموت

يمكن كل الي صار بيني وبين جلال سبب لحتي يكون
حل لحالته

ابتسمت وكلت بتحذير.. من هسة اكلك بعد ماكو نوم فوك السطح لان مهيمن بنى القاط الثاني والسطح كان مهربك ما احبه

ابتسم وكال.. هذا هو يجرالك جعف.....
حور

رفعت حاجبي وكلت .. لاتخاف ما راح ازعل على لقب جعفوري
تريد اصبلك جاي وياي

كنا نحجي ودخلت نور ولافة راسها بمنشفة شكلها كانت
بالحمام تسبح

شافت جلال وكالت .. ها بشرني شلون صرت
.. لا زين احسن من البارحة
.. اسويلك ريوك

..

..

ريم
كنت واكفة وية صديقاتي يم البوابة انتظر السايق
وهن هم ينتظرن خطهم يجي عليهم

هم يسولفون بينهم واني كان عقلي وتفكيري بوادي ثاني
طول هاي الايام الي مرت
وانا اراقب مهيمن شلون ملتهي ومشغول بالبناء

اشوفه متحمس ويحتار شنو يحط اسمعه يحجي وية الاسطى يكله اريد كلشي من الدرجة الاولى

واسمعه يحجي وية ابو الديكور الصباغ
وكله الالوان راح اخلي الاهل يختارون. بس انت جيب وياك الكاتلوك مال الالوان والاصباغ حتى يشوفون ويختارون كنت اشوفه متلهف

اكيد يكون هيج متلهف مو هذا بيت العمر الي راح يجمعه وية بنت خاله

شكد احاول اقنع گلبي
وكله ان الخلقه خلق غيره خليه يروح يشوف حياته
شنو قابل راح توكف الدنيا عليه

بس غصب عني الكة روحي وعيوني تراقبه
وتجر الحسرة ورة الحسرة صرت احسد نغم
للحظة اتمنيت ان هذا الاهتمام يكون من نصيبي

رغم النار الكايدة بداخل صدري كنت احاول
اكون مو مهتمة واتصنع اللامبالاة وياه

انتبهت على صوت هورن السايق
سلمت عالبنات
كان السايق جديد مهيمن اجر غير مؤمل
لان بعد الصار صارت مقاطعة بينهم وبين بيت خالهم حسن

السايق متعود يمر علية بالاول وبعدين نروح على حوراء
ومن مرينا على حوراء حتى ناخذها
نزلت حتى اشوفها وين وصارت بوجهي نغم بنت خالها
اشو هاي خزرتني ودارت وجها وراحت وية صديقتها

عبالك كاتلة اهلها
ثول وعمى

حوراء.. ها شبيج اشو واكفة تدردمين لوحدج
.. جنت احجي على هاي بنت خالج الغبية

صعدنا بالسيارة وسألتني
.. شنو شبيها نغم
.. اشو شافتني وخزرتني بعيونها ودارت وجها هي وصديقتها عبالك كاتلة ابوها والحمدلله على هيج عقول
يعني حضرتها زعلانة لان ما وافقت على اخوها عابت لهيج شكول

حوراء.. ولج لا هي مو علمود اخوها حاقدة عليج
.. لعد علمود شنو
.. لج مو انتي الله يحفظج اكلتينا بلسانج والتهيتي تتعاركين وية مهيمن وما تدرين شنو الصار

.. ليش شنو الصار
.. انا مو كلتلج مؤمل وخالي ما راح يسكتون على الصار وخصوصاً انتي الله يحفظج حرگتي فلم مهيمن يمهم ليش ما خالي من عرف بالرفض صادر من مهيمن زعل وكال

على سوايتك هاي بعد ما الك مرة عندي

كمزت من مكاني والتفتت على حور
.. حلفي كولي والله يعني مهيمن ما راح يتزوج بنت خالكم حسن

.. لا حبيبتي اتفركشت وامي حلفت وتكول بعد هاي هي انتهت وياهم بعد حسن لو يصوغ بنته ذهب ما ازوجها
لأبني ما دام ردني

حور تحجي وانا كوة لازمة روحي حتى ما ابين فرحتي كدامها ما اعرف شنو صار بمشاعري
كانت شماتة بمهيمن على فرحة ان اكو حاجة عزيزة رجعتلي

عقلي وگلبي غاصوا بعالمهم
وگلبي كان صاحب الفرحة الكبيرة لانه فاز برهانه
على عقلي
گلبي راهن عقلي بيوم وكع بحب مهيمن وكال
هو الي ما يصير لغيري

وعقلي كان ماعاجبه الكلام وراهن عليه وكال
هذا كلبه من صخر ما راح يحن عليج

وهسة احس بفرحة كأن حقي رجعلي محتارة شلون اتشفى بمهيمن

باوعت لحوراء وسألتها
.. اكول حور شنو كانت ردت فعل مهيمن بتجاه رفض خاله اكيد ضاج لان بعد ما راح يتزوج نغم

.. ما سوى شي انا سمعته يحجي وية امي وكللها الخلقها خلق غيرها شنو ماكو بالعالم مرة بس بنت اخوج

.. اها اني توقعت ان هو راح يضوج لان كانت نغم اختياره ومطابقة لجميع مواصفات الزوجة الي يريدها

كنت گوة لازمة روحي لا ابين انتصاري

بالبيت وقت العصر
كعدت من النوم وعدلت شعري وحطيته صفح
وكفت كدام المرايا مالت المغسلة وحجيت وية حوراء

.. تدرين شعري طولان لكتفي يحتاج اروح للصالون اعدل الكصة مالته

سمعتني ام مهيمن وكالت .. يا خالة شلون ينطيج گلبج
وتكصينه
.. ما احب الشعر الطويل اتخبل منه احس بروحي ما مرتبة ما يلوكلي

سمعت صوت احد جاي ينزل من الدرج
رفعت راسي ولكيت مهيمن يباوع عليه وعيونه راحت
تعاين شعري

گلبت عيوني بغرور وهزيت شعري بدلع حركتي المفضلة

جان شايل سطل مال صبغ
وملابسه متلفة بنقط الصبغ
باوع علية وجاوب امه وهو يمر من يمنا وكال
.. هو انوثة المرة وحلاتها بشعرها الطويل.

يمة هو انا كال هيج وطلع وانا احس بروحي نار كامت تطلع من اذاني من الغيض شنو قصده
يعني اني ما بية انوثة

راح طلع السطل ورجع يريد يصعد فوك شكله عنده شغل فوك

جاوبت خالتي حتى اسمعه
.. حبيبتي خالة اني انوثتي تكمل بشعري القصير
وهالشي يميزني عن الباقين

كمل صعود الدرج ولا كأنه سمع شي
قهرني بروده وتكبره

باوعت لنور شايلة كلاص الجاي وتريد تصعد فوك
سألتها هذا المن
.. لمهيمن
.. ليش مهيمن فوك لوحده يعني ماكو فوك عمال
.. لا ماكو العمال طلعوا قبل ساعة

.. اها لعد انطيني الجاي اني اصعده له
رفعت حاجبها وكالت .. ها ريم على شنو ناوية

اقتربت منها واخذت الكوب من ايدها وكلت
.. لا تخافين على اخوج مني ما راح اسويله شي

رحت صعدت فوك واني اتفحص البناء والتغيرات
هاي شنو عالم ثاني الاخ گالب دقلة يعني صدك انجاز
وانقلاب

اباوع للسيراميك والارضية تحفة
دخلت عليه كان موجود بغرفة بصفها حمام
كان صاعد عالدرج جاي يشتغل بالكهرباء
ونازع التشيرت وباقي بس الجينز

جنت داخلة وانا متحلفة اتشمت بي وبرفض خاله اله
بس اشو انقلبت الادوار ونسيت نفسي على شنو انا جاية
كان رافع راسه ما انتبه لوجودي بالغرفة

بديت اتمعن بي وبشكله وجسمه كان عركان من الحر بحيث شعره مبلل سهيت ونسيت نفسي
اول مرة اشوف مهيمن هيج كان هواي ملتزم ومستحيل
ينزع تشيرته كدامنا انا ونور الا بغرفته

مسح كصته من الحر ورجع يضبط الوايرات
باوعت للجاي الحار الي بيدي شيحس الاخ وطالب جاي على هالحر

بلعت ريگي وجليت صوتي وكلت مهيمن هذا الجاي
بسرعة دنك باوع علية وكال

.. خلي يمج وطلعي وانا من اخلص انزل اشربه
حطيته بالكاع على كيف
وصرت اتفحص بالغرفة كان الغرفة بعدها ما مصبوغة
بس بياض وكانت علب الاصباغ بالكاع والسطل والفرش كلها موجودة ريحة الصبغ عاطة الفوك كله

رجع كرر كلامه.. انا مو كلت خلي الجاي واتوكلي
رفعت حاجبي وباوعت عليه كان بعده يشتغل
ورافع راسه

جاوبته.. ما عاجبني اطلع اريد اشوف شنو سويت
بالقاط الثاني بس حرامات راح تعبك عالخالي بلاش

.. ليش
.. لان خالك ضربك بوري وما راح يزوجك بنته
يعني كل الي بنيته انهدم.

عزة هو انا كلت هيج وهو اهتز الدرج وكام ينزل عالسريع

وهو يهدر بصوته ونوب الغرفة هي منا فارغة وهو صوته يرعد احس كلبي ارتعد واذاني طوطت

مهيمن يتحلف.. وحق الكعبة اليوم اذا ما ابلعج كلامج هذا ما اطلع مهيمن

والله اذا لزمني يموتني شكلي زودتها
عزة طفر من الدرج واني التفتت وطكيتها ركضة
وصلت اريد اطلع من الغرفة وكان اسمع

من وراي صوت عالي واتبعها لعنات مهيمن
.. من احترك ابو اصلج
التفتت لكيت مهيمن متعثر بسطل الصبغ وواكع بالكاع

شهكت ورحت عليه ركعت يمه بس بدون ما الامس الكاع لان صارت لخة من الصبغ لا تتلف ملابسي

.. شنو خو ما اتأذيت اي غير تنتبه
ما احس الا مهيمن يعيط بية ولزمني من زندي وقربني
عليه اجيت اوكع على صدره الاشعرة

مهيمن .. ولج غضب بلاء انتي شلون تتجرئين وتحجين وياي بهاي الطريقة بس هو مو صوجج صوجي انا الي
عايفج على حل شعرج بس لهنا وحدج
الا اادبج من جديد

باوعت بعيونه نية العقاب وخفت من الجاي ورة هذا الغضب
بلعت ريكي وحجيت .. ششنو مهيمن شراح تسوي

انتظري وانتي تشوفين
ما اشوف والا وايد مهيمن غطها بسطلة الصبغ
وهزيت راسي وعطت

بس ما لحكت اسوي شي لان مهيمن طلع ايده المليانة صبغ. ابيض ولطشها على وجهي وخدودي

كان بعده مقيدني ما يخليني ابتعد
واني صرت اعيط
.. ولك لا مهيمن خبيث الا وجهي

بس هو وين جان مستمتع يحتفل بنتصاره
رجع غمس ايده مرة الثانية
وهالمرة مسح الصبغ على شفايفي وانا ضربته بصدره
بقبضة ايدي والتفت بوجهي اريد ابعده عنه

.. مجنون انت شسويت
فاجئني من كام يضحك

وانا عيوني دمعت من الموقف
صدك بجيت شعري وخدودي وشفايفي كلهم اتلفوا صبغ

جان يضحك على شكلي من حركة كلبي كلبت العلبة مالت الصبغ وهو كان بعده كاعده بالكاع

كمز من مكانه لكن بعد فوات الاوان وصار بنطرونه كله صبغ

دفعته واختل توازنه وكعد على الصبغ
صاح .. اشتعلتي نار نفط
وانا استغليت الفرصة حتى اكوم من مكاني وانهزم بعيد عنه لكن هو نهض مثل الفهد وكان اسرع مني وجرني من شعري وكال

.. دتعاي اليوم لو انا لو انتي

التفتت عليه وعيوني لمعت بالدموع وحجيت
.. عوف شعري جاي تأذيني

انتبه على روحه وهد شعري بسرعة وجلى صوته وباوع على روحه ورجع باوع لوجهي وكال
.. شفتي لوين وصلنا لسانج وشسوى بينا

ابتعدت عنه وكلت اتحلف بي وصوتي يبجي
.. والله العظيم اذا ما راح الصبغ من شعري لو يصير على بشرتي شي احرك القاط الثاني كله وكول كالت ريم

ورفعت صبعي وكلت .. شوف هالمرة صارت وسحبتني من شعري مرت الثانية اذا انعادت صدگني ما اتردد لحظة وحدة والكط ايدك بعضة كون ازرع اسناني بيها

هسة عرفت انت ليش تريد المرية شعرها طريل حتى تكعد تسحل بيها مثل الخروف من شعرها
كنت احجي واتلمس بشعري
تركته يضحك وكال .. عفية عليج صايرة خوش تحللين

نزلت من فوك وملابسي وشعري وجهي ملطخة بالصبغ حصرتني البجية ياربي هسة اكيد وجهي راح يتحسس

نور شافت شكلي وكالت
.. والله عرفت وكلت ورة هاي صعدتج راح تصير كارثة وما خاب ضني بيج

تركتها واتوجهت للحمام واني ادردم
لاكتني ام مهيمن وشهكت
.. يا خالة هذا ياهو مسوي بيج هيج

.. خالة هذا ابنج الخبيث سوة بية هيج
.. يا خايبة شجاه فقد عقله وسوى بيج هيج

تركتها ودخلت للحمام

جلال
نهضت من مكاني بأنتصار وصحت بصوت عالي
وخيراااااااااا

دخل علية عناد وباوع لشكلي ورجع باوع بتجاه نظراتي كنت اباوع عالجهاز الي

كدرت اطوره واحدثه
سألني .. شكو شبيك تصيح

.. عناد شايف هذا الجهاز
اشر بستهزاء وكال.. قصدك هذا الخردة

.. حقك اليجهلك ما يثمنك
لو تعرف قيمته جان ما كلت عنه خردة

صرت اشرح لعناد عن اهمية الجهاز وهو بقى متفاجيء

حياتي كلها تغريت من يوم قطعت الوعد لحور
وبمساعدة مهيمن كدرت اترك الشرب وارجع بالتدريج
لحياتي

اول شي سويته بعدما قطعت الوعد
التقيت بعناد واعتذرت منه
عن كل الي بدر مني اتقبل اعتذاري
ورجعت علاقتنا مثل قبل واقوى

وبديت اتقرب من نور ومهيمن ولكيتهم منتظريني
بفارغ الصبر حتى ارجعلهم ذاك جلال الاولي

حتى باربي كانت منتظرتني وفاجئتني من انطتني دفتر المخطط الخاص بالجهاز وكالت اتوقع انت تحتاج
دفتر الحلم جنت ضامته الك

وفعلا اخذته منها ورجعت اكمل الي هجرته
مديت ايدي على صدري حتى ارفع السلسلة وابوسها
احس هالسلسلة فال خير علية

لكن انصدمت ماهي شنو السلسلة وين
عناد انتبه علية وكال

.. ترة انت اول ما وصلت للمعمل السلسة ما كانت موجودة على صدرك

عقدت حواجبي مستغرب استغفر الله وين نسيتها

يتبع

احداث البارت القادم

نور
مهيمن والوجه اظلم رحت عليه ولزمته من قميصه وسألته
.. مهيمن كلي فهمني اخونا وين اختفى
ليش ما جاي تلكاه

يتبع

اتمنى لكم قراءة ممتعة
مع تحيات اختكم نهى الحسون