رواية خلف القضبان روح يتيمة الفصل الخامس عشر 15 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
______

رعد - اروح اشوف تعميرات المجمع الحترك
اشوف العمال وين وصلو

حيدر - لا اتعب نفسك اني مرتب كلشي

رعد - ميخالف خويه اشوف وين وصلو
قبل لا التحق

حيدر - براحتك خويه

جوان - يمه الله يحفظك حبيبي دير بالك على نفسك

رعد - ادللي ويحفظج الي يالغاليه

يمه مثل ماكتلج اهم شي الأدوية فدوه اروحلج
اخذيهم بأنتظام

جوان - ماشي يمه

رعد - صعدت فوك لغرفتي بدلت وتعطرت
اخذت الموبايل والمحفظه وطلعت توني شغلت السياره وصلتني رساله عبالي ركان
فتحته اشوف مكتوب

- لا تثق بالنار مرات النار تحرك صاحبهَ

شغلت سيجاره
واضحك عليهم قشامر
هههه عبالهم يخوفوني بهاي سوالف
المزعطه بسيطه اله احركم حرك كلشي بوقته حلو

شغلت السياره ورحت اشوف العمال وين وصلو بالمجمع بعدهم يعمرون بي والحرك مسبب خسائر كثيره ضليت هناك اشرف عليهم خابرني ركان جاوبته

ها لك ساقط شتريد

ركان - لا تكولهَ عبالي نجحت
زين ماعرفت بجم ماده طلعت سقطت

رعد - بكل المواد

ركان - الله يسامحك

رعد - كول شتريد

ركان - كلت هيج احجي ويه رعوده اوي اوي
شكد احبج

رعد - ههههه خلي الناس كلها تقلد البنات بس
انته لا تقلدهن

ركان - هههه حقك مو وجه غزل
اليوم بالليل شعندك

رعد - عادي ماكو شي مميز

ركان - حلو لعد نروح اليوم نتونس جم يوم ونلتحق خلي شوي نغير جو

رعد - ماشي

ركان - انتظرك هناك وماراح اكول لعُمر
تعرفه مايحب هاي السوالف

رعد - اي لا تكله يلا ضلعي اشوفك هناك
اروح هسه عندي شغل

ركان - ماشي

رعد - سديته ورحت اساعد العمال
رحت اشتريت طلاء ابيض انشغلت وياهم تعبت اشتغل وادعي على عمران مو كافي الخسائر والتعب وفوك هذا كله خال راسه براسي
سهله يصير خير

اذن المغرب يلا شباب كلمن ويروح لبيته تعبتو اليوم

- حاضر استاذ

رعد - راحو واني رحت شغلت السياره ورجعت
للبيت سبحت وبدلت ورتبت نفسي وتعطرت نزلت
جوه اشوفهم يحضرون العشاء رحت بست راس امي ها يمه شلونج اليوم

جوان - هلا يمه الحمد لله بخير

رعد - دومج يابعد كَلبي

بتول - اكول خويه

رعد - كولي بعد اخوج

بتول - شعندك هيج كاشخ يلا اعترف وشنو اسم عطرك ريحته اجنن الواحد حرام عليك تخبل الوادم بعطرك

تبارك - صدك شنو انت ماعندك خوات ماتحس ابنات الناس ههههه

رعد - لا هو اني اريد ادوخهن هههه لا اشاقه
هسه احجو صدك طالع حلو

بتول - اجنن اتموت عمي محظوووظه التاخذ اخوي شتريد بعد هيج جمال واناقه وشخصيه كملي تبو

تبارك - كاريزما وفوك كل هذا احلى نقيب وبجهاز مكافحة الارهاب بعد شكو شتريد التاخذك

رعد - اي تخلوني كوه انغر بنفسي هههه
ها يمه شتكولين نيالها التاخذني

جوان - اله نيالها ونص غير تخبل يايمه
اااخ شوكت اشوفك عريس واشوف جهالك
خاف اموت وماشوفهم

رعد - لا يمه تشوفيهم ان شاءالله عسى عمرج طويل يالغاليه يلا اني اروح لا يضل بالج

جوان - يااا والعشاء وين تروح تعشه يلا روح

رعد - لا يمه اتعشو انتو بالعافيه

حيدر - السلام عليكم

الكل - عليكم السلام

حيدر - ها رعد وين

رعد - طالع برا يم ركان والشباب

حيدر - خوش يمه وين ابويه

جوان - قبل شوي طلع

حيدر - واحمد وسيف وينهم

جوان - احمد سوده عليه نايم من كد ماقره تعب ونام وسيف هو هم طالع ويه أصدقائه

رعد - يلا اني اروح

جوان - درب السلامه يايمه دير بالك على نفسك

رعد - حاضر ادللي يالغاليه
طلعت برا سحبتلي سيجاره
شغلت السياره ورحت لمكان المتفقين علي
صفيت السياره داريد انزل وصلتني رساله ثاني وايضًا من رقم مجهول

النار تحرك والثائر يدمر وانت الضحيه

ذوله المزعطه منين جايبين رقمي
صدك جذب ذوله من كل عقلهم عبالهم
يخوفون سهله يصير خير

خابرت علي صديقي بالدوام بامكافحة الابتزاز
شوي ورد عليه

ها علاوي حبيبي شلونك

علي - هلا بضلعي نحمد الله ونشكره
انت شلونك

رعد - بخير اكلك علاوي اكو ارقام مجهوله كل شويه واحد يراسلني راح ادزلك وشوفلي من وين المصدر ولو اعرف سوالف مزعطه

علي - ادلل بس دزلي والباقي عليه
ولا يهمك

رعد - تسلم ضلعي ثواني ويوصلك

علي - ماشي واني انتظرك وباجر
تعرف من وين المصدر تدلل

رعد - حبيبي ماتقصر
اخذ راحتك تعبتك وياي

علي - ماكو اي تعب هلا بيك خويه

رعد - سديت الخط ودزيتله الأرقام وقفلت السياره ودخلت للملا.ه اول مادخلت هوسه واغاني شفت ركان من بعيد رحت يما

ركان - هلا بضلع نورت المكان

رعد - من زينه ينور بيه

- اهلا استاذ تفضل شنو تشرب

رعد - كاس مرتب ويه راس نركيله

- ادلل

ركان - شوكت تبطل شرب

رعد - ليش اليجي هنا شنو يشير قوطية ببسي واني ماعرف

ركان - ضلعي علمودك اني

رعد - عادي متعود نتناسى لان مانكدر ننسى

ركان - مافهمت عليك شو مالك خلك

رعد - لا بس تعبنه اليوم بالمجمع

ركان - خوش بس لا تثكل وتفضحنه هاي كتلك

رعد - نحاول

التفتت اغاني وضحك وسوالف
وهوسه مر الوقت حسيت ثكل راسي كُلش وغوشن عيوني ضليت افتح واسد بيهن مافاد اباوع عل الساعه البيدي اوووف صارت بال2 شبسرعه مره الوقت ركان خلي نرجع كافي

ركان - علي صوتك ماسمعك

رعد - اكول خلي نرجع اتاخر الوقت

ركان - ولك هسه بدت الحفله

رعد - اني راح ارجع

ركان - شبيك كوم اني ارجعك شوف حالتك
مو كتلك لا تثكل بالشرب ماتسمع الكلام
كوم اسند نفسك عليه كوم

رعد - كمت ورجليه وراسي ثكلن بزايد طلعنه
بره هدوء سندت نفسي على ركان صعدنه شغل السياره

ركان - جم كلاص مزقنب وهيج مطفي

رعد - هههه ماعرف تعرف شيكول محمد

ركان - محمد منو

رعد - محمد جبار يكول
بسرعة الوقت صاير يخلص وياك الهواء إنت وإذا رحت اختنكناااا وإذا طلعت شمس فوت إنت للبيت

ركان - ههههه لا طافي كُلش

رعد - شغل اغنيته يلا

ركان - ولك يا اغنيه تخبلت ههههه

رعد - انجب انتَ المخبل شغل

ركان - اي بهاي صدكت صوجي ماعفتك وحدك
عمي الله يساعد التاخذك

رعد - هههه اي صدك تعرف شنو

ركان - شنو

رعد - اني ماريد اصير اب بيوم من الأيام

ركان - ليش

رعد - التفتت عل جام اباوع نجوم السماء
كتله ونزلت دمعه من عيني

ماريد ابني يعيش ويشوف الأبو شافه

ركان - ليش شبيك انت

رعد - هههه كله البله بيه كول شنو مابيك
ولك اااااااخ بس ااااخ

ركان - منو الغثك بس كلي ايدي والجيله

رعد - هههههه لا تضحكني كُلش مال خلك

ركان - سلامتك رعيد والله ياخويه كلمن وهما شكل منو مرتاح الحمد لله

رعد - اي بس هم عن هم يختلف يا ركان

ركان - صح بس متأكده الشي النحرمت منا
بطفولتك راح تعوضه بجهالك وراح
يتعلمون من ابوهم القوه

رعد - هههههه ياقوه شوف حالتي اضحك على روحي بالشرب اريد انسى انسسسسسسسسسسى الأصوات البراسي ماريد اسمعها ماريد اذكرها اريد انسسسسسسسى

ركان - بكَلبك حجي هواي احجي بعد اخوك احجي

رعد - مامرتاح ياركان والله مامرتاح
ساكت والسوالف البيه مال صياح

ركان - رعد خويه لا تسوي بروحك هيج
يجي يوم وتفرح وتزوج وتكون عائله حلوه
وتنسى كلشي صدكني واذكرك

هيج كلت ضحك ضحكه كلها حزن وفتح الجام
مال سياره وصرخ بعلو صوته استغربت بعمري ماشيفه بهيج حاله

رعد - افرح هههههههههه ياناس ركان يكول افرح
هو وووووين الفرح

ياهل الفرح شراي ورب الكعبه شراي بيعوني
الفرح دلوني الفرح وين الكه

اااخ ياركان اااخ لاتفتح جروح سنين
ماريد تنزل دموع العين

ركان - انقهرت علي

لا تنقهر يجي يوم وكلشي بتصلح
باذن الله انت بس كول يارب تهون صدكني كلها تهون وسد الجام ضلعي الجو بارد ورانه التحاق مابينه حيل النشله

رعد - هم صدك ذكي انته مو بيدك

ركان - ههههه من زمان
طول الطريق لو يغني لو يضحك ضحكة
حزن مدري شبي وصلنه لبيتهم فتحو الحراس الباب صفيت السياره ونزلته

رعد - يكول لااااا تسولف علينا من يسألون

ركان - اششش صوتك يمعود لا تفضحنه

رعد - ليش تخاف اني مالي شغل هو يكول
لا تسوولف علينا من يسألون يابه ليش ش شنو السالفه يكول عيون الناس لا تحسسسد عشكنا

ركان - يمعود نصي صوتك هاي شلون طلابه وياك
طلعت تلفونه وخابرت حيدر اخو
شوي ورد عباله صاير شي

حيدر - رعد شنو وين انتَ

ركان - خويه على كيفك اني ركان
صديق رعد

حيدر - وووينه رعد شصار

ركان - كلت بكَلبي اليوم الرزايل
غسل ولبس كتله

بس اهده ماصاير شي تعال افتح الباب ولا تخلي احد يحس عليك

حيدر - يا باب شبيك ركان تحلم لو شارب شي

ركان - رحم الله والديك هذا الطلع منك باب بيتكم
قابل يا باب

حيدر - كلشي مدافهم عليك

ركان - خويه بس انزل وقتها تفهم عليه

حيدر - ماشي

ركان - سده شوي وفتح الباب شغل الاضويه
انصدم من شاف اخو بهيج حاله
وهذا رعد بعده يغني محد يعرف شديخرط

حيدر - شنوووو هذا شبي رعد

ركان - خويه صوتك الله يخليك ساعدني
نصعده فوك لغرفته وبعدين احجيلك كلشي

حيدر - اااااخ هاي من شوكت
متعلم دروب عوجه

ركان - ساعدني اخو اني من اليمين لازمه وهو من اليسار كوه صعدنا فوك رعد طويل ومعضل وزنه ثكيل احنا بياحال وهذا لزك بأغنية لا تسولف علينا من يسألون

رعد - يكول عيون الناس لا تحسد عشكنا

حيدر - قزر قوط هذا هم صوت مال اغاني

ركان - هههههههههه

رعد - ههههه شبيه اخبل يكول عيون الناس لا تحسد عشكنا

ركان - لزك بهاي الأغنيه ههههه

حيدر - وولك ياعشك ياحسد
باجر العب بي شلم بلم بس خلي يصبر عليه

ركان - ههههههه ضحكني كلام اخو

وصلنه لغرفته ذب روحه عل سرير
نزعتله حذائه واخو غطاه ونام نزلنه جوه داريد اطلع التفت عليه كال

حيدر - ركان احجي بدون لف ودوران منو
علمه على هذا الدرب وليش هلكد مزقنب
هذا السم

ركان - والله خويه تعرف رعد مو صغير
ويميز الصح من الغلط احسن مني منك بس رعد نفسيته تعبان اني اكلك نفسيته كُلش تعبانه ومن تتعب نفسيته يشرب هواي وهسه اني اترخص وباجر من يصحه اتمنى منك تفهم منا شبي لان جان يحجي كلام اني صديقه مافهمت علي تعرف رعد من النوع المايحجي بهيج امور حساسه تخص حياته حتى الي مايحجيلي

حيدر - اي هنا المشكله اني اخو وماعرف
شي عنه المهم زين سويت خابرتني والله لو امي شايفته هيج جان ماتت من القهر

ركان - اني هم كلت انت اكبر من البقيه اكيد متفهم اكثر علمود هيج خابرتك يلا خويه اروح قبل لا احد يشوفني هنا في أمان الله

حيدر - الله وياك
ركان لحظه

ركان - نعم

حيدر - شكراً على وكفتك ويه رعد

ركان - ابتسمت وكتله
رعد اخو الماجبته امي وهذا واجبي بحقه

_
_

________
في مكان اخر

نور - كمت الساعه 6 حضرت الريوك ومثل كل يوم روتين كلت اليوم اسئل اشوف موضوع الدراسه شصار بي رحت اغسل الحوش جتي وراي

منال - اكلج هييي انتِ

نور - اسمي نور

منال - من امداج عود فرحانه بأسمها
سمعي حضري نفسج من اليوم تخبزين ونبيع لجوارين كافي شنو المصروف كوه يكفينه قابل نعتمد على سهيل

نور - شنو خبز شنو مصروف صدك تحجين

منال - مثل ماسمعتي

نور - منو يكول الجوارين راح يشترون

منال - لا يشترون لان هنا كلها واصله ونسوانهم
عشتو مايتعبون ايدهم بالخبز وانتِ كومي عجني كميه وباجر نكمل الباقي الطحين (الدقيق) مايكفي هسه خبزي كميه علمود نبيعه وبفلوسه نشتري
كيس ثاني خبزي بال قليل 50 كرصه

نور - بس اني ماعرف اخبز هيج كميه خاف مايطلع حلو بيدي

منال - جذابه تعرفين
هاي سوالفج مو عليه وهسه رايحه اشتري تنور دير بالج تفتحين الباب لكأن من يكون

نور - فهمنه

خلت العبايه فوك راسها وراحت واني بقيت
حايره بحالي شلون راح ادبرها عود كلت اليوم اشوف موضوع الدراسة والله صعبه يارب اعرف دومك وياي ربي لا تعوفني وحدي وانت اقرب الي من حبل الوريد مر ساعتين اندك الباب

منال - فتحي هاي اني

نور - رحت فتحته دخلو ولد ثنين صغار شايلين
التنور

منال - ها خوش تنور

نور - اباوع التنور من بره كله مزنجر كتلها

بس هذا كله مزنجر

منال - هذا الموجود دبري حالج بي مابي شي

نور - سكتت ادعي بسرعه يجي الليل علمود انام وما اسمع كلام منال اليجرح لو نظرات زوجها المقززه رحت لغرفتي كلت شوي ارتاح ورايه غده واحس روحي معلعلة مالي خلك شي تعبت من شغل البيت ماطول 5 دقائق اندك الباب

منال - كووومي لج ليش قافله
الباب كووومي وراج عجن وخبز

نور - اكو واحد يخبز هسه
والله تعبانه خليها باجر

منال - بنت الفكوره هم تتعب فتحي الباب

نور - ربي صبرني
كمت فتحت الباب استلمتني

منال - سمعي لج تروحين تعجنين
بلغت الجوارين وكلها كالو نريد

نور - جم بيت

منال - اليوم 7 رادو ومن ضمنهم البيت الرحنه يمهم المريشين

نور - قصدج بيت بتول

منال - اي هسه يلا روحي عل مطبخ

نور - يعني شكد اخبز غير اعرررف

منال - وجع لا تعلين صوتج خبزي 70 كرصه

نور - حييييل مو كلتي 50

منال - تنحول عينج ليش حيل كووومي يلا
هما رادو كميه زينه سهيل راح يدز صديقه يجيب الكيس الثاني اني اروح اكمل نومتي والله ثُمَ والله اذا طلع الخبز ماحلو وماطيب والله الحزام اللعبه على ظهرج تعرفيني مخبله كلشي اسوي

نور - ماكول غير يارب ارزقني الصبر

منال - الله يخلصني منج كولي امين

نور - راحت واني كمت غسلت وجهي اريد
اصحصح رحت للمطبخ محضرتلي كيس طحين (دقيق) شكبره هسه وين اعجن هاي الكميه قابل اروح بال انجانه مال حمام اعجن اااخ يارب صبرني

حميت مي حار وكلشي حضرت سميت
بأسم الله وبديت اعجن وادعي يطلع طيب
وزين علمود منال لا تسويلي سالفه انهد حيلي
بالعجن اكتافي تشنجت من العجن العجين هوايه
يادوب كدرت اسيطر علي خلصت بعد تعب ساعه
ونص فقط عجن رحت سحبت القنينه يم التنور وجان تمطر والهوى بارد رفعت ايدي لسما وكلت
ربي سهلها عليه يارب

رحت اجيب باقي الغراض شويه والحمد لله
وكف المطر كملت كلشي وسميت بأسم الله وشغلت التنوروبديت افرش بالعجين واضربه بالتنور بقيت تقريبا 3 ساعات متواصله اني اخبز وخلصت واخيراً تعبت متت هلاك الحمد لله طلع الخبز يخبل نزلت دموعي احمدك واشكرك ربي صارت الساعه بال10:15 كامت منال من النوم

منال - ها خلصتي

نور - اي هسه خلصت
جتي شافت الخبز واكلت شويه منه

منال - خوش خبز يلا لفي شالج وتعالي وزعي
عل جوارين وهما ينطوج الفلوس

نور - مو كلتي انتِ تروحين

منال - وانتِ وياي قابل وحدي

نور - رحت لفيت الحجاب اشوف خدودي صايرات حمر من حرارة التنور صاحتني منال بدينه نوزع عل جوارين بقه بس بيت بتول منال كالت تعبت انتِ روحي انطيهم كلت ماشي رجعت هيَ واني اخذت حصتهم شافوني الحراس
كتلهم

هذا خبز هما طلبو بس انطيهم واطلع

الحراس - ماشي

نور - اول مادخلت طلعتلي تيلا
ابتسمتلها وانطيتها الخبز

حبيبتي هذا الخبز الطلبو

تيلا - ماشي ماما انت ضل هنا
ماما بتول تجيب فلوس

نور - ماشي انتظرها
راحت شويه وجان اسمع صوت صياح وصوت كزاز يتكسر بلعت ريكي عزه شنو هاي هسه غير اعرف وين صارت الشاغله وبتول بقيت واكفه انتظرها وجان ينفتح الباب التفتت عبالي الشاغله والصدمه اشوف اخو بتول صار بوجهي صاير عصبي وعيونه تجدح نار خفت منه كُلش اشوف ايده تنزف دم راح للكراج وصاح بعلو صوته

رعد - فتحووو البااااب بسرررعه

نور - انخبصو الحراس فتحو الباب بسرعه
وهذا شخط السياره من السرعه وطلع طلعت امه تبجي وحالتها حاله

جوان - ووولكم ااابني ااااخ ولك ررررعد
يمممه

نور - ثبتت ابمكاني مصدومه ماعرف
شسوي وهيَ شافت الأرض كله دم اتخبلت من البجي انقهرت عليها كعدت بالكاع وتضرب على رجليها وتبجي اجوي 3 ولد ورجال اصلع اول مره اشوفهم الرجال صاير عصبي كُلش كام يصيح ويهدد وذاك يهدي

جوان - عززه العزاني هذا دم رررررعد يمممه
اااااخ تعبت ربي تعبت يارب شيبو راسي ولكم ابني ااااخ ابني راح يروح من ايدي ووولك يمه رعد ليش هيج تسوي بيه لييييش

عمران - ووووووينه بس يعرف يدييح بالشوارع
ويه الادبسزيات لهيج سوالف شاطررر اني اعلمه بس خلي يرجع

سيف - كافي اذكرو الله شجاكم
يمعود ليش تكبرون الموضوع بويه شنو السالفه

حيدر - دشوووفه وشوف تصرفاته كافي
لشوكت يعقل كلشي واله حد وهو عبر كل الحدود

جوان - ووولكم خابرو شوفو ووينه ابني راح
يروح من ااايدي

عمران - عوفي كون الكبر يلفه واخلص منا
هذا ولد عاااااق مايصير براسه خير
وراح يبقى عاق

جوان - لاااا تكول علي هيج ابني كلشي مابي
كله منك كااافي تعبنه وياك

احمد - دكافي والله كرهنه العيش بهذا البيت

سيف - انوب اخابره ماكو مغلق

عمران - لا تخابره تلكه داح بشوارع
هو هذا مكانه الشارع

نور - انصدمت من كلام الأب شنو هاي القسوه
العنده يبقى ابنه شلون هيج يحجي علي شفتهم كلهم مخبوصين ولا منتبهين اني موجوده ابتعدت بدون مايحسون داريد اطلع وجان تصيحني بتول

بتول - نووور

نور - التفتت جتي تركض بيده الفلوس

بتول - اسفه والله نسيتج
اعتذر منج بس شفتي شصار

نور - عادي حبيبتي ماصار شي
مسكت ايدي نزلن دموعها كالت

بتول - نور فدوه الشفتي انسي ماريد احد
يعرف بي

نور - مسحت دموعها وابتسمت لها
لا حبيبتي اكيد البيوت اسرار مايحتاج توصين

بتول - ااااخ يانور اسرار عن اسرار تفرق
يلا اروح اشوف امي شكراً عل خبز

نور - بالعافيه حبيبتي
راحت واني رجعت للبيت وبعدني مصدومه
من الشفته اول مادخلت استلمتني منال

منال - ها ليش اتأخرتي

نور - ما اتأخرت

منال - لا تأخرتي وليش هيج مصفر لونج
شصاير وياج

نور - لا مابيه

منال - وين الفلوس

نور - هاج اروح انام تعبانه
كمت من وكت الله يخليج بس خليني
انام ساعتين ماريد اكثر يابه ساعه مو ساعتين

منال - ووووين روحي كملي الغده يلا
روحي انطمري نامت عليج طابوكه اليسمعج
يكول مسويه وليمه لعشيره هنا جم خبزايه
خبزتي

نور - ماجاوبتها لان اعرف الكلام مايفيد وياها
رحت اكمل الغده ونعسانه بشكل كوه خلصت الغده
رحت شفتها كاعده بالستقبال خاله رجل على رجل
وبيدها الجهاز مال تلفزيون وتفر بهل علج
كتلها

خلص الغده ومااتغده اروح انام متت نعس
فدوه اروحلج لا تكوميني لو البيت يحترك عوفيني
وطلعي خوش بس خليني انام

منال - امداج طبعاً اعوفج علمود اخلص منج
وارتاح روحي انطمري نامت عليج طابوكه

نور - الله يهديج بس هيج اكول عفتها بقت ادردم رحت لغرفتي قفلت الباب فتحت شعري مو كلش طويل بس زين اااخ صداع مو طبيعي تمددت اول ماغمضت اريد انام تذكرت نظرات عيونه فتحت
عيوني والله جان يخوف وايده كله دم شنو سالفته

رجعت غمضت عيوني تذكرت كلام الأب وبجي
الأم رجع مره ثانيه اجه ابالي نظراته ويومل الشفته من اخذت الكيك تذكرت شكله وطريقة كلامه وصوته فتحت عيوني وكعدت

وتااالي وياج ست نور شلون يعني ما انام
نفكر بالناس رجعت مره ثانيه تمددت غمضت
عيوني مره ثانيه نظراته وهو عصبي اجه ابالي

فتحت عيوني
ااااخ اريد انام والله تعبانه ليش نظراته تجي ابالي
لا اعرفه ولا يعرفني شعليه بيهم

رجعت وهل مره استسلمت عيوني لنوم لان
صدك جنت نعسانه وكُلش تعبانه

_____________
في مكان اخر

رعد - كمت الصبح جسمي متكسر كعدت
شوي صفنت واتذكرت شصار البارحه اهووو هسه هذا حيدر يكبر الموضوع وانه كُلش مالي خلكه

كمت اسبح سبحت وبدلت نزلت
جوه شفت امي كاعده بالستقبال وعمران كاعد يمها
رحت بست راسها وكعدت عل تخم مقابيلهم
صباح الخير يمه

جوان - صباحك ورد يايمه
شلونك بعد امك

رعد - بخير

جوان - عساك دوم يايمه

رعد - بعد روحي
شويه ونزلو سيف واحمد وتبارك وبتول
بس حيدر ماكو

اكول يمه حيدر ماكو شنو طالع

جوان - لا يمه هسه ينزل

رعد - خوش

طلعت موبايلي دزيتله رساله عل واتس
مارد

بتول - رحت اساعد تيلا
خلصنه الريوك التمينه كلنا عل طاوله
وجان ينزل حيدر بس ضايج كل شوي يلتفت على رعد ورعد يسوي نفسه مامهتم

شويه ونطق ابوي

عمران - رعد وين جنت البارحه

رعد - يمه كلاص مي

جوان - ادلل حبيبي

عمران - داحجي وياك وين جنت البارحه

بتول - رعد مارد على ابوي وسوه نفسه
ماسمع صار عصبي ابوي ضرب ايده عل طاوله فززنه كلنا وكال

عمران - ااااحجي وياك وووين جنت البارحه
جاوب

بتول - غمضت عيوني وكلت ويه نفسي
صدك مو كتها والله تعبنه من المشاكل
التفتت اباوع رعد ولا عبالك رد علي
بعدم اهتمام

رعد - مو شغلك

عمران - اها لعد شغل منووو ستاذ رعد

رعد - من الآخر شتريد اذا تريد عركه مالي
خلك كلي علمود اطلع واعوفلك البيت

عمران - صدك ماتستحي فوك سوايتك لسانك طويل وترادد

رعد - ههههههه منو يحجي

عمران - رررعد احجي وياي بأحترام فهمت

جوان - سمو بسم الله شنو السالفه
عمران عوفه خلي يتريك قابل وين جان
ويه ركان وجماعته

عمران - ههههههه ضحكتيني
الظاهر بعدج ماتعرفين خلي اني اكلج
وين جان البارحه مثل ماتشوفي هوَ مايحب يرد ابنج المحترم بنظرج البارحه مطلعي من الملا.ها وهو سكرااان

بتول - صدمنه ابويه بكلامه التفتنه على رعد
امي لطمت على خدها

جوان - شنووو لا لا ابني مايسويها

عمران - لا يسويها ونصص

جوان - عزه العزاني
يمه رعد فدوه احجي شي

رعد -

جوان - بدموع /
اااحجي لا تسكت يايمه احجي

عمران - ماعنده شي يحجي بي
دايح بالشوارع والملا.هي والنسوان والعربده

رعد - عمران شتريد

عمران - جاوبني اني وامك وكول وين جنت
اذا انتَ رجال

بتول - كام صار عصبي وكله بعصبيه

رعد - رجااااال وغصباً عليك فهمت

عمران - ايا حقير ماتعرف تحترم اهلك

بتول - ابوي هيج كال ورعد تخبل هجم علي
يريد يضربه لزمو حيدر وسيف

رعد - منوووووو حقير الزم حدك خاف صرت مثلكم الحقاره يمكم ينضرب بيها المثل

حيدر - بسسسس كافي احترم نفسك
يبقى ابوك تريد تضرب ابوك تخبلت شبيييك انت بس كلي شبيييك

رعد - مووووو ابويه ولو يموووووت مايصير ابوي
ابوكم انتووو بس مو ابويه فهمت ولا تعلي صوتك عليه مرررره ثاني

حيدر - تعال اضربني تعال وقاحتك وين وصلت

رعد - حيدرررر انجب اسكت

حيدر - ما اسكت ديلا اريد اشوف شلون اطلع عظلاتك على اهلك

عمران - عوفه هذا العاق

بتول - ابويه هيج كال وهذا ضرب ايده بالشباك
احنا شبابيك كلها كبار كسر شكو شي كدامه وكام يصيح ويحجي وايده تنزف دم وهو بعده يكسر
عمري كله ماشفته بهيج حاله انقهرت علي
كمت ابجي امي انهارت

رعد - منوووو العاق نسيت شسويت بهذا العاق نسييت عمررران اذكرك ياظالم اذكرك ولك تررروح فدوه لى اسمي بس اسميييي يسوه راسك وراس
الوياك ياجباااااان اني العاق اني ياجبناء اكبر واحد بيكم مايكدر يوكف كبالي و اشوفك العاق شيسوي وربك اشوفك العاق شيسوي وشلون يدمر البنيته سنيييييييين ياحقرااااء

جوان - بدموع /
رررعد يمه فدوه اروحلك بس اهده

سيف - خويه اهده بتول جيبي لفاف وقطن
وديتول بسرعه

بتول - حاضر

جوان - يمه اهده فدوه اروحلك

عمران - عوفي هذا مخبل كل هاي الهوسه وماكلكم وين جان

رعد - ولك عبالك اخاف منك هاااا
اااااي جنت بالملا..ها ديلا شتسوي وجنت سكرااان
ومالك شششششغل بيه فهمت

جوان - بدموع / ليش يايمه ليش هيج تسوي هاي الدروب مو دروبك يايمه ليش هيج تسوي بروحك

بتول - امي تبجي وهو جان اكو اخر كلاص
كسره وكف كبال ابوي وكله

رعد - كتلك قبل وراح ارجع اعيده وخلي الكل يسسسسسسمع

اليلعب بنار رعد يتحمل حركها

طلعت من البيت واني صاير نار وجان
اشوف نفس البنيه كبالي اول ماصادفت عيني بعيونها نزلت راسها وبين عليها الخوف عفتها
ورحت شخطت السياره وطلعت

وماعرف وين رايح تائه ضائع بحياتي
اسوق وادخن بهل سجائر ومالحك باكيت
كامل خلصته واحس بنار تحرك كَلبي حرك

وكفت السياره بمكان رجعت راسي ليوره
غمضت عيوني نزلن دموعي محتاج شي
وماعرف شنو هوَ شوكت ارتاح ماعرف

اباوع ايدي كلها دم وصخت السياره ولا مهتم
ليش واصل هيج مرحله ماعرف هيج دمي هين
عليه هيج وجعي هين عليه هيج الألم هين عليه لا ورب الكعبه ماهين بس تعبان من كلشي مامرتاح
بحياتي مامرتاح فتحت باب السيارة وايدي بعدها
تنكط دم خابرت ركان شويه ورد

الو ركان وينك

ركان - هلا بضلعي بالبيت ليش

رعد - تعال اني كُلش تعبان ..........................

_
_
__________
يقول الشاعر

أحبكِ جداً وأعلم
أن طريق إلى المستحيل طويـل

احبكِ جداً واعلم
أنكِ ست النساء وليس لدي بديـل

احبكِ جداً وأعلم أن زمان الحنيـن
انتهى ومات الكلام الجميل

احبكِ جداً واعلم بيني وبينك طريق طويل

احبكِ جداً واعلم ان القلب قد تمزق
وقارب الصبر انكسر وليس لدي بديـل

احبكً جداً لكن لا اعلم
ماحكمة الخالق الذي زرع حبكِ في قلبي الحزين

_

بقلمي مختلط ✍

___
_
_

منو يحب منو ؟
ومنو راح يتعب ويه منو ؟
والان اود القول لكم من الان قد ابتدائة رحلتنه
لا اعلم متى تنتهي وكيف سوفً تنتهي لكن اود
القول لكم هناك رحلة جميله في انتظارنه

_

يلا قلبييي البارت القام ناااااار فجرولي
هذا البارت بالتصويت بالنجمة وتعليق بين الفقراتوصلو اقل شي 200 الرواية خلي نكول
هسه بدت جمالها ومتعتها الحقيقيه رغم هيَ
من اول بارت بين جمالها واحداثها النار🔥

ملاحظه
الأحداث هوايه ومدلحك اكتب وانزل يوميه
راح اسويلكم جدول ان شاءالله بهل ايام
ابلغكم عبر حسابي انستغرام موعد نزول
البارتات بس اريد منكم التفاعل مع الرواية
حسب التفاعل ينزل البارت اسرع واطول

لكم من قلبي طن اطنان من الحب ❤

قلبي تابعو حسابي انستغرام انشر هناك كلشي يخص الرواية وموعد نزول البارت 👇

الان ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا