رواية قضية طلاق الفصل الحادي عشر 11 - بقلم Aseel🤗

مرحبا حبايبي..

قضية طلاق ..
بقلم Aseel.

بارت ١٢ ..

.......

راحت وبديت اكمل شغل ...كملت وسبحت لان حار الجو وشهر السادس موت ..

رحت مددت بالغرفة والله ضوجة تعلمت على الدوام
ماحس الة عياط سهام وامي ...

نزلت اتعثر من الدرج جان اشوف الكاع كلها دم وسهام لازمة بطنها وتصرخ وامي كامشتها وماكو احد بلبيت بس عماد ..

رحت بدون ماعرف شكو ادكدك على الباب مال غرفة عماد .. فتحلي وعيونة حمر من النوم .

جاوبني ..

عماد :شكو شبيج .

رشا :جانت شفافي ترجف من الخوف كوة طلعت الكلمات مني ..الحك عماد سهام حتموت ..

بس سمع هذن الكلمات ركض نزل جوة جان لابس فانيلة وبجامة ..

وصل ليمها شاف المنظر دار وجها واتصل على سامر حتة يجي .

جان يكول .

عماد :راح اروح اشوف سيارة سامر عما يجي دمهة مصفى ..

رشا صعدي جيبيلي تيشرت بسرعة .

رشا :صعدت اركض واحس رجلي متحملني اخاف من الدم ومنظرة .. شكو شي سيئ اجة ببالي .

لحد هسة ماعرف شبيها وليش هيج صارت ..

انطيتة التيشرت وكلبي يرجف قبل جسمي اباوع عليها وجها اصفر وشفايفها ترجف زركة. ..

والكاع دم ومي .. بس امي كوة حضرتها اني اخاف اتقرب منها ..

اجة عماد جاب السيارة ... اني بعدني صافنة ماعرف شسوي .

امي عاطت بية .
ام سامر :ولج عليمن صافنة على حظي امشي ركضي جيبي جنطة الطفل بسرعة البنية حتروح منعدنة .

رشا :جفلت من عيطتها ورحت ركض جبتها ونطيتها الهم جانو واصلين باب الشارع ..

اخذو سهام وراحو .. ضليت ارجف من الخوف ربي لا تفجعنا بيها ... ادعي بكلبي واني اباوع للسيارة شلون تمشي لحد مااختفت من الفرع ..

سديت الباب ونتجيت على الحايط كعدت ابجي واون .. انفتحت الباب صار سامر بوجهي شاف عيوني الوارمة ..

سامر: ولج رشا سهام شبيها ..

رشا :شهكت وبجيت بجية قوية .. شفت عيونة دمعت ..

سامر :احجي رشا ابوس ايدج ولج وينها محد ديجاوب على تلفونة .

رشا: اخذوها للمستشفى .. ماعرف شبيها بس الكاع نترست دم وامي تعيط .

سامر: غير يجاوب هذا الخرة اخوج ..اريد اعرف وينهم .

الوو وينك لخاطر الكعبة .. يلة جاي .

رشا قفلي الباب وراية ابوية ميجي راح اخابرة مناك يطلع ..

رشا:عافني وطلع سودة علية انخبص خفت لا يسوي حادث ..

قفلت الباب مثل ماكلي .

طبيت للبيت شفت الدم تارس الصالة والمطبخ والحمام ... كمت ابجي واملخ بروحي ..

حيل احبها هوة منو الي ميحبها ..

كمت لحيلي وجبت منظفات وكعدت امسح بالدم . واهمس ربي لا تموتها .. ربي لا تموتها .

صار بية هوس امسح بالكاع اريدها تنظف .. مع العلم نظفت حيل وصار يلمع بس ارجع اعيدة ..

مرت ساعات واني امسح لا خابرو ولا اني خابرت ..
ماكو خبر واخاف اتصل ويكلولي ماتت ..

ظليت انتظر وانتظر لليل سمعت دكت الباب باوعت للساعة جانت ب١٠ ونص بليل ...

رحت صحت ..منوو .

عماد :اني اني افتحي

رشا: ايدي ترجف ولازمة القفل كوة فتحتة طب بس وجهة احمر وعيونة حمر ..

عماد شكو فدوة ..

عماد: وضعها صعب دخلوها للعمليات وسولها ولادة بس لحد هسة ماكعدت لان نزفت هواي .. والاطفال تعبانين حطوهم بالخدج ..ادعيلها ..

جان يحجي وهوة يطب للبيت ..كعد على القنفة كال .
وضعها ميطمن .

رشا: يبوو يبو .. كمت اضرب بخدي .

عماد: اششش كافي ابيش مفاولتها ..

لزمني من ايدي وحضني واني اناشغ وشهكة تطلع احسها من روحي وتجرح بلعومي .. سودة علية سامر..

زين سامر شلونة طمني عنة ..

عماد: اووف شحجيلج ..وضعة يبجي ماخلة نذر مانذرة .. تدرين يكول حتة لو يموتون الجهال اهم شي سهام ترجعلي .. ولج يفتر ويوزع فلوس للفقرة الي برة ويكوللهم ادعو لمرتي تكوم والله ماعندي غيرها .

رشا: متحملت كمت ابجي بصوت عالي وكعدت بالكاع ..سودة علية حبيبي الصبح جانت شمحلاها وتضحك .. وين جانت النا هلمصيبة .

كومني من الكاع وكلي..

عماد: كومي ادعيلها البجي ميفيد ..

رشا :صدك رحت سبحت وتوضيت وصليت صلاة الحاجة ودعيت كل الادعية العندي ضليت لحد صلاة الفجر اني ادعي واصلي وابجي ..

حسيت روحي خوت لان بلا اكل ع الريوك .. وبدون نوم ..

كوة كمت للجرباية مددت وغفيت ..

كعدت الظهر طفرت من مكاني ..نزلت اركض عبالي جابوها ..

نزلت البيت فارغ .. حتة عماد ماكو .. ضليت ابجي وحدي معدتي كامت توجعني حيل ودخت بالموت وصلت للطباخ سويتلي جاي وطلعت جبنة وصمون مال البارحة ..

كعدت اكل وابجي .. تلفوني ماعرف بي وين .. او بالاحرى اني مجنت اريد اعرف وين حتة ماتصلت واسمع خبر مو زين ..

كمت افتر وادعي بهمس .. انفتحت الباب لبرة طفرت ..

طلع ابوية وشايل علاكة ..
اول ماطب حضنتة وابجي ..

ابو سامر :ااششش بوية حبيبتي مابيها شي صحت والله ..

رشا :صدك والله يعني مابيها شي .. والبنات شلونهن.

ابو سامر: البنات بعدهن بالخدج لان نزفت بيهن هواي .

وسهام صحت بس بعدها تعبانة انشالله مابيها شي وترجع تنور بيتنا ..

رشا: انشالله انشالله ..

ابو سامر: هاج حبيبتي هاي جبتلج غدة اكيد لهسة مماكلة ..

رشا: اكلت قبل اشوية جبن وجاي .

ابو سامر: ميخالف هاج خلي يمج لان اني اسبح وابدل وارجع وحضري غراض لامج ملابس الها ولسهام ..

رشا: انشالله بعد يريدون شي .

ابو سامر: لا كلشي متوفر هناك بس ملابس يريدون .

رشا: ميخالف روح ارتاح عما احضرهن .. اكدر اروح وياك .

ابو سامر :لا بوية شسوين جاية ميخلون بس مرافق واحد .. واحنة مكضيها برة كاعدين ..

يعني اذا رحتي تكعدين برة ويانا بالحر.

رشا: ميخالف نتبادل اني وامي خل تجي ترتاح .

ابو سامر: وتتوقعين امج تعوفها .. وانتي تدرين ماعدها ام .. منريد تحس باليتم .

رشا: لعد شيصبرني عليها ..

ابو سامر: انشالله ماكو شي.

كرصني بخفة من حنجي وكمل كلامة ..

روحي بابا حضريلي الحمام اريد اسبح امدد فد ساعة وكعديني .

رشا: ماشي بابا .

رحت حضرت ملابسهم وملابس لابوية وحضرتلة الحمام ..وصعدت اشوف موبايلي حتة اتصل بيهم هسة يلة اجتني القوة اواجه الصار.

دورت عليه طلع مشمور جوة الجرباية ..

فتحتة لكيت ٢٣ مكالمة من مهيمن ورسالتين ..
و٧ مكالمات صهيب ..و٥ امي .

اتصلت على امي وتطمنت عليهمن والكلام لا يخلى من الدموع .. والدعاء من الطرفين .

سديتة منها واني روحي مقبوضة عليهم .. ربي عديها والله صعبة بيوم وليلة تنكلب احوالنة ..

الي فهمتة من امي بعد ماسألتها السبب الي صار وياها ..

كالت .

ام سامر :والله بنيتي جانت يمي تثرم الزلاطة وكامت تحضر طوس حتة توزعهن .. من كامت عثرت بالحصير ووكعت على بطنها والجارة نفطرت ومي الراس طك . ولان هية شهرها صار نزف قوي .

والبنات بسبب النزف تعبانات وتاثير البنج بعدة .

.....
بعد يومين طلعو الحمد لله
ابوية جاب ذبيحة وسامر هم جاب وحدة ..

دخلت واشتغلت الهلاهل من كرايبنة ..
جانت اجواء فرح تعم المكان وخطاطير كومة ومي وعصاير واكل .. بس رغم التعب جان مثل العسل على كلبي اهم شي طلعو بسلامة ..

جانن البنات وياي يتعاونن .. الة زهرة ماكو ..
اسأل صفية عليها تكول ..

صفية :ماشايفتها حتة من اروح الكاها نايمة ...

رشا :سودة علية حبيبتي مجنت ادري بيها هلكد تحبة ..
بس شبيدي عليج ..

كملنة وعدة اول يوم بسلامة وجنت ممصدكة صرت عمة .. خلصنة الخطاطير وطبيت على سهام حظنتها وابجي ..

ولج خوفتيني عليج ردت اموت ..

سهام: بصوت متعوب وكوة تحجي .. بعدوج انشالله حبيبتي ..

رشا: ارتاحي يلة راحو الخطاطير ..

طلعت من يمها ورحت لامي حتة اشوف البنات لان جانت تغسلل الهن هية وخالتي نهاد .. .

اووي فدوة لله يجننن .. عبارة عن لحمة حمرة وكلش صغار .. ماما شسميتوهن ..

ام سامر :.. سامر نذر اذا كامت بسلامة يسمي زهراء وزينب ..

رشا :اووي فدوة الحمد لله الله انطاه وحققلة امنيتة ..

ام سامر :الحمد لله معجزة وكامت بس ماكو شي على الله مستحيل ..

رشا :ونعم بالله .. كملن تغسيل واخذت وحدة منهن بستها بمتنها لان اخاف الزم جلدها اخاف ينشلع هيج جنت اتصور ..

ورجعت شلت الثانية هم نفس الشي ..
عفتهن يرضعن ممة الهن لان سهام مو مال ترضعهن .

رحت لسامر لكيتة امدد بالاستقبال .. رحت عليه حضنتة ونمت بحضنة ..

سامر :هلة حبيبتي .. تعبناج اليوم .

رشا :عسل على كلبي . الحمد لله على سلامتهم .يتربن بعزك حبيبي...

سامر: يوم الالج نفرح بيج وتصيرين ام ..

رشا :ههههه ايس حبيبي ايس . .. يجوز نتزوج اني وبناتك سوة .

سامر :اووف لهدرجة قافلة .

رشا :لا بس مامستعدة بعدني . .

سامر: انشالله الله كريم ..

رشا :كوم اسبح حبيبي واصعد نام بغرفتك ..

سامر :ولج مكسر ياسبح ياصعدة للغرفة ٤ ايام ما نايم ولا متمدد مثل البشر

رشا: يلة لعد خل اروح اجيبلك فراش ...

سامر: بس جيبيلي بطانية كلشي ماريد ولا اكدر اتحرك ..

رشا: ماشي .

اجواء الفرح طغت على البيت بعد مجانت غمامة سودة بس قهر وبجي ..

كملت شغلي بعد ماجبت بطانية لسامر ..

رحت سبحت وصعدت انام ..

شفت تلفوني الي ملازمتة ولا شايفتة شبي مابي.

شفت مهيمن كومة متصل ... دكيت عليه خطية هسة ضل بالة ..

دكيت .. مرة مرتين يلة جاوب ..

مهيمن :الو رشا انتي زينة ..

رشا :اي زينة الحمد لله انت شلونك ..

مهيمن: ياشلوني ميت والله انتي متجاوبين واليوم جيت لبيتكم لكيت اكو هلاهل وزلم بالباب لزمت كلبي عبالي انخطبتي بس اشكري الله انو فكرت قبل لا اتصرف ..

رشا: ههههه وشفكرت بلة .

مهيمن :كلت اسأل يلة اتصرف .

رشا: امم كمل شتتصرف .

مهيمن :اطب اخذج سحل واعقد عليج وغصب عن الكل .

رشا :ههههه بس منو يكلك اني موافقة اتزوجك .

مهيمن: شنو رشا لعد تلعبين علية طبعا نهايتنا زواج واني كتلج من البداية اريد اتقدملج والله بس تكولين تعال باجر ابابج اني .

رشا :لا مو قصدي بس انت تدري اني كتلك نتعرف اول شي وبعدين تتقدم ماريد تتقدم وتصير بعدين مشاكل لا سامح الله وهم ننفصل .. وشراح يخلصني من الحجي ..

مهيمن :ابيش مفاولتنا انتي .. طيرتي واهسي خرب ببليسج ..

رشا .... ضلينا نسولف وختمتها ويا وسديتة
حاولت اتصل على زهرة مغلق. .

اوف ربي بس تخلص الهوسة اروحلها .. امها تكول حتة للدوام متروح ..تكول ماريد اداوم بعد ..

نمت من التعب ..

كعدت ثاني يوم هم هوسة وخطاطير بس الي صار بعد الغدة حدث بلا حرج ...

يتبع ....

تحياتي Aseel .

لا تنسو التصويت .. واطلب منكم الدعم بالمشاهدات حتة تصعد القصة لان هواي يبحثون متطلع ..

احبكم 😃✌🏼