رواية كفي والمنجمه الفصل الحادي والخمسون 51 - بقلم Leo Alfatlawi

باوعتلها متفاجئة أشرت: صدق؟ -أي والله خيه، ولك مؤتمن يخوي اعزل بمرتك نصيحة هههههه. مؤتمن: أي بالعباس ماكو غيرها، لو أضمها بقوطية هم ما أحفظها منها. مصطفى: أنتوا أكيد تخبلتوا، وروح أبوي ما آخذها. هذا تسودن حسباله إنه مؤتمن وراح أهتم لزعله، ما يدري هو والقندرة عندي. مؤتمن: هوبك ثمن كلامك يبن أبوي، لا تتجاوز، زلمة بكد جدك وجبير الديرة، اله مكانته واحترامه، لا تظل تحجي صاعد نازل، شعرفه بنته هيج. -وأنتَ شكو عليك؟

تريد تورطني بوحدة عندها رجولة أكثر مني، والديرة كلها تشهد، ولكم صيتها واصل للصين. جدو: مصطفففى، احترم نفسك، لا تجيب طاريها بالباطل، هاي بنت الشيخ والكل يعرف منهو بناته، موش جاي واحد امتهلف مثلك يجيب طاريهن. -يابه بالعباس زلمة موش مرة، يا عالم زلمة، ولكم محد يعرفها كدي، نص الديرة تعرف زهراء شنهو، تردون تلبسوها براسي، خو كولوا ركب قرون وفضوها. جدي: عبنك باطل وموش زلمة، والبت تاخذها وغصبًا عنك، ونص كلمة ماكو.

-أنتَ مصدق هاي مرة جدي؟ خاف ربك، وين تريد تشمرني؟ يابه أنتوا عليش متصدكوني؟ ولكم جنت أوصل غزل للمدرسة، أشوفها توكف، أتفهي عليها تريد تاكلها، أنوب تخازر وياي مخاز، بالعباس خفت على روحي منها، تكول إنه المتحارش موش هيه. هيفاء: بيو يبوو على حظك يخوي، يله فترة وتتعود، بس هاا اعذرني يخوي، إنه بعد ما أجيكم والله، أخاف على روحي، عود تعال لبيت مؤتمن هناك نتشاوف إذا عزل.

اندارت لمؤتمن كالتله: خو تعزل يخوي ما تظل، لو ناوي تجاسم ليالي بمرتك؟ بعد هاي يمك تظل. مصطفى: من باجر أتجاسم وياه بالعباس، تركعه دفرة بس تشوفه واصل صوبها، خويه شيل مرتك من بالك وتاني رحمة الله، بلكي يلوحك سره لأن البت قافلة على مرتك. مؤتمن جان كاعد منتجي عالحايط يدخن وميت ضحك على سوالف مصطفى الي راح ينط من القهر. لمن جدي كلهم: بسكم، منينلكم هذا الحجي؟ وينج غزل تعالي كربي صوبي. رحت يمه كلتله: كول جدو؟

-شنهو صدق البت اتحارشت بيج؟ احجي الصدق، لا وروح أبوك أكسرج بالعصة. -اليوم ما اتحارشت بس ذبت كم كلمة هيج مو حلوات، وكالت تعالي ما أسويلج شي بس أشمج. مصطفى: هووووب هوووب كافي. جدي: أنتَ اششش ولا كلمة، ما أريد أهيس حسك، هاي مسميها حركشة وجايين تذمون بالبت. مصطفى: جدي چا شلون الحركشة تصير بمفهومك لمن تجيك البت حامل؟ -أنجبب، هاي عود أنتَ التفهم بهيج شغلة، الكبر موش جدتك دوم تكلكم تعالوا أشمكم؟

چا هاي اشفرگ عدكم لو كوه تردون سالفة؟ هو يحجي ودخلوا كاظم ومكرم سلموا وكعدوا، مبين عرفوا بالسالفة لأن يباوعون لمصطفى وكوه كاتمين ضحكتهم. لمن كال جدو: أي كملي، يعني ما حاجتج غير شي لو اتعرضتلج؟ -لا جدو اتعرضت بس بالمدرسة من جنت وياها، بس شغلات عيب. بيبي: أم حلق الفاهي، شنهو العيب هسه تطلع أمصخ من وجهج، احجي خلي نفتهم. -بيبي حكول بس مالي شغل إذا عيب أنتي تتحملين. -احجي لجججج.

-ومرة أخذتني للساحة سحل، كالت تعالي أكولج شي، رحت لبالي صدق، من وصلنا حصرتني هناك دفعتني و... مؤتمن: ووووين كافي لج بت الثولة، وين داخلة بالغميج؟ مصطفى: استلم، هاي شلون آمن روحي وياها إذا ساحلة البت قدام المدرسة كلها ومتحارشة بيها، وتردون تخلوني وياها بغرفة وحدنا؟ مكرم: إنه أترخص، آخذ مرتي وأروح، بعد اعذروني إذا ما أجيتكم، تعالوا ليه بس مصطفى خويه بيتي يتعذرك، لا تجي عود أدزلك الضيافة بيد أخوك.

هيفاء: هههههههه أخ يمه، ولك مصطفى محد راح يستقبلك بعد، كلها تخاف على نسوانها من حرمتك. مصطفى: قصدج رجلي يبعد أخوج، رجلي زلمة البيت، والي بي حظ يعوف مرته هنا ويروح للشغل، حرام يرجع يلكاها حامل، واهااا ترانا ما مسؤول عن الراح يصير. حبيبة: اهاا عليش يخوي؟ خو نسأل مؤتمن ماخذ أختها نفسها أكيد. مصطفى: أي وروح أبوج، إنه شكيت من البداية، من أول يوم دخل مؤتمن طلع وجهه أصفر عرفت الصار.

مؤتمن: هههههههه بويه كافي، أنشوفلنه حل ويه الشيخ ونسد السالفة، شماك راح تموت، شنهو تخبلت أجيب هالس... ه لبيتي؟ بسك لا يصيرلك شي. حبيبة: هيه شنهو الصار متكوليلي؟ شو طلعتوا ورجعتوا ملبسيكم مرة. مصطفى: الثولة أختج داخلة على زهراء لغرفة أخوها، ومتهمتها بالتحرش قدام حريم الديرة، عالأساس مفضوحة وأمهاتها موصلاتها للشيخ، بنته فضحوها ولازم يسترون عليها لأن محد راح يكربلها بعد.

-عزا والله مؤتمن جان وياي بالغرفة، من طلع هيه دخلت، هيه ودعاء عليه حتى دعاء راحت وهيه سوت هجوم. -وأنتي يا المفهية ما عرفتي هذا صوتج الجنه صوت صرصر مسحوك تصرخين بي؟ -والله صرخت وصرخت ااااشكد. -افهه افهه ولكم ناوشوني الماسحة ألطمها بيهااا. -لااابعدين لحكتني سماح وهيفاء، جان هسه الله أعلم اشسوت بيه. -احترقت عشيرتك مؤتمن، مو جنة شامريها بأمريكا هيه وثولها، دكيت رجل إلا أردها عليششش؟

جدو: هذا الحجي كله ما يفيد، البت تاخذها ورجلك فوك راسك، لو لا تجيني على دينار بعد، مالك ولا درهم يمي، حتى بالوصية أشيل اسمك. كالها وكام عافنا راح لغرفته. ظلوا مكرم وكاظم يضحكون على مصطفى الفاك حلقه، شنو يحجي. اندارلي كال: خويه يا كوافيرة ترحيلها بعد أخوج؟ أخذيني وياج أخاف على ساعة جدج الحوالي يزفني وإنه ما مستعد. مؤتمن: أنكتم مصطفىى لا تتجاوز.

-أسكت يخوي، أنتَ آخر واحد تحجي، ماخذ أربع نسوان وجايتك الخامسة، جامثل حظي وحدة وشاربها أثخن من شاربي. -أكل تبن وكوم شوفلي المضمد خلي يبدلي الضماد. كام طلع يتعارك ويه ذبان وجهه وهمه ميتين ضحك. شوية ورن فون مؤتمن، رد: ها يابه... لا تعالي... منهو يجيبج؟ خرب بشكلج، هو منهو الكالج طلعي؟ ... جا يطبج مرض، خليج لا تجين للباب ما أتحرك... لا مصطفى ماهو... أهووو دولي. كالها وغلق الفون. تمدد نام بالكاع،

كالتله هيفاء: عليش تردها يخوي وهيه كلها مشاكل؟ -منهو رادها؟ شفتيني طلعت ورحت وراها؟ هيه تجي مثل ما راحت وحدها، غصبًا عن أهلها، وأريدن أطلع السوته من عيونها. -طلقها يخوي وارتاح. -أطلقها بس موش هسه، يجي يوم وأهفها على أهلها، بس أنطيني صبر آخذ حق السنين وأعمل الي براسي، يكون وقتها جاي. -وهاي اشوكت تهفها على أهلها؟ -منهو غزل قصدج؟ -أي المفهية أم لسان الأعوج، علة قلبك، فراولة، الشيخات، بعد شنهو إلها الألقاب خلي أذكر.

-هم يجي يومها وأدفرها بس خلي أحضرلي أربعة مكانهن وأبدي بالتصفية. كمت كعدت يمه، خليت أيدي على بطنه أشرت: منو تشمر؟ وعصرت بطنه. طفر، كمش أيدي كال: لا دخيلج جاي تأذيني كافي. عصر جف أيدي ورد تمدد لازمها خايف أرد أجمع. ضحكت هيفاء كالتله: تذكر من أجيت أول مرة وسألناك شلون شكلها صاير شكلتنا؟ ههههههه. -أي بعلي غبي شفت الظاهر وانغريت ما أدري راح يطيح حظي بعدين. -لا على شنهو أنطيها لزهراء تتسلى بيها.

-لا أخوي تردها ثاني يوم هم يطيح حظها، هاي كارثة تكرهه بعيشتها. -مؤؤتمن، خلينا ساكتين يخوي، اليسمعك يصدق، ولك ثواني عفتها يمك فتت وراك لكيتها مطكعة، خليتني أطفر، حسبالي زهراء حاصرتها كلت وين لحق هذا. -ششش ولج صوتج، الولد كاعدين يمعودة. -چا لا تحجي لخاطر محد ينتقدك. -منهو الحجي يابه؟ هو العنده كيكة مثل هاي يكدر يحجي، بمناسب الكيك، كيوت وين؟ وين بنتج ولج؟ -شنوو بنتي شنو؟

-ربي منين بليتني بهالبلوة، استلمي أنوب نست هيه مخلفة. اندارلي كال: حبيبي الصدمة مبينة أثرت على عقلج، ترانا عدنا بنت. هيفاء: هههههه أخ يمه، لا تخاف يخوي لكيتها سارحة أخذتها نيمها يم سند. -عزا مؤتمن هاي فضيحة ثانية لازم تسترون على بنتي، أخذيها منها هسه. هيفاء: ولج أنتي أصلاً ناسيتها، لكيت البت تفتر وتعض بالفريخات، طايحة لفروخ مؤتمن عض وجتل، ولك راح تسقط فروخك هاي، أحبسها.

-والله هيه وأمها رادلهن حبس، ذني جاييات مناك ناويات يسقطنه إنه وجهالي. -مؤتمن حبيبي نرجع عادي، تره هناك ماما مبتلية بينا. -جوازاتجن احترقت يعلة قلبه لمؤتمن. -صدق اشوكت تشتريلي غرفة؟ خو مو أظل هنا جوه؟ -ماكو غرفة، شوفيلج جودلية من جدتي دبري روحج بيها. -صدق تحجي؟ يعني دعاء عندها غرفة وأني لا؟ صدق تذكرت لويش ضحكت عليه وخليتني أشتري غرفة لزواجك بيدي.

-لا حول الله فري السالفة فري وردي للنكد، بعدي خلي أكوم أنعل أبو اليفكر ياخذ راحته يم مرة. وخرني وكام للديوانية وهيفاء ميتة من الضحك كالت: فلا تخلين الزلمة مرتاح. -ولج أني شكو هو ما يرضى يشتريلي؟ -ولج غير يشوف دربه من مصيبة لمصيبة، أنطي فكة. ظلينا نسولف شوية ولحكوا مكرم وكاظم لأن كالوا أجه المضمد يبدل الضماد. بقينا أني وهيفاء وسماح، وحبيبة راحت تسوي جاي. دخل مصطفى صاح: جاييي يابه. هيفاء: اشمالك يخوي تصيح؟

على كيفك سوينا. -أنكتمي لج، متجين موو سهلة. -يااا وأنتَ عليش ضايج؟ بس لا تكول راح تشتاقلي لو اكو شي ثاني مضوجك؟ -لا يخوي هيج بطارة ضايج، شنهو اكو أحظ مني راح آخذلي وحدة متحارشة بنص بنات الديرة وتحب مرت أخوي فوكه الزين كله. -هههههههههه أخ بنطي هههه، ولك مصطفى كافي أختك، ولك ترا مؤتمن بده يضوج، لا تجيب طاري حرمته. -خلي يطير مؤتمن، منهو الورطني غيره؟ يله وين جايكم بسرعة خلي ألحك على مؤتمن جاي يضلخون بي خلي أضحكلي شوية.

-رربي شلون ويا هذا؟ ولك مو كال أحلها؟ -من باجر يحلها، هسه جدي يحرمني من الورث، ما عنده مانع حتى ينفيني من الديرة، ابن النطيحة والمتردية، بس بعلي راح ألعب بيهم لعبة إلا أخليهم يطفرون سهلة. كامت وياه للمطبخ تنطي الجاي، أخذها الطريق كله هيه تضحك وهو يدمغ بيها. البيت اشكد حلو والضحكة ماليته لأن ماكو لا عمتي ولا دعاء ورجاء، سبحان الله اشكد شؤم هالبنات.

أتأخر الوقت احتاريت وين أنام، أستحي أروح لسماح لأن شفتها منيمة أطفالها بغرفتها وأمها هيه وكيوت هم يمها. رحت لغرفة بيبي تمددت بالكاع لأن جدو نايم بمكانه اليوم، أنوب غرفة جدو حارة، عجايز يخافون يبردون، منقصين التبريد. استوني دا أنام ودخل مؤتمن أشرلي: كومي تعالي، وطلع. كمت رحت وراه، كمشته من ظهره هو ويمشي، كلتله: تره سماح والأطفال نايمين عيب، أني حنام يم بيبي. -وين تنامين يم بيبي؟ خايبة يا الفاهية ما تسكتين، تعالي وياي.

جر أيدي ورحنا لغرفة دعاء، دخلنا صارت الفرشة مالتها كدامي، عضيت شفتي وابتسمت. باوعلي وضحك كأنما قره الي براسي شنو، كال: لا تفكرين بشي تره ممنوع عليه السبح. ما رديت، والله بطران يريدني أنام بغرفة دعاء وأكعد عاقلة، لو أعرف يصلخون أحشائه من جلده هم أسويلي كارثة بي اليوم، أحرك روحها. راح ذب قميصه وتمدد، رحت للحمام سبحت، مديت راسي من الحمام كلتله: مؤتمن ياهيه منشفتك؟ -البيضة. رجعت أخذتها لفيتها على نفسي، طلعت شعري بنقط مي،

كال: عليش شعرج ما منشفته؟ -مو ما عندي منشفة بس مالتها وتعلب روحي منها. كام فتح الكنتور طلع منشفة ثانية أنطانيها، هم إله لفيت شعري، أباوع لكنتوره شلون مرتبته إله. صفنت حسيت بغيرة لا والله مو غيرة بحركة بقلبي، من فتح الكنتور وطلع المنشفة يعني يندل كل حاجة وهاي غرفته وهيه مرته، شنو الأيام الكضاها بهالغرفة وياها. شنو سوى؟ شلون حضنها؟ شلون باسها؟ حسيته حضني من وراي كال: وين صافنة؟

انداريتله والدمعة بعيني الي ما كدرت أسيطر عليها نزلت. ابتسم ابتسامة مال قهر ومسح الدمعة كال: اشوكت راح تنسين وتعتبرها ما موجودة؟ -من تحس بالحسيته وتصير بغير حضنك، ذاك الوقت تعال احجي هذا الحجي. -ما راح ألحك أحجي وقتها، خله أصابعه براسي على شكل مسدس وضرب راسي كال: هاي راح يكون وقتها كلامي. -وتظل عايش مو؟ -لا ألحكج مخبل، أخليج هناك وحدج، أنوب الولد المخلدون تطفرين بينهم. -هههههه مؤتمن تدري شنو كالت زهراء اليوم؟

أخذ حسرة وجرني للجرباية، تمدد وكال: شنهو؟ هو ويحجي سحبني لحضنه وغطاني. -باوعت لركبتي كالت: لويش هيج من يكرب صوبج ما يرحمج؟ شنو مسوي بيج؟ بس معذور، أنوب أجت رادت تسوي مثلك. -ولج شنهو بس لا خليتيها؟ -هاا لا بس بعد لا تبوسني حيل حباب تره يبقى أثر عيب. ما رد بس اندار صفح مد أيده يمسح برقبتي ويباوع، أدري من أجيب طاريها كدامها أثير غيرته ولهفته بنفس الوقت، مسح العضة مال الصبح، ظل يتحسر الدكتور مانعه.

همست كلتله: مؤتمن يعني إذا عضتني شتحس؟ هاي هم بيها لذة لو هيج مرض بيها؟ -ما أعرف بس أكيد عندها هرمونات ذكورية تسحبها غصبًا عنها. -يعني من عضتني ذيج المرة من شفتي حست بمتع... ما لحكت حتى أكمل الكلمة لأن سحبني إله دنگ عض شفتي وراحت تعليمات الدكتور هبائًا منثورًا... لفيت المنشفة كمت للحمام سبحت وطشرت الحمام بكبره حتى الشي الي ما عتازه شمرته، سويته هوسة مرتبته أم حلق المعفنة.

لفيت المنشفة هالمرة أني اندليت وين ملابس مؤتمن، فتحت الكنتور بس ماكو منشفة بعد، سحبت واحد من قمصانه نشفت شعري، رحت يمه يباوع للكنتور ويضحك لأن خربطته، سحبني لحضنه كال: اشوكت تعقلين متكوليلي؟ -من تبطل تعضني، مو كلتلك تره والله تأذيني أنتَ وما حاس، تعال أجرب بيك وشوف الألم. -لا غزل يبين فشلة من العالم.

أشرت أي وكمت دنگت عليه، هو يدفع وأني أعضه رقبته، والله ما ردت أحسسه بس أريد أشوفها الصبح من تجي شنو سوينا بغرفتها حتى تعرف هيه لا شي وما حاسبلها أي حساب من الأساس. كلما ردت الكفه من مكان يعصر وجهي ويبعدني، ما تركته لمن لحته عضيته بكل حيلي، ما تركته لمن تأكدت صارت علامة، دفعني وكام راح للمراية باوعلها ضاج أجاني كال: أكيد تسودنتي، ولج شلون أطلع باجر هالشكل؟ -من راح تسبح الصبح همه وحدهم حيكتشفون هيج.

-اهاا همزين ذكرتيني، جا تعالي هيه فضيحة فضيحة. كالها وسحبني دنگ لباله راح أمنعه مثل كل مرة، تفاجأه من تفاعلت ويا، ما يدري كل الي ببالي أريد أسودنه بأي وسيلة، صح تعب عليه وطاح حظي وحظ أمي وعشيرتي لأن مؤتمن بدون تفاعل شايطة روحه، مو أنوب أحصل شوية مجال فوك هذا، جان متأذي الحرج يحركه وما يهون يبطل. لمن سمعني أشتم بدعاء والكيد والغيرة. بطلت، ردت بس أفلت بروحي العزيزة لأن ما ناوي يبطل، شافها بعد ما بيها مجال، كمت أتوسل.

رد أنكلب على ظهره وكال: كومي، وإذا طلعتي من الحمام تتنقطين مي، وروح أبوي أرد أطيح حظج وحظ أهلج لو موش تبجين. سحبت الجرجف ورحت للحمام، أنعل بي وأدعي على دعاء، دخلت سبحت ونشفت زين طلعت، رجعت لكنتوره طلعت تيشيرت لبسته وقميص لفيت شعري بين ما ينشف وأشمره، وآخذ غيره ناويه ما أبطل إذا ما أقلب غرفتها وأشوط قلبها.

أجيت تمددت جرني لحظنه، خليت راسي على صدره غمض، ردت أنام ما أكدر، من تذكرت بغرفة دعاء أحس النشاط كله يمي، ظليت أحوص، كعد مؤتمن كال: شلون ما ناوية تنامين اليوم؟ -ما أكدر غمضت عيوني اشكد ما يرحن بالنوم. -أستغفر الله بويه، عدنا خطار الصبح شلون؟ والله أكعد أسولف وكوه مسيطر لا تثاوب بسببج. -مؤتمن الدوشك قوي ضهري وجعني، لويش هيج؟ -لأن ما مستعمل كثير، ضال على ضغطه. -لعد أنتَ وين تنام؟ -بجهنم غزززل نامي بنتي.

أشرت أي وكمت عليه، أخذتلي كم قفزة أول مرة ضاج، أخذه صفنة خاف لا أوقع عليه ويتأذى، أخذه شوية كام يضحك وهز بيده وكعد اتجه، طلع جكارة كال: طفري بويه طفري لمن تتعبين اليوم مبين ما تهيدين أنتي. خله المخدة على ممتلكاته الخاصة، وظل يدخل ويضحك. التيشيرت مالته غاطة بي صايرا لي ثوب وكفشتي بطول تيشيرته من جوه، شكلي تقول جني طالع من الكهف. ما بطلت أتطفر لمن طك السبرنك، كال: خرب بشكلج طك الدوشك، شو تعالي سحبني، طفى

الجكارة وعصرني بحضنه كال: إذا اتحركتي أشلع راسج، اركدي لا أنعل أصلج. -مؤتمن. -يعلة قلبه لمؤتمن، كولي بويه. -بداعت كيتي لا تجذب، كول بعد ما أضوج والله. -المفروض ما أحجي بهيج أمور بس بلكي هذا يريحج، صح كربتلها بس وحق زرق ربي ولا ليلة نيمتها بحضني. -مؤتمن لا ترد تحرك قلبي. -ما عاش اليوصل يم قلبج، نامي بنتي. رجعت راسي غمضت مرتاحة، مو بس حيلي خلص حتى خباثتي، بسرعة رحت بالنوم.

فزيت الصبح على صوت صرخة دعاء، فتحت عيوني لكيتها هيه والبنات واكفات سماح وهيفاء مدمعة عيونهن من الضحك وهيه تبجي، عقدت حاجبي على شنو يضحكن؟ شلت راسي لكيت روحي نايمة مكلوبي عكس الجرباية، ورجليه وحدة عكس شمارتها وحدة بالكاع مدندلة. كعدت تربعت أفرك بعيوني، كلتلها: هييي شكو تتصارخين من الصبح؟ -شكوو بغرفتي غزل؟ -منو داخل غرفتج؟ أني أصلاً جنت بغرفة بيبي بس مؤتمن شالني وجابني هناا، لويش ما أدري.

-غزززل كومي طلعي بسرعة، وداعت أبوي أسحلج. -لا فدوة سحل بعد ما بيه، مؤتمن كفه ووفه وداعت صبوحة للصبح تقول واحد محلفه يثبت رجولته البارحة. -أنتي حتى شرف ما عندج، صوجي أحجي وياج وهاي عليش الملابس مطشرة؟ -مو دا أكلج اكو واحد محلفه، أنتي حسبي عدد القمصان والملابس المطشرة على عددهن سبحنا. -كو و و مي كومي طلعي. -أييي لا تعيطين، وهاا صدق تره الجرباية انكسرت، لعد اشكد استوك هاي صارلكم سنة شنو مگضيها نظري؟

شو من أول جولة يمي طكت، بس هم صدق قابل شيسوي وياج جنك دجاجة مي سودة يع. كمت أخذت الكلبية للحمام أببدل، خليتها تنحب مو تبجي، كعدت بالكاع ضمت وجهها بالعباية وتبجي حيييل. لبست وطلعت لكيت هيفاء مدنگة عليها عود تسكت بيها، بس أعرفها جذابة كوه ضامة ضحكتها، تقولها: شذنبها هيه جربايتج خربانة يجوز مكسورة من وقتج وما تدرين، وهاي ملابس مؤتمن يجوز راد يشوف شنهو موديله، رايح راد يسوي تصفية مو إله ذيج الشغلة الي ببالج.

هيه تحجي وسماح كل شوية تطلع صوت الضحكة ما تسيطر، رحت لكنتوره شمرت التيشيرت مالته كلتله: مو تكولين بهذلته؟ أني هاي تيشيرت رجعته مكانه. طلعت لغرفة سماح، عدل أول ما دخلت دخلن وراي يضحكن ويسولفن، كمشتني سماح من شعري كالت: وين غزيلان؟ غرفتي إذا لكيتج مطشرتها أطشر راسج. -عزا هو أني وين أطشر؟ صدق دتحجين. هيفاء: ههههههه أخ يمه بطني، أنوب تقولها حسبي على عدد القمصان سبحنا، خلتها تطحل. -لعد أجذب ترديني؟

سماح: غزيلان الزلمة مريض ولج، الصبح طلع يسحل بروحه، اشصخمتي بي؟ -وروح بابا هو الصخم بيه مو أني، أني أكوله أنتَ مريض وهو لاطش، كلتله عيب غرفة دعاء، يكول طز بيها. هيفاء: أممم غزيلان ذني عليها موش علينا، خفي اللعب جلطتي البت. دخلت حبيبة كالت: شكو ولجن اشصاير؟ شو دعاء تريد تنتحر، مگامبلة أمها وجدتي وتبجي، وعمتي أم مكرم ضامة وجهها بالشيلة وتضحك، ما أعرف الشغلة تبجي لو تضحك. -ماكو مؤتمن كسر جربايتها.

-اهااا غزالة منهو الجسرها؟ -يااا هاي اشبيكم لويش متصدقون؟ هو وزنه ١١٣ وجربايته استوك بسرعة طكت من أول جولة. أحنه نحجي ودخلت عمتي أم مكرم جرت الفرجاة من الميز وأجت هادة عليه كالت: ولكم كضوها جيبوها لجاي، ولج بت فريال شلون معضعضة الزلمة، خالته يمشي وهو مدنگ خجلان. طفرت عالجرباية الي سماح عينها بيها تخاف هم اطك، كلتلها: عممممه لويش محسسيني اغتصبته؟ تره هذا زوجي.

-بت المشعولة زوجج شيخ عشيرة وكعداته بين الزلم موش فرخ مايع يگضيها بين الكهاوي، ولكم كضوها مالي حيل أركض. هيفاء: ههههههههه أخ يمه، والنوب لقفة مصطفى الصبح وبلش بالتصنيف، فطسنا من الضحك، هو يسد بحلقه وهذا منطلق. سماح: ياا ومكرم يكوله بحال تسوك علينا النهار كله بحجة مريض ومريض، يرد مصطفى لا ولك لا تظلمه هاي بت عمي مفترسة هو فقير، شوف وجهه مبين مال واحد مغصوب.

هيفاء: هههههههه مكرم يكوله دشوف وجهه مال مغصوب، ولك شوف ملامحه مال واحد يكول تمت المهمة بنجاح، يمه خبلوا خلوا حتى الريوك يعوفه ويكوم. أم مكرم: سوده عليه ابن أخوي، غير غيروله الضماد الصبح، خلوا يشيل روحه ويدقها بالكاع، وهذا المشيعب مصطفى يكوله لا تبجي يبعد أخوك أنوب أنيمك يمي، تالي حذره المضمد كله أسبوع ما تلوح المي بعد. -عمه جوعانة. -سم يبعد عمتج سمم، ولج طبعًا تجوعين، تعالي نزلي من الجرباية شكو معلقة.

-لعد تردون تضربوني؟ تره والله أني ميتة جوع، صدق كييوت وين؟ -أصخام أنتي تدرين عن كييوت بحال رادت تموت هناك كلنا بعد ما نلحك. -أي والله يعمه قلب الأم، كلتها وغمضت عيونها متأثرة. -ووجعة أمي اليسمعج يصدق، ديله نزلي خلي أروح آخذها من هذا المسودن لا يسودنها بالزايد، وأنتن ولا تظلن تتمضحكن، طلعن كلمن تكمش شغلة، الناس بدت تجي يله طلعن.

هنه طلعت وأني أخذت ملابس من كنتور سماح حضرتهن، سرحت شعري وسويت مكياج، طلعت غير ذهب هالمرة ماشاء الله هواي عندها لأن أول وحدة عند مؤتمن وجانت بس هيه، جايب إلها هواي لأن تحب الذهب. وأني هم المستفادة ألبس براحتي، كملت طلعت رحت للمطبخ لكيت قوري جاي يفور، صبيت وسويت لفة. رحت لغرفة بيبي لكيت ريم كاعدة، سلمت وكعدت أكل، دخلت دعاء تبجي وأمها تسكت بيها، شافتني كامت تخزر، كعدت كالت لبيبي: شوفولنا جارة تره بتنا موش زايدة.

قبل لا ترد كلتلها: لا زايدة وبايرة هم، وأنتوا شمرتوها براسنا شمر، عود هم جذبيني وكولي جذب. أم دعاء: غززل أنتي مبينة ما مترباية بس هم مالي حجي وياج، يجي زلمتج ونتفاهم وياه. -والله زلمتي يريد بس رضاتي، شنو أكوله يكول تم، فلا تتعبين روحج، وهاا صدق أخذي بنتج وياج بين ما أسوي غرفة. ما ردت عرفتها ضغطها صعد وريم ضامة وجهها وتضحك، بيبي تأشرلي عود يجي مؤتمن وتكله.

أصلاً ما اهتميت، خليت رجل على رجل وانتجيت أكل، دخلن نسوان أول مرة أشوفهن، سلمن وكعدن، دعاء أمها ما أعرف شنو كالتها، كامت طلعت شوية ودخلت كاشخة ومعطرة، قدمت الضيافة ووحدة من النسوان كالتلها: أنتي مرت الصغيرة للشيخ؟ -أي إنه مرته الصغيرة بت الشيخ علوان. اندارتلي كالت: چا هاي الحليوة منين؟ -هم مرته. -ياا چا تقولين أنتي الصغيرة. -لا إنه أجيت على راسها. -يع اشماله ياخذ عليها مرة؟

قبل لا ترد كلتلها: أبوها أجه أتوسل، كسر خاطر مؤتمن، كلك أكسب ثواب وهم تفيدنا للخدمة لأن بيبي ما ترضى نجيب خدم. المرة ضمت وجهها وضحكت، ريم حتى النفس كطعته. كمت وعفتهن، دعاء وأمها وحدة تردم الثانية من الحركة، رحت للمطبخ، دخلت أجت ريم وراي دخلت كالت: ها أساعدجن بشي؟ -لا باجي تسلمين، عدنا كود نسوان. -أنتي ولج شيخلصج اليوم من مؤتمن على السويتي؟ سماح: أصخام غزل اشسويتي بعد؟ ريم: ياع غير هانت الشيخ ومرته وبنته بكلمة وحدة.

سماح: غزيلان أنتي شلون بيج متكوليلي؟ ولج اشوكت تعقلين؟ -تره أني مو خبله وما حجيت شي، صدق هو أتوسل وخله مؤتمن ياخذها غصبًا عنه. ريم: ولج هذا شيخ لا تقولين غصبًا عنه ما يصير. -شيخ على نفسه مو عليه. سماح: ها مؤتمن رايد شي؟ جنت أحجي وظهري للباب، هيه كالت: ها مؤتمن، وأني جمدت كمشت خدودي وغمضت، انداريت على كيفي لأن ما بيها مجال أنكتل قبل أحجي، و أسمع ضحكهن فتحت عيوني لكيته ماكو، انداريت

لسماح ضايجة كالت ريم: من تعرفين روحج تنطكين عليش هذا لسانج. -عزا بعينج سماح جان وكف قلبي. -عليش وين وكاحتج ولسانج؟ اشو تسمعين مؤتمن تخنسين. دخلت دعاء كالت: صبن جاي يلااا. -هيه أنتي صوتج يا النعالة، توكفين تصبين وأنتي ساكتة، لا تخليني ألبس القوري براسج. -ما أرد عليج هسه يجي مؤتمن ونشوف.

-عود باجر روحي صبي جاي وانقلعي يلا، وهاا خفي شوية، موكل اليجي تكولي له مرت الصغيرة وجابني على راسها، تره والله ما تفشلين غير روحج، أول شي أنتي عجوز ومحتركة، وثانيًا تره على ساعة تطك براسي أردج لحضن أمج فانعدلي أحسلج. -أنتي لو تكدرين من زمان سويتيها بس ما طايح بيدج. -ها تجربين؟ يله بعدها بأولها اليوم نشوف. سمعتها صارت صدق خافت، أخذت الصينية الجاي وطلعت، كالت ريم: أووف فوختي قلبي بيها، ولج والله سويتي الي ما قدرت أسوي.

-صدق باجي الشيخ هم مقسم بيناتجن؟ -أي والله يخيه عادل بينا بس يبقى يوم زايد يگضي يمي، طبعًا بموافقتهن عليش الجذب ما يرضى بالحرام. -أممم لعد من هيج أنطه بنته لباله مؤتمن نفسه. -لا يدري بمؤتمن ما يعدل ومن البداية يعرف، بس غزل يمه خفي شوية ترا ذني ما يخافن الله تالي يسونلج شي يخلنه يعوفج من ما فرنها وخلنا يدخل دعاء. -ما يكدرن كولش يسون، عوفج منهن.

سماح: كلي لها خيه ما تسمع الحجي ولا تاخذ كلام من واحد، ما شافت البارحة جا ذبنها بسالفة اشكبرها. -يبوو جا أهنه ناوياتها، حسبالج ما أدري؟ بس جيبي اليصدق التكولي، البارحة بليل أسمعهن تكولها بس ظلي مصرة هو يطلقها وأنتي تجين يمنا غصبًا عنهم وراح تظل غزل الج سوي التريدي، ردت زهراء أخاف تروح إذا طلقها، تكولها لا ما ينطيها بنتها راح تظل لا تخافين. -عزززا ذني صدق قافلات.

-طبعًا كل عقلج بعد ما دخلت بيته وشمت عطر حضنه ترديها هيج تعوفه بسهولة، غير هاي راسمة لبعيد ومستعدة تعيش موش بي خدامة لا حتى مذلولة بس تظل يمه. ردت سماح وأني اكتفيت أتنصت لأن قررت بس يجي مؤتمن أكوله ما أسكت بعد. وقت الغدة دعاء أخذت أمها ودخلن يتغدن بغرفتها، وريم كعدت يمنا بغرفة سماح ناكل، خلصنا جابوا الجاي وظلينا نسولف، دخلت أم دعاء تصيح ريم: يردن يرحن.

كمشت بيها كلتلها: ظلي فدوة لا ترحين، لأن جانت استوها دتحجينا عنها شلون تزوجت وجت واجهة هاي العائلة. اشكد أحب هيج سوالف، عاد كالتها روحي أنتي وإنه أجي ويه الشيخ بليل. راحت أم دعاء وبدت تسولف شلون أول ما تزوجت جانت تسحب الشيخ لغرفتها وتخليهن يتعاركن؛ ضحكت تذكرت من جنت أسوي مثلها علمود ما يروح لتهاني، باوعتلي وكالت: اشكد سويت بس لسوالفج ما وصلت، صدق شخبار تهاني؟

سماح: الطفل نزل ومؤتمن منتظر يخلص فترة النفاس لخاطر يطلقها، هسه بعدها بالمستشفى. كلتلها: يوم الدعاء كون هيج وأخلص منها. -يا خوفي يوصلني السره. -لا أنتي لا، لعد منو يربي بنتي؟ -خرب بقسمتي عبني طحت بيدج بس يلا هم نعمة أقلها أضمن بقائي هنا بحجة بنتج. -هههههه لا والله دا تشاقه وياج والنبي حاسبتج أختي. -ولج يا أختج! إنه لو مخلفة من وقت بنتي بكدج. رن الفون ردت كالت: هاا -أي هاي هنا... لا هسه أرسلها.

سدت الفون كالت: مؤتمن يريدج بغرفة دعاء كومي يله بده وقت الحساب. -عزا بس لا يكتلني؟ -لا يقلبي عليش يكتلج؟ هسه يحضنج ويظل يبوس ويتشكر منج على سوالفج التبرد القلب. كمت ردت أطلع تذكرت أني لابسة كلبية يعني راح تعطلني بالركض، رجعت فتحت الكنتور كالت سماح: شتسوين؟ ما رديت لأن مستعجلة، طلعت أتراك عالسريع لبسته وشلت شعري قباية، كلتلها: علمود سهلة بالفلته أخاف يفكر يكتلني هيج ما راح يلحك.

-أي صح قنعي روحج، مؤتمن إذا راد يلوحج ما يكدر راح تفلتين، روحي بنيتي الله يكمل عقلج. طلعت رحت لغرفة دعاء دقيت الباب، كال: دخلي. فتحته لكيته كاعد عالجرباية ومدنگ، شال راسه أشرلي: تعالي. دخلت وسديت الباب، دعاء جانت يم الميز تبجي. عدل كعدته كال: يلا غردن شنهو الصار؟ دعاء: والله هيه بدت مثل ما كلتلك، كالت الشيخ بكلمة مني يشمرج، يريد بس رضاتي، والباقي الصار حجيته إلك. -همم خوش، وزهراء شلون أدخليها عليها؟

-ما دخلتها كالت تعبانة أريد أرتاح، جبتها لغرفتي لقيت غزل طالعة بس من شافتها دخلت ردت وراها كالت نسيت شالي، بعد عفتها حسبالي صدق. ما رد كام راح يمها كلها: أدخليها على غزل ولج؟ -وداع... ما لحكت حتى تكمل، أجاها راجدي من يمي انشعلت طبلة أذني من قوته، انسطرت بالكاع. لزمت خدودي أول مرة أشوف راجدي يشمل الخد والأذن والراس، ترس على كد وجهها، دنگ عليها شالها من شعرها، حسيت راسي انشلع مو راسها، لأن رفعها منه لمن وكفت،

كلها: على مرتي مو؟ وركعها واحد لاخ طك خشمها دم. كعدت يم الميز لمت روحها، اندار لبالي كسرت خاطره وعافها، وصل يمي ضمت، عصرت خدودي، دفعني وكال: بيجي الدور لا تستعجلين، وسحب الحزام معلق وره الباب. طبكه طبقتين وراح يمها وكف، صاحت: دخيلك و... ما لحكت حتى تكمل واستلمها صلخ، كل ضربة تشلع جلدها، كل شوية أكول هسه يتعب هسه يبطل هسه يكول فشلة من الشيخ، بس بالعكس كلما يمر وقت يزود، والضربة بدل ما جانت تصلخها كامت تشلع جلد منها.

شفته صار كتلة من غضب وعيونه حمر، فتحت الباب وطلعت أركض بوجهي لغرفة سماح، دخلت كلتلها: ولج لحكيني. -شكووو؟ -ضميني ضميني كومييي يلا ضميني، جنت أحجي وأفتر أدور مكان أنضم بي ما صار كدامي غير الكنتور، فتحته وأتكومت بي جوه. -قفلي. -يا ههههههه ولج غزيلان شصاير؟ -ولج قفلي بسررررعة راح يجي. أجت قفلته وهيه تضحك، ماكو دقايق ودق الباب كال: يا الله، ودخل سلم لأن ريم كاعدة وكال: وين غزل؟ سماح: ههههههه منهو غزل؟ -سماااح غزل وينن؟

شفتها دخلت لهنا. -هههههههه يااا وين هنا؟ شوف قدامك قابل ضامتها بالكنتور؟ عضيت شفتي، الجلبة فتنت، سمعته يحرك بالقفل مال الكنتور بسرعة، ضمت خدودي وغمضت، فتحه كال: طلعي. سكتت ما رديت، ظليت حتى عيوني ما فتحتهن. -يعني ما تطلعين؟ -هئ. سماح: ههههههههههه بغلات محمد عوفها دشوفها جنها كتكوت متيه أمه هههههههه. -لا منهو واصل صوبها، كالها ورجع سد الكنتور وقفله: لحد يفتحه. -يا وإذا اختنقت؟

-تركيها خلي بلكي تخلصنا من ثولها، روحي سويلي جاي وجيبي للديوانية. سمعته طلع وراحت سماح ورا، دقيت الباب حيل صحت: فتحوووا. ريم: هههههه ولج كال لحد يفتحه. -عزا باجي فدوة حموت اختنقت. كامت فتحت الباب ميتة ضحك كالت: انياله عليج أمونسته. -يا مونسة؟ تدرين لو كامشني جان كتلني، روحي شوفي اشسوى بدعاء. -هههه يا يكمشج، غير يحجي ويضحك على سوالفج. -أكلج يمكن دعاء ماتت؟

-چا اشبالها يسكتلها عن العملته، تستاهل حيل بيها، چا ما لكت غيرج تتحارش بي؟ -هسه تزعل وتروح لبيت أهلها مو؟ -لا وروح أبوي إذا ما باست حتى رجله بس حتى يرضى، ما أطلع ريم، هسه لو يسحلها من شعفتها ويشمرها هم ترد، موش تريدها تروح برجليها. رجعت سماح دخلت ودخلت وراها هيفاء يضحكن، كالت هيفاء: ولج أفيرة فلتي من الكتلة وطاحت بذيج. -وين مؤتمن بعده معصب؟ -أي كولش، كال بس أكضها أشلع أذاناتها لا تراويني وجهها. -الله عليج؟

-لا خيه يم الولد بالديوانية، هسه أنطيتهم جاي، كال فتحولها الباب لا تختنق، حسباله بعدنا حابسج، كلتله يخوي يا باب غير تتكمز على جرباية سماح هيه وبنتها، ومشوطة المرة وراها، هز أيده وضحك. -وين كيوت صدق؟ -عند أمي تنيم بيها، اشوكاحتها يمه يمه. أحنه نحجي سمعنا عيطة عمتي بره، طلعنا على صوت بيبي الي جاي من غرفتها تعد وتصف، رحنا للغرفة لقينا عمتي شايلة كييوته وبيبي تريد تكتلها وتصيح: جيبيها لجاي، هاي ما مترباية.

عمه تتحامى وهاي مصرة إلا تكتلها، ما عرفنا شكو لمن دخل مؤتمن كال: شكو؟ بيبي: شوف بجدة فرختك اشعملت برجلي. طلعت رجلها معضوضة عضة لمن شالعة اللحمة والدم طالع، اندار مؤتمن على كيوت ما ضربها أباوعله بس لمسها عالكيف، راد يخوفها حتى تبطل عن هاي العادة. بعده ما وخر أيده وهيه صرخت صرخة رجت الغرفة، بعد يريد يسكتها ما يكدر، بجت بجي خبصت الأمة، دخل مصطفى يركض كال: شكو اشبيها؟ أخذها من أيد عمتي.

كلتله: كتلها مؤتمن كتلة قوية صلخ جلدها لأن شوية عاضة بيبي. -عليششش اشبييييك كل عقللللك تطكهاااا؟ مؤتمن: ما طكيتهااا بس ردتها تبطل، ولك البت انجلبت، شكو واحد تكضه تنهشه عضة. -وإذا أستغفر الله عاضتها هيج تطكها؟ اشبيك متكلي مؤتمن؟ وداعت الخوة أتخارب وياك إذا عدتها لو تحرك البيت على روسكم محد يكرب صوبها. -أنكتم ولي منا. -وروح أبوي اليوصل صوبها أنوب أعدمه العافية، ابن أبو اليكرب. -شنو ولك؟

وتقدم يمه صارت نيتهم يتعاركون، ركض مكرم جر مؤتمن ودفع مصطفى بره، لو متأخر دقيقة جان كبت بينهم. طلع مصطفى شايل كييوته ويدردم فوكاها ما ساكت وهاي تنوح بيده مو تبجي، تقول ذابحها يمه العيارة، الحمد لله أمنت على بنتي بعد ما شفتها اليوم. عمتي ضامة وجهها بالشيلة وتضحك، كعد مؤتمن كوه مبين متأذي حيل لأن سد عيونه حيل وعصر جف أيده، أخذه ثواني وسحب نفس، اتجه لبالي راح ينزل على مصطفى بس ضحك وكال: غبي يريد يتخارب لخاطرها.

مكرم: غير بنته حقه. -يابه يا بنته؟ شنو صدق روحه هذا؟ كلتله: أي بنته وباسمه مالك حق بيها أنتَ. اندارلي كال: منهو طلعج؟ شو تعالي. شفته راد يكوم، انداريت ودكيتها ركضة لغرفة سماح، دخلت سديت الباب. رحت لجرباية سماح تمددت، دخلن سماح والبنات يضحكن عالصار، كالت ريم: لا بالله ماخذات حقجن وزيادة. -ياا يا حقنا؟ ما شفتي شلون ضربها. -ولج وين لحك؟ بعد ما واصل صوبها صرخت بنتج. -غير خافت، وشلون ما ضربها؟ شفتي شلون لاح أيدها.

-يبووو يبو ولج بس لا من يكتلج أنتي هم هيج تسويها مناحة؟ -طبعًا لعد شلون ننكتل ونسكت؟ -لا چا من هيج خال دعاء هنا لأن هاي زمال مال دك، كل ما يضوج منج يطلعها بيها. أحنه نسولف وما نسمع غير دخلت مرة لبيتنا تبجي وتصيح: دخيلكم لحكونيي. طلعنا على صوتها لقيناها أم مهرة، ركضت عمتي أم مكرم إلها تريد تفهم منها شكو، بس هيه مستمرة تبجي وتدگ على وجهها. اشكد حاولت تفتهم منها بس ما حجت، لمن دخل مؤتمن ركضت

دنگت على يده تبوس وتترجاه: تقول له طلبتك لا تردني، بنتي راحت راح يذبحوها. -تعالي هنا واهدي خلي أفتهم. كومها أخذها وراح للغرفة دخل ودخلت ويا عمه وسدوا الباب، أخذ بالربع ساعة طلع بيده سلاحه يمشي سريع والمرة تركض ورا، مكرم جان واكف أشرله طلع ويا. دقايق ودخل مصطفى يركض لغرفته هم أخذ سلاحه وطلع يركض وراهم، رحنا لعمه نريد نفتهم لقيناها كاعدة تملخ بخدودها كالت: راحوا أوليداتنه. دنگت كمشت أيديها باوعتلها وأشرت بترجي: شكو؟

-ولج راح زلمتج وأخوتج، ولج يا غزالة راحووا للموت برجليهم. -لا عمه دخيلج لا تقولين يصيرلهم شي. سماح: شششكو يمه؟ -ولج راحوا هادين على أبو حسين السكير، ولج راح تعبي ورباتي يا يمه لحكيني، راحوا أوليداتي ربيت وسهرت ليالي تالي يرحون أول ما أشوف كبرتهم. كعدت صافنة أحس قلبي يريد يطلع حتى الدمعة، أباوع لسماح أيديها على قلبها. وعمتي

تلطم تملخ خدودها وتكول: من الصبح نغزني قلبي من شفت ضحكتهم، حسيت ضحكة الوداع، يمه وين أروح منهو يردهم ليه. تذكرت الشيخ ماكو غيره، كمت ركضت للغرفة أخذت الفون مال سماح دقيت عليه، شوية رد بس صوته تعبان مبين جان نايم كال: ها بويه أم غزل. -عمو أني غزل، ألحكنا مؤتمن راح بمكان ما أعرف وين بس عمه دتلطم، كوم بسرعة ألحكه. -بس هدي بويه خلي أفتهم وين راح. -ما أعرف عموو، ألحكه فدوة بيت اسمه أبو حسين السكير. -اهاا اشودا هناك؟

روحي بويه هسه رايحين وراه. سد الفون، طلعت رحت لعمه كلتلها: خبرت الشيخ حيروح ورا عمه بلكي ما يصيرله شي. -أندعي له غزل، أنتي فطيرة وقلبج أبيض يا يمه، الله يستجاب منج، ولج أندعي يردون زلمتج وأخوتج سالمين. ناس تندعي وناس كمشت السجادة تصلي يردون، ما جنت أعرف شنو الصاير بس مبين يعرفون شغلة صعبة وهذا واحد مو زين وهيج خايفين. كم مرة خابرناهم محد يرد، وره ساعتين دخل كاظم يركض كال: مستمسكاتهم ويننن؟ سماح: منهو منهم؟

-ثلاثتهم بسرعة. -شكو ولك كاظم بيهم شي بداعت جهالك؟ -لا خويه والله ماكو شي بس أنطيني المستمسكات بسرعة. أنطتهن هيفاء، أخذهن ورد أخذ سلاح من غرفة جدو وطلع يركض. بيبي محد كاللها شنو الصاير يخافون عليها. كاعدين بغرفة سماح منتظرين واحد يرد لو نعرف شنو. اتصلت ماما كمت بره رديت أبجي كالت: شكو غزل ماما بنتك بيها شي؟ -لا ماما مؤتمن وأخوتي ما أعرف وين. -أصخام الصخمك لبالي بيج شي، منو ذوله التبجين عنهم؟

مو هذا مؤتمن السحلج لو مصطفى الضحك عليج؟ -مامااا لا تحجين فدوة والله أموت إذا صار بواحد منهم شي، فدوة أندعي لخاطري خلي يرجعون سالمين. -لا تخافين والله ما عليهم، عارات لا تبجين يا أمي. -روحي ماما ما أكدر أخابر أحس روحي راح أوقع، بعدين أخبرج. سديت الفون، أني قلبي وين وهيه تحجي وين، كعدت مكاني ما بيه أرجع للغرفة، أجت كييوته يمي شلتها خليتها بحضني كلتها: أندعي يرجع بابا سالم. أجت دعاء تسحل بروحها كالت: منهو منهم قصدج؟

وضحي لخاطر الطفلة لا تحتارين. -دعاء ما بيه أحجي ولي عني. -مم حبيبتي كايتي أنتي تعرفين منهو أبوك الصدق لا تحتارين، وأنتي هم وفري دموعج تره أخذوا المستمسكات لخاطر يطكج بالرابعة مكان تهاني. -عسى ما يجيب عشرة بس خلي يرد سالم ما يهمني. -چا اشبي حظيييي بس وياي خاله عقلج. -وليي دعاء روحي واصلة لخشمي لا تخليني أكوم أكتلج فوك كتلة مؤتمن. أحنه نحجي وأسمع صوت باب البيت اندفر حيل، وصوت هوست زلم...