رواية كفي والمنجمه الفصل الحادي والستون 61 - بقلم Leo Alfatlawi

هيه سمعت نطقها واتخبلت، زحفت ووقعت على رجليه، لزمتهن وقالت له بتوسل: -لا تقولها، أبوس رجلك. صاح الشيخ: -قوميييي انعل أبو أصلج! دنك شالها من شعرها، طلعها سحل تبكي وتلطم، تتوبس بيديه وتصيح: -والله أموت، رجعني، اقتلني ولا تاخذني، والله أصير له خدامة، أبوس رجلك. عفتهم بهوستهم وصعدت فوق، مريت على غرفتها، صار منظر تهاني من شفتها تفتر يم الغرفة. شنو هاي التسوي بحيث ما اتعطلت وطلعتها من الغرفة؟

اتذكرت هم نفس الشيء سوت وياي وفترة قصيرة هم طلعت من غرفتي. دخيل الله شنو من شيطان هاي؟ دخلت غرفتي، شمرت الشال، فتحت كنتوري، طلعت شيء خفيف ألبسه حتى أنام. غيرت وتمددت. دقايق دخلت سماح، قلت لها: -ها ولت؟ -إي خيه بس أبوها طاح بالباب، خذوه للمستشفى، مؤتمن ومكرم ومصطفى أخذوهم لبيت أهلهن ادمغ. -حيل، بس خطيه الأبو ما يستاهل، شفته مكسور من وراء بناته، هيبته وشخصيته تالي بناته يفشلن.

-إي والله هسه هم مدري شلون، بس لا يصير له شيء، والله مؤتمن يتأذى يحبه حتى أكثر من أبوه. -عزا بس لا هم يرد دعاء، ما عونت أخلص. -يردها خيه يردها، لا تصدقين راح يتركها، فترة وترد. -ليش عود؟ -لخاطر أبوها، صح مؤتمن ماله نفس بيها، بس أبوها اله أفضال هواي عليه، وخاصة هسه بس يعرفون الناس يتشمتون بيه، خاصة ولد أخوته لأن فضل مؤتمن أنطاه الشيخة وتركهم، تالي رد له بناته اثنينهن مطلقات، هاي عيبه بحقه وفشلة.

-لا حبابه خليني فرحانه، خلصت منها. -يمعودة وإذا ردت، هو مؤتمن يمته مقلبها؟ أشوفه خاتل بغرفتك يمه، دخيل الله شلون صلخها اليوم، بعد مؤتمن ومحترق قلبه ومتحارشين بغزالته، يبووو شلع جلدها، يكتل وما يفوخ قلبه، دخلت لقيتها تطفر من الدق، طلعت أتوسل بمكرم يكمشه، قلت له: راح تموت. قال: عوفيها تستاهل. أنوب هذا الثاني متحمل عليها شقد. -ومصطفى شنو سوى؟ -هههههههه لا هذا فلمه وحد، يطك طك تجسير موش تأديب، كلها بهاي إيدك اتحرشتي مو؟

طقها الها وفرك حلكها، فركة كوة طلعناها من جوه إيده، أنوب دخل مؤتمن دفرها على حلكها، جسر فجها، كلها لخاطر تعرفين مرة ثانية تستعمليه عدل. -طلقها صافي مو؟ -إي خيه، خلص ارتاح نفسيًا، طلقها بالثالثة بعد ماكو ردة. -جهالك وين؟ -نايمين جوه. -سموح والله ما أريد أخوفك، بس ديري بالك من رجاء على أطفالك لا تأذيهم. -لا خيه جهال أخوها ما تأذيهم، وأنا مالي شر عليها، هيه ميتة منك موش مني.

-ما أعرف بس والله تخوف فدوة، والله عينك بيهم من تطلعين من الغرفة قفليها، لو خليني أودي غزولة ويه ماما علمود يبقى بس شهم، عينك بيه. -يمه بنتي بعيدة عليه، لا خيه ما أقدر، وأنوب تتعلم لغة من أختها وتجيني تطرن هيه الثانية، هسه بنتك أملونه مبينة أجنبية، بنتي خيه سودة تفشل تصير مضحكة هههههههه. -بكيفك بس قومي نزلي لا تخليهم وحدهم، لأن هيفاء دوم توصيني بيهم تقول عينكم بيها، حالة نفسية أختي ترى ما تعرف شتسوي.

-يووو خوفتيني يا غزل، خلي أقوم أحسن. طلعت وأنا تمددت، أخذتني النومة. قعدت على إيد مؤتمن يلعب بشعري، شلت راسي لقيته قاعد يدخن، قمت حضنته قلت له: -وأخيرًا رجعت لي. -هاي الهوسة الصارت كلها ما هامتك، الهمج رجعت لك. عليش بويه وين كنت بالآسر؟ -لا رجعت لي يعني صرت بس الي بعد ماكو دعاء. -شو خلي أشوف شعامله بيج هاي؟ مسح شفتي، دنك على قميصي رفعه قال: -يأذنج؟ -هئ. -هواي ضلت وياج؟

-هى بسرعة اجيتوا بس هيه متوحشة تستعمل أسنانها مثل الجلب. اتحسر، طفى الجكارة، أخذني لحضنه وتمدد، قلت له: -مؤتمن. -ها بويه؟ -ما ترجع دعاء مو؟ -ما أردها، خلص أجه الوقت ترد لبيت أبوها، سالفة صارت وخلصت منها. -مؤتمن اوعدني ما يجي يوم وتقول أريدها، لأن أعرفك تدور على طفل منها. -غزل بسك يابه، شبيك تعبان أريد أنام، عندي طلعة من الفجر، الشيخ تركته يم مصطفى، قلت له أنام ساعتين وأرجع.

خليت راسي بحضنه وغمضت بس ولا نمت، كلما أقعد أسمع حسرته وضاغطني بحضنه، لو يتلمس شفتي ويبوسه على خفيف ما يريدني أقعد، لو يتلمس الحسرات اللي صارن بصدري، كل حسرة أطول من الثانية. هنا تأكدت مريض بالغيرة، يعني بنية اللي سوت هالشيء وهيك قاتل روحه ما يقدر حتى ينام. للصبح، أذان، قام صلى وطلع. كملت نومتي ما قعدت غير على صوت شعشبونة تلطم وتصيح: -طلعت منا خربت بيت ولد غزل! منا وينها ولك جيبوها لجاي!

قمت غسلت وجهي غيرت ملابسي نزلت بعدني على الدرج وصاحت: -اجيتي يا البومة اجيتي يا غراب البين، طلقتيهن اثنينهن ارتاحيتي؟ راحن بنات الشيخ وبقت بنت فريال. -عمة شبيك اللي يسمعك يقول بنات النبي، ترى هو علوان وشنو مخبوصة! -يا ع ولكم كضوها جيبولها ليه! نزلت رحت يمها قلت لها: -أنا اجيت بس قبل لا تحجين شوفن شنو سوت بنت الشيخ. شلت تيشيرتي راويتهن. -جذب هاي شغل مؤتمن.

-أوك خلي يجي مؤتمن وعود قولي له هاي أنت وها شوفي شفتي حتى بليل عرسي ما حصلت هيك مقاومة وإصابات وياي، شوفي الشريفات الجايبتهن شنو! بيبي كأنما تعرف ساكتة وتسبح، وعمتي بعد ما شافت صدري وشفتي سكتت. قعدت رجعت قالت: -جا إذا صدق عليش بس أنتِ ما تحارشن بالباقيات؟ سماح: -لا أبشرك تدور كيكات، أحنا ما نفيدها، تريد مسقول تقرمش بيه، خو موش تهاني الزلمة ما بيه نفس بيها موش المرة، صدق وين تهاني؟ ضحكت قلت لها:

-يم رجاء يحضرن عفريت لماما. بسرعة عضت شفتها، أشرت لي: -ولي للمطبخ. عفتهن ورحت للمطبخ، فتحت الثلاجة طلعت جبن، دخل مصطفى قال: -ها ولك يا المفهية طلقتيهن؟ -هههههههه أنتِ صرتِ حامية ليش طلقتوا بسرعة، كان انطيتوا هدنة. -بس لا تفرحين زايد، رادة أدعيوه. -ليش؟ -عفت جدي وكاظم يقنعون بمؤتمن يردها، لأن الشيخ متخربط من الصدمة، يقولون له ردها وطلقها بعدين بس موش هسه، تردوهن اثنينهن ما يصير، سمعته بالديرة راحت. -ومؤتمن أكيد وافق؟

-والله لحد الآن تركته مقاوم بس بعد ما أدري، خاصة أبو سماهر طاح بعينه يقول له: كلنا نعرف ذيج إي بس أدعيوه بنت محترمة روحها، عوفك من هالحجي سوي لي أكل ميت جوع. -شنو أسوي لك؟ -هو أنتِ شتعرفين غير المخلمة يا علة قلب أخوي. -هههههههه لا أصيح مهرة تسوي لك شيء، خطية مخلمتي مو طيبة. -لا ما أريد، سوي لي قابل بمخلمتك، لا تلعبين نفسي رحمة لموتك، يلا رايح أسبح أجي القاها كاملة، لا وداعة صبوحة أغط راسك بالجدر، صدق صبوحة اجت؟

-إي ما تشوف الصالة منورة؟ -يا بعد رويحتي يا جدة غزل طلقت نسوانها. طلع يصيح بصوت عالي وفاتح إيديه مسوي روحه متأثر، ضحكني شقد يحب الدراما. وقفت سويت له أكل وبالي ليش هيك لعبانة روحه من مهرة، معقولة عرف لو شنو؟ بس منين يعرف؟ لا مستحيل، أو يمكن هو أصلاً ما يحب شيء اسمه مرة وظل على طبيعته ما تغير حتى لو تزوج، المشكلة محد يعرف شنو براسه. كملت المخلمة، خليت القوري على النار، دخل ينشف بشعره قال: -كملت؟

-امم بس الجاي ما أعرف شقد أخلي، تعال خلي. -ولك عممممه راحت نسوانها وقمنا نخدم! -عزا مصطفى استوني فلتت يمعود، هو جاي يلا بين ما أحضر الأكواب. وهو واقف يسوي الجاي وأنا أغسل بالأكواب، دخل مؤتمن ومكرم، صاح مصطفى: -مكرم بدربك خويه الطارمة أغسلها، وأنت يا الشيخ على الحمام الملابس مكومة. مؤتمن: -خير، شنو الجديد؟ -جا خويه غير مرتك طيرت نسوان البيت، جا منهو اللي يشتغل؟ -سهلة نجيب غيرهن.

انداريت له ضيقت عيوني. مصطفى ركض فتح الجرارة طلع أكبر سكينة خلاها بيدي قال لأخويه: -لا تقتلني خطية عندي جهال يريد يربيهم. مؤتمن: -اترك السوادين وركض للجاي فار لحقه. رجعت السكينة وخليت المخلمة قدامهن والأكواب، مصطفى جاب القوري صب جاي، قعدنا أربعتنا ناكل. دخلت سماح قالت: -يا ع عليش بالطاوة تاكلون؟ -لعد ترديني أوسخ أماعين، منو يغسلهن؟ شبيها الطاوة مو بلة طيب. أشر مكرم أوك بصبعه: -تمام لا تهتمين.

مؤتمن كان بعالم ثاني، مدنك وياكل باله مو يمه، قال مصطفى: -يا المفهية قومي جيبي مي. -ما بيه حيل، قوم أنت حبااااب. -ولك هاي الثلاجة بصف إيدك ثولة بس مديها. مديت إيدي قلت: -شوف ما ألوح، قوم أنت. -قومي لا أركعك بالكوب. -حيل مصطفى شيوصلني؟ أحنا نتعارك ومكرم قام طلع البطل وخلاه قدامنا قال: -بس رحمونه انكتموا، خرب بشكلكم من الصبح شقد تغثون.

قام مؤتمن راح لغرفة سماح يغير ملابسه، ومكرم ومصطفى لغرفة بيبي. نظفت المطبخ على السريع وطلعت، لقيت عمة وبيبي يقنعن بمؤتمن: -رد مرتك هاي بنت الشيخ. تهدأ وحدة تكمش الثانية. كنت خايفة يوافق ويقول إي، بس الحمد لله ماخذ موقف منها وكاره وجودها، حسم الأمر وطلع.

مر يومين نفس الحالة، بس الشيخ كلش تعب ومؤتمن مقابل المستشفى، قليل يجي لأن تجيهم ناس لهناك، ولحد الآن محد يدري هو طلق بنته. بليل قاعدين ندقت الباب، راحت مهرة فتحتها، دخلت دعاء وأمها، سلمن اتلكتهم بيبي وعمتي، قام مؤتمن راد يصعد. ركضت دعاء كمشت إيده تتوسل وتبكي تحلف: -ما لها شغل. قلت: -كلها يابة شغله وخلصنا منها، ردي لبيت أبوك، ردة لهنا ماكو. -لا مؤتمن وداعة أبوي وداعتك، عندي كلهن يشهدن أنا يمهن كنت واقفة ما لي شغل.

-اتركي الشغلة يا بنت العالم، عليش أظل ظالمك وياي وأنا ما لي نفس بيك، ردي لبيت أبوك الله يرزقك بواحد يقدرك. -مؤتمن بداعة غزل عندك وداعة أهلي، أنتحر ما أقدر أعيش بدونك. -أستغفر الله بويه، جاي أدخل للحرام بسببك حتى لو ما لك دخل، أنا بعد ما أريدك ببيتي، فكيني. قالها ودفعها. ركضت كمشت برجله باستها، سحبها ويستغفر لعبانة روحه، قالت له:

-أجيب لك ولد موش تريد طفل من نسل الشيخ يكون أب وأم شيوخ، أنا أجيبه حتى إذا تريد سجله باسم غزل موافقة، والله أظل أخدام بيك أنت ومرتك دخيلك. -ما أريد هونت بويه، ردة لعصمتي شيليها من راسك ماني رادك. دفعها وصعد. مرت الشيخ: -هيك صارت يا مؤتمن؟ هاي جزات الشيخ فضلك على أهله، وقف بوجوههم كلهم هذا ابني وحامي بيتي، تاليتك ترد له بناته اثنينهن بيوم، خليته ما يقدر حتى يرفع راسه، ذيج والكم حق بس هاي ما لها ذنب. هيه تحجي وطلعت

رجاء تسحل بروحها قالت له: -إي يا خوي أنا أشهد كانت وياي بالمزرعة يم الحلال ساندتني، ما سمعت صوت لمن دخلنا على صوت مصطفى ورحمة ابني اللي راح ما أجذب، ظلت هيه تحجي شلون هنتهن وشلون دعاء أخذتها وطلعت ووو. مهرة: -إي صح اللي تحجي، أنا كنت وياهن برا أنظف، ما سمعنا شيء من صراخ غزل لأن غرفتها بعيدة ومسدودة وأحنا برا، لا تظلمها يا الشيخ بخت أختها. وأم دعاء تعتب ودعاء بس نعالي ما باستة حتى أقله ردها، ردت له قالت له:

-حتى غزل ما أقرب صوبها ولا أفتح حلكي بكلمة وياها، أحسبني ما موجودة بس رجعني، ما أريد أي حقوق قابلة بس أبقى وياك نفس البيت. واقفة مكتفة صافنة شفت عالم ما عندهم كرامة بس مثل دعاء ماكو، أشوفها شلون سحلت كرامتها سحل، يقول لها: -بويه ما أردك، ردي بيت أبوك أحنا ما نرهم. وهيه تبوس بإيديه ورجاليه. جدي: -ردي يا بويه وأنا براسي جاي آخذك من بيتك معززة مكرمة.

-أبوس رجلك يا جدي أبوي راح يموت وأنا ما أقدر أترك بيت زلمتي مظلومة يا جدي وداعة أهلي مظلومة، أقنعه أبوس إيدك خليه يردني أخدمكم بعيوني. مؤتمن صعد، لحقته عفتها هيه وأمها يتوسلون جوه. دخلت الغرفة لقيته متمدد يدخن، رحت يمه قعدت خليت راسي بحضنه قلت له: -ما ترجعها مو؟ -لا. -شلت راسي وإذا جدو غصبك؟ -بويه أنا محد يغصبني على شيء ما أريده. -لعد شلون تقول غصبوني عليها من تزوجت؟ -ما غصبوني كان قرار غلط وأكلت طن تبن وراه، ارتاحي.

-ليش يعني اشتاقت لي من عفتك؟ -لا. -طبعًا كيفت ارتاحيت من النّق، محد يحاسبك بعد من تقسم الأيام بمزاجك، كلهن مدارياتك ويتمنن رضاتك مو؟ طفى الجكارة تمدد وسحبني لحضنه قال: -مثل الواحد من يدخلوا بجنة من غير بشر يفتر وحده، خرب بأهلك، قمت أترك القعدة وأجي للبيت حتى بس أسمع صوتك من تتصلين بسماح، لو أراقب النقال أربعة وعشرين ساعة حتى أشوف شنو ناشرة وأسمع ضحكتك، أنعل أبو أصلك باليوم إذا ما أعض إصبعي ألف مرة ندم ما أرتاح.

-هم يجي يوم ونترك بعض؟ -محد يعرف رب العالمين شنو كاتب. قالها وغمض. -لا ترجعها خلينا مرتاحين. -هاي شفتك عينك والله تشوفين شلون الضغوطات غزل وروح أبوي، ما أتمنى أحد بحياتي غيرك، شقد جاي أتحمل ضغط وكلام صاعد نازل بس حتى ما أزعلك وأردها، بس الشيخ جاسر ظهري والله محتار. -شنو يعني تريد تردها؟

-إذا ما توافقين ما أردها ولا توصل بيتي، بس إذا تحبيني صدق والي خاطر يمك، أوقفي وياي، صح انطيتك كلمة وقلت لك أطلقها بس اجت موش بوقتها، الوقت صار غلط، اثنينهن ردن بساعة وحدة وهذا الشيء جسر ظهر الشيخ. -ليش هيك شايل همه؟

-لأن ما يستاهل، وقف بوجه الكل ودك صدر من سلمني الشيخة، قال لهم موش نسيبي هذا ابني، تدرين عاملني وقال لي بأملاكه أتصرف بكيفي من دون نسبانه، هذا اللي يعمل هيك شلون تدريني أجسرَه وأنزل راسه، ترى شماتتنا هواي. -يعني شنو ما أفهم، تريدها وإلك نفس بيها مو؟ -بويه منهو يريدها؟

أنا لو الي نفس بيها مو من أول فرصة أشمرها لأبوها، وأعرف هيه ما لها إيد كلش زين، بس لأنو قالت عنك كلمة مو خوش قدام أبوها بس والله أبوها ما يستاهل هذا، رباني من أنا وعمري ١٢ سنة، دخلني بيته ومضيفه وحسبني ابنه، كبرني وسندني، خلاني ابن ديوان والناس تهابني، تاليتي جسرته بناته. -أظل أحرق قلبي وأذيني؟ -ما عاش اللي يوصل قلبك ويأذيه بويه، أنت بنت روحي عندي، تسوين الديرة وأهلها، أقهرك لخاطر هالمحترقة صدق تحجين غزل؟

-لعد إذا تحبني عوفها تولي لخاطري، والله ما أقدر أشوفها قريبة منك، أنت ليش ما تحس بيه، يعني أنت اتخبلت لأن شفت زهراء متحارشة بيه وهيه بنية وأنا كون أتحمل، ليش عود؟ -ذكرتيني، شو تعالي هاي شنو الحمار؟ -كلشي ماكو، وخر بعد وقت أريد أنزل. -إي بويه منهو واصل صوبك، نزلي بس هاي شبيها شفتك شو؟ استوه يمد إيده طفرت بس ما لحقت، لكفني بسرعة صرخت، جرني اله سد حلقي، باوعت له بتجري ودمعت عيوني، ضحك بصوت عالي وعصرني بحضنه.

مر أسبوع على طلاق دعاء، أحلى أسبوع عايشته مرتاحة، صح مرات أشوفه يتصفن لو ضايج بس ما أحاجي، أعرفه خجلان من الشيخ لأن طلقها بوقت مو مناسب، بالأخص هسه حالته ساءت كلش، ضال بالمستشفى حتى ضيوف ما يستقبل بعد، قد كسرته. صار يومين أشوفه يراسل من أوصل يمه يقفل الفون ويشمره، أنا هم ما أهتم ولا خالة بالي شيء لأن أعرف عنده أشغال دوم. كنت قاعدة دا أسوي زلاطة، دخل مصطفى أخذ من الماعون ياكل قال: -ها ثولة وين رجلك؟

-ما أعرف طالع بس أكيد يم الشيخ. -ماكو يم الشيخ أنا كنت يمه هسه. -لعد وين راح يجوز مشية لو شغل. -يمكن. قالها وقعد قال: -شوفي غزل خلي أنصحك نصيحة أخوية، يا بنتي خليك مسيطرة ودائمًا خلي إيدك على ركابهم، لا تخلين يفلت أحد من جوه إيدك. -شنو يعني؟؟

-دعاء رادة رادة إن كان رضيتي أو لا، عليش ما ترديها وتخلين شروط عليهم، وشوكت ما فك حلكه تطيرين صفحة وجهه، لا تخليه يردها غصبًا عنك وذاك الوكت ما تقدرين حتى تتنفسين، لا تعيدين الغلط. -ما عونت أخلص تريدني أرجعها؟

-يابه راجعة وحق علي راجعة، تعلميني بمؤتمن، بس الشغلة بعدها حارة، خايف من رد فعلك، ترى يردها ولا تتوقعين مؤتمن يجي يوم ويطلقها نهائيًا بدون لا يستفاد، ما معقولة ضحى بيك وخرب حياته وتحمل ضيم سنين تالي من وصلت بيده هيك يطلع إيد ورا وإيد قدام. -شيريد بعد؟ -منصب أعلى والشيخ سانده، و هالمرة لعب على الكبارية، تريدين من وصل هالمرحلة يتوقف؟ شوفي لك غيرها. -لعد خلي المنصب يفيده أنا أتركه.

-أنا وياك اللي ذاقها ما عاود، هم صدق يجوز اكتفى، بس هيه راح ترد يغير طريقه، اشتغلته هالمرة بطريقة شيطانية خلته يتصفن. -شنو يعني؟؟ -إنه شنهو كلتلك بيمن وعدتك؟ -أطلّقها قبل لا تمر سنة ثلاث مرات. -وهاي أول وحدة، بعد اثنين. -إذا صار عندها طفل متأكدة مؤتمن حيمكش بيها. -ههه من باچر عود يصير، وهذا الشي اللي مستحيل وتشيليه من راسچ، بس خلّيها ترد. برضاتچ تروحين تكوليله ردها وخليچ وراي وماراح تندمين.

-أخاف أخلّيچ وراي وماراح تندمين وتالي تنصح بمنو؟ -أكلي تبن، غير نصحته منا ودزيت مهرة منا أنبّهچ. إنتي ثولة، أنا لو أريد أنطي لواحد حل، أنطي بالمطبخ قدام الزمايل. -مؤتمن ماراح يرجّعها غصبًا عني، متأكدة. -إي أنا وياچ، بس راح يدخلچ بألف درب لأن نص شغلة بلّش يتعرقل وينسحب من جوه إيده، ولا تحسبين دنانير ومايهتم ترا تعب سنين وأملاك تسد عين الشمس. -ما تهمه الأملاك مؤتمن.

-ههه كلش. روحي شوفي وينه هسه، وها النقال مالته عينچ بيه لا تتثولين. كالها وكام أخذ صم زلاطة طلع ياكل بيها. قمت صعدت فوك، قلبي لعب من كلام مصطفى. أخذت الفون واتصلت بمؤتمن. أول دقة رد كال: -ها بوية؟ -وين إنت؟ -يم الشيخ، صاير شي؟ -لا، وقت الغدا ما تجي؟ -لا أتغدى هنا، عنده خطار. -مؤتمن. -هلا. -ما تضحك عليّ مو؟ -شكو بوية إش صاير؟ -ما صاير شي، بس إذا إنعادت محد راح يخسر غيرك. قلتها وغلقت الفون.

رجّع اتصل، رفضته. شمرت الفون وتمددت. معقولة وياها هذا؟ بس لا، مستحيل مؤتمن ما يسويها. هو جان متزوجها وما يطلع وياها، مو أنوب هسه مطلقها. بس مصطفى ليش هيج كال؟ شنو يعرف؟ ماكو غير مكرم يعرفه وين. قمت أخذت الفون اتصلت بهيفاء. كلتلها: -وين مكرم؟ -يم مؤتمن، عليش؟ -فدوة اتصلي بيه، بس لا تبيّنين إني الكايلتلك. شوفيلك حجة وعرّفيلي وينهم. -لحظة هسه أشوفهم، يلا. غلقت الفون وضليت أمتانية. خمس دقايق اتصلت، رديت: -ها ولچ وينهم؟

-يكول أستوني دخلنا يم الشيخ، چنا بالمعمل وجاي نتغدى عدنا خطار. شنهو صاير غزل؟ -ما أعرف، خوّفني مصطفى يكول رجعت علاقته بدعاء.

-لا قلبي، أنا أكلچ بس خليچ نبيهة. مؤتمن ما رجعت علاقته، وهيه هاريته اتصالات ورسائل تريد ترد. ترا والله موش بحالها بس لخاطر أبوها، لأن حالته كلش متأزمة غزل. والله خيّة نصيحة، خلي يردها وضلي على شرطچ، لأن طلاقها صار غلط. مؤتمن إنفعل وبعدين حس العملة موش وكته، وهسه خجلان من الشيخ ومحتار شلون يقنعچ. -صدك تحجين؟ إني ما صدقت أخلص.

-خيّة صح مشتري خاطرچ وموش بحالها، بس يردها لأن بلّشوا يضغطون عليه والشيخ زادت حالته. ياما وكف بظهره وطلّعه من مصايب، ولحد الآن سانده بمشروع يرفع للسما. ما معقولة هاي كلها ما يحسب الها خاطر ويخلي هيج مجسور قدام العالم وهو الحل بيده. -يا حل هاي؟ يرجّع دعاء على راسي؟

-بس كم شهر لبين ما يهدأ الوضع ويرد يكوم الشيخ قدام العالم ويردها لأهلها. وكتها يطلع بوجه أبيض قدامه هو والديرة. ما تراهموا وكلمن راح بطريق. موش ردها هيه وأختها بساعة وحدة وبفضيحة، تراها چبيرة هاي حتى هو ما يرضاها. -ترد؟ إني أطلع. -ما تطلعين غزل، والكل يعرف مؤتمن مستعد يخلي چيلة براسچ ولا يخليچ تتحركين من يمه. عليش ترد غصبًا عنچ وإنتي تتأذين؟

