رواية خلف القضبان روح يتيمة الفصل السادس والثلاثون 36 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
__________

: اخذ نفس وكال بتعب

رعد - مشتاكلج حد النخاع وكَلبي بس
بأسمج يدك

نور - ابتسمت احبه مشتاكه لكلامه اخذت نفس
وكتله

: احبك يا ابن كَلبي

رعد - احبج يابنت كَلبي

نور- كالها بتعب وجان اسمع صوت انفجا.ر
ش ش شنو هذا ر رعد الووو ررررعد رد عليه
الووو لاتعووووفني رررعد

_

: رعد لا تعوفني رعد رررررعد

ام ركان - نور يمه كومي شبيج بنيتي

نور - كمت واني ابجي و اردد
حجيه رعد فدوه وينه لييش عافني وووينه

ام ركان - بسم الله الرحمن الرحيم عليج يايمه
كابوس حبيبتي اهدي رعد زين

نور - حضنتني طكيت من البجي

حجيه تعبت والله تعبت حتى بنومي ما ارتاح
اااااخ حبيته وكلت خلص راح افرح بس زاد
التعب بيه اذا صار بي شي اتخبل اني منا اهلي
ومنا هو منو يبقالي منووو

ام ركان - بسم الله عليج يايمه ذكري الله
ان شاءالله يرجعلج بسلامه بنيتي كومي غسلي
وجهج وتوضي وتعالي ادعيله محتاج دعواتج
مو دموعج يايمه

نور - ماعرف حجيه مخنوكه مامرتاحه كَلبي ناغزني والله احس بي شي فدوه محد خابر

ام ركان - لا مغلق خطهم

نور - نزلن دموعي كتلها
مو اكلج كَلبي ناغزني صاير شي اكيد

ام ركان - ولج يمه تفائلي بالخير ليش تفاولين
من هسه وكل مره هيج يغلقون خطوطهم تفائلي وكومي صلي ركعتين ارتاحي وادعيله انتِ ايمانج قوي ليش تخلين الشيطان يوسوس براسج خلي ايمانج اقوى بربج بهيج مواقف يلا حبيبتي كومي شوي وتجي جوان

نور - ان شاءالله

مسحت دموعي وكمت غسلت وجهي
وتوضيت والحجيه راحت لصاله فرشت السجاده
صليت خلصت قريت القرآن شوي ارتاح كَلبي
رفعت ايدي لسماء ودعيت يرجع بسلامه دعيت
ربي يهيدي ويصلحه دعيت ربي لا يحرمني منه

اندك الجرس وسمعت صوت امه شلت السجاده وطلعت اول ماشفتها حضنتها وبجيت

جوان - يااا يمه نويره ليش البجي يايمه ادعيله
ان شاءالله يرجعلنه بسلامه

ام ركان - مايفيد حلمت بي ومن كامت هيَ تبجي
ماتقبل تسكت

جوان - نويره بنيتي باوعي عليه

نور - ابتعدت باوعت عليها مسحت دموعي
بيدها وباست راسي كالت

جوان - ماريد بنيتي الحلوه تبجي يمه ادعيله
هاي مو اول مره هما هذا شغلهم

نور - خاله صدكيني كَلبي ناغزني مامرتاحه

جوان - ميخالف يمه تعالي كعدي واهدي
وان شاءالله خير

نور - كعدت يمهم بصاله مسحت دموعي هما يحجون واني بالي ساعه يمه وساعه اذكر الصار البارحه حيل اختنكت كمت اشرب مي طلعت بالحوش اريد اتنفس ماكدر خليت ايدي على كَلبي
وضليت اقره ايات قرانيه شوي حسيت حالي احسن رجعت لصاله يمهم

______
في مكان اخر

رعد - جنت كاعد بالمكتب ننتظر يصير الليل اجه ركان

ركان - اكلك رعيد ماكالو ساعه بيش انفذ المهمه

رعد - بالليل يعني يفصلنه جم ساعه

ركان - حماس فول

رعد - اكثر منك هاك شوف تاريخهم الاجرا.مي

ركان - شو اووو خبره ذوله

رعد - راح نستمتع صدكني

ركان - اي اكيد

رعد - واحنا نحجي دك الموبايل
هذا المقدم سلام

ركان - رد

رعد - رديت كال

المقدم سلام - رعد بعدكم بالمقر

رعد - نعم سيدي

المقدم سلام - بعد ساعه تنطلق المهمه تقدم الموعد
كونو جاهزين وعيونكم 10 على 10 ماريد اغلاط
وان شاءالله منتصرين يا ابطال

رعد - حاضر سيدي ان شاءالله اعتبره تم

المقدم سلام - كفو يلا روح بلغ السريا

رعد - حاضر سيدي
سد الخط باوعت على ركان باوع عليه ابتسمنه

ركان - ها بشر بده اللعب

رعد - الظاهر بده

ركان - اجه بوقته

رعد - روح جهز نفسك وبلغ السريا يجهزون نفسهم
منا لساعه لازم الكل جاهز

ركان - ماشي

رعد - طلع ركان تذكرت كلام نور رحت توضيت وصليت ركعتين استغفرت ربي على ذنب مسوي بحياتي كلشي يصير خاف ما ارجع

خلصت كمت جهزت نفسي لبست اللكس ( اللثام ) والدرع ودرع الركب والحزام والتكتيكي والخوذه والنظارات والقفازات واخر شي السلا.ح والبيكيسي وهسه تمام يارب منصورين

طلعت حفزت السريا وزعتهم على الهمرات
وتوكلنه على الله جان يفصل بيننا وبين العدو ساعة مسافة ساعه مسافة الطريق وصلنا ونزلنا
على بعد 300 متر المكان عباره عن بيوت
وبنايات قديمه متروكه

ركان راح ننقسم مجموعتين مجموعه اني
اديرها والثانيه انت خلي الاسلكي عندك احنا
راح نتقدم وانتو تامنون ورانا من اكول
اتقدم تتقدمون واضح

ركان - تمام

رعد - يلا يا ابطال

تقدمنا احنا اول

اثبتو من اكول ارمو ترمون واضح

- واضح سيدي

رعد - تقدمو

تقدمنه اكثر وكل تركيزنه على الهدف استعدو
1 . 2 . 3 ارمووو

سحبت الاسلكي

ركان حول حول تسمعني

ركان - حول اسمعك

رعد - بده الرمي شلون الوضع يمكم

ركان - كل شي تمام وحسب الخطه

رعد - شوف راح ارمي ذخيرة ار بي جي RPG اول ما ارمي تتقدمون واضح

ركان - واضح

رعد - انطوني الذخيره

- تفضل سيدي

رعد - اخذته وثبته ركزت عل هدف
عدت ل3 ورميت واجه بالهدف

- عاشت ايدك سيدي بالهدف

رعد - وين الثاني بسرعه

- تفضل سيدي

رعد - شوفو بويه اول ما ارمي تتقدمون واضح
يا ابطال

- نعم سيدي

رعد - جيد
ثبته وحددت الهدف الثاني ورميت
يلااا تقدموو بسررعه

ركان حووول تسمعني

ركان - اسمعك حول

رعد - وين وصلت

ركان - وراكم على بعد 100 متر

رعد - تروح لجهة اليسار وترمي واحنا نتقدم
بس انتبه الرمي مكثف عددهم مو قليل اكو
بنايه قديمه على جدرانها خطوط حمر تعالو
هناك ماشي

ركان - تم ولا يهمك

رعد - يلا ضلعي اريد ابداعك

تقدمنه لامام اكثر صار الرمي مكثف

يا ابطال

- نعم سيدي

رعد - راح اتقدم وانتو وراي تتقدمون واربعه
منكم يامنون ورانا واضح

- سيدي خلي يهده الرمي

رعد - ماعدنه وقت لازم نخلص بسرعه

- بس سيدي

رعد - كلت اتقدمو

- حاضر سيدي

رعد - انتو امنو ورانا

- حاضر سيدي

رعد - تقدمت وتقدمو ورايه بده الرمي بين الطرفين امنوو جهة اليمين وانتو اليسار واني وثنين منكم نتقدم لامام شايفين ذاك البيت
القديم لازم نوصل هناك ومن ارمي ترمون
وياي يلا بوويه

- حاضر سيدي

رعد - صار رمي ولازم نعبر لطرف الثاني حتى نتقدم اكثر والرمي كُلش مكثف اجه صوت ركان

ركان - رعد حول حول تسمعني

رعد - اسمعك

ركان - لا تتقدم اكو كمين

رعد - وين

ركان - على يمينك اكو عبو.ه ناسفه انسحب
فرقة تفكيك المتفجرات بالطريق

رعد - تخبلت شلووون انسحب واني واصل
هيج نقطه

ركان - اجباري لازم تنسحب على اي دقيقه
تنفجر ابتعدو بسرعه

رعد - شنو اسم العبوه بسررعه

ركان - رعد

رعد - اسمها بسررررعه

ركان - IED

رعد - اعرف افكها

ركان - لاااا رعد لا تجازف

رعد - كتلك اعرف افكها لا تعاند راح افكه
وانتو اتقدمو هواي منهم ماتو

ركان - رعدد لا تخبلني هذا مووو شغلك لاتسويها

رعد - ركاااان نفذ الي اكلك بدون عناد وانتبهو احتمال زارعين عبو.ه ثانيه يلا روح

وانتو انطوني جهاز الكشف بسررعه

- تفضل سيدي

رعد - اخذت الجهاز حددلي موقع العبو.ه قريب
التفتت كتلهم شوفو على اليمين اكو عبو.ه IED وفرقة تفكيك المتفجرات بالطريق بس احتمال يتاخرون والوضع مو مال تأخير راح احاول اني افكه عندي معلومات ومدرب على هيج نوع من العبوا.ت اريد واحد منكم يجي يأمن الطريق لحد ما افكه وخليكم مركزين من أئشر بيدي تتقدمون واضح

- واضح سيدي

- سيدي اني اجي وياك

رعد - تعال وانتو اول مانعبر الطرف
الأيمن امنو علينه

- حاضر سيدي

رعد - بين الرمي المكثف عبرنه لطرف اليمين
الحمد لله انطاني اشاره جهاز الكشف حددلي موقع العبو.ه بضبط تحت الأرض حاولت افكه المنتسب
توتر كتله

: لا تخاف خليك على بعد مترين بعيد عني
امن المكان واني افكه

- حاضر سيدي

رعد - سميت بسم الله وبديت افكه بحذر
واستخدم أدواته الخاصة لتفكيك العبو.ة
وعلى اي دقيقه او غلطه مني تنفجر علينه
ركزت بكل قوتي وأنا أفكك العبو.ة توترت
ومنا صوت الرمي الفوك راسي ومنا ساعة
العبو.ه تقترب من الانفجا.ر استخدمت جهاز الكشف للبحث عن الأسلاك المتصلة بعدين
عزلت المواد المتفجر.ة بحذر

- سيدي دير بالك

رعد - رفعت راسي ااااانتبه

التفت المنتسب تصاوب رميت على الصاوبه
وكع عل ارض

كوم بويه تصاوبت ؟

- ماكو شي اصابه خفيفه كمل سيدي

رعد - رحت بسرعه فكيت العبو.ه والمنتسب كعد تصاوب برجله سحبت الشماغ الجان على رقبتي ولففته حول رجله المصابة

متوجع يابطل

- لا سيدي فدوه للوطن

رعد - كفووو منكم ابطال
اشرت بيدي على الجنود يتقدمون
سحبت الاسلكي

ركان حول تسمعني

ركان - اسمعك حول ها فكيته

رعد -اي تقدمو وارمو بسرعه هنا المنتسب
تصاوب واني وحدي بموقع العبو.ه الباقي امرتهم يتقدمون وانتو استخدمو تكتيك الانتشار للتغطية الكاملة من اليمين والشمال خليكم منتشرين لا تتركو مكان مفتوح انتشرو من جميع الجهات

ركان - تمام

رعد - هسه انطيهم امر يرمون الهاو.ن بسرررعه

ركان - رعد متاكد نرمي الها.ون هسه

رعد - ركااان نفذ الي اكلك بسررعه ماعندنه وقت

ركان - تم

رعد - وانت بويه زين

- زين سيدي

رعد - حسيت بواحد منهم تقرب من البنايه البيها احنا التفتت رميت علي وكع على الأرض ارمي وهما يرمون شوي واجه ركان والبقيه وصار الاشتباك عنيف بين الطرفين

ركان - رعد راح اتقدم

رعد - لا فقط ارمي متقدمين بنقطه جيده
بس خلي علي يرمي الها.ون الثاني بلغه

وانتو تعالو وياي وانت بويه ماتكدر تمشي
هسه يجون الولد ياخذوك

- لا سيدي اجي وياكم

رعد - مستحيل وانت متصاوب

التفتت على ركان اشرتله بالتقدم فهم عليه
تقدمو واحنا هم تقدمنه اني و5 من الجنود صرنه قريبين كُلش منهم رمه علي الها.ون اغلبهم ماتو
او احد من جماعتنه تصاوب

بقى الرمي مستمر منا لنصف ساعه ماحس غير اجتني طلقه بكتفي انداريت رميت على الارها..بي الصوب عليه مات

- سيدي انت بخير

رعد - اي كملو

- سيدي ايدك تنزف

رعد - ميخالف كملو

رفعت ايدي بثلاث إشارات متتالية عرفو
أنو الإشارة تعني التوقف المؤقت استعدادًا
للهجوم الأخير اشرت بيدي 1 . 2 .3 ارمو

صار الرمي بين الطرفين شوي وصفيناهم كلهم بقو بس ثنين لتحقيق بقيناهم

وقفو الرمي كفووو منكم ابطال عاشت ايدكم
والمتصاوبين شلون وضعهم

- زينين سيدي

رعد - جيد
سحلولي ذوله الاثنين

- حاضر سيدي

رعد - نزعت الخوذه عدلت شعري اجه ركان
شغلو اغنية عراق اسمك هيبه وركان يركص
فرحان

ركان - وعراق اسمك هيبه

وياساس النيبه العاداك نجيبه
نعلكه تعلك والله علكناهم تعلك ههههه

هيبة واحنا رفعة راس بي شيمة
علي الكرار شايلين غيرة العباس بعد شتتوقع

رعد - و سباع وتدرينه وياهو يلاوينه
واليندك بينه نخلص عمره

ركان - ههههه كفوو عمي يخسر الراد يزامطنه
والله كفووو منه احنا الذهبيه بعد الزلمه الخشنه

بس لصراحه ابدعت ماتوقعت تكدر تفك العبو.ه

رعد - اعجبك كلكم ابدعتو

ركان - لا والله انت صدك ابدعت
لحظه منين هذا الدم شنو متصاوب

رعد - اصابه بسيطه
ماكو شي لم الشباب علمود نرجع تعبو
والوضع مو امان هنا

ركان - ولك ايدك تنزف شو تعال اشوف وين تصاوبت

________
في مكان اخر

نور - صار الليل وماكو اي خبر عن رعد وركان واحنا خايفين بقت ام رعد يمنا وكل ما نخابر يطلع
مغلق صار بال1 بالليل وهم ماكو اي خبر ام رعد والحجيه نامو بالصاله على التخم من التعب واني بقيت اجي واروح حيل متوتره رحت توضيت فرشت السجاده صليت بقيت عل سجاده وادعي صارت بال3 وهم ماكو اي خبر حاولت اخابره يطلع مغلق ادعي وابجي لحد ما اذن الفجر صليت الفجر وجان اسمع رنة موبايل بصاله ركضت جان موبايل ام رعد

جوان - هذا ركان

ام ركان - يارب سترك ردي

جوان - الو ها يمه ركان
الوو تسمعني اي اي اسمعك وينكم يايمه كملت مهمتكم لو بعد صدك الف الحمد لله الله يوفقكم يايمه رعيد شلونه شكو لا احجي ولك يمه احجي شكو شنووو شبييي رعد

نور - من هيج كالت عرفت صاير شي خليت
ايد على كَلبي

ام ركان - سترك ربي خير اللهم اجعلو خير

جوان - شلوون هيج صااار وينه هسه احلف
سوده عليه ولك يمه رعيد شلون ما ابجي
شوكت يرجع اي اي ماشي ميخالف ماشي تمام
بس اريد اسمع صوته مو تكول زين ركان احجي الصدك ابني عايش لووو لا ماشي مع السلامة

ام ركان - شصاير وكعتي كلوبنه

جوان - بدموع /
اااخ ياحجيه رعد متصاوب

نور - من هيج كالت مدري شصار بيه موقف جدا صعب ابجي واحجي

مو كتلكم كَلبي ناغزني مامرتاحه مامرتاحه
محددد صدك بيه

ام ركان - يمه اهدي كولي يا الله خلي نفهم السالفه

جوان حالته خطره ؟

جوان - ماعرف ركان يكول اصابه مو كُلش خطره
بس راح يرجع مايكمل التحاقه لازم يرتاح
بالبيت ماعرف بعد

ام ركان - خير ان شاءالله خير

نور - كعدت امه تبجي والحجيه تسكت بيها
عفتهم ورحت للغرفه سحبت الموبايل اخابره يدك مايرد اااخ يارعد لييييش هيج تسوي بيييه ليييش
ياربي صبرني راح اتخبل ويا هذا الرجال

طلعت لصاله ابجي

: ماايرد ماااايرد صاير بي شي مو احجولي

ام ركان - يمه اهدي تعالي كعدي هنا ركان كال
هو بخير كال شوي ويحجي وياكم وباجر يرجع

جوان - يمه نويره ذكري الله بنيتي ماكو شي
ان شاءالله ادعيله

نور - هما يحجون واني بالي يما وجان يدك
الموبايل طلع هو حجه ويه امه كامت تبجي
وتحجي ويا واني دموعي تنزل سده ودك عليه الموبايل جان بالغرفه ركضت رديت بلهفه
اجاني صوته نزلن دموعي

رعد - نور

نور - طكيت من البجي كتله

ليييش هيج تسوي بيه ليييش
ليييش التحبه تعذبه وياك طبعك
هذا لو شنو فهمني

رعد - كافي تبجين بويه

نور - شلوون تروح وماتكول
اخابرك ماترد هذا حبك اااالي تروح للمعارك
وماتكلي اذا صار بيك شي وووين انطي وجهي وووين

رعد - كافي بجي بويه اني بخير والله

نور - شلووون بخير وانت متصاوب شلوون

رعد - دموعج تجوي كَلبي تحرك كَلبي حرك
كافي تبجين

نور - سمعت صوت انفاسه من التعب كال

رعد - اذا بعدج تحبيني لا تبجين

نور - شلوون ماحبك وانت روحي شلون ماحبك وانت كَلبي ونفسي رعد

رعد - عيونه وكَلبه انتِ

نور - فدوه انت زين احلف و احجي الصدك

رعد - والله زين بس لا تبجين احنا متعلمين مو شي جديد علينه لا تخافين

نور - شوكت ترجع

رعد - باجر

نور - انتظرك لا اطول

رعد - ان شاءالله بويه يلا لازم اروح دير بالج على نفسج ولا تبجين ماشي

نور - ماشي

سد الخط رفعيت ايد ادعي ودموعي تنزل

يارب لا تحرمني منا يارب احفظه الي
واهدي اهدي ربي تعبت ويا ربي لا تحرمني منا

طلعت برا الغرفه كالت امه

جوان - نويره يمه اني اروح البنات خابروني
دير بالج على نفسج بنيتي

نور - ان شاءالله خاله تسلمين

جوان - يلا حجيه اترخص مع السلامة

ام ركان - هلا بيج حبيبه

نور - راحت الحجيه توصلها يم الباب رجعت كالت

ام ركان - باجر يرجع مو

نور - اي

ام ركان - كُل شي ماشفت منج يايمه كضيتي كله بجي روحي جيبي فراش وفرشي بالصاله علمود نكعد عندي حجي وياج

نور - يعني عادي انام يمج

ام ركان - اكيد يمه انتِ بحسبت بناتي

نور - فدوه لعيونج يالغاليه

فرحت من هيج كالت رحت ركض جبت الفراش
فرشته يم بعض قللنه الاضويه وجتي كعدت
اشرتلي اخلي راسي على رجلها اتمددت وخليت
راسي على رجلها كامت تلعب بشعري وتحجي

ام ركان - يمه نور اني حاسه من جيتي وانتِ
مو على بعضج احجي يايمه وفضفضي اني مثل امج احسج كاتمه شي بكَلبج احجي يايمه شبيج

نور - نزلن دموعي كلت بكَلبي ااااخ ياحجيه
شكلج وشحجي مو كلمه وكلمتين

حست عليه ابجي مسحت دموعي

ام ركان - خيرج يايمه احجيلي صاير شي بينج وبين رعيد

نور - تعبانه والله ياحجيه حيل تعبانه

ام ركان - بسم الله عليج من التعب يايمه

نور - حجيه اكلج شي بس فدوه يبقى بينه

ام ركان - كولي يايمه سرج ابير ماله عنوان

نور - حجيه طبعه صعب تعبت اني مدافهمه
تخيلي ساعه احسه حنون ويحبني ومن يتعصب ينسى نفسه هو انسان يصير انسان ثاني اخاف منه والله اخاف من صوته من يصير عصبي حجيه تعبني وماعرف شلون اتصرف ويا ماعرف معقوله هذا طبعه من البدايه بس اني ماجنت اعرف يوميه يوميه اكتشف طبع وصفه جديده بي شسوي فدوه نصحيني والله تعبت اني ما جان ناقصني تعب والله ماجان ناقصني

ام ركان - كافي يمه لا تبجين انتو بعدكم ماصاير شهر على زواجكم شي طبيعي الديصير وياكم
انتِ ماتعرفين طبعه ولا هو يعرف وانتو ثنينكم
مختلفين ماعندكم صفه مشتركه حياتج وحياته يختلفون

يايمه كلنا بالبدايه واجهنه هاي الصعوبات مثلكم يبقى شخص غريب ماتعرفي ولا يعرفج شي طبيعي تتعبون بالبدايه كلنا هيج جنا
بعدين عرفنه وصلحنه وتعودنه وتغيرنه

وجواب سؤالج هذا طبعه او لا

يايمه رعد ماعاش طفوله بحضن امه وابو ماكبر بين عائله تحب وتملك جو عائلي جانت دوم جوان تحاول تزرع هاي الأجواء بالعائله بس عمه عمران جان يرجع جوان لنقطة الصفر بتصرفاته وتعامله القاسي ويه رعيد ولا تنسين رعد تعذب بطفولته وكبر على اجواء قاسيه هو هم تعب يايمه مو بس انتِ واعرف اطباعه صعبه بس

بس صدكيني يايمه حيل يحبج وانتِ ذكيه حاولي
ويا يمكن من حبه الج يتغير حاولي صح عصبي بس حنون كُلش صبري ويا شوي وطولي خلك وبشطارتج راح تساعدي شوي شوي ويغير اطباعه
ان شاءالله

نور - امه هم هيج كالت

ام ركان - بعد ابنها وتعرفه احسن منا

نور - الله كريم ان شاء الله احاول مثل ماتكولين

ام ركان - اي يمه حاولي ويا الله يوفقكم بنيتي

نور - حبيبتي ياحجيه فدوه لكَلبج الحنون الطيب

ام ركان - فدوه لعيونج يايمه صدك ولج نويره شوكت تحبلين نريد نشوف جهالكم

نور - هههه مو كافي هو انوب الجهال خلينه هيج هسه والله كريم

ام ركان - هههه هذا رعيد هيج متعبج يايمه

نور - كُلش الحمد لله على كل شيء

ام ركان - اي والله يايمه الحمد لله لا تضوجين يتغير ان شاءالله بس صبري علي يلا يمه كومي طفي باقي الاضويه خلي انام جم ساعه منا لحد مايجي رعيد

نور - ماشي

كمت طفيت الاضويه ورجعت نمت ماحسيت
غير اندك الجرس فتحت عيوني الحجيه بالمطبخ جانت و الساعه بال12 الظهر

الليل كله ما نايمه ماحسيت على الوقت شوي
وسمعت صوت رعد مدري شصار بيه بسرعه رحت غسلت وجهي ورحت عل غرفه بسرعه مشطت شعري ورشيت عطر وشوي مرطب للوجه والشفه حيل وجهي تعبان وعيوني حمر من البجي
صاحت الحجيه

ام ركان - نووور يمه تعالي

نور - اي حجيه جايه

باوعت على المرايه زينه

طلعت اشوف ماكو كتلها

حجيه مو جان صوت رعد شو ماكو

ام ركان - بلا يمه بغرفة الضيوف

نور - ماشي

عفتها ورحت للغرفه اول ما فتحت الباب
جان كاعد عل تخم بيده الموبايل شافني كام اباوع شلون لَف ايده وكتفه مكان الاصابه واكو جروح بوجهه مضمدهم احس نار وشبت (ولعت) بكَلبي نزلن دموعي لا اني كدرت اتقدم واروح احضنه ولا هو بادر دخلت الحجيه

ام ركان - يمه ليش واكفين كعدو

رعد - لا حجيه لازم ارجع ارتاح

ام ركان - رحت يم امك

رعد - اي قبل شوي جنت يمها

نور - باوع عليه كال

رعد - انتظرج برا لا تتاخرين

نور - طلع باوعت عليه الحجيه مستغربه

ام ركان - يمه نويره شنو ماتحجون سوا

نور - مسحت دموعي وابتسمت كتلها

ماكو شي يالغاليه لا تشغلين بالج اروح اخذ
الجنطه

عفتها ورحت اخذت الجنطه ولفيت الشال سلمت
عليها وطلعت وهو جان بالسياره ينتظرني صعدت
سلم عل حجيه وشغل السياره طول الطريق جان والهدوء سيد الموقف لا اني حجيت ولا هو رغم كثر الكلام البكلوبنه التزمنه الصمت

