رواية خلف القضبان روح يتيمة الفصل الثامن والعشرون 28 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي

________

نور - بصراحه حبيت طريقة كلامه يعلمني بتفاهم وهدوء واكثر كلمة جذبتني من كال عندي كلشي يخصج يسوى

كتله

تمام بس ممكن سؤال

رعد - تفضلي

نور - رعد انت صدك موافق على شرط امك واذا موافق علمودها لو انت

رعد - اني شنو كملي

نور - لو انت تريدني من صدك

رعد - بويه نور تثقين بيه لو لا

نور - رفعت راسي وعيني بعينه كتله
خايفه

رعد - من شنو

نور - منك

رعد - ليش

نور - خايفه اثق بيك وتعوفني او

بعدني مامكمله كلامي مسك ايدي وكال

رعد - ماعوفج لو اعرف اخسر عمري بس ماعوفج نور كتلج من قبل انتِ مسؤوليتي ومستحيل اعوفج وحدج

نور - نزلن دموعي كتله رعد تساعدني لانو ماعندي احد وتستخطين مو

رعد - لا تفكرين هيج بويه
اني بنفسي ماعرف شنو الربط البينج وبيني
بس كل الي اعرفه اريدج دوم تكونين قريبه وكدام عيني مداكدر اتخيل حياتي بدونج

نور - كمت كال

رعد - ها وين ماكلتي شي

نور - شبعت
رحت اغسل ايدي هو هم كام

واني داغسل شميت ريحة عطره حسيت بقربه مني جان واكف ورايه قرب راسه يم رقبتي نزلت لمسات ايده من كتفي لحد اصابع ايدي وكال

رعد - نور

نور - غمضت عيوني كتله
نعم

دارني علي خله عينه بعيني
ضم وجهي بين ايده كال

رعد - نور دموعج تحركني حرك ماريدج تبجين

نور - تقرب باس راسي وكال

رعد - ولج بويه شعندي  غيرچ يمن عيني تروح فدوه لعينچ

نور - من هيج كال صدك حسيت بأمان
فرحت معقوله راح يعترفلي بحبه معقوله يحبني مثل ما انا احبه كمل كلامه

رعد - نور انسي بويه الفات مات والميت مايرجع  منال وزوجها وكلشي صار وياج كلهم  انسيهم هذا عقلج اريد تريحي ولا تشغلي بالماضي وهسه تعالي نكمل البيتزا ترا اني حيل جوعان واعترفلج بشي

نور - من كال اعترفلج حسيت راح يغمى عليه
من التوتر وكَلبي يدك بسرعه واخيراً راح يعترف
كُلش فرحت كلت

بشنو تعترف

رعد - شكد ماكل بيتزا بالمطاعم بس مثل بيتزتج مامَكل صدك عاشت ايدج

نور - بهت وجهي كلت بكَلبي ليش ماعترفت بشي ثاني اااخ يانور هاي اذا صدك جان يحبج الظاهر حلمنه وصدكنه حلمنه بسرعه ابتسمت رغم خاب ظني بكلامه كتله

الف عافيه
رجعنه اكلت شوي وكمت انظف المطبخ صار هوسه من وره البيتزا وهو كمل اكل وكام غسل كعد بالصاله بيده الموبايل كملت شغلي توضيت ورحت للغرفه اصلي العشاء اشوف ماكو سجاده مال صلاة شنو هاي يمكن حاطها بمكان مايبين دورت زين عل سرير والكنتور ماكو يااا وين السجاده اروح اكول لرعد بيته اكيد يعرف وين حاطه

رحت للستقبال كتله
رعد

اول ما ناديته رفع راسه كتله
وين سجادة الصلاة ادور ماكو بغرفة النوم
وين حاطها

حسيت بي فشل من سؤالي ليش ماعرف كال

رعد - ها ماعرف شوفي يمكن بالغرفه الثانيه

نور - ماشي
رحت للغرفه الثانيه دورت
هم ماكو رجعت لصاله كتله

ماكو

رعد - شلون يعني

نور - شنو شلون يعني لحظه لا تكول ماكو من الأساس معقوله

رعد - اي اني هاي الشقه تاركها

نور - انصدمت كتله
اكو بيت مسلم مابي سجادة صلاة صدك تحجي

رعد - بويه كتلج الشقه متروكه بالسنه حسنا
اجي هنا

نور - واذا بس كلشي كامل مامعقوله مابي سجاده
هسه شلون اصلي

رعد - ترا البيت كله نظيف وين ماتصلين صلي

نور - ماشي بس ها لازم باجر اجيبلي سجاده

رعد - ادللي

نور - ردت اروح للغرفه تذكرت القرآن رجعت كتله
زين والقرآن وينه لا تكول هم ماكو

اباوع علي ماعرفت افسر نظراته كال وهو يباوع عل موبايل

رعد - باجر اكول لي امي اجيبلج واحد

نور - رعد صدك تحجي شلون اكو بيت مابي القرآن وسجادة صلاة 

رعد - يابه كتلج اني تارك هاي الشقه شلزكتي بهاي الحجايه كتلج اني تاااارك الشقه لاتعصبيني

نور - اي عفيه على كلشي عصب ماوصيك

رعد - ولج بويه انتِ لزكتي شلون وشلون اي غير الشقه متروكه

نور - ماجاوبته رحت للغرفه اصلي حتى ملابس صلاة ماعنده هو سجاده ماكو الكي ملابس صلاة
لبست الدشداشه العريضه ويه الحجاب وكلت
ربي على نيتي راح اصلي تقبل صلاتي يارب

صليت العشاء وكعدت اقره السور الي حافظتهم
بدون قرآن خلصت بدلت ورحت لصاله اشوف رعد نايم وفاتح شباك البلكون والهوى بارد رحت سديت الشباك وجبت لحاف من الغرفه غطيته

جان بيده موبايله نزلت لمستواه علمود اسحب الموبايل من ايده تقدمت شمية ريحته غمضت عيوني شميته مره ثاني شكد احب ريحته ركزت على ملامح وجهه هاي اول مره اشوفه هيج عن قرب كل مره من التوتر ماكدر حتى اشوفه زين

اباوع رموشه ما شاءالله شكد حلوه اطول من رومشي لو شواربه والمرتبهم لو شعره الأسود الي يلمعن من النظافه لو يربي لحيه يطلع يخبل فوك ما هو يخبل

كعدت صفنت علي بنظري رعد اجمل رجل اشوفه بحياتي سبحان الله الي حلاه بعيوني وهو حلالي جانت واكعه شعره من رموشه على وجهه تقربت  اكثر  هفيت عليها ابطئء ريحة عطره تجذبني اله كلما اريد اكوم اشمه عطره اصفن علي تقربت بدون ما افكر بسته بخده بهدوء ماخليته يحس وابتعدت

ااخ يارعد ياريتك تحبني مثل ما اني احبك ياريت سحبت الموبايل شوي شوي خليته عل طاوله كمت خففت الاضويه ورحت لغرفة النوم  تمددت عل سرير اريد انام مايجيني نوم ضليت اتلمس بشفايفي شلون جتني الجُرأه ابوسه من خده بس شسوي ريحة عطره تجذبني اله مو بيدي ههههه

ضحكت على نفسي غمضت عيوني بس اذكر  نظراته وابتسم ساعه كامله اقشمر على نفسي واكول راح انام ومايجين نوم كمت اووووف ليش ما انام  حقي اذا يوميه نايمه بمكان شسوي هسه عطشت كمت رحت للمطبخ اشرب مي اباوع علي نايم غارك بالنوم نيالك لعد شبيه اني ماكدر انام انوب شكد حلو نايمه اووف حتى بنومه حلو هههه

يبوو نسيت المي رحت شربت مي ورجعت للغرفه باوعت على عطوره جتني فكره رحت اخذت عطره رشيته عل مخدمه والفراش لان كُلش احب عطره اخذت المخده الثانيه ترستها عطره هههه حضنتها وضليت اشم بيها لحد ما نمت

_____
في مكان اخر

بتول - خلصت دراستي ونزلت جوه اشوف شكو ماكو بالبيت شفت امي كاعده تحجي ويه الحجيه ام ركان مدري هيَ شكلتلها وامي ردت عليها

جوان - هههههه اي هو هيج كتله اي فهمته
لو ماعيب جان خابرته هسه ههههه حجيه فرحانه كُلش اي والله صح هههههه بضبط

بتول - اباوع على امي بس تضحك وفرحانه من رجعت من المول وهيَ فرحانه رحت كعدت يمها غيرت الموضوع ويه الحجيه وسدت الخط شغلت التلفاز وضليت اقلب بال كونترول كتلها

ما شاءالله يمه اليوم من رجعتي من المول وانتِ فرحانه خير فرحينه وياج

جوان - ان شاءالله افرحكم بس مو هسه

بتول - اممم ليش صاير شي

جوان - كلشي بوقته حلو يمه

بتول - اها خوش ابوي شوكت يرجع

جوان - كال اسبوع وارجع شمدريني شغله مايخلص

بتول - زين شوكت نروح علمود حيدر

جوان - سوده عليه على حضه ابوج سافر وين نروح اذا ابوج مو هنا

بتول - يمه غير اول مره نروح كعدت نسوان بعدين رياجيل

جوان - اي

بتول - لعد ليش مانروح باجر ومن يرجع ابويه روحو طلبوها رسمي خطيه علمود حيدر واذا هو ساكت غير يستحي منكم

جوان - خلص باجر نروح هو وينه شو مامبين
لا تكولين بعده برا

بتول - اي بعده

جوان - اااخ انتو ناوين تخبلوني

بتول - يمه قابل حيدر صغير

جوان - ولج يمه الدنيا مو امان وهو من العصر طالع شوكت يرجع ها شوكت

بتول - خابري وشوفي وينه

جوان - اي هسه

بتول - خابرته واني رحت للمطبخ اخذتلي تفاحه ورحت اشوف احمد شيسوي دكيت باب غرفته

احمد - تفضل

بتول - الحلو المزيون ماذا يفعل

احمد - طايح حظ حظه بالدراسه يعني ماذا يفعل

بتول - ههههه خويه شنو السالفه انطي نفسك استراحه قابل انت سادس وزاري هيج تسوي بروحك

احمد - هو اني لو ابويه الطيح حظي

بتول - ابويه شعليه

احمد - كتله اريد اسافر بالعطله ويه أصدقائي

بتول - اي

احمد - ماخذ الجواز بدون ماحس
يكول من تطلع الأول عل دفعه مالتك وقتها تسافر
اكله بويه المهم انجح ليش اله اول صار سنين بالمدرسه كله اول اول هسه خليني برحتي يكول
لا اريد ارفع راسي بيك كدام الوادم اعرفه يريد يتباهى كدام اصدقائه مايعرف اني حظي طايح هو بلا شي صعب انوب ابوج هيج يسوي

بتول - لحظه واني اكول وينه مانشوفه بس عل اكل نشوفه طلعت السالفه سالفة سفر ودراسه وابوي ههههههه

احمد - ضحكي عفيه عليج  بس ضحكي تموتين عل هيج سوالف

بتول - يااا الله يسامحك هههههه هسه تعال كلي رعد وين شو ماكو

احمد - روحي سئلي  امج تعرف

بتول - صدك امي اليوم من رجعت من المول وهيَ فرحانه وتضحك وتخابر بالحجيه ومدري كلامهم مايفهم صاير شي

احمد - غريب هاي من شوكت امج تروح للمول

بتول - اني هم استغربت كتلها اجي وياج كالت لا وحدي اروح ادرسي انتِ

احمد - ويه منو راحت

بتول - ماعرف بس متأكده صاير شي

احمد - شلون

بتول - اكلها يمه فرحينه وياج صاير شي تكول
كلشي بوقته حلو 

اكص ايدي اذا واحد يفهمكم بهذا البيت كلمن وعنده سر مو بيت كهف اسرار 
بس لازم اعرف شنو السالفه

احمد - خويه  اهلج من الجدم لراس كلهم اسرار منين توصلين لخيط سرهم

بتول - هنا المشكله
هسه عوفك منهم باجر نروح نخطب لحيدر

احمد - صدك شلون وابويه

بتول - خطبة نسوان شبيك بعدين من يرجع ابوي روحو خطبو رسمي

احمد - خوش واخيراً راح يصير عرس طكت روحنه

بتول - ولك اني لو انت صدك طكت روحنه
هلا هلا ردح لصبح ههههه
يارب افرح بيكم كلكم

احمد - فدوه لدعوتج امين

بتول - ها ولك شو فدوه لدعوتي تريد تزوج انت هم

احمد - هههه ليش يعني مو بشر حالي حال الناس

بتول - اكيد وان شاءالله احلى عريس
ي

لا خويه كمل دراسه اروح اشوف امي بلكت تعرف وين رعيد

احمد - ماشي سدي الباب وراج

بتول - تمام
طلعت من الغرفه رحت لصاله جانت تحجي ويه حيدر شوي وخلصت متعصبه

جوان - يعني انتو من تجلطوني يلا ترتاحون اعرفكم

بتول - يااا يمه شبيج كولي يا الله خير شصاير

جوان - حيدر

بتول - خير شبي

جوان - الأفندي يكول مارجع اليوم طالع ويه أصدقائي يابه وين طالع مايكول اكله ابني ارجع الدنيا ليل من العصر انت طالع يكول يمه عندي شغل هذا ياشعل بهذا الليل

بتول - يمه إنَ بعض الظن إثم ماتعرفين يجوز صدك عنده شغل يعني وين يروح خاف عبالج يدور سوالف مصخمه لا اله حيدر مو من هذا النوع

جوان - اعرف يايمه بس أصدقاء السوء هواي اذا علمو  على دروب عوجه وين انطي وجهي ابوكم هم مو هنا لو يكعد مثل الناس ويشوف جهاله وين ماوين جان صار هذا حالنه

بتول - يمه صدك تحجين ترا حيدر استاذ جامعي
هو اليعلم مو الناس تعلمه الي يسمعج يكول
مراهق هههههه

جوان - مالومج حقج كَلبج مو كَلب ام

بتول - هههه من اروح فدوه لكَلبج ياعسل
صدك يمه رعيد وين

جوان - بالشقه

بتول - ياشقه

جوان - اهوو راسي صدع منكم اكوم انام احسلي

بتول - اشوف غيرت الموضوع اممم اله اكو شي
بستها من راسها

اخذي العلاج قبل النوم  وتصبحين على خير

جوان - ماشي يمه وانتِ من اهلو

بتول - راحت واني بقيت اقلب بال قنوات
اجه سيف كعد يمي

سيف - ها شو سهرانه

بتول - تعبت من الدراسه شسوي

سيف - ميخالف خويه كلشي بي تعب حلو ان شاءالله بالنهايه وين الباقي

بتول - حيدر برا واحمد يدرس بغرفته وتبارك من العصر رجعت من الدوام لحد هسه نايمه ورعيد ماعرف وينه من الصبح طالع

سيف - ما شاءالله عائله متفككه كلمن مشغول بنفسه 

بتول - ااخ اسكت وخليها

سيف - الله كريم خويه كومي نامي باجر وراج مدرسه لا تسهرين

بتول - تمام تصبح على خير

سيف - وانتِ من اهلو بعد اخوج

بتول - ابتسمت
عفته ورحت وصعدت للغرفه اباوع تبارك طامسه بالنوم رحت جوه الفراش اريد انام ماكدر تذكرت ركان لا ارادين ابتسمت شوي ونمت

_________
في مكان اخر

رعد - جنت نايم كمت على صوت الموبايل
سحبته بدون ماشوف منو ورديت

الو

جوان - صباح الخير يمه شنو بعدك نايم

رعد -  التفتت هاي شنو نايم هنا وماحاس على نفسي كتلها

هلا حبيبه اي والله كعدت على رنة الموبايل

جوان - يمه نويره شلونها

رعد - ها زينه زينه

جوان - بشر  البارحه شصار ان شاءالله
كلشي تمام

رعد - ها اي لا الحمد لله كلشي تمام

جوان - ربي يحفظكم يايمه وفرح بجهالكم

رعد - كلت بكَلبي ياجهال هو بوسه مامحصل منها كلت

امين حبيبه

جوان - ماشي يمه كمل نومتك وبعدين تعال هنا عندي موضوع وياك

رعد - ماشي حبيبه
سدت الخط اباوع الساعه بال 9 اوف جسمي متكسر شلون نمت عل تخم بدون ماحس كمت غسلت وجهي ورحت لغرفة النوم اشوف نور حاضنه المخده و نايمه تقدمت اكثر جان شعرها منثور على وجها وخرته صافن على جمالها  سبحان الله جنها ملاك نايم مو بشر والشفه موضوع ثاني

شلون حاضنه المخده اويلي على حضي شجان يصير لو جنت بمكان المخده

اااخ وين صايره عريس نايم بالصاله وعروسته حاضنه المخده من امداك ياركان فكرني هلكد مايحجي رحت طلعت ملابس الطلعه شوي واطلع عندي شغل جيت اشمر الساعه عل سرير وكع بالكاع كامت

نور - جنت نايمه حسيت على صوت شي وكع فتحت عيوني اشوفه رعد واكف يم الكنتور يطلع ملابسه

رعد - بويه اعتذر كومتج بس الساعه وكعت

نور - ها لا عادي ماصار شي
شنو طالع

رعد - اتريك واطلع عندي شغل

نور - اممم
ضليت افتح واسد بعيوني كتله
شنو هوَ شغلك

رعد - ليش يهمج شغلي ؟

نور - ها لا بس هيج سؤال انسى اكوم احضرلك الريوك

رعد - بس سوي چاي نازل اجيب صمون

نور - تمام
طلع واني لميت شعري بأهمال وكمت غسلت وجهي ورحت للمطبخ خليت الچاي عل نار طلعت اجبان ومربه وكيمر وزيتون رتبت الطاوله ورحت ارتب الصاله وجان يدك موبايل رعد جان عل ميز الي  بالصاله  ونفس الشخص مكتوب حرف Rبالانكليزي

يعني صدك صابني الفضول اعرف منو هاي ضجت بصراحه شكد تخابر انقطع المكالمه رجعت مره ثاني خابرت على وشك ارد عليها بزور كدرت اسيطر على نفسي اهدي نور اهدي مالنه شغل اي مالنه شغل اهدي سدته بعد احسن

رحت للمطبخ اشوف الچاي رجع رعد

رعد - تأخرت

نور - لا

رعد - وهذا احلى صمون حار

نور - كعدنه عل طاوله نتريك (نفطر) كتله
موبايلك دك مرتين

رعد - منو جان

نور - حرف R بالانكليزي
من هيج كلت ضاج كتله

منو هاي

رعد - شمعرفج بنيه

نور - احساس

رعد - خوش
اني لازم اروح عندي شغل كملي انتِ

نور - غير الموضوع كام راح يبدل يلا يجي يوم واعرف منو هاي ولو شلون ماشوف تالي راح يصدمني وتطلع حبيبته

شوي وطلع صدمني شدعوه هيج كاشخ
الي يشوفه يكول رايح عرس مو شغل لابس تيشيرت نص ردن اسود وجينز اسود وساعه فضيه ومشط ومرتب شعره وريحة عطره فايح كتله لا ارادين

شنو لازم شغلك عرس هيج كاشخ
ابتسم وهو يعدل بساعته كال

رعد - ههههه لا

نور - خوش

رعد - شوفي بويه راح اطلع لا تفتحين الباب لكأن من يكون اني شوكت ماارجع عندي المفتاح ماشي بنيتي واي شي تحتاجين خابريني

نور - ماشي راح تتأخر

رعد - ماعرف بس حيل مشغول اليوم 
لا يضل بالج وها العصر امي تجي تاخذج لسوك لا تتاخرون ماشي

نور - تمام
تقدم شرب الجاي وباوع عليه كال

رعد - مثل ماكتلج اذا سألتج على البارحه كولي كلشي تم ماشي

نور - هزيت براسي بمعنى اي باوع على شفتي وكال

رعد - والقهر كلشي ماتم الله يصبرني بس هيج اكول

يلا مع السلامة

نور - مع السلامة
اخذ المحفظه والموبايل وطلع ضحكت علي ههههه
شبي هذا راح يخبلني ويا كمت نظفت المطبخ جان اكو مبخره كهربائيه بيها بخور عل طاوله بالصاله
رحت شغلتها وبخرت الشقه وكعدت بالصاله ماكو شي اسوي الشقه نظيفه شغلت التلفاز انوب ماكو شي بي خير واحد يتابعه اوووف رحت فتحت باب البلكون المنظر كُلش حلو هوى يميل عل بروده

وكفت هناك شوي ورجعت لصاله اجي واروح ماعرف شسوي مليت ماكو شي اسوي اووف حتى
قرآن ماكو اقره خلي انام شسوي لعد تمدتت عل تخم نمتلي ساعه وجان يدك موبايلي جان عل تخم يمي كلت اكيد رعد بدون ماشوف جاوبت  بنعس

الو
اجاني صوت امه كمت

جوان - يااا يمه بعدج نايمه هههه يلا حقج
مانايمه زين

نور -  يبوو هاي وين راح فكرها كتلها
لا خاله لاني وحدي وماكو شي اسوي نمت شوي

جوان - بنيتي كتلج ناديني يمه وشوي واجي اني والحجيه ناخذج لسوك ولصالون خوش

نور - ماشي يمه البنات مايعرفون مو

جوان - بتول شاكه اكو شي بس ماتعرف

نور - اذا عرفو ماراح يزعلون

جوان - اكيد يضوجون بس مايزعلون وبعدين كلشي بوقته حلو يمه يلا تغدي فد ساعه
واحنا يمج ان شاءالله

نور - ماشي
سدت الخط واني راحت توضيت وصليت الظهر ورحت للمطبخ اشوف شسوي غده ماشتهي وحدي سويتلي فقط سلطه خلصت غسلت المواعين ورحت ابدل لبست  نفس العبايه الخليجيه الي جنت لابسته البارحه ولفيت الحجاب وكعدت انتظرهم شوي ودك  موبايلي طلع رعد ابتسمت جاوبته

رعد - ها بويه شدسوين

نور - انتظر امك والحجيه يجون علمود نروح
وانت

رعد - مشغول ويه العمال نور بويه من تروحين انتبهي على نفسج ماوصيج ولا اطولون وكولي لي
امي لا تروح لاماكن مزدحمه وافضل تشترون من المول هناك اهدء وغير مزدحم احسن الكم

نور - تمام

رعد - شنو راح تلبسين

نور - عبايه خليجيه

رعد - اي احسن وشعرج ماريد يطلع منه خصله ومكياج لا تكثرين وعطر لا تخلين

نور - هاي شبيك صدك تحجي

رعد - ليش اجذب مثلاً

نور - شنو عطر ومكياج ترا هذا الشي يخصني

رعد - جان بس هسه لا كلشي يخصج يخصني قبل لا يخصج

نور - وشنو افهم هاي غيره لو حب لو خوف

رعد - بكيفج شلون ماتفهميها فهمي
وها عينج في الارض وانتِ تمشين

نور - صدك تحجي

رعد - اي

نور - لعد ليش رايحه غير اشتريلي الي اريده شبيك

رعد - نور حيل تعبانه بويه لا تجادليني
يلا اني اروح دير بالج على نفسج مثل ماكتلج

نور - سده بوجهي قبل لا احجي
صدك جذب شبي هذا

دك الجرس اكيد خاله جوان
فتحت الباب طلعو هما جتي حضنتني وباستني
ك

امت تهلهل

جوان - هلا بعروستنه كلووولش
شلونج يمه

نور - ابتسمت كتلها
الحمد لله وانتِ

جوان - الحمد لله بنيتي

ام ركان - هلا بنويره شلونج يمه

نور - هلا حجيه الحمد لله
تفضلو

دخلو جوه كعدو رحت قدمتلهم مي وجان ام رعد تكول

جوان - ها يمه بشري شلون جانت ليلتكم البارحه

نور - صفنت انوب ماعرف اكذب شلون سالفه هاي

ام ركان - ههههه خجلتي البنيه ياجوان

جوان - ههههه غير اطمئن عليهم
هايمه نويره شو صافنه

نور - ها اي كلشي تمام

جوان - الله يفرحني بجهالكم

ام ركان - امين

جوان -  اذا تعبانه يمه مانروح اليوم

نور - لا زينه  ليش اتعب
هيج كلت ضحكو عليه مافهمت عليهم
ليش ضحكو

جوان - ههههه اي خوش يلا نروح السائق جوه منتظرنه

نور - ماشي
طفيت الاضويه الزايده مالت الشقه وقفلت الباب وطلعنه الحمد لله مسوين المصعد نزلنه لطابق الأرضي صعدنه بالسياره ورحنه اول شي لسوك اشترينه عبايات خليجيه كُلش حلوات وفساتين لون اسود ونيلي وزيتوني وبعد جم لون احب هيج الوان اني ما البس جينز برا كله فساتين او عبايات خليجيه اخذنه دشاديش طويله وقصيره  واشترينه طقمين ملابس صلاة والسجاده ام رعد كالت عندي هواي بعدين ادزلكم ويه القرآن كتلها ماشي

رحنه لمكان الجنط والاحذيه  تكرمون اخذتلي احذيه نازكات وحلوات وكعوبه وسط مو كُلش عالي ماحب العالي واخذتلي احذيه رياضيه خلصنه ورحنه للمول اشتريت تركات للبيت كُلش حلوين ومكياج ومنتجات عنايه بالبشره والشعر والجسم وعطور تعبنه هلكنه كالت

جوان - يمه تعالي هنا اشتري ملابس نوم حلوه

نور - اكثر فقره شايله همها من الخجل استحي كدامهم شلون سالفه هاي رحنه شفت الملابس  انصدمت شنو هاي شلون ملابس عزه شلون الناس تلبس هيج اني شوفه ماكدر اشوفهم انوب البسهم صخام الصخمج يامنال
كالت

جوان - يمه اشتريلج الي يعجبج واخذي كل الألوان كلهم حلوين خلي اخابر رعد اشوف يالون يحب

نور - فتحت عيوني من الصدمه الحجيه ضحكت
عليه عزه العزاني عفتهم  وراحت على اساس اشوف الملابس واني ميته خجل انوب خابرته هنا القهر يبووو اهدي نور اهدي شوي وجتي  كالت

جوان - ها يمه شنو اختاريتي

نور - ماختريت شي

ام ركان - ههههه البنيه مستحيه من مكالمتج

جوان - ياا ليش تستحي غير اعرف زوجها يالون يحب غير اله تلبسه 

نور - بوخت كُلش من التوتر ام رعد كُلشي تحجي طك بطك  واني واستحي من هيج كلام كتلها

اني طالعه انتِ شنو تاخذين اخذي اني عادي يمي

جوان - ماشي يمه

نور - طلعت من المحل عزه العزاني يمه حتريت من بس ياترا استاذ رعد يالون ختار ما كالت امه
صابني فضول لا غير

شوي وجتي امه رحنه اشترينه تركات نوم ستن وباقي النقوصات كملنه كلشي رحنه لسياره 

جوان - هسه نروح لصالون شوي نرتبج ولو انتِ
ما شاءالله عليج تخبلين

نور - ابتسمت كتلها
تسلمين

كمل السائق طريقه شوي وكالت وصلنه
اباوع صالون جبير كُلش مدري مركز تجميل ماعرف نزلنه من السياره ورحنه طلعت صاحبة الصالون رحبت بينه ذاك الترحيب الظاهر يعرفوهم

- ياهلا بأم رعد نورتينه

جوان - هلا بيج حبيبتي منور بيكم
هاي عروستنه الكتلج عليها اريدج تخبلين زوجها فوك ماهو متخبل عليها هههههه

نور - من هيج كالت مدري ليش فرحت معقوله صدك كلامهم رعد متخبل  عليه

- هههه تم من عيوني تدللين

جوان - يلا يمه نويره روحي وياها واحنا نكعد هنا ننتظر لحد ما تخلصين تعبنه اني والحجيه

ام ركان - اي والله تعبنه

نور - ماشي
رحت ويه المره اباوع صالون جبير هواي ناس بي وعرايس وهوسه كالت

- تعالي انتِ مختاريلج VIP

نور - وشنو هذا مافهمت

- جناح  خاص ومميز يعني مو ويا الهوسه ويهتمون بيج اهتمام خاص مو مثل العادي

نور - اها اي
رحت وياها صدك كعدتني بغرفه خاصه وبيها 4 بنات كالت الهم

- هاي من طرف ست جوان اهتمو بيها مثل ما وصيتكم

الكل - تم

نور - راحت المره واني كعدت عل كرسي بدو كل وحده بيهم بشغلها وحده حفت حواجبي اوجهي  واني مكضيته كله ااي وااخ يوجع مامتعلمه
خلصو جتي وحده مدري شنو خلت  لوجهي كل شوي تخلي كريم شكل وتحركه عل وجه مثل المساج وبعدين خلت ماسك شوي وكالت خلص كومي غسلي كمت غسلت وجهي بدون ماشوف نفسي كبل جتي امل المناكري كالت

- عيوني يالون تحبين نخليلج ويافصال اختاري

نور - اباوع بيدها اظافر كتلها
شنو هذا مو مثل اظافر اصطناعية

- اي بس هذا يبقى هواي بيدج

نور - يعني شكد

- حسب اكو شهر اكثر اقل

نور - يااا هواي شلون هيج ماريد مايجوز اصلي بيهم مي الوضوء مايوصل اظافري
اني هيج كلت وهاي صفنت عليه كتلها

حبيبتي ماريد مناكير واظافر اصطناعية
وهاي السوالف بس عدليلي اظافري  الطبيعيه

- ماشي

نور - بدت تعدل بيهم خلصت جتي وحده
صابغه شعرها احمر يااا ذوله شلون هيج حلو يصبغون كالت

- هلا عيوني نور اسمج صح

نور - ابتسمتلها كلت
هلا بيج اي نور

- عاشت الاسامي حبيبتي شنو تحبين نشتغل بشعرج قص صبغ ميش شنو تحبين انتِ

نور - لا تصبغي لونه الطبيعي حلو بس اريد خصلتين من الكذله اريدخ ميش لون اشقر بلاتيني  بسيط كُلش يملي للفاتح اكثر من الغامق لان لون شعري بني مو اسود

- تمام عيوني فهمت عليج وماتردين نكصه

نور - لا هو قصير مو كُلش طويل بس شوي عدلي من جوه و الكذله شوي كصي منها وعدليها علمود ويه الميش حلو يطلع

- ما شاءالله عليج ذواقه يخبل بال اختيار

نور - ابتسمت كتلها
البساطه حلوه

- اي اكيد وانزك

نور - اي
بدت تعدل بشعري من وره وجتي كصة الكذله شوي صار بطول عظم الفك السفلي
وميشته مثل ماطلبت وغسلته بسائل كالت هذا راح ينطي لمعه لشعر وريحته كُلش حلوه نشفت شعري بالسشوار ورتبتلي الكذله جتي وحده تمكيجلي كتلها

اني ماحب مكياج غامق فدوه اريده كُلش فاتح وبسيط ماشي

- تمام

نور - بدت تمكيجني ربع ساعه وخلصت جتي امل الصالون شافتني انصدمت

- ما شاءالله هاي شمسوين بيها عاشت ايدكم ابدعتو

نور - تقدمت يمي كالت

- ست نور راح اعد ل3 و افر الكرسي اي تعليق عندج اي شي ماعجبج كُلش عادي بس كولي قبل لا تشوفج ست جوان نعدله الج وتدللين

نور - خوفتني كلت
ماشي

- يلا 1 ، 2 ، 3

نور - فرت الكرسي جنت مغمضه عيوني مدري ليش خايفه فتحتهم شوي شوي انصدمت انبهرت من النتيجه شنو هذا كمت صفنت على نفسي اتلمس بوجهي ناعم وحواجي يخبلون والشعر كُلش عجبني يخبل يخبل طلع احلى من الجنت متوقعته والمكياج مثل ماطلبت كُلش بسيط ونازك و الحمره لون مشمشي شوي غامقه مو كُلش كالت

- شنو رائيج بشغلنه

نور - بصراحه يخبل صدك عاشت ايدكم

- انتٍ من الاساس حلوه 

نور - تسلمين

- يلا نروح نشوف النتيجه لست جوان

نور - اي
رحنه للغرفه الثانيه مكان الكعده اول مادخلت انصدمو بيه هيَ والحجيه  الي هناك التفتو عليه توترت شبيهم يباوعون عليه كالت الحجيه

ام ركان - اللهم صل على محمد وعلى ال محمد
ما شاءالله تبارك الرحمن يمه نويره طالعه تخبلين

نور - تسلمين حجيه جمال عيونج

جوان - بسم الله  ما شاءالله كُلش حلوه طالعه يمه الله يحفظج من كل عين بنيتي

نور - تسلمين يمه

- ها ست جوان هذا حسب طلبج وطلبها

جوان - عاشت ايدكم حبيبتي واني لو ما اثق بيكم ومتعلمه اجي يمكم ماجان جبتها هنا

- اهلاً وسهلاً بيكم بكل وقت تنورونه

جوان - حبيبتي يمه
نويره بنيتي لازم نرجع رعد خابرني قبل شوي يكول كافي رجعو

نور - ماشي
واحنا دنحجي جتي مره وبنيه وياها
كالت المره

- شنو تستخدمين لبشرتج هيج بيضه

نور - كُلشي ماستخدم
كالت الثانيه

- عمي نيال زوجج عليج شيريد بعد واحنا
نجي ونلبخ بهل المكياج والماسكات وكلشي مايفيد

نور - انصدمت من كلامهم رغم هما مابيهم شي حلوين بس بشرتهم على سمار

جوان - كولو ما شاءالله

- اي قابل نحسدها ياعيني

ام ركان - ميخالف بنيتي من تشوفون شي حلو كولو ما شاءالله

نور - كلت
بس انتو حلوين وبشرتكم كُلش لايكه على وجوهكم رب العالمين مايخلق شي ماحلو السالفه مو سالفة ماسك السالفه سالفة تقبل الذات والرضا

- خوش

نور - شبيهم ذوله شلون يباوعون عليه كالت الحجيه

ام ركان - يلا يمه خلي نروح

نور - تمام
لفيت الحجاب ولبست العبايه وطلعنه السائق جان منتظرنه يم باب الصالون صعدنه بالسياره وتوجهنه لشقه شوي وصلنه نزلت الغراض والسايق ساعدني
رحنه لشقه ام ركان ضلت بالسياره بستها وسلمت عليها وام رعد جتي وياي خلينه الغراض بالصاله كالت

جوان - يمه خاف رعد يرجع وصاير عصبي شي لا تجاوبي من يتعصب تركي وعوفي ماشي

نور - مافهمت ليش يصير عصبي بدون سبب ؟

جوان - لا بس اكول اذا رجع تعبانه خاف يعصب
لا تجاوبي تركي من يهده رجعي احجي ويا

نور - كلبي نغزني كتلها
يمه احجي  صاير شي واني ماعرف

بين عليها التوتر كالت

جوان - ها لا لا ماكوشي يلا اروح اني ماوصيج دير بالج على رعيد وعلى نفسج يمه

نور - ماشي

جوان - مع السلامة يمه

نور - مع السلامة

راحت واني سديت الباب واخذت الملابس للغرفه
رتبتهم بالكنتور فتحت كيس الي ملابس النوم  يااا سوتها صدك ام رعد جايبه كل الألوان واحد منهم ابيض ستن طويل يكون مثل الفستان المشلح و علي مثل روب تول كله ريش والله ياخاله طلعتي مو هينه هههه

رتبتهم بالكنتور وطلعت المكياج والعطور رتبتهم ويه عطور رعد كملت الترتيب حضرت العشاء خابرت على رعد يطلع مغلق نص ساعه رجعت خابرته هم مغلق عفت العشه عل طاوله وكعدت انتظره يجي علمود نتعشى سوا

_
_

_______
في مكان اخر

رعد - طلعت الصبح توجهة للمجمع اشوف وين وصلو العمال انشغلت وياهم خابرت على نور
وبعدين كملت شغلي شوي وخابرني علي صديقي بالدوام جاوبته

هلا بعلاوي شلونك خويه

علي - هلا بيك رعد موجود احجي وياكم بموضوع

رعد - اي بس لحظه
طلعت برا المجمع هوسة عمال وشغل كلت
اي خويه احجي اسمعك

علي - تذكر حادثة الاغتيال  الي صارت وياك قبل فتره

رعد - اي شلون انسى

علي - عرفنه منو وراها

رعد - سحبتلي جكاره ولعتها كتله
اي ومنو جان

علي - شوف خويه بيني وبينك الشخص من عائلتك مثل ماكلت

رعد - اي عرفت كمل ضلعي

علي - بصراحه طلع شكك بمحله ابوك وره السالفه

رعد - لا تكول ابوك لانه مو ابويه سهله يصير خير انه اعرف شلون اصرف ويا

علي - اي واكو شي ثاني هم

رعد - شنو

علي - شوف حسب الي عرفته ناوي يعيد
الاغتيال مره ثاني وموصي جماعه وكايللهم

رعد - شنو كايل كمل

علي - ماكدر اكمل

رعد - ضلعي كمل لا تخافي كلشي اتوقع منا

علي - رعد
عمران طالب راسك اله والجماعته

رعد - انصدمت من كلامه شمرت السيجاره كتله
شدتحجي متأكد من كلامك

علي - مع الأسف اي لان جماعته داخلين بمشروع
كُلش جبير وارباحه خياليه وماقبلو عمران يدخل وياهم من وراك خافو لا بسببه تسويلهم مشاكل مثل ذاك المره وعمران متخبل شلون هيج مشروع راح من ايده رعد خويه دير بالك على نفسك
كُلشي توقع من عمران

رعد - كُلش انصدمت من كلام علي اعرف بي مايحبني ويكرهني من صغري بس ماتوقعت لهاي الدرجه لا ابد ماتوقعت سهله سهله ياعمران انه الك كلت

علاوي شكراً خويه تعبتك خلي السالفه بينا

علي - ماكو تعب ولا توصي حريص

رعد - كفو منك ضلعي اخذ راحتك خويه
مع السلامة في امان الله

سد الخط  سحبتلي سيجارتين ولعتهم احس نار بصدري نار تحركني حرك

والله وجتك ايام سوده ياعمران سهله اذا ما احرك حرك ما اسمي النقيب رعد انه تريد راسي ولك اانه سهله

اخذت الموبايل خابرت حيدر شوي ورد

حيدر - هلا خويه

رعد - هلا بيك اكلك عمران رجع من السفر لو بعده

حيدر - لا بعده

رعد - شوكت يرجع

حيدر - ماعرف اتوقع بهل ايام ليش صاير شي

رعد - سهله لا سلامتك اخذ راحتك

حيدر - وينك هسه شو ماكو مانشوفك

رعد - مشغول بالمجمع

حيدر - كواك الله خويه

رعد - تسلم اروح اكمل شغلي بعدين نشاوف

حيدر - ماشي

رعد - في امان الله
سديت الخط صرخت من اعصابي ااااااخ عمران الحقير  من حسن حظك مسافر بسيطه  انه الك بسييطه

رحت كملت باقي الشغل ويه العمال و نار بصدري تحركني حرك صار المغرب راحو العمال واني صعدت بالسياره خابرت امي

جوان - هلا  يمه رعيد

رعد - هلا بيج يمه رجعتو

جوان - لا هسه نرجع

رعد - ليش هيج متأخرين مو كلت لنووور لا تتاخرون

جوان - شبيك يمه ليش عصبي هسه راح نطلع من الصالون

رعد - يمه صالون ما صالون ماعرف منا لساعه نور تكون بالشقه هاي كتلج

جوان - يمه خير شبيك عصبي

رعد - هو الي بحياته عمراااااان النذل يشوف الخير سهله سهله يلا اروح اني مثل ماكتلج 

جوان -  ماشي يمه بس لا تسوق سريع

رعد - ان شاءالله
قفلت الموبايل وشغلت السياره وكفت بمكان مابي هواي ناس فتحت جام السياره ضليت ادخن خلصت باكيت ونص بعدني محترك بناري شغلت السياره ورحت للملا.هَ الناس تركص فرحانه واني نار بكَلبي تذكرت كل افعال عمران النذل من صغري واني مامرتاح كعدت لا كاس ولا كاسين ضليت اشرب ودموعي تنزل من قهري نار بداخلي نااار
تحركني حرك وانه ساكت جتي وحده من البنات الهناك كعدت يمي

- ليش الحلو وحده كاعد

رعد - ما جاوبتها

- شدعوه عيني واذا حلو ليش هيج مغرور

رعد - ماهتميت لكلامها كملت شرب تقدمت مسكت كتافي كالت

- شبي الحلو ضايج ترا انا بالخدمه
انسيك كل همك

رعد - اني بلا شي روحي طافره
دفعتها وكلت

مافيدج القذر يرهم ويه القذر واني مو مثلج

- هههههه ودامك مو قذر شتسوي هنا

رعد - مو شغلج وامشي ولي من كدامي

- خوش عيوني لا تعصب

رعد - راحت راسي صدع من الهوسه حسيت براسي و رجليه ثكلن خليت الفلوس عل طاوله وطلعت مخنوك بزور كدرت امشي وصلت لسياره شغلته شخص ضائع تائه ضليت افتر بالسياره

وادخن انوب حتى عيوني غوشن ماعرف شلون داسوق ولا اعرف وين رايح مشيت وره كَلبي
ضليت اسوق لحد مالكيت نفسي يم الشقه نزلت قفلت السياره واني اجي واروح من كثر الشرب كوه ارمش بعيوني احس طاقتي خلص انتهت رحت للمصعد وصلت لشقه دكيت الباب ماكدرت اطلع المفتاح من جيبي ضليت ادك لحد مافتحته

نور - رعد .....................................

_
___
يكول

علـــى لحــــن الدمــع نــــامت عيــــوني الليـــل
و علــــى صــــوت القهـــر فـــز الصبــح گلبــي
بخنــــــگة الســـــوالف تطــــــلع من الـــــروح
مـا أدري إشعجـب ؟ و شصـار ؟ و شذنبــي ؟
يــــــلوموني لأن ربـّيــــــت حزنــــــي ويــــــاي
المفــــــارگ اهل متگلــّـــي شيـــــــيربّي ؟

____

بارت القادم يمكن اكثر بارت جنتو منتظري بالرواية
هذا البارت صار طويل كُلش مالحكت اكمل بي الأحداث كُلش هواي 💔 انتظروني في البارت القادم ماطول عليكم ان شاءالله

قلبي وصلو البارت اقل شي 200 تعليق حقي تعبي طلبتو بارت طويل وماقصرت وياكم ❤

لا تنسون التصويت بالنجمة
وعلقو بين الفقرات

حسابي انستجرام
انشر هناك كلشي يخص الرواية + موعد نزول البارتات ومشاهد قبل نزول البارت هنا 👇

والان ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا