#خلف القضبان روح يتيمة
#بقلم الكاتبه جيهان آغا
_
_
قبل مانبدي صلو على سيدنا محمد
( اللهم صل على سيدنا محمد وعلى ال محمد )
ولا تنسون تفاعلكم يحفزني
اكتب البارت وانزله اسرع
قراءة ممتعة ياقلبي
__________
رعد - احجي شعندج خلصيني
ريتاج - مو كل حجي ينحجي عل موبايل لازم اليوم اشوفك
رعد - ماكدر عندي شغل
ريتاج - رعد لازم تجي
رعد - كتلج ماكدررر لا تلحين يلا روحي
عندي شغل
ريتاج - لحظه لا تسده
رعد - ربي صبرني ولج شنو من بشر
انتِ والله مدافهمج كااافي راح احظرج وربي
ريتاج - واذا كتلك حامل هم راح تحظرني
رعد - شنووووو هذا الحجي
لا تخليني هسه اجي اموتج واخلص منج
ريتاج - ماتكدر كلشي تسوي و ابنك اليبطني
رعد - لا حول ولا قوة الا بالله وولج
يا ابن لا تخبليني ريتاج والله اذا اجي
اسويج كاع وامشي عليج شنوووو
انتِ ولج شنو من بشرررر
ريتاج - لا تصيح عليه مو دكولك تعال
ماتقبل تجي جبرتني عل موبايل اكلك
اني الي ماعرف انت شنو من بشر
الي مثلك يفرح مو يتعارك
رعد - وووولج انتِ صدك تحجين لا تخبليني
دخيلك ربي صبرني
ريتاج - شبيك انت متكلي شبيك
رعد - ااااني لو انتِ بنت ال هسه شحجي
سمعي لج كل هذا الخرط مايمشي عندي
هسه بس ارجع اعرف شغلي وياج سهله
ياريتاج ااااني اعلمج
سديت الخط راسي صدع سحبتلي
سيجاره ولعتها الله لا يوفقكم مالحك افرح يطلعولي بمصايب من جوه الكاع ادبسززيه
احمد - رعيد شدتسوي برا
رعد - التفتت اشوف احمد ورايه
والله يابعد اخوك اااحرك بكَلبي
كون هيج بلكت اموت واخلص
احمد - خويه شبيك صاير شي
رعد - ااااخ شوكت ارتاح ماعرف
احمد - ياستار ياربي شنو السالفه
رعد - اخذت نفس من السيجاره
ااااخ خليني بضيمي
احمد - كول يا الله وتعال ندخل والله كريم
رعد - ونعمه بالله روح انت اني هسه اجي
احمد - تمام
رعد - طفيت السيجاره ودخلت وعمران
بعده بالموضوع شكد فاهي هذا الرجال
دخيلك ربي صبرني اني كاعد على نار
اريده بس يخلص وهذا على كيفه يحجي
_
سيف - اكلك حميد
احمد - كول
سيف - شو رعد ضايج صاير شي
احمد - صاير شي بس ماعرفت شنو الصاير
سيف - ها لعد شلون عرفت صاير شي
احمد - من طلعت اشوف وين راح جان يدخن
ويحجي كتله شصاير كام يدعي على نفسه
سيف - الله يستر
احمد - اي والله
سيف - اكلك شوكت يخلص ابوك طكت روحنه
احمد - ههههه اندري
سيف - ولك مامرتاح عندي شغل دراسه صخام
احمد - الحال من بعضه خويه شنسوي
اكلك شوف حيدر شكد فرحان ههههه
سيف - اي وربي جنا مامصدك ادري شنو
السالفه ياخويه شجاك
احمد - اي عمي هذا الحب وما ادراك ما الحب
احنا همج شمعرفنه بهيج سوالف هههه
سيف - هههههه اتفق
رعد - على شنو تضحكون
سيف - سلامتك خويه حجي عادي
انت شبيك ضايج اكو شي
رعد - لا انسى هسه هذا ابوك شكد فاهي
هنا كلمتين دفضها وخلصنه
احمد - هههههه
رعد - على شنو تضحك يا ارعن
احمد - هههه سلامتك بس هدي يمعود
رعد - كاعد على نار متكلي شلون اهده
قدمو ضيافه وعمران كاعد يسفط
بالحجي احنا هيج وهيج وبيت فلان
وعلان وسألو علينه اي طبعاً محد يعرف
حقيقتك غيري كاعد برحابة صدر يحجي
ويتباهى كدام الناس بفلوسه ومنصبه اني
الك اتباهى بفلوس اخوك وابنه بسيطه
ضل يسفط بالحجي ماتحملت كمت
: اني استأذن منكم لازم اروح عندي شغل
حيدر - خويه بعد وكت
رعد - وربك عندي شغل مهم لازم اروح
عمران - عوفه بويه واضح اخوك عنده شغل
تعرف بعد الدنيا ليل وشغله يكثر
رعد - اي صح مثلك يبدي شغلنه بالليل
احمد - ولك سيف بس لا ننفضح كوم احجي
ويه بدون مايحسون كوم
سيف - ماشي
كمت على اساس اشوفه شي بالموبايل
: رعد خويه منا العالم امسحها بوجهي
فدوه اروحلك لا تفضحونه روح شوف شغلك
رعد - من العصر متحمل كلامه وربي لخاطر
امي وحيدر بس سهله خلي نرجع واعرف
شلون اتصرف ويا هذا مو مال احترام
سيف - ميخالف خويه كول يا الله
رعد - ونعمه بالله
يلا اني اترخص
ابو العروس - هلا بيك وليدي نورتنه
رعد - تسلم حجي منوره بيكم
سيف بعدين بلغ امي ماشي
سيف - ماشي خويه
رعد - باوعت على عمران شكد نذل
اعلمك بعدين بسيطه طلعت من بيتهم
شغلت السياره طرت بيها من السرعه
اااااني اااعلمج ياريتاج بسسسيطه
مسافة الطريق وصلت لشقه رحت دكيت الباب
كل قوتي الادبسز ماتفتح الباب
لجججج ريتاج لا اطلعين صوتي فتحي
الباب لا اكسره فوك راااااسج فتحيييييي
_
ريتاج - جنت كاعده وفجأه اندك الباب بقوى عزه العزاني هذا رعد يبوووو كام يصيح ويعيط
كمت ركض خليت حمره حمره ورشيت عطر
عدلت شعري وفتحت الباب اشوف عيونه تجدح من الأعصاب دخل ركع الباب
رعد - ليييش ماتفتحين الباب
ريتاج - حبيبي بس اهده جنت نايمه اعذرني
جرني من شعري وسك على اسنانه وكال
رعد - ااانجبي ااااااانجبي شنوووو سالفة
الصخام اااحجي
ريتاج -رعد هد شعري
رعد - جاااوبي على سؤالي
ريتاج - بس هد شعري جاي تأذيني
رعد - اااااحجي اكلج
ريتاج - شحجي يعني شسوي
رعد - وووولج اني جم مره كايلج
لوووو تموتين موووت ماتصيرين
ام لجهاااالي شلوون هيج صار اااحجي
ريتاج - اااخ بس هد شعري خلي افهمك
رعد - شتفهمين وووولج راح اموتج بيدي بيدي اموووتج واخلص منج
ريتاج - هاي شبيك تخبلت هد شعري اكلك
هد شعري وكعت بالكاع كام يكسر شكو شي
كدامه حتى جرح ايده كام ينزف تقدم يضربني كلت خلي احجي هذا من صدك تخبل كتله
شبيك كتلك شاكه بحمل مو حامل والله
رعد -شلووون يعني شاكه شلوووون
ريتاج - يعني شلون المره تشك بالحمل شهل حجي جبتك علمود نروح نسوي فحص
رعد - اااانتِ تعرفين نفسج شدتحجين لو لااااا
لااااااا تخبليني
ريتاج - بس اهده فدوه خلي افهمك
رعد - ريتاج والله وهاي حلفت حتى لو حامل
لوووووو تموتين الطفل المنج هم ماريده
ريتاج - ليش هيج تحجي اذا حامل ماتريد ابنك
شنووو من بشر انت ماعندك احساس
رعد - لاااا ماعندي بيقتوووو بيه احساس ولكم
راح تخبلوووني
ريتاج - وهو يحجي نزف خشمه خفت لصراحه
:
رعد خ خ خشمك ينزف
سحب كلينكس خله على خشمه
وكعد عل تخم رفع راسه
رعد - الله لا يوفقج رفعتي ضغطي
شوووكت ارتاح منكم شووووووكت
ريتاج - بين علي التعب حتى صوته
اختنك كام راح يغسل واني غايتي موبايله
وين حاطه ماعرف بس لا بجيبه شلون سالفهد هاي كمت دورت ماكو وين حاطه وين شوي واجه
كعد عل تخم رفع راسه و خله ايده على راسه
طلع الموبايل وحطه عل تخم يما شلون اخذه ماعرف رحت جبتله كلاص مي وكعدت مقابيله كتله
: رعدي حبيبي اهده شجاك هيج تنرفزت
اشرب مي
اخذ الكلاص وركعه بالكاع اطشر الكزاز بالشقه
وكال
رعد - ماريد اشوفج كداااامي
ريتاج - بس خشمك ينزف
رعد - مااالج شغل بيه
ريتاج - عوف العركه فدوه كوم غسل
رعد - اني اعلمج وربي اليوم اله اخلص منج
ريتاج - ماجاوبته شوي وكام سحبت الموبايل
فتحته دخلت عل جهات الاتصال علمود اشوف
اخر مكالمه ويه منو قبل مكالمتي جان اكو رقم كاتب علي بنت كَلبي
متت قهر بنت كَلبك مووو والله
عرفت هاي سالفتك مو خاليه بسيطه يارعد
صورة الرقم بموبايلي اجه شمرت الموبايل بسرعه
كمت عيونه حمر تجدح من العصبيه وكف
مقابيلي وكال بعصبيه
رعد - بااااااجر تروحين ويه السائق
تسوين الفحص وبعدها اعرف شغلي وياج
وخلي ابالج حمل بدون حمل بالحالتين ما ااااارحمج ورب الكعبه وهاي حلفت سهله
اذا هذا خشمج ماكسرته ما اسمي رعد
ريتاج - بس
رعد - ماااااريد اسمع صوتج
ريتاج - سكتت ونار تحرك بكَلبي فوك كل هذا
بعد هو اليحجي اخذ الموبايل وطلع وركع الباب
كعدت عل تخم ابجي اني هيج تسوي
بيه يارعد ااااني بسيطه اذا خليتك ترتاح
انت وهاي الادبسز ما اسمي ريتاج ااااااني
الكم اذا ماسودت عيشتك بس اصبر عليه
__
رعد - طلعت من الشقه صداع راسي مو طبيعي
شغلت السياره وكفت يم صيدليه ع شارع
نزلت ورحت اقيس ضغطي دخلت
: السلام عليكم بلا امر عليكم
بس واحد منكم يقيس ضغط الدم
الصيدلاني - اكيد اتفضل اخي
رعد - كعدت اجه واحد منهم يقيس الضغط
وعيونه على ايدي
- استاذ ايدك تنزف لازم تضمده
رعد - لا مايحتاج بس انطيني كلينكس امسحه
علمود لا يتوصخ الكاع ( الارض )
- براحتك استاذ بس الجرح امبين غميج (عميق)
رعد - متعود عل جروح بعد اخوك
بس شوفلي الضغط
- ماشي
رعد - قاس الضغط كال
- اووو مرتفع كُلش ماكل شي
رعد - اي طن اعصاب ماكل ليش يخلوني ارتاح
انطيني مسكن لصداع الم قوي تعبني
- ماشي بس لازم ينزل ضغطك
مايصير تبقى هيج واسمحلي اضمد
جرح ايدك مايصير تبقى تنزف
رعد - تمام شوف شغلك
جاب المعدات وكعد مقابيلي يضمد
بالجرح كتبلي ادويه دفعت حقهم وطلعت
شغلت السياره سحبت الموبايل خابرت نور
___________
في مكان اخر
نور - جنت كاعده عل تخم بالصاله
ما اعرف شسوي حيل ضوجه وحدي
وماكو شي واحد يتابعه عل تلفاز وانوب
احس نفسي مخنوكه ماعرف ليش
كمت فتحت شباك البلكون اجي واروح
فكره تجيبني وفكره توديني ماعرف
شلون تذكرت زنوبه ياترا شلونها هسه
حتى رقم موبايلها راح مني ماعرف باقي
لا بذاك البيت
واني بين افكاري دك الموبايل ابتسمت اكيد رعد
وفعلا طلع رعد رديت
: تعرف مشتاكتلك
رعد - مو بكد شوكي صدكي
نور - شبي صوتك
رعد - بويه خابرتج علمود
اكلج شوي واوصل لايضل بالج
نور - لحظه رعد شبي صوتك
رعد - مابيه شي
نور - لا بيك احجي
رعد - هسه داسوق من اجي نحجي
نور - تمام حبيبي انتظرك
سد الخط كَلبي ناغزني وربي بي شي
رحت لبست تراك ابيض شتوي
مشطت شعري على رشة عطر على حمره
بناتيه فاتحه ومسكاره مشطت حواجبي هسه
تمام سمعت صوت الباب اكيد رجع رحت لصاله
اول مادخل شفت ايده مضمده بشاش رحت يمه
: رعد شكو شصاير شبيها ايدك
رعد - ماكو شي نظر عيني
نور - شلون ماكو شي دشوف ايدك
حضني واني هم حضنته ابتعد باسني من راسي
وكال
رعد - تعبان ويمج كل التعب يهون
نور - حبيبي بسم الله عليك من التعب
شبيك فدوه فهمني شبيها ايدك
رعد - مسك ايدي كعد عل تخم
وسحبني لحضنه غمض عيونه احس اكو هواي
كلام بعيونه طلع السيجاره يريد يولعها سحبته
من ايده وشمرته
: رعد احجي شبيك
رعد - تعبان والله تعبان
نور - بسم الله عليك من التعب حبيبي
رعد - نور
نور - عيونها
رعد - ليش مالحك افرح بحياتي المصائب
تنزل عليه نزول وربج اركض منا ومنا وكلشي
ماكو لا سعاده لا راحة بال لا صخام اريد اعيش حياة طبيعيه مثل الوادم ماكدر شوكت ارتاح
نور - حبيبي لا تكول مصائب يمكن ابتلاء
او بلاء من رب العالمين
رعد - وربج كلشي مدافهم احس هيج ضائع
نور - اكو حديث يكول
إذا أحب الله عبدًا ابتلاه
واذا كان بلاء هذا نداء من الله لك يعني كانما
ولله المثل الأعلى وكانما يناديك ويكلك هذا مو طريقك ارجع يناديك لانو يحبك ومايريدك تعصي
يعني مثلاً اكو طفل امه كالتله لا تلعب يم الباب توكع بالطين بس هوماسمع الكلام وراح لعب اوكع تصور الام راح تعوفه وتروح
اكيد لا راح تروح تكومه واطلعه من
هذا الطين والوصخ وتسبحه وتنظفه ويرجع
انظف واحلى من قبل فمابالك رب السموات والأرض اذا الام خلفت وهيج تحب جهالها
بس هو خلق خلقك من روحه هو نفخ بيك الروح وخلقك شي اكيد من يشوفك واكع بطريق مضر عليك لانه ارحم عليك من نفسك راح يطلعك من حالتك
مايريد يعذبك ولا يعاقبك يحبك يبتليك حتى
تراجع نفسك ويذكرك ترا انت عندك رب ينتظرك
رعد - تعرفين هاي اول مره بحياتي اسمع هيج
كلام
نور - هههه تعرف شنو دائما منال جانت
تستهزئ بيه تكول عليه شيخه لان ملتزمه
بس شلوني بالله عليك خوش شيخه
وربي حلو احجي ههههه
رعد - نور
نور - عيونها
رعد - نيال عليج شمسوي بحياتي
ربي رزقني بيج
نور - يمكن لان صدك يحبك رزقك بنور
رعد - من هيج تكولين اخجل من نفسي
احس بتأنيب الضمير اني حيييل مقصر
بحق ديني تكولين ليش ماتصلي ما اتجرأ
اصلي ماكدر اوكف بين ايده وانه عاصي
على كولتج شلون الطفل من ينهزم مايرد
تشوفه امه من يخالف كلامها ولله المثل الأعلى
نور - ضميت وجهه بين ايدي وعيني بعينه كتله
: حبيبي وربي وربك ربنا دوم ينتظر نرجعله
ونتوب ربنا ماخلقنه حتى يعذبنه شلون
يعذبنه وهو يحبنه وارحم علينه من نفسنه
وساوس الشيطان هذي ابتعد منها تعوذ من الشيطان وكوم توضه وصلي ركعتين وشوف
شكد راح ترتاح
رعد - ماشي بس اريد
اني وانتِ نصلي مثل البارحه
نور - اي اكيد
تقدم ضم وجهي بين ايده وعيونه على
شفتي باسني ابتعد عيونه بعيوني كال
رعد - وربج احبج
نور - وربك احبك
رعد - ما اشبع منج شلون وياج انتِ
نور - اي حقك كيكه نادره فديتني ههه
رعد - اي والله نادره بنت كَلبي
نور - فديت كلبك اني فديته وهسه نكوم
حبيب الروح والريه
رعد - اويلي يابه حبيب الروح والريه مره وحده
نور - كَلبي عشكك انه شعليه صار شعر ههههه
حبيب الروح والريه كَلبي عشكك انه شعليه
والله حلو هههههه
رعد - كلشي منج حلو نور
نور - عيونها وكلبها
رعد - كدامج اضعف اقاوم اكبر المعارك
بس ما اقاوم جمال عيونج
نور - تقدم باس عيوني وخدودي وحط راسه برقبتي وكال
رعد - وريحتج ماكدر اوقاومها ترا صدك احجي
احسج طفله طفلتي الي وبس
نور - غمضت عيوني وهو يشم برقبتي كتله
: رعد حبيبي كوم نصلي ياكَلبي انت
رعد - اي هسه نصلي
نور - دك موبايله كتله
:حبيبي شوف منو
ابتعد واني كمت كتله
: راح اروح اتوضه وافرش السجاده
بالغرفه انتظرك لا اطول
رعد - ماشي عروك كَلبي
راحت سحبت الموبايل اشوف امي رديت
: هلا يمه
: يمه وينك
رعد - بالبيت اقصد الشقه
: نور يمك
رعد - لا راحت تصلي
: يمه شبيك صاير شي احجي كالو جنت
مستعجل من رحت ضل بالي وبال اخوانك عليك
رعد - احمد الفتان هذا بخور السوك
: رعيد ابني واعرفك لا تلف وادور احجي
يمه شصاير وياك
رعد - سلامتج حبيبه موضوع
مو مهم واصلا ً راح اخلص منه لا تهتمين
: اكيد
رعد - اي
: ماشي يمه اخذ راحتك ودير بالك على نفسك وعلى مريتك ماوصيك
رعد - بعيوني اضمها ادللي
: الله يحفظكم يايمه يلا تصبح على خير
رعد - وانتِ من اهله حبيبه
سديت الخط وكمت اريد اصلي بس ماعرف ليش متردد اريد وماريد بنفس الوقت شعور غريب ومُتناقض تذكرت من كالت تعوذ من الشيطان
وفعلاً تعوذت منه ورحت توضيت رحت للغرفه اشوفها لابسه ملابس الصلاة وكاعده عل سجاده صفنت عليها سبحان الله الفرق بينها وبين ريتاج مثل فرق السماء والأرض
التفتت شافتني كامت وابتسمت
نور - يلا حبيبي تعال نصلي
رعد - اي بس اني بطيء لان انسى الكلام
اوكف شوي يلا اذكر و اكمل
نور - عادي ياعمري انتَ على راحتك بعد احسن
رعد - ماشي
وكفت عل سجاده احس هموم الدنيا كلها فوك كتافي بدينه نصلي اني وهيَ
_
نور - صلينه سوا خلصت اني بس هو بعده
كعدت عل سجاده ادعي شوي وخلص صلاة
اتمدد حط راسه بحضني غمض عيونه حطيت
ايدي على شعره واتلمس بوجهه سحب ايدي
باسها و كال
رعد - بنت كَلبي انتِ
نور - حبيبي وعمري انتَ
رعد - الصداع حيل متعبني
نور - حبيبي سامعه التدليك يخفف الم
الراس راح اجرب وبلكت يخف الصداع
رعد - ياريت والله
نور - ادلل نظر عيني
بديت احرك اطراف اصابعي على شكل دوائر
واقره ايات قرانيه بصوت منخفض جداً
وهو مغمض كال
رعد - احبج
نور - ماتوقع بكد حبي الك
رعد - لا اكثر العالم كله ربع من حبي الج مايوصلون لعد شكد احبج
نور - ياعمري انت واني هم احبك
اصلا ماخذ كَلبي وعقلي
رعد - هههه شلون
نور - من تغيب كَلبي يشتاكلك
وعقلي دوم يفكر بيك اشتاك لصوتك
وريحتك اشتاك لضحكتك وسوالفك
رعد - كل هذا الشوك من اغيب جم ساعه ؟
نور - اي
رعد - ترا ماباقي شي اصعد واجب واغيب
10 ايام ومرات 15
نور - احلف
رعد - والله
نور - اووف شلون راح اكدر بدونك
رعد - ههههه طلعت عينج اعرف
نور - شكد منحرف وين راح بالك اقصد
ماكدر هلكد اذا ماشوفك شلون ابقى وحدي
رعد - لا بويه شنو وحدج رجعي يم الحجيه
هاي المره ولغير مره ان شاءالله عالنين زواجنه
اوديج لبيتنه يم امي وبتول
نور - الله كريم
ضليت احرك اطراف اصابعي على وجهه
وشعره وهو مغمض شوي وماحسيت علي
يمكن نام تقدمت اشوفه اي والله نايم ماعرف
ليش نزلن دموعي ماريد اشوفه هيج تعبان
وماعرف شبي وشنو صاير ويا بس كل الي اعرفه
دوم اريده يكون بخير والله احبه من كل كَلبي
تقدمت بسته اباوع حتى بنومته حلو
: ليش احسك طفل من تنام معقوله لهل درجه
حبك ماثر بيه
مسحت دموعي واطراف اصابعي تتلمس وجهه ورموشه همست بصوت منخفض
: رعد حبيبي كوم نام ع جربايه (سرير)
رعد - ا ا اي هسه
نور - يحجي بنعس كتله
: كوم ياكَلبي انتَ الكاع يابسه
رعد - اممم هسه
نور - رجعت بسته كتله
يلا كوم حبيبي
فتح عيونه بنعس كام واني شلت السجاده
ردت اروح اشرب مي عطشت كال
رعد - وين
نور - اشرب مي هسه اجي
رعد - لا تتاخرين نعسان كُلش
نور - اي انت نام حبيبي
رعد - لا روحي شربي وتعالي لا اطولين
نور - ماشي
رحت للمطبخ شربت مي ورجعت جان متمدد عل سرير سحبني لحضنه يشم برقبتي وشعري
رعد - ادمنتج ماكدر انام اذا ما اشم ريحتج واحضنج
نور - ابتسمت بسته بخده
رعد - ادري اخوج وكل شوي تبوسيني بخدي
نور - ياااا مو صوجك صوج التبوسك
رعد - بوسي يابعدهم كلهم بس ليش اله بالخد
بس لو اعرف الشفه بشنو مقصره
نور - عزه بعينك شكد منحرف
رعد - ههههه اي والله يمج اكبر منحرف
اعترف شسوي غير تخبلت بيج وبحبج
تعرفين لو ما نعسان وراسي مصدع جان
عرفت شسوي بهل كيك النايم بحضني
بس تعبان من حسن حظج
نور - يعني اني كيك
رعد - لا احلى من الكيك
نور - هههه زين بس لحظه شتسوي مثلا مافهمت
فتح عيونه باوع عليه نظراته مليئة بالحب والاهتمام تقدم باسني ابتعد
رعد - باجر اكلج شنو اسوي يلا نامي هسه
نور - اها ماشي يلا انت هم نام ابني
رعد - هههه اني ابنج خوش
نور - اي ابن كَلبي ماتعرف
رعد - هههه فدوه لكَلبج نيالي لعد اني ابنه
نور - اي طبعاَ نيالك
من شفته ضحك صدك فرحة
حضنته وهو كذالك ونمنه
صار الصبح روتين كل عاده رعد يروح لشغل
واني ماعندي شي اسوي كلت بس نعلن زواجنه
اقترح علي ارجع لدراسه واتمنى اكمل وان شاءالله
يقبل ارجع لان عندي وقت فراغ واحب دراستي
_
__________
في مكان اخر
بتول - جنت ادرس وماحسيت بالوقت
تعبت شلت الكتب وكعدت اشوف شكو ماكو
بالموبايل وجان اشوف ركان ناشر ستوري شعر
وخواطر معقوله يقصدني لا ماتوقع
ماعرف بس احسه يقصدني لو اني متوهمه
والله ماعرف خلي لا احلم واصدك حلمي بسرعه
اي احسن دخلت تبارك
: ادري يا اختي انتِ ماصدع راسج من الحجي
تبارك - ويه صديقاتي جنت احجي ديتفقون
نروح سفره لشمال بالعطله
بتول - ياعطله
تبارك - مال نصف السنه
بتول - تروحين وياهم ؟
تبارك - اي اذا ابوي قبل حتى عدنا شغل
هناك بالمنظمه
بتول - اها حلو
تبارك - حيل تعبانه اليوم يلا تصبحين على خير
بتول - وانتِ من اهله
لفت راسها ونامت بقيت وحدي كل شوي ادخل
لحسابه اشوف مانشر شي واخر ظهور اله
متصل او لا
انتظرته يراسلني بس ماراسل واني هم
عفته ونمت وماحس غير الشمس بعيوني
فتحت عيوني اشوف تبارك كاعده تتمكيج
ومشغله اغاني
: ولج تبووو شنو هاي الاغاني من الصبح
ماتكولين ناس نايمه مصخمه
تبارك - كومي كاف نوم
بتول - شنو من واهس عندج من الصبح اغاني
ومكياج لعد اني شبيه يرادلي نص ساعه بس
اصحصح من النوم
تبارك - دوام عندي من تكونين موظفه وقتها
تنجبرين تكومين من وكت
بتول - هم يجي يوم اتوظف مو طاح حضي
من الدراسه
تبارك - اي يجي هذا اليوم وحضج الطاح
بالدراسه راح يصير مجرد ذكريات حلوه تذكريها
بتول - هو دخلي بس اخلص هسه
تبارك - تخلصين ماباقي شي
يلا كومي هسه تيلا محضره الريوك
بتول - بس طفي الاغاني وسدي البرده
ماريد شي
تبارك - والريوك
بتول - ماريد
تبارك - اوي شعليه انخمدي عابتلج
بتول - خوش
سدت البرده واخذت الجنطه وطلعت سدت الباب رجعت اريدي اكمل نومتي وجان اسمع صوت
هلاهل هاي شكو ياستار ياربي مايخلوني انام
نزلت جوه اشوف امي تهلهل وحيدر فرحان
: شكو شصاير
جوان - قبلو اهل البنيه
بتول - صدك جذب يمه شلون مايقبلون هو وين
راح يلكون احسن من حدوره
حيدر - اي اول مره تحجين حجي بي خير
بتول - هيج صار الحجي ميخالف حدوره
تبارك - هسه شوكت نبدي نحضر للخطبه
عمران - ياخطبه بابا صبرو بعد باقي الفحص
تبارك - اليوم خلي يسوون الفحص هو شيرادله
حيدر - هو فدشوي ونروح نسوي
بتول - لحظه الفحص قبل الخطوبه لو بعده
عمران - لازم يكون قبل احسن
بتول - اها ماعرف زين شوكت يطلع
تبارك - يوم يومين هيج بال اهلي مو الحكومي
بتول - زين خلي نفترض وان شاءالله كلشي يكون
تمام وماكو مشكله شوكت الخطوبه اوين تكون
غير نعرف
حيدر - هاي يم الغالي شدكول بويه
عمران - الخطوبه بالقاعة
واحتمال نسويها مختلطه
حيدر - والله اشوف لو بس
العرس مختلط مو احسن
عمران - انت اول ابن يزوج لازم نسويلك
خطوبه وعرس العراق كله يحجي بي
نسيت انت ابن عمران مو ابن شخص عادي
حيدر - ماشي بويه سوي الي تشوفه مناسب
عمران - يصير خير وانتِ جوان شتكولين
جوان - براحتك شنو التشوفه مناسب سوي
بتول - يمه واحنا شوكت نروح عل سوك
نحضر نفسنه
جوان - ولج يمه دخلي يطلع فحصهم بال اول
ومن يطلع نبدي نحضر
تبارك - اني اروح اتاخرت يلا مع السلامه
جوان - الله وياج يمه
عمران - دير بالج على نفسج بعد ابوج
تبارك - حبيبي ان شاءالله
بتول - راحت تبارك وحيدر راح يبدل
علمود يروح واحمد وسيف بالكليه
واني مالي خلك اروح للمدرسه ماعرف ليش
ؤدت اصعد اكمل نومتي صاحتني امي
جوان - وين يمه تعالي تريكي
بتول - مدري اليوم تعبانه ما اشتهي
جوان - والمدرسه
بتول - مالي خلك يمه شوي تعبانه ماروح اليوم
عمران - تعالي بعد ابوج
وردة بيتي شبيها ضايجه
بتول - رحت بست راسه كتله
: لا حبيبي زينه بس اريد انام نعسانه
يمه فدوه لحد يكومني ومن اجوع اني اكوم
انتو اتريكو الف عافيه
عفتهم وصعدت لغرفتي سديت الباب
ونمت نومت أهل الكهف كمت على صوت
الموبايل سحبته ماشفته زين عبالي واحد من
اخواني رديت
: يعني الواحد ما ينخمد
ركان - هههههه لا شلون انخمدي بويه انخمدي
بتول - فتحت عيوني اشوف منو عزه العزاني
هذا ركان ليش دائما افضح نفس كدامه ليش
صخام الصخمني كتله
:اعتذر عبالي اخواني ماشفت الاسم زين
ركان - عادي ماصار شي شلونج بويه
بتول - بصراحه مالي خلك احس هيج تعبانه
ومو تعبانه ماعرف
ركان - وين يوجعج
بتول - ماعرف اني بنفسي ماعرف احس
كل جسمي يوجعني
ركان - هاي شني
هسه غير نعرف شبيج علمود
تروحين تاخذين علاج شي
بتول - ماعرف انسى انت شلونك
ركان - شلوني وانتِ هيج
بتول - ضحكني كلت بكَلبي
اي هيج احجي شكد فاهي كتله
: ليش شبيك انت
ركان - ماعرف مثلج
بتول - ليش
ركان - ساعه اعرف وساعه ماعرف العقل
مشوش
بتول - هو منو العقله مو مشوش
شنسوي اي ليش خابرتني
ركان - اسلم عليج
بتول - الله يسلمك
ركان - بتول
بتول - ها
ركان - دير بالج على نفسج واذا بقيتي
هيج روحي لدكتور
بتول - لا ماروح هسه يكتبلي ابر ومغذي
ركان - بتول
بتول - ها
ركان - كتلج روحي كولي اي اروح
بتول - ماريد اروح ماحب الأدوية
ركان - يارب الصبر
ولج بويه ليش هيج راسج يابس كتلج روحي
كولي اي اروح الا تعاندين
بتول - ابتمست حبيت كلامه واهتمامه كتله
: لحظه ليش هلكد مهتم ممكن اعرف
سكت مارد كتله
: ها ماعندك جواب
ركان - سمعي كلامي ماتخسرين
بتول - واذا ماسمعت
ركان - وليش ماتسمعين عناد بيه
لو شنو سالفتج
بتول - لا موهيج بس مدري كلامك
صيغة امر وماعرفت افسره
ركان - مو امر غلطانه
بتول - ماشي
ركان - اروح هسه بعدين اخابرج
بتول - بس ماعندي درس اليوم
ركان - ابقي بهاي فهواتج خوش
بتول - عصب عصب هههههه كوه
كتمت ضحكتي كتله
: ادلل
ركان - بعدين نحجي مع السلامة
بتول - مع السلامة
سد الخط
اني فاهيه بسيطه هو انت الفاهي ياحضي
اباوع عل ساعه اوف راح ياذن المغرب
لعد شكد نايمه كمت سبحت شوي احسن
صرت نزلت جوه اكلي شي شفتهم كاعدين
كلهم بصاله يحجون بسالفة الخطبه عفتهم
رحت للمطبخ تيلا جانت تغسل مواعين
تيلا حبابه سويلي شي اكله جوعانه
تيلا - حاضر ماما تريد سوي لفه الك
بتول - براحتج لفه اي شي سوي اروح لصاله
جيبي هناك ماشي
تيلا - حاضر ماما
بتول - رحت كعدت يم امي همستلها
: يمه رعد وين
جوان - عنده شغل
بتول - ادري شنو هذا شغله
بس قبل جان يتواجد بالبيت شو
هسه مانشوفه
جوان - ماعرف
بتول - والله احسج تعرفين شي بس ماتحجين
جوان - طاح حضج وحض احساسج خوش
بتول - ههه خوش
جابتلي تيلا اللفه كعدت اكلها واستمع لحديثهم
احمد - اني اكول لو نسوي بالمزرعه احلى
سيف - اني هم اكول سوو خطوبه بسيطه
عود العرس خلي جبير
حيدر - شتكول بويه
عمران - لا نسوي خطوبه وعرس جبير
سيف - والله ماكو داعي بويه
عمران - لا اكو داعي ونص واريد
كلشي يكون 100% لا تفشلوني
كدام جماعتي
تبارك - زين بويه عادي اني هم اعزم صديقاتي
بالدوام
عمران - اي بعد ابوج منو تعزمين عزمي من معارفج بس كون ناس محترمه مانريد مشاكل
تبارك - اي اكيد
احمد - صدك مختلط راح يكون
سيف - شلون يعني
احمد - اقصد ماتعزلون
النسوان بمكان والزلم بمكان
عمران - اي كلمن وعائلته يكعد على طاولته
تبارك - حجزتو القاعه
حيدر - اي حجزت قاعة ....... احلى كلهم جانت
تبارك - هو ماكو أرقى منها ابغداد هنا المشكله
حيدر - لعد وين نروح لا تكبرون السالفه
يمعود هيَ خطوبه عاديه حالنه حال الناس
عمران - احنا نعرف شي انت ماتعرفه
حيدر - والله بويه شكد مايكون بسيط
يطلع احلى ماكو داعي نبالغ بالتجهيزات
احمد - هههههه بسيط الاخ
حيدر - ها ارعن ليش تضحك
احمد - تذكرت رعيد صدك وينه رعد
جوان - عنده شغل يمه
سيف - غريب شو كثران شغله حتى
مانشوفه
عمران - لا تشوفو احسن مو هلكد شي مهم
احمد - لا بويه يبقى اخونه ومهم عدنا
عمران - اي ابقو هيج خلي يضحك عليكم
من طاح حظكم
بتول - امي ضاجت غيرت الموضوع
: اي حدوره هم تحجي ويه البنيه
حيدر - فقط سلام
سيف - ليش
حيدر - شنو ليش بعد ماصاير شي رسمي
سيف - شمدريني
احمد - كتلك احنا همج شمعرفنه بهيج سوالف
بتول - هههههه
________
في مكان اخر
بعد مرور يومين
نور - جنا كاعدين نتغدى خابرت امه رد عليها
رعد - هلا حبيبه
جوان - هلا يمه شوكت تالتحق
رعد - مو باجر عكبه ماخذ اجازه
جوان - اي مو اكول طولت اكلك يمه
الخطوبه عل جمعه راح تكون
رعد - طلع الفحص
جوان - اي يمه الحمد لله كلشي تمام شوكت
تجي ترا ذوله اخوانك مايعرفون يتصرفون
رعد - بس اتغدى واجي
جوان - ماشي يمه
ها صدك جيب نور وياك للخطبه وخلي تكشخ
وترتب نفسها على حبايه ونص
رعد - هسه مايكولون منو هاي
جوان - يمي الموضوع
اكلهم اقارب الحجيه ام ركان
رعد - ماشي على شنو ثبتو رائيكم للخطبه
جوان - مختلطه عمران معند وخواتك ضايجين
رعد - ليش ضايجين
جوان - يردن يلبسن براحتهم اذا مختلطه ماياخذون راحتهم
رعد - اي صح
جوان -يلا يمه لا اطول اروح اكمل التحضيرات
رعد - ماشي يمه
جوان - لا تسوق سريع من تجي
رعد - ادللي حبيبه
جوان - الله يحفظك يايمه
رعد - ويحفظج الي حبيبه
نور - سد الخط كتله
:خير حبيبي صاير شي
رعد - اليوم شنو من الايام تاهت عليه
نور - اليوم الأربعاء
رعد - يوم الجمعة خطوبة حيدر
نور - صدك حلو الله يتمم لهم عل خير
رعد - راح اخذج وياي
نور - شلون والناس
رعد - امي تكول راح تكلهم اقارب ام ركان
نور - اها اي حلو احسن
رعد - بس شوفي الخطوبه مختلطه ملابس
ضيكه ممنوع معالم جسمج اتبين هاي وحده
ثنين شعرج خصله شنو ممنوع تبين ومكياج ممنوع حتى عطر ممنوع ولبسي شي عريض
نور - انصدمت من كلامه
:هاي شبيك رعد عود صدك تحجي لو تشاقه
رعد - طبعاً صدك
نور - وين رايحه فاتحه لو عرس شبيك
رعد - نور كلت العندي اتمنى ما اجادليني
نور - اني ماحب هيج طبع شنو السالفه
رعد - والله اني هذا طبعي شسوي يعني
نور - ماروح
رعد - ليش
نور - لا مكياج لا صخام وين اروح شنو رايحه
فاتحه بس باقي تكلي تخمري
رعد - لو بيدي جان خمرتج بس ماريد اضغط
عليج اكثر واضوجج
نور - فتحت عيوني من الصدمه
: لا اكيد تشاقه
رعد - لاوالله مو شقه حقيقه
نور - صدك جذب لا مستحيل
ماروح عمي شسوي لا اريد هيج عرس ولا شي
رعد - نور لا تعاندين بويه
نور - على شروطك باب الشقه ماشوفه
رعد - كتلج بدون عناد
نور - ما اعاند بس اني حره اروح او لا
رعد - لا مو حره
نور - لا والله اشو حره
رعد - ورب الكعبه داطول خلك وياج
لا تخليني اتعصب كتلج لا تعاندين كولي حاضر
نور - ما اعاند بس كتلك اني حره ماروح هيَ كوه
رعد - اي كوه
نور - باوعت علي ماحجيت شي كمت
رعد - وين
نور - شبعت
غسلت ايدي ورحت للغرفه رحت جوه
الفراش حضنت المخده ضجت منا لصراحه
مامتعوده هيج
شوي ودخل سويت روحي نامي
رعد - كومي اعرفج ما نايمه
نور - ماجاوبته حسيت بي تقدم لتجاه السرير ضليت مغمضه ماحس غير سحبني لحضنه
باسني ابتعد كال
رعد - هاي الشفه اريدها بس الي وهذا الشعر بس اني اشوفه حتى عيونج ماريد تشوف غيري انت بلا شي بيضه وحلوه انوب مكياج والناس تباوع
عليج غير اتخبل اني اريدج بس الي فهميني
نور - تقدم يبوسني خليت ايدي على شفته كتله
: هذا مو عذر يعني خطوبه شكدها وشكبرها
بس نور بيها والناس تباوع عليها شهل حجي
رعد - اي صدكي كلهن تجميل ونفخ عادميني
وجهم عدم بس انتِ ملامحج ملامح طفله
وين اضمج تعرفين بياضج يجذب النظر
تعرفين لو لا
نور - رعد والله مايصير هيج يعني حالي
حال البنات اريد اكشخ تعرفني زين ملتزمه
ومستحيل البس شي مامستور او انزع الحجاب
بس مال مكياج والله مكياج خفيف احط عمري
ماحاطه مكياج غامق وانوب حتى عطر ماتقبل فدوه لا فدنوب تسدها بوجهي
رعد - اغار مو بيدي ماريد غيري يشوفج
نور - خلص لعد ماروح لا تجبرني اروح
رعد - نور بدون عناد بويه انتِ
نور - ليش لازم بس كلامك يمشي
رعد - احبج
نور - لا تغير الموضوع
رعد - ماغير لان احبج ماريد غيري يشوفج
نور - كتلك ملابس مستوره وحجاب
رعد.- بقت عل مكياج شتسوين بي والله حلوه
بدونه
نور - رعد لا تخبلني رايحه مناسبه مو فاتحه
وبعدين مناسبه تخصكم مو غربه شبيك
رعد - تخصنه ماتخصنه اني رجال اغار اغااار
نور - لا تصير عصبي
رعد - ترا شكيتي بطني وتكولين لا تصير عصبي
نور - هيج صار اني اشك البطن خوش
وخر اريد اكوم
رعد - عناد بويه عنااااد كلج عناد
نور - كتلك وخر اريد اكوم
رعد - ههههه حلوه حتى باعصابج
نور - اي خوش قشمرني بكلامك
رعد - وربي ما اقشمر احبج ااااحبج بعد اصرخ
ااااااااحبج ديلا واموت عليج لوبيدي اضمج
بكَلبي وحتى النفس من ريتي تتنفسين
ولج اغار عليج من الهوى شلون
ما اغار من الوادم .................................
_
_
_______
يكول
أغار عليك من أبيات شعري
إذا وصفت جمالك في خيالي
أغار عليك من قطرات حبري
ومن قلم يخط به مقالي
____
بارت القادم مشاكله واحداثه 🔥🔥🔥
يعني هذا البارت هدوء ماقبل العاصفه
قلبي الحلوين لا تنسون حق تعبي وياكم التصويت بالنجمة وعلقو بين الفقرات اتمنى توصلون البارت اقل شي 200 تعليق ❤
حسابي انستجرام انشر هناك كلشي
يخص الرواية والابطال 👇
حسابي واتباد تابعوني حتى يصلكم كل جديد 👇
Jehan-Stories
الان ثقلو ميزان حسناتكم بذكر الله
"""""""""
سبحان ألله
ألحمد لله
لا إله إلا ألله
ألله أكبر
"""""""""
#خلف القضبان روح يتيمة
#بقلم الكاتبه جيهان آغا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!