رواية خلف القضبان روح يتيمة الفصل الثاني والعشرون 22 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي

________

نور - اجاني صوته فزيت من مكاني اباوع هذا رقمه يااا جاوبته

اي هسه كمت اعذرني

رعد - معذوره بويه نامي وارتاحي بس الأدوية مو تنسين

نور - تمام

رعد - شلونج اليوم

نور - لا الحمد لله احسن

رعد - ماشي خابرتج علمود اكلج
حضري نفسج اليوم اجي اخذج

نور - وين تاخذني

رعد - لبيت خالج

نور - بصدمه / صددك تحجي

رعد - ليش اجذب عليج مثلاً مافهمت

نور - لا اسفه ماقصد هيج بس من الحماس
شلون عرفت مكانهم وين هما

رعد - ماكو شي يصعب على النقيب رعد

نور - ابتسمت لا ارادين وكتله
اني كُلش اشكرك

رعد - ها يعني بس تشكريني

نور - مافهمت

رعد - حق تعبي اريد تسويلي كيكه مثل ذاك المره

نور - ابتسمت مدري فرحة ماعرف شجاني كتله
ماشي اعتبره تم

رعد - خوش يلا حضري نفسج شوي واوصل

نور - ماشي
سديت الخط ورحت اشوف الملابس الجابته الحجيه شفت فستان عادي لون بيجي لبسته ويه حجاب اسود ماعندي مكياج وهل امور بقى بالبيت ويه غراضي المهم مايحتاج مكياج خلي بس اشوف اهل امي ماريد شي يارب سهلها عليه يارب
رتبت الغرفه واخذت الموبايل وطلعت جانت الحجيه كاعده عل تخم اتابع الإخبار كتلها

حجيه اني اروح

ام ركان - خير يايمه وين رايحه

نور - اخو بتول راح يجي ياخذني يمكن لكه
اهل امي

ام ركان - صدك الف الحمد لله

نور - ادعي حجيه ادعي تتسهل كل اموري

ام ركان - روحي يايمه الله يمطر عليج الرزق والسعادة والصحة والعافية والي تردي الله يفرحج ويفرحنه بيج بنيتي

نور - رحت بست راسها
اللهم امين تسلمين يانظر عيني

ام ركان - فدوه لعيونج داده

نور - واحنا نحجي اندك الجرس
اني افتحه

رحت افتح الباب طلع رعد اول ماشافني صفن بوجهي شوي توترت ابتعدت شوي وجان يكول

رعد - شلونج

نور - الحمد لله
حسيت بي يريد يحجي شي بس ماديحجي

رعد - ركان والحجيه بالبيت

نور - بس الحجيه بالبيت
دخل جوه سلم عليها واني كعدت بالحديقه
انتظره يجي شوي واجه كمت طلعنه

ام ركان - لا تتاخرون يايمه ورجعو عل غده

رعد - لا حجيه اتغدو انتو احنا عدنا احتمال
نتأخر

ام ركان - ماشي يايمه على راحتكم

نور - صعد بالسياره ردت اصعد وره كال

رعد - تعالي كعدي كدام

نور - مو شسمه هاي

رعد - تعالي كعدي قابل راح اكلج هههه

نور - فشلت من هيج كال كعدت كدام
سيارته GMS سوده مضلله شغل السياره
راد يشغل تدفئه كتله

لا تشغله حاره

رعد - تمام

نور - جان الهدوء سيد الموقف بس اني كُلش متوتره وخايفه مدري شبيه اطك طك بأصابعي من التوتر ماعرف شسوي حس عليه كال

رعد - شبيج تعبانه

نور - لا ماكو شي

رعد - اكيد

نور - اي
شغل اغنية لا تسولف علينا من يسألون جان الصوت منخفض جداً وجان يكول

رعد - بويه اريد اكلج شي بس لا تفهميني غلط

نور - اتفضل

رعد - يعني احنا رايحين نشوف بيت خوالج وبعدنه مامتأكدين من العنوان وانتِ تعبانه يعني مو مال ماعرف شلون اكلج

نور - شنو مافهمت

رعد - اقصد انتِ تعبانه مو مال مكياج وهذا البياض على وجهج

نور - اجذب اذا اكول ماصدمني بكلامه شديحجي هذا كتله

بس اني مامكيجه

رعد - بلا وجهج مدري شحاطتله

نور - والله حتى مرطب ماخاله هو هيج ابيض

من هيج كتله فشل كال

رعد - عذريني اذا ضوجتج بكلامي

نور - لا بس
انسى ماكو شي

رعد - لا كملي بس شنو

نور - خل نفترض خاله انت ليش زاعجك الموضوع

رعد - مو قصة زاعجني بس يعني اكول المكان مامناسب

نور - سكتت ماجاوبته كمل الطريق وكل شوي يلتفت ماهتميت شنو يدخل اذا خاله مكياج او لا
استغرب من تصرفاته وياي

رعد - ضجتي مني

نور - لا

كمل الطريق والهدوء سيد الموقف
شوي وكف السياره يم باب سوده كال وصلنه اباوع
الفرع كله بيوت راقيه وحلوه

معقوله بيت خوالي هنا عايشين

رعد - ماعرف خلي ننزل ونتأكد

نور - اي
نزلنه البيت مو كلش راقي يعني شوي قديم بس مابي شي وكفنه هو دك الجرس واني متوتره
حس عليه كال

رعد - ليش متوتره

نور - ماعرف خايفه

رعد - لا تخافين اني مو وياج على شنو تخافين

نور - شكد افرح من هيج يكول احس بأمن اكثر
شوي وفتح الباب ولد صغير يطلع عمره 7 سنين
نزع نظراته رعد وحجه ويا

رعد - شلونك يابطل

- زين

رعد - هذا بيت حمزه الخياط

( ملاحظه الأسماء مستعاره )

- اي

رعد - انت ابنه

- اي شتريد

رعد - يابطل مانريد شي بس نسلم على بابا ونطلع

- بابا مو بالبيت

رعد - وماما

- اي ماما بالبيت

رعد - روح صيحها

- ماشي

نور - راح الولد شوي وجتي مره يطلع عمرها بال35 سنه لابسه دشداشه لون احمر وشعرها لون احمر ولابخه وجها بالمكياج اول ماشفتها انقبض كَلبي مدري ليش شافت رعد كامت تتموع بالحجي

اروى - هلا عيناي تفضلو منو رايدين

نور - التفتت عليه كصتني كص بعيونها مدري شلون تباوع مثل واحد ماعاجبه العجب التفت عليه رعد حسيت بي مرتاحله كال

رعد - هذا بيت حمزه الخياط

اروى - اي عيناي هذا بيته شتريد منا

رعد - سلامتج بس عندي امانه اريد اوصله
هو مو بالبيت صح

اروى - لا مو بالبيت

رعد - شوكت يرجع

اروى - فد نص ساعه ويرجع

رعد - عادي ننتظره جوه

اروى - اي تفضلو

نور - دخلنه جوه
رحنه للغرفه يمكن مال ضيوف جانت مرتبه
كعدنه اني ورعد واني التوتر يقره الف شافني ضحك

رعد - ههه سؤال انتِ دوم هيج متوتره

نور - ماعرف

رعد - بويه ليش التوتر الخوف اني مو وياج

نور - سكتت شويه وجان تدخل مره جبيره
مدكدك وجها كله وايدها حنه خاله كحل بعينها
لابسه دشداشه سوده وشال ابيض كالت

- يا اهلاً وسهلاً

رعد - هلا بيج حجيه

نور - كعدت وكال للولد الفتح الباب يجيب مي
التفتت عليه ضلت تباوع زاد توتري

- بلا صغراً بيكم يمه منو انتو اول مره اشوفكم

رعد - حجيه اني عندي امانه لحمزه الخياط بس اريد احجي ويا واوصل الامانه ماريد شي ثاني

- اي اي فهمتك يمه هلا بيكم

رعد - وبيج حضرتج شتصيرين لي الأخ حمزه

- امه

نور - جنت مدنكه راسي من هيج كالت رفعت راسي التفتت عليه مصدومه نزلن دموعي ماكدرت اسيطر على دموعي يعني هاي بيبي معقوله هاي ام امي شافتني نزلن دموعي استغربت

- خير يمه ليش تبجين

رعد - لا مابيه شي بس يمكن شي دخل بعينها
ها بويه شبيج

نور - مسحت دموعي وكتله مابيه شي
ضلينه كاعدين ننتظر رعد اجا اتصال طلع برا يحجي وهاي المره ضلت تباوع عليه كالت

- احس شكلج مو غريب عليه يايمه

نور - يمكن مشتبها

- لا والله ماضنتي مشتبها
هذا الرجال زوجج

نور - جيت اكله لا كبل رعد دخل كال

رعد - الظاهر الاخ يتأخر واحنا عدنا شغل يلا بويه نور كومي ان شاءالله غير يوم نجي

- لا هسه يرجع وليدي

رعد - حجيه خابروني من الشغل لازم اروح
لغير مره بس اذا ممكن رقم الهاتف

- اي هسه اروى ارووى وووينج

اروى - ها حجيه

- كتبي رقم زوجج وانطي لرجال

نور - اكلت رعد اكل بعيونها ونظراتها مدري ليش ضجت ليش هيج تباوع

اروى - حاضر يدللون هاك عيناي هذا الرقم

رعد - شكراً

اروى - ولو ادلل عيناي

نور - شكد غثتني بكلمة عيناي تجره جر ضجت منها كُلش واحنا دنطلع وجان نشوف رجال يطلع عمره بال 47 سنه جان بيده اكياس خظروات وفواكه اجه الولد الفتحلنه الباب كله

- بابا بابا ذوله يردوك

نور - من كله بابا حسيت بشعور غريب
يعني هذا خالي حسيت بشعور صدمه على فرحه على حزن مشاعر مختلطه نزلن دموعي وكلي امل
واحد منهم يتقبلني واخلص من منال

رعد - حضرتك حمزه الخياط

حمزه - نعم

رعد - عندي الك امانه وكلام يمكن يصدمك

حمزه - تفضلو نحجي جوه

رعد - ماشي بس اكمل مكالمتي واجي
انتِ روحي بويه هسه اجي

نور - تمام
رحت كعدنه بنفس الغرفه كل شوي يباوعون عليه
وهاي اروى مدري شسمها ضلت تباوع عليه توترت كلش ادعي رعد يجي بسرعه كُلش متوتره
شوي واجه

رعد - اي عذروني عل تأخير
اي خويه اني عندي الك امانه كل الي نريد نعرفه
راح تحافظ على الامانه لو لا كون صريح
بجوابك

حمزه - ماشي بس غير اعرف شنو ومنو انتو

رعد - اني النقيب رعد وهاي نور بنت اختك

نور - صفر وجه خالي وبيبي فتحت عيونها من الصدمه

حمزه - شدتحجي انت

رعد - والله مثل ماسمعت

حمزه - اكلك انت ناصب علينه لو شنو فلمك

رعد - رحمه الله والديك ليش انصب عليك
اعرفك تعرفين بنتكم المرحومه مو جان
عدها بنيه

نور - نزلت دموع بيبي وكالت

- اي اي جان عدها بنيه

رعد - اي وهيَ هاي حفيدتج

نور - التفتت عليه مصدومه كامت نزلن دموعها

- ش ش شنو هذا الحجي

رعد - والله حجيه اتفضلي هاي هويتها علمود تتأكدون

نور - اخذ الهويه خالي صفن بيها مصدوم كال

حمزه - لا غلطان بتها كالو ماتت بحادث ويه ابوها

نور - التفت عليه رعد رجع التفت علي كله

رعد - منو كلك

حمزه - بيت عمامها اهل ابوها سئلت عليها وكلهم كالو ماتت ويه ابوها بحادث سير

رعد - ماكو هيج شي البنيه واكفه كدامكم
لا حادث ولا شي

نور - ضل يباوع عليه مامقتنع بكلام رعد
صدمنه بكلامه

حمزه - جذب ماكو هيج شي من كل عقلك اصدك
يلا يلا تفضل راوين عرض كتافك

رعد - اول شي عيب تحجي بهيج اسلوب وياي
وتطردني من بيتك

حمزه - العيب عليك انت جايب وحده من الشارع وتريد ابتلي بيها والله شنو هاي بنت اختك
وانت منووو علمود اصدك بكلامك

نور - كُلش انقهرت من كلامه الأمل الوحيد العندي اختفا التفت عليه رعد شافني مقهوره ودموعي تنزل صار عصبي

رعد - اااسمع لك احترم نفسك من تحجي وثمن كلامك كُلش زين

حمزه - شتريد مثلاً اشكرك واكلك جزاك الله خير
امشي روح بابا وين كاعدين احنا تقشمر على منو

رعد - تعرف متحملك لانك اكبر مني ومحترم عمرك
بسس مرات افقد خليها ابالك واذا فقدت اعصابي كلشي ماشوف كدامي

حمزه - اعلى مابخيلك اركبه شتسوي روح سوي

- يمه خلي نفهم يجوز صدك هاي بنت اختك

حمزه - يمه شنو تفهمين ناس تألف حجي وترتبه
وتبيعه براسنه صدك الكال الستحو ماتو

رعد - سهله كلشي بوقته حلو الي افهمه
منك هذا اخر كلام

حمزه - اي

رعد - يصير خير يلا بويه امشي

نور - كمت باوعت عليهم نزلن دموعي بيبي بجت بس ماحجت شي وخالي يخوز بيه طلعنه اني ورعد سدو الباب بوجهنا

رعد - طاح حظكم اي والله

نور - صعدنه بالسياره ماتحملت طكيت من البجي
يريد يسكتني ماكو ضليت ابجي مخنوكه

رعد - ولج بويه ليش البجي

نور - بدموع /
جانو املي الوحيد جنت متأمله بيهم ماتوقعت هيج تكون ردة فعلهم اني شمسويه وهيج يصير بيه والله تعبت

رعد - شنو املج ما املج طز بيهم كلهم لا تهتمين اصلا اني من اول ماشفت مرته كلت مو هينه بالعكس زين من اول مره عرفتيهم وعرفتي شنو طبعهم ناقصج تتعبين وياهم لاتنقهرين اني ماعوفج راح ابقى ادور على خوالج وخالاتج البقيه لابد نوصل لواحد منهم ويطلع براسه خير قابل كل اصابعج سوا

نور - انت مامجبور بيه البيك مكفيك ماناقصك
نور ومشاكلها

رعد - ليش هيج تحجين مو كتلج صرتي من مسؤوليتي وبعدين شمسوي قابل واجبي هذا

نور - افهمني ماريد اتعبك وياي

رعد - نور ماكو تعب كتلج هذا واجبي

نور - ليش واجبك عرفه ولفه وياك بشنو واجبك
ابقى وحده غريبه عليك

رعد - بس اني ماحسبج غريبه

نور - التفتت علي عيني بعينه
شتت نظره وشغل السياره وبقى طول الطريق ساكت ماحجه شي شوي وكف السياره يم مطعم
كال

رعد - يلا انزلي ناكل شي

نور - لا ماريد

رعد - شنو ماتريدين انزلي بويه كلشي مامكله

نور - ماشتهي

رعد - عندج علاج انزلي اكلي شوي علمود العلاج

نور - ليش هلكد تهتم بعلاجي

رعد - نزلي بويه لا تعاندين

نور - ويه الكل هيج لو بس وياي

رعد - لا حوله ولا قوة الا بالله هسه ليش هاي الاسئله

نور - ماعرف احس اهتمامك بيه زايد

رعد - خوش لعد راح اقلل

نور - ماقصد هيج

رعد - حرت وياج هسه تنزلين لو لا

نور - ماحجيت شي نزلت باوع عليه وضحك
غريب هذا الرجال اني بياحال وهو يضحك
دخلنه للمطعم طلع صاحب المطعم صديقه
رحب بينه كعدت وهو كعد مقابيلي

رعد - شنو تاكلين

نور - ماشتهي

رعد - شكلنه بالسياره

نور - اتمنى تتفهم وضعي صدكني ماشتهي

رعد - بويه بس بطلي عنادج شك بطني

نور - ماحجيت شي بس بداخلي ضحكت على كلامه طلب هو من نفسه واني مالي خلك شي كلش جنت مقهوره شافني ضايجه كال

رعد - بعدج تفكرين

نور - ترا الموضوع مو سهل

رعد - بويه اعرف مو سهل بس مو صعب
اصبري والله كريم

نور - ونعمه بالله
اجه الأكل موصي مشاوي مشكل واني ماشتهي
كتله

شكد تحبون اللحم والكباب

رعد - هههه يعني انتِ ماتحبين

نور - اني ماشتهي كلشي

رعد - يلا بويه بلا حجي و اكلي

نور - شنو بلا حجي قصدك احجي هواي
حقك دوختك بس من قهري شسوي

هيج كلت وهذا خرب من الضحك

رعد - هههههه يابه انتو محد يكدرلكم شكد
ادققون وتفسرون وتتحسسون من ابسط حركه او كلمه

نور - عفواً ليش شحجيت اني

رعد - اكلي هسه

نور - اني بلا شي متوتره وهو ياكل ويباوع عليه
وترني بزايد اكلت شوي وكلت

اكوم اغسل ايد

رعد - ماكلتي شي

نور - ماشتهي
عفته ورحت اغسل ايدي طلعت دفع الحساب وطلعنه صعدنه بالسياره التفت عليه

رعد - وين تحبين اوديج

نور - سؤالك غريب

رعد - ليش

نور - يعني وين نروح مثلاً واحنا وحدنه مايصير

رعد - فهمت عليج بس اقصد مامحتاجه شي
اذا محتاجه نروح للمول نشتري هذا قصدي

نور - لا شكراً بس رجعني لبيت الحجيه

رعد - حاظر ادللي

نور - شغل السياره والهدوء سيد الموقف شوي وصلنه نزلنه دك الجرس فتح الباب صديقه

ركان - هلا بالضلع

رعد - هلا بيك خويه

ركان - تفضلو شلونج خويه

نور - الحمد لله
دخلنه جوه هما راحو لغرفة الضيوف واني رحت للغرفه الي انام بيها قفلت الباب وكعدت ابجي على حالي ليش هيج ديصير بيه ليش كلما اكول هانت خلصت فرجت اشوف العكس تعبت من كلشي تعبت ضليت ابجي مخنوكه كلش حسيت كَلبي
يأذيني اخذت نفس شهيق زفير بعدني احس
نفسي تعبانه اندك الباب مسحت دموعي وعدلت الشال فتحت الباب طلع رعد

رعد - فتحت الباب اشوف عيونها حمر من البجي
كتلها

خير شبيج بويه صاير شي

نور - لا

رعد - لعد شبيج ليش هيج عيونج

نور - عادي شوي تعب

رعد - خوش حبيت احجي وياج كلمتين واروح

نور - اي تفضل

رعد - مو مال نوكف عل باب ونحجي
انتظرج بغرفة الضيوف

نور - ماشي

راح واني رحت غسلت وجهي وعدلت الشال ورحت لغرفة الضيوف اول ماشافني راكان
والحجيه طلعو من الغرفه وماعرفت ليش بصراحه خفت وتوترت

رعد - شبيج واكفه

نور - رحت كعدت عل تخم شافني عرف بطبعي بدون ماكله كال

رعد - ليش متوتره

نور - بشنو جنت تريد تحجي

رعد - منال وزوجها بالسجن

نور - من هيج كال انصدمت كتله

ش ش شلون هيج صار

اخذ سيجاره ولعها وكال

رعد - ماكو شي يصعب عليه

نور - اتمنى توضح اكثر كلشي مافهمت
منال شلون وشوكت انسجنت

رعد - من اخذت اقوالج وكلتي شلون جانت تتعامل وياج وحسب كلامج رادو يزوجوج لواحد وطلع هذا الواحد مجرم وتاجر مخد.رات

نور - صدمه وره صدمه نهايتي راح اتخبل
كتله

كمل

رعد - اي رفعنه على زوجها دعوه وعليها من خلال اقوالج وهيَ من الأساس جانت متهمه بجريمة تجارت المخد.رات

نور - عززه منال

رعد - اي منال الظاهر ماجنتي تعرفين

نور - لا والله صدمتني

رعد - زين ماحسيتي بيوم من الايام

نور - لا نهائي

رعد - المهم فَ جريمتها ويه قضيتج ويه زوجها كلها التمت سوا وشكلها راح اطول هيَ وزوجها

نور - والبيت شلون حصتي من بيت ابويه

رعد - عندج حصه

نور - اي بس البيت وماخذت ورثي منا

رعد - بس انتِ لو كلكم

نور - لا كلنه اني وخواتي وهيَ

رعد - حلو اشوف باجر اسئل عن هذا الموضوع

نور - ماشي اذا هيج اكدر ارجع للبيت

رعد - اكيد لا

نور - ليش

رعد - شلون تعيشين وحدج بالبيت وين كاعدين احنا

نور - شنو شلون لظروره احكام

رعد - لا بويه مايصير بعدين خلي اتأكد من سالفة البيت يجوز مسجلته باسم زوجها او اسمها

نور - لا ماتوقع

رعد - اشوف باجر انطيج الخبر

نور - تعبتك وياي ودوختك

رعد - لا بويه ماكو تعب
يلا اني اروح اي شي تحتاجين خابريني ماشي

نور - ماشي

كام واني كمت دخل صديقه

ركان - ها ضلعي وين

رعد - عندي شغل لازم اروح

ركان - هلكد مهم

رعد - اي نشاوف باجر

ركان - ان شاءالله

نور - طلعو واني عدلت الغرفه وطلعت رحت للغرفه الي انام بيها سديت الباب وافكر منال اخ يامنال شكد تعبتيني بحياتي بس رب العالمين
جان وياي مثقال ذره ماتضيع عنده سبحانه شكد كريم ورحيم ادعي من كل كَلبي يارب تفرحني وتجبر بخاطري واعرف ربي راح تفرحني لانك الكريم والعظيم وعلى كل شيء قدير

بين افكاري ودعواتي ودموعي التنزل استسلمت عيوني لنوم

______
في مكان اخر

رعد - طلعت من بيت ركان شغلت السياره طول الطريق كل فكري وبالي يمها اول مره احس بهيج شعور غريب معقوله احبها لا اكيد شنو حب ليش حاب منو علمود احبها بس يمكن معجب بيها لأنها حلوه ومحترمه وملتزمه استخطيها لانها يتيمه احب اساعدها اكيد اي هذا السبب

فتحت جام السياره وشغلت اغنية شمسين وضليت
ادندن ويه الاغنيه اكثر مقطع احبه من يكول

يردوني أبتعد عنك وأعوفك
وإذا إنت جرح ما أريدك تطيب
أوكف بصفك ولا ما أعوفك

واني بالطريق حسيت اكو سياره تلاحكني
ضليت اسوق واركز عل سياره ورايه ورايه غيرت الطريق هم مافاد حسيت اكو شي مو طبيعي
دنكت اطلع السلا.ح ماحس غير رموني
بطلقتين....................................................

___
يكول الشاعر

على الورق أرسمك وأحچـي وياك ؟
وأحاچـيك بزعل وأرجع أبوسنك ؟
وأغار أعلى ألرسم لوشافتة ألناس ؟
وأشيلن روحي بيدي وبيها أمسحنك ؟
أنا ألمحتاج حبك كلش هوآي ؟
وأشوف عيونك ألعني يسألنك ؟
أليبيع ألذهب ممكن لان محتاج ؟
لكن أنت روحي شلون أبيعنك

____

البارت القادم صدمه كبيره لنور شنو وشلون
انتظروني في البارت القادم وصلو هذا البارت اقل شي 200 تعليق وينزل البارت القادم 

قلبيييييييي انتو تفاعلكم يحفزني يوميه انزل
بارت لا تنسون التصويت بالنجمة وتعليق بين الفقرات احبكم

لي محبي الرواية تابعو حسابي انستجرام انشر هناك كلشي يخص الرواية 👇

الان ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا