رواية خلف القضبان روح يتيمة الفصل التاسع عشر 19 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
_____

رعد - خويه ليش تبجين

بتول - نور شنو ذنبها ماسمعت كلام الدكتور
اذا البنيه انحرمت من الامومة شنو راح يكون ردة فعلها الموضوع مو سهل والله

رعد - والدكتور كال ان شاءالله نلكي حل بديل
ادعيلها ماعرفتج هلكد تحبيها

بتول - كُلش احبها خويه نور ماكو منها حقك
ماتعرفها

واحنا نحجي كامت نور مسطور راسها خطيه

نور - كمت احس روحي دايخه كُلش فتحت عيوني

حسيت بألم مو طبيعي براسي وبطني رفعت ايدي اتلمس راسي شادي بشاش طبي شفت بتول واخوها واكفين فوك راسي كلت بتعب

وين اني شنو صار ااخ راسي

بتول - بدموع / حبيبتي انتِ زينه

نور - بتعب /
سؤالج صعب جوابه يابتول
اني هيج كلت وهاي طكت من البجي

شكو شصاير ليش تبجين

رعد - بتول شكلنه

بتول - بدموع / ماكو شي ياعمري

نور - طلعت برا الغرفه شوي ورجعت عيونها مورمه من البجي سندتني عدلت كعدتي خليت ايدي
على صدري حسيت نفسي مخنوكه اجه اخوها

رعد - بويه وين يوجعج

نور - اول ما كال بويه غمضت عيوني نزلن دموعي
كلت بكَلبي كلشي ولا هاي الكلمه تحرك كَلبي حرك

بتول - بدموع / ها نور حبيبتي شبيج احجي

نور - فتحت عيوني
مخنوكه وكَلبي احس كَلبي يأذيني

رعد - هيج كالت واني احس روحي تعلعلة عليها
كلت بكَلبي بيه ولا بيج عفتهم رحت اصيح الدكتور
اجه يشوفها

الدكتور - ها شلونها مريضتنه

نور - ماعرف مخنوكه دكتور

الدكتور - اشوف

رعد - فحصها الدكتور رغم هو رجال جبير
بس ماعرف ليش ضجت من تقرب منها كتله

دكتور استعجل ماشوفها تعبانه

الدكتور - لحظه ابني

رعد - يارب صبرني كوه لزمت اعصابي

بتول - ها دكتور

الدكتور - لا زينه الحمد لله بس يرادلها راحه

بتول - الحمد لله زين يصير نطلع اليوم

الدكتور - بس نشوف مشكلة الرحم وقتها نقرر اليوم تطلعون او لا

بتول - ماشي
طلع الدكتور هو ورعد التفتت عليها عيونها الحلوه ذبلانه ياربي شكد انقهر عليها مو بيدي كلما اشوفها تنزل دموعي رحت مسكت ايدها

حبيبتي ما جوعانه

نور - بتعب /
لا بس عطشانه اريد مي

بتول - ماشي لا تتحركين انزل جوه اجيبلج مي وارجع ماشي

نور - هزيت براسي بمعنى اي
راحت بقيت وحدي اباوع لصكف
دايخه شلت الشال على راسي ورقبتي احس النفس كوه ينجر شوي وانفتح الباب عبالي بتول طلع اخوها بسرعه عدلت الشال هو نزل عيونه من شافني تلبك وكال

رعد - ها بويه شلون صرتي

نور - الحمد لله ممكن سؤال

رعد - اتفضلي

نور - نزلت دموعي واني احجي كتله
ماعرفت منو ذوله الضربوني بحوشيه

رعد - بلا

نور - منو

رعد - عمامج

نور - فتحت عيوني من الصدمه احجي بكَلبي
شوكت عرفوني وحجو وياي وسئلو عليه علمود هيج يضربوني اذا جان عندي امل 1% هذا الأمل اختفه

رعد - بويه لا تبجين

نور - مسحت دموعي وكتله
شكراً اني تعبتك هواي كُلش اشكرك

رعد - واجبي هذا ماكو اي تعب

نور - دخلت بتول جايبه بطاله مي شربتني
شويه ودخل الدكتور

الدكتور - جاي ابشركم

رعد - خير احجي

بتول - يالله

الدكتور - المريضه رحمها كُلش زين طلع البطن الامعاء متظرره لان الضربات جانت مستهدفه البطن الامعاء وهل شي خلانه نشك في الرحم

بتول - الف الف الحمد لله

رعد - يعني هسه شنو المطلوب نسوي

الدكتور - المريضه تعاني من تمزق في البطن
ولازم إراحة العضلات للسماح لها بالتعافي، و تجنب أي أنشطة تضيف إجهادًا إضافيًا لعضلات البطن أو تسبب لها الألم

رعد - اذا هيج سهله

الدكتور - راح افحصها اخر مره وطلعوها

رعد - ماشي

بتول - اجه فحصها الدكتور كال

الدكتور - الحمد لله وضعها زين بس تحتاج راحه
وبعض الأدوية واذا حسيتو بي اي شيء غير طبيعي في قلبها فوراً تجون

رعد - ماشي دكتور شكراً

الدكتور - سلامتها ماتشوف شر

بتول - طلع الدكتور رحت ساعدتها تكوم
شوي شوي

نور - شنو يحجي يارحم يابطن مافهمت

بتول - حبيبتي سالفه طويله بعدين اكلج
اهم شي انتِ بخير

نور - ماشي
كمت مسكت ايد بتول التفتت على اخوها كتله

عادي اطلب منك طلب

رعد - اكيد بويه طلبي

نور - ممكن ترجعني للموصل

رعد - ليش منو عندج هناك

نور - بيت اختي

رعد - بس اني دادور على بيت
خاوالج او خالاتج لا تستعجلين

بتول - اي اي صدك كلام رعد

نور - وين اروح

رعد - ادزج لبيت صديقي ركان
هناك يم امه وخدها ماعندهم احد ابقي جم يوم لحد ما الكي عنوان اهل امج

بتول - باوعت لرعد عرفت ليش دزها هناك وماجابها يمنا علمود ابوي طلع يخابر صديقه
و

نور كاعده وتنزل دموعها كعدت يمها حظنتها

وكتلها

لا تبجين حبيبتي

نور - تعبانه

بتول - ياروحي التعب بيه ولا بيج والله اعرف تعبتي بس ان شاءالله راح التعب وكلشي يتصلح فدوه لا تبجين

___

رعد - طلعت من الغرفه اخابر ركان شوي ورد

ركان - ها ضلعي

رعد - ركان اريد مساعدتك بشي

ركان - اطلب وادلل

رعد - البنيه الحجيتلك عليها

ركان - يا وحده

رعد - يول الي البارحه جبناها للمركز شبيك

ركان - ها اي اي عرفتها شبيها

رعد - سالفه طويله بعدين احجيلك هيَ هسه بالمستشفى وتعبانه يرادلها راحه واهتمام

وماعندها احد تروحله واحنا عمران افندي مايقيل تجي للبيت يخاف لا احد يبوك املاكه النذل

ماكو غيرك خويه راح اجيبها يمكم جم يوم لحد ما الكه اهل امها اهنا ابغداد البنيه صارت امانتي

ركان - مو اكول صاير رخاخ ماتصدك
هههههه

رعد - وارجع اكلك انجب

ركان - هههه خوي
ادلل خويه هلا بيها وبيك البيت بيتكم

رعد - فدوه لعمرك ضلعي يلا مسافة الطريق
ونكون يمكم

ركان - ماشي خويه نتتظركم

رعد - سديت الخط رحت صحت وحده
من الممرضات مسكتها ويه بتول

نور - طلعنه من المستشفى صعدنه بالسياره شوي وصلنه لبيت ركان اول ما وكفت السياره يم بابهم طلع هو وامه استقبلونه وامه نزلت ذاك السلام على اخو بتول ماتعرف شتسوي من الفرحه اول ماشافته استغربت بصراحه شنو السالفه وين مانروح الناس تحبه وتحترمه الله يوفقه

ام ركان - ياهلا ومية هلا برعيد نورتنه يايمه

ركان - نستنه الحجيه خلص

رعد - ههه عود غار ماوصيك
هلا بيج حجيه شلونج

ام ركان - الحمد لله يايمه نورتنه يايمه
شدعوه هل غيبه

رعد - حقج عليه حجيه بس عذريني
مشغول كُلش صدكيني

ام ركان- معذور يايمه
ياهلا بضيوفنه

بتول - شلونج خاله

ام ركان - ياهلا بعد خالتج ألحمد لله
تفضلو

ركان - اخت رعد مو

بتول - اي

ركان - شلونج بويه

بتول - الحمد لله

ام ركان - يمه رعيد منو هاي الحلوه
بس لا خطيبتك واني اخر من يعلم

رعد - هههه لا حجيه ياخطبه الظاهر ركان ماكلج لا تخافين من افكر اخطب انتِ ويا امي تروحون تخطبولي

ام ركان - اي لازم

ركان - تفضلو

نور - دخلنه ابيتهم ما شاءالله كُلش جبير وحلو
كعدنه بالستقبال جتي بتول كعدت يمي خليت راسي على كتافها ماكو اي طاقه بجسمي
والحجيه جتي كعدت يمنا ورعد وصديقه كعدو
مقابيلنه كل شوي التفتت اشوفه يباوع عليه ويحجي ويه صديقه

ام ركان - يمه اذا نعسانه حظرتلج غرفه روحي نامي

نور - لا شكراً

ام ركان - شسمج يايمه

نور - اسمي نور

ام ركان - عاشت الاسامي اسم على مسمى

نور - تسلمين

بتول - دخلنه للبيت رعد وصديقه كعدو مقابيلنه
كلما احجي ويه الحجيه اشوف صديقه يباوع عليه احجي بكَلبي

معقوله يباوع لو اني متوهمه واتخيل لا لا شنو اتخيل لعد ليش يباوع عليه اووووي واذا يباوع يعني شنو بتوول سوالف المسلسلات لا تتخيليها بواقعج

رعد - حجيه راح نتعبج ويانه

ام ركان - ماكو تعب يايمه انت تدلل حبيبي

رعد - مايدلل عليج ظالم
بتول خويه نروح

بتول - ماشي خويه

حبيبتي دير بالج على نفسج
وان شاءالله باجر اذا كدرت
امرلج من ارجع من المدرسه

نور - ماشي
قبل لا يطلعون كلت

لحظه

التفتت بتول هيَ واخوها

بتول - كولي حبيبتي

نور - باوعت على اخوها كتله
شكراً تعبتكم وياي اني جداً اشكركم
ان شاءالله من ميزان حسناتكم

اخوها ابتسم ابتسامه تخبل فوك حالي
صفنت على ابتسامته كال

رعد - لا بويه ماكو تعب

بتول - لا داده كلشي ماسوينه حبيبتي تدللين

نور - تسلمون

رعد - دير بالج على ضيفتنه حجيه

نور - فرحني بهاي الكلمه

ام ركان - من هاي العين قبل هاي انت تدلل يايمه
ياهلا بيك نورتنه يابعد كَلبي

ركان - كل شوي نورتنه و نورتنه
شنو الظاهر جان البيت ظلمه
بدون كهرباء واني ماعرف

رعد - غيره اااخ من الغيره ههههه

ام ركان - اي يمه يغار منك هههه

رعد - تعلميني بي هذا الساقط

بتول - ههههه

ركان - اي مثلك ساقط تنجب انجب خلينه ساكتين

ام ركان - ههههه شلون ماشوف ثنينكم
نفس الطينه الله يساعد التاخذكم

رعد - افا عليج حجبه هيج صار الحجي

ركان - لا يمه اني التاخذني اتوقع امها داعيتلها
باليلة القدر

بتول - ما شاءالله الثقه ههههه

ام ركان - كُلش هههه

ركان - اي طبعاً

نور - ابتسمت على كلامهم التفت عليه
اخو بتول كال

رعد - اني التاخذني راح تتعب وياي

ركان - اعترف الأخ عمي دنجب هيَ منو تريدك وتتحملك

بتول - لا هاي قويه شنو السالفه هههه

ركان - صراحه هههه

ام ركان - انجب انت نيال التاخذ رعيد وين
اكو منا من اروح فدوه لطوله

ركان - صار شعر حبيبه

رعد - عوفو هذا العكروك يغار
فدوه لكَلبج حجيه

ركان - اني عكروك ولك تروحلي فدوات مو فدوه

ام ركان - انجب هو يروحك فدوه بسم الله علي

ركان - اكلج يمكن ناسيه اني ابنج مو هو

ام ركان - ماكو فرق بينكم غير كبرتو سوا

رعد - فدوه لعيونج حجيه الكلام وياكم ماينمل بس لازم نروح يلا في امان الله

ام ركان - الله وياك وليدي

نور - راحو كلهم بس بقت الحجيه جتي كعدت
يمي كالت

ام ركان - يمه ماجوعانه

نور - لا حجيه تسلمين
بس اريد اروح اتمدد وين الغرفه اذا مابيها زحمه

ام ركان - لا يمه وين الزحمه تعالي وراي

نور - كامت واني كمت رحنه للغرفه اول مافتحت الباب فاحت ريحة الغرفه معطريها ومنظفيه غرفه شوي صغيره بس حلوه ونظيفه واثاثها مرتب

ام ركان - يمه نامي وارتاحي واي شي تحتاجين صيحيني

نور - ماشي شكراً تعبتكم وياي

ام ركان - ولو يايمه انتِ من طرف الغالي رعيد
يلا يمه نامي وارتاحي

نور - ماشي
راحت التفتت اشوف الغرفه بيها سرير نفر واحد
وطاوله عليها ورود وكنتور صغير ومرايه طويله بالزاويه

رحت اتمدد عل سرير حسيت بدوخه اول ماخليت راسي عل مخده اجه ابالي شلون ساعدني وكف وياي لو كلمة بويه بصوته صارت دوم ترن براسي شبيج نور من كل عقلج تفكرين بي تعرفين فرق البينج وبينا فرق السماء والأرض شيلي من بالج ما ناقصنه خذلان وحزن

بين افكاري استسلمت عيوني لنوم

_____
في مكان اخر

رعد - طلعنه من بيت ركان وطول الطريق
هيَ ابالي ونظرات عيونها مطبوعه بعقلي
وبتول كل شوي تحجي بيها وصلنه للبيت
نزلنه رحت سلمت على امي وصعدت فوك لغرفتي اسبح تعبان كُلش سبحت ورحت انام شوي اول ما خليت راسي عل مخده تذكرتها او يمكن اصلاً ما ناسيها علمود اذكرها لازم اساعدها شلون ماعرف اجه ابالي اخابر صديقي علي اكله يدور على اهل امها بلكت اوصل لخيط يوصلني الهم سحبت الموبايل خابرته رد عليه

علي - هلا برعيد شلونك خويه

رعد - هلا حبيبي بخير انت والأهل شلونهم

علي - نحمد الله ونشكره كلنا بخير

رعد - دومكم اكلك علاوي محتاجك بموضوع

علي - كول خويه خير ان شاءالله

رعد - لا خير خير عندي جماعه من طرفي
ماعندهم احد هنا بس عندهم اقارب امهم
ومايعرفون عنوانهم او مايعرفون اي شي عنهم غير الأسماء الثلاثيه راح ادزلك اسمائهم واريد عنوان بيتهم وكلشي يخصهم اذا تكدر

علي - افا انت تأمر خويه ادلل دزلي وباجر او بعده كل المعلومات تكون يمك ان شاءالله

رعد - ان شاءالله خويه تعبتك

علي - افا رعيد وياك انت بذات ماكو تعب

رعد - تسلم حبيبي اخذ راحتك اعذرنه عل ازعاج

علي - هلا بيك خويه

رعد - سديته اريد انام ماكدر ضليت اكَلب بنفسي ماكو فائده ماكدر انام فكري وبالي كله يمها شلون ماعرف ضليت مغمض وصافن على صورتها براسي ضليت على حالتي نص ساعه ماكدرت انام كمت اووووف ليش ماكدر انام

سحبت التيشيرت مال تراك لبسته ونزلت جوه اشوف شكو ماكو

يمه تبارك وينكم

جوان - هلا يمه تعال

رعد - رحت اشوفهم ملتمين بالمطبخ يحضرون العشاء رحت بست راسها

جوان - الله يرضى عليك يايمه
شنو تحب احظرلك عشه

رعد - اخذت زيتونه
اي شي مو مهم

بتول طلعت المواعين وانكسر بيدها ماعون

بتول - يبوووو هسه وكته

جوان - ما صار شي يمه هسه تيلا تنظفه
بس دير بالج لا تنجرح ايدج

رعد - اول ماسمعت الصوت التفتت اذكرت يومل الشفتها وانكسر المواعين بيدها تذكرت من جانت تحجي ويه نفسها وتضرب بخدودها لا ارادين سحبت الموبايل وطلعت برا خابرت ركان رد

ركان - هلا بضلعي

رعد - هلا خويه وينك

ركان - بالكوفي شوكت تجي

رعد - شوي واجي اكلك الحجيه ماعندها موبايل

ركان - بلا عندها بس ماتعرفله فقط تجاوب من يدك

رعد - دزلي رقمها اريد احجي وياها

ركان - ماشي راح ادزلك عل واتس

رعد - ماشي ضلعي مسافة الطريق وانه يمكم

ركان - تمام لا اطول

رعد - سديته دزلي الرقم حفظته وخابرت انوب الحجيه ماترد ردي ياعيوني انتِ دردي

ماكو ماترد رجعت مره ثانيه خابرت يلا ردت

ام ركان - الو منو وياي

رعد - هلا حجيه اني رعد

ام ركان - هلا برعيد هلا يايمه

رعد - هلا بيج يالغاليه
حجيه نور شلون صارت من رجعنه

ام ركان - اول مارجعتو راحت للغرفه تنام

رعد - حجيه ولو تعبتج بس كل شوي اطمني عليها
لأن يرادلها مراقبه

ام ركان - لا يمه ماكو تعب ابقى عل خط اروح اشوفها

رعد - ماشي
بقتني عل خط وراحت تشوفها

نور - جنت نايمه اندك الباب دخلت الحجيه

ام ركان - يمه كاعده لو نايمه

نور - بنعس/ هلا حجيه لا جنت نايمه تفضلي

ام ركان - كومي حبيبه سويتلج شوربه
شربي واخذي والأدوية

نور - ماشي حجيه تسلمين

ام ركان - تدللي يابعد روحي
ياااا يمه رعد نسيتك عذرني

رعد - اول ماسمعت صوتها الهادئ ارتاح كَلبي اطمئنيت عليها كلت

عادي حجيه تعبتج وياي

ام ركان - تعبك راحه يايمه

رعد - تسلمين
سدت الخط صعدت فوك بدلت وتعطرت مشطتت شعري وعدلت شواربي اخذت الموبايل والمحفظه وطلعت

يمه اني طالع للكوفي يم الشباب

جوان - ماشي يمه لا تتاخر

رعد - ادللي
بست راسها وطلعت شغلت السياره
توجهة للكوفي يم الشباب.......................................

_
_

_____
يكول

شئ اليكَ يجذبني
ولم ادرِ ماهو مُنتهاه
يوماً اراهُ نهايتي
ويوماً ارى فيهٌِ الحياة
واليك حروف كان لُغتهُ الصمت
في قلوب العشاقِ ولم ادرِ متى يكون مُنتهاهُ

《بقلمي انا جيهان آغا 》 ✍

_

لاتنسون
التصويت بالنجمة
تعليق بين الفقرات
وتفاعلكم مع الرواية وصلو البارت اقل شي 200 تعليق وينزل البارت ال18 على تفاعلكم

قلبي انتو اذا اكو تفاعل ان شاءالله يوميه ينزل بارت وادللو

تابعو حسابي انستجرام انشر هناك كلشي يخص الرواية 👇

وحسابي واتباد تابعو يلي مامتابع
حتى يصلكم كل جديد

Jehan-Stories

والان ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا