رواية خلف القضبان روح يتيمة الفصل الثامن والثلاثون 38 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي
__________

اخذت نفس شهيق زفير وقريت سورة الفاتحه
توكلت على الله ورحت افحص كملت عفته شوي رحت لصاله اجي واروح حيل متوتره طلع رعد شافني هيج كال

رعد - بنت كَلبي شبيج اليوم مالج خلك

نور - مابيه حبيبي شوي تعب ماكو شي

رعد - اكيد

نور - اكيد

رعد - ماشي

نور - راح للغرفه ينشف شعره
واني ادعي واجي واروح شلون الواحد ينتظر
نتائج امتحانه هيج متوتره اخذت نفس شهيق زفير 3 مرات وتوكلت على الله ورحت اشوف النتيجه
وجان اشوف خطين صفنت على النتيجه مداستوعب مصدومه ماتوقعت احبل هسه بعدنه البارحه صار شهر على زواجنه ماتوقعت نهائي ولا فكرت بسالفة الحمل والأطفال

خليت ايدي على بطني معقوله اني حامل نزلن دموعي ماعرف افرح راح اصير ام لو انقهر
خايفه ماكون كدها خايفه ما اكدر اربي جهال
بهذا الوقت اني هسه بديت اتعود على رعد ومشاكله وهسه اطفال رفعت ايدي لسماء

يارب حكمتها عندك ربي اذا بيها خير الي سهلها عليه يارب ولك الحمد والشكر على كل شيء

مسحت دموعي ورحت للغرفه جان ينشف
شعره اريد اكله ماعرف شلون اكله احس بعدني مصدومه خلص رش عطره التفت عليه

رعد - ها حلو ؟

نور - منو

رعد - منو يعني غير اني

نور - بنظري احلى رجال اشوفه بحياتي

تقدم بتجاهي باس راسي خله راسه على
جبيني وكال

رعد - من اروح فدوه لنظرج

نور - غمضت عيوني نزلن دموعي كتله

: رعد

رعد - عيونه

نور - فتحت عيوني مسح دموعي

رعد - شبيج بويه ليش تبجين

نور - مسكت ايده وخليته على بطني كتله

: رعد يمكن راح تصير اب

صفن عليه تلمست وجهه
رفعت نفسي حتى اوصله بسته وهو بعده صافن ابتعدت كتله

: حبيبي راح يصير احلى اب

رعد - شلون هيج

نور - اني حامل

رعد - لحظه خلي استوعب انتِ صدك تحجين

نور - والله حامل

رعد - يعني راح اصير اب من صدك

نور - هههه واحلى اب

رعد - راح يصير عندنه اطفال

نور - اي مصدوم مو ههههه

رعد - لج شلون ما انصدم راح اصير ااااب

نور - اي هههه
حضني وشالني فرني ويحجي بصوت عالي

رعد - ااااحبج اااني اااااحبج ولج انتِ صدك اجمل
عوض من رب العالمين

نور - ههههه يااا نزلني مو زين خاف حمل

رعد - وووولج احبج اعشكج تعرفين شنو يعني اعشكج

نور - هههه اي واني اموت عليك بس نزلني

حطني عل سرير واني ماسكه رقبته وهو
يناظر بعيوني ويتلمس شعري المتناثر
على السرير كال

رعد - ولج نور شسويتي بيه

نور - ابتسمت تلمست وجهه بأطراف اصابعي
ورديت

: شسويت

رعد - تغيرت كل حياتي من دخلتيها
احبج يا اجمل نعم ربي

نور - باوعت بعيونه تلمست رموشه وشعره
النازل على وجهه وكتله

: احبك يا اجمل نعم ربي

تقدم باسني ابتعد كال

رعد - اريد جهال مثلج حلوين

نور - تلمست شفته تقدمت بسته كتله

: اريد جهال مثلك حلوين

رعد - اشتعلو اهلج

نور - هههههه

حط راسه برقبتي يشم بيها كتله

: رعد

رعد - اشش

نور - اخذ نفس وكال

رعد - تعرفين وياج عرفت شنو معنى السعادة ؟

نور - اخذ نفس ثاني وكال

رعد - تعرفين احبج حب جنوني ؟

نور - ابتعد باس عيوني كال

رعد - تعرفين انتِ اول وحده رجفلج كَلبي ؟

نور - باس خدودي وكال

رعد - تعرفين ليش احبج ؟

نور - تلمست وجهه رديت

: ليش ياعمري

عينه بعيني باس راسي كال

رعد - لانج نعمه من رب العالمين خلاج بطريقي حتى تتغير حياتي

نور - اكو ايه بالقرآن تكول

( الله ولي الذين آمنوا يخرجهم من الظلمات
إلى النور ) صدق الله العظيم

رعد - بنظرج استاهل هذا النور ؟

نور - العلم عنده لا تنسى هو ارحم عليك
من نفسك حاول اتقرب منا الحياة
بدون الله لا تُسمى حياة

رعد - ونعمه بالله ان شاءالله

مستحيل اكدر الكه مثلج احبج واحب تفكيرج
كلج احبج من الجدم (قدم ) لراس

نور - ابتسمت وهو يناظر بعيوني وشفتي
هو يناظر واني اناظر تقدمت بسته ابتعدت
خليت ايدي وايده على بطني كتله

: ثمرت حُبنا هذا

رعد - احلى ثمره شوكت يجي

نور - ههههه بعد خلي نتأكد هو موجود لو لا

رعد - صدك شلون نعرف توأم لو لا

نور - هههههه بس لو اعرف شعندك ويه التوأم

رعد - ماعرف سبحان الله احب التوأم

نور - ههههه خوش رعدي

رعد - عيونه

نور - لازم باجر نفحص بالمستشفى حتى نتأكد
يمكن الاختبار غلط كُل شي يصير

رعد - هسه نروح

نور - شلون

ابتعد كام واني بعدني متمدده سحبني اله بهدوء كومني ويا

رعد - بدلي نروح

نور - وين

رعد - نفحص

نور - عوفه باجر مو اليوم

رعد - لا اليوم بسرعه بدلي خلي نروح

نور - يعني مُصر

رعد - اي وكُلش

نور - تقدم باس راسي وكال

رعد - بنت كَلبي يلا بسرعه بدلي نروح

نور - تمام

طلع واني رحت لبست عبايه خليجيه على ملابس البيت لفيت الشال ورحت جان كاعد بالصاله صافن
رحت جبت المعقم والشاش موعدهم كعدت مقابيله كتله

: ها حبيبي شبيك صافن

رعد - مصدوم

نور - حتى اني ماتوقعت احس
كُل شي صار بسرعه تعرفت عليك وتزوجنه
وهسه احتمال حامل

رعد - احلى سرعه

نور - اي افتح القميص شوي علمود اسيطر
على لف الشاش

فتح القميص عقمت الجرح ولفيته بالشاش
خلصت عدل القميص ماله كتله 

نور - رعد خايفه

رعد - ليش بويه

نور - اخاف ماكدر هسه اربي اطفال ماعرف كُلشي
بحياتي ما ماسكه طفل يعني مرات احس اني بعدني طفله انوب اربي اطفال احسها صعبه

نزلن دموعي اخذت نفس كتله بحزن

: اخاف ما اكون ام زينه

مسح دموعي تقدم باس عيوني وحضني كال

رعد - لعد اني وين اني وياج وراح اساعدج
نتعلم شلون نربيهم سوا بالج وعقلج هذا صفي بويه لا تشغلي من هسه اني وياج ماعوفج وحدج

نور - حضنته وكتله
: احبك والله احبك

رعد - اعشكج مو بس احبج

نور - ابتعدت باس راسي كال

رعد - وهسه يلا نروح نفحص نشوف اكو فصعون
او لا حتى نتأكد

نور - ههههه اي يلا

مسك ايدي وطلعنه شغل السياره طول الطريق
ماسك ايدي وصلنه دخلنه للمستشفى رحت سويت فحص الدم شوي وطلع النتيجه باوع علينه المحلل ورجع باوع على الورقه مسكت ايده توترت كال

- مبروك زوجتك حامل

نور - اول ما كالها نزلن دموعي سبحان الله شعور غريب غريب وحلووو ماتوقعت شعور الحمل لهل درجه حلو الله يرزق كل وحده تتمنى تحبل

التفتت على رعد باوع عليه ابتسم اخذ الورقه من المحلل وطلعنه ماسك ايدي ويمشي كال

رعد - تخيلي طفلتي راح تصير ام

نور - هههه تخيل حبيبي راح يصير اب

رعد - ولج ااااخ اريد هيج اضمج بكَلبي

نور - ههه اي ضمني

رعد - خلي نشوف الدكتوره شتكول ومن ارجع اضمج بطريقتي

نور - ههههه خوش

رحنه لدكتوره شافت الورقه كالت

- حلو بداية حمل راح اكتبلج بعض من الأدوية
مكملات غذائية

نور - ماشي دكتوره

رعد - دكتوره ماتسوين سونار نعرف توأم او لا

- لا بعد الاسبوع ال6 تجيني اسويلها السونار
هسه حتى اذا اسوي كُل شي ماراح يبين من صغره
لكن بعد الأسبوع ال6 نكدر نحدد مكانه ونسمع نبضاته في بعض الأحيان حسب ومن الاسبوع ال6الى ال8 بينهم نكدر نحدد ونشوف اذا جانو توأم او لا

رعد - اوو هواي

نور - يااا اشرتله يسكت
باوعت علي الدكتوره ضحكت

- ههه مستعجل حضرتك

رعد - اي والله كُلش

نور - اي واني راح اوكع بيها

رعد - مو كتلج اني راح اساعدج

نور - انت مو بكل وقت موجود

واحنا نحجي باوعت علينه الدكتوره ضحكت

- ههههه انتو امبين بعدكم عرسان

نور - ابتسمت : اول شهر زواج

- الله يحفظكم لبعض حلوين

نور - تسلمين دكتوره

رعد - زين دكتوره ماكو شي ثاني منا منا
نعرف توم او لا

- بلا شوف ماريد انطيك كلمه اكيده لكن
بالفحص واضح هرمون الhCG وهوَ هرمون الحمل نسبته مرتفع عندها وفي العاده لكن مو اكيد يعني مرات من يكون الحمل بتوأم يرتفع اكثر من المعتاد نكدر نكول نسبه ربما تلمح انَ هناك حمل بتوأم

واعراض الحمل المتعبه مثل التعب والغثيان بكثره ايضاً ممكن يكون مأشر لوجود توأم راقبي حالتج
منا لجلسة السونار

نور - ان شاءالله شكراً

رعد - شكراً دكتوره

- اهلا ومبروك مره ثانيه

نور - الله يبارك بيج

طلعنه من المستشفى صعدنه بالسياره
مسك ايدي باسها وكال

رعد - نور فرحان كُلش بحياتي مافرحان هيج

نور - حبيبي دومك ان شاءالله

رعد - يعني هسه انتِ حامل وبعد كم شهر
نصير عائله بربج دتستوعبين

نور - ههههه

رعد - ماعرف مصدوم مدري فرحان ماعرف

نور - هههه حالي حالك

رعد - من اروحلج فدوه انتِ والي ابطنج
صدك نور يسمعنه هسه مو

نور - ههههه لا

رعد - ليش

نور - بعده كيس صغير اعضائه مامكتمله
شلون يسمع

رعد - اووف شوكت يكبر او يكبرون

نور - ههههه واذا ماطلع توأم

رعد - الحمد لله صح حيل اتمنى يكون توأم بس
اذا ماطلع بعد سويت الي عليه الباقي بيد الله
من ناحيتي سويت الي عليه ههههه

نور - عزززه بعيني شنو انت

رعد - هههههه منحرف وما استحي مو هذا كلامج

نور - اي حقيقه

رعد - هههه اشتعلو اهلج شحجيت قابل جذبت
دشوفي بعد ماصار شهر حبلتج بعد شنو تردين

نور - يااا رعد والله استحي شبيك لا تحجي هيج

رعد - ههههه من الكلام تستحين ومن الأفعال تذوبين ماتكولين يااا رعد شبيك استحي

نور - قلد صوتي وضحك باوعت علي كتله
والله ماتستحي ومنحرف مايفيد الحجي وياك

باوع عليه ضحك خله ايده على شفتي
وسحبها بيده

رعد - ههههه شلون مايفيد الحجي وهو يطلع
من هاي الشفه العسل ولج شعندي غيرج يادليلي

نور - مسك ايدي وشغل اغنية شمسين
عله الصوت يسوق ويغني ويه الاغنيه

رعد - لا تسولف علينا من يسألون
عيون الناس لا تحسد عشكنا
وإذا طلعت شمس فوت إنت للبيت
لأن شمسين معناها احتركنا

نور - التفت باوع عليه ابتسم باس ايدي وكمل

رعد - عيون الناس تحسد كل حبيبين
يردوني أبتعد عنك وأعوفك
وإذا إنت جرح ما أريدك تطيب
أوكف بصفك ولا ما أعوفك

نور - ياعمري

رعد - احبج مثل السيف

نور - من يجدح عطش لدم انه هيج احبك واكثر

رعد - ههههه

نور - ههه حفظتهم مثل اسمي

رعد - هههه اي خوش

نور - صدك حبيبي مانفرح امك ؟

رعد -  نسيت بلا هسه نروح نفرحها

نور- لا خليها هيَ تجي يمنا بالشقه احسن

رعد - ليش

نور - احنا فرحانين اليوم ماريد نروح هناك وتصير
مشاكل وتخرب فرحتنه

رعد - ماشي بويه هسه بس اروح عندي شغله
اخلصها ونرجع لشقه

نور - تمام حبيبي على راحتك

مسافة الطريق وكف نزل واني اخذت الموبايل
اشوف شكلي لا زينه مرتبه شوي واجه شغل السياره

رعد - مامحتاجه شي من المول او الماركت

نور - لا حبيبي

رعد - ماشي

نور - كمل الطريق وصلنه دخلنه الشقه رحت ابدل وهو خابر امه وطلب منها تجي بس ماحجالها شي

تذكرت الحجيه رحت لصاله كتله

: خلي تجيب وياها الحجيه وبتول وتبارك

رعد - تبارك مااتوقع تجي بهيج وقت بالمنظمه اكثر شي بس اكلها تجيب بتول والحجيه

نور - ماشي حبيبي شنو رائيك نخليهم يتعشون
يمنا شكلت

رعد - خوش فكره نوصي كباب ومشويات من برا

نور - والمقبلات عليه

رعد - لعد هسه اخابرهم

نور - تمام حبيبي

عفته ورحت للغرفه لميت الغرفه وبدلت التراك لبست تراك اعرض رفعت شعري وشلته بأهمال
ورحت للمطبخ اطلع مواد المقبلات وهو جان يحجي ويه امه بالموبايل خلص وكال

رعد - بنت كَلبي اروح انام منا لحد مايجون
لا اتعبين نفسج ماشي

نور - ماشي حبيبي

راح واني كتبت عل يوتيوب اسماء المقبلات
الي اريد اسويهم وبديت اسويهم

______
في مكان اخر

بتول - صار الصبح كمت بدلت راجعت دروسي
اجاني اشعار منه فتحته كاتب

: صباح الخير

بتول - كتبتله : صباح النور

شوي وشاف الرساله رد

: يومين وانزل

بتول - ابتسمت كتبتله : حلو

رجع كتب

: اول ما انزل اجي اخطبج

بتول - ابتسمت كتبتله : ركان تحبني ؟

: ماعرف يمكن اي ويمكن اكثر من اي وانتِ

بتول - يمكن اعجاب ويمكن حب ماعرف

: سهله اذا اعجاب هم نعمه ويه الوقت يصير حب

بتول - ههههه خوش

مارد شوي ورجع كتب

: بتول اكو فرق بالعمر بيني وبينج اتمنى منج
شوي تقدرين هذا الشي واني كذلك اقدر

بتول - مافهمت

: يعني بويه انتِ بعدج صغيره واكو فرق بين تفكيري وتفكيرج يمكن مرات تفكرين او تردين
شي ماقبل بي واني كذلك يمكن اريد شي انتِ
ماتردي اكو اختلاف وفرق بالعمر بينا شي طبيعي
ماتفكرين مثل تفكيري ولا اني افكر مثلج الي
اريده منج اذا صارت القسمه وان شاءالله انتِ الي
ماتصيرين لغيري ماحب نواجه مشاكل بحياتنه اول
فتره اني شخصيتي واقعي وكلامي بمنطق اكثر
فَ يابنت الحلال اول فتره احتمال نواجه صعوبات
بس بالتفاهم كل شيء ينحل وصلت الفكره

بتول - صفنت على الرسالة طلع الفاهي هم يعرف يحجي من اروح فدوه لهل تفكري هههه والله حلو كلامه كتبتله

ركان انت دوم هيج لو بس وياي

: مافهمت

بتول - اقصد دوم هيج تحب التفاهم واحسك
هادئ يعني مثلا عندك رعد فد عصبي بشكل
والله ماعرف شلون نور متأقلمه ويا طبعه حيل
صعب مو بس صعب بس انت ماحسك هيج

مارد شوي ودزي بصمه بصوته فتحته كال

ركان - هههههه صح طبعي مو عصبي كُلش مثل رعد بس مو كُلش هادئ  بصراحه لكن كتلج شخصيتي واقعي اكثر ومنطقي احب التفاهم بس اني اكلج اكره الكذب الخيانه الغدر الغلط وعلو الصوت ومن طبعي اغار لكن بحدود يعني حد معقول وصدكي اذا احب من صدك احب مو كلام اكوله وبس

بتول - شكد فرحني كلامه رجعت عدت البصمه مره ثانين من اروح فدوه لهل ضحكه هههه
انوب الفاهي صوته شكد خشن فدوووه كتبتله
: ركان شكراً

ركان - على شنو

بتول - حبيت صراحتك وانت توصف نفسك وشخصيتك بس سؤال اعتبره فضول

: جواب

بتول - حاب وحده قبلي لو اني اول حب

سئلته واتمنى اعرف الجواب مارد شوي
وكتب

ركان - الصراحه فترة التخرج جنت احب وحده
ونويت اخطبها بعد التخرج من الكليه العسكريه بس سبحان الله انخطبت البنيه قبل لا اتخرج
ماكو قسمه

بتول - ماعرف ليش ضجت كتبتله

جنت تحبها حب لو اعجاب وهيَ هم جانت تحبك لو حب من طرف واحد ؟

: شلج بهذا السؤال

بتول - كتبتله : فضول

شوي ودز بصمه بصوته فتحته

ركان - بويه لا ادوخين نفسج بهل امور الماضي راح ويه الماضي خلينه بالحاضر مو مهم جنت احب او لا المهم هسه احب منو

بتول - رجعت عدت البصمه مره ثانيه
حرت شنو اجاوب بس خليت علامة اوكي
عل صوت رجع راسل

: يلا بويه دير بالج على نفسج اروح الاامر اجه

بتول - كتبتله
: وانت هم دير بالك على نفسك

شاهده انطه علامة قلب وراح ماعرف احس فرحانه كُلش يارب ديم فرحتي اذا جان هذا الشخص الصح يارب

نزلت جوه رحت للمدرسه جان يوم عادي خلص
الدوام رجعت للبيت امي جانت بالمطبخ تساعد تيلا
نزعت الحذاء ودخلت جوه رحت حضنتها

: جوانو تعبانه بطلوني تعبت من المدرسه

كفختني على راسي

جوان - لا تعيديها بس هذا الباقي

بتول - لعد يرضيج توله لوله تتعب

جوان - ام لسان يامحلا التعب اذا هيج
يلا روحي بدلي وتعالي تغدي العصر نروح
لشقة اخوج

بتول - اخذت زيتونه كتله
يا اخ بس لا رعوده

جوان - اي عازمنه عل عشاء

بتول - والله اجه بوقته ضوجه ومشتاقه لنور

جوان - اي كملي درسج اول يلا نروح

بتول - ان شاءالله كلنا نروح ؟

جوان - لا بس اني وانتِ وام ركان

بتول - من كالت ام ركان غصيت بالزيتونه جانت حامضه كحيت

جوان - يااا شجاج شربي مي

بتول - اخذت منها كلاص المي شربته شجاني
توترت و ليش ما اتوتر غير راح تصير عمتي
ههههه اووي فدوه كتلها

يمه ابوي وين شو ماكو مانشوفه

جوان - ماعرف يكوم الصبح يتريك يطلع منا لليل
ساعه بال12 يرجع لا كلام ولا سلام

بتول - اووف لشوكت تبقى هيج ماعرف

جوان - الله كريم يمه الله كريم

بتول - ونعمه بالله تبو ماتجي ويانه

جوان - لا مناك تكول عندي شغل روحو انتو

بتول - ماشي اروح ابدل واجي

جوان - ماشي يمه

رحت بدلت ونزلت اتغدينه كملت دراستي وبدلت حتى نروح اني وامي لبست تراك رياضي عريض
لون ابيض واسود  تذكرت كلام نور بخصوص الحجاب سحبت شال لون اسود رهمته ويا لفيت الشال هل مره لفه مضبوطه بدون ماطلع شعري ماعرف حبيت شكلي تغيير الله يثبتني

نزلت جوه انتظر كعدت بالصاله شوي وخلصت امي
رحنه ويه السائق لبيت ركان نزلت امي واني بقيت بالسياره صفنت على بيتهم من الجام مال سياره

يارب معقوله اصير الركان واصير جنت هذا البيت يارب سهلها علينه يارب

شوي وجتي امي وام ركان صعدت بالسياره سلمت عليها

: شلونج حجيه

ام ركان - هلا يمه نشكر الله ونحمده انتِ شلونج
بنيتي

بتول - بخير حبيبتي

ام ركان - دايمه يايمه

بتول - حبيبتي يدومج الله النا

شغل السياره السائق وامي وام ركان يحجون
واني جنت اقره برسائلنه مال بارحه وابتسم
وبين الحجي جان امي تكول

جوان - حجيه ركان شلونه اخباره شوكت ينزل

ام ركان - زين الحمد لله بحيل الله يوم الخميس ينزل

جوان - ان شاءالله ، الله يحفظهم

بتول - كلت بكَلبي امين ويرجع ونخطب شكد
حلو يارب سهلها علينه

وكف السائق السياره يم
محل حلويات وصته امي يشتري
بقلاوه ومن السما وحلويات ناخذهم ويانه شوي واجه السائق مسافة الطريق وصلنه لشقه

_______

نور - كملت المقبلات وشغلت القرآن رتبت الشقه
بخرتها وعطرتها اندك الجرس اكيد هما رحت فتحت الباب هما جانو

جوان - هلا يمه شلونج

نور - هلا بيج خاله الحمد لله
هلا حجيه نورتي يالغاليه

ام ركان - هلا يمه بنورج بنيتي

نور - تفضلو
دخلو ماشفت بتول وياهم كلت

خاله بتول ماجتي وياكم

بتول - شلون ماتجي

نور - التفت شفتها

بتول - هلاااااااا بزوجة رعوده عوده موده

نور - هههه ياعمري هلا بيج شلونج حبيبتي

بتول - بخير داده  فدوه لعيونج شنو هذا الجمال

نور - جمال عيونج ياعمري

بتول - فدوه اروحلج
ماكلتي شلون الحجاب عليه امانه حلوه لو لا

نور - تخبلين ما شاءالله

بتول - حبيبتي ادعي ان شاءالله استمر علي

نور - ان شاءالله حبيبتي تفضلي

دخلت سديت الباب رحت للمطبخ قدمتلهم مي  كالت الحجيه

ام ركان - هذا الارعن وينه

نور - ههه نايم هسه اكومه

جوان - حبيبي نوم العوافي فدوه لعينه شلون صار

نور - الحمد لله احسن

ام ركان - شلونه الارعن وياج

نور - والله متعبني عنيد بشكل

بتول - الله يساعدج هههه

ام ركان - اي اعرفه عنودي الله يساعدج يمه هههه

جوان - لا تحجون علي ما اقبل فدوه اروحله

بتول - ابنها ماتنطي بي

نور - هههه حقها هسه اجي

عفتهم ورحت للغرفه اكومه تلمست وجهه وشعره

حبيبي كوم امك والحجيه جوي
مارد كتله

:رعود كوم فدوه لا اتعبني والله اتعب وياك حتى بالكومه كوم

فتح عيونه كال

رعد - اجو

نور - اي

كام من النوم كعد كتله

: اخذت ادويتك

رعد - لا

نور - اااخ منك يعني مثل الأطفال لازم اجيب الدوه اخلي بيدك ليش ما اخذتهم

اني هيج حجيت جنت واكفه يم السرير سحبني
لحضنه

رعد - نسيت صدكي

نور - تقدم باسني حط راسه برقبتي بعدته كتله 

:رعد مو وقته كوم عيب كاعدين بالصاله هسه شيكولون

ابتعد ضاج

رعد - نور لا تخبليني بس لو اعرف وين
العيب بالموضوع شكيتي بطني عيب وعيب
ادري غير مرتي شبيج

نور - بسته بخده وابتعدت كتله

حبيبي اقصد عيب طولنه عليهم ماقصد شي ثاني
يلا كوم

ماحجه شي كام عدل شعره يم المرايه واني رتبت
السرير طلع واني وطلعت ورا

رعد - ياهلا عمي اكول ليش الشقه منوره طلعو
الحجيه والعافيه منوريها

بتول - افا واني شنو

رعد - بعد اخوج الورده انتِ

بتول - يابعد عمري

ام ركان - اي لوتي تعرف شلون تكسبنه بالحجي

رعد - هههه افا عليج حجيه حبيبه شلونج

جوان - هلا يايمه بخير انت شلون صرت حبيبي

رعد - لا الحمد لله احسن ها حجيه هذا الارعن بعده مانازل

ام ركان - لا يوم الخميس ينزل

رعد - جيد شلونج انتِ يالغاليه

ام ركان - نحمد الله ونشكره يايمه

رعد - الحمد لله

نور - كعد يمهم واني جنت كاعده يم بتول باوعت علي اشرلي معنى احجي كلت

: احنا اليوم حبينه نشاركم فرحتنه لان نعرف
كُلش راح تفرحون ويانه

ام ركان - خير ان شاءالله واخيراً فرح

جوان - بس لا الي ابالي يارب ان شاءالله دوم الفرح احجي يمه بشرينه

نور - باوعت علي وعليهم كلت
اي يمكن الس ابالج اليوم رحنه سويت فحص
حمل وطلعت حامل

اني هيج كلت وام رعد كامت تهلهل
كامت الحجيه باستني

ام ركان - من كل كَلبي فرحتلكم الف مبروك
يايمه

نور - حبيبتي حجيه تسلمين

جوان - يمه نويره الف مبروك بنيتي الله يكومج
بسلامه

نور - حبيبتي خاله تسلمين

بتول - والله عرفت راح تكول حامل واخيرااااً ياااااي ولكم راح اصير عمه فديتني احلى عمه

نويره مبروك داده من اروحلج فدوه

نور - حبيبتي الله يبارك بيج وصدك احلى عمه

بتول - هههه اي لازم
وانت خويه مداصدك رعيد يصير اب يبووو

رعد - خلي اني اصدك بال اول

ام ركان - مبروك يايمه الله يفرحكم وتشوفوهم جهال جهالكم

رعد - امين تسلمين حجيه يومل الركان ان شاءالله

بتول - هو هيج كال كلت بكَلبي يارب هم يجي
هذا اليوم ان شاءالله

ام ركان - ان شاءالله يايمه

نور - جتي امه حضنته كامت تبجي باس راسها

جوان - مبروك يمه مبروك ياحبيبي الله يفرحك
يايمه ويجبر بخاطرك بجهالك حبيبي

رعد - فدوه اروحلج حبيبه امين

بتول - بس عندي سؤال اذا ممكن شبسرعه
حبلت نور

ام ركان - ليش اخوج يكعد راحه

جوان - ههههه اي بهاي صدكتي ياحجيه

رعد - ههههه لا والله ما اكعد ليش اكعد وعندي
هيج كيك والله كفو مني حبلتها بأقل من شهر
عمي كفوو  هي هاي الزلمه الخشنه

بتول - هههههه كفو

نور - عززه بعيني عود موصيته لا يحجي هيج
حجي انوب كدامهم حجه متت من المستحى باوع عليه ضحك خزرته الحجيه وامه خربو من الضحك

ام ركان - هههههه والله صدك كفوو

جوان - ههههههه كفو من ابني

نور - خزرته ضحك

رعد - ها باوعو شلون تباوع عليه ماتحب
هيج حجي ههههه

جوان - حقها تستحي

نور -  ماتحملت عفتهم ورحت عل مطبخ صخام الصخمني هذا شديحجي مايبطل سوالفه

يبووو احتريت غسلت وجهي وهما يضحكون
جتي بتول تضحك

بتول - هههه داده ليش كمتي

نور - اخوج مايستحي

بتول - هههههه هسه عرفتي

نور - جم مره منبهته لا يحجي هيج حجي
مايفيد ويا انوب كدامكم مايستحي

بتول - ههههه ولج داده عادي قابل هو غريب غير زوجج ترا كُلش عادي شفايتلي اخذلي واحد مرح ويشاقه مثل رعيد

نور - يااا اي ليش استغرب بعد اخوج ادافعيله

بتول - هههههه  طبعاً هسه تعالي احجيلي
شلون عقد عليج ليش ماكتيلي

نور - والله ماكدرت هو حب بنفسه يحجيلكم

بتول - يلا عادي المهم شلون عقدتو احجيلي

نور - نحضر السفره واحجيلج

بتول - اي تمام

نور - مر الوقت كعدو يحجون واني وبتول حضرنه السفره عل طاوله

دخل للمطبخ جنت اسوي السلطه وكف قريب مني اخذ زيتونه وهمسلي

رعد - ياحلو مشتهي بوسه

نور - التفتت هم زين بتول ماجانت موجوده
بالمطبخ باوعت علي كتله

: جم مره كتلك لا تحجي هيج حجي ليش تخجلني كدامهم مو كتلك استحي

باوع عليه ضحك

رعد - ههههه شكو بيها من باب المزح

نور - يامزح بهيج سوالف بس مايفيد وياك

رعد - هههه لعد شنو يفيد

نور- باوع عليه غمزلي فهمت قصده كتله

: منحرف مو بيدك

رعد - ههههه اعلمج تصيرين مثلي ولا يهمج

نور - لا والله

رعد - اي والله

نور - دخلت بتول كال

رعد - من يروحون اعلمج الانحراف

نور - عزه بعين اختياري بس هيج اكول

ضحك وطلع حمر وجهي واحتريت وترني
غسلت وجهي

بتول - ها داده شنو بقى شي

نور - ها اي اي بس هاي السلطه
رشي عليها شوي ملح

بتول - تمام حبيبتي

نور - طلعت قواطي الببسي من الثلاجه اندك الجرس راح فتح الباب رعد وصل الأكل كملنه ترتيب السفره اجوي كعدو بين الضحك والحجي وسوالف رعد المنحرفه خلصنه كعدنه شربنه جاي قدمتلهم فواكه وبقلاوه جانو جايبين وياهم صار بال10 كالت الحجيه

ام ركان - اكلج داده جوان خلي نرجع تاخر الوقت

جوان - اي صح ماحسينه بالوقت

رعد - ليش بعد وكت

نور - صدك بعد وكت ابقو متونسين وياكم

جوان - لا يمه كافي من العصر جايين

نور - شكو بيها ياخاله قابل احنا غربه

جوان - لا يمه بس ميخالف اتاخر الوقت

بتول - صح واني عندي درس ماكملته

نور - براحتكم حجيه ليش ماتنامين يمنا

رعد - اي ابقي يمنا ومن ينزل ركان رجعي ويا

ام ركان - لا يمه اروح يم البنات ان شاءالله لغير مره

نور - ان شاءالله

كامو

ام ركان - يلا يمه بيت العامر وعاشت ايدج دير بالج على نفسج بنيتي

نور - حبيبتي الف عافيه ان شاءالله

جوان - يمه نويره لا تيشيلن شغلات ثكيله
ودير بالج على نفسج هاي الفتره تركي حتى
ادوية وجع راسي كل شي تركي خلي الحمل يثبت

نور - ان شاءالله خاله

جوان - وانت يمه دير بالك على مرتك وعلى نفسك

رعد - بعيوني اخليها شعندي غيرها

بتول - اووي فدوه شكد رومنسي ههههه

رعد - اي طبعاً شعندي غيرها
بلايها احبل اجيب ههههه

بتول - هههههه ياااا

نور - والله مايفيد الحجي وياك
باوع غمزلي شافو ضحكو وهو ضحك

رعد - هههه بعدين يفيد مو هسه

ام ركان - هههههه يمه نويره الله يساعدج

نور - اي والله حجيه منحرف شسويله

جوان - ههههه الله يحفظكم يايمه شوكت ترجع
للبيت

رعد - ان شاءالله بهل يومين
اجيكم وياي مفاجأة لعمران ما اجي وحدي

جوان - يمه رعد عوفه لخاطري

رعد - ههههه لا يمه لا تخافين مالي شغل بي بس مفاجأة حلوه ان شاءالله

بتول - يلا نروح

جوان - اي يلا

رعد - نور بويه مفتاح السياره بجيب الستره السوده بالغرفه بس جيبي

نور - ماشي

رحت دورت عل مفتاح لكيته انطيته

رعد - ارجعهم واجي لا تفتحين الباب لأحد اني
عندي المفتاح افتحه تمام بويه

نور - تمام

سلمت عليهم وراحو رعد اخذهم سويت حمله عل صاله والمطبخ لميت الصاله وكنسته ورتبته ورحت عل مطبخ غسلت المواعين ورحت للحمام سبحت
لبست ملابس خفيفه الجو حار مدري اني محتره
مشطت شعري ومكياج بسيط ورشت عطر ورحت لصاله كعدت حسيت بألم المعده رجعت تمددت صفنت افكر شلون اقنع رعد على مو موضوع الدراسه صار شكد اريد اكله سبحان الله مشكله وره نشكله مايصادف وقت اكله بس اليوم
ان شاءالله اكله سحبت الموبايل خابرته اشوف
وين صار اتأخر طلع مغلق اكيد خلصان شحن موبايله

شمرت الموبايل ضليت افكر وافكر مر الوقت
صار بال 11:44 وهو ماكو حسيت الم معدتي زاد ركضت عل حمام اتقيأ احس روحي جاي تطلع
حيل مضوجني التقيأ

سمعت صوت الباب عرفت رجع غسلت وطلعت
شافني تعبانه شمر المفتاح عل تخم وتقدم بتجاهي

رعد - ها بويه شبيج

نور - ليش اتاخرت

رعد - ازدحام وهوسة الشوارع تعرفين بعد
انتِ شبيج

نور - معدتي توجعني بس اتقيأ

رعد - اخذتي الادويه

نور - اي روح جيب شاش ومعقم انظف جرحك

رعد - ماشي بس  تعالي ارتاحي هسه

نور - رحت عل تخم تمددت وهو راح جاب الشاش
عدلت كعدتي نزع التيشيرت ماله عقمت الجرح ولفيته بالشاش وساعدته يلبس التيشيرت

ورجعت اتمددت معدتي توجعني كتله

:حبيبي روح اخذ الادويه موعدهم هسه

تقدم سحب ايدي باسها عينه بعيني كال

رعد - نور

نور - عيونها

رعد - ماريد اشوفج تعبانه

نور - ابتسمت تلمست وجهه ورموشه بأطراف اصابعي كتله

: كُل شي حلو بي تعب وثمرت حبنه يستاهل التعب

تقدم باس راسي كال

رعد - ان شاءالله بويه

صلاة العشاء بعده باقي ؟

نور - اي

رعد - تمام

نور - كام اخذ الادويه وراح توضه وتوجه للغرفه
دمعت عيني من الفرحه رفعت ايدي لسماء ودعيت

يارب ثبته على الصلاة وارضى علي يارب

________
بعد مرور يومين

بتول - كمت من النوم غسلت وبدلت علمود اروح للمدرسه واليوم خميس خايفه وفرحانه بنفس
الوقت خايفه ابوي مايقبل اب ركان وفرحانه اليوم
راح اشوفه بنيه ثانيه اشوفه بنيتي زواج يارب
ارزقني هاي الفرحه اوفقني بيها

سحبت الموبايل اراسله كتبت

: ركان نزلت لو بعدك

انتظرت خمس دقائق مارد عفت الموبايل ونزلت جوه جانو تبارك وامي كاعدين بالصاله اشرت
لي تبارك تفتح الموضوع ويه امي وفتحته

تبارك - يمه عندنه موضوع وياج نحب نشوف شنو
رائيج بي

جوان - موضوع ويه منو

تبارك - موضوع يخص بتول بس اني واختي واحد
يعني الي يفرح اختي يفرحني ولي يحزنها يحزني

جوان - اكيد يايمه احجي

تبارك - شوفي يمه احنا البنات لابد يجي يوم وتنتهي خبزتنه يمكم بالنهايه مصير اغلب البنات هيج بس كلمن بالوقت الي الله كاتبه

جوان - شنو قصدج

تبارك - يمه بدون لف ودوران ركان طلب بتول لزواج

جوان - شنووووو

بتول  - استغربت يبووو الله يستر

جوان - شلون هيج بتول صغيره يازواج

تبارك - شكو بيها خلي بس يخطبون ومن تكمل
دراسه يزوجون

بتول - التفتت عليه كالت

جوان - لحظه انت ِ شلون طلبج ركان

بتول - انعكد لساني ماعرف شرد عليها ردت تبارك

تبارك - شافها وكال اريد اخطبج

جوان - واحنا شكو هنا خراعين خضره

بتول - لا يمه مو هيج شنو السالفه

جوان - ولج بتول احجي شعندج ويه

بتول - يااا عزه بعيني شعندي يعني

جوان - بتول احجي يمه احجيلي كُل شيء
لا تخافين اريد افهم منج شلون وشوكت طلبج

بتول - باوعت على تبارك اشرتلي بمعنى احجي
اخذت نفس عميق توكلت على الله كعدت يمها
مسكت ايدها وحجيتلها السالفه انو جان يدرسن
وبيوم اعترفلي وفعلاً هيج صار ماكو علاقه حب
بينا جان الكلام على كد الدرس وبيوم فجأه طلبني

لخلصت كلام كتلها

يمه والله لا بيوم كلي شي ولا اني ماكو شي بينا

جوان - اعرف يمه عند ثقه بيكم ونعم التربيه ربيتكم بس يايمه ركان اكبر منج ب10 سنين
اكو فرق بينكم بالعمر والزواج مو اول شهر
ولا اول سنه عمر كامل يايمه وانتِ بعدج صغيره

بتول - يمه اعرف ومقدره كلامج بس العمر مجرد رقم والرقم عمره ماوكف كدام الحب الحقيقي ركان حسب كلامه يحبني واني اتمنى اخذ واحد يحبني قبل ماحبه لان اذا العكس راح اتعب

اما بخصوص عمري يمه اذا ابوي قبل
فقط  نخطب ومن اداوم كليه مرحله ثانيه او ثالثه نتزوج ان شاءالله اذا الله كتبلنه قسمه

جوان - ابوج صعبه يقبل

بتول - انتِ شنو رائيج بي

جوان - والله يمه ركان منا وبينا نعرفه ومن الصغر كبر وياكم واعرفه خوش ولد ونعم منا ومن امه بس السالفه يم ابوج يمه مو يمي

تبارك - الله كريم هو وينه

جوان - ماعرف وضعه ابد ماعاجبني هاي الفتره وقته كله برا ومن يرجع احسه تعبان ماعرف شنو سالفته ومن يوم مشكلة رعد وهو مايحجي ويايه

بتول - ميخالف يمه مانعرف ظروفه الله كريم

جوان - الله كريم

بتول - كمت بست راسها

يلا يالغاليه اني اصعد اجيب كتبي واروح للمدرسه من نرجع نكمل

جوان - اليوم رعيد ونويره يجون

تبارك - صدك حلوو

بتول - يااي هم زين يجون ضوجه
صدك  تبو ماعرفتي نور حامل

تبارك - حلفي

بتول - والله هههه

تبارك - يااا شو محد كلي ها يمه شو ماتحجيلي

جوان - ناسيه يايمه ولا ابالي

بتول - انتو اتفاهمو اني اروح باي

عفتهم وصعدت فوك اخذت الكتب وشفته راد على رسالتي كاتب

: اي بويه نزلت بس حيل تعبان باجر اجي مو اليوم

بتول - كتبتله

: عادي وسلامتك دير بالك على نفسك

دزيته وطفيت النت ونزلت جوه رحت ويه السائق
للمدرسه

_____
في مكان اخر

نور - مر يومين حاله حال باقي الايام وقرب
موعد التحاق رعد واليوم خميس كال رعد
معزمين ابيت اهله وعنده خبر صادم لعمران
بس ماحب يكول شنو هوَ الخبر كال بس نروح
هناك تعرفون بدلنه ورحنه لبيت اهله بين السلام والكلام ويه اخوانه مر ساعتين واجه وقت الغده  وامه طبخت الغده وتيلا حضرت السفره جتي امه  كالت

جوان - يلا يمه الغده جاهز

سيف - ماننتظر ابوي

جوان - من يكول يجي

رعد - اني

احمد - شمعرفك

رعد - اعرف يجي

جوان - ماشي يمه

نور - محد حجه واخو حيدر ماموجود
على اساس رعد جاي هو يطلع من البيت
رعد من يوم المشكله الصارت مايحجي ويا

كملو حجي سيف واحمد كل واحد بيهم يحجي على دراسته وجامعته شوي وجان يوصل اتصال الرعد

رد

رعد - الو

- مرحبا النقيب رعد

رعد - هلا نعم منو وياي

- تعرف البيوت القديمه الي يم ..... تعرفها ؟

رعد - اي شبيها

- هناك روح شيل جثة ابوك عمران.....................

_

________
يقول 

إنما الدنيا فناء ،
ليس للدنيا ثبوت إن كان عنوانها الوداع

إنما الدنيا كبحرٍ كبير ، يحتوي
حوتًا وقرشًا وسمكًا صغير

الموت لا ينتهي تحت التراب ،
بال تبدأ الحكاية هُناك عند القاء ،

قد تتغير مساراتنا ،
لكن الذكريات هيَ التي تُغرس في أذهانُنا ،
هي التي تبقى معنى ، هي التي تسكن قلبًا ،
فاحرص أن تكون ذكرى جميلة تُسرد بين
أوراق قصص الحب العظيمة ،

القصيده بقلمي ،  جيهان آغا ✍

______

الظاهر ودعنا شخص من ضمن ابطال الرواية
شلون ؟ كيف ؟ وهل رعد الا ايد بالموضوع ؟
الجواب 👇

انتظروني في البارت القادم .

هُناك احداث كثيره و قرب موعد انتهاء الرحله البارت الاخير ان شاءالله احتمال يكون بارت ال40 لكن راح تكون البارتات القادمه طويله حتى تسرد الأحداث الباقيه ان شاءالله تحملونه شوي 🤏🏻❤

_

فضلاً وليس امراً لا تنسون
التصويت بالنجمة ، وتعليق بين الفقرات
اتمنى توصلو تعليقات اقل شي 200 تعليق

وشكراً لكُم 🙏
_

حسابي انستجرام انشر هناك كلشي يخص الرواية حتى موعد نزول البارتات واخبار تخص أبطال الرواية شخصياً 👇

حسابي واتباد تابعوني حتى يصلكم كل جديد

Jehan-Stories

وضيفو الرواية في المكتبه حتى يصلكم الأشعار اول ما انزل البارت القادم 👍

_

والان ياقلبي انتم ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا