رواية كفي والمنجمه الفصل الخامس والأربعون 45 - بقلم Leo Alfatlawi

كفي والمنجمه

بقلمي: leo Alfatlawi

بارت الرابع   /ج2 /

شخطت على الورقة رفض ورجعتها  باوعتلي ماما بغضب  همست ماكدرت اسجل بنته بأسم غيره ولا اعقد واني على ذمته صح اذاني هواي بس ماگدر اغلط هيج غلطة

صاحت ماما صدك دتحجييبن انتي

دنگت مارديت احس بداخلي مرتاح ماعرفت جان اسوء قرار اخذته بحياتي بعد ماارتاحيت من عيشتي ويا وبديت استقر مادريت بهذا الشي راح ارجع الف سنه ليورا

ماما ضلت تعيط وتتوسل وسيف طلع ضايج بعد ماجان متأمل اصير بأسمه المحلف كلهم انتهت لازم تقدمون طلب من جديد اتوافق المحكمة يالله اجي عافنه وطلع

مرت الايام ماما زعلانه وياي وحتى فوني خذته وسيف يجي على كد الاشياء الي نعتازهن ويطلع
صار وقت خروجي بس بنتي لازم تبقى بعد بالخدج

اتحملت  ردت فعلهم لان متوقعه منهم اثنينهم بعد ما تأملوا اولد واسوي مثل مايردون جانت صدمة الهم الصار

كمت حضرت  للخروج بس فاجأتني ماما من كالت اطلعين منا عالمستشفى الخاصه بالتجميل حاجزتلج هناك باوعتلها اشرت لويش

-عود هم عاندي ويبسي راسج

-ماما اني مابيه شي شسوي بالتجميل اشو حتى بنتي وماخليتيني ارضعها  نشفتي حليبي بعد شكو بالتجميل

-بطنج خربت خو موانتي بهذا العمر وجسمج خربان

-ماما لاتخبليني استوني طالعة من عملية مواته وين تردين تورطيني

-وديت تقاريرج للطبيب الخاص ونصحني بهاي المستشفى صح غالية بس مضمونة سلامتج بيها

-لويش هيج اجازف وخسارة افلوس

-ياامي لويش اتعبيني انتي بعدج اصغيره وبعد كم يوم طلعاتج وسهراتج والبحر خو مو مدمره روحج وانتي بهالعمر ماطول بنتج بعدها هنا ماتشغلج بس تطلع بتج ماراح يكولج وقت فراغ ادري راح تهملين روحج وبعدين شنو ذنبه سيف ياخذج وانتي امبهذله

-استغفر الله هم كالت سيف ماما زواج ماراح اتزوج افتهمي اني متزوجة

-تطلگين  مو شي صعب

-منين جبتي الفلوس

-هااا بعت ذهبي وكم فلس زادن من المستشفى

-شنو  هاي موحكومية

-لا طبعاً انتي حالتج خطرة ياحكومية هاي خصوصي لهيج حالات خطرة

-تمام ومنين جبتي افلوس الحجز

-موكلتلج بعت ذهبي

-مؤتمن موو؟؟

-اي مؤتمن لعد بس يعرف يحبل ويشمر غصباً عنه يدفع

- ماما  لويش دترخصيني هالشكل

-يااا لعد منين اجيبلج هيه بس المستشفى بذاك الاحساب وانوب بتج بالخدج رادلها مصاريف لاصارت ولادارت ولبالج جنتي عايشة بكم فلس الي ينطيهن سيف تره ذني مايعشن يوم وهذا حقج من ورث ابوج ماماخذين منه شي

-ماما انتي اتغشمين روحج ورثي يم جدو ذني يدفعهن مؤتمن منه افلوس تعبه الله اعلم هسه اشكد متداين  بسببي  وانوب تريد تجميل والله يالله شيلي الفكرة من راسج وترديله فلوسه تجميل مااسوي 

-دفعت الحساب وكمل يعني اذا اتبطلين محد ينظر غيرنا ماراح يردون  الفلوس وحتى لو ردوا مااكدر ارجعهن لمؤتمن لان راح يشك بالسالفة اني كايلتله مصاريف مستشفى اكيد راح يبحوش ويعرف السويته بعد فلس مانشوف منه اذا عرف

-ماما تره مجان اله داعي تاخذين منه عندي ضمام صحي واكدر اسويها بمستشفى عاديه بلاش

-لاعيني اني هيج مستشفيات متعجبني وانتي حالتج جانت تعبانه دكاتره كبار يالله سيطروا على حالتج وهسه عوفج بعد سالفة خلصت

-لاماما ماخلصت انتي متعمدة هيج تسوين تردين بس تاخذين افلوس منه وعملية تجميل مااسوي

-مو بكيفج ترحين غصباً عنج كلتلج حجزت والموعد اجه يله لاتعاندين ياامي والله راح تتندمين جاينه الصيف نسيتي شنو جنتي تلبسين هسه راح تنحرمين من هيج اشياء

درت وجهي عنها مارديت وهيه مستمره بعد محاولات وياها  شفتها قافلة وماما من نوع العنودية ومن زمان جانت تتمنى  تنتقم من مؤتمن وهذا الشي تحقق وجان يوگع بيدها

اعرفه مايكدر يردها  وميدز راح تجي براسه الف شغله لان ميعرف اشلون عايشين ويضل قلق

استسلمت الها لان مجان يفيد وياها الحجي مصرة ؛  وصدگ طلعت منا دخلت هنا.الدكتوره شافتني اجلتني كالت بعدها لمن تنشف العملية فرد مره وجسمها حتى مامتضرر لان سبع اشهر بس شيقنع ماما لوبيدها ترجعني حتى ابنيه  ماتعرف شتسوي بس كون عدها تصرف وتخسر مؤتمن

رجعنا للبيت مر شهر استعاديت صحتي بي
واجان يجي الوقت تطلع بي  بنتي جنت متحمسه لهذا اليوم

اجيت طايره على المستشفى  اريد اشوفها دخلت  ركض وماما تصيح على كيفج وصلت لكيت سيف شايلها ويبوس بيها

اخذتها من ايده دنگت اباوعلها  شعور يخبل من تشوف نتيجه تعبك كدامك ؛ صغيره كولش بس خدود تجنن حضنتها واشتميتها جنت اريد ادخلها بداخلي من حبي الها اتمنيته وياي يشوف ثمرة حبنا الضيعها بلغطة 

اباوعلها والدمعة بعيني مشيت اصبعي على خدها هم يجي يوم وتشوفين ابوج وتحتمين بحضنه

سيف- انطينياها  بين ما اتلمون غراضها

-بس دقايق

-الوقت محسوب عليه استعجلي غزل هيه باقيه وياج 

صدگ جان  لازم نطلع دنكت بستها ونطيتها اله خذها راح وكف على جهه يبوس بيها واني دنگت الم بالغراض ثواني واشوفه يصور وياها عفته وكملت شغلي استوني داسد الجنطة ودخلت  ماما تركض كالت سيف امسح الصورة عزا العزاك شنومنزل

-شكو ماما اشصاير

-كولي شنو الماصار ولج اتصل الثور مالتج حرك الجو عليه لان شاف صورة لسيف ويه بنته اندارت السيف كالتله لاتبلينه امسح

رحت اخذت بنتي وعفتهم وحدهم يتصافون مااريد اضيع فرحتي بالمشاكل

رجعنا للبيت مامصدگه صرت ام اباوعلها واضحك كائن صغير بين اديه من فرحتي ماعرف شسوي بس بهيج وقت دائما الانسان غصبا عنه يتصرف تصرف خارج عن السيطره يحاول يشارك فرحته ويه اقرب الناس بدون لايحس ماشفت روحي غير  اتصل بسماح وخليت الكام على وجهه وكفت مبتسمه

رن كم  رنه ردت اسمع صوت مؤتمن يضحك وهو يكول بسم الله ماشاء الله اللهم صلي على محمد واله محمد

سماح- ياغزل ولج تشبهلج هاي صدقة خدودها مال عض

مؤتمن- هههه حتى بياضها ماخاله شي من امها

-اووف كون يمي جان اكلتها

-غزل بويه وينج

درت الكام كلتله هنا  باوعلي وسكت عيونه جان بيهن لمعه ماعرف شوگ لو فرحه لو عتب اشرت هااا

اخذ حسره وكام صعد للغرفة مالتي دخل سد الباب كال اي بويه  اول شي الحمد الله على سلامتج وثانياً شناويه احجي

-الله يسلمك على  شنو مثلاً ناوين مافهمت

-ماحن گلبج موش كافي تراج اخذتي حگج وزياده

-شنو الكافي مؤتمن  على شنو يحن عليك مستحيل اخر شخص افكر بي هو انت  تذكر هذا المكان الكاعد بي شنو نفسه الجنت كاعده كامشه ايدك اتوسل بيك لاتروح

-اشوكت تنسين

-شنسى من عفتني معلكه وسافرت لو من خليتني اجهزلك غرفتك بيدي لومن دخلتها عروس بيدك وتباوعلي ولاكأنما اكو بشر يتالم  كدامك تذكر بليل شنو كلتلك قبل لاتدخل يمها لولا كلتلك وكتها اذا رحت الها انتهت بينه وراح اندمك

-وندمت وشبعت اطياح حظ وطلعت الدنيا من عيني ولج مانمت براحه من تركتيني  لسه كل ركن اشوفج بي كل مجان اشوف روحج بي خليتيني امشي واحجي ويه روحي شرايده بعد اكثر من هذا

-يجي يوم وتنساني

-شنسى ولج انتي روحي انتي النفس الي اشهكه غزل صارت عدنه بنت لخاطرها ردي عوفج مني لخاطرها عليش تخليها اتعيش بدون اب

-ماراح يأثر عليها هياتني اني عايشه ومرتاحه

-شنهو التردي كولي اني حاضر طلبي التردي يجرالج كولي غزل لاتضلين معانده اذا شفتي رديتج ذالك الوقت الج حگ عملي اليطلع ابالج

-كوم مؤتمن انزل جوه وشوف  منو كدامك  وانتى تعرف لويش عفتك

-اطلكها بس ردي

-ماراح اطلكها وحتى لو سويتها ماراح تگدر تزيل الحرگه والخذلان العيشتني بي مؤتمن اني بعد مااثق بيك

-غلط اي بس ورح عمي ماجنت ناوي اوجع كلبج حرجوني جدام ناسي ماعرف شعمل وقتها لاكدرت احجي وياج لان اعرف ماراح تسمعيني ولاگدرت ارد الشيخ لان خلاني جدام العالم بموقف ماكدرت اطلع منه

-وشنو سويت شمرتني يم ماما و رحت جبتها وكسرت كلبي

-وداعت بنيتي من وديتج ردت ابعدج بس حتى مانتجسرين  بدخلتها حاسب حساب ثاني يوم اردج وتشوفين وجودها مثل عدمه يمي ماتأثر عن حياتنا بشي كم يوم واردها لابوها بس تنسد السالفة الصارت

-واني كلتلك تدخل دعاء تطلع وعرفت معزتي يمك من دخلتها مالك حق تحجي بعد

-تراج ذليتيني جثير

-مثل ماذليتي بتمام زواجك منها

باوعلي بلحظه نگلبت عيونه حمر ضغط على سنونه وگال من تكونين بحضن غيري وانت بأسمي تستاهلين الذبح موش الذل اااخ بويه تمنيتج كريبه يمي لخاطر اعلمج الذل اشلون يصير

-وهيج بردت دمك من تممت زواجك منها شتحس من تخليها بحضنك وانت منطيني كلمه ماتخلي بي غيري

-مارجعت بيها حتي كربي منها جان بسببج

-بس خليتها بحضنك ونمت وياها تغزلت بيها وضحكت على ضحكتها

-من تبعدين كل هالفتره وتعملين كل العملتي موش من حگج تحاسبيني وتعتبين لو جنتي باقية يمي الج حگ تحجين

-هه نفسها دعاء الجنت اجيك ابجي بس لان اسمعها تكول راح اخذه صرت تنيمها بحضنك مكاني وجاي هسه تكول رجعي روح لاتحرك كلبي اكثر وهاا حتى اتصال بعد لا تتصل ولو تبقى اخر واحد بالدنيا ماارجعلك 
كلتها وسديت الفون وحضرت حتى سماح من حركت كلبي

اشكد سهله يكولها لوجنتي باقيه الله ياخذك مؤتمن يضل نفسه مايتعدل ابد حتى لوطلكهن هم وكت ويتزوج غيرهن اعرفه

قررت من صدك هالمره اعوفه وبعد ما افكر بي لازم اعلم روحي بدونه واعيش بس البنتي مؤتمن يضل نفسه عمر ماراح يتغير يستمر بتعذيبي

صدك مرت الاشهر واني علاقتي شبه مقطوعة بيهم صار عمر كايتي اربع  اشهر بس ولاتنحمل النهار والليل تبجي وكحه ماما تكول لاصلفة على ابوها وعمتها بنتج

حمدت ربي يم ماما هاي لو راجعه  لمؤتمن جان شمرنا سوه وطلكني لان مستحيل يتحملنه اني كفشتي وبجامتي التسحل مالحگ حتى امشط وهي صوتها يرگع بالبيت

بس هذا كله ما نست ماما عمليه التجميل رجعت كملت الحجز ودخلت
ضليت فتره جبيره بالمستشفى وكلما يتصل مؤتمن تاخذ الجهاز ماما وتطلع تخابره  بره لان اتخاف يكتشف الصاير وبعد مايدز افلوس وهو صاير البنك المركزي مالتها طايحتله دك سحب ؛ اني هم ماادخل لان يستاهل اثنينهم نفس الطينه الله امسلط واحد على الثاني

الحمد الله طلعت بنتيجه حلوه  وره معانات كلش هواي ؛ كيتي من ايد الايد بالنهار ماما مبتليه بيها  وسيف الليل كله سهران وياها من غير  انواع الفيتامينات الي مستمر يجيبها  لحد ماصارت تنفوشه الي يشوفها ميصدك هاي نفسها الي جانت تريد تموت

مرت الاشهر كبرت كايتي  صارت تتخطى اول خطواتها مشت حياتنا روتينه  مثل باقي العالم حرمت مؤتمن حتى من شوفة صورتها مو بس من سماع صوتي اشكد مااسوي  مايبرد گلبي كلمااحس رفت روحي اله اذكر ذاك اليوم  الدخلت ولكيته عريس وارد اغمض اتخيلها هسه نايمه بحضنه  ماافتح عيوني اله والحقد مفول يمي

واني هم  وره بنتي حتى تفكير بعد قل لان ماعندي وقت حتى بليل انام جفي من التعب يادوب احجي ويه مصطفى دقايق وأمن عليه لان مستمر بالعاملة رغم جان بوقتها سحل السحب بس تعرقلت شغلته  لحد مااتصل  وكال تلكيني بالمطار ولج جايج باجر

الخبر بين فرح وبين خوف من المستقبل بس ارجع واكول مايسوي شي مايكدر وهم لازم افرح لانو واحد من اهلي راح يجي يمي اقلها كيتي تحس بالامان والحنيه بوجوده

بيومها للصبح مانمت هو رن فوني واني شلت كيتي ونزلت اركض صارت ماما كدامي صحت هاج اخذيهااا

-ها ولج شكو

- فدوه غيريلها بسرعة

-خير شكو من الفجر

-صافو اتصل كال راح اوصل

-عززا بعينه شبسرعه

-ماما تره من اجيت لهنا همه يشتغلون بالمعامله وهسه كيتي  حتمشي  يعني صار قرن

-غزززل منو كفله بالكنيسه

-هاا

-وجع انتي مو

-ماما تركي السالفة فدوه وخذيها  فشله منه من هيج اروحله للمطار بالكفشه

انطيتها كيتي وركضت  للحمام قبل لاتبلش سين وجيم  طحت جلف لحد ماطلعت المع نشفت شعري  وشلته سويت ميكب عالسريع

لبست جينز وبلوزه خفيفه نزلت حذائي بيدي مالحكت راح الوكت لبسته عالدرج لكيت ماما محضره كيتي  اخذتها  شمرتها بالسياره وانطلقت عالمطار

صح  سمعتها اتنقنق بالكرسي مالتها  بس غلست اريد اوصل مستعجله واخيرا التك الثاني على گولت مؤتمن   راح يوصل اسوق وكوه كامشه فرحتي  اشكد مشتاقتله ومشتاقه الايامنا الگضيناها

وصلت وعيني بالساعة اخاف تاخرت بس الحمد الله لكيت بعد عندي وقت ؛نزلت اخذت بنتي ودخلت طايره لساحة إنتظار المسافرين 

مرت ربع ساعة امدنكه العب بخدودها واسمع واحد يصيح غزاااااله شلت راسي واشوفه يسحل بجنطته ويأشرلي

ماعرف اشصارلي حسيت كلبي طفر جاي من ريحه مؤتمن عفت كيتي بالعربانه ركضتله لزمت ايده وكفت اباوعلي دموعي كوه مسيطره لايوگعن  ضحك وكال شبيج ولج

-اوووف وأخيرا اجيت ولك مامصدگه

-ههههه اخبال اشلونج خويه

-والله ميته على شوفتكم اشكد مشتاقتلكم

-اممم مشتاقتلي هم صدك تعالي لج عليش بدون حجاب

-هااا يانسيت

-مرض اكو زمال ينسي حجابه

-دشوف العالم اكو بشر يباوع هنا يمعود منو متحجبه اصلاً نشاز بالحجاب

- خرب بهلج اشكد مشتاقلج دهاج فتحيلي الشبكة خلي اتصل ابيهم 

-ؤك  جيب الفون --اخذت الفون كال بنتج وين

-ذيج كدامك روح شوفها جنها صبوحه

-لابربج لاتكوليها بت المنغولي موش  هنا صخمتي بيها اشجابها لصبوحه

-حضي مثل ماطلعني من مريكا وشمرني عدل بحضن اخوج  بنتي هم تركت اهلي بكبرهم طلعت على صبوحه

راح ومصدم مصدك لان ابد ما صورتها ولاخليت احد يشوفها

شالها ضحك كال ولج غزيلان متاكده هاي بت مؤتمن هو يحجي ورن فونه بيدي اباوع المتصل مؤتمن احس مثل النتله الكهربائيه  لجمت لگلبي بكد الفتره الي مرت واني ماسامعة صوته بكد دكات كلبي وهو يتصل

رديت وجهت الكاميرا على مصطفى هو ويلكف بكايتي اسمع ضحكت مؤتمن رحت يم مصطفى كله ولك مؤتمن متأكد هاي بتك يمعود

-والله يكولون انه هم شاك البت شكره بربك تحليل dna بطريجك حرمات الحوالات اخيك طاح حظه بسببها تاليتها تطلع موش بنتي خرب بقسمتي الكشرة

-بدون تحليل  انطيك گرنت بيها بتك ولك البت تزابك جنها صبوحه دشوف ماتستقر كالها وعضها خلاها تبجي

-هااا ولك عليش خرب بلشتك لاتعض هاي وراها فصل

-الفصل يمك ابن ابوي  -يلا لج وين سيارتج جيبي الجنطة وتعالي وراي

اشرت اي

اخذ الفون وطلع خلاني ابتلي اسحب بالجنطة ورا طلعت لكيته بعد يسولف ويه مؤتمن ويبوس بكيتي فتحت الجنطه مالت السيارة صعدت جنطة مصطفى  ردت اخليها فلتت وگعت بالكاع رجعت دنكت شلتها ردت اخليها هم فلتت طاحت

اخذت نفس ودنگت شلتها بعصبيه شمرتها شمر بالجنطة  وسديتها كعد بالكاع ارتاح تربعت لكيت مصطفى داير الكام عليه ويضحكون كمت نكثت بنطلوني وكلتله عوف الضحك وصعد يله

-لا بربج انتي راح تسوقين لاعمي انه اشوفلي تكسي

-ياا مصطفى ياتكسي انت بدون كملك راح يشحتوك دصعد

-حجت بت امريكا يله لج كم شهر واصير احسن منج

-عود ذاك الوكت تعال احجي وياي  يله فضني

صعدت وهو راح للباب الثانية الجو حلو زلت القمارة واسمع مصطفى يصفر صعد كال عمي حظوظ شوف ولك مؤتمن خرب بلشتك اسنين اشتغل عندك تاليتي سيارتي كايم ابوها اشتعلت ابو عيشتك

مؤتمن- اي هاي انت وصلت هناك خلي اشوف اشلون تحصل مثلها واتعيش

مصطفى-  سوقي على كيفج لج غزيلان بعدني مامتهني استوني وصلت

-ؤك

ثبت الفون وظل يسولف وياهم سماح بس ماسلمت عليه  زعلانه لان حضرتها من اهد ماولدت لسه مااتصلت بيهم

اسمعهم كاعدين كلهم يسولفون بس ابد مادرت وجهي وباوعت عيني بالطريق لمن كال مؤتمن هانت غزل ماضل شي وهذا راسج اذا ما فلشته سهله  طيريتي الحجاب موو

مارديت كوه كمشت ضحكتي ونطيت  بنزين  مشيت سريع كال مصطفى  هوووش وياج يحجي  بعده ماكمل الكلمة ودست ابريك بسرعة طفر وصاح اشبيج تسودنتي

-اشش انت هنا صوتك ماتعلي نفس مااسمعلك تشوف ذاك البوليس  بس اكوله اتجاوز عليه اخلي يردك بدون حتى جنطة هيج شمر عالحدود

-لابربج

-اي وربي فصير حباب وتگعد عاقل واكمش بنتي عدل سمعتتتت

-امرج يابه صدك جذب منهو حجه اصلاً

دااندار احرك انتبهت لمؤتمن  امدنگ يحك بگصته وكوه كاتم ضحكته بس سماح مااتحملت طكها ضحكه وكالت لامصطفى تاليتك هاي الفصمة اترزلك وتسكت

-چاخويه شسوي حكم القوي خبله كلشي يطلع منها خليني متحملها بس اخذ الجنسيه واطيح حظها

مؤتمن- عود باجر من اشوفك واكف تغسللها اماعين

-هههههاي والله يخوي مرتك كلشي يطلع منها دشوف اشلون تسوق خرب بغيرتج ولج غزيلان جاي تشوفين من هاي الكاسكيته لو نازله خويه ارفعها الج شوية

-لاع

-امرج يابه

-انتظر هنا انزل اعبي بنزين

-منتظر يابه منهو كلج راح اتحرك

نزلت واسمع الضحك اشتغل الي يكله بالعباس رد احسلك من هالمذله والي يكله ولك مصطفى لم كرامتك وتعالي؛  يبن مافولت واجيت صعدت لكيت العائلة  كولها كاعده تسولف ويا وتتحمدله بالسلامة شغلت السياره صاحت بيبي هايالفاهيه تسوكين امفرعه

مصطفى- لاغزل هاي قويه يكولن فاهيه بس خويه اكلج الصدك وامتزعلين صدك فاهيه ماتجين مجاني اعلمج السياقة اشلونها

-صافو كمش عدل كلتها ورفعت الكاسكيته ودست بنزين ونطلقت بكل سرعتي خليه يصيح لج ثووووله خففيييي انعل ابو اهلج غزززززل خففي

هو يصرخ واني ادوس عبرت غرامتين ماوكفت لمن خليته يحجي بغير لغه ومؤتمن كل صوت يصيحه يرج المكان لحد ماوصلت دست ابريك لطمته بالجكمجه كلتله يله   وصلنه بس الغرامتين انت تدفعهن

-ياغرامه من انعل ابو اصلج خرب بيج لو امسويه حادث بت المنغولي

-حادث موحادث صارتلي مخالفتين تدفعهن وانت الممنون يله وصلنه انزل

-اشتعلت عشيرتك مؤتمن على هاي البلوه شورطتني بالخبله وين بيتكم ولج

-هياته كدامك

--هذا الجنه گن وين راح تخليني ولج هذا كن مال دجاجات صبوحه اكبر منه

-لعد مابقيت ويه مرتك وينها

-وصلتني لهنا بت الزمال وراحت ويه اهلها كالت راح تجيك غزل

-انزل مصطفى يله

سلم غلق الفون ونزل جانت ماما وعمو منتظرينا  بالباب رحبوا بي دخلنا كعد بالصالة اباوع بنتي نايمة على صدره  كلتلها ماما اخذي كيتي

-اكلج هيه كايتي لوكيتي

-لاكايتي بس كيتي اسهل

-يله كايتي كيتي اي شي المهم موش صبوحه هاج خاله سمي واخذيها

شمرت الكوشه وكعدت يمه اي مصطفى شنو ناوي خويه

-سلامتج يبعد اخوج ماكو شي جاي هنا اخذلي شقه وافتحلي مشروع ان شاء الله استقر

-وزوجتك ؟؟

-هاي اسمها خط الوصول يازوجتي يمعود انعال حشاج لادين ولا ديانه حسنتها الوحيده سحبتني

-ؤك حصل الاقامة اول وبعدين فكر بغير شي تكوم ترتاح هاي غرفه سيف حضرتها الك

-وهو وين يولي

-انتقل البارحة

-شنهووو مات لاحول الله

-لاع انتقل البارحة لبيته  من عرف انت واصل

-خوش طلع يفتهم بس موش تعبان وبعده الوكت  خلي نطلع شويه بس بروح ابوج خلي شي على راسج ولج حسيت كروني يحكني

- ههههه ؤك انتظر لحظه

رحت صعدت لفيت الغتره مال مؤتمن ونزلت شافني ضحك وهز ايده كال يلا يالگويه المطنشته

طلعنه صدك وديته هواي اماكن افترينا  كل مكان ياخذ صوره ودزلهم وهمه يدزوله مقاطع صوتيه  ماخلينه مكان ورانا  اخر شي رحنه للبحر ركنت ونزلنا يمه

هو كعد واني رحت جبت ذره ناكل وصلت لكيته گاعد ماخذته الصفنه انطيته الذره وكعدت يمه اي مصطفى اشلونها دولتي عجبتك

-حلوه بس جنها خنگه مابيها حركه وصوت

-امم ممنوع الضوضاء هنا

-چااشلون وين نروح اريد اغني اريد اطكلي  واحد 

-اجلهن وكت الزياره من تروح للعراق سويهن ذني هسه كولي شنو ناوي تشتغل

-بعد ماراد واتصل مكرم -رد--هالك بذات مثل بت عمك طفرت

-اي بعلي دشوف النعمه ولك جنه موش دوله

-اشلونج خويه غزل

-هلو مكرم الحمدالله انت اشلونك

-اشلونه بيت وفارغ  من مصطفى وغزل رب الكئابة  ومايندخل  وحگ ربج

-ههههه اي احسن لعد اشكد جنتوا تحجون علينه هاي احنه عفناكم خلينه هنا احسن

دااحجي اشرتلي هيفاء على رجليه جنت ماده وحده والثانية عاكستها عدلتهن ومديتهن  اثنينهن  كلتله اشلونه سنود

-اسمر على خاله ومايتحاجه كل اليتحارش بي يطكه بدفره

-ههههههه لعد مو هذا هم خاله لويش ماطلع عليه

-كالك هذا خالي فالت ويه عمتي مايستاهل اطلع عليه خليني عالباقي احسن صدك ولج عليش متنطينه بنتج بلكي اتحسن النسل يكولون حلوه

-اي ثلثين الولد عالخال اكيد يسفط اربعه ويطيح حظ بتي روحوا عمي بتي ماادزها للعراق لا تفكرون

-منريدها اذا فاهيه ولسانه اعوج مثلج يابه خليها يمج

-يمه فدوه كيتي فاهيه غير عرمه على عمتها

-ههههههاي لابربج صدك تحجين

-اي والله موكفه البيت على تك رجل الكل يصيح منها بس همزين شكلها عليه

-اهم شي هذا انه اشوف ابني تاليته مثل خاله يكابل الشط ويدك جكاير

مصطفى- ولك انعل ابو خاله  دشوف ذيج الچاتت بالبحر انعل شبيب ابوها كمشي  لج؛ كالها وشمر الفون وخرط تيشيرته البنطلون بثواني وطفر وراها

اباوعله صافنه ضحك مكرم وكال بالعباس هذا ما يطول رادي رادي علينه

-اي والله ولك شوف وين راح اخ يمه

-لايا ناقص ولج هذا وين وله شجاي يسوي

-ديحجي وياها هههههه اسرع تگبيل بالتاريخ

ضلينه نسولف و نضحك عليه  لان دخل بين مجموعة بنات ومنطلق شنو يحجي ماندري بس امبين  يلطش تلطيش لان صوت ضحكتهن عاليه
اخذله شوية وسبح وياهن ؛احنه هم عفنا براحته لمن مل وحده عافهن واجه طلع ينكث بروحه كال الحمد الله على هاي النعمه الماء والخضراء  والوجه الحسن شريد بعد

-ولك شنو جنت دتحجي وياهن

-ولج يا احجي بطل حيلي عليهن مايعرفن يسبحن علمتهن

-ههههههه ولك مصطفى تره يشمرنك بلوة ذني ماعدنه تحرش هنا يمعود اكعد عاقل

-خايبه ماتنجبين غير اريد اجر علمتهن على كم شغله يفيدني بالآخرى  ترديني عابر انهر ومحيطات واكتم  الايمان بداخلي بدون لا انشره

-لااشلون انشر خويه انشر ولايهمك اختك بظهرك  اطلعك منها لمن ننطرد اثنينه منا

-اي بعد اخوج چثري من هيج اماكن اخيج متضرر جان يحجي ويلبس

-يله ولك راح الوكت

-ولكلاكه التلكلك اضلوعج لج اشوكت تنعدلين

-بوليسسسسس

-هااااا جذب اشبيج غير اتشاقه وياج يمعوده

احنه نتعارك مكرم وهيفاء ميتين ضحك كالت هيفاء ولكم اشجمعكم سوه انتوا اشلون راح تمشوها بلعباس سينما ولج غزل اخيي ديري بالج عليه

-افا بعيوني هذا صافوو ياما شبعني ادمغ لان ما اقره التعريف صح

-سكتي البارحه سماح ذكرتكم من خليتوا التعويذه لجدتي بخطج غير هيه تسولف واحنه فطسانين من الضحك

-واللعابه بغرفه امج والعجين والروبه حيييل هواي اشياء والله ايام حلوه جانت

-اي والله يخيه البارحه هم من ذكرناكم اول ضحكنه وبعدين كمشتنه العبره يله كلمن يشوف نصيبه يلا خيه براحتكم روحوا

سلمت لكيت مصطفى مكمل ردينه والطريق كله يكول خففي لمن وصلنه  شلع باب كلبي دخلنه للبيت لكيت سيف شايل كيتي يلعبها ومصطفى انغث يريد يفترسه

عرفتهم واحد على الثاني سلم اباوع لمصطفى عصر ايد سيف الي صار وجه بسرعة كمشت ايده ويبتسم باوعلي وتركها

كعدوا كعدت يم مصطفى واندعي كون يهدأ اخاف حتى اكوم اغير ملابسي

جابت العشه ماما خلته اكله لكمتين وكال وين الغرفه غزل

-هياتها كدامك

-جاعمج وين

-يم ام سيف مايجي لهنا قليل

-اهاا متزوج على امج وهيج باقيه هادء معقوله

-لاهيه ماما الثانية وزين منها ام سيف باقيه ساكته بس عقد مومن لان هنا ميصير تعدد الزوجات وهم ماما اصلاً مو بحاله مثل سالفتك عمو خط توصيل كل يوم توصل للطلاق ويرجعون

-خير ان شاء الله وهذا اللوح شنهو باقي

-لاهسه حيروح فشله مصطفى نصي صوتك

-يلا يابه سكتنه كالها وكام  اخذ جنطته وراح دخل  امنت شوية رحت صعدت غرفتي شمرت نفسي بعد هذا اليوم الطويل بسرعة نمت

كعدت على صوت مصطفى وهو يصيح حيهم يمعودين اهل البيت وينكممم

كمت بسرعة طلعت بكفشتي حافيه كلتله شكوو

-ولج جعت اريد ريوك وهاي بنتج سودنتني تعالي شوفيلج جاره امج شمرتها واختفت وهاي الخدامة مااعرف اشترطن

-يله جايه بس اغسل وجهي

رجعت للغرفه غسلت عالسريع ونزلت اني واشيل بشعري عالدرج  سمعت مصطفى يضحك شلت راسي  لكيته يصور وكال بعلي لا خلفه تعقلها ولاغربه نفس اخبالها شوف اشلون تنزل اطفر

-صافووو عيني ترا انت يمي لاتخليني اشمرك بالشارع

-اسمع مؤتمن سمعت اخوك اشلون انذل هم احجي بعد وكول ظالمها

-عوف مؤتمن وين الداده لويش مسوت ريوك لسه

-وينج صبووووحه سمعتي شنهو كالت داده والله راح وكتج  تركضين وراها لخاطر تنظف عدل

-تعال عوف صبوحه وسد الاتصال شنو تريد ريوك

دخلت للمطبخ احجي ويه المساعدة على الريوك وهو دخل بيد كيتي وبيد الفون يكلهم يمكن والكم جاي تسب هاي مامعقوله هذا الرطن بس لخاطر ريوك ولك مؤتمن راحت هيبتي يخوي مرتك ماخلت واحد بعشيرتك ماسبته اسمممع

-مصطفففى عوف مؤتمن واحجي شنو اتريد مو كعدتني من وكت ودا تصنف  

-مرض لج حسج سويلي مخلمه وانتي موهاي اخاف وسخه مااريد منها

-تمام

وكفت اسوي وهو يحجي وياهم عفيه فون اربعة وعشرين ساعة متصل بي يسولف ويضحك والي معجبني مؤتمن تارك شغلة ومگابله اشوكت صارت هالحنيه بينهن ماادري

كملت المخلمه وجبتها يمه كلتله اذا هيج كاتل روحك عليهم جان ضليت لويش اجيت

-اشوفج كالها وسلم علي وسد الفون كعد ياكل ويوكل كيتي كلتله تره بعدها صغيره متاكل هيج اكلات

-ولي لج ماتاكل شوفها اشلون تسمط الاكل وخري مالج شغل

-ياا مصطفى اخاف تغص

-ماتغص بس لاتدخلين  ويله كملي بسرعة خلي نطلع اندور شقه

-لويش خليك يمنه

-بويه لحد اشوكت هم اريد اخذ راحتي وانتي تجين يمي ماكو تبقين يم سيف

--لافدوة  بس خلي تكبر كيتي مااكدرلها وحدي اصلاً مااعرف اسكتها اذا بجت خليك هنا علما اشويه تكبر ونطلع

-ولج والله البارحه احسه كاعد على خوانيكي مينبلع اشكد مايع دخيل الله

-مومايع تره خوش ولد حباب وطيب وخدوم

-اي مبروك اشوكت تعرسون

-ههههههه استغفر الله مصطفى اشبيك امعصب تره هذا زوجي قبل اخوك

-لاوالله والنعم تعرفين خوش تاكلين تبن وتحجين اخاف حسبالج اجيت هنا راح اتغير واصير مثلكم غزل وادعت الخوه اسحلج للبصر عدل

-يووومصطفى اشبيك من الصبح

-ولج مختنك اشتاقيت لهلي

-ياا وانت ماصارلك يومين يمعود بس عادي تتعود اشويه اشويه اني من اجيت هم هيج كوه اطبعت

-استلم وهاي انتي عمرج كله عايشه هنا بس كم يوم اجيتينا وهيج حسيتي تره صارلي قرن بالاردن انسمط ابوي 

-اي لعد هاي لم الشمل انت من المحظوظين الي طلعت هيج بسرعة الناس اتضل اسنين

-اي طلعت ابشيب ابوج غير دفعت افلوس الدنيا للمحامين  وضمانات اشكد

زغرت عيوني كلتله منيلك ضمانات شنو سجلك مؤتمن

-لاتخافين اردهن اله   لان وقعني على اوراق يطيرن راس ابوي بكبره صدك شكرا عالكفاله

-ولو اذا لاخوي مااكفل لعد المن اكفل صدك ابو مرتك لويش ماكفلك

-ابن الجحش يخاف اذا خالفت هو يتعاقب

-طبعا اي مخالفة منك اطير بيها اني لان دخلت على مسؤوليتي يلا كمل خلي نطلع  ونشمر كيتي على ماما

مرت شهر وحنا على وضعنا نطلع بالنهار وبليل نسهر ونفتح كام وياهم اني دائما ابتعد عن الكاميرا خاصه من اشوف دعاء تجي تگعد يم مؤتمن اختنك لذلك ابتعد

ومصطفى هم كام  يحس عالسالفة گام اول مايشوفهم سوه يبعد الفون عني لان بعتبارنا كلمن اختار حياته وخلصنه ماكو شي بعد يربطنا

يضل يسولف وحده بس كيتي بحضنه يسولفون وياها يكلهم ولكم ماتفتهم البت غربيه لاتخربون لغتها اشلون احنه ويه المضغوطين يابه فكونه

يضحكني من اسمعه يحجي وياهم ويصنف يمكن بهاي الشهر بس ثلث مرات راح يم رانيا

بس خرب بغيرته مااعرف شيقرا  براسها يخليها اطفر وراه وكاتله روحها عليه؛ بلشوا بالاقامه اخذت مده هم طويله يالله طلعت

ماخليت  مكان ماوديته اله بس ردته  مايحس بالغربه جربتها قبله واعرفها

رجعنا بليل تعبانين  كاعدين اني ويا وكيتي يلعبها كال غزل موش كافي يمم امج والله اخجل خلي ناخذ شقه

-بس تكبر كيتي بعد اشوية  ننتقل فدوه

-ولج موش المره راح تفلت من ايدي

-اي لعد روح يمها شكو بيها هيه شقتها وحدها

-خايبه مانتجبين من اشوكت انه اكعد بيت مره

-لعد والله مااعرف لكيتي اذا بجت انت دااتشوفها ماتسكت وحركه بس تزابك

-شتكولين انخليها بحضانه ونفتح مشروع انه وياج

-مااعرف اخاف عليها كلما اتخيل ماراح يصير عندي غيرها اخاف اكثر مااكدر ابعدها عن حضني

-اوووو اشلون شغله هاي يابه ماعليها هنا ماكو شي تايه موش مثلنه عليش خايفه

-مااعرف والله موبيدي

-هيه باسمج

-اي سجلتها بس بأسمي بدون اب

-واذا كبرت اشلون

-عادي مواني كبرت بدون اب شنو يعني

-غزل ابوج ميت موش ماعندج من تكبر ابين الاطفال ومن يسألوها شتكلهم وينه

-اتكلهم ماما جانت حامل ومات عادي

-على راحتج هم صدك اعتبروا مات كالها واخذ حسره

-لويش دتتحسر خفت على اخوك

-عليش جاهو اخوي هم حاسب روحه عايش بعد ماتركتي  يخلص ليله يتصفن چنه امسودن وبالنهار يشتغل مثل الخبل حتى لايخليجن معتازات شي  جان بس همج انوب بنته بره مايعرف مصيرها ولامستقبلها شنهو

-ماعليها بنته بس خليها بعيده عنه هيه بخير وافلوس گله كافي بعد لايدز ماله شغل بماما لان مامعتازين

--كومي يله خمدي باجر عدنه طلعه من الصبح  اريد اقدم على شغل كافي صياعه

كالها وكام راح لغرفته ضايج كل  من نجيب طاري مؤتمن ينغث مهما يكون اخو ويحبه اكثر مني مريضه احجي عليه هيج

ثاني يوم قدمنا شغل فتره قليله وطلع اسمه وبلش يشتغل اشويه قل التوتر مالته وبده يتطبع على عيشتنا قدم على سيارة بالتقصيد  بس بعدها ماطالعتله

…گعدت الصبح على دگت الباب عرفته مصطفى  يصحيني  لان عازمنا سيف على غده بدت علاقه سيف ومصطفى تتحسن خاصه من عرفه اشلون حباب و معتني بينه وماعنده مثل سوالف الولد المنحطين

ضميت راسي بالمخده منتظره بلكي يروح وهو ولا ويا مستمر يدگ ويصيح لج ثوووله لمن زهگني كمت فتحت الباب صحت هااا

-ومرررض وين جنتي

-خامده مصطفى خامده وبعدين ترا السبعة استوها صارت  شبيك

-هم يالله بين ماتلبسين خلفتج رادلج اربع ساعات وكومي لچكينا خلي تسويلي اكل اكلها
سويلي اچله جوعان تسب اهلي

-عزا مصطفى ترا مدا تسبك بس اتكولك صوتك مزعج نصي

-اها يعني هاي الرطن كله بس نصي صوتك وانه حسبالي تشعل صبوحه وتعرفيني اشكد اعزها
خرب ولج غزل تذكرين اول لقاء بينه سبب تعارفنا صبوحه

-ههههه واول عركه جانت هم بسبب صبوحه

-واول فراك بينه وبين عائلتنا هم بسببها گالها وتحسر  نزل جوه

اعرفه مامتعود يبتعد وصعبة بس ماجان بدينه شي قدره ولازم نعيشه

نزلت ورا حاجيت الداده تسويله ريوك بس شيقنع مصطفى يكعد عاقل ايده وياها هيه اتكوله اكعد  اني اسوي وهو يسب بعشيرتها يييي علما يخلصون امناكر ارواحنا طالع

كعدت يمه اكل ويا وهو يزمخ شيلي ايدج انه السويته

-عزا مصطفى كم مره اني اسويلك اكل

-وييين الي يسمعج يصدك ولج هيه مخلمة حشى نعمة الله متنوكل بس غصباً عني اكل من الجوع

-سهله لعد بعد ما سويلك شوف منو يسوي من ننتقل لبيته الجديد

-صدك ولج اشوكت ننتقل

-بس نحصل بيت زين هسه قدمت طلب بين مااحصل نطلع نفرشه

-تمام يلا فضيها كومي ماشبعتي

كمت غسلت اديه وهو طلع شغل السياره اخذت كيتي وطلعت لكيته يمسح بالجام كال انه اسوق ولي

-ؤك يله بس سيارتي اذا صار بيها شي يمصطفى

-اي شتسوين بالله

-افلش جهرتك

-اتفلشين جهرت منهو ولج كالها واجه لام ايده يريد يضربني بوكس

انداريت ردت اركض صار بوجهي سيف انضميت ورا وكلتله اني دخيله يمك

سيف-شنو يعني ؟؟

-خرب بحضي علما تعرفها شابعه طن كتل دوخر خلي اكل بوكسي اهون مااكعد افهمك

ضحك مصطفى بصوت وسحبني من يمه دفعني للسياره وسيف بعده صافن مايعرف شنو الحجي

رحنه سيارتين نزلنا حديقه عامه حضرنا  امور الشوي وكف سيف يشوي ومصطفى ياكل امغلس اجت رانيا سلمت وكعدت ولااهتم مصطفى ولااتكول مرته

بس واضح شغله جان تمام وياها البت مطكعه اطگع صح يروحلها اوقات قليله بس ماخذ حقه وزياده امبين فززني وهو يگول-غزل لاتفهين بتج لاتوكع

-ماعليها هسه انطيها خبزه تستقر اشلون تعلوم علمتها عالاكل

-دطيري چا ترديها مثلج جنج كتكوت غاط باللبن 

-عوفك مني وكوم ساعد الولد ديشوي وحده خطيه

-لحظه جاي يتصل مكرم --ها ولك وينك صار كم يوم ماكو

-والله شغل وطالعه ارواحنا مؤتمن ملتهي بالواجبات وانيه طايحه براسي الشغل

-جا اشحسبالك  تحصل راتب من مؤتمن بدون لايطلع روحك اسالني عنه رب العصر والطياح الحظ اي شكو ماكو

-ماكو شي سلامتك على حطت ايدك وين اليوم

-طالعين سيف عازمنه على غده ماخذين الاهل وطالعين

همه يسولفون كمت اخذت ماعون بي اجنحه من سيف واجيت يم مصطفى كعدت سلمت على مكرم لكيته بيت جدو اجت هيفاء شاركت بالحجي

ضلينه فتره نسولف ومصطفى يلكفلهم بكيتي لمن اجه مؤتمن سلم وضل واكف  اجت  دعاء تركض وكفت يمه اشلون يسكت مصطفى وهيج شافها ندسني برجله وغمز

كله ولك مؤتمن قررنا نرجع بس شرط غزل اطلك دعاء

مؤتمن انتبه لباله صدك اني هم ما اعترضت ردت اشوف رد فعل

دعاء- ههههه بعد مينفع يعيني لان حامل ومنتظرين الولد بفارغ الصبر شوفيلج غير طلب

-اي الف مبروك كلتها وكمت

كعدت على جهة الثانية احس روحي مختنگه  مصطفى من شافني بجيت ومؤتمن انغث تأسف من مؤتمن وسد الفون جان فكرته يخبث ما اتوقع راح توصل لهيج شي اجه يمي كعد كال على شنهو تبجين

-لان حقير يكول ما احبها واطلكها وهسه امتاني طفل منها

-غزل لا تضحكين على روحج كلنه نعرف ماراح ترديله وصار اكثر من سنه ونص تاركته  صح مايصير احجي بس وهو شاب يعتاز مره بحياته موش انوب دعاء اللزگه الي دنگ حتى رجليه تبوسهن

-گال راح اطلگها

-طلب منج ترديله بالمقابل يطلگهن شعملتي انتي وترگج من هالشي ابصملج هسه اذا گلتي موافقه يردها لبيت اهله ومن تولد يرمي اليمين

-ماارجعله لو يموت

-جا خلي يعيش مثل مايريد وانتي هم ابني حياتج هنا وانه وياج ابضهرج شنهو تعتازين تلكين يمج ناخذ بيت ونفتح مشروع ونعيش هنا انسي مؤتمن واهله ماطول اخذتي القرار كملي

-هو هم هيج مصطفى راح اخلي ثقتي بيك لاتغدرني مثل ماغدرتني قبل راح اقدم طلاق غيابي واطلق منه

-عليش تطلگين خليج باسمه وكلمن يكمل حياته

-مصطفى مااضيع عمري ويه واحد مثله

-هم كقج بعد صغيره وتردين تكونين عائله على راحتج غزل سوي التردي بس البت متصير باسم احد غيرنا

-شنو قصدك

-غزل اشكد اريد اسايرج واوكف جانبج بس من توصل لحمنه عذريني مااكدر اخلي بأسم احد غيرنا

-تره بأسمي هيه ماتصير بأسم غيري

-اعرف بويه بس لحد من غزل البت كبرت شوفيها ماجسرت كلبج من تريد تصيح بابا تصفن ما تعرف منهو ابوها بربج غزل من جنتي صغيره مااشتهيتي يكون عندج اب تركضيله وتحتمين بحضنه

-اجذب عليك اذا كلتلك لا خاصه من اطلع من المدرسة واشوف كل البنات يجون عليهن ويركضن لحضن ابوهم   اضل واكفه بحسرتي اتمنى اكول كلمه بابا لاحد واركض بلهفه مثل ركضتهن

-عليش بويه اتخلين بنتج اتكمل معاناتج

-لعد شسوي

-خليها بأسمي وداعت الخوه اضمها بعيوني موش بس اب اصيرلها لا انطي روحي الها غزل هاي بمعزتج يعني روحي من الدنيا وحك علي من اسمعها  تكول بابا احسها تاخذ روحي

-مااكدر مصطفى

-حگج ماثاقة بيه اعرفج

-لامو ماعندي ثقة بس هاي الطلعت بيها من الدنيا وماعندي امل يصير غيرها اريد احس بالامومه

-ومنهو كلج احرمج  من هالاحساس هيه بتج واحنه عايشين سوه وحتى رانيا اخليها تتنازل عنها بساعة التسجيل حتى نضمن ماتروح منه

-مااكدر مصطفى ماينطيني كلبي

-على راحتج خويه وانه هم ابضهرجن كل وحده منجن اخليها بعين امم هسه شنهو ناويه

-اقدم على الطلاك

-قبل الطلاق اخذي حگج نعلي اصله وبعدين قدمي واهاا اهم شي تنسين القديم حتى تكدرين تتقدمين خلي ايدج بأيدي نبني روحنا سوه طز بيهم

-اشلون اخذ حقي

-ترديني اشوف المعفنه منزله دمعتج وغلس تعالي يابه ناخذ جوله بيهم غير لعبتي ذوله 

-مافهمت شنو

-انطيني النقال مالتج وخليج وراي بس انكتمي

اخذ الفون ودخل رقم تهاني ودز لاك كتب اريدج بشغله

-شنو مصطفى شدتسوي

-بويه انطيني مجال ثواني

كعدنا ننتظر واباوع لمصطفى شنو يفكر دقايق واجه مسج امري ست غزل

-رد هلوو تهاني اشلونج ان شاء الله بخير ومرتاحه على غيابي بس والله كسرتي خاطري لبالج اتخلصين مني ترتاحين اجتج الانكس مني

--شرايده غزل

-كل خير شوفي كلتلج كسرتي خاطري وحبيت اساعدج وهااا تره ماعندي مصلحه وياج بس دعاء داقتني واريد العب وياها

-وشنهو المطلوب

-ماكو شي بس توصليلي اخبارها اول بأول اشوكت تطلع ويا واشوكت يدخل غرفته ماريد تفوتين حتى الضحكه ويا ولاحرف واتمسحين الرسائل اول باول ومالج دعوه بالباقي

-خوش خلي انشوف سهله

-يلا انقلعي  خليني اشوف شغل صدك وينه هسه

-كاعد عالدرج يسولف ويه سماح وهيه واكفه يمه

-تمام انقلعي ومسحي لاتنسين

رجعلي الفون وگال يلا راويني همتج

-مافهمت اشلون

-اشتغلي عالبارد دخلي على صفحته دزيلج صوره و كليله انت البديت اتحمل الجايك بس لاتحجين غيرها هو راح يفهمها وحده

-ؤك

صدك دخلت على صفحه ابو شهم دزيت لايك وغلقت الفون لان كلي نرجع للبيت ونبلش ماعونت اشوكت نخلص ونرجع للبيت جنت متحمسه للخباثه من زمان مامسويتها مفتقده هيج شعور الحمد الله من اجاني مصطفى بس هو يعرف اشلون يشتغلهم ويطلع الي بكلبي

اول ماوصلنا شمرت كيتي على ماما ورحت للحديقه غمزلي مصطفى ودخل جوه رجع طلع صاح غزااااله ولج هم شايف صوره لحديقتكم

-لامامصورتها اله

-ؤك چا نطلقي بعد اخوج

شمرت الغتره وطلعت بطني شلت النطلون من جوه كعدت مديت رجل ورجل عكستها اخذت صوره اتخزي اخذت وحده متمدده وناثره شعري  على الثيل

كمت بس تعبت لان عالسريع اشتغل تربعت فتحت صفحته ودزيت الصور كتبت احلى من الحريه ماكو

ثواني وجاني مقطع صوتي فتحته واسمع صوت عيطته طرم اذني وينننن انتي بت الكلب

-وانت شكووو خليك بدعاء شوف شنو تشتهي خطيه لايطلع بالولد

-غززززززل

-ههه اعصابك صح مو من حقك تعرف بس هم مااخليها بنفسك يم البحر لويش اكو شي

-انعل ابوج لابو شرفج لابو الجابج عليه غزل اتكومين عالبيت لاانعل ابو اصلج يلاااا لج

-لاتصرخ وتزعجني وهااااا صدگ مكان هذا تدخلك خلك نبه هالمره راح اعديها مره لخ المحك يمها اسوي الما يخطر على بالك كلتها وغلقته

دخلت جوه مرتاحه شفيت غليلي بليل طلع مصطفى من غرفته يضحك كال خبرني مشتعل ابو شنهو دزيتيلي ولج

-كم صوره خرافيه شنو طلب منك

- شنهو لغه غير انجلط  كلتله مااكدرلها خويه هنا قانون انحبس ومرتك خبله تذبني سجن فانت اختصرها من الاخير ابتعد عن دعاء واشتري راحت بالك

-مم هواي راح يبتعد

-ولج كل عقلج وداعت كيتي مايباوع بجهرتها حالها حال الجاريه جوه رجليه وهاا هم عيشة الجواري جثيره عليها اريدج تذليها  بكد خراب السووه بينكم كون ماتركيها لمن تاخذين شكو حگ الج

هزيت راسي صدگ رجعه بعد ماارجعله الي حق اخذه منها ابرد كلبي واصدمه بالطلاق انهي بكد مانهاني بخبر حملها

ضلينه على هذا الوضع تهاني كيفت من شافت صدك كام ينعزل عن دعاء خلت روحه وياهم كامت تراقب اربعة وعشرين ساعة بس حتى تاخذ صوره وادزلي وبالمقابل ادزله صوره تخزي الي اخلي يطفر واتخبل كلما راد يعرف اشلون اعرف ماكدر

بيوم الي يفكر يبات يمها هنا اطلع للبحر اطبك بنطلون واصورله بس من جوه بالمي لباله بالمايو واكتب مره لخ تفكر اصورلك من فوك

كرهته بيوم الفكر يدخل غرفتها كل مقطع صوت يدزه اكول هسه يوكف كلبه من الحرگه اشكد دز مقاطع يتوعد بيه راح اطيح بيده وكتها اعلمج اشلون يصير الحجي ماجنت فاهمه شنو يحجي اكول بس يريد يخوفني بس صدك ارتاح من اشوفه محترك وهيه عايشه بالذل بس للخدمة

تمددت على فراشي ومتانيه صار  يومين وتهاني منقطعه اخاف اتصل تالي ننكشف ماكو غير سماح كعدت  تربعت اتصلت دقايق وردت بس ماكو صوت عرفتها بعدها زعلانه كلتلها هاسموح

-اي زين اتذكرين اسمي

-ولله دوم على بالي بس لان مااريد احجي ويه مؤتمن كطعت الاتصالات

-هو وينه مؤتمن خيه اشو مااعرف اشبي هالايام بس يتعارك

-اخاف دعاء مامريحته

-يادعاء ولج ينام بالديوانيه  صار اسبوع حتى يمي مايجي  متخبل محد يعرف اشبي دعاء تحلف اتكول مامحاجيته  وهوماعنده غير تجي لوماتجي اذا ماتوبتها سهله

-على منو يقصد

-شعرفني مااعرف متعارك ويه منهو ومنتظرها تجي حتى البارحه سحب اجهزتنا مااعرف شراد منهن لليل وردهن

-هم جاجه تهاني

-لاع عليش يحاجيها حتى نقالها مجسور كالتله شامرته ماعندي

-وسكت لو هم شك بيها

-لاخيه صدك جابته مجسوره شاشته كالت صار شهر تاركته عافها ماحجه

-ؤك باي سموح شويه وارد احجي وياج

سديته ودزيتله رساله بسرعة منو هاي التجي شنو بعدك تتأمل ثواني وطلع جاري الكتابه ---غزل لاتحجين جلمه وحده ولي

-منو حاجي وياك اصلاً مافارغتلك بس سمعت تتوعد كلت خلي اشوفك اشبيك اتعيط كسرت خاطري

-استغفر الله بويه روحي من وجهي

-يلا عاد لاتصيح هو رايحه اليوم عدنه سهر هم يالله اكوم اغير

-غزل وداعت بنتي اذا ماتوبتج واخليج تبوسين ادين بس حتى ارحمج مااطلع ابن ابوي

-اششش لاتحجي يلاااا

-اخ بويه اگضج لوماگضج سهله ماضل شي
اذاماگضيت بيج التوبه اطلع موزلمه

-اهووو هاي شنو وين تلزمني بس لا هم راح تجي لهنا تره حتى لو جيت متكدر حتى تفتح حلكك بشكوه وحده اذبك جوه الكاع لانتسى ازعاج المواطنه الامريكيه عقوبتها وره الشمس ذاك اخوك اجه نفس مايكدر يتنفس عود تعال اسفط بصفه خلي اضحك عليكم سوه هههههه

-انعل ابوج لابو امريكا الي لفتج سهله غزل سهله اخذي راحتج بعد مردج بيدي اذا مافعصتج وانعل اصلج عود ذاك الوكت صفينه وضحكي براحتج

-هاي امريكا التحجي عنها تسوه راسك انت ونسوانك صدك لويش نايم بالديوانيه والله كسرت خاطري اربع نسوان وتاليتك وحدك والله خطيه هههههه

-وهذا الي يوصلج المعلومات هم اگضه اذا ما ركعت راس ابراس وانعل ابو اصلكم سهله ماضل

-اهووو تره كولش اوفر انت يله لاتزعجني اذلف

بعده جاري الكتابه قبل لايدز ركعته بلوك حسيت مي بارد نزل على كلبي راحه موطبيعيه

…يومين وواني شامرته بقائمه المهملات مافاتحه الحضر لمن اتوسل مصطفى وحلفني بالخوه شرطت ميلغي بعد ياالله فتحته هو هم مارحجه  امبينه كرامته مسحوله

صار وقت دوامي وبدت صعوباتي ويه بتي وهيه
كلما جايها  تكبر وصدك صارت تعتاز سند خفت عليها من المحيط العايشين بي اشكد مااحاول احميها من المناظر والمجتمع القذر بس ماكو جدوا العالم بالشارع همه ونكاستهم  بالاخص اعمار المراهقه لان الدوله مطيتهم الحق صايره كوارث

كاعدين اني ومصطفى كال غزل شوفي ذيج الطفله

-وينها

-الي تمشي ويه هذا الولد المسحوگ شوفي اشلون حاضنها ويبوس بيها

-هاي حريتها ميصير اتباوعلهم

- لاابربج يعني بنتج بعد كم يوم هم هيج وتدخل بارات

-مااعرف بس اكيد تربيتنا تختلف جان اني دخلت بار  وبعدين  انت موجود اكيد حتخاف منك

-الدنيا جاي تتقدم وانه ماعندي مسؤولية عليها مااكدر امنعها لان ماكو صله قرابه يعني اذا قبل السن القانوني  دخلت احد للبيت مااكدر احجي مو

-اكيد لان شكو وحده منها تلبسك سجن 

-العب عمي حلوو زين واذا ابوها منعها

-لاينطوا الحق لان تحت السن القانوني اتصير تحت وصايه الاب يكدر يشتكي على الولد الي يتحرش بيها

-اووف استغفر الله

-اشبيك مصطفى

-لاسلامتج خويه اشوف وين تصفى بعدين اعرفن تاليتي اخذ مؤبد بسببجن

-مصطفى لاتخوفني فدوه

-والله اكثر من الهم والخوف الشايله مااتصور اتشيلين ؛لحمي امطشر بين الشباب بالعباس انتحر هيج اشوفها ومااكدر اكضها غير اخلي طلقه براسها وبراسي واخلص

-لا ان شاء الله نحافظ عليها راح نكونلها اهل صالحين

-وين عنج مؤتمن جا عرف شيرد

-هههههههه اجت براسي لاتكولها

-كومي لج حصلت خوش شقه تعالي شوفها حتى اذا عجبتج نفرشها

رحت وياه موقعها حلو ثلث  غرف واسعه ونظيفه وقعنا عقد بأسمه طلعنه جهزناها غرفه خاصه لكيتي اشترالها غرفه مرتبه   وصلت يم غرفه عجبني شكلها گلتله هااي صافو

-شنهو هااي صافوو بت المنغولي شوفي اشكد سعرها
-موغاليه  اشتريها الي

-ولج منيلي اضل ادفع اقصاد شوفي هاي حلو ورخيصه هم بروح ابوج غزل بالعباس ماعندي

-مصطفى لوهاي لومااريد

-بت الصخل شوفي الرقم المكتوب عليها اخذي مثل مالتي

-صافو صدك لويش اختاريت ام نفر

-كافي عليه

-ومرتك

-كل عقلج اجيب مرتي تعيش وياجن غير تسيبجن بويه هاي اوطى مخلوق على وجه الارض اول ماحصل الجنسيه اهفها

-تره تطول خمس سنوات مولبالك سهله

-اتطول اشكد ماتريد ماطولني امشبعها افلوس متتحرك من جوه ايدي طمعه بت المداس يله لج بعد بس ثلاجه كافي هواي اخذتي غراض

-صدك باجر نروح نسجل كيتي بالروضه

-اي اخذت اجازه من الشغل وهاي طيرتولي يوميه يوم كامل

كملنا غراض البيت ثاني يوم رحنه سجلنا كيتي بالروضه بس حزت بنفسي من سالتني عن كنيتها وكلتها باسمي ماعدها اب حتى مصطفى شفته ضاج ويباوع لكيتي بحسره بس ماجان بايدي شي اسوي

كلما تمر الايام واباوع بنتي اخاف اكثر اخاف تكبر وتصاحب واحد ومنكدر نحجي وتضيع مني

ماجنت منتبها لهالشي بس من صارت كمت اخاف عليها من الهوا وافكر اباصغر تفاصيل خاصه من عائلة يمنه انتقلوا لتركيا لان خافوا على بناتهم من الحريه الزايده 

ماجان عندي حل  غيره اسجلها لو باسم سيف لو بأسم مصطفى حتى احميها ما اخليها تحس بالنقص مثل ماحسيت بي ماردت تكبر وتنكسر كدام اصدقائها لان ماعدها اب

بعد سمعت مصطفى  يحجي ويه مؤتمن على شغل مشترك بينهم هنا وبالبصره امنت اكثر

رجع طرح عليه الفكر من جديد  وحجه هواي قنعني هالمره صدك شفت انو من مصلحتها لازم يكون احد يراقبها ويتابع تصرفاتها مهما يكون مااكدر وحدي خاصتاً هنا الدوله وياهم يعني اي صديق سوء يقشمرها مااكدر اوكف بعد بوجهه 

ماصار گدامي غير مصطفى مهما كان يطفر ويتشاقه تضل الاصول العربيه والغيره بي اعرفها راح يحميها خاصه هسه تعلق بيها كلش اربعة وعشرين ساعة شايلها ويلعب وياها ضامها بروحه

قررنا نسويها باسمه بس بسكوت عن امي نعرفها راح اتعارض  لان مصممه  تصير بأسم سيف حتى تكون اول طريق لزواجنا

كملنا غراض الشقه وقررنا ننتقل ونبلش بمشروع اتبنه كيتي هو ورانيا سجلوها باسمهم  دخلتها حضانه ارتاحيت من شعوذتها اشويه

صارت مشيتها قويه وهو متخبل عليها وخاصه من بدت تحجي كلمات طار بيها الكلمة يخليها تعيدها الف مره لمن مؤتمن يصيح بي يكله كافي خبلت البت

- وانت شكو غير بنتي روح شوف ابنك المحترك وينه

-خايب انجب وانعدل من تحجي

-ضل ميت غيره الله حاركك انت وعائلتك اخاف انت بيك شوفه اشويه الله بلاك بزره قرود جنهم امهاتهم

يضلون يتناكرون واني اضحك من بعيد ؛هيه هم املسنه وكحه ماخذته بالسانها مو تكول كم كلمه تحجين سابيته بيهن من غير من تصيحله دادي وهو طاير بيها

اشكد مامرتاحه اشكد مامصطفى بده يخنكني  خاصه بالمدرسة صاير يشلع كلبي بالبسي وطلعاتي  خو بيوم السفره للصبح اتوسل وهم مارضه اروح وحدي

بعد كومه تواسيل بي تالي هم اخذ اجازه من شغله  قرر يجي وياي هو مرته تاركها بكيفها والي مراقبني بكل خطوه

كعدنا من الصبح وطلعنا ويه الباص بالبداية مارضه الكاتبن المسوؤل عن السفر يجي ويانه وگلب خلقه من اصريت

بس بعد ما تعرف على مصطفى وخبصله السيارة بالاغاني والركص غير رأيه  وصلنه نزلنا فرشنا وبعده على هوسته وشقاه وين الولد

صح لغه مايعرف كلش لان ماصارله هواي يعني امشي حاله اتعلم من الشغل بس مشتغلهم تصنيف ساعة يتصارعون ساعه يغنون من كل قطر اغنيه بكيفهم عيشهم اجواء عراقيه جنوبيه

اكثر البنات انعجبن وهو منطلق وياهن ورانيا كاعده تطحن باوعتله وضحكت اشرتلي شكوو

-لاماكو شي بس ركزي على  ابن الرافدين

-يعني ليش هيج يضحك وياهن ويتشبك

-حبيبتي بي رس مايكدر مو بيده بدمه تمشي هاي الشغله

-بس هو يحبني

-ههههاي ضحكتيني ذكرتيني برجلي من يكول احبج وماخذ اربع نسوان ومتأكده اذا اجته هديه هم راح بقبلها

-يعني متزوج اربع زوجج

-اي بلا فخر كلتها وضحكت

كل شغله يسويها مصطفى اصورها وادزها للبنات اخر شي كالت سماح ولج فتحي كام صار بنفسي اشوفه اشلونه

ضحكت وفتحت كام وشتغل الضحك يباوعوله اشلون  لام البنات  واكف بينهن يركص كال مكرم  لاوالقسمة دزه مؤتمن يعدل تصرفات غزل تالي ربته وربت عشيرته سوته انكس منها

-يااا مكرم ولك هو ابنكم وصلني شاخط

-لاوالله جان امعوز اشويه كملتي على ايدج بس والله حقه حوريات يمه ااااخ

-ههههه هاانكتلت

-يابه غزل سحبيني انه ضايع حگي هنا تتورط تحجي چلمه يجيك الجفجير طاير

-يااا شوف مصطفى حيكتل الولد

سديت الفون وركضت لان مصطفى عصر واحد منهم شاله من مكانه  عود يتصارعون ياهو الاقوى ميدون هذا شابع حليب جاموس صاير اقوى من الحديد تالي شافني كمت اصرخ عليه وكلتله يسويلك دعوه اذا تأذه ياالله عافه

رجعت كعدت وعفته وياهم يتشاقه همه خطيه فقره لبالهم هذا مثلهم على الاهيته ميدرون رب الخباثه  يضحك عليهم ياكل اكلهم ويكتلهم ويجعص بحبيباتهم وهو المان عليهم

اجت تالي  كالت هذا اخوج بطل امبين عليه قوي

-لعد لو تشوفين الجنت ماخذته مرتين من هذا

-اووو يعني قوي كلش حلوو اكيد رومانسي

-كولش خاصه بليل من يشتعل عنده گلوب الاحمر يكوم ينگط رومانسيه خو اذا كلتيله تعبانه وووو هنا اگلوبات كلهن يشتغلن يمه بعد مينطفي للصبح يضل الليل كله ينورلج طريقج

-مافهمت يعني يجبرج لو يأذيج

-لاابد مافد يوم جبرني ابدد حشا والاذيه لامو يمه اصلاً ناعم بالتعامل مايعرف العنف شنو فد انسان كيوت اتخلي بكلبج

-اشكد حلو

-اي جميل حيييل حيييل ميتوقف جماله لاذان الصبح لمن يخليج تسمعين صوت الاذان نعي ياله يفك ياخه عنج

-مافهمت اي كلمه

-احسن حبيبتي بس نصيحه لاتتورطين بعراقي ابتعدي خليج على ولدنا احسن

-اوو طبعا حبيبي بالرومانسيه ماشفت اله مثل يحضرلي ملابسي والاكل ويحممني واذا لكاني تعبانه يتركني وحدي بس يغطيني

-نفسه نفسه هاي تصرفات زوجي سبحان الله اشتعلت صفحتك مؤتمن من اول يوم زواج كرهتني بالعرس لسه ابالي ذيج الليله الكشره حشرت روحي بالزويه كاعده للصبح اخاف يرجعلي هسه انتي وكتج تذكريني بي خلينه مستمتعين فدوه

اتغدينا وجلبت بكم لعبه ماقبل اصعد بس وحده وكوه هو وياي صورته ودزيته وحنا امعلكين بالسما اشويه واتصل بي مؤتمن رزله وغمه وغلقه رجعنا هالكانين للبيت من التعب

مر يومين وماكو مؤتمن ما اتصل احسه يحركني من ميعبرني ويدز مسج حتى لو رزاله عادي بس احس ذاكرني صح بلشت بمعاملة الطلاق وحجيت ويه المومن بس اكو شي يسحبني اله دوم اريد اغيضه احس براحه من اشوفه مشتعل

نشرت استوري   جنت مصوره الكافتريا ناكل ومايكل يتشاقه اخذ الفنكر وتضاربت ويا

ضليت منتظره دقايق خفت هم يشوفها ومايرد وكتها صدگ اكول نساني تأخر بالرد استوني ارد الفون واشوف اجاني مسج منه هانت يعلة كلبي ماضل شي

-تره صار اسمعها عمر شنو ما تعرف اتكول غيرها شيخ وشيخ والله ياربي

-سهله غزل

-كول والله شوف مؤتمن نصيحه اترك الشيخه واخذ بخور بيع باب الكاظم والله احسلك شكلك مال هيج شغله لويش دتخربه بالشيخه

-ااااخ بويه توگعين بيدي لو متوگعين

-اهووو هم رد للتهديدات روح حباب لايصعد ضغطك رجال جبير وراك كومه نسوان خطيه يترملن جاي يهدد تره متخوف بنتي بهذا صوتك

-خليج كد جلمتج

-كدها والله  وانتظر المفاجئه الجايتك بالطريق

-موش اكبر من مفاجأتي الج

دزيت اريد اعرف شنو مارد  دزيت ثاني هم مارد قهرني والفضول كتلني شيقصد بالمفاجئه

رجعت من المدرسه  امشي بسرعة خياليه مع العلم هنا القانون يحاسب على السرعة بس جنت ضايجه كولش صار كدامي مصطفى يخابر همزين ماردمته لفت السياره اجت بسيارة سيف نزلت بسرعة اسمع مصطفي يضحك بصوت عالي  ويكله ماكو شي بس مرتك ركنت سيارتها

-مصطفىى عوفه وتعال شوف اشلطمت

-منهو الزمال الجابلج سيارة

-اهووو دتعال شوفها اشصار بيها  على صوتنا طلع سيف يركض اجه يمي كال هاغزل تعورتي

-لابس سيارتك اتفلشت

-يمعوده  فداج بس كون ماتاذيتي

مصطفى- يالحنين گول والله مرتين دخيل ربك لونخلطك بتهاني ونچسمكم جان مؤتمن هسه بخير ولك ناعله ابو اصل سيارتك شبيك يول  استرجل اشويه انطيها كف اكلب عيونها زرك

-لاياعيني  فدها هيه سيارة بس كون ماخافت

- اشتعلت صفحتج صبوحه امش لج يلا على جوه دخلي اروح اجيب الصخله بتج

-حيل مصطفى لسه ماجبتها

-لا موردت الوكت يتاخر اشويه اريد اخذها للحديقه اخاف نتاخر لاتقلقين وياي

-تمام بس دير بالك عليها

راح مصطفى دخلت للبيت تعبانه كبل نمت من التعب كعدت بليل لكيت سيف ماهو سألت ماما  كالت  اخذ سيارته للتصليح ومارد يمكن طلع لبيته مناك ومصطفى هم بعد لا ياخذ البنيه يفرها الولايه كلها

-يلاماما بعد احسن علمود تتعب تنام بليل

رحت للمطبخ استوني اطبخ دخل مصطفى شايلها وهيه نايمه على متنه امبينه تعبانه وداها يم امي واجه يمي بالمطبخ دمغني وراح يفتر  لازم يمشي ويخرب ميكعد كال اكلج منهو يدفع الفواتر

-سيف

-هذا الفاهي يصرف علينه

-لاتكول فاهي وسد البوي خطيه كلها فواتير عليه هاي

-والغاز هم

-عزااا صافو  سد الكاك نحترك هالشكل

-اكلج هاي الثلاجة هم مستفادين منها

-اووو مصطفى خلي افتهم شدااسوي بطل

-اكلج شنهو تعتاز كيتي اذا اخذتها سفره وياي

-لويش وين اتريد

-ردنه انه ورانيا نروح للحديقه كلت اخذها وياي لان دوامج وامج عدها شغل وين تبقى بعد الحضانه عليش متجين ويانه

- سفرتك صبح لو ليل اذا صبح لاعوفها اني اغيب لان تتعب خطيه وجيه والله مالي خلك

-لاعصريات اخذها هيج ساعتين اوديها الصبح للحضانه باجر والعصر امر اخذها مناك لاترحين وراها بس حسبالي تجين اطلعج من الخنگه اشوية

-مابيه شي

-احجي غزل شكو ضايجه

-رفعت دعوه طلاق غيابي والمومن انطاني موعد

-ادري سمعتج قبل يومين تحجين ويه امج بس نصيحة خويه اخذيها مني لاتثقين بأمج

-لويش

-ناويه على ضياعج انتي وبنتج حسبالها لسه بعدها بأسمح وهذا سيف ابتعدي عنه تراه ثلعب صاف وياها و الفلوس التسحبهن من مؤتمن يخلصهن بارات

-عالاساس مؤتمن الزين

-صح ماعنده حسنات مؤتمن بس هو الوحيد الي راح يحميج من الضياع الي ناوين يشمروج بي يله بويه هسه تجين وياي باجر لولا

-  لا عندي فحص مهم   انت اخذها وديربالك عليها ححضرلها جنطه حليب وحفاضات كم غيار اخاف اتوسخ

-خوش دروحي هسه حضريهن لان الصبح تنيسن وانه لازم اطلع من وكت كلت اخذها بطريجي

-ؤك  تعالي كلب بالشوربه مو تنساها وتحترك

-لايابه بس روحي اله اخلي حبيبة عمها باجر اتكمز لمن اتمل

-اشوكت ننتقل شقتنا

-هذا الاسبوع ان شاء الله حضري امورج كملتها كلها ماضل بس نفتح فواتير

-تمام تفتح باسمك لو باسمي

-لاخلها بأسمي حتى الراتب ميكطعون منه هواي يله ولي حضريلي غيارات لكيتي

رحت حضرت ملابسها وكم غرض خليتهن بغرفته علمود لايكعد احد  واعرف ماما تحضرها الصبح لان اتعاجز اكوم

رجعت لكيته بعده يخوط بس جان صفنه تاخذه وصفنه تجيبه سالته اشبيك

-سلامتج وخربط شعري ابتسم  وطلع لغرفته اني هم صبيت اكل وكلت وصعدت غرفتي كملت ادروسي  استوني انام واسمع باب الشقه انفتحت بالبدايه وهمت روحي وبعدين كلت يمكن مصطفى طلع بالحديقه لان بعد وقت نومته

نمت كعدت الصبح نزلت مالكيت احد بس ماما ونايمه عرفته ماخذها للحضانه تريكت ورحت للمدرسة

رجعت الضهر مامريت عليها  لان ادري هو راح يمر عليها واني تعودت دائما ياخذها يفتر بيها ويلعبها لليل يالله يردون وهم يكملون سهر بالبيت كد مامزعجين

رحت لغرفتي شمرت روحي من التعب ماكعدت غير على صوت ماما وهيه اتكول غزل صارت العشره وين مصطفى

كمت شنو بالعشرة عزا اشكد نمت

-يا نمتي بنتج وين

-ويا ماما كال لاتقلقين بيت رانيا ماخذها

-ياماما اريد انام دخابري خلي اغيرلها اسبحها خو مواضل للصبح

-تمام هسه اخبر

كمت خبرته ماكو مغلق رحت على برامج التواصل هم ماكو ضليت محتاره اتصلت على رانيا كالت ها هنا نايم

-اي عفيه دكعدي خلي يجيب كيتي

-لاخطيه  نايمه  تركيها

-ولج هاي تكعد بليل تزعجج واني مااكدر انام اذا ماهيه

-ماكو ازعاج خلي زوجي اليوم يمي دخيلج واذا على بنتج احنه اصلاً صاحين الليل كله وهي متعوده على مصطفى اكثر منج

-دتفتهمين شنو احجي اكلج تبجي هاي

-غزل شبيج هذا مصطفى متمدد يمها وهيه بسابع نومه شنو اول مره يجيبها يمي كلها كم ساعة ويطلع الصبح ويجيكم

-ؤك اشوكت مابجت خلي يجيبها

-تمام يروحي يله باي

غلقت الجهاز بس كلبي يفور مااكدر انام اذا مويمي من غير  ماما الي  ضلت تحجي عليه لويش سمحتله كلتلها لاتزيديها استحيت ارده وهسه يمكن يم زوجته الي غالق جهازه وهيه كالت يبات عيب ازعجه

الليل مر عليه بطلاع الروح مانمت للصبح لمن سمعت الباب انفتحت وصوت ماما طلعت امنت راحت اجيبها من التعب رحت بالنوم بدون لاحس
هدوء وتعب ماكعدت اله العصر كمت طلعت لكيت البيت هادء ماكو احد

دخلت لغرفه ماما مهوسه عرفتها كيوت مهوستها لهيج ماما ماخذتها وطالعة

طلعت فوني اتصلت رفضته عفتها كلت ملتهيه تمرجحها اكلت شي عالسريع ورجعت غرفتي طلعت كتب ادرس لليل تأخر الوقت ومحد رد ضل گلبي لعب  اتصلت بماما ماردت رجعت اتصلت بمصطفى هم ماكو

كمت لبست دااطلع ورن جهازي  شلته لكيت  مصطفى رديت  بسرعة صحت صدك تحجي ولك كلبي نار ضل وين صرت

-فتحي كام وشوفي وين صرت

-شكو مصطفى تره قلقتني كيتي بيها شي

-لاهاي مابيها شي بديرتها عن الله تحرسها طايره  بس فتحي كام

فتحت الكام وكعدت بعد رجليه متعيني واني
اشوف كيتي بيد مؤتمن يبوس بيها ويضحك…

لاتنسو التصويت ⭐⭐⭐⭐⭐