رواية كفي والمنجمه الفصل الثاني والستون 62 - بقلم Leo Alfatlawi

هيه تحجي واني راسي بالشباج. صاح مؤتمن: "غزززل شكو يابه؟ انداريت عاصره كلبي. هنه على صوته هم سكتن. ركضت حضنته كلتله: "مؤتمن حتموتني." "اشبيج بويه شنهو اموتج؟ "مااعرف بس امك وتهاني هسه سمعتهن دتكلها مثل امها حتسوي وحيكتلها يترس راسها بارود. شلت راسي كلتله لاتكتلني فدوه." وشهكت. حضني كال: "بويه اشصابج اكتلج عليش؟ "والله راح تموتني اعرفك." "دخيل محمد بسج بويه لاتبجين. وينها امي شو تعالي."

اخذني واني كامشه قميصه ارجف. راح للغرفة فتحها لكه امه ورجاء وحدهن كال: "شنهو الصاير؟ كامت امه كالته: "شنهو يبعد امك شكو؟ "غزل اتكول سمعتج تحجين ويه تهاني على امها مااعرف جتل شنهو غزل احجي." "والله سمعتها تكللها مثل مسويت بأمها حسوي بيها بس الغلط هالمره اعرف اشلون امحي اخلي مكان ميضرب طلقه براسه يضرب راسها." عمتي: "ياع منيلج هالحجي؟

هيه وينها تهاني من الصبح لسه ماشفتها. يمه هاي مريتك مثل اختها هم صار بيها خويط ديربالك منها." "والله مؤتمن مدااجذب حتى اسأل رجاء شوفها دتبجي لان تهاني كتلت ابنها مو سمر وهيه رادت تكتل كيتي امك اتكول نغله مااعرف غزل منين جابتها." وكف صفن بوجهي وامه اتبررله انو اني جذب. اخذله ثواني وكال: "على غرفتج." "مؤتمن تره دااحجي صدك." "روحي غزل." كالها ودفعني بره وكف ياشر فوك. خفت منه لان شكله اتغير. رحت صعدت.

اتأكد صعدت دخل وسد الباب ورا. نزلت على كيفي رحت وره الباب اسمع امه تتوسل وهو مااسمع شنو يهمس. كعدت اباوع من فتحت الباب لكيته متجه لناحيه رجاء وكف دنگ عليها هم مااسمعت شنو حجه وهيه بجت خايفه. نزل اديها كلها: "احجي."

"يخويه انه النار تاكل بجسمي وشوف هاي الكتله الجاي تكبر ايامي معدودة. ويني وين هالحجي جاانت ماتسال عني ولاتعرف اشصابني بس من غزل تشكيلك تجي تريدني اشهدلها. عليش يخوي هيج هنت عليك ونسيتني موش انتي الربيتني بيدك ودللتني جنت الهوا مترضه يمسني." "رجاء فوك هذا الحرك احركج بعد وهالمره ابتيزاب." "مرتك مريضه موش صاحية مثل اختها كم مره شافنها البنات تحجي وحدها." "مرتي مريضه همم." كالها واندار لامه. عمتي اتباوعله بخوف كالتله:

"ها يمه شهدت اختك على امك؟ هاي ييمه تعبي ورباي هيج صار متصدك بيه؟ "ماراح اشهد ولاراح اسمع لاحد. الج الصافي ياام مؤتمن كربت ماضل شي." "ولك مرتك مخبلة واشكال تخرط. ييمه اسأل سماح وهيفاء دوم يشكن منها خايفات." "اي عليش لا خبله تركيها بس حكي اعرف اشلون اطلعه." كالها واندار فتح الباب شافني واكفه. جرني من شعري كال: "كم مره اكلج لاتسنطين."

"ما اتسنطت مؤتمن اني مو خبله ومااسمحلكم اتهينوني والحجي الكلته كوله صح تريد اتصدك خوش متريد خليك على عماك عود يجي وكت وتندم." وعصر وجهي كال: "شنهو على عماك؟ انتي ويامن تحجين شهالطياح الحظ؟ "اني موطايحت حظ. امك دتتبله عليه تكول امخبله واني سمعتها تريد تكتلني وانت ساكتتتت." عصر وجهي ودنگ حجه من بين سنونه: "حسج لج وهذا فجك اجسره اذا لكفتج متجاوزه سمعتييي." كالها ودك راسي بالباب. جرتني عمتي عالاساس حنونه گالت:

"اتركها يمه ماتفتهم طفلة." مارد دار وجهه. دفعتها ردت اطلع حتى موكلش خفيف واشوفها انشمرت لهناك على وجهه وصاحت بوجع: "انه امك يا مؤتمن اتجسرت." جان يريد طلع من سمع اندار باوعلي متفاجئ. رجعت ليورا همست: "والله جذابة لاتصدك بي... مالحكت حتى اكمل تولاني راجديات.

خليت اديه احمي وجهي. جرني من شعري. نبتت اضافيري بادية وصرخت بعلو صوتي. على صوت صراخي دخلت عمتي ام مكرم وهيفاء استوهن جايات. ركضن لزمنه. عمتي صارت بوجهه تتوسل بي وهيفاء تجر بيه تريد تفتح شعري ونسمع عمتي صرخت بوجع: "ولكم لحكوني ظهري طگ." دفعني علي هيفاء وركض هو وعمتي الامه. كمشتني هيفاء طلعتني بسرعة. وصلت للدرج احس روحي بهتت وكفت مابيه اتحرك كالت: "اشجابج لهنا متكليلي؟ "ولج موتني والله مادفعتها هيه طاحت."

"دمشي خيه بسرعة قبل لايرد سمعي عياط امي كوم البيت ياوگعت وحدها." "مااكدر اصعد وديني لغرفة مصطفى." سندتني ودتني لغرفة مصطفى. دخلت غسلت ورحت لفرشته تمددت احس راسي صدع من الضرب وعمتي بعد صوتها مستمر بالصراخ خبصت البيت. عصرت راسي ونزلت دموعي. غمضت حتى اريد ادعي مااگدر احس كلبي فارغ. شوية واجت هيفاء بيدها مسكن كالت: "هاج دشربي بلكي يخف الالم." كعدت اخذته منها باوعلها عيونها على وجهي ومقهور عرفته صالخني.

شمرت حتى العلاج ورجعت نمت. دقايق ودخلت عمتي ام مكرم كالت: "كومي احجي وياج." مارديت. "سوي روحج نايمه غزيلان بس اريد افتهم انتي اشوكت تعقلين وتكومين تحترمين الاكبر منج. مرة بگد امج طاكتها ومتجاوزه عليها اشلون؟ "مو نايمممه وماضربتهاا. روحي شوفي شنو تريد تسوي بيه ولج عمه والله سمعتها تريد تسوي بيه مثل مامااا." "يااع انوب شغله جديده شمالج ييمه انتي؟

"وروح بابا هيه وتهاني واكفات يتفقن وابن اخوج ضربني بس لان وكفت بوجهه وكلتلها سمعتج." "ولج تهاني شوصلها لذيج الشغله القديمه؟ غزل عمة ابتعدي عن امج لاتخليها تترس راسج ترا ناويه على خراب بيتج." رجعت احلف واحجي محد يصدك. عجزت تركتهن ينصحن ابتعد عن مؤامرات ماما. ضميت راسي بالمخده ونمت. كعدت على صوت مصطفى دخل للغرفة كالها: "عليش غزل هنا؟ مهره: "طكها مؤتمن." "اااها وجايه تزعل يمي صدك تحجي هاي؟ كمت كعدت لكيته يطبك اردان

قميصه شافني ضحك كلتله: "هسه حروح لغرفتي." "لاخليج انام بذيج الغرفة بس شنهو صاير بوجهج عليش هيج طكج؟ ردت احجي صاح بمهرها كالها: "طلعي." طلعت. اجه كعد مقابيلي كال: "احجي عليش طكج؟ سولفتله كل السمعته كال: "مال اتفل بوجهج من اكلج ثوله تزعلين. تركي الزلمه يتصرف. اجفصين بأم السالفة. غزززل اشوكت تركدين وتفتهمين؟ "لاتكول ثوله تره عقدتوني وبعدين المن اكول تالي يكتلني صدك."

"يابه محد يكربج صوبج اخاف عملنها قبل ونجحت بيدهن ترا ماجان اكو احد يفتر واراهن ويعرف اشجاي يقندرن على روسهن. بويه انه يمج لاتخافين محد يوصلج خلي بس يفكر بس وروح ابوي امحيهن من الوجود." "يعني تعرفون شنو ديسوون وهذا الله ياخذه اشلون ضربني؟

"شنهو كالولج ازمايل واماندري شنهو اليصير من يوم الدخلتي هالبيت وانتبه مؤتمن المشاكل رجعت نفسها الجانت بزمن امج. ترا كل ذبانه تفتر بهالبيت ندري وين رايحه وشنهو جاي اتعمل مثل ذولاك الناس الشفتيهم وضميتي عليه." كالها وفع حاجبه. دنكت كلتله: "مارتك تكتلهن وتروح بيها والله خفت عليك تعرف ماعندي غيرك لاتزعل فدوه." "لابويه عوفج من السالفة ولت. هسه شنهو ناويه ترديله اتخلي نايم بالديوانيه يراسل؟

"صدك دتحجي يعني كتلني وراح يراسل بيها؟ "هههههه وانتي عليش محتركه موش عالاساس الله ياخذه؟ "صدك ديراسل؟ "لاوالله نايم بالديوانيه يدك جكاير ويمه هيفاء تسوك عليه. يله هسه خليج هنا كم يوم كرصي اذنه لمن اتشلعيها وبطلي رعونه اصرفي بعقل يالفهيمه. تعتازين اجيبلج شي من الصيدلية؟ "لا مابيه بس خدودي يحركني ضربني حيل." "عاشت ايده لو شالع راسج فرد مررة." "لعد اني شعرفني يدري لبالي ديفازع الامه ومامصدگ بيه خلاني اتجاوز علي."

"لو يعرف بيج عاقله جان من زمان گلج بس يعرفح ثولة وذرة عقل ماعندج گلك خليني اتحمل ضيم ركضتي وراها افضل ماتشمرني بوحده من جفصاتها تجيب اخرتي بيها." ردت احجي دخلت مهره وكفت. باوعلها ورد كال: "بيها الخير ردي نامي يبعد اخوج." "مصطفى لاتتركني." كلتلها وكمشت ايده. "جا عملتها من زمان لو جنت ناويها نامي خويه."

طلع. رجعت نمت مااعرف لويش اتصرف ويا هيج يمكن لان حاسبته مو بس اخ لا توئمي الي الله دزه الي. احس بالامان والراحة من احجي ويا واشوفه قريب مني. اشكد جنت اتمنى موجود بذاك الوكت الجنت ابجي ورا الباب خايفه من سيف. يله عالاساس هسه احسن اشو شابعه كتل اقلها ذاك جان بس يتحارش. غمضت اتذكرت من جان يتحارش اقشعر جلدي. اشكد انضرب ماحسيت مثل ذاك الخوف الجنت عايشه بي. ماعرف لان طفلة جنت لو لان هسه ادري اكدر اخذ حقي. دخلت هيفاء كالت:

"اليوم انام يمج." "لويش وين رجلج؟ "خيه خلينه انفك شويه نتذكر ايام العزوبيه." اجت تمددت يمي كالت: "هاولج متوجعه؟ "امم وجهي احسه نار." "ولله صار ساعة احجي عليه ساكت مايرد اصلا موش وياي ماعرفن شنهو براسه هذا اخوي راح يخبلنا اتمنى فد يوم يفتح كلبه لواحد يحجي وياه عليش هيج يتصرف." "ماعنده جواب لان واحد ظالم عنده الضرب يامسهله."

"والله خيه انه هم كلتله وشلت ايده كلتله شوف تره الزلمه مايتحمل قوة طكه ايدك موش هاي الترفه تدري اشكد انطيتها دوه لخاطر تهدأ وتنام اتشحرج من الالم كوه نامت." "شنو رد اكيد ولاهمه؟ "لاخيه والله مقهور وكلبه ياكله بس دالغه جاي تحفر براسه تالي كام طلع عرفته راح للصيدلية يجيبلج شي يهدأ الالم." "هو يضرب ويدور شي. عوفج منه هذا الثور رجلج وين؟

"يم جماعته هم اتلاغيت ويا خيه هالايام اضن شايفله شوف اشو بس يتراسل ومن اجي يسد النقال." "هسه يطلع متزوج." "لايمعوده غير انجلط بعدين وين متزوج انهي حيله على ايدي حتى من يكعد يريد يروح للدوام اعوف نومتي اكوم اخذ حصتي من النفط وارجع انام اخاف تتوزع على الدول المجاوره مابيها امان." "لعد العدي نفطهمكفيني اني والدول المجاوره وانوب كام يدور قارات يريد يسافر هسه يرجع بوحده هنديه."

"ياا بعد كلبي جهال اخوي من كل الدول عراقي وامريكي وهندي شحلاتها وهيج تصير صدك." ضربتها ابطنها: "بت شعشبونه اكول مو اسكتين احسن؟ اندكت الباب كامت طلعت اسمع صوته ورا الباب كالتله: "ادخل." رد: "لا هاج ذني واذا متأذايه خلي اخذها للمستشفى." "لازينه جاي تحجي مابيها شي شمالك يخوي شكلك تعبان؟ "بطاره كل الراحه ومبين تعبان عليش يابه." "ربي يريح كلبك ويطول بعمرك."

"مارايد يطول بس اريد ارتاح مثل البشر حتى لو يوم واحد كافي حامد ربي وشاكره." كالها واخذ نفس راح وهيه دخلت جابت شريط حب وعصارات اثنين. كالت: "كومي ادهن وجهج خايف على خديداتج لايكسبن من الضرب." كمت كعدت دهنت وجهي كلتلها: "بعد اكو شي يحرگني بظهري." ذبيت تيشيرت. باوعتي وضحكت كالت: "وين ادهن اشو الظهر مطبوع تكرص والصدر عضات ولج هاي بطنج شنو بيها؟ "هم ضربه." "غززززل هاي اسنون وزراك مومال ضرب."

"لعد عضه عوفها دهني ظهري ديحركني." ... نايمه واحس نفسه بركبتي. باسني ولعب بشعري. بعدته عصرني وحضني حيل كال: "تزعلين زعلي يطبج مرض بس زعلين وانتي بحضني." بجيت. مسح على ضهري وحضني حيل باس راسي. دفعته درت وجهي للجهة الثانية. صح عرفت السوا بس حتى يسكتني وميخلي امه تحس بيه كاشفها. بس جان المفروض مايضربني كدامها هيج. هو هم فهم كارهه حضنه. عدل نومته اتجتف. رجعت نمت.

بين نايمه وبين كاعدة واسمع صوت همس. فتحت عيوني اشوفه نايم والعرگ ينزل واسم بابا بحلكه مثل المختنك. كمت هزيت متنه طفر. باوعلي اشلون الواحد مختنك كوه يجر النفس مثل الاختل توازنه. كعد انتجه عالحايط خله راسه بين ادي يفرك بي. خفت من منظره مو طبيعي اجيت يما كال: "غزل طلعي منا بسرعة." "شبيك مؤتمن؟ "كومي غزززززل طلعييي." كمت بسرعة اركض لغرفة مصطفى. دكيتها حيل صاح: "هوشششش." فتحتها دخلت لكيته نايم بالكاع ومهره عالجرباية.

شلته من تيشيرته كام كال: "شكو ولج؟ "الحگ مؤتمن ماعرف اشبي." "شبي ولج بس لا جتلتي؟ "جان نايم ويهمس باسم بابا وهسه كاعد منهار." "خيلج هنا لاتجين وراي غزل." "اي بس لحگ لايصيرله شي." طلع. سمعته سد باب الغرفة. طلعت على كيفي ورا. دنكت اباوع شفته يمه كاعد نص كعده ومؤتمن يدخن ويده ترجف. مااسمع شنو يهمسله ومؤتمن ضم راسه صوته مبحوح مال واحد باجي. كاله: "ترجيته توسلت كلتله انه اخذ ثارك لاتعملها خليك وياي."

"يخوي شمالك جالمن گربت وصارت بدينه انهديت." شال راسه خله الجكارة بحلكه بس يرجف سحب نفس وهز راسه كاله: "ماتبرد ناري حتى لو شربت من دمه." "مؤتمن ماتعمل شي اذا ماتبعد غزل يخوي ماتحمل هاي كلبها ضعيف تسكت بلحظتها بس تشوفك." "مااكدر اتركها." "مؤتمن يخوي انه بظهرك واحميك وايدي كبل ايدك ناخذ حكنه والك البيت كله صفي بمزاجك بس غزل ترجع." "لا ماترجع حتى لو عرفت وشافتني ادري تسامحني كله لخاطرها الجاي اعمله."

"بس راح تكرهك وانتي مامعوز اكثر من هيج." "مااكدررر يااخي مااكدر خلي تكرهني اشكد ماتكدر بس اتضل يمي." "راح تشوف امها بيها تأذيها بدون لاتحس المرض الزرعته بيك فريال جاي اطلعه بيها بدون وعي." "مااطكها بعد." اتحسر واخذ نفس وكام مثل العجز. شفته توجه للباب. ركضت لغرفة مهره دخلت لكيته كاعده كالت: "هاا اتسنطتي؟ "اشبيج مهره؟ "مابيه شي شنو البيج يختلف وهيج يميزوج عن الكل؟ "منو يميزني؟؟ "اولهم مصطفى عليش هيج يحبج؟ "غير اخته."

"لاخواته يكرهن بس انتي عنده اعز من روحه وحتى الشيخ يضحك على ضحكتج." "وييين مو العصر شبعني راجديات." "تجاوزتي عليه جثير وحتى طگيتي امه ودميتي اديه وجنت ناويه اطگي وهو كل العمله ضربج كفين وموش قويات وضل يتكاوت كاعد يباوع للغرفة النايمة بيها." "مهره كلش مو وقتج اريد انام تعبانه." سكتت بس عيونها بيه تباوعلي بحقد ماهتميت. تمددت وانطيتها ظهري. هاي فايخه واني عقلي راح يوكف شضامين شنو الخايف منه اشوفه.

مر كم يوم ومؤتمن ميحجي وياي هو الزعلان مواني لان اديه مبينات اثر اضافيري بيهن وعمتي دوم تشكي من ظهرها. كلما رادات جدي يضربني لو يعاقبني على السويته ماكدرت لان جدي مبتعد عن المشكل ويه ومؤتمن ويعرف اذا حجه وياي كلمة راح يسويها هوسه بالبيت.

جان نظرات الكل تتهمه بسببه وصلت لهيج مرحله وبعد مااحترم احد ولااخاف. واني هم ساحگتهم صح مسوي روحه زعلان عالاساس بعد مو بحالي حتى عود اتربى وابطل رعونه وتجاوز. مايدري كاشفته كل هذا ظاهري بالاخص من يدخل بليل يضل صاحي يدخن لمن يتأكد نمت حتى ياخذني لحضنه عالكيف وينام. كوه اكتم ضحكتي لان اعرفه ديربي روحه مو يربيني كل نفس ياخذه من ركبتي تحس روحه موجره.

بالنهار انام مرتاحه حتى لومااجه لان اعرفة بالديوانية نايم هاي لوجانت دعاء موجوده جان گابلت الدرج وگعدت. وكفين بالمطبخ دخلت سابحه تحارشت بيها هيفاء اتكلها: "بربج فتحي الدكم خلي انشوف شمسوي؟ ماردت من حركتها اندارت تفلت عليه وصاحت: "منا لباجر ماترديله. اروح اجيبن دعاء انه مره جبيره موش حمل سوادين مؤتمن نص الليالي." "ولي ولج خلي اطيب وجهي ديحركني."

طلعت للصاله صار بوجهي كاعد يم جدي يراسل. احس النار شعلت بروحي عرفته ويه دعاء. احتاريت شنو اسوي اعرف مابيدي شي واكفه بس اباوع عاجزه بس النار تاكل بيه مااكدر اهدء. صعب تشوفين زوجج يراسل بوحده وانتي ماتكدرين حتى تحجين. رحت صبحت على جدو كعدت شال راسه باوعلي غلق الفون وعكد حاجبه ضايج دنك يفرك بسبحته. كملنا ريوك كام كال: "بويه معتازين شي قبل لااطلع؟ عمتي:

"اي والله يمه دز واحد من الولد يجيب طماطم هاي مرتك ماخلت على حالنا تروح وتجي تاكل بيها." شهكت باوعتلها كلتله: "اشوكت؟ "ولج شنهو اشوكت؟ البارحه جان مجانه طماطم بالثلاجه صبحن ماكو." "مو كلهن مصطفى اكل نص." "يبووو يبوو على ضيمي انه شمسويه بدنياي والله بلاني بيج وبمصطفى." هيفاء: "ولج غزل اذا اكلت طماطم اصير هيج ورديه مثلج؟ "امم اكولي كيلوين باليوم وشوفي." بعدني احجي وضربتني عمتي بقبق الشكر كالت:

"كومي لاتسودنيلي البت كيلوين ام حلك." "شبيج هيه طماطه ومادام هيج ضربتيني اله مااخلي طماطيه وحده بعد بثلاجتج كلها اكلها." صاح مصطفى مناك: "طمطايه يبعد اخوج طمطايه." ضحك مؤتمن كال: "اذا عالطماطم سهله هسه انزللكم صندوك بعد بويه شنهو رايدين؟ عمتي: "يمه انه اخلي تهاني تكتب النعتازه واندزه الك." هيفاء: "اخذني خويه وياك لبيتي اشو عمتي بطت ماجت اليوم." "يلا كومي اشمرج بطريجي هم بلوه انتي متكليلي اشوكت اخلص منج؟

طلعوا كملنا ريوك اني مااحجي لاويه عمه ولابيبي معزوله بالمطبخ لو بالطارمة حتى غرفتي بعد مااصعدها ماخذه غرفة مصطفى. واكفه بره نغسل بالطارمه واتصلت هيفاء رديت كالت: "غزل راح اكلج شي بس موش مني سمعتي." "شنو ولج؟ "تره دعاء متواعده ويه مؤتمن اليوم يجي للبيت مالتي تريد تحجي ويا عدها شغله." "اشوكت حتجي؟ "ساعة وجايه لان خبرني مكرم كال لاتطلعين جاييكم." "ؤك ولي." "شنهو راح تسوين؟ "مالج دخل يجيج الصافي هسه ولي."

ركضت صعدت غرفتي طلعت جبه وكفت شفت وجهي صاير اصفر. وكفت كدام المرايه عالسريع عدلت وسويت ميكب خفيف حتى مابين اكو قلق بداخلي بس جذب احس كلبي يفور مااعرف اشوكت اخلص منها. اشلون ماجان تريد ترجعله غير احركها واحركه وروحه وراها كون صدگ يمؤتمن وتسويها اله اخليك طول عمرك عايش بندم. كملت لبسي خليت الشال فوكاني لفه خليجيه فتحت كنتوره اخذت مفتاح سيارته العالية مال الواجبات ونزلت اركض عيني بالساعة ماضل وقت. طلعت للكراج

اجت سماح تركض وراي كالت: "وين؟ "سماح وخري والمسيح اذا خبرتي مؤتمن بعد لساني مايطخ لسانج." "ولج مؤتمن يذبحج اذا طلعتي عقلي غزل كافي الصار بينكم." "واني اريد انهي لهذا الشي ويا وخررري عن طريقي." صعدت السياره صح ماسايقه قبل هيج ارتفاع سيارتي ناصيه بس من حركة كلبي حتى مافكرت كل تفكيري بدعاء.

شغلت صارت سماح ومهره كدام السياره دكيت هورن حيل وشحطتها وخرن. طلعت لبيت عمتي عين بالطريق وعين بالساعة اكيد وصلت وهسه اتسولف وتقنع بي. بس مؤتمن ماراح يوافق هو وعدني بس وعدني قبل وهم خلف بوعده موكال بعد مااضربج ورجع ضربني. كلبي يدك واديه ترجف ماعونت اوصل صدك لكيت سيارته وسياره ثانيه باب عمتي. نزلت قفلت السياره ودكت الباب. فتحته هيفاء خايفه كالت: "لاتدخلين عوفيهن يتفاهمون والله جاي يردها ماينطيها مجال انه واكفه اتسنط."

"وينهم؟ "بالاستقبال." "وخري." "غزل بروح ابوج اهدي." دفعته ودخلت لكيته وكف امجتف ومدنك وهيه تحجي ويا. شال راسه خزرني كال: "اشجابج؟ "شنو اشجابي شدتسوي وياها وحدكم؟ اجه يمي كال: "منهو جابج؟ "هذا الهامك مؤتمن لويش دتسوي هيج؟ "شسوي بويه ماكو شي سوء تفاهم وجاي احلى وياها." "يعني رجعتها مو؟ "شنهوو رجعتها خبله انتي؟ ضربته بصدري ردت اروح املخها. كمشني كال: "اوكفي بس اهدي والله ماكو شي."

"وخر مؤتمن بعد لو يصبوك ذهب لوتنكلب نبي هم ماارجعلك وخرررر." "بويه اشبيج تسودنتي بس انطيني مجال احجي." "وخررر جاي وياها وحدكم تتختلون جان كلتلي على شنو خايف وجاي عد العالم موعدكم غرفه." "غزززل انكتمي بويه اشبيج جايه متسودنه. والله ماكو شي لااردها ولاعندي شي جايه اتريد افلوس وعدها كم جلمة كلت اسمعها." "لابعد متضحك عليه كافي جذب وخرر عني مؤتمنننن وخرر." هو كامشني واني ادفع اريده يهدني مااكدر. كال مكرم:

"اخذ دعاء ردها لبيت اهلها." صحت: "اوكفييي لاترحين وخر مؤتمن مااروحلها بس احجي." "يبويه والله ماكو شي لاتحركين بروحج." "واحد حقير وعمرك ماراح اتصير بشر." عصر وجهي ضغط على سنونه كال: "وروح ابوي غزل ادوسج وما اسال عنج ضبي السانج وخلي النفس طيبه عليج." "مؤتمن وخرر مااريدك بعد." دفعني كال: "يطبج مرض ولي وين تردين جنج صدك متنصلحين." "هيج صارت اولي لعد خليك وياها اشبع بيها بس لا تجي تتوسل وتبجي ساعتها لواشوفك ميت مااكلبك."

اجه راد يكمشني كمشه مكرم كله: "تركها." صاح: "طلعي غزززل ولي من وجهي وانعل ابو اليجي يتوسل ويبجي وراج." دعاء: "اهدء مؤتمن عوفها تراها ماتفتهم خليها تولي." رحت جريتها من من شالها على شعرها كلتله: "منو متفتهم ولج والمسيح اشعل ابوج اليوم انتي شنو ماعندج كرمه كم مره شمرج شكو لازكه؟ "راح يرجعني لذمته." كالتها وضحكت. انداريت لمؤتمن لكيته يمسح بوجها. طلعت لباله رحت صاح: "غزززل."

انداريت مالكيت غير حديده منتجي عالحايط. شلت ودخلت سطرت دعاء بنص راسها خليت دمها صار طشار من شفتها خفت طاحت الحديده من ايدي. ورجعت ليورا مؤتمن وكف صافن. ركض مكرم وهيفاء الها. اباوع راسها مفتوح والدم بثواني ترس المكان. اندارلي مؤتمن فاتح عيونه على كبرهن كال: "شعملتي ولج وروح عمي اليوم لو طيرين هم اذبحج." حسيت الخوف بنجني. رجعت ليورا صار الباب بوجهي. انداريت واركض بكل حيلي بدون وعي. شغلت السياره واسمع الصريخ. طلع من بيت

عمتي طلع مؤتمن يركض صاح: "اوكفييي غزززل." شحطت السياره ولفتها طلعت كبل طلعت ماعرف اشلون هيج سويت. اعرف مؤتمن ماراح يرحمني لان انتهت هاي اذا مامات تفقد عقلها. همست: "اني اشلون وصلت هيج مرحله اشلون فقدت عقلي. مالكيت غير بت الشيخ تكتليها بس تستاهل لوكاتله مؤتمن جان اخلصتي فرد مره ورتاحيتي."

اسوق دايسه واحجي ويه روحي وماادري وين رايحه. فوني يرن اباوعله مؤتمن مارديت. زودت السرعه ماكو غير اروح لماما لان ادري اذا كمشوني راح يكتلوني ومحد راح يدري عني. على طول ماامشي الفون مابطل رن. هواي مشيت هنا مومثل شوارعنا لامزدحمه وناس رايحه وناس راده. وصلت شارع لخ دااعبر وصار كدامي واحد عنده يسموها ستوته. ضربته فلشته دخل بالمقدمة مالت السياره. الضربه قويه راسي اجه بالاستيرن احس الدنيا افترت غمضت.

دقايق اسمع يدكون عالباب. شلت راسي اباوع العالم ملتمه صايره هوسه. صارت عيني بالولد شالوا منتهي واني احس روحي بهتت. الباب تندگ حيل والولد يخر دم. عصرت نفسي ولميت رجليه. عيوني تتنقل عالعالم الي كل واحد يدگ من جهه يردني افتح الباب لان السياره مضلله ماعرفوا رجال لو مره التسوق. شلت الفون من الخوف حتى مااعرف اشلون افتحه. اتصلت بمؤتمن اول مارد شهكت وكلتله: "الحكني مؤتمن سويت حادث وموتت واحد." "خرب بهلج وين انتيييي؟

"ماادري الحكني الناس حيكتلوني مؤتمن مات الولد سحكته الحكنيييي." "اهدي بويه هسه جايج بس كولي وين انتيي؟ "مااعرف مااعرف." جنت احجي وابجي منهاره وهو انخبص صاح: "اهدي بنيتي لاتخافين نزلي وانطيني واحد من الموجودين." "اخاف يموتوني." "محد يوصلج غززل بويه فتحي الباب لاتخافين ولج اخاف السياره تنفجر بيييج نزلي دخيل ربج." فتحت باب السيارة بالبداية خايفه بس من شفت العالم مخبوصه الي يتحمد بالسلامة والي يسأل اذا بيه شي امنت.

نزلت جان رجال جبير يم الباب يباوعلي خايف متأذايه لان الدم ينزل من راسي گال: "امشي بويه اخذج للمستشفى." "لاعمو بس خابر هذا زوجي وگله وين احنه." اخذ الفون راح على جهه اسمعه يكله: "لامابيها شي... والله مابيها شي يبويه بس خدوش الولد تأذه اخذوا للمستشفى... اي احنه بال... گريب عالسوگ." ضل يحجي وينطي العنوان المضبوط. شوية وسدته رجعلي الفون. واحد انطاني اكلنس كال: "ضغطي راسج جاي ينزف."

اخذته خليته على كصتي. رحت كعدت على مسطبة عالية جسمي يرجف ودموعي تنزل منتظرة مؤتمن. شوية اجوا البوليس. كمت وكفت بين ماسألوا وتفتهموا من العالم. اجه واحد يمي كال: "الحمد الله على سلامتج." من الخوف والرجفه كوه طلعت ويه الشهكه: "شكرا." "وين اجازت السوق؟ "ماافهمت شنو دتقصد." "هويه القيادة." "بيتنا." "تمام خابرتي الاهل؟ مسحت دموعي كلتله: "هسه زوجي ديجي خبرته." رجعت شهكت كلتله: "مات الولد؟ "لا ان شاء الله ماعليه وين ساكنه؟

"ويه زوجي." ضحك كال: "ادري انه اسال عن المنطقه." -واعرف باسم منو يصيحولهم بس ذني اعرفهن." "تمام يعني هنا من البصرة خابري الاهل خلي يجيبون مستمسكاتج وجازت السوق ويلحكونا للمركز." ماعندي مستمسكات بس باسبورت ويم ماما بغداد وهوية القياده ضلت بأمريكا بس عندي صوره بالفون الها. "بابا انتي منين؟ "من بغداد بس قبل جنت بأمريكا مصار هواي من اجيت هنا." "حرام اذا فهمت شي خابرتي احد من اهلج؟

"اي زوجي جاي بالطريق بس انتظر دقيقة فدوه." هز راسه واندار صاح بالناس لان ملتمه صايره هوسه. بعدوهم واني رجعت كعدت. لميت روحي ودموعي تنزل بخوف كلما اغمض اتخيله مات افتح عيوني مرعوبه لحد مااجه اجوا روحي خلصت. شفت كاظم ومؤتمن اجوا كمت ركضت لمؤتمن كلتله: "كتلت واحد ماااات." "اهدي بويه." "مؤتمن سحكته بالسياره." "بس هدي انطيني صبر خلي افتهم." "دااكولك ماتت مااااات."

سحبني بحضنه لان جنت منهاره وخايفه مو سهل تقتل شخص بريئ وتشوفه كدامك ميت وانت سبب موته. وصلت لحاله حتى بعد مااشوف من الخوف. ايد حاضني بيها وايد سلم على البوليس الي طلع يعرفهم لان الولد سلامه قوي كله لايكولون ماميت بس هم نروح للسمتشفى ونتاكد. رحنه صعدنا سياره حتى مااخذوني وياهم خلوني ويه مؤتمن. تعجبت هناك لو ابن الرئيس هم حاله حال الشعب ينسحل بسيارة البوليس.

الطريق كله دموعي تنزل بخوف شبه فاقده وارجف كامشه قميص مؤتمن كاظم يسوق. اخذ اكلينس ضغط على راسي ونطاه كاظم مي كله: "خلي تشرب البت راح تسكت بويه يكولون مامات عليش جاتله روحج." حتى مي مااكدرت اشرب خليت راسي بصدره اريد ابجي وارتاح مااكدر بس دموع مستمر تنزل. على طول الطريق مؤتمن ضاغط عليه بحضنه ماحجه ولاكلمة.

وصلنه للمستشفى نزلنا رحنه للاستعلامات سالوا عن الولد. لكينه اهله يمه رجال جبير ومره جبيره امشيله وحده اكبر مني يمها طفل كاعده بالباب. سلم عليهم مؤتمن طلعوا هم يعرفوا لان كام يصيح: "هلا بالشيخ على راسي جيتك هلابيك عليش زحمة روحك." كعدت على الكرسي لان احس طاقتي خلصت. عيني بحلگ الرجال شنو يكول علما كال: "لامابي شي بس كسر الرجله." احس الدنيا خلصت. اخذه مؤتمن البوليس على صفحة يحجون اجت المريه الجانت بالكاع كعدت يمي كالت:

"انتي مرت الشيخ؟ اشرتلها: "اي." "انتي ياهو منهن؟ "غزل." "هاي انتي غزاله اي اشلون ضربتي رجلي؟ "والله ماادري بي فجاه طلع غلط بالسير صار كدامي ضربته والله ماادري." "اي شعليج قابل خسرانه شي؟ عليش تبجين احنه الراح ناكل تبن شوكل هالعائلة وزلمتي متجسر." "مؤتمن حينطيكم اشكد تردون." "انشوف." كالتها وكامت. اجت المره الجبيره كالت: "هاج يمه شربي مي كلبج يبس من البحجي." اخذته واتشكرت شربت شوية كالت: "انتي الشيخه غزاله؟ اشرتلها:

"اي." "هلا بيج يبعد بيتي مسحي ادميعاتج مابي شي ابنيي." غمضت احمد ربي. اجوا مؤتمن والرجال والشرطي يضحكون ويسولفون عادي. دخلوا للولد دخل مصطفى يضحك بيده جوازي ومستمسكات اشرلي ؤك. دخل يمهم شويه وطلعوا. اجه الشرطي كال: "بس بصمي هنا خويه." "شنو يعني؟ مصطفى: "استلم تيهت العربي." كام يااشرلي: "خلي اصبعج هيج وطمغي هيج." ضحكت سويت مثل مكلي كلتله: "تره اعرف بس هو حجاها بسرعة ملحكت افهم." "مؤتمن يتعطل كومي وياي نرجع."

"شنو يعني مااروح للمركز؟ "بت الثوله يالمركز دكومي." "منين جبت جوازي؟ "افاا وانه اخوج لا زعلت منج." "ماما منطيتك حتى التنازل مو؟ "رب الي أمنت بتها يمي ماتأمن التنازل كومي خويه." كمت رجعت ويا قبل لانوصل كلتله: "دعاء ماتت؟ "اي بالطب العدلي هسه." "عزا شنو حيسوولي؟ "ماكو بس السن بالسن يعني توكف زهراء تطبر راسج مثل ماطبرتي راس اختها تموتين هاي هيه." سكتت هذا اكيد يتهزل شكله مومال واحد عدهم ميت يضحك. خليت راسي

عالجامه لمن وصلنه كال: "يلا عالبيت عدل خلي ارجع بسرعة." نزلت لكيت سماح وهيفاء اتلكني كالن: "بسرعة صعدي قبل لااتلكفج جدتي." صعدت فوك ذبيت حجابي ميته تعب ورهاق. دخلت للحمام سبحت وطلعت لكيت هيفاء تضحك وتسولف لسماح اشلون طابره دعاء وسماح تكول: "حيييل بعدبيتي." كعدت مهدوده مشطتلي سماح وضفرته كالت: "ولج جان انطيتيها بالوريد بنص ركبتها." "يعني ماماتت؟

"لاخيه كم خياط ابجهامتها جنها صل كلشي مابيها فطر خفيف بالجمجمة بس اااخ عرفت اشلون تستفزج وسوت الي براسها." "ترا ادري جان ناوي يردها." "وداعت جهالي ماناوي ولاخالها براسه وماراح اذا ماجان رايد يخلي حد لهاي السالفة لان لعبت نفسه اربعة وعشرين ساعة تتصل يحضر من رقم ترد من غيره." "كالت راح يردني."

"لان عرفتج ثولة راح اطكيها وبيت هيفاء والكل راح يعرف لكفتيها ويه مؤتمن حتى ينجبر يردها قبل لاطش السالفة ويطلع بفضيحه بسس اااخ من الكبر الشغله وشعل النار." كالتها وندارت على هيفاء الي سوت روحها مو يمها تكلب بالغراض. "المهم الولد شنهو صارله؟ "هم كلشي مابي بس متت لبالي ميت هسه مؤتمن شنو حيسويلي؟ "دكومي نامي وجهج اصفر بعدين الحساب." اني نمت وهنه طلعن حتى ماحجن لان شافني مهدوده. رن الفون شفته مؤتمن رديت بصوت منبوح:

"ها مؤتمن." "مابيها شي البت ماماتت لاتخافين وعلاجج اخذي ونامي بين مااجي." "مم." "غززل كومي اخذي علاجج بويه لاتعلين كلبي." "دعاء راسها مفطور مو." كلتها وشهكت. "انعل ابو دعاء لابو اليوم الي انعل اهلي بي. كومي بنيتي يله يبعد ابوج اخذي علاجج ورتاحي لاتخافين قز القرط مابيها." غمضت احس كلبي يريد يطلع. "غزل بويه شصارلج؟ "تعبانه." "دخيل محمد وين استغفر الله عنج اشلون خالتج وحدج بالغرررفه."

كالها وغلق الفون عرفته راح يخابرها تصعدلي. رجعت غمضت حتى مابيه اكوم اخذ العلاج لحد ماصعدو سماح انتطني اخذته ونمت بسرعة. كعدت على صوت مؤتمن وهيفاء الجانت تتوسل بي اتگله: "دخيلك اتركها لاطكها بروح ابوك هيه تعبانه وخايفه لاتزيدها." على صوتهم كعدت. شافني كاعده دفع هيفاء واجاني. رجعت ليورا. جرني من شعري صاك على اسنونه ويحجي منفعل كال: "شنهو اليجيب وياج نتيجه فهميني؟ اجت هيفاء رادت اتسحبه وخر دفعها وصاح بصوت عالي:

"طلعيي لااسحگ راسج." خافت تركته. اندارلي كال: "شنهو يسموا العملتي؟ قلة ادب طياح حظ لومالج رداد لو شنهو. ولج تالي عمري افتر وراج من مجان لمجان والعالم تتفرج عليج واتوسل بالضباط لايدخلوج مراكزززز شنهو هذا فهمينييييي." جان يحجي ويضرب على راسي. سكت ولارديت لان التعب الاحس بي ماجان ينطيني مجال حتى اجاوب. عفته براحته حجه صيح انفعل واخر شي شافني صافنه عليه لباله مامعبرته انطاني كف صحاني لزماني رجعني للواقع.

"طك وطكيتج وطلاك وطلكتج هجر وحبس اطياح حظ كلشي استعملت وياج. متكليلي شنهو بعد اعمل حتى تجين للطريق احجييييي." رفعت راسه اباوعله عيونه حمر ومحترك من يحجي الاورده كلها ظاهرة كد ماضاغط على اعصابه. واني امفهيه مابيه اجاوب صك على اسنونه كال: "ساحكتني حضرتج مامهتممممه." ركعني كف ثاني لمن دك راسي بالجربايه. انفتح الجرح نزل الدم. اني تعبانه والدم زودها. علاقتي كلش قوية ويا من اشوفه مااعرف شنو يصعد براسي.

ومؤتمن يصارخ منفعل هيفاء تبجي وتتوسل. خليت راسي عالمخده وغمضت اريد اشرد من الاني بي. اسمع هيفاء تتوسل يعوفني اتكله: "دشوفها منتهيه مااعرف اشصابها." "قز القرط ميصيبها خبلتي وهيه صاحيه ولج اتصلت خلتني اركض مثل المسودن مااعرف اشبيها بس كالت جتلته المن اشلون مااعرف منا هاي فاتحه راسها محتار بيها وهيه مااعرف وين ولت." "ميخالف يخوي عدت الحمد الله اتركها ادخيلك."

"شتركها هاي متنعدل وماطولها موجوده ماراح ارتاح. هم طلعت بدون اذن وهم فضيحه نعلت ابوي بيهااا اشكبرها تالي عمري حرمتي بين الزلم يكلبون بيهااا ماضل واحد ماتمايزها بالديره." دفع اخته وشالني من شعري فتحت عيوني كال: "منهو كلج اطلعن بالسياره بكيفج تتصرفين." رجعت هيفاء كمشته تتوسل. اني اكتفت بس اباوع خليته براحته يطلع شكو شي بكلبه. ردت بس اخلص من هذا الموضوع يفك عني ويخليني انام.

ابين هيفاء ادفعه وبين هو اعصابه منهاره خجلان وضايج من السويته. شافني لادافعت ولاحجيت عافني. رجعت خليت راسي عالمخده وغمضت. اجت هيفاء كعدت يمي توخر شعري عن وجهي كالت: "خيه اشبيج غزل اتسمعيني؟ ولك مؤتمن اشبيها هاي خاف صابها شي؟ "مابيها مرض هاي اتمرض وكلشي ميصيبها." كالها وطلع ركع الباب. حجت وياي اشكد احسها صدعتني. فتحت عيوني كلتلها بترجي: "تعبانه اريد انام طلعي حبابه."

تالي جابت اكلينس ضغطت عالجرج ومسحت وجهي. شافتني نمت عافتني وطلعت. من التعب والخوف الشفته اليوم حتى بعد مااحس لا بالم ولابأي شي يصير غفيت بسرعة. كعدت على عمتي وسماح الي يغسل اديه والي يسويلي كمادات. فتحت عيني ضحكت سماح كالت: "اووف ولج وكفتي كلبه واخيرآ وعيتي." مؤتمن جان على صفحه خال اديه على راسه مدنگ. سمع كعد شال راسه باوعلي بتعب وجهه باهت وعيونه حمر دم. رجعت غمضت وهنه مستمرات بالكمادات. عمتي كعدت يم راسي كالت:

"هاي ماكله خرعة موش مريضه بس بعدوا خلي اقرا على راسها." تركتها تقرا ورجعت نمت لثاني يوم. صح اسمع اصواتهم ومن يحاجوني اكعد واشرلهم بس جنت معوزه نوم اشكد ما انام بعدني نعسانه مااعرف شنو اليصير وياي بس هيج جنت مرتاحه. حتى اكل مااكلت كوه ثاني يوم الظهر كعدتني عمتي سوتلي لفه صغيره اكلت شويه ورجعت نمت. اسمع مؤتمن دخل سأل عني بالبداية من تأكد زينه وماخذه علاجي كالها: "تركها خلي تولي هيه جوع وتكوم تاكل."

"ولك يمه هاي مخترعة موش طبيعية." "بلكي لنها متخبلة مثل اختها وتشنق روحها واخلص." "يع مؤتمن صدك تحجي؟ "عمه دخيل ربج راسي مصدع اريد اخمد." "يلا كايمه." كالتها وطلعت. اعرف مؤتمن اليحجي من وره كلبه لان ضايج من السويته بس هم جان يأثر بيه كلامه. تمدد انطاني ظهره ونام. كعدت الصبح على صوت سماح كالت: "كافي صارلج يومين نايمة كومي بعد يله اتريكي ويانا."

كمت شوية احسن غسلت وجهي طلعت اشوف وجهي بالمرايه خدودي مورمات وكصتي عليها بلاستر مال الضربة متبلله وخرتها مسحته بالكلينس طلعت ردت انزل اتفاجأت بوجود دعاء بالغرفه جان راسها امظبر وعينها زركه امورمه او نص وجها امورم. طلعت هيفاء من يمها باوعتلي ودنكت عرفت مؤتمن مرجعها. مااهتميت بعد الشفته والصارلي اي شي يصير مااهتم. نزلت كال مصطفى: "يابه حمدالله على السلامة." ابتسمت وكعدت مؤتمن جان يكلب بالفون شافني ودنك يكمل ضايج.

بلش جدو هو وبيبي بالرزايل والاهانات خلوني اتندم لان نزلت خاصة عالسيارة متخبلين. اخر شي زهكت كلتله: "جدو خبرت ماما عرضت سيارتي للبيع بس اتحولي افلوسها اصلح سيارتكم." مؤتمن هو ومدنك ضحك بستهزاء. مكرم: "هاي وجهج من الحادث من غير شي." همست: "لا ذني عقوبة تحطيم سيارته." مصطفى: "سبحان الله نفس حنيت ذولاك الناس من حطمتي سيارتهم." مؤتمن جان كدامه جاي دفره اجه بمصطفى عدل وصاح: "موش جنك لغيت زايد." "اعصابك يابه اتهزل."

"مصطفى خبثك تبعده عنييي قسما برب العز اكوم اسحك راسك ونعل ابو اهلك." سكت مارد. اجه ابالي سيف صدك ولامره مد ايده عليه اشكد سويت بي دوم جان خايف عليه وعلى مشاعري ماحمدت ربي انطاني الي يربيني ويعاقبني على تبطري. مصطفى. غزيلان، وين صافنة؟ -هياتني موجودة، مصافنة. -أمدولغة. ردت أحجي، شفت دعاء اجت كعدت يم مؤتمن تضحك، كاللها مصطفى: -بعلي لو أني ما آكل هاللطكة، جا بالطب العدلي. روحي ترفرف بويه موش حيل، دخيل ربج. دعاء:

-تريدني أموت؟ اسم الله إن شاء الله لليكرهوني. -اها، إشقصدج؟ عمي ذوله الناس من راجدي إشهوت خلقتهم، موش كرك. إصحي مني. همست: -مصطفى، مو كلت ماتت؟ -لا بربج، وهاي حاسبتها عايشة؟ دشوفها جنها زومبي. بويه ودعناها من يومين، هاي روحها الزفرة تفتر يمنا. دعاء: -سمعت مؤتمن، شنهو يجون؟ ما رد مؤتمن، جان مدنك على فونه، إيده يسد ويفتح بيها، كد التوتر مبينة. حجاية مصطفى اجته بالصميم. أخذ له شوية وكلها: -صبيلي جاي.

أباوع له، الحياة ماشية وياه طبيعي. ولا كأنما أني كدامه، ولا هو اللي كلي: "ما تردين إلا برضاتج". وهسه بصفه، ما أعرف من شنو مخلوق. كطع تفكيري مصطفى وهو يأشر كدام وجهي، كال: -إشبيج؟ -ماكو، بس اكتشفت كل اللي جنت أعيشه وهم. عمري ما انطبعت على عيشتكم، ولا راح يجي اليوم اللي راح أصير مثلكم هيج. -يعني؟ -يعني إجه الوقت اللي أندم على العشته من صدك، واللي حسيت بيه. وأتمنى أرجع ذيج غزل، كل همها تخلص درسها حتى تباوع فلمها المفضل.

-فات الوقت خويه، محد يضل على وقت عاشه متمسك بيه. دنكت، صدك اللي يحجي. أصلاً أني بالوقتين ما عشت مرتاحة. أكلت لكمة، شفته كدامي ياكل عادي تكول ماكو شي. رجعت الخبزة، كالت عمتي: -وين؟ -عمه، نعست داكوم أنام. -ياع، إشمالج يعمه؟ راح يصر ثلاث أيام نايمة.

ما جاوبتها، لأن صدك جنت أريد أنام وعيوني قفلت. قمت صعدت شمرت روحي عالجرباية. غفيت بسرعة، أحس إيد تمشي على راسي، تلمس حرارتي، ضغط على الوريد، تأكد من النبض، دنك باسني وقام طلع. كعدتني هيفاء كالت: -تره صار العصر، قومي. فتحت عيوني، كعدت. كالت: -غزل خيه إشمالج؟ -ما بيه شي، بس تعبانة. -موش مال تعبانة، بيج شي. حتى مكرم انتبه، كال لمؤتمن: "تره مرتك بيها شي موش صاحية، تتصفن ونايمة حتى وهي وكاعدة". -كلتلج تعبانة ونعسانة.

-لا خيه، ماكلة خرعة. ناخذج للعلوية تسبحج. -مؤتمن إش وقت رجع دعاء؟ -من طكيتيها وبسببي، بس والله وداعة سند ما جنت قاصدة اللي عملته. حسبالي جاي لخاطر يردها، وخابرتج لخاطر تلحگين، بس من سمعته يكلها: "يبت الناس، أحنه ما نرهم، لا تفكرين بعد للردة"، عرفت جاي يخلي حد. -ههه، والحد جان رجعتها. -وعلي راد يلم السالفة، بالأخص من شافوها مفتوح راسها وسألوا عليش هيج.

كال لهم: "أنه طگيتها لأن جسرت جلمتي وطلعت بدون إذني، حسبالها بعدها تحت حكم أبوها وتتصرف بكيفها". -يالله بالعافية علي، خلي هي نفس صنفه ترهمله. -دكومي سبحي وتعالي أكلي، راح تطيحين من الجوع. مر يومين وأني حتى جوه ما أكدر أنزل، بالعكس زادت حالتي، حتى للحمام ما أكدر أدخل، كوه أريد بس أنام. إضافة على هذا كله، مؤتمن زعلان وياي، محملني مسؤولية الصار كله. أصلاً ما معبرني،

وكلما كالت له عمتي: "مرتك مخترعة، أخذها سيد لو للإمام"، يرد: -عوفها، بلكي لأنها ميتة وفاكتني من شرها. انضاف لي فوق النوم كوابيس، بين نايمة وبين كاعدة، وأشوف اللي دعمته مشلوع راسه وجاي يمشي اتجاهي، كله دمايه. أباوع له شي مرعب، مد إيده، كمزت أصرخ بعلو صوتي. طفر مؤتمن لزمني صاح: -بويه، كولي يالله. غمضت عيوني حيل، أريد أخلص من منظره ما أكدر. عصرت نفسي أبجي بصوت ومؤتمن يكول: -اهدي هذا كابوس، ماكو شي لا تخافين.

هو يحاول يسكتني وأني داخلة بحالة رعب أتصوره حقيقة. ما صحيت ورجعت لوعي غير لمن دخلني للحمام غسل وجهي، جنت باقية بأنفاسي الأخيرة. شافني صحيت مسح وجهي، رجعني لفراشي، كعد يمي خلاني على صدره، غمضت بلش يقرأ آيات لمن رجعت غفيت بدون وعي.

ما أعرف شنو الحالة اللي دخلت بيها. بالنهار أخاف أبقى وحدي، أحس الغرفة مشؤومة وظلمة، ما أرتاح إذا ما أخذ زوية، أحسها تحميني. أخلي راسي عالحايط أغمض أرتاح، حتى مؤتمن بعد ما يهمني وين راح وين إجه، بعد حتى ما أطيقه، كمت أتمنى ما يدخل غرفتي، هيج أختنق من شوفته. كم مرة دخل لكاني كاعدة هيج، قومني رجعني لفراشي. حجه وياي لويش أكعد هيج وشنو أحس، ما جنت أكدر أجاوبه بس أترجاه يطلع، أريد أنام وفعلاً أغفه ما أحس بعد. دوم أسمع يقرأ قرآن يم راسي، من أسمع صوته شي يخنق صدري، كوه أنام لأن ما أريد أكعد وأشوفه كدامي.

آخر شي هو هم عجز، قام من يدخل يشوفني نفس مكاني كاعدة بالزوية، أشوفه محتار، يكعد عالجرباية ويضم راسه بين إديه، ما يعرف شيسوي. إذا راد يقرب أترجاه وأبجي وتوسل يوخر عني، هو هم قام يبتعد، أحس براحة من أشوفه مبتعد. من قام يشوفني مرتاحة على بعده وعرف قربه يتعبني، ابتعد لأن من صدك وصلت حالة أتعب من أشوفه، غير الشهكة والترجي ماكو بلساني. بعد حتى بليل ما يجي ينام جوه، لباله كرهته هيج، ما يعرف أختنق من وجوده.

كعدت الصبح شفت وحدي بالغرفة، من الخوف طلعت أركض مرعوبة، نزلت لكيتهم طالعين مخلصين ريوك. غسلت وجهي واجيت أمشي كوه، خليت راسي بحضن عمتي أم مكرم. لعبت بشعري كالت: -إشمالج يعمه ذبلانة؟ -تعبانة عمه. هيفاء: -وين ذبلان عمه؟ خافي الله شوفي خدودها تنكط دم. -يمه والله حسدتوها من عويناتجن، البت طاحت. وين حركتها وتطفرها بالبيت؟ شوفيها شلون صايرة. قومي تريقي عمه. -ما أريد، مو جوعانة. -ولج سماح، جيبي لكمة لخيتج خلي تاكل.

غمضت أسمع عمتي أم مؤتمن اجت كعدت كالت: -إشبيها المكموعة نايمة أربعة وعشرين ساعة؟ دعاء: -عيارة عمه، تريد تخلص من الشغل وأنتي شو ساكتتلها. -أمم، هو أني لو هذا رجلج ألف مرة يروح ويجي يكول: "لا توصلون صوبها". -والله عمه، على اللي عملته بيه المفروض تاخذولي حكي وما أرد، بس لخاطر أبوي كال: "لخاطري ردي ولا تحاجيها، هاي ما تفتهم وشافت مؤتمن هاويج من غيرتها طكتج".

-يبعد عمتج، أنه آخذ حقج من عيونها، خليها وراي وأعرف شنهو اللي يرضيج. ماكو بعد، راح أخلي جده يحاجيه يعدل بينجن وأريد من الله يعترض، إلا أغضب عليه هالمرة. أسمع ضحكة دعاء، فرحت من سمعت الحجي. عمتي عصرت إيدي تاشرلي: "لا تسمعين، مالج شغل". ما أريد هسه لو ياخذون مؤتمن وأهله ما أهتم، أريد بس أرتاح وتروح الخنقة عني. جابت سماح الأكل وعمتي أصرت كوه أكلت لكمة وركضت للمغسلة أتقيأ، أحس روحي طلعت. غسلت ورجعت يم عمتي،

خليت راسي على متنها كالت: -لا أنتي ما ينسكت عنج. باجر أغبش بيج للإمام وخلي مؤتمن يعترض، إلا آخذج وأنهزم. شنهو شبلانا بسوادينه حابسج حتى نسمة هوا ما يخليج تشتميها براحة؟ كلنا يغار بس موش هيج مسود وراح يسودنج وياه. اندكت الباب فتحوها، نسمع هلاهل. دخلن نسوان، مرة جبيرة وحده بكد عمه واثنين صغار، يهلهلن ويطشن جكليت. اتلكتهن بيبي سلمت. دخلت دعاء اتلكت المرة الجبيرة هلهلت وطشت جكليت على راسها وباستها، كالتلها:

-مشكورين يمه ما كصرتوا، رجلج جابلنا حقنا. صوت ضرب بره مال طلق والمرة تهلهل. كعدن طايرات من الفرح، تكول للبيبي: -ما كصر زلمة كد جلمته، ردن له أوليدنا وحقنا الشيخ. طلع عدهم مشكلة وحالها لهم مؤتمن. ما عرفت شنو لأن هواي يسولفن وأني دايخة راسي على متن عمتي. اندارت لدعاء المرة الوسطانية هم قامت حبتها، كالتلها: -الله يطولج بعمره ويرزقكم بالذرية الصالحة، يخليج إله عابنكم فرحتونا هيج فرحة. جعت كعدت

وبدن يسولفن ودعاء تنفخ: "أحنا اللي ينخانا ما نرده، وأحنا الشيوخ هيج وهيج". والله أتمنيت بذاك حيلي جان قمت دفرتها بنص حلقها كدامهن، بس مالي خلق. والنوب المرة تصيحلها: "شيخة بت شيوخ معدلة من أصلج". دخل مؤتمن كال: -يالله.

قامت المرة الجبيرة باستها، راحت دعاء كمشته من زندة. طشوا عليه جكليت، ضحك. ما قهرني من شفته واكف بصفها وحاسبها شيخة، لا اللي قهرني خلى إيده على راسها خاف جرحها يلجم من طشوا جكليت. أباوع له صدك وكفتهم لايكة سوه، مبينين هيبة. صح أكرهها وما أطيقها بس مبينة رزنة. واكفه يمه، جانت كامشته من زندة وهو واكف يضحك ويه المرة. كالت له: -الله يخليها الله ويطول بعمرها. -وخليلج حريماتج مشكورة حجية.

إجه سلم على المرة الثانية، صارت عينه بعيني، غمضت عدلت راسي على متن عمه. حس على روحه بعد دعاء، بعديش لمن شعلت النار بكلبي. كعدت المرة الجبيرة كدامي وذني جانن قريبات الصغار يمي، أسمعهن يتهامسن يحجن بيه. اتلكاها: -خيعونها شلون واكفه بصفه. وذيج ترد: -غير شيخته، لا تباوعين لو مية سنة ما يكلبج، شوفي شلون يضحكلها.

فتحت عيني لكيته خال إيديه بجيوبه ويسولف ويه دعاء، أتمنيت ذاك الحيل بيه وأقوم أسحلهم. ما أعرف شنو كاللها ودخل لغرفة بيبي. اجت كعدت، سالتها المرة الجبيرة: -شلونها ابنيتج؟ -حجية ما عندي فرخ بعدني. -هاا، الله يرزقج. جابت منهو غزل؟ -بت سماح مرته الجبيرة بالمطبخ. -جا إشعجب أنتي الشيخة موش مرته الجبيرة؟ -لأن أنه أبوي الشيخ علوان قبل لا أجي شيخة، ونوب اتزوجنا صار شيخ. أكثر وحده أنه استحقها بين نسوانه.

-والله لانج شيخة معدلة وصدك لايكتلج. وحده من البنات كالتلها: -بس موش كالوا غزل الشيخة حرمته الصغيرة؟ -لا أنه، منهو كال هيج؟ -ما أعرف، هذا الماشي بالديرة حتى يصيحوا أبو غزل، كالوا سمى بنته على اسم حرمته هلكد ما عاشقها. ما ردت، قامت تمشي وتنتح الحايط، راحت للمطبخ. المرة الجبيرة خزرت هاي اللي حجت وهي سكتت. عرفتها تقصدتها من حجت، لأن دعاء من نوع المتكبرة والشايخة عالعالم وذني ضاجن لأن مهما يكون من عمرها أكيد يغارن.

شوية ورجعت كعدت يم بيبي بالصدر مال الكعدة. إشكد حجن، ونوب البنات يباوعن ويتحسرن، وهي صدك دخلت كاشخة لابسة طن ذهب، وهنه محترماتها لخاطر مؤتمن. تباوعلي وتبتسم شمتانة: "عود شوفي العالم إشكد تحترمني". مؤتمن صاح: -دعاء. قامت تركض راحت للغرفة. ضلن يسولفن، باوعتلي المرة كالت: -هاي بتكم مدوسة؟ عمه: -إي والله خيه، صار كم يوم بس تنام ما نعرف إشبيها. -دايسة مكان موش نظيف ومبينة ترفه ما تتحمل. -ما تعرفين شي نعمله إلها؟

-لا عمتي تعرف، عمتي علوية بت رسول الله إيدها عافية. صاحت للمرة الجبيرة كالتها: -عمه ما تشوفين بنيتهن مدوسة؟ كالت: -تعالي يجده أشوفنج. أشرتلها: -لااا. وغمضت. عمتي: -يمه قومي، هاي بت رسول الله إيدها عافية. الحجية: -لا أنه أقوم لها، تركيها أخاف ما بيها حيل. كال مؤتمن: -لا حجية، هي تقوم. قومي بويه خلي تشوفج. فتحت عيوني واكف هو ودعاء بيده أوراق يكلب بيهن. رجعت غمضت. الحجية: -اتركها يجده، يجوز ما بيها تقوم، أنه قايمتلها.

كاللها: -لا حجية خليج. إجه دنك راد بمكشني يقومني، دفعته صحت: -وخررر عنييييي. دعاء: -عوفها تسودنت. -وخرررر، مرتك لا أقوم أدوس على راسهااااا. هي تفشلت والبنات ضحكن عليها. دنك مؤتمن همس: -كافي، المرة جبيرة لا تزحميها، قوميلها. -ما أقوم، وخر مؤتمن. -بويه بس تشوفج. غمضت محتركة همست: -قوم من وجهي لا أسويلك فضيحة، أخلك عمرك كله ما تراوي وجهك للعالم. ما رد، جرني من إيديه. أخذني أدفع وصلت يمه كعدت. خلت إيدها على راسي كالت:

-عليش عصبية يمه؟ -خاله وخري، هذا خلي يطلع. باوعت لمؤتمن كتم ضحكته، حك خشمه خجلان كاللها: -لا تتفاجأين هواي راح تسمعين منها خرط. -خليها تدلل بجاهك. -بويه راضين وحاملين بس خليها ترد صحتها. -ما بيها شي هسه أقرأ عليها وبعون الله ترجع أحسن. بدت تقرأ وأني أتصفن بوجها. كالت: -انطيني مي أقرأ عليه تشربه. جابت عمتي مي، هم انطتها قرت. كالت: -شربي. أخذته بس ضكته ورجعته، جان اكو علك براسها شادته نزعته وخلته بركبتي. عمتي:

ها شتشوفين شمالها؟ -هاي عدها خرعة ومديوسة، دايسة مكان نكس. -وشنهو انعمللها، والله جانت وردة مفتحة. -موش أخت مصطفى هاي؟ مؤتمن: لا هاي الشيخة الديرة غزل حرمتي، صح بيها شبيه من أخوي. -ها يمه، هاي الشيخة الله يحفظها إلك، جا حسبالي ذيج الشيخة، يلا كلهن حريمك. هو طلع والبنات يباوعن لدعاء ويباوعلي ويضحكن، خَلَّنها تصير سودة من الحرقة، ولو هيه ما معتازة من كاعها محتركة. كالت العجوز: الله يخليج يا جدة، أنتي عين عليج قوية.

اندارت لعمتي كالتلها: منهو عدكم ماخذة ابن عمها؟ -هيه تصير بت عم مؤتمن. -خوش، انطيني شمعة عرسها. -ها ماكو، خلصت بنفس الليلة، تركوها مشتعلة. -جا دكومي وياي لغرفة وجيبولي شمعة، وخلي يجي هو يعلكها، هسه أطلع الخرعة والدوسة منج، راح ترتاحين. ما صدكت هيج أرتاح، كمت وياها لغرفة بيبي. نمت غطت صدري بالتيشيرت وخلت ماعون على بطني وخلت الشمعة. كالت العجوز: خلي يشعلها هو. عمتي: ميصير وحدة منه حَجِيَّة، هذا ما يؤمن بهيج أشياء.

-لازم هو لو شمعة ولد عم، وإذا ماكو كون هو يعلكها ويسمي بِنيَّة عليها، وهم يكون ابن عمها، إذا ماخذة غريبة ميفيد. -والله شكلج ما يقتنع، أدري أروح هسه يردني، يخجل هذا يدخل. -جا أحسن هيج حرمته تظل تعبانة؟ كامت عمتي، شوية ودخل مؤتمن صاح: يالله. ويا جان دعاء ويكول: أنتي لازكة بذيل مصطفى، لعد هاي شنو تركض وراك؟ شافني اندار لعمتي ضايج كاللها: عليش هيج؟ مؤتمن عنده عقدة من إني أطلع جسمي، يكول: يرحون بالبيت يسولفون بيج.

وأنوب شافني خالعة، اتخبل. عمتي باست متنه كالتله: ماكو بس العلوية لخاطري، أعلك الشمعة وروح، هسه أضم بطنها. الحجية: يله يمه، سمي وشغل الشمعة بنية ملجة، حتى تكون نفس مالت العرس. أخذ الجداحة، دنگ شغل. باوعتله وهمست: الله ياخذك. أخذ نفس استغفر وكام، طلع قالب خلقته. المرة ما أعرف شنو تقرأ، خفت والحماوة توصل لصرتي، حسيت بلسع ردت أبعده، كمشت أيدي العجوز، كالت: وبعدي أيدج.

ظلت هواي تسوي أشياء، طلب شكر وتمن وما أعرف هواي أشياء ما منتبهتلها. خلتهن بصينية وظلت لمن خلصت الشمعة، أخذت من كلش كالت: خلي بحلكج. خلصت كالت: معافاية، بطريجكم كبل للكاظم. كامت طلعت هيه وعمتي. كعدت ألبس، دخلت دعاء كالت: ها يا الخبلة، وصلتي نهايتج حتى تخلين راسج براسي بعد. ما رديت لأن مالي خلك، تعبانة، كلشي ولا فادني السوته العجوز. كمت صعدت غرفتي، رجعت نمت بتعب، رحت بالنوم.

بين كاعدة وبين نايمة، أسمع أصوات مخيفة مثل البحيح وأصوات مرعبة تفتر داير ما دايري، كعدت أشوف روحي مربوطة. اثنين نسوان، وحدة بيدها مثل طير الحمام تكطم براسه على بطني. وحدة تفتر بالغرفة ترش شي ودخان يفتر وياها. أريد آخذ نفس ما أكدر، بالبداية لبالي عمتي أم مكرم تحصني، بس انتبهت أيديه مشدودة، هاي شلون ما حسيت، صح نومي ثكيل بس شلون؟ ردت أحجي ما كدرت، انتبهت بلاستر ساد حلكي. ميزت أكثر وإجان أشوف تهاني وعمتي أم مؤتمن.

تهاني ترش وعمتي شالت حمامة، رفعت تيشيرتي وذبحتها، تطشر دمها على بطني. صوت تهاني كالتها: يله شوهيها بسرعة. شالت السجينة خلتها على وجهي ضحكت و...