وصلنه دخلنه لشقه راح للغرفه واني رحت للمطبخ اشرب مي نزلن دموعي وماحس غير سحبني لحضنه ولزكني عل حائط عيونه بعيوني كال

رعد - بعدج تعبنيي مو كافي عناد

نور - اباوع باين علي التعب واثار الجروح
بوجهه كتله

: ليش تعبك مو انت تحب تتفنن بتعذيبي
هذا كلامك لو اني غلطانه

: سحبني وحضني كام يبجي اول مره
اشوفه يبجي كال

رعد - المايعرف يحب وكلها تكول علي قاسي
وماكو رحمه بكَلبه يمج يصير طفل يتيم

نور - اسمع كلامه ودموعي تنزل
اخذ نفس وكال بتعب

رعد - بدونج كُلش صلب بس يمج اضعف حييييل

نور - اني تعبت منك افهمني تعبت

ابتعد وركز على عيوني والهدوء بينا
نزلت دمعه من عينه وكال بتعب

رعد - وياج انه غير انسان انه غير فهميني ولج
انه عاشك ولهان ووولهان بحبج وربي احبج

نور - بجيت مدري علي مدري على حالي
مسح دموعي وباس راسي وكال

رعد - دموعج تجوي كَلبي تحرك كَلبي حرك

نور - باس عيوني رفعت راسي اله
نزلت عيونه على شفايفي تقدم اكثر
غمضت عيوني ونزلن دموعي ودموعه
سوا باسني ابتعد حضن بيده وجهي كال

رعد - نور انتِ فهمتي الموضوع غلط وما انطيتي
مجال اشرحلج

نور - شنو تشرح مابقى شي تشرحه

خله ايده على حلكي وكال

رعد - اشش لا تحجين خلي اكمل

جنت مزوجها قبلج ومن شفتج واني ماكدرت اتقبلها ماكدرت اتقرب لوحده غيرج حتى لو جانت
حلالي ماكدرت ردت اطلكها توسلت بيه ابقيها ماعدها مكان تروحله بقيتها ماعرفت الحقيره جانت ناويه هيج تسوي نور صدكيني احبج وماحبيت غيرج مو كتلج اطلكها و طلكتها

نور - نزلن دموعي كتله

ليش اخذتها شنو الشي الحبيته بيها شنو الشي العندها واني ماعندي

رعد - ماحبها اخذتها استر عليها بعدين احجيلج
السالفه كلها من البدايه لنهايه والا اخليها تجي تعتذر منج وهيَ هم تكلج ليش وشلون اخذتها علمود تصدكين

نور - تعبت منك اني تعبت

رعد - اعرف اعوضج صدكيني اعوضج بس شوفي
اذا نريد نكمل حياتنه سوا خلي نكون صريحين

وانتِ كلامج ماحلو جان كلامج نرفزني خلاني
افقد واني كتلج خبالي لا اطلعي عليج بس مافاد
الحجي وياج

نور - اي بس كلامي غلط وانت كلامك تكسيرك الشكو شي كدامك مو غلط انت جيت تضربني على غلطه انت مسويها هذا حبك الي بالضرب والغلط والكلام الجارح جاوب

رعد - غلطت عليج لان جفصتي بالحجي ومن جيت اضربج فقدت ومن افقد ماشوف كدامي
ومع ذلك ماضربتج ومستغرب شلون ماضربت

نور - اي واضح من جرت الشعر وكلامك اليجرح

رعد - جنت شارب والله ماعرف شلون هيج كلت
وشلون هيج سويت

نور - واني شنو ذنبي تشرب تفقد تزوج اطلك
تكسر اني شنووو ذنبي

سكت مارد كتله

: تعرف شنو ذنبي
ذنبي حبيت واحد مثلك هذا ذنبي

رعد - خلي ننسى الصار ونبدي من جديد

نور - ماكدر

رعد - ماعوفج

نور - ترا مو اجبار

رعد - نور لا تعاندين

نور - مو كلت بعد ما اشرب ليش رجعت
هذا مو عناد بس اني اعاند

رعد - بعدج يتعبني

نور - هذا مو عذر كول متعلم وماكدر

تقدم اكثر حط راسه برقبتي وايده على خصري كال

رعد - ادمنتج احبج حب جنونييي افهمي
وبهذا الحب اتعب واتعبج وياي كافي عناد
وانسي مال بيوم اعوفج بس الموت يبعدني عنج

نور - اخذ نفس من رقبتي كال

رعد - مشتاكلج حيل مشتاكلج حد النخاع ولج كَلبي بس بأسمج يدك كافي اتعبيني

نور - نزلن دموعي وابتعد مسح دموعي ذبلات عيونه ونظراته على شفتي تقدم غمضت عيوني باسني بهدوء وابتعد فتحت عيوني

رعد - نبدي من جديد

نور - بشرط

رعد - وهوَ ؟

نور - تحجيلي القصه كلها واخر مره تضم عليه هيج موضوع مهم واخر مره تشرب من تشرب ماتحس على نفسك ومن وتتعصب تنسى نفسك انسان

صح احبك بس مامستعده اكمل حياتي وانت هيج اختار لو اني لو السم الشرب

قابل بالشروط؟

رعد - خلص اتركه ادللي واني هم عندي شرط لغير مره تفهمين وتسمعين السالفه قبل ما تحكمين واخر مره تعيدين الكلمه الكلتيها جنت ناويه بيومها

اتصرف غير تصرف وياج على هاي الكلمه بس من حسن حظج تراجعت بس ما اضمن ردة فعلي لغير مره فَ لا تعيدها

قابله بالشروط ؟

نور - قابله و اعتذر عل كلمه

رعد - قابل واعتذر عل تصرف والكلام

نور - احبك

رعد - اعشكَج

نور - بسته وحضنته صاح

رعد - اااخ

نور - اسفه اسفه توجعت نسيت الجرح

رعد - هههه من كل عقلج حضنج يوجعني الا
يطيب الجرح مو يوجعه ولج ميت شوك صدكي

نور - باوع عليه غمزلي فهمت قصده كتله

منحرف اكعد راحه متصاوب وتعبان

رعد - شلون اكعد وهيج كيك كدامي

نور - باوعت علي
ورفعت نفسي بأطراف اصابع رجليه وكفت على اصابع رجله ابتسم حاوطت ايدي على رقبته وهو ايده على خصري تقدمت بسته ابتعدت
شوي عيني بعينه كتله

: رعد لخاطري اترك الشرب اذا تحبني اتركه

نظراته على عيوني وشفتي تقدم باسني ابتعد كال

رعد - تدللين اتركه ادمنتج انتِ بداله

نور - رجع باسني دك الموبايل ابتعد رد

رعد - هلا يالغاليه اي هسه نجي اي لا هو اني هيج اريد خلي موجود احسن اي ماشي يمه ادللي ساعه واحنا يمج ان شاءالله مع السلامة

نور - سد الخط رجع حط راسه برقبتي

رعد - وين جنا

نور - وين

رعد - مشتاكَلج

نور - رجع باسني دك الموبايل صار عصبي هههه

رعد - لا حول ولا قوة الا بالله منووو هذا

نور - ههههه ضحكني
سحب الموبايل جان ركان ابتعدت رجع سحبني

رعد - لا تروحين

نور - تمام

رعد - ها ولك يعني حتى ابيتي لَحكني

ركان - ايا ارعن مو صوجك صوج اليسئل
ويطمن عليك

رعد - كول الرجال مشغول ويه مرته خلي
ياخذ راحته كل شوي مخابر شعندك

ركان -ههههه يول متصاوب وماتكعد راحه الله
يساعد المره ماتخلص منك

نور - هههههه

رعد - انجب اضل اعلم بيك الحجي ماتعرف
تحجي

ركان - هههه اي راح احتاجك تعلمني
بس انزل مو هسه شلون الجرح

رعد - لا زين الم بسيط

ركان - اي طبعاً وصلت يم المسكن

رعد - هههه اي اكيد

ركان - هههه اعرفك واعرف سوالفك يلا خويه اروح صاحوني مع السلامة

رعد - مع السلامة ضلعي

نور - سد الخط باوع عليه كال

رعد - مايخلونه ناخذ راحتنه واني ميت شوك والقهر لازم هسه نروح لبيتنه اليوم اريد اعلن زواجنه

نور - احلف

رعد - والله

نور - صدك تحجي صدمتني لصراحه

رعد - ههههه بعدج ماشايفه شي يلا روحي بدلي

نور - ماشي
بسته بخده وعفته رحت بدلت لبست فستان
لون تركواز علي بشت نفس اللون وحزام من
نفس القماش لفيت الشال لون بيج ومرطب وجه ومسكاره على سحبت ايلاينر كُلش نازكه وبسيطه وحمره لون مشمشي خفيف مشطت حواجبي ورشيت عطر وهسه تمام خلصت رحت اشوفه كاعد بالصاله بيده الموبايل كتله

: نروح حبيبي

رفع راسه باوع عليه من فوك ليجوه كال

رعد - هيج تروحين

نور - اي

رعد - لا ماقبل روحي مسحي هذا البوجهج

نور - تذكر شكلنه نبطل غيره تخنك مو

رعد - مو قصة غيره بس احس مبالغه

نور - رحت كعدت عل طاوله مقابيله اتلمس بوجهه وشواربه وشفته تقدمت بسته ابتعدت كتله وايدي تتسلم وجهه

: صدكني المكياج كُلش عادي ومابي اي مبالغه وفاتح بس انت هيج تحس يلا نروح

باوع عليه ماحجه شي كام واخيراً اووه
هههه اخذ الموبايل والمحفظه والمفتاح وطلعنه شغل السياره مسافة الطريق وكف السياره يم صيدليه كال

