رواية خلف القضبان روح يتيمة الفصل الحادي والعشرون 21 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي

________

نور - مافهمت شنو معنى كلمة
( صرتي من مسؤوليتي ) بس ماحبيت اناقش واحجي ويا اكثر اخذت الموبايل وكتله

شكراً على كلشي

رعد - ولو بويه ادللي

نور - كمت قبل لا اطلع كال

رعد - بويه دير بالج على نفسج ماوصيج

نور - ان شاءالله
طلعت رحت ركض للغرفه احس نفسي حتريت كُلش ومتوتره مدري شجاني شمرت الكارتون عل سرير ضليت اجي واروح بالغرفه و100 سؤال براسي ليش يساعدني معقوله يساعد بدون مقابل
شيريد مني يمكن لو غير وحده بمكاني هم جان ساعدها اي اي اكيد جان ساعدها نور قابل بس انتِ يساعدج لا اكيد بس ماعرف احس اهتمامه بيه أعمق من هيج مو اهتمام مساعده وبس يعني شنو قصدج نور بس شغلته ادوخ واتحير يعني شيريد مني اكيد حب يساعدني وبس اي اكيد بس اني افكر هواي واتخيل واعيش الدور
اوووي ليش ادوخ نفسي ناقصني لا والله ما ناقصني  كعدت عل سرير سحبت الكارتون طلعت الموبايل جان من هذا العادي ابو الدكم شغلته صدك بس رقمه موجود وكاتب علي النقيب رعد

صفنت عل اسمه واحجي ويه اسمه

ليش تساعدني معقوله تريد مقابل كمت اخاف منكم كلكم اخاف تكسروني اخاف تأذوني اخاف اتعبوني اخاف تظلموني ماكدر اثق صعبه اثق تعبت والله تعبت

اندك الباب سحبت الشال خليته على راسي
وكلت تفضل

ام ركان - يمه شدسوين

نور - كلشي تفضلي حجيه تعالي كعدي

ام ركان - لا يمه انتِ تعالي نكعد بالحديقه الجو طيب برا غيري جو

نور - ماشي

ام ركان - يلا يمه انتظرج جيبي كيك وعصير وتعالي

نور - ماشي حجيه ادللي

ام ركان - يابعد عمري يايمه

نور - ابتسمت طلعت واني طلعت وراها اخذت الكيك والعصير ورحت للحديقه  كعدنه
صفنت عل سما كلت

حجيه

ام ركان - هلا يمه

نور - سبحان الله الغيوم شكد حلو متوزعه

ام ركان - حياتنه تشبه هاي الغيوم يايمه

نور - شلون

ام ركان - تعالي خلي راسج على رجليه وتأملي جمال الغيوم واكلج شلون

نور - ماشي
خليت راسي على رجليها وصافنه بالغيوم وجمال
السماء  نزل الشال من راسي ماكو احد بالبيت خلت اصابعها بشعري وكامت تحركهم ابطئء و تحجي

ام ركان - حياتنه مثل الغيوم متوزعه كل رغبه او امنيه نريدها متجها لزوايه معينه الحياة صعبه يايمه والانسان رب العالمين ناطي عقل يفكر ويتمنى يتعب ويسهر ومرات يبجي من التعب وبالأخير يوصل لغيمته يحقق الي يريده

لابد يجي يوم والسعادة تدخل حياتج تذكري كلامي وقتها وكولي صدكت الحجيه من كالت وراء كل ليلة ظلام دامس شروق شمس قويه تنور الدنيا الحياة بين الظلام والنور جاري يايمه

نور - نزلن دموعي كتلها
حجيه اسئلج سؤال و اعرف راح تكولين انتِ انسانه ملتزمه ليش ماتعرفين جوابه بس والله تعبت وماعرف شنو اسوي

حجيه اهلي ليش عافوني وحدي ليش ماياخذوني يمهم

كعدت شهكت من البجي وكملت كلامي

ل ل ليش اني ميته شوك عليهم مشتاقتلهم  معقوله مامشتاقيلي اني مو بتهم معقوله نسوني ليش عافوني ليش يعرفون ماعندي غيرهم

كمت ابجي حضنتني وكامت تمسح بيدها الحنونه
على راسي وتهدي بيه

ام ركان - يمه نويره ذكر ربنا بالقرآن الكريم
(ان لله وان اليه راجعون ) كلنا على هذا النهج يايمه الموت حق علينا كلنا كلمن بيومه  والموت هو قضاء الله وقدره وهو الي يأخذ إليهِ من يحب ولأن الله يحب عبده يختار من يريده بدون ماينظر لعمره وأبناءه وزوجته وعائلته فالموت يايمه
هو الحقيقة الوحيدة  في هذه الحياة

نور - حجيه بس اني بقيت وحدي والله صعبه

ام ركان - صدكيني يايمه رب العالمين ياخذ شي وينطي شي وهو اقرب الج يايمه من حبل الوريد
شلون بقيتي وحدج وربج وياج لاتخلين الشيطان يوسوسلج يايمه انتِ انسانه مؤمنه ملتزمه
خلي ايمانج قوي بربج بنيتي

نور - الحمد لله على كل شيء زين حجيه اخر سؤال فدوه كليلي اهلي يحسون بيه يشتاكولي يذكروني لو نسوني

ام ركان - يايمه شلون مايحسون بيج وشلون ينسوج وشلون ما يشتاقولج غير انتِ وردتهم الوحيده وابشرج بإذن الله ينتظرج بالجنه ويحضنوج ويفرحون بيج

نور - ابتسمت على كلامها ومسحت دموعي اندك الجرس رادت تكوم كتلها

اني اكوم
عدلت الشال وكمت فتحت الباب طلع ركان

ركان - بعد اخوج شلونج

نور - هلا خويه الحمد لله 

ركان - دوم ان شاءالله
يمه وينج

ام ركان - هلا يمه تعال

ركان - شنو هاي الأجواء الحلوه عصرونيه وحركات
خويه امي مدللتج اني ابنها صار سنين ماشايف منها لا عصرونيه ولا حلوانيه

نور - هههه

ام ركان - من غمه التغمك شكد جذاب لا تصدكين بي يمه هذا اكبر كلاوجي وملعب منو يكدرله

نور - هههه

ركان - هيج صار الكلام بسيطه
يلا اروح اني جيت اكلج لا تسون عشاء  اليوم
رعد واخته يجون يمنا يتعشون رايح اوصي كباب
ومشويات

نور - من كال رعد واخته يجون لا ارادين ابتمست
بعدين حسيت على  نفسي عزه شبيج نور شنو هاي الحركات بس هذا الباقي

ام ركان - هلا بيهم يمه البيت بيتهم

ركان - يلا اروح اني اوصي

ام ركان - يمه بس كباب مو عيب فشله خلي نطبخ

ركان - لا يمه ما ياكلون اني بزور قنعته يجي
واجيب وياي سمج مسكوف ومقبلات وقواطي كولاه ودجاج مشوي

ام ركان - ماشي يايمه روح الله وياك بس دير بالك من تسوق بعد روحي

ركان - حبيبه انتِ تدللين

نور - باس راسها وراح
صافنه على احترام بين الأم وابنها
شكد حلو هيج ياريت لو جانت امي عايشه
جان كل شوي اجي احظنها وابوس بيها

ام ركان - هايمه بشنو تفكرين

نور - ولا شي حجيه
كعدنه بالحديقه شويه وصار المغرب رحت صليت وكعدت بالستقبال والحجيه راحت تتوضه وجان اسمع صوت ادور ماكو شي بالستقبال ياربي صوت شنو هذا ركزت عل صوت طالع من غرفتي تذكرت الموبايل رحت بسرعه وفعلاً جان الموبايل يدك مكتوب النقيب رعد حسيت نفسي توترت وضربات القلب صارت ادك بسرعه من التوتر اخذت نفس شهيق عميق وبعدين زفير ورديت علي

رعد - هلا بويه وينج

نور -  اجه صوته بأذاني صوته بي بحه مدري شلونها بس كُلش حلو حسيت صوته بي حنيه
ومن يكول بويه احس بحنان الاب
كتله

موجوده بالبيت

رعد - اتأخرتي بالرد علمود هيج
شلون صرتي

نور - الحمد لله 

رعد - اني وبتول بالطريق اضن ركان كللكم راح نجي يمكم

نور - اي

رعد - مامحتاجه شي نجيبلج

نور - لا لا شكراً سلامتك

رعد - ماشي بويه

نور - سد الخط
خليت الموبايل على كَلبي ولا ارادين كلت
بويه اااخ ياكلمة بويه شكد مفتقدتها بحياتي

خليت الموبايل عل سرير ورحت غسلت وجهي
وغيرت ملابسي ولفيت الشال وطلعت اساعد الحجيه فرشنه السفره بالكاع بالستقبال ورتبنه المواعين والكلاصات اخذت الكنترول خليته على قناة القرآن الكريم بخرنه البيت وعطرنه اني والحجيه شوي واندك الجرس رحت فتحته طلع ركان جايب كباب وسمج دجاج مشوي وتكه ومعلاك  وقواطي ببسي ومقبلات كال

ركان - بعد اخوج بس رتبيهم ترتيب حلو

نور - تمام
اخذتهم للمطبخ واني ارتبهم اندك الجرس فتحو طلع رعد وبتول اني بقيت بالمطبخ ملتهيه بالغراض
جتي بتول 

بتول - شلونه الحلو

نور - التفتت حضنتها وسلمت عليها
يا هلا بتوتو

بتول - حلوه هاي مال توتو حبيت مو مثل احمد يكلي تيل مال كهرباء

نور - ههههه

بتول - يمه فدوه لضحكه الحلوه
شتاقيتلج شنو هاي تعودت عليج

نور - عمري صدكيني اني هم شتاقيتلج هم زين جيتي جنت منتظرتج

بتول - حبيبتي شسوي التهيت مدرسه ودراسه يبووو عل دراسه كسرت ظهري

نور - تذكرت دراستي راحت عليه السنه نقهرت بس ماخليتها تحس عليه كتلها

امج وتبارك شلونهم

بتول - كلهم بخير ويسلمون عليج وماما كالت باجر اروح اشوفها يعني باجر تجيج ان شاءالله

نور - هلا بيها حبيبتي

بتول - اساعدج بشي

نور - لا خلصت تعالي ناخذهم ونرتب السفره

بتول - اي يلا

نور - اخذت الصينيه مال كباب وبتول جابت السمج
والدجاج اول مادخلت جان يحجي ويه صديقه التفتلي نزلت راسي ورتبت السفره ويه بتول
وهو كل شوي يلتفت عليه ماهتميت خلصنه

بتول - تعالي حبيبتي كعدي يمي

نور - رحت كعدت يمها وهو صار مقابيلي وعيونه عليه شلون طلابه من يباوع عليه اتوتر مو بيدي
ضليت اطك طك بأصابعي من التوتر على يميني بتول وعلى يساري الحجيه وخطيه ثنينهم مدلليني
اكلي هذا واكلي هذا يجبون بهل اكل واني ماشتهي

بتول - هذا الدجاج يمممي شكل يموت اكلي
حبيبتي

نور - لا ماشتهي

ام ركان - يمه مايصير وراج علاج اكلي وتغذي

نور - ماحجيت شي ضليت بأطرفه اصابعي اكل التكه ماشتهي حس عليه كال

رعد - بويه شبيج ليش ماتاكلين

نور - ماشتهي
سحب شيش معلاك وكباب وكال

رعد - اكلي بويه اكلي جبري نفسج واكلي مايصير تكضينها ماشتهي عندج ادويه لازم تاكلين

نور - ماحجيت شي بس مدري ليش حبيت
اهتمامه بيه بديت اكل شوي شوي وكلما ارفع
راسي اشوف عيونه بعيوني ماعرف شنو الديصير
احس هاي الأجواء غريبه عليه

ام ركان - رعيد يمه ليش ماجبت جوان

رعد - حجيه ماكدرت تجي كالت باجر امرلهم

ام ركان - هلا بيها يايمه البيت بيتكم

رعد - تسلمين حبيبه

ركان - اي ضلعي بعد يومين وننزل

رعد - اي ننزل شعدنه

نور - هما بقو يحجون اني كمت رحت للمطبخ ماشتهي جتي بتول

بتول - ها حبيبي شبيج

نور - مابيه شي بس هيج تعبانه شوي

بتول - سلامتج حبيبتي بس ماكلتي شي

نور - صدكيني ماشتهي مو بيدي

بتول - ماشي حبيبتي من اجوعين حمي بالفرن واكلي

نور - ماشي
راحت جابت الموعين والغراض واني بديت اغسل بيهم جنا نحجي اني وبتول عن المدرسه والطلاب وجان اشتم ريحة عطر تجنن كتلها

اكلج بتول اشم ريحة عطر اجنن مالتج

بتول - هههه لا داده هذا عطر رعد

نور - رعد  استغربت
التفتت اشوفه واكف يم باب المطبخ
عزه العزاني شكد غبيه فشلت طلعت بتول تجيب باقي المواعين بقينه بس اني وهو تقدم كم خطوه يريد يغسل ايده كتله

عفواً بس ليش هنا تغسل ايدك
صار قريب عليه حسيت كلبي راح يطلع من  مكانه
من التوتر كال بصوته الخشن

رعد - الحجيه كالت خربانه المغسله
مال بره انجبرت اجي هنا اغسل

نور - ماحجيت شي انوب هذا لزك ساعه يغسل بيده وهو قريب عليه ريحة عطره سطرتني سطر
اريد يبتعد بس لساني انعكد وماكدرت اكله ابتعد
شوي وخلص اخذ كلينكس ينشف بيده وكال

رعد - تردين اسم عطري

نور  - ها

رعد - ههه اكول تردين اسم عطري

نور -  لا لا شكراً
ابتسم  وطلع هو ابتسم لو دوخني بمكاني عزه
بعينج نور هيج بسرعه تتأثرين شسوي اذا هو حلو وضحكته اجنن وكلامه وصوته يرن براسي معقوله حبيته لا ياربي اذا مو من قسمتي لا تخليني احبه يارب

احجي ويه نفسي دخلت بتول

بتول - ها داده اجي اساعدج

نور - لا حبي خلصت

بتول - راح اخذ الچاي باالحديقه خلصي وتعالي

نور - ماشي
راحت بتول واني كملت المواعين ورتبت ونظفة المطبخ ورحت بدلت ملابسي صارت مي

لبست دشداشه لون اسود وردانها جلد النمر
كُلش حلوه هاي هدية الحجيه جابتلي الصبح

ولفيت الحجاب لون اسود خليت عطر ريحته بسيط كُلش هسه تمام اول ماطلعت هو الوحيد التفت عليه ضل يحجي ويضحك ويه صديقه وعيونه عليه

ام ركان - ياهلا ومية هلا بنويره تعالي يمه

نور - هلا بيج حجيه
هما كاعدين بالحديقه ضحك وسوالف رحت كعدت يم بتول هما يحجون واني بالي مشغول وعقلي مشوش بالي ابد مو يمهم وكل ما ارفع راسي
اشوف عيون رعد عليه ماكدرت افسر نظراته اتجاهي ولا كدرت اعرف شنو الربط البيني وبينه

بتول - من جينه وركان يحجي ويضحك
ويسئلني عن الدراسه وعن حياتي وشنو احب وشنو هواياتي ماعرف حسيت بشعور غريب اتجاه
مدري اني اتخيل لو هو صدك يريد يتعرف عليه اكثر كعدنه شوي وكلت

خويه نرجع عندي هواي دروس

رعد - ماشي بعد اخوج لعد احنا نترخص

جوان - يااا يايمه بعد وكت

رعد - لا حجيه كافي هم يله امرلكم باجر

ركان - حجيه رعيد صاير حنين علينه

ام ركان - هههه لو ندري  جان من
زمان جبنه نويره يمنا

نور - كلهم ضحكو واني مثل الاطرش بالزفه مافهمت شنو تقصد كتلها
شلون حجيه مافهمت

ام ركان - رعيد فهم كافي هههه

رعد - ههههه لا حجيه شنو السالفه

ام ركان - علينه ولك رعيد اعرفك يايمه
اضحك جعل محد غيرك يضحك يابعد كَلبي

ركان - اضحك ضلعي اضحك شكلك راح تتعب
ههههه

بتول - اني اشهد ههههه

رعد - هيج صارت خوش يصير خير

بتول - اباوع على نور خطيه كلشي مافهمت
هههه دعيت الله يجمع بينهم بالحلال رحت حضنتها

حبيبتي دير بالج على نفسج

نور - وانتِ هم ياروحي دير بالج على نفسج
وعلى الدرس

بتول - ان شاءالله تم ادللي

رعد - بويه اي شي تحتاجين خابريني

نور - ماشي شكراً

رعد - هذا واجبي

نور - راحو كملت باقي الشغل ورحت للغرفه
ضليت اجي واروح اجي واروح شديصير وياي
شو بنفسي ماعرف شنو دسوي وشنو سالفتي

رحت توضيت وصليت ونمت كمت الصبح
على صوت الموبايل جنت كُلش نعسانه جاوبت
بنعس

الو منو

رعد - اول ماسمعت صوتها اتراح كَلبي ليش وشلون ماعرف

هلا بويه شنو بعدج نايمه

نور - اجاني صوته فزيت من مكاني اباوع هذا رقمه يااا جاوبته

اي هسه كمت اعذرني

رعد - معذوره بويه نامي وارتاحي بس الأدوية مو تنسين

نور - تمام

رعد - بويه اليوم شلونج 

نور - لا الحمد لله احسن

رعد - ماشي خابرتج علمود اكلج
حظري نفسج اليوم اجي اخذج

نور - وين تاخذني

رعد - لبيت خالج ...............................

_____
يكول الشاعر

شنفضهن نفض
شو كلهن التمن
‏شگثر أسهام كلهن
فد وكت هدن
‏سهم وداع
سهم أوجاع
‏وسهم عمري
وشبابي الضاع
‏شنفضهن
ونيابهن حدن
ياهو يرادف 
بنص المحنه حروف
بوكت صار المحنه تعلم الوگعه

_____

قلبيييييييي مو تنسون

التصويت بالنجمة
تعليق بين الفقرات
تفاعلكم مع الرواية

مدللتكم بارتات يوميه انزل بارت لا تنسون حق تعبي وحق الرواية تستاهل التفاعل قلبي انتو

《 ملاحظه تعبانه اليوم باجر البارت اطول ان شاءالله عذروني على يلي اكدر علي ماقصر ان شاءالله  》

حسابي انستجرام انشر هناك كلشي
يخص الرواية 👇

الان ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا