رواية خلف القضبان روح يتيمة الفصل السابع عشر 17 - بقلم الكاتبة جيهان آغا

#خلف القضبان روح يتيمة
# بقلم الكاتبه جيهان آغا

_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
_____

رعد - ولك غير البنيه الراد يعتدي عليها

ركان - ليش ماعندها اهل شو صاير حنين ماعرفتك
ههههه

رعد - انجب

ركان - ههههه خوش

رعد - بالليل نشاوف

ركان - يم عُمر اللمه

رعد - ماشي

ركان - يلا روح صاير رخاخ الاخ ولا عرفتك ههههه

رعد - كلت انجب خوش
يلا في امان الله

ركان - هههه الله وياك خويه

رعد - وعفتهم الولد كملو ويا التحقيق
رجعت للبيت مسافة الطريق كل شوي اذكر شكلها اكول على نفسي تعبان الظاهر اكو اسوء مني سحبت سيجاره وصلت للبيت اول مادخلت جتي بتول

ها بشري شلون صارت

بتول - سيف انطاها ادويه نامت

رعد - ومرت ابوها ماجتي

بتول - بلا من ردنه نطلع جتي وكامت تحجي وتصيح وتتهم نور انو هيَ السبب

رعد - ذوله يرادلهم تربيه واني الراح اربيهم

بتول - شلون

رعد - بالقانون بعد اخوج بالقانون صبري عليه

بتول - خوش صدك الرجال شصار بي

رعد - كعدت عل تخم اخذت نفس من السيجاره
وكلت

زوركته تزورك صار جنازه كاع وامشي علي

بتول - ياااا هههه كفوو عمي صدك اسد الجهاز

جوان - هلا يمه شوكت رجعت

رعد - كمت بست راسها
هلا بيج حبيبه هسه رجعت

جوان - شصار بهذا النذل

رعد - شنو تتوقعين يكون مصير اليوكع جوه ايد النقيب رعد

جوان - كفو من ابني
سوده عليه البنيه ترجف من الخوف

بتول - كُلش خطيه هسه شنسوي تروح لو تبقى

رعد - بقيها باجر احاول احجي وياها والله كريم

بتول - ماشي
واحنا نحجي سمعنه صوت سياره التفتت على تبارك كلت

تبو اليوم شكد بالشهر

تبارك - لحظه اشوف
15 ليش

بتول - وووولكم هلاااا رجع بابا

تبارك - صدك صارله اسبوع

رعد - اهوو صدك مو وكتك

بتول - رعد ضاج
اجه ابوي رحنا اني وتبارك حضنا

هلا بويه فديت نورت شتاقيتلك

عمران - هلا بعد ابوج

تبارك - فدوه لعيونك بويه شكد مشتاكتلك

عمران - اني الاشوق بعد ابوجن

جوان - نورت ابو حيدر شلونك

عمران - هلا بالحبيبه بنورج شنو حيدر والبقيه مو بالبيت

جوان - لا بالبيت

بتول - شفت رعد ضاج كام اجه حيدر واحمد وسيف سلمو على ابويه وباسو راسه  كعدنه كلنا بالستقبال وابوي يحجيلنه على سفرته شلون جانت و جايب هواي هدايه من عطور وملابس من دبي وزعهم علينه كل واحد بينه اكثر من هديه مشتريلنه تذكرت رعد كلت

بابا وين هدية رعد

عمران - بعدين

بتول - لا بابا فدوه شنو هديته وين
خلي نشوفه

عمران - كافي لا تعاندين بويه كتلج مو مهم هسه عجبكم الهدايه لو لا

حيدر - كُلش حلوين شكراً بويه

سيف - حيل حلوين شكراً

احمد - اكيد عجبنه شكراً بويه

عمران - بالعافيه عليكم 

بتول - جابت تيلا كرزات وحب شمس وعصاير كعدنه نحجي ونسولف وسولفنه لي ابويه على موضوع نور وصدمنه بردة فعله

عمران - شنووووو تخبلتو شلون هيج تسوون
قابل احنا مبتلين بالناس شلوون ادخلون وحده غريبه للبيت شلوون لج جوان جم مره محضرج ومنبهج شنو اااانتِ تخبلتي مايفيد وياج غير الضرب لو شنووو

حيدر - بويه اهده البنيه ماعدها احد انجبرنه
نجيبها يمنا

عمران - انت اااانجب شنو مخلفيها وناسيها
واحنا شكووو بيها عدها ماعدها مشكلتها واني شكوووو ابتلي بمشاكل الناس شنووو ناقصني مشاكل

سيف - بس تكوم نشوف منو عدها و نبلغهم يجون ياخذوها

عمران - اسمعووو منا لحد الليل هاي البنيه ماتبقى بالبيت فهمتوووووو اني طالع حركتو دمي الله لا يوفقكم قسماً عظماً اذا رجعت بالليل وجانت موجوده تشوفون شي مايعجبكم فهمتوووو ادبسززيه صايرين كريمين براسي ولد جوان
وانتِ حسابج بعدددين ياجوان

بتول - ركع الباب وطلع نزلن دموع امي مسحته بسرعه علمود لا نحس  اجه رعد صار عصبي

رعد - شبييي هذا تخبل

احمد - اوووف صدك ما جان ناقصنه مشاكل

حيدر - ولك سيف شناطي البنيه دخلي تكوم نفهم سالفتها قابل نحرك بيتنه على بنات العالم

سيف - هاي شبيك حيدر صدك تحجي ولك روح شوف حالتها شنو انتو ماكو ذمه وضمير بكَلوبكم

حيدر - واحنا شكو صدك كلام ابويه قابل مبتلين بيها شعلينه بالناس

رعد - حيدر انت انجب اليسمعك يكول جايبين بنات الملا.هي للبيت شبييك

حيدر - اتفضل استلم ولك رعد من شووكت صاير
تهتم لناس شو صاير رخاخ ماعرفتك

رعد - حيدررر انجب واحترم نفسك وتذكر اني اكبر منك

جوان - ولكم يمه كافي شجاكم ذكرو الله

بتول - اخواني ديحجون وجان نسمع صوت نور
ورانه التفتنه جانت واكفه وعينها في الأرض تحجي ودموعها تنزل وايدها ترجف

نور - كمت على صوت صياح فتحت عيوني انصدمت شنو وين اني شوي وتذكرت شصار وياي بجيت احس روحي مو نظيفه كمت شفت ملابس صلاة بالكاع لبسته لان ملابسي كله مشكك لبسته وطلعت من الغرفه بعدني مامتقدمه كم خطوه اسمعهم كلهم يحجون بسالفتي نزلت دموعي وين ماروح اكون عِبْء على الناس تقدمت وعيوني في الأرض وحجيت بصوت متقطع ومخنوك كُلش

ا ا اني اريد ارجع
التفتو كلهم عليه اول مارفعت راسي جتي عيوني بعيونه نزلت دموعي جتي بتول رادت تلزمني ماخليتها

لا لا لحد يلزمني لا لا

بتول - ماشي حبيبتي اهدي تعالي كعدي هنا

نور - رحت كعدت

جوان - يمه شلون صرتي

سيف - بعد اخوج بس اقيس ضغط الدم اذا تخليني طبعاً

نور - لا لا لحد يلزمني لا لا

سيف - خويه بس اهدي على راحتج خلص مانقيس

نور - كعدت عل تخم كلهم كعدو
كعد مقابيلي الاسمه رعد وبده يسئلني

رعد - بويه اول شي لا تخافين وهذا الحقير حسبي صار في خبر كانَ انسي راح يعفن بالسجن بس الي اريد منج تحجيلي شصار وياج من البدايه لنهاية

نور - رفعت وراسي و عيوني بعيونه ودموعي تنزل غمضت عيوني واخذت نفس كتله

من وين ابدي وشلون ابدي ماكدر احجي

رعد - كومي وياي نروح للمركز هناك احجيلنه قصتج علمود التحقيق والقانون ياخذ حقج

نور - مسحت دموعي وكتله
لا غلطاً محد ياخذ حقي غير ربي هو وحده يعلم بحالي

بتول - ونعمه بالله داده ماعندج عمه خاله عم خال

نور - بلا عندي بس حتى اذا اشوفهم ماعرفهم
ضحكت بحزن

ههه هما خلي اول مره يعرفون نور عايشه لو ميته

جوان - الله يساعدج بنيتي لا تنقهرين

نور - الحمد لله

رعد - يلا بويه كومي نروح واحجي كلشي هناك
ونشوف بعدين شلون نحلها

نور - ب ب بتول ممكن طلب

بتول - اكيد تفضلي حبيبتي

نور - جانت كاعده يمي تقربت شوي وكتلها بصوت منخفض جداً

اريد اسبح احس نفسي مو نظيفه

بتول - اي حبيبتي ميخالف كومي وياي

رعد - وين نريد نروح

بتول - اي بس نص ساعه وروحو عنده شغله

رعد - ماشي

نور - اخذتني بتول للحمام وجابتلي ملابس
وكالت

بتول - اي شي تحتاجين طلبي وادللي حبيبتي

نور - شكراً

بتول - العفو عيوني انتِ

نور - راحت بتول واني فتحت المي الحار
كعدت ابجي جوه المي احس نفسي وصخه مو نظيفه مثل المخابيل صرت اغسل بوجهي ورقبتي وايدي انهاريت واني اذكر لمساته على جسمي وشلون راد يغت.صبني ااااخ اريد اصرخ صوتي انبح ابجي وامسح بكل مكان لمسني بيده الوصخه طولت ساعه كامله اسبح وبعدني احس نفسي مو نظيفه الله يحركم مثل ما حركتو كَلبي الله لا يوفقكم دنيا وآخره حسبي الله ونعم الوكيل
ضليت ابجي جوه المي اندك باب الحمام

بتول - نور حبيبتي انتِ زينه

نور - اخذت نفس بتعب وكلت
اي

بتول - ماشي حبيبتي

نور - كملت نشفت شعري ولبست دشداشة بتول شوي جبيره عليه لفيت الحجاب وطلعت بعدهم كاعدين بالستقبال كال اخوها

رعد - يلا بويه امشي نروح

نور - كتله ودموعي تنزل
بس منال ماراح تعوفني اعرفها كُلش زين

رعد - لا تخافين انتِ بأمانة رعد محد يكدر يتقربلج

نور - من هيج كال رفعت راسي صدفة عيني بعينه حسيت بشعور غريب ماعرفت اوصفه

بتول - كومي حبيبتي انطيج شي تلبسي

نور - لا مايحتاج

بتول - يااا قابل تروحين بملابس البيت كومي
عندي تعالي ملابس

نور - ودتني لغرفتها غرفه جبيره ديكوراتها تجنن ما شاءالله فتحت الكنتور مليان ملابس

بتول - اني انزل موعد حبوب امي نسيت انطيها اختاري اي شي يعجبج حبيبتي لا تستحين

نور - بشرط

بتول - شنو

نور - اروح للمركز وارجع اغسله وارجعه الج

بتول - ههههه خلص على راحتج اهم شي راحتج حبيبتي

نور - تسلمين ياعمري

راحت بتول التفتت ملابسها اكثر شي جينز واني ما البس جينز اكثر شي فساتين البس جان اكو فستان طويل لون اسود مطرز لبسته ويه حجاب اسود بس احس بدوخه وخايفه لا اعترف بكلشي ومنال تسويلي مشاكل وماتقبل ارجع للبيت اكيد ماراح تقبل منال واعرفها ياربي حايره دلني شسوي وشلون ابدي وشحجي

عدلت الحجاب  ونزلت جوه اول مانزلت
التفتو عليه اله رعد جان صافن عليه عيونه ولا رمشة توترت نزلت راسي

رعد - اول مانزلت التفتت سبحان الخالق هاي البنيه شكد بيضه ولابسه اسود بارز بياض وجها وايدها ضليت صافن لا ارادين نزلت راسها حسيت على نفسي

بتول - حبيبتي شلون صرتي

نور - احسن بس دايخه كُلش

سيف - اي خويه ضغط الدم نازل هبوط حاد بتول روحي وياهم احتمال ادوخ

رعد - لا وين تروح ماقبل اني وياها واي شي يصير اكو ضباط العنصر النسوي هناك يهتمون بيها يلا بويه اتاخرنه امشي

جوان - يمه لا تتأخرون

رعد - ان شاءالله حبيبه بتول تبارك خويه ديربالجن عليها ماوصيجن

تبارك + بتول - حاضر

رعد - التفتت عليها بعدها واكفه ومنزله راسها

بويه اتاخرنه يلا امشي

نور - ماحجيت شي هو طلع واني طلعت وراه وجان امه تكول

جوان - يمه خلي بتول تجي وياكم تكعد بالسياره ماتنزل علمود البنيه خطيه

نور - وكف شوي وكال

رعد - ماشي

نور - راحت بتول بسرعه بدلت ونزلت طلعنا كعدت كدام واني كعدت ليوره طول الطريق كلما التفت اشوف عيون اخوها عليه كمت اخاف من كل الرياجيل

هو يباوع واني اعصر بيدي من الخوف كُلش خايفه ومتوتره وصلنه

رعد - بتول خويه انتِ ابقي هنا لا تنزلين

بتول - ماشي خويه نور شلونج هسه

نور - بدموع / خايفه

بتول - ياعمري ليش الخوف

رعد - بويه لا تخافين اني وياج

نور - ماجاوبته نزلنه هو يمشي واني امشي ورا بعد المسافه البينه متر هو ضخم معضل طويل واني ناعمه ماعرف ليش اخاف منه او صرت اخاف من كل بني ادام من وره زوج منال تذكرت الصار نزلت دموعي التفت شافني اجه يمي

رعد - بويه ليش البجي

نور - هو هيج كال واني طكيت من البجي
كتله

ا ا اني ا ا اخاف

رعد - اني وياج وشاهد وشفت كلشي لا تخافين لازم هما يخافون مو انتِ يلا امشي لا تخافين

نور - راح واني امشي وراه دخلنه للمركز كلها التفتت علينه اول ما شافو رحبو بي ذاك الترحيب
وقسم منهم ضربوله تحية احترام مع العلم هو ما لابس ملابسه العسكريه بس الظاهر كلش يحترمو
اجه واحد من الضباط حضنه وسلم علي

علي - ياهلا برعيد عمي منور المركز كله

رعد - ههه هلا بيك حبيبي بنوركم

نور - التفت الضابط عليه ورجع التفت على رعد

علي - خير خويه شصاير

رعد - هيَ نفسها الكتلك عليها

علي - اها قصدك هذا الحقير الراد يعتدي عليها

رعد - اي شسويتو بي

علي - بالسجن المؤقت حالياً
مع الأسف حالات الاغتصا.ب كثرانه
خلي تروح للغرفه هسه اجي احقق وياها

رعد - لا اني احقق انت كمل شغلك

علي - متأكد

رعد - اي

علي - ماشي خويه نشاوف بعدين

رعد - ماشي
التفتت عليها اشوفها بعدها خايفه ومتوتره كتلها
روحي لهاي الغرفه ولا اطلعين منها هسه اجي

نور - ماحجيت شي نزلت راسي ومشيت هو ماعرف وين راح كُلش متوتره المركز كلهم ضباط ومنتسبين وقليل اكو بنات وياهم رحت لغرفة التحقيق اباوع شنو هاي الغرفه تقبض روح الواحد حسيت نفسي اختنكت شوي وانفتح الباب والرجفه رجعت تسري بدمي منزله راسي سحب كرسي وكعد مقابيلي اسمع صوت ولاعه وريحة سيجاره
ترس الغرفه خليت ايدي على حلكي كحيت اختنكت كال

رعد - شربي مي شنو عندج ربو لو شنو

نور - حجيت بصوت منخفض صوتي مايطلع من التوتر كتله
لا بس اختنك من ريحة السيجاره

رعد - خلص راح اطفيها  يلا
بويه اخذي نفس عميق واحجيلي شنو قصتج من البدايه لنهايه ولا تخافين

نور - ب ب بس م م موبيد خايفه

رعد - كتلج لا تخافين اني وياج وشاهد هم شفت كلشي ماكو داعي للخوف يلا احجي حتى اسمج ذكري راح اسجل الصوت

نور - اخذت نفس احس النفس كوه اجره
وحجيتله قصتي

اني نور اصلي من الموصل من عائله بسيطه متكونه من اب وام واني بتهم الوحيده من جنت في سن ال10 توفت امي جانت حامل باخويه أثناء  الولاده توفت امي و جان قلب اخوي كُلش ضعيف ماتحمل هو ايضاً توفه وابوي متزوج جان بس ماعرفنه على مرته وجهاله من ماتت امي وقتها كلي انتِ عندج ام ثانيه وعندج خوات ثنين اكبر منج نصدمت بوقتها وكُلش فرحت بنفس الوقت كل ضني راح اعيش حياة حلوه ويه عائلتي الجديد لكن مع الأسف صار العكسه منال بالبدايه جانت تمثل انو تحبني كدام ابويه ومن جان يطلع لشغل جانت تشغلني ومرات تضربني بقساوه وخواتي ثنين الجبيره جانت تحبني لكن الأصغر منها ماجانت تحبني دوم جانو يضربوني هيي وامها

اخذت نفس عميق وغمضت عيوني نزلت دموعي كملت

بعد 3 سنوات ابوية اتوفه بحادث سير ومحد خسره غيري اني ابويه جان كُلش يحبني ومن مات منال زاد تعامله وياي نحو الأسوء ومرت ايام واشهور وسنين تزوجو بناتهاوخلصو منها واني وكعت بيها بين الشغل التعب التعذيب الغدر الظلم وبيوم جوي صديقاتها كالو ليش ماتزوجين قتنعت تزوج هذا النذل ومن تزوجته وهو تصرفاته غريبه وياي ماقبل نبقى بالموصل كال لازم نجي لبغداد ومن جينه لحد هسه اني اتعذب منها ومن زوجها بس كل هذا لا شيء مقابل تعذيب اليوم

خليت ايدي الترجف على وجهي وبجيت من كل كَلبي

رعد - بويه كاف تبجين المهم حسب كلامج
اكثر من مره متحرش بيج سواء كان كلام او غيره

نور - اي

رعد - وين اهل ابوج اهل امج وينهم

نور - من ماتو اهلي وهما كطعو علاقتهم ويانه بسبب منال وتصرفاتها

رعد - وانتِ شنو ذنبج شلون عمامج يذبوج هيج شنو ماعندهم غيره لو شنو السالفه

نور - ماعرف كُلشي ماعرف عنهم بس كلي الي اعرفه واحد من خوالي ابغداد وين بضبط ماعرف

رعد - شنو اسمه

نور - ماذكر يمكن جان حسين تحسين ال....
هذا الي اذكره

رعد - هسه اريدج تحجيلي شلون هذا الحقير حاول يعتدي عليج

نور - مسحت دموعي بيدي ورجعن نزلن احجي وابجي حجيتله كُلشي كتله على الحوار الصار بين منال وزوجها وشلون يردون يخلصون مني ومن رحت اخابر سوزان اجه هجم عليه احجي وابجي وهو صافن بعيوني وكل شوي يكول بويه لا تبجين
كلمة بويه منه جانت صدك تحسسني بال امان خلصت وكتله على كُلشي الصار وياي كال

رعد - يلا كومي اخذج يم بتول ابقو بالسياره شوي واجي اكمل الأوراق

نور - ماشي كمنا وصلني لحد السياره ورجع هو
رحت يم بتول كعدنه بالسياره شويه واجه شغل السياره

بتول - ها خويه بشر شصار وياك

رعد - ننتظر يوم المحكمه حالياً في السجن المؤقت

نور - يحجي وكل شوي يباوعلي من المرايه مال سياره كلت

بتول اني ارجع للبيت

بتول - ياااا داده شلون يصير غير تاكلج اكل منال

نور - ميخالف اتحمل

بتول - لا ابقي يمنا

نور - لا حبيبتي شكراً انتو ماقصرتو وياي
جداً اشكركم

بتول - يااا حبي شبيج اصلاً هذا واجبنه

نور - طول الطريق جان يحجي ويه اخته وصلنه قريب عل بيت كتله

اذا ماكو زحمه ممكن توكف هنا بس انزل

رعد - ماشي

بتول - حبيبتي ابقي يمنا وباجر نشوف شيصير

نور - تسلمون كلامكم وكفتكم وياي يكفي شكري اخوانج وامج بدالي

بتول - عيوني انتِ تدللين داده
دير بالج على نفسج واي شي يصير تعالي يمنا

نور - تسلمين
التفتت علي بعده عيونه عليه من المرايه
كتله
شكراً تعبتك وياي

رعد - هذا واجبي ماكو اي تعب

نور - نزلت من السياره شفت الباب مفتوح شوي بلعت ريكي وتقدمت وجان اسمع صوت رياجيل وهوسه واحد منهم يصيح يكول

- هاي العار تخبلت نزلت راسنه الحقيره اله نغسل عارنه هيج ادبسز لازم من زمان تموت ...................................

_
_
_______________
يقول الشاعر

إِذا ما خَلَوتَ الدَهرَ يَوماً
فَلا تَقُل خَلَوتُ وَلَكِن قُل عَلَيَّ رَقيبُ
وَلا تَحسَبَنَّ اللَهَ يُغفِلُ عَن ما مَضى
وَلا أَنَّ ما يَخفى عَلَيهِ يَغيبُ

لَهَونا فَي الحَياةِ حَتّى تَتابَعَت الذُنوبٌ
وفوق موجات الحياة ابحرنه وقسة القُلوبُ

أعَلمُ أَنَّ اللَهَ يَغفِرُ الذُنوبُ
لكنِ اعَلمُ انهُ شَدِيدُ الْعِقَابِ وَأَنهُ الغَفُورٌ الرَحِيمٌ

ارفعُ اليدِ الى السَماءِ
وَأدعو أن يَأذَنُ في تَوباتِنا فَنَتوبُ
إِذا ما مَضى القَرنُ الَّذي كُنتَ فيهِم
وَخُلِّفتَ في قَرنٍ فَأَنتَ غَريبُ

ولَقَريبُ نَسيبُكَ مَن ناجاكَ بِالوِدِّ قَلبُهُ
وَلَيسَ لِمَن تَحتَ التُرابِ نَسيبُ
وَلَيسَ لِمَن تَحتَ التُرابِ نَسيبُ

_

_____

نور دخلت حرب جديده تتوقعون منو ذوله
وشنو راح يصير ؟

انتظروني في البارت القادم بارت ناري

قلبييييي تفاعلو اريد تفاعلكم ويه الرواية

التصويت بالنجمة
تعليق بين الفقرات  وصلو البارت اقل شي 200 تعليق علمود ينزل البارت القادم باجر ان شاءالله

ولي محبي الرواية تابعو حسابي انستجرام انشر هناك كلشي يخص الرواية 👇

وتابعو حسابي واتباد حتى يصلكم كل جديد

Jehan-Stories

الان ياحلوين ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبة جيهان آغا