رواية خلف القضبان روح يتيمة الفصل الخامس والعشرون 25 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي

________

رعد - سهله نكول لكينه اقاربج وعايشه يمهم لحد ما نلكي خالتج

نور - لا والله هذا الكلام مو مقنع

رعد - يابه كولي رحت لبيت خالي وعايشه ويه جدتي وخلص قابل منو راح يجي يزورج ويتاكد

نور - سؤال جاوبني لان راح اتخبل

رعد - جواب

نور - خليت عيني بعينه وكتله
رعد ليش تساعدني فهمني ليش اني بذات هيج تتعب وياي وتساعدني وتهتم بيه فهمني والله التفكير تعبني

رعد - نور بويه لا تخافين اني ماريد منج شي ولا طمعان بشي بس اريد اساعدج اني مو شخص نذل علمود اعوفج مثل عمامج وخوالج اذا اني ماساعد وغير مايساعد لعد من يادين احنا واجب عليه اساعدج وكتلج قبل انتِ من مسؤوليتي ومستحيل اعوفج وحدج

نور - صفنت علي جنت منتظره منه غير كلام جنت منتظره يكول احبج واريدج جنت منتظره يكول انتِ الي وماتصيرين لغيري ماتوقعت هيج يكون رده الظاهر صدك بنيت احلام ورديه من لاشيء والحجيه تكول يحبج ياحب هذا عرفت مايحبني الفرق البينا هواي حقه اتضح لي بكلامه يساعدني لان ماعندي احد يساعدني لاني يتيمه يتيمة وبس ماكول غير وسفه وهظيمه وعيب على كَلبي الحبك يارعد

انداريت عل جام نزلن دموعي مسحتهم قبل لا يشوفهم ضليت ساكته والكلام الي بكَلبي يهد جبال
لكن كان الصمت هو اختياري

رعد - صفنت عليه وانداريت حسيت بيها ضاجت
معقوله حجيت شي يضوجها لا والله كلامي جدا لبق كتلها

نور شبيج

نور - مابيه شي

رعد - لا حسيتج ضجتي حجيت شي غلط

نور - لا اني الجنت غلطانه مو انت

رعد - شنو قصدج

نور - انسى مو مهم

رعد - هسه نعقد لو لا شنو قرارج

نور - التفتت علي نزلن دموعي كتله
تصدك صرت ما اهتم شتسوي سوي مو مهم
تعبت اريد ارتاح وبس ارتاح مثل الناس اعيش حياتي بسلام وامان وكلشي ماريد بعد

رعد - مسحي دموعج بويه كافي تبجين
ماكو شي ماله حل خلي نعقد والله كريم والله ماكو غير حل حاولت ورب الكعبه لكن سبحان الله
شفتي شصار

نور - مسحت دموعي وكتله
ابتليت بيه اعرف

رعد - هو هذا حجي شو ماتعرفين تحجين

نور - لا والله اعرف كُلش زين بس خليها هيج

رعد - نور ماريد اغصبج على شي انتِ بكيفج ماتردين مانعقد واذا تريدين نعقد تحبين الكل يعرف ماعندي مانع ماتحبين هم ماعندي مانع سوي الي تردي بويه اهم شي راحتج عندي

نور - هههه راحتي عندك اي واضح

رعد - شنو قصدج

نور - ياريت لو كلام العيون تنسمع
انسى مو مهم

رعد - شنو انسى لاتحجين كلام مامفهوم كملي كلامج شنو قصدج

نور - انسى مو مهم قصدي اتمنى مانتناقش بهذا الموضوع

رعد - براحتج هسه شنو تريدين
ابلغ اهلي لو محد يعرف

نور - سوي الي تريده مو مهم عندي

رعد - خوش

نور - سحب سيجاره ولعها وكال

رعد - اووف نسيت

نور - طفاها كلت بكَلبي بقت على سيجارتك مو حركت كَلبي الحبك وماطفيت ناره اااخ ياكَلبي ااااخ شبسرعه حلمنه وصدكنه حلمنه

بقيت ساكته والهدوء سيد الموقف شوي وكف السياره يم بيت الحجيه وكال

رعد - باجر راح التحق من انزل نعقد ماشي

نور - براحتك جم يوم وتنزل

رعد - 10 ايام

نور - ماشي فتحت باب السيارة نزلت قبل
لا اسده كال

رعد - نور

نور - نعم

رعد - دير بالج على نفسج واني بوقت فراغي راح اخابرج

نور - ماشي وانت هم دير بالك على نفسك
من هيج كتله ابتسم وكال

رعد - تدللين

نور - سديت باب السيارة نزل الجام انتظر ادخل للبيت يلا راح والله كمت ماعرف طبعه ولا اعرف نظراته ساعه احسه يحبني وساعه احس متوهمه
بس ماضنتي يحبني اتوقع متوهمه مو حب هذا
لا مو حب خلص نور انسي مايحب براحته انتِ تحبي احتفظي بحبج بكَلبج خلص اتقبلي الواقع الحمد لله على كل شيء

دخلت جوه البيت هدوء اباوع الحجيه نايمه عل تخم وبيدها السبحه ماحبيت اكومها رحت جبت لحاف غطيتها ورحت للغرفه بدلت لميت شعري شلون ماجان ورحت توضيت وصليت ركعتين وكعدت احجي ويه ربي

يارب يمكن جنت غلطانه عبالي يحبني بس اليوم اتضح لي بكلامه يساعدني لاني يتيمه يارب من صدك احس كَلبي انكسر ربي جنت متوقعه منا غير جواب جنت متوقعه منا غير كلام جنت متوقعه اليوم اصلي واسجد ركعتين حمد وشكر على وجوده بحياتي بس خاب ظني بكلامه يارب
ربي اذا رعد مو من قسمتي لا تخليني احبه واذا حبيته خليني انسى ربي ما ناقصني حزن والله ولا ناقصني تعب وتفكير راضيه ربي بكلشي تكتبه الي راضيه والحمد لله على كل شيء

نزلن دموعي واني ادعي
يارب مستقبلي مجهول وماعرف شنو منتظرني بس اعرف انت وياي وماراح تتركني يارب اجبر بخاطري تعبانه ربي حيل تعبانه

مسحت دموعي ونمت عل سجاده احلى نومه ماحسيت بشي ولا حلمت او فكرت بشي مر الوقت
واني غاركه بنومتي كمت على صوت الموبايل جان رعد جاوبته بنعس

رعد - ها بويه شلون صرتي

نور - هلا زينه اي زينه

رعد - الو شنو نايمه

نور - ام

رعد - ماشي بويه بس موعد الأدوية لاتنسين

نور - ام تمام

رعد - ماشي بويه كملي نومتج

نور - اي
سد الخط شوي وكعدت احس جسمي متكسر لان الكاع يابسه والسجاده خفيفه اباوع الساعه بال 7 عزه الصلاة اتاخرت شلون هيج نمت وماحسيت على نفسي كمت ركض رحت غسلت وجهي وتوضيت وكملت صلاتي ورحت اشوف الحجيه وين جانت بالمطبخ تحضر العشاء

مساء الخير حجيه

ام ركان - هلا يمه مساء العافيه

نور - حجيه ليش ماكومتيني لصلاة

ام ركان - كلت اكيد صليتي ونمتي يايمه ماعرفت

نور - والله نمت نومة اهل الكهف من صدك ارتاحيت

ام ركان - نوم العوافي يايمه

نور - الله يعافيج حجيه دك الجرس

ام ركان - اكيد الولد دزيتهم يجبون صمون
اني اروح افتح

نور - ماشي
راحت واني كملت العشاء تعشينه اني وهيَ
غسلت المواعين ورحت كعدنه بالستقبال
كل شوي تباوع عليه حست عليه مالي خلك

ام ركان - يمه نويره شصار وياج اليوم

نور - اااخ حجيه كولي شماصار

ام ركان - خير ان شاءالله احجي يمه وكعتي كَلبي

نور - والله حجيه شحجي وشكول رحنه وطلعت مسافره وبايعه بيتها

ام ركان - ياااا شوف شلون شغله

نور - اي والله حجيه قهر قهر مو طبيعي بس شسوي الحمد لله على كل شيء

ام ركان - اي يمه الحمد لله لا تنقهرين قدر الله وما شاء فعل كلشي من ربج بي حكمه يايمه الحمد لله

نور - اي والله ونعمه بالله

ام ركان - يمه ليش عيونج حمر شنو باجيه

نور - تذكرت الصار اليوم وتذكرت كلام رعد

ام ركان - يمه نويره احجي صار شي ثاني

نور - لا بس شوي تعبانه حجيه اني
استئذن منج نعسانه

ام ركان - يايمه هسه كمتي من النوم

نور - اي صح بس نعسانه

ام ركان - ماشي يمه اخذي علاجج ونامي بنيتي

نور - كمت بست راسها
ان شاءالله حبيبه

رحت للمطبخ اخذت الأدوية
ورحت للغرفه ضليت اجي واروح افكر شنو راح يصير ماعرف تعبت من التفكير كعدت اقره القرآن لحد مانعست رحت نمت

_______
في مكان اخر

رعد - وصلتها ورجعت للبيت جانو كاعدين بالستقبال

السلام عليكم

الكل - عليكم السلام

جوان - هلا برعيد هلا يمه شلون صرت

رعد - رحت بست راسها
حبيبه زين لا يضل بالج

جوان - عساك دوم يابعد عمري

احمد - خويه شنو رائيك اليوم نطلع طلعه عائليه برا نتعشى نغير جو

رعد - وربي تعبان اريد اسبح وانام الفجر التحق

جوان - يمه بعدك تعبان يا التحق هذا لا تخبلني

رعد - لا صرت احسن يمه لا يضل بالج

حيدر - خويه ماتكدر تأجل التحاقك مو كتلك
باجر نروح نخطب

رعد - اووو نسيت لا والله ماكدر مجبور التحق
ميخالف خويه عمران وسيف وياك واخذو احمد هم عود للعقد والخطبه اروح وياك

حيدر - ماشي

رعد - بتول خويه راسي حيل مصدع بلا امر عليج
حضريلي الملابس والحمام

بتول - افا خوي انت تدلل من عيوني

رعد - تسلم عيونج

سيف - يمه ابويه شو ماكو وين رايح

جوان - مسافر

احمد - صدك شو احنا بالبيت ومانعرف

جوان - الصبح سافر

تبارك - حبيبي شكد يتعب بشغله وكل هذا علمودنا

رعد - هههههه اي كُلش  علمودكم
عفتهم ورحت لغرفتي حضرتلي بتول الملابس
والحمام سبحت  وخابرت نور جانت نايمه ذكرتها بموعد الأدوية وسديت الخط وكفت يم الشباك
سحبتلي سيجارتين ولعتهم احس نار بصدري وصورة نور وعيونها ماتروح من بالي طفيت السيجاره ونمت لساعه 5 الفجر بدلت اخذت الجنطه وطلعت 

_________
في مكان اخر

نور - صار الصبح نفس الروتين بين الشغل والطبخ ماكو شي جديد مر اول يوم عادي وثاني وثالث يوم نفس الشي ورعد لا خابر ولا راسل ضل بالي علي وخفت علي بس لاصاير بي شي كملت الشغل ورحت يم الحجيه

اكلج حجيه ركان ماخابر

ام ركان - لا والله يايمه ليش

نور - لا بس هيج اسئل هو واخو بتول بنفس المكان شغلهم صح

ام ركان - اي يمه اذا ضل بالج على رعيد لا يضل بالج هما مرات هيج من كثر الشغل من الحذر يغلقون الهواتف

نور - اها قصدج يعني مو اول مره هيج

ام ركان - لا يمه مو اول مره لا يضل بالج

نور - لا قابل شعليه الله يحفظهم كلهم

ام ركان - اي والله يايمه الله يحفظهم وينصرهم سوده عليه شكد يتعبون

نور - اي صح الله يكويهم

ام ركان - اللهم امين بنيتي

نور - ابتسمت بوجها ورحت للمطبخ واني نار بكَلبي
ادعي يكون بخير تعودت يوميه احجي ويا على الأقل اطمئن علي من اسمع صوته ياربي شجاني ماريد افكر بي ولا ينشغل بالي بس اااخ من كَلبي
مو بيدي

مر اليوم الرابع وهم رعد ماكو واني كُلش بالي مشغول وخايفه علي اشتغل وفكري يما صار الليل اندك الجرس فرحت راحت الحجيه تشوف منو واني من شباك المطبخ وكفت من كل عقلي متأمله يطلع رعد بس طلعو اهل رعد جانت بتول وامها وتبارك واحمد يمكن اخوهم الصغير  وصلهم وراح

رحت بسرعه للغرفه عدلت شعري
وتعطرت وطلعت سلمت عليهم

ام ركان - ياهلا بيكم داده نورتو البيت

جوان - هلا بيج حبيبه بنورج

نور - السلام عليكم

جوان - ياهلا ومية هلا وعليكم السلام

نور - شلونج خاله

جوان - الحمد لله بنيتي انتِ شلونج شخبارج

نور - الحمد لله

بتول - شلونها العسل

نور - محد غيرج عسل حبيبتي شخبارج

بتول - طايح حض حضي بالدراسه

نور - الله يساعدج حبي تبارك شخبارج

تبارك - هلا حبيبتي نحمد الله ونشكره ياعيوني

نور - اي الحمد لله

بتول - نويره عيوني جبتلج وياي شوي
غراض تعالي نشوفهم بالغرفه

نور - ماشي حبيبتي
رحنه اني وهيَ للغرفه جان بيدها علاكه (كيس)
كارتون كتلها

شنو هذا

بتول - شوفي رحت للمول ويه سيف واخذتلي عطور وشوي مكياج وتذكرتج هناك امانه اخذيهم لخاطري وعتبري هديه وان شاءالله يعجبج

نور - بتول ليش مكلفه نفسج حبيبتي والله ماجان يحتاج

بتول - ياتكلفه حبيبتي الغالي يرخصلج

نور - شكراً حبيبتي كلشي منج حلو ان شاءالله اردها الج بال افراح

بتول - يااا صدك تحجين ليش جبتهم علمود ترديهم
ترا راح ازعل منج

نور - ههههه لا خلص كلشي ولا زعلج

بتول - حبيبتي صدكيني اني كُلش احبج
صار سنين ماعرفت اصادق وحده مثلج ياختي انتِ نادره وربي بالأخص بهذا الزمن

نور - خجلت كافي ههههه

بتول - ههههه جعل محد غيرج يخجل

نور - حبيبتي نروح يم تبارك هسه تكول عافوني

بتول - هههه هم صدك يلا نروح

نور - خليت العلاكه عل سرير وطلعنه كعدنه يمهم والحجيه وام بتول يحجون عن الحياة والجهال والمشاكل واني جنت احجي ويه بتول وتبارك عل دراسه بين الحجي وسمعت اسم رعد التفتت بلهفه

ام ركان - اخبار رعيد شلون صار

جوان - والله بعده مامخابر سوده عليه ماعرف شلون صار انتو ركان ما خابركم

ام ركان - لا والله ياداده

تبارك - ان شاءالله ماكو شي

ام ركان - اي ان شاءالله يمه

نور - كلت بكَلبي اااخ يارعد ماعرف وين راح اوصل وياك

كمت قدمتلهم الضيافه هما يحجون واني بالي مشغول ومخنوكه كُلش صارت بال 11 اجه اخوهم اخذهم غسلت المواعين ورحت للغرفه فتحت العلاكه جان بيها عطور ومسكاره وتنت لونه على احمر فاتح كُلش يبين طبيعي بس ريحة العطور تجنن ان شاءالله يجي يوم اني هم اشتريلها هديه

عفتهم وكمت صليت ودعيت يكون رعد بخير دعيت يرجع بسلامه ادعي وتنزل دموعي اندك الباب اكيد الحجيه مسحت دموعي

تفضلي حجيه

ام ركان - يمه نور شبيج  صارلج يومين لا تاكلين لا تسولفين مكضيته كله صلاة نوم شغل ليش يايمه شبيج اذا مريضه كولي بنيتي نروح لدكتور لاتبقين هيج يمه ماريد اشوفج تعبانه

نور - هيَ تحجي واني دموعي تنزل كتلها حجيه مخنوكه كُلش

ام ركان - بسم الله عليج من الخنكه بنيتي
صاير شي يمه اكو شي مضوجج

نور - كلت بكَلبي اااخ ياحجيه شكلج اكلج بالي يمه وخايفه علي ومشتاكه لصوته كلت

ماعرف حجيه الله كريم

ام ركان - ونعمه بالله يمه يلا تعالي نكعد طلعي فلم فيلم مدري شتسمو انتو وسوي شاميه (فوشار) خلي نتفرج سوا

نور - صدك حجيه اتابعين افلام

ام ركان - علمودج  اتابع بس كون الفلم يكون كوميدي شوي نضحك

نور - هههه تم ادللي هسه اجي

ام ركان - يابعد عمري يايمه
مايدلل عليج ظالم بنيتي

نور - حبيبتي

راحت الحجيه واني رحت غسلت وجهي وعدلت شعري ورحت سويت فوشار ويه عصاير وحب شمس طفينه الاضويه ضليت اقلب بال قنوات لحد مالكينه فيلم قديم شوي بس مابي شي ادمجنه ويه الفيلم اني والحجيه والحمد لله شوي نسيت سالفة رعد واحنا نتابع الفيلم جان يدك موبايل الحجيه بالمطبخ جان

اني اجيبه حجيه لا تكومين

ام ركان - ماشي يمه

نور - رحت جبته طلع ركان ماعرف شصار بيه
من الفرحه الضحكه شكت حلكي رحت ركض انطيته للحجيه

حجيه حجيه هذا ركان

ام ركان - يا الله ان شاءالله خير

نور - ردة علي

ام ركان - هلا وليدي هلا يمه شلونك يابعد كَلبي وينك صار جم يوم ماتخابر ضل بالنه اكيد احلف
الحمد لله يحفظكم الرحمن يمه فدوه اروحلك دير بالك على نفسك ودفي نفسك زين يمه لا تبرد واكل زين فدوه اروحلك وليدي ماشي اي لا زينه رعيد شلون صار عساكم دوم الله ينصركم ويحفظكم صدك شوكت ماشي يمه درب السلامه وليدي سلملي على رعيد الله وياكم حبيبي فدوه اروح لعيونكم يايمه مع السلامة

نور - ها حجيه بشري

ام ركان - الحمد لله كُلش زينين بس مثل ماكتلج مرات يكون عندهم مهمات صعبه ولازم ياخذون حذرهم فُ ماكدرو يخابرون

نور - يعني هما بخير

ام ركان - اي الحمد لله وابشرج بعد يومين
يرجعون ان شاءالله

نور - صددك فرحتيني ان شاءالله

ام ركان - ها نويره هيج مشتاكه لرعيد
هههههه

نور - شكد فشلت من امداني
ماعرف اتحكم بنفسي كلت

ها لا حجيه ياشوك بس هيج
فرحت لكلهم مو بس اله

ام ركان - ههههه يمه شيبات راسي ماراحن هدر
عبالج ماعرفج الله يجمعكم بالحلال بنيتي

نور - كمت اشرب مي من الفشله ماعرف ارد
يبوووو هيج حبك امبين عليه يارعد صخام الصخم منال بس راح يرجع واخيرا ياااي ههههههه

كملنه الفيلم راحت الحجيه تنام واني هم رحت اتمددت اريد انام ماكدر وجان يدك موبايلي انوب ماعرف وين خليته صوته عالي ماريد الحجيه تكوم اوووف ولك وين رحت وين دورة علي جان واكع جوه السرير اشوف مكتوب النقيب رعد سبحان ألله اول ماقريت اسمه التوتر يقره الف وكَلبي يدك بسرعه احس هسه راح يطلع من مكانه
يبووو عليج يانور

رديت اجاني صوته

رعد - نور بويه شلونج

نور - من كال بويه نزلن دموعي من صدك حسيت
بغيابه طفله بدون اب كتله

اني لو انت شلونك

رعد - شبي صوتج دتبجين

نور - مسحت دموعي وكتله
لا

رعد - والله بويه الشغل هواي ومتعب ماكدرت
اخابرج شلونج هسه احسن والعلاج مستمره علي لو تركتي

نور - زينه لا مستمره انت شلون صرت

رعد - بويه اني صنديد ماينخاف عليه لا يضل بالج

نور - صح دوم ان شاءالله  رعد

رعد - هلا بويه

نور - شوكت تنزل

رعد - بعد يومين ان شاءالله

نور - ان شاءالله

رعد - اول ما انزل نعقد ان شاءالله

نور - ماشي

رعد - يلا اروح الولد محتاجيني دير بالج
على نفسج بويه

نور - ماشي وانت هم دير بالك على نفسك

رعد - ماشي مع السلامة

نور - مع السلامة
سد الخط احس نفسي طايره من الفرح واخيراً سمعت صوته الحمد لله يارب اهم شي هو بخير الف الحمد والشكر ربي دعيت ونمت

__________
في مكان اخر

رعد - سديت الخط اباوع عل موبايل وابتسمت لا ارادين طفر ركان مدري من وين طلعي

ركان - ها ولك ساقط ويه منو تحجي

رعد - ممكن تنجب شنو شايفني يوميه ويه وحده

ركان - ههههه ديلا الي يسمعك يكول شيخ

رعد - على اساس انت الشيخ مو

ركان - الله يهدينا
هسه اعترف ويه منو جنت تحجي

رعد - ركان مالي خلك كُلش

ركان - يمعود ماتنجب هسه جنت مبتسم
ولك رعد وربي اعرفك يول دافنيها سوا
لاتغير الموضوع احجي ويه منو جنت تحجي
لحظه خلي اخمن ويه نور مو

رعد - وانت شعليك ابني لاتصير فضولي
شون سالفه اضل اعلم بيكم اني

ركان - ههههههه ورب الكعبه ويه نور عرفت
لا تستحي كول احبها وخلصنه

رعد - منو كلك احبها

ركان - امبينه ترا نظراتك وتصرفاتك فاضحتك

رعد - ركان عوف الشقه خلي نحجي كلام جدي

ركان - جدي مات وجان اخرس،كلشي ماحجه شلون احجي كلامه هههههههه

رعد - من طاح حظك مو صوجك
صوج اليحجي وياك

ركان - هههههههه عصب يابه شكلنه على كيفك شوي نلطف الجو احجي اسمعك جدي ههههه

رعد - ركان صدك احجي اكو شي يجذبني الها شنو هو ماعرف ياخي ضحكتها ترد روحي ودموعها تحرك كَلبي يمها كل الموازيين تتغير

ركان - هههههه لا ولك هذا منو اليحجي ماعرفتك

رعد - لا حولَ ولا قوة الا بالله ابني لشوكت تبقيى  ملطلط

ركان - رحمه الله  والديك
خويه طلعت واكع خوش وكعه هههههه

رعد - ماعرف احبها لو معجب بيها بس اريدها تكون دوم قريبه مني

ركان - تحبها ولا ابشرك تحبها حب جنوني امبين من اهتمامك مكضيها كله دير بالج على نفسج بويه العلاج بويه شلون صرتي بويه ادري مخلفها وناسيها هههههه

رعد - دنجب انجب مو صوجك
صوج اليحجي وياك

ركان - رعوده واكعه بالحب ياناس هههههه

رعد - ركان انجب لاتخليني اغلط عليك

ركان - هههههه اعصابك ياحلو

شوف رعيد ليش ماتزوجها والله خوش بنيه صار جم يوم يمنا ماشفت منها شي ياخي محترمه بشكل وملتزمه تعرف يوميه بالليل تروح تتوضه تصلي صلاة الليل ياخي وين بقن بنات بهذا الزمن يصلون هنا صلاة الفريضه مايصلن الله يخليك فَ ياضلعي اذا تحبها لاتروحها من ايدك البنيه خلقه واخلاق وانت بكيفك

رعد - ركان ماريد اظلمها وياي

ركان - خاب ماتنجب ياظلم ليش شبيك
جمال فلوس شهادة ومهنه بعد شكو

رعد - ركان مو كلشي فلوس

سحبت سيجاره ولعتها وكملت
ضلعي صدك راح تتعب وياي

ركان - ليش تتعب

رعد - يعني بربك وحده مثلها ومثل التزامها
تاخذ واحد مثلي الذنوب تراسته من الجدم لراس
ياخي احجي بمنطق

ركان - اذا قصدك عل شرب والملا.هي من تزوج بطل بعد ازوجة قابل شنو تريد بعد عندك مرتك تملي عينك واترك الشرب اني من زمان اكلك اترك بس انت راسك يابس

رعد - بس من اضوج اشرب اقشمر نفسي بالشرب

ركان - والله خويه جاي تأذي نفسك مو تقشمر

رعد - يصير خير
تعال نشوف وين وصلو الولد

ركان - اي يلا

_______
في مكان اخر

نور - ومرت باقي الأيام مثل كل يوم روتين واجه يوم نزول رعد الحجيه كالت هو وركان ينزلون سوا ويتغدون يمنا كمت من الصبح ويه الحجيه حضرنه دجاج مشوي بالفرن اوصينه من المطعم مندي لحم وسويت مقبلات صار بال1 الظهر وصل المندي رتبنه السفره بس باقي يجون رحت طلعت ملابسي علمود اسبح ريحتي كله طبخ جان سبحت وبدلت ولفيت الحجاب وشوي عطر

وطلعت اشوف الحجيه فرحانه تبخر بالبيت وتعطره ومشغل القرآن وتقره ايات قرآنية وكفت
اباوع عليها شكد حنونه الله لا يحرمهم من بعض الام نعمه جداً عظيمه ياترا لو امي واخوي باقيين
هم جان هيج سوت اي اكيد ماما جانت احن ام نزلن دموعي اندك الجرس راحت الحجيه تشوف منو مسحت دموعي ورحت للمطبخ اباوع من الشباك بس اني اشوفهم هما مايشوفون دخل ركان امه تبوس وتحضن بي وبعده دخل رعد هو وملابسه السوداء العسكريه شكد حلوه علي هو وعظلاته وكتافه العريضه اويلي كَلبي ابتسم واباوع علي يخبل بنظري احلى رجل اشوفه بحياتي ضل يباوع منا منا ركان مدري شكله وضحكو دخلو لغرفة الضيوف هناك فرشنه السفره بالكاع اجه ركان يشرب مي

ركان - السلام عليكم
بعد اخوج شلونج

نور - عليكم السلام خويه الحمد لله

ركان - دومج خويه

نور - تسلم
راح لغرفته جتي الحجيه كالت

ام ركان - يمه نويره اخذيلهم مي واني اسوي الچاي

نور - حاضر حجيه

عدلت الحجاب وكُلش متوتره سميت بسم الله واخذت المي اول مافتحت الباب جان كاعد عل تخم وبيده موبايله عباله الحجيه كال

رعد - حجيه تعالي كعدي لا اتعبين نفسج

نور - ماكو تعب

اول ماسمع صوتي رفع راسه وعينه بعيني

رعد - بويه هاي انتِ شلونج

نور - الحمد لله انت شلونك

رعد - نحمد الله ونشكره

نور - نزلت راسي خليت المي عل سفره وردت اطلع كال

رعد - نور

نور - نعم

رعد - باجر الصبح لازم تروحين للمركز يسئلوج كم اسئله تخص سالفة منال اني اجي اخذج ونروح ماشي بويه

نور - بهت وجهي جنت منتظره غير كلام كتله
ماشي وطلعت رحت كملت شغل المطبخ خلصو لمينه المواعين اني والحجيه غسلتهم شربو چاي وكعدو يحجون اني رحت لغرفتي شكد انقهرت على نفسي اني شوكت حبيته ماعرف شوكت تعلقت بي ماعرف نور تقبلي الواقع الحب من طرف واحد راح يحركج وانتِ ما ناقصج اااخ ياكَلبي شكد تعبنه وراح نتعب الله المستعان

بعد نص ساعه ردت انام ماكدرت اندك الباب كعدت خليت الشال على راسي

اتفضل

ام ركان - يمه رعيد راح يروح ويكول اريد نور بحجايه

نور - ماشي حجيه هسه اجي
راحت واني عدلت الحجاب وطلعت جان واكف
بغرفة الضيوف وحده كتله

الحجيه كالت تريدني بموضوع

تقدم سد الباب وكف مقابيلي عينه بعيني توترت
بزايد كال

رعد - نور شبيج

نور - مافهمت

رعد - لا فهمتي شبيج وياي تره خبلتيني

نور - اني خبلتك ؟

رعد - اي انتِ لعد جدي بويه شبيج احجيلي

نور - مابيه شي

رعد - شكد تحبون الملحه شنو مابيج عبالج اني غبي ما ملاحض تصرفاتج وياي اتقرب تبتعدين احجي اسئل عليج فقط تجاوبين على كد السؤال وكبل تطلعين شنو سالفتج من شوكت تجنبييني

نور - كلت بكَلبي ياريت لو كدرت تقره كمية الحب
من نظرات عيوني بس اااخ ااخ

رعد - ماراح تحجين

نور - مابيه شي وخلص يمكن شوي تعبانه

رعد - ماشي براااحتج

نور - صار عصبي وطلع هذا الشاطر بي على كلشي يصير عصبي رحت للغرفه مر اليوم عادي انتظرت منا اتصال بالليل بس ما اتصل عفته صليت ونمت كمت الصبح ساعه بال8 كل جسمي يون عليه كوه كمت حضرت الريوك كامت الحجيه

ام ركان - ياااا نويره بنيتي ليش حضرتي وحدج
يايمه ليش ما كومتيني

نور - حجيه ماسويت شي

ام ركان - يايمه ماريد تتعبين يمنا ركان بالبيت

نور - ماعرف والله

ام ركان - هسه اروح اشوفه يمكن نايم هذا من ينزل يكضي يوم كامل كله نوم هو رعيد هذا طبعهم

نور - كلت بكَلبي اااخ من رعيد مالكم

راحت واني صبيت الچاي شوي واجو كعدو تريكنه دك موبايل ركان رد

ركان - هلا بضلع

رعد - وينك

ركان - بالبيت

رعد - نور يمك

ركان - اي ليش

رعد - كللها تجهز نفسها نص ساعه واني يمها

ركان - وين تروحون

رعد - مو كتلك للمركز علمود سالفة مرت ابوها

ركان - اي اي اتذكرت

رعد - يلا مع السلامه

ركان - مع السلامة

نور - سد الخط وكال

ركان - خويه نور رعد يكول خلي تجهز نفسها نص ساعه واوصل

نور - تمام

ام ركان - وين يرحون يمه

ركان - للمركزه علمود قضية مرت ابوها

ام ركان - اها اي خير ان شاءالله

نور - غسلت ورحت ابدل جذبني عبايه سوده خليجيه كله تطريز وكريستال كُلش حلوه جان ويه الملابس الجابتهم الحجيه طقمت ويا شال اسود تعطرت خليت شوي مسكاره وهذا التنت الجابته بتول شوي على خدود وشفتي ولا مبين عبالك طبيعي وطلعت انتظره بالحوش شوي واجه نزل من السياره اويلي شلابس هذا لابس جينز اسود وبلوزه سوده لازكه على كتافه لزك ورافع شعره وريحة  عطره ترست البيت عزه هذا يجلط الواحد شدعوه هيج كاشخ وين رايحين اي علمود البنات يركضن وراه اوي شعليه ادوخ راسي ناقصني

راح سلم عل حجيه وركان  وضل يباوع عليه بس ماحجه شي حتى ماكلي شلونج اني هم ماحجيت شي صعدنه بالسياره هو ساكت واني ساكته وصلنه للمركز سئلوني جم سؤال جوابتهم وطلعنه صعدنه بالسياره وجان يكول

رعد - لشوكت نبقى هيج

نور - ماجاوبته بده يعصب

رعد - مو دحجي وياج ليش ماجاوبين

نور - ليش شبينه

رعد - راح تبقين تجنبيين  الحديث وياي

نور - رعد شتريد مني ترا اني تعبت الله واكبر
شبيك وياي

ماعجبه كلامي ضاج كال

رعد - سلامتج ماريد شي

نور - شغل السياره واخذ الموبايل وماعرف خابر منو

رعد - هلا ضلعي وينك اي
لا بعد هسه خلصنه اي اكلك تكدر تروح لشقتي الي بال.... اي روح هناك وجيب وياك شيخ محتاجك بموضوع بعدين اكلك لا كلت بعدين اكلك خوش وجيب الحجيه وامي وياك اي لا بس الحجيه وامي وخابر عُمر هم خلي يجي اي كلهم رعد محتاجكم بشغله اي لا ولك هسه لا تحجي شي يم امي بس جيبها لا تتاخر ماشي يلا ضلعي اروح هناك انتظرك ماشي تمام بعدين تعرف يلا في امان الله

نور - سد الخط كال

رعد - اليوم راح اريحج واريح نفسي

نور - شلون

رعد - اليوم راح نعقد

نور - شنووو .......................................

_
_
_________
يكول الشاعر

هل علمت بما جرى
أن مر طيفك في خيالي أو سرى
ألقى الحياة تفتحت أبوابها
والكون من عبق الزهور تعطرا
واليأس من فؤادي يائسا
والفرح عشش في الحنايا ونبرا
فتراك روحي في غيابك حولها
وسواك عيني ياحبيبي لاترى
وسواك عيني ياحبيبي لاترى

______

البارت القادم نار طن احداث يبووووو🔥

قلبييييي الحلوين شلونه بارت اليوم طوووويل لحد تكول قصير البارت والله العظيم صارلي 3 ايام اكتب بي وهم مالحكت بهذا البارت نذكر احداث عقد الزواج لان صار البارت طويل كُلش انتظروني في البارت القادم ماطول عليكم
ان شاءالله

قلبي وصلو هذا البارت اقل شي 200 تعليق 
حيل تعبت بهذا البارت وربي و ان شاءالله احاول قدر الإمكان انزل البارت القادم بهل يومين
بس تفاعلو قلبي انتو

واكو منكم يكولون مانعرف شوكت ينزل البارت قلبي انتو نزلو الرواية في المكتبه حتى يصلكم
الأشعار اول ما ينزل البارت

واني دوم اعوضكم اذا غبت كم يوم اعوضكم ابارت طويل واذا يوميه انزل اكتب بارت اقصر شوي بكل الحالات ماقصر وياكم قلبي انتو

والان ياحلوين
لا تنسون التصويت بالنجمة
وتعليق بين الفقرات وتفاعلكم مع الرواية اريد تفاعل حلو مثلكم والله من اقره تعليقاتكم وتفاعلكم اتحفز اكتب اكثر وانزل اسرع

حسابي انستجرام انشر هناك
كلشي يخص الرواية + حتى انزل مشاهد من البارتات قبل لا انزله هنا 👇

وحسابي واتباد الي مامتابع
تابعوني حتى يصلكم كل جديد

Jehan-Stories

الان ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا