رواية خلف القضبان روح يتيمة الفصل السابع والعشرون 27 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي

________

رعد - بويه رفعي راسج وخلي عينج بعيني

نور - ماكدر ارفع راسي احسه كُلش قريب عليه بس كتله

رعد

رعد - عيونه واهله وعشيرته كلهم

نور - بلعت ريكي صخام الصخمج يامنال شلون اخلي يبتعد كَلبي راح يوكف من سرعة ضرباته من التوتر راح يغمى عليه

رعد - احجي بويه لاتخافين احجي

نور - كلت بكَلبي ولك شحجي وانت هيج قريب بس ارفع راسي تصير كارثه يبوووو شجابني على هيج سوالف صخام الصخمج يامنال ربي لا يوفقج دنيا وآخره

رعد - نور بويه

نور - نعم

رعد - شو باوعي عليه

نور - رفع راسي بيده جتي عيني بعينه ذبلن عيونه وهو مركز على شفايفي وانفاسه الحاره تضرب بوجهي كال

رعد - نور

نور - نعم

رعد - لصبر حدود بويه

نور - اباوع عيونه ذبلن تقرب اكثر شديصير كتله بصوت منخفض

رعد

رعد - عيونه 

نور - ممكن تبتعد

باوع بعيوني وكال

رعد - ليش

نور - م م ماعرف

نزلن نظراته على شفايفي كال

رعد - امي حجت وياج بسالفة الشرط

نور - اي بس

رعد - بس شنو

نور -  ا ا اني ماكدر هسه
غمض عيونه وريحة عطره ترست ريتي
يبوو شلون سالفه هاي كال

رعد - ليش

نور - غمضت عيوني وكتله
رعد ماكدر افهمني 

نزل راسه وابتعد كال

رعد - ماشي براحتج

نور - كام
حسيت بي ضاج بس مابين نفسه كال

رعد - بويه اني كُلش جوعان كومي نحضر شي ناكله لو  اطلب من برا  شتكولين

نور - مسحت دموعي وكمت كتله
لا اني احضر شي لا تطلب

رعد - ماشي يلا بويه روحي غسلي وجهج وتعالي للمطبخ اني هم اساعدج على فكره اني خوش شيف هههه

نور - صدك

رعد - اي جربي وشوفي

نور - حلو

رعد - يلا اني اروح خلصي وتعالي
صدك نسيت اكلج وصيت مرت البواب تشتريلج كم قطعه ملابس مشي روحج بيهم وباجر روحي ويه امي اشتري الي يعجبج تلكيهم بغرفة النوم

نور - ماشي شكراً

رعد - اني وانتِ واحد ماكو شكر بينا

نور - هيج كال ابتسم وطلع ضليت اهفي بيدي على وجهي حتريت كُلش عزه العزاني شصار يبوووو  شجابني على هيج سوالف

رحت غسلت وجهي ورحت لغرفة النوم
اول مافتحت الكنتور فاحت ريحة عطره اباوع كله  بدلات رجاليه رسميه ودشاديش عربيه  وملابس عسكريه وملابس بيت وجينز وتيشيرتات وقمصان الكنتور عباره عن  ملابس رعد عزه هذا شكد يشتري ملابس اي مو اكول يوميه اشوفه يخبل يبووو حتى ذوقه بالملابس حلوه مثله هههه

وين الملابس الكال علي وين دورت ماكو التفتت بالزاويه يم السرير جان اكو كيس يمكن هذا هو  اخذته اشوف بي تراك ثنين واحد اسود واحد ابيض ودشداشه شتويه لون زيتوني اباوع بقه شي بالكيس وجان اشوف طقم ملابس نوم لون احمر اباوع عزه هذا شنو بس لا هذا الي غميت كصتي

صخام الصخمني لعد لمنو عزه اني البس هيج شي بس هذا الباقي يبووووو شجابني على هيج سوالف
شلون سالفه ولا فكرت بيها رجعتها للكيس

وماعرف وين اخليها ماريد رعد يشوفها فشله
ادري مرت البواب شحجي عليج هسه هو اني تراك اريد البس  واستحي من رعد انوب هيج ملابس ماكول غير صخام الصخمج يامنال شلون سالفه هاي هههههه

فوك صدمتي ضحكت على نفسي فتحت الحجاب واخذت الدشداشه رحت بدلت اباوع الدشداشه عريضه عليه طالعه تخزي يبوووو شسوي هسه اروح اجرب التراك بلكت يكون احسن

رحت لبست التراك الأبيض ضيك لازك لزك عليه
عزه بس لو اعرف هذا تراك لو ملابس نوم
والله استحي البسه علمود رعد بعدني مامتعوده علي رحت اجرب الأسود طلع يخبل عليه بضبط قياسي وكُلش حلو ونازك واخيراً اخذت الحجاب اريد الفه تذكرت هسه رعد مو محرم عليه ليش اتحجب كدامه بس مو عيب هسه شيكول عليه يبووو عليج نور ليش عيب قابل شمسويه انوب ماعندي مشط التفتت شفت مشط رعد يم العطور رحت وكفت يم المرايا مشطت شعري وهوَ شعري من النوع السرح بس خفيف قليل يعني مو سميك ومو كُلش طويل يعني يميل للقصر اكثر ولونه بني بندقي على شقار هو هيج ماصابغته مشطته اخذت خصلتين من الأطراف ثبته بال كماشه هسه تمام

انتبهت على عطوره شكد حلو مرتبهم اخذت واحد منهم رشيته على معصم ايدي شميته يبوووو
شنو هذا يخبل ريحته نفس العطر الايستخدمه
جعل محد غيرك يتعطر يارعد فددديت هههههه

انوب اريد اخلي شوي منه بس استحي منا
خاف يضوج استخدمت شي يخصه ماخلي احسن

رتبت الغرفه وطلعت اشوفه لابس الصدريه مال مطبخ صفنت علي اويلي هذا الرجال لو يلبس
كونيه يطلع يخبل علي فديته رحت كتله
شنو تسوي التفت عليه صفن

رعد - جنت اقطع بالسلطه وجان تدخل نور
التفتت اول مره اشوفها بدون حجاب ترعط رعط وربي هيَ من الأساس حلو وانوب هيج مرتبه نفسها وفاتحه شعرها ولابسه تراك طالعه تخبل
يعني واحد يشوف هيج جمال شلون يسيطر على نفسه اااخ يانور لو قابله اليوم اتقربلها شجان صار يعني نزلن عيوني عل شفه كرز مو شفه دخيلك ربي صبرني بس هيج اكول يعني حلالي وماكدر اتقربلها وربي قهر

نور - كتله
شنو نطبخ

احجي مارد عليه كصني كص بعيونه شبي هذا هو بلا شي متوتره انوب هيج يباوع رجعت مره ثانيه كتله

رعد

يااا مايرد صدك مايسمع لو شنو كتله بصوت اعلى

ررعد

رعد - ها بويه

نور- واخيراً سمعني كتله
مو داصيحك ليش ماترد

رعد - ها ماسمعت جنت شارد

نور - خوش كتلك شنو نطبخ
رجع يكمل السلطه كال

رعد - انتِ شنو تعرفين تطبخين

نور - كُلشي اعرف  انت شنو تحب

رعد - كلت بكلبي احبج انتِ هو اليشوفج شيحب بعد سحبت كلينكس مسحت وجهي عركت (تعرق)
كتلها

بويه اي شي تطبخين عادي بس شي خفيف
لان عشاء مو مثل الغداء

نور - ماشي راح اسوي بيتزا اطيب من المطاعم
اذا تحب طبعاً

رعد - اي يلا بيتزا بيتزا ليش لا

نور - بس دليني على مكان الطحين (دقيق)
وباقي المكونات

رعد - اي بويه فتحي الباب الاخير تلكين كيس الطحين

نور - ماشي
رحت فتحته لكيته وجبت الزيت خليت مي بالغلايه الكهربائيه علمود يحمي المي للعجين 

رعد - بويه اني خلصت السلطه بشنو تحبين اساعدج

نور - لا خلص روح غسل ايدك اني اكمل الباقي

رعد - ماشي

نور - راح غسل وكعد عل كرسي مال طاوله الطعام هو نفسه الفاصل بين المطبخ وصالة الاستقبال سحب موبايل وضل يكَلب بي واني كملت العجينه مال بيتزا عفته يختمر رحت طلعت الجبن وزيتون كتله
رعد

رفع راسه

رعد - عيونه

نور - تحب البيتزا بالخضار لو بس لحم وجبن

رعد - لا بس لحم وجبن عدنا لحم بالفريزر تلكي

نور - ماشي
رحت طلعت اللحم اريد اقطعه ماكدر جامد عفته شوي يموع التفتت اشوفه يباوع عليه اول ماشافني سوه نفسه مشغول بالموبايل اجاه اتصال
تغيرت ملامح وجها كال

رعد - بويه هسه اجي بس انزل اشتري عصاير نشربه ويه البيتزا لا تفتحين الباب لكأن من يكون
ماشي بنيتي

نور - ماشي
طلع واني كملت تقطيع اللحم

____

رعد - جنت كاعد اجاني اتصال اهوووو هاي ريتاج
سديته بوجها وطلعت برا خابرتها

ريتاج - رررعد وووينك  لااااا تخبلني

رعد - لججججج  بنت ال هسه شكول 

ريتاج - لا كمل بنت الشنو بس باقي تغلط عليه

رعد - انجبي وسمعيني كُلش زين لج لسانج هذا اكصه اذا مره ثاني تعلين صوتج علي فهمتي لو لا

ريتاج - رعد لا تخبلني يعني صار شكد اكلك تعال تعال وينك شبيك وياي ليش هيج فجأه تغيرت لييش بس فهمني

رعد - لج بابا اني مشغول مشغووول ماتفهمين ماعندي شغل غير اجي يمج شبيج

ريتاج - رعدي هوااي مشتاقتلك فدوه تعال اليوم مايصير هيج والله مايصير 

رعد - لا حولَ ولا قوة الا بالله
شتريدين انتِ شتريدين

ريتاج - بس اريدك ماريد شي ثاني

رعد - شوفي اني كُلش مالي خلكج كافي تخابرين
وتزعجيني كتلج من افرغ امرلج

ريتاج - شوكت يعني ها شوكت

رعد - اشوف باجر اذا كلت اذا
صادفني وقت فراغ امرلج

ريتاج - ماشي حبيبي انتظرك لا اطول فدوه

رعد - اشوف وهسه روحي عندي شغل

ريتاج - ماشي رعدي احبك

رعد - خوش يلا مع السلامه
سديت الخط اني بيا حال وهاي بيا حال

نزلت جوه رحت من الماركت اشتريت عصاير وقواطي ببسي شفت علبة النوتيلا اخذته لنور واشتريت نساتل واجباس لان اعرف البنات يحبون هيج سوالف دفعت الحساب وطلعت سحبتلي سيجاره ولعتها اخذت اول نفس تذكرتها سبحان الخالق مو بنيه ضيم

دك موبايلي  اشوفه ركان جاوبته

ها ارعن

ركان - ها ولك شصار وياك بشر بنيه ولد ههههه

رعد - يول انت صدك ماتستحي لشوكت تبقى ملطلط

ركان - اي عليك طالع شسوي ههههههه
هسه عوف الشقه ماصار شي

رعد - لا

ركان - ليش

رعد - اخذت نفس من السيجاره وكلت بحسره
حضي

ركان - ههههههه شبي حضك لسانك هل طول
ماتعرف تحجي وياها لو بس علينه لسانك طويل

رعد - ولك اااخ خليني بضيمي

ركان - صار عنده ضيم الاخ ههههههههه
هسه غير نعرف ليش

رعد - وربي البيه مكفيني شسويلها قابل اجبرها

ركان - تدلل عليك ياحضي هههههه

رعد - ههههه اي ناقصني

كلت بكَلبي تمون هيَ ودلالها

ركان - اضحك بعد اخوك اضحك والله شكلك راح تتعب وياها

رعد - انت هيج تكول

ركان - المكتوب امبين من عنوانه

رعد - ههههههه خوش

ركان - اكلك شو  اني الفرحان اكثر منكم  على شنو فرحان ماعرف

رعد - غير ضلعك تزوج شلون ماتفرح

ركان - اي صدك هسه شنو راح تسوي لعد بهيج حاله مادزلك تمر ماتحتاج سوده عليه ههههههه

رعد - خاب تنجب هلكد ماتحجي فكرتني

ركان - هههههههههه اني شكو

رعد - عوفني بحالي حتى راسي صدع

ركان - له له له رعوده عوده هيج يحجي هههههه

رعد - هو شبقو برعوده شسوي مشكله مو كل حجي ينحجي

ركان - ههههههه لا صدك متغير هاي من هسه خبلتك عيب ابني اثكل شوي

رعد - ولك ياعيب هاي صايره دايره حلالي ماكدر اتقربلها عوفني بضيمي اصرف نظر واشبع قهر وربي

ركان - هههههه الله يساعدك هو اليريد الحب يتحمل عذابه خويه

رعد - شسوي نشوف وين راح نوصل

ركان - هههههه اصبر خويه اصبر

رعد - لصبر حدود شصبر بعد

ركان - هههههههه بويه متت

رعد - دوم الضحكه الله يرزقني ضحكتك

ركان - ههههه اي تعال احسدني عل ضحكه
يلا روح يم الحب ادعي الله يصبرك  هههههه

رعد - ههههه امين 

ركان - يلا في امان الله

رعد - في امان الله
سديت الخط خلصت السيجاره
وصعدت فوك لشقه

______

نور - راح رعد واني كملت البيتزا والمكونات وحمسة اللحم وكلشي صار جاهز  بس ماعرف وين الفرن انوب ماعرف هو وين راح تأخر اووف شسوي كلت اشغل قرأن بالبيت رحت لصاله شغلت التلفاز وضليت اقلب بال كونترول شنو الظاهر مابي قناة القرآن معقوله انوب نسيت التردد تذكري نور تذكري شكد جان التردد خلي اقره اية الكرسي كل مره من انسى شي اتعوذ من الشيطان واقره اية الكرسي والكي الحاجه الضايعه مني

واني داقره دخل رعد بيده اكياس كال

رعد - بويه تأخرت عليج

نور - بصراحه اي شوي تأخرت

رعد - تعالي اخذي هاي الغراض مني ايدي

نور - رحت اخذتهم منا

رعد - العصاير خليهم بالثلاجه والباقي الج بويه
اني اروح اسبح اذا مابيها زحمه عليج ممكن تجهزيلي ملابسي مامتعلم دوم لو بتول لو امي تجهزلي

نور - ماشي لا عادي ماكو زحمه

رعد - ماشي بويه اروح اني

نور - رعد لحظه نسيت

رعد - ها بويه

نور - الفرن وين ادور علي ماكو 

رعد - شتسوين بالفرن

نور - هههههه صدك تحجي شسوي بي يعني لعد شلون تستوي البيتزا

رعد - هيَ تحجي واني بالي مو يمها كل بالي وتركيزي على جمالها انوب ضحكت اباوع عليها شنو من بنيه دخيلك ربي راح اتخبل صبرني

نور - صفن عليه سكتت كتله
هسه ماكلت وين الفرن

رعد - ها اي بالكونتر الباب الجوه
الطباخ هناك الفرن

نور - ماشي

رعد - دير بالج على نفسج من الكهرباء

نور - شكد احبه واعشقه عشق من هيج يهتم ويخاف عليه ابتمست كتله

تمام

رعد - عفتها ورحت اوووف يانور بس لو اعرف شسويتي بيه

نور - راح للحمام واني رحت طلعت العصاير خليتهم بالثلاجة والكيس الثاني فتحته كله نساتل ونوتيلا واجباس اوووي فدوه شكد حنيني صدك كلام امه من كالت ابني حنين ولج خاله من اروح فدوه لبنج ههههه

خليتهم عل كاونتر ورحت اطلع ملابسه اول مافتحت الكنتور ريحة عطره اويلي يابه محد خبلني غير عطرك يارعد انوب ماعرف شنو اطلعله دشداشه لا وين رايح هو بالبيت اطلعله تراك اسود مثلي ههههه اي هيج حلو يكون

طلعته تراك اديداس اسود ومنشفه
رتبتهم عل سرير ورحت للمطبخ اكمل البيتزا
فتحت الكاونتر صدك هنا الفرن حاولت اطلعه مو كُلش جبير حجمه صغير طلعته خليته عل كاونتر شغلته علمود وفرشت العجينه بالصينه مال فرن وخليت المواد علي وخليته بالفرن رحت كعدت عل كرسي بالمطبخ علمود كل شوي اشوفه لا يحترك وجان اسمع صوت رعد  شنو قابل كمت اتوهم واتخيل حتى صوته يبووو شجاني

شوي ومره ثانيه سمعت صوته اي والله هذا رعد عزه رحت اشوف شكو

رعد - نور بويه وووينج

نور - جان بالحمام من وره الباب كتله
ها جيت اعتذر ماسمعتك

رعد - عادي ماصار شي بس جيبي منشفه
اريد اطلع

نور - اي اي هسه
رحت ركض عل غرفه اخذت المنشفه ورحت انطي انوب وكفت شلون راح انطي كتله

شلون انطيك المنشفه

رعد - ولج بويه يعني شلون تنطيني هسه افتح الباب لحظه

نور - فتحت عيوني من الصدمه كتله
لا لا شنوو  تفتح الباب راح اتركه هنا في الأرض واروح وانت اخذه

هيج كلت وهذا خرب من الضحك
شبي هذا

رعد - هههههههههه ولج بنيتي انتِ ليش هلكد فاهيه
وين راح بالج اقصد افتح الباب امد ايدي واخذ المنشفه بوي صدك ضحكتيني ههههههههه

نور - غميت كصتي من امداني يافشلتي عفت المنشفه بالأرض ورحت للمطبخ اضرب بهدوء على خدي عزززه عزززه يافشلتي  هسه شيكول عليه يبوووو اني ليش دوم هيج يصير وياي ماعرف

رحت اشوف البيتزا شصار بي طلعت العصاير
ورتبتهم على طالة الطعام والسلطه مال رعد ماعرف شنو يحب اضيفله عفته
انشغلت بال بيتزا وجان اسمع صوته

رعد - عافت المنشفه عل ارض قبل لا افتح الباب اخذه منها خربت من الضحك ههههه راح تخبلني
هاي البنيه طلعت من الحمام ريحة البيتزا تارس الشقه رحت اشوفها شلون مخبوصه اباوع على شعرها الجنه حرير شلون يتمايل على متونها ( اكتاف) دخيلك ربي صبرني مو بنيه ضيم
اااخ ياكَلبي حبيبتك تخبل وخبلتني وياها
كلت

ها بويه خلصتي

نور - سمعت صوته انداريت اجاوبه اشوف فقط لابس البجامة ومن فوك كلشي ما لابس وخال المنشفه على رقبته وشعره الينكط مي بسرعه انداريت عزه عززه شنو هذا كتافه شكد عريضه

كتله

ها اي لا يمكن

رعد - شافتني هيج كبل اندارت هههه شلون وياها هاي صدك راح اتعبني

ههههه شبيج

نور - مابيه شي

رعد - ليش انداريتي جنج شفتي وحش

نور - مو شسمه انت

جان ظهري علي حجيت وماحس غير ريحة عطره ترس المطبخ وصوته قريب عليه توترت وكَلبي بده يدك بسرعه من هو يكون قريب مني
كُلش اتوتر تقدم اخذ زيتون وكال

رعد - اي اني شنو كملي

نور - بلعت ريكي كلت بتوتر
ا البيتزا اروح اشوف يمكن استوت

حاوطني بيده عل كاونتر علمود لا ارح وكال

رعد - نور انداري عليه بويه

نور - يبووو شلون اندار استحي منا انوب ماكدر اروح محاوطني بيده رجع كال

رعد - نور داحجي وياج انداري

نور - غمضت عيوني وانداريت فتحت عيوني
قطرات مي شعره نزلن على وجهي جان قريب عليه رفعت راسي هو طويل وضخم واني ناعمه وصغيره حسيت واكفه كدام جبل مو رجال
خله عينه بعيني وكال

رعد - اني شنو كملي

نور - م م ماكو شي

شافني متوتره ابتسم وكال

رعد - شبيج ليش هيج متوتره بنيتي

نور - لا ارادين كلت
اني بنيتك ؟

رعد - اي من اليوم انتِ بنيتي

نور - غمضت عيوني نزلن دموعي بهدوء
تقرب اكثر بيده مسح دموعي وكال

رعد - اششش ماريد بنيتي تبجي

نور - ر ر رعد

رعد - عيونه واهله

نور - شكراً على كلشي

رعد - ليش ماتشكريني بغير طريقه

نور - شلون
نزلن نظرات عيونه على شفتي كال

رعد - هسه اكلج شلون

نور - ضم وجهي بين ايده  تقرب يريد يبوسني غمضت عيوني ندك الجرس ابتعدت بسرعه صار عصبي متت ضحك علي شكله يموت ضحك وهو عصبي

رعد - منوووو هذا هسه وووووكته
دخيلك ربي صبرني

نور - ههههه راح لبس تيشيرت وفتح الباب واني البيتزا واخيراً خلصت قطعتها ورتبته عل طاوله
شوي واجه

رعد - يعني ماصدكت اكون قريب منها اندك الجرس تنرفزت بس لو اعرف منووو هذا هسه وكته رحت لبست تيشيرت وفتحت الباب طلع ابو ياسر البواب اني اسمي حجي حكم عمره كتله

هلا حجي تفضل

- هلا بيك وليدي جيت اشوف مامحتاج شي بسرعه جهزنه الشقه وكلت خاف ناسي شي

رعد - لا حجي تسلم كفيتو وفيتو

- تدلل وليدي جم رعيد عدنه

رعد - تسلم يالغالي 

- اخذ راحتك وليدي واي شي تحتاجون خابرني

رعد - ماشي حجي شكراً تعبتك

- تعبك راحه وليدي مع السلامة

رعد - مع السلامة هلا بيك

راح كلت بكلبي هسه وكتك ياحجي
اااخ اليوم شكلي انام بحسرة كَلبي سديت الباب
اشوفها مرتبه السفره وكاعده كالت

نور - منو جان

رعد - انسي اروح انشف شعري

نور - البيتزا راح تبرد تعال اكل يلا روح

رعد - ماشي
كعدت مقابيلها مدري اصفن على جمالها لو اكل البيتزا راح اموت بقهري ولكم حلالي حلالي وماكدر اتقربلها هاي وين صايره دخيلك ربي صبرني

نور - اجه كعد صافن عليه شبي اليوم
شوي وكال

رعد - باجر امي تجي تاخذج لسوك
اذا حجت وياج او سئلتج شصار وياكم البارحه كلشي لا تحجين بس كولي كلشي تمام ماشي

نور - يعني شلون مافهمت

رعد - لج بابا انتِ ليش هلكد فاهيه يعني اله احجي بالقلم العريض يلا تفهمين اقصد اذا سئلتج تقربتلج او لا كولي كلشي تمام

نور - ليش ماكتلي على شرطها قبل لا نعقد

رعد - ليش هيَ ما كالتلج

نور - لا وره العقد كالتلي

رعد - ابتسمت كلت بكَلبي والله يمه عليج سوالف عود يمي كالت اي كتلها وموافقه ههههه

نور - اشو هذا ابتسم وكال

رعد - شوفي بوي خلي افهمج على جم نقطه وانتِ واعيه واكيد تفهمين بسرعه

اي شي يصير بينا مانحجي بي لناس حتى لو جانت امي الشي اليصير بالشقه مايطلع خارج الشقه لا خير ولا شر كل بيت اله خصوصيته واني طبعي كلشي يخصني اعتبره خاص بيه تمام

ومالنه شغل بالناس كلها ولا يأثر علينه كلامهم بلاخص من نعلن زواجنه خاف بيوم وحده من الأقارب تسمعج كلام لا تهتمين وها خاف وحده تكلج رعد هيج كال ويطلعون حجي على لساني لا تصدكين تعالي اسأليني وقتها اني ارد عليج بكل صراحه

نور بويه ماحب  الكذب والفتن ولا البنيه التجيب حجي وتودي حجي وهاي السوالف الطايح حظها كلهن اتنرفز منهن كوني دائما صريحه وياي

وماتطلعين باب الشقه بدون علمي واي شي يصير وياج لازم اعرفه حتى لو جان بنظرج مايسوى اني عندي كلشي يخصج يسوى ومن اكلج على شي اتمنى ماتعانديني وسمعي كلامي والله ماضرج
نور بس سمعي كلامي والله اعيشيج مثل الأميره
كلشي تردي يجرالج وتدللين

نور - بصراحه حبيت طريقة كلامه يعلمني بتفاهم وهدوء واكثر كلمة جذبتني من كال عندي كلشي يخصج يسوى

كتله

تمام بس ممكن سؤال

رعد - تفضلي

نور - رعد انت صدك موافق على شرط امك واذا موافق علمودها لو انت

رعد - اني شنو كملي

نور - لو انت تريدني من صدك

رعد - بويه نور .....................................

_

__________
يقول الشاعر

عليمن صافن وهاي المن النظرة
على الي راح لو عالجاي تنتظره
ما يسوه العمر لا تنظر اعلى الجاي
وعلى الي راح منك لا تجر حسره
شنهي البقه بعمرك هو ليلة ويوم
احبك يابن الناس افهمها اليوم

راح احبك من طرف واحد نويت
حتى اني وياك ميمرنه زعل

وحتى باجر لو رحت عني ومشيت
مايسألوني واكلهم ها رحل
وحدي بيني وبينك قصة حب اعيش
مااكلك خاف يمنعني الخجل
وخاف اكلك واكتشف عندك حبيب
ليش اجازف وانهي قصتنه بفشل
عن نفسي اكلك انه مرتاح خليني هيج
وما تجيني جروح منك ع الاقل
وحتى بالفركه شخص واحد ينكسر
وهو نفسه الجان عايش ع الامل ؟

___

تتوقعون حبهم من طرف واحد او طرفين  ؟

اعرف حيركم الشعر لكن
انتظروني في البارت القادم راح نعرف كثير اسرار كانت مخبئ في رفوف الذكريات

قلبيييييي الحلوين مو تنسون التصويت بالنجمة وتعليق بين الفقرات وصلو البارت اقل شي 200 تعليق وينزل البارت القادم  عن قريب ان شاءالله

حسابي انستجرام انشر هناك كلشي
يخص الرواية + موعد نزول البارتات ومشاهد قبل نزول البارت هنا 👇

والان ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا