#خلف القضبان روح يتيمة
#بقلم الكاتبه جيهان آغا
_
قبل مانبدي صلو على سيدنا محمد
( اللهم صل على سيدنا محمد وعلى ال محمد )
ولا تنسون تفاعلكم يحفزني
اكتب البارت وانزله اسرع
قراءة ممتعة ياقلبي
_________
ركان - باجر نروح مو تنسى
رعد - اي ماشي
ركان - في امان ألله
رعد - في امان الله
راح واني اضحك علي شلون يمشي من التعب
اني وركان أصدقاء من الطفوله وجوارين درسنا وتعبنا سوا وكملنا الكليه العسكريه سوا هوَ وعُمر
اصدقائي المقربين رجعت للبيت فتحولي الباب الحراس دخلت السياره للكراج شفت سيارة
عمران موجوده اخذت نفس من التعب
اااخ صدك مو كتك
بتول - سمعت صوت سياره
كمت اشوف منو من شباك غرفتي
طلعت سيارة رعد ركضت فرحانه
نزلت جوه ابوي وامي واخواني
كلهم كاعدين
جوان - ولج شبيج على كيفج لا توكعين
شكو شصاير
بتول - بفرحه / يمه رعد رجع
جوان - صدددك وليدي رجع
بتول - التفتت على ابوي شفته ضاج عفتهم
وطلعت نزل من السياره سوده عليه امبين
علي التعب حضنته
الحمد لله على السلامة خويه
رعد - ياهلا ياهلا بجمال كله الله يسلمج بعد اخوج
بتول - اخذت الجنطه منا ونزعتله البسطال
خله ايده على راسي وكال
رعد - الله يوفقج خويه
بتول - ترا مشتاقيلك شنو هاي
رعد - ليش بيدي شسوي خويه الشغل هوايه
بتول - الله يساعدكم
دخلنا جوه
جوان - هلا بسورها ونورها هلا بشمعة بيتنا
يمه هلاااا ومية هلا بروعيد وليدي نورت
البيت يايمه نورته يابعد كَلبي
رعد - رحت بست راسها
هلا بيج يالغاليه منور بيج
سيف - هلا خويه على كولت امي صدك نورت
البيت
حيدر - شمعة البيت لقبه يم امي واحنا شنو
سيف - ولك احنا منو بحالنه بس لطلابات
يذكرونه جيب هذا ودي هذا
هيَ هيج حظوظ
رعد - يمه ذوله يغارون مني تعرفين
جوان - هههه اي يمه حقهم يابعد كَلبي
حبك انتَ غير عنهم
سيف - ما شاءالله تعترف الوالده صريحه
حيدر - اي حظوظ لعد اجذب علينه مثلاً
جوان - نزول عليكم شكد تحبون تتناكرون
بتول - ترا اني الأصل والفصل والتفصال خاف عبالكم بس انتو لا اني المدللة اي عيني
رعد - فديت وردة البيت انتِ
بتول - اوووي لا تخجلوني فدوه
ضحكنه وجان نسمع صوت ابوي كام يصيح
عمران - بسسسسس شنو هاي الهوسه احترموني
شنو رجل كرسي كاعد هنا
بتول - كلنا انصدمنه من ردة فعل ابوي لان
نادراً يعصب الا رعد ابتسم حسيته يعرف ليش
ابوي صار عصبي
سيف - لا بويه اعذرنه بس فرحانين برجعت
رعد
حيدر - بويه حشاك حقك علينا
رعد - ابتسمت وماستغربت من تصرفه جان كاعد
عل تخم وخال رجل على رجل وبيده سيجارته
تقدمت على اساس اسلم علي وكتله بصوت منخفض
لا تصير عصبي هستوني راجع وتعبان بس
خلي اشبع نوم ولعيونك الحلوه محضرلك مفاجأة على كولت البنات سبرايز من العيار الثقيل
ابتعدت وكلت
هذا الغالي لحد يضوجه يتدلل علينا
تخربط كل وضعه من كلامي وكام
بتول - راح رعد سلم على ابوي وماعرف شكله
وابوي توتر وكام بدون كلام التفتت اشوف رعد
يبتسم الله اليستر ذوله الاثنين راح يخبلونه
رعد - احمد وتبارك وينهم
بتول - تبارك نايمه واحمد طالع ويه أصدقائه
رعد - خوش خويه بتول حضريلي الحمام
حيل تعبان اريد اسبح وانام
بتول - مو تدلل من هاي العين قبل هاي
جوان - يمه لازم تتغده اكل شي بعدين روح نام
رعد - لا يمه تعبان من اكوم اكل
سيف - اي يمه خلي يرتاح ومن تكوم
خويه محتاجك بموضوع
رعد - ماشي
عفتهم وصعدت فوك كُلش تعبان شفت بتول
محضره الحمام والملابس وتعطر الغرفه
بتول خويه تعبتج
بتول - يابعد عمري ماكو اي تعب حبيبي ادلل
بس سؤال اذا ممكن
رعد - جواب كولي
بتول - شوكت نفرح بيك ونشوف جهالك
رعد - ههههه من الكي التتحمل اعصابي وتكدر تعيش ويه اطباعي
بتول - يااا خويه شبيك ترا الف وحده تتمنى نظره
منك شو شاب صاك مصكصك تخبل وضابط اوين بجهاز مكافحة الارهاب هو بس الاسم وحده هيبه
عمي شفايتلي اخذلي ضابط من الجهاز
ضربني على راسي
رعد - ولج لسانج طولان
بتول - برطمت عود زعلت كتله
هسه غير الصراحه راحه عود جاي امدحك
رعد - خويه الزواج مسؤوليه
بتول - اعرف واني اقصد عليك
انتَ عمرك مناسب ازوج خلي
نفرح بيك وبجهالك وبعدين اني امنيتي اصير عمه وعلى حظي محد بيكم يقبل يزوج ادري شجاكم
رعد - هههه تصيرين ان شاءالله نخلص من حيدر
بتول - اي ومن سيف واحمد ومنك رفعت
ايدي لسما وكلت
يارب كون يزوجون واخلص منهم ومن طلباتهم
رعد - افا عليج مليتي منا
بتول - ههههه لا بس غير اريد افرح بيكم
رعد - خوش
بتول - يلا خويه اني احجي هواي تعبتك بسوالفي
اخذ راحتك
رعد - ماشي خويه
راحت بتول واني سبحت وبدلت خابر ركان
ركان - هاضلعي ماذا تفعل
رعد - اذهب الى النوم
ركان - ههههه
رعد - لماذا تضحك
ركان - ولك انت غير تموت ضحك
لا تحجي فصحى احسنلك
رعد - خاب انجب عبالي على شنو تضحك
ركان - اكلك خليها اليوم نروح
رعد - وين ها لا تعبان ومالي خلك عيب عليك
اشبع نوم يلا دور سوالف طايح حظها مثلك
ركان - يلا عود انت احسن مني
ترا انت طلعت عينا
رعد - لا اجذب عيب عليك
ركان - ههههه اذكرك رعيد ماعندي شي
رعد - انجب انجب وروح خليني انام
تعبان
ركان - ماشي بالليل تعال يم عُمر اللمه
رعد - ماشي
سديت الخط ورحت اتمدد تذكرت شكل عمران
من اتوتر ههههه بعدك ماشايف شي سهله ولك
تحرك المجمع مالي والله اخليك تندم بسيطه
طفيت التيبلام ونمت
_________
في مكان اخر
نور - بدينا نلم غراض البيت وسهيل زوج
منال لاكي بيت ابغداد بمنطقة..... انقهرت
شلون اعوف الموصل طفولتي ولاادتي واهلي وذكريات كلها بالموصل ودراستي سوزان
كالت خليها علينه احن نرتيب معاملات النقل
ابجي والم غراضي ومنال وزوجها
ضحك وسوالف صفنت عليها
وكلت الله ياخذ حقي منج
رحت بدلت ولفيت الحجاب علمود اروح اودع
زينب رحت والطريقه كله دموعي تنزل بهدوء
واحس روحي معلعلة من الحزن دكيت
الباب فتحلي اخوها مسحت دموعي وكتله
صيح زينب
كرم - نور شبيج ليش تبجين
نور - مو شغلك صيح زينب مستعجله
كرم - نور اني ان شاءالله بهل يومين اجي
اخطبج
نور - يارب صبرني وووولك ياخطبه
اكلك صيح زينب شبيك ماتفهم
واني احجي جان تطلع زينب حضنتها وابجي
بحركة كَلب
زينب - عزه شبيج نور شكو احجي
نور - زنو راح اروح لبغداد واعوفج
كرم - شنووووو
زينب - عزززه سوته صدك منال
نور - ابجي واحجي وهيَ تهدي بيه
والله ماريد اروح واعوفج ليش كلما
احب شخص اتركه لو يتركني
ااااخ يا زينب تعبت احس طاقتي انتهت
زينب - بدموع/
ياحبيبتي فدوه اهدي تفائلي انتِ انسانه
مؤمنه تذكر كلام رب العالمين من كال
{ وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ
وَعَسَى أَنْ تُحِبُّوا شَيْئًا وَهُوَ شَرٌّ لَكُمْ
وَاللَّهُ يَعْلَمُ وَأَنْتُمْ لَا تَعْلَمُونَ }
نور - ونعمه بالله
زينب - حسبي الله ونعم الوكيل عليج يامنال
زين دراستج شلون
نور - سوزان كالت خليها عليه وماعرف بعد
الله كريم التفتت على اخوها ضاج عافنه
ودخل جوه
زينب اريد اشوف امج قبل لا اروح
زينب - هسه اصيحها
نور - راحت شوي وجتي امها حضنتها
جنت احسها مثل امي بستها من راسها
ابجي وهيَ تبجي ام زينب كُلش حنونه
- ولج يمه نور شلون تعوفينه يايمه شلون
تعوفين بنيتي وحدها سوده عليه يايمه
نور - ااااخ ياخاله تعبت روحي معلعلة
وكُلشي مو بيدي خاله فدوه اروحلج ادعيلي
يكولون دعاء الام مستجاب واني اعتبرج امي
ادعيلي ياخاله حيل تعبانه ومخنوكه
- الله يوفقج بنيتي ويرضى عليج ويجبر بخاطرج
ويرزقج سعادة يتعجب اله اهل السماوات والأرض
بسم الله عليج من التعب يايمه
نور - اللهم امين تسلمين حبيبتي
يلا اني اترخص زنو كتبيلي رقم امج
بالورقه بلكت اكدر بيوم احجي وياج
زينب - اي والله صح فدوه نور دير بالج على نفسج
نور - ان شاءالله ياعمري وانتِ دير بالج على نفسج
ودراستج
زينب - ان شاءالله حبيبتي
نور - كتبت رقم امها حضنتها ودعتهم ورجعت
رحت للمخزن طكيت من البجي الله اكبر
على الظالم حسبي الله ونعم الوكيل راح تشردني
منا ومنا لا عندي عم بي خير ولا خال
يارب مالي غيرك ولا اريد غيرك ربي منال وحده ظالمه ربي خلصني منها يارب اجبر بخاطري يارب
خلص اليوم كله بشغل والبجي
صار الصبح
وخلص كل التجهزات جوي سوزان وشهد
ودعو امهم واني عفتهم رحت لغرفتي
فاتحه القرآن اقره وابجي وادعي جتي
سوزان حضنتني كامت تبجي
سوزان - نور اسفه ياخيه
نور - ليش حبيبتي
سوزان - خيه ماكدر اساعدج واخليج تخلصين
من امي وسوالفها يلي مثلي مايسموهم اخت
نور - حضنتها وكلت
لا سوزان انتِ الوحيده
الحبيتيني وحسستيني صدك اني اختج
اصلا اني راح اشتاكلج كُلش هواي
سوزان - ياعمري الله يسعدج يانور والله
تستاهلين كل خير يابعد كَلبي
نور - حبيبتي
حضنتها اقوى وبجيت من كل كَلبي كتلها
سوزان الله يخليج اطلب منج بس طلب
سوزان - عيوني الج حبيبتي طلبي
نور - مشتاكه ل امي وابوي اريد اشوفهم
اخر مره فدوه وديني يمهم
سوزان - ادللي بدلي علمود علي يودينا
نور - بستها وبجيت
حبيبتي الله لا يحرمني منج
مسحت دموعي وباست راسي وكالت
سوزان - ياعمري نور انتِ تدللين حبيبتي
كافي بجي يلا بدلي لا نتأخر انتظرج برا
نور - ماشي
رحت ركض لبست فستان ساده اسود
وحجاب ابيض اول ماطلعت من الغرفه
زوج منال اكلني اكل بعيونه توترت مسكت
ايد سوزان وجان منال تطفر
منال - هاي شنو وين رايحه ست نور
سوزان - يمه اني ونور رايحين للمقبره
نزور قبر ابوي وام نور
منال - طاح حضج ياقبر بنت الفكر هسه
وكت قبوره
نور - ردت اجاوبها بس سوزان حجت قبلي
سوزان - يمه ماقبل تحجين على ابوي
الميت صارله سنين وكدام منو كدام ناس
مانعرف اصلهم من فصلهم
سهيل - افا يامنال دسمعين بنتج
شتكول هسه اني صرت مامعروف اصلي من فصلي
منال - تروحلك فدوه لا اضوج الله يخليك هاي
لسانها متبري منها ماتعرف تحجي
سوزان - لحظه شنو لساني متبري مني ليش
شكلت فشرت على منو لو غلطة بحق منو
كدام الغربه تكسرين ابناتج
منال - ايا ادبسز بنات الفكر لا عتب عليكم
شهد - كافي يمه سوزان شبيكم
سوزان - دشوفي امج تالي عمرها صارتلي مراهقه ادور زواج وصخام
شهد - يااا شبيج لااطولين لسانج
منال - يا ادبسز اكو بنيه هيج تحجي ويه امها
سوزان - الله يهديج يايمه تبقين امي وماكدر
احجي عليج
التفتت على نور
يلا حبيبتي علي ينتظرنه يم الباب
نور - لا روحي انتِ ماريد اسبب لكم مشاكل
سوزان - ماكو مشاكل حبيبتي يلا تعالي
نور - ماشي
رحت ومنال ضلت تحجي صعدت وره
بسيارة زوج سوزان وسوزان كعدت كدام
وطول الطريق تسمعني كلام حلو علمود
لا انقهر
سوزان - ياحبيبتي مالج شغل بأمي اي
شي تحتاجين وشوكت ماتحبين خابريني
نور - ان شاءالله
علي - اي خويه نور اي شي تحتاجين مانقصر وياج
بعد اخوج اعتبرج اختي اني هم مو بس اخت
سوزان
نور - تسلمون ماتقصرون والله كلامكم جداً كافي
الله يحفظكم لبعض
سوزان - امين
نور - شويه وصلنا للمقبره اول مانزلت من
السياره اخذت نفس شهيق عميق وبعدين زفير
نزلت دموعي وكلت
افيييش ياريحة هلي
الله وحده يعلم شكثر مشتاكه لريحتكم
رحت لقبرهم كعدت ابجي واحضن ترابهم على يميني امي وعلى يساري ابويه واني بالنص كاعده
ابجي التفتت على قبر امي
يمه ليش رحتي وعفتيني لييييش رجعي اني وحدي شلون اعيش حياتي يمه ظلموني
يمه تعبت اااخ التعب الي بكَلبي بس الله يعلم بي
اخذت نفس والتفتت على قبر ابوي كتله
والدموع تجري على خدي
بويه صرت خدامه اخدم بيهم حتى اعيش ابيتنا ااااااخ ظلموني بويه ظلموووني ليش عفتني وحدي جابو الغربه ونسووووك بووويه الغريب
كعد ابيتك ااااخ صعبه يابويه حيل صعبه اني ما انساك يابعدهم كلهم اني ما انساك ياعمر نور انت
والله والله ما انساك
شهكت كتله
ارجعو ماكدر اعيش وحدي بويه
الناس ماترحم ماترحم تعبت
اليتيم ينوكل حقه يابويه ومحد يرحم بحاله اليتيم الله ويا اي الله ويا من صغري علمتني
الله وياي جنت تكول بنيتي الله اقرب الج
من حبل الوريد بويه الله وياي مو اي اي وياي
والله تعبت ليش ما اخذتوني وياكم ليييش
عفتوني ليششش اريد احظنكم
اخذت التراب اخلي على كَلبي واكول
بوي ترابكم ماينحظن
بويه ترابكم ويه الهوى يطير
اريدكم رجعو بس مره وحده احظنكم
رجعووو اني انتهيت بدونكم
سوزان - رحت حضنتها وابجي انقهرت عليها
نور هوايه تعبانه ويه امي الله يهديج يايمه
كافي ياعمري كافي حبيبتي كومي
نور - راحوووو ياسوزان عافوني
وحدي شلوون اعيش بدونهم تعبت والله تعبت
سوزان - ياعمري نور انتِ قويه
بعدج ماشايفه شي الحياة كدامج
فدوه اروحلج كافي تبجين جبتج
ترتاحين مو تناهرين
نور - حضنتها كل قوتي وابجي
سوزان تعبت يا اختي امج سودة
عيشتي والله تعبت
سوزان - اعرف والله اني بتها ماتحمل كلامهم
الله يساعدج
علي - خويه كولي يا الله كومي كافي تبجين
نور - اليتيم طير بدون جناح ياخويه
علي - ذكري الله خويه نور انتِ قويه
نور - اني تعبت والله تعبت
سوزان - سوده عليه التعب بيه ولا بيج
حبيبتي شلون اعوفج هناك شلوون
نور - حضنا بعض ونبجي وزوج سوزان
يسكت بينا مر نص ساعه وكال زوجها
علي - يلا بويه كومن كافي سوزان جايبتها تفرحيها
لو تبجيها
سوزان - اي نور حبيبتي كومي كافي يابعد عمري
اني يمج صدكيني دوم راح اجي ازوركم علمودج واخابرج ونتواصل ماعوفج وحدج
علي - اي خويه واني اخوج اي شي تحتاجين
ماقصر وياج
نور - تسلمون ماتقصرون
سوزان - يلا حبيبتي كومي تأخرنه
نور - كومتني سوزان كتلها لحظه
اخذت شوي من تراب امي وابوي
وخليتهم على كَلبي وكلت
انتو دوم بكَلبي دوم احبكم
رحت رشيت عل قبورهم مي ورد وخليت هناك
كيس جكلية جبته وياي من البيت
سوزان - لمنو هذا الجكلية
نور - لكل شخص يمر من قبرهم
ويقره الفاتحه على روحهم
سوزان - ماعرف شكلج والله اعجز بوصفج
يانور صدك انتِ انسانه عقلج اكبر من عمرج الله
يسعدج ياكَلبي
نور - حضنتها ومسحت دموعي وصعدنا
بالسياره طول الطريق خليت راسي
عل جام واباوع على قبرهم واكول بكَلبي
ماعرف اذا راح ارجع ازوركم لو لا
ماعرف اذا راح ارجع اشم ترابكم لو لا
ماعرف شنو منتظرني يمه جنتي تكولين
توكلي على ربج واني موكلته امري
تعبانه يايمه ومحتاجه احضنج حيل
تعبانه بويه محتاجه حبك وحنانك
تعبانه اريدكم يمي
نزلت دموعي واني اسمع كلام كَلبي وعقلي
طول الطريق دموعي تنزل وامسحها
حتى لا ينتبهون عليه وصلنه لفرع بيتنا
انقبض كَلبي وكلت الله يستر من الجاي
اشوف منال مطلعه كل الجنط برا التفتت
ماشفت جنطي ويه الجنط عفتهم كلهم واكفين برا ورحت اجيب جنطي شايله الجنطه بيدي ورحت
غرفه غرفه والمطبخ اريد احضن كل زاويه
بهذا البيت كل ذكرياتي بي الشي الوحيد الجان
مونسني ذكرياتي وريحة اهلي حتى الذكريات
حرمتني منهم منال حسبي الله ونعم الوكيل
مسحت دموعي التفتت عل مطبخ تقدمت
وكل خطوه احس روحي امشي عل الجمر من القهر
وكفت يم الباب وعيوني تفتر على كل زاويه
واذكر اهلي
____
نور - بابا بابا
الأب - ياروح بابا
نور - شوكت نروح للغابات
الأب - بويه باجر نروح
الأم - يمه نور تعالي اضفر شعرج
نور - اي بس اجيب المشط
رحت ركض اجيب المشط وكعدت يم امي تضفرلي
شعري وتغنيلي بصوتها الحنون شده ياورد
الأم - شده ياورد شده
شده ياورد شده
منو هيَ الورد شده
بنيتي الورد شده
نور الورد شده
نور - التفتت وكملت
ماما الورد شده
الأم - يمه فديت البنيات الحلوات اني
نور - حضنتها وضحكنه اجه ابوي برطم
على اساس يقلدني من ازعل
الأب - هاي شنو زعلت بس حضن الماما
اورد الماما وبابا شنو ابن البطه السوده
نور - متنه ضحك علي رحت حضنته
وغنيت
شده ياورد
وهما كالو شده
كلت
منو هو الورد
كالو شده
بابا الورد
كالو شده
ماما وبابا الورد وكلنا كلنا شده وضحكنه
______
غمضت عيوني ونزلن دموعي واني
اذكر احلى لحظات طفولتي ويه اهلي
خليت ايدي على شفتي المبلله من البجي
وبست ايدي وهفيته بالهوى
احبكم واحب ذكرياتكم واحب كلشي
يذكرني بيكم
سمعت صوت سوزان تصيحني
عرفت خلصو راح نروح اخذت الجنطه
وطلعت بالحوش ابو التكسي جان واكف
ومنال تبوس بناتها جتي سوزان حضنتني
وتبجي واني ابجي
وشهد لا تباوع عليه وسوت نفسها ماشافتني
سوزان - يمه نور امانه بركبتج فدوه اروحلج
خفي عليها مالها غيرنا
منال - ليش عيني شمسويتلها لسانها هل طول
نور - ما جاوبتها صعدت بالتكسي وهما بقو يحجون
شوي وصعدو التفتت اخر مره على بيتنا لوحت بيدي اودع ذكرياتي الماترجع وطلعنا من الموصل
لبغداد
_________
في مكان اخر
رعد - جنت واكف بمكان والظلام دامس
واسمع صوت زنجيل ينسحل بالكاع
وماشوف شي ضليت افتر اريد بس اعرف
من وين مصدر الصوت بس ماكو
الظلام هندس كُلش تقرب صوت اكثر
واكثر ضليت اصيح
منووو هنا
محد يرد صار صوت الزنجيل مزعج خليت ايدي
على اذاني صوته ينرفزني وماحس غير من كل
الجهات تجيني ضربه بزنجيل واصيح
ووولكم منو انتوووو الرجال اليوكف كدامي ياجبناء
اصيح والألم ياكل بجسمي اكل محد يجاوبني
جتني ضربه على راسي اختل توازني وكعت عل أرض نزل شي حار على وجهي مسحته بيدي اشوف كله دم غوشن عيوني واسمع صوت ضحك قوي بس الصوت ماجان غريب عليه
- بعددك ماشايف شي احركك حرك يارعد احركك حررك ههههههه
رعد - جبان انت جباااااان تعال اوكف كدامي اذا
تكدر ياجبان
_
رعد - ضليت اردد جبان جبان انت جبان
فتحت عيوني عركان شربت مي سحبت
كلينيكس امسح العرك ضايج ومخنوك
نفس الكابوس لا حوله ولا قوة الا بالله
شغلت التيبلام اشوف الساعة ب8:30
اووف تأخرت عل شباب
كمت سبحت مره ثاني من وره العرك طلعت اسشور
شعري دك ركان
ركان - ها ضلعي وينك شنو ماتجي
رعد - هسه كمت من النوم تعبان
بس ابدل وجايكم
ركان - ماشي نتظرك
رعد - خوش
سديت الخط وكملت شعري رتبته
ومشطت شواربي وتعطرت اخذت المفاتيح
والمحفظه والموبايل وطلعت قفلت الباب
نزلت اشوفهم كلهم ملتمين
جوان - هلا بشمعة بيتنا
احمد - ووولكم هلا بالضابط رعد هلا بجمال
اكول ليش البيت منور ثاري سيادة الضابط
منورنا
بتول - خوش مقدمه حلوه للمصلحه
رعد - ههههه اعرفه وربي
احمد - افا عليك خويه مو خوش سمعه
رعد - غير اعرفك
تبارك - شلونك خويه
رعد - هلا بتبو كالو نايمه خير بعد اخوج
بس لا مريضه
تبارك - فديت الخايف على اخته لا حبيبي
زينه بس تعرف شغل وطلاب تعبت ونمت
رعد - اذا هيج خوش
جوان - يمه شلونك هسه
رعد - الحمد لله زين
جوان - دومك يابعد كَلبي اكوم احظرلك العشاء
رعد - لا يمه ماريد طالع برا
جوان - يااا يايمه شلون يصير لاغده ولا عشه
رعد - اكل برا حبيبه لايضل بالج
سيف - خويه مو كتلك اريدك بموضوع
رعد - بعد اخوك بس ارجع نحجي وتدلل
سيف - ماشي خويه انتظرك
جوان - رعد وليدي
احلف بربك تاكل برا يايمه مايصير هيج
لا غداء ولا عشاء
رعد - والله اكل لخاطرج
جوان - ماشي لا اطول يايمه
رعد - رحت بستها وكلت
حاضر يدلل الحلو
جوان - مايدلل عليك ظالم حبيبي
بتول - واني شو محد بحالي
هيج كلت وبرطمت اجه رعد حضني
رعد - غير انتِ مدللة البيت
بتول - اووي خجلت فده اروحلك
احمد - ليش بتول هم تعرفين تخجلين
بتول - ليش يمه شبيه مو بشر
جوان - ولكم كافي انتو مو صغار
رعد - يلا حبيبه اروح اتأخرت
جوان - الله وياك يابعد كَلبي
رعد - بعدني ما طالع كال
عمران - ويه منو طالع
رعد - ماجاوبته وردت اكمل طريقي
عله صوته
عمران - ووووويا منو طالع احجي
رعد - ظهري علي كتله
مو شغلك
عمران - لعد شغل منووو ستاذ رعد
جوان - عمران عوف الولد شبيك ويا
عمران - انتِ سكتي لا تتدخلين منو
فسده غير دلالج
رعد - التفتت علي وتقدمت
كم خطوه اتجاها وكتله
لاتعلي صوتك على امي ولو اعرفك
بس تكدر عل فقره
عمران - رعد احترم نفسك
رعد - يكولون الأحترام للمحترم
صح لو اني غلطان تحرك وتهدد
وتريد احترمك
عرف شنو اقصد بكلامي واعرف مايحب
العائله تعرف افعاله القذره صار عصبي
رفع ايده يريد يضربني
عمران - شلوون تحجي هيج وياااي
رعد - مسكت ايده وكتله
ماعاش اليرفع ايده على رعد
عفته وطلعت واحس نار كبت بصدري
يريد يرفع ايده عباله
رعد القديم بعده يقبل ويبجي
اااني اعلمك بسيطه
رحت صحت عل حراس يفتحون الباب
فتحووووو الباب بسرعه
- حاضر استاذ
جوان - عزه العزاني هذا صوت رعد روحو
شوفو شبي ويامن يحجي
بتول - ركضنه اني واحمد جان يصيح
عل حراس وشخط السياره وطلع
احمد - وربي صار عصبي
بتول - شفت شلون شخط السياره
احمد - بس لا يسوي حادث على هاي السرعه
بتول - لاتكول هيج بسم الله على اخويه
احمد - بس لو اعرف شنو السر بين رعد وابوي
بتول - شفت من هيج كال رعد ابوي شلون
صار نار من العصبيه استغربت من تصرفه
احمد - ورعد ماكال شي يستوجب ابوي
يرفع ايده علي
بتول - راح اتخبل لو بس اعرف شنو سالفتهم
احمد - اي والله وراهم شي جبير الله يستر
بتول - سمعنا صوت امي تبجي ركضنا
نشوفها كاعده على ركابها وتبجي
ركضت حضنتها وتبارك تشربها مي
يمه فدوه اروحلج ليش البجي قابل
هاي اول مره
جوان - يممه اخوكم اعرفه ولكم هذا من يصير عصبي يتخبل ابني واعرفه
عمران - اذا ماكسرت ضلوعه مااسمي عمران
جوان - كااافي حرام عليك يارجال
عوف الولد شتريد منا دمرت طفولته
وهسه تريد ادمر حياته الباقيه كااااافي
بتول - استغربنا من كلام امي ياطفوله يادمار
وابوي صار عصبي من هيج كالت
عمران - لججججج كااافي سدي حلكج
بتول - راد يضرب امي مسكه حيدر
واني ميته خوف من عصبيته
حيدر - لا بووويه شنو السالفه ذكرو الله
عمران - سكتوها لا اموتها سكتووووها
تبارك - كومي يمه فدوه اروحلج كومي نصعد
فوك
بتول - اي يمه كومي
جوان - تضربني اي تعال اضرب متعلم
اااانت متعلم حجايت الحق تجوووي
حسبي الله ونعم الوكيل عليك حسبي الله ونعم الوكيل
عمران - سكتووووها اكلكم
سيف - يمه تعالي نصعد فوك كافي
لاتكبرون الموضوع
بتول - يلا يمه فدوه اروحلج كومي
اخذناها وصعدنه فوك اني وتبارك بقى حيدر
وسيف واحمد جوه يم ابويه
سيف - بويه شنو السالفه شبيك ويه رعد
عمران - مو شغلكم
حيدر - شغل منو لعد شغل منو ليش اله رعد
بذات هيج تصرف ويا فهمنا
احمد - وامي ورعد ماحجو شي ليش هيج
تنرفزت
عمران - لااااا امكم لازم اكص لسانها
حيدر - بويه امي ماحجت شي غلط
او يمكن حجت شي انت تعرفه واحنا مانعرفه
عمران - سدوووو الموضوع
احمد - صار عصبي وطلع برا
سيف - شنو هاي محد يتحاجه
احمد - العيشه بهذا البيت صاير جحيم
هسه غير نعرف شنو السالفه
حيدر - يلا كافي كلمن يروح لغرفته
ماكو بيت بدون مشاكل
سيف - اتفق وياك بس الناس تعرف شنو
المشكله مو مثلنه اطرش بالزفه
احمد - يجي يوم ونعرف شنو السالفه
يجي يوم وكل الأوراق تنكشف قابل نبقى هيج
_
_
________
في مكان اخر
رعد - طلعت الطريق كله اذكر شلون
راد يمد ايده عليه سهله ياعمران اذا
ما احركم حرك ما اسمي رعد سسسهله
خابرت ركان جاوب
ركان - هاضلعي وينك تأخرت
رعد - ما اجي غيرت الطريق رايح اديح
ماتجي
ركان - شبي صوتك رعد صاير شي
رعد - مووشغلك لا تسئل هسه تجي لو لا
ركان - شلون اعوفك وحدك جاي انت روح
رعد - ماشي
سديت الخط ورحت لملهى كعدت والناس تركص
وصوت الاغاني كُلش صاخب ضليت اشرب كاس
ورا كاس شويه واجه ركان
ركان - يمعود شبيك شصاير وياك
رعد - ولك اكسر الأيد التنمد عليه اكسررها
ركان - نصي صوتك هسه غير اعرف شبيك
رعد - سد الموضوع مالي خلك
ركان - ماشي بس امبين عليك شارب هواي
كافي كوم نطلع
رعد - لا بعد وكت قبل شوي جيت
ركان - ماشي براحتك
رعد - ضليت اشرب اريد اطفي ناري
ماكو فايده مخنوك كُلش طلبت منهم ينصون
صوت الاغاني شوي وهم ماكو فايده
اباوع ركان مندمج ويه الجو كتله
ركان اني اروح
ركان - وين
رعد - موو شغلك
ركان - خلص بس لا تصير عصبي
اجي وياك اسوق انت مثكل بالشرب
رعد - لا مايحتاج اكدر اسوق
ركان - ماشي خويه اي شي تحتاج خابرني
رعد - ماشي
عفته وطلعت ماعرف وين اروح احس روحي
ضائع تائه وكفت السياره خليت راسي عل ستيرن مية فكره ادور براسي وصداع موتني
شغلت السياره
ورحت يمها ماريد ارجع للبيت واشوف عمران النذل لان اعرف اذا شفته ماراح اسيطر على نفسي شوي وصلت صعدت لطابق الثاني
دكيت الجرس فتحت الباب
ريتاج - بصدمه/
رعد شوكت نزلت .....................................
_
_____
يكول
كالو ما تجي وكالو عليك بعيد
ودرب كلش طويل البينك وبيني
شح مني الدمع كد ما بجيت أعليك
وأعاتب بالكَمر هلبت يواسيني
تعب حتى الورق حبر ودمع مخبوط
وحسرة وي القلم تأذيني
وتبجيني صفة رسمك حلم عذب
حنايا الروح مثل طيفك أبد ما شايف بعيني
نهر طولك عذب صافي ويرد الروح
وأنه الميت عطش وبكطره ترويني
أكتبلك شعر وأسطرلك الأبيات
وانته بلا بخت بالفركة تجويني
قيس بعام واحد وتيبّس من الشوك
وآنه سنين مرّت ما غفت عيني
_
قلبي لا تنسون
التصويت بالنجمة
وتعليق بين الفقرات
وتفاعلكم مع الرواي
قلبي انتو اذا ماكو تفاعل ماكو بارت لان اني هم
اتعب علمودكم وابسط شي حق تعبي تعليقات وتفاعل بالرواية يعني مو شي صعب او متعب
حسابي وانستجرام انزل كلشي يخص الرواية
هناك 👇
ضيفو الرواية عندكم في المكتبه حتى يصلكم الأشعار من انزل البارت القادم
وحسابي واتباد تابعوني حتى يصلكم كل جديد
Jehan-Stories
والان نختم هاي اللمه الحلوه بذكر الله
"""""""""
سبحان ألله
ألحمد لله
لا إله إلا ألله
ألله أكبر
"""""""""
#خلف القضبان روح يتيمة
#بقلم الكاتبه جيهان آغا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!