صوت يمة صياح
ختفة صوتة
بس بعدة لخط مفتوح
اسمع صراخ نسوان
بقيت اصيح
قيصر وينك
تسمعنيييي
صوت طلق وصراخ لنسوان يعلة
نغلق لخط
بلكاع وكعت خاوية دخيلك ياربي
دخيلك بسلا صارلة شي
معقولة لكو لولد الي ضامهم
زين اذا لكوهم ليش اسمع صراخ نسوان
واذا لكوهم اكيد يعتقلوهم خوما يرمون عليهم
بلبيت افتر مثل لمخبلة
ارجع ادك.علتلفون ميتحصلون
للصبح مانمت
افكار مخاوف خلتني مثل لمخبلة
وجهة شكلة كلامة ابتسامتة طولة
كلشي كلشي
جان يتجسد كدامي
كدامي كأن كاعد ويحاجيني
لخوف الي بداخلي علي خلاني اسأل بروحي
ليش اني تحديدا اتصل بية
ليش مااتصل بغيري
زين اني مرة عاجزة وبغداد شلون اكدر اساعدة
شكول عليك قيصر
سلبتني راحتي بخوفي عليك واني كلشي مابيدي
جريت لتلفون كلت اتصل بأهلة واحجي لغضنفر اكيد هوة اخو ويحبة ويخاف علي ويوكفلة حتلو عرف بلسر لضامة
دكيت رد علية واحد من ولد جليل
ماكدرت اطلب غضنفر ترددت كلت اطلب انعام واكلة اني صديقتها واحجيلها وهية بلكي بطريقتها تفهمة
اسمع صوتة من صاح عليها وكللها هاي صاحبتج
وراها صوت جاوبني بنتر
ونسد لتلفون بوجهي
شكيت يكونون عرفوني
كلت ماالح اخاف اتسبب بمشكلة لبسعاد
رغم لسوتة بية
بس اخاف عليها
ساعة بل٦
اعاين لوجهي بلمراية عيوني لفص لابيض بي شراين حمر شفتي باهتة
بخطوات ثقيلة تسحبت لغرفتي
بدلت ورحت للدوام
كلها تسألني عيونج شبيهن
كضيت لدوام كلة اتصفن
فوضى برأسي
صداع يقتلني
ملل من لوقت الي ميرضة يمشي
حزن فضيع
اريد لنهار يخلص ويجي اليل
بلكي يرجع يتصل
بلكي يكون مابي شي
واكفة وبيدي لطباشير واشرح علسبورة
ماعرف شنو لخلاني اشمرة بلكاع واركض
جنت محتاجة لهرب
من لناس من نفسي من كلشي
مااكدر بعد اكون على طبيعتي اكثر من هيج
مااكدر
جان لشي الي مخرب لحضاتي دائما
الإفراط
بكلشي جنت مفرطة
افراط بتوقعاتي
بمخاوفي
بالإنتظار بكل شي
طبيت للبيت مخنوكة شايلة حمل على صدري لا اكدر احجي ولا اكدر ابقة ساكتة
عصرية تانيت يم لسماعة هواي
لحد ماحسيت نفسي راح انفجر
طلعت اجرت تكسي ورحت لبيت عمي
دخلتني مرت عمي
وتستفز بية بكلامها
شعجب يارجب ليوم زايرتنا
خوما بيكم شي اهلج خوما صاير بيهم شي
لا لحمد لله كلشي مابينا
مو اكول انتو بس من عدكم شي نعرفكم
زياد موجود
رفعت تك حاجب وجاوبتني ننايم
لا استغفر الله نسيت
طالع طالع
خوش لعد اني اترخص
صوتة من جوة يصيح
وين ياب وين
تمشة بلصالة وجان يلبس بفانيلتة
تقرب الي يضحك
لجلب لعضج كتلنا عمي
شعجب ذاكرتنا
امة تخازر وترد علي
شوف شو شعدها
اشر الها وهوة يغمز
ستكانين جاي من ادينج لحلوة
مشت وتعض شفايفها وتخازر
كعد يمي وتقرب شوية
اي ياب شلونج مالونج
لحمد لله زينة
شبيج شو موعلى بعضج
اول شي اريد احجيلك على سالفة لرسائل
وداعة نضر عيني وداعة بابا وصحتة وداعة بسعاد لمانشفت دمعتي عليها لا اعرف شي عنهن ولا اعرف كل حرف نذكر بيهن
ولا بعمري كايلة عنك هيج شي
ولشخص الي نذكر اسمة بلرسالة لا اعرفة ولا عندي شي ويا
بتسم وهمس
لتحلفين اني سالت وعرفت لولد خاطب بت خالتة ويحبها ماجذب عليج وقتها شكيت انو انتي كاتبة هلشي بس حتة تكرهيني بيج بس اهم شي تاكدت ماعندج شي ويا انتي عرضي وماقبل عليج لشينة
باقي لكلام الي بلرسائل سواء انتي كاتبتة او لاء ميهمني لشي اليهمني تاكدت منة وخلص
اعتقد بسعاد هي لكاتبة لرسائل بس ماعرف شنو غايتها
تعرفها زعطوطة ام عقلين كلشي يطلع منها
خلص لتبررين ماطول حلفتي بداعة عمو اني مصدكج
كليلي شعجب جايتنا ليوم
محتاجتك زياد
عيوني الج
تردين فلوس توصيلة للدوام
لا موهيج
لعد
كوم خل نطلع بلسيارة نفتر ونسولف
اي ليش لا شكو ورانة
جاب سويجة وجكايرة وطلعنة
واحنة نلبس احذيتنا
مدت راسها
وين ان شاء الله
رايحين بشغلة
اي مو كلت من لأول معقولة تجي تشوفنا
سد لباب وعافها تدردم
ركبنا لسيارة بس عبرنة دربونتهم ندار علية وكال
شبيج بلقيس شكلج ماعاجبني
ماعرف شكلك
اني محتاجة وكفتك
قبل مااحجيلك توعدني تساعدني وتبقة وياي لحد ما يصير كلشي
شكو احجي
نطيني كلمة بلأول
ياب وياج للوحة لتخافين بس احجي ترة دتخوفيني بلقيس
عيال بسعاد
شبيهم
بلعت ريك وترددت احجيلة خفت يشك بيني وبين قيصر شي وعلى هلاساس يتردد وميساعدني
ماعرف شلون طلعت مني هلجذبة
رجلها واكع بمشكلة واتصل بية ويمة صوت رمي وكلي دوني عنوان وطلب مني اذا مايرجع يخابرني لثاني يوم اروح للعنوان والكة هناك امانة اجيبها يمي
وادير بالي عليها بينما هوة يتصل بية واذا مااتصل
نطاني رقم ناس اخابرهم واطلب احجي وية شخص اسمة عبد لواحد واتواصل ويا واسلمة لأمانة
بلقيس شنو هذا لحجي
وليش اتصل بيج انتي بلذات
اخوتة وولد عمة يسدون عين لشمس لو بس وكت لمشكلة اجونة واحدهم تكول مجرم مجهزين سلاحهم
لا موهيج بس لضاهر لمشكلة تخصهم كلهم ولآمانة لازم شخص غريب ياخذها يمة
جائز عليهم ثار شو شنو وحياتهم بخطر ويخافون هاي لامانة تنضر
وشنو هلامانة ماكلج
ماعرف بس كلي يم لهور من صفحة لكصب جهة لبزل لخايس
هلا هلا واحنة نروح نهبد وندور علبزل لخايس حتة نخيس هناك وبعد محد يندل النة درب
ياب صدك تحجين تتشاقين ناس عشائر وثارات ولكتل عدهم اسهل مايكون وين تردين تورطينا
اطبك يمك ونزلني ماطول كمت تصيح
ستغفر ودار وجهة علجامة
بلقيس احجي لأبوج شوري
مااكدر بابا تدري بي رأسا يمنعني وحتة من لدوام يكعدني من سالفة بسعاد صار يخاف علية من كلشي حتة روحتي الها لو ماخالو بلتواسيل يقنعة مجان خلاني
بقة ساكت اكثر من ربع ساعة
كسرت لصمت وكتلة
زياد متكدر رجعني للبيت خلص
بقة ساكت ماجاوب
سألني تحتاجين شي من لبيت لو نطلع
لاماعندي شي
جانت لساعة بل٤
من محل بلشارع نزل شترة جكاير ووخابر وصة امة تتصل بأهلي وتكللهم اني ابات يمهم
صعد وشمر بحضني مسقول وحب شمس وعلج
ندار علية يتبسم
ورانة درب طويل كضي وكت بيهن
فتحت لجكمجة وحطيتهن
لتفكير خلاني مااشتهي لعسل
يحجي وياي بلطريق شي اسمعة وشي اهز راسي واصلا ماادري شكال
ماعرف شوكت نمت
مانايمة وتعب لطريق وسيارتة مطعطعة تخضخض بينا بلشارع موتمشي
عبالك كاعدة بكاروك موسيارة
لعبت نفسي ودخت رغم مماكلة
كعدني يهمس
عاينت دنية اليل
بلقيس طبينة لمحافضتهم هسة منين نهبد ان شاء الله
اذا طلعولنا سلابة بهليل بلله شتسوالنة
هسة بس لتفاول علينة
شوفلك واحد وسألة
ولج شسألة هنا كلها عشاير كبل يسالني من ياعمام والمن رايح
شكلة رايح للبزل لخايس افوج بي
لعد شلون نضل نمشي
اي دإسال احد ياعيني ماياكلون بلعكس هنا يقدسون لضيف
ماشي نشوف تاليها
من بعيد اشر لحارس متمدد بلزرع ويمة قوري جاي
اجا يركض
نطا لعنوان لكتلة علي
دلا ووصفلة
زياد ميفهم كلامة عندة مسطلحات صعبة
بقيت افهمة
مشينة علوصف مالتة
بماحاذات لبزل
مشيينة كومة وماكو لخرايب لكال عليهن
نزلنة نتمشة
لمكان اضلم وصوت لذيابة ولحشرات
ولبرد
جنت خاتلة بضهرة وهوة يرجف واني ارجف
نتمشة بين لزرع ندور علخرايب
ندار علية بنفاذ صبر ويستغفر
هسة شلون بلقيس
هاي بساتين لعالم كلها بيها حرس هسة لو لزمونة يعلكونة بمكان هاي لفزاعة
اي لعد اجينة وتعنينة وتالي نرجع
هانت هسة نلكاها بس امشي فدوة لعينك
صار ياب صار
مشينة بضع امتار ومانسمس غير صوت طلقة
وثنين من بعيد يركضون بين لزرع ويصيحون
هايلولاد وينكم طبونا طبونا
سحبني حيل من ايدي وركض من لأتجاه لثاني
بس عبرنة بستانهم مانشوف غير خرايب ثنين كبالنة واحنة ركضنة عليهن مثل لغركان ولكالة كشة
ومن بعيد نشوفهم يركضون للسيارة
طبينة بيهن
لمكان اضلم
كعدنة بزوية واحد ميشوف لثاني
نسمع صوت لرمي طلع برة يباوع
اعاينلة ادي على راسة ويصيح
راحت لحبيبة رااحت
شكو
لج زرفوها للسيارة
هسة انتي مخبلة اني شبية وطاوعتج
ديلله هسة هية شلونها سيارتك تذكر جدي
ولج ترحيلها فدوة لوماهية توصلين لهنا
تعاي خل اشمرج الهم فدية وارجعها
عشتوووو همزين زرفوها حتة تبدلها
يمعود لو عدها لسان وتحجي جان صاحت فاركني مروتك
بقة كاعد بلكاع ويشامر علية حصو
تلفتت علمكان وكمزت
ولك زياد ذني لخرايب
شوف ذيج لكصبة كبالنة
وهاي احنة بمحاذات لبزل لخايس تشتم لريحة
اي كرت عين امي
هسة شنشوف ونلكة لأمانة
هيج وتطلع لأمانة سلاح وافرغة براسج هنا وارتاح
ومنو يكول راح نرجع سيارتك وفلشوها شيطلعنة منا
هوة اني من لأول كلبي حاس راح افوج بلبزل لخايس واعبر
سبحان الله على نياتكم ترزقون
انت طيب
حيل من لكاع شال صم حصو ورمل وشمرة علية
اسمع صوت
خايبين هلا يمة
يلفروخ
يلويلاد
منو هنا
طفرت ركضت يمة
سمعت سسسمعت
اي سمعت ادري اني بدولة ثانية غير نفس لمهجومة لخرابة
خاب ياهو هنا
بلغيس
يمة بلغيس هاي انتي
يمة يمممة تعرف اسمي تعرفة
صرت بضهرة
ولج خاف هاي شبح جني
ومنين تعرف اسمي
اندري غير ضليتي هنا سبوع ثاردة وياهم للعجس انتي
تقدمنة ليجوة ونصيح منو هنا
صوتها يرد
يمة بلغيس هاي انتي
خاب وين صرتي من لبارحة اتانيج يمة
غويصر حطني هنا وانة لا نضر عدي ولا رجلين تعيني
اتبع لصوت جنت
تقربت الها
خالة انتي لامانة مال قيصر
اي يمة انة لصخمانة لامانة ساعة لسودة لشفت قويصر بيها دكني لجوع ولبك كلاني وبس لجلاب تحوم علية اريدلي بشر يجيني ماكو
مديت ادية اتلمس
لزمتها
لتخافين خالة هياتني راح اخذج وياي
وين انوب
اخذج يمي ببيتي اسبحج واوكلج لتخافين
يلله كومي
خايبة انة لو اكدر اكوم اضل هنا مربطة ومتانية
يعني انتي مقعدة
يمة انة مكَرمة
شيليني
نداريت علي
شيلها زياد
ووين اوديها ان شاء الله لو شلتها
نفوج بلبزل لخايس
اهوووو عاد شجلبت بلبزل انت
اي غير لسيارة سووها منخل وين اخذ لمرة اهبد بيها وهي ضريرة ومقعدة
لعد شلون
تاني يطلع لفجر هسة منكدر نطلع اكيد ذولة مترصدين احد يتقرب للسيارة
يعني نضل هنا للصبح
اي ماضل شي علفجر بلكي يطلع لفجر ويجيب بشارة من رب لعالمين
ونعم بلله
ننتضر امرنا لألله
بقينة كاعدين ولحجية تتلوة من لجوع والم جسمها نايمة علكاع
شالها زياد من لكاع شربها ماي من عطشها
شوية وشخرت
وبقينة لاهوة نام ولا اني نمت
كاعدة واهش بلبك وهمسلي
بلله هسة اني شلون طاوعتج واجيت لهنا
اسأل نفسك
سالتها ومالكيت جواب
هذهو لعد اسكت
هاا ولج شو انتي مانة علية
هسة شنو راح تكعد تعيرني كلسا
لاياب عليمن اعيرج بس انتي مادري شبيج وياي
اوووفففف ماعدنة حض
مابية شي وياك وشكرا على كلشي سويتة راح انام اني
جر حسرة وماجاوبني
تمددت بمكاني وعيني علي كلسا يروح يباوع بتجاه لسيارة ويرجع
بقة يناطر مانام
فجرية فزيت على صوتها وهية تفزز بينا
عاينتلة جان نايم وهوة منتجي علحايط وركبتة مكسورة
فتحت عيوني كوة افرك بيهن وهية تصيح
خايبين يمة راح اموت من لجوع
الله لايوفقك قويصر على هلعملة
خاب يمة بلغيس طلعي منا جيبيلي هرش نعناع وتعاي
شنو هرش
خايبة نعناع نعناع شلون اوذن
خاب يمة كضاني لجوع
تمشيت ليكدام
جانت اكو بلكاع اشكال لزرع وكلة متشابه ماعرف افرزنة جبتلها من كلشي شوية واجيت
بقت تعض وتذب الى ان ضاكت لنعناع سكتت
رحت علي فززتة
يعاينلي ويتلفت عبالة حلمان
تمشة غسل وجهة واجاني ملابسة متوصخة زالك بلطين بقيت كوة كاتمة لضحكة وادور وجهي عنة
تخصر وهوة واكف وكال
ضحكي ضحكي راح تموتين وجهج صار اجمر
ضحكت من صدك علي بنطرونة من ورة على طولة كلة طين
هسة شلون شنسوي
راح اتمشة للشارع واأجر سيارة تاخذنا لبغداد
وسيارتك
متصيرلها جارة بعد
وحتلو لو تصيرلها ماشايل فلوس حتة اسحبها
لمبلغ لعندي يادوب يوصلنة بسيارة خصوصي
يعني نعوفها
هسة خل نسلم على رواحنا
فدوة لسيارة
معقولة انت تكول فدوة
شبيج بلقيس
يعني مامقهور عليها
اي مقهور عليها وراح انجلط
بس شسوي قابل هذا قدر والله رفعة عنة
هذهو فدوة الج
ابقو هنا ديري بالج على نفسج وعلى لمرية
احاول مااتأخر لتطلعين مكان ولا تتحركين
راح وبقينة ننتضرة
مرت اكثر من نص ساعة
بديت اخاف
ولمرة اكلت كلبي جوعانة
كسرت خاطري
كمت اهبد اجيبلها زرع من لكاع وانطيهيا وتشمرة علية تكلي مينوكل هذا
تعبت من لخوف
جنت ابالغ بخوفي لدرجة افتر بلمكان واتلفت مثل لمخبلة
شفتة من بعيد يهرول ويتلفت
تقرب الي يلهث
كومي يلله وتعاي شيليني لمرة
وين لسيارة
علشارع بقة مترهم يدخل ممنوع هنا يخافون
شيلتها الة جانت سمينة وثكيلة
رغم سمين وجثل بس كام يلهث وكلسا احسها راح توكع منة
نزلها شكم مرة بلكاع يرتاح ويرجع يشيلها
وصلنا
جان واكف لسايق
ركبنا
هنا يلله جريت لنفس
مشينة لبغداد قريب لضهرية يلله وصلنة
جان ضايج ومخنوك عيني علي لطريق كلة عينة للجامة ويتحسر
رغم ماحجة بس ادري بي كلش مهموم على سيارتة
الها عندة اكثر من ٧ سنوات
تعبانة بس ميبدلها ابد
مثلها مثل هواي اشياء بحياتة تتعب وتصير بالية وتنتهي بس ميذبها ولايبدلها
وصلنة للبيت لخوف ولقلق شحجي لاهلي على لمرية
ندار علية و نقذني بلوقت لمناسب وهمس
لتخافين اني ادبرها
شلون
مالج شغل
دكينا لباب
من ورة لباب اسمع ماما تصيح منو صوتها مخنوك عبالك منشولة
رديت اني ماما اني
اسمعها تصرخ على بابا
وميض هاي بلقيس تعااال
فتحت لباب الي
ودموعها تتجارة وحيل شبكتني
اني اعاين لزياد وهوة يعاينلي
تضرب بية على متني وترجع تبوسني
ولج وينج متكليلي
شنو ويني ليش مرت عمو ماتصلت بيكم
لا اني اتصلت بيها سألتها عليج كالت اجتنا لعصر وراحت
يعني ماكلتلج راح ابات يمهم
لا ولاجابت طاري
عيوني على زياد حيل ضرب لباب بقبضة ايدة وإستغفر
تقرب بابا يلوم بية وبزياد وبمرت عمو
جان تعبان مبين هوة وماما مبين عليهم لسهر
بقيت مخنوكة وحيل ضجت من مرت عمو
دخلنة لمرية راح شالها زياد وطببها
امي وابوي عينهم علينا يطالبون تفسير
عاين الي وبتسم كأان يكلي طمأني وندار على بابا
عمو هاي لمرية ام صاحبي وبقاها يمنا لولد بس هلواحد الها وعلي ثار وشرد وشوفة عينك لمرية ضريرة ومقعدة امنها امانة يمي بينما يشوف حل
واني ليوم اطلب منك ومن مرت عمو اذا تكدرون تبقوها يمكم
ماما ماعارضت وكالتلة نكسب بيها اجر،
بابا جان متردد وخايف من سمع بيها ثار وهلامور بس مارفض خجل من زياد
بقت يمنة
سوالفها تخبل ماما متونسة عليها
من تسمعني اتجادل وية ماما عللبس تكعد تغنيلي
رشاد لبر اكعد راحة
رشاد لبر اكعد راحة
تحب لخضرة ماما متلحك عليها تحط لطاسة يمها تشيلها فارغة
بابا يتبرك بيها
تعودنا عليها ودنة ماتروح
قيصر ماراح من بالي
اروح لبيت جوارينة يومية واتصل منهم على اهلة اطلب انعام ماينطوها الي اطلب غضنفر يكلولي طالع تعبت حييل
يوم ثالث بقيت قلقة بليل كلت لازم انفذ وصيتة واتصل بلرقم واطلب لاسم لكالي علي
اتصلت رد علية شخص
طلبت عبد لواحد
نطا الي
سلمت وكتلة
اني يمي امانة من قيصر
ياقيصر
قيصر خليل
رد علية بصوت هامس
بس قيصر.....................................
انعام
وكعت لسماعة من ايدة
ايدة لزمت كلبة ووملامح وجها تكرمشت
وكعد بلكاع
ركضن علي
وبيبي شكرية تريد تكوم ماتكدر
من مكانها وتصرخ
حجي ويلاد خليل بيهم شي
حجي جاوبنييي
صوت نعناهة تنتر بيها
دسكتي خل نشوف لزلمة شمالة كل همج احفادج
جا ويلادنا مو هم طالعين
دموعها تنزل وتهمسلي
لو واحد من ويلاد جليل بي شي لحجي مايتخربط دومة يكول يستاهلون من اديهم
بس لخبر لسمعة بلتلفون علم يو عن غضنفر يو عن قيصر
وماكذبت تنبؤاتها
وهوة بلنوبة لقلبية وتفوهت شفافة بحسرة والم وهوة يهمس بغصة بوية قويصر تريد تروح مني مثل ماراح ابوك وتكسر ضهرييييي
علة صراخ بيبي شكرية وتلطم على وجها وتخرمش
ولك خليل تعال شوف ويلادك الهم يوم يموتوني
نعناعة تفرك بصدرة وتنتر بيها
كلشي مايصير بيهم بسبع رواح
صعدو لسيارة فدعم وجليل وصميدع
بقت بيبي شكرية بين تتلوة من لألم وبين تتحسر عليهم وتندعي يكون بخير
بقينة نلوب عليهم
الى ان دك لتلفون ضهرية ردت حدهن
بشماتة تكل لبيبي جدي مابي شي بس قويصر مدري شمسوي من عملة ومصوب طلقتين بصدرة وبرجلة وحالتة خطرة مسويلة عملية وبعدة ماصاحي بلأنعاش
صراخ بيبي شكرية وزوري وام فدعم
وتكابلن يتصارخن ويلطمن
يمة لفرخ يمة
ولك قويصر تريد تلحك امك وابوك وتخليني
ولكم جدة جاانة المن عايشة
انة عايشة الكم بهلدنية مالي حصة
انتم حصتي وربحي
ونعناعة وحدهن ينترن عليهن
خاب دسكتن تفاولن عليهم
كلشي مابيهم هسة يجوج يكمزون بسبع رواح لاتخافين
وبهمس ترفع اديها للسمة وتكلة
ربي كون يردون بخير ويفكسون عين عكرب الرمل
هيج ويطبون علية بطولهم ليشبه طول خليل
ربي ابو طويلة طالبتة منك يردلي سالم وانة علي نذر اذبح واحنيهم من دم لذبيحة ثنينهم
ربي لاتشمت عكرب لرمل بية
عيني على بسعاد من نزلت مخروعة وتبجي
تقربت الي وكالت
حلمت ببلقيس حلم موحلو
حطت راسها بحضني
شحلمتي
حلمت جن اني صاعدة بهذا المثل لبلم وبنص لبحر وهية غركانة وامد الها ايدي وماالوحها
وبقيت احاول اسحبها ومااكدر
وهية تغط تغرك وترجع تقاوم لمي وتطلع
الى ان غطت وبعد ماطلعت
خير ان شاء الله لتخافين لمي بلحلم خير
بس هي غركت
ان شاء الله مابيها شي
تقربت لزوري تهمس الها
فدوة زوري ماطول محد من لزلم موجود
وملتهيات
خلي اتصل بأهلي
وترد عليها خاب صكَد جذب عرب وين وطمبور وين
وتفر بايدها
هوة اني شكلت هسة شبيهم ذولة
مابيهم سكتي مووكتها
انتي بوكت لمصايب تطلع سوالفج
خوش خوش سكتت
شوية ودخلو ولد جليل صيهود ماوياهم
ركضت عليهم نعناعة ونسوانهم يسألن
نفس لكلام كالولهن خوالنة طابيلهم حرامية وفزعنا
امهم حيل ضربت على صدرها وتسأل خوما بيهم شي خوالكم
واحد يباوع علثاني ويحجون
مابيهم شي
جا صيهود وين
عبود..ها جدة موضل يمهم
شعدة ضل
عبود.. خاف يصير شي يفزع وي لولد
ها جا خوش
شوية ودك لتلفون
رد عبود وعينة علية وكال تعاي هاي وحدة تكول صاحبتج
ونعناعة تهمس بغل
شني ذني لصاحبات لفجأة طلعن ومنين يعرفن رقمنة
قبل مااوصل الة سحبت لسماعة من عندة ونترت
ماهي انعام نايمة وسدتة حييل
لييش
اني هنا موفصلية حتة تتحكمين بية
اني ضيفة وباقية برضاتي هلمرة محد جبرني
اي عود من تمشين لهلج خابري صاحباتج هنا ماعدنة بدالة احنة
بقيت استشيط
واخمن
ياترى منو الي اتصل بية
كلامها صح ماكومن صديقاتي وحدة تعرف رقمهم
معقولة زوجة اخو محمد
شنو محمد ستوة ذكرني
كومة صارلة لا اتصل ولا فكر يعرف شبية
وحتة لولد لعساس يجي ياخذني كلشي بعد مادريت عنة
بقيت بقلق وافكر
لليل وقيصر ماصحة علأجهزة
وبيبي شكرية تلوج حتة لماي من تشربة يأذيها
لحد ثاني يوم بليل وهوة ماصحة
مخبوصين بي جدة وغضنفر وعمة إسماعيل ورحيل وفدعم وصميدع
اما جليل وولدة كاعدين بلبيت عادي ياكلون ويمارسون حياتهم طبيعي
صيهود مابين ومرتة كلسا تسألهم علي
يكلولها ضل يم خوالنة يحرس وية لويلاد
اني وزوري نبات يم بيبي شكرية
اليل كلة متنام
تكلي اقريلي قرعان وتردد وياي
يوم ثالث يلله رجع غضنفر وشفنا
كلهم يجون يبدلون ويسبحون بس هوة ابد مااجة
جنت كاعدة بلصالة اصلي وبيبي شكرية ممددة ولازمة بطنها كبالي
دخل
جان متعوب ومهموم
سلم وتقرب الها
خلة راسة بحضنها وماعرف شيهمس الها
لميت سجادتي ورحت للمطبخ اسويلها ريوك
شوية ولحكتني زوري
اسمعة تسأل بي
يمة ياهو لصوبة ووين جان ليلتها
ويرد عليها بصوت ناصي ميريد احد يسمع
لكيتة قريب لبزل من جهة لكصبة
ياااع شودا كل هاي لمسافة
انة ادري
وانت شمدريك مكانة
سألت صحبانة
ياصحبان ذول
متعرفيهم
وصحبانة شمدريهم بي هناك
يعرفون هوة ميضم عليهم شي
وشعدة راح
جدة اريد ارتاح دخيلج والله مانايم
نام يمة نام
بس كلي شلونها صحتة
مايندرى
ماينطون نشد لدكاترة يكولون تانو بلكي يصحا
اسمها تضرب على وجها وتكلة
سودة بوشي جدة قويصر
ثلث تيام ماشايفة وجهك لحلو
خايب يمة ابو طويلة عيني بلاماتشوف طولك شلي بيها
عيني تختلس لنضر الهم
جان نايم بحضنها بمثل نومتة لمعتادة ايدة على عيونة ولثانية على صدرة ورجلي متعاكبات
نفسة عالي صدرة يصعد وينزل
اعاين على حدهن طلعت من غرفتها لتفتت الهم وجههم صوب لمطبخ مو عليها
تمشت لغرفة غضنفر
دكت لباب علكيف ودخلت
بقيت اباوع للغرفة
طولت يلله طلعت
ورة ماطلعت بدقايق طلعت وراها سللّامة شافتة اجت تركض علي
شلونك
كوم كوم بغرفتك رتاح
يضرب بخفة على رجلين بيبي شكرية ويكللها هنا راحتي
ليش نايم بلكاع
مالج غرض انتي شني مسؤلة عني
خل اسويلك لكمة
بساع نهضت روحها واجتنة تتخاطف
دفعتني بجسمها من لطباخ
ووكفت تسوي اكل
زوري تعاين الها وتهز ايدها وتهمسلي
شفنة لفصلية مكسورة عين
شو هاي ماخذتنا بحيل صدر ليكول الها سنين عدنا
اني ابتسم مارديت
رجعت تقربت وتكلي
هذن لمسمومات يحشن بيها
يردن يخلن غضنفر يعشكها ويشيل عينة عنج
خزرتها وتلفتت بنكران جاوبتها
وشنو يشيل عينة عني ليش احنة شكو بينا
علينا خاب انتو واحد افضح من لثاني
زوري عيب هذا لكلام
اني هنا خطار وماعندي كلشي ويا ولاهوة عندة وياي شي وان دار بينا حديث دائما نحجي عن سفري والح علي بهلشي
اي اي
اعاين الها صح تشتغل بس اذانها يمنا
وتتعمد تتقرب النة بحجة تاخذ من لكاونتر شي
اخر شي شمرت لخاشوكة من ايدها ونترت بزوري
شني تتهامسن يمي
عدجن اسرار روحن بحجرتجن وسون اتفاقاتجن عيب عليجن
ولو لعجايز ماعليهن عتب هية هاي سوالفهن
بقيت اضحك
بس زوري تخبلت
ولج منو هنة لعجايز
والله خية لبعبة صخلة تمعمع
تقربت الها ودفعت زوري الي تريد تاكلها اعرفها تقصدني لأن الي فهمتة هية بكد زوري
رغم مااحب افتعل مشاكل بس ماعرف بوقتها ليش جنت مستعدة ادخل وياها بشجار
عيب هذا لكلام انتي منو يمج احنة دنسولف
شبيج من يمج حتركتي وغرتي
يااااع وعلى شني اغار
اغار من لعجايز شمالني
خاب غير لو بيجن شي ينغار منة
ونوب رافعة خشمها لعجيز على شني علشوك علعاكَول
احترمي نفسج ياقليلة لأدب اذا مغيرانة شبيج محتركة من لبوري اخذت قطرات مي وذبيت عليها
اهدي راح تفحمين
ذبيت عليها مي لو هية تخبلت
حيل جرت لكلاص وترستة ماي
دريت بيها راح تذبة علية بساع مشيت
بعدني بداية خطواتي بلصالة وذبتة علية
ضهري نكع
وكفت بمكاني مجفولة وهمة كبالي وملابسي ناكعة
شفتة من طفر على حيلة وتقرب
اول بداية عبالة زوري تتشاقة وياي
جانت بداية شهر لثاني بحيث من برودة لماي دمعة عيوني
تقرب عاط بزوري
اشرتلة عليها
انة مالي غرض هاي مرتك نكعتها
ماعرف شنو لخلاني اتجاهل برودة ملابسي الي ينكطن ماي وجسمي ليرتجف
واندار واتقرب واني اشوفة
حصرها بين جسمة ولحايط
عاض شفافة لجوة بأسنانة وقبضة ايدة يم وجهها ويهمس الها
ولج انتي شني مفلحمة علزواج كلنة ميخالف
ماخذة لبيت طول عرض جنج وحدة من عدنا واحنة بينة دم وكتل ومكاتل هم كلنة ميخالف
بس مال تتجاوزين على ضيفنا
اخليج تلحكين اخوج تونسي بلمستشفى وحق هاي لشدة لآنة بيهااااااااااا
وخر عنها وبعدها لازكة وية لحايط
زوري تضحك وتتشفة بيها
فات من يمي وهمس غيري ثيابج بساع
من مشيت صاحت علية زوري
يااااع
شبيج شكو
تقربت الي
خايبة لداخليات مبينات
لزمت لثوب بيدي
جان لازك على جسمي ولأن مرطوب صاير مثل لشفاف
بساع طبيت للغرفة نزعتة ولبست غيرة
لاحضت انو من جدهم ماموجود كلهن يتاخرن بلكعدة بس بيبي شكرية وزوري وام فدعم يكعدن وية لأذان
عدن يومين قيصر ماصحة واشوفهم مخبوصين بي
محمد على بالي ماعرف ليش
وخايفة حيل خايفة الي متورط وياهم قيصر يرجعون يدكَوهم مثل ذيج لمرة
اريد اطلع منا
متت ماكو امان
ماعرف شلون لزمت لتلفون بليل وخابرت عليهم
رد علية صوت رجال جبير
عرفتة ابو
خفت اكلة اسمي
نطيتة غير اسم
شوية وجاوبني محمد مبين جان نايم
همس محمد اني انعام
انعاااااام
وينج
شكد اخابر ولج مابطلت كل سبوع اخابر وماحصلج مرة يكلولي نايمة مرة يكلولي طالعة
كليلي شلونج
زينة زينة
صاحبي لدزيتة الج بيومها خابرني مرعوب
كال ماوصلت للمكان الي تفقنا علي من بعيد سمعت صوت رمي ومناوش
خليت ورجعت
خلاني بقلق فضيع عليج
محمد مااكدر اطول
اطلب منك طلب
قبل متطلبين اني متاني لفرصة حتة احصلج
اني اريد اجيج انعام
اني اريدج وداعة امي ماطلعتي من نفسي
هلمرة اجيج برجلية
ولوبنص لرمي اطبلج واطلعج من هلناس
ماعرف شنو ارد دموعي تنزل
ها انعام احجي
استاذن من جدهم وارجعلك خبر ونتفق
سديتة
طبيت للغرفة بقيت افكر وابجي
حاولت مااستمع لكلبي ابد رغم كل ندائاتة
تانيت لصبح
وقبل ميطلع جدهم ستاذنت منة
بتسم وكال
بوية انة ماراضي على ضلتج وانتي تدرين
موعجز منج لا حشا
بس خايف تنضرين ووجهي اسود وية اهلج
اذا هذا لزلمة ثقة ويكدر يوصلج وعلي لاعتماد توكلي بوية
هلتشوفينة متدودهين بقيصر وغضنفر مايلحك يحك راسة
مكابة وكاعد حتة لزاد كاطعة
تانيتة راح
وبساع دكيت على محمد قبل ميطلعون من غرفهم
جنت مطمأنة من اتصل لأن غضنفر ميتواجد بلبيت ولا يجي
حجيتلة
كال باجر يمج
ماعرف شلون مر علية ليوم
بس الي اتذكرة مادخل زردومي لكمة
وحتة لماي جنت اغص بي
تمنيت اشوفة واشوف كشمش
هاي جانت امنيتي قبل مااطلع من هلمكان
تمنيت احضن كشمش بكل قوتي
وتمنيت اشوف وجها
جان اصعب قرار اتخذتة بحياتي
ماعرف اذا صح او غلط بس الي ادري بي نغزة كلبي مافاركتني لحضة
مانمت ليلتها
بليل كلسا ابوس بيبي شكرية وارجع ابوس زوري
فجرية طلعت من غرفتي
صليت وندعيت
كعدت بيبي وزوري
يعايننلي ثنينهن ولدمعة تلمع
طلعت لاكيت جدهم
هابوية راح تمشين
اي جدو بل٥ صميدع ياخذني للشارع لعام هناك ننتضرة
بتسم وتقرب الي
وحييل حضني
من وخر عني باوع بوجهي وكال
انة هسة اكدر انام مرتاح
عذرينة بوية ماشفتي راحة يمنا
لاجدو انتو عذروني طبتي الكم طبة فكر وشؤم
لا بوية حشة حفيدة محمد انتي
احنة معلمين هاي حياتنة
بس انة جنت خايف عليج لامانة صعبة وحملي ثكيل جان بس قويصر وغضنفر تعبوني كل واحد الة راي
واحنة نحجي دخل
طبتة جانت لحمل الي افقدني توازني
صبح بصوت متعوب
جان حالة مثل جدار متهالك بس يأبى لسقوط
ومر من يمي
بس مامر بسهولة احس كأن ترك ندوب بية
تجاهلت كلشي
لحسرة الي نجرت من مر من يمي
رجلي لخففت مشي
مشيتة لمحنية عكس اول
بس لنضرات ماكدرت اتجاهلهن جانن مثل رصاصة ثقبتني وغادرت جسدي وتركت بية نقش
ماعرف اذا جان عندة علم او لاء
نزل صميدع صبح وغسل
وهمس الي جاهزة
ماعندي شي
لوداع جان اصعب شي
ماجنت احضنهم
جنت اموت بين احضانهم
مو سهلة ولاهينة علية
بس الله يشهد ستنفذت كل طاقة بية وخوفي جان من روحي لتسحبني للهاوية كل يوم
مشينة
وعيوني الف مرة ندارت الهم
امشي خطوة وارجع خطوتين
بقن بلباب واكفات ويلوحن الي
بسعاد الي نضراتها كأن تكلي بعد ماعندي سند كشمش راحت وانتي رحتي
دمرتني
وصلنة للشارع لعام
ماعندي طاقة اوكف
كعدت بلكاع
وصميدع واكف
بقينة اكثر من ربع ساعة
صوت هورن
فزيت
كمت على حيلي
سيارة طبكت شوية بعيد وسيارة تتقرب
عاينت
غضنفر،يتوجه النا بسرعة
فركت عيوني عبالي من لنعاس تراوالي
اباوع محمد طبك يمنة بتسامة شاكة وجها وسلم
تقرب الي
حيل من ايدي سحبني واخذني بضهر لسيارة
شني انة اخر من يعلم
واني وين شفتك حتة اكلك
امشي وياي مترحيين
سحبت ايدي حيل منة
هلمرة لو اعرف اموت ماارجع
اروح
مترحين انعام
ليش لييييش
شمعرفنة هذا لولد شني ماشني شمدرينا شنو ممكن يسوي بيج
مترحين جدامي للبيت
اعاين على صميدع يسولف وية محمد
خفت لامحمد ينزل وتصير سالفة
عضنفر هلمرة ليش متخليني اروح
انت موكتلي اوديج اني شفتك مشغول وموحمل هلشي كلت اخفف عليكم
انعام انة ماشاكيلج ولا متعاجز منج
امشي وياي لتعلين حسي مترحين كلت
ليش ليش غير اعرف لييييش
لأن ....يتبع
اعتذر عن لتأخير لبارت مؤلم ومليان احداث تعبني موشلون مجان
طول ذيج لمدة ابدا ماطالبتكم بتفاعل لأن جانت لقصة بعدها ببدايتها بس هسة لا اريد تفاعل قوي
دااضغط على نفسي رغم ماعندي طاقة بس ماعوفكم تنتضرون
شوفوني تفاعل قوي ويفرح يلله
وتابعو اسو لوردة تصاميمها حلوة
@AsooHadi
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!