#خلف القضبان روح يتيمة
#بقلم الكاتبه جيهان آغا
_
_
قبل مانبدي صلو على سيدنا محمد
( اللهم صل على سيدنا محمد وعلى ال محمد )
ولا تنسون تفاعلكم يحفزني
اكتب البارت وانزله اسرع
قراءة ممتعة ياقلبي
__________
رعد - ليش متاخرين بالسوك
نور - مو اني البنات اتاخرو
رعد - ديلا فد ساعه وارجع
نور - ماشي
سد الخط كملنه الطريق وصلنه اخذت الفستان
ورحت لشقه اول مادخلت شمرت الفستان ورحت
اتمددت على تخم يابويه تعبت شنو هاي
ارتاحيت كمت اخذت الفستان
لغرفة النوم بدلت لبست دشداشه شتويه
بس قصيره شوي مال بيت احتريت كُلش من
التعب دك الموبايل اباوع رقم غريب منو هذا
ارد مارد
ماعرف احتاريت فصل رجع مره ثانيه دك
يرن ويرن واني محتاره بين ارد او مارد كلت
خلي ارد يجوز بتول او تبارك رديت اجاني
صوت بنيه
ريتاج - مرحبا
نور - مراحب منو وياي
ريتاج - منو انتِ
نور - عفواً انتِ مخابره مو اني منو حضرتج
ريتاج - اني من طرف رعد انتِ شتكربيله
نور - مافهمت يعني شنو من طرفه قصدج أقاربه لو شنو بضبط
ريتاج - انتِ منو
نور - اني زوجته
هيج كلت وهاي سكتت
: الووو
ريتاج - وياج
نور - منو انتِ
ريتاج - وصليله سلامي وكليله ريتاج تسلم عليك
هو يعرف منو اني
نور - سدت الخط بوجهي بصراحه كَلبي نغزني
منو هاي وشعدها ويه رعد معقوله زميله ويا بالدوام اي ليش لا بس والله مارتحتلها مدري
ليش شنو سالفتي اليوم ما ارتاح لأحد
: رحت للمطبخ اسويلي جاي راسي مصدع
شوي واجه رعد جان بيده اكياس حطهم عل
طاوله واجه للمطبخ ظهري علي حضني وحط
راسه برقبتي كتله
: كواك الله حبيبي
رعد - يكوي حيلج بنت كَلبي
نور - اخذ نفس من رقبتي وايده على خصري
كال
رعد - مشتاكَلج مشتاكيتي
نور - بلا عيوني رعيد
من هيج كلت ضحك
رعد - ههههه بربج مو وقتها خلينه رومنسيين مدري شتسموها انتو
نور - عبالك انسى لا والقهر شكد خفيفه صدك جذب استغرب من هيج بنات وانت طبعاً مكيف
: واني داحجي دارني وجهه بوجهي نزل لمستواي يناظر بعيوني وشفتي حضن بيده وجهي وبهدوء دخل ايده بين خصل شعري ابتسم وكال
رعد - ههههه وربج الي تحبي واحبه كَلبي لغيرج مارجف ولا راح يرجف
نور - ابتسمت تلمست وجهه ورموشه بأطراف اصابعي كتله
: اريد هذا الكلب والعيون وحتى كلامك وحبك
بس الي ماحب المشاركه
ايده على خصري سحبني اله اكثره وكال
رعد - وربج بس الج
نور - ابتسمت تقدمت بسته ابتعدت ضحك
رعد - هههههه لا واضح مطورين
نور - اي ليش لا نطور مايصير
رعد - شلون مايصير هو شريد اني
نور - غمزلي مدري ليش استحيت شلون بسته
ماعرف يبوو غيرت الموضوع
: مسويه جاي مهيل تريد
رعد - اي ياريت
نور - ماشي
راح لصاله كعد عل تخم واني صبيت الچاي
ورحت كعدت يما
رعد - شنو اشتريتي من السوك
نور - فستان وكعب
رعد - وينه
نور - هسه اروح البسه وشوفه
رعد - ماشي
نور - رحت للغرفه طلعت الفستان لبسته
ويه الكعب فتحت شعري ورحت اشوفه
: ها شلونه بكل صراحه
رفع راسه باوع عليه من فوك ليجوه كال
رعد - كُلش حلو بس
نور - بس شنو
رعد - مخصر عليج مو كتلج يكون عريض
نور - رعد هو عبايه لو فستان لا تخبلني شلون
يعني عريض اصلا ماكو اعرض من هذا يكون بعلمك
رعد - وهيج يبقى خصرج بارز والناس تشوفه
نور - هاي شبيك صدك تحجي
رعد - اي
نور - ياربي صبرني رعد ترا خبلتني وياك
رعد - ليش خبلتج كتلج اشتري
فستان عريض كتلج لو لا
نور - ماكو اعرض منه شبيك
ضجت لصراحه كتله
: والله هذا الموجود تقبل تقبل ماتقبل اصلاً ماريد اروح من الأساس عرس لو فاتحه الله اكبر
رعد - بدينه بال عناد
نور - اني لو انتَ دشوف الفستان شكد مستور
ومع ذلك ماعاجبك شلبس لعد
رعد - عاجبني بس ماريد معالم جسمج اتبين
نور - اي خلص لعد ماروح
رعد - كافي عناد مالي شغل لبسي
نور - صار زحمه ولله يا الله راح يخبلني عبدك الهي
رعد - ههههههه لعد الله يساعدج
نور - اي وربي
تذكرت الابنيه الكالت سلمي علي كتله
: اكو وحده كالت وصلي سلامي الرعد
رعد - منو وشسمها
نور - ماذكر رنا لا فد اسم مشابه ها اي اي اسمها ريتاج يمكن هيج شي
: اني هيج كلت رفع راسه باوع عليه تغير ملامح
وجهه حسيت بي ضاج مدري توتر كال
رعد - وين شفتيها وشكالتلج
نور - اجاني اتصال عبالي تبارك او بتول كلت ارد وجان اسمع صوت بنيه كالت منو انتِ ومن هذا الحجي بعدين كالت وصلي سلامي الرعد كليله ريتاج تسلم عليك
: مسح وجهه بيده و يهز برجله كال
رعد - سهله اعرف شغلي وياج
نور - ليش شمسويه اني
رعد - مو انتِ بويه
نور - ردت اكله منو هاي وجان يجي اتصال رد
رعد - هلا يمه الحمد لله اي هسه رجعت
كلشي تمام اي القاعه كامله حتى الكيك كمل
لا ماعندي علم شوفي سيف هو يعرف اي اي
منو شوكت الصبح ميخالف لا مايحتاج بالبيت
ترتب نفسها لا يمه ماريد زوجتي تروح لصالون
اصلاً هيَ حلوه ما تحتاج اي لا يابه شنو
السالفة هيَ هم ماتريد لحظه
نور - جان يحجي ويه امه على موضوع الصالون
سئلني وامه عل خط كال
رعد - تردين تروحين لصالون ويه البنات ؟
نور - سكتت فهم جوابي بدون ماكول
رعد - ها يمه منين طلعتو بهاي السالفه مايحتاج
ماشي اي هو هيج ماشي يمه باجر الصبح
ان شاء الله ادللي حبيبه مع السلامة
نور - سد الخط باوع عليه
رعد - روحي بدلي وتعالي احجي وياج بموضوع
نور - ماشي
: رحت بدلت الفستان ورجعت لصاله اشرلي
اكعد يما رحت كعدت تقدم عيوني بعيني
وايده حاضنه وجهي كال
رعد - بنت كَلبي افهمي كلامي وركزي بي
نور - هزيت براسي بمعنى اي
رعد - هذا الوجه
نور - بده يتلمس وجهي وخدودي كال
رعد - هذا الوجه اريد جماله بس الي يكون
نور - عيونه بعيوني تلمس عيوني ورموشي كال
رعد - وهاي العيون ممنوع تشوف غير
نور - نزلت عيونه على شفتي تلمسها بيده وكال
رعد - هاي الشفه لا تبرزين جمالها لغيري
نور - عيوني بعيونه اراقب كل كلمه يكولها
بعد شعري نزل ايده على رقبتي وكال
رعد - وهاي الرقبه
نور - تقدم غمضت عيوني اخذ نفس منها
ابتعد كال
رعد - هاي الرقبه بس اني اشوفها واشمها
واتنفس منها ومن ريحتها
نور - رجع باوع على عيوني سحب ايدي يتلمس بأصابعي كال
رعد - وذني الاقلام اقلامي الي وبس
نور - باس ايدي باوع على شفتي تقدم غمضت عيوني باسني بهدوء وابتعد كال
رعد - لا تحركيني بنار الغيره اريدج بس الي فهميني من اكلج ماريد مكياج ماريد لبس ضيك ماريد شعرج يبين لناس لاني احبج واغار مو بيدي
غيرتج عليج تملك فهميها
نور - تلمست عيونه وحواجبه بأطراف اصابع ايدي تقدمت بست عيونه كتله
: حب وغار بس لا تخنكني اني هم احبك واغار عليك بس ماريد اخنكك
ابتعد اتلمس بوجهه وشواربه كتله
: رعد الغيره الزائده ادمر لا تخلي حبنه يكون ضيحه للغيره الزايده
- تلمست شفته تقدمت بسته ابتعدت كتله
: احبك وتحبني كلي ملكك وانت ملكي بس
حب نقي ابيض بدون تقييد زايد او غيره تخنك
مرات الغيره توصل مرحلة الشك بدون مانحس واذا وصلت هاي المرحله راح تكون افشل علاقه
رعد - وين الغلط اذا اريدج بس الي
نور - واني بس الك والله وبعمري مايصير لغيرك
صفن عليه حسيت يريد يكول شي بس ماحجه حضني واني كذلك كتله
: يعني باجر اروح لصالون لو لا
ابتعد باوع على شفتي كال
رعد - بشرط
نور - الي هوَ ؟
رعد - من نرجع اطلع قهري وغيرتي بهل الشفه
نور - ههههههه تدلل
بعمري ماشايفه واحد منحرف مثلك
رعد - هههه يعني اصدك ما عاجبج انحرافي
نور - ترا استحي كافي شبيك
رعد - لوتيه تستحي جدي هسه باسني
نور - هههه منك نتعلم مايصير
رعد - اله يصير ونص هو هذا المطلوب على كولتج
نور - ههههه خوش
رعد - بس شوفي احمر واخضر ماريد شي بسيط
جداً هيج ولا يبين
نور - هو اني ماحب الاحمر والاخضر لا تخاف
رعد - ماشي هسه ركان وعُمر يجون
نور - وين
رعد - هنا عدنا شغل لازم نكمله قبل لا التحق
نور - ماشي حبيبي شتحبون احضرلكم
رعد - براحتج بويه انتِ حضري كلشي بالمطبخ
واني اقدمه الهم
نور - ماشي
رعد - بس جيبي الابتوب بالغرفه مابيه حيل اكوم
تعبت اليوم
نور - ادلل حبيبي
رحت للغرفه جبتله الابتوب بده يشتغل علي عفته
رحت للمطبخ سويت جاي وقهوه جان عدنا بسكت وكيك رتبتهم بالماعون ويه الفناجين خلصت كتله
حبيبي حضرتلك الضيافه عل كاونتر بس صب الجاي و القهوه وقدمه الهم ماشي
رعد - ماشي بويه عاشت ايدج
نور - ادلل ماتتعشى
رعد - لا ماشتهي انتِ تعشي
نور - اني هم ماشتهي هسه
دك الجرس
رعد - هاي هما
نور - كام فتح الباب عفتهم ورحت للغرفه
اتمددت على السرير سحبت الموبايل كعدت اقلب بي شوي ومليت عفته كلت شوي انام وجان يدك الموبايل اشوف ام رعد رديت عليها
: هلا خاله
جوان - هلا بنيتي يمه كلت لزوجج علمود الصالون
ماعرف راح يقبل لو لا بس اذا ماقبل ارجع اكله
نور - لا خاله قبل
جوان - اي الحمد لله مو كتلج يقبل
نور - اي خاله
جوان - ديلا يمه اخذي راحتج اشوفكم باجر
ان شاءالله
نور - ان شاءالله حبيبتي
جوان - مع السلامة يمه
نور - مع السلامة يالغاليه
سدت الخط اباوع عل ساعه بال 10
وصوت حجي وضحك رعد واصدقائه واصل ذاك الصوب حاولت انام بس ماكدرت اوووف صدك ضوجه شنو السالفه
ضجت كلت اكوم امكيج شوي الهي نفسي كمت
مكيجت نفسي اجي واروح ماكو شي اسوي
عندنه مثل تخم صغير لنفرين بالغرفه مثل
الديكور مسوي اتمددت هناك سحبت الموبايل اقلب بي وماحس غير نمت
شوي وحسيت بي شالني بهدوء
: رعد
رعد - عيونه
نور - حطني عل سرير مسكت ايده كتله بنعس
: وين رايح
رعد - يمج عروك كَلبي
نور - اجه تمدد يمي سحبني لحضنه كال
رعد - ماتعشيتي ؟
نور - لا و انت
رعد - ماشتهي
نور - احجي بنعس
: همم اي اني هم
بأس راسي وكال
رعد - فديت الهمم من حلكج
نور - ابتسمت حضنه بعض ونمنه
:صار الصبح كمت اشوفه ماكو وين راح
صحصحت شوي ورحت لصاله جان يحجي
اتصال ماحس عليه
رعد - اي شوف شغلك ويه هاي البلوه خلصني
منها ماوصيك اااخ اني اعرف شغلي وياها سهل انت شوف شغلك تمام ماشي يلا مع السلامه
نور - صباح الخير
التفت عليه ابتسم
رعد - صباح الور والنور يانور كَلبي
: يلا بويه حضري الريوك اروح اسبح نتريك
ونروح ماشي
نور - تمام حبيبي
راح يسبح واني ورحت للمطبخ حضرت الريوك
كملت رجعت عل غرفه لبست عبايه خليجيه على ملابس البيت مايبين لفيت الحجاب رحت للمطبخ وهو طلع من الحمام مزين لحيته ومبدل كتله
: هيج تروح ؟
رعد - لا بويه بعدين اروح للكوفير ارتب نفسي والبدله الرسميه هناك ابيتنه البسها واطلع شلون شاب يطك بالكاع كلها تركض وراي هههههه
نور - اي عايزها وتكمل
كلت بكَلبي اولهم امل عيني عشتو عينها
رعد - هههه غيرتج احبها صدكي
نور - رعد هاي البنيه امل عيني ماحبيتها فدوه
اروحلك لا تاخذ وتنطي وياها بالحجي
رعد - هههههه ماشي
نور - كعدنه اتريكنه خلصنه كال
رعد - اتاخرنه يلا بويه
نور - اي هسه بس ارتب المطبخ
رعد - مو وقته اتاخرنه من نرجع
نور - ماشي
رحت اخذت الفستان و الموبايل وطلعنه
صعدنه بالسياره اول ما شغلها كال
رعد - حجاب مو ؟
نور - منو
رعد - انتِ
نور - اي اكيد
رعد - جيد ومثل ماكلت اخضر واحمر ماريد بالوجه خوش
نور - بدون ماتكول
اجاه اتصال رد
رعد - هلا اي شنو
لزكه ماخلص بسرعه اعرف
بسيطه مو بكيفها غصباً عليها اي
مشكور تعبتك اني اشوف شغلي وياها
ماشي مع السلامة
نور - ضاج حسيت من خلال كلامه جان
يقصد بنيه او مره كتله
: صاير شي حبيبي
رعد - لا تشغلين بالج بويه ماكو شي
نور - ماشي
مسافة الطريق وصلنه لبيتهم دخل السياره بالحوش نزلنه هوس اجه اخو
سيف - ها خويه وينك تعال شوف المصيبه
رعد - شكو
نور - ضل يباوع استغرب من شاف نزلنه
سوا رعد كله
رعد - جنت يم ركان كال شوي واجي
سيف - ها مو دكول شلونج خويه
نور - الحمد لله
سيف - شلونه كَلبج هسه
نور - الحمد لله
سيف - دومج
نور - تسلم
: دخلنه للبيت جتي ام رعد
جوان - هلا يمه شلونكم
رعد - هلا يالغاليه
جوان - يمه نور شلونج
نور - هلا خاله بخير وانتِ
جوان - نحمد الله ونشكره روحي فوك يمه
البنات شوي ويروحون لصالون وانت يمه تعال
شوف القائمه مال بوفيه
رعد - ماشي
نور غرفة البنات اول غرفه على يمينج
نور - اي اعرف
رعد - ماشي بويه
نور - راحو اني صعدت فوك الباب جان مفتوح
شافتني بتول جتي حضنتني
بتول - يمه ياهلا بضلعتي نورتي
نور - هلا بيج ياعمري منور بيكم
تبارك - هلا نويره حبيبتي شلونج
نور - هلا ياكَلبي بخير الحمد لله
تبارك - تعالي حبيبتي كعدي ولو الغرفه هوسه
عذرينه
نور - لا حبيبتي عادي معذورين
تبارك - نويره شوفي هاي الصوره
المكياج هيج حلو مو
نور - اي كُلش حلو
بتول - ام النور محتاجتج بشغله
نور - شنو حبيبتي
بتول - شوفي اني مو محجبه مضبوطه يعني
مرات اتحجب ومرات لا ومرات نص شعري يطلع من الحجاب يعني حجاب عل نص تبارك تكول مايصير شتكولين انتِ
تبارك - اي مايصير والله لو تحجبين ابدي لو لا تتحجبين
نور - صح كلام تبارك
بتول - ليش شكو بيها يعني اذا مرات اتحجب ومرات لا
نور - شوفي حبيبتي الحجاب شي عظيم زين ليش عظيم لان انذكر في كتاب عظيم الي هو القرآن
الكريم وامرنه الله بالحجاب وشنو كال سبحانه كال
( وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ ) نص صريح
العباره
بتول - والله مافهمت كال خمرهن مو حجابهن
يقصد الخمار مو او النقاب مو ؟
نور - لا حبيبتي مايقصد الخمار شوفي في الآية توجيه من الله للنساء المؤمنات في كيفية
التزامهن بالحياء والعفة
واستخدام كلمة الخُمُر في الآية يعني
غطاء الرأس وهو جزء من الحجاب
بتول - ها
نور - اي و كلمة على جيوبهن يعني الصدر
المقصود المرأة يجب أن تغطي شعرها وصدرها والرقبه بهذا الخمار الي هو الحجاب
بتول - اي هسه فهمت
تبارك - عاشت ايدج والله حلو اني المحجبه
ماجنت اعرف تفسير الآية يا سورة هذي
نور - سورة النور
بتول - على اسمج يمه فديتج اني
نور - حبيبتي
بتول - زين نويره يعني اذا ماالتزم بالحاجب
هم يكون الي ذنب او غضب من الله سبحانه
نور - والله حبيبتي بالنهايه العلم عند الله بس من نجي نفسر الكلام في حياتنه يعني الله امرج بي
وانتِ عصيتي يعني ايضاً مو شي عادي
بتول - اي والله صح كلامج بس ااخ من ابويه
لح اله مختلط لو ما مختلط جان لبسنه براحتنا
نور - هههه يلا عل مره الجايه
تبارك - على عرس رعيد ان شاءالله
اكلج نور انتِ محجبه صح دائما اشوفج متحجبه
نور - اي حبيبتي محجبه
تبارك - اني هم الحمد لله
نور - الحمد لله
بتول - ان شاءالله اني هم عن قريب
كلام نور اثر بيه
تبارك - شكد لوتيه صار سنتين احجي وياج
بكلمتين من نور اثر بيج
بتول - دشوفي شكد حلو تشرح الآية والمعاني
مو مثلج كل شوي تحجبي مايصير غلط مدري شنو مو مثل اسلوب نور فددديت نويره وين اكو منها
تبارك - هيج يعني ميخالف صوجي ادوخ راسي بيج
نور - ههههه ياعمري فدوه لعيونج الحلوه
بتول - غاليه فديت
تبو راح اخذ الفستان مالي وانزل ماخلصتي
تبارك - بلا نزلو هسه اجي
بتول - ماشي يلا نويره ننزل
نور - اي يلا
: نزلنه جوه رعد جان بيده موبايل مدري
يحجي ويه منو واخوانه مخبوصين واحد جاي واحد رايح وجان تدخل خالتهم ويه بتها
بتول - لا هلا ولا مرحبا
نور - التفتت اول ماشفت بتها حسيت بجالي بالمعده من القهر صدك مالي خلك حركاتها لابسه جينز لزك عل جسم نشاز ويه تيشيرت قصير بزور مغطي بطنها وتتموع بالحجي ربي صبرني
رنكين - يلا عيوني شوكت نروح مو تأخرنه
بتول - ليش انتِ هم تجين ويانه
رنكين - اي
بتول - لا بالله فلحنه
اكلج يمه منو يودينه
جوان - تبارك خلي تاخذ سيارة سيف
تقبل يمه تاخذ سيارتك
سيف - اي عادي
نور - عيوني على رعد مدري ليش مامرتاحه
احس صاير شي يحجي بالموبايل بانفعال
الله يستر نزلت تبارك
تبارك - يلا نروح خلصت
جوان - يمه اخذيهم وروحي بسيارة سيف
تبارك - ماشي
سيف - بس شوفي دير بالج عل سياره
ولا تسوقين سريع
تبارك - اكيد خويه لا توصي حريص
يلا بنات امشو
نور - بتول بس اجيب الفستان مالي بسيارة رعد
بتول - فستانج شجابه بسيارة رعد ؟
نور - اني جيت ويا رعد ركان عنده شغل
بتول - صدك اكلج ركان شلون
نور - مابي شي زين ، يلا اروح هسه اجي
بتول - ماشي داده
نور - عفتهم ورحت لسيارته طلعت الفستان سديت
الباب انداريت اشوف عم رعد ورايه توترت عاكر حاجبه ضل يباوع عليه كال
عمران - منو انتِ
نور - كلت بكَلبي معقوله نساني مو هو الكال ماريدها تبقى بالبيت
عمران - شنو خرسه ماتحجين
نور - توترت ماعرف شنو ارد كتله
: اني
بعدني مامكمله الحجي اجه رعد ارتاحيت اول ماشفته كال
رعد - ها بويه شدسوين هنا
نور - كتله
:اخذت الفستان
رد عمه
عمران - اها يعني من طرف ابو النسوان
رعد - احترم نفسك ولا تجاوز
عمران - ليش مجذب وبعدين منو هاي شنو
بيتي فندق ياهل تعرفه تجيبه
رعد - بيتك ؟ ههههه يلا احلم ميخالف
نور - رجع باوع عليه كال
عمران - منو انتِ
نور - بعدني ماحاجيه ردت علي بتول
بتول - بويه اقارب ام ركان
يلا نور حبيبتي تعالي اتاخرنه
نور - باوعت على رعد اشر بعيونه بمعنى روحي
عفتهم ورحت ام رعد كدام كعدت واحنا وره
وتبارك تسوق شغلو اغاني وضحك وسوالف
وهاي رنكين مدري شسمها تركص ذاك الركص
بالسياره صدك خفيفه ماعرف شنو من بنيه استغرب منها
وصلنه لصالون حاجزين جناح Vipبس هما بي كل وحده منه راحت جوه ايد كوفيره
بتول - داده شغلو اغنيه شي خلونه نشحن نفسنه
من هسه
رنكين - اي صدك د شغلو اغاني
الكوفيره - ماشي
تبارك - يمه جبتي قفطانج
جوان - اي بنيتي
تبارك - يمه طلبي منهم مكياج خفيف يرهم ويه لون القفطان
جوان - اي
تبارك - بتوله لوله
بتول - عيونها
تبارك - بعد اختج
مكياج خفيف لا تثكلين ماحلو
بتول - لا خفيف بس الحمره شوي اغمقه
رنكين - يمعود اذا مو حُمره حَمره مايتسمى
مكياج
بتول - كلمن وذوقه اصلاً الحُمره الحَمره احسها قديمه مو نور
نور - عن نفسي ماحبها بوجهة نظري الألوان
البناتيه احلى وانزك
تبارك - اتفق
رنكين - دسكتي منيلج ذوق
نور - على منو قصدج
رنكين - عليج ذوقج سزز
نور - انصدمت من كلامها ردت عليها بتول
بتول - والله اذا اكو واحد ذوقه سزز هو انتِ
رنكين - لا تصيرين لوكيه عيوني
بتول - لا داده ليش اتلوك
نور - بس لحظه بتول انتِ مدري شسمج
منو انتِ حتى تكولين هيج اعرفج تعرفيني ؟
رنكين - رنكين اسمي وشدعوه عيوني هيَ حجايه
نور - لا مو حجايه اني ما ضاربه ثريد ابيتج
شهل ميانه الزايده
بتول - هههههه
رنكين - وسسم على شنو تضحكين
بتول - يااا بسم الله عليه اضحك على كلام نويره
شكد حلو فديت ههههه
نور - باوعت عليه ضاجت كامت راحت يم
ام رعد وبتول خربانه من الضحك
بتول - وربي مو هينه هههههههه
نور - دوم الضحكه حبيبتي بس
والله يابتول احترم الكل واعامل الناس
بأصلي مو اصلهم بس اذا اسكت لغير مره
راح تتماده اكثر ومع ذلك رديت باحترام
بتول - كفو منج داده اساس الاحترام انتِ حبيبتي لا تهتمين هيَ هيج طبعها ماتعرف تحجي
نور - الله يهديها
بتول - امين
: سحبت الموبايل دخلت على حساب ركان جان
نشط قبل نصف ساعة شو ماراسلني اليوم
الفاهي اني هم ماراسلك دروح .
تبارك - اكلج يمه
جوان - كولي
تبارك - وين العروس
جوان - شوي وتجي هسه خابرني حيدر
بطريق بعدهم
تبارك - اي زين اذا هيج
_
نور - شوي وجتي بنيه تمكيجني
: حبيبتي بس العيون سحبي بال ايلاينر
سحبه بسيطه والمكياج كله يكون ترابي خفيف جداً ونازك ماشي
- تمام عيني ادللي
نور - تسلمين
بدت تمكيجني شوي وجتي وحده طويله حنطاويه
ملامحها نازكه ما شاءالله تخبل شعرها طويل كامت خالتي تسلم عليها والبنات هلهلن عرفت
هاي العروسه
جوان - يمه هلا بوردة ابني
حور - انتِ الورده خاله
بتول - يابه نورت عروستنه كُلللللوش
تبارك - ياهلا بعروستنه الحلوه
حور - هلا بيكم حبيبتي
جوان - يلا يمه كعدي خلي يجهزوج ليش
اتاخرتو
حور - حيدر اتأخر عليه
جوان - يلا ماصار شي
عيوني بنات تعالن جهزن العروس
نور - جتي كعدت قريب مني ابتسمت رديت الابتسامة كالت ام رعد
جوان - يمه هاي نور اقاربنه وان شاءالله تصير جنتنه
نور - انصدمت من هيج كالت التفتو البنات استغربو من كلام امهم
حور - صدك حلوه خاله لا تضيعوها من ايدكم
جوان - ههههههه اي اكيد
نور - بلعت ريكي توترت ماتوقعت هيج تحجي
كامت بنت خالتهم كالت
رنكين - خاله فدوه اروحلج الف وحده تتمنى
ولدج
جوان - اي يمه بس وحده عن وحده تفرق
والله لو الف الدنيا كلها ما الكه احسن من نويره
بتول - هلااااا اي وربي اتفق
تبارك - صح كلامج
بتول - يمه اخذيها لرعيد وربي حلوين سوا هههه
نور - اول ماهيج كالت مدري شصار بيه
توتر انعكد لساني كلشي ماحجيت كالت امها
جوان - ههههههه من اروح فدوه لعقل بنيتي
رنكين - يااا خاله شبيج اكيد تشاقون هاي ورعد
شلون رهمتوها لا عيوني رعيد يستاهل وحده مثله
شجابها على رعيد
بتول - لا عيوني ماكو احسن منها ونياله رعيد
اذا قبلت بي
نور - بزور كدرت اسيطر على ضحكتي
عزه العزاني ذوله ديحجون واني التوتر
اكلني وانوب بتول خوش ترد على بنت
خالتهم شلون موقف محرج ياربي
جوان - كافي حجي يلا كملو شغلكم اشوف
الولد وين وصلو
بتول - اي شوفي
نور - واخيراً غيرو الموضوع وكامو يحجون
ويه خطيبة حيدر مر تقريبا نصف ساعه وكالت
ام الصالون
- يلا عيوني خلصت شوفي نفسج وان شاءالله يعجبج المكياج حسب طلبج
نور - جابتلي المرايا انصدمت ماتوقعت
هيج اطلع كمت اشوف نفسي بالمرايه الجبيره
: ها عيوني عجبج
نور - يخبل يجنن احلى من الطلبته صدك
عاشت ايدكم
التفتت على بتول كتلها
توله شوفي حلو
بتول - يملخ ما شاءالله تخبلييين
تبارك - صدك حلوه ونازكه ما شاءالله
نور - تسلمون
اروح ابدل اني علمود ترتب الحجاب
بتول - تمام داده
نور - عفتهم ورحت للغرفه مال تبديل لبست
الفستان فصاله جان شوي مخصر من يم الخصر وجوه عريض ستان نازل موزع علي كرستال حجم
صغار لون ابيض ، كُلش حلو بدلت وطلعت جتي البنيه ترتبلي الحجاب
بتول - اكلكم اني اروح اللبس الفستان شوفو
اللوك النهائي بس لا تتخبلون هههه
نور - هههه كلج جمال من الجدم (القدم) لراس
بتول - فدوه اروحلج واروح لكلامج العسل مثلج
نور - حبيبتي
بتول - اروح ابدل واجي
نور - تمام حبي
بتول - رحت ابدل لبست فستان لون احمر
ستان ساده فصاله من فوك ضيك شوي ويجي
عرضه من الخصر لجدم عريض ومن يم الصدر مسحوب كله صاير خطوط طبقات القماش
كله مسحوب يم ورده جبيره كرستال عل خصر كُلش حلو ،
والمكياج ترابي يعني مو كُلش خفيف وسط والتسريحه شوي مروفع من فوك والجوه
مفتوح شعري مرتبي وتاج بسيط ونازك
يممه فديتني صدك طالعه حلوووه ما شاءالله
عليه لا احسد نفسي بنفسي
_
نور- كملت البنيه الحجاب
- كمل شوفي اذا ماعجبج نلفه بطريقه ثانيه
نور - كمت شفته طالع كُلش حلو ومرتب ويه الفستان والمكياج من صدك يخبل ما شاءالله
: عاشت ايدج حبيبتي كُلش حلو
- اهم شي عجبج عيوني
نور - اي كُلش
التفتت على ام رعد جانت وحدها البنات راحو يبدلون كملو مكياج بس هيَ باقيه تمكيجها ام الصالون كتلها
:خاله خلصت شوفي حلو
رفعت راسها ابتسمت
جوان - بسم الله ماشاء الله تخبلين يمه تبرقين برق فدوه لهل عيون الله يساعد الي ابالي هههه
نور - ههههه حبيبتي تسلمين
جوان - يمه خفي على ابني خطيه شلون يحتمل
كل هذا الجمال
نور - هههه خجلتيني
جوان - بنيتي الحلوه جعل محد غيرج
يخجل يايمه
نور - حبيبتي ياخاله تسلمين
رجعت التفتت عل مرايه صدك طالعه حلوه
شوي وجتي بتول وتبارك تبارك جانت محجبه
بس بتول لا جانت مسويه تسريحه كُلش حلوه
بتول - ها احجو بضميركم اخبل مو
نور - ما شاءالله صدك تخبلين
بتول - ياعمري اصلا الجمال يمج ويكطع داده
تبارك - واني شلوني
نور - تجننين تخبلين ما شاءالله
تبارك - ياعمري فدوه لعيونج والله انتِ التخبلين
بتول - يمه شلونه حلوين
جوان - لحظه عمت عيني بالمسكاره
بتول - هههه داده اهتمو بيها هاي ام العريس
ام الصالون - ادللو من عيوني
بتول - سالمات عيونج
نور - وهما يحجون وجان تجي العروس
بصراحه صدك حلوه وتسريحتها نازكه كُلش
فستانها يجنن ما شاءالله
بتول - صلو على محمد وآل محمد
يمممه فدووه عروستنه تخبل ما شاءالله
تبارك - حبيبتي شنو هذا الجمال
حور - عمري جمال عيونكم
بتول - عمي نيال اخوي اليوم يومه هههه
تبارك - دنجبي خطوبه مو عرس
بتول - باعو هاي ولج هيَ المقبلات بالخطوبه
تصير شكد فطيره هههههه
تبارك - وانتِ شمعرفج ام لسان الله يساعد
الياخذج متأكد هو راح يستحي مو انتِ
بتول - هههههههه فديتني نياله عليه من اروحله
فدوه وين ماجان
تبارك - ههههه من طاح حظج
نور - هما يحجون واني اضحك على كلامهم
_
جوان - خلصت خلي اشوف بناتي
يمه فدوه ما شاءالله تبارك الرحمن تخبلون الله يحفظكم وحده احلى من الثانيه
وانتِ يمه حور شنو هذا الجمال
خفي على ابني خطيه
حور - ههههه جمال عيونج خاله تسلمين
جوان - الله يحفظكم كلكم يايمه
تبارك - يمه وين رنكين شو ماكو
بتول - راحت للبيت ما جايبه الفستان وياها
وكالت بالبيت ابدل
بتول - خفه وراحه بعد احسن
تبارك - زين يلا نروح اذا كملتو
بتول - صبرو اريد اسوي بروفه
عيوني ام الصالون ماتشغلينه اغاني شوي
نذب لحم ( نرقص ) غير عرس الغالي
- ادللي
نور - ام الصالون شغلت اغاني رقص ردح
وبتول وتبارك والعروسة يركصون واني اصفك
سحبتني بتول
بتول - يلا تعالي هزي ويانه كتف بال كتف هيج
نور - هههه عليج سوالف والله
بتول - داده نياله الي ياخذني مدري شمسوي بحياته وربه رزقه توله لوله
نور - ههههه صح كلامج
بتول - هههههه حور عيوني هزي الكتف هيج
حور - هههه والله بتول مانعرف مثلج نركص
بتول - تعلمو هيج شوفي
نور - ههههه تعلم العروس واني اضحك
عليها صدك حلو تركص شوي وتبارك كالت
تبارك - ترا اتاخرنه يلا نرجع
جوان - اي يمه يلا
تبارك - خابري حيدر خلي هو ياخذ حور
جوان - هسه اخابره
_
نور - مر نصف ساعه واجه حيدر اخذ خطيبته
واحنا هم طلعنه ام رعد تشكرت من ام الصالون ودفعت الحساب و طلعنه صعدنه بالسياره مسافة الطريق كله بتول ترقص وتغني وتبارك تغني ويه كلمات الاغنيه وام رعد تصفك فرحانين من صدك اجوائهم حلوه الله يحفظهم
وصلنه لبيتهم اول ما دخلنه للبيت اشوف اخوان رعد ما شاءالله واحد احلى من الثاني كلهم لابسين بدله رسميه وقصة شعر كُلش حلو مرتبين نفسهم التفتت عيوني تفتر اريد اشوف رعد وين
مو وياهم مدري وينه
_
بتول - رجعنه صعدت فوك لغرفتي اجيب طقم الاكسسوارات الي راح البسه اليوم لبستهم وطلعت
اول مانزلت اشوف كلهم واكفين بصاله وياهم
ركان نزلت بهدوء التفت عليه ضل يباوع عليه
واني كذلك شمسوي بنفسه طالع يخبل الفاهي
رايح عل كوفيرامبين من ترتيب شعره ابتسمتله
لا ارادين وهو بعده صافن عليه
توترت اخذت نفس عميق
شوي رفعت الفستان لان طويل ونزلت بهدوء
وهو بعد صافن حتى وترني شافني بابا
عمران - ولكم وردة بيتي شمسويه بنفسها
بتول - ابتسمت رحت يما باسني من راسي كتله
:ها بابا يعني حلوه لو لا
عمران - احلى كلهم بويه
بتول - حبيبي تسلم
التفتت اشوف اخواني عزه واحد احلى من الثاني
:لحظه لحظه هاي شمسوين بنفسكم من اروح
فدوه لطولكم
احمد - نملخ مو
سيف - لا انجنن
بتول - هههه الا اطكون بالكاع من الجمال
ما شاءالله
سيف - اي بلاخص اني شوفو شلون مرتب اللحيه
فديتني وربي خوش شاب اني
احمد - ههههه احلى منك
بتول - هههههه شهل غرور العندكم
اكلكم وين رعيد
احمد - هسه طلع
كال عندي شغله اكمله واجي ماطول
بتول - خوش
التفتت على ركان بعده يباوع عليه انداريت
ماريده يحس اني هم اباوع علي بس طالع
يخبل الفاهي هههه
_
عمران - خابرو ذاك شوفو وين صار اتاخرنه
سيف - هسه اخابره
عمران - وانت حيدر روح اخذ خطيبتك وروحو للقاعه قبلنه بس سوق على كيفك
حيدر - ماشي بويه
_
نور - هما مخبوصين واني طلعت برا بالحوش يم
تيلا جانت تحضر الغراض صدفه طلع ركان
سلمت علي
: شلونك خويه شخبارك
ركان - ياهلا بعد اخوج بخير دامج بخير
نور - دومك وينها الحجيه
ركان - هسه اروح اخذه ونروح سوا للقاعه
نور - اها اي نصيت صوتي كتله
خويه رعد وين اخابره ماكو مغلق
ركان - بعد اخوج هسه يجي لا يضل بالج
اتوقع خلص شحن موبايله تعالي ويانه اني والحجيه نروح سوا
نور - بس شلون اروح غير اكله
ركان - خويه هذا طلب رعد قبل شوي خابر
وكلي اخذها وياكم
نور - اذا هيج تمام
ركان - يلا خويه تعالي
نور - ماشي
رحت ويا لبيتهم مو كُلش بعيد قريب على
بيت اهل رعد وصلنه جانت الحجيه يم الباب
واكفه نزلت سلمت عليها شكد مشتاقتلها
ام ركان - يمه فدوه لهل جمال شلونج
يابعد كَلبي وطوايفه
نور - الحمد لله حجيه حيل مشتاقتلج شلونج انتِ
ام ركان - يابعد عمري بخير نحمد الله ونشكره
وين زوجج الارعن صار شكد مامبين
نور - هههه والله ماعرف لحد هسه ماشايفته
ركان جان السياره صاح
ركان - يمعود اتاخرنه يلا صعدو
ام ركان - انجب هسه نصعد
ركان - رحمه الله والديج يمه انجب ليش لا
نور - ههههه يلا حجيه مسكي ايدي
ام ركان - اي يمه يلا
نور - مسكت ايدي وصعدنه بالسياره هيَ
كعدت كدام واني وره شغل السياره وتوجهنه
للقاعه طول الطريق الحجيه تسئلني شلونه
رعد وياج شلونكم ومن هذا الحجي مر الوقت
وصلنه صفه السياره ركان نزلنه اني والحجيه رفعت راسي اباوع شلون قاعه تخبل من برا لعد شلونها من جوه دخلنه صفنت شلون قاعه ملكيه تبرق برق
من الاضويه والثريات والديكور الحلو والورود الموزعه عل طاولات تخبل ومقدمين الطعام تارسين القاعه وبال زاويه حاطين بوفيه مفتوح
مال اكل واحد ثاني مال حلويات صدك خطوبه عبالك عرس ملكي كُلش حلو
و مزدحم هوسه ناس هواي جايين وكلها امبين ناس واصله من ملابسهم وكشختهم كعدنه اني والحجيه على طاوله التفتت ماكو رعد اوف ضجت وينه سحبت الموبايل خابرته ماكو مغلق وحتى اهله ماكو مدري وينهم محد امبين
ام ركان - يمه شبيج
نور - مابيه شي حجيه بس
رعد مدري وينه ضل بالي
ام ركان - كولي يا الله بنيتي قابل وينه هسه يجي
نور - اي ان شاءالله
شغلون أغاني هادئه بس محد يركص كلمن كاعد عل طاوله ويحجون شويه واجوي بتول وتبارك وامهم وخالتهم وبنت خالتهم عزه شلابسه
لابسه فستان ضيك ضيك وايدها كله امبين وشوي من صدرها اني من يمي استحيت شنو من بنيه
هاي صخام الصخمني
: اجه ابو بتول يسلم عل ضيوف شوي وجان
يشغلون اغنيه مابعرف مال يارا فتحو منظمين
القاعه الباب شغلو الشموع النا.ريه ويه دخان
ارضي
دخلو حيدر و حور بهدوء يمشون وبتول والبنات يصوروهم كمنا كلنه الناس مندمجه بالحفله واني عيوني تفتر ادور على نظرها اااخ يارعد وين صرت
دخلو العرسان وبنص الطريق احمد كال
احمد - يابه احنا مو مال هيج اغاني ساعه
يلا يمشون شغلو اغاني ردح نذب لحم
سيف - اي غيروها
_
نور - غيرو الاغنيه التفتت وجان يدخل رعد
صفنت علي شكد شايفته حلو من قبل بس
اليوم غيرر صدك طالع يخبل حبيبي انتبهلي
اشرلي اطلع برا كلت للحجيه
: حجيه هسه اجي
ام ركان - ماشي يمه
نور - طلع برا القاعه واني شوي وطلعت ورا
اباوع يمين يسار ماكو وين راح
ماحس غير سحبني من ايدي
على جهه اطراف القاعه مابيها ضوه هواي ظهري عل جدار وهو مقابيلي خله ايده على خصير وسحبني اله بلعت ريكي كتله
: رعد وخر لا يشوفنه احد
رعد - خلي يشوفون رجال ومرته قابل شمسوين
ولج نور شمسوي بنفسج اشتعلو اهلج
نور - ابتسمت كتله
: وانت طالع تخبل
رعد - ولج بويه رحمي بحالي
نور - هههه ليش شمسويه
رعد - تعالي نرجع لشقه
نور - يااا تخبلت
رعد - اي بحبج
نور - عيب لخاطر اخوك شبيك
رعد - اشتعلو اهلج عود كتلج لا تكثرين مكياج
نور - هههه والله خفيف شبيك
رعد - هذا الخفيف وهيج بارز جمالج
الحَمره خففيها لا اخففها بطريقتي
نور - يااا اصلاً ولا تبين
:التفت على يمينه ويساره شاف ماكو واحد
تقدم باسني ابتعد
رعد - من نرجع اعرف شغلي وياج هسه
روحي قبل لا يحسون
نور - ههههه
رعد - لا تضحكين
نور - ههههه ادلل
رعد - اشتعلو اهلج
نور - هههههه اذا على كلامك منال هسه
صايره فحم يلا لا اطول
رعد - بس ادخن واجي روحي انتِ
نور - ماشي
تقدمت بسته بخده وابتعدت
رعد - ستري عليه ترا والله هسه نرجع لشقه
امشي روحي اشتعلو اهلج امشي
نور - هههههه خلص رايحه
عفته اضحك على كلامه مخبل يسويها
رجعت بعدهم يركصون والكل مندمج
رحت كعدت يم الحجيه
ام ركان - ها يمه رعد ما خابرج
نور - حجيه برا هسه يجي
ام ركان - اكول فرحانه ثاري شفتي حبيب الكلب
نور - ههههه اي والله
ام ركان - الله يحفظكم بنيتي
نور - تسلمين حبيبه
شوي واجه رعد شغلو اغنيه نسمع احلى هلهوله
بدو يركصون ويغنون ويه الاغنيه
بتول - نسمع احلى هلهوله
تبارك - كللللوش وللغالي الحلو طوله
احمد - الف مبروك كولوله
بتول - الف مبروك يالغالي
رعد - والعبلك جوله ماقصر
احمد - اله اركصلك ركص يعور
سيف - رقص عماره اركصلك حالف
بتول - يالكاعد بالكوشه منور
اخونه خوش اخو يستاهل الهوسه كُلللللوش
:التفتت اشوف ركان عيونه عليه ماهتميت
رحت كومت امي وابوي اجوي اجه رعد مسك
ايد امي ويركص وياها
احمد - سمعوني بهاي سمعوني يكول
احنا الطكينه اصبع حتى الحاكم وكفناه
رعد - واحنا الطكينه اصبع حتى الحاكم وكفناه
سيف - احنا النخبطها ونشرب صافيه
واحمد - واحنا النخبطها ونشرب صافيها
بتول - احمد شيلو حيدر
تبارك - اي صدك شيلو
احمد - اي هسه
بتول - احمد شاله وكلنا غنينه ويه الاغنيه
اخونه فدوه رحنالك فرحتك هيَ فرحتنه
جوان - كُللللوش
بتول - ركص عماره اركصلك حالف
مسكت ايد امي وكمنه نركص سوا احلى يوم بحياتنه جان لان هاي اول مره ننجمع كلنا كعائله بدون مشاكل ذبينه لحم هلكنه وركان ويانه عل خط مرات جان يجي كدامي جنا نركص سوا
وكل ما التفت عيونه عليه بس ماحجه شي
لا كال حلو مصخمه من اكول فاهي محد يصدك
_
نور - جنت كاعده يم الحجيه اباوع عليهم
شلون حلون يركصون كالت الحجيه
ام ركان - شوفي زوجج شلون يردح
ماتروحين ويا
نور - هههه خبيث مايقبل
ام ركان - يااا ليش
نور - يغار منبهني ماكوم من مكاني
الله يصبرتي حجيه
ام ركان - اي والله عمي الله يصبرج
نور - ههههه
:جانت حفله حلوه لصراحه من تنظيم من جمال من ترتيب كل شي حلو ومرتب جان لبسو المحابس وركصو سلو العرسان وقطعو كيك وفتحو البوفيه لضيوف اكلو وكملو ركص كوكتيل شغلو اغاني اجنبي وسوري وخليجي
منا لساعه بال10 خلصت الحفله بدت الناس
تروح اجه رعد سلم عل حجيه
رعد - حجيه شلونج
ام ركان - انجب ارعن هسه تجي تسلم
رعد - هههههه حقج التهيت وربي اخبارج يالغاليه
نور - باوعت علي صفح صغرت عيونها كلتله
ام ركان - ليش ماخليت البنيه تركص وياكم
يا ابو الغيره
رعد - هههههه حجيه حقي اغار عليها
ام ركان - انجب مو هيج غيره البنيه
ما كامت من مكانها شكو جايه لعد
نور - كوه كدرت اسيطر على ضحكتي
هههه رد عليها
رعد - تمونينن يالغاليه حقج
ام ركان - حقها هيَ مو اني اسمع لك رعيد
هاي بنتي خاف عبالك ماعدها احد اكسر ضلوعك
اذا تضوجها بعدك ماتعرف الحجيه شتسوي
رعد - ههههه ونعم صدكي حاطها بين عيوني
ام ركان - اي عفيه هيج كون
نور - اضحك على كلامهم اجه كعد يم الحجيه
باوعلي غمزلي ابتسمت وجان تجي بنت خالته
تكعد يمنا لا حول ولا قوة الا بالله شتريد هاي
رنكين - عيوني رعيد طالع تخبل اليوم
رعد - شكراً
رنكين - ماكلت اني شلوني اليوم
نور - باوع عليه خزرته ضحك كال
رعد - ماعرف كلكم حلوين جنتو
نور - صغرت عيوني يباوع عليه ويضحك وجان
تخلي ايدها على كتفه تخبلت
رنكين - هاي ليش البدله مالتك تراب
نور - فتحت عيوني من الصدمه ماتحملت كتلها
بعصبيه
: شدتسووين عوفي الرجال صدك جذب
رنكين - شبيج عيني ومن داس على طرفج
هيج انفعلتي
رعد - يلا كافي ماصار شي اروح اشوف حيدر
نور - كام وهيَ ضلت تباوع عليها ضاجت
كامت راحت يم امها
لزكه صدك جذب شهل ميانه الزايده
ام ركان - ههههههه هايمه شو غرتي
نور - ماتشوفيه شلون تتموع كدامها والله تراب
مدري شنو وانتِ شعليج صدك جذب بس باقي تكعد بحضنه
ام ركان - ههههههه والله كفو من غيرتج على زلمتج
نور - حجيه والله مو قصة غيره بس
ماتشوفين تصرفاتها تغث
ام ركان - ههههه بلا اشوف واشم ريحة
غيره هم
نور - اي حقي والله يعني هو زوجي وماكدر
امسك ايده كدام الناس وهيَ تجي تتموع
بكيفها شلون ما اغار
ام ركان - ههههه حقج يايمه
اكلج بنيتي روحي جيبيلي بطل مي ريكي نشف
نور - ادللي حجيه
كمت جبتلها مي التفتت اشوفها هم واكفه
يم رعد مدري شنو تحجي ويا وهو مامعبرها
لا حول ولا قوة الا بالله شنو من بنيه هاي عزه
بعينها من صدك ضوجتني انطيت البطل للحجيه
شوي واجه ركان كال
ركان - يلا يمه كومي نرجع ورايه التحاق
ام ركان - ماشي يمه
ركان - خويه نور تعالي ويانه ومناك رعد ياخذج
تعليمات سيادة النقيب بعد
نور - ماشي
بس خويه هسه اجي بس اسلم عل بنات
ركان - ماشي خويه لا اطولين
نور - لا هسه اجي
رحت سلمت على بتول وتبارك وام رعد وطلعنه
ورجعنه لبيت ركان ماطولنه نصف ساعه اجه رعد
ماقبل ينزل بالسياره جان سلمت عل حجيه
وصعدت بالسياره اجه ركان
ركان - ولك ارعن الفجر نلتحق
رعد - اي اروح اجهز نفسي
ركان - ماشي خويه عود نشاوف الفجر
رعد - ان شاءالله ضلعي يلا في امان الله
ركان - في امان الله خويه
نور - شغل السياره سحب ايدي باسها كتله
رعد جم يوم وتنزل
رعد - من 10 الى 15 حسب
نور - هواي شنو السالفه
رعد - والله يابنت كَلبي بعد هذا شغلنه شسوي
نور - راح اشتاكلك
رعد - كل مايصير عندي وقت فراغ اخابرج ونحجي
نور - اووف وحده ابد لا تاخذ بالسلك العكسري
تتعب ويا
رعد - هههههه فدوه اروح لهل اوف
نور - شبيك ترا صدك احجي
رعد - ياعروك كَلبي الايام تمر بسرعه
لا تفكرين هذا عقلج لا اتعبي بويه
نور - ان شاءالله
وصلنه للبيت دخلنه لشقه هو راح يسبح واني
رحت بدلت لبست تراك خفيف الجو متغير
كعدت مسحت المكياج وغسلت وجهي دك الموبايل
اشوف نفس الرقم مال بارحه رديت
: الو
ريتاج - اريد اكلج شي اذا عندج وقت
نور - تفضلي
ريتاج - البارحه كلتي اني منو
نور - اي
ريتاج - اليوم اكلج اني منو
الو تسمعيني
نور - اي اسمعج تفضلي
ريتاج - اني زوجته مثل ما انتِ زوجته
نور - اول ماكالت هيج ماعرف شصار بيه انعكد لساني اريد احجي انطق ماكدر من الصدمه معقوله الي داسمعه لو اني داحلم
ريتاج - شبيج اخرسيتي
نور - منو انتِ
ريتاج - كتلج زوجته
نور - لا لا اكيد جذابه شنو اليثبت
ريتاج - لا مو جذب وهسه ادزلج صور واتأكدي
نور - سدته اجاني اشعار عل واتس
فتحته وياريت ما فتحته دزتلي صورها لابسه
ملابس نوم وهو نايم فتحت عيوني من الصدمه
دزلتي بعد صور هيَ تبوسه وهو نايم عل سرير
اول ماشفت الصور نزلن دموعي وايدي ترجف انصدمت شكد بحياتي مصدومه بس هاي جانت اقواهم تمنيت يكون حلم تمنيت يكون وهم
رجعت دكت رديت وايدي ترجف من الصدمه كالت
ريتاج - انصدمتي ههههه
حقج يلا عود مدتج شهر ويعوفج حالج حال البقيه نصيحه عوفي انتِ بكرامتج قبل لا يعوفج هوَ
علمودج اني وانتِ بكيفج بس تذكري شي واحد عمره ماحب ولا راح يحب لان ماعنده كَلب ماعنده احساس حبه على كد رغباته بيج فتره ويمل هذا طبعه
نور - هيَ تحجي واني دموعي تنزل بدون صوت سديت الخط بوجها وكعدت عل سرير مصدومه احاول استوعب شنو الصار وشنو سمعت معقوله بحلم اني يارب يكون حلم واصحى منه يارب مايكون حقيقه
رجعت اشوف الصور متت من القهر متت
شلون هيج صار م م معقوله لا لا رعد مايسويها
لاااا يانور مايسويها مستحيييل
كمت اجي واروح واهلوس واكول مستحيل رعد مايسويها لا اعرفه مستحيل مايكسر كَلبي شلوون يكسر كَلبي وهو يحبنيييي شلوووون
احجي وابجي وماعرف شسوي وجان يدخل للغرفه
شافني ابجي كال
رعد - ها بويه ليش تبجين
نور - اريد احجي انطق ماكدر ماكدر احجي
بس اشوفه ودموعي تنزل
رعد - شبيج ليش تبجين صاير شي
نور - تقدم بتجاهي اشرتله بايدي الترجف ودموعي تنزل كتله
: لا لا تتقدم
رعد - لا تخبليني شبيج احجي
نور - اسئلك سؤال جاوبني وبكل صراحه
رعد - هسه غير اعرف ليش تبجين
نور - اريد احجي ماكدر اريد انطق ماكدر والله ماكدر غمضت عيوني والدموع تنزل بدون صوت اجه يمي مسح دموعي
رعد - نور بويه ليش البجي احجي شصاير وياج احجي بويه لا تخافين
نور - تقدم يحضني دفعته وابتعدت انصدم من
ردة فعلي
رعد - نور شبيج احجي
سكوتج جاي ينرفزني شكو ليش البجي اااحجي
نور - غمضت عيوني وكلتها
: انت متزوج غيري لو لا
اول ماكتله هيج تغير ملامح وجهه
ماعرف شنو يرد رجعت كتله
: لا تسكت
رعد - شلج بهذا السؤال
نور - جاوب
رعد - مو شغلج
نور - لا شغلي
رعد - كلت موووو شغلج
نور - صار عصبي غمضت عيوني نزلن دموعي
ماتحملت طكيت من البجي نهاريت
: رد ااااي لووو لا
لااااا تسكت لااااااااا تسكت ليييش تسكت تخاف
لو تستحي لووو شنو عذرك رددد لا تحركني بنااااار افكاري كووول اي لو لا
رعد - لااا تعلين صوتج
نور - ها وانت همك صوتي
رعد اااخر مره اكلك مزوج غيري لو لا رررد
اباوع علي مايحجي مايحجييي متت من القهر متت انهاريت تخبليت ماعرف شصار بحالي
ابجي واحس نار بكَلبي
رعد - ليش البجي خلي افهمج الموضوع
نور - التفتت علي عيني بعينه والدموع تنزل كتله
: شنو تفهمني شنووو ليش بقى شي ولك بكلشي رضيت وياك بكلشييييي وتالي مزوج وعندك مره ليييش اخذتني لييييش جان عفتني وشمرتني مثل خوالي ليييش ماعفتني
رعد - كافي تبجين بويه بس اهدي هسه شلون افهمج وانتِ هيج تعالي كعدي هنا اهدئي وافهمي
الموضوع
نور - شتفهمني ليييش هيج تسوي بيه ليييش
: فوك سوايته صار عصبي
رعد - لااااا تبجين جم مره كايلج لا تبجييين
بسسس خلي افهمج السالفه شبيييييج
نور - اشهك واحجي
: ووولك يوميه تصدمني بشي يوووميه تصدمني
لا انت موو رعد الكَلبي حبه لا مستحيل معقوله انخدعت بيك
تقدم صار عصبي
رعد - لا تخبليني خبااالي هذا لاااااا اطلعي عليج ترا وربي ابووووي ماعرفه من افقد كتلج تعالي
كعدي افهمج ليييش العناااااد
نور - باوعت علي مسحت دموعي كتله وصوتي يرجف كل جسمي يرجف
: اذا انت رجال احلف وكول مامزوج
رعد - كااافي خبال ماتعرفين شي لا تفسرين
من يمج
نور - اذا انت رجال ررررد
رعد - رااااح اطلكها والله شبيج
نور - هو هيج كال لو حرك كَلبي حرك
حسيت حالي بحلم واريد اكوم منه بس شلون واكوم وهذا واقع مو حلم كتله اني وابجي
: ليييش بشنو قصرت وياك اني ليييش بشنو هيَ احسن منيي ليييش حرام عليك امنتك كَلبي كتلك احتووويني حبني هذا جزاء حبي الك ووولك قبلت بيك انت وعيوبك ويوميه تصدمني بشي واكول ميخالف احبه ويحبني وحبنه اقووووووى هيج اجازيني ليييش حرام عليك والله حرااام
رعد - يا الهي الصبر وووووولج لا تخبليني مو هيج السالفه اااافهمي يلا احجي
نور - شهكت بقهر كتله
تعرف شنو بنظري مو رجال اليخون مرته
: هيج كلت باوع عليه
رعد - شنو قصدج
نور - مسحت دموعي وكتله
: اي مو رجال اليخون مرته
رعد - قصدج اني مو رجااال ؟
نور - عيونه حمر تجدح خفت كُلش بده يتقدم واني ابتعد
رعد - جاااوبي شنو قصدج
نور - ماكدرت احجي تقدم واني ابتعدت صار الجدار وراي وهو واكف مقابيلي رفعت راسي عيونه حمر تجدح من العصبيه خفت منه
سك على سنونه وكال
رعد - اااحجي
نور - مارديت تعصب اكثر
رعد - كلت ااااااااحجي منو مو رجال
نور - نطقت بصوت يرجفف من البجي
ا ا اليخون م م مرته
رعد - ووواني بنظرج خاينج جااااوبي
نور - خفت من صوته واعصابه واني اناظر
بعيونه تذكرت الصور الشفتهم غمضت عيون وكلتها لا ارادين من قهري
: اي
اني هيج كلت لو هذا تخبل
رعد - ااااااانتِ تعرفين نفسج شنوووووو دتحجيننننن وووولج منوووو انتِ وهيج تحجين
نور - كام يصيح ويعيط ويغلط كسر شكو شي كدامه فقد واني واكفه خايفه و ابجي على
حالي شجاني وهيج كلت
رعد - ااااااني وووولج اني تكولين عليه هييييج
ووولج هذا خشمج اكسسره فهمتي لوووو لاااا
نور - نزلن دموعي
وهو يغلط ويصيح عليه خليت ايدي على اذاني
وابجي وهو يكسر ويشمر شكو شي كدامه
مو هذا رعد الي عرفته لا لا ابد مو هو
تقدم بتجاهي رفع ايده راد يضربني
حميت نفسي بأيدي وغمضت عيوني وابجي
جان اكو طاوله كزاز صغيره يمي بالصاله ماضربني جتي ضربت ايده عل طاوله كمت اصيح خفت خفت من الصوت بعدت ايدي الترجف من عيوني
اطشر الكزاز كله وايده تنزف كال بصوت مخنوك انبح صوته من الأعصاب
رعد - لييييييش اليحب يتعب ويه محبوبه لان
يكون صادق بحبه ؟ جاااوبي
نور - غمضت عيوني دموعي تنزل كتله
: ر ر رعد ايدك
رعد - جااااااوبي
نور - تقدم اكثر وكال
رعد - وربج هاي الكلمه الكلتيها ماراح تعدي
على خير ..................................
_
______
وكانما نظرات رعد كانت تقول 👇
اوگف على الجرح لا تصرخ انت وياه
و راح اكتب قصيدة بس الك اهديهَ
مدينة ألم انه واضمك بالروح
بس لا تظن من تعيش ترتاح بيهَ
انه ابن المدينة واتيه مرات
جا شلون وانت البعدك غريب بيهَ
وكانما نور ترد علي وتقول 👇
اعاين بالوجوه وانت ما موجود
شلتك بالكلب يوم الجنت موجود
ودمعة بالجفن يوم الرحت شلتك
ما ردتك دمع وتساير الخدين
انه عون وذخر بالدنيا الي ردتك .
_
_
انتظروني في البارت القادم ،
: قلبي بخصوص التأخير والله يادوب الحك
وجاي اطول البارت اوصل قرابة ال7000 كلمه
صح اطول بالتنزيل بس ارجعلكم ابارت اطول
واحلى من الي قبله ،
حبايبي فضلاً وليس امراً لا تنسون التصويت بالنجمة وتعليق بين الفقرات تفاعلكم مع الرواية اتمنى توصلو البارت 300 تعليق اقل شي لان البارت طويل والله حقي تعبي انتو يمكن من تقرو يطول ساعه عندكم بس اني والله اتعب
بي ايام لعيونكم الحلوه ❤
_
حسابي انستجرام انشر هناك كلشي يخص الرواية حتى موعد نزول البارتات ومشاهد
مسربه قبل لا انزل هنا 👇
والان قلبي ثقلو ميزان حسناتكم بذكر الله
"""""""""
سبحان ألله
ألحمد لله
لا إله إلا ألله
ألله أكبر
"""""""""
#خلف القضبان روح يتيمة
#بقلم الكاتبه جيهان آغا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!