رواية خلف القضبان روح يتيمة الفصل التاسع والعشرون 29 - بقلم الكاتبة جيهان آغا

#خلف القضبان روح يتيمة
#بقلم الكاتبه جيهان آغا

_
_

قبل مانبدي صلو على سيدنا محمد

( اللهم صل على سيدنا محمد وعلى ال محمد )

ولا تنسون تفاعلكم يحفزني
اكتب البارت وانزله اسرع

قراءة ممتعة ياقلبي

________

راسي صدع من الهوسه حسيت براسي و رجليه ثكلن خليت الفلوس عل طاوله وطلعت مخنوك بزور كدرت امشي وصلت لسياره شغلته شخص ضائع تائه ضليت افتر بالسياره

وادخن انوب حتى عيوني غوشن ماعرف شلون داسوق ولا اعرف وين رايح مشيت وره كَلبي
ضليت اسوق لحد مالكيت نفسي يم الشقه نزلت قفلت السياره واني اجي واروح من كثر الشرب كوه ارمش بعيوني احس طاقتي خلص انتهت رحت للمصعد وصلت لشقه دكيت الباب ماكدرت اطلع المفتاح من جيبي ضليت ادك لحد مافتحته

نور - هواي انتظرته ما اجه ولا فتح موبايله كلما اخابر يطلع مغلق شلت العشى حتى اني ماتعشيت

ورحت اصلي قيام الليل اندك الباب بقوى خفت بصراحه لان رعد كلي عندي المفتاح منو هذا باوعت من العين السحريه طلع رعد فتحت الباب اباوع مايكدر يمشي وعيونه كوه يفتحهم
شبي هذا كتله

نور - رعد شبيك
واني داحجي تقدم بصراحه شكله يخوف ماعرف ليش ابتعدت دخل لشقه وركع الباب كل قوته اباوع عيونه حمر كُلش لا وضعه ابد مو طبيعي بده يتقرب تجاهي واني ابتعد كتله

ر ر رعد شبيك

مارد عليه تقرب اكثر ابتعدت لحد ما صار جدار الصاله وراي وكف مقابيلي وعيونه كُلش تخوف نزلن دموعي كتله

ش ش شبيك احجي

فجأه حضني كل قوته انصدمت من ردة فعله
انوب ريحته كُلشي ماطيبه كتله

رعد شصاير

رعد - اشش نور اشش لا ت ت تحجين

نور - يحجي ابطئء شبي هذا ماعرفت شسوي وشحجي واكفه مثل الصنم بقى حاضني ويشم برقبتي رجف كل جسمي نزلن دموعي مامتعوده يكون هيج قريب عليه

هلكد مابقوى حاضني حسيت بنبضات كَلبه يشم برقبتي شواربه خشنه زعجتني بده جسمه يثكل دموعي نزلن ماعرف شبي كتله

رعد بس ابتعد شوي اختنكت
احجي ويا مايرد وريحته ريحته خنكتني ريحه كُلش ماطيبه ماعرف شلون ريحه بعدين طخت ابالي عزه العزاني صخام الصخمني هذا بس لا شارب شي لا معقوله يشرب لا لاشلون بس ريحته ماطيبه وتصرفاته وعيونه غريبه لا لا مستحيل
ماتوقع مايصير اتهمه واذا شارب وين انطي وجهي عزه العزاني شلون سالفه يارب احفظني يارب

شوي وابتعد
عينه بعيني اباوع عيونه كُلش حمر كتله
احجي شبيك فهمني

مارد عليه ضم وجهي بين ايده وعيونه على شفتي فجأه باسني فتحت عيوني من الصدمه ابتعد بسرعه واني بعدني مصدومه من تصرفه خله راسه على كصتي نزلن دموعه على خدي غمضت عيوني كال بصوت مخنوك

رعد - احبچ نور احبچ مثل السيف من يجدح عطش لدم انه هيج احبچ

نور - من كالها ماعرف شصار بيه نزلن دموعي
وبداخلي صراع بين عقلي وكَلبي طلع يحبني اي اي يحبني رجع حضني وكال

نور احبج والله احبج لا انه اعشكَج
مو بس احبج

نور - ماعرف شصار بيه مصدومه من الفرحه ماصدكت معقوله اني بحلم نزلن دموعي من الفرح يارب الحمد الشكر الك طلع يحبني يارب
كلت خلص راح اعترفله اني هم كتله
رعد

ابتعد خله ايده على شفايفي وانفاسه الحاره تضرب بوجهي كال

رعد - اشش خلي اكمل نور

نور - هزيت براسي بمعنى تمام كال

رعد - حتى وانه سكران احبج وانه صاحي
هم احبج ولو اموت ابقى احبج

نور - نزلن دموعي مصدومه شديحجي هذا
يعني طلع ريحة الكحول التفوح منا اااخ يارعد ليش هيج ليش ليش كالها وهو بهيج حاله ليش طلع يسكر كل عمري اتمنى اخذ واحد ملتزم مثلي ليش اخذت واحد سكير ليش ااااخ ياكَلبي ااااخ ماحجيت بس نار بكَلبي تحركني من القهر رجع حضني نزل على ركابه ونزلني ويا كعدنه بالكاع اني ابجي وهو يبجي كال

رعد - اعرف تستاهلين واحد احسن مني اعرف ورب الكعبه اعرف

نور - هو يحجي واني دموعي تنزل كتله
رعد ليش هيج تسوي بيه ليييش

رعد - شبقيتي برعد ولج شبقيتي بي صرت مجنون مجنون بيج وبحبج شوكت وليش وشلون حبيتج ماعرف بس هذا

نور - ابتعد و ضرب على كَلبه وكال

رعد - هذا حبج مو اني

نور - نزلن دموعي اشر على راسه وكال

رعد - وهذا ماكدر ينساج صورتج ماترو من باله

نور - يحجي واني ابجي على حالي شكله وشحجي حتى فرحتي ماتمت مثل الناس صار شكد انتظر هيج يوم تالي وهو بهيج حاله يصدمني يلا يكول احبج اباوع على حالته انقهرت مدري علي لو على حالي انقهر عيونه ذبلانه مو هذا رعد الي اعرفه هذا غيره كتله

رعد احس نفسي ماعرفك

رعد - اي صدك ماتعرفيني

نور - بس انت تعرف كلشي عني

رعد - الظروف العرفتني مو اني

نور - شهكت بقهر

رعد - اشش لا تبجين

نور - شلون ما ابجي شلوون شنو الوصلك لهيج مرحله ماتوقعتك من النوع التشرب ابد ماتوقعت

تمدد خله راسه على رجلي وكال

رعد - لو ما احبج مافتحلج كَلبي
شوفي لان اليوم اعترفتلج بحبي وماجنت احب بهيج حاله بس بعد صار الكَلب اعترفلج قبل العقل

نور - يحجي واني ابجي كال

رعد - راح احجيلج كلشي يخصني من البدايه لنهايه لازم تعرفين بس لا تبجين ماريد اشوف دموعج

نور - مسحت دموعي كال

رعد - بدأت معاناتي من جيت عل دنيا نولدت واني يتيم الاب ابوي ستشهد بالعسكريه وامي جانت حامل بيه بشهر ال5 من استشهد ابويه

نور - انصدمت كتله
لعد عمران مو ابوك

رعد - خلي اكمل وبعدين اجاوبج على كل اسئلتج

بعد استشهاد ابويه جدي جبر امي تزوج عمي بعد الولاده وعمي قبل لان ابوي حالته الماديه جانت كُلش زينه احسن من عمران وهو قبل علمود فلوس اخو ترجع اله ماتروح لغيره بعد اربع شهور اجه وقت الولاده وبعد تمام الولاده تزوج عمران امي
وسجلوني بالهويه على اسم عمران وره سنه تقريباً امي حبلت بحيدر من عمران وبعده تبارك وسيف واحمد وبتول بس اني اكبر كلهم

امي ماقصرت ويانه ولا فرقت بينا بس عمران دوم حاط كوره وياي دوم جان يضربني ويعذبني اشد انواع التعذيب لانه مايحبني ولا جان يحب اخو الي هو ابوي كبرت وكبرت مشاكلي ويه عمران من غير التفرقه الجان يفرق بيني وبين جهاله جنت احير شسوي حتى اخلي يرضى عليه وصلت مرحله حتى احذيته تكرمين اروح انظفه قبل لا يطلع لشغل واكول بلكت يبدي يحبني مثل جهاله بس جان العكس هو الصح جان يتماده وياي اكثر

يضربني اكثر ودوم يكول انت مو ابني انت فاشل انت غبي انت قشمر وانت وانت و انت هواي جان يغلط عليه بكل وقت وحتى كدام الناس جان يغلط حيل جنت انقهر واروح ركض احجي ال امي واكلها يمه صدك اني مو ابنه صدك اني فاشل واني هيج جانت تكول لا ابني انت ابنه بس هو لان يحبك هيج يسوي بس اسمع كلامه

جنت طفل واصدك بكل كلمه تناكل لكن الواقع الي اعيشه يوم عن يوم يثبتلي كلام عمران هو الصح
مو امي جان يثبتلي اني مو ابنه تخيلي جان يحرك ايدي عل طباخ ومره حاول يخنكني وصلت للموت جدي جان يطلعني من ايده

وامي كلما جانت تحجي جان يضربها وياي جان كُلش قاسي وياي يكرهني ماعرف ليش اويا اطفاله لاجان يحبهم ومدللهم بس وياي هيج يسوي جدي دوم جان يحجي علي بس ماجان يفيد الكلام ويا

فوك كل هذا جنت مصدك هو ابويه وهيج سنه بعد سنه زاد تعذيبه الي اكثر واكثر لحد ماصادفني بيوم رجعت من المدرسه جنت صف سادس ابتدائي جنت متعلم اول مارجع اروح ابوس راس جدي قبل لا اغسل وابدل بيوم رجعت من المدرسه

بعدني ماجنت داخل لديوان سمعت صوت عمران يحجي ويه جدي يكله اني اريد افوت بفلان مشروع وجدي كله اي بس لازم تبلغ مرتك ورعد هو هم اله حصه وياك ولازم يعرف وهو عصب على جدي رجع جدي كله يبقى يتيم وابن اخوك حرام عليك غير اسلوبك ويا اني مافهمت شنو يعني ابن اخوك بس من كال يتيم صابني الفضول اعرف شنو يقصد جدي بقيت واكف اسمع كلامهم وجان عمران يكول

اني تزوجت جوان علمود اتحكم بحلال اخويه وكتلك وانت وافقة مو تالي عمري اروح اخذ اذن واحد زعطوط مثل رعد اكله راح اخذ فلوس ابوك

هنا اني عرفت عمران مو ابويه بصراحه مانصدمت بالعكس فرحت طلع مو ابويه لان مستحيل اكو اب عاقل هيج يعذب ابنه عفتهم ورحت يم امي كتلها هيج سمعت احجيلي شنو السالفه بالبدايه ماقبلت تحجي كتلها اذا ماتحجيلي السالفه راح اطلع ومارجع للبيت بعد

بعدين يلا حجتلي السالفه
كتلها يعني اني اكون ابن اخو عمران كالت اي

ابوك اخو الوحيد بوقتها ماعرف ليش انقهرت حسيت جنت عايش بكذبه جبيره واكثر شي جان قاهرني فلوس وحلال ابويه كله بيد عمران النذل وانه حصره عليه اخذ فلس وجنت محتاج هواي شغلات مرات جدي جان ينطيني لان عمران مايقبل ينطيني

كبرت والمشاكل كثرن وكل مشكله تكول اني لحد ما كملت دراستي متت الف موته من وره مشاكله وياي من صغري جان حلمي اكون جراح بس من كثر تعذيب عمران حسيت بكَلبي مات ومابقى عندي ذاك الشغف لطب مع العلم معدلي جان زين بس مارحت طب عام رحت للكلية العسكريه تعرفين ليش

نور - هو يحجي ودموعه تنزل واني ابجي ويا كتله
ليش

رعد - علمود النوم حتى لنومه مارجع والتهي هناك انسى عمران ومشاكله الولد الي وياي كلهم جانو يرجعون بوقت العطل اله انه جنت ارجع ويه ركان وهناك اشوف امي ماجنت ارجع للبيت علمود
لاشوف عمران وخواتي واخواني محد يعرف اني مو ابن عمران لان عمران سجلني على اسمه وماحب يعرفون ولا يقبل امي تكلهم بس هما شاكين اكو شي لان مستغربين ليش عمران بس وياي قاسي

جدي قبل لا يموت جان ناوي يفهمهم السالفه بس عمران ماقبل يحجيلهم اصلا هما كلشي مايعرفون على ابوهم اني الوحيد اعرف كل سوالفه النذل علمود هيج يكرهني ويخاف لا بيوم افضحه كدام جهاله الحقير جان ولازال عايش بفلوس وحلال ابويه ويدخل بمشارع ويطلع من مشروع و محد يعرفه شديسوي امي ماتكدر تحجي ويا وجدي مات واني جنت بالكليه بوقتها

بس ومن تخرجت تغيرت 99% مابقيت ذاك رعد
الجان يعذبه عمران ويسكت هواي تغيرت بيوم تخرجي اجه علمود يلبسني الرتبه ويتباهى كدام الناس مو علمودي لا بس طبعه هيج كُلش يحب يتفاخر كلت ال امي اذا يجي راح اطلع من التخرج ورتبه ما البس وصلتله كلامي مااجه امي وحيدر اجو امي لبستني الرتبه وطشت الجكلية على راسي جانت فرحانه بيه كُلش واني افرح من اشوفها هيج
فرحانه

بس ماكملت فرحتنه من رجعنه للبيت صارت مشكله شكبرها لان ماخليته يجي لتخرج راد يمد ايده عليه وهاي اول مره امسك ايده ماخلي يمدها عليه انصدم رعد الجان دوم يعذبه شلون هيج صار صار كلما يحجي يشوف ارده اله بأفعال ماتعجبه يلا بده يحسبلي حساب

عفته وبنيت حياتي بدأت من الصفر كونت نفسي لحد ما اجه يوم لزمت علي لزمه بشغله النصه حرام بحرام وهددته يرجعلي حصتي من حلال ابويه

بوقتها قبل او انجبر مو قبل رجعلي حصتي من حلال ابوي ومن وقتها زاد حقده عليه ولحد هذه يومنا يوميه مسببلي مشكله حتى حادثة الاغتيال هو جان وراها

نور - نزلن دموعه مسحتهم بيدي كتله
كافي لا تبجي

رعد - تعبان يانور حيل تعبان ساكت والسوالف البيه مال صياح بركان بداخلي يحرك كَلبي حرك

نور - كُلش انصدمت من كلامه نهائي ماجنت اتوقع هيج تكون قصة رعد شكد مصدومه بحياتي مثل هاي الصدمه ماشفت حسيت نفسي ماعرفه وهسه يلا عرفته كتله

وانت ليش هلكد شارب ها ليش هيج تسوي

رعد - اااخ عوفيني بضيمي نور عوفيني لعد شسوي من انقهر وتصير مشكله اروح اشرب اريد انسى وهم ماكدر انسى

نور - من شوكت تشرب

رعد - من تخرجت

نور - اهلك يعرفون

رعد - ذاك اليوم عرفو عمران كللهم

نور - مايصير وغلط وحرام هيج تسوي
مسحت دموعي كتله

هسه انت مو بوعيك باجر نحجي
كوم اسبح وصحصح لا تنام وانت هيج

كعد كال

رعد - تصدكين حتى الكلام وياج غير

نور - تقدم يريد يبوسني كتله
وخر فدوه ريحتك خنكتني

رعد - نور افهميني اريدج

نور - عيونه حمر انوب اخاف منه
من هيج يكون كتله

ش ش شنو يعني

رعد - اريدج مثل كل رجال يريد مرته

نور - مستحيل

رعد - ليش

نور - هيج علاقه طاهره مستحيل اتم وانت بهيج حاله شوف نفسك وحالتك مستحيل اقبل

رعد - ااااخ منج اااخ شبيج
دخيلك ربي صبرني

نور - وبعد تطلب منه الصبر وانت عاصي بس شوف نفسك اريد اتقيأ من ريحة السم الي شاربه
ليش هيج ليش ماجنت اتوقعك بيوم تشرب حرام عليك تأذي نفسك وتأذيني وياك والله حرام

ضحك بحزن وكال

رعد - هههههههه اذي نفسي ياريت بس هيج ولج نفسي محروكه حرك من زمان بس لو اموت ما اذيج

نور - بلا تأذيني وكُلش تأذيني هاي مو حاله اشوفك بيها ياريت ماشفتك بهيج حاله ياريت

رعد - ا ا اي ح ح حقج م م ماتعرفين شي

نور - ثكل لسانه لعد شكد شارب صخام الصخمني
كتله

كوم اسبح وصحصح باجر نكمل

رعد - م م ماكدر اكوم اريد انام

نور - شلون تنام وانت هيج

رعد - م م متعود
نور

نور - ها

رعد - اريد انام يمج

نور - ولك ياتنام وانت حجي ماتكدر تحجي من صخام الصخمني شوكت ارتاح ماعرف كوم اسبح واني اسويلك شي تاكله يلا كوم

رعد - احبج و و والله ب ب بس انتِ ما ماتحبيني

نور - منو كال ماحبك
هو غير حبك عمى عيوني

كلت بكَلبي
هو غير احبك قبل ما انت تحبني اااخ حتى بحبي ماعرفت احب مثل العالم كال

رعد - تتتحجين صدك

نور - والله بس كوم اسبح اريد اعرف شنو سالفتك

رعد - انتِ سالفتي

نور - خوش يلا كوم اسبح

رعد - م م ماشي

نور - كوه كام رحت طلعتله ملابسه وابجي على حالي وحاله علكت ملابسه بالحمام وطلعت وهو راح يسبح رحت جبت سائل الصحون ساعه اغسل بشفتي احس ريحت السم ماله يجي مني اغسل واستغفر ربي

توضيت ورحت ركض فرشت السجاده صليت ركعتين خلصت طكيت من البجي نهاريت كتله ربي الكلام هواي بكَلبي وانت تعرفهم قبل لا انطقهم يارب ماعرف ليش هيج صار وشلون

ربي تعبانه برد كَلبي يارب تعبت من كلشي

شسوي وين انطي وجهي ربي ماعندي مكان اروحله واحبه يارب احبه شلون اعوفه وشلون اعيش ويا وهو هيج والله تعبت ربي اذا جان اختبار من عندك ارزقني الصبر لان طاقتي انتهت يارب اني انتهيت سهل امري يارب نزلن دموعي رفعت ايدي لسماء ودعيت دعائي الي كل
مره ارتاح من ادعي

ادعوك باسمك الذي تحب وقد نفضت يدي من الناس لأقول لك وحدك سبحانك بأنني أحتاج معيتك لتأذن وقدرتك لأكمل وفضلك لتهبني العطايا قد سُدًت الأبواب وجئتُ أرتجي بابك وانغلقت المفاتيح وجئت أشحذ فتحك وتعقدت الأمور وجئت اسألك فرجك وحسن تدبيرك اعجزتني الحيل ولا يعجزك شيء في السماوات والأرض وخانتني خياراتي فأسلك خيرتك ومشيئتك وتركتني الأيادي وارجو منَّتَكَ لترافقني في الطريق لا أملك الآن غير التوجه إليك ولا يسعني أن ادعو سواك ولا افتقر لغير رحمتك بأن تنظر لي نظرة رضى فترضى عني وترضيني اللهم امين

خلصت شلت السجاده ورحت اشوفه خلص

جان متمدد عل تخم وخال ايده على عيونه شوكت سبح شوكت طلع ماعرف ولا حسيت بي مسحت دموعي كتله

ها شلونك هسه

رعد - مو زين

نور - كالها بتعب هد حيل هد كتله
رعد كوم صلي ركعتين صدكني ترتاح

رعد - ماكدر

نور - ليش

رعد - ماعندي الجُرأه اوكف بين ايده وانه هيج

نور - ترا الله غفور ورحيم ليش هيج تفكر

رعد - وشديد العقاب وانه كلي ذنوب من الجدم لراس

نور - هذا مو عذر ولا كلام تكوله تفكيرك كله غلط وكله وساوس شيطان تعوذ منه وكوم صلي لو شما كان ذنبك اذا ترجع اتوب وتصلي وتستغفر ربك وتدعي مستحيل يردك خائب وهو ارحم عليك
من نفسك

رعد - تعبان والله انتِ روحي نامي

نور - براحتك يعني ماتاكل شي

رعد - ماكل هموم وشبعان شريد بعد

نور - مارديت علي
عفته ورحت للغرفه كل شوي اذكر كلامه وابجي ياربي شلون هيج صار ماعرف

هواي بجيت لحد مانمت صار الصبح حسيت بشي مقيدني فتحت عيوني اشوفه نايم ولف ذراعه على خصري ياااهذا شوكت اجه هنا نام اباوع علي احسه طفل نايم مو رجال

اااخ يارعد تذكرت الصار البارحه من صدك انقهرت علي بس سالفة الشرب ابد مو خوش سالفه لازم يتركه اجباري اي لازم

شفته لَف ذراعه حول خصري ارتجف كَلبي من التوتر اريد إبعده بس ماكدرت كتله

ر ر رعد

ماسمعني رجعت كتله

ر ر رعد

رعد - اممم

نور - هذا غركان بالنوم كتله
بس وخر اريد اكوم

مارد عليه وغشم روحه كتله

رعد شبيك وخر

رعد - اشش خليني نايم تعبان

نور - بس اني اريد اكوم شلون

رعد - نامي

نور - ياربي صبرني

رعد - كتلج نامي

نور - ضجت كتله
ما اناام هيَ كوه شنو السالفه

فتح عيونه باوع على شفتي وكال

رعد - ترا اذا كمت من النوم اكطعهم الج وهاي كتلج كافي نامي

نور - شكد ادبسز ماجاوبته رجع نام ابتعدت شوي رجع سحبني اله يشم برقبتي شواربه مزعجه كتله هيَ شنوو السالفه يانوم هذا وخر اريد اكوم

مارد عليه سوه نفسه نايم صدك جذب شبي هذا راح يخبلني شوي ودك موبايله كتله

كوم موبايلك يدك

رعد - خلي يدك

نور - يجوز اهلك دكوم شوف منو
ضاج كال

رعد - والله مو علمودهم اعرف ليش هيج تسوين

نور - ماحجيت شي ابتعد واخيراً كمت بسرعه رحت للمطبخ كلبي يدك بسرعه شديصير احس كلشي ديصير بسرعه بسرعه كلشي مدافهم

شوي وطلع من الغرفه ما لابس غير البجامه الجوه
يعني بس لو اعرف ليش مايلبس شي فوك شنو يشوفني عظلاته مثلاً مو شفتها بعد شكو المشكله من هيج يكون حيل استحي منا
خلي اكمل الريوك احسلي

خليت الچاي عل نار وبدأت احضر الريوك دخل للمطبخ كال

رعد - صباح الخير

نور - صباح الخير
تقدم وكف يمي توترت ليش هيج اتوتر منا
ماعرف كال

رعد - بخصوص الصار البارحه مثل ماكتلج خلي بينا لان محد يعرف غيرج وغير امي

نور - اكيد بدون ماتكول

رحت اطلع الأجبان من الثلاجه
سحبني من خصري ولزكني عل حائط
يبووو شلون سالفه كتله

رعد شبيك وخر

نظراته على عيوني وشفتي كال

رعد - واحنا لشوكت نبقى هيج ست نور مو كافي
تعبتيني

نور - غمضت عيونه متوتره منا كتله
شتريد

رعد - اريدج موكافي نفذ صبري

نور - فتحت عيونه اباوع عيونه ذبلانه ونظراته على شفتي كتله

بشرط

رعد - انوب تشرط دخيلك ربي صبرني
وشنو هو

نور - توعدني تترك الشرب

رعد - ماكدر

نور - لازم تكدر لشوكت تبقى هيج

رعد - ماكلج اترك بس احاول والله

نور - رعد

رعد - عيونه واهله

نور - افهمني اريد نبدي حياة جديدة ننسى كل الفات نبدي حياتنه واحنا كاسبين رضى ربنا
وطاهرين نبدي كلشي من جديد وننسى الصار ويانه يارعد والعلاقه الزوجيه علاقه طاهره
مايصير نبديها واحنا هيج افهمني

تقدم يشم برقبتي وكال بصوت خافت

رعد - صح كلامج ان شاءالله نبدي كلشي بلي يرضي الله بس صدكي احبج

نور - واني هم احبك
سحبني اله اكثر كُلش توترت كال

رعد - نور مشتاكَلج حد النخاع وكَلبي بس
بأسمج يدك

نور - ابتسمت فديت يعرف يتغزل كتله
رعد بس انطيني مجال هل يومين

ابتعد

رعد - ليش

نور - ماكدر هسه

رعد - نور ترا تعبتيني اني ماتحمل بعد اريدج فهميني

نور - ميخالف حبيبي شوي تحمل اذا صدك تحبني

رعد - شكلتي

نور - كلت شوي تحملني اذا صدك

رعد - لا قبلها عيدي شكلتي

نور - شكلت ها كلت حبيبي

رعد - انه حبيبج

نور - وحياتي

رعد - حلو مطورين

نور - ههههه اي شوي شوي بس اصبر عليه

رعد - اويلي حتى الضحكه تخبل شلون
اصبر فهميني

نور - لا تصبر لخاطر حبك الي لازم تصبر
باوع على شفتي تقدم كال

رعد - بس اريد جرعه من الصبر

نور - شلون

رعد - اني اكلج شلون

نور - ماحجيت شي تقدم يبوسني

خليت ايدي على كتافه وغمضت عيوني
وجان يدك موبايله ابتعدت تعصب

رعد - ليشش

نور - هههه موبايلك دك اني شكو

رعد - شعليج بي خلي يدك

نور - ههههه يااا شنو السالفه دشوف يمكن اهلك

طلع موبايله شاف منو و غلقه الظاهر مو اهله
رجع كال

رعد - يلا غلقته وين جنا

نور - رعد شكلنه

رعد - ميخالف قبلت والله ماريد اجبرج على شي بس خليني على الأقل ابوسج تره هاي لا صايره ولا دايره حلالي ماكدر ابوسها

نور - ضحكت علي وعلى سوالف

غمضت عيوني
تقدم باسني حسيت كَلبي راح يوكف من سرعة ضرباته ابتعد كال

رعد - احبج مثل السيف من يجدح عطش لدم انه هيج احبج واكثر

نور - اشوف عيونه ذبلانه تلمست وجها ورموشه بأطراف اصابع ايدي وهمست

وأني هم أحبك

حضنته ودعيت بكَلبي ربي يغيره ومايحرمني منا ويعوضني بي ويجبر بخاطري واعيش حياة حلوه

رعد - وتكول اصبر وهي ماتكعد راحه

نور - هههههه ميخالف اصبر

رعد - ولج شبقيتي بيه

نور - هههه ابتعدت كتله يلا
وخر اروح اشوف الچاي
تقدم باس راسي كتله

كافي لا تصير طماع

رعد - بحبج انه اكبر طماع

نور - فديتك اني وفديت حبك هسه ممكن تروح علمود اعرف اكمل شغلي لان وجودك يمي يوترني ماكدر اكمل

رعد - تمام بنت كَلبي تدللين
اروح اسبح

نور - لا تكول عندك شغل

رعد - مع الاسف اي شسوي

نور - اووف شنو هذا شغلك

رعد - ولج فديت ال اووف من هل شفه هو
صدك اوووف

نور - غير الموضوع غير ترا مايصير هيج

رعد - شسوي صدكيني مجبور ولا اني اعوف الكمر
بس غير مجبور

نور - اممم خوش يلا روح بسرعه اطلع
علمود نتريك

رعد - تمام حبيبتي

نور - راح
من هيج كال فرحت كُلش فديت حبيبتي بصوته شكد حلو يارب بس يترك الشرب ويلتزم بصلاته ماريد شي ثاني

_______
في مكان اخر

بتول - كمت الصبح تريكت ورحت للمدرسه جان عندي هواي دروس وامتحانات التهيت من درس لدرس واخيراً خلصنه طلعت انتظر السائق يجي

كل صديقاتي رجعو وحدي بقيت انتظر السائق ما اجه رحتعل الإدارة طلبت من المديره اخذ موبايلها علمود احجي ويه امي وامي تكون صديقتها تعرفنه قبلت انطتني الموبايل طلعت برا
خابرتها شوي وردت

الو يمه وينكم وين السائق

جوان - بسم الله منو انتِ

بتول - ههههه منو يعني غير بتول توله لوله
فديتني كل الدلع يرهم على اسمي

جوان - ام لسان مايفيد وياج ليش بعده السائق ماجاي

بتول - لا تأخر هواي شوكت يجي كل صديقاتي
رجعو وحدي بقيت ويه المديره وكم مدرسه

جوان - هسه اخابره اشوف وينه

بتول - ماشي
سدت الخط رحت عل مديره انطيتها الموبايل وشكرتها وطلعت برا انتظر شوي وجتي المديره كالت

- ماما امج خابرت كالت السائق يم المصلح السياره عطلانه هسه يجي اخوج ياخذج

بتول - تمام شكراً

- العفو بنيتي راح ابقى اني لحد مايجي اخوج ياخذج يلا ارجع للبيت

بتول - تمام ست

خطيه بقت واكفه يمي شوي واجه حيدر سلمت عليها ورحت اول مافتحت الباب انهديت علي

انتووو شنو ها شنو صار ساعتين انتظر السائق وينه ها وينه ليش السياره خربانه الي يسمع يكول فارين بيها العراق من الشمال لجنوب اله من يجي وراي تخرب السياره

والقهر حضرت جنابك ساعه يلا تجي ليش هيج تعبت من الوكفه اني ماعرف انتو شنو مسوين بحياتكم ورب العالمين رازقكم هيج ملاك مثلي شلون تخلوها هيج تتعب علما تجون هاااا احجي شو ساكت اي طبعاً تسكت هو الغلطان يسكت

حيدر - ليش تنطين مجال احجي دهر دهرج ولج لسان دلاله مو مثلج

ركان - هههههه والله صدكت

بتول - عزه باوعت لطرف الثاني طلع ركان ويا عزه العزاني ما انتبهت سيارت حيدر مضلله ماشفت منو ويا كل ضني حيدر وحده صخام الصخمني طلعت الجبار الي بداخلي بسرعه بعد وكت هسه الولد راح ينهزم مني حقه من امداني شكد عيب هسه شيكول عليه سكتت ماحجيت شي

حيدر - ها ام لسان شو سكتي

ركان - تعبت هههههه

حيدر - هاي تتعب ولك الله يساعد الياخذها

بتول - عزه شديحجي هذا انوب صخمها بزايد كتله
قصدك محظوظ

حيدر - اي كُلش امبين المسكين شلون يعيش وياج ماعرف هههه

ركان - هههههه مو لهل درجه

بتول - نصيت صوتي سهله حيدر بسيطه هيج تحجي عليه كدام ركان ميخالف يصير خير

ركان - اي دلاله شلون جان يومج

بتول - ويامن تحجي

ركان - ويه جدي

حيدر - طكها ثول ههههه

بتول - عيب عليكم انتو الاثنين واحد يكول دلاله والثاني ثول وين كاعدين اووي شكد متخلفين

حيدر - اي عفنه البرستيج الج ست بتول

بتول - والنعم اساس البرستيج يمي كفو مني

ركان - هههه ثقه عاليه

حيدر - كُلش ههههه

بتول - كلت اغير الموضوع

ركان نور شلونها

ركان - ماعرف الاخبار يمكم

بتول - يمنا ليش غير هيَ يمكم

ركان - يبووو جيت اجفص كلت
ها اي اي صح زينه

بتول - خوش

الطريق كله حيدر وركان يحجون ويضحكون واني اضحك على سوالفهم وكف حيدر يم محل عنده شغله بقينه اني وركان كال

ركان - شلون جان امتحانج

بتول - ممتاز

ركان - يعني شكد الدرجه

بتول - كامله ان شاءالله

ركان - عفيه هيج اريدج دوم شاطره وذكيه

بتول - ليش جنت غبيه واني ماعرف

ركان - ههههه لا اقصد دوم خلي درجاتج كامله

بتول - خوش الحجيه شلونها

ركان - زينه

بتول - دومها ان شاءالله

ركان - تسلمين

بتول - سكتت وهو سكت اجه حيدر شغل السياره شوي وصلنه للبيت حيدر كوه نزل ركان وكله اله تتغده يمنا وهو قبل واني فرحت ليش ماعرف هههه

رحت غسلت وجهي وايدي وركض صعدت فوك لغرفتي لبست تراك نيلي شتوي طويل وعريض لفيت حجاب اسود علي و تعطرت رتبت نفسي ونزلت جوه جانو كاعدين بغرفة الضيوف رحت للمطبخ اشوف تيلا تحضر ترتيبات الغده كتلها

تيلا وديتي شي لضيوف

تيلا - لا ماما انا يرتب

بتول - ماشي اني اودي وانتِ كملي السفره

تيلا - حاضر ماما

بتول - سويت قهوه وطلعت بسكت رتبته ويه القهوه عدلت الحجاج تيلا تباوع عليه تضحك

شو تضحكين شنو ماحلوه

تيلا - لا ماما انت كتر حلو

بتول - اووي خجلت فديت انتِ الحلوه ياعسل

يلا بتول خلي نروح نقدم القهوه رحت للغرفه عديت ل3 دكيت الباب فتحته اشوف ركان وحده كتله
وينه حيدر

ركان - جنا كاعدين راح حيدر يبدل واني مسكت الموبايل ردت اخابر رعد وجان ينفتح الباب عبالي حيدر رجع طلعت بتول بس شنو هاي شلون مرتبه نفسها يابه اطك بالكاع من جمالها نزلت راسي استغفر ربي

بتول - بقه صافن عليه توترت نزل راسه كتله
وين حيدر

ركان - شبي حيدر

بتول - ابتسمت حس على نفسه كال

ركان - دخيلك ربي صبرنه

بتول - شبيك

ركان - ماكو شي

بتول - تمام خليت الصينيه عل طاوله
وطلعت متت ضحك هههههه بس والله حلو وشخصيه اااخ ياركان شلون وياك

رحت للمطبخ ساعدت تيلا كملنه ترتيب السفره نزلت تبارك وامي جانت برارجعت واحمد اجه بس سيف ورعد ماجانو بالبيت التمينه عل سفره بين حجي وضحك كل ما التفت اشوفه يباوع عليه اغشم روحي بس حاسه علي وعلى نظراته كملنه شربو چاي شوي وكال

ركان - حيدر وين الحمامات اريد اغسل

بتول - قبل لا يحجي حيدر كلت
تعال اني ادليك ابتسم

حيدر - اي بتول ادليك

ركان - ماشي

بتول - كمت اجه ورايه دليته كتله
تفضل هنا

باوع عليه ابتسم وكال

ركان - شكراً تعبتج بويه

بتول - ولو ماكو تعب
ردت اطلع كال

ركان - بتول

بتول - نعم

ركان - جم شهر وتخلص المدرسه

بتول - بعد باقي ليش

ركان - ها خوش مجرد سؤال

بتول - تمام
عفته ورحت للمطبخ ارتب الكنافه والبقلاوه وصينه من برا رتبتهم علمود وره الاكل يتحلون وجان اسمع صوته

ركان - بتول

بتول - انداريت كتله
هلا

ركان - كلاص مي اذا ممكن

بتول - اكيد لحظه

ركان - حبيت اكلج شوكت مايكون عندج سؤال يخص الدرس او موضوع ماتعرفي اني اساعدج بي اذا ماعندج مانع طبعاً

بتول - اي حلو بس شلون

ركان - بس فتحيلي كام عل انستا واني اشرحلج واساعدج بالسؤال

بتول - لا ماريد ازعجك

ركان - ماكو ازعاج بويه

بتول - متأكد

ركان - اي

بتول - تمام تفضل المي

ركان - عاشت ايدج

بتول - ابتسمت شرب المي وراح لصاله يم اهلي يبووووو شكد حلو ويكول ادرسج يادرس اذا درسني ابقى اصفن علي ولا اعرف ادرس هههههه

كملنه ترتيب الحلويات اني وتيلا رحنه قدمنا لهم شوي وكال

ركان - اني لازم اروح تأخرت

جوان - ليش يمه بعد وكت

ركان - لا والله ست جوان الحجيه وحدها
لو تعرف اجي هنا جان جتي وياي بس ماعرفت كلت نخلص الشغل اني وحيدر بسرعه ماعرفت نتأخر

جوان - اي يمه حقك
بس ياريت هل مره اجيبها وياك اني وحدي
دوم من تجي التهي وياها

ركان - ان شاءالله يلا في امان الله

جوان - الله وياك يمه مع السلامة الله وياك

بتول - التفت عليه ابتسم وراح ضجت بصراحه جنت اتمنى يبقى اكثر

جوان - تبارك يلا انتِ واختج بدلو علمود نروح لبيت هاي البنيه

تبارك - يابنيه

جوان - الرادها حيدر نروح نخطبها حجي نسوان وبعدين الزلم تروح

تبارك - اها ماشي يلا رايحه

جوان - بتول يلا يمه انتِ هم كومي بدلي

بتول - تمام

________
في مكان اخر

ريتاج - صار اسبوع ورعد ماكو
حيل شتاقيتله اخابره لو مغلق
لو مايرد عليه ااااخ بس لو اعرف
شنو الغيره علي ليش هيج صاير
خوفي يطلع مزوج وحده ثانيه

رجعت خابرته وهم مارد
ليش هيج يسوي لييييش
ضليت اجي واروح شسوي وشلون
اوصله طخت ابالي فكره سهله يارعد بسيطه
اني تجاهلني يارعد اااني سهله

اذا ما اروح وافضحك كدام كلهم واكول انه مرتك ما يكون اسمي ريتاج .................................

_

______
يقول الشاعر

عنيد أنا
كالصخور اذا حاولوا عصرها

وقاسي أنا
كالنسور اذا حاولوا قهرها

وصلب أنا
كالجسور و لو أثقلوا ظهرها

وحين أثور تعيد البراكين لي سرها

لكنني طيب كالسنابل اذا نشدوا خيرها

و سمح أنا
كالخمائل و لو أتعبوا زهرها

عنيد أنا
كالصخور اذا حاولوا عصرها

_

وكانما كان الشاعر رحمه الله
يقصد طفولة رعد في ابياته
___________

شوفو هذا الجمال شغل احد البنوتات الحلوات
حبيت ما شاءالله ابداع عاشت ايدها

قلبي مثل ماكتلكم بارت طن احداث وفعلاً جان طن احداث انتظروني في البارت القادم نشوف ريتاج شنو راح تسوي وكتبولي شنو تتوقعون بوجهة نظركم راح يصير في البارت القادم

_

قلبي مو تنسون تفاعلكم يحفزني كثيررر اكتب اكثر واطول البارت اكثر لا تنسون التصويت بالنجمة وعلقو بين الفقرات اتمنى توصلون البارت اقل شي 200تعليق حقي تعبي7 ساعات متواصله اكتب واعدل البارت والله البارت
طويل بس انتو مندمجين بالرواية تحسو قصير
يعني شسوي بعد 🙂

حسابي انستجرام انشر هناك كلشي
يخص الرواية 👇

حسابي واتباد تابعوني حتى يصلكم كل جديد

Jehan-Stories

نزلو الرواية في المكتبه حتى يصلكم الأشعار من ينزل البارت القادم

_

والان ياحلوين ثقلو ميزان حسناتكم بذكر الله

"""""""""
سبحان ألله
ألحمد لله
لا إله إلا ألله
ألله أكبر
"""""""""

#خلف القضبان روح يتيمة
#بقلم الكاتبه جيهان آغا