رعد - هسه اجي بس ابدل الشاش
مال ايدي وانظف الجرح

نور - ماشي حبيبي
راح شوي واجه حسيت بي متوجع

رعد متوجع مو ؟

رعد - لا بويه بس شوي

نور - ماكتلي شلون هيج صار وياك

رعد - بعدين احجيلج اخذي هاي الادويه
بس ذكريني بيهم بالليل اخذهم

نور - ماشي حبيبي

شغل السياره سحب ايدي باسها وشبكها (حضنها) ويه ايده وصلنه لبيتهم دخل السياره بالحوش نزلنه

رجع شبك ايدي بأيده ودخلنه لبيتهم وجان نشوف عمه واخوانه كاعدين بالصاله التفتو علينه باوعو على ايدنه استغربو كامو سلمو علي

سيف - هلا برعيد هلا اخوي نورت والحمد لله على السلامة يالغالي

احمد - هلا بسيادة النقيب نورت البيت خويه
الحمد لله على السلامة

رعد - هلا بيكم بويه تسلمون وين الغاليه

احمد - هيَ وحيدر راحو مدري وين كالو هسه نرجع

رعد - جيد واني اريد احجي وياكم ابموضوع
اريد الكل يتواجد تيلااا

تيلا - نعم بابا

رعد - روحي صيحي ماما تبارك وبتول

تيلا - حاضر بابا

رعد - وانتِ بويه تعالي كعدي هنا

نور - ماشي

كعدت على التخم اجه كعد يمي واخوانه مستغربين بس محد بيهم نطق بكلمه صار عمه مقابيلنه نزل النظاهر من عينه وكال

عمران - ها جاينه بمصيبه جديده ؟

نور - ضحك رعد سحب سيجاره ولعها كال

رعد - المصيبه الجبيره هو انت ماضنتي اكو مصايب اكبر منك بحياتنه

نور - توترت من جوهم هم زين نزلن بتول وتبارك
ركضو حضنو رعد ويبجون

بتول - سوده عليه بيه ولا بيك خويه شلون صرت

تبارك - شلونك هسه فدوه

بتول - لو تعرف شكد بجينه وخفنه عليك

رعد - ليش تبجون بعد اخوكم مو واكف كدامكم
وكُل شي مابيه

عمران - هو العار شوكت صاير بي شي

رعد - بضبط وانت اقرب مثال

عمران - احترم نفسك ولو منين اجيب الاحترام
من واحد مثلك

رعد - اوو ستاذ عمران بقيت الاحترام الك دليني وينه شكو بيها نتعلم منك

سيف - بويه رعد كافي منا البنيه شبيكم

رعد - فهم ابوك

بتول - التفت اشوف نور ولا انتبهت عليها

: نور ماشفتج شلونج حبيبتي

تبارك - شلونج داده شخبارج

نور - بخير الحمد لله انتو شلونكم

بتول - بخير حبيبتي

تبارك - ويه منو جيتي

نور - بعدني ماحاجيه رد عليها

رعد - وياي جتي

نور - باوعت عليه استغربت

بتول - اها اي زين

نور - دخلت امه وحيدر

جوان - ياهلا يمه نورتو البيت

رعد - هلا بيج يالغاليه

حيدر - شلونك خويه شلون صرت

رعد - هلا بعد اخوك زين الحمد لله
يمه جنت منتظرج تجين علمود احجي

نور - باوعت عليه وعلى زوجها كالت

جوان - اي يمه احجي

رعد - خوش

شوفو كلكم تعرفون نور وتعرفون قصتها ويه مرت ابوها وزوج مرت ابوها وشلون وطلعناها من ايده النذل

حيدر - اي وشنو هسه مافهمنه

رعد - تقريباً صارلنه شهر اني ونور مزوجين

حيدر - شنوووو شدتحجي

سيف - لحظه حيدر خلي نفهم السالفه
خويه صدك تحجي لو تشاقه ؟

رعد - اكيد صدك ليش اشاقه بهيج موضوع

نور - جنت واكفه يمه وجان يهجم علي
عمه مسكو حيدر وسيف

عمران - ووووولك انت شلووون هيج تسوي ............................

_

______
يقول الشاعر

لِعَينَيكِ ما يَلقى الفُؤادُ وَما لَقيوَ
لِلحُبِّ مالَم يَبقَ مِنّي وَما بَقيوَ
ما كُنتُ مِمَّن يَدخُلُ العِشقُ قَلبَهُ
وَلَكِنَّ مَن يُبصِر جُفونَكِ يَعشَقِ .

____

قلبييي مثل ما وعدتكم ماطولت عليكم هل مره
هذا الاكدر علي اكتبه حالياً اقصد طول البارت
ان شاءالله ماكون قصرت وياكم

في هذا البارت كُنت جداً سعيده وانا اذكر او اسلط الضوء على جانب بسيط جداً من عمل وتضحيات قواتنه الأمنيه العراقيه من اجل ان نعيش بسلام وامان تحياتي لهُم جميعاً و الرحمه والمغفره على روح الشهداء الابطال

_

انتظروني في
احداث جداً جميل في البارت القادم ❤👍

فضلاً وليس امراً لا تنسون

التصويت بالنجمة وتعليق بين الفقرات
وتفاعلكم مع الرواية وشكراً لكُم

حسابي انستجرام انشر هناك كلشي
يخص الرواية 👇

_

والان ياقلبي انتم ثقلو ميزان
حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا