رواية خلف القضبان روح يتيمة الفصل التاسع والثلاثون 39 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
__________

رعد - الو

- مرحبا انت النقيب رعد

رعد - هلا نعم منو وياي

- تعرف البيوت القديمه الي يم ..... تعرفها ؟

رعد - اي شبيها

- هناك روح شيل جثة ابوك عمران

رعد - شنوو منو انت

- مو مهم نصيحه درب عمران لا تعيده لا انت
ولا اخوانك بعدين مصيركم راح يكون اسوأ
وصلت الفكره ياسيادة النقيب سلملي هههه

رعد - منووو انت الووو
سد الخط بوجهي رجعت خابرته صار مغلق

جوان - شبيك يمه شصاير

رعد - ماعرف سيف خابر عمران بسرعه

سيف - ليش

رعد - بسرعه خابره مو وقت الاسئله

سيف - ماشي

بتول - اباوع على رعد متوتر معنى صاير شي
خابر سيف ابوي

سيف - مغلق

بتول - صفر وجه رعد كلت

: فدوه شكو احجي شصاير

رعد - احمد روح كثر الحرس يم الباب
اوزعهم على أطراف البيت كله وخلي عيونهم
عشره على عشره وانتو يمه ماريد خيالكم
بالحوش مو بس برا ممنوع احد يدخل
او يطلع برا وراح اوصي الحرس لا يدخلون احد

جوان - شكو يمه غير نعرف شصاير

سيف - ابوي جهازه مغلق احجي رعد شنو السالفه

رعد - يمكن عمران

بتول - شبي احجي

اخذ نفس وكال

رعد - احتمال انقتل مغتالي ماعرف بضبط

بتول - لطمت على وجهي
: صخام الصخمني شدددتحجي

سيف - شنوووو

احمد - ررعد شنوو هذا الحجي

رعد - اهدووو خلي نروح نتأكد يمكن كذبه
او كمين اني السالفه ماقتنعت بيها

تبارك - لا لا اكيد كذبه مستحيل ابوي يموت

رعد - يمكن

سيف واحمد تعالو وياي وانتو يمه مثل ماكلت ممنوع تطلعون برا نهائي يطلع ولا احد يجي واضح

جوان - بدموع / واضح يايمه دير بالكم على نفسكم

رعد - ان شاءالله

نور - مصدومه من كلام رعد معقوله عمران مات
انقهرت لصراحه التفت عليه كال

رعد - نور بويه دير بالج على نفسج

نور - ان شاءالله وانت هم

رعد - يلا امشو

نور - راح وبتول وتبارك كعدو وحده حاضنه
الثانيه يبجون جتي امهم حظنتهم وتبجي وياهم من صدك انقهرت عليهم حيل صعبه ان شاءالله
يطلع كذب

_____

رعد - احمد شغل السياره بس اخابر جماعتي
يتأكدون من الرقم

سيف - رعد خاف السالفه اكبر من كمين

رعد - ماعرف

سحبت الموبايل خابرت علي رد

ضلعي شلونك

علي - هلا برعيد عاش من سمع صوتك

رعد - حقك والله بس مشغول وربي
علاوي اريدك بموضوع مهم

علي - تفضل خويه

رعد - شوف راح ادزلك رقم اريد الموقع ماله وبأسم منو مسجل الرقم التفاصيل كامله اريدها

علي - ادلل بس شصاير وياك

رعد - خابروني هسه يكولون
قاتلين عمران ماعرف صدك جذب ماعرف

علي - ان شاءالله خير دز الرقم وادلل

رعد - تسلم ضلعي هسه ادزلك
سديت الخط دزيتله الرقم

سيف - ابلغ حيدر

رعد - مالي شغل بي

رحت يم الحرس انبهم لميتهم كلهم كتلهم

: شوفو اريد عيونكم عشره على عشره ممنوع طير يطير بالبيت وفهمكم كفايه قسماً عظماً اذا صار شي تشوفوف وجهي الثاني وهاي نبهتكم يلا بويه كلمن يشوف شغله

الحراس - حاضر استاذ

رعد - عفتهم ورحت صعدت بالسياره شغلتها اني اسوق وسيف كاعد كدام واحمد وره مسافة الطريق وسيف بعده يحاول يخابر عمران وعمران مغلق

سيف - لييش مغلق

احمد - ولكم بس لا يطلع صدك

سيف - ان شاءالله ماكو شي
خلي اخابر حيدر اشوف وين دايح

احمد - راح اتخبل بسس لو اعرف منو ذوله
رعد ماتعرفهم

رعد - لا

سيف - ااااخ لو بس اعرف منوو ذوله اله اثرمهم ثرم

احمد - دخلي نعرف ابوك شنو عنده وياهم محد يعرف شنو سالفته بس مايكدرون يسون شي
متأكد كذبه مال موت يمكن اغتيال

سيف - ماعرف الله يستر

رعد - كافي اهدو خلي اركز بالطريق

سكتو سحبتلي سيجاره وسَقت بسرعه مسافة الطريق وصلنه للموقع سحبت السلا.ح

: يلا نزلو بس انتبهو واي شي يصير سلا.حي
الثاني هنا تمام

سيف - ماشي

احمد - انطيني مفتاح السياره

رعد - هاك بس كتلك لضروره السلا.ح مو لعبه
دير بالك ترمي

احمد - ماشي

رعد - يلا نزلو

نزلنه اني كدامهم امشي وهما وراي المكان عباره عن بيوم قديمه مهدومه وتكرمون كله مزبله

تقدمنه اكثر وجان نشوف عمران مرمي
على الأرض وكفت بمكاني وسيف واحمد ركضو على ابوهم حاضني ويبجون واني ضال بس اباوع

صاح سيف

سيف - بعده عااايش اكو نبض والله اكووو تعالو نشيله بسررعه

احمد - رررعد افتح باب السياره بسرعه

رعد - شمر المفتاح رحت فتحته شالو وحطو على
الكشن الورا واني صافن معقوله جاي انقذ حياة عدوي

: صعدت بالسياره صفنت معقوله اني دانقذ حياة عمران

سيف - شغل يمعوود شبيك صافن

احمد - هذا شبي صافن وولك ابوي راح يموت
شجاك

رعد - ماحجيت شي مصدوم من تصرفي

شغلت السياره وتوجهنه للمستشفى
سيف خابر حيدر وامي علمود يجون مسافة الطريق وصلنه للمستشفى اجوي اخذو الكشن كله صار دمه ضاربي ومتصاوب مدري قريب من كَلبه ماعرف صفيت السياره ونزلت شافه الدكتور كال

دكتور - لازم عمليه فوراً

سيف - دكتور عادي اجي وياكم

دكتور - حضرتك منو

سيف - ابنه وطالب طب عام اتمنى اتواجد وياكم

دكتور - ماشي
جهزو غرفة العمليات بسرعه

- حاضر دكتور

رعد - اخذو يجهزو شوي وجتي امي والبنات

جوان - ها يمه شكوو شبي عمران

رعد - اهدي يمه ماكو شي ان شاءالله

بتول - احجي الصدك ابوويه ماات مووو
احجي الصدك

رعد - لا بعد اخوج ياموت راح يدخلو للعمليه
والله كريم

تبارك - رعد شلونه جان شمسوين بي

رعد - ماكو شي ومابي شي لا يضل بالكم
وين نور

جوان - عفناها بالبيت

رعد - تمام طالع برا ادخن

جوان - ماشي يمه

رعد - بعدني ماطالع اجاني اتصال من ركان رديت
: هلا ضلعي

ركان - رعد صدك السمعته عمران مات

رعد - لا بعده راح يدخل للعمليه

ركان - منو وشلون هيج صار

رعد - ماعرف وصيت علي والولد
يشوفولي منو ذوله

ركان - تمام اني جاي يمكم يامستشفى انتو

رعد - ال.......

ركان - مسافة الطريق واني يمكم

رعد - ماشي خويه

سد الخط عفتهم وطلعت برا ادخن

_

بتول - كعدت على الارض ابجي جتي تبارك حضنتني اجه الدكتور طلعو ابوي علمود ياخذو لغرفة العمليات كمت اشوفه انصدمت اباوع
وجه مورم من الضرب

: سوده عليه حسبي الله ونعم الوكيل منو هيج مسوي بيك منووو

مسكت ايده بستها وابجي كتله

: بويه فدوه ارجع انتظرك لا تعوفني فدوه لعيونك

انفكت ايدي عن ايده اخذو للغرفة العمليات اجه احمد حضني ونبجي اني وهو وجان يطلع سيف امبينمن ملابسه راح يتواجد وياهم بالعمليه

تبارك - سيف شلونه

بتول - اباوع مارد عليها نزل راسه بجه
راحت يما امي مسكت ايده وكلتله

جوان - لا يايمه لا تبجي ابوك راح يرجعلكم بسلامه ان شاءالله يرجع امسح دموعك يايمه

بتول - بجانه كلنا مسح دموعه وكال

سيف - ان شاءالله يمه ادعيلنه

جوان - ان شاءالله يايمه ان شاءالله

بتول - رحت مسكت ايده توسلت بي كتله
سيف اريد ابوي يرجع فدووووه امانه يمكم

سيف - بيد الله بعد اخوج بيد الله يلا لازم اروح ادعوله

جوان - ان شاءالله يرجع بسلامه

بتول - يارب كومه بسلامه ربي

تبارك - يارب لا تحرمنا منا يارب

بتول - دخلو واحنا نبجي وندعي اجه رعد وركان
ضل يباوع عليه بس ماكدر يتقدم ويحجي ويا
واني اصلا ولا باوعت علي بقينه اني وتبارك وحده حاضنه الثانيه ونبجي عيونه صارن حمر من البجي
اجه حيدر

حيدر - شكو شصاير وين ابوي

احمد - اهده بالعملية

حيدر - شلوون هيج صار

احمد - مانعرف صدفه اجه اتصال الرعد
وكلوله روح شيل ابوك هناك لو ميت لو عايش
رحنا نشوف اكو نبض بس جبنا دخلو للعمليه
مباشر ولحد هسه مانعرف

بتول - هو يحجي واني ابجي اباوع حيدر
ضل يباوع على رعد عصب بس ماحجه شي

مر ساعتين واحنا على هذا الحال وجان يطلع سيف
كلنا كمنه نزل الكمامه من وجه و باوع علينه وعلى امي وبجه صرخ بصوت

سيف - مااااات يايمه اااابوي ماااات

بتول - هو هيج كال واني تخبلت رحت يما
كمت اضرب كتافه فقدت وكتله

: شلوووون يموت لاااااا ولك ابوي مايعوفنه هيج بسرعه موووو كتلك سسسيف دير بالك على ابوي
كتلك سيييف ابوي امانه عندك ووووولكم ابوي مايموت مايعوفنه

تبارك - لاااااا مستحيل ابوي يموت مستحيل

احمد - شلووون مات يول كوول غيرها

بتول - صارت هوسه وبجي طلعو ابوي مغطين راسه ركضت يما مسكت ايده بستها كتله

: كوم لا تعوفني وحدي كوووم بعدني مافرحت كلبك بنجاحي كوووم بويه بعد وكت يابويه كوم لا تعوووفني وردة بيتك تذبل بدونك وووالله تذل كوووم فدوه اروحلك كوووم

رادو ياخذو ماقبلت ضليت ماسكه ايده وابجي
جتي تبارك واحمد التمو علي صارت هوسه الناس التمت علينه بالمستشفى الأطباء كلهم يبجون على حالتنه ورعد صافن ماحجه شي ولا نطق بس
يباوع وركان يهدي بسيف واحمد وحيدر
بجو بجي على ابوي

_

رعد - اول ماكال سيف مات عمران صدمني لان ماجنت اتوقع راح يموت بهذي الطريقه صح عمران هواي تعبني بحياتي وجان ناوي بهذا الشهر يخلص مني بس ماتمنيته يموت علمود جهاله لان حاس بشعور واحد يكبر بدون اب شعور جداً صعب ماحبيت اخواني يحسون بهذا الشعور

سيف - بوويه كوم الله يخليك كوم

احمد - كووم لا تعوفنه لااا كوم يابويه بعد وكت
كوووم

رعد - ضليت اباوع عليهم مصدوم تمنيت اذكرك بذكره حلوه بس ماكو غير الضرب والتعذيب الله يرحمك بس هيج اكول : ابتعد شوي صافن عليهم

حيدر تخبل كام يصيح ويعيط على الدكاتره صارت هوسه واني واكف بس اناظر بيهم التفت عليه كال

حيدر - كله منك ياحقير كله منك اااانت

سيف - هاااي شبيك مو وكت هذا الحجي
ووولك ابوك ماااات ماااات

حيدر - كله منا هو اااحجي شسووويت بي

رعد - احترم نفسك لا هذا راسك اكسره

حيدر - ووولك انت ماااال احترام دمرتنه وتريد احترمك

جوان - بدموع : ووولكم يمه كافي شجاكم ابوكم مااات وانتو تتعاركون شجاكم تخبلتوو

بتول - امي كامت تبجي وتصيح اخذو ابوي احنا نبجي على فراكه وحيدر يتعارك ويه رعد هجم علي راد يضربه رعد دفعه مسكو ركان واحمد مافاد رجع حيدر مره ثانيه راد يضربه بس هاي المره

رعد مسك ايده وضربه بوكس وكع على الأرض صارت هوسه ركان مسك رعد

ركان - كافي عوف مقهور على ابو

رعد - وااااني شكوو ابو مات اني شعليه

حيدر - كله منك اااانت دمرررتنه

رعد - لا تحجي حجي زايد و اخر مره تحاول تمد ايدك هاي المره وكعتك على الارض بس غير مره قسم الكسور ينتظرك نذل

حيدر - وووولك الله يخلصنه منك الله
يخلصنه من مشاكلك

رعد - انت منووو مستحيل انت حيدر اخوي
مع الاسف عليك حرامت التعب وياك طاح حظك

سيف - وولكم تخبلتو شبيكم ابوي مااات وانتو تتعاركون

جوان - كااافي فضحتونه حرااام عليكم

احمد - حيدر كااافي كوم اطلع برا

حيدر - ما اطلع هو هذا هذاااا جتال ابوكم
شبيكم ساااكتين خلي هو يطلع

رعد - ياغبي شلون جتال ابوك واني جبته للمستشفى شبيك انت تخبلت كوم غسل خشمك يمكن انكسر بعدين تعال احجي حجي اكبر من عمرك

حيدر - يابه مو رجال اذا اخليك تعيش مرتاح
جتال ابوي اذا ما اشرب من دمك ما اسمي حيدر
سهله يارعد

سيف - تخبلت ووولك جان ويانه شبيك

جوان - حيدررر كااافي شنو هذا الحجي

حيدر - وووولج يمه انتِ كاااافي دمرتي حياته
بسببه

بتول - احنا منهارين وحيدر يتعارك احمد صار
عصبي كال

احمد - وووين امن المستشفى خلي يجون يطلعوك لان واضح تخبلت ووولك ابوك مات تعرف شنو يعني ماااااات وانت حايره بالحجي السخيف مالك

حيدر - هذا موت ابوك كدامك ليش ساااكتين
احجو لو تخافووون

بتول - باوع علي رعد انقهر كله

رعد - والله مع الأسف عليك سويتك رجال هيبته
تمشي كدامه وين مايروح هذا جزاتي سهله يصير
خير ياحيدر يصير خير

سيف رايح شوفو شغلكم بعد اخوك واي شي تحتاجون بلغوني اني رايح

سيف - لا تروح مالك شغل بحيدر اعذره كلنا مصدومين

حيدر - على شنوو انصدم واضح وجنت متوقع
هيج عمله وصخه من شخص مثله

سيف - كااافي حيدر شجاااك

جوان - ولكم يمه كااافي كاافي انتو اخوه شجاكم
رعد يمه اعذره اخوك بحالة صدمه اعذره

رعد - والله لو ما اخوي جان فلشت راسه هنا
اذا ابقى دققيقتين اكثر اسوي كاع وامشي علىِ خلي اروح احسن بس ماعديها بخير ويه هذا النذل اني يغلط عليه سهله يصير خير

ركان - كافي تعال وياي عوفه يحجي

رعد - يصير خير سهله

عفتهم وطلعنه اني وركان برا المستشفى سحبتلي سيجارتين ولعتهم

ركان - شبيك ياخويه اعذره ابو الميت ترا الموضوع
مو سهل والله

رعد - ركان اني شكوو واذا ابو مات قابل اني موته
لا تخبلووني

ركان - ميخالف لا تهتم هو هيج بعد شتسويله

رعد - ارجع اربي ولا يهمك اني اعلمه

سحبت الموبايل خابرت علي رد

: هلا خويه عمران مات

علي - لا حول ولا قوة الا بالله ان لله وان اليه راجعون الله يرحمه

رعد - خويه شوفلي الرقم الخابرني ومنو ذوله
بأسرع وقت ممكن

علي - ادلل ضلعي اني والشباب جاي ندور

رعد - ماشي عاشت ايدكم بعدين اخابرك

سديت الخط كتله

ركان اني راجع كون وياهم بعد اخوك
ماريد ابقى هنا لان ما راح اتحمل كلام حيدر
وماريد أذي يبقى اخوي دير بالك عليهم بمكاني

ركان - ماشي خويه روح

رعد - لبست النظاره ورحت يم السياره خابرت نور
ردت

: ها بويه شدتسوين

نور - تعبت اقاربكم كلها ملتمه صياح وهوسه وبجي اختنكت انت وين

رعد - بالمستشفى هسه اجي ارجعج عل شقه
لا تبقين هناك

نور - خاف عيب علمود امك والبنات

رعد - لا مو عيب حضري نفسج جاي بالطريق

نور - تمام بس رعد تعرف محد يعرف من اقاربك
بزواجنه كلها تكول منو هاي

رعد - اي اهلي ماحاجين لناس علمود هيج لا تهتمين راح يعرفون منا وجاي

نور - تمام حبيبي لا اطول

رعد - ماشي بويه

سديت الخط ورحت شغلت السياره مسافة الطريق وصلت للبيت هوسه وسيارات محتله الفرع كله نزلت من السياره صدفه شفت رنكين جتي يمي

رنكين - رعد شلونك

رعد - هلا

رنكين - حيل انقهرت على عمو عمران البقيه بحياتك

رعد - حياتج الباقيه

رنكين - رعد ممكن سؤال

رعد - تفضلي بس بسرعه مستعجل

رنكين - شلون مات

رعد - ماعرف لازم اروح مستعجل

عفتها ودخلت جوه هوسه نسوان وجهال وصياح وعياط صحت تيلا جتي

: تيلا صيحي ماما نور كولي بابا رعد برا

تيلا - حاضر بابا

رعد - راحت تيلا
سحبت سيجاره ولعتها باوعت على البيت حرامات ماكملت فرحتي جيت اصدمه بتسجيل البيت باسمي صدمني بموته ماكملت فرحتي

اخذت نفس من السيجاره اتذكرت كُل شي
سوا بيه من الصغر لحد هذا اليوم اااخ ياعمران
الله يرحمك شكد جنت ظالم وياي

_

نور - جنت بالصاله كاعده يم خالت رعد سعديه ماعرف احد غيرها ومحد ماكو بالبيت

هوسه نسوان وجهال محد بحال احد وجان تدخل رنكين كعدت يم امها ضلت تباوع عليه ماهتميت جتي تيلا كالت

تيلا - ماما نور بابا رعد يرد انت برا

نور - هيَ هيج كالت وجان ترد رنكين

رنكين - شنو يريد منها

تيلا - انا مايعرف

نور - ماشي حبيبتي كليله هسه تجي

راحت تيلا واني رحت اغسل وجهي احس
بدوخه جتي ورايه كالت

رنكين - شعندج ويه رعد

نور - التفتت كتلها
اتوقع شي مايخصج

رنكين - لا يخصني احجي على شنو ناويه
ابشرج لا تحاولين مستحيل يباوع على وحده مثلج

نور - ههههه لا يباوع على وحده مثلج مو ؟ روحي
بابا ستري نفسج اول مره بعدين تعالي احجي

عفتها رحت للمطبخ اشرب مي جتي ورايه سحبت الكلاص من ايدي وخلته عل طاوله مسكت ايدي وكالت

رنكين - سمعي لج لا تلعبين بنار انتِ مو كدها
والله اذا اخليج براسي اذبج وره الشمس فهمممتي
فَ عوفي الرجال احسلج

نور - سحبت ايدي منها وكتلها

: شلون اعوف زوجي وابو ابني انتِ عوفي رجال مزوج عيب عليج ثكلي شوي

اني هيج كلت وهاي انصدمت اخذت الموبايل وعفتها على صدمتها وطلعت برا جان واكف برا
يم الحرس يدخن رحت يما

: يلا نروح

رعد - اي بويه روحي صعدي هسه اجي

نور - ماشي

عفته جان يوصي الحراس وينطيهم تعليمات
صعدت بالسياره انتظره وجان تطلع هاي الاسمها رنكين شكد لزكه هاي الابنيه وكفت يما ماعرف على شنو جانت تحجي ويا وجان تمسك ايده ماتحملت نزلت رحت يمهم باوعت على رعد كتله

: يلا حبيبي اتاخرنه

باوعت عليه كالت

رنكين - لا ماصدك

نور - شنو ماتصدكين

رنكين - انت لا تحجين

نور - اها ليش عيني بس انتِ تحجين ؟

رنكين - بس لو اعرف شنو شفت بيها هاي المعقده

رعد - رنكين احترمي نفسج حجي زايد ماريد

رنكين - مايصير هيج مااايصير شلون تزوج وحده خبازه جانت تخبز لبيتكم

رعد - يشرفني ويسعدني ماخذها ونصيحه لغير
مره لا تستنقسين من الناس كلنا بشر ماكو داعي
لهذا الكلام عيب

نور - هيج كال باوعت عليها ابتسمت ضاجت
مسك ايدي كدامها وكال

رعد - يلا بويه نروح

نور - تمام

التفتت عليها ضلت تباوع علينه كلت بكَلبي الله يستر من عيونج

صعدنه بالسياره شغلها ماحجه شي وجان ضايج كتله

: مقهور على عمك

رعد - لا

نور - لعد شبيك

رعد - تعبان ولازم باجر التحق وماعرف وين اوديج
ماريد تبقين وحدج ولا اكدر اوديج لبيتنه هوسه
وفاتحه تتعبين واستحي اخذج يم الحجيه

نور - عادي ابقى بالشقه

رعد - مستحيل

نور - ليش

رعد - ما اقبل

نور - هاي شبيك شكو بيها

رعد - لا تعاندين كلت لا يعني لااا

نور - تعصب شكد اضوج منه من يتعصب
عفته مارديت علي وصلنه لشقه بدون اي كلام
راح للغرفه نام واني عفته كعدت بالصاله

حيل دايخه تمددت وماحسيت على نفسي نمت بالصاله كمت على صوت الموبايل جانت ام رعد رديت

: هلا خاله

جوان - هايمه وينكم

نور - بالشقه

جوان - رعد وين ليش موبايله مغلق

نور - والله خاله صاير عصبي مايتحاجه
رجعنه كبل راح نام ماعرف شبي

جوان - ميخالف يمه لا تحجين ويا عوفي
من يهده هو يرجع يحجي

نور - لا مالي شغل بي شلونهم البنات

كامت تبجي بجتني وياها كالت

جوان - سوده عليه بس يبجون
يلا يمه اروح هوسه كلشي ما اسمع

نور - تمام خاله

سدته رحت للغرفه بعده نايم عفته رحت للمطبخ
اشتهيت اكل شي حامض طلعت خس ويه السماك اكلته سمعت صوت باب الغرفه عرفت بي كام

توضه اجه اخذ السجاده جانت عل تخم
فرشها وبده يصلي واني بقيت بالمطبخ خلص واجه
وكف ورايه ظهري علي حضني خله راسه برقبتي كال

رعد - نور تعبان

نور - متوجع ؟

رعد - ماعرف تعبان

نور - اخذت الادويه ؟

رعد - اي بس راسي مصدع ومالي خلك شي

نور - خله ايده على خصري ونزلها على بطني كال

رعد - شلونه الحلو متعبج مو

نور - يعني بعدني شوي شوي اتعود
اخذ نفس من رقبتي كتله

: حبيبي ممكن سؤال

رعد - جواب

نور - ليش ماتروح لفاتحة عمك مهما يكون يبقى عمك بمثابة ابوك ولا تنسى الناس كلها عبالها هو ابوك لان اسمه مذكور بالهويه ماتكدر تنكر هذا الشي اواجب عليك تروح وتأدي واجبك هنا يومين
او يوم انت تكول باجر التحق يعني بس اليوم
روح احسن علمود اخوانك وامك خطيه

رعد - ماكدر انسى السوا بيه

نور - حقك بس صير احسن منا هو هسه راح
لدار حقه انت صير احسن منا علمود خواتك واخوانك تبقى اخوهم الجبير واجب عليك توكف
وياهم بهيج يوم صعب

رعد - ماعرف مالي خلك اروح

نور - ساعه او ساعتين وارجع لا اطول

رعد - الله كريم

نور - اخذ نفس من رقبتي وباسني بخدي كال

رعد - عندي شغل كوب قهوه من هاي الاقلام الحلوه

نور - تدلل

راح لصاله كعد يشتغل على الابتوت

سويتله القهوه وانطيته ورحت للغرفه صليت وقريت قرآن دخل للغرفه يبدل خلصت قراءة القرآن كتله

: ها كَلبي راح تروح

رعد - لخاطر امي واخواني مو لخاطره

نور - ابتسمت كتله

: هو هذا حبيبي الي اعرفه

رعد - تجين وياي

نور - لا مالي خلك هاي الاسمها رنكين

رعد - تغارين هههه

نور - حقي مثلك ليش انت ما تغار ؟

رعد - بركان وربج ههههه

نور - اي خلص لعد واني هم مثلك

رعد - ههه خوش

نور - دايما

وهو ديحجي حسيت بألم المعده ركضت عل حمام اتقيأ تعبت كل شوي اتقيأ غسلت وجهي ورحت اشرب مي بالمطبخ وجان يطلع من الغرفه لابس جينز اسود ويه تيشيرت اسود لازك لزك على كتافه و علي قمصله لون اسود طالع يخبل وريحة عطره تفوح كتله وهو واكف يعدل ساعته

: هوب هوب شنو هاي

رعد - شنو

نور - ترا فاتحه مو عرس ليش هيج كاشخ

رعد - والله كل مره هيج اصلاً شعري مارتبته مثل كل مره مالي خلك

نور - مو لان لابس كله اسود طالع تخبل
شدعوه هيج حلو ما شاءالله

ضحك سحبني الا ولَف ايدينه على خصر وكال

رعد - هههه شبيها مرتي الحلوه تغار

نور - وليش يعني مو من حقي

رعد - الا حقج ونص هههه

نور - خوش دامك تعرف ليش هيج كاشخ علمود رنكين تاكلك بعيونها اكل

رعد - ههههه ولا معبرها لا هلكد تهتمين لكلامها

نور - اذا تحبني لا تاخذ وتنطي وياها بالحجي

تقدم باسني وكال

رعد - لان احبج ادللي

نور - خوش انزل شوي شطولك ما اوصلك

ضحك نزل لمستواي تقدمت شميت رقبته ريحة عطره تخبل كتله

كافي خفف عطر مايصير هيج

رعد - ههههه ادللي

نور - بسته بخده وكتله
: يلا روح بس لا تتاخر

باس راسي وكال

رعد - ماشي بويه دير بالج على نفسج

ونور - وانت هم

راح سد الباب واني تمددت على التخم بالصاله اتصفح على الموبايل

_____
في مكان اخر

بتول - رجعنه للبيت ننتظر يخلصون ارواق المستشفى ويرجعو للبيت نشوفه اخر مره
بعد مرور ساعه جابو نشوفه صارت هوسه

انهاريت تخبليت شلت الغطاء على راسه
بست راسه وعيونه كتله

: كوم يالغالي بعد وكت كوم لا تعوفني وحدي
كوم لمنووو عفت وردة بيتك كووم يابويه
لا تعوفني محتاجتك يمي كووووم كوم بعدني ما فرحتك بنجاحي وتخرجي كوم اريد ارفع راسك
بنجاحي كوووم

اااخ يابويه كسرت ظهري بغيابك يابويه ااارجع من اروح فدوه لطولك ارجع ووولكم راح الغالي رااااح

تبارك - بويه كوم لا تعوفنه البنيه بدون الاب مكسور ظهرها يابويه البنيه بدون الاب تضيييع بهل دنيا كوم بعد وكت كوم البيت ماله طعم بدون صوتك كوووم

احمد - بويه كوم ابنك راح يطلع من الأوائل كتلي
احمد اريد ارفع راسي بشهادتك كوم يالغالي كووم
ارفع راسك

سيف - مالحكت افرحك بتخرجي لا والله مالحكت
بوويه ليش تروح تعوفنه هيج بسرعه لييش

بتول - انهارينه كلنا بالبجي وامي تحضن بينه وتبجي اجه حيدر يحضنه ويبجي نقصة عائلتي
وراح الغااالي رااح

واني منهاره اجه رعد حضنا اني وتبارك

: راااح ابويه ياخويه رااااح عاف وردة بيته وراح

تبارك - عااافنه وراح عميت عيني عليك يابويه

بتول - باس راسنه ويهدي بينه

رعد - كافي خويه اني يمكم اني ابوكم واخوكم
لا تبجون فدوه لعيونكم

بتول - احنا نبجي وهو يهدي بينا

شويو اجو ياخذو كلنا كمنا
بس احمد ماقبل يكوم كل شوي يبوس بي
ويبجي بجي ماصاير شكد حاولو ويا يكوم
ماقبل يكوم حاضن ابوي ويبجي رعد راح كومه

رعد - بعد اخوك كوم خلي ياخذو

احمد - رررعد هذا ابوي تعررف شنو يعني ااابوي

رعد - والله اعرف بس كوم مايصير هيج تسوي
كوم بعد اخوك تعوذ من الشيطان وكوم

بتول - رعد كومه كوه حضنه احمد يبجي وهو يهدي بي اخذو ابوي واخذو كل طفولتي ويا
اتذكرت كل لحظه حلوه عشتها ويا مر شريط
ذكريات كدام عيني

__

عمران - ولكم وردة بيتي شمسويه بنفسها

بتول - ها بابا يعني حلوه لو لا احجي الصدك

عمران - احلى كلهم بويه غير وردة بيتي

بتول - حبيبي وانت احلى واجمل اب
__

نزلن دموعي واني اذكر كلامه

وردة بيتك ذبلت يابويه ذبلت

اول ماخذو احس اخذو كَلبي ويا حسيت
بسواد نزل على عيوني وبعد ماحسيت على شي

فتحت عيون شوي شفت خيال سيف حسيت بي ديقيس ضغطي كلت بصوت مخنوك انبح من البجي

ا: بوي روح يم ابوي لا تخلو وحده يبقى الدنيا بارده القبر ظلمه روحو يما

ركان - كافي بويه كولي يا الله

بتول - فتحت عيوني شفت ركان فوك راسي كتله

: راح ابوي عافني وراااح اخذوني يما اريد ابوي

ركان - الله يرحمه ويغفر له بويه باجر بيدي اخذج يما بس اهدي وكافي تبجين

سيف - عندج هبوط حاد تيلاااا ووينج تيلااااا

تيلا - نعم بابا

سيف - سوي شنينه لماما بتول وكثر بي الملح

تيلا - بابا مايعرف شنينه

سيف - لا حول ولا قوة الا بالله راسي صدع
شلون ماتعرفين

ركان - روح ارتاح خويه اني افهمها

سيف - ماشي

بتول بعد اخوج ابوي محتاج دعاء مو دموع كافي
خويه رحمي بعيونج

بتول - انداريت نزلن دموعي ماحجيت شي هو
هم نزلن دموعه وراح بقى ركان وتيلا

كعد مقابيلي وكال

ركان - بتول اذا تحبيني كافي تبجين اموت الف موته من اشوفج هيج وماكدر اتقربلج ولا احضنج واهدي بيج كافي تبجين لخاطري اذا تحبيني

ادعيله يابويه البجي عمره مارجع الميت ادعيله

بتول - مارديت فقط تنزل دموعي كال

ركان - كافي لخاطري

بتول - ابوي المات تعرف شنو يعني ابوي

ركان - اعرف بويه بس مايصير هيج تبجين
عيونج راحن من البجي

بتول - ماحجيت شي طلعو هو وتيلا
بقيت وحدي بالغرفه شوي وجتي تبارك نفس
حالي حضنه بعض ونبجي صعبه فراك الابو يكسر الظهر والله صعبه

_____
في مكان اخر

نور - صارت بال 12 ورعد مارجع
خابرته مارد رجعت مره ثانيه خابرته رد

: وينك ضل بالي ليش ماترد

رعد - مسوي كتم هسه انتبهت بالطريق شوي واوصل

نور - تمام حبيبي

رعد - بس جهزيلي الجنطه مال التحاق

نور - تمام حبيبي

رعد - يلا بويه شوي واوصل

نور - ماشي

سد الخط رحت طلعت الجنطه وجهزتها
كمت اصلي خلصت جنت ادعي سمعت
صوت الباب اكيد هو كملت دخل للغرفه
باين علي التعب كتله

: شبيك ياعمري

رعد - تعبان والله وراسي حيل مصدع

نور - تعال اسويلك مساج لراسك بلكت يخف الصداع

رعد - ياريت

نور - اجه حط راسه بحضني تمدد واني بعدني على السجاده كاعده مررت ايدي على جبينه بشكل دوائر واقره علي آيات قرآنيه كتله

: شلونهم اخوانك والبنات

رعد - منهارين واكثر كلهم بتول واحمد حيل متعلقين بي بتول نزل ضغطها طاحت بيدنه واحمد حبس نفسه بالغرفه يبجي لا يقبل ياكل ولا يشرب واني اااخ يانور اااخ

نور - لمعت عيونه وهو يحجي كال

رعد - واني اتعب لتعب كل شخص احبه اريد التعب بيه ولا بيهم اتحمل التعب ولا اشوفهم هيج عاجز ماكو شي بيدي عليهم اريد دوم اشوفهم مرتاحين

نور - تقدمت بست راسه كتله

: حبيبي وانت ماقصرت وياهم
بكل شي وكفت وياهم والدليل
حبهم واحترامهم الك ومتأكده راح تصير الهم
احن من ابوهم عليهم لا تنقهر

رعد - تعرفين اليوم دفنته بيدي ومانزلت دمعه
من عيني تعرفين ادفنه ويه كل ذرة تراب يتناثر على قبره اذكر شسوه بيه وشكد عذبني وتعبني دائما جان يغلط بحقي دائما هو الغلطان و هو اليبدي يغثني بس شي واحد متندم علي

نور - شنو

رعد - اخر مره جانت اول مره اضربه مشكلتي
عصبي ما اتحمل وهو غثني بكلامه جبرني اضربه

نور - كتلك بوقتها يبقى عمك صح غلطان بس
مو كُل شي بالضرب ينحل اصلاً مايجوز الضرب على الوجه بس تعرف شنو الحلو بالموضوع

رعد - شنو

نور - الحلو حسيت بغلطك وهذا شي كُل شي حلو
الاغلاط جمالها نتعلم منها لغير مره والندم جماله
يحرك الضمير الي بداخلنه ويذكرنه اكو شي اسمه صح واكو شي اسمه غلط

الله يرحمه ويغفر له

رعد - ماكدر اكولها من اذكر ظلمه ماكدر ادعي الله يرحمه مو بيدي

نور - اعرف ياعمري بس المسامح كريم
وهو مات بعد انتهى ظلمه وتعذيبه

عوفك من هذا الموضوع اخذت الادويه لو لا ؟

رعد - اي اخذتهم اكلج نعسان كُلش كومي انام

نور - ماشي ياعمري اليوم الفجر تلتحق

رعد - ان شاءالله وامي كالت جيبو ملابسكم
وخلص تعالو يمنا عيشو

نور - وانتَ موافق ؟

رعد - ماعرف عمران وراح احس واجب عليه
اروح يمهم كلهم بعدهم شباب مو بعمر واعي اكثر يعتمدودن على نفسهم وحيدر مو مال اعتمد علي
وصعبه بيت شكبره مابي احد جبير امي ماتكدر وحدها لازم اكون وياها واهتم بيهم يبقون اخوتي

نور - صح كلامك بس ماعرف تعودت على الشقه
صعبه عليه افارقها هنا اخذ راحتي اكثر هناك ما شاءالله انتو هواي راح اتقيد بحجابي وملابسي

رعد - لا الطابق الثالث كله النا يكون محسب حساب هيج شي

نور - يعني قصدك الطابق الثالث بس احنا بي ؟

رعد - اي 3 غرف وصاله ومطبخ اسويلج مثل الشقه مفتوح عل صاله ونرتبه اني وانتِ على ذوقنه وحتى نجهز غرفة لجهال ان شاءالله

نور - حبيت خوش فكره يعني باجر اخذ
كل ملابسي خلص ؟

رعد - اي فقط ملابس ومن انزل وتخلص الفاتحه نبدي نرتب البيت والأثاث

نور - ماشي ياكَلبي

رعد - يلا انام

نور - اي يلا

شلت السجاده وهو بدل طفيت الاضويه
حضنه بعض ونمنه

_

صار الفجر حسيت علي كام سبح ولبس ملابسه العسكريه واني كمت رتبت الملابس والمكياج والشغلات الي احتاجهم بالجنطه وبدلت طفه الاضويه وبعض الاجهزه بالشقه وطلع الشغلات الي بثلاجه وانطاه لعائلة البواب مال شقه رجع اخذ جنطه مال عسكريه وجنطي وقفلنه باب الشقه صعدنه بالسياره وتوجهنه لبيتهم كتله

رعد شوكت تنزل

رعد - حسب من 10 ل15 يوم ومرات اكثر

نور - والله هواي

سحب ايدي باسها وكال

رعد - كُلش هواي على غيابج بس شسوي
بعد هذا شغلنه

نور - اووف شيصبرني

باوع عليه غمزلي كال

رعد - تعلمتي عل انحراف ههههه

نور - اني وين وانت وين يا انحراف
ربي صبرني ويا هذا الرجال

رعد - اشتعلو اهلج هههه

نور - شبقه بيهم هسه روح شوف منال صايره فحم
على كلامك

رعد - ههههه

نور - دايما حبيبي

رعد - فدوه يروحلج حبيبج

نور - مسك ايدي وكمل الطريق وصلنه لبيتهم
دخلنه جوه وتيلا دخلت جنطي جانو كلهم كاعدين بالصاله بس باين عليهم التعب وكثر البجي عيونهم حمر من البجي وخالتهم وبنتها هم جانو موجودين

رعد - السلام عليكم

الكل - عليكم السلام

جوان - هلا بيكم يمه

رعد - يمه بتول واحمد شلون صارو

جوان - بتول احسن بس احمد بعده قافل الباب
لا اكل ولا شرب

رعد - هسه اني اروح احجي ويا

جوان - ماشي يمه

رعد - بويه روح لغرفتي فوك هسه اجي

نور - تمام
عفتهم ورحت لغرفه

_

رعد - رحت دكيت باب غرفة احمد

: احمد افتح الباب بعد اخوك

مارد رجعت دكيت

: خويه افتح الباب احجي وياك كلمتين واروح
التحق افتح الباب

فتح الباب جان كاعد منزل راسه و حاضن كتبه ويبجي سديت الباب رحت خليت ايدي على كتفه
كتله

: كول يا الله كلنا على هذا الطريق مو بس هو

احمد - ااااخ يارعد لو تعرف شكد تعبت نفسي
حتى افرحه بورقة النتائج كلي بويه اريدك تطلع من الأوائل كتلها تم و الاسبوع الجاي امتحانات
افرح منو بالنتائج كسر ظهري من عافني كسر ظهري حيل صعبه

رعد - يحجي ويبجي بجي ماتوقعت لهل درجه يحب ابو كتله

: بعد اخوك كول يالله وكافي تبجي كوم
غسل وجهك وروح يم امي وسيف اكعد بالعزاء وياهم اني رايح التحق انت وسيف صيرو بمكاني
كوم اسبح واكل شي وبدل وروح اكعد وياهم

الناس من كل مكان جايين يعزوك كوم لو باقي ابوك تتوقعه يقبل بهاي حالتك ؟

احمد - ماكدر يارعد مااكدر انكسر ظهري بموته

رعد - اني يمكم ماعوفكم ولا مقصر ولا راح اقصر وياكم لا تفكرون ابوكم مات ماعندكم احد لا خويه
دام خشمي يشم الهوى ماخليكم تحتاجون شي

احمد - اعرف والله ماتقصر بس لووو اعرف منو الحقير الهيج سوا

رعد - وربك من الزمه اسحل بي المركز كله بس اصبر عليه وصيتهم يدورون علي اذا ماخليهم بيدكم تاخذون حق ابوكم ما اسمي النقيب رعد
وهسه كوم بعد اخوك تعوذ من الشيطان وكوم ماريد اشوفك هيج مهزوز

احمد - تمام خويه

رعد - بست راسه ومسحت دموعه وكتله
: هيج اريدك يلا اروح دير بالك على البيت بغيابي

احمد - تم

رعد - وكوم امشي كدامي اسبح وبدل واكعد الوادم من كل مكان ديجون استقبلوهم

احمد - ماشي خويه

رعد - كام مشى كدامي طلعت برا صعدت فوك
للغرفه

___

نور - جنت واكفه صافنه على الشباك والهوسه جوه وحراس دخل للغرفه رحت حضنته نزلن دموعي

: راح تروح

رعد - اي

نور - رعد مايصير ماتروح

رعد - هههه لا

نور - خبيث ليش تضحك ترا صدك احجي

حضنته وبجيت كتله

: فدوه دير بالك على نفسك ماريدك ترجع متصاوب جرحك بعده دير بالك

بعدني عنا وكعد على السري وكعدني على رجله بحنان وكال

رعد - وانتِ اريدج اديرين بالج على نفسج وعلى العنفوص مدري العنافيص الي ابطنج بعدنا مانعرف
توأم او عنفوص واحد

نور - هههه تمام

تقدم باسني ابتعد كال

رعد - نور لا تندكين لا برنكين ولا بحيدر تمام

نور - تمام

تلمست وجهه ورموشه وشواربه تقدمت بسته ابتعدت كتله

: لخاطري اكل زين واخذ الادويه لا تعاند ودير بالك على جرحك

رعد - فديت الخايفه عليه مو تدللين

نور - خله ايده على خصري ونزله بحنان
على بطني وكال

رعد - دير بالج على جهالي

نور - ابتسمت حاوطت ايدي على رقبته كتله

: بكَلبي اخليهم هما وابوهم شعندي غيرهم

رعد - اشتعلو اهلج فلا تكعدي راحه

نور - ههههه
تقدم باسني حط راسه برقبتي يشم بيها

رعد - احبج

نور - اعشكك

ابتعد تقدمت بسته بخده وايدي محاوطه رقبته تقدمت اكثر اشم ريحة عطر على رقبته كال

رعد - شو صايره منحرفه ههههه

نور - ابتعدت بسرعه وكمت كتله

: مو صوجك والله صوجي اني اريد اعوضك

رعد - هههههه ولج شحجيت تعالي

نور - ما

رعد - هاي شنو انوب

نور - يعني لا

رعد - هههههه مزوج طفله وربي

نور - مارديت علي سحبني الا وكال

رعد - كملي وين جنتي

نور - ما

رعد - ههههه كملي

نور - مارديت ضحك مسك ايدي وحاوطه على رقبته وكال

رعد - ماصدكت طلعت عينج شوي هههه

نور - باوع على عيوني تقدم باسني ابتعد كال

رعد - لو ما اتاخرت جان مارضيت ابوسه وحده
بس تاخرت من ارجع اطلع ظيم ال10 ايام

نور - ههه خوش

كمت وهو كام سحب سلا.حه واخذ الجنطه باس
راسي وكال

رعد - ماطول ان شاءالله

نور - ان شاءالله حبيبي ترجع بسلامه ياكَلبي

طلع ردت اطلع ويا كال

رعد - لا تطلعين بويه هوسه جوه

نور - تمام حبيبي

راح نزل جوه واني بقيت بالغرفه كعدت على السرير ابجي شلون راح تمشي هاي الايام ماعرف

مسحت دموعي ورتبت ملابسي ويه ملابسه
مر ساعه

بدلت لبست فستان اسود عادي ساده ولفيت الشال ونزلت جوه جانت بتول كاعده يم امها رحت
كعدت يمها شافتني حضنتني وتبجي بجتني وياها
حيل تعبانه امبين من عيونها كعدت اهدي بيها

_

وهيج مرت الايام وام رعد عرفت الكل عليه وكالت هاي زوجة رعد الناس سلمو عليه منهم الشمر حجي يجرح ومنهم الحبني وسمعني كلام حلو وهاي رنكين ابد نهائي ولا جرعتني وكل ما التفت تباوع عليه وتخزرني ولا هتميت بقيت يم خاله جوان والبنات

ويوم بعد يوم نفس الروتين خلصت الفاتحه (العزاء) بديت اتأقلم ويا خواته واخوانه شوي شوي بس حيدر مايحجي وياي نهائي ولا اني احجي ويا لكن احمد وسيف خطيه حتى بأسمي
ما ينادوني كله خويه وبعد واخوج ومرت الاخ
كُلش محترمين لصراحه ماحسيت نفسي غريبه وياهم

وبيوم من الايام قبل نزول رعد الناس صارو اقل يجون خلصت الهوسه شوي

جنت كاعده يم خاله جوان تحجيلي عن الأطفال وتربيتهم

جوان - اي يمه لازم ماتخلي يبجي واذا بجه
اقلبي على ايدج وطبطبيله بهدوء على ظهره
ودائما حاولي تنطي حليبج مو حليب الاصطناعي
حليبج صحي اكثرر واحسن

نور - ان شاءالله بس خاله متت بعدني ماصاير10 ايام ادمرت كل شوي اتقيأ ودوخه شوكت تروح هاي الاعراض

جوان - والله يمه حسب اكو الحمل يأثر عليهم بشكل اكثر مثلج واكو اصلا ماعندهم هيج اعراض
واكو فقط بالبدايه ومن يثبت الحمل يخف الاعراض واكو لا من اول يوم الى اخر يوم الولاده يبقون هيج انتِ بس هاي الاعراض عندج ؟

نور - اي وخمول وتعب وبس اريد انام الدكتوره كالت اذا اعراضج اتعب يمكن توأم لان بالفحص واضح هرمون الحمل نسبته مرتفع اكثر من الطبيعي

جوان - يالله ان شاءالله يطلع توأم رعيد كُلش
يحب التوأم وفرصه استغلي الوضع رعيد ماكو شبعي نوم من يرجع مايخليج تنامين ابني واعرفه
هههه

نور - ههههه اي والله خاله شسويله

واحنا دنحجي دك الموبايل جان رعد كمت رحت على المطبخ رديت علي

: هلا حبيبي

رعد - ها بويه شدتسوين

نور - جنت كاعده يم امك

رعد - فد ساعه وانزل

نور - وين تنزل

رعد - وين يعني غير للبيت

نور - ياااا باقيلك يومين يانزول مو كلت
من 10 ل15 يوم

رعد - اشتعلو اهلج اني ميت شوك وانتِ تكولين يانزول

نور - حبيبي ماقصد شي يعني ماكلتلي قبل يوم او يومين هذا الاقصده

رعد - اي خلصت الشغل اسرع ونزلت يلا بويه بعدين احجي وياج

نور - تمام حبيبي

سد الخط جتي امه كالت

جوان - خير يمه شبي رعد

نور - يكول راح انزل ولا كلي بس شوفي بهذلتي غير يكلي قبل بوقت اااخ من سوالفه

جوان - ههههه حقج

نور - ااخ دائما هيج يفاجئني يلا خاله اروح احف وجهي كله راجع واسبح

جوان - زين تسوين يايمه اخذي راحتج

نور - حبيبتي
بست راسها حيل احبها ماحسها عمتي

صعدت فوك بسرعه حفيت وجهي وحواجبي
رتبتهم طلعت دشداشه صيفيه قصيره الجو حار نهاية شتاء ورحت سبحت اكو حمام داخلي بالغرفه

طلعت مشطت شعري ونشفت شعري ورتبته نزلت خصل بسيطه على وجهي ونثرت الباقي على كتافي ومكياج خفيف بسيط جداً ورشيت عطر وعطرت الغرفه ورتبتها

حالياً كاعدين بالغرفه مالته على اساس من يرجع نرتب الطابق الثالث بس غرفته حلوه جبيره ماتخنك وبيها شباك جبيره على اتجاه الشمس كُلش حلوه

كملت ماحبيت انزل واني لابسه دشداشه قصيره
بقيت بالغرفه رحت اخذت سيلفي ودزيتله الصوره شويو شافه كتب

: اشتعلو اهلج

نور - ههههه

شمرت الموبايل انتبهت على كتبه عنده طاول بالغرفه مرتب عليها كتب ولابتوب وأوراق شغله كعدت اشوف الكتب اليقراهم

اكثرها جانت عن علم النفس وقصص
اجنبيه حبيت

مر نصف ساعه جنت كاعده اقره الكُتب مال علم النفس انفتح الباب هو جان حط الجنطه على الأرض كمت رحت حضنته وهو حضني ابتعدت تلمست وجهه رفعت نفسي حتى اوصله بسته كتله

: تعرف شكد مشتاكتلك تعرف شكد احبك ؟

نزل لمسات ايده على خصري نزل لمستواي يناظر بعيوني ابتمست تقدم باسني ابتعد كال

رعد - مشتاكلج حد النخاع وكَلبي بس بأسمج يدك

نور - ياعمري

حط راسه برقبتي يشم بيها كال

رعد - مشتاكلج ميت شوك صدكي

نور - ابتعد نزل ايده على بطني كال

رعد - شلونهم اطفالي

نور - متعبيني مثل ابوهم

رعد - اها وابوهم متعبج

نور - كُلش هههه

تقدم رفعني الا رجع حط راسه برقبتي وايده على خصري كال

رعد - شلون متعبج ممكن تشرحين

نور - توترت كتله
رعد

رعد - عيونه

نور - بلعت ريكي كتله
حبيبي روح اسبح وارتاح واني اروح اجهزلك شي تاكله

تقدم اكثر شواربه خشنه اخذ نفس من رقبتي كال

رعد - نور مشتاك فهميني

نور - بس

رعد - اشش اكلج مشتاك ميت شوك

نور - غمضت عيوني وجان يندك الباب ابتعدت بسرعه تعصب هههه

رعد - لييش

نور - الباب

رعد - واذا

نور - يااا اكلك الباب شوف منو

رعد - اندك الباب ؟

نور - اي ههههه شنو ماسمعت

رعد - لا

نور - راح فتح الباب جانت تيلا كللها

رعد - تيلا الا هسه تجين لو موقتته وياي

تيلا - بابا انا مايفهم انت

نور - ههههههه

رعد - لا تفهمين احسن شنو رايده

تيلا - بابا ماما كبير يرد انت

رعد - ماشي روحي هسه اجي

نور - راحت سد الباب باوع عليه واني متت ضحك
صاح

رعد - على شنوو تضحكين

نور - هههه عليك وعلى اعصابك

رعد - صدكي كلما اريد اتقرب منج لو يندك باب لو يجيني اتصال ماعرف شنو السالفه

نور - ههههه صدفه

سحبني لحضنه رجع حط راسه برقبتي كال

رعد - وين جنا

نور - روح هسه امك تنتظرك بعدين

رعد - ما اصبر

نور - هههه يااا

رعد - مشتاك

نور - ميخالف بس يمكن محتاجتك بشي روح

ابتعد باسني وكال

رعد - ماعوفج اليوم

نور - لا تعوف

رعد - سهله

نور - هههه راح يشوف امه واني اضحك علي منحرف مايفيد ويا

__

رعد - نزلت جوه جانو كلهم كاعدين

: ها يمه رايدتني

جوان - اي يمه تعال

رعد - رحت كعدت يمها وعلى الطرف الثاني حيدر
كاعد كالت

جوان - رعد يمه ماعرفت منو سبب موت عمران

رعد - بلا

حيدر - منووو

رعد - انت بذات ما اسمع صوتك

بتول - رحت كعدت مقابيله مسكت ايدي وابجي

: فدوه منو لا ليلي ليل ولا نهاري نهار منو هذا الحقير

كومني وباس راسي كعدني عل تخم كال

رعد - كافي خويه عيونج راحن من البجي

سيف - خويه منو جان

رعد - ماكدر هسه احجي لان بعدهم مامتكدين

احمد - شيصبرنه يمعود شوكت يتأكدون

رعد - وربك اخليهم بيدك بس اصبر عليه

بتول - هما يحجون واني ابجي باوعت امي على حيدر رجع باوع على رعد كام باس راسه واعتذر منه كله

حيدر - خويه اني اعتذر وحقك عليه بس حالة عصبيه وماعرف شلون هيج حجيت واعتذر رفعت ايدي عليك بس انت هم ماقصرت

رعد - خلي ابالك جنت ناوي اكسرك تكسير بس
تذكرت تبقى اخوي انت هوايه اجاوزت عليه لا احترام ولا شي والقهر تتهمني اني بموت ابوك

حيدر - انت ذاك اليوم كلت الى امي لو ما جهاله جان شفتي ميت لا تلومني

رعد - شوف اني اذا اريد اموته جان من زمااان
ميت مو هسه خلي ابالك هو جان ناوي يخلص مني بس راح قبلي

هاي سالفة اخلص و تخلص هاي شغلته هو مو اني

سيف - خويه اعذره احنا ماجنا نعرف بقصتك ويه ابوي البارحه امي حجتلنه القصه ونصدمنه بصراحه تصرفات ابوي جانت غلط من زمان بس ماتوقعنه يكون قاسي لهل درجه

احمد - وسالفة اغتيالك صدمتنه لصراحه
اخر شي جنت اتوقعه من ابوي

بتول - هما يحجون سحب سيجاره ولعها وضحك كال

رعد - جزء بسيط عرفتو جزء جداً بسيط الله يمهل ولا يهمل اصدق واجمل عباره اسمعها لاتزعلون مني
بس ماكدرت انقهر او انزل دمعه على ابوكم

تبارك - خويه انت حُر تنقهر ماتنقهر شي يخصك احنا قصدنه ماعرفنه قصتك وحيدر حب يعتذر منك

جوان - يمه تبقون اخوه ودمكم واحد اريدكم
واحد واكف بظهر الثاني لخاطري انسو المشاكل
عمران مات الله يرحمه انسو كل المشاكل وابدو
من جديد انتو

بتول - نزلن دموعها وكالت بحصره

جوان - انتو كلكم جهالي نظر عيني ماريد اشوفكم
واحد زعلان من الثاني اني تعبت هواااي ويه عمران الله يرحمه لا اتعبوني انتو اكثر

بتول - بجت كمنه كلنا حضنها وبسنه راسها
ورعد وكف مقابيل حيدر باوع علي حضنو
بعض وكال

رعد - واني اعذرين ضربتك

حيدر - تمون ياخويه

رعد - دير بالك تعيدها

حيدر - مخبل واسويها غير قسم الكسور يتنظرني
ههههههه

سيف - والله من يتعصب مايعرف احد هههه

حيدر - اي والله كلت خشمي انكسر هم زين
ماصارلي شي هههه

بتول - فوك حزني ضحكت على كلامهم دعيت الله لا يحرمني منهم كلهم التفتت على احمد اشوفه ساكت لا يشارك بالحديث ولا شي كعدت يما كتله

شبيك خويه

احمد - سلامتج خويه سلامتج

بتول - عافنه وراح لغرفته

رعد - شبي احمد بعده

سيف - اي والله صاير حتى مايروح لدوام ولا يدرس مكضيها صافن ودموعه تنزل

رعد - بعدين اني احجي ويا يلا اني استئذن منكم
حيل تعبان اروح اسبح وانام

جوان - ماشي يمه اخذ راحتك

_____

نور - اتاخر ما اجه تمددت نعست دخل للغرفه
حسيت بالمسات ايده على خصري ورقبتي كتله

: حبيبي

رعد - روح الحبيبج

نور - تلمست وجهه ورموشه كتله
كوم اسبح ياكَلبي الحمام جاهز

تقدم حط راسه برقبتي كال

رعد - بعدين

نور - شوي و ابتعد باس راسي وكال

رعد - بهل ايام نبدي نجهز الطابق الثالث

نور - ان شاءالله حبيبي

رعد - اي

نور - اي

باوع عليه غمزلي فهمت قصده كتله

: روح اسبح اكل شي ونام ملحك على سوالفك المنحرفه

رعد - ههههه والله تعبان اناملي شوي وننحرف
سوا ولا يهمج

نور - هههه شكد ماتستحي

ضحك باسني بخدي وراح يسبح مايبطل سوالفه

_

مرت الايام جهزنه الطابق الثالث بس بعدنا ماكاعدين بي باقي تعديلات بسيطه

مر اقل من شهر على موت عمران الله يرحمه بطني شوي كبرت بس التعب اثر عليه التقيأ زاد والدوخه كثرت وبس انام ماعرف شجاني سوينه سونار كُلشي تمام بس بعد مايبين توأم او لا لان كُلش صغير مو واضح

بيوم جنا كاعدين كلنا على السفره بس بعد جو البيت حزين والناس يجونه

جنا كاعدين نتغدى وجان حيدر يكول

حيدر - رعد اني على السنه الجديده ان شاءالله
ازوج نروح نسافر لتركيا ماريد لا عرس ولا هوسه
احترام لموت ابوي على شنو افرح واسوي عرس

رعد - براحتك الي تريده سوي

حيدر - يمه شتكولين

جوان - والله يمه هيَ فكره حلوه بس
خطيبتك تقبل بدون عرس

حيدر - وليش ماتقبل سويتلها خطوبه ملكيه
منو مسوي هيج خطوبه اكيد تقبل

جوان - والله يمه انت هيج تكول بس يمكن الابنيه ماتكول هيج تعرف بعد سوالف البنات خطوبه وعرس وحنه ومدري شنو

حيدر - اشوف شتكول هيَ الله كريم

رعد - بتول خويه شلونج ويه الامتحانات

بتول - الحمد لله

رعد - شدي حيلج بعد اخوج اريدج من الأوائل

بتول - ان شاءالله خويه

نور - هما يحجون ماعرف ليش انقهرت لعد اني
شكول لا دراسه ولا عرس لا خطوبه اخذني جني فصليه حتى فستان الأبيض مالبسته مثل العالم الحمد لله على كل شيء كمت ماشتهيت اكمل الاكل

رعد - ها بويه ليش كمتي

نور - ماشتهي

عفتهم غسلت وصعدت فوك للغرفه تمددت ماعرف اختنكت وبجيت لازم اكله على الاقل موضوع الدراسه العرس راح بعد اني ماريده بس الدراسه
لازم اكله شوي ودخل شافني ابجي كال

رعد - شبيج

نور - مسحت دموعي كتله

: اذا اكلك يهمك ؟

رعد - افا شلون مايهمني كلج تهميني
شنو هذا الحجي

نور - كمت سحبت ايده وكعدته على السرير وكعدت مقابيله كتله

: رعد اطلب منك اول طلب ويمكن اخر طلب
فدوه لا تردني

رعد - كولي بويه اسمعج

نور - اخذت نفس شهيق زفير كتله

: رعد تعرف من جنت بالموصل ادرس وامتحانات ومن جيت لبغداد انجبرت اترك السادس ومنال جذبت عليه وكالت من نروح هناك كملي ومن
جينه ماقبلت اكمل ومن بعدها سالفة زوجها وانت وزواجنه وحملي كُل شي صار بسرعه راحت عليه هاي السنه فدوه اقبل ارجع اقدم وادرس اريد اكمل دراستي

رعد - نور شلون رهمتيها دراسه وحملج

نور - اقدم السنه الجايه مو هاي السنه

رعد - مامقتنع

نور - ليش

رعد - يعني خلي نفرض كملتي السادس ونجحتي من كل عقلج اقبل تروحين كليه

نور - وليش ماتقبل مافهمت

رعد - وليش اقبل من كل عقلج تحجين شبيج بابا

نور - اني لو انت شبيك ترا كُلش عادي يعني ليش ماتقبل فهمني

رعد - مو عادي يمي انسي هاي السالفه ماتفيدج

نور - لا تفيديني واني اريد اكمل

رعد - كلت لا يعني لا انتهى الموضوع

نور - هاي شبيك لا تخبلني والله ماطالبه منك شي
مستحيل

رعد - وولج تخبلتي بس فهميني هذا عقلج شلون يفكر من كل عقلج تردين اقبل مرتي تروح

بمكان مختلط تدرس ولج اني لو بيدي نقاب البسج ماخلي احد يشوفج غيري بس لخاطرج ساكت ماريد تحسين جاي اخنكج بغيرتي

نور - رجعنه على نفس السالفه ياطلابة الماتخلص
رعد اني هواي تعبانه بحياتي وفوك تعبي تعبت بدراستي لا تسدها بوجهي فدنوب ترا والله تعبت كافي شوكت اعيش مثل العالم

رعد - ليش شبيج هسه معيشج مثل الملكه شنو تريدين بعد شنو ناقصج

نور - ياملكه لا تخبلني يااا ملكه سمعت اليوم حيدر شيكول كال اذا ما ازوج اخذها ونسافر وبعده حاير اذا تقبل خطيبته او لا وهو الخطوبه السواها كل عشيرتك لحد هسه تحجي بي ومع ذلك يريد يراضي خطيبته بسفر علمود تقبل بدون عرس
واني شنوو سويت ها بس كلي اني شنو سويت لا خطوبه لا عرس جني فصليه اخذتني وعقدت عليه وين رحنه وين سافرنه احجي ذكرني يمكن ناسيه ذكرني فهمني

رعد - انتِ ماقلبتي كتلج نسوي العرس ماقبلتي

نور - نزلن دموعي كتله

: لان كُل شي بوقته حلو مو هسه الطفل ابطني وتريد اروح اسوي عرس اني ماقهرني هذا الشي ولا يهمني عرس مو عرس فلوس وسفر كلهم مو مهم عندي اني ردت كلبك مارايده فلوسك بس مقصد كلام فقط لا غير لكن مال ترفض ارجع اكمل حرام عليك كلكم كملتو اواصلين ما شاءالله عليكم ليش تبقيني وحدي لا شهاده لا شي واني امنيتي اكمل دراستي

اني هيج كلت تعصب

رعد - اغار اااافهمي ااااغار ولج احبج حب جنوني فهمي اريدج بس الي وبس اني اشوفج اعشكج فهميها لا تخبليني

نور - نزلن دموعي احس حطم امنيتي ردت اكوم سحبني لحضنه بعدته

عووفني كاافي مااريد شي منك عووفني

رعد - بس لو اعرف ليش على كل شي تبجيني

نور - حتى على دمووعي تحاسبني كافي تعبتني
وياك والله تعبت بعدنه اول شهرين وهيج

رعد - كافي تبجين بس لو اعرف بشنو مقصر وياج
على السفر اسبوع الجاي اخذ اجازه ونروح وين ماتردين

نور - كتلك مايهمني كل ذني اريد دراستي

رعد - شتسوين بالدراسه لا ناقصج فلوس ولا محتاجه شي شتسوين بالدراسه

نور - باوعت علي كتله

شو احسك دكه قديمه شنو فلوس شنو صخام من شوكت العلم صار لخاطر الفلوس اني اريد شهادة بيدي بتعبي امسكها والله ماطالبه شي مستحيل
او حرام

رعد - ميخالف اغار اني اغار تفهمي هذا الموضوع

نور - واني شنو ذنبي اني شنوو ذنبي انت تغار غيرتك مالها داعي والله

تعصب كام يصيح

رعد - لييش مالها داعي لازم تفرحين اغار عليج لان اااحبج شنو الماله داعي بضبط وضحيلي

نور - غار ميخالف بس مو هيج هذا اسمه تحكم وتملك وعمره الحب الحقيقي والعلاقه الصحيحه ماجنت تملك

رعد - نووور سدي الموضوع

نور - بس هذا اول طلب اطلبه منك

رعد - كلت لا يعني لاااا ماحب اكرر

نور - نزلن دموعي باوعت علي عيونه احمرن كتله

: على كُل شي عصب ماوصيك

رعد - لعد شنووو تريدين اصفك لو اهلهل
تشكين بطني واكلج بعد شكي جم مره كايلج ماااحب العناد ليش تعاندين كلت لا

كولي اي ليش العناد .....................................

_

____
يقول الشاعر

رياح الحزن تعصرني
وتسخر بين وجداني

أحبك واحة هدأت
عليها كل أحزاني

أحبك نسمة تروي
لصمت الناس ألحاني

أحبك نورًا يسري
ويشعل في قلبي الأماني

أحبك أنت يا أملا
كضوء الصبح يلقاني

أمات الحب عشاقا
وحبك أنت أحياني

ولو خيرت في وطن
لقلت هواك أوطاني

ولو أنساك يا عمري
حنايا القلب تنساني

إذا ما ضعت في درب
ففي عينيك عنواني

____

البارت القادم يبووو
🔥🔥🔥🔥 نار صدمه لا صدمه شنو الا مصيبه مو بس صدمه احزرو منو راح يرجع وشيخلصه
من ايد رعد

ملاحظه مو عمران عمران مات الله يرحمه

غير شخص ظهر في البارتات الأولى
من نور .......

يااا تردوني اكمل لا والله ماكمل تعبت
انتظروني في البارت القادم نعرف منو 😎🔥🤏🏻

__

اطول بارت اكتبهة في هذي الروايه
حالياً تقريباً وصل 8000 كلمه

معقوله على هذا التعب والجمال والأحداث ال🔥
ماكو تفاعل حلو مثلكم ؟ ؟

استاهل تفاعلكم لو ما استاهل ؟ 🙂

اطول عليكم بالتنزيل لكن ارجع ابارت اطول
و🔥 اكثر من القبله ياقلبي حق تعبي وياكم لا تنسون

التصويت بالنجمة وتعليق بين الفقرات وتفاعلكم مع الرواية وبس والله وسلامتكم وشكراً لكُم ❤

_

حسابي انستجرام انشر هناك كلشي يخص الرواية
والابطال ايضاً وموعد نزول البارتات 👇

__

والان ياقلبي انتم ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا