رواية كفي والمنجمه الفصل الثلاثون 30 - بقلم Leo Alfatlawi

هو قالها، وجدّه باوع له متعجّب. ضحكت رجاء بصوت عالي، كل عقلها د يغيظها. كلهم بجهة وعيني كانت على مؤتمن، أريد أشوف ردة فعله شنو من يتزوج على أخته. أباوع له أصلاً مو يمه السالفة، مدنّك يكمل بأكله كأنما يعرف ما متفاجئ بالحكي، صاح جدّو: -وعليش يبوي تتزوج؟ إشبيها حرمتك؟ أحمد: -ما بيها شي بس أنا رجال أقدر أفتح بيتين، وحرمتي قضيتها يم أهلها من حقي أتزوج، هم أريد لي وحدة تساعد أمي. رجاء: -شنووووو؟ يعني صدق ناويها يا أحمد؟

والله أشعل أمك إذا سويتها! -شنو قلتي ولج؟ قالها وقام دفرها. طفر مؤتمن سحبه دفعه للجهة الثانية، قال له: -تريد تتزوج ولي، محد يمنعك، بس تمد إيدك عليها أكسرها لك. -تجيب طاري أمي أكسر راسها مو بس أمد إيدي، مؤتمن أختك كثير تتجاوز وسكت لخاطرك، بس وصلت حدها عدّل تربيتها. -مترباية أحسن من تربيتك، بس أكيد ردة فعل ما قاصدتها، ويلا ولي شوكت العقد؟ عود بلغنا نجيكم.

كانت رجاء واقفة صافنة بعد ما سمعت مؤتمن ما اعترض، صرخت صرخة رجّت البيت وكعدت قامت تلطم. بسرعة كعد يمها مؤتمن سحب إيديها، حضنها حيل، وأحمد طلع. صاحت: -لااا مؤتمن لا تخلي يروح، لا يا خوي صيح له صيح له! -كافي بويه هدّي. -بس امنعه، والله أصير له خدامة، بعد ما أتجاوز، لا تخليه يتزوج، ولك مؤتمن أموت ما أقدر أشوف وحدة ثانية وياه.

-هاي هيّا خليك يمي، عوفك منه، هذا ناويها ومكمل شغله، بعد ما أقدر أمنعه، هذا بيتك لا ترجعي له، عوفي يطقه مرض البايعك بيع، لا تهتمين. -كله من مرتك، جا منين له فلوس يتزوج لو ما تنطيه؟ هو جات له الفقر، قوا مدبّر لقمته. شال مؤتمن راسه يباوع لي، قلت له: -منين لي عزاء؟ لو شنو مصيبة تذبوها براسي؟ هو شامبو أسبوع ما خليت بشر ما توسلت بيه يلا جبتوا لي، أنوب زوج.

-والله هيّا اللي ملت راسه، كله منها هيّا اللي دكت له صدر، أحمد ما يعملها، يحبني. قالتها ولطمت، كلما راد يسيطر عليها ما قدر. عضيت شفتي متشمّتة أباوع لها، خلي تحس بطعم الشريكة شلون، لو بس همّه أوادم يحسون والباقي هيج بلا إحساس. رحت كعدت على الدرج وأتفرج شافية غليلي، لبالها ما يجيها يوم، مصطفى واقف يمهم قوا كامش روحه لا يضحك، باوع لي وغمز، دنّكت عن لا أضحك وأنفضح. كل صوت كانت تصرخه يطلع من قلبها، آخر شي قامت تصيح:

-طلقني ما أريد له طلقني منه! استوى مؤتمن يقول أي، وسمعنا طبة، اندارينا لقينا عمتي بالقاع واقعة. ترك رجاء وقام ركض لأمه، دنّك رفع راسها لحضنه، ضرب على وجهه شافها بلا نفس، شالها وصاح: -مصطفى، إلحق شغل السيارة! -دشمر عليها مي تصحى لا تخاف. -ولك أركض، راحت إلحقني يا خوي قاطعة النفسسس! -طالع قدامك بس جيبها يلا بسرعة.

طلع يركض ومصطفى ورا، من خبصتهم نسوا مفتاح السيارة، أخذته تركت بيبي لازمة راسها وراي طلعت، لقيت مؤتمن واقف ينكث بعمتي يريدها ترد لوعيها ومصطفى راجع، أنطيته المفتاح وقلت له: -مصطفى وين بيبي راح تروح؟ -تروح لك فدوة شنو بيها صبوحة؟ -مو هم متخربطة يمكن صعد ضغطها. -سوي لها ماي وملح بسرعة. دارد وقاطعنا مؤتمن وهو يصرخ: -فضهاااا ولك! تركني وراح يركض له، رجعت لغرفة بيبي لقيتها تون. -بيبي أسوي لك مي وملح؟

-أي موش أعرفن إذا ما أموت من الهم، أموت مجلوطة على إيد فروخ معتصم. -عزاء إش بيهم فروخ معتصم؟ والله إحنا أحسن أفروخيات بالعشيرة. جرتني سماح قالت: -غزل عوفي الجمع اشتغلي على الفردي لطمتي باللغة. -خابرتي مكرم؟ -أي ولج غير لقيته طاير ما خال لا شيخ ولا سيد ما رايح له، قال راح أجيب مشية تلوك بيها. -يمه فديت ابن عمتي، تعالي نروح يم هيفاء خلي نشوف شنو شعورها. -يااا غير رجاء يمها تروح تاكلها، بروح أبوك غزل مالك إيد بالشغلة.

-ولي لج غير أنا خطبت بيدي، رحت وين عمة أم مصطفى؟ -والله شكيت فيكم أنتوا من تتصفون سوا تسوون كارثة، يمه إذا درى مؤتمن شنو يخلصك؟ -ما راح يعرف بس اسكتي ونصي صوتك، بيبي راح تخمد، تعالي نصعد فوق. طلعنا لقينا تهاني بإيدها مي وتركض للغرفة مال هيفاء، عرفنا رجاء متخربطة عفناها، وكل من راحت لغرفتها، لبالهم ما يجي يومها.

دخلت غرفتي أخذت دوش وتمددت نمت، ما كعدت غير على لمسات مؤتمن يمشي إيده على ظهري، قلبت خلى راسه بحضني غمّض وعصرني حيل، حسيت صاير شي همست: -شنو بيك مؤتمن؟ -ماكو شي حبيبي، بس تعبان أريد أرتاح. -صدق راح أطلق رجاء؟ -لا يابا شنو أطلقها؟ ما عندنا بنت تطلق، تبكي كم يوم تبرد وترد، والله عجيبة أنتن النسوان شنو راح ينقصه الزلمة وإذا تزوج. -شنو تحس من تحكي هيج؟

ترى مثل ما أنتم تغارون على نسوانكم نفس المشاعر عندنا إحنا، ليش متخيلين الشغلة سهلة ما أعرف شلون د تفكرون؟ يعني هسه أنت ما راح تزعل من أحمد وتاخذ أختك بعد ما تردها؟ -لا أكيد لأن من حقه رجال، الله منطي صحة ومحلل الزواج وهو متمكن، عليش أعترض؟ يجوز أنا هم أتزوج، هم راح يجي يأخذك ويقول أختي. -عزا بعيني تتزوج؟ بعد ليش ما كافياتك ثلاثة؟ -وين ثلاثة بس عدد ومحسود عليهن؟

أشو أنا ما شايف بس هالغرفة حسرة عليّ عيني تصير على باب غيرها يجيك الرد السريع يعميها. -أي لعد خليها ببالك إذا أجت الرابعة مو بس عينك حتى رجليك أخليك تعاني من الشلل الرباعي. -عوفك من الرباعي وتعالي أقول لك شغلة. -شنو مؤتمن ترى تعبانة ونعسانة وخر! -منهو جاي صوبك بويه بس خلي أشوف هاي الحمرة نفس طعم البارحة...

العصر كلنا متحضرين للمشية، مخبوصين وعمتي وبنتها شادات روسهن نايمات من الهبطة، والزاد الحالة أحمد من أجا شاق حلكه والدنيا ما سايعته. حتى ما سأل عن رجاء، الفون بإيده ويراسل، عرفته ويّا الجديدة. فرحت وأنا أشوفه شلون طاير، الحمد لله ربي عوضه عن الظلم اللي كان عايش بيه ويّا أخت مؤتمن، عكس مؤتمن كان يباوع له والدنيا طالعة من عينه، نسى أيام تهاني. هيفاء واقفة بالباب وعينها بالشباك، تروح وتجي خلصت أكل أظافرها من التوتر،

أنطيتها إيدي صفنت قالت: -شنو؟ -أكليهن حبيبتي، ارحمي إيدك راح توصلين للحم. -ولج غزل قلبي راح يوقف، ما مصدقة وأخيراً راح أصير لمكرم، أوف يا ربي كون الأيام تطفر يجي الخميس. -أنطيه صبر يجوز مؤتمن يعترض، تعرفيه مزاجي وعلى ساعة يبدل رأيه. -اسم الله غير أموت، لا غزل لا تخوفيني حبابة.

سمعنا أصوات هوسة، ركضنا للشباك مال المطبخ نباوع لأن وصلوا، بدأوا يدخلون الزلم، صدق مثل ما قالت سماح، جايب الدنيا كلها ما خال شيخ ما جايبه، عالم كومة بحيث ما كفى المكان. كانوا ناصبين جادر برا هم كعد بيه عالم، دخل مكرم صليت على محمد خفت أحسده، لابس زي عربي طالع شكل ثاني. هيفاء شافته ساحت مكانها، سحبتها للطباخ قلت لها: -حبيبتي الجاي بانتظارك مو وقت موعة. -ولج اسكتي، شفتي شلون؟ يمه.

-عزا البت راح تخلص، ولج الجاي احترك ركضي. مصطفى: -خويّه كل شي لا تسوون، عندنا قهوجي بس حضرن الضيافة. أحمد: -وين هيفاء خويّه؟ حضري روحك ورا المشية العقد. -ليش غير يأخروا حتى نسوي حفلة؟ -لا مبين مكرم مستعجل يخاف، يردون بكلمتهم، مؤتمن يقول خلي تحضر بسرعة لأن جايبين حتى السيد. -يلا لعد هسه دقايق وتكون جاهزة يلا هيفاء. -ولج غزل شلون ألحق؟ -د تعالي للغرفة بسرعة نلحق هواي ساعة.

تركنا سماح على الضيافة، وركضنا للغرفة مخبوصين ما نعرف منين نبلش، شي على شي صح خربطنا بكيفنا بس طلعنا بنتيجة. ... واقفين ورا الباب بلّش السيد يعقد، أجا ببالي أول مرة عقدت على مؤتمن شلون كان قلبي يدق وخايفة، ضحكت من تذكرت عصر خصري لأن تأخرت بالرد. كملوا عقد وبدت عمتي أم مكرم وسماح بالهلاهل، طشوا الجكليت، أجواء صارت ما توصف الفرحة ملت روحنا. هنّه يهوسن وأنا جريت سماح أشرت: -شنو؟ -وين مكرم ما يدخل؟ -ياا وين؟

أول ما خلص طرده مؤتمن، قال له لا تجي منا للزفة. -عزا مسوي له حرب أعصاب. -هههههه أي ولج طلع يسب بيه، بس يلا أهم شي صارت إلنا ما ضل شي للخميس. بلشنا تحضيرات للعرس، عمتي ورجاء ما خلن إيديهن، حتى تهاني من فوق تباوع كانت ما عاجبها الوضع وهمها الوحيد كان مؤتمن شلون تخلي يدخل غرفتها. عمتي أم مكرم ما خلت شي ما جابته لهيفاء، ترستها ذهب من غير النيشان والغرفة اللي اختارتها عن طريق الحجز.

طلعت هيّا وعمتي أجر بدلات واشتروا التحضيرات، إش قد توسلت بمؤتمن أروح وياها ما قبل، قال وصيهن شنو تريدين يجيب لك وياهن. قبل الحنة بيوم طلعت تهاني ورجاء اشترن فساتين للعرس، ولا تقول رجلها راح يتزوج، يومين نست السالفة وعادي، خفت سوت شي تأذيهم لأن كان وضعها مو طبيعي، مرتاحة وتضحك. بيبي أصرّت تعزم بيت علوان للعرس، إش قد اعترض مؤتمن وحذرهن بس هنّه كان عندهن غاية من هاي العزيمة.

واقفة على السنك يم سماح وسمعنا مؤتمن عاط بغرفة بيبي وطلع وعمتي ورا تركض تتوسل بيه، باوعت لسماح أشرت: -شنو؟ -حذرهن لحد يقرب صوب بيت الشيخ ويعزم، وجدتي رايحة عازمة بدون علمه. -ليش يعني شنو تريد بالضبط هاي؟ -تريد تقربهم منه، جات لها روحها هيّا وجدي على نسبهم، ميتين على زواج مؤتمن من بنتهم، يريدون الشيخة منهم، هذا حلم حياته لجدي. -إذا سوّاها مؤتمن وروح بابا هالمرة أعوفه وما أرجع لو يموت.

-والله ترجعي له ما ترجعي له، من توصل لشغلة الشيخة جدي مستعد يدفنك وعرسك بس منتظر الشيخ ينطي كلمة. -يعني مؤتمن موافق؟ -لا طبعاً، وهو مبتعد عن هيج شغلة وخايف الشيخ يهديه بنته وساعتها ما يقدر يرده، ويدري راح تعوفيه إذا جاب عليك مرة، ما تشوفيه تعارك ويّا جدتي لخاطر ما تعزمهم، ما يريد تتطور العلاقة، كل ما جاي يبعد روحه عنهم، حتى كان حلمه يصير شيخ، هسه بطل، عوفك منهم شنو راح تلبسين باكر؟ ترى جايين الحبابات.

-ما أعرف مؤتمن داق رجل ما أطلع، قلت لي ولا تقول له أطلع، أمنيته يحبسني بالغرفة حتى جوا ما أنزل. -أنا راح أطلع وأفتح كاميرا وياك واختاري اللي تريديه. -ماكو غير هذا الحل لأن مؤتمن قافل، فدوة شنو حلو جيبي لي. -أنتي اختاري خيّه، ما لي شغل أنا لا تبليني ويّا مؤتمن. -أجيب لك فلوس لو تأخذين من مؤتمن؟ -لا هسه رايحة للغرفة، هم أنظفها وآخذ منه فلوس. -لعد شلون تخابريني؟ ما عندي فون ومؤتمن بعده ما قانع يرجع لي فوني. -وين نقالك؟

-بقى يم أحمد ولقيته مبدل الشريحة، استحيّت آخذه منه. -جا خلي يمك نقال هيفاء ماكو غيرها. -تمام شوكت تروحين؟ -ساعة وأطلع يلا ردي لغرفتك ولا تظلين هنا تراهن حاميات أخاف أطلع وتالي يطقنك. طلعت سماح وأنا صعدت غرفتي تمددت.

الظهر مؤتمن ينام بغرفتها وخاصة إذا عنده هم أو مشكلة لازم يروح لها، ما أعرف طبيعة العلاقة اللي بينهم، مرات أشك ذوله مو متزوجين مثل باقي البشر، أشو ما أشوف بينهم مشاعر متزوجين، واللي يشكي لها من زوجته الثانية، وهيّا تتقبل الأمر وتنصحه شلون يعاملني، مستحيل تكون زوجة وتغار على رجلها، علاقتهم تحيّر. بالليل بغرفتي تهاني مطيريها من الجدول، وصلت سماح اتصلت بيّا على جهاز هيفاء.

افترت على كومة محلات ماكو شي حلو لو طويل أو منفوش، وأنا كل ما أتذكر راح يجن نسوان الشيخ أدقق باللبس أكثر، أريد شي كون محد تتجرأ تلبسه، أريد أدق ناس وأيأسهم من مؤتمن. هيّا تفتر وفاتحة كام، وصلت يم بدلة مفصولة تنورة قصيرة كلوشة ومن فوق مثل الستيان شوية أعرض متصلات من البطن بنجمة، قلت لها: -هاي. -غزززل هاي شنو؟ غير مؤتمن يعلقك من شعرك عقلي. -لا حبابة والله حلوة. -لا شوفي هاي مثل السمكة حلوة. -هاي مو مال حفلات مقبطة.

-ماكو لو هاي لو ما أجيب، لا تسوي لي عركة ويّا مؤتمن، ألف مرة وصاني كون مقبطة ومستورة. -روحي لعد ما أريد حتى الحنة ما أحضرها، يلا. قلتها وقفلت الفون وقررت ما أحضر الحنة. رجعت لغرفة هيفاء أسفط بأغراضها أحضرهن بالجناط وأفكر بمؤتمن ومرته نفس الطينة، من هيج متوالمين نفس التفكير، الله خالقهم قطعة وحدة.

خلصت ترتيب الجناط د أضم الأحذية، عجبتني وحدة منهن سودة صيفية بس بيها قيطان لفوق كلش حلوة، عزلتها، رجعت أسفط وآخذ لأن أدري مكرم يخليها تطلع مو مثل الغثة اللي عندي. خلصت الترتيب وأخذت الأغراض د أصعد صارت رجاء بوجهي، نزلت هيّا وتهاني يضحكن، باوعت لي قالت: -شنو هم ما خلاك تطلعين؟ -أمم يغار ما يريد واحد يشوفني، قابل مثل غيري تقول زلم يخليهن يطلعن وحدهن لأن يعرف محد يقلبهن.

-ظلي قنعي بروحك، قولي مستخسر يخسر عليك فلس، خالك جارية بس للنوم، يقضي وياك أيام لحد ما تجيب مرته، جا وين يروح؟ سودة عليّ، كلك أخص هالأيام يم هاي. -أقول ولي عن طريقي، يقضي أيام ما يقضي المهم تالي الليل ينام بحضني، مو مثل باقي الناس ينامن سوا وحدة تواسي الثانية على مصيبتها. -لا يا قلبي عايفته بمزاجي وإحنا أم جهالهم يعني الأصل، الباقين هنا مو كم يوم يخلصون نزوتهم ويشمرونا.

-عود ميخالف، خلي تخلص النزوة أول وبعدين فكري بهاي السالفة، يا خوفك النزوة طول عمر كامل. دفعتها وصعدت لأن هواي تلغي ما لي خلقها، دخلت غرفتي رتبت الأغراض بالكنتور، رن الفون مكرم ردت أول كلمة قالها: -ها روحي وينك؟ أنا بالباب. -عزا يا باب مكرم؟ ولك ما هيّا هيفاء. -أنعل... ولج شنو جهاز مرتي بإيدك؟ والله قمت أخاف أحكي كلمة بسببك أتخيل تطلعين بوجهي. -عوفك من وجهي ما راح أحضر الحنة. -أها عليش يابا ما تحضريها؟

-مؤتمن ما خلاني أطلع أشتري وأختك ما ترضى تشتري لي اللي أريده، تريد تشتري لي فستان بيبي ما تقبل بيه مو أنا. -وينها سماح؟ أنطيها لي أنا أحاكيها. -ماكو طالعة بالمول. -روحي بويه أخذي الناقصك من هيفاء وأنا هسه أخبرها تجيب لك اللي تريديه، ولا تضوجين روحك، كم غزل عندنا يابا؟ تآمريني أنتي وجهاز حرمتي بلكي بعد ما تردين عليّ إذا ما تردين تسمعين شي خارج القانون.

-ههههههه لا هيّا تقفله لما تجي يلا باي، ألحق خابر سماح قبل لا ترجع. قفلته وضحكت، إش قد بطران يقول لي أخذ، هو أنا أخذت شنو شي حلو من مرته لباله أنتظرته. سفطت العطور بنت شعشبونة والله ذوقها حلو، خليت أقلام الحمرة والماسكات ويّا أغراضي.

تراكات كم واحد هم ماخذة منها، سفطتهن أخذت واحد دخلت للحمام سبحت ولبسته، واقفة أمشط شعري أسمع سماح تصيح لي من جوا، لفيته ونزلت لقيتها د تدخل غرفتها، رحت وراها شمرت لي العلاقة وتتأمل لي صفح. -شنو إش بيك؟ -غزيلان أنا ما لي دخل لا توقعيني بمصيبة ويّا مؤتمن، ولج تشكيني لمكرم تخليه ينزل عليّ بنص السوق؟ -لعد تستاهلين أقول لك اشتري لي ما تقبلين؟ أنتي ومؤتمن طينة وحدة نفس العقدة. -أمداكِ نفس العقدة لو نخاف عليك من العين؟

غزل إذا شافك مؤتمن بهذا اللبس يحرقك، ولج حتى من اشتريته استحيّت من الزلمة، أخذته بدون لا يشوفه ولفيته بالعلاقة، ولج يخزي شورت وستيان مقتنعة أنتي؟ -أمم مقتنعة بس أنتي لا تفتنين لمؤتمن وما لك شغل وهنّه بس نسوان ليش هيج قاتلين روحكم؟ -اكو من اللي يفتن ومؤتمن إذا سمع ما يرحمك لأن حذرك، ترى النسوان راح توصل لزلمها وتسولف عنك هناك، على قولة مؤتمن حتى راح يتخيلوها بحضني شلون راح تقول مو بس يتخيلون شكلها.

-ترى كلش أوفر على فكرة، أنتم عوفك من مؤتمن هذا الثاني شنو؟ -بلكي تبدلين رأيك وتقبلين تلبسيه. -عيع هذا أنطيه لشعشبونة تلبسه، يلا حبابة ارتاحي وحفي لي وجهي أكيد مؤتمن ما يخليني أروح للصالون هاي الشغلة متأكدة منها.

متمددة على الجرباية وأفكر ببنت الشيخ شلون أخلص منها، صدق هاي إذا أبوها هداها لمؤتمن ما يقدر يرده، بالأخص من خسر فلوسه بالمشروع وهو الوحيد وقف جانبه وسنده، من غير الفصل اللي دفعه وما رضى يأخذ منه ولا دينار وغيرها وغيرها، مفضل عليه بهواي أمور تخليه يخجل يحكي ويا مو يرده. صفنت شوية تخيلت يأخذها، عزا غير أقتل روحي وأموت بساعتها. شلون أخلص منهم؟

ماكو غير أبين مؤتمن قاتل روحه عليّ وما يشوف غيري، لأن مستحيل أخلص منهم، بلكي يحسون ويبطلون، وأعرف هنا شغلة الإحساس مفقودة، بس هم أجرب ما خسرانة شي لأن ما عندي أي طريقة. باوعت للميز صغرت عيوني ابتسمت وقمزت بسرعة وقفت، خليت مكياج على السريع ورحت للكنتور، طلعت أفضح شي عندي لبسته، رجعت للميز حمدت ربي عطور هيفاء عندي لأن كلش وقتهن. سبحت بالبودرة والعطر، بعدني أصبغ بأظافري دخل، أول ما شافني ضحك قال:

-شنو اليوم منهو قارص غزالتك؟ صفنت بوجهه لأن حسيت كاشف كل لعبي، رفع حاجبه أشر: -شنو؟ -ها ماكو بس هيج د أقضي وقت. -أهاا قلتي وقت تمام بويه كملي. قالها وشمر سلاحه على الميز، أخذ المنشفة وراح للحمام، بين ما كملت الصبغ بعدني د أقوم، انرفعت وشكمشت برقبته بسرعة، دنّك باسني وقال: -ترى جاي تعبان لا تفكرين بشي. -شنو مثلاً أفكر؟ قلت لك د أقضي وقت. -متأكدة ما متلاغية ويّا وحدة منا منا؟

-هئ وبعدين، عادي من تقول تعبان أعرفك قبل لا تحكي، ترى هذا آثار التقدم بالعمر حقك، عاذرّتك رجال صار لك سنة من دخلت الثلاثين، جماعتك ودّعوا من زمان. صغّر عيونه يباوع لي بمكر، سويت روحي مو يمه لأن أعرف هاي نقطة ضعفه من أقول أنت جبير يخاف أفكر بغيره. -يلا نزلني لا هم تقول ظهري قام يوجعني من وراك. -بويه أنتي قد الحكي هذا؟ -مؤتمن نزلني. -موش بعدين تظلين تتوسلين وتبكين؟

باوعت له باستهزاء ضحك وشمرني على الجرباية، أعرفه ما يفوّت ليلة ويكعد عاقل بيها، بس كان حاب يغيظني، تالي إلّا إيه انقلب عليّ، صح محد طاح حظه غيري وشبعت عضات بس هو هذا اللي أريده... قمت لفيت روحي بالجرجف الجرباية رحت للحمام، باوعت جسمي ما بيه أثر هواي وهذا الشي ما يفيدني، كنت ناوية على أكثر. سبحت وطلعت لقيته يقلّب بجهازه، تمددت يمه باوع لي ابتسم ورجع يكمل بالجهاز. -على شنو د تضحك؟

اللي يشوفني يقول ما متزوجة، أثر واحد يدل على الزواج ماكو طبعاً، أول بوسة تتعب وخر سوي لي مجال خلي أنام. كنت أحكي كاتمة ضحكتي قوا أريد أبين جدية لأن شكله يخليني أضحك غصباً عني، وهو عاقد حاجبه متفاجئ من الحكي. لفيت روحي د أنام قال: -والله موش صوجك عود جاسرة خاطري وأتعامل وياك بهدوء، أقول خطية ما تتحمل، شو تعالي أعلمك على الزواج الأصلي شلون.

سحبني وعيني ما تشوف إلّا النور، خلاني أصيح التوبة إذا حكيت بعد، كلما ردت أخلص نفسي ما قدرت، من صدق خلاني أندم وأتوب بعد أتحارش بيه، وأنعل أبو المكايد، شوفني الكرة الأرضية مربعة، ما تركني لما بكيت. عصر وجهي وقال: -مرة ثانية لعبي على قدك يلا يا حلوة قومي من يمي. رجع دنّك عضني من شفتي حسيتها انشلعت، دفعني وقام أخذ المنشفة وراح للحمام.

حسيت من صدق جسمي مصلوخ، قمت للمراية مال الجرباية أباوع، صح ذني الآثار اللي ردتهن بس دفعت ثمنهن بطياح حظ، لفيت روحي ونمت. طلع من الحمام نكث شعره وأجا يمي تمدد، سحبني لحضنه باسني قال: -تأذيتي بويه؟ -هئ بس أريد أروح باكر ويّا البنات للصالون. -ماكو روحة، عندكِ أغراض اشتغلي هنا. -نسوانك وأختك يرحن أي أنا لا، ليش هالتفرقة هااا؟ -بويه محترقات حقهن يرحن، أنتي شنو ما تحتاجين بنيّتي؟

-مؤتمن فدوة حبّاب والله يظل شغل الكوافير أحلى ومحد راح يشوفني، هنّه بس بنات. -حتى بنات ما أريد يشوفنك غزل، لو بيها مجال حتى للحنة ما أخليك تنزلين. -ليش يعني فدوة مؤتمن حبّاب؟ حكيتها بتوسل شوية وأبكي لأن من صدق مليت من تصرفه. شافني هيج حضني حيل باسني وقال: -والله ما أقدر بويه، وحق عليّ أموت من أشوف أحد يباوع لك، ما أريد أحد يشوفك غيري، موش أنوب تكعد تلعب بجسمك وشكلك بويه، غير أترسها بارود إذا خلت إيدها عليك.

يئست ما منه هذا، ظليت على نومتي معصورة بعضّه، وهذا الشي الوحيد اللي مصبرني على عيشتي وياه، مع العلم ما شفت من عيشته شي حلو، بس تالي الليل من ألقى روحي نايمة بحضنه ويبوس بخدودي على كيفه خايف عليّ، يهون عليّ غيرته وتصرفه اللي ما تنطاق. من التعب نمت ما كعدت للصبح، قمت لقيته يسولف ويّا سماح، شافني كعدت قال: -غزل لبس مستور ممنوع يطلع إصبع من جسمك. -أمم. -سماح بويه عينك بيها، لا تخليها تطلع إذا ما تشوفها متسترة. سماح:

-أنا ما لي دخل وصي أمك غزل ما تسمع مني. -كونها صدق وما تسمع حتى أعلقها من شعرها، شوفي لج لعب جهال وتعري ماكو، سمعتييي؟ -أي مؤتمن شنو بيك؟ أصلاً ثوب جابته سماح مغلق. -خوش حكي بويه سماح، أي غلطة اتصلي بيّا أجي أسحلها سحل. -هاااي سمعتييي؟ -وأنا أريدها ما تسمع لخاطر أصلخها، يلا بعدي عن طريقي تأخرت. طلع أجت سماح قالت: -هاي قدامك، وأنوب أقعد على أمه من الصبح، قال لها تراها زعطوطة عينك بيها ما تفتهم خليها يمك.

-عزا أنتي أجيتي تفضحيني، شنو تخازرين من يحكي؟ -لأن أعرف شنو محضرة مصيبة غزل، والله تنطقين. -ولي أنتي وياه، والله بطران هذا مصدق روحه لباله راح أسمع كلامه، لعد البارحة هاي العضات والقراميص لمن؟ غير لخاطر البدلة. -حذرتك ما لي شغل بعد، بالأخص من سمع حريم الديرة كلها جاية يعني راح تصير بلسان العالم كلها. -عود ميخالف. -أنا ما لي شغل تتحملين اللي يجرى لك، ويلا قومي فضّينا. -وين هيفاء؟ راحت لو بعدها؟

-لا راحت ويّا أمي والبنات، بقينا بس أنا وياك وهم بس أخلص شغل أروح وراهن. -أي حظوظ لعد مثل حظي، كاسرين قلبي وبس الح يقول لي بطلي حتى الحنة لا تحضريها، أعرفه معقد. -ديلا هسه اللي يسمعك يقول صدق تحتاجين صالون، فضّيها غزيلان. -قمت بس روحي هسه جاية وراك. طلعت قمت وراها سبحت نزلت، لقيتهم ينزلون بالكوشة جايبينها حاضرة، خلوها بداية الصالة رتبوها وطلعوا، رحت يمها وقفت د أباوع وأجا مصطفى قال: -بعد لكِ خلي آخذ صورة.

-يلا حتى أنا وراك بسرعة. ابتعدت شوية أخذ صورة لمحته دنّك يكتب تحتها، رحت يمه وأشوف كاتب: "باركوا لي وعذروني ما قدرت أعزم لأن صارت الشغلة بسرعة". وأنطاها نشر. -عززا مصطفى شنو تسوي؟ -بس انتظري لحظة وهذا أول تعليق اسمعععع شوووف. -شنو؟ -ههههههاي شوفي التعليقات خرب العالم انخبصت، حسبالهم صدق زواجي، تعالي خلي نضحك.

كعدنا نقرا التعليقات، اللي يسأل شوكت واللي يعتب على مؤتمن شلون ما قال، بعد حتى الاتصالات ما يلحق عليهن، شبعنا ضحك لحد ما رن مؤتمن واحد يشمر الفون على الثاني. -رد مصطفى. -منو هذا؟ -ولك أخوك رد هسه يجي. أخذ نفس وقال: -ألووو... أوصل وأحرق عشيرتك، تمسح المنشور وتنزل اعتذار، تقول لهم كنت أقندر على راسي وأجذب، وألعن أصل أهلك اليوم بس خلي أوصل. -شنو يا خوي؟ -أنعل أبو أخوك جايك وأقول لك شنو. عفته يتفاهم وياه رحت للمطبخ.

مبين هواي متصلين يعتبون اللي واصلة وياه لهنا. كملت شغلي على السريع، سماح راحت للصالون، بقيت بس أنا وشعشبونة وصبوحة، الولد كلها يم أحمد راحوا. صعدت غرفتي بلّشت شغل بروحي من الظهر للرابعة العصر، يلا خلصت لما سمعت جابوا العروس وأنا بعدني ألبس بالحذاء، شعري سويته كيرلي صار ومكياج هادئ ويّا صار شي مرتب.

كملت قمت يم المرايا أباوع صدق استحيّت من لبسي، ما توقعت هيج قصير، كون أبد ما دنّك لأن يطلع المستور كله، خو بطني منورة طوخت اسم مؤتمن بالفراشة ردته يبرز أكثر، وصدق برز، أسمع الهلاهل بدت يعني معناتها العالم واصلة من زمان لأن حتى الملّة بلّشت تقرا. آخر لمسات رشت عطر وطوخت الحمرة، نزلت جوا دخلت للصالة تفاجأت بالعالم الجاية إش قد. الحنة كانت حلوة والعروس طالعة غير شكل مو هيفاء تقول وحدة لخ، سلمت عليها وباركت لها.

أشرت لي على صدري صعدت البدالة لقيتها نازلة. ومن إيد لإيد أسلم، عمتي أم مؤتمن تسحل بيّا مثل الماعز اللي وراها، شنو وحدة أسلم عليها لازم أنا وراها. وكل وحدة تسلم عليها لازم تشرح قصة حياتي، هاي بنت معتصم زوجة مؤتمن الثالثة. والله الثانية عمة بس هيّا مصرة وأنا وراهم بس أوزع ابتسامات انشق حلكي. وأجان أوصل يم نسوان الشيخ، من كثر المحبة أجيت أوقع بحضنهن وأشبع بوس بحبيبات قلبي، سلمت على الكبيرة تباوع لي وعاوجه حلكها.

على شنو عاوجه حلكك؟ تقول غورله لابسة شيلة وجهك نصه طاير من كثر الحقد. سلمت على الباقيات وصلت للصغيرة سحبتني قالت: -تعالي كعدي يمي خلي أشوف هالجمال منين محصله مؤتمن. كعدت هاي اللي تريح قلبي، بناتها هواي سلمت عليهن هيج من بعيد بس عيني بالصغيرة كانت كاعدة على أعصابها بس تخازر بيّا. مرة صغيرة اسمها ريم ظلت تسولف وتضحك وياي وتسأل هواي أشياء وأجاوبها، تباوع لي وتضحك أنوب اندارت للقاعدة يمها قالت:

-بالله موش قلت له للشيخ خو طلع صدق الحكي، دشوفيها مطقّعها أطقّع مؤتمن. -حقه والله يا خيّه أنا اشتهيتها موش أنوب زلمة ويشوفها قدامه أملونة. -هههههه الشيخ يقول مؤتمن هالأيام ما عاجبني وضعه، يسولف وياي قوا فاتح عيونه دايخ حسباله مريض، قلت له لا والله مدولبته البغدادية، تلقيه للصبح قاعد وياها ما يلحق ينام. باوعت لها فاتحة عيوني همست: -عزا إش قد فشلة لا فدوة ترى ماكو هيج شي.

-لا ماكو مبين من أزرورك ذني ناقشهن نقش، مبين البارحة حامي. كانت تحكي وتباوع لبنت الشيخ وتبتسم بشماتة، هيّا تحكي وأنا طايرة أريدها بعد تزيد، هو هذا اللي كنت راسمة له. وهاي الله دزها أجت رجاء كعدت يمنا يم بنت الشيخ قدامي، خزرتني أشرت لي على رجليّ عرفت على شنو، سديهن حيل علمود ما يبين شي. ظلت تبسبس ويّا بنت الشيخ وذيج تبتسم، ما سمعت لأن على كيف لما أجت وحدة سلمت على نسوان الشيخ وكعدت يم ريم سألت عني، قالت لها ريم:

-هاي بنتي الكبيرة. -ياا جا ما ندري عند الشيخ هيج بنت، خيّه إذا أجينا ما تنطوها، ابني خو تعرفوه خوش ولد وخريج هندسة، والله خليها بعيوني من زمان ندور هيج وحدة. -هههههههه يا خيّه أتشاقى وياكِ هاي حرمة مؤتمن الصغيرة، غير يشردنه. -يع خيعونه على هيج مرة بس موش جنها صغيرة عليّ؟ -موش صغيرة ضامها بحضنه يخاف عليها من حتى روحه. رجاء: -غزززل قومي للمطبخ لا تظلين هيج أمفهية يلااا. عفتهن وقمت يم الملّة لأن صار وقت الجلوة،

وقفت د أكمش الشمعة قالت: -شنو أنتي كل ما جاي تصغرين وتحلوين؟ -شكراً خالة عافية، أنطيني طاقة إيجابية بعد. هيفاء: -شنو أخاف معوزة غرور زوديها علينا. -اسكتي أنتي عروس ما يصير تحكين، خلي المرة تحكي. ضحكت الملّة وقال: -يلا نبدي. جلّتها كانت الكلمات اللي تقولها حلوة، قامت بيبي لبستها قلادة جبيرة، وعمتي أم مكرم لبستها هم كومة ذهب. أنوب الملّة وقفت تعدد: -هاي هدية من جدها، وهاي من أخوها الشيخ مؤتمن.

أباوع تخم جبير داز بإيد سماح حتى محد يعرف شوكت جايبه وهو على الأساس زعلان. هيّا لبستها وهيفاء بكت لأن مؤتمن لحد الآن ما حكى وياها. ردت قالت: -هاي هدية من أخوها الصغير. طلعتها، قوا لزمت ضحكتي، خرب يومك مصطفى جايب لها قلادة حية. افترت الملّة تريد تلبسها ما تعرف منين لفتها من ذيلها ما رهمت، دندل راسها فرت راسها طاح ذيلها، آخر شي ردتها بالعلبة وهمست: -الله يهدي أخوك ما لقى غيرها شنو هاي؟

-عزا والله مصطفى عنده سوالف، هاي إش قد موديلات جايب هاي؟ -يا خالة أخوكن ما أعرف شنو يفكر، يااا شوف أنوب المحبس شنو؟ -شنو خالة وينه؟ -هذا عقربة لا خالة فال موش حلو تركي. هيفاء. لا خاله جيبي البسه، فدوة لأخوي هذا الروح مالتي شنهو ما ألبس هديته؟ ادنيت يمها شاورتها: ولج ذني أُمج وبيبي ديذكرج بيهن أخاف تنسيهن. والله أول ما شفتهن عرفت شنهو يقصد. كفلت الملة رقصنه آني وهيفاء، كل شوية سماح تجرني صاحت: طلع شي نزلي البدلة.

أنزلها وأرجع للرقص لمن تعبت لأن الحذاء عالية نزعتها شلتها دأروح للغرفة أشمرها صاحت: شعشبونة روحي وزعي ويه البنات. رجعت لبستها وبلشنه آني وسماح بالتوزيع، هيه شايلة السلة وآني أنطي، كلما أوصل يم وحدة تتباوع وتعوج حلكها. أمشي وعاضة شفتي، هسه آني وين أعرفهن وهيج يباوعلي، وصلنه يم وحدة كاعدة يم بت الشيخ الجبيرة، دأنطيها رفعت الفستان كمزتني.

إشبيج خية كمزتي، ردت أشوف نفسه العدنه لو يختلف، عليش چاتل روحه مؤتمن ويومه كعدة إشكبرها وفاصلين. بت الشيخ: يااا هسه أنوب زلمنه گاموا يعيرونه بيها، كلما فچينه حلكنه وطلبنه شي ردوا لو تشبيهن البغدادية چا إشطلبتي. حظ مدولبته وراها وفگت عيون زلمة علينه تگول بس هيه الله خالقها مرة. سحبتني سماح كالت: أمشي يا غضب الله خلي يسمع مؤتمن اليوم يقوم قيامتج.

بين ما كملنه التوزيع أحس روحي بهتت، خلصت الحنة طلعن النسوان، ضلن كم وحدة من ضمنهم نسوان الشيخ للعشة، شمرت حذائتي دخلت للمطبخ شربت مي. سماح: غزل ليفوك عدل، غيري ونزلي، كفيلج العباس إذا لگفج مؤتمن ما يرحمج، غزيلان لحكي على رويحتج. ما يجي هسه عدنه نسوان، خليني أفتر أدق العالم شوية. غزل انظبي وصعدي يلا. عمتي: وحدة منجن تودي مي للنسوان. آني عمة، گلتها وبسرعة أخذت الصينية وركض قبل لا تحجي سماح لو تروح هيه.

دخلت أوزع مي وتذكرت آني ما أكدر أدنگ، صفنت شافتني ريم ضحكت كامت اجت يمي. كالت: دجيبيها تره وروح أهلي هسه يفردشنج ذني، لا تحسبيهن نسوان تره عيونهن أكثر من الزلم. ضحكت أنطيتها الصينية راح توزع، درت وجهي شفت تهاني كاعدة مادة رجليها وتاكل بشفايفها، رحت كعدت يمها مددت رجليه همست: شلونج تهاني؟ هلا يبعد جبدي شلونج، شنهو رأيج بدعيوة. منو دعيوة هاي؟ ياع چا غير بت الشيخ الصغيرة مرة مؤتمن الجديدة. بعينج مؤتمن ما يشوف غيري موتي.

صاحت: دعيوة تعالي خية يمي گعدي. كامت اجت كعدت يمنه باست تهاني، أباوعلها تمسح على بطنها وتضحك، لعبت روحي من اللواكة. تهاني: بس خلي يصير اللي بالي، نذر لسيد محمد لَطش چكليت بضريحه وهلهل للصبح. إن شاء الله. دعائي ما يطيح الگاع كون هالمرة هم يوصل. دندعيلي بلكي الله ولنه صاير من قسمتي. عينك عينك أكابلك وبز عينك، عزى كاعدات يتفقن على زوجي، شلون اثنين. انتجيت باوعت لدعاء ابتسمت وعضيت شفتي. دعاء: شكو تضحكين؟

لا ما أضحك، بس هم لا تتأملين من دعائها لأن الدعاء اللي يوصل لو من حرة طاهرة لو من عاهرة. أويجوز صدگ الثانية ضبط، وإنتي حبي خليج بكرشج تره كولش الخباثة ما لايگتلج، ولا تخليني أخلي يشمرج مثل ما هجرج وتعرفيني أسويها. سهلة يغزيلا يجي اليوم وأذكرج، وهسه هم بس يوصل مؤتمن أگله وخلي أشوف إنه موش خدامة ضالة بس للإهانة والطياح حظج. لويش ما تبتي، نسيتي من رحتي شكيتيني وكتلج مكاني؟ دعاء:

مستحيل مؤتمن يعمل هيج، هذا تربية ابوي وبمضيفنه حگاني ويعرف الله. اللي تشمر روحها برخص تعيش برخص، والكل يعرف الشيخ مؤتمن تربية المضايف على گولتج، چاتل روحه عليه بس رايد رضاتي، لويش قبلت بي؟ غير هو اللي چتل روحه وأخذ زلم الديرة وطلبها من أهلها. ههه ما گالج أبوج لويش هيج سوى؟ يحبها. لا، بس حتى يثير غيرتي عليه، لباله راح أهتم، من شافني مو بحاله ولا شايفته گدامي شمرها ورد يتوسل بس رايد رضاتي. من هيج راد يچتلج.

ههه منو يچتلني ولج، فضيحة صارت ملت الدنيا من غير الدم الصار والفصل اللي أبوج دفعه، يادوب راچدين وروح بابا غيرهن ما حصلت وهم ضربني لأن تجاوزت عليه، وبنفس اليوم أخذت حقي شمرت مرته وبنته من الدرج، وبدل ما يعاقبني ركض حضني يهدئ بيه لأن شافني بجيت. عصرت وجهه اللي صار أسود من الحرگة، تباوع لتهاني، رجعت انتجيت متشفية، كل اللي ردته يندق بهذا اليوم، الحمد لله گدرت أموته قهر، اجه وياي عدل.

حسيت دآخذ انتقامي براحتي من كل الصار بيه بسببهم وخاصة من تهاني، كل ما ترفع رأسها وتشوف العلامات اللي بصدري أحسها تريد تگوم تفترسني، هسه هاي وعرفتها شريجتي وميته حقها مهما يكون زوجها وهم تغار عليه. بس دعاء مدري دعيوة تباوعلي تريد تاكلني، لويش قطعت تفكيري ريم وهيه تگول: غزل وين سويتي الوشم اللي ببطنج وشنهو مكتوب ما أشوف. بالشمال هذا اسم مؤتمن بي. على طاري مؤتمن أسمعه كال: يا الله، طريج.

هو كال يا الله وآني گلبي صار برجلي، احتاريت وين أضم روحي. دخل مدنگ ما عدنه غربة بس نسوان وبنات الشيخ، ذولة عادي ناس تفوت على ناس. صارت عيني بدعاء اللي عيونها عليه طول ما هو واگف، مع العلم چان مدنگ ما رفع رأسه، أباوعلها تباوع لطوله، گوة صبرت روحي لا أگوم أفترسها. اترخص واندار صعد، راحت ورا رجاء صعدت، عرفتها تريد تسأل عن أحمد.

وعين دعاء ورا، والله بمخيلتي أگوم أجر السلاح من متنه أفرغه براسها، هو آني كافي عليه اللي بالبيت كوه حافظته منهن، أربعة وعشرين ساعة كامشتله حراسة علمود لا يروح لوحدة منهن، جايتني البطرانة غير أمرعطها إذا خلته ببالها. ظليت كاعدة گلت بلكي شوية وينزل يروح لأحمد لأن يمنه نسوان، مرت أقل من عشر دقايق دخلت سماح كالت: مؤتمن يريدج. أريد أگوم ما أكدر، باوعت لسماح ودموعي كوه لازمتها، ذني يتنادسن ويضحكن، وسماح اجت جرتني،

گمت همست: سموح خلصيني. والله مشكلتج، أنوب شافج بعد ما يفيد تغيرين. عزززا بعيني، زين شنو وضعه معصب لو لا؟ الله يعينج خية روحي، الله يهدي عليه، ياااا شوفي دعاء أنوب شلون تباوعلج. خلي أنبدل آني وياها، قابلة هيه تروحله وآني أكعد مكانها. أمشي لج، كاعد يفور لا تتعطلين تزيديها. شنو يعني شيريد يحجي، هو بس نسوان لويش مصعبها هيج؟ عود گليله، يله روحي.

رحت وصلت للدرج أخذت نفس صعدت، دخلت لگيته وكاعد على الكرسي يم الميز ورجاء واگفة تباوعلي وتبتسم بحقارة، إشرلي تعالي. عفت الباب مفتوح، وگفت يم الثلاجة خفت أتقدم أكثر، كال: شنهو هذا اللي لابسْته؟ تره بس نسوان ومحد شافني وكلها لابسة هيج. بعدني ما مكملة انهدت رجاء بلشت من الخطبة مال المرة لزرزري المطگعة للشيخ، شلون يگول مؤتمن دايخ ورده على مرته، ما خلت حتى شلون ما يعدل حتى يرضيني، بس ذني كلهن چان بس يسمع ويغلي ما رد.

لحد ما گالتله: زلمهن يعيروهن بيها يگول لو مثل البغدادية چا إشسويتهن. هنا انفجرت القنبلة، گام دفع رجاء وقفل الباب، اجاني أريد أشرد لو أنضم اختفت الأماكن كلها من گدامي. بقيت متصنمة، كال: شنهو گلتلج؟ بعدني ما راده يجيني راچدي گعدني مكاني. اتقرب رجعت ليورا لو أدري ما راجعة، شاف رجليه شلون طالعات وهو تخبل.

دنگ عليه شالني من شعري ضغط على سنونه وما أحس غير اجاني راچدي ثاني شمرني مسافة مال واحد صدگ واصلة وياه، حسيت جلدي انصلخ، توبني صدگ من لبس القصير. اتقدم رجعت ليورا أباوعله بخوف والشهگة بگلبي، شال رجله لميت روحي بسرعة، ما أسمع غير دفر الچرباية بحرگة گلب، لميت روحي يم الحايط. كمش رأسه وكال: شأعمل، وعلي راح تخبليني. گعد على الكرسي دنگ عاصره، أخذله دقايق مسح وجهه وطلع چكارة ورثها، سحب نفس طير نصها، نفخها وباوعلي بغضب،

شهگت صاح: إششش نفس إذا حسيت منج أدفنج. كتمت صوتي بس دموعي تنزل، كل شوية أگول هسه يگوم يجاويني. إشگد تندمت على اللي سويته، هسه شنو استفاديت، قابل راح أمنع زواجه منها، من صدگ اكتشفت عقلي صغير وتصرفاتي مال وحدة ثولة. خلص چكارة ورث الثانية وآني على گعدتي أخاف أتحرك، بس صوت الشهگة تطلع غصبًا عني، دنگ انتجه على رجليه باوعلي عيونه حمر. گال: راويتهن شافن الطگع اللي بجسمج ارتاحيتي؟ سكتت.

چان گلتلي أشتغلج عدل لخاطر تطلعين الغل اللي بگلبي، والسالفة توصل صدگ لزلمهم، شلون ماخذ راحتي بيج. والله مؤتمن. لا تحلفييييين، كم مرة گلتلج لا تجذبين بالحلف. ما دأجذب بس هاي رجاء چذابة زودتها. شنهو چذب يعني ما گالتلج مبين البارحة چان حامي. بس هاي صح. ما تارك حريمي وراكض وراج مثل الزمال لخاطر أرضي حضرتج. مو هيج حجيت. موش هيج خوش، ما معيرهن زلمهن بييييج. هاا؟

شنهو هاااااا يا غضب الله، شنهو هاااااا غزل ناويه تجلطيني، بويه گولي خلي افتهم راسي من ساسي على شنهو ناويه فهمينيييي. كولش ماكو بس ردت هاي دعاء تندق من تشوفني هيج. هااا هنا مربط الفرس، وحدة جديدة براسج وتردين تراويها جسمج، إنتي شنهو ما عندج عقل، كم وحدة شافتج وراح تسولف لزلمتها ويتخيل الصار. محد وبعدين إنت مريض نفسي، لويش تفكيرك كوله هيج. منهو ولج مريض نفسي؟

إنت، ولو تموت بعد ما أخليك توصل يمي علمود تبطل تتخيل هيج وتحجي عليه، تره مليت من تصرفاتك خنكتني، واحد متوحش مريض روح عالج روحك بلكي تبطل غيرة وشك بالعالم. بعد كملي شنهو رايده ست غزل. اطلع من غرفتي بعد شعراية وحدة ما تلزم مني لو تموت ما أخليك توصلني. هز رأسه وبعد؟ خلي عندك كرامة وطلگني، ما رايدتك عايشة وياك غصبًا عني، لويش ما تحس؟ حلووو چا خلي أعلمج الكرامة شلون تصير لخاطر تنزلين تكملين طياح حظج جوه.

كالها واجه، گمت ردت أشرد ما لحگت، شالني ضربته بكل حيلي، شمرني على الچرباية، رجعت ضربته اجت بصدره، عصر أيديه ودنگ خله رأسه برگبتي. إشگد ردت أدفعه وأخلص نفسي ما گدرت، دأصرخ ما لحگت سد حلگي ورجع يتعامل بطريقة وحشية، استعمل وياي أسوأ الأساليب ملخني تمليخ، كل عضة يعضها يخلي روحي تشوغ، حتى الفراشة حسيتها انشلعت بسنونه من قوة العضات.

من كثر الألم بديت أفقد بعد ما أحس، خدر جسمي بس أدموعي تنزل، حتى مقاومتي انتهت، استسلمت، من شاف قوتي انهدت وبديت أغمض وخر عني، دفعني وكال: هسه تگدرين تراويهن وتطلبين الطلاگ براحتج. سحبت الغطة لفيت روحي وهمست: الله ياخذك. ما رد ضحك باستهزاء، انتجه طلع چكارة ورثها، سحب نفس ونفخه بوجهي. شتطلع منو أمك يعني شتجيب ملائكة، طبعًا نفس الطينة مالتها. قبل لا يلوحني شفته راد يسحبني، طفرت للحمام دخلت وقّفلت الباب وراي. صاح:

فتحي الباااب. لو تموت. خليج وين تروحين تطلعين لو لا ما خرستج ما تسمى عالزلم. الله ياخذك. ديرد وندگت الباب الغرفة، عافني وراح، كعدت ورا الباب تعبانة. بس فتحها وأسمع صوت أمه تحجي بانفعال ومخربط كلشي ما ينفهم شي داخل بشي لمن صاح: شكوو على كيف خلي افتهم. شنهو تفتهم، مصيبة وگعت على روسنا، الحگني ييمه دعاء بت الشيخ تبچي وتگول غزل تگلي إنتي كـ... وتركضين ورا مؤتمن تردين تاخذيه، ولك تعال ليه شلون ألم الفضيحة...