ترا الردة الإجباري بيها طعم يختلف. خلي يردها بكيفچ وبشروطچ أحسن، لا تجي وفوكاها أم الراهي هيه. -ما أكدر هيفاء، والله ما أكدر. تعرفين شنو إحساسي من أشوفها يمه لو أشوفه يسولف وياها؟ -أدري والله، بس وهو هم متأكد من هالشي حتى سمعته يكول لمكرم يمكن أردها بيت وحدها فترة وأطلقها حتى ما تكرب يم غزل. تدرين إذا بيت وحدها شنهو يا حبيبتي؟

بحجة اليوم وكعت ولازم أبات، ومريضة ولازم أبات. تالي رجله يجر لهناك وتيهين المشيتين. والله نصيحة، خليها ترجع قدام عينچ أحسن. ترا الرجال مثل الطفل ينضحك عليه وينسحب، وخاصة دعاء إذا استفردت بيه لو جبل توكعه بيدها. -إذا صدك سبع يسويها، أخاف ذيج المرة كدر يرجّعني عن طريق بنتي، هالمرة وروح بابا أي أثر ما أخلي إلنا.

-وهو ما يردها غصب، منتظر تهدين ويفتح الموضوع وياچ من جديد. وإذا يأس كلش يردها بسكوت. وكتها ماراح يصير بس الخراب، والمستفادة الوحيدة دعاء لأن تصير جوه رجلي بس حتى تثبتله إشكد تحبه، وهيه اللي تستاهل تكمل ويا. -روحي هسه بعدين أحاچيچ، ماما دتتصل. سديته منها وخبّرت ماما، لأن چانت تتصل. سولفتلها نفس الشي. نصحتني. خوّفوني ليش كلهم نفس الرأي؟ يعني شنو إني ما أعرف مؤتمن وثاق بيه أكثر من اللازم لو اكو غلط؟

ظلت فترة طويلة تحچي وياي وسديته. حتى للغدا ما كدرت أنزل أحس نفسي انسدت. طبكت مخدتي ونمت. كعدت على نفس مؤتمن بركبتي. فتحت عيوني كال: -شنهو الصاير عليش متصلة معصبة؟ -راح ترجع دعاء؟ -منهو كلچ؟ -محد كلي بس قلبي حسني هيج. داحس بيك رجعت تغدر بيه. -كلتلك إذا ما توافقين ما أردها. كالها وتمدد بس كلامه ما برد قلبي، حسيته يجذب.

-مؤتمن، إنت وعدتني تطلقها. صح چنت تكول إلا يصير طفل بس الله ما رزقك، يعني يريد يبعدها عن طريقنا. واتحملت لهذا اليوم وما عاونته يجي. لا تخليني أندم ويطلع صبري ومعاناتي ذيچ الفترة كلها هيج جذب. -أستغفر الله، منهو لاعب براسچ بوية؟ جايلي ساعة أرتاح بيها، لا تعلّين قلبي. -ما دام تكول منو لاعب براسچ يعني صدك راح تعيد اللي سويته بيه من جديد؟

-غزل، ابتعدي عنهم ولا تسمعين لأحد. ترا كل اللي يزرع فكرة الخراب براسچ إله مصلحة. لا تتخيلين اكو واحد خايف عليچ لأن الكل مصلحته مرتبطة برجوع دعاء لهنا. -وإنت مصلحتك وين؟ -اكتفيت بحضنچ بعد ما أدور مصالح كلها. وسحبني عصرني حيل، همس: -ولچ مشتاق لكيوت، ليش ما نجيبها؟ موش چنتي تكولين دعاء وهاي ولّت؟ بعد شكو ظالة هناك؟

-لا خلّيها بين ما نشوف شنو حيصير. اكو ناس ناوية نية بس الله يدري بيها. أقلها سهلة إذا صار ذاك الشي أطلع بطرك روحي. شال راسه باوعلي كال: -شنهو قصدچ؟ -ما داقصد شي، بس إني صبري خلص لهنا. بعد ما أكدر أتحمل شي لخ. انكلب عليّ كال: -يعني ناويه تتركيني ولچ؟ -إنت اللي تريد هذا الشي. -وأرد أگابل الشط أتصفن، متأمل يجي الليل أحضن مخدّتچ بلكي تهد روحي الموجّرة.

-لعد لا تعيد الغلط حتى لا تنوجع مرتين. وها أخاف خال براسك أسافر وتجي وراي هم شيلها من راسك، لأن دولتي بيها خمسين ولاية وكل ولاية بكد دولتك. -دولتچ؟ غمضت وهزيت راسي إي. -وينطيچ قلبچ تعوفيني؟ -إي، لأن الظاهر إنت مليت وحابين نفترق بس ما تعرف شلون. -هممم مليت، هم صدك. هسه أنا إش مستفاد؟ بس الحسد على يابه عنده كيكة خيعونه. ما يدرون بس النگ وعلة القلب كلشي ماكو غيرهن. كالها وخلّه راسه بركبتي عضني. -مؤتمن. -همم.

-إسنونك اللي يوم أكسرهن. شال راسه ضحك كال: -عادي، اكو طريقة غير العض ما تحتاج إسنون مثل هيج... دفعني وتمدد ينفث. لميت روحي صحت: -عود إنت ليش من تاخذ غرضك تدفعني هيج؟ شنو معناتها؟ -يعني فكّيني بعدي، مليت منچ هيج معناتها. ردت أحچي، وصله مسج. عرفته منها لأن فتحه عگد حاجبه ضاج وغلّقه. رجع وصل واحد لاخ، رد فتحه. دز مقطع صوت: -عمي حالته زينة، عشر دقايق أكون هناك. سهلة من أطلع أمر عليكم آخذكم بطريقي.

سحبت الفون بسرعة لگيت "دعاء بت الشيخ" مكتوب. كلتله: -شنو هذا مؤتمن؟ -يريدن يرحن يشوفن أبوهن. -وليش إنت توديهن؟ -قوم حريم بلا زلمة، تعرفين شنهو هذا اللي ما عنده سند؟ هيج تالي حريمه يتوسلن بالريح والجاي. -داسألك ليش إنت؟ -طالع وبطريقي آخذهن. -لا ما تروح. -إش بيچ بوية تسودنتي؟ قابل ماخذها وحدها؟ أهلها وياها. بعدي خلي أقوم أسبح. شفته مصمم وأكيد متانيته ذيج، الله أعلم شنو حتحچي ويا. بسرعة نزلت الغطا شوية صحت:

-عزا مؤتمن شنو مسوي؟ شال راسه كال: -شكو؟ -شوف إشلون مشوهني! صدك دتحچي؟ -إش بيچ بوية؟ وينهّن؟ ترا خفيفات. خليت إيدي اتلمستهن كلتله: -هممم هم صدك. بيّن عليك الكبر بعد ما بيك حيل. أرجع عالعض أحسن لأن صدك ما حسيت بيك. جان يريد يقوم من سمعني، رجّع رفع حاجبه كال: -منهو الما حست؟ شو تعالي خلي أعلمچ إشلون بيّن عليّ الكبر.

سحبني عصر وجهي ودنگ عضني من شفتي. عرفته يريدني أصرخ حتى يوخر، لأن انطاهم كلمة ياخذهم. صرت أعرف كل تصرفاته مثل ما أعرف إشلون أتجاوب ويا وأخليه يتخبل وأطوّل بالوقت إشكد ما كدرت. ما خليته يوصل مبتغاه، حمّيته على الآخر لمن شفت وصلت حدها ويا يالله خليته. وخر عني آخر نفس كعد، مسح وجهه. رد يقوم، كمشته من ظهره. اندارلي كال: -أنا چبير ورجليه بالكبر، جماعتي بالفتحة الخامسة. دخيل أهلچ تركيني.

-ههههههه لا بس تعال بحضني والله مشتاقتلك صار إشكد ما نايم يمي. أخذ نفس هو تعبان رادها من الله وشافني أمبرطمة. أخذ الفون وخبّر مكرم كله: -مرّ على أهل الشيخ آخذهن لأبوهم. وغلّقه. إجه خلّه راسه بحضني ونام. أقل من عشر دقايق وحسيت ثقل راسه، عرفته تعبان بس يكابر. كعدت إيدي خدرانة، لگيت مؤتمن على نومته. أحس رقبتي تحركني من النفس. وخرته على كيفي كعد، كعدل نومته ورجع غفه. قمت للحمام سبحت، طلعت على كيفي عن لا يكعد.

إجيت سحبت فونه. بسرعة فز، كمش إيدي أخذ الفون خزرني و خلا جوه مخدته. أشرلي طلعي. رجع نام. والله لو ما ضام بي شي ما چان هيج طفر. نزلت البيت هدوء. رحت لغرفة سماح دخلت، لگيتها هيه وهيفاء يدكن سوالف. شافني ضحكن كالّن: -تعالي وين ضميتي الزلمة؟ -وليش نايم؟ شنو اكو؟

هيفاء: يا محفوظة السلامة مؤتمن خابر مكرم كال "أخذ أهل الشيخ للمستشفى". كلي "عيب أروح وحدي تعالي وياي وهم بطريجچ أدي واجب سلّمي عالشيخ". عاد لبست وطلعت. وصلنا للباب لگينا دعاء مادة راسها، كال "استلمي مواعدها الأفندي وخلاها تنتظره وهو كاضيها بحضن المسعدة". -يعني طلع مواعدها، والله شكيت وعرفته.

-انتظري خلي أكمّلچ. طلعن هيه وأمهاتها السيارة مظللة ما شافت منهو. حسبالها مؤتمن. طلعت شاكه حلگها وذاك المكياج الصارخ والعطر عبر للديرة الثانية. فتحت السيارة صعدت كالت "شنهو شو تأخرت؟ ". بس سكتت من شافت مكرم اعتذرت. كالت "مؤتمن كال أنا أجيكم". قبل لا يرد مكرم عاد أنا استلمت الرد. صعدن ريم ومرته الوسطانية. تانيتهن يسدن الباب لخاطر أغرد براحتي. كلتله:

-والله عالأساس هو ياخذجن بس إشو صعد للغرفة ما نزل غير ليوين. وأنوب سابح. كالت: -وشنو يخاف يبرد إذا سبح وطلع؟ كلتلها: -إنطي مجال أكمل. لا موش يبرد، بس نزلت غزالته ورا كاشخة. كال لمكرم "إنت وديهن، غزالة تريد للمول آخذها". إشو بعد ما عرفنا إش عدّهم أخذها وطلع. خيّة ماكو ثواني واسمع تتنشغ وراي ويم ضامة وجهها وتضحك. باوعتلها غمزلتي، خلتني أنا هم أضحك على شنهو ما نعرف.

-لا حبيبتي هاي متواعدين، لأن صار كم يوم منبهة تراسل تريد بس تحچي ويا. الله أعلم شنو اكو مصيبة دتحضر، لأن حچي الفون ما يكفيها. اللي طلبت يلتقون بالمستشفى بس الحمد لله كشفته. عاد طلعت خليت روحه تسلم للقبر من التعب. -عفية بيچ. مبين الصنف من هاي رقبتچ اللي صارت بنفسي أشوفها ما بيها چثح.

-خيّة هيه مليانة تطبع، وأخوچ ما كاعد يدور نسوان بعد. لو عايفته چان إشلون. يلا المهم بي ضمان لباچر يضل نايم ما بي كومة. بلكي يبرد منا لحد ما تخلص العدة حتى تصعب ردتها. -دقومن للمطبخ نسوي عشا، هم يالله. -أكولچ وين مهرة؟ شو ماكو. -خيّة ويه رجلها بالغرفة، شرايدة منها؟ -جبتلها كومة أشياء وماما هم دزتلي أول البارحة بيد مصطفى غراض دأنطيهيا توديهن لخواتها. -أكلچ غزيلان موش چنج زوتيها؟

خيّة هاي مو مال واحد هلكد ينطيها عين ويدللها. ترا شفتچ من انطيتيها فلوس بس سكتت كلت ما أريد أفشلها. لا تعوّديها تراها طماعة. -لا خطية دزيتهن لأمها، خلي تشتري أكل للبنات. دا ينطيني مؤتمن هواي مصروف، يزود عندي ما أحتاجهن لأن ما دا اطلع، فدزّهن إلهن. -ياع غزل! كل مصروفچ تدزين؟ أصخام بوجهچ ولچ! لميلچ سوي ذهبة سوي أصخام لبنتچ. شنهو تشيلين وتنطين هيج؟

-عندي ذهب ما أحب ألبسه أصلاً. ومؤتمن كال بعيد ميلادچ حسويلچ أسوار ألماس لأن يعرفني ما أحب الذهب، بعد شسوي بالفلوس؟ -بسّچن لغوة، قومن للمطبخ. رحنا للمطبخ. شمرلي مجانه إشكبرها بتيتة أنظفها. وسماح وكفت تطبخ تمن ومرگ، وهيفاء تنظف خضرة وتسوي زلاطة. مو تكول عائلة بعد نفرين يصيرون دولة مستقلة من كثرتهم. للمغرب دخلت مهرة تتمغط وتباوعلنا بطرف عينها. أباوعلها هم صايرة تدلل وتسخت مو مثل أول ما إجت. سماح كالتلها:

-ماسحتچ وعالطارمة عدل، روحي نظفي بيها تراب. أخذت الماسة وطلعت. نزل مؤتمن دخل شرب مي وسأل عن مكرم. ردت هيفاء: -رجّعني وراح للمستشفى مرة ثانية. عافنا وراح للحديقة. خلصت البتيتة غسلتها. كلتلهّن: -بعد كافي ما أگلي تعبت. هيفاء: أمم تعبتي من البتيتة لو مؤتمن؟ چا ظليتي تكمزين كلچ نشاط. -أكولچ گلي وسكتي، وين عمتي؟ -يم جدتي تنيم بسند. طلعت بره أريد أشوف مؤتمن. لگيته بالمرجيحة يراسل وكالب خلقته. رحت يمه ردت أسحب الفون، غلّقه.

كلتله: -لمن دتراسل؟ -جماعتي، عوفچ من النقال. تعالي أكلچ شغلة. -مؤتمن لا تضحك عليّ. افتحه دا أشوف. -أووو غزل إشكد صايرة مزعجة. دخيل ربچ بوية، أسرار شغل إنتي شلچ بيهن؟ -ما يهمني ما دا أكولك أقراهن بس أشوف من بعيد وهاي هيه. يلا افتحه. خلّه الفون بجيّبه وكام. رفعني من خصري يضحك عضني من خدي كال: -بطلي غيرة بنيتي. صاحت هيفاء: -هااا يمعودين نجي لاااا؟ نزلني ضحك وصاح: -تعالي.

إجت هيفاء تحچي ويا وإني عيني بالفون. كل شوية أريد آخذه ويكمش إيدي يعصرها ويرد يكمل حچي. چانوا يحچون عن رجاء لحد ما كالتله: -ترا ملينا، إش وقت تاخذها تعالجها؟ حسرة علينا النومة صارت. -حجزت للهند، منتظر الموعد وهم بلكي أخلّص شغلي هنا حتى آخذها وأروح. -منو يروح وياكم؟ -تدبر وكتها. عوفچ منهو، كولي كون تنجح لأن نسبتها كلش قليلة. -ما يخالف، خطية حتى لو قليلة بلكي تتعالج لا تظل هيج تخوّف. أقلها تبقى بس عالحرك.

اندلي شافني أباوع لجيّبه كال: -وداعتچ كلها تخلص وترتاح إلا أنا أظل مبتلي بمصيبتي. -هههههههه إذا كل المصايب مثل مصيبتك هيج أتونّس عمي يا محلاها هلابيها. -حقچ ما شايفه من إنتي بعزّة نومچ وجه الفجر وتكمّزچ بصرخة مال خبال. إنت ما تحبيني لو بس أعرف شنهو يجي براسها ساعتها چا ارتاحيت. كلتله: -ترا مو خبلة والله. أشوفك درت وجهك نمت عالصفحة الثانية. إنت لو صدك تحبني چان ظليت نايم على صفحتي. دار وجهه لأخته كاللها:

-استلمي وتعالي لوميني. إش بيك تتصفن بوية؟ سوّدنتني خلتني أمشي وأتلفت. عافنا وراح طلع. كعدنا بالمرجيحة. دخلت مهرة كالت: -كمّلت. هيفاء كالتلها: -تعالي وياي نظفي الحديقة لا تردين لزويتچ. أخذتها وراحت. ما أعرف ليش هيفاء هيج شادّة وياها. چانت زينة ليش كلبت؟ قمت دخلت جوه. سماح مكّملة الأكل راجعة لغرفتها. رحت لغرفة بيبي لگيتها تسولف هيه وعمة. دخلت كالت بيبي: -تعالي يا جدة لچاي. -شنو بيبي حتضربيني؟ -لا إش مسوية وأطكچ؟

تعالي كعدي چاي، أريدن أحچي وياچ. رحت كعدت بس مستعدة لضربة مفاجأة. كالت: -يمه إنتي أبنيت ابني العزيزة، صح مخبلة وشالعة أفادي بس تظلين أبنيت معتصم وأحبّنچ. -إي بيبي أدري من كثر حبچ كلما تشوفيني يطلع من عيونچ سمايل قلوب. -شنهو ولچ؟ -لا هيج تعبير مجازي. كملي بيبي بس كافي صبغ جيبي من الأخير. -يمه بنيت الشيخ ما يصير تبقى هيج معلّقة. وهذا شيخ علوان موش قليل. بنيته هيج مردودة وزلمتچ يحبچ.

-طلع شعر بلساني وأنا أكوله ردها بس خايف على زعلچ ما يرضى يكسرج. يريدچ إنتي اللي تكوليله. -وهسه شنو بيبي؟ تريدين أروح أكوله جيبها إني راضية؟ وحدة لخ تشاركني بيك؟ -غصبًا عنچ ترحين. وإذا ما عقلتي أعقلچ بالسكف. هاي شيخة الديرة موش وحدة مثلچ فاهية تجي تطلعها من بيتها. -شنو شيخة الديرة بيبي؟ ترا إني الشيخة. يعجبچ ما يعجبچ إني مرت الشيخ وغصبًا عن الكل شيخة.

-اممم شيخة أم لسان الأعوج. تجين ربع هيبة دعاء، ذيج المعدّلة المترباية من صغرها على الشيخة وبت شيخ ومرت شيخ والديرة كلها تهابها عِبنها صدك مزيونة. -عيع شيخة معفنة ودور بنات ديرة. چيس حب. إنتوا بابا عيب إني منكم ما أحچي. سكتوا فشلة. شفتها شالت العصا طلعت أركض. صار مؤتمن بوجهي كلتله: -الحك دتضربني. دخل كالها: -ها چدة ما تبطلين طك؟ إش عدچ وياها؟ -ولك، تريدني بت المصخمة. صار ساعة أحچي وياها تكلي "أنا منچ أخجل وما أحچي".

باوعلي مؤتمن بخزّة. رجعت ليورا. جرّني من شعري كال: -شهالحچي؟ -بس هدني دا أكولك ما كلتها هيج. تكول دعاء شيخة وإنتي أم لسان الأعوج. ترضى؟ جرّني أكثر كال: -أعوج عدل تتجاوزين إشلون؟ كمشت إيده. نزّلت دمعة، صح مبين جذب بس عصرت نفسي. كلتله: -والله ما تجاوزت. هيه كلبت الحچي. تكلي "روحي جيبي دعاء غصبًا عنچ، هاي شيخة الديرة وإنتي ما تسوين". صدك ما أسوى ترضاها؟ -إي أرضاها، وأفلّش حلگچ إذا فكّيتي وردّيتي. ويلا روحي اعتذري.

دفعني على بيبي. بستها من راسها صحت: -اعتذر بيبي. وهمست: -ما طول ارتكبتي عليها، دعاء ما تفوت للبيت. قمت ركض طلعت من الغرفة. تركتها تسب وتدعي. وكفت أتسنط شنو حتكول. وإجان أسمعه: -نزلت عليش هيج تغيرت؟ ولك مؤتمن موش نفسك اللي ربيته هيج صاير. -خيرچ جدة من الأخير؟ شنهو الرايدته؟ لا تحسبين مشت عليّ متجاوزة بس ما ردت أكسرچ قدامها. -ياع هاي إنت مؤتمن اللي چنت ما تعرف الرحمة شنهو؟ تدوس شكو بشر قدامك، جاي تدافع عن بت فريال؟

-أستغفر الله جدة لا تكولين "بت فريال". إنسيييي هاي حرمتي موش بت أحد. -ترد دعاء؟ -ما أردها، سدّي السالفة. -لا تردها، وبيت بحدها مثل ما طلبوا أهلها حتى لا تجسر أصخامك. -وإنا هيج ماشي بمزاجكم جدة؟ دعاء ما ترد، شغلة وانتهيت منها. لا تظلون تلحّون.

-لا كول ما أكدر إشكم بت فريال أخاف على زعلها. ولك يا جدة إنت شيخ والناس تهابك، وتجيك عالم تزورك وتكدرك. تعتاز شيخة توكف بظهرك وتستقبل خطارك. أدعيوه من صغرها متربية على هيج شي يا يمه. عقلها چبير ورزنة وهيبة مثل أهلها. تفتهم هسه إنت من تصير واجبة عندك وتريد تاخذ شيختك كونها رزنة وتعرف إشلون تحچي وتشيل راسك مثل دعاء؟ لو تاخذ هاي الچنها أرنب تطفر تفشّلك قدام العالم؟

-تتعلم جدة تتعلم. محد طلع من بطن أمه يعرف كلشي. غزل صغيرة ومترباية بره، حقها من تتصرف هالشكل. من جبناها أول مرة شكل وهسه صارت شكل. هواي استعدلت وتطبعت علينا، يعني رادلها بعد شوية تصير أحسن شيخة بالبصرة. -ياع وين اتعلمت؟ ولك دشداشة لحد هسه ما تعرف تلبس، تمشي وتعثر بيها. عباية ما تعرف تستر روحها بيها. وينها تعدّلت بشنهو؟ شو كلي. -أستغفر الله جدة، والله تتعلم. وإذا على الواجبات أخذ سماح، هاي أم بيتي وشايلة زينة العقل.

-هاي يا يمه ملتهية بفريخاتها. إنت تريد وحدة تتفرّغلك للواجبات وملكة العالم. وما تفيدك غير دعاء. -جدة دعاء شيليها من بالچ، بعد ما أردّنها. عندچ هاي أم لسان الأعوج تردين تعلميها؟ أتركها بعوجتها بكيفچ. بعد شوفي اللي يناسبچ بيها عملي. -ياع تردني يا مؤتمن؟ -جدة موش أردچ، بس هالحچي موش وكته. وشغل اللي جاي تعملوا بطلوا عنه، لأن بس تعب ما يفيدكم.

سمعته كام يريد يطلع. ركضت صعدت وكفت بنهاية الدرج. شفته طلع بره أمنت. صفنت شنو الشغل اللي ديكول عنه؟ عضيت شفتي. يمكن على اتصالات دعاء ومراسلاتها عرفهن. هنه اللي يحركّنها حتى يلبسّنه بيها من جديد. رفعت راسي فوك. وحشة ماكو أحد. وحتى البيت تكول موته بس بيبي ترعص وهم سكتت هسه. عزا إشلون يقنعنا؟ وهاي هيفاء هم چلبة طلعت بس تريدني أقنع وإني أكوله يردها. طلع أصلاً ولا خال الفكرة براسه.

مو بعيدة هيه اتكلها إش وقت يجي حتى تراسله وأشوفه وأتعارك وأتجاوز علمود يجيبها غصب عني لخاطر شغل رجلها يمشي. عزا شنو هاي؟ ولا واحد شريف بهذا البيت. أووف ماما لو بس تقنعين تجين يمي وتاخذين شهم هيج چان خوش لعبنا. نزلت ردت أطلع للبستان. مريت على غرفة شعشبونة، أسمعهن كابة للضالين بس مو واضح الصوت. طلعت للبستان ورحت للشباچ أريد أعرف على شنو يتعاركن. وكفت وره الشباچ وأسمع تهاني اتكلها: -أنا ما أعرف. إنتي انطيتي چلمة حليها.

عمتي: أنا كلتلك أردّچ وردّيتچ بس شوفت عينچ مؤتمن هالصفرا ماخذة عقله ما يشوف غيرها. إذا ما نخلص منها ما راح يقلبچ. حتى الشيخة طلقها بسببها. -وأنا لحد من أظل هيج أمتانية؟ رجاء: يطبچ مرض، عِبنچ عاطلة، كون ما يقلبچ أبد. -إنتي المحتركة لا تحچين. كافي عليچ وجهچ الصاير چنه وجه چلب. -تعيّريني موش سهلة؟ يا تهاني إذا ما كلت لمؤتمن إنتي وره هذا الصار كله وإنتي اللي ردتي تكتلين بنته، ما أطلع أنا أخته. -هههههه وين أكتل بنته؟

لا تنسين أنا چنت بعدني ما رادتله. شوفيلچ غيرها. عمتي: عسى ها بالموت بت نغلة. ما نعرف منين جابتها غزل ولزكتنا بيها. عوفوهنا لا تتعاركن بسببها. رجاء: لا أعرف كلش زين إنتي اللي زرعتي الفكرة براس دعيوه وردتن تلبسنها براسي. حسبالچ ما أعرفن؟ -ما عندچ دليل ولو تأذنين للصبح ماراح يسمعلچ. نسيتي من ردتي تحركين غزيلان؟ -ذني كلهن ما عندچ دليل، ومؤتمن شاك بيچ. إنتي ردتي تكتلين ابنيته. حسبالچ من نعرف عليش ودّاها لجدتها؟

وهو كاره فريال بس لأن يعرف عقلچ موش تمام من أهد ما إنجتل ابنچ حقدتي على الفريخات. -ابني وآخذ بدمه. حسبالچ ما أعرفن إنتي اللي كتلتِ. وإنتي وره موتة سمر. بس خلي أقوم على حيلي وأعرفن إش أعمل بيچ. -هاي إذا قمتي. وإنتي عمة شوفيلچ حل ترا وصلت حدها. خلي مؤتمن يردني مثل قبل. خو مو أظل هيج مشمورة؟ ترا تعرفين شنهو أعمل وأخليه يطلعچ قبل لا يطلعني منا. وإنتي تعرفين.

عمتي: لا بس تانيني. هاي كل الطرق ما فادت وياها. ماكو غير أرجع أعيد ذيج الليلة اللي صارت بفرّيال. وهالمرة الچيلة مجان ما براسه تجي براسها. -إشلون أخاف ينعاد نفس الغلط؟ -لا مؤتمن موش مثل معتصم ذاك عشقها بخبال. هذا بغيرة من يعرف عادت غلط أمها راح يترس راسها بارود. والليلة راح أخلي يكتلها. حضرت كلشي هسه وكّت جيّته ويشوف ال...