رواية كفي والمنجمه الفصل السابع عشر 17 - بقلم Leo Alfatlawi

كفي والمنجمة البارت السادس عشر انْدَار شافني، تفاجأ بوجودي. عاف كعدته وضل يباوعلي من فوك ليجوه، واني ابتسم. أشرلي بتوعد لأنه ما يكدر يحجي. صبوحة: لاحك على أصخام البين، هسه أكعد يم أمريتك. جنت بعدني كامشة ايده، عصر ايدي حيل بيده، حسيت اتكسرت عظام ايدي. همست: مؤتمن اترك ايدي، لا والمسيح أصرخ بين النسوان، ما عندي مانع اسويها مناحة هنا. -امشي جدامي، أنعل أبو أصلج اليوم. صبوحة: وين تريد تفشلنه جدام العالم؟

بس لبسيها ذهبها واطلع. -أنتي لبسيها أصخامها مجاني، وانتي الثانية جدامي بسرعة. -وروح ابني يا مؤتمن إذا تحركت بعد ما تشوف وجهي، ولك زحمة من أبوها شيكول إذا وصله الخبر؟ داخل يم بنته وطالع بدون لا تعبرها. هيه تحجي وهو عينه برجليه، صاك على أسنونه. ردت كالت: موش وياك؟ ولك يجده، العالم تتنوع راح نتخزى جدام الديرة، طلبتك يبعد جدتك لا تردني، ما تتأخر، هنه دقيقتين.

هز راسه واندرلي: روح ستري روحج أحسن ما استرج بالجفن. كالها ودفعني. كعد واني وكفت على صفحة. بدت تكفل صبوحة وتهوس كدامة، وشعشبونة وياها. هسه ذني افتهمنا، أم مكرم وياهن لويش؟ ما تشوفين بتج تنوح؟ هو عود خجلان بس والله كاعد على أعصابه، ذاك ويا مبين يأشر روحي. درت وجهي ما اهتميت. اجه وقتي، ما أعرف لويش من أريد أخبث أشوف صورة مصطفى كدامي. هيفاء: غزل دخلي جوه واستري علينه.

-ولي من يمي، والله إذا ما أخرب وأخلي يطفر ما أطلع غزل. -دخيلج غزل خلي يكمل اليوم على خير. -عوفج منه ولج، دا أحس روحي مختنكة. -من عيون النسوان وانتي جايه مصلخة، لو لأن شفتيه كاعد وياها. -لا لا، اني أعرف راح يتزوج، بس لويش هيج من شفته كاعد يمها حسيت؟ ولج كلبي وجعني. -ههههه، على شنهو كلبج وجعج؟ دشوفيها شلون تريد تكض ايده ويدفعها، خلي أروح أنطي الذهب ساعة وطكها وفضحنة.

-كون الله صدك تسويها وتنطي الذهب حتى أمرعطج هنا، ولي اوكفي على جهه وضمي لمن أكلج. -ولج اخيي راح ينجلط، شوفي شلون يمسح بكصته من العرك وحنا ابنص الشتا، أصلاً ما مقتنع بكعدته، الله يهدي جدتي أشورطته. -عوفي هاي من الفرحة ماخذ النعجة مالته. -ربي يحرسه من العين، دخيل الله شلون يباوعله راح ياكلنه. -والله مو حباً بي بس هواي على تهاني، كلش ما لايكتله. -تدرين أكبر منج هاي أكثر عشر سنوات.

-بس مبينة أكبر من مؤتمن، أكلك هذا أخوك شنو؟ يلطش أعمار، شو ما مبين عليه جبير. -تراه موش جبير، بعز شبابه بس انتي زعطوطة. بعدي خلي أودي الحنة. -اني أوديها جيبي. أخذتها منها، رحت يمه قدمتها إله، دنكت عليه همست: بالمبارك يبن عمي، شايف الخير تتهنى. شال راسه بس يباوعلي، وجهه محتقن، كاز على أسنونه كال: نوصل لو ما نوصل؟ سهلة. -هاك حني عروستك. -بعدي لا أفلشه على راسج وروحي ستري روحج، خرب بأصلج. تهاني: جيبي انه أحني روحي.

-هاج وخلي بطريقج لشعرج لأن عيب من العالم طالع الشيب، ستري وانته حبيبي خلي أخليلك شوية. -الصبر يا صاحب الصبر. كالها ومسح وجهه. دنكت على بسته بخده، صار شعري بحضنه، همست يم أذانه: تستاهلها. سحب شعري بيده: كلتلج ضمي شعرج، تنزعين ملابسج غزل، يلا جدامي عالسيارة. وخرت راد يكوم، رجعت صبوحة تهوس كدامة، منعته من الحركة، كعد يريد ينفجر.

هيه تصفك واني وياها أتمايل، وكلما أشوفه يضغط على ايده يعصرها، أتماوع أكثر كدامه، لمن بدت تهوس واني ما صدكت كمت أهوس وياها، كل ما أطفر تنشال تنورتي ليفوك، خليت النسوان كلها تترك العروس وعينها بيه. شافهن هيج فول، كام راد يطلع، بيبي صارت كدامه كالتله: لبسها الذهب واطلع. -بعدي لا أحرك أبو أصلها. -ولك جده شمالك؟ حجه من بين أسنونه: بعدي وانتي يا غضب الله تعالي وراي. كالها دفع بيبي وراح اتجاه الباب.

ركضت وراه سماح. اني سحكته، رديت أباوع لتهاني وكوه كامشة ضحكتي. والله نعلت والدي للعرس، الحمد لله خربته. بس أحس كلبي يوجعني، أعرف بنفسي أضحك جذب. رحت كعدت على جهه، كمشت كلبي، لويش هيج دا أحس؟ شنو غزل نسيتي السواه بيج؟ ديربالج تحبيه! لا ما أحبه مستحيل، بس لويش مختنكة؟ جذب والله دا أجذب على روحي، أدري بنفسي أحبه. نزلت دمعتي مسحتها قبل لا واحد يشوفني. مشاعري مخربطة، أكرهه وبنفس الوقت محترك كلبي على زواجه.

اجت سماح كالت: مؤتمن يصيحلج. كمت كمشتني كالت: تره معصب حيل غزل لا تعاندي. -وخري عني، هم متزوج وهم معصب، خوش والله. دفعتها وطلعت. اكو طفل واكف صحتله كلتله: وين مؤتمن؟ -هذا العريس قصدج؟ -يي. -تعالي هنا. رحت وياه بس الطفل صافن على بطني، ضحكني واني ضايجه. وصلت لكيته واكف مدنك بيده جكارة، وصلت يمه. -شنو مؤتمن؟ -خرب بيج وبمؤتمن، لبسي وتعالي بسرعة. -ماااا. -شنهو ما؟ ولج عليش تخليني أشيلج وركعج بالكاع؟

-لويش حضرتك ضايج لأن لابسة هيج؟ -يا لبس هذا؟ ولج انتي شلابسة من اشتعلت أمج؟ -مؤتمن لا تضل تغلط، شوف روحك شتسوي بالأول وبعدين حاسبني، تره قبل ثواني انت جنت يمها كدامنا، مو حيوانات احنه؟ لويش لبالك كلها مثلك ماكو إحساس؟ اندار مسح وجهه يريد يكتم غضبه، ضغط على أسنونه كال: لبسي وبالبيت نتفاهم. -ما أروح راح أضل، وأريد أشوف شنو حتسوي، راح تضربني؟ عادي تعودت، شنو شعورك وانت كاعد يمها واحنه كدامك؟ هاا؟ شنو مرتاح؟

مو العبيد مالتك داير مدايرك ويردن بس رضاتك مو؟ شنو راح تزودلك من تجيبها؟ لو هيج حالة اله تكوم نسوان تگول حيوانات عندك بلا مشاعر؟ هم فكرت بينه بشنو د نحس؟ مؤتمن أخاف جنت أكرهك شوية هسه تضاعف كرهي الك تعرف؟ -شنهو هاي مشاعر ظهرت بالحلقة الأخيرة؟ بالله بلكي توضحيلي أكثر. -ما ظهر شي ولا تحلم يجي يوم وأحبك. -يابه ميخالف. كالها وهو يبتسم. رجع كال: يلا حبابة روحي بدلي وتعالي، منتظرج بالسيارة لا تتعطلين. وطلع.

رحت للغرفة، معقوله حس بيه؟ لا بس اني ما كلتله شي، بس ردته يحس على روحه. أي بس هو يحجي وياي باستهزاء، اني شسويت؟ لويش حجيت ويا هيج؟ دخلت للغرفة أريد ألبس، شفت تهاني كاعدة تبجي ويمها الحبابات يسكتن. دخلت بلا صوت، دنكت ردت أشيل غراضي وهيه طفرت بوجهي. -خربتي؟ ارتاحيتي هسه؟ -شنو الخربته؟ شمتانيه من واحد متزوج؟ يعني ياخذج بالأحضان لو شرايدة بالضبط؟ -غزل والله راح أندمج. -امم، عود بسيطة، د تعالي وثبتي روحج وبعدين ندميني.

-لا حبيبتي، ردته وأخذته، حسبالج ما أكدرلج؟ -أخذتيه بمزاجه، اني كلتله تزوج لأن ما أريد أخرب جسمي، وهو خطيه يريد طفل، كلتله جيبلك حيوانة تخلفلك. -غزل طلعي منا لا أكتلج. -طالعة، أصلاً مؤتمن واكفلي بره يمتانيني، يغار عليه حتى من النسوان ما يريد يشوفني. وإذا بيج حظ سويها، والله أخلي يسحلج وانتي عد أهلج. -إذا ما كرهتج عيشتج وأخلي يسويج خدامة يم رجليه سهلة. -تره هواي طالعة بأحلامج بنتي، منو يسويني خدامة مؤتمن؟

تره مؤتمن حتى شعري هو يغسله الي وملابسي ينطيهن لسماح تغسلهن، يله هسه بعد انتي اجيتي نوب تغسليهن الي. اجت يمي عيونها طالعة مثل الضفدع، هيه ضخمة تخوف، جرتني من شعري صرخت، ركضت سماح وهيفاء كمشنها. كللت سماح: عيب هسه يكولون نسوان مؤتمن تعاركن بأول يوم. -بعدي عني سماح. -وعلي يا تهاني إذا صار خدش بغزل يا مؤتمن يحركج، تركيها أفضلج. -عليش يحركني هاا؟ موش حرمة انه لو شنهو؟

هيه تحجي بحركة واني ضامة خدودي، خفت على وجهي لا تشخطة وتخربه، تكول غوريلا. كوه هدني منها. سماح: طلعي بسرعة تره أمهاتها هسه يكتلنج، ذني ما يتأمنن. تهاني: إذا ما خليته يركنج بس للخدمة ما أطلع بت أبوي، بس تاني جايتج باجر إذا ما خليته يشمرج مثل ما شمر أمج. -شنو شمر أمي؟ سماح: غزل طلعي. -شنو شمر ماما؟ شتقصد؟ -غزل عوفيها بعدين أكلج. -ما أطلع إذا ما تكليلي، والله هسه أروح أفضحه وتعرفيني أسويها. -غزل شو تعالي.

أخذتني للصالة وعفت تهاني تبتسم بعد ما شمرت الحجاية وخلتني صافنة ما أعرف شنو اكو. طلعت ويه سماح كالت: شوفي غزل هاي تريدج تتعاركين ويه مؤتمن، لأن بهذا شكلج تعرف مؤتمن ما راح يفوتج وهيه تريد من هسه تكوش على كلشي. -عوفج من لطمه، كولي شنو شمر ماما. -اجت وراج من جابوج قبل كم يوم، جانت واكفة هيه من اجت أمج تتوسل بمؤتمن بس تشوفج ومؤتمن طردها. -بس هذا الشي سماح؟ لا تقنعيني، أدري اكو سالفة، كولي حبابة شنو؟

والله وأخربلج الليلة عليهم، وآخذلج ثارج منها بس كليلي، والله ما راح أكله انتي ولا أفتح الموضوع ويا، فدوه راح تضل تاكل بكلبي وصدك راح أتعارك ويه مؤتمن إذا ما عرفت، لأن راح تجي ألف فكرة براسي. -غزل حبيبتي عقلي. -خلص رايحة، انتي لا تحجين. -انتظري هيه اجت وجانت تحجي ويا بهدوء وتتوسل بس تشوفج. -أيي. -بعدين طلعت أصواتهم، دفع قتيبة وصاح على أمج، كلها: اعتبريها ماتت، ما أريد ألمح شكلج لو أسمع واصلة حدود البصرة أندمج.

-وبعدين شنو الصار؟ -عمج أخذ مؤتمن على صفحة يتفاهم ويا، وأمج اجت تتوسل بيه أدير بالي عليج، بس تهاني كالتها: بنتج اجتني بوقتها، أقلها تخدمني ما بيه حيل للشغل. أمج انفعلت من سمعت، رادت أسكتها بس ما سكتت، ضلت تغلط، تالي تهاني كالتها: إذا ما خليتها تصير خدامة للبيت كله وجوه رجليه وخلي يصبحها بكتلة ويمسيها بكتلة، ما أطع بت أبوي. طلعت أصواتهن، اجه مؤتمن يريد يشوف شنو. -أي كملي، أكيد تهاني ارتكبت وخلته يطردها مو؟

-أي عفيه، لمن خلته يطردها من صدك كال لقتيبة: إذا اجيتوا أردكم بتوابيت وقد أعذر من أنذر. -تمام لعد شوفي شلون راح أخليها باجر تستمتع، هيه الجابتها لروحها. -شنهو راح تعملين؟ -مالج دخل وخري. رحت لمؤتمن لكيته يمتانيني، أول ما صعدت صاح بوجهي: الزمال الشلتي وراج ما حسبتي حسابه، وين جنتي؟ -ما أعرف نسيتك. -شنهو ولج؟ -هااا. -ومررررض، وشنهو هالبس غزل؟ منهو ضل اليوم ما راح يتخيلج؟ -تره بس نسوان. -وإذا نسوان؟ تصلخين؟

لج غززززل راح تخبليني بعقلج هذا المابي بس الثول، النسوان ما راح تسولف حرمة مؤتمن شلونها؟ -تره لابسة وهاي حنة يعني عادي، لويش مكبر الموضوع؟ اني كلت هيج وهو طلع غضبه بالستيرن يضرب بي لمن طك بيده، رد اندارلي كازو على أسنونه: نوصل وأعلمج شلون كبرته. -تراااا أنت ما خليتني أطلع أشتري وهسه تحاسبني؟ -موش جبتلج أصخام عليش ما لبستي؟ -وين جايبلي؟ بس لا هذا ثوب، تره هذا مال حج مو مال حنة. مد ايده راد يسحلني، لميت روحي، هو

هم ضغط عليها ورجعها كال: نوصل ويصير خير. خفت من صوته خنست ما رديت لأن جان معصب، شغل السيارة وداس حيل. وصلنا من الباب الخلفي كال: يلاااااا على وجهج للغرفة. نزلت ركض لغرفة عمتي أم مكرم لأن طلعت كبلنه أكيد وصلت، دفعت الباب ودخلت، لكيتها واكفة تلف بشيلتها، صرخت: عمة لحكيني حيكتلني. -يا يمه اسم الله، منهو يطكج؟ بعدني ما كلت مؤتمن وهو دخل مثل الثور الهايج، ركضت عمتي كمشته من صدره تدفع بي.

-عمة لا تدخلييين رحمة لرببببج طلعي منها. -يا عمة هدي دخيلك بهاي عصبيتك إذا لحتها تموت بيدك. -ما شفتهاااا؟ بله هيه ما تفتهم، انتن شبيجننن؟ ما تكليلي ما عرفتي تسحليها وتلبسيهاااا؟ -يا عمة حنة وفرحانة بس نسوان، وانت شبيك يا عمة؟ راح تنجلط من عصبيتك. -بعددددي وانتي لو طيرين الكفج اليوم. -يمه هاي انه منا وجاي مسؤولة عن لبسها، بس عوفها بداعتي لخاطري يا عمة عوفها، ولك شنهو مالي خاطر عندك؟ -استغفرررر الله. كالها ومسح وجهه.

-يا عمة طفلة ما تفتهم وشافت عرس كيفت، يلا يا يمه لخاطري اتركها. -للحنة ما تنزل إذا لمحتها موجودة أدفنها. -ميخالف ما أخليها بس اهدأ واطلع. خنست يم الكنتور أخاف أحجي لأن أشوفه مشتعل، همزين عمة كامشته بس يباوعلي يريد ياكلني، كوه قنعته وهدأته وطلع. رجعت كالت: راح تسودنين الزلمه انتي. -لويش عمة؟ فوك ما أم عرس. -استوج ما ذكرتي غزيلان لمن راح من ايدج؟ روحي عمة لا أطك مرارتي.

-خلص عمة رايحة بس شوفي أخاف بعده وتالي يلكفني من أطلع. -لا ماكو راح للديوانية، طلعي بسرعة لا يجيج. طلعت ركض للغرفة صعدت دخلت سديت الباب. ذبيت الجبة وبالي يم ماما خطيه شكد ذلها واني أقول لويش ما اجت وراي. سوده عليه ماما شلون أوصل الها، كلبي نار عليها. تمددت ما بيه حيل أبدل تعبت من الهوسه، شمرت الحذاء وغمضت استسلمت للنوم من التعب.

كعدت على صوت طكطكة يمي، فتحت عيوني شفته كاعد مقابلي على الكرسي بيده جكارة، يباوعلي بنظرة جمدتني بمكاني قبل لا يحجي لو يصيح، كعدت لميت روحي ونزلت دموعي. كام اجه يمي كال: إذا انتي هيج تخافين عليش تعاندين؟ -بعد ما أعيدها خلص، هسه البدلة أنزعها وأشمرها. -اممم خلص وقتها، لازم عندج غير سالفة مدبرتها. ما رديت، أخذ نفس ودنك طفه الجكارة، سحب الغطه كعد مدد رجليه وانتجه غمض عيونه مبين تعبان. -مؤتمن. -هممم. -لويش طردت ماما؟

فتح عيونه كال: منهو كالج؟ ما رديت نزلت دموعي وشهكت بحركة، سحبني لحضنه، ردت أدفعه بس شدد عليه بحضنته وباسني من راسي كال: شنهو التريدي يا علة كلبي؟ عليش تبجين؟ -ما أريد شي بس وخر. -جا عليمن هالدموع؟ -اشتاقيت لماما. سمع اسمها تعصب، وخر عني وكمش وجهي بيده ورفعه كال: شنهو كلتلج غزل؟ -والله اشتاقيتلها. -تنسيها سمعتي تنسيهاااا، هالشيطان ما تذكرين اسمهاااااا. -ما أكدر.

-لا تكدرين، أمج اعتبريها ماتت، لا تجيبين طاريها ما طول ما تريدين تنطكين. دفعني ورجع غمض. باوعتله عرفت هاي الشغلة ما تفيدني مال أبجي، هذا إذا أضل ويا لباجر هيج ما راح يباوعلي، وذيج راح تتشمت بيه. كلتله: مؤتمن. -هممم. -وانت شنو تضل هيج تعاملني؟ ما خلصت عقوبتك؟ -شنهو التريدي؟ موش شعلتي عشيرتي؟ -أريد ترجع مثل قبل وياي. -اهااا، تريديلي أثول مثل قبل تضحكين عليه؟ ولج والله خليتيني ما أثق حتى بنفسي.

-اني آسفة والله ما أعيدها، مؤتمن تره أذيتني هواي. -شنهو التغير خلاج اليوم تبدلين كلامج؟ -ما أعرف. ضيك عيونه وكال: غزل شنهو الي ببالج؟ هم شفتي مصطفى اليوم؟ -لا، شفتك مرتك الجديدة. -اهاا، يله سهلة. ذني ملابسج غيريهن يا غزل، إذا شفتج جدام أي كائن يكون بهيج لبس مرة ثانية أصلخج. -أوك هسه أبدل. -لا هسه تعالي بعدين غيري. رجع ضمني لحضنه يلعب بشعري أخذله شوية كال: عليش واشمه اسمي ببطنج؟ -لبالي حتموت وتضل ذكرى.

-اهاا يعني عاملته وره ما انضربت؟ -امم. -لا واضح. -ما دا أجذب ولا تباوعلي هيج تره أمسحه. ما رد ابتسم، عدل راسه على المخدة وسحبني لحضنه خله راسه بركبتي ونام. اني شبعانة نوم بس ضليت مسايرته لأن ماكو طريقة غيرها، ضليت ألعب بشعره، لمن اتصلوا بي وكعد رد عليهم كال: يله نازل. كعد يمسح بوجهه، كام للحمام يغسل وجهه، طلع كال: كومي غيريهن لا تضلين بيهن لا يدخل أحد. -هسه بس صدك نسيت أكولك. -خير. -اليوم خطبني اثنين نسوان.

-وانتي كيفتي؟ -لا ع كلتلهم عيب اني مرت مؤتمن، كالن يااا صغيرة مبينة بكد بته. -امم وبعدين؟ -شنو بعدين؟ شنو انت ما تغار؟ مرتك خطبوها شو تحجي وياي باستهزاء؟ هز ايده وطلع ما عبرني. شنو هذا؟ بس والله وراك وراك إذا ما رجعتك مثل قبل وأركعك بوري بسيطة. رحت غيرت ملابسي وخففت مكياجي ونزلت لأن أصواتهم وغناهم يجنن. نزلت ركض لكيته صايرة هوسه، رحت للمطبخ أشوفها كلها مخبوصه، عمتي صاحت: كعدي سوي لفات ويه البنات بسرعة.

-يا عمة يا لفات؟ مو جايبين حاضر بعد شنو؟ -لا ما يكفن جابوا بعد، كعدن لفنها. -تمام، وين سماح؟ سمر: بغرفتها مسويتها مناحة. -وين مؤتمن؟ -راح يمها شكد ضل يقنع بيها بس هيه كلبها محترك. -خطيه. أم مكرم: منهو الخطية؟ مؤتمن لو بنتي؟ -لويش مؤتمن؟ طبعاً بنتج. -لا والله ابني، أخيي الي انشلع كلبه ساعة فوك يرضي بيج نزل لكه هاي كالبها مناحة. -لعد منو كله يتزوج؟ والله يتحمل غصباً عنه.

-أوووف لو موش عقلج الصغير جان هسه الكل مرتاح بس شنكول، الله يهديج. -انتوا لويش كلكم محمليني المسؤولية؟ صاحت شعشبونة: كافي ولفي بسرعة، مال أنلفج بجفن إن شاء الله. همست: كون انتي وصبوحة إن شاء الله. خزرتني عمتي أم مكرم سكتت. كعدت ألف وياهن، خلص الأذان واشتغل الرمي وبدت الحفلة، ركضنه للسطح صعدنه نباوعلهم، الحنة جانت تخبل بس مؤتمن أبد ما فرحان، ما أعرف هو هيج ديزاينه ثكيل، كوه تطلع الضحكة منه لو اكو شي؟

مصطفى ركص لمن الله كله بس هو ومكرم، وصلوا للجوبي راحوا سحبوا مؤتمن كوه وياهم، لعبوا شوية تركهم ورجع مكانه. همه كملوا، شكد جانت الحنة فد شي خيالي تختلف اختلاف جذري عن حنة النسوان الي ما بيها بس نگه وهوسه. واكفين نباوع وصعد راسه مكرم شافنا من السطح أشرلنا ودخل جوه وحنا صرنا طشار كلمن بجهه، ركضت نزلن كلهن. اني ضليت فوك بين ما كمل رزالته وطلع، نزلت رحت لغرفة سماح لكيته لافه راسها ونايمه، رحت يمها كلتلها: كاعدة؟

-فتحت عيونها حمر وتبجي. -لويش هالبجي يا عيني؟ -ولج مؤتمن راح، أنسيه بعد. -لويش؟ هياته ديركص وين راح قابل؟ -غزل هاي تهاني يعني الشر، هاي جايه حاده سنونها وحبها من الصغر، تدرين إذا مؤتمن رجع لذيج الأيام الها احنه انتهينا. -ما راح يرجع لا تخافين، عمة تكول حب مراهقة وعناد بأهلها لأن ردوا هيج صمم ياخذها. -غزل انتي ما تعرفين شلون عايشين هنا، ولا تعرفين شنو هاي. -أعرفها، سحارة مثل أم مؤتمن.

-عفيه، يعني إذا ما ردته بكيدها ترده بسحورها. -عادي خلي تاخذه. -استغفر الله هاي شنهو تحجين وياها؟ -انتي بس كومي ولا تبجين، واني أخربلج ليلة عرسهم وأطيح حظها لمن أهججها. -غزل سكتي رحمة لأبوج. -والي تخربها شنو تنطيها؟ بس كون الله لا ينكلب غول واني أعرف شلون أخلي يجيني. -والله يا غزل لا تكدريلها ولا راح تعيشيلج يوم براحة ما طول راح تدخل.

-أوك هسه انتي مالج شغل بس كومي خلي نتونس الأغاني حلوه، هاي أول مرة أسمعهن واني أخذلج ثارج. كوه قنعتها وكومتها بس بعدني لحد الآن ما عندي فكرة شلون أخذه باجر وأخرب عليهم. طلعنه، عمتي جانت كاعدة وخاله ايدها على خدها خطيه على بتها، من شافتنا واني أشرح لسماح شلون راح أخلي تهاني تكمز وهيه تضحك رد الدم بوجهها، كامت اجتنا كالت: يمه شلون صرتي؟ -كلشي ما بيها عمة، هاي عيارة تره. -الله يخليكم يا عمة طلعيها وياج، لا تخليها وحدها.

-امم ما خلصوا؟ -ودوا اللفات يعني خلصوا. رحنه كعدنا على الدرج، اجه ببالي هو اليوم يمها، كلتلها سماح: اليوم سوي روحج زعلانة ولا تخلي يجي يمج. -لا تخافين هو ما راح يجي أصلاً. -تمام بعد أحسن، خلي حامي لباجر. -غزل شناوية؟ مال يعوف عروسته ويجيج شيليها من بالج. -تمام باجر نشوف. دنحجي واجه مصطفى كال: هاي يا الثولات راح رجلجن بقيتن مثل الأرامل. -عوفك من رجلي وأنطيني هاي البراسك. -ولي غزل عندي شغل، بعدي من يمي. -لا عفيه حباب.

-غزل خويه ولي، اكو وحدة بغرفتي روحي أخذيها. -أوك بس انتظر علمود تسويها الي، إذا تحركت ألطمك بالكاع. -شنهو ولج؟ كالها وجرني من الغترة. -آاااي شعري، غير أنتم تكولون هيج؟ -وانتي تسوين نسخ ولصق لحجينا بدون لا تفتهمين شنهو؟ -آسفة يعني هاي غلطة. -روحي بويه خبله ما عليج عتب. ركضت لغرفته جبتها واجيت كلتله: هاك سويها يله. -ذاك رجلج روحيله. -لا عفيه أنت. -بويه بعده ما تزوج حالياً، بعد يذكرج، أمشي اجفيني شرج. -لا لا حباب أنت.

دار وجهه وصاح: مؤتمننن. اندارله مؤتمن وأشر: شكو؟ -تعال خلصني من العلة مالتك. اجه مؤتمن ما يدري شكو، وصل كال: شنهو بويه؟ -سويلي هاي مثلكم. هز ايده شافني برطمت كال: تعالي أخذها مني ولفها على راسي، صار قريب عليه، راد يضبها من وره ما انداريت، تعمدت أصير قريبة من حضنه وهو يلفها اجه عطره بداخلي غمضت، همس يم أذني: لا تلعبين وياي غزل. -شنو دتقصد؟ ما رد بس ابتسم، عصر خدودي وغمزلي وراح.

رجعت كعدت يم سماح، همزين الولد ممنوع يدخلون للبيت بس ولدنا ومخبوصين بالنقل يطلعون صواني بره. مرت ساعة وهمه بعدهم، اجه مصطفى وأحمد كعدوا مقابيلنه على الزولية، رحنه يمهم كعدنا، اتمدد مصطفى كال: اشتعلت شتك مؤتمن انت تعرس واحنه نبتلي. -مصطفى. -ها خويه. -يكلي لا تلعبين وياي شنو يقصد؟ -منهو مؤتمن؟ -امم. -لا يا نغل عرفج موش انتي ثوله مفضوحة. -لعد شسوي؟ -ربي من خلقتها معقوله نسيت تنطيها عقل؟ -يووو مصطفى. -أمري. -شنو أسوي؟

-ولج لو عندي نص شكلج أفره فر بس انتي رب الثول، إذا بيج حظ من صدك وأكول عليج مرة حوك، خربي علي ليلة باجر. -هو اني أريد هيج أسوي بس ما أعرف. -انطيني مجال هسه أدبرلج شغلة. ضليت أمتانيه شنو راح يدبرلي، اجه مكرم هم اتمدد من التعب، مؤتمن يم جدي، اجن البنات كعدن، حجيت بصوت عالي: صدك مصطفى اليوم خطبوا هيفاء وعمتي كالت خوش ناس، حضر روحك للعرس الجاي. -لمن أحضر روحي؟ شنو أركص بعرس أختي؟ شو انتي موش بس ثوله طلعتي.

-لا يعني حضر روحك للطلعات، لعد شلون تجهز؟ -اهااا سهلة، خلي يجي والله كريم. -لا ع همه كالوا وره عرس مؤتمن نجي. أباوع لهيفاء صافنة لأن جذب بس ردت أشوف رد فعل مكرم الي جان متمدد وكام كعد، أول ما خلصنه حجي عنها كام راح من يمنه بس مبين أحواله مخربطة، أول ما طلع من باب البيت كفز مصطفى جرني من الغترة كال: كلتلج صيري أصخام مو تبلشين بأختي. -آااا مصطفى شعري عوفني. -لج قندرة حسبالج ما أعرف جذب؟ هالمرة كلتلها مرة ثانية تنطكين.

-ولك شعري، مؤتمننننننن آااا ولك هدني. -غزل لعبي ويه مؤتمن، مالج شغل بالباقين اسمعتي؟ -أيي هدني ميخالف. هو جان كامشني من الغترة وشعري سوه مسحوله واني أسحب بيده، اجه مؤتمن وكف صفن علينه، وضعنا همزين أحمد كاعد جان فكر غير شي كال: شصاير؟ -شنو شكو؟ ما تشوفه شلون سحلني؟ مصطفى: غزل لا تخليني أكوم أسحلج بالصالة انكتمي. -سمعت مؤتمن هاي كدامك. -لج سكتي لا أكوملج أطيح حظج. -عاااا مؤتمن ما تحجي؟

ما رد هز ايده عافنه وراح، أصلاً ما عبرنه. خرب الغترة وكام ما أعرف شلون أسويها، أحمد مثل الأثول مو يمنا متمدد مدري ميت شو ماله صوت. كمت رحت يم الباب البره يمهم وهمه يلمون بالكراسي، لكيته مكرم يشيل ويشمر حيل بالكراسي، ضحكني إذا تحبها لويش ما تاخذها؟ استغفر الله عائلة غريبة ذولة. دخل الكراسي صرت بوجه امنعه كال: غزل بعدي خلي أدخل. -لويش ضايج؟ -بويه بعدي لا تتعوين غزل، موش لعبة هذا، روحي شوفيلج شي التهي بي.

-امم صح مثل أروح يم وحدة كاعدة تبجي على واحد ما معبرها. -منهو هاي؟ -وحدة بس شنسوي للعالم البلا إحساس. -بغلاة أمج صدك تحجين؟ -إذا انت هلكد تحبها لويش ما تخطبها؟ -ما ينطوني. -منو ما ينطيك؟ تره مؤتمن حاسبك أكثر من أخو. -أي حاسبني بس من توصل للنسب ما يخلي ايده بيدي. -لويش؟ -بعدي غزل خلي أدخل. -تره جذب محد خطبها. -شنهو ولج؟ -والله بس ردت أشوفك شنو حتسوي. -هسه من ألطمك بالكرسي اكو أحد يكلي عليش؟

جان شايل الكرسي يريد يضربني بي. ودخل مؤتمن كال: بويه شبيج ما تركدين انتي؟ كل شوية ألكه واحد طاكج غزل بنيتي استجني. -تره همه يتحارشون بيه. -استغفر الله بعدي منا، خلي الولد يدخلون الكراسي. -هسه دا أساعد مكرم خطيه وحده. بقيت يمهم مكرم يناوش ومؤتمن يأخذ يسفط واني بس أحسب وكل شوية أغلط ومؤتمن يعصب يكلي عيدي، كملنا طلع نقص واحد، مؤتمن ما واثق من حسابي وكف يعيد حسابهن.

اجه مصطفى كاله: وانت ما لكيت غير هاي الثوله المكوكه عكس تعتمد عليها؟ رد مؤتمن مضيك عيونه: شلون مكوكه عكس؟ -يخوي أدزها على شغلة تسويها مكلوب. -شنهو جاي دبرون انتوا الاثنين؟ -شدبر خويه؟ دخلي تثبت بالأول لا تنكسر وتسويلنه مصيبة بهالليل. -همم اطلع مصطفى كمل البره ولم باقي الغراض وانتي يلا على غرفتج، ما أريد أشوف جهرتج هنا.

رحت صعدت للغرفة دخلت وقفت الباب، غيرت ملابسي وشمرت روحي ميتة تعب، نمت واني أفكر شلون أخرب ليلة باجر وهذا الحمار كلشي ما كلي. عزااا بس لا ما تخرب، غير أنط وأموت إذا تهاني فازت يمه كلبي. نمت واني ألف فكرة براسي شلون أنفذها باجر. فزيت على صوت الدمام الصبح، كعدت متكسرة، كمت أتمغط رحت للحمام غسلت غسل مضبوط، خلي أشوف شنو حسوي اليوم ويه مؤتمن، طلعت نشفت شعري وبالي كله بي. بس هذا ما ينغلب مو وحدة مثلي ثوله تجي تضحك علي.

بالي مشغول شلون حدبرها، كملت مكياجي على السريع ولبست شلت شعري خليت شال وطلعت، لكيت مؤتمن كدامي بالغرفة مالته واكف يعدل بساعته، كلبي عصرني وهاي مو أول مرة أحس هيج إحساس، لويش الشي البدينه ما نحس بقيمته لمن نفقده يالله نكتشف شنو ضيعنا. إحساس غريب جان غيرة على ندم شي فقدته من ايدي. رحت وكفت بالباب كلته: صباحووو. شال راسه وابتسم أشرلي: تعالي.

رحت يمه فتح ايده دخلت بحضنه، جان شعور حلو وبنفس الوقت خفت منه، أخاف أتعلق ويرجعلي السويته بي. شلت راسي باوعتله وهمست: -مؤتمن بعدك تحبني؟ -شتكولين انتي؟ -ما أعرف، أذيتك هواي مو؟ ما رد بس رجعني وشدد حضنته حيل باسني من راسي كال: شتردين غزل بالضبط؟ -ما أعرف. -هاي الـ "ما أعرف" مالتج تخوف. -لا والله دا أحس كلبي يوجعني. -عليش بويه؟ -ما أريدك تحب غيري. -حيل كلش متأخرة جاية. -يعني حبيتها موو؟ كلتها ونزلت ادموعي.

مسحهن ودنك باسني: الكلب ما ياخذ بس وحدة بس كون على الله تستاهل. -يعني شنو ما فهمت؟ -ما يعتاز تفهمين، يلا ننزل نتريك ورانا جثير شغل. نزلنا جوه حضرنه الريوك بس ما أشتهي، أحس نفسي مسدودة، ما أعرف لويش بس راسي مطبل يمكن من هوسة البارحة. لو من شفته داخل غرفته حسيت بالغيرة، هذا مالتي اني اتخليت عنه وخليته يروح لغيري، اني البارحة ما بيه شي وأضحك على سماح، لويش هيج دا أحس؟

ما تخيلت روحي راح أشوفه بغرفتها وراح أضوج هيج أو أحس هيج إحساس، كلبي مقبوض. غزل وين انتقامج؟ وين كرهج إله؟ شنو التبدل وهيج كلبج يدك؟ لو لأن شفتي راح لغيرج وما عبرج؟ متعودة همه يتوسلون ويجوج؟ أي يمكن لأن شفته عافني وراح لغيري هيج دا أحس. أوووف يا ربي شنو الديصيرلي. وخر صفنتي مكرم وهو يكول: غزل ناوشيني دبة الماي. انطيته المي كال: خويه بيج شي؟ -هئ.

-خير إن شاء الله غزل بويه، أي شي تعتازيه ما يردج غير لسانج، اعتبريني أخوج موش ابن عمتج. باوعتله وما رديت أحس روحي مقبوضة. -غزل خويه وضعج موش طبيعي، بيج شي احجي. -ما أعرف أحس روحي تعبانة والدنيا تفتر. -كومي أخذج للمستشفى. -لا حنام شوية هسه أرتاح. ردت أصعد شفت روحي ما بيه حيل، دخلت غرفة بيبي لأن الولد طاشين بالصالة بس هاي الغرفة ما بيها أحد، دخلت لكيت عمة أم مكرم تسبح كاعدة عالسجادة، رحت يمها بدون

لا أحجي خليت راسي بحضنها: عمة راسي دايخ. -شبيج يا عمة؟ -ما أدري بس تعبانة، اقريلي شي مثل ما تقرين للبنات. -أكلتيلج عين من البارحة تطفرين وانتي مصلخة، أركدي يا عمة أركدي. -عمة راسي حينفجر. كلتها وشهكت. بجيت مو من راسي بس كلبي وجعني، ما أعرف شنو صارلي من شفته بالغرفة مثل السحر ودخل كلبي، اني نمت بليل ما أفكر بي، فجأة هيج صار بيه. سمعتني أشهك. -يا ع اسم الله يا عمة شصابج؟ بيبي.

صابها الوجع ما بيها شيء، بس تريد تشغل صاحب العلة، حسبالها ما أعرفنها، والله يا غزيلان لأجسر راسك وأحبسك بالحمام بس أسمع نفس منك. أم مكرم: يمه دتركيها، ما تشوفينها مريضة؟ -ما أكون صدق والله ياخذها. ما ردت عمه، خلت إيدها على راسي وبدت تقرأ آيات، غمضت عيوني، أريد أشيله من راسي، أدري بروحي راح أتعب إذا ضليت أحس هيج إحساس. أنا مو كدهن ولا أقدر أتعامل وياهن، إذا حبيت مؤتمن راح أعاني هواي، بدون حب وجايبتها كوه.

انفتحت الباب ودخل جدي، شافني ما حكى بعد، ضايج بس شفت بعيونه القلق. ردت أقوم لأن ما أريد يتضايق من وجودي، قال: لا تطلعين، الزلم صعدوا لغرفة مؤتمن، خليك هينه. رجعت كعدت ما حكيت. أجه يمي قال: إشمالك يا جدي؟ -ما بيه شيء بس تعبانة. -أخلي الولد ياخذونك للمستشفى؟ -لا جدو ما بيه شيء، هسه أنام وأصير زينة. بيبي: كل شيء ما بيها، أصحه مني، عساها بالسل. -بسك يا حرمة، فوتي بحال البت. -ياع اسكتني لخاطر هالصفر.

-يبووي تركي البت بحالها، خلي ابنك يرتاح بكبره، الله أكبر. سكتت بيبي وهو غير ملابسه وطلع. رجعت راسي على رجل عمتي، قلت لها: شو جدو صاير حباب. -عليش يمه؟ جا هو إشوكت مو زين؟ تراه قلبه حنين. -أمم كلش من قال لمؤتمن اذبحها. -إي ويعرف مؤتمن بسرعة حد سنجته وذبح. غزل المثلج بديرتنا تنجتل، احمدي ربك طحتي بيد جدك ومؤتمن. -أمم خو مؤتمن من كثر حنيته، قمت أوزع للجوارين. -منو يتصور مؤتمن يأخذ بنت فريال وروح أخوي؟

لو قايلينها بذاك الوقت جا قلت الحكاها مسودن. أووف احمدي ربك يا عمه من زرع حبك بقلبه. -يجي يوم وأعرف السر الضامي. -ماكو أسرار يا عمه، بس مؤتمن كثير قست عليه الدنيا، ترى أكثر واحد انظلم، شاف أشياء العقل ما يستوعبها. يمه نصيحة محد راح يحميك ولا واحد يقدر لهم غيره. خليك جوه جناحه، لا تعلين قلبه، تراه ملجوم كثير. -يا يحميني عمه؟ ترى شابعني ضرب.

-لو ما واجعه قلبه ما يجيسك. يشوفك نافرتيه وهو محتر قلبه، يخاف تروحين من إيده، تراه يعشقك ومتسودن بيك، بس أنتِ الله يهديك ماكو عقل. إنسولف ودخلت عمتي تسأل بيبي على الزفة وعلى دجاجة فدوه للعرس، ما أعرف شنو. باوعت لي قالت: إشبيك يا المصخمة؟ -ما بيه شيء بس دخت. -ولج أخاف حبله؟ -لا عمه اليوم غسلت ما عندي شيء. -تجين للزفة يا المصخمة؟ -إي بس خلي أرتاح اشويه وأقوم أبدل. -لا خليك، شكو جايه؟

ما عندنا مكان زايد، خلي الولد فرحان بعرسه، لا تصخمين بجهرتك تالي تطقين عين. -من حسن ابنك وأحسده؟ لو أبيض جان إشسويتي؟ -تروحين أنتِ وأمك فدوه لسماره وطوله وهيبته. -لحني عمه وكعدي بصف صبوحة، سون دويتو. بيبي: ياع، البت تغلط. -لا بيبي هذا دعاء للعافية. عمتي غمتني وطلعت. وأنا غمضت. انفتحت الباب، قلت لها: بيبي غرفتك على حظي صارت مزار. -انكتمي يا بنت فريال، اقطعيه مثل أمك، تفو عليكن. سكتت، قمت نمت على قريولة جدو.

أخذتني النومه للظهر، فزيت على صوت هلاهل. كعدت، هاي إشقد نايمه؟ الغرفة ظلمة ومحد موجود. قمت طلعت لقيت الكل متحضر والزفة تريد تطلع. صدق أنا هلكد نمت! نزل مؤتمن من فوق يضحك هو ومكرم وأحمد. والهلاهل اشتغلت، جان لابس قاط أسود وقميص سمائي، مدنق يعدل بساعته. قلبي وجعني من شفته، ليش ما كنت أشوفك بهالشكل؟

رجعت للغرفة، ما أريد أشوفه ولا أخليه يشوفني، ما أريد يحس بضوجتي. كعدت بالغرفة، ما أروح للزفة، على شنو رايحه أشوفه إشلون يطلعها من بيتهم معززة مكرمة وأنا جابني سحل وكتل لهنا. أتذكرت إشلون عقدني بالكتل، أحس روحي اشتعلت نار ودموعي تنزل. لميت رجليَّ لحضني، مؤتمن أنا أكرهك، إي أكرهك، ما حبيتك عمري، بس ليش هيج أحس النار مشتعلة بقلبي؟ شنو التغير؟ انفتحت الباب، لبالي هو. مسحت دموعي بسرعة، شلت راسي لقيت مصطفى كدامي.

دخل يضحك قال: ها يا النجرة، طحتي؟ -هئ. -لا مبين. -ليش ما رحت للزفة؟ -منو قال لك ما رايح؟ بس أطلع وراهم، بين ما يجيبون المرة أنا أطلع. -آها. -إي غزل، شنو الجديد؟ -ماكو شيء. -غزل لا تضحكين على روحك، أنتِ قبل لا تروحين تحبيه، وقلت لك ونصحتك بس أصريتي. -ترى مو بحاله ولا خالته ببالي، غلطان بس شوف إشلون مسوي لها عرس وأنا إشلون جابني. -عادي رديها إله وخربي ليلته الأولى مثل ما عمل بيك.

-إشلون وهو مستعد ورايح، ضحكته واصلة للشارع الثاني؟ -والله بعدها اللعبة بيدك، تقدرين تقلبين الموازين. -إشلون؟ -بالنسبة لليوم بيدك. صار ساعة أشحن بيه، قلت له مريضة وعلى آخرها وراجع آخذها للمستشفى. -أكيد كيف مو؟ -تريدين الصدق؟ راد يعوف الزفة ويجي يشوفك، كوه رديته، قلت له أنا رايح لها لا يضل بالك. -من إشوكت هالحنية؟

-شوفي غزل، مال حب وغرام وسوالف عشاق ماكو يم مؤتمن، ذني كلهن طمامة بيهن، أنطي دواوين وعركات ومطاقق يطلع بزوده. هسه عوفك منه وحضري روحك. -يعني شنو أروح للمستشفى هسه؟ -ربي منين اجت هاي؟ ولج بويه من يجي من الزفة راح تروحين غرفتك، وأنتِ وشطارتك بعد، هاي يمك ظلت. افتهمتي لو أجيب لك أمي تفهمك؟ -أوك فهمت. -عفيه، هسه راح للزفة وأنتِ استعدي. -تمام بس ليش دتساعدني؟

-لأن أختي أنتِ وطحتي بيد ناس ما تستاهلك. بس شغلي عقلك، ترى الطوبة بيدك والملعب فارغ، شوتيها عدل. قالها وقام طلع. رحت للغرفة ركض، أريد ألحق لقيتها كلها رايحه للزفة. دخلت للحمام عدل، غسلت. طلعت حضرت روحي، ميكب مضبوط. طلعت قميص نوم حلو لبسته، عدلت شعري. أتذكرت الحب، أخذت وحدة كملت وضليت أفكر شنو حسوي. قلبي يدق والله أخربها على تهاني، أخربها ما أخليها تتهنى.

أباوع للساعة وأفكر إشلون راح أخليه يبقى يمي وأموتها قهر، ترتكبين على ماما وتخليه يطردها، مو تهاني أم السحور؟! بسيطة ما ضل شيء. سمعت الزفة اجت، ركضت لبست قلبيتي وشال وطلعت وكفت على الدرج تانيته يدخل، أريد أشوف شكله وهو زافي إشلون، بلكي قلبي يقتنع ويعوفه. أسمع الرمي اشتغل. دخل من الباب ساحل ورا الصخلة هي وبدلتها الضلت بنفسي ألبسها. ذبح مصطفى جوه رجليهم دجاجة. دخلوا، وصل للدرج ديصعدها، اتفاجأ بوقفتي.

كوه عصرت روحي علمود لا يبين عليَّ شيء. ما حكى، صعد وساعدها تصعد والهلاهل والجكيت مستمر. صعدوا وصلوا يمي، سويت له مجال يتعدى. دخل لغرفته وسدوا الباب. أحس قلبي وكف. رحت لغرفتي، قلبي مشتعل نار. دخلت، دخلت وراي هيفاء قالت: غزل بيك شيء؟ -أريد الفون مالك. -موش مؤتمن ما يقبل. -هو أريد أخابر أصخام، انطيني إياه. أخذته،

قلت لها: طلعي. طلعت. خابرته، رن إشقد ما رد، أكيد ملتهي وياها هسه. رجعت اتصلت هم ما رد، شنو بس لا نام وياها شبسرعه؟ رجعت دقيت رد قال: ها خير؟ -مؤتمن تعال. -خير غزل؟ -مؤتمنننن هسه تجي لا والله أشمر روحي من البالكون. -بويه إشصاير؟ -داقول لك تعاللللل مؤتمن لا تخليني أكتل روحي. سد الجهاز، شنو لباله ما أسويها؟

سهلة. فتحت الباب، رجعت الفون وسديت الباب حيل بكل قوتي. رجعت آكل بأظافري، ما راح يجي أكيد، طبعاً شافها أملونة إشلون يعوفها؟ انفتحت الباب، دخل عاقد حاجبه قال: إشصابك؟ -اتزوجت وجبتها لهنا، خلص ما تروح بعد يمها. -والله حسبالي بيك شيء، روحي بويه الله يهديك. -والله يا مؤتمن وروح بابا إذا طلعت منا أشمر روحي من البالكون. -غزل بويه لا تسودنيني، شتريدين؟

-ما أريد شيء بس أريدك تحس باللي سويته بيه. شوف روحك شنو سويت لها وإشلون جبتها وأنا إشلون، فوق هذا تقول لي ليش تكرهيني؟ قلتها وبكيت. أجه يمي ضمني لحضنه، دنق باس راسي وقال: عليش البكي يا بويه؟ شتريدين؟ -تبقى اليوم يمي. -غزل ما يصير، العالم منتظرتني. -والله يا مؤتمن وكتاب الله إذا رحت يمها أكتل روحي. عود بذاك الوقت هم كلهم لا أحد يغسلها، أغار أنا أغسلها بيدي، ضل ظالمني حتى بموتي. -إششش شنو هالحكي؟ منو جان يمك غزل؟

-ترى أنا مو حيوانة وفاقدة الإحساس، واحد يعلمني جاي فرحان وصار يومين اتعدل بروحك ولابس قاط ورايح لها ميت عليها. تذكر لو أذكرك إشلون جانت ليلة زواجنا؟ -استغفر الله، إشلون إطلابة هاي؟ دفعته وقلت له: روح مؤتمن، بس لا تجي تعتب على اللي راح أسويه، روح عروستك امتانيتك. كعدت على الجرباية. أنا متعجبة على روحي منين جبت هلكد دموع وإشلون أشهق.

سد الباب وأجه يمي، حتى سترته بعده ما نازعها. نزعها وخلاها على الكرسي وكعد يمي، خلاني بحضنه. شنو اللي رديتيه غزل؟ -تظل يمي اليوم. -بويه ما يصير، باجر أجي يمك. -لعد قوم روح، شكو رجعت؟ بس والله ما راح أخليك تكمل اليوم يمها، إذا ما بيتك بالمستشفى ما أطلع غزل. -خرب بقسمتي الكشره، عليش تخليني أربطك وأطلع؟ ما رديت ظليت أبكي. مسح وجهه يريد يهدأ. نزع حذاءه وسحبني قال: تعالي نامي، هدي اشويه، خلي أشوف قسمتي وين تصفى.

اتمدد وخلاني بحضنه على الأساس أنام ويروح يمها، والله بطران، غير دخلت لغرفتي بعد ما تطلع للصبح، والله على جثتي. لباله مثل كل يوم اشويه وأغفى، غير اليوم شبعت نوم. خاله راسي بحضنه وبالي تهاني إشلون هسه كاعدة منتظرة. كوه كامشة ضحكتي، ما أريده يحس. شلت راسي باوعت له: مؤتمن تحبها؟ -منو؟ -عروستك. -أهوووو غزل نامي بويه. -بس أنا مشتاقة لك. -موش وكتها نامي.

وخرت إيدي وتجرأت بسته من شفته وهاي أول مرة أسويها. رجعت عضيته على كيفي، يوميه أشبع سحل وكتل يالله. أخلي اليوم جايته برجليه، هو بنفسه ما مصدق اللي يصير. والله صدق الغل تعمي وتخلي الواحد يتصرف تصرفات خارج عن العقل. كعدت ذبيت الكلبيه، هو صافن شنو دأسوي؟ رجعت له خليته يتيه دربه. -الساعة بياش؟ -ما أعرف ليش دتسأل. -أذن لو بعده؟ -هئ يمكن بعده، لا تتحرك مؤتمن. -يا به منو اتحرك؟ ما تشوفني مسموط أبوي مثبور يمك.

شلت راسي: قصدك يعني أنا بلوة وأنت مبتلي بيه؟ ضحك وقال: أحلى بلوة وعلي. سحبني رجعني لحضنه. حسيت بيه يريد يأذن ويقوم يسبح ويروح لها. رجعت كررت وياه نفس اللي بديته، خليته ينام للصبح جفي على وجهه من التعب. كعدنا على الفون يدق، فتح عيونه كوه، شال الفون ورفضه. قام راح للحمام يسبح، طلع لبس ملابسه وأجه يمي باسني وقال: طلعتي الغل اللي بقلبك، خلصنا لو بعد؟ -أممم قلتها وضحكت. ضحك على ضحكتي وعفس خدودي، رجع باسني وطلع.

قمت والفرحة ما سايعتني، كلي نشاط، صح انسلحت اشويه بس عادي أتحمل لخاطر تهاني تستاهل. رحت سبحت ولفيت الخاولي، أسمع الهلاهل والضرب، يمكن نزل مؤتمن. خرب بحظي، يلا المهم عرس ما يهم أي وحدة. طلعت بوجي أنا وخاوليي على غرفة تهاني. لقيت الباب مفتوحة. دخلت عضيت شفتي، أكتم الضحكة. لقيت الحبّابات كلها مجتمعة يمها، هي كل عين إشكبرها، مبين الليل كله تبكي. بيبي كل نفخة تنفخها يمكن إذا لاحتني كبل للكبر، وأمها يمها هم تبكي.

-عزااا إشقد فشلة ولجن تبجن على رجال؟ يلا المهم صباحووو. بيبي: صباحك بالجفن. -عزززا إش قصدك؟ ترى صبحت بوجهه لا والله بحضنه. -قومي تهاني كضيها وجيبيها ليَّ أدوس راسها. -مؤتمننننن تعال راح يكتلوني. -بنت فريال ناوية شر مثل أمك، اتعلميني بيك. -يا شر بيبي؟ هو لطش يمعود، عروستك خطية قال ما أقدر مشتاق لك. حبيبي روح وباجر تعال. قال: أموت إذا طلعت منا. إشلون تريديني أخليه يموت؟ لعد منو يصير شيخ عشيرتكم؟ -آآآآخ ولكم كوضوهاااا.

اجت سماح تركض جرتني تريدني أطلع، قلت لها: بالمبارك. وسحبتني. -ترى المفروض تقولين لي أنا لأن البارحة عندنا ليلة عرسنا. -غزل كافي طلعي. -بس لحظة صدق السخان ما يكفي، إشقد دأقول له جيب واحد أكبر ما يقبل. بس يلا انوب أنا أسبح بحمامي وأدزه يسبح يمك، أحسن ما باقي المي هيج حرمات. سحلتني سماح لأن تهاني شاطت و بيبي قامت وبيدها العصا ما اتحملت. ركضت للغرفة دخلنا. -ولج والله وطلع بيك البله، إشلون خليتيه يمك؟ -لعد إشعبالك؟

تريديني أعوفه لها؟ بس إشلون؟ خو سويتها صح، عظامي اتحطمت بس عادي. -لا والله بيك حظ. هسه أسوي لك حليب يدفيك وتردين أنشط من قبل، تستاهل لعيون تهاني. -خليها علمود تعرف ويامن تحكي مرة لخ. بس مؤتمن من نزل هم ضايج لو عادي؟ -لا والله الضحكة تارسة وجهه، حسبالي يمها لمن صعدت وشفتها تبكي عرفت ما نايم يمها. تنحب تقول راحت حنتي وليلة عرسي اثنينهن. غير اجيت أطفر وأجي أحبك بحلقك. -عيع كافي رجلك ولي منا.

طلعت غيرت ملابس ولفيت شعري، خليت الشال ونزلت. لقيت عمه أو شعشبونة بالأصح محتارة تمشي وتسولف ويه روحها. صحت: ها عمي إشصاير؟ -ولج يا عمه باقنه راح يروح بيها ابنيي. -شنو عمه؟ -راس الدجاجة ما أدري وين اختفى. -عزا هو راس دجاجة شكو مخبوصة؟ -ولج يا غبرة هذا يسوون بيه سحر، هسه يسقطون ابني بيه. -ياااا لعد وين راح؟ -دولي من البارحة ما نايمة أدور لسه وجايتني الفاهية تقول وين راح.

عافتني ومشت. دخل مصطفى يضحك أشر لي، رحت أركض أشوف شنو يريد. -ها صافو؟ -هلا بأختي الحوك، هلا بنت الذيبية، والله وطلعتي مرة من صدق. ولج خليتيهم طشار الصبح مخبوصين، دخلوا لغرفة وطلع من الثانية. يا بوي غير انشقت بطني من الضحك. -عوفك من مؤتمن، راس الدجاجة انباك. -منو قال لك؟ -عمه دتدور راح تنجن. -خليها تتخبل. -مصطفى ليش دتضحك؟ أنت بايقه مو؟ -شعامل بيه أحنطه؟ بنت المنغولية لا تبليني. -وين وديته فدوه؟ وداعت ماما ما أقول.

-إششش ولج، شمرته بالمجري. خليها تتسودن، وأخاف تنسى كل اشويه ذكريها سمعتي؟ -إييي إشقد حلو اليوم ألعب على أعصابها. -يا غزل إذا واحد درى أنا اللي عملتها أشنقك وأشمرك ورا الراس. -يعع مالقيت غير المجاري؟ دشمرني بمكان بيه حظ. -هو هذا مكانك الأصلي، ويه الجريدية. صاحت شعشبونة: ولج غزيلان أصخيمان ما تروحين ويه البنات تساعديهن؟ مصطفى: وعلى أساس غزيلان راح تسويها بركنده؟ عمممممه عوفي غزيلان يمعود، شوفي الراس وينه.

-ولك يا عمه ما أدري، سودة بوجهي من البارحة أدور. -طلعي بره بلكي شامري بالمزرعة، روحي دوري. قالها وطلع. هي رادت تطلع اتذكرتني واقفة، اندارت قالت: يلااااا. رحت ركض للمطبخ قبل لا تعلق السمفونية مالتها. دخلت شفت عمه كوه كاتمة ضحكتها، مدنكة شالت راسها شافتني قالت: عملتيها يا بنت فريال. والله يا خوفي مثل أمك تطلعين وتسودنين الزلمة. -أقول لك عمه ترى أنتِ انطيتوني إياه من الأصل ضارب أفيوزه.

-وكملتيها أنتِ يا عمه، يا خوفي تطق من صدق ويطقكن بالرابعة. -والله عادي، هلا بيها تجي على راس تهاني. -غزل عمه، غسلي الاستكاين. للظهر وإحنا بالمطبخ، كرب مال حيوانات ومؤتمن ما شفته بالديوانية ويه جدو. انتهينا من تعب بين ما كملوا الغدا وغسلنا المواعين لأن روحنا طالعة. صعدت على السريع بدلت ونزلت. رحت لغرفة بيبي اتمددت يمها تعبانة. ناس رايحة جاية، إشقد عالم عدهم ما اجوا مثلهم بـزواج أحمد، مبين الناس تحسب له حساب.

اجت يمي سماح ذبت روحها وهيفاء سمر وباقي البنات صارت كعدتهن يم الباب. -ترى ماكو هيج هو يتزوج وإحنا نخدم. -قولي لروحك، غير خلصنا وفرحنا، رجعتيني للصفر. -إش دعوه هلكد عالم جايه؟ -غير مسوي واجبات والعالم تحترمه ويحسبون له حساب. -لو يشوفن هذا المحترمي البارحة تحت رحمتي إشلون جان ما اجوا ولا احتركوا. -غزل انضبي ترى أغار. -أمم مبين، لعد خلي يكمل يم تهاني لأن أنا أحبك وما أرضى تزعلين.

-لا بغلاة محمد غزل بديتيها، لا تخربيها مثل قبل، كملي خلينا نرتاح. بالعباس ما أغار منك جذب. -خليني أنام تعبانة حموت. دا أغفى وفاتن جوقة نسوان وبده السوالف سطرني وبيبي محرمة علينا نفوت لغرفنا. قامن البنات للمطبخ مرة لخ للجاي. أنا ما اتحركت، ظليت اتسنط. اشويه ونزلت تهاني كعدت يمنا. سماح ساكتة، أول ما قالت لها: قومي خلي أكعد. قامت ثول. اجت كعدت وأنا مددت رجليَّ على القريولة، صارن عليها. باوعت لي أشرت لها: شكو؟ -ماكو شيء.

-جان ضليتي بغرفتك. -غير عروس والناس جايه تبارك لي. -على شنو؟ المفروض يباركون لي أنا لأن أنا العرست البارحة. دقت العصا بيبي بالكاع. باوعت لها أشرت لي: طلعي بره. -ما بيه حيل بيبي، حفيدك سقطني. -غزززل انكتمي وطلعي. -ما هو أخاف أطلع وهم يلحقني وأطير بعد ليلة. شفتها قامت خفت أنضرب كدام النسوان وأتفشل. طلعت ركض، لقيت مؤتمن يم الدرج مبين أستوه داخل يريد لغرفة بيبي. صحت له: مؤتمن. -ها بويه؟ -تعبانة أريد أصعد. -المطلوب شنو؟

أجي أصعدك؟ -لا بس بيبي ما ترضى وحدة تدخل غرفتها وأنا والله ميتة تعب. -روح بويه لغرفتك، مالك شغل وإذا حاجوك شمرها عليَّ. -تمام لعد أنت وين رايح؟ -غزل ولي لغرفتك. صعدت وهو دخل، جان وقت الغروب. وصلت لغرفة تهاني، أسمع أمها تحكي بصوت واطي يمكن بالفون. ما أسمع شنو تقول بس لفت انتباهي من قالت: دير بالك كون بعد نص الليل، عفيه بالسبع.

عبرت غرفتها وصلت غرفتي. فتت سديت الباب. غيرت ملابس، لبست خفيف وشمرت روحي ميتة تعب، حتى العشا ما أردت، وهمه هم ما كعدوني بعد. فزيت على صوت حركة بالغرفة. أباوع هدوء والدنيا ظلمة تالي الليل. رفعت راسي، ما أميز شنو الصوت. مطفية الضوه بس أسمع حس أحد يمشي يمي. فتحت عيوني أريد أركز عدل منو دخل غرفتي. شفت واحد وصل يم راسي، جان ضوه قليل داخل من البالكون شبه مبين الرجال ملثم.

ردت أصرخ، خلى إيده على حلقي سده حيل وبإيده الثانية خلاها يم صدري، سحب قميص النوم بكل قوته انشق من طوله...