رواية كفي والمنجمه الفصل الثامن والثلاثون 38 - بقلم Leo Alfatlawi

كفي والمنجمه

بقلمي: leo Alfatlawi

بارت السابع والثلاثون***

اريد ارد مااگدر اتبنجت صاحت يلااااا

-زهراااء فدوه  بس سمعيني وخري السجينة فدوه راح تدخل بركبتي

-ششش صوتج اي حركه تنحرين نفس مااريدلج

-الله يخليج بس سمعي عيب الدتسوي والله غلط ومؤتمن يموتج اذا عرف  ااااخ زهراء ركبتي كلتها وبجيت لان دخلتها زايد

-صوتج سمعي لج الحمام بعيد لو اتصرخين لباجر محد يسمعج نزعي بدون صوت بس تعترضين اذبحج واطلع محد يدري

-والله يذبحني مؤتمن فدوه اروحلج 

-ماراح يدري بس طاوعيني وسكتي

-ولج يعرف والله زهراء عقلي بداعت ابوج والله نموت اثنينه مؤتمن ميرحمنا الله يخليج ولج اني من هالنوع لويش انتي مد تفتهمين

-اششش صووووتج 

اني الشهكه كامشتني اترجاها شكلها يخوف اتباوعلي بنظره مقرفه ولايمها  اشلون اتوسل وابجي

خلت الفون ابصفحتها ومد ايدها لقميصي جرته طكت الدكم ردت اكمش ايدها نبتت السجينه اكثر  همست  بس تتحركين اسحبها 

ايدها جانت اتحركها على جسمي بقرف دخلتها داخل صدري …صرخت بكل صوتي لان حسيتها مو بنيه

ضربتني بظهر ايدها ودنگ شالت الفون استوها تفتحه واندكت باب الحمام حيل صوت دعاء وسماهر يصيحن زهراءءء وحك علي يذبحج مؤتمن ولج فتحييي

اني ابجي واتوسل وهنه يصرخن بس مااكدر اتحرك شاله حركتي بالسجينه بس اتحرك ينكطع الشريان

دفرت الباب سماهر وصاحت اجت المديررره  ؛من سمعت المديرة ارتبكت كامت ضمت الفون كالت سدي دكمج واذا حجيتي اذبحج اذبحج متفلتين من ايدي

كعدت لميت روحي بسرعة ارجف  وهنه مخبوصات كسرن الباب وايصيحن فتحي

راحت جهة الباب فتحتها دخلن  وسدنه وراهن

اجت سماهر تركض كعدت كدامي صافنه كالت اشعملت

اني من الرعب العشته مااعرف احجي بس ادموعي تنزل وارجف دعاء واكفه تحجي واتصرخ عليها كامت سماهر جابت مي غسلت وجهي ودكمت قميصي

اجت دعاء دفعتها ردات تفتح القميص كمشتها خفت نفس اختها عتت ايدي حيل وصاحت

-بعدي لج  ايدج خلي اشوف شمصخمه بيج

سماهر- عوفيها يمعوده حتى لو مصخمه محد ينتبه هيه تضم السالفة

-ولج يامحد ينتبه هذا ذيب يعرف الجديد عن القديم انوب ننفضح شو لج خلي اشوفف

- وخري مالحكت تسوي شي  ذني قديمات مومنها

كمت سديت قميصي وغسلت وجهي جنت امقرره اطلع واخبر مؤتمن بالصار هو يتولاهن

وصلت للباب صاحت دعاء-شوفي ولج غزل اعرف شنهو براسج اخاف نيتج تكولين لمؤتمن   تره محد يخسر غيرج

-عود انشوف وروح بابا اذا ماخليتجن تندمن عالصار بس خلي يجي انتظري

-ضحكتيني باوعي لج اول شي مينطي بأبونا وحتى لو اجه كله راح يسترون على الشغلة ويلموها يعني انه اخذه وزهراء يشمرها على مصطفى يسترونه بيهم وانتي ياحلوه بعد ماكو مدرسة تكعدين اتخدمينه بعد فضيحتج شيلي مدرسة من راسج

-شنو انتن هم بشر

-اي حبيبتي بشر ويم اختي لاتوصلين تره حذرتج هاي تتحيون من تشوف وحده حلوه وانتي الضاهر خلتج براسها فبعدي احسن

- مريضات انتن مستحيل اسكت هسه بس اوصل اكوله وشنو يصير خلي يصير

-والله اكون ممنونه اذا اتكليله لان ابوي امغرك مؤتمن بجمايله ويطلبه اكثر من شعر راسه  مستحيل يخلي ينفضح اكيد يسد السالفة بزواجنا فياحلوه ياريت تستعجلين واتكليله

باوعتلها ضحكت بستهزاء و اجت دفعتني  وطلعت هيه واختها من الخوف والهبطه كعدت مكاني ارجف كعدت سماهر يمي تتوسل اكوم كمشت راسي

-ولج راح يرن الجرس  تنفضحين ومحد يتأذه غيرج ذني يطلعن منها

-لويش مو انتي دتسمعين روحي وياي نشتكي يم المديره

-مااكدر ذني خالاتي واذا سمع ابوي يبطلني ترا لاحسبالج راضيه على الي يعملنه بس مابيدي شي لاتنسين ابوهن شيخ وكلشي بيده

-شنو يعني هسه لازم اسكت ولج جانت بيدها فون

-اي هذا النقال رادت تصورج واتضل اتهددج بي لو تجين وتعملين  التريده بيج لو ادز صورج لزوجج وادبرلج تهمه

-يعني امسويتها قبل ويه وحده

-مااعرف احنه ابوي مانعه من الروحه الهم بس امي تروح لان يعرف بيها موش راحه ولج حتى  رجلج هم  انتبه كال لابوي وصلتهن واشوف وحده منهن اتباوع لمرتي بنظره انه اخجل اباوعلها بيها

-اي قبل كم يوم اخذناهن صدك جان يباوع بالمرايه واني لبالي يباوع لدعاء

-يادعاء هاي المزنجره هو العده مثلج هم اله  نفس  يباوع للمعفنه  ديلا كومي دك الجرص خلي نطلع

خلص الدوام واني احوالي تعبانه بعده الرعب بيه   كل مااتصور المنظر ترجعلى الرجفه يعني لوماملحكات عليه جان الله اعلم شنو حالي هسه

صار وقت الطلعة طلعت لكيت مؤتمن واكفلي اتعجبت اشجابه هذا وصلت للسياره لكيت تهاني كاعده يمه بعده وجهه منفخ  صعدت حتى ماسلمت

تهاني- السلام لله تره

مارديت انتجيت وضليت اباوع من الجامة بالي وين وهاي تلغي وين

-ماباركتيلي چاغير اخذت تحليل وطلعت حامل وراح يصير عدنه فرخ جديد

شافتني هم  ماريدت سكتت رجعت كالت والله مكانج خالي اشلون ونسه وغده يخبل اخذني مؤتمن مچان اتكول چنه

مؤتمن-  دخيييل محمد  اشكد تلغثين

-هسه شنهو حجيت

-اشلون اتخليني انزلها واسحك راسها بالتاير بسسسج ياغضب الله

درت وجهي للجام افتر مؤتمن اطلعها ونسها اريد اشوف شنو نهايتك وياي

عينه جانت بالمرايه كلما ادير راسي اشوفه يباوعلي لباله ضاجه لان طلعها

خليت راسي علي الجامة واباوع للشارع صافنه على حالي شنو عيشتي شنو ضامتلي الدنيا بعد

اباوع للشارع العالم تمشي هسه ذوله هم شايلين هم اشلون عايشين شنو حياتهم هم اكو مثلي هيج دولبتهم الدنيا وين جنت وين اجيت

قاطع تفكيري مؤتمن وهو يكول غزل بويه بيج
شي

انداريت باوعتلي بس مارديت رجعت راسي محد دمرني غيره دااحطم بروحي كوله بسبب خوفي منه لويش هسه محتاره المن اشكي ومنو ينصحني

رن جهازه رد كال بالطريج هسه نوصل واتصلي.

…لالا  …اشكد اتحلين دخيل ربج هاج اندار كال هاي امج وياج

اخذت الفون كالت ها ماما اتصل عليج صار يومين ماكو

ماكدرت احجي عربي ردت اخذ راحتي رديت بالغتي هيه افتهمت انو اكو سالفة ردت احجي ماما شصاير - بلشت احجي  ماخليت شي ماكلته  اخر شي كمت ابجي اريد تنصحني

-غززل ماما  لاتحجين كدامه شي هذا خبل راح يبطلج وتنكلب السالفة عليج

-بس ماما اخاف اروح للمدرسة بعد

-حبيبيتي روحي وخليج بين البنات لاتنعزلين مابقى للامتحانات هواي حرمات هم تروحين سنه عليج غززل اهم شي النتيجه اريدها ماما سمعي مني مو اتكولين اكو صديقه اسمها سماهر

-اي ماما

-اي حبيبتي حتى للحمام دخلي وياها اذا احتاجيتي لزكي بيها واتفقي وياها بيوم الي تاخذ اجازه خلي اتخبرج حتى هم لا تداومين

-لويش مااحجي

-يماما مثل ماكالت دعاء هاي اذا مومتفقات هيج يسون حتى تكولين لمؤتمن هم راح يبطلج وهم يجيبها ابحجت يسترها ويلم السالفة لخاطر ابوها مااستبعد جدتج دازتها

-يعني  هسه مااحجي حتى لسماح وهيفاء

-بنتي عقلي وافتهمي دااحجي وياج ترا ماكو عقل يستوعب الصار محد يصدكج بس يطلعون سالفة عليج موخوش ذني حيايه هسه اتسكتين وتكملين دراستج وتنتبهين خليج ابوسط البنات لاتبتعدين ابد ولج هاي حايكاتها سوه حتى يفرن السالفة لاتضلين تبجين كافي 

-ماما داكولج اخاف وانوب هذا هم لاطشلي بمرته ومصمم مايكسر جبروته ويحجي وياي اذا مااعتذر منه

-عوفي وقهري  بغير سالفة هذا من ذيج عملتج مسيتي كرامته يريد يردها بس مايعرف بأي طريقة ترا هو هسه هم متخبل كلما اتصل يسب ابتربيتج وينزل عليه فايض بي الشوگ ميكدر يضمه اكثر مفضوح بس كرامته مانعته

-يله حنوصل ماما

-مثل ماوصيتج هذا رجلج حگري والبنات لاتحجين بيهن وحضرهن من الفون اخاف هم يسولج سالف

-ؤك ماما  باي

سديته مسحت دموعي ورجعت الفون باوعلي اشرلي شنو الصاير

درت وجهي

تهاني- شفتهمنا هسه بس اتنعوص وماما وماما

مارديت رجعت انتجيت صح هو يعرف مختطفات انكلش بس مولغه كامله ماراح يلحك يفتهمها لان احجي سريع مأمنه من هاي السالفة

وصلنه كال لتهاني نزلي عرفته يريد ياخذني ويا لباله ضجت لان طلعها صح اني هم ضجت بس سالفه زهراء غطت على الصار قبل لا تنزل تهاني فتحت السيارة ونزلت

صاح غزل اوكفي بويه مارديت دخلت للبيت بسرعة

صعدت غرفتي وقفلتها حتى ميدخل وراي اني اله اذا ماتوبته من صدك واخلي يدوس على كرامته الخابصني بيها مااطلع غزل

غيرت ملابس وشمرت روحي على الجربايه من تفكير وتعب وقهر نمت ماادري بروحي للمغرب صح مرتين سمعت الباب يندك و الفون هم سمعته يرن بس ولااتحركت لليل كعدت شبعانه نوم

فتحت الفون لكيت كومه اتصالات منه عرفته لان مافتحت الباب ؛ يله خليني اشتغلك شوية اطلع الضوجه براسك  واسوي مثل ماكالتلي ماما يمكن صدك هاي لعبه حتى تجي دعاء

غسلت شلت شعري اخذت كتابي والمحفظه نزلت جوه رحت للمطبخ  لكيت سماح تغسل الممه كالت صح النوم

-جوعانه

-هذا حبيبتي اكل سويلج لفه

-وعندي امتحان

-والله مافارغه شوفي مصطفى بغرفة جدتي

سويت لفه ورحت صدك لكيته كاعد على القريوله  وخال رجله على الطبله بعدها امكبسه اول ماشافني كال بس لا عندج امتحان

-اي والله فدوه وماراح اشلع كلبك ابدابسرعة احفظ بس هيج فوكاني درسني

-غزيلان تره روحي واصله بخشمي ونعسان اذا ماحفظتي اهفج دفره لمن افتح الجبس براسج

-صدك اشوكت راح تفتحه

-باجر يله انطيني كتابج وفتحي مخج 

انطيته كتابي وكعدت بالكاع كلتله ماطول راح تفتحه خلي اوقعلك عليه

- عملي التردي المهم  فگي مخج وقعي شمخطي  لو اترسميلي افضل شتكولين

-ارسملك ذولاك الناس حتى اتسحك عليهم

-اكثر من هيج سحكه مااتصور ينسحكون سكتي لان اجو تالي ننسحك انه وياج

سكتت كعدت يم الميز صرت ابصف رجله      طلعت اقلام تلوين هو يدرسني واني ارسم وكل شوية يسال

مصطفى عصبي لازم ارد بسرعة مومثل سماح تتحملني واتعيد

الكل  كاعدين مؤتمن يم بيبي على القريوله وسماح ابصفه كاعده تمسح على ضهره

اصلا مو يمهم اني ماخليت شي مارسمته برجل مصطفى بس بالي يا بالدراسه لان اخاف انكتل اذا جاوبت غلط لحد مابيبي قاطعتنه من كالت هسه راضيه عليك يجده من چسمت وعدلت بينهن

مصطفى- من اشوكت عدل هاي جديده

تهاني- من زمان عادل بينه مؤتمن بس جان اكو مشكله وانحلت الحمد الله هسه كل يوم يم وحده

-هاي شنهو جا انه من ضمن القائمه لوشنهو اشو كل ماافتح عيني اشوفه مسطور يمي بالديوانيه  يله المهم  يمكن بيه  ريحة الغولي

-شقصدك

-قصدي يحي العدل

بيبي - بعد جدتك مؤتمن ضل هيج عادل لخاطر ربك يرضه عليك

-دنكت راسي على رجل مصطفى  گلتلها اني يومي متنازله بي لتهاني  مااريده

تهاني -ياع معقوله اشعجب غزيلان عاد كد جلمتج

-اي كد كلمتي بس كون ذولاك الناس يصير عدهم كرامه وميضلون بالباب يتوسلون ادخلهم

-منهو ذوله

-نفسهم الخلصوا الضهر كله يتصلون بلكي احن وارد عليهم

جنت امدنكه ارسم واحجي  ماشفت رد فعل مؤتمن شنو حرك رجله مصطفى رادني اسكت كلتله
مصطفففى لاتتحرك حتخرب الرسمه

اجاني مسج

عفت الرسم وفتحت  الفون طلع من مصطفى ضاحك وكاتب بالعباس مره بيج حظ خرب بغيرتج انطيتي بنص كصته خلي اشوف اشلون راح يلم السالفة

- تربيتك افا غير اعجبك

-ابعلي عجبتيني وحده ثانية وخلينه  انجلطه

-بس لحظه خلي ادبرلي بس اخاف ارفع راسي اشلون شكله

-ماكو ولانفس على تدنيگته عالاساس مامعتبرجن خالجن تلغن وحدجن بس ذاك وجه وينه امبين

-وبيبي شنو وضعها

-جدتي وتهاني راح يطيرن مامصدكات انتصراً     لاتشيلين راسج خرب  خليج مثل ماانتي
يلا تركي الفون وخليج وياي خلي اكمل شرح

شمرت الفون رجعت   ارسم لحد ماوصل نهاية الفصل وسالني صفنت كال الله من وزع العقول وين جنتي

-جنت اسبح صدك مره غرگت بالبحر

-شوصلج صوب البحر

-هذا سيف الحمار كلي دخلي واني جاي وراج بس اني رجلي اخذتني للغميق ومااعرف اسبح وهو اتعطل غركت همزين لحك عليه اخر نفس جان متت

-ماطكج طكه   توبج بيها

-هئ بس عيط عليه اول ماشافني نزلت دموعي سكت خطيه ضل يتوسل حتى اسكت

تهاني- واكيد بالمايو تسبحين

-لاجنت لابسه دشداشه وشال شهالتخلف الي انتي بي وترا للعلم اكو مايو مستور شورت وكيمونه موكلهن سوه

-وشورت وكيمونه يعني موش امصخله تحسبين روحج

-انتي غبيه غير جنت بره قابل اسبح بالنقاب

بعدني اكمل حجي وصاح ومؤتمن مرررض اكوم اسحك على راسج واسكتج لواشلون

سكتت  رجع مصطفى كمل شرح وسالني كم سؤال همزين عرفتهن بس واحد غلطت بي واجتني الدمغه ابنص راسي  وشمر الكتاب بره كال كومي طلعي من وجهي

كمت جبت الكتاب وحاجيته بتوسل راح انتبه بس هالمره

اخذه ورجع شرح هالمره عدته عدل خله الكتاب يمه طلع الكتاب الثاني يقرا بي علمود يطلع بس المهم يدرسنيا

شلت راسي لكيت مؤتمن يدخل كل نفس يسحبه يخلص الجكاره كلها العصبيه فول مفعله يمه تطلع من اذانه عرفت روحي زودتها ويا بس يستاهل مو تهاني خالها بالصدر وتفتر بيها خلي اشوف اشلون حتنام اليوم

خلصت دارسه والرسمه  اخذت كتابي كلتله خلصت اشلونها رجلك

اشرلي ب لاك  وهز ايده وره ماشافها كال اشلون باجر افتحه جدام الزلمه

ام مكرم- هههههه  عود كله بت اخوي شخبطت

-ياعمه شنو شخبطت هذا الابداع كوله واتكولين شخبطت صدك تكبتون المواهب

مصطفى-امشي لج كون الله باجر تجين مامجاوبه اذا ماشلت الجبس من رجلي وخليته براسج اطلع ماافتهم  يلا ولي

طلعت لغرفتي صعدت لكيت تهاني بالباب واكفه شافتني وطكتها ضحكه كالت خو رد لحضني بعد بنعال مايشتريج لو تحافظين كرامتج وتردين لامج احسن

-عود ميخالف خلي يعدل بينج وبين مصطفى بالاول وبعدين تعالي خلي راسج براسي

-ههههه حلمي حبيبتي حلمي اذا ماخليتج ابصف اختج واتحلمين بأضفر مؤتمن ولو هسه لو يصبوج ذهب بعد مايكلبج ولج المن انتي المؤتمن اتكليله كون تحفظ كرامتك وجدام اهله ولله شفت ثول مثلج ماكو

-كملتي ويلي يله

-صدگ الثقه بالنفس مرض  يلا اجتني صافيه امعدله ادفي زين تره الجو بارد  هم يالله اروح احضر روحي كالتها وضحكت دخلت  غرفتها وسدتها بوجهي

سمعت مؤتمن  يصعد ركضت فتحت الغرفة كال على كيفج لاتركضين

دخلت  وسديت الباب بسرعة مااريد اشوفه لان اعرف راح  انكتل على الحجي والأهاين السمعها صفنت شويه سمعته دخل  امنت

رحت حضرت جنطتي وملابس لكيت جهازي يضوي اخذته ورحت لفراشي لكيت ضايفيني لكروب طالبات الشعبه

دخلت صايره هوسه مال مسجات وصاير الضحك وين ؛شاركت وياهن ضلينه للساعه ثنتين نسولف ماخلينه وحده ماگصيناها من المدرسات

همزين دعاء ماهيه ويانه بس سماهر وهاي حبابه تقريبا قوة علاقتي بيها اشتغل الضحك على كل وحده والدزاين مالتها لمن سمعت صوت غرفه مؤتمن انفتحت بسرعة سديت الفون خليته جوه المخده وسويت روحي نايمه هو يمكن سمع صوت ضحكتي

فتح الغرفة دخل اسمع خطواته اجه يمي وكف  اني نايمه على وجهي لبالي راح يطلع بس اندفعت انكلبت للجهة الثانية شال المخده واخذ الفون گال  شنهو هذا

-هاا جنت دااحجي ويه صديقاتي

-الساعة ابيش غزل

شلت راشي ثنين ونص رديت دنكت

-الساعة عشره  اتخمدين عشره وعشره تنحرمين من النقال سمعتي

-امم بس رجعليا حباب اخر مره اسهر

-اشوكت اتعقلين انتي

مارديت ضم الفون بجيبه عيني بالفون وهو صافن حاجيته بتوسل رده وبعد مااسهر

- كل همج النقال غزل

شلت راسي باوعتله وبرطمت هو على وكفته منتظر  شنو اكول تذكرت بيبي وكرامة حفيدها وسوالف  تهاني

شيطان مصطفى مر كدامي عضيت شفتي دفعت الغطه وكمت ركضت حضنته من بطنه اتحسر  شلت راسي باوعتله كلتله احبك تره

-متاكده

-همست براءة والله ورجعت راسي  بحضنه

ضحك ورجع حضني حيل كال اوووف اشكد مشتاقلج خرب بشكلج

-والكرامة مؤتمن

-انعل ابو الكرامة لابو اهلها ولج راح اموت اشوفج واتحسر طيرتي حتى النو كالها وشالني خله راسه بركبتي اخذ نفس طويل

-عيب ترجع بكلامك انت شيخ

-شيخ جدام العالم بس يمج طفل مضيع امه

- تذكر اشلون  جريت شعري لولا

-عساها بالجسر الايد التأذيج بس يبويه تراني الزعلان موش انتي

-لعد لويش اجيت اذا زعلان

-طفح بيه الشوگ ونعلت الساعة الفكرت بيها اتوبج

-يعني تبت هسه بعد ماتعيدها

باوعلي صفن شويه وضحك شمرني عالجباية
ذب قميصه ودنگ عصر وجهي همس موش بس توبت اكلت حتى تبن

باسني وخله راسه بركبتي …

مؤتمن كل يمي وكوه اخلص نفسي منه مو هسه صار اسبوع بعيد خلاني صدگ اتندم اشترك بشياطين مصطفى ماتركني لمن شافني طفيت من صدگ

سحبت روحي منه رحت لحمام سبحت  لان ادري الصبح راح اتعاجز طلعت لكيته يريد ينام فتح ادي كال تعالي يعلة گلبي 

رجعتله حضني حيل وباسني رفعت راسي باوعتله همس دخيل ربج ولج صدگ كدرتي تنامين من دون حضني

-كول لروحك

-اشتعلت ابو روحي اذا كدرت تغمض عينها دقيقه بدون عطرج

-هسه الصبح مصطفى يضحك عليك

-هو منهو طيح حضي غير مصطفى شكو شغله طايحضها علمج بيها حسبالج مااشوفكم تتراسلون وتتفقون

-تره مجنه نحجي عليك

-لاحشه انتي تكليلي ؟  المهم بنيتي عليش بجيتي اليوم 

-ماكو شي بس جنت مخنوكه هيج وشتاقيتلها

-متاكده بويه كولي اذا اكو شي لاتضمين اكو احد مضوجج

-هئ

-خير ان شاء الله شوفي بنيتي اي شي يصير تعالي كولي لاتترددين ولاتخافين ماراح احاسبج وداعت بنتي لاتخلين بكلبج شي وتضمين عليه

-وين اكلك اذا انت صاررر اشكد زعلان

-والزعلان يراضوا لويتركوا مسحلوا ومنعول والدي

-يعني شنو تريد اروح اتوسل بيك واراضييييك

-لا يابه اشلون وروح عمي لو ابقى سنه ماادخل غرفتج ادري ماراح يهمج ولايفرق وياج اتعلميني بيج
 

شلت راسي باوعتله وضحكت عصر وجهي وعضني ورجعني لحضنه عصرني حيل احسه يريد يدخلني بين ضلوعه

…كعدت على صوته فتحت عيوني الساعه سبعة دنگ باسني وكال يله  راح الوكت

- بس شويه انام وخرر

-كملي نومج بالحمام يعمري كالها ودنگ شالني  دخل  للحمام شمرني وفتح الدوش 
نوم العوافي بويه

-صدك مؤتمن

-يله لج  راح الوكت  لخاطر اخذج بطريجي

غسلت طلعت غيرت ملابس لكيته ماهو بالغرفة مشطت وشلت شعري اخذت الجنطه على ظهري والجبه والشال بيدي نزلت  لكيتهن يتريكون

صبحت وكعدت اكل بس انتبهت لمصطفى يدور على شي جدو كله اشبيك يبوي على شنهو ادور

-انتظر جدي كالها و شال المخده ورجعها

بيبي- اشمالك يجده شمضيع

- مكرم كله بروح خالك ماتشوفها يمك بلكي طايحه

-شنهو ولك

-كرامته مؤتمن كالها وطكها ضحكه خلاهم كلهم يضحكون  حتى مؤتمن ضحك ودنك كمل اكله بس بيبي صار وجهه اسود 

عمتي - هم يجي يوم وتتزوج ويردها الك

-شنهو خبل اخذ بكده يابه وحده واخلها ملكه تأمر وتنهي بكيفها

مؤتمن- هلا بخوي اشحن بعد شحن اعلكها بعد اخوك كالها وكام كال يلا كومي لاتأخريني

كمت لبست الجبه وطلعت وراه

وصلني داانزل وشفت دعاء نزلت من الخط رجعت كعدت كال يابه نزلي شكو لطشتي

-مصطفى ينزل ويفتحلي الباب

-خرب بيج وبمصطفى نزلييي

-ماوالله اضل لليل اذا متنزل وتفتح الباب

-غزل عقلي ونزلي بويه فشله واحد يشوفني

-مستعر مني حضرتك يلا رجعني للبيت بطلت مااروح اليوم

-خرب بيييبج خرب بقسمتي كالها ونزل فتح الباب حيل نزلت عادي حتى لو عيط عليه المهم اغيضها

باوعتله وبرطمت صك اسنونه كال للمدرسه غزل بسرعة

-  اريد مصروف حبيبي

وكف يطلع من محفظته اباوع لدعاء متبسمره بالباب ردت اطول بحرك روحه بس خفت من البنات يباوعلنه انوب هو كاشخ بقاط ونظارات طالع جنه العافيه على كوله بيبي

راسن اخذت الفلوس وكلته يلا اصعد ولاتلبس هالشكل مره لخ

ضحك كال يله بنيتي روحي الله وياج

رجع لسيارته واني عدل عالمدرسه وصلت باب المدرسه صاحت سماهر اي عيني حظوظ اذا باب السيارة يفتحه الج وين ابوي عنه اذا ماخليتها بحلكه اليوم اخلي يشبع تصنيف بي

-هههه ولج والله نزل كوه الف عركه يالله قبل ردت اكيد عالم

-ابشرح العالم ذولاك يمكن اليوم ينتحرون ديله دخلي  خلي نراجع راح الوكت

الدوام  مر واني لاطشه لسماهر اخاف اعوفها وتلكفني زهراء طبعاً كم مره اجت رادت تحجي هددتها سماهر اتكول لامها عافتنه بس ضلت عينها بيه

خلص وقت الدوم طلعت متاخره علما لبست وضليت شويه احجي ويه سماهر

طلعنه لكيت مؤتمن واكف يم سيارته يدخن داير وجه للشارع  ودعاء واكفه اتسولف  ويا انوب  مااعرف تتوسل لان شكلها مدري اشلونه

هو حضرته ذاب سترته وكاف ارداناته غير كمت اطفر من الغيره كمشتني سماهر كالت هدي خيه لاتنجلطين

-لج شوفي اشلون واكفه اتسولف وهو ماخذ راحته منتجي عالسياره ولايمه اخاف  اشوفه

-تره رجلج ماله شغل هيه لزكه شوفي اشلون تتوسل بي الله اعلم شتريد  شوفي ولج  اشلون يباوع  بس عود نظارات لابس حسباله مامبين 

-اووف شعليني بعد تعالي اوصلج بطريقي

جريتها ورحت وصلت يمي نزعت جنتي شمرتها عالبنيد كلتله دخلها  بطريقك ورجعت اسولف ويه سماهر تجي اوصلها

انداريت لكيته يضحك شال الجنطه وشمرها داخل السيارة كال اشلونج عمو سماهر

-هلو عمو الحمد الله

-يله بويه اوصلج بطريچنه

دنصعد وكالت دعاء اخذوني بطريچكم اريد اروحن لاختي

مارد دنگ وصعد  وهيه صعدت بدون لاواحد يكلها  يله ؛شفت بشر شامرين روحهم مثلها ماكو صعدنه واني احمس بروحي اباوعله كوه ضام ضحكته شغل سيارة وكال يالله

حرك كال لسماهر اشلونه ابوج

-زين عمو

-سمعت كالت عمو وهاي صديقتي

-شنهو بلكي اتوضحين اكثر

-يعني اتلم عيونك مؤتمننن وعرف روحك اشكبرك

-چااشوكت  كايلج انه اصغير حبيبي

-مؤتمننن

-حبيبي امريني

-سلامتك عينك للطريق

-على امرج تم

هو يسوق واني عين بي وعين بدعاء الي تريد تاكله بعيونها وكوه اتريد تحجي ويا اخر شي مااتحملت تسكت اكثر كالتله تجون للبستان مثل كل سنه

-ان شاء الله

-اشوكت السفرة حددتوها لو بعد

-والله ماادري بس اخلص كم شغله عندي واخابر الشيخ نتفق

-خوش بس خليها قبل الامتحان فدوه علمود ناخذ راحتنه

-الله كريم احاول اخلص شغلي من وكت

هو يحجي واني فاكه حلكي اشلون يحجي بهدوء باوعلي اشر شكو

-لاماكو بس والله الي يشوفك هيج هادء يصدك بيك لبالهم كيوت صدك انت دتحجي

-شبيج حبيبي عليش امعصبه اكو واحد مضوجج اليوم وتعالي انتي اشوكت تحجين عربي مفهوم

-عزااا مؤتمنننن لاتخبلني لواكلك نزلني هنا احسن اوكف

كلتلها انداريت اسحب بالباب القافله اني افور اريد اطك  هو ميت ضحك  وسماهر وياه

دار السياره على جهه وكفها  وكمش اديه كال بس هدي شبيج يعمري

-مابيه شي بس هيج ماطايقتك اليوم  نزلني يله

رد ضحك وكلما يضحك يحرك كلبي اكثر يخليني اطفر

رادت تحجي دعاء انداريت كلتلها اشكد تلغين دخيل ربج موكافي وبعدين شنو ماعندج اهل اشلون اتصعدين ويانه ماراح يسالون اشلون جايه ويعده غربه عيع هم كرامه ماكو وهم اهل ماكو

مؤتمن- غزل موش كافي زوتها

-لامازودتها اني بس اسلم على واحد اتقوم قيامتي مو هاي عود بت شيخ اشو محد يسأل وين تروح لويش يعني

دعاء- تره قبل لاتجين وتصيرين مرته هو جان يوصلنه مرات موش جديده الشغله وابوي ثاق بي

-لعد اشكد لزكه وماكو كرامه

مؤتمن- غزززل بويه شمالج اليوم

من حركت كلبي ماشفت روحي غير ارگعه بكل قوتي بوكس ابطنه كمش ايدي عصرها وخزرني سحبت ايدي وانداريت للجامة هم هم ماحجه

رجع شغل السياره كمل الطريق وصلهن سلمن ونزلن رجعنه للبيت وصلنه ردت انزل

كمشني كال ماحبيت افشلج جدامهن بس اذا عدتي العملتي  افلش راسج

-اي لعد اشبع بيها وخر

-غززززل لاطولين لسانج

-وخررررر مؤتمن داانزل

دفعني وكال وحك علي متصيرلج جاره

نزلت ودخلت ابجي جوه لكتني سماح كالت خير اول يوم يوصلج شنهو هم اتعاركتوا

- اني لو هو روحي شوفي الطريق كوله ديحجي ويه دعاء وفاك حلكه وانوب يضحك على لهجتي

-استغفر الله غزل بنيتي يمه عقلي

-عزااا انوب هاي دااكولج يحجي وياهااا

مصطفى-  ولج غزيلان لاتطلعين سالفة واتغلسين عن الامتحان جيبي الاسئله وتعالي

مسحت دموعي ورحتله كلتله والله جاوبت

-جيبي الاسئله

انطيته و نزعت جبتي رحت يمه طلع عندي بس ثلاثه غلط غمني مرتين وكم غلطه

شمر الاسئله وكال ولي من وجهي روحي لرجلج جان يسولف ويه دعاء صدك جذب اشلون ساكته انتي

مؤتمن جان نازل من فوك امغير ملابسه صاح مصطفففى زيدها بعد اخوك

رحت صعدت لغرفتي عفتهم يتضاحكون ولاتكول امسويله مصيبه ؛غيرت ملابس ونمت تعودت يوميه انام واكعد وره الغروب سماح شايله كل الشغل هيه وتهاني لان مؤتمن مايرضه يخاف يتعب كلبي  دوام وشغل

كعدت على سحبته خلاني بحضنه دفعته عصرني صاح اشش رجع يعضعض ويبوس شافني كارهته ماكو نتيجه سكت استسلم رد ضمني اله ونام

كعدت بس اني بالغرفه الساعة سته  كمت غسلت اخذت كتبي لان بعد مابيه حيل اصعد

نزلت لكيت لكيت تهاني عالدرج صاعده باوعتلي وتريد تاكلني ضحكت كلتلها اشلونج ام الكرامه

-يجيج يوم

-ههههه اكثر من هيج  مااتصور تذكرين الديباج الكلتي عليه عود اتغطي بي زين

-غززل وداعت امي

-اشش عوفي امج لاتجيبن طاريها لا تخليني اردج لحضنها ويلا ولي منا خلي انزل بس نصيحه هدي شوية الحرگه للي بعمرج موزين تسبب الضغط والسكر كلتها ونزلت خليتها وراي تنطح الحايط

لكيت  سماح   شايله غزوله  اخذتها وبوستها كلتلها حرمات سمره جان طلعتي عليه

-اي  عايف امه وابو لاحگ مرت ابو مترهم

-يلا هم حلوه بس حرمات من اذكر هاي امها اضوج منها

-لايكلبي هاي بنتي تره مؤتمن سجلها بأسمي

-عليج الله اشلون رضت هاي الحويلي

-الحولي يالثوله جلمة  ماتعرفي لاتكولي  جان اتفاق اكو ونفذ مؤتمن الها

-شنو ولج صاير ضامي عائله حزورات شنو انتم

-موش مؤتمن كال اذا اتجيب اتولي لاهلهه  لان انه اعرف روحي ماعدل وموش كد الحرام من ولدت مؤتمن صايح لامها كاللها اخذيها خلصت مسؤوليتي وياها لهنا مثل مااتفقنا هيه ضلت تتوسل كلتله انطي بنتي لسماح وتسجلها بأسمها وراضيه بكلشي بس خليني وياك واكون اسوي غيره التهي بي

- وهسه سجلها لوبس حجي

-لامصطفى متفوته هيج شغله اول ماكالت اركض سجلها   لخاطر مترد بجلمتها ومؤتمن نفذ الطلبته هسه حبلت حسبالها  راح ينسى العملته  وترد علاقتها بس المفاجأه البارحه حللت طلعت حامل تركها مؤتمن

-عزا واني لبالي من صدك رجعها واكول اشبي هذا رد بكلمته

- لاحبيبتي وحتى هذا الطفل هم اكو لعبه براسه الله اعلم شنهو  تره  لاحسبالج  مؤتمن غشيم على اسوالفها بس يشتغلها عالبارد

-لعد من جانت حامل موجان ينام يمها

-وداعتج بس ينام ماكربلها ابد بس جان يغيضج بيها

-تمام لعد هسه اعلمه

-غزيلان لخاطري كافي مؤتمن وبعد صفالج بس الج شتردين حبابه كافي خلينه مرتاحين هيه الطفل راح يبقالها وانه حصلت الكمريه هاي كالتها وشالتها اتبوس بيها

دخل مصطفى كال خويه كمريتج محتركه

-چاشسوي اذا ابوها اسمر  ومها محتركه  حسبالنه  تطلع على عمها لومرت ابوها بس البخت مااجه عدل يمه تحجون على بتي دروحوا وانوب انه اخذني الواهس وياكم

-وينج لج انتي يلا اريد اطلع تعالي شعدج ادروس

-اي هسه اجيب الكتاب واجي دقايق

طلع اخذت كتابي ورحت ورا فرشنه وكعدنه شايل الجبس بس بعده ماد رجله بعدها هو كالعاده يشرحلي واني لازم بيدي شي التهي بي جانت لعابه بت حبيبه بيدي صغيره ملخه  لاشعر ولاادين باقيه

التهيت ارسم على وجها وجسمها شخمطتها اتشخمط مليت ردت اشمرها صاح مصطفى- لاولج لاتشمريها جيبيها كالها واخذها من ايدي

-شتسوي بيها

-انطيني القلم وياج

اباوعله  كتب موت شلل رسم اكس وكتب مؤتمن وامه عمى وموت  كال ناوشني خيط

-ماعندي منين

-كومي لج فاهيه روحي للمطبخ تلكين هناك

كمت للمطبخ ماشفت بس وصله المسح جبيتها شلع منها خيط وكال رديها وتعالي بسرعة بين مارحت ورجعت لكيته رابطها اشرت شنو هاي

-مالج شغل هاج و لاتخلين احد يشوفج خليها بغرفه عمتج بسرعة

اخذتها رحت لغرفة عمتي خليتها جوه مخدتها وطلعت ركض

رجعنا كملنا دراسه للثمانية وكت العشه خلصت شلت كتبي ورجعت للغرفة ضميتهن نزلت تعشينا  للعشرة كلمن راح غرفته صعدت غيرت ملابس اجيت طلعت من الحمام لكيته يريد ينام كلتله تره اليوم لتهاني شكو جاي هنا

-عندي طفله اتضل تبجي وراي كلت انيمها واروح

-لاتطلع اسوالف تره عرفت

ضحك وسحبني كال شعرفتي

-رجعت تدخل يمها مو لان خجلان من العالم واهلها لا علمود تسويلك طفل لخ

-لو ماعامل  هيج بالعباس ماتخليتي ادخل غرفتها تعلميني بيج خبله وسماح كسرت كلبي جان امنيتها طفل

-وانتوا تتفقون على حساب مشاعري

-ولج  هو اسبوع وخلصتها ضهاري  اتكول واحد ناهب رايح بالختلات  موش حرمته ولج بس لا تحسبين الزعل والكرامة الي تطشرت وياهن انكتمي كضيتها  بغرفة سماح لحد ماانعل ابو اصلي 

-لويش تزوجتها

-غزل غلط انتي اساسه مالج حگ تحجين بي

-لاالي حق مثل ماجبتني وغصبتني عليك تتحمل كلشي اسوي بيك

-وانه ماگايل غير هالشي ترا انه  تحملت وتنازلت جثير لخاطرج ودست عالكل عملت كلشي طلبتي

-طلگها

-اطلگها بس خلي يجي ابني بالسلامه  الحرمه الي تجسر جلمتي وتلعب  من وراي مالها مجان يمي

-يعني راح اطلگني

-انتي ربي دزج لخاطر يذلني وينعل ابو اصلي بيج

كالها وعصر وجهي استوى دنگ يبوسني وسمعنا صوت صرخه عمتي  من جوه رجع خله راسه على المخده ومسح وجهه همس  مصطفى

-عزا اشعرفك هو شمرها

وخر اديه اندارلي كال شعملتوا  غزيلان

-كولشي ماكو اصلاً حتى اسأله

لبالي يكوم ينقذ امه من السحر بس هو جان اله راي غير سحبني وطلع السحر من عيوني توبني من صدگ بعد اشترك ويه مصطفى بالخباثه

…كاعدين من الصبح عدنه سفره ويه بيت الشيخ الليل وكله اتوسل ويه ابو سماهر حتى رضه يخليها تلبس جبه والحجي  مايدري مؤتمن بسكوت ادز رسائل واتوسل ماتركته لمن وافق

كملت لبسي  دخل مؤتمن  شافني لابسه الجبه مفتوحه من كدام خزرني واشر وين

-شنو مؤتمن تره مستوره وبنطلون جواها

-غزززل هيج مكياج ولبس ماترحين من الاخير غيري وصيري ادميه

-اي حتى اتضل فاتح حلكك اتباوع لدعاء

-خرب بدعاء وابوها غززززل لاتخبليني ولج شباوع اشبيج بويه بت جنها صخل اشبيج تخبلتي وجلبتي بيها هم شكل واحد يباوعلها هاي استغفر الله

-مؤتمن اتفقنا كلنا  نلبس جبب غيرها ماراح اللبس

-جاخليج متجين

-حتى اكتل روحي اي كول اريد اخذ راحتي وياها

-دخيل علي  دخييييل علييي اشلون ورطه هاي بويه انتي عندج عقل جاي تفتهمين شحجي

-اي افتهم تريد اطلع امخربطه ومبهذله ويله اصلاً مااروح روحوا انتم كلتها ونزعت الشال شمرته كعدت 

اخذ نفس واستغفر اجه كعد يقنعني اغير شاف ماكو مني نتيجه بس دموعي نزلت ودايره وجهي عنه   كام دفتر الميز  وطلع

دقايق واسمع العركة جوه وين وصل صوتها  مااعرف شكو شوية ودخل وكال يلا كومي فضيني خرب بالقسمة  كالها وطلع ركع الباب وراه 

عرفته راد يبطل الروحه ومارضوا لفيت الشال ونزلت ؛ لكيتهم محضرين كلشي  الاكل واغراض المشاوي و اسلحة الصيد

طلعنه اربع سيارات صعدت ويانه تهاني ورجاء وهيفاء الجانت استوها حامل تنسى ومصطفى غير سيارة اخذ كم وحده ويا

ومكرم هم سيارة بس لانو يسوق سريع مؤتمن جاب ويانه هيفاء ماقبل تصعد ويا

خالتي ماقبلت تجي ضلت يم سمر الي صايره متتأمن حتى بليل تطلع وحدها كم مرة شردت وجابوها

وصلنه  لكيناهم واصلين قبلنا وفارشين ناصبين مثل الخيمه الصغيره ومحضرين ادوات الشوي نزلنا

رحنه سلمت من بعيد بس الشيخ صاحلي  جان واكف هو وابو سماهر وبنته رحت سلمت عليهم

مؤتمن راح جهة الشباب اخذت سماهر ورحنا سلمت على البنات كالت ريم اشلون خلاج مؤتمن اطلعين بالزي هذا

-يوو سكتي مية مرة اتعاركنا  كوه قبل وره متعارك ويا جدو لان بطل مايقبل نجي كال خليهم يرحون واحنه نضل

-چاماضليتي ويا خطيه يجوز جان معوز حضن

-عزا شنو هالظلم هم مااروح وهم اضل ويه مؤتمن بالبيت وحدي لويش شمسويتلج

-ههههه ولج اكو احلي من حضنه بروح ابوج

-مااريد شبعت مليت كرهني بالزواج كوله كمت اذا اسمع وحده راح تتزوج ابجي عليها تكسر خاطري راح تذب روحها مصيبة بدون لا تدري

-ياع عليش ولج شمسويلج الزلمه وهيج امكرهج

-هسه يجي يكلج كلشي ماكو حتى بوسه مامحصل منها مظلوم وياها اكولج عوفينا منا تعالي وياي اريد اطلع بس اخاف يعيط عليه اذا شافج مراح يحجي يستحي

-اخذي وياج دعاء

-لاهيج اني راح اعيط علي  وافشله كدام العالم كومي انتي

ضحكت وكامت وياي طلعنه الاجواء حلوه عمو ابو سماهر ولامبين هيج كبره من جان لابس اعگال امبين جبير بس اليوم لابس مثل مؤتمن بنطلون وهم شايل سلاح ولاف غترة بارز عمره الصحيح

جانت وحده واكفه يمه ومؤتمن وياهم يسولفون رحنه يمهم سماهر عرفتني عليها طلعت امها سلمت باوعتلي وضحكت كالت هاي اشوكت صرتي وكبرتي ذاك اليوم يجيبج مؤتمن استوج تمشين وتوكعين محتار بيج

حامد-  ابشرج لساته محتار حتى باب السيارة يفتحها الها مو لو انه غلطان

ضحك مؤتمن ودنك كله لا بالله مو غلطان

حامد- اي عمو هم يضوج مؤمن كولي اشلعلج اذاناته

-اي والله عمو ديضوجني هواي بس يلا عوفه خطيه

ام سماهر- شنهو يمه صدقه لمحمد اشلون تحجين انتي

ريم-  هو الله منطيها جمال وعوجه لسان لخاطر تكمل اي مؤتمن ماناوين تجيبون جهال اشبيكم بلكي الله و صاير ولد عندك

-الله كريم اذا مقسوم يجي يلا حامد شنهو  ناوي تصيد لوكبرت خويه

-والله بعد ماشفتك ماخذ بكد بتي عرفت روحي مظلوم ومضيع شبابي ويه اعجيزه

ام سماهر- ياع جاشنهي استوك ما انتبهت يا رجال لا تنسى مؤتمن اصغر منك بشكد  وهاي ضربت حظ حصلها لاحسبالك  كل اليجي ويحصل هيج احمد ربك على البيدك لا تطيرها

-عمي ماطيرين وتخلصيني ولج بويه غزل امج وين ماتاخذني

-ههههه لاعمو تزوجت من زمان

-چاهيه حظوظ وعارف حظي ضال على هاي

-يا عمو لعد شبيها فدوه لاتصير مثل مؤتمن بقى بعد بس وماملكت ايمانكم قبط الايه كولها

-هههههه اي بالله صدك قبطها كلها

مؤتمن-  يله يابه تروح لو اتضل ادورلك حرمه

-مااحصل يابه وحك على موش مثل حظك انه حتى لوحصلت اجيبها حولي

-اخذها نصيحه من اخوك وخلك على حرمه وحده الف مره احسن تخلص من وجع الراس

-اهااا هسه وره ماخذيت اربعة چاي تنصح

-وحك علي لويرجع بيه الوكت جا اختصرتها بوحده وفكيت روحي

اخذه وراح جانت دعاء وتهاني يسولفن سمعنا من حجه وهنه انضرب وجهن صار اسود من القهر

ضليت كاعده يم ام سماهر اسولف وريم راحت يمهن تسولف شوية و كمنا نفتر الولد يشوون للغدة ويتشاقون بينهم عيونهم بالگاع ابد مايشيلوها علينه بس اثنين جانوا عيونهم وسخه فصلوني تفصيل من فوك ليجوه حتى سماهر كالت غزل يمعود خلي نروح للجهة الثانية اخاف يسويلنا مصيبة رجلج

صدك رحت يم البنات لكيت زهراء  كاعده واتباوعلي بسرعة اتلمست صدري اخاف مفتوحة دكمة شي صار بيه خوفه من ذيج السالفة اجت دعاء كالت وين بت مؤتمن يريدها

اخذتها من ايد سماح وطلعت تركض اتكول بات مان هيه وعباتها ردت اكوم سماح خزرتني  ماهتمتها كمت طلعت لكيت مؤتمن داير وجهه للجهة الثانيه يلكف بنته ودعاء واكفه فاكه حلكها عليه  المشكله ساحكها وهيه لاطشه

اجيت يمهم غزرني  قبل لااحجي خاف يتفشل وصلت يمه كلتله تره انت فاهم غلط المفروض اني اخزرك

-استغفر الله ربي غزل بنيتي اهدي شوية

-لويش مخبله واهدأ وبعدين انت شتسوي جاي هنااا

-غزل بويه  ردي مچانج لاتجبريني اصعد صوتي العالم موجوده

-ولويش اتعلي صوتك على شنو تره انت مزودها واذا وكفت يمك شنو مستعر مني حضرتك وشكو هاي الصخله واكفه يمك

-بويه منهو واكفه يمي صار ساعة اصيح واحد يجيب بتي رحمة على موتاها من جابتها بسج وانتي بويه دعاء ردي مجانج  مشكور زحمتج

دعاء- لابس اريد افهم منهو   الصخله دكوليها عدل واحجيها بعدين اول مره اشوف لسان معوج

-لساني المعوج مثل ماتكولين تتمني انتي بس ماطايح بيدج ويله ولي منا

-مؤتمن ترضاها تحجي هالشكل وياي

-مؤتمن شنو منو هو ويحجي مكاني

مؤتمن-  لايابه منهو هو اصلاً عليش حاسبتله اعتبار هاي اذا معتبرته من الاصل  غزل دري مجانج ولا وروح عمي اسحلج

-يلااا سويها دنشوف اشلون انسحل علمودها

حامد.  يابه كولوا يالله اشبيكم مؤتمن خويه كل عقلك انت اترك البت

-شترك  لخاطر ربك دشوفها جنها جلب

-عزززا منو جلب ؟؟؟

باوعلي مؤتمن ودنگ كوه كاتم ضحكته وهمه ضحكوا بصوت عالي لان مالفضتها عدل كمشتني العبره

رجعت لمكان الكاعدات بي النسوان وحلفت بعد مااحجي ويا على هذا الموقف
كعدت نزلت دموعي  اجت عمتي ام مكرم  كالت عليش تبجين

-طلعي شوفي مؤتمن اول شي رزلني وثاني شي واكف يمها هسه خلاهم يضحكون على كلامي لعد اني مدااكدر الفظ الكلام  لويش يضحكون ويفشلوني

-ياع منهو يضحك ولج غير اتخبلين من تحجين لايكليبي لاتبجين محد يضحك عوفيهم  لاتكدرين خاطرج  هسه اطلع اجر أذانه

-عوفي اصلا بعد مااحجي ويا خلي يشبع بيها

-ولج سكتي چاهنه يكيفن بس يردن يلفلفن السالفة الولد يطرد بيها وهيه مثل الهمجي تركض ورا بدون كرامه شيعمل ماتكليلي

-خلي ياخذه قحط باقي بطرك الشكل قطره اخلاق ماكو 

-انتي لوبس تظبين لسانج احنه بخير 

ضلينه كاعدين وهوسه يسولفن كعدت سماهر وبعدها تضحك ضوجتني  بالاكثر درت وجهي  كالت بالعباس يخبل حجيج خليج هيج لاتتبدلين

-من هيج تضحكون

- ولج غير وره مارحتي ابوي ضل يحجي على مؤتمن لان زعلج كله بالعباس البت اتهج اذا اتضل هيج ناصب عليها موش حسبالك مثل بنواتنا وتتحمل هاي احمد ربك قابله بيك جنج ثور هايج

-اي والله بس ابوج يفتهم وحاس بمعاناتي

-هههه ولج وحگ على نزل عليه نزله تسوه عمره تالي مؤتمن اشرله على دعاء افتهم وحده رد عليها سحلها  وطردها كلها اذا كربتي صوبهم اكول لابوج يلمج

بعدنا نحجي ودخلت هيفاء كالت مؤتمن يريدج

-كوليله ماتت هجت ولت ماكو غزل خلي يدور غيري

-ااها معقوله غزيلان هاي منهو المتريده

-اي اني واليوم ارجع لبيت احمد ولويموت ماارجعله بعد اريد اشلوف اشلون يعيط عليه بعد

-ولج اغزيلان موش  اوصلها اله واخلي يدخل  يسحلج

-روحي كوليله وداعت ماما مااطلع روحي يله

راحت رجعت احجي ويه سماهر بس انتبهت للصنته طلعن كلهن يسمعلي واني نازله باوعت لسماهر وعضيت شفتي

-غززل موش جنج نزلتي عالزلمه دوسه ونص

-يمكن بس يستاهل

-ولج هسه   يكولن مامتربايه هنه عدهم الزلم اذا صاحولهن لوميتات يطلعن من كبرهن ويركضنله  موش انوب هذا مؤتمن شيخنا  المستقبلي

-سكتي اضن صدك حجيت هواي

رجعت اجت تهاني كالت كومي مؤتمن يكول خلي تجي يريد ياخذج للصيد ويا

-رجعي كوليله جيه مااجي لايضل يلح درت وجهي هيه طلعت فراره عرفتها راح تخبث بلكي ياخذها ويا مكاني

ضلينه كاعدين والبنات كل اثنين يسولفن سوه صايره هوسه رجعت دعاء عيونها حمر همست سماهر شوفيها

-ولج  اضن مترزله

- انه سولفت لابوي عليها اشلون شامره روحه على مؤتمن ويومية خالتها توصل بينهم للطلاق عاد ابوي اتخبل من سمع گال اعرفها عرمه وتخرب بيت مؤتمن راح شكاها لجدي

-كون عاد جدج يطلع شريف ويبعد عن رجلي

-جدي مستعد ينطي املاكه ويخلي بناته جوه رجلين مؤتمن ماتعرفين اشلون يحبه رب الراح يتنازل عن الشيخه اله وهو بعده بعز شبابه تردي يتركه

- واكيد مؤتمن يخجل منه مايرده لان هو الي مربي والي وكفه على رجلي وخله اسمه بالديره

-بس يحبج وجدي يعرف هالشي مستحيل يطلب منه شي يدري  راح يوجع كلبه بي

- كومي نطلع بره انشوف بلكي استوى الاكل  متت جوع

كمنا طلعنه رحنه يم الولد يشوون واحد كال بعد خويه لاتنجوين

-بس دااخذ من هذا فدوه تره جوعانه

-منهو انتي اشو اول مره اشوفج

-مااعرف اجيت من ذاك الشارع ولكيتكم امخيمين

-اهاا خير ان شاءلله تعال جا خلي اكسب ثواب انطيج خو ماعندج ايتام

-لا زوجي معوق وحمايه اعمى واني دااشتغل وصرف عليهم

-هههه الله يساعدج يخوي  هاج هذا كافي

-شو دااشوف لاشيل هذا الابيض مطيب شوف ذاك اريد منه مستوي اكثر

-وينه شو تعالي لجاي ياهو منهن

رحت شلته كلتله هياته دااقصد عليه شكرا

-هلا الف عافيه سماهر خويه ماتردين

سماهر- اي انطيني واحد بس مثل مالت غزاله

-منهو غزاله يبه

-ههههههه ام الايتام الي رجلها معوق

-اهاا چا صدك منهو هاي

-مرت مؤتمن

-لاابشرفج چا مؤتمن  شيخ عشرية ال …معوق وانتي الشيخة غزل ام الايتام لا ربحنا

صاح مصطفى-  اطفر يخوي شوف تسجيل الخروج منين وطلع من العشرة هاي تاليتنا بأدين ذوله

-اي بالعباس انلاصت

-شايف اذا اجونا  من غير ديره  وتلكتهم هاي ام لسان الاعوج وكالتلهم هاييي

-هههههههه وحك علي مؤتمن كارثه امنين جابها

-لكيناها بأمريكا تجدي جبناها نكسب اجر بيها كلنه نسويها شيخه علينه امده حظي اذا هاي تحكمني وتمشي چلمتها

-عزاا لويش دتقلد عليه

انداريت للولد كلتله ذكرني اول مااصير شيخة علمود داانفيكم من العشيره

-مايحتاج خويه احنه نفلت بريشاتنا ههههه لا اتشاقه وياج والله شيخه البنات وعلى راسي انتي ومؤتمن

ضحكت كلتله تسلم خويه

رحت على جهه ناكل مرت ربع ساعة اجه مصطفى يركض وجهه مخطوف صاح لحكي مؤتمن تصوب

- عزا لاتكول مات

-ولج لحكي يريدج بسرعة كومي قبل لايشيلوووا

ردت اكوم مااكدر احس رجليه ماتت دموعي نزلت بسرعه ركضت انوب الجبه طويله كوه كدرت اكمل طريقي صرت اخر نفس كلبي وكف من الخوف اني كلبي لاجمني مااعرف لويش احس نتفارك ما نضل سوه

وسمعت هذا الخبر حسيت هاي هيه  وصلت لكيته واكف بيده بندقية الصيد

بجيت من كلبي ضحك وجه سحبني لحضنه حضني حيل  دنگ باسني و كال والله فكرت مصطفى موش انه كافي يعلة كلبي

شهكت

-بويييه هاي صدك  هيج خفتي عليه

وخرت راسي دنك مسح دموعي سب  مصطفى ورد يضحك

-عزا لبالي متت كلتها ورجعت بجيت

-ههههه واذا متت شنهو قلة زلم

-يمه اموت وراك غير

-انه اكول رجعينا للبيت انعل ابو  السفره

-عزا مؤتمن راح يسمعوك فشله

اخذ نفس مسح دموعي ورجع باس راسي كال بسج يبوي ترا انه مااستاهل دموعج

-لويش هيج دتحجي

اباوعله صفن بوجهي اتحسر وابتسم دنگ  باس راسي كال يله تعالي اعلمج اشلون تصيدين

ماتموتني غير هاي حسرته الي مااعرف شنو ضام وراها مرات احس  اله ايد بموت بابا مرات احس مسوي مصيبه جبيره ومتأكد راح يروح بيها واضل وحدي بعد ماعودني عليه

…انطاني بندقية الصيد وعلمني اشلون اصوب جان شعور حلو وهو لازم اديه ويعلمني خايف لاتأذه صح ماصدت كلشي بس صدك حسيت بحبه الي بالاخص من مااهتم للموجودين جان كل همه اشلون يسعدني

كمشني من متني دارني عليه كال- عوفج من الطيور صوبي على هذا واخذج للشمال سفره

-لاخطيه صافوو

-بكيفج بس هاي تفوتج سفر عشر  ايام بالعمر ومسموحلج تعملين شكو شي بنفسج

- صافوو اوكف

مصطفى -خرب بصافو ولج لاغزل خويه دخيلج جا منهو يدرسج

-اسفه العرض مغري راح اضربك بطنك ميأثر

-لااا دخيلج بالعباس ثوله تنشنين على بطني واجيبيها بعيني

مؤتمن- يله تركي خطيه  هااا حامد ولاطيرر شمالك يخوي

مصطفى-  بالعباس اثنينكم هيج شوف اشكد جمعت

حامد- هسه انه هم ميخالف بله من زمان مااعرف انشن بس شوف شيخنا اضن  هدنه النسوان جان مايخطي هدف واحد

-هو صوبت هدفي الاخير واكتفيت عايف باقي الطيور الكم

-يخوي ما تاركلنا  طيور تارك غربان انت يله امشينه نتغدى بسكم صيد

رحنه كملوا الاكل اتغدينه وشربنا جاي صار وكت العصر شغلوا ديجي وركصوا جوبي

ضلينه لليل الولد واحد ينصب عالاخ واشتغل التصنيف مصطفى اتحارش بيهم صاح حامد جتفوا ولكم والحمز اليوم اطلع شكو خباثه من خشمه

مصطفى- لاهاي موش مرجله انتوا خمسه ولكمممم لااا

-كضوووا لايفلت ولكم جيبوا لجاي

كام راد يركض بس مالحگ كمشوا جتفوا وهو يتماطل جابوا لحامد مطلوا بالگاع لعبوا بخلقته

هو يصيح وعلي اطلعها بيكم اضعاف وهمه مستمرين بالشقى ويا لحد ماگام  مكرم وكال - الله جابك  من زمان متحامي واجتني للحلگ عدل كضوا عدل

مصطفى - مكرم وروح عمي اذا عملت شي اله تطير اجيبج واسحل بيك الكيعان

-عود باجر افتح حلكك لك كالها وعصر وجها شربه شطه

-ولك خرررب بهالك انسمطت بسك

-هاك فلفل اصفر يبرد

-لك كافييي اشتعل جدك

-ولكم ناوشوني طرشي حامد بروح اهلك سبحه بالبن

حامد ماكال لا دار الدبه وغسلوا وجهه  طلعوا شكوا شي مسوي بيهم مااعرف اشلون تلاوه وياهم وفلت اول واحد ركض على مكرم شاله وشمره بالگاع  نام على خوانيگه وعاد السوا بي اضعافه

هيفاء خايفه على زوجها وتتوسل بمصطفى يعوفه وهو مستمر يشربه شطه صاحت كافيي راح يموت

-بت الزمال  صار ساعة سحل بيه كيعان البصره ماانجسر خاطرج وحجيتي بالعباس اليوم اردلجيا نكضان

هو يحجي ويتصارع ومكرم الي كامشته نوبه  ضحك ؛مؤتمن متمدد خال راسه بحضن سماح وبنته على بطنه خالها  يضحك على اسوالفهم  واني لازمه فوني اصور ماخليت حدث ماصورته لليل من صدگ تعبنا

كاعدين كلنا  سوو  كهوه وجاي؛ الشيخ يسولف ويه جدو ومؤتمن والولد هم كاعدين وياهم مشاركين اجه مكرم يوزع الكهوه وصل يمي قدملي كال اتفضلي يالشيخة

-شكرا مااريد

-افا ولج ميصير انتي شيخة لازم كل وقت تشربين ماتردين احد

ردت مرت علوان كالت وينها وين الشيخة ماتشوفها اشلون مايعه وتتنعوص

مكرم- ماعليها تتعلم غزاله خوش مرة معدله واهم خصله هاي بيها تسوه ديره نسوان

-اي افتهمنا بس ترا الشيخة متوارثه وكون من الصغر متربيه على هذا الشي موش تجي من تالي  صارت عالي هاي متضبط تبقى هيه المدلله على مؤتمن وياخذله شيخه اتمشيله بيته شتكولين غزل

-والله بيبي مؤتمن اذا شافني مو مناسبه لهذا الشي جان المفروض مياخذني من البداية واله و اني مدااشوف روحي بيه نقص اقبل تجي وحده تاخذ مكاني وبعدين  هو وعدني اذا قرر يتزوج لازم يطلكني قبل والزلمه مثل متكولين لازم كد احجايته ميرجع بيهه

-ياع شنهو هالحجي جا انتي قابل راح ينكص من مگدارج اشو خالج على راسه موش جاي انشوف محد مداري حرمته ومنفذ طلباتها مثله بس يايمه كلمن واله مكانته ويعرف عيشته انتي موش مال هيج مجان بس تضلين حرمته وعزيزته

-مثل ماتكولين بيبي كلمن يعرف مكانه وعيشته ماطول يشوفني مو مناسبه لهيج مكان ارجع لعيشتي الاصليه تره عندي اهل وحياتي الخاصه مومن الشارع اني وكلمن ينتمي لبيئه شكل اعرف هذا الشي و يعرف كولش زين اشكد عانيت حتى اصير منهم واضل واكفه ابضهره ساندته واذا يشوف مو كفو هيج شي ومااصلح لهيج مكان يرجعني منين مااجيت

مؤتمن جان امدنگ بس يسمع ميرد والشيخ صافن بوجهي اشلون اتزاود ويه مرته بالحجي لبالهم بت البغداديه والكل يكدر يمشي كلمته عليه جدو يخزرني اشرت شكو

جدو- جاهو مؤتمن بعد ماعنده مجال ماخذ اربعه وكلهن بنات شيوخ

-جدو لو سمحت ثلاثة الرابعة تدخل اني اطلع  لو اعرف موتي بيها مااضل ثانية

-انتي انكتمييي وكومي منا

-اني اصلا ماردت اجي لو مايلح مؤتمن رضيتوا او لا اني الشيخه مالتكم الماعاجبه لايختار مؤتمن لهيج مكان حتى لايشوفني بوجهه

مؤتمن-  كافي بويه اشبيج

جدو- انتي مامتربايه ورادلج تربيه

-شنو مامتربايه لويش بس لانو دافعت عن حقي يعني لازم شنو تكولون اكول تم بس خلي اكولك تره التقبل على روحه الاهانه متصلح تكون شيخه حجيتها وباوعت لدعاء

جدو- من اكوم اجسر واسحكه محد يعترض

مؤتمن- يابه  اترخص انه كالها وكام  سحبني شافها صارت موخوش

مرت الشيخ كامت تكمز وجدو  يتهدد خاف اتصير سالفه ويتخاربون بس هو معصب جان كلش يمكن اني دست هواي بالحجي

رجعنا الطريق كله ماحجي ردت احجي كال انكتمي مااهيسلج حس 

-انكتمت مؤتمن بس والله وداعت ماما بس خليها ابالك لو اموت تعرف شنو لو اموت ماابقى على ذمتك دقيقه وحد بس اتسويها

-غزززززل غززل محد راح يورطني ويطيح حظي غيرج ولج انتي جاي اتلبسيها براسي كلما افر السالفة واطلع منها انتي اطمسين ابوي  بالزايد

-لويش لان دريت عليهن

-بسج لا انزل انعل ابو اصلج كافيييي بويه اشوكت تفتهمين انتي ماتكليلي 

-ماراح افتهم وبنفس اليوم الي تدخل بي دعاء اني اطلع

-منهووو مدخل استغفر الله انعل ابوها لابو عشيرتهااا كافيييي

سكتت  درت وجهي للجامه گلبي يغلي كل اشوية وتنزل دمعتي امسحها بسرعه وهو يستغفر  اعرفه مارايدها وادري يموت بدوني بس خايفه لا يضغطون عليه وتالي يحكم علينه بالبعد

وصلنه نزل ركع باب السيارة اجه فتح الباب دنگ راد ينزلني دفعته حيل  ونزلت

بين ماقفل باب السيارة دخلت للبيت   شفت خاله بلا شيلة كاعدة شاكة ملابسها  وصافنه بالبيت

دخل مؤتمن وراي شافها  اجه يركض يريد يعرف اشصار

درت وجهي لغرفة هيفاء وصرخت بكل حيلي …

لاتنسون التصويت⭐⭐⭐⭐⭐