رواية قضية طلاق الفصل العاشر 10 - بقلم Aseel🤗

مرحبا حبايبي ..

قضية طلاق .
بقلم Aseel

بارت ١١
.........

رشا : احساس بداخلي مو طبيعي بين الفرح وبين الحزن .. فرحت لان سمعت صوتة لصهيب ..وحزن لان صعب ننجمع بعد.

ليش مااكدر اكرهة انوب احبة اكثر ..
ربي نسي الي والله مالي حيل ابد ..

مر كم يوم ومهيمن يتصل وماجاوب ابد لان مالي خلكة من هسة يصدك بغيري ..

بهذني الايام عماد كام يحاول يقنع بامي حتة تخطبلة حبيبتة الظاهر اهلها قبلو ..

يومية نفس الحوار ينعاد بين امي وعماد ..

عماد: يمة لخاطر الله بس كليلي ليش

ام سامر :كتلك اكثر من مرة بنية لا نعرفها ولا عدها ساس من راس شلون اخطبها الك انت تخبلت .

عماد :يمة شنو ماعدها ساس عدها امها وزوج امها واخوانها وعمام وخوال شنو الي يمنع هذا الشي ..

ام سامر:البنية مو راحة ابني افهم مبينة من شكلها مو راحة ..

عماد:يمة انتي شعرفتي عنها حتة تكولين مو راحة ..

ام سامر:انت بلسانك كلت نطلع ونطب سوة يعني اكو اهل ميسألون بنتهم وين رايحة ووين جاية .

عماد:اوووف يمة الف مرة كتلج همة عائلة متحررة .. هسة شنو المانع اخطبها واني مااتزوج هسة الة اكون روحي ..وفترة خطوبة اذا ماعجبتج افصخ .

ام سامر:اي واني طفلة نونو حتة تقشمرني بهلحجي ..

عماد:يعني ليش بس اني مو سامر اخذ الي يحبها ورشا انطيتوها للي تحبة ..من جيتو ليمي كمتو دورون غريب وقريب

ام سامر :اولا سامر مااخذ غريبة بنت عمنا ونعرفها من الصغر ..

ورشا الي حبتة جوارينة وبعمرها ما طلعت وطبت ويا ..حتة بالخطوبة ..

عماد:اي وتالي شسوة بيها مو عافها هذا الجوارين .

ام سامر :هسة انت شتريد تقارن روحك بخوانك ..
ماما لا تعاندي تتندم والله البنية مو راحة مارتاحيتلها مبينة تتنعوص .

عماد :يمة هية صوتها هيج بتلفون والله عادية .

ام سامر:اني معلية روح شوف ابوك من يجي اني امشي بشورة بس من هسة اكلك اني مراضية حتة لو طبت بيتي ..

عماد:انطيها فرصة لا تحكمين بالشكل ..

ام سامر :انشالله الله كريم .

.رشا : ابوية وافق يروح يخطبها وراحو وسألو عليها جانو جديد كاعدين بمنطقتهم ..فراحو لمنطقتهم القديمة الناس جانو يحجون انو زوج امها راعي مشاكل وسكير بس ابوية كال اهم شي عندي البنية شعلينا بزوج امها ..

تمت الخطبة ومشية الزلم .وعقدو سيد ..
جان بيومها الجو كئيب ولا عبالك عدنة خطوبة امي مراضية من ورة خشمها تهلهل لان ابنها مهما يكون بس مراضية على العروس ..

واني مقهورة على زهرة الي حالتها تنتكس يوم بعد يوم .. ومن يوم ماعرفت بالخطبة هية اختفت ..

لبست فستان عادي ورحنا لبيت العروس .. جانت ويانا بنات هواي ونسوان عمامي وخوالي .. وبناتهم .

طبينا وتم كلشي وعلت صوت الهلاهل .. بس لي خبلني بناتهم كلة لبس ملزك على الجسم وتاتو ونفخ وشد وعدسات .. عبالك كويتيات من التجميل .

خو العروس كلة صناعي .. الفلر والرموش والعدسات ونافخة خدودها ونحت خشمها

وذبت لحم بالخطوبة عبالك ممصدكة حتة نسوانة انتقدنها لان احنة ماعدنة هيج صح العروس تركص بس مو لهدرجة من عقدو لهسة هية ماكعدت بس تركص ..

طب عماد فدوة لطولة شكد طالع يخبل لابس قاط نيلي ولون عيونة السمائي بارز ويا قميصة السمائي ..

احلة منها ..مو لان اخوية بس صدك احلة منها ..

لبسها الحلقة بس.... لان ورة المحكمة يشترون الذهب .

بس شنو غير تخجل كومنة ويركص وياهن وهوة كام يصب عرك خجل حيل مسويات دائرة عليه ويركصن وهوة وسجى بالنص وكلساع وحدة مايلة عليه تهز بجتفها ..

يعني حسيت روحي بملهى والله.
حتة لعبت نفسي شهلخفة .

سهام صافنة وامي صافنة على حظها .

ونسوان عمامي وخوالي كلمن اخذلة شريك ويسولف بيهن .. يعني مهزلة حيل. .

والاضرب جتي الام لابسة بنطلون فيزون وبدي ربع ردان للكمر لون احمر وهية فيلة والشعر اصفر صارخ وتجميل ..

بحيث ردت ابجي على حظ اخوية شوكعة بعائلة كاولية..

وتركص الاماية عبالك عرس ابنها وامي سودة علية وصلت الدمعة بطرف عيونها من القهر ..

شاورتها .

يمة يلة خل نروح خاف سهام تعبت ..

ام سامر :يلة يمة حاجي اخوج خل يفكها عاد .

رشا:ماشي .. رحت عليه كوة وصلتلة ..

عمااد ... عمادد ..

عماد :ها رشاوي ..

رشا :يلة حبيبي امي تريد تروح سهام حيل تعبت وهية هم تعبت .

عماد:يلة ماشي تحضرو ..

عاد طلع قبلنة واحنة لبسنة وطلعنة وراه ولكينة ابوية راجع باقي بس سامر برة ..

رحنا للبيت وامي طبت تلطم ..

ام سامر:ولك ماخذلي وحدة كاولية ابن الزفرة ..من تالي عمري النسوان تتبسبس على ابني .

عماد:يمة شبيج ترة كتلج عائلة ماحررة يعني مابيها شي واني علية بالبنية من تجي اعلمها على طبعنا .

ام سامر :ولك اسكت اسكت انت شفت امها ولك منين جبتلي هاي المصيبة كتلك مو راحة عاندتني ..

ابو سامر :اهدي اشوية لا تكسرين فرحتة خلي براحتة هاي حياتة وهوة حر بيها الي علينة نصحناه وماسمع .

رشا:ماما ارتاحي لا يرتفع ضغطج فدوة لخاطري.

ام سامر :ولكم ماتحسون بناري يمة الحكيني ..

رشا :عماد روح من يمها حبيبي خل ترتاح .

عماد :بس عماد حب وبس عماد خطب يعني ليش هيج تفرقون ..
عافنة وطلع .

رشا:يمة اهدي حبابة .

ام سامر :ولج يمة انفضحنة بسبب اخوج ..

رشا :بابا هديها والله حتموت ..

ابو سامر:شهدي انتي شفتي زوج امها عبالك مجرم ...
وكل حجية بالفلوس عبالة احنة زناكين .

هيج اريد وهلكد مهر ولج يريد ٥٠ ب٥٠..

امي شهكت ولطمت على صدرها ..
ام سامر: وانشالله قبلت دهج بالشارع والله .

ابو سامر :شقبل منيلي اني هلكد .. كوة نزلناه ل١٠ ب١٥ ..
ولج عجيب بشر ماحترم حتة شيخهم يكلة اني بنتي هواي يجوها ومانطيها لان كلهم حفاي ..

بربج هاي حجاية تنحجي بنص الزلم ..

بس واحد الظاهر الة هيبة عندة كلة كافي لي يامرون بي احنة نشتري رجال متهمنة فلوس ..

بس هوة كام يفور وحتة صار وجها اسود من الاعصاب ومايكدر يحجي .

واخر شي اتفقنة على ١٠ ب١٥ .

ام سامر :يمة منين جتنا هلبلوة .

رشا: يابة كتلك هديها مو خبلها ..حروح اسويلج نومي بصرة هدي اعصابج بي..

ابو سامر:اني هم سويلي هذا فور دمي رجل امها .

رشا:رحت بدلت عسريع وسويتلهم نومي بصرة وانطيتة الهم..وصعدت لعماد اشوفة .

اسمعة يخابر بيها عفتة وكلت بعدين احاجي ..

سويت عشة ومحد اكل سهام كالت مابية اتعشة بعدين اكل وامي وابوية مقهورين ماتعشو سودة علية ..

وعماد عود زعلان ميريد .. وسامر طالع ..
سويتة وغطيتة لان ماشتهي اكل وحدي.

رحت مددت ارتاح شوية جان يدك تلفوني بدون ماانتبه جاوبت ..

الو ..

صهيب: واخيرا رديتي .

رفعت التلفون اشوف الاسم طلع صهيب يبوو على الورطة ناسية احضرة .

نعم تفضل رايد شي.

صهيب :رايدج رشا .

رشا:وبعدين انت وياك .

صهيب :رشا اريد احجيلج كلشي وياريت تفهميني ..

رشا:ماريد اسمع منك شي اكثر من مرة انطيتك فرصة وكتلك احجي وماجاوبت ضاعت فرصتك .

صهيب:احبج بعدني ومافرط بيج .ابد.

رشا:لا الظاهر صحيت من شفتني عشت حياتي واكو غيرك .

صهيب :اشك حلكج اذا تكولين غيرك والله اروح اكتلة الج وانتي تشيلين ذنبي.

رشا:واني شكو بيك احد كلك ادخل بية ..

صهيب:ادخل وغصبن عليج لا تنسين انتي مرتي .

رشا:جنت مرتك مو هسة .. حاليا مايربطني بيك شي .
غير ماضي وذكريات ونسيتها وطلعتك كلك من كلبي

صهيب:حلفي بداعتي انو انتي نسيتيني ..

رشا: هسة انت متصل حتة تريد ترجعني يعني ..

صهيب : احلفي وبس.

رشا :مااحلف لان ميهمني تصدك اولا ..
واني صوجي فتحت خط عبالي مهيمن لو ادري انت فلا اجاوب .

صهيب:انجبي انعل ابوج لابو اذا جبتيةاسمة كدامي بعد والقران اجي اسحلج من بيتكم واشوف رجال يطلعلي ..

رشا :لا تتجاوز زين وغصبن عليك اكو رجال .
وصوجي احجي ويا واحد مثلك .وطبكتة ..

فور دمي خاف اني منا جنت هادية ..

رحت سبحت احس جسمي بوخة بي ..ضليت تقريبا جوة الدوش بالساعة ابجي  . ودموعي تختلط ويا المي ..

ماردت اطلع ابد..

كملت احس روحي فرغت كل دموعي وفرغت شكو شي بكلبي طلعتة ..

طلعت لبست تراك نوم ونمت مرتاحة ..

الصبح كعدت على صوت موبايلي جان مهيمن يتصل ..

رديت .
الو

مهيمن :صباح الخير حبيبتي .

رشا :هلو صباح النور .

مهيمن :واخيرا رديتي ليش هيج زعلج ثكيل علية .

رشا:مجنت اريد احجي وياك وانت بعدك تفكر بالسالفة كلت اخليك ترتاح وتطلع الموضوع من راسك يلة ارد.

مهيمن :والله متندم لان شكيت بيج بس عقل مضل براسي .
عوفينا من الموضوع سدي ..

رشا: ماشي .

مهيمن : شلونج انتي .

رشا :زينة الحمد لله انت شلونك .

مهيمن :والله مشتاقلج وعطشان على شوفتج ..

رشا :مابقة شي للدوام وتشوفني ..

مهيمن :ومنو كلج اكدر اتحمل ..

رشا :يعني شنو .

مهيمن:يعني افتحي بردة غرفتج وتعرفين .

رشا :فتحت البردة واشوفة واكف كبالي ابتسمت لا اراديا ..
هاي شنو شجابك .

مهيمن:مو اكلج مشتاقلج .. وتدرين شغلة جنت حالف اذا اتصلت ومارديتي اطب للبيت واصيحلج ..وشيصير خل يصير.

رشا:انت مخبل والله تسويها .

مهيمن :متدرين شكد احبج ..
اتمنة يجي اليوم الي اسمع هلكلمة منج بس كون من كلبج ..

رشا:هههههه انشالله بس ماوعدك .

مهيمن ادري بيج حقيرة وكلبج اسود من زعلتج هاي عرفتج .

رشا:وشعرفت يمة ..

مهيمن:عرفتج راسج يابس ومن تقفلين دماغج بعد محد يفتحة لو يجي الحمزة .

رشا:ههههههه اويلي .. هيج ماخذ عني فكرة .

مهيمن:ولج سبوعين انتي ماكو عقل مضل براسي .

رشا :هههههه لا هاهية منا وهيج اجاوب.
يلة اني اروح .

مهيمن :اخذي راحتج ومن تكملين دكي علية مشتاق لصوتج حيل ..

رشا :انشالله وانت ارجع لحد يشوفك عيب .

مهيمن :من عيوني .. احبج

رشا:باي ..

مهيمن:دكولي اني هم حتة لو على غير سالفة..

رشا:من يجي وكتها تسمعها مني .

مهيمن :اووف..... انشالله .. ديري بالج على روحج..باي

رشا :انشالله وانت هم باي .

سديتة ونزلت اسوي ريوك لامي وشفت العشة على حطيتة محد ماكل ذبيتة بالزبل همزين مسوية شوية

كعدت امي وابوية جان طالع ..

سوينا ريوك ونزلت سهام كوة تمشي جنها بطريق ..

عماد مقبل يكعد عود زعلان بعد عيني هوة ابو الراهي ..

نزل سامر وتريكنا وامي بغير وادي ..

شكد انقهر من اشوفها صافنة ومقهورة ..

يمة جايج برد ..

ام سامر :ها يمة اي اي هسة اشربة .

رشا:يمة لخاطري كافي لا تسوين بروحج هيج ختولي ..
والله ماعندي غيرج وين اروح اذا صار بيج شي .

ام سامر: يمة شبيدي اني والله مو بيدي لازم انقهر كل مااذكر الاشكال الي شفتها البارحة ..

رشا:يمة شسويلهن خل يولن ميجن لتراب نعالج ..
اهم شي صحتج تنقهرين علمود هيج شكول ..

جرت حسرة واحسها جرت روحها وياها ......
ام سامر :انشالله انشالله.

رشا:كملنا ريوك وكمت اكمل شغل وسهام متكدر اذا ماتنفخ راسها وياي ..

ولج بابا ارتاحي اني اكمل هوة شعدنة احنة .

سهام :ولج والله ماكدر اذا مااشتغل .

رشا:اي مو موزين عليج انتي تتعبين .

سهام :شسوي يعني اضل كاعدة اطك واموت ..

رشا:روحي ثرمي زلاطة .. المهم اشتغلي وانتي كاعدة .

سهام :اووف شوكت اجيب وارجع اشتغل والله تكسرت من الكعدة .

رشا:هههههه غيرج يتمناها والله .

سهام :اي غيري مو اني .

رشا:دروحي دروحي .

راحت وبديت اكمل شغل ...كملت وسبحت لان حار الجو وشهر السادس موت ..

رحت مددت بالغرفة والله ضوجة تعلمت على الدوام
ماحس الة عياط سهام وامي ...

نزلت اتعثر من الدرج جان اشوف ..

يتبع .....

طبعا جدا اعتذر بس اقسم بالله البارت حاضر من قبل لا يقطع النت ومن ردت انشرة انقطع النت وهليام كلها الواتباد ميفتح عندي ..

ماعرف اذا بس اني لو انتو هم .. اتمنة تعذروني .

ملاحظة صغيرة هذا البارت دست نشر من ال٧ .. ماعرف شوكت حينشر ولحد هسة اعيد النشر وماكو

تحياتي Aseel.

لا تنسو التصويت

احبكم 💘💘