#خلف القضبان روح يتيمة
#بقلم الكاتبه جيهان آغا
_
_
قبل مانبدي صلو على سيدنا محمد
( اللهم صل على سيدنا محمد وعلى ال محمد )
ولا تنسون تفاعلكم يحفزني
اكتب البارت وانزله اسرع
قراءة ممتعة ياقلبي
__________
رعد - لييش مالها داعي لازم تفرحين اغار عليج لان اااحبج شنو الماله داعي بضبط وضحيلي
نور - غار ميخالف بس مو هيج هذا اسمه تحكم وتملك وعمره الحب الحقيقي والعلاقه الصحيحه ماجنت تملك
رعد - نووور سدي الموضوع
نور - بس هذا اول طلب اطلبه منك
رعد - كلت لا يعني لاااا ماحب اكرر
نور - نزلن دموعي باوعت علي عيونه احمرن كتله
: على كُل شي عصب ماوصيك
رعد - لعد شنووو تريدين اصفك لو اهلهل
تشكين بطني واكلج بعد شكي جم مره كايلج ماااحب العناد ليش تعاندين كلت لا
كولي اي ليش العناد ليش تخليني اتعصب عليج
نور - كمت عصبني كتله
: اها حلووو لو شي انت تقبل بي لو اسكت مايصير احجي و ليش حضرت جنابك تعصب ترا مايصير هيج والله مايصيرر على كُل شي عصبي اني شنو ذنبي
كام باوع عليه تقدم بتجاهي ابتعدت صار الجدار وراي وهو واكف مقابيلي ثبت ايده على الجدار
ونزل لمستواي وهمس باذاني
رعد - شوفي واسمعي كلامي كُلش زين
كلج تهميني وكلج ملكي ومن اكول لا يعني لا
بدون اعناد نهائي تعاندين اعاند اكثر لا
تلعبين بنار اعصابي وهاي حذرتج وكافي تبجين
نور - رفعت راسي نزلن دموعي كتله بصوت يرجفف من البجي
: اني مو ملك احد ومثل ماعندك رائي واحلام وطموح عندي ومثل ماتعيش اعيش لا انت احسن مني ولا اني احسن منك ليش الك كُل شي عادي بس اني مايصير
صفن على عيوني وشفتي تقدم راد يبوسني دفعته
كتله
: الناس مو لعبه عندك تريد بس كلامك يمشي
رعد - هيج صار الحجي
نور - نزلن دموعي مارديت علي عفته وطلعت برا
الغرفه ماكو مكان اروحله صعدت لطابق الثالث
كعدت بغرفه من الغرف قفلت الباب وشبعت بجي
حيل انقهرت مو بس انقهرت ماتوقعته يرفض
احس حلمي تحطم والله تعبت احب اكمل دراستي حالي حال كل بنيه بعمري
واني دابجي حسيت
بالم بمعدتي الم فظيع طلعت ركضت للحمام اتقيأ وابجي خليت ايدي على بطني
ليش اتعبوني مثل ابوكم على الأقل انتو ريحوني
رجعت اتقيأ تعبت غسلت وجهي وكعدت على الأرض ماسكه بطني وابجي
___
بتول - جنا كاعدين بالصاله سمعنه صوت رعد
سيف - هذا مو صوت رعد
بتول - بلا
تبارك - معقوله ديتعاركون
بتول - ماعرف
واحنا دنحجي صار الصوت اعلى
: والله يمكن ديتعاركون
جوان - خير ان شاءالله
سيف - روحو شوفو شكو
جوان - لا ابقو اني اروح اشوف شصاير
بتول - راحت امي واحنا ضل بالنه
تبارك - الله يستر رعد ومن يتعصب وعندكم الحساب
سيف - والله هاي مرته فقيره واحد يحجي الصراحه
بتول - اي والله وهادئه
تبارك - عيني هو عصبي الله يساعدها
بتول - خلي اروح اشوف شكو
تبارك - وين
بتول - هسه اجي
صعدت فوك اشوف شنو السالفه دكت الباب امي
دخلت واني وكفت يم الباب
جوان - خير يمه ليش صوتك طالع
رعد - ماكو شي يمه
جوان - شلون ماكو شي نور وين
رعد - مانزلت يمكم ؟
جوان - لا ماشفناها وينها
رعد - ماعرف يمكن فوك
جوان - يمه رعيد صاير شي بينكم
بتول - سحب سيجاره ولعها وكال
رعد - ماكو شي يمه شغله بيناتنه
جوان - براحتك يمه
بتول - طلعت امي وسدت الباب كتلها
يمه صدكتي كلامه اكص ايدي اذا ماكو شي
جوان - مايقبل يحجي شسويله
بتول - هسه اني اعرف شنو السالفه
عفتها وصعدت لطابق الثالث صحت
: نور حبيبتي انتِ هنا
ماردت دورت بالغرف ماكو سمعت صوت بجي
قريب من الحمامات بسرعه رحت فتحت اشوفها كاعده على الأرض وتبجي
: يااا شدتسوين هنا كومي ياعمري
ماردت عليه ضلت تبجي جتي امي
جوان - عزه العزاني يمه شبيج
بتول - حضنت امي وتبجي بحركة كَلب
انقهرت عليها كومتها امي وكعدتها بالصاله على الأرض بعدهم ما مشترين اثاث البيت لان باقي تعديلات
جوان - بتول روحي جيبيلها مي
بتول - تمام
عفتهم ونزلت جوه اخذت بطل مي وصعدت فوك
نريدها تسكت ماتسكت امي حاضنتها وهيَ تبجي
جوان - ولج يمه غير اعرف شبيج شربي مي واهدي خلي اعرف شبيج
نور - تعبانه خاله والله تعبانه
جوان - سوده عليه يمه شبيج تعبانه احجيلي ماكو شي ماله حل يايمه احجي
بتول - شربت مي ركضت على الحمام تتقيأ خطيه وتبجي شكد نقهرت عليها راحت امي يمها شوي وطلعو ماسكه بطنها وتبجي
: داده نور احجيلنه شبيج موجوعه مريضه احجي
ياعيوني
جوان - يمه احجي رعد مسويلج شي صاير شي
احجي
بتول - باوعت على امي كالت
نور - تعبت اني تعبت والله تعبت
جوان - بسم الله عليج من التعب يمه كافي تبجين
بتول - حضنتها امي كالت
نور - خاله على كُل شي يتعصب خانكني بحجة اغار اني شنو ذنبي والله غيرته تملك تملك مو غيرة حُب اليحب مايتعب محبوبه ويا هو يتعبني ياحب هذا ياحب كله اعصاب ولازم كلمته تمشي اني من الأساس تعبت بحياتي زاد فوك التعب تعبين شصير بس كليلي شصير اني هم بشر اتعب احزن اكتئب
انقهر
بتول - تبجي وتحجي بحركة كَلب عمي الله يساعدها والله رعد طبعه كُلش صعب اني مستغربه
شلون متأقلمه ويه طبعه
جوان - كافي يمه اهدي حبيبتي اني احجي ويا
نور - والله مو من طبعي اشكي والله مو من طبعي اطلع مشاكلنه صارلي شهرين بس شهرين ويا
جم مره تعاركنه وصل مرحله راد يضربني على مشكله متاكده انتو ماتعرفوها وهو جان غلطان والله وماحجيت ولا كتلكم احب نحل مشاكلنه بنفسنه بس تعبت والله تعبت
جوان - سوده عليه يايمه بس فهميني على شنو متعاركين اليوم اني احجي ويا
نور - كتله اريد اكمل دراستي شكو بيها ياخاله اني هم سادس اخر سنه يابه ماروح مدرسه بس اكعد بالبيت ادرس وقت الامتحانات اروح امتحن
مايقبل ولا ينطي مجال احجي واقنعه
بتول - شكو بيها ليش مايقبل
نور - يكول اغار بربكم هذا حجي اغار شنو راح اتخبل ويا بخطوبة حيدر طلع عيوني لحد ماقبل
اروح لصالون وحتى ملابسي هو كال هيج فستان اخذي ومن أخذته يكول هذا مخصر عليج ادري فستان لو عبايه مو هيج فدنوب خانكني وسكتت
كلت ميخالف احاول ويا شوي شوي بس ماكو
عصبي كُلش مايتحاجه ومتملك بشكل يخنك
مو حب
جوان - يمه والله هذا طبعه هيج من الصغر يتملك
اي شي يخصه
نور - خاله الله يخليج اني هم بشر مايصير هيج والله مايصير اني مو ملك احد ترا ماكو شخص مايحب ابسط حقوقه والله ماطلبه منا شي هاي
جم مره اكله اني اريدك الك مارايده فلوسك
ماريد منا شي بس هو لا متعبني ويا طبعه صعب خاله مداكدر اتفاهم ويا مايصير هيج والله مايصير
جوان - لا حول ولا قوة الا بالله
بتول - كافي ياعمري كافي تبجين حبيبتي كومي
وياي نروح نغسل وجهج
كومتها ورحت غسلت وجها جتي امي كالت
جوان - يلا يمه تعالي ننزل
نور - لا ما انزل ماريد اشوفه
بتول - تعالي يمي بالغرفه ماتشوفي
جوان - اي روحي يمها
بتول - ماحجت شي نزلنه جوه رحنا لغرفتي كتلها
حبيبتي اخذي راحتج اني انزل جوه اسوي قهوه الي والج واجي ماشي
نور - ماريد اني
بتول - ليش
نور - حتى اطفاله مثله متعبيني ماكدر اشرب قهوه
اتقيأ
بتول - لعد اجيبلج صحن فواكه اني وانتِ ناكله
ماطول هسه اجي
عفتها ونزلت جوه وامي راحت تحجي ويه رعد
___
رعد - كمت ابدل حتى اطلع برا اندك الباب
اتفضل
جوان - يمه اريد احجي وياك بموضوع
رعد - اكيد تفضلي
جوان - شنو طالع
رعد - اي عندي جم شغله برا
جوان - يمه ليش هيج تتعامل ويه مرتك خطيه
صار ساعه اريدها تسكت ماتسكت هيَ مريضه
ليش هيج يايمه
رعد - ااخ شكت بطني بهذا البجي جم مره كايل لا تبجين مايفيد على كُل شي تبجي
جوان - لا يايمه مو على كل شي بس اكو شغلات تتراكم على الإنسان بالنهايه هيَ بشر وبداية حمل
النفسيه تتعب انت شمعرفك بهيج سوالف شي
طبيعي تتعب ليش ماتخليها تكمل وتدرس
رعد - يمه ماناقصها شي ولا مقصر وياها بشي
جوان - اعرف بس هيَ حابه تكمل ادعمها واوكف وياها يايمه الحياة الزوجيه اخذ وعطاء ودعم من الطرفين اني متأكده لو جنت بمكانها جان دعمتك
اوكفت وياك
رعد - يمه اغار عليها يعني اني مدافهم هيَ ليش
ماتحب غيرتي لازم تفرح
جوان - يايمه الغيره شي والتملك شي غيرتك تملك
ماكو واحد يحب التملك يمه غير طبعك لو خفف غيرتك لا تخنكها تبقى يتيمه ماعندها لا عائله لا اهل انت صرت اهلها مو بس زوجها لا تظلمها بغيرتك يا ابني
رعد - اني غيرتي تملك يعني شسوي مو بيدي
وبعدين مدللها حياتنه حلوه مامقصر وياها والطابق
الثالث راح اجهزلها ارقى اثاث على ذوقها يعني
بيتها كامل مكمل واطفالنه راح ينورون حياتنه الا دراسه شتسوي بالدراسه
جوان - يمه اني مو علمودها احجي بس الحياة مو كُل شي زواج واطفال وبيت الحياة مراحل ورغبات
هيَ رغبتها تكمل خليها تكمل بيدك اخذها خلي تمتحن وبيدك رجعها اذا هلكد تخاف عليها
رعد - اني مو علمود السادس اخليها تكمل عادي يمي بس الكليه ماقبل تدخل
جوان - ولك يمه شبيك واذا كليه البنيه رايحه تدرس لو ادور سوالف طايح حظها وبعدين الا نور مو من هذا النوع شنو ماتثق بيها ؟
رعد - لا والله اثق شلون ما اثق بس اغار ماريد احد يشوفها غيري عيونها لازم بس تشوفني اني وبس
جوان - والله الكلام وياك ماله فائده بس اكلك شي واحد لا تخلي هذا التملك يدمر حياتك البنيه اذا
تمل او ينكسر كلبها بعد مايفيد لا غيرتك ولا التملك واني ماقصد هاي المشكله فقط لا بصوره عامه وبعد الايام كدامكم ولابد تواجهكم مشاكل
راجع نفسك يمه وفكر زين ولا تضيع هيج ورده من ايدك لان مستحيل بهذا الوقت تلكه مثلها وانت بكيفك
رعد - هيج كالت وطلعت
صفنت افكر بكلامها ااخ يانور ااخ
بدلت مشطت شعري وشواربي رشيت عطر اخذت الموبايل والمحفظه وطلعت نزلت جوه جانت بتول بالمطبخ كتلها
: ها خويه شدتسوين
بتول - هلا اخذ شوي فواكه الي والنور
رعد - نور وين
بتول - بغرفتنه
رعد - بعدها تبجي
بتول - بصراحه اي وحتى معدتها توجعها خطيه
كل شوي تتقيأ
رعد - سهله يصير خير دير بالج عليها بعد اخوج
بتول - ادلل خويه
طلع برا رتبت صحن الفواكه واخذته فوك فتحت الباب جانت تبارك يمها تحجي وياها
: وهذا احلى صحن فواكه لعيون جهال اخوي فديتهم نيالهم عندهم هيج عمه مثلي اووي فديت
تبارك - ههه الله يساعدهم عندهم هيج عمه بس لا تخبليهم مثلج
بتول - افا عليج غير احلى خبال
حبينه نطلع نور من الجو الحزين بس ماكو فائده
نبجي بهدوء بدون صوت بس دموع تنزل
كعدت يمها
: يلا حبيبتي اكلي شي غذي جهال اخوي
تبارك - اي صدك حبيبتي لاتنقهرين ماكو شي ماله حل الله كريم كلبي انتِ اهم شي صحتج وصحت
اليبطنج
نور - ونعمه بالله ، بتول هو وينه
بتول - طلع برا
نور - اي يطلع ليش مايطلع
بتول - اتوقع عنده شغل
واحنا دنحجي جتي امي
جوان - يمه نور خلصي وتعالي احجي وياج
نور - ماشي خاله
بتول - تعالي هنا احجي وياها
جوان - لا بعدين اريدها بموضوع وحدها
تبارك - أسرار دوله
بتول - بضبط ههه
_
نور - البنات بقو يمي يحجون ويسولفون رغم حزنهم بعدها مقهورين على ابوهم بس مع ذلك ماعافوني وحدي هما يحجون واني بالي مو يمهم
فقط اكول اي واي واني مامركزه على كلامهم شوي وكامو اجوهم ضيوف كتلهم روحو عادي اني اريد انام شوي راسي مصدع
راحو وبقيت وحدي بالغرفه تمددت اباوع على الصقف وابجي احس عايشه بسجن مو قصر شكبره
شوكت ارتاح ماعرف شوكت افرح ماعرف تعبت
ربي تعبت اجبر بخاطري يارب مالي غيرك ولا راح يكون الي غيرك وحدك ربي لا اله الا انت يارب
_______
في مكان اخر
رعد - طلعت شغلت السياره ورحت كملت جم شغله وخابرت ركان رد
هلا ضلعي وينك
ركان - هلا برعيد بالبيت
رعد - تعالو للكوفي انتَ وعُمر وباقي الولد
ركان - ماشي ضلعي
رعد - يلا انتظركم
سديت الخط توجهة للكوفي شوي واجوي مر الوقت بين الحجي والدومنه صارت بال11 بالليل راحو عُمر والشباب بقينه اني وركان سحبتلي سيجاره ولعتها
ركان - احسك ضايج
رعد - كُلش
ركان - صاير شي
رعد - انسى
ركان - معنى انت ونور
رعد - لا تعليق
ركان - وصلت بدون ماتعلق عود جيت اكلك شي
بس خليها لغير مره امبين مالك خلك
رعد - لا عادي احجي
ركان - عوفه لغير مره
رعد - كتلك احجي
ركان - والله ماعرف شلون اكلك مامتعلم احجي
وياك برسميه
رعد - رسميه منو رسميه ماعرفها
ركان - ههههه حتى اني ماعرفها هسه احجي لو لا
رعد - احجي
ركان - شوف رعيد بصراحه اني اريد اتقدم لبنيه
وخاف اهلها ماينطوني
رعد - ليش ماينطوك شنو ناقصك
ركان - لا والله ما ناقصني شي بس خاف اخوتها
مايقبلون
رعد - لا خويه توكل على الله وروح تقدم متأكد راح يقبلون
ركان - ها انت هيج تكول
رعد - اي بس لحظه منو هاي وين شايفها
علاقه لو شنو سالفتك
ركان - لا يابه ياعلاقه ماعندي شي وياها
رعد - خوش نعرفهم لو غربه
ركان - تعرفهم
رعد - بيت منو
ركان - غير يوم اكلك
رعد - ماشي خلي نكوم تأخر الوقت
ركان - اي يلا
__
بتول - اجونه ضيوف متأخر راحو صعدت فوك اشوف نور نايمه عفتها براحتها وكعدت على الأرض اكمل دراستي منا ل12 كملت نزلت جوه اشرب مي صدفه دخل رعد الظاهر بعده برا كال
رعد - ها خويه شدتسوين
بتول - كملت دراستي جيت اشرب مي
رعد - الولد وينهم
بتول - احمد بغرفته يدرس وسيف اتوقع نايم
وحيدر رايح لبيت خطيبته بعده ماراجع
رعد - ماشي
بتول - اي
وكف حسيته يريد يحجي شي بس متردد عفته
رحت شربت مي ردت اصعد لغرفتي كال
رعد - خويه بتول
بتول - هلا
سكت بعدين كال
رعد - نسيت شنو ردت احجي
بتول - عرفت شنو يريد يحجي كتله
: شبسرعه نسيت هههه يلامن تذكر صيحني
صعدت لغرفتي تبارك يم امي نايمه
ونور بغرفتي نايمه واني لميت الكتب علمود انام
وجان يندك الباب بهدوء كمت فتحته جان رعد
كتله
: ها خويه محتاج شي
ضل يباوع على نور رجع باوع عليه كال
رعد - من شوكت نايمه
بتول - والله صار هواي نايمه
حسيت بي يريد يروح يمها بس يستحي مني كلت
: اووو نسيت قلمي بالمطبخ اروح اجيبه
اخذت الموبايل وعفتهم ورحت علمود ياخذ راحته بلكت يصالحون
كعدت بالصاله سحبت الموبايل دخلت على حساب ركان منزل صور اسلحه ومكان شغلهم وايده ابتسمت من يوم الفاتحه لا اني حاجيه ويا ولا هوَ حاجي
___
نور - اني ودموعي نمت بغرفة البنات نمت نومت أهل الكهف ماعرف شجاني
ماحس غير واحد شالني بهدوء فتحت عيوني شوي شفته رعد واني كُلش ضايجه منا سويت نفسي نايمه حتى ماحجي ويا ضليت مغمضه دخلني للغرفه حطني عل سرير بهدوء وسد الباب حسيت بي بدل مدري سبح ماعرف بس حسيت بحركه بالغرفه لكن مافتحت عيوني شوي تمدد على السرير واني ظهري علي وجان يحط راسه برقبتي وايده على خصري كال
رعد - بعدج يتعبني
نور - نزلن دموعي اخذ نفس من رقبتي كال
رعد - اعرف بيج مانايمه
نور - مارديت بقيت مغمضه دارني الا حسيت بلمست ايده على وجهي تقدم باسني بخدي وراسي رجع حط راسه برقبتي وكال
رعد - كافي اعناد ليش تسوين حواجز بينا
نور - مارديت علي اخذ نفس وكال
رعد - احبج فهميها بعدج يتعبني
نور - فتحت عيوني شوي وابتعد باوع على عيوني
نزلن دموعي مسح دموعي وباس عيوني كال
رعد - دموعج تجوي كَلبي تحرك كَلبي حرك كافي تنزليهم
نور - اي واضح شكد مهتم
رعد - شلون ما اهتم
نور - باوع على عيوني وشفتي تقدم باسني بعدته كتله
: نعسانه اريد انام
باوع على عيوني نزلن دموعي
انداريت لطرف الثانيه كال
رعد - سهله يصير خير
نور - ابتعد وكف يم الشباك يدخن واني دموعي تنزل بهدوء مر تقريبا ساعه تمدد على السرير
مشكله اريد احضنه بس ماكدر متعلمه بحضنه انام
بس ما نداريت شكد انتظرته هو يسحبني لحضنه بس ماسواها بقينه هيج لحد مانمنه صار الصبح
حسيت بثكل على بطني فتحت عيوني اشوفه لَف ايده على بطني وراسه قريب من رقبتي نايم
صفنت علي وهو نايم
: ياربي والله احبه اهدي كلبه عليه يارب اهدي
ضليت صافنه علي وهو نايم وحايره وماعرف
شلون اتصرف ويا غيرته تخنك وحبه متعب شلون اقنعه شلون اغيره شلون افهمه الموضوع مو سهل وهو طبعه كُلش صعب
حاولت ابعد ايده حتى اكوم بس ماكدرت مشتاقتله
بعده يتعبني اني هم مو بس هو نزلن دموعي تقربت بست راسه شوي تحرك حاولت ابعد ايده كال
رعد - نامي
نور - مارديت حاولت ابعده رجع كال
رعد - كتلج نامي
نور - اريد اكوم
رعد - نامي
نور - ماريد انام هيَ كوه وخر اريد اكوم
رعد - كافي عناد ماتملين
نور - من تمل من اعصابك وقتها امل من العناد
رعد - اللهم طولج ياروح ويكلك ليش عصبي
غير عنادج شكه البطني
نور - مارديت علي
ابتعد واندار لطرف الثاني كمت غسلت وجهي
لبست دشداشه طويله لفيت الحجاب ونزلت جوه
ساعدت خاله جوان وتيلا بتحضير الريوك رتبنه السفره كالت امه
جوان - يمه روحي كومي رعيد
نور - بس
جوان - يلا يمه روحي
نور - ما انطتني مجال اكلها ماحجي ويا حسيتها متقصده اروح اكومه صعدت فوك للغرفه حتى اكومه جان بالحمام يسبح هم زين مايحتاج اكومه هو كايم
طلعته ملابسه ورتبت الغرفه طلع من الحمام
لَف المنشفه على خصره وكف يم المرايه ينشف شعره بالمنشفه طلعت من الغرفه نزلت جوه شوي ونزل مرتب وكاشخ خبيث شكد حلو يرتب شعره
اجه كعد تريكو كلهم الا اني ماشتهي حس عليه كال
رعد - ليش ماتاكلين
نور - ماشتهي
جوان - يمه مايصير لازم تاكلين شي
نور - ان شاءالله
شربت مي خله البيض يمي كال
رعد - اكلي اجباري مايصير ماتشتهين
نور - ماحجيت شي ردت اكل البيض شوي وجان
معدتي تقلب ركضت عل حمام اتقيأ غسلت وجهي ودموعي تنزل صعدت فوك للغرفه كعدت على السرير ابجي احس تعبانه وهذا التقيأ حيل متعبني وجان ينفتح الباب رفعت راسي طلع هو اجه يمي
رعد - كومي نروح لدكتور
نور - مايحتاج
رعد - ليش تعاندين
نور - مثلك
رعد - نور تعبت وياج كافي عناد
نور - اني تعبت مو انت
حضنت رجليه وابجي اجه كعد يمي وسحبني لحضنه
رعد - كافي تبجين شكيتي بطني بهذا البجي
نور - مارديت علي حضنته وبجيت
رعد - ولج بويه كافي بجي وتالي وياج
نور - تعبانه
رعد - وين يوجعج
نور - ماعرف بس تعبانه
رعد - اذا على سالفة الدراسه
اقبل كملي دراسه بس كافي تبجين مو زين عليج
نور - ابتعدت عنا كتله
احلف احلف راح تقبل
رعد - والله بس بشرط
نور - شنو
رعد - اول مره كملي سادس والله كريم للكليه
لا تروحين كليه مباشرة وعندي شرط ثاني
نور - شنو
رعد - البارحه ردت ابوسج بعدتيني اظن
الدنيا ديون
نور - يعني شنو مافهمت
رعد - لا فهمتي
نور - يحجي ونظراته على عيوني وشفتي فهمت قصده ابتسمت
تلمست وجهه وشواربه تقدمت بسته ابتعدت حضنته ودموعي تنزل وكتله
: احبك احبك والله احبك اعشكك مو بس احبك
رعد - بعدني زعلان
نور - ابتعدت كتله
: وشنو يراضي زعلك
تقدم ايده على خصري حط راسه برقبتي يشم
بيها كال
رعد - تحملي غيرتي مو بيدي غيرتي عليج بركان وربج تفهمي هذا الموضوع
نور - حاوطت ايدي على رقبته وهو يشم برقبتي كتله
: حبيبي الحب مو تملك مايصير غيرتك تكون تملك اني بكل الاحوال الك مايصير لغيرك بس الموت ياخذني منك لو يرجع بيه الزمن الف مره راح ارجع اختارك انت ماريد غيرك لان احبك اعشكك مو بس احبك بس ماكدر التملكك بغيرتي لان هذا الشي غلط التملك الزائد مع الايام يصير شك والشك يصير عدم ثقه وعدم الثقه معنى نهاية العلاقه ماريد اخسرك بسب هيج شغلات
رعد - نور
نور - عيونها
رعد - اني اثق بيج بس ماحب غيري يشوفج
اريدج بس الي
نور - بس
رعد - بدون بس
نور - ابتعد باوع عليه تقدم باسني
تركته براحته ماحجيت شي شوي وابتعد وكال
رعد - شلون ما اثق بيج وانتِ بنت كَلبي شيلي
هاي الأفكار من راسج
نور - ابتسمت حضنته
__
وبيومها قبل ارجع اكمل شلون قبل ماعرف بس اتوقع خاله جوان جانت حاجيه ويا يمكن اثر كلامها بي بيومها كُلش فرحت مو بس فرحت
هو طلع برا واني نزلت ركض ابشر بتول وخاله جوان بتول اقترحت عليه اقدم على الامتحانات هاي السنه كالت بعد وكت تلحكين وتبارك كالت اني ادرسج لان هيَ مدرسه انتظرت يصير الليل يرجع رعد علمود اكله وفعلاً رجع وكتله وقبل كال ميخالف قدمي هاي السنه بس ماكو كليه منا بعد الولاده بسنه او سنتين عود افكر بالموضوع واني وافقة كلت خلي اخلص السادس على الأقل والله كريم للكليه
مرت الايام التحق واني التهيت بالدراسه وتبارك بدت ادرسني هيَ وبتول خطيه ماقصرو وياي بعد اسبوع نزل رعد كملنه اثاث الطابق الثالث اثاث البيت اختارينه اني وهو كله لون رمادي فاتح مثل الشقه لان كُلش جان عاجبني مال شقه وفتحنه المطبخ على الصاله صار نفس ديكور الشقه كملنه كُل شي بس غرفه تركناها فارغه انتظرنه يقرب موعد الولاده نشتري جهاز الطفل ونرتبها هناك
كملت الشقه كال بعد الولادة نسكن بيها
واني قبلت وحسب الي عرفته مسجل هذا البيت بأسمه قبل لا عمران يموت الله يرحمه وهو من البدايه جان ارض ابو وعمران اخذها وبنا هذا
البيت بس كال حصت اخواني بي حتى لو جان
بأسمي البيت
ماحجيت شي مالي شغل بهيج مواضيع يبقون اخوه بينهم مو من حقي ادخل بقينه هاي الفتره بغرفته كاعدين
وبيوم رحنه نسوي سونار موعد جلستي وبهذ السونار راح نعرف توأم او لا لان مر على حملي تقريبا من3 الى 4 اشهر وبطني ما شاءالله جبيره
جنت اروح قبل جانت تكول مايبين بس هل مره ان شاءالله يبين وبعدني على تعب الدوخه والتقيأ بصراحه شكيت بتوأم لان بطني كبرت بسرعه ما شاءالله واعراض الحمل مثل وصف الدكتوره كالت راح تحسين بهيج اعراض وفعلاً حسيت بيهم
بيومها رحنا اني وهو وخاله جوان يم الدكتوره سوتلي السونار كالت حملج توأم يمكن احلى واجمل خبر اسمعه بحياتي من الفرحه ماعرفت شسويه كمت ابجي والدكتوره تسكت بيه وهو باس راسي وخاله جوان جتي باست راسي رجعنه للبيت بشرناهم كلهم فرحو من صدك فرحتنه جانت احلى فرحه الله يرزق كل شخص يتمنى هاي الفرحه
تغدينه خلصو كمت شوي ساعدت تيلا الحركه
البسيطه تفيدني بهيج مرحله من الحمل كملت سويت جاي قدمتلهم كعدت يم رعد جان يحجي ويه اخوانه بموضوع فتح مشروع بالشمال وصوتهم عالي من يحجون حسيت بتعب عفتهم وصعدت فوك بدلت لبست تراك صيفي ورفعت شعري بأهمال جبت لابتوب رعد دخلت على اليوتيوب وكعدت على السرير اكمل دراستي شوي ودخل جنت مركزه بالدراسه اجه تمدد كال
رعد - ها شلونه سهل صعب
نور - يعني بس هذا الموضوع مافهمته لصراحه
رعد - اشوف ياموضوع
نور - تقدم شاف الموضوع كعد شرحلي ودرسني تقريبا مر نصف ساعة درسني وفهمني الموضوع كُلش زين كتله
: حبيبي ليش ماصرت مدرس ترا خوش ادرس
رعد - جنت احب ادخل كلية الطب بس بوقتها مارحت لان اعرف نفسي مو مال طب انطيني اسلحه معارك وافك العبو.ات هذا مكاني
نور - بسم الله عليك ياكلبي الله يحفظك
رعد - بنت كَلبي هسه فهمتي الموضوع
نور - اي
رعد - يلا كومي شيلي هاي الأوراق وتعالي لحضني
نور - تم بس لحظه
كمت لميت الكتب وخليت الابتوب عل مكتبه مالته رحت يمه حضنته وحضني تقربت اشم ريحة عطر على رقبته كتله
: حبيب الروح
رعد - عيونه
نور - شوكت نروح نجيب الأوراق من الموصل
رعد - مال تقديم ؟
نور - اي
رعد - على الاسبوع الجاي نروح بس اكمل شغلي
نور - ماشي ياكَلبي
رعد - نور يعني فد 4 اشهر تقريباً يصير عندنه اطفال ثنين
نور - اي وكُلش متحمسه وخايفه بنفس الوقت
رعد - لا تخافين اني يمج وامي والبنات
مو وحدج
نور - ماعرف اكلك حب
رعد - كولي
نور - شنو نسميهم ومانعرف ولد وبنيه لو ثنين بنات او ولد احنا ماكلنه لدكتور شنو جنسهم وبصراحه ماريد اعرف
رعد - ليش
نور - الي يجي من الله راضيه بي احسن هيج يكون مثل مفاجأه لحد مايقترب يوم الولاده
رعد - اي صح اهم شي الخلقه الكامله اني هم ماهتم بنيه او ولد
نور - اي بس خلي نفرض ونشوفلهم اسم من هسه
رعد - اني اقترح مال بنات وانتِ مال الولد
نور - تمام
رعد - اذا بنات ثنين سميهم وحده لوجين والثانيه
قمر حلو شنو رائيج
نور - حلوو حبيت بلاخص لوجين كُلش حلو
واذا ولد شنو رائيك نسميهم وعد وسعد على اسمك
يعني تخيل بالجنسيه وعد رعد عمران كله عين عين هههه والله حلو او سعد رعد عمران مو حلو ؟
رعد - هههههه حلو
نور - اني كُلش حبيت اسم وعد حتى اذا ماجانو ولد البنات هم وحده منهم راح اسميها وعد بال حالتين اريد الأسم تعرف ليش
رعد - ليش
نور - احس حبنه جان مثل الوعد وتوافه هذا الوعد
وذوله ثمرت حُبنا
رعد - من اروح فدوه لهاي الشفه على هذا الكلام
نور - ابتسمت تقدم تمدتت صار وجه مقابل وجهي
باوع عليه كال
رعد - تعرفين صايره دبدوبه بهذا حملج وحليانه اكثر
نور - هههه لا والله الضعف احلى عليه
تقدم حط راسه برقبتي كال
رعد - بكل حالاتج حلوه
نور - ياكَلبي
وهو يشم برقبتي وجان احس بنغزه ابطني مهتميت كلت يمكن هيج نغزه عاديه شوي وجان
احس بيها مره ثانيه كتله
: رعد بطني
ابتعد بسرعه
رعد - شكو
نور - بطني مدري تنبض ماعرف
رعد - مافهمت شلون يعني
نور - كعدت سحبت ايده خليته على بطني كتله
: اصبر هسه تفهم
شوي ونفس الحاله تكررت كتله
: شفت بطني تنبض نبضات بسيطه والله
رعد - اي بس شنو هذا زين مو زين مدافهم
نور - يااا ولك غير ذوله جهالك ديتحركون هههه
رعد - حلفي صدك تحجين
نور - اي والله شبيك رجع ايدك وشوف
رجع حط ايده حس
رعد - اي والله اكو مثل نبضات مدري دفرات
نور - هههههههه دفرات لا هاي هيَ غير نبضات
بسيطه بس فدوه جهالي امبين مشاكسين من
هسه على ابوهم طالعين
تقدم قرب اذانه يريد يسمع متت ضحك
: هههههه شدتسوي
رعد - اريد اسمع
نور - ههههه شنو تسمع
رعد - بلكت اسمع صوتهم شي
نور - ياااا مو لهل درجه هههههه والله عليك سوالف
رعد - مو ديدفرون مدري شديسون
نور - اي بس مو لهل درجه بعدهم صغار
شنو تسمع ههههه
رعد - شمعرفني بهيج سوالف
نور - رعد شعور يخبل شكد حلو احسهم ديتحركون والله
رعد - هما جهالي بعد دمهم عسل مثل ابوهم
نور - ههههه الغرور
رعد - حقيقه
نور - اتفق
تقدم باس بطني كال
رعد - مو جنهم طولو
نور - اي اني هم هيج احس ههه
رعد - شوكت ينورون حياتنه
نور - ماباقي شي ان شاءالله
اجا اتصال ابتعد جان ركان رد علي
رعد - هلا بضلعي اي بالبيت شوكت هلا بيكم اي موجوده ماشي خويه تمام انتظرك مع السلامة
نور - سد الخط كتله
شبي ركان
رعد - يكول باجر بالليل نجي يمكم اني وامي
نور - هلا بيهم
رعد - اي اني حيل تعبان راح انام لا تكوميني لحد ما اني بنفسي اكوم ماشي بويه
نور - تمام حبيبي
تمدد سحبني لحضنه نام واني اقلب بالموبايل اشوف ملابس مال أطفال ناشريها كلت اشتري منهم كُلش حلوين
شوي ونمت اني هم وكمت لبست دشداشه طويله ونزلت جوه يم خاله جوان والبنات مر اليوم روتين عادي
صار الصبح بين تعب الحمل والدراسه وكعده ويه البنات مر النهار صار الليل اجوي ركان والحجيه ركان طلع ويه رعد برا الحجيه وحدها بقت كعدت تسولف وتحجي سوالفها تخبل كمنه اني وبتول قدمنا الضيافه كعدنه وجان تكول
ام ركان - داده احنا اليوم جايكم بطلب مو زياره عاديه
جوان - حجيه بكل جياتكم هلا بيكم نورتونا
ام ركان - بنورج داده راح ادخل بالموضوع
ماريد اطول عليكم
عيوني احنا جايين نخطب بتول الى ركان على سنه الله ورسوله عليه افضل الصلاة والسلام
وبصراحه جنا ناوين نطلبها قبل
موت عمران الله يرحمه بس ماصارت القسمه انتظرنه يمر جم شهر على موته احترام الميت واجب
نور - بصراحه اني انصدمت ماتوقعت نهائي
جايه تخطب بتول التفتت اشوف بتول وتبارك وامهم عادي اقصد مانصدمو مثلي معقوله جانو يعرفون مادري كالت ام رعد
جوان - والله حجيه نتشرف بيكم ويسعدنا اناسبكم بس القرار بيدها وبيد اخوانها وان شاءالله خير
ام ركان - ان شاءالله خير بعيوني احطها ماعندي احد هيَ وركان وبناتي تعرفين بالشهر مره اذا يجون
جوان - اعرفكم ونعم منكم بس حجيه بنيتي
بعدها صغيره ومنا دراستها
ام ركان - اعرف بعدها صغيره بس
ياداده ابني قافل عليها يكول حتى لو بس كلام
خطبيها الي منا لحد ما تكمل دراستها يلا نزوج
وركان ابنكم كبر وياكم وتعرفون طبعه واخلاقه
وسئلو علي من حقكم
جوان - مايحتاج نسئل حجيه ركان كبر ويه جهالي
ونعم خوش ولد الله يحفظه لشبابه
ام ركان - تسلمين داده ويحفظلج الولد والبنات
هايمه بتول شنو رائيج
نور - التفتت على بتول خجلت متت ضحك
كالت تبارك
تبارك - خجلت معنى موافقه هههه
نور - هههههه اتفق
بتول - يااا شبيكم
نور - نعتبر عدم الرد رد موافقه مو ههههه
نور - سكتت امها كالت
جوان - ماتحجين ام لسان
بتول - ماعرف بكيفكم
نور - هيج كالت وكامت راحت للمطبخ خربنه ضحك اني وتبارك هههه
تبارك - خلص يعني موافقه بس بطريقه غير
مباشره هههههه
نور - اتفق ههههه
ام ركان - يا الله ان شاءالله نفرح بيهم
نور - امين
اجه سيف سلم واخذ امه ماعرف وين وتبارك اجاها اتصال طلعت برا تحجي صاحتني الحجيه اكعد يمها كمت رحت كعدت يمها كالت
ام ركان - شلونج يمه ويه الحمل
نور - والله حجيه شوفت عينج على كولت رعد صاير جني دب تعبانه وجسمي ثكيل ومع ذلك اتحرك
ام ركان - اي تحركي يمه احسن هو توأم مو
لان ما شاءالله بطنج جبيره
نور - اي توأم
ام ركان - ههههههه الارعن هلكد مايكول احبلج بتوأم سبحان الله رزقه توم على نيته
نور - هههه اي والله الحمد لله بفضل الله
بعدنه مانعرف شنو جنسهم
ام ركان - احسن الكاتبه الله هلا بي اهم شي
الخلقه الكامله
نور - اي والله
ام ركان - رعيد شلونه وياج
نور - الحمد لله
ام ركان - يعني زين وياج
نور - اي مابي شي
ام ركان - الحمد لله والبنات والولد شلونهم وياج
نور - كلهم يحبوني ويحترموني
ام ركان - الحمد لله يايمه وانتِ بادليهم وكسبيهم
نور - اي والله هيج اسوي الحمد لله
جتي خاله جوان كعدت شوي وراحت الحجيه ويه ركان
شوي و رجع رعد كعد يم امه حجتله على طلب الحجيه حسيت بتعب عفتهم وصعدت فوك اكمل دراسه شوي ودخل رعد شفته صافن كتله
: شبيك ياكَلبي
رعد - مصدوم
نور - ههههه علمود ركان مو
رعد - ماكلي صار شكد ويا ولا حجه لا والحلو صار
شكد يكول اريد اتقدم لوحده ومتردد وتالي تطلع اختي ليش ماكلي وجه لوجه
نور - حبيبي يمكن يستحي او يخاف تفشله
رعد - ماعرف
نور - انت شنو رائيك
رعد - ماعندي مانع اذا هيَ تقبل اني قابل
نور - صدك ركان خوش ولد اني احبه
رعد - شنو تحبين
نور - باوع عليه ضاج كتله
: يااا شبيك اقصد احبه واحترمه مثل اخ
رعد - خوش شلونج اليوم
نور - زينه
كملت دراستي وهو خله الموبايل على المكتبه نزع ساعته وبدل ملابسه واجه تمدد على السرير وسحبني لحضنه واني هم حضنته سحب ايدي
تلمس اصابعي وباسهم
رعد - جنهم اقلام
نور - هههه هنا اقلامك
رعد - اي اقلامي
نور - تقدمت بسته بخده ودفنت راسي برقبته
لحظة هدوء بيني وبينا شوي وكال
رعد - باجر نروح للموصل
نور - ابتعدت كتله
: صدك تحجي
رعد - اي
نور - مو كلت اسبوع الجاي
رعد - لا باجر نروح اسبوع الجاي التحق
بس لازم نروح للمدرسه الي جنتي اداومين بيها علمود الأوراق ومعاملة التحويل مدري شسمها
نور - اي صح والوثيقه اتوقع لازم انجيبها
رعد - اي
نور - رعد عادي اذا رحنه امر اشوف اختي وصديقتي
رعد - اي عادي
نور - هو هيج كال حضنته وبسته
ياعمررري يلوموني ليش احبك يول اعشكك مو بس احبك على كولتنه اهل الموصل قبان عينك اشقت احبك ههههه
رعد - هاي المصلحه هيج تسوي
نور - يااا راح ازعل يعني بحياتي مامتغزله بيك
رعد - لا يابه مشبعتني غزل طلعتي عيني من الغزل
نور - باوع عليه عود يعلق كتله
: والله اتغزل بيك واسمعك كلام حلو
ليش هيج تكول
رعد - مايكفي بس غزل
نور - باوع عليه غمزلي فهمت قصده غميت كصتي (جبيني) كتله
: راح تصير اب لطفلين شوكت تبطل سوالفك المنحرفه
ضحك سحبني الا ولَف ايدينه على خصري تقرب يشم برقبتي وانفاسه الحاره تضرب بوجهي ورقبتي كال
رعد - ننحرف سوا شتكولين
نور - هههه والله جنت فقيره طلعت عيني
اخذ نفس من رقبتي كال
رعد - تعرفين مشتاك
نور - بس مشتاك عبالي ميت شوك يمعود
رعد - وتكول فقيره واضح
نور - هههه هو اليعاشرك شيصير لعد
سحبني الا اكثر كتله
: رعد
رعد - عيونه
نور - احبك
رعد - اعشكج
نور - ابتسمت حاوطت ايدي على رقبته وهو
يشم برقبتي
_
: مرت اليله وصار الصبح كمنه حضرنه نفسنه ونزلنه سوا صبحنه على خاله جوان وحيدر جانو كاعدين بالصاله
رعد - يمه رايحين للموصل علمود المعامله مال امتحانات
جوان - ماشي يمه بس ديربالك من الطريق
ترجعون اليوم
رعد - لا احتمال باجر نرجع مامحتاجين شي
جوان - لا يمه سلامتك
حيدر - بلا اني محتاج جيبلي وياك عصير زبيب وبرتقال من شربت طه يمكن اسمه مو
نور - اي بلاخص الزبيب مالهم كُلش طيب
حيدر - اي عصايرهم طيبه دائما طلابي من الموصل يجيبولي
نور - اي هو هذا الزبيب ويه طبق بقلاوه من احمد الحلواني اووف شهيتني
رعد - ها شبيج بابا
حيدر - هههههه
جوان - ههههه جيبلها مدام شتهته
نور - والله خاله ماحب الحلا بس ماعرف شتهيته
جوان - يمه غير حامل شي طبيعي
نور - اي
رعد - بس نوصل اشتريلج روحي بالسياره
هسه اجي
نور - تمام
عفتهم ورحت برا صعدت بالسياره شوي واجه شغل السياره وتوجهنه للموصل طبعاً اكيد طريق طويل
وبعد تعب ساعات طويله ومتعبه وصلنه للموصل ورحنه على مدرستي بس ماقبل اني انزل كال ابقي بالسياره بقيت هو راح جاب اوراق وكمل المعامله ورحنه لتربيه علمود اوراق التحويل حتى امتحن ابغداد كمل تعبنه صار الليل حجزنه غرفه بفندق لنوم صار نمنه صار الصبح بدلنه طبعاً لبسني عبايه خليجيه حتى فستان عادي ماقبل البس ماحجيت
شي لان حتى اني العبايه الخليجه اريح واسهل
الي علمود بطني
اخذني رحنا نفتر شوي بالموصل رحنه لمرقد النبي يونس عليه السلام ومناك رحنه لسوق النبي ولمنطة السيدة الجميله والمجموعه الثقافيه اشترينه شغلات ماسك ايده ونمشي
كل شوي يضحكني بكلامه ومايخليني اضحك برا وكل شوي نزلي راسج نصي صوتج لا تضحكين انوب اني مو بيدي يجيني ضحك شسوي هههه والله خبلني ويا هيَ صح طلعه بسيطه بس
كُلش حبيتها وفرحت وهاي اول طلعه الي الا
تعبنه رحنه للمطعم ومناك رحنه لمحل احمد الحلواني جاب بقلاوه الي والى اهله حسب طلب حيدر وجابلي عصير زبيب طه بالسياره كعدنه شربنه العصير
حبيب الروح شكراً
رعد - بالعافيه بويه وين نروح هسه
نور - اذا تكدر نروح يم سوزان اختي ومناك
امر على صديقتي ونرجع اذا تكدر يعني وبكيفك
رعد - لا عادي هسه نروح بس ماتروحين تشوفين
اهلج
نور - قصدك نروح للمقبره
رعد - اي
نور - والله اتمنى ياريت
رعد - اي نروح شعدنه
نور - ابتسمت حيل مشتاقه لقبر اهلي و شوفت سوزان وزينب ان شاءالله اشوفهم كلهم
وتوجهنه لمنطقة الساكنه بي سوزان دليته بيتهم وصلنه
رعد - هذا بيتهم
نور - اي
رعد - ماشي نزلي بس ها صدك اذا شفتيها ماريد ملحه بالحضن والبوس ماشي بويه
نور - ههههه ليش
رعد - كتلج ماريد كولي اي
نور - ادلل بس لحظه يعني انت حتى من
البنات تغار ؟
رعد - من الهوى اغار
نور - اووو جواب دبلوماسي هههه
رعد - اي طبعاً يلا نزلي
نور - ماشي ياكَلبي
نزلنه جنت رافعه شوي ردان العبايه تقدم عدلها علمود ايدي لا تطلع متت ضحك على سوالفه
فوك ضيمي احبه الخبيث
دكينه الباب شوي وانفتح طلع زوج سوزان ضل يباوع علينه مصدوم
رعد - السلام عليكم
- عليكم السلام
نور - ضل يباوع عليه مثل عرفني وماعرفتي اني شكلي متغير من الحمل حيل منتفخه بطني وايدي اوجهي قبل جنت ضعيفه كال بتردد
- نور اخت سوزان لو اني غلطان
نور - ابتسمت كتله
: ما غلطان شلونك خويه
- ياهلا ومية هلا انتِ شلونج اخبارج شكد
دورنه عليج كلهم كالو مسافره يم خالتج
نور - لا والله لا مسافره ولا شي
واحنا دنحجي وجان تجي سوزان انصدمت من شافتني
سوزان - نور
نور - اي نور
نزلن دموعي رحت حضنتها وابجي وهيَ تبجي
سوزان - ياعمري انتِ وين رحتى وعفتيني
نور - موجوده والله بس اااخ طشرونه ياسوزان
طشرونه وفرقونه
سوزان - الله يسامحج يايمه بعدتنه وكلمن اطشر بمكان ولج شكد مشتاقتلج
نور - حضنتني تبوس بيه سوزان كُلش حنونه تبجي واني ابجي ورعد وزوج سوزان واكفين يم الباب كال زوجها
- تفضلو جوه قابل تبقون واكفين
رعد - لا احنا مستعجلين
- بلا صغرة بيك ماعرفتك حضرتك شتقرب النور
رعد - زوجها
نور - رعد هيج باوعت عليه سوزان انصدمو هيَ وزوجها كتلهم
: اعرفكم على رعد زوجي
سوزان - شوكت تزوجتي
نور - سالفه طويله بعدين اكلج بس انطيني رقمج
- تفضلو مايصير واكفين يم الباب
سوزان - اي تفضلو جوه
نور - باوع عليه رعد ماحجه شي دخلنه رعد وزوج سوزان راحو لغرفة الضيوف واحنا كعدنه بالصاله قدمت مي ركزت على بطني نزلن دموعها كالت
سوزان - بس لا حامل
نور - مسحت دموعها بست راسه حيل احبها كتلها
اي وبتوأم همين
سوزان - يمه فدوه ولج نور شوكت تزوجتي
نور - تقريباً 4 اشهر
سوزان - ياعيوني بعدج عروس
شكد دورنه عليج من بعد ماعرفنه امي انسجنت ردنه نجي لبغداد علمود ارجعج للموصل بس بيت عمي كالو سافرتي يم خالتج بالسويد
نور - لا حبيبتي بقيت هنا خلي احجيلج شصار وياي
سوزان - اي فدوه
نور - حجيتلها كل الي صار هيَ تبجي واني ابجي
جانو مفهميها اني تحارشت بزوج منال سوالف
بيت عمامي حجتلي حجي انصدمت
مطلعين عليه حجي يوكف شعر الراس كتلها السالفه شلون زوج منال راد يغتصبني ورعد واهله ساعدوني ورحت يم الحجيه ومناك دورت على اهل امي وشلون عقدنه اني ورعد انصدمت
سوزان - عزه العزاني كل هاي الأحداث صايره
وياج بهل جم شهر
نور - شايفه هيج شي
سوزان - لا والله ماشايفه الله يسامحج يايمه نزلت راسنه بين الناس وطشرتنه وراحت شكد كتلها لا تزوجين هذا الرجال شكله مو راحه مافاد وياها عنيده هاي تليتها سحبها ويا
نور - اي والله شهد شلونها
سوزان - زينه
نور - دومها
واحنا دنحجي اجه زوج سوزان كال
- خويه نور زوجج يكول خلي تجي تأخرنه
نور - تمام
التفتت على سوزان حضنتها تبجي واني ابجي
: حبيبتي سوزان امانه شوكت ماتجين لبغداد مري عليه
سوزان - ان شاءالله ياكَلبي انطيني رقمج على الاقل اخابرج كل مره اطمن عليج
نور - اي لحظه
طلعت الموبايل انطيتها الرقم واخذت رقمها طلعنه برا سلمنه عليهم وصعدنه بالسياره شغلها وكال
رعد - منين يعرفج هذا الرجال
نور - يا رجال اها قصدك زوج سوزان شلون مايعرفني جان دائما يجون يمنا هو وسوزان
والله وكفو وياي بمواقف عمري ما انساها
ماعندي اخوه هو صارلي اخ
رعد - بيها الخير
نور - حسيت بي ضاج ماحجيت شي شوي وكال
رعد - وين بيت صديقتج
نور - اذا ماتحب مانروح
رعد - لا عادي
نور - ماشي
دليته المنطقه والبيت وصلنه نزلنه دكينه الباب
شوي وانفتح طلعت ام زينب
نور - خاله شلونج
- هلا يمه
نور - ماعرفتني لان هيَ خطيه نظرها كُلش ضعيف
مره حبيره بالعمر كتلها
: خاله تذكرتيني
- منو
نور - نور صديقة زنوبه
اني هيج كلت شكد فرحت حضنتني وتبوس بيه
- يمه هلا هلا ومية هلا نور يمه شلونج اخبارج يايمه
نور - الحمد لله ياخاله انتِ شلونج
- الحمد لله يايمه عايشين تفضلي
نور - لا خاله مستعجله بس زنوبه بالبيت اريد اشوفها
- اي هسه اصيحها
نور - تمام
راحت واني وكفت يم الباب ورعد صفه السياره شوي بعيد اوكف ينتظرني واني واكفه يم الباب انتظر زنوبه التفتت لطرف الثاني صدفه شفت اخوها كرم يبووو شجابه هسه شافني من بعيد اجه بتجاهي ايدي على كلبي بس لا تصير سالفه يبووو ولج زنوبه وين صرتي صخان الصخمني
انداريت على رعد جان واكف يم السياره يدخن وبيده الموبايل يارب ماينتبه وتصير سالفه
وجان تطلع زينب
زينب - ولج نورر هاي انتِ يمممه كَلبي مداصدك
نور - حضنتها
اي اني شلونج ياعمري شكد مشتاقتلج
زينب - غير مشتاقتلج موت ليش ماخابرتي
نور - اووو صار وياي هواي سوالف تشيب الراس
انطيني رقمج بعدين احجيلج
زينب - تمام شلونج شو سمنانه
نور - هههه حامل
فتحت عيونها من الصدمه
زينب - جذابه
نور - والله ههههه
زينب - عزه بعينج شوكت تزوجتي وحبلتي
نور - كتلج صار وياي هواي سوالف بعدين اكلج
شلونج بالدراسه
زينب - زينه الحمد لله وانتِ
نور - بعدني ماحاجيه وجان يجي كرم كال
كرم - نور هاي انتِ شلونج اخبارج
نور - بلعت ريكي كتله
الحمد لله
التفتت على رعد شافه اجا بتجاهنه كلت
: زنوبه بعدين اخابرج لازم اروح
زينب - يااا بعد شنو شفت منج وين تروحين
كرم - نور تفضلي جوه لا تكوفين برا
نور - بعدني ماحاجيه اجه رعد كال
رعد - يلا بويه نروح اتاخرنه
نور - ماشي
تقدمت حضنت زينب وهمست
: هذا زوجي
ابتعدت انصدمت
زينب - حلفي
نور - والله
يلا حبيبتي ان شاءالله اتواصل وياج وافهمج السالفه
زينب - ياريت انتظرج
نور - ادللي حياتي
التفت عليه كرم كال
كرم - نور شلونج بالدراسه
نور - بعدني ماراده كال رعد
رعد - زينه يلا نروح
نور - تمام
كرم - انت منو نور منو هذا
نور - رد علي رعد
رعد - زوجها انت منو
نور - التفت عليه كرم باوع عليه بنظره ماعرفت افسرها انصدم او ماصدك كال
كرم - جذاب
رعد - احترم نفسك
نور - رجع باوع عليه كال
كرم - نور صدك كلامه احجي
رعد - انت شبيك ملطلط نور ونور شلزكت
زينب - كرم اي زوجها
كرم - شلوون هيج صار نور شكتلج اني
عيب عليج والله مع الأسف
نور - عزه شديحجي هذا يبووو دفعه رعد وكله
رعد - احترم نفسك اوزن كلامك قبل لا تحجي
كرم - ولك انت منو علمود هيج تحجي وياي
نور - حسيت الوضع راح يطور كتله
: رعد خلي نروح اتاخرنه
رعد - منوووو هذا
نور - تعصب كتله
: مو مهم خلي نرجع فدوه
كرم - اذا اني يمج مو مهم بس انتِ يمي كُلش مهمه
نور - هو هيج كال وجان تجي ضربه من رعد
وكعه على الأرض
رعد - شوووو ماخذ راحتك انت شنو مهم مو مهم
شديحجي هذا
نور - رعد فدوه عوفه خلي نروح
رعد - كتلج منووووو هذا ردي
نور - نزلن دموعي ماعرفت شحجي
كام كرم باوع عليه بحقد و رد على رعد
كرم - حبيبها عندك مانع .............................
-
-
_____
يقول
ارا في عينيكَ الحب
واراهُ نهاية المطاف
لا اشكو لناسي همً
لكن زدت فوق الجرح جرحً
كان عنوانهُ الصمت وفي القلب الف كلام
لَمن اقول مافي قلبي
الم تعلم ليس في قلبي سواك
َولَمن اعزف نغمات الحزنِ والحزن كان مُنتهاك
بقلمي___________________________✍
_
انتظروني في البارت القادم 🔥🤏🏻
فضلا وليس امرا لا تنسون التصويت بالنجمة وتعليق بين الفقرات وتفاعلكم مع الرواية
أتمنى يوصل 200 تعليق حتى اكمل البارت القادم اسرع ان شاءالله
وشكراً لكُم
حسابي انستجرام انشر هناك كلشي يخص الرواية والابطال 👇
_
_
والان ياقلبي انتم ثقلو ميزان حسناتكم بذكر الله
"""""""""
سبحان ألله
ألحمد لله
لا إله إلا ألله
ألله أكبر
"""""""""
#خلف القضبان روح يتيمة
#بقلم الكاتبه جيهان آغا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!