#خلف القضبان روح يتيمة
#بقلم الكاتبه جيهان آغا
_
_
قبل مانبدي صلو على سيدنا محمد
( اللهم صل على سيدنا محمد وعلى ال محمد )
ولا تنسون تفاعلكم يحفزني
اكتب البارت وانزله اسرع
قراءة ممتعة ياقلبي
__________
حيدر - اي وشنو هسه مافهمنه
رعد - تقريباً صارلنه شهر اني ونور مزوجين
حيدر - شنوووو شدتحجي
سيف - لحظه حيدر خلي نفهم السالفه
خويه صدك تحجي لو تشاقه ؟
رعد - اكيد صدك ليش اشاقه بهيج موضوع
نور - جنت واكفه يمه وجان يهجم علي
عمه مسكو حيدر وسيف
عمران - ووووولك انت شلووون هيج تسوي
تخبلت تررررريد تفضحنه كدام الناس
سيف - بويه بس اهده خلي نفهم
عمران - وووولكم شنو تفهموووون بعد
هذا واحد حقييير هيج يسوي علمود يغثني يفضحني كدام الناااااااااس هدووني أدبه هدوووني يانذل ياحقيييير ولك انت عااار
علينه عااار هدووني
نور - فتحت عيوني من الصدمه هذا شبي
هيج انفعل التفتت على رعد يضحك ويدخن
شهل البرود العنده ماعرف استغربت
رعد - ههههههه عمران ياعمران ماريد اغلط عليك
كدام جهالك فَ احترم نفسك احسن الك مو الي شوف عمرك والله مو مال اغلط عليك وانت بهذا العمر عيب مو
عمران - انت تعرف العيب يانذل وووولك موتك على ايدي بس العااار مايموت مايفيد وياك ياااااااانذل شوكت ارتاح منك شووكت انت
شنو من بشر شنووو من حقاره عندك
جوان - كااافي يارجال حرام عليك
انت شعليك بي يزوج يطلك انت شعليك
عمران - انتِ اااانجبي هاي تربيتج يرووح يجيب بنات من الشارع ويكول مزوجها شوف من يا ملا.ها جايبها اي مو بيتي فندق لعربدته
نور - هو هيج كال ورعد كام ضربه بوكس وكعه
بالكاع صارت هوسه البنات التمو على ابوهم يبجون
واخوته دفعو صار عصبي
رعد - وووولك منووو انت وتجاوز على عرضي وووواحد مثلك حقير ونذل لازم يسكت
النااااس كلها تحجي وانت تسكت ياااااااااحقير
حيدر - كاااافي شبيييك تخبلت شلوون تضربه
رعد - اني تخبلت لووووو هو الحقير ماتسمعه
شديحجي تررريد اسكت وهو يحجي على عرضي هاااااااي غيرتك
نور - ضاج اخو باوع عليه ورجع باوع
على رعد كال
حيدر - اطلع برا انت فدنوب صاير لا تحترم لا
شي منووو هاي علمود تضرب ابوك علمودها
تخبلت اااكيد تخبلت
رعد - وولك لوو يموت هيج واحد مو ابويه
مو بالحيف هذا الحقير ابوي يروح فدوه لتراب
كبر ابوي فهمت لووو لا
جوان - بدموع /
رعد فدوه اروحلك عوفه وروح
رعد - يمه اني اروحلج فدووه انتِ ليييش هلكد تخافين منه بأشاره مني تشوفي ميت كدامج
بس لخاطر جهاله ساكت
نور - كام عمه باوع عليه خزرني وكفت وره رعد
باوع على رعد كال
عمران - يانذل ابوك خلص منك اني ابتليت بيك
ووولك انت عاق عاااق شترجه منك بسيطه الايام
بينه وانتِ اني اعلمج طمعتي بفلوسه ومنصبه
هو انتو الهمج هيج كلكم تركضون ركض
على المريشين
نور - انصدمت من كلامه
سيف - بويه شهل حجي
رعد - مو كل الناس مثلك بفلوس اخوك صرت مريش وتفتخر وتتباهى كدام الناس بفلوسه ومنصبه وربك متحملك لخاطر ذوله جهالك لو ماهما جان من زمان عفنتك بالسجن فَ احترم نفسك وعلم نفسك شلون تحجي لا والله بطريقتي اعلمك شلووون تحجي
نور - التفت على اهله مسك ايدي وكال
رعد - الكل يسمع احترام نور من احترامي
الي يغلط ويسيئ الها معنى غالط عليه
الكل يحترمها اااالكل وغصباً على اليعجبه والمايعجبه نور زوجتي على سنة الله ورسوله مامسوي شي غلط واني حررر منو ازوج ومنو
اختار ومحد بيكم يكدر يحاسبني
نور - نزلن دموعي وهو يحجي واخيراً اجه هذا اليوم الي احس بي عندي من يدافعلي ويوكف بوجه كلمن يريد يأذيني التفت عليه كال
رعد - تعالي اشوفج غرفتنه
نور - سحبني من ايدي وصعدنه فوك وهما
كلهم مصدومين ماعدا امه فتح باب الغرفه
جبيره وكل الأثاث البي لونه اسود بس البردات بيض سد الباب الشاش كله صار دم
رعد ايدك مكان الجرح كله دم
رعد - الخياط انفتح
نور - فدوه كوم نروح للمستشفى
رعد - عوفي هسه راسي صدع
نور - رعد لا تخبلني كوم مو زين عليك فدوه كوم
ل
ا تعاند
رعد - روحي جيبي شاش ومعقم يم
تيلا وتعالي نظفي بعدين اروح
نور - ماشي
طلعت خابرت امه ردت
: خاله بس شاش ومعقم انظف جرح رعد ماكدر
انزل هسه والجو هيج
جوان - اي يمه احسن لا تنزلين هسه ادزلج تيلا رعد زين
نور - اي
جوان - ماشي يمه هسه تجيج تيلا
نور - تمام
سدت الخط شوي وجتي تيلا اخذت منها الغراض
ورجعت للغرفه جان متمدد عل سرير
حبيبي كوم ابدل الشاش
كام القميص كله دم ماعرفت شسوي كال
رعد - نزعيني القميص اول مره
نور - ماشي
نزعته القميص كال
رعد - فتحي الشاش
نور - كله دم راح اكصه بالمقص
رعد - ماشي
نور - وين المقص
رعد - بالمجر الثاني مال مكتب ذاك
نور - التفتت رحت دورت لكيته كصيت
الشاش جتي عيني عل الجرح نزلن دموعي ماتحملت كتله
الجرح غميج شلون متحمل كوم نروح للمستشفى يخيطو مفتوح الخياط كله
رعد - مايحتاج بس نظفي
نور - رعد فدوه
رعد - نووور كلت مايحتاج شوفي شغلج
نور - نزلن دموعي مسح دموعي كال
رعد - انتِ بس لا تبجين ماريد شي ثاني
نور - شلون ما ابجي وهيج ايدك شلوون انت متوجع بس مدتحجي وتعترف رعد حبيبي فدوه لا تعاند راح انظف الجرح واضمده مؤقت ونروح نخيطه لخاطري اذا تحبني لا تعاند
رعد - هو منو مصبرني غير حبج يلا امري لله
نور - بسته بخده
احبك احبك احبك
رعد - خبال احنا الاثنين خبال ههههه
نور - هههه احلى خبال
نظفت الجرح ولفيته بالشاش
: يلا نروح
رعد - بس شوفيلي قميص بالكنتور
نور - ماشي
كمت فتحت الكنتور يمه هذا شكد عنده ملابس
حرت شنو اختار سحبت قميص لون نيلي
ساعدته يلبسه كام رحت اجيب الموبايل مالي
سحبني اله
رعد - لا تضوجين من كلام عمران وغصباً علي
انتِ جنة هذا البيت حالج حال خطيبة حيدر
واكثر بعد ماشي بويه ماريدج تضوجين
نور - باوعت علي مسحت دموعي كتله
لا عمران يهمني ولا البيت انت بس التهمني
حضنته وكتله
: فدوه لا تعوفني بيوم وحدي من بعد اهلي انت
صرت اهلي
حضني وكال
رعد - بس الموت يبعدني عنج
نور - ابتعدت كتله
يلا نروح بس فدوه لا تهتم لكلامه اذا حجه
رعد - انتِ ماتعرفي من يحجي شنو
يقصد اني اعرفه ومقصده وصخ مثله
نور - ميخالف حبيبي يبقى عمك عوفه لخاطري
خلي يحجي مايكدر يسوي شي
رعد - عود شخاط مايكدر يشعل لو ما فلوس ابوي
محد جان عرفه ولاجان وصل هيج منصب حتى هذا البيت مو بيته بس اعرفه شلون اتصرف ويا
نور - تعرف جوكم غريب كُلش
رعد - هههه تتعودين عروك كَلبي
نور - ماعرف
رعد - ويه الأيام راح تعرفين
نور - ابتسم مسك ايدي ونزلنه جوه بعدهم بالصاله
التفتو علينه كلهم نظراتهم عباره عن علامة استفهام ماهتم راح يم امه
رعد - حبيبه اروح اخيط الجرح انفتح خياطه
جوان - بدموع /
سوده عليه يمه فدوه دير بالك على نفسك
رعد - ادللي يالغاليه
نور - ردنه نطلع وجان يكول حيدر
حيدر - اطلع لا ترجع بعد
نور - التفت رعد باوع علي كله
رعد - شنو شدتحجي
حيدر - كلت اطلع برا لا ترجع بعد
رعد - شبيك ابني شارب شي
حيدر - ليش صرت مثلك اشرب وافقد
جوان - حيدر شنو هذا الحجي يمه شجاك
سيف - حيدر كافي بلا حجي زايد
رعد - لا عوفو خلي يكمل كمل اسمعك
حيدر - ماعدنه ولد يمدون ايدهم على اهلهم
انت منو والله انت منوووو على شنو شايف
نفسك على كولت ابوي هنا جم نجمه على كتافك شوف حالك يمهم بدوام مو يمنه عيب عليك تمد ايدك على ابوك لشوكت تبقى مستهتر شوكت تكبر
بتول - عزه هذا شديحجي
احمد - اليوم راح تعلك
بتول - صخام الصخمنا
: باوع علي رعد مستغرب من كلام حيدر ابتسم كله
رعد - طلعلك لسان ياحيدر وصرت تجاوز بالحجي على اخوك الجبير وتطرده من بيته الي انتو كاعدين بي لا تصير مثل ابوك الحقير ناكر الجميل وانت
بتول - التفت على ابويه كله
رعد - وانت لييش ماتحجيلهم الحقيقه فهمهم انت
مو ابويه فهمهم ااانت ظالم وحقير ونذل فهمهم انت مجر.م مو بشر عادي احجيلهم بفلوس منو عايش احجيلهم ابيت منو عااايش احجيلهم منو اني وشنو اصيرلك احجيلهم على تعذيب الطفوله الحرك والضرب والإهانة احجيلهم لاااا تسكت ليييش تريد تبينلهم اني واحد مو زين مثلك ليش ماتحجيلهم الحقيقه اااحجي فهمهم
نور - رعد فدوه خلي نروح
رعد - لا خلي يحجيلهم ويفهمهم
احجيلهم منوو رعد وابن منوو وبفلوس منوووو وصلت هذا المنصب احجيلهم ياحقيررر
بتول - يحجي وعيونه حمر تعصب انقهرت علي والله عرفت اكو شي احنا مانعرفه التفتت اشوف ابوي يباوع علي يضحك تعصب رعد هجم علي مسكو احمد وسيف
رعد - يااااحقير على شنوووو تضحك ليش ساااااااكت اااحجيلهم حقيقتك
سيف - خويه عوووفه واهده شجاك
احمد - خويه هدي فدوه اروحلك تيلااا
تيلا - نعم بابا
احمد - كلاص مي بسرعه
رعيد خويه اهده وتعال وياي
رعد - خلي يفهمكم ليييش ساكت
جوان - بدموع /
ولك يمه بس اهده مو زين عليك العصبيه
حسبي الله ونعم الوكيل عليك ياعمران
نور - امه وخواته يبجون واني وياهم ابجي
ماحب اشوفه هيج عصبي مسكو سيف واحمد بعدو وعمه يضحك استغرب شنو من بشر شنو من عم هذا
سيف - خويه بس اهده اعصابك يمعود
رعد - ليييش مايحجي ليييش مايفهمكم لييييش بس يحب يبين الكم اني شخص موو زين اااحجي ليش سااااكت اااحجي
سيف - خويه اذكر الله تعال وياي جرحك ينزف احمد روح شغل السياره بسرعه
احمد - ماشي
نور - نزلن دموعي حسيت بتأنيب الضمير كله
من وراي هيج صار كتله
: رعد فدوه كافي جرحك ينزف
جوان - ولك يمه عوفه هذا مايفيد الحجي ويا ليش اتعب نفسك وصحتك عوفه خلي يحجي لا تهتم
رعد - وربي اعرف شغلي وياك ياعمران يومين بسسسس يومين وشوف شلون مصيبه راح تنزل على راسك عود وقتها اضحك ماوصيك
نور - هيج كال وطلع باوع عليه عمه كال
عمران - يحلم بنت الشوارع تصير جنة بيتي
نور - نزلن دموعي واني اسمع كلامه حجت
علي ام رعد
جوان - كاااافي عوفهم حرااام عليك شنو من بشر انت
نور - عفتهم تعاركو طلعت صعدت بالسياره احمد يسوق وسيف كدام كاعد وهو كعد وره كعدت يمه كتله
: رعد خلي نرجع لشقه
رعد - لا
نور - فدوه لخاطري مالي خلك مشاكل تعبت
هناك احسن
سيف - خويه لاتزعلين من كلام ابوي مسحيها بوجهي هو صح انصدمنه كلنا بس ردة فعل ابوي مبالغه وكلامه ماجان يستوجب يحجي
احمد - مرت الاخ نعتذر نايبه عن ابوي كلامه
ماحلو جان بس شنسويله ابونه مانكدر نجاوز علي
نور - الله يهدي مالي شغل لا بي ولا بكلامه
رعد - بسيطه يومين بس يومين صبرو عليه
سيف - كافي خويه انت هم غلطان ليش تمد ايدك علي سواء جان ابوك او لا مايصير
احمد - لصراحه هو صح حجه كلام ماحلو بس الضرب ماجان يستوجب وتصرف غلط منك ياخويه مايصير لازم تهده شوي
رعد - اي يطعن بعرضي واسكت هاي غيرتكم
سيف - مو قصة غيره اني ماكلك هو ماغلطان اكيد غلطان بس ضربك اله ساواك ويا وصرت مثله غلطان خويه اعصابك لازم تتحكم بيها مايصير تبقى هيج عصبي مو زين صدكني لو تعرف
شيصير بالخلايا والانسجه العصبيه من تتعصب
وارتفاع ضغط الدم وسرعة دقات القلب شتسوي
من تتعصب بهيج مواقف مايصير غلط تتعصب
هيَ العصبيه فادت منو علمود تفيدك
احمد - اي والله تضر ماتفيد
نور - من يتعصب خشمه يطك دم
سيف - طبعاً بسبب ارتفاع ضغط الدم
بسببه يصير تمزق الأوعية الدموية الدقيقة
في الأنف وينزف الأنف
احمد - دكتور بعد خبره هههه
سيف - ههه انجب و لا تقشمر
والله خوش دكتور بس خلي اتخرج
احمد - الا خوشين مو بس خوش هههه
نور - هما يحجون وهو عيونه حمر ساكت حسيت
كاتم شي بكلبه كل شوي يمسح وجهه بيده ومايحجي وصلنه للمستشفى اجه الممرض
فتح الشاش كال
- جرحك ملتهب
رعد - شوف شغلك بويه اعرف ملتهب وخياط انفتح كُل شي اعرف شوف شغلك
سيف - اعصابك ويه الولد ترا ماحجه شي
احمد - ههههه صار ساعه لمنو نحجي مايفيد
سيف - اعذرنه خويه شوي اعصابه تعبانه
- عادي ماصار شي
سيف - خويه اخذي المفتاح وروحي كعدي بالسياره نخلص ونجي
نور - ماشي
اخذت المفتاح وطلعت من المستشفى كعدت بالسياره اذكر الصار وابجي احس كله من وراي هيج صار اااخ تعبت يوميه مشكله شوكت ارتاح ربي ساعدني يارب احس طاقتي انتهت
كعدت ابجي وادعي واجه احمد مسحت
دموعي كتله
نور - خويه وديني لشقه
احمد - ليش
نور - احسن هو بلا شي تعبان ومنا ابوك يحجي
علي وهو عصبي مايتحمل كلامه رجعنه لشقه احسن
احمد - ماشي ياشقه ساكنين انتو
نور - ال...... هناك
احمد - اي عرفته
نور - اي
اجه رعد وحيدر صعدو بالسياره شغل السياره اخو التفتت على رعد يمسح وجهه بيده وضايج كتله
- متوجع
رعد - لا
سيف - بلا متوجع ليش تكابر
خويه جرحه ملتهب وحتى الدكتور شافه
وكال يراد اهتمام خاص الخياط كله جان منفتح
وهاي الادويه قسم منهم قبل الأكل وقسم بعده وقسم قبل النوم بس انطي بانتظام وكله مكتوب علي جم مره ياخذهم وشوكت
نور - ان شاءالله
سيف - وين تروح
احمد - لشقه
سيف - ياشقه ولك ارجع للبيت
نور - لا خويه هذا طلبي
سيف - ليش بعد اخوج بالبيت احسن
احنا كلنا يما نهتم بي
نور - ميخالف هنا جم يوم بس يتحسن
عود خلي يرجع
سيف - براحتكم
نور - ماحجه شي رعد مسافة الطريق وصلنه
دخلنه الشقه كعدو شوي بدو يحجون ويا عفتهم رحت للمطبخ اقدملهم مي رحت قدمته كامو
سيف - يلا خويه احنا نروح ان شاءالله بالليل نرجع
نمر عليك اي شي تحتاج خابرنه وتدلل
وانتِ خويه اي شي يصير او تحتاجين بس خابري وتدللون
نور - تسلم ان شاءالله
احمد - دير بالج على الغالي اهتمي بي
نور - ان شاءالله
سيف و احمد : يلا خويه في امان الله
رعد - في امان الله بويه
نور - سلمو علي وراحو التفتت علي كاعد
عل تخم ومرجع راسه ليوره ومغمض رحت جبتله كلاص مي ويه الادويه وكعدت يما تلمست جبينه
مصخن (إرتفاع درجة حرارة الجسم ) كتله
: رعد حبيبي مصخن
رعد - بردان
نور - اي مصخن علمود هيج اخذ هاي الادويه
اكوم اسويلك كمدات
رعد - شغلي التدفئه
نور - مو زين عليك لازم تنزل حرارتك
عفته ورحت جبت مي وقطعة قماش نزعتله
حذائه وساعدته يتمدد وكعدت يما سويتله كمدات
رعد - نور
نور - عيونها
رعد - بردان كُلش جيبي شي غطيني
نور - حبيبي مايصير علمود تنزل الصخونه (الحمى)
: سويتله كمدات نام رحت بدلت القماش والمي
ورجعت اسويله مره ثانيه دك موبايله طلعت امه رديت
هلا خاله
جوان - هلا يمه رعد وين
نور - نايم ومصخن ماعرف شسوي
اني هيج كلت بجت امه وبجتني وياها
جوان - سوده عليه ولك يمه رعيد بيه ولا بيك شوفي نور سويله كمدات
نور - هو هاي مره الثانيه اسويله
جوان - اخذ ادويته
نور - اي قسم منهم
جوان - اذا زاد الصخونه كومي وساعدي يسبح
علمود ينزل مايصير يبقى هيج
نور - ماشي
جوان - واي شي يصير خابري سيف هو يعرف
سوي الي يكلج علي ماشي يمه
نور - ماشي
جوان - يلا يمه روحي دير بالج علي فدوه لعيونج
نور - بدون ماتوصين
سدت الخط خليت ايدي على جبينه اوجه بعده مصخن ياربي شسوي
سحبت موبايله طلعت رقم سيف خابرته رد
سيف - هلا خويه
نور - سيف اني نور اكلك رعد مصخن كُلش
سويتله كمدات ومدينزل الصخونه وبردان نام وهو مصخن شسوي فدوه
سيف - بس اهدي هذا علمود جرحه ملتهب صارله مضاعفات والحمى يستخدمها الجسم لمحاربة العدوى او الالتهاب حاولي تكومي يسبح بماء معتدل انتبهي معتدل مو بارد ويلبس ملابس خفيفه مسافة الطريق واني يمكم
نور - ماشي
سديت الخط التفتت علي تلمست وجهه
نار من الحراره سوده عليه كتله
: رعد حبيبي كوم ياكَلبي
فتح عيونه شوي ورجع نام رجعت حاولت ويا
: رعد حبيبي كوم فدوه
رجع فتح عيونه كال
رعد - شكو
نور - كوم حرارتك مرتفعه كُلش سيف بالطريق
هسه يجي ونبهني تكوم تسبح وتلبس شي خفيف لحد مايوصل
رعد - بردان ياسبح
نور - ميخالف حبيبي كوم اسبح بلكت تنزل شوي لحد مايجي سيف
رعد - بعدين مو هسه
نور - لازم هسه كوم لخاطري فدوه كافي عناد
مو زين عليك كوم اروح اطلعلك ملابس واحضرلك الحمام لا تعاند لخاطري
رعد - ماشي
نور - عفته رحت طلعتله تراك اسود صيفي هذا الاجه كدامي ويه المنشفه رحت حضرتله الحمام ورجعت اشوفه نايم اااخ يارعد والقهر يكولون
شوكت تجيبين اطفال شسوي بال اطفال وانت موجود ربي صبرني ويا هذا الرجال
: رعد كوووم اسبح ليش اتعبني وياك كوم
فتح عيونه كام كتله
نور - تكدر تسبح
رعد - اي
نور - ماشي اي شي تحتاج صيحني
رعد - تمام
نور - راح اوكف يم باب الحمام علمود من تحتاج شي اسمعك
رعد - هههه تعالي وياي ليش توكفين يم الباب
نور - حتى وانت مريض منحرف
ربي صبرني ويه هذا الرجال
رعد - ترا صدك احجي
نور - رعد لا تخبلني روح اسبح
رعد - هههه تمام
نور - راح ضحكت على كلامه هذا الرجال
غريب عجيب منحرف بكل وقت الله يساعدني
شوي واندك الجرس يمكن سيف شبسرعه وصل
رحت فتحت الباب طلع هو
سيف - ها وينه
نور - راح يسبح
سيف - ماشي وين الادويه اشوفهم خاف علاج ماوالمه
نور - هاي الادويه
سيف - بس هلكد
نور - لاالصبح هم جاب ادويه من الصيدليه لحظه اشوف وين خلينه
كعد عل تخم يقراه العلاج رحت للمطبخ ادور على باقي الادويه لكيته انطيته وجان يطلع رعد لَف المنشفه على خصره والمنشفه الصغيره ينشف شعره
سيف - ها خويه شلونك هسه
رعد - مادري شو احس تعبان كوه سبحت
سيف - بسبب مضاعفات التهاب الجرح روح بدل وغير الشاش مالك واني انتظرك بالسياره نروح للمستشفى
نور - التراك عل تخم بالغرفه
رعد - مايحتاج مستشفى
سيف - لا يحتاج
بعد اخوج روحي بدلي الشاش ماله هذا
راسه يابس والعناد يمشي بدمه ماشي
واني انتظره جوه
نور - ماشي
راح سيف التفتت علي
: لا تعاند تعال بدل وروح للمستشفى
رعد - مالي خلك والله
نور - ميخالف حبيبي الشغله طارئه مو مال
خلك او واهس روح بدل هسه اجي بس اشوف الشاش وين خليته
رعد - ماشي
نور - راح واني رحت ادور عل شاش لكيته رحت للغرفه جان كاعد عل سرير ومالابس التيشيرت رحت كعدت يما انظف الجرح بالمعقم
ليش مالابس شي من فوك مو تكول بردان
رعد - علمود يكون عليج سهل تنظيفن الجرح
نور - ماشي
نظفت الجرح ولفيته بالشاش وجبت التيشيرت ولبسته ورشيتله عطر ومشطت شعره ورتبته
وهو كل شوي يباوع عليه ويبتسم
: خلصت يلا كوم ها لحظه اطلعلك القمصله لان التراك صيفي خاف تبرد
رحت فتحت الكنتور اطلع القمصله التفتت اشوف واكف وراي تقدم اكثر حط ايده على خصري نزل لمستواي يناظر بعيوني ابتمست كتله
: اخوك برا ينتظرك
رعد - خلي ينتظر
نور - ابتسمت تلمست وجهه وبسته بخده كتله
: فديت حبيبي وابني الحلو حتى وهو مريض يخبل
رعد - هههه صدك اليوم صاير ابنج
نور - حبيبي وابني وزوجي وكَلبي وحياتي وعمري كلهم انت شعندي غيرك يادليلي
رعد - ماعرف شمسوي ورب العالمين رزقني بيج
نور - امممم خلي افكر لا ماعرف العلم عنده
باوع عليه ضحك تقدم باسني ابتعد
رعد - اشتعلو اهلج شكد مشتاكلج
نور - ههههه
رعد - استغفر الله عمي لا تضحكين هو بلا شي متخبل عليج ستري عليه
نور - هههه ماشي
رجع باسني كتله
: رعد كافي روح سيف خطيه ينتظرك
رعد - مشتاكلج شسوي
نور - ميخالف من ترجع هسه روح عيب
شيكول علينه
رعد - شكيتي بطني بالعيب مالج ارجع
واشوف شغلي وياج
نور - ههههه اني اول مره اشوف واحد مريض ومنحرف رووح
رعد - من ارجع اشوفج المنحرف هذا بس هيج مقبلات
نور - يااا ولك رووح ربي صبرني راح يخبلني
رعد - هههه هو اخبلج وياي مابيها مجال
نور - احلى خبال راضيه بس روح هسه
ضحك وراح ههه راح يخبلني
: رحت شغلت قرآن وربطه عل تلفاز وعليت صوته شوي رحت للحمام خليت ملابسه بالغساله ولميت الشقه صار يومين تاركي نظفت ورتبته وعطرته وبخرته رحت ارتب الغرفه مر تقريباً ساعه
وجان اسمع صوت الباب انفتح لفيت الشال
ورحت لصاله
سيف - ما شاءالله شنو هاي الريحه الطيبه وقرآن وأجواء راحه نفسيه ورب الكعبه نيالك
رعد - هههه تعال اكعد
سيف - لا اروح اتاخر الوقت وعندي امتحان
بس والله دنيا منو جان يتوقع بيوم من الأيام نشوف هيج أجواء ابيت رعيد
رعد - ماتنجب وليش ماتشوف
سيف - ههههه لا تعصب اقصد هاي مو اجوائك
يعني مشغل قرآن فهمت قصدي بس سبحان من غير الاحوال من حال الى حال
نور - دخلت لصاله شافني اخو ضحك كال
سيف - من حال الى حال سبحان ألله
رعد - هههه محظوظ مو
سيف - اي هههه الله يحفظكم خويه
رعد - حبيبي ان شاءالله يومل الك
سيف - هسه بعد وكت بالمستقبل ان شاءالله
خويه نور اسمج مو انسى
نور - اي
سيف - عاشت الاسامي بعد اخوج هاي ادويته
غيرانها ذوله اقوى شوفي كلهم كتبت عليهم قبل وبعد الأكل بس انطي بانتظام واي شي يصير خابريني ماشي خويه
نور - ان شاءالله شكراً تعبناك ويانه
سيف - لا خويه ماكو تعب يلا اترخص
نور - راح رعد وصله سد الباب التفت عليه
سحبني اله حط راسه برقبتي كتله
: رعد
رعد - عيونه واهله وعشيرته كلهم
نور - هههه شلون صرت
رعد - شلوني وانتِ يمي
نور - اخذ نفس من رقبتي كتله
: حبيبي اروح اسبح تعبت و توصخت
نظفت الشقه
رعد - صدكي مشتاكلج
نور - بسرعه اخلص وبعده نسهر على فيلم اني وانت شكلت
ابتعد راد يبوسني خليت ايدي على شفته كتله
: مو هسه من اسبح يلا
عض اصبعي روحي شاغات
: اااخ ليش هيج بطل العض ترا يوجع
رعد - هههههه اشتعلو اهلج يانور
نور - هو شبقه بيهم يلا اروح اسبح ماطول
عفته ورحت ركض للغرفه ضحك
طلعت تراك ستان لونه احمر وبي
قلوب بيض صغار ويه المنشفه اخذتهم ورحت للحمام سبحت بسرعه ورحت للغرفه نشفت شعري
رطبت ايدي وشوي مرطب للوجه والشفه ومسكاره مشطت حواجبي ومشطت شعري ورفعته بأهمال
ونزلت كم خصله على وجهي وحمره لون بناتي
على حمار شوي رشيت عطر وهسه تمام
رحت للمطبخ وهو جان كاعد عل موبايل كتله
: ها كَلبي شلون صرت
رعد - الحمد لله هاي الادويه فادتني حتى
ماحس بالم
نور - الحمد لله
رفع راسه التفت عليه سويت روحي على اساس مامنتبه علي طلعت الشاميه (فوشار ) خليته عل نار وطلعت عصاير راني من الثلاجه اجه للمطبخ
سويت روحي ملتهيه ومامنتبه
واني داسوي الشاميه حسيت بلمسات ايدي على خصري حضني وحط راسه برقبتي كتله
: ابتعد شويه لا نحترك
رعد - اذا عليه من زمان احتركت بنار حبج
نور - ههههه هذا المطلوب
رعد - نور
نور - عيونها
تقدم شم رقبتي كال
رعد - ريحتج تاخذين لغير عالم
ولج ليش هلكد انتِ حلوه
نور -ابتسمت دارني اله تقدم اكثر انفاسه الحاره تضرب بوجهي طفه الطباخ كتله
: ليش مو داسوي شاميه للفيلم
تقدم اكثر رفعني اله رجع حط راسه برقبتي وايده على خصري كال
رعد - احنا احلى فيلم شتسوين بالفيلم
نور - اخذ نفس من رقبتي غمضت عيوني كال
رعد - مو مره ضيم وضلايم اشتعلو اهلج
نور - ههه هسه هذا غزل لو شنو بضبط
رعد - هسه اكلج شنو
نور - مسك ايدي باسها وايده الثانيه
على خصري تقدم اصطدم رمشي برمشه وانفاسه الحاره تضرب بوجهي غمضت عيوني باسني ابتعد
: رعد
رعد - اشش
نور - بس حبيبي الفيلم لعد ما انتابع ؟
رعد - اشتعلو اهلج هو اني صرت فيلم يافيلم هذا
نور - هههههه
______
في مكان اخر
بتول - جنت كاعده وحدي بالصاله
من رعد راح واحنا كلنا مصدومين
من سالفة زواجه و ضربه وكلامه لبابا اكو شي واحنا مانعرفه اجه احمد كعد يمي
احمد - اكص ايدي اذا رعد يطلع ابن ابوج
بتول - تصدك حتى اني كمت اشك مو ابنه مستحيل اكو ابن هيج يسوي او اكو اب هيج يتعامل ويه ابنه تصرفاتهم مال اعداء مو اب وابنه
احمد - لا مو ابنه امبين
لحظه معقوله يطلع ابنه من غير مره
بتول - عزه بعينك منيلك هذا التفكير الخايس
احمد - شمدريني خبلونه بس وربي رعيد صدمنه
بتول - كُلش عوف الصدمه الي صار شكد ويه نور ولا حجت ولا كالت
احمد - صدمه ماتوقعت هيج يسوي
بتول - لصراحه كُلش فرحت نور خوش بنيه
احمد - امبين الله يوفقهم
بتول - امين
واحنا نحجي جتي امي تبجي بيدها الموبايل مدري
تخابر منو
جوان - ولكم لييش سيف مايرد راح اتخبل
احمد - خير يمه شصاير اهدي وتعالي كعدي خلي نفهم شكو
جوان - رعيد مريض كُلش وسيف راح ياخذه لدكتور وماكو اخابره يطلع مغلق
بتول - رعد شبي ليش مريض
جوان - لعد مو جان متصاوب طلعو الرصاص من كتفه وخيطو اليوم من اعصابه انفتح الخياط وملتهب ومصخن واني كَلبي مثل النار علي
بتول - سوده عليه
جوان - بس لو اعرف سيف ليش خطه مغلق
احمد - تلكين موبايله خلصان شحنه كل عاده
جوان - ااااخ شيبتو راسي
بتول - فدوه الراسج يالغاليه ماكو شي ان شاءالله
بس تعالي يمه جنتي تعرفين رعد مزوج نور ؟
جوان - مو وكت هذا الحجي
بتول - باوعت على احمد كتله
لعد تعرف
احمد - هههه اي طبعاً
بتول - واحنا نحجي دخل سيف
جوان - ولك يمه وينك ليش خطك مغلق
سيف - خلص شحنه
جوان - بشر شلونه رعيد
سيف - لا زين الحمد لله
جوان - اكيد
سيف - اي والله بدلنه علاجه بعلاج اقوى وعلمت مرته شلون تنطي وشوكت
بتول - مدري احس كلمة مرته غريبه علينه هههه
احمد - كُلش هههه
سيف - ولك احمد بس احنا بقينه كلهم ازوجو
احمد - خويه ذوله خبره بالحبجيات قابل مثلنه همج شمعرفنه بهيج سوالف
سيف - اي والله صدكت بس انطينه ندرس
بهل كتب ومانلحك
بتول - سوده عليه شكد خطيه هههههههه
سيف - اوف اووف نصرف نظر
احمد - ونشبع قهر بعد اخوك
بتول - ههههههه
جوان - ياااا ليش هيج تكولون انتو بس اشرو بنفسي اروح اخطبلكم
سيف - الله كريم
احمد - الله كله كرم بس العبد بخيل بعد اخوك
سيف - دور بساميرك ههههه
بتول - ههههه وصلت الرساله خويه وصلت
جوان - ها احمد اشوفك متوازي عَ زواج بعد امك
احمد - هههه لا يمه اشاقه
جوان - اي امبين
بتول - هههه
احمد - والله اشاقه هههه
سيف - يمه وين ابوي وحيدر
جوان - ابوك طالع وحيدر رايح لبيت خطيبته معزوم هناك
احمد - هاك استلم من اكول احنا همج عمي
حظوظ
سيف - هههههه روح احضن المخده ونام
بلا حجي زايد
احمد - هو حاضن المخده ياحضي لعد احضن
منو من امداني
جوان - يااااا ولك يمه صدك تحجي
بتول - عزه ههههههههه فلا يستحي
سيف - اي حقه كثرو المحفزين عل زواج ههههه
احمد - مو بالله عليك
ههههه لا يابه اشاقه وياكم يلا اروح اكمل درسي
سيف - اني هم اروح ماكملت التشريح
بتول - ثنينهم باسو راس امي وراحو التفتت على امي كتلها
: يلا احجيلي شلون وشوكت هيج صار
جوان - مالي خلك
بتول - يمه فدوووه احجيلي وهاي نور اني اعلمها بس خلي اشوفها
جوان - عوفي البنيه اخوج ماقبل تحجي
بتول - اممم يلا يصير خير
هسه احجيلي القصه فدوه فدووه
جوان - والله اعرف ما راح اخلص منج
بتول - لا ابد هههههه
جوان - باجر احجيلج روحي كملي درسج
بتول - خوش بس باجر ماعوفج
فَ لا تفرحين ماتخلصين مني بسرعه
جوان - اعرف لزكه ليش ماعرفج
يلا روحي درسي
بتول - هههههه ماشي
رحت بِسة راسها وصعدت فوك ادرس
قواعد وجان يدك الموبايل اشوف ركان
استغربت مايخابر بهيج وقت رديت
ركان - شلونج بويه
بتول - ياهلا زينه
ركان - شدتسوين
بتول - ادرس
ركان - جنت ناوي من انزل اكلج بس ماصبرت
شوفي بويه يوم الخميس الجاي بس انزل
نجي يمكم ان شاءالله
بتول - شنو يعني منو مافهمت
ركان - شنو منو اني وامي شبيج هههه
بتول - ليش تجون
ركان - شنو هاي ويه كل الضيوف تسئلوهم ليش يجون يمكم
بتول - لا ماقصد هيج هلابيكم بس سؤال
ماكلت ليش تجون ؟
ركان - نصلح اضويه بيتكم صدك تحجين
يعني اصدك مافهمتي شنو اقصد
بتول - والله مافهمت شنو تقصد
ركان - مو وكت فهاوتج والله يعني شنسوي غير اجي اخطبج
بتول - عززه العزاني تخطب منوووو
ركان - اخطب تيلا الي
بتول - ههههههههه
ركان - انوب الضحكه استغفر الله
بتول - صفنت عزه سواها الفاهي يمممه واخيراً
انوب انعديت منا صرت فاهيه عززه هههه
ركان - وينج
بتول - موجوده
ركان - وصلت الفكره
بتول - شنو
ركان - لا حول ولا قوة الا بالله ولج بويه ليش هلكد فاهيه فتيتي كَلبي شجاج
بتول - هاي شبيك غير انصدمت وبعدين
انت فاهي مو اني
ركان - ها هيج صار سهله عود اعلمج الفاهي
شيسوي شعلتي كَلبي وتكول فاهي اذا اكو واحد فاهي هيَ انتِ
بتول - هههه انعديت منك عادي تصير
بس لحظه ركان انت تحبني لو شنو يعني ليش تخطبني
ركان - هو لو ما احبج اني اجفص بطين عمران
بس غير حبج عام عليه
بتول - يمه فدوه ههههه تحمل استاهل
ركان - هو مال تستاهلين اي تستاهلين لكن ابوج بس لا يعاند وياي ترا اذا ماقبل اخذج غصب
بتول - هاي شنو
ركان - اي والله اني جايج من الباب مو من الشباك علمود يرفض وسواء قبل رفض انتِ الي وماتصيرين لغيري
بتول - اكلك شو خجلت يمه كَلبي شدتحجي
اني بحلم لو شنو السالفه خلي استوعب
ركان - هههههه خجلي بويه جعل محد غيرج يخجل
بتول - اووي فدووه
ركان - الج يروح كَلبي وانتِ شنو رائيج
بتول - عود لازم شوي اثكل يمكن هيج واشلع كلبك يلا انطيك الرد يمكن هيج يسون مو
ركان - وتحجي طك بطك
بويه شكد فطيره هههههه
سهله يجي يومج بس صيري حلالي اني
اعرف شلون اشلع كَلبج شلعي كَلبي هسه ميخالف
بتول - هههه احمم لا نروح زايد بالحجي خوش
ركان - خوش يلا بويه روحي شوفي شغلج
بتول - ماشي مع السلامة
ركان - بتول
بتول - نعم
ركان - دير بالج على نفسج
بتول - وانت هم
سد الخط
كمت اكمز عل سرير صدمني الفاهي يمه كلبي
يمممه واخيراً حجه الفاهي يارب تمم النا بخير وسلامه ربي اهدي ابوي ويقبل بي يارب
هسه شسوي انثولة ماعرف لمنو احجي ماتحمل اسكت اشوف تبارك وين
نزلت ركض جوه تبارك جانت بالمطبخ
سحبتها من ايدها
: تعاااالي اكلج شي مهم مهم مهم
تبارك - ولج على كيفج شكو
بتول - لا لا نصعد فوك مو هنا يمممه كَلبي
ولج تبو مصدوومه
تبارك - خبله ههههه على كيفج راح اوكع شبيج
بتول - اخذتها وصعدنه فوك للغرفه كعدت عل سرير واني سديت الباب وكفت مقابيلها انوب اريد احجي استحي صخام
تبارك - احجي شكو شصاير
بتول - لحظه عود استحيت شوي
تبارك - هههههه اكو وحده هيج تحجي ولج انتِ
شوكت تكبرين
بتول - ما اكبر
تبارك - اي صعبه
بتول - رحت كعدت يمها اخذت نفس وكلت
شوفي تبو راح اكلج شي بس صدكيني ماصار شي بينه ولا اكو شي كله صدفه
تبارك - ماشي احجي
بتول - اي شسمه تعرفين ركان صديق رعيد
تبارك - بربج هذا سؤال يعني شلون ماعرفه دحجي
بتول - ها مو كلت يمكن ماتعرفي المهم
شوفي قبل فتره كال اي شي تحتاجين اني اساعدج بالدراسه بس فتحيلي الكام واني
اشرحلج الموضوع الي ماتعرفي
تبارك - مافهمت هو شعلي شنو قابل مدرس واني ماعرف ؟
بتول - لا بس يعني حب يساعدني مثل اخته لا لا مو اخته يبووو ماعرف
باوعت عليه صغرت عيونها كالت
تبارك - بتول مدارتاحلج ولا دافهم احجي السالفه كلها شصاير
بتول - كل خير ان شاءالله شوفي
انطاني حسابه مو رقم بس حساب
وكال من تحتاجين خابريني
بيوم ماعرفت بموضوع وخابرته علمود يشرحلي
تبارك - اها واني وين رحت لو حيدر استاذ جامعي وين راح تحتاجين ركان يدرسج ؟ لو احنا مانجي بعينج
بتول - لا والله مو هيج انتو الخير والبركه
ماقصد هيج بس خلي اكمل وقتها شنو تحجين عليه احجي اقبل بس خلي اكمل
تبارك - احجي
بتول - شوفي هو كال اني ادرسج واساعدج قبلت مرتين يمكن اي خابر ساعدني والكلام بينه على كد الدرس والسلام فقط بس اليوم فجأه خابر رديت
كال
سكتت ماكدرت اكمل
تبارك - وثوول كملي
بتول - بس لا تصيرين عصبيه كال يوم الخميس نجي اني وامي نخطبج
كلتها وخليت ايدي على وجهي اخاف اشوف
نظراتها الي
تبارك - عزه بعينج كل هذا بس درس
بتول - والله ماكو شي بينه حتى اني صدمني
تبارك - والله طلع مو هين واني اكول علي فقير
بتول - فاهي هههههه
تبارك - انجبي
بتول - ماشي
تبارك - ابوج ماراح يقبل
بتول - ليش
تبارك - تعرفين ليش ماشفتي شصار لان رعد اخذ نور على اساس نور مو من مستوى العائله شفتي شسوه
بتول - بس غلط يعني كلنا بشر بعدين ركان شبي نقيب وعنده رتبته وحالتهم الماديه زينه واصلاً اني ما اهتم زينه او لا اني اريده هو مو فلوسه
تبارك - حجي يفيدج هذا الحجي مايمشي يم ابوج
من تجين تقارنين بينا وبين بيت ركان فرق هواي
وابوج صعبه يقبل
بتول - ترا كلنا بشر شنو الفرق كله علمود جم فلس وصخ دنيا ليش هيج تحجين
تبارك - مو اني ياثوله ابوج هيج يفكر
بتول - هسه شسوي
تبارك - هاي شبيج ولج بعدج صغيره ملحكه على
وجع الراس اهتمي بدراستج
بتول - تبو شبيج اني معجبه بي شكو بيها
اكمل واخذه مو موضوع صعب
تبارك - ماتكدرين تسيطرين دراسه وزواج الا بحاله وحده اذا قبل بابا خلي بس يعقد عليج ومن تدخلين كليه ازوجو
بتول - حبيت خوش فكره هسه شوفي اريد منج
تروحين تحجين ويه امي استحي اني احجي وياها
تبارك - ليش انتِ هم تعرفين درب المستحى وين
صاير ههههههه
بتول - و ليش يمه ماعرف لا تشوفيني ام لسان بس بهيج سوالف استحي والله
تبارك - خوش
بتول - يعني راح تحجين وياها
تبارك - شسيويلج لعد امري لله
بتول - حضنتها وبستها
يممممه فدوه وفداوي اروحلج ولج تبو
احبج احبج اممممممح فديت
تبارك - ههههه المصلحه شلون تغير الواحد
سبحان ألله
بتول - افا عليج ولج اني احبج بدون مصلحه شهل حجي
تبارك - خوش صدكتج اكوم اني وانتِ كملي درسج وها دير بالج تراسلي ثكلي شوي الثكل حلو
بتول - ههههه ماشي
نزلت تبارك واني فرحانه احس هيج فراشات اطير بالغرفه يمه كَلبي مداصدك معقوله الفاهي خطبني لا والحلو يكول اله اخذج وماتصيرين لغيري يمه فدوه نشوف شراح تسوي ياركاني حلوه هاي مال ركاني هههه يارب ان شاءالله صدك يصير ركاني
ههههه يلا نكمل درس
فتحت الكتاب اكمل درسي
_____
نور - كمت على ضوه الشمس فتحت عيوني
اشوفه شلون نايم ابتسمت اتلمست وجهه
: ياربي شكد احبه من اروح فدوه لهاي العيون
سحبت الموبايل اشوف ساعه بال 11 عزززه
شلون ماحسيت متأخر الوقت
ردت اكوم ماكدرت حاضني بعدت ايده بدون مايحس ومع ذلك حس
رعد - اااخ
نور - يبووو نسيت جرحه صخام الصخمني كتله
: حبيبي اسفه توجعت
فتح عيونه بزور كال
رعد - شوي
نور - خليت ايدي على جبينه
: الحمد لله مامصخن بس هسه موعد ادويتك
اكوم احضر شي ناكله واخذ الادويه
سحبني اله ولَف ايده على خصري
رعد - مو وكت الادويه خلي اكمل نومتي
نور - اي كمل بس اني لازم اروح
رعد - نامي
نور - راح يأذن الظهر يانوم
رعد - كلت نامي
نور - رعد كُلش مامحضره غده يانوم عوفني اروح اسوي شي ناكله
سكت مارد تقدمت بسته وبعدت ايده وهو كمل
نومته رحت للمطبخ احضر الغده سويت تمن(رز) ومرك اخذت موبايله وصيت على دجاج شوي مالحك اشوي هسه وسويت سلطه كمل الغده دك الموبايل جانت ام رعد رديت عليها
: هلا خاله
جوان - هلا يمه شلونج
نور - الحمد لله وانتِ
جوان - نحمد الله ونشكره يمه رعيد شلون صار
نور - احسن الحمد لله
جوان - شديسوي
نور - نايم
جوان - دير بالج علي فدوه اروحلج
نور - خاله بدون ماتوصين
جوان - فدوه لعيونج بنيتي يلا يمه خاف عندج شغل اخذي راحتج
نور - تمام حبيبتي
سدت الخط رحت طلعت ملابسي وهو بعده نايم رحت سبحت اذن الظهر صليت وصل الدجاج دفعت حق الدلفري ورحت للمطبخ خليت الدجاج عل تمن ( رز ) رتبت السفره ورحت للغرفه اكومه جان نايم وحاضن المخده سحبتها منا بهدوء
وتقربت تلمست وجهه ورموشه بأطراف اصابعي تقدمت بست عيونه كتله
حبيبي كوم الغده حاضر
رعد - بعدين بعدين
نور - لا ياعمري وقت الادويه كوم
مارد رجع نام شكد يتعبني بالكومه رجعت اكومه
: رعد حبيبي كوم فدوه لا اتعبني
فتح عيونه بنعس ابتسمت تقدمت بسته بخده
: يلا كوم ياكَلبي انت
رعد - اذن الظهر لصلاة
نور - استغربت من سؤاله
وفرحت بنفس الوقت كتله
: اي اذن
رعد - لازم اسبح يلا اصلي مو
نور - اي
رعد - مايصير بدون سبح
نور - لا حبيبي مايصير لازم تسبح يلا تصلي
رعد - ماشي
نور - كوم تغده هسه وبعدين اسبح وصلي
رعد - تمام
نور - ماشي اروح اني لا اطول
رعد - تمام
نور - عفته ورحت للمطبخ شوي واجه مغسل وجهه ومعدل شعره انطيته قسم من الادويه قبل الأكل اخذهم وبدينه ناكل واني داكل حسيت بألم ابطني شربت مي مافاد مسكت بطني من الالم حس عليه
رعد - خير بويه شبيج
نور - ماكو شي يمكن ماخذه برد
رعد - وين يوجعج
نور - معدتي مدري بطني ماعرف
واني داحجي حسيت راح اتقيأ ركضت
عل مغسله تقيأت وماسكه بطني من الالم اجه ورايه
رعد - بويه شبيج
نور - بطني الم الم ابطني
رجعت اتقيأت اشرتله يطلع برا طلع
بقيت 10 دقائق على هذا الحال حسيت
شوي ارتاحيت غسلت ورجعت اتمدتت عل تخم بالصاله ومسكت بطني موجوعه
رعد - ها بعده الألم
نور - اي
رعد - كومي نروح للمستشفى
نور - ماكو داعي يمكن ماخذه برد
رعد - ميخالف كومي نروح نشوف شبيج
نور - خلي انتظر فد ساعه اذا هم بقى الألم
نروح هسه انت كمل غداك واخذ ادويتك
خليتهم عل طاوله
تقدم باس راس وكال
رعد - ماكو شي ان شاءالله
نور - حبيبي
راح كمل الغده واني متمدده عل تخم صفنت
اتذكرت راح يصير شهر ماكو شي معقوله كتله
يطلع الي ابالي التفتت علي
: رعد
رعد - عيونه
نور - من ازوجنه واني لحد هسه ماتمرضت
رعد - مافهمت شلون يعني
نور - انسى
سحبت الموبايل ورحت للغرفه خابرت الحجيه
شوي وردت
ام ركان - هلا نويره
نور - هلا حجيه شلونج
ام ركان - بخير يايمه انتِ شلونج
نور - والله حجيه ماعرف
ام ركان - خير يمه شبيج
نور - شوفي حجيه من ازوجنه واني ماتمرضت
فهمتي عليه
ام ركان - اي يمه فهمت
نور - اي حجيه واني ابد ماصاير هيج وياي
واليوم حسيت بل الم نفسه ابطني وتكرمين بس اتقيأ مع العلم كلشي ماماكله معقوله يطلع حمل
ام ركان - ههههه اي يايمه معقوله
نور - حسيت كَلبي بده يدك بسرعه كتلها
: شلون حجيه
ام ركان - هلكد ما يكول احبلج بتوم هههه الظاهر
التوم بالطريق والعلم عند الله
نور - عزه بعيني ياتوم حجيه يمممه انوب توم يابويه غير اتخبل هسه شلون اعرف حمل او لا
ام ركان - ماعرف اكو جهاز من الصيدليه تشتري
يكولون اذا طلع خطين معنى حامل ماعرف كل مره
بناتي يحجون بي
نور - قصدج اختبار الحمل اي عرفته بس منو يجيبلي ماريد هسه رعد يعرف او يشك
ام ركان - كولي لعمتج جوان خلي توصيلج الجهاز يجيبولج يم الباب
نور - اي احسن هسه اخابرها شكراً حجيه
ام ركان - هلا بيج يايمه ان شاءالله يطلع حمل ونفرح بجهالكم ويارب يطلع توم علمود رعيد خطيه هههه
نور - ياااا واني مو خطيه حجيه فدوه ياتوم
غير انتهي ادعي غير دعاء فدوه لعيونج
ام ركان - هههههه
نور - دوم يالغاليه مع السلامة
ام ركان - الله وياج يمه
نور - سديت الخط خابرت امه ردت كتلها
الاعراض كامت تدعي يكون حمل كالت شوي ويوصلج الجهاز سديته مدري احس بشعور غريب
خليت ايدي على بطني واحجي ويه نفسي
: معقوله حامل العلم عندك يارب
بال حالتين سهلها عليه ربي
دخل رعد
رعد - ها بويه ماخف الألم
نور - بلا شوي احسن اخذت الادويه
رعد - اي
نور - تعال اغير الشاش وقته
رعد - لا اروح اسبح من اطلع وقتها غيري
نور - ماشي حبيبي تكدر تسبح
رعد - اي بويه بس جهزيلي الملابس والحمام
نور - الحمام جاهز وملابسك هسه اجهزهم
رعد - ماشي
نور - راح يسبح واني طلعتله ملابسه شوي واندك الجرس رحت فتحته وصل الجهاز انطيته حقه للولد راح فتحت الكيس مسكته بيدي الترجف من التوتر ماعرف شعور خوف على فرح ماعرف شعور غريب علمتني ام رعد شلون استعمله بس خايفه ماعرف ليش ماعندي الجرئه اروح افحص
: ياربي شجاني ماعرف
ساعدني يارب خايفه ماعرف ليش
اخذت نفس شهيق زفير وقريت سورة الفاتحه
توكلت على الله ورحت افحص كملت عفته شوي رحت لصاله اجي واروح حيل متوتره طلع رعد شافني هيج كال
رعد - بنت كَلبي شبيج اليوم مو على بعضج
نور - مابيه حبيبي شوي تعب ماكو شي
رعد - اكيد
نور - اكيد
رعد - ماشي
نور - راح للغرفه ينشف شعره
واني ادعي واجي واروح شلون الواحد ينتظر
نتائج امتحانه هيج متوتره اخذت نفس شهيق زفير 3 مرات وتوكلت على الله ورحت اشوف النتيجه
وجان اشوف خطين .................................
_
_
________
يقول الشاعر
في عينيكِ ألقيتُ الأماني
وقُلتُ الآن أصفح عن زماني
قضيت العمر أبحثُ عنكِ حلماً
رأيتُكِ من سنين في كياني
تركتُ القلبَ عندكِ دون خوف
وأخشى أن يموتَ إذا أتاني
فإن سألوكِ يوما عن فؤادي
كيف يعيش مذهول الأماني؟
فقولي إن حُبكِ كان لحنا
كحلم لاح في ليل زماني
عشقتُكِ ذات يومً في ضَياعي
وَفي عينيكِ أصفحُ عن زماني
وكانما كان الشاعر يقصد ابطال روايتي ✍
____
قلبي انتظروني في البارت القادم 🔥🤏🏻
فضلاً وليس امراَ اتمنى توصلو البارت اقل شيء
200 تعليق لصراحه تعليقاتكم على اخر بارت ابد ماتحفز واني على تفاعلكم اتحفز اكتب واستمر
لا تنسون التصويت بالنجمة وتعليق بين الفقرات وشكراً لكُم
_
حسابي انستجرام انشر هناك كُل شيء يخص الرواية 👇
والان ياقلبي انتم ثقلو ميزان حسناتكم بذكر الله
"""""""""
سبحان ألله
ألحمد لله
لا إله إلا ألله
ألله أكبر
"""""""""
#خلف القضبان روح يتيمة
#بقلم الكاتبه جيهان آغا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!