#خلف القضبان روح يتيمة
#بقلم الكاتبه جيهان آغا
_
_
قبل مانبدي صلو على سيدنا محمد
( اللهم صل على سيدنا محمد وعلى ال محمد )
ولا تنسون تفاعلكم يحفزني
اكتب البارت وانزله اسرع
قراءة ممتعة ياقلبي
__________
رعد - تخصنه ماتخصنه اني رجال اغار اغااار
نور - لا تصير عصبي
رعد - ترا شكيتي بطني وتكولين لا تصير عصبي
نور - هيج صار اني اشك البطن خوش
وخر اريد اكوم
رعد - عناد بويه عنااااد كلج عناد
نور - كتلك وخر اريد اكوم
رعد - ههههه حلوه حتى باعصابج
نور - اي خوش قشمرني بكلامك
رعد - وربي ما اقشمر احبج ااااحبج بعد اصرخ
ااااااااحبج ديلا واموت عليج لوبيدي اضمج
بكَلبي وحتى النفس من ريتي تتنفسين
ولج اغار عليج من الهوى شلون
ما اغار من الوادم سمعي كلامي ولا تعاندين
نور - ها والناس كلها كاشخه واني وبهذلتي
اروح تقبلها انت ؟
رعد - اقبلها اي جمالج خلي بس الي يكون
نور - تعرف يوميه تصدمني بشي تعرف لو لا
رعد - نور بويه حقي اغار ماكو واحد مايغار
على محبوبه
نور - غيره عن غيره تفرق غار بس لا تخنكني
رعد - منو كال خانكج
نور - اها وبنظرك مو خنكه شروطك
رعد - مايفيد الكلام عناد كلج عناد
نور - اني لو انت
ابتعد فتح الكنتور يطلع ملابسه يبدل
عفته ورحت لصاله يعني صدك احسه خانكني
ليش هيج يسوي
شوي وطلع كاشخ ومرتب نفسه وريحة عطره تارس الشقه كتله
: انت حلال عليك تسبح بالعطر وتكشخ مايصير اني اغار بس من توصل يمي حتى العطر ممنوع
رعد - هههه تعرفين ليش
نور - ماريد اعرف
رعد - ترا مايلوكلج الطنكره بويه
نور - مارديت علي عفته و رحت للمطبخ
اغسل المواعين اجه ورايه ماهتميت كملت شغلي
بس حيل ضايجه منه وهو يباوع عليه ويضحك
كملت المواعين ظهري علي ماحس غير لمسات
ايده على خصري تقدم بعد شعري النازل على رقبتي وحط راسه برقبتي توترت كتله
: شدتسوي
مارد عليه اخذ نفس بهدوء من رقبتي
غمضت عيوني همس
رعد - اضيع اني بجمالج وحبج اضيع
نور - فتحت عيوني كتله
: اي خوش قشمرني وخر اكمل شغلي
مارد عليه
ماحس غير شالني بهدوء وحطني عل طاوله
مالت الأكل رجع حط راسه برقبتي اخذ نفس
وايده على خصري حسيت بضربات كَلبي
تتسارع من الحب والأمان اليسكن كَلبي
كلما جان قريب مني كال
رعد - لاتزعلين مني بس والله اغار مو بيدي
اريد اضمج بنص كَلبي وروحي ومحد يشوفج غيري
نور - اذا تحبني هيج لاتخنكني
رعد - والله احبج
نور - ابتعد وايده حاضنه وجهي تقدم اكثر لامس رمشي برمشه وانفاسه الحاره تضرب بوجهي من صدك احس ويا بال امان والحب من يكون قريب مني تقدم اكثر غمضت عيوني باسني بهدوء وابتعد فتحت عيوني كال
رعد - احبج والله شايفه السيف من يجدح عطش لدم انه هيج احبج واكثر شعندي غيرج يادليلي
نور - صفنت على عيونه وهو يحجي
رجع باسني ابتعد وعيونه تناظر عيوني وشفتي
ابتسم اخذ الموبايل والمحفظه وطلع سد الباب
واني بعدني صافنه على تصرفه
خليت ايدي على شفتي ورموشي ضحكت
وربي يعرف شلون يقنعني واني شبيه هيج
اضعف كدامه وينعكد لساني ااخ يارعد
والله شكلي راح اتعب وياك خاف جان
ناقصني تعب وتعبك كمله علىِ
__
رعد - طلعت من البيت خابرت ريتاج
ردت
ريتاج - هلا حبيبي
رعد - طلع الفحص مو
ريتاج - اي لا تخاف مو حمل
رعد - لمي ملابسج ورجعي لبيت خالتج
ريتاج - هاي شبيك صدك تحجي
رعد - اي ورقة طلاكج توصلج هناك
ريتاج - فدوه لا تسوي هيج حرام عليك
رعد - ريتاج عندي شغل ومن البدايه تعرفين
زواجنه مابي اي هدف ليش اطولين الموضوع
ريتاج - بس اني احبك
رعد - بس اني ماحبج وانتِ مامجبوره تكملين
حياتج وياي خلص يابنت الحلال كلمن وبطريق
ريتاج - رعد صدكني راح تندم وكول
ريتاج كالت
رعد - ههههه من كل عقلج حاطه راسج براسي
عشره مثلج مايهزون شعره بيه صدك تحجين
ريتاج - اذكرك والأيام بينا يارعد
رعد - نصيحه اله نار رعد ابد لا تلعبين
بي مرات تحرك حتى صاحبه وهاي كتلج
: سديت الخط اعرف شلون اتصرف وياج سهله
خابرت ركان رد
: شلونك ضلعي
ركان - ياهلا برعوده شلون عرفت تخابر
رعد - مشغول والله حقك عليه
ركان - اعرفك بشنو مشغول تعرفني بيك
مستعجل عل اطفال هههه
رعد - هههه ماتبطل سوالف البرابيك
ركان - هههه لا ما ابطل اي وين ماوين
رعد - رايح للبيت خابرتك كلت تعال ويانه
نجهز خطوبة حيدر
ركان - مو تدلل
رعد - الحبيب تسلم
ركان - اكلك مو جنك طولت شوكت تالتحق
رعد - يوم السبت ان شاءالله التحق
ركان - خوش ويايه اي اخبارك ويه نور
رعد - هو زين بس اكو صعوبه شوي بين
طبعي وطبعها
ركان - كلشي مافهمت شلون
رعد - يعني مثلاً خطوبة حيدر مختلطه وامي
كالت جيبها وياك رحت كتلها بويه ماريد عطر ومكياج وملابس ضيكه وشعرج يطلع ممنوع
ضاجت تكول تخنكني
ركان - لحظه هسه ملابس ضيكه عرفنه
وحقك وشعر هم حقك بس مال مكياج وعطور وهل سوالف مو جنك مزودها بعد اخوك يعني وين اكو بنيه تروح للعرس بدون مكياج او عطر خلي نكون واقعيين اكثر
رعد - ركان تعرف طبعي اغار
ركان - ميخالف خويه بس مو هيج من هسه
البنيه بعدها عروس خليها تكشخ حالها حال البنات
رعد - ماكو داعي كشختها يم زوجها جداً كافي
ركان - رعيد غيرتك خليها بحدود بعد اخوك
رعد - الله كريم يلا شوي وراح اوصل
تعال للبيت انتظرك
ركان - ماشي ضلعي هسه راح اجي
رعد - اي لا اطول ديلا مع السلامه
ركان - ماشي في امان الله
رعد - سديت الخط وتوجهة لبيتنه وصلت
فتحو الباب الحراس صفيت السياره نزلت
اشوف الحوش هوسه اجه حيدر
حيدر - هلا خويه شلونك
رعد - هلا عريسنه شنو هاي الهوسه
حيدر - ابوي راح يجلطني كلشي مايعجبه
يجبون بهاي النماذج ومايلحكون وهو كلشي ماعاجبه
رعد - بطران طبعاً مايعجبه شي
وين وصلتو
حيدر - حجزنه القاعه باقي الكيك وهاي الأمور
رعد - خوش
واحنا نحجي اندك الباب فتحو الحراس
طلع ركان
ركان - هلا بالي يحفزنوي عل زواج
حيدر - ههههه ياهلا
اي والله ازوج خويه انصحك
رعد - بعدك شنو شايف وتنصح بي
ركان - هههههه مشكله ماكدر احجي
رعد - انجب اعرف شنو تريد تحجي
ركان - هههههه اي حقيقه لازم نتعلم منك
رعد - ليش لا
حيدر - شنو نتعلم مافهمت
رعد - عوفه هذا طافي عقله
حيدر - خوش هسه تعالو وياي اروح اشتري البدله
رعد - لحد هسه مارايح
حيدر - لا والله ليش عمران يخلي الواحد يجهز نفسه كل همه الخطوبه شلون تكون
ركان - هههه والي بالخطوبه مو مهم
لو شنو السالفه
حيدر - اسكت وخليها اروح اجيب الموبايل
والمحفظه ونروح
رعد - وين الولد علمود نروح سوا
حيدر - احمد موجود بس سيف ماعرف
وينه خابره وشوف
رعد - تمام
تعال ضلعي ندخل جوه
ركان - اي يلا
__
بتول - جنت بالمطبخ اكل كيك سمعت صوت رعد
ردت اروح اسلم علي بعدني مافاتحه الباب سمعت صوت ركان ويا عززه شجابه هذا تيلا تيلا
تيلا - نعم ماما
بتول - ماما بتول حلو
تيلا - كتير هلو ماما
بتول - هههه يعني هلو
تيلا - نعم ماما كتير هلو
بتول - خوش
رحت جبت شال شمرته على شعري
وكعدت بالصاله على اساس ماعرف اجه حيدر
صعد فوك مديت راسي وينهم ليش ما اجو
واني اباوع جان يدخلون سويت نفسي على
اساس اباوع بالموبايل
رعد - ها خويه شلونج
بتول - كمت سلمت علي وحضنته
هلا خويه بخير حبيبي
التفتت على ركان عيونه عليه حسيته ضايج
كتله
: شلونك ركان
ؤكان - بخير
بتول - اي دومك
: عشتو حتى ماسلم عليه شبي هذا من امداني
واني هيج خابصه نفسي بي صوجي مو صوجه جتي امي
جوان - ها يمه شوكت جيت
رعد - هلا حبيبه هسه جيت
جوان - ركان يمه شلونك
ركان - اهلا ست جوان الحمد لله
بخير اذا انتِ بخير
جوان - دومك يايمه
رعيد امي روح على ابو القاعه
وشوف شنو اكو نقص هناك
رعد - تم ادللي حبيبه
ركان - عفواً بس القاعه مو مجهزه يعني ليش
تروحون تتاكدون هو مو يكون دائما مجهزه
لو اني غلطان
جوان - ليش بقو قاعه على تجهيزه غيرو كلشي
بالقاعه ماعجبه عمران تجهيزه القديم
ركان - ها مو اكول استغربت
التفتت على بتول
كلت بكَلبي اذا ارقى قاعه ماعاجبه ابوج شلون
راح يقبل اناسبه لا بالله مو خوش سالفه حضي
مابقت بنيه احبها غير بنت عمران من امداني
رعد - اكلج يمه شو سيف اخابره يطلع مغلق
وينه هذا الارعن
جوان - ماعرف كال طالع عندي شغل
بس ماكال وين
رعد - ااخ جهالج يشيبون الراس
جوان - ههههه اي والله يايمه ماتشوف خابرتك
لان اعرف يجون ويروحون وكلشي مايسون
كل واحد همه نفسه
بتول - ركان نور شلونها
رعد - زينه
بتول - وانت شمعرفك
رعد - منو
بتول - انت تكول زينه شمعرفك بيها زينه
ركان - مو جان يمنا علمود هيج
رعد - اي جنت يمهم
بتول - خوش
ركان جيبها باجر يمنه نروح نشتري ملابس للخطبه
اني هيج كلت ركان باوع على رعد ورعد رد
رعد - ماكو داعي يمكن الابنيه ماتريد ملابس
بتول - لا شلون ماتريد
جوان - صح كلام بتول جيبها باجر
ويه البنات
ركان - ها اي ان شاءالله
بتول - واحنا دنحجي نزل حيدر
حيدر - يلا خويه نروح
رعد - احمد وين
حيدر - احمد كال اني اشتريت ويه اصدقائي
رعد - اذا هيج يلا نتوكل على الله
بتول - كامو اباوع على ركان عيونه عليه ومن اشوفه يشتت نظره عود على اساس مايخليني
احس بس اني حاسه على نظراته
راحو واني وتبارك كملنه باقي الشغل
مر ساعه على روحتهم اجاني اشعار من ركان فتحته دازلي صورتين وحده بدله رجاليه
لون اسود والثاني نيلي وكاتب
: اي واحد احلى ؟
بتول - ابتسمت كتبتله
الاسود بس بدون رباط ماحلو الرباط
كتب
: هو اني ماحب الرباط
بتول - كتبت
اي
رجع كتب
: هسه اثبت عل اسود ؟
بتول - اي ثبت
: ماشي بويه شكراً
بتول - العفو
انطه علامه اوكي عل رساله وراح
شصار اخذ رائي اي والله اخذ رائي يمه جعل
محد غيرك ياخذ رائي اويلي على كَلبي شيتحمل بعد هههه
تبارك - تخبلتي
بتول - التفتت اشوف تبارك ورايه عزه بس
لا سمعت كتلها
: شنو
تبارك - شنو كَلبج ومنو يتحمل شدتحجين
بتول - بلعت ريكي كلت
ولا شي تعب الشغل ماثر عليه
تبارك - اااخ هو منو الما تعبان ادري الناس كلها
هيج تتعب من تخطب لو بس احنا
بتول - والله ياختي الناس بسيطه يجهزون يوم
يومين يسون الخطوبه وخلص مو مثلنه صار
اسبوع داخلين انذار وهاي بس خطوبه لعد العرس
شيسوي ابوج ماعرف
تبارك - سكتي وخليها
اكلج شوكت نروح نشتري فستان صخام ترا
باقي بس الخميس واحنا ملابس لحد هسه مامشترين
بتول - هو شنلبس ياحضي بقو بيها ملابس
تبارك - اي والله لازم نلبس فستان مستور
بتول - تتحجبين
تبارك - اي غير محجبه و انتِ
بتول - والله ماعرف لصراحه
تبارك - انتِ مو محجبه مضبوطه وهذا الشي مايصير لو تحجبي ابدي لو لا تتحجبين عل نص شنو هو قشمريات مايصير و مايجوز
بتول - صح كلامج اشوف الله كريم
تبارك - الله كريم شوكت نروح
بتول - باجر حتى نور راح تجي ويانه
جتي امي كالت
جوان - ورنكين هم راح تجي
بتول - اهوووو انوب رنكين
جوان - يااا عيب عليج ليش هيج شاده ويه البنيه
بتول - يمه انتِ شايفتها شكد متكبره عبالك
بس هيَ بالكره الأرضيه
تبارك - لصراحه صح كلام بتول طبعها ابد ماحلو
اي شي تشوفه تستصغره ومايعجبها وتكسر بي
جوان - مابيها شي كافي تحجون عليها
بتول - بنت اختها ادافعلها
تبارك - اي طبعاً غير بنت سعديه هههه
جوان - بلا حجي زايد ويلا روحو كملو شغلكم
بتول - خوش رايحين
تبارك - ااخ عفيه شغل ابد مايخلص
بتول - نهائي
_
______
في مكان اخر
رعد - رحنه للمول نشتري بدلات رجاليه للخطبه
عجبني ثنين احتاريت بينهم
ركان - رعيد محتار بين النيلي والأسود
رعد - انت ياهو العاجبك اكثر
ركان - ماعرف احس النيلي حلو مو
رعد - اي خلص اخذه اني هم محتار بين
ذوله الاثنين
التفتت اشوف حيدر خابر خطيبته وفتح الكامير ياخذ رائيها بالبدله
تذكرت نور مشكله ماعندها موبايل حديث
اخابرها كاميره واخذ رائيها باقيه عل موبايل
القديم الجبته الها ذاك المره اجه ابالي اخذلها موبايل كتلهم
: شباب اروح عندي شغله هسه اجي
ركان - وين
رعد - هسه اجي
عفتهم ورحت الابو الموبايلات اخذتله
موبايل جديد وكتله
بلا امر عليك غلفه تغليف حلو
لان اخذه هديه مو الي
: ماشي استاذ
رعد - غلفه ورتبه دفعت حقه ورحت اشوف
حيدر وركان وين وصلو دخلت للمحل
: ها ولكم وين وصلتو
ركان - اني راح اخذ الاسود
رعد - مو كلت النيلي عاجبك
ركان - اي بس الأسود احلى
رعد - اي هم حلو وانت حيدر ماخلصت
حيدر - لا هسه اخلص
رعد - ماشي اني طالع لا اطولون
حيدر - ماشي
ركان - اجي وياك خلصت اني
رعد - تعال
طلعنه من المول وكفنه يم السياره
سحبتلي سيجاره ولعتها
ركان - شبيك احسك ضايج صاير شي
رعد - لا بالعكس بس اكو شغله ابالي
اريد اخلص منها يلا ارتاح
ركان - رعيد شغلك مايخلص ياخويه
رعد - اااخ اسكت وخليها
ركان - اكلك صار فتره مارايحين
نسهر برا نغير جو
رعد - احسن
ركان - ههههه صاير شيخ ماعرفتك
رعد - هو الي يعاشر نور شيصير لعد
ركان - ههههههه هاي قويه
رعد - اي والله شبيك
ركان - هههه الله يحفظكم خويه
يعني تنصحني ازوج على هذا كلامك
رعد - اي شي اكيد بس كون تختار الشخص الصح
ركان - والله ماعرف كَلبي اختار الصح لو الغلط
رعد - ها ولك كمت تحب وتتمعشك يول
ركان - ههههه ليش الك حلال والي احرام واني ماعرف
رعد - لا خويه حب وانحب بس الله يساعدها
التاخذك
ركان - ليش ولك شبيه اني
رعد - لا مابيك شي بس ارعن
ركان - هههههه من طيح الله حظك
رعد - ههههه وحظك ويه حظي
هاك استلم اجه الأفندي
ركان - صار ساعه محتارين هو وخطيبته
خبلو ابو المحل وياهم هههه
رعد - هههه اي اعرفه من هسه خله لحيته
بيدها
ركان - ههههه ديلا على اساس انت احسن
رعد - هههه اني خبلتني ليش بقت بيه عقل
ركان - الله اكبر هههههه يابويه هيج الحب حلو
رعد - كتلك ويه الشخص الصح اي والله نعمه
حيدر - ها تاخرت عليكم
رعد - لا جان نمتلك شوي ترتاح تعبت
حيدر - هههه والله حقكم بس شسوي ماكو شي
عجبني
رعد - ماكو شي عجبك انت لو المدام اكو فرق
ركان - جابها بالجبها وربي ههههه
حيدر - هههه
اني وهيَ هو هيج خويه لازم اخذ وعطا
رعد - اي من هسه خلي لحيتك بيدها
ركان - هههههه
حيدر - هههه ديلا عود نشوفك
ركان - ههههه
مايحتاج هو اخرب منك أخذها مني
رعد - انجب ابني
حيدر - هههه لاصح كلامه
عشرة عمر انتو اكيد يعرفك بطبعك اكثر منا
ركان - هههههه اي وربي
رعد - صعدو بالسياره لا العب بيكم شلم بلم
يلاااا ادبسزيه
حيدر - ههههه اي يلا
رعد - صعدنه بالسياره حيدر كعد كدام
بين الحجي والسوالف دك الموبايل
حيدر - موبايل منو يدك
ركان - مو مالي
رعد - يمكن مالي شوفه بالجيب مال جاكيت
حيدر - اي هسه
رعد - جنت اسوق وهو اخذ الجاكيت يشوف
منو
حيدر - هلوو
ركان - صار بيها هلوو الله يستر ههههه
رعد - منو
حيدر - مكتوب بنت كَلبي
ها خويه سالمين شصاير وياك
ركان - انفضحنه ورب الكعبه هههههه
رعد - جيبه
اخذت منه الموبايل انقطع الاتصال
حيدر - ها رعيد منو بنت كَلبك خويه هههه
ركان - صدك منو هههههه
رعد - ركان انجب
ركان - اي دكله منو بنت كَلبك ههههه
حيدر - ها شو ساكت
رعد - كلشي بوقته حلو
ركان - فلسفي سوده عليه ههههه
حيدر - اي كُلش هههه
يعني اكو حب بحياة رعيد
رعد - ليش ماكو
حيدر - الله يساعدها
ركان - اي والله ههههههه
رعد - شو انتو حيل ادبسزيه
حيدر - عليك طالعين هههههههه
ركان - ترا هاي حقيقه الله يساعدها
حيدر - خطيه منو هاي
رعد - ماتنجبون عود انتو اهلي وهيج تحجون
حيدر - والله خويه لا تزعل مو كل وحده تتحمل
اطباعك
رعد - انجب تروح فدوه الطباعي ديلا
ركان - ههههه
حيدر - بس هذا الباقي
رعد - رجع دك الموبايل
حيدر - ههههه ها ها استلم الحب رد عليها
ركان - صدك رد عليها يجوز محتاجه شي
رعد - سحبت الموبايل رديت
: ها بويه
حيدر -لا مطور الوضع واصله ال بويه ههههه
ركان - لا عابر ال بويه صدك ههههه
_
نور - احجي ويا اسمع اصوات كتله
حبيبي وينك
رعد - ويه الولد محتاجه شي بويه
نور - اي لصراحه ماباقي زيت شي قليل
رعد - هسه ادزلج كارتون يوصلج يم الباب
نور - زين مايصير انزل جوه اكو ماركت اشوف
شعنده ماعنده
رعد - لا
نور - ليش
رعد - كلت لا يعني لا
نور - شبيك رعد ماتثق بيه لو شنو سالفتك
رعد - منين اجيبين هذا الحجي شلون ما اثق
نور - لعد ليش هيج تخنكني
رعد - مشكله ماكدر احجي هسه والولد يمي
نور - يعني ماروح اخر كلام
رعد - اي
نور - ماشي نشوف وين راح نوصل ويه طبعك
هيج كلت وسديت الخط
ضجت لصراحه يعني شكو بيها اذا رحت فدنوب
سواها بلا معنى وين كاعدين احنا ربي صبرني
راح يخبلني هذا الرجال
كمت للمطبخ اكمل شغل دك الموبايل كل ضني
رعد جاوبت بدون ماشوف
: ها نسيت اوامر ثانيه
جوان - هلا يمه شلونج
نور - اباوع هذا رقم امه صخام الصخمني كتلها
: هلا خاله عذريني عبالي رعد الحمد لله انتِ شلونج
جوان - نحمد الله ونشكره بنيتي خيرج يمه
صاير شي بينكم حسيتج ضايجه
نور - ردت احجي تذكرت من كال وكلام البينه
مايطلع خارج الشقه كتلها
: لا خاله ماكو شي
جوان - يمه احجي اني مثل امج
نور - ماكو شي حبيبتي بس لصراحه
طبعه صعب ياخاله أطباعه صعبه افكاره
ماعرف شلون يفكر يوميه اكتشف طبع وصفه جديده بي واني مامتعلمه على هيج أجواء ماعرف يعني احس الموضوع صعب علىِ ماعرف اذا دتفهمين قصدي او لا
جوان - اي يمه فهمت عليج والله يابنيتي كتلج
من قبل اطباعه صعبه حكم طفولته السيئه
والأجواء الكبر بيها بس اني متأكده حبج راح يتغلب على اطباعه وافكاره
نور - شلون
جوان - ترا رعيد يحبج يايمه حيل يحبج
واني واثقه حبج راح يغير ابني او نكدر نكول
وسيله حبج راح يكون وسيله لتغييره ان شاءالله
نور - والله يا خاله اني هم احبه واتمنى
اكدر اغيره يلا شنسوي الله كريم
جوان - اي يمه ربج كريم ورحيم
نور - ونعمه بالله جنتي محتاجه شي
جوان - اي خابرتج علمود اكلج باجر
البنات يروحون يشترون ملابس روحي وياهم
واشتري فستان قفطان بكيفج الي يعجبج
اشتري واعتبري هديه مني الج
نور - لا خاله مايحتاج شكرا كلامج كافي
جوان - لا يمه انتِ هم مثل بناتي ماكو فرق بينكم
نور - تسلمين يالغاليه ماتقصرين
جوان - الله يحفظكم يايمه
اخبارج ماكو شي منا منا
نور - مثل شنو مافهمت
جوان - هههه اقصد اعراض حمل شي
نور - لا خاله على بختج كولي غيرها
ياحمل بعد ما صارلنه 20 يوم
جوان - ههههه والله يمه شدو حيلكم
نريد اطفال حلوين مثلكم
نور - فدوه اروحلج خاله لا تحجين هيج
كدامه هو بلا شي كل شوي احبلج بتوم واحبلج
بتوم طبعاً ابنج ما يستحي نهائي
جوان - هههههههه تعلميني بي
نور - دوم الضحكه يالغاليه
لا اكيد امه وتعرفي احسن مني
جوان - يايمه الله يحفظكم نظر عيني انتو
نور - ويحفظج النا يالغاليه
جوان - يابعد عمري
يلا اروح اكمل شغلي باجر نشاوف
ان شاءالله واريد تكشخين وروحي
لصالون ويه البنات
نور - ماتوقع رعد يقبل
جوان - يااا شلون مايقبل غير عرس اخو
نور - والله خاله شكلج احجي ويا اني ماعندي
مانع اروح بالعكس اتمنى اروح
جوان - يمي الموضوع يمه ولا يهمج
نور - تسلمين يالغاليه
جوان - الله يرضى عليج بنيتي يلا مع السلامه
نور - مع السلامة
سدت الخط اااخ يا خاله شكلج اكلج ابنج
راح يخبلني الله يساعدني بس هيج اكول
اندك الجرس منو هذا انوب
لفيت الشال وفتحت الباب
: مرحبا هاي شقة النقيب رعد
نور - اباوع بيده كارتون زيت كتله
اي تفضل
دخل حط الكارتونه بالمطبخ
وراح سديت الباب دك الموبايل هو جان رديت
رعد - ها بويه وصلج الزيت
نور - اي وصل
رعد - ماشي ان شاءالله وره المغرب ارجع
نور - براحتك
رعد - هههه مطنكره بنت كَلبي
نور - اروح اكمل شغلي
رعد - بسيطه من ارجع اني هم اشوف شغلي
ويه طناكيرج
نور - خوش
رعد - يلا بنيتي مع السلامة
نور - مع السلامة
سد الخط رحت شغلت التلفاز وكعدت بالصاله
مر الوقت ماحسيت على نفسي نمت عل تخم
كمت على لمسات ايده وخشونة لحيته بخدي
فتحت عيوني اشوف حاط راسه برقبتي
ابتعد عينه بعيني كتله بنعس
: شدتسوي ؟ ترا لحيتك مزعجه
رعد - اي راجعه ازينها ادللي
نور - خوش وخر ضايجه منك
رعد - نتصالح ولا يهمج
نور - شلون مترهي
وشلون تتصالح عيني
رعد - هسه اكلج شلون
نور - شالني بهدوء
: رعد شدتسوي
رعد - نتصالح
نور - نزلني
رعد - ادللي بس مو هنا
نور - وداني للغرفه نزلني عل سرير راح بدل
لبس تراكه واجه سحبني لحضنه باسني كتله
: لا تحاول ما اتصالح
باسني بخدي وراسي وعيوني كال
رعد - حتى عنادج احبه
نور - مو عنيده بس انت غلطان وحيل غلطان
رعد - ليش شمسوي
نور - غشم روحك حبيبي غشم
رعد - ههههه عيونه الحبيبج وعمره وحياته انتِ
نور - اي خوش بس كلام ماكو افعال
رعد - ههههه ها يعني تردين افعال
نور - يعني اذا احجي وياك لازم افكر مية مره
يلا احجي كول ليش
رعد - ليش
نور - لان هذا عقلك منحرف اي شي احجي
تاخذه بمعنى ماكول غير الله يصبرني
رعد - هههه افا هيج صار الله يصبرج عليه
ميخالف عود جايبلج هديه
نور - احلف
رعد - والله
نور - شنو هيَ
رعد - بوسيني واكلج شنو هيَ
نور - شكراً ماريد حتى الهديه
ردت ابتعد سحبني اله
رعد - شكد عنيده
نور - مثلك
رعد - اعقلي بويه اعقلي
نور - هو العقل بس يمي تلكا
ضحك تقدم غمضت عيوني باسني ابتعد كال
رعد - ههههه ولك يواهس تضحك الدنيه عله اشفافك يبو الليل الحلو اليلعب عله اجتافك
أحس روحي تآمن بيك واتخافك
نور - رجع باسني ابتعد عينه بعيوني كال
رعد - ولج فصعونه شسويتي بيه يمج انكلب
طفل ويم الناس كلها تهابني
نور - هو هذا المطلوب حبيبي
رعد - اي صدك باجر اوديج روحي
ويه امي والبنات عل سوك (سوق)
نور - اي اعرف خابرتني امك
رعد - شوفي بويه نور اشتري فستان مرتب
حلو مستور محترم واهم شي مو ضيك ماريد معالم جسمج اتبين نهائي
نور - ترا اعرف بدون ماتكول مايحتاج كل
شوي مذكرني
رعد - لا يحتاج وحاولي تختارين فستان
لون نيلي او جويتي
نور - ليش
رعد - احب هيج الوان
نور - خوش هسه وين الهديه
رعد - بوسيني يلا انطيج ياها
نور - رعد عوف الشقه وينها الهديه
رعد - مو شقه نفذي الكتلج واخذي الهديه
نور - ياربي صبرني
رعد - ههههه يلا انتظر
نور - ابتعدت منه عدلت كعدتي
: غمض عيونك
رعد - ليش
نور - غمض اكلك
رعد - لا حول ولا قوة الا بالله هههههه يلا امري لله
نور - غمض عيونه تقدمت بسته بخده وابتعدت
بسرعه
رعد - هاي شنو
نور - شنو
رعد - ولج اني اخوج كل شوي بايستني بخدي
لا تخبليني
نور - هذا العندي يلا وين الهديه
رعد - اظل اعلم بيج مايفيد
نور - ههههه منحرف اني مو مثلك وين الهديه
رعد - بالصاله عل تخم
نور - كمت ركض عل صاله وهو يضحك
عليه رحت جان اكو كيس بي كارتون مغلف
فتحته اشوف موبايل من هذا الحديث من صدك
فرحت ماتوقعت راح يجيبلي موبايل كلت يمكن
عطر او شي ثاني بس صدمني رجعت للغرفه جان
بيده الموبايل شمره وكال
رعد - ها بويه عجبتج الهديه
نور - كُلش حلوه يعني صدك صدمتني
رعد - تستاهلين الاحسن منها ياعروك كَلبي
نور - اوووي فدووه
رحت حضنته وبسته كتله
: شكراً حبيبي
رعد - هسه بعده زعلان الحلو
نور - مو زعل بس ارجع واكول لا تخنكني
باوع عليه ولمسات ايده على خدي تقدم باسني
واني حضنته اجه اتصال سحب الموبايل طلعت
امه رد عليها
رعد - هلا يمه
: ها يمه وينك
رعد - بحضن مرتي
نور - يااا شكد ماتستحي
رعد - هههه شبيج قابل مجذب
: ههههه الله يحفظكم يايمه لعد بعدين اخابرك
رعد - لا عادي يمه احجي صاير شي
: لا يمه ماكو شي
باجر من تجي نحجي بس ها اخوانك
شاكين بيك لان ماترجع بالليل صار فتره كون حذر
رعد - هو وره خطوبة حيدر اكلهم واخلص قابل
بايك ( سارق ) ناهب على شنو ضامين (مخبئين) الموضوع
: اي يمه صح بس احجي بالوقت المناسب
رعد - ادللي يالغاليه
: مايدلل عليك ظالم يمه يلا اخذ راحتك وسلملي
على نويره
رعد - وابوسها بمكانج مو
: ههههه تكيف اعرفك يلا بوسها بمكاني
رعد - ههههه اشاقه وياج حبيبه
: اعرف يمه الله يحفظكم مع السلامة حبيبي
رعد - مع السلامة يالغاليه
نور - سد الخط كتله
ترا عيب ليش هيج تحجي كدام امك
رعد - اي قابل مجذب ياعيني وبعدين امي عادي
يلا اني نعسان كلش طفي الاضويه وتعالي انام
نور - كمت طفيت الاضويه حضني واني كذلك
ونمنه
كمت على ضو الشمس اتجاها على غرفة النوم
فتحت عيوني اشوفه بعد نايم ولَف ايده على خصري ابتسمت واني اناظر وجهه وهو نايم
بسته بخده بهدوء وبعدت ايده كمت بهدوء علمود
لا يكوم من النوم
رحت لصاله احضر الريوك دك موبايلي جانت
خاله جوان رديت عليها
: هلا خاله صباح الخير
جوان - هلا يمه صباح النور والسرور
رعيد وينه
نور - نايم
جوان - اي ادك علي مايرد
نور - اتوقع مسوي كتم
جوان - اي يمكن يمه من يكوم تعالو
نور - شلون نجي سوا قصدج
جوان - اي اكلهم جابج من بيت الحجيه
نور - اها ماشي
جوان - يلا يمه انتظرك مع السلامة
نور - مع السلامة حبيبتي
سدت الخط خليت الجاي ع نار ورحت
سبحت ع سريع وبدلت لبست فستان لو
ابيض صوف و علي جاكيت طويل وعريض
مثل البشت
ومكياج بسيط مرطب شفه
ومسكاره على سحبت ايلاينر كُلش نازكه
رحت اكمل الريوك حضرته رجعت للغرفه بعده
نايم فتحت البرده والشبابيك ورحت اكومه
:حبيبي رعد كوم ياكَلبي انت
رعد - اي اي هسه بعدين
نور - لا حبيبي كوم اتاخر الوقت امك خابرت
وكالت تعالو
رعد - ماشي بويه بس شوي انام
نور - رجع نام شسوي ويا كعدت مقابيله اتلمس بوجهه وشواربه وهمست
: حبيب الروح والريه كوم الريوك حاضر
ليش اتعبني كوم كافي نوم
ابتسم كال
رعد - لا تتحارشين بيه ترا مارحمج بعدين
نور - خوش اكوم وحدي اتريك لا تجي
كمت سحبني من ايدي اله اجه شعري على وجهه
عيونه بعيوني بعدت شعري كال
رعد - فدوه لهل وجه نيالي يوميه اصبح بي
نور - ها ها سيادة النقيب منو ديتحرش بمنو هسه
رعد - ههههه هو اليشوفج تردي يكعد عاقل
نور - ههههه بسته
: فديتك اني فدديت يلا اروح لا اطول انتظرك
رعد - ماشي بويه
نور - عفته ورحت للمطبخ شوي واجه تريكنه كمت اجيبي الچاي ضل يباوع عليه من فوك ليجوه كال
رعد - يعني من كل عقلج تردين تروحين
بهذا الفستات مدري بشت شنو هذا
نور - ليش ماروح بي ترا فستات عادي مال سوك
رعد - وهيج لون ابيض ؟
نور - مافهمت
رعد - لون الفستان بارز بياض وجهج
كومي بدلي لبسي شي ثاني
نور - انوب اللون رعد لا تخبلني
رعد - ليش اخبلج مثلاً ترا كلامي منطقي
نور - حبيبي حياتي عمري
خفف غيرتك مالها داعي والله هو لون فستان
منو ينتبه واني لبسي مستور وهسه اروح الف حجابي وخلص منو يركز على لون الفستان ياكَلبي
رعد - لا اصلاً ماحلو عليج لبسي شي ثاني
نور - مو مهم هو رايحه لسوك وارجع قابل
وين رايحه
رعد - ميخالف كتلج ماحلو بويه لبسي شي ثاني
نور - ضليت اباوع علي وهو يتريك ضجت كتله
: حيرتني وياك ماعرف شلون اتصرف ويه
غيرتك المالها اي داعي
رعد - لا تحتارين ترا عندج هواي ملابس
لبسي شي ثانيه هذا ماحلو عليج
نور - ها يعني بس لان ماحلو
رعد - اي
نور - عفته ورحت للغرفه طلعت فستان لون اسود
على عناده اريد اشوف وين راح نوصل بهاي
غيرته بدلت ولفيت حجاب لون بيج
رشية عطر رحت لصاله جان كاعد عل تخم يحول السيم كارت ع الموبايل الجديد
رعد - بويه هاي حولت السيم هناك وفعلت
النت والواتس حتى نحجي مرات كاميره ماشي
نور - ماشي
رفع راسه باوع عليه كال
رعد - شو لبستي اسود
نور - اريد اشوف وين راح اوصل ويه غيرتك
رعد - ترا مو لهل درجه
نور - لا لهل درجه ونص بس انت ماتحس
رعد - و الحمره
نور - شنو
رعد - الحمره خففيها لو مسحيها ماكو داعي
نور - ماحاطه حمره بس مرطب لو هذا هم ممنوع
رعد - هههه وليش المرطب واني موجود
نور - منحرف مايفيد الكلام وياك
رعد - هههههه يمج انحرف شسوي
نور - اي هاي هي
: كام راح للغرفه يبدل واني رتبت المطبخ ماحب اطلع والشقه هوسه احب من ارجع تكون مرتبه شوي واجه كاشخ ومرتب ونظارته وشعره وريحة عطره وساعته كتله
: شكد خبيث
رعد - ليش
نور - الك حلال تكشخ بس الي حرام ماتقبل
رعد - ههههه اغار
نور - يعني اني الما اغار مثلاً
رعد - لا والله صدك تحجين
نور - اي صدك احجي
رعد - فدوه ال تغار عليه حقج لعد اذا تغارين
نور - اي خفف عطرك عرض ملابسك شدعوه
هيج لازكه على كتافك وعظلاتك
رعد - هههههه حلو وبعد
نور - وبعد ماعرف هسه من اذكر اكلك
رعد - خوش ادللي نظر عيني جم نور عندي
نور - وحده
رعد - ماتصير ثنين
نور - نهائي
رعد - اي هيَ وحده وخبلتني انوب اثنين
نور - ها وهذا غزل لو شنو
رعد - هههه اخو الغزل عروك كَلبي
يلا تاخرنه
نور - اي يلا
طفينه الاضويه وطلعنه من الشقه هاي
اول طلعه اطلعها واني مزوجه رعد مسك
ايدي ونزلنه بالمصعد توجهنه لسياره شغلها
الجو جان مشمس على نسمات هواء بارده
شغل اغنية شمسين ماسك ايدي
وكل شوي يبوس بيها ويغني ويه الأغنيه
رعد - ويكول
لا تسولف علينا من يسألون
عيون الناس لا تحسد عشكنا
وإذا طلعت شمس فوت إنت للبيت
لأن شمسين معناها احتركنا
نور - ههههه لعد دير بالك لا تحترك
رعد - لا اني من زمان احتركت بنار حبج
نور - حلوو يامحلا هذا الحرك
رعد - اي طبعاً
نور - طلع فلوس من المحفظه انطاني يا كال
رعد - هاج بويه خلي جوه ايدج اي شي يعجبج
اشتري
نور - شكد ذني
رعد - 200 الف
نور - شسوي بيهم هواي
رعد - اشتري اي شي يعجبج
نور - مامحتاجه شي معين راح اخذ 100 كافي
رعد - براحتج
نور - اخذت مية الف ورجعت الباقي
شوي وصلنه باوعت على بيت
منال المشؤوم كَلبي انقبض كتله
: رعد شصار بهذا البيت
رعد - عيال منال باعو ماعرف لمنو
نور - وهما بعدهم بالسجن
رعد - اي
نور - الله لا يوفقها حسبي الله ونعم الوكيل
رعد - لا تقهرين نفسج ربج اخذ حقج منها
راح تعفن بالسجن
نور - مثقال ذرة مايضيع عند ربي شلون حقي
يضيع واني يتيمه ومظلمومه الحمد لله
رعد - اي اكيد ونعمه بالله
نور - وصلنه لبيتهم فتحو الباب الحراس
دخلنه صفه السياره بالحوش كال
رعد - شوفي بويه عينج بالكاع من تمشين
تمضحك وصوت عالي ماريد بالسوك نهائي
حتى ويه ابو المحل امي تعامل ويا انتِ الي
عليج فقط اختاري والباقي على امي وخليج
ويه امي لا تروحين لمحل وحدج ماشي
نور - باوعت علي ابد ماعجبني كلامه لان
اني مو طفله واعرف بدون مايكول سكتت
ماحجيت شي لان اذا احجي راح تصير مو خوش
رعد - يلا بويه ننزل
نور - ماجاوبته نزلنه سلمو علي الحراس
وتيلا الشاغله مالتهم جانت تغسل الحوش
تيلا - مرهبا بابا
رعد - هلا تيلا شلونج
تيلا - زين بابا مرهبا ماما
نور - هلا حبيبتي مراحب
رعد - وين ماما بتول و تبارك
تيلا - راح لبيت بابا ماما جديده اجه
رعد - منو
تيلا - مايعرف بابا
رعد - خير ان شاءالله
تعالي بويه نشوف وينهم
نور - راح واني ورحت ورا دخلنه لصاله هوسه
وكراتين وعلاليك ( اكياس )
رعد - كعدي هنا بويه
هسه اروح اشوف وينهم
نور - ماشي
كعدت عل تخم بالصاله وهو صعد فوك
شوي وجتي امه وياها مره تنطي شبه خاله جوان
كمت سلمت عليها
جوان - ياهلا ومية هلا بنيتي نورتي البيت
نور - هلا بيج بنورج حبيبه
سعديه - يمه فدوه منو هاي الحلوه
جوان - اقارب الحجيه ام ركان
سعديه - تخبل ما شاءالله
نور - عيونج الحلوه خاله تسلمين
جوان - يمه نور هاي تكون اختي
نور - اها مو اكول تنطي شبهج
ياهلا بيج خاله تشرفت بمعرفتج
سعديه - فدوه لعيونج داده تسلمين الي الشرف
نور - نزلت بتول ركض حضنتني
بتول - ولكم هاي منو منورنه
يا هلااااااااا مشتاكلتج شنو هاي
نور - ههه اني الاشوق حبيبتي
بتول - فدوه لهل ضحكه اخبارج ياعمري صحتج شو حليانه ولج
جوان - هيَ من يوم يومها حلوه ما شاءالله
نور - تسلمون عيونكم الحلوه
نزلت تبارك وبنيه وياها ماعرفها
سلمت عليه تبارك بس البنيه ماسلمت
تبارك - داده نور شلونج ياكَلبي
نور - الحمد لله حياتي انتِ اخبارج
تبارك - الحمد لله حبيبتي
ها يمه يلا مانروح
جوان - بلا هسه اشوف منو ياخذنه
رنكين - خاله عيوني
رعيد وينه خلي هو ياخذنه
نور - اول ما جابت اسمه التفتت عليها
منو هاي اباوع لابسه فستان ضيك لازك
لزك على جسمها ورجلها امبين شوي قصير
الفستان ولابخه وجها بالمكياج هيَ حلوه بس امبالغه بالمكياج واللبس وتصرفاته مدري شلون مارتحيتلها ماعرف ليش
جوان - وين رعيد
بتول - فوك بغرفته
جوان - روحي شوفي يكدر ياخذنه
بتول - ماشي
نور - صدفه وهما يحجون نزل رعد بيده الموبايل كامت خالته تحضنه وتبوس بي وهاي البنيه اول ماشافته كامت تتموع بالحجي كدامه صدمتني
رنكين - شلونك رعيد عيوني شخبارك داده
رعد - هلا برنكين الحمد لله شلونج انتِ
رنكين - دومك بخير عيوني انا هسه صرت بخير
نور - لا والله شبيها هاي
اباوع شلون تتموع وهو يحجي وياها
ضجت حيل ضجت كلت ال بتول
بتول منو هاي
بتول - بلوه سوده
نور - ياستار ياربي
بتول - اي والله شبيج هاي بنت سعديه خالتي
نور - ليش هيج تحجي ويه اخوج
بتول - كاتله نفسها علي وهو مامعبرها
نور - اها بس هذا الباقي وهاي من شوكت عيني
بتول - من زمان ماتشوفيها مو صغيره
لحد هسه مامزوجه متامله رعد ياخذها
نور - صخام الصخمني
بتول - ههههه شبيج
نور - ها لا ماكو شي
التفتت اشوفها شلون تحجي
رنكين - عيوني رعيد ماتاخذنه انت لسوك
ليش نروح ويه السائق
سعديه - اي والله يمه انت اخذهم
رعد - ماتروحين انتِ وياهم
سعديه - لا يمه وين اكدر امشي اتعب بسرعه
جوان تروح وياهم كافي
رعد - ماشي بتول شنو هاي الكراتين بالصاله
بتول - مال ديكور القاعه
ابوي جابهم كال اخذه للقاعه
رعد - وين الولد ليش ما ماخذي
جوان - يمه دوام عندهم بعدهم بالكليه وحيدر
ماعرف وين راح
رعد - ديلا اني أخذهم بس استعجلو
رنكين - حاضرين عيوني انت
نور - باوع عليه رعد ضحك واني
النار تاكل بيه من وره تصرفات هاي البنيه
جوان - يلا يمه روحو لسياره هسه اجي
بتول - ماشي يمه نور يلا تعالي نروح
نور - اي
رحنه اني وهيَ لسياره كعدنه ليوره جتي
بتول وهاي البنيه مدري شسمها كعدو يمنا وامه
كعدت كدام عدل المرايه على جهتي باوع عليه
غمزلي ابتسم شغل السياره
رنكين - عيوني رعيد شغللنه اغنيه شي
رعد - يا اغنيه تردين
رنكين - على ذوقك عيني
نور - كلت بكَلبي تنفكس عينج شلزكتي عيني وعيوني الصبر ربي الصبر
شغل اغاني وهاي كامت اطكطك بيدها
وتسوي حركات واني مصدومه كلت ال بتول
: صدك جذب شدتسوي هاي
بتول - ههههه اي داده هذا طبعه عود عبالها
تجذب نظر رعد
نور - شكد خفيفه
بتول - كُلش
نور - كلت بكَلبي
ياحضي هاي منين طلعتلي
رنكين - عيوني رعيد سوق على كيفك
عندي فوبيا من السرعه
رعد - صار
نور - عشتو عندها فوبيا باوعت على رعد
عيونه علي خزرته حس عليه ضحك
جوان - ها يمه ضحكنه وياك
رعد - ههه سلامتج حبيبه ماكو شي
رنكين - فدوه لهل ضحكه عيوني دايمه
نور - كوه كدرت اسيطر على نفسي
باوع عليه ضحك رد عليها
رعد - تسلمين
رنكين - الله يسلمك ويحفظك عيني
نور - احتريت مدري اختنكت فتحت
جام السياره وادعي الله يصبرني حست عليه بتول
بتول - داده شبيج
نور - اختنكت
بتول - ليش
نور - مادري
بتول - اكله يوكف السياره
نور - لا حبيبتي فتحت الجام هسه اصير احسن
بتول - ماشي حبيبتي
نور - سكتت وهاي عود ماسكه ايد
تبارك تصفك (تصفق) وتغني ويه الاغنيه وتسوي
حركات ورعد كل شوي يباوع عليه من المرايه
ويضحك من صدك ضجت منين طلعتي هاي ناقصني اني وصلنه هما نزلو واني دانزل كال
رعد - بويه مثل ماكتلج
نور - باوعت علي عبالك حط بانزين عل نار كلبي كتله
: وانت بس اضحك خوش مكيف عل وضع
رعد - هههه لعد شسوي ابجي
نور - لا ليش تبجي اضحك عيوني تنفكس
عيونج ان شاءالله
رعد - هههههههه يابه فديت التغار
نور - اي وانت كيف على نار الغيره
بسيطه رعد من نرجع يصير خير
خرب من الضحك واني نار تاكلني اكل
عفته نزلت امه ماعرف شحجت ويا وراح
جوان - يلا يمه امشو
رنكين - اي خاله
نور - اباوع شلون تمشي وتتعيقل بتول كالت
بتول - هههههه شو صافنه عليها
نور - الحمد لله والشكر على
نعمة العقل بس هيج اكول
بتول - اي والله ههههه
نور - رحنا من محل لمحل ماعجبهم شي
رنكين - اوووي شني هاي ماكو شي حلو
تعالو نروح لمحل صديق بابا
جوان - وين صاير يمه
رنكين - قريب منا امشو وراي هسه اني ادليكم
نور - ضلينه نمشي ونمشي تعبنه عود تكول قريب
وجان توكف يم محل جبير وكله فساتين راقيه تخبل تخبل كالت
رنكين - تعالو لهذا المحل شغلاته كله ماركه
وحلوه دوم اشتري منا
جوان - اي يلا خلي نشوف شعنده
نور - دخلنه المحل راقي ومرتب جتي بتول
بتول - واخيرا استفادينه منها
نور - سكتي وخليها
بتول - هههههه ليش ماحبيتها
نور - تصرفاتها مدري شلون
بتول - اي صح ههههه
نور - الله يهديها
بتول - امين
نور - البنات كلمن وراحن لجها يشوفون الفساتين
المحل جبير جتي خاله جوان كالت
جوان - تعالي يمه نشوفلج فستان حلو
مثلج
نور - والله انتِ الحلوه
جوان - حبيبتي شوفي هذا الاحمر يجنن
نور - خاله رعد كال اشتري فستان
لون نيلي او جويتي
جوان - اي صدك يحب هذي الألوان
نور - اي ويكون مستور مايقبل ضيك
جوان - حقه اذا عنده ورده مثلج
نور - ابتسمت كتلها
انتِ الورده حبيبتي
بدينه نختار اني وهيَ عجبنه واحد لونه
جويتي مال محجبات مستور بس كله كرستال وقماشه ستن يجنن
جوان - هذا كُلش حلو
روحي جربي نشوفه عليج
نور - ماشي
اخذت الفستان ورحت لبسته وطلعت
شافته ام رعد وبتول وتبارك انصدمو على جماله
جوان - بسم الله ماشاء الله يجننن
بتول - عزه بعينج ولج نويره منين لكيتي
مو فستان ضيم وربي
تبارك - يخبل شو ماشفته اني
نور - كدامكم ياكَلبي
بتول - لا حبيبتي انت محليته
تبارك - صح كلام بتول
جوان - كُلش حلو يمه
نور - اباوع هاي البنيه باوعت عليه
من فوك ليجوه ماعجبها عوجت حلكها كالت
رنكين - عيوني اصلا يخزي عليج فدنوب
يخنك لا ايد يبين لا صدر لا رقبه
هو هذا هم اسمه فستان
نور - رديت عليها
والله عزيزتي اني محجبه واحب هيج فساتين
وبعدين اني البسه مو انتِ
بتول - لا بالعكس يخبل عليج
رنكين - يخبل من الخزي ماعندكم ذوق
جوان - داده رنكين كلمن وذوقه شعليج بالبنيه
رنكين - مالي شغل والله بس هيج حبيت انطي رائي اوي بكيفها
تبارك - اكلج تعالي نشوف هذا حلو عليه
نور - راحت ويه تبارك فلا حبيتها كالت بتول
بتول - لا تزعلين منها هيَ هيج عقلها شنسويلها
نور - بس ترا ماتعرف تحجي
بتول - اي والله خيه ماتعرف بس صدكي يخبل
عليج يخبببل
نور - حبيبتي تسلمين
ها خاله شتكولين اخذ هذا
جوان - اي يمه يخبل ونفس اللون الردتي
نور - اي
رحت بدلت اخذت الفستان وبنفس المحل جان اكو كعب كُلش نازك وحلو اخذته ويه الفستان
وبتول والبنات بعدهم يكدرون الفساتين عفتهم
ورحت كعدت يم ام رعد مسكت ايدي كالت
جوان - يمه نور اني مقصره وياج عذريني
بس مثل ماتشوفين مشغوولين ويه حيدر
شلونج ويه رعيد مامحتاجه شي احجي لا تستحين
نور - لا خاله حبيبتي لاتحجين هيج ماقصرتي وياي واني الحمد لله زينه مامحتاجه شي تسلمين
جوان - يابعد عمري اخبار رعيد
نور - زين الحمد لله
جوان - الله يفرحني بجهالكم
نور - الله كريم خاله بعد وكت
جوان - الله كريم
نور - خاله هاي الفلوس مال كعب شوفي
بيش مايقبل اني اتعامل ويه صاحب المحل
شايفه هيج شي
جوان - ههههههه اي عنده طبع ماحلو
يغار بشكل وغيرته تمللك مو بس غيره
نور - والله ياخاله شكلج ماحب هيج يخنكني
جوان - بنيتي صدكي يحبج
نور - اعرف بس مو هيج داتعب بحبه
جوان - حقج يمه اني احجي ويا ولا يهمج
نور - ياريت والله تحجين ويا
واحنا دنحجي جوي البنات
بتول - يلا يمه خلصنه
جوان - صار زحمه
تبارك - ههههه والله بعد تعرفين احنا البنات
من نشتري تراك مال بيت نفر السوك فر انوب
فستان لمناسبه بعد حقنه
جوان - اي يابه حقكم
رنكين - خاله عيوني خابري رعيد خلي
يجي ورانه
نور - ضليت اباوع عليها كلت بكَلبي
دمج شكد ثكيل ولا تنجرعين كالت بتول
بتول - لا رعد راح اخذ غراض الديكور
للقاعه هناك يشرف عليهم خلي السائق
يجي
جوان - اي صح هسه اخابر السائق احسن
نور - خابرته شوي واجه واحنا بالطريق رعد
خابرني توترت ماعرف ارد مارد انقطع الاتصال خابر امه ردت
جوان - ها يمه لا وياي اي هسه دنرجع
اي غير رايحين لسوك شلون مانتاخر يااا هاي
شبيك ليش خليها ويه البنات ولك يمه قابل
غربه احنا مايفيد الحجي وياك اي فهمنه ديلا
يمكن ماتكدر اي هو موجودين ديلا يمه مع
السلامة حبيبي الله وياك
نور - سدت الخط حسيت جان
يقصدني بكلامه
بتول - ها يمه شيكول رعيد
جوان - ماكو شي يمه يحجي عل قاعه
رنكين - فدوه لعيونه شايلكم شيل
شتردون بعد
نور - عزه بعينها شنو من بنيه هاي بكل عين صلفه
تكول فدوه لعيونه ربي صبرني ماكدر احجي هنا المشكله وراح اموت من القهر
جوان - اي والله شايلنه شيل ويتعب سوده
عليه
نور - كلت بكَلبي سوده عليه اني على هاي
البلوه على كولت بتول
وصلنه للبيت نزلو البنات ردت انزل كالت
امه
جوان - يمه هذه زوجج تخبل صار عصبي
يكول ليش متاخرين بالسوك كال هسه ترجع لشقه اكله خليها يمنا ويه البنات مايقبل رجعي يمه مابيه حيل خبال رعد واعصابه
نور - الله يساعدني
جوان - ههههه اي والله
يلا يمه باجر خلي يجيبج
روحي ويه البنات لصالون
نور - ماشي خاله
كالت لسائق على مكان الشقه وراحت
واني بقيت وره كاعده شغل السياره
السائق دك الموبايل هو جان رديت
رعد - وينج
نور - راجعه لشقه
رعد - ليش متاخرين بالسوك
نور - مو اني البنات اتاخرو
رعد - ديلا فد ساعه وارجع اني هم
نور - ماشي
سد الخط كملنه الطريق وصلنه اخذت الفستان
ورحت لشقه اول مادخلت شمرت الفستان ورحت
اتمددت على تخم يابويه تعبت شنو هاي
ارتاحيت كمت اخذت الفستان
لغرفة النوم بدلت لبست دشداشه شتويه
بس قصيره شوي مال بيت احتريت كُلش من
التعب دك الموبايل اباوع رقم غريب منو هذا
ارد مارد
ماعرف احتاريت فصل رجع مره ثانيه دك
يرن ويرن واني محتاره بين ارد او مارد كلت
خلي ارد يجوز بتول او تبارك رديت اجاني
صوت بنيه
ريتاج - مرحبا .........................................
_
_
_____
يكول
أراك في حروفي أتراني كما أراك ؟
أجدك بين نبض القلب فهل تجدني هناك ؟
ألقاك مع طيفي فهل تلقاني كما ألقاك ؟
تاه ناظري فاصبحت لا أرى سواك ،
أي عشق هذا ياقلبي انه الجنون بمحياك ،
__
انتظروني في البارت القادم
وربي ردت اختصر حدث ريتاج بهذا البارت
بس ماكدرت احداث هواي وماكدر اختصر
هواي حتى تعيشون وياهم كل لحظه حلوه
بالرواية يعني اجباري صادف عل بارت القادم
بارت ريتاج
ملاحظه بارت اليوم اطول
بارت بالرواية تقريبا 7000 الف كلمه حق
تعبي وياكم فضلاً وليس امراً
لا تنسون التصويت بالنجمة وعلقو بين الفقرات
اذا شفت تفاعل قوي على هذا البارت
راح استمري انزل بارتات اطول ان شاءالله
واذا لا اخر بارت اطوله بعد بقت يمكم اليوم ماكول 200 تعليق لا اريد اشوف انتو وضميركم وتفاعلكم وحبكم لروايه شكد
حسابي انستجرام انشر
هناك كلشي يخص الرواية 👇
حسابي واتباد تابعوني حتى يصلكم كل جديد
وضيفو الرواية في المكتبه حتى يصلكم الأشعار اول ما انزل البارت ❤👍
Jehan-Stories
_
_
والان قلبي ثقلو ميزان حسناتكم بذكر الله
"""""""""
سبحان ألله
ألحمد لله
لا إله إلا ألله
ألله أكبر
"""""""""
#خلف القضبان روح يتيمة
#بقلم الكاتبه جيهان آغا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!