رواية خلف القضبان روح يتيمة الفصل العشرون 20 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
_____

رعد - اول ماسمعت صوتها الهادئ ارتاح كَلبي اطمئنيت عليها كلت

عادي حجيه تعبتج وياي

ام ركان - تعبك راحه يايمه

رعد - تسلمين
سدت الخط وصعدت فوك بدلت وتعطرت مشطتت شعري وعدلت شواربي اخذت الموبايل والمحفظه وطلعت

يمه اني طالع للكوفي يم الشباب

جوان - ماشي يمه لا تتاخر

رعد - ادللي
بست راسها وطلعت شغلت السياره
توجهة للكوفي يم الشباب وبين الحجي والضحك
مر الوقت

____
في مكان اخر

عمران - جنت اشرف على الشغل اجاني اتصال
اااوف مو وكتكم رديت
اهلاً استاذ ليث

ليث - وينك

عمران - اشرف عل شغل

ليث - اليوم اجتماع طارئ يم الباشا وبلغني اكلك تجي قبل الموعد بنصف ساعه

عمران - ساعه شكد بضبط

ليث - 11 تكون هناك وبال12 الاجتماع

عمران - ماعرفت شنو السالفه

ليث - شغل جديد وخطر ومتعب بس ارباحه
ناريه والربح يكون مضاعف لشغلنه

عمران - اوف حلو ماشي
سد الخط كملت الشغل وتوجهة هناك وصلت اشوفهم كلهم كاعدين ينتظرون الباشا كعدت والهدوء سيد الموقف شوي وسمعنا صوت عكازة الباشا مشه بكل هدوء وكعد في مقدمة طاولة الاجتماع ولع سيجاره ونزع القبعه والنظاره وكال

الباشا - الكل موجود

الكل - نعم باشا

الباشا - حلو اليوم جبتكم هنا لان راح ندخل
بمشروع جديد وارباح هائله والكل راح يربح بدون استثناء بس الشغل متعب وخط.ر لكن يستاهل
بس هناك عائق في طريقنه

- شنو هو باشا

الباشا - عمران

عمران - اول مانطق اسمي انصدمت كلهم التفتو عليه بلعت ريكي وكلت

خير باشا شصاير

الباشا - ابنك ياعمران راح يخرب كل مخططاتنه

عمران - اي واحد بيهم وليش اتمنى توضح اكثر

الباشا - النقيب رعد

عمران - اول ما كال اسمه حسيت بجالي بالمعده كلشي ولا هذا ماكدرله اااخ ربي صبرني

الباشا - اشوفك سكتت

عمران - لا باشا انتظرك توضح وتكمل كلامك

الباشا - اذا بدينه بهذا المشروع ابنك مستحيل يسكت وحسب علمي انت وهو من الروس واني مامستعد اضحي بشغلنه وتعبنه علمود عداوه بينك وبين ابنك مدري مو ابنك محد يعرف

عمران - شنو المطلوب

الباشا - تنسحب من المشروع

عمران - اها انسحب حلو زين متأكد راح تكدرون بدوني تكملون هيج مشروع ضخم

الباشا - نعم

عمران - ماشي براحتكم باشا انت فصل وعمران يلبس

الباشا - حلو تفضل شوفنا عرض كتافك نريد نكمل الاجتماع

عمرات - من هيج كلي زاد حقدي وكرهي اتجاه رعد بسيطه اني اعلمك صاير عله على كَلبي كمت وطلعت من الاجتماع صعدت لسياره ضربت الستيرن من العصبيه ااااخ اااني اعلمك يارعد بسيطه سسسسهل بعيوني اصبر عليه سحبت الموبايل وخابرت عليهم دك مرتين والثالثه ردو

- هلا استاذ عمران

عمران - اسمع راح اكلفكم بشغله واريدها اتم بكل سريه وحذر

- اي تفضل استاذ

عمران - اريد تقتلون شخص

- استاذ ها جريمه

عمران - صدك شكرا ماعرفت ثولان مالومكم

- هسه شنو تريد

عمران - راح ادزلكم الاسم والصور وكلشي يخصه اريدكم تقتلو وادفنو بمكان الجني الأزرق مايعرف وينه فهمت لو اااعيد

- بس هذا الطلب يكلفك ملايين خليها ابالك

عمران - انت بس سوي الكتلك علي وتدلل اي شي تطلبو اعتبرو تم

- لازم ادانش ويه ربعي

عمران - وشوكت ترد الخبر علمود اعرف

- باجر نردلك الخبر

عمران - ماشي انتظرك
سديت الخط سهله يارعد
واخيراً راح اتخلص منك

_____
في مكان اخر

نور - جنت كُلش تعبانه نمت وكمت على صوت الحجيه كعدنه اني وهيَ نتابع التلفاز مر الوقت
هيَ نعست نامت عل تخم اباوع الساعه بال12
ماعرف وين الحمامات اريد اغسل وجهي واتواضه
ضليت اجي منا اروح منا لحد مالكيتهم رحت توضيت واخذت سجاده وملابس صلاة جان عل تخم ورحت للغرفه لبست ملابس الصلاة وفرشت السجاده اول ماسجدت نزلن دموعي وكلتها بحصره

اااااخ يارب شكد تعبانه نور يوم عن يوم تطفى يارب نور كُلش تعبانه ربي كُلش اللهم اتنا في الدنيا حسنى وفي الآخرتي حسنا وقني عذاب النار كملت صلاتي وبديت ادعي دعواتي مثل كل مره ليش امل لا والله ما امل اني عبده لحوحه بالدعاء وربي يحب العبد اللحوح خلصت تذكرت اخو بتول لا ارادين دعيتله كلت

ربي اني ماعرفه بس ساعدني وكف وياي يارب سهل كل اموره وفرح كَلبه ارزقه سعادة وصحه وعافيه واحفظه لهله يارب

خلصت عدلت الحجاب طلعت برا اشوف الحجيه بعدها نايمه واني ضجت وحدي ماعرف شسوي وين اروح اخذت الكنترول واكلب بهل قنوات ومالحك وجان ينفتح الباب رجع ابن الحجيه اول مارجع شافني كبل نزل راسه  وسلم

ركان - السلام عليكم خويه

نور - وعليكم السلام

ركان - شنو لازم الحجيه نايمه

نور - اي قبل شوي نامت

ركان - نوم العوافي انتِ ليش ماتنامين بعد اخوج

نور - ما نعسانه

ركان - شلون صرتي رعد خبصنه خبص بيج

نور - لا الحمد لله زينه هسه

ركان - دومج اي شي تحتاجين اطلبي وادللي اعتبريني اخوج

نور - شكراً خويه صدك تعبتكم

ركان - ولو انتِ من طرف الغالي بعد اخوج
ماسوينه غير واجبنه

نور - من هيج يكولون ماعرف احس بحساس غريب كلها تكول من طرف الغالي لعد اخو بتول الناس شكد تحبه وتحترمه الظاهر صدك انسان زين وعنده وكفات ويه الناس صفنت بين افكاري

ركان - خويه اروح اني اخذي راحتج واذا تخافين وحدج تنامين خلي الحجيه يمج تنام

نور - ها لا لا ماخاف

ركان - ماشي

نور - راح كوم امه واخذها لغرفتها واني رحت للغرفه الي انام بيها سديت الباب ردت اقفله بس كلت عيب هسه يكولون ماعندها ثقه بينا بس شسوي مو بيدي ماكمت اثق بالناس كلها قفلته علمود ارتاح اكثر بقيت لصبح حاضنه رجليه اذكر الي صار وابجي بهدوء ماريدهم يحسون عليه ابجي ادعي على كل شخص ضلمني حسبي الله ونعم الوكيل عليهم كلهم اذن الفجر صليت ونمت كمت بال10 على صوت الباب يندك

ام ركان - يمه نويره نايمه لو لا

نور - كمت جسمي كله يون عليه كوه كدرت امشي كم خطوه افتح الباب فتحته

ام ركان - ياصباح الور وياصباح الياسمين

نور - حبيبتي حجيه فدوه اروحلج صباح الخير

ام ركان - يووو بسم الله عليج من الفدوه يايمه
جيت اشوف بنيتنه الحلوه كايمه لو بعدها

نور - ابتسمت بوجها وكلت
انتِ الحلوه حجيه اي هسه كمت

ام ركان - يابعد روحي يلا تعالي محضرتلج شلون ريوك بغدادي يخبل

نور - ماشي عاشت ايدج اغسل واجي

ام ركان - ماشي يمه انتظرج

نور - راحت واني رحت غسلت وجهي وعدلت الحجاب رحت للمطبخ صدك محضره ريوك غير شكل من الكاهي والكيمر وجبن العرب وراشي ودبس ولبن وجبن وجاي مهيل و زيتون مرتبته ويه الجبن وخبز عراقي حار شهتني اكل

ام ركان - يمه تعالي كعدي اكلي شوي سمني كُلش ضعيفه جم لحمايه منا منا نشنشي شوي

نور - هههه اني ماحب السمن

ام ركان - اي يمه اني ماكول صيري سمينه كُلش
بس شوي ها منا منا خدودج خصرج هاج اخذي خبز عراقي حار هسه جبته من الخباز شلون خبز يخبل

نور - تعرفين حجيه اني خبزي احلى من هذا

ام ركان - صدك يااا شوكت كبرتي شوكت تعلمتي تخبزين

نور - كلت بكَلبي ليش منال خلتني ارتاح مثل الناس كلت

اي حجيه بالفتره الأخيره كمت اخبز كميات هوايه ونبيع لجوارين

ام ركان - فدوه لنادره عمي هنيال الياخذج يايمه
خلقه واخلاق فدوه لهل عيون والخدود الحمر

نور - ابتسمت ماكدرت ارد خجلتني بكلامها سوالفها كُلش حلوه وتونس شوي ودك موبايلها
ردت

ام ركان - الو منو يمه هلا برعيد
فدوه لكلبك يايمه اي لا كعدت اي تتريك من عيوني
يايمه ادلل حبيبي انتَ ماشي ان شاءالله الله وياك يمه الله وياك حبيبي

نور - صابني الفضول اعرف على شنو جان يحجي
رغم مو من طبعي الفضول كلت
خير حجيه صاير شي

ام ركان - لا عيوني انتِ ماكو شي هذا رعيد يسئل عليج سوده عليه حتى البارحه خابر وسئل كل شوي يذكرني حجيه عندها علاج بفلان ساعه حجيه لازم تاكل بفلان ساعه لا تشوفي هيج دوم عاكر حواجبه وعصبي تره رعيد كُلش حنيني بعد روحي

نور - الله يحفظه لهله تعبته وياي وتعبتكم كلكم مو بس هو

ام ركان - لا يمه انتِ بحسبت بناتنه واجبنا نوكف وياج او ويه غيرج ترا الناس الطيبه موجوده
بس الموزين عمه عل زين

نور - الله يكثر من امثالكم وجزاكم الله خير الجزاء

ام ركان - اللهم امين ربي يسعدج يايمه ويفرج همج ويرزقج بزوج صالح ينسيج كل العشتي

نور - ابتسمت ودموعي نزلن
حجيه ماضنتي الجرح ينسي يمكن يروح الألم
بس الأثر دوم باقي

ام ركان - والله بنيتي ماكو واحد فرحان بحياته كلمن همه شكل كلمن ونقصه شكل الكمال فقط لله عز وجل انتِ امبين من حجابج وملابسج واسلوبج انسانه محترمه ومؤمنه وملتزمه خلي ايمانج قوي بربج وان مع العسر يسرا يايمه

نور - ونعمه بالله الشي المصبرني هو ربي اعرفه يحبني ويختبرني ادعي دوم اكون كد الاختبار والله مرات ماحس بصبري كل مره اكول خلص هاي النهاية وانصدم بشي اكبر من الراح تعبت ياحجيه والشكوى لغير الله مذله

ام ركان - لا يمه لانكولين هيج الله يمطر عليج الرزق والسعادة انتِ بس كولي امين

نور - رفعت ايدي لسما وكلت

اللهم امين
خلصنه الريوك كمت شوي شوي انظف وياها البيت خطيه وحدها هيَ وابنها بالبيت وبيتهم جبير كالت عندي 2 بنات ومزوجات وباقيه وحدها كملت الشغل وياها وكتلها اني إسويلي الشوربه انتِ كملي غداكم قبلت رحت قطعت الجزر والفطر وباقي الخضروات وسويت الشوربه اذن الظهر رحنه صلينه شوي ورجع ابنها صبينه الغده

حجيه انتو اتغدو اني بالمطبخ اي شي تحتاجون صيحيني اني اجيبلج لا تكومين

ام ركان - تعالي تغدي يايمه كلشي مانريد

ركان - بعد اخوج تعالي تغدي ويانه لا تستحين كتلج عتبريني اخوج

نور - تسلمون بس

ام ركان - لا بس ولا شي يلا تعالي تغدي

نور - ماكدرت اناقش اكثر هما كُلش زينين ومتحرمينين كلت عيب وفشله منهم
رحت كعدت يم الحجيه تغدو هما واني ماشتهي اكلت جم خاشوكه من الشوربه وكمت ماشتهي غسلت الموعين وسويتلهم الجاي جتي للمطبخ استغربت

ام ركان - عززه يايمه ليش هيج انتِ تعبانه
لا تشتغلين ناقصج تعب يا داده

نور - لا حجيه اني متعوده ماكدر ابقى كاعده
اتحرك احسن علمود اطيب بسرعه

ام ركان - بسم الله ما شاءالله عليج خليتي المطبخ
يبرق من النظافه

نور - تستاهلين حجيه

ام ركان - يابعد عمري روحي نامي وارتاحي اني اصب الجاي

نور - ماشي
عفتها ورحت للغرفه اتمددت صفنت بالصكف وفكره تجيبني وفكره توديني غمضت عيوني اريد انام احس الم براسي مو طبيعي اندك الباب

اتفضل

ام ركان - يمه عذريني عل ازعاج بس رعيد اجه ويريد يحجي وياج

نور - ماشي بس اعدل الشال واجي

ام ركان - ماشي يايمه

نور - راحت واني كمت عدلت الشال وملابسي
شو احس نفسي متوتره مدري ليش اباوع على ايدي التوتر يقره الف يبووو عليج يانور ضليت اجي واروح بالغرفه وافتح واسد بيدي واتنفس شهيق زفير علمود يخف التوتر الحمد لله خف طلعت رحت للمطبخ

ام ركان - يمه بغرفة الضيوف كاعدين روحي هسه اصب الچاي واجي وراج

نور - ماشي
رحت لغرفة الضيوف دكيت الباب

ركان - تفضلي خويه

نور - اول مادخلت جان كاعد يدخن التفت عليه
نزلت راسي ورحت كعدت عل تخم مقابيلهم طفه السيجاره وباوع عليه وكال

رعد - شلونج بويه

نور - الحمد لله

رعد - اكو تحسن لو بعدج

نور - لا اكو الحمد لله

رعد - بويه دامج زينه اريد اسئلج جم سؤال بس ركزي على كلامي

نور - بخصوص شنو تسئل

رعد - بخصوص اقارب امج علمود نلكيهم

نور - ماشي
كام صديقه

ركان - اروح اجيب الچاي انتو كملو

رعد - ماشي

نور - طلع صديقه وبقينه بس اني وهوه كال

رعد - اذا ماكو زحمه بس تعالي كعدي هنا شلون احجي وياج ومسافة مترين بيني وبينج

نور - ما جاوبته كمت كعدت عل تخم القريب منا شوي

رعد - اي هيج زين شوفي بويه عيدي اسمهم الثلاثي وحاولي تذكرين ولو شي بسيط يخصهم

نور - ماشي
بده يسئل واني ارد على حسب السؤال الأعرفه وكلما التفتت علي علمود اجاوبه عيونه بعيوني ويحجي حسيت الكلام البينا اعمق من القضيه
شعور غريب يلوحني من يكون يمي ويحجي
وياي ماعرف اني يتهيألي او هو صدك اكو شي مخفي بين سطور كلامنه خلص اسئلته وكال

رعد - بتول تسلم عليج وان شاءالله باجر اجيبها تشوفج

نور - عليكم السلام وانت وصل سلامي الها

رعد - يوصل بويه يوصل

نور - خله ايده بجيب السترته طلع منها كارتون
وانطاني يا كتله

شنو هذا

رعد - موبايل بي شريحه صح هو مو حديث بس يمشي الحال خلي يمج ومابي غير رقمي وراح يبقى بس رقمي بي لا تخابرين احد ولا تحجين ويه احد بس من تحتاجين مساعده
او اي شي خابريني بي

نور - رفعت راسي اله وعيوني بعيونه كتله
ممكن سؤال

رعد - جواب

نور - انت ويه كلهم هيج تتعامل لو بس ويايي

رعد - جوابج ماكدر ارد علي هسه بس ثقي بالله
اني نيتي فقط اساعدج لا غير

نور - بس اني تعبتك هواي وماريد اكون
عبئا على الناس

رعد - لا تعتبريني شخص غريب

نور - بس هاي حقيقه انت مامجبور تساعدني

سحب سيجاره ولعها باوع عليه وبكل هدوء كال

رعد - لا بويه انتِ صرتي من مسؤوليتي وما ارضا اشوفج هيج واعوفج

نور - مافهمت شنو معنى كلمة
( صرتي من مسؤوليتي ) بس ماحبيت اناقشه واحجي اكثر اخذت الموبايل وكتله

شكراً على كلشي

رعد - ولو بويه ادللي

نور - كمت قبل لا اطلع كال

رعد - بويه دير بالج على نفسج ماوصيج

نور - ان شاءالله
طلعت رحت ركض للغرفه احس نفسي حتريت كُلش ومتوتره مدري شجاني شمرت الكارتون عل سرير ضليت اجي واروح بالغرفه و100 سؤال براسي ليش يساعدني معقوله يساعد بدون مقابل
شيريد مني يمكن لو غير وحده بمكاني هم جان ساعدها اي اي اكيد جان ساعدها نور قابل بس انتِ يساعدج لا اكيد بس ماعرف احس اهتمامه بيه أعمق من هيج مو اهتمام مساعده وبس يعني شنو قصدج نور بس شغلته ادوخ واتحير

يعني شيريد مني اكيد حب يساعدني وبس اي اكيد بس اني افكر هواي واتخيل واعيش الدور
اوووي ليش ادوخ نفسي ناقصني لا والله ما ناقصني كعدت عل سرير سحبت الكارتون طلعت الموبايل جان من هذا العادي فتحته صدك بس رقمه بي وكاتب علي

النقيب رعد ............................................

____
يقول

لونظر نيوتن الى عينيــك
لعرف أن ليس للجاذبيه قــانون

لونظر الجميع الى قلبكِ
لعرفو اننِ مجنون

مجنون بكِ
وبحبكِ انِ احبكِ بجنون

فاليشهد الجميع
انا عاشقاً ولهان في حبكِ
وقلبي بين يدكِ وعيناي تقول لكِ

لماذا هذا البعد بيننا
ولماذا نراقب بعضنا
يدي في يدكِ وهيَ بنا
لنكتب قصة حُبنا
لتكن عنوان قصتنه
خلف القضبان روح يتيمة
بقلم الكاتبه جيهان آغا

بقلمي         جيهان آغا                     ✍

_

قلبي لا تنسون

التصويت بالنجمة
تعليق بين الفقرات
تفاعلكم مع الرواية

مدللتكم بارتات يوميه انزل بارت لا تنسون حق تعبي وحق الرواية تستاهل التفاعل قلبي انتو
وصلو البارت اقل شي 200 تعليق وينزل البارت القادم ان شاءالله

حسابي انستجرام انشر هناك كلشي
يخص الرواية 👇

وحسابي واتباد تابعوني حتى يصلكم كل جديد

Jehan-Stories

الان ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا