#خنجر_لغضنفر
#البارت_التاسع_٩
#حنين_حاتم
صديت على غرفتة طلعت من لغرفة بنية شكلها غريب ماشايفتة عدهم
صوت بسعاد يهمس الي
هاي لبنية نطوهميا ...
نخرس صوتها بكرصة بيبي شكرية وتقربت الي حيل سحبتني الها وتبوس وتشم بكل قوتها
وراها كلهن صارن يبوسني ويسلمن
وجوه فرحانة بجيتي ووجوه بيها فرحة شماتة وتشفي
عيني على لبنية
مابادرت احد بلسلام
بس اريدهن يوخرن واتفحص ملامحها
شوفتها كانت طريق يمهد لخيبة وكسرة جديدة
جانت زغيرة وحلوة بيضة حمرة ملامحها ملائكية ولبرائة تتجلى بوجها ونضراتها
تقربت الي تريد تسلم
اديها الي نفتحنت حتة يحتضنني
كانن الموت الي حضني
وترك الكلمات تخرج من شفاهي مثل رماد يتطاير منبعث من لنار لكانت تحرق جوفي ...
صوتة من وراي يهمس
ياهلا
نداريت الة
كانت اشرس مواجهة خاضها قلبي
بهللحضات قلبي تصالح تماما مع عقلي مع انكساراتي مع خيباتي
هذي لدقائق لجان بيها كبالي صامت جانت تسحقني مثل مايسحق الرحى لحنطة
عيوني وحواسي وكلشي بية ينتضر منة احرف ممكن تحييني او تميتني.
تقرب الي
بهدوء طلعت لكلمات منة
شلونج
ردي الة كان كلمات جانت تستحوذ على وعيي بلكامل
"هاي منو"
نصة
وجر حسرة
عيونة عليها
شفافة بهمس تحركت
"هاية الحسبة الماجانت على لبال"
عيوني نزلت للكاع ووياها دموع تناثرت على ارض هذا لبيت الي كل يوم احس جذوري تنبت بي اكثر
مشيت للغرفة وجنطتي على صدري
ايدة سحبت ايدي
عيونهن علية
صوتة يهمس
وين بعدني جاي احجي وياج
نعيمة عليش هلدموع
افتهمي بلأول
بلعت لغصة وبصوت احاول ماخليهن يسمعنة رديت
ماكو شي ممكن يرمم لخراب الي بداخلي
لا ماابجي على شنو ايجي
مشيت للغرفة بخطوات غير متزنة
صوت مهامسهن بأذاني
وصوت حدهن بفحيح يختبر اعصابي تهمس لنعناعة
جدة شني كلمن عدوة كبال عينة
لاتخليني اخذ لفروخ واطلع لبيت اهلي
وصوت نعناعة يرد عليها
يمة شني تاخذين لفروخ انة وين اكدر على فراكهم ماكافي فراك حنون
جا انتم بكفيكم انة بحجرتي ماطولها هنا
صوت زوجها ينتر بيها
مالج غرض بلبت ماسوتلج شي
تضل ضيفة ماطول جدي فتحلها دارنا
دخلت للغرفة بس ماسديت لباب
بقيت كاعدة علقريولة وصوت السبرنك جواي يختبر صبري
دنكت اتحسسة
لفراش لعلي جان ناصي مونفسة لجنت انام علي
جان عالي ومريح
دخلت بسعاد تتلفت
بساع تقربت الي
تسألني وين جنتي
عوفي هلسالفة ونطيني للفراش لجان هنا اريد اتمدد حيلي بايد
لفراش موهنا
وين
وخرتة اني وزوري شالتة
ليش
لأن هاي لبنية لجابوها ..
سكتت من شافت لبنية دخلت
عيني عليها
تبتسم
وتقربت الي وكالت
خالة شني ماعدج فروخ شو بطرك روحج اجيتي
اني ممتزوجة
ياااااااع وانة هلكوول
شسمج انتي
بتسمت وبينن اسنانها للمتراكبات على بعض من لمقدمة رغم ذلك ابتسامتها بريئة وحلوة
"انة اسمي سلامة"
وانتي
انعام
انتي شني معلمة
مدرسة
شني غير تدرسين
اي
يعني معلمة
بقت تحقق وياي واني راسي احس ناقوس يدك بي
اذاني برة
بقيت استمع الهم
من خلال كلامهن فهمت صارلهم اكثر من ١٥ يوم من راجعين للبيت
واني لمنسية الي محد فكر يسأل عني
بداخلي خنكة وبكائي كان يثأر لكرامتي
ليش ختنكت من شفتها
اني لامرتة ولاجان بينا عشم ولا كلمة
مالي حق
ابد ماالي
صوتة برة يصيح على قيصر
بقت اذاني يمهم
اسمع صوت جدهم
سأل عني كلولة بلغرفة
صوتة يهمس لغضنفر وقيصر لكاعد بلأستقبال
بوية بعد لبت شني ضلتها عدنا
احنة لبينا كافينا لو صاير بيها شي بيوم لدكَونة شتسوالنة
واحنة لدكَينا صدر
ابوها مامرتاح هاي ثالث مرة يجيني بلمنام
ودو لبت لأهلها وخلونا بسالفتنا
صوت غضنفر يرد علي
جدي عبرة صوب اهلها ترة صعبة مو مثل اول ومحمدنا نلزم انت تدري بعد
ولحوالي كلهم لعين عليهم مانكدر نجازف
غضنفر شني ماكو غير محمدنا
بوية سالفة طلعتها منا خلوها علي اذا متدبروها
بس عيشة اهلها ترة كلش صعبة
مخيمات بنص لصحراء
لخدمات ذلة ولأمن لمسؤل عن لمخيم شغلهم كلة رشاوي لماعدة مهنة هناك بلضيم وهنة نسوان
بوية انت شلك غرض
لقاضي راضي
ومنو كالك راضي
من سمعت هلجملة نهضت على حيلي وطلعت برة
جانن بلمطبخ كلهن ناس تسولف وناس تشتغل
عينة صدت علية ورجع ندار على جدة
تقربت الة للدرجة الي ممكن تخلي يسمع صوت انهياراتي من الداخل وهمست
اني راضية
وبتساؤل ودهشة حجا
راضية؟؟؟
اي
يجرالج بحيل الله
بس صبرج علية
صبرررج
صبري على شنو
على ضرفي لماكادر اتقبلة ولاكادر اطلع منة
وبصوت يثأر لكلبي الي نذبح
حبيتة
اي يمكن
ماادري
بس كل لأعرفة احساسي من شفتها كأن هسة تيتمت من جديد
" اني مالي دخل بضرفك متكدر تطلعني خلي جدو يتكفل بلموضوع "
"مالج دخل؟؟"
"اي
ليش اني منو
وانت منو
ترة لصفة لوحيدة الي تربطنا
اني ضيفة
غريبة
وانت غريب عني "
مشيت خطوات
صوتة رد علية
ماجان لكلب يستغربكم
لجن لجمات لعزاز هنة لغربنكم
وصوتي يرد علي بغصة
سقطنا معا
في الفراغ المهيب
- حبيبان؟
- كلا ولكنّما
غريبٌ يرد الأسى عن غريب
صوت من داخلي يتصارع وية تناقض مشاعري لأزلي
شنو حبيتة
انسان قاتل
كتل امة وجان ناوي يكتلني
علي ثارات مو ثار
لايخاف على نفسة ولايخاف على اهل بيتة
مستغل سلطة جدة وماخذ خاوة عالعالم
اي اي
قاتل مجرم
اصلا ذولة ناس حياتهم عبارة عن موت
ولقتل شي عدهم طبيييعي
ولثار يمتد لأحفاد احفادهم
اي اي شنو ذولة واعيش بينهم
حبيش هذا ياحب يابطيخ
رجال متزوج
كل محاولاتي بأقناع قلبي كانت ملف ينطوي ويتعنون بلفشل
احجي كره
وعيني غصب تتصيد لفرصة تتفحصة طاب لو بعدة
راسي للسمة
يارب ياررررب
جاي يسحبني للقاع
خلصني من هللعنة
طلعني منا
بقناعتي او عدمها اكتبلي لخلاص منا
لأن نفسي و وضعفي ومشاعري لغلط جاي يسحبني للمجول
صوت خطواتها لبطيئة
دخلت وتقربت كعدت يمي
بأيدها تمسح دموعي وتتلمس خدودي
يمة لتفيفيحة ذبلانة
شمالج نعيمة عودج ذبلان
مابية تعبانة اريد اهلي
تعبانة على اهلج يوو علي
شتقصدين عليمن
تعرفين
كشمش وينها
كشمش خذوها بمكان هاي لبت وبلموت يلله نسدت لسالفة
شنووو
يعني كشمش راحت فصلية
ليش لييييييش ياضلام ششافت من حياتها
وبعدين هية متزوجة قبل شلون
صوتها يهمس الي
محد جبرها يمة
ولعين جانت على زوري عبن بت
بس هية فاجأتهم وكالت خذوني بمجانها
سودة بوشي طلعت بنية وضامة سر مرض رجلها حتة بعد مامات ماترضة بلعيبة علي
هية نقهرت على زوري وكالت خل ياخذوني انة زوري مابيها علضيم انة معلمة
دموعي تنزل
ليش هيج سوت بروحها ليش
خاب هية تكلي جدة انة ببينكم وعايشة فصلية جا شني لجديد
وشلون سمحتو بهيج حكم انتو مو اهل لحق
ياحك يمة غير طلع لفرخ لتهمو ولد جليل مصوب غضنفر ملتحق قبل ماتصير لسالفة بسبوع ولوادم كلها شهدت وجدج هم سأل عنة وتأكد
لعد شلون كالو هوة
انة اندري بفروخ جليل ورطونة وية لوادم وخزونة وركبنا لباطل من براهم
خلو لغضنفر وشة هاكدوتة
ومن حلتها لوادم لكبار بفصلية ماعارض لأن احنة محَوكَين الهم
عبن احنة لعيالة
يايمة صارلنا اكثر من ٢٠ يوم بهلرعب
هناك احنة عد نسبانة وكلوبنا هنا يمهم
مانحلت إلة وكلوبنا خلصانة ورواحنة موشلة من لخوف
يعني بعد مانشوف كشمش
اااخ ياجدة ليلية اندعيلها
كون يطلع لفرخ ادمي
همة موهنا كبالنة منكدر نشوفها حتلو من بعيد
لايمة لوادم لتكفلت بلسالفة كالو يو همة يشيلون يو احنة
لويلاد مارضو وخصوصا قويصر تسودن
فضت همة شالو وراحت كشمشتنا وياهم
زين خل نخابرها
يمة ماترهم
وين صايرة
وماضن يخلوها
وويلادنا هم نارهم موجرة على حنون وجتالة ماميت لساع بلمستشفى بس حالتة خطرة
لغضنفر مصوب منهم ثنين بلغلط غير جتال حنون
زين لحكومة وين
عفية ناحية شكبرها مابيها قسم
بتسمت ودارت وجها
وبهمس تدردم
ياحكومة هاي خاب همة قسم لشرطة دكَو قبل سنتين
وخلوهم يطلعون بطرك روحهم حتة لسلاح شمرو
منو همة
ويلاد جليل وإسماعيل
وشعجب غضنفر ماوياهم عاد هوة بهلأمور سبّاق
يااااع غضنفر مايعيل يمة
ويلاد جليل عالو بيهم وشردوهم خاطر يضلون هنا لاحسيب ولارقيب
غضنفر مارضة عليهم
لجن جدج لم لسالفة ولعب بيهم فلك على عملتهم
اضكر من حركة كلبة صوب صيهود برجلة وخلا ثلث تشهر مايكَدر يكَوم
وهية تحجي صاح عليها لحجي
كامتلة كوة تشوف لبيت وكت لمغربية يضلم
كمت على حيلي اريد اسد لباب وراها
صار بوجهي جان منتجي على باب لمطبخ وحدة من رجلي مرفوعة ولثانية منزلها
جان يدخن عاين الي ودنك
سديت لباب وكعدت
شوية واجن جابن لعشة
كوة جبرت نفسي واكلت
افتقدها بكل نفس اجرة
لباب مردودة
جانت سلامة كاعدة برة وياهم علسفرة
وتحديدا يمة
بس زوري وبسعاد يمي
شوية وصاح صميدع على بسعاد
راحت
عيني تختلس لنضر عليهم
جانت تفلس لحم من لماعون وتخلي كدامة
هوة عينة على جدة يسولف ويا وياكل بهدوء وبطئ
ندار عليها
شافها بتسمت الة ومدري شتكولة
صد على غرفتنا
بساع درت وجهي
نكت ايدة من لأكل وكام
صوتها وصوت بيبي يكللة مااكلت شي
ويرد عليهن شبعان
عينة علينة وكمل
شبعان متزوهر
بقيت مدنكة من دخل للغرفة ويسأل بزوري
كشمش وين جانت تكوي ملابسي
على هاي لجرباية
وتأشرلة على جربايتي
جاب دشداشتة وحط لأوتي وكعد علجرباية يكوي بيها
طفرت من لسفرة بساع غسلت اديها واجت بساع سحبتها من عندة
يااااع موت لكرفني تكوي هدمك جا انة شني هنا
صوتة يهمس الها
عن اللكَافة عاد وهدي لدشداشة انة مايعجبني غير كوي كشمش
ابد والله
خل اكويها وشوف ياكشمش لتلحكني بلكوي
شمرها حيل علجرباية وطلع
سحبت لإوتي بساع ولحكتة
دخلت ورا للغرفة
زوري عينها علية
ماتاكلين
ماريد
ها انتي هم شبعانة
اريد انام
كمت للمغسلة رغم ايدي نضيفة
بس جان لفضول ينهش بخلايا دماغي
مشيت وعيني علغرفة
جان نايم على جربايتة ام نفر
بلصروال ولفانيلة
ايدة على عيونة حاطها ولثانية على بطنة
ورجلي مرفوعات وحدة علثانية
وهية بلكاع تسفط ملابس وتدندن
غسلت ادية وعيني يمهم
تمشيت للغرفة
من شافتني كامت على حيلها وطبكت باب لغرفة
ماجانت سدة باب
جان لخذلان الي اشعرني بلشفقة على نفسي
رجعت للغرفة
كعدت علجرباية وحضنت رجلية لصدري
صافنة باههتة مااعرف شنو لبية
بس احساسي
كأن بداخلي مدينة تضج وتنبض بلحياة وفجأة اصبحت متهرئة خالية من كل مضاهر لحياة
زوري كبالي تعاينلي بشفقة
شالو لسفرة راحت برة وياهن يغسلن مواعين
بقيت بمكاني
ساعة عدت واني على نفس لكعدة
فزيت على صوتة وراي يهمس
انعام
تكدرين تكتبيلي مرسال
ليش انت متعرف تكتب
لا أعرف بس خطي موحلو ومامفهوم
ماشي
ايدة مدها الي بيها قلم وورقة
لزمتهن دفتر احط جواها ماكو
علحايط ثبتتها وعيوني تنتضر منة يمليني لكلام
جان سارح عينة برة لغرفة وهمس كتبي
مسافرين
وبلمعة عيوني صورهم عايفين
عودونة وتالي كالو رايحين ...
...
ناظريني قليلاً
ولا تكثري سوء الظن بي
ناظريني ومن نقاء قلبكِ
ألبسيني حلل التمني
لم أكن يوما امرأ سوء
ولا بين الماجنات
أفقهُ فن التغني
لي قلب يفهمهُ الطير
قبل أن يغني
لي روح تبتهجُ
لها زهراات الياسمين
فتفوح عطراً
وتقترب أكثر مني
ف إقتربي وناظريني
وأحسني الظن بيَّ
حتى أغتسل
من فيض روحكِ
ويزول كل همي
ايدي جانت ترتخي كما يحجي ودموع من عيني تتناثر على فراشي
جر حسرة وعينة برة ماندار للغرفة ابد
مشة
صوتي يهمس
ولرسالة
ندار علية وكال وصلت
بساع مشة بوجها للمطبخ وطلع برة
صوت حدهن تنعة يم عتبة لمطبخ اسمعها
بلباب كاعدة وبأيدها تأشر وتنعة
خايب حنون يمة
ماخلوني حتة اشمنك
خاب يمة يبجري وشيال كبرتي
هيج تعوفني
دمعت عيني على كلامها
وكلبي محتصر شتاقيت لامي بهللحضات لدرجة انو بجيت مثل لجهال
بليلتها مانمت
اتصارع وية فراشي مثل لمسموم
تانيت لفجر
طلعت اتوضة
شفتة جان طالع من غرفتة وبلصالة وية بيبي شكرية يحجي
اسمعها تكلة
جنك تريد تفتح لسالفة من جديد
تردها يردون بتنة وماتنسد بعد
لتفتو الي ثنينهم
هوة مشة للاستقبال وهية تقربت الي
صبحت وتهمسلي
شمالهن عيونج
مابيهن شي
مشيت اتوضة وهية وراي
صوتة يهمس الها
جدة جيبيلي ثيابي وياج
وترد علي بصوت عالي
جا ماتكعد مرتك
انة ماعندي مرة
طلعت من لغرفة تفرك بعيونها
تقربت الة بزعل حجت
جا انة شني
كام على حيلة وكال
خل زوري تسويلي كهوة راسي ماشوف بعيوني
دخلت للغرفة
صليت
وبجيت
ادية تنرفع للسما وتنزل
اريد اعرف شنو اريد حتة اطلبة من ربي ماادري
لميت سجادتي وكعدت علقريولة
صوتها يمة بلمطبخ من حضرتلة لكهوة وتكلة
انة اسويها طيبة ابوي مايحبها غير من ايدي
وانة مو ابوج
يااااع انت ابوي وكل اهلي
ويهمس صبرك يارب مارايدين غيرة
اخذ لفنجان منها وطلع
وصوتها ورا تندعيلة
ونوب لحكتة بركضة
ماعرف شنو تريد منة للباب وصلت ورا
ومن رجعت جانت مبتسمة
ايدها لازمة كصيبتها لطالعة من جوة لشيلة وتلعب بيها
وعدت لأيام يوم يجر يوم
كل يوم اسمع جدة يسألة عن سالفة سفري
ويطلع بحجة
شهرين مرن واني بلمرار
ماضكت بيهن راحة ولا عرفت لنوم مثل لبشر
يسالوني شبيج ذبلانة
وارد مابية
ويفضحني لسواد لجوة عيوني
لاكيتة بمرة يم لحمام هذا لمكان لوحيد لنلتقي بي
هوة وبيي شكرية دائما الكاهم قبلي كاعدين
وخرت حتة يعبر
صوت بيبي شكرية من صبحت وكالتلة فدوة لهلوجه
صوتة لهامس يم اذاني يرد عليها
فدوة الج لروح ولديرة وعربها
مشة وتعداني
صوت غصاتي يسألة
شوكت غضنفر
شنهو لشوكت
شوكت تطلعني لأهلي
تاني
شتاني
ماجاوبني
وعدة اسبوع اتجرعت بي لمرار من حدهن ونعناعة ولعيبية الحطن دابهن ودابي
فجرية جان ماطالع تانيت بلصالة
طلع متوجه للحمام
لحكتة
يم لمغسلة وكفت وسألتة
ها غضنفر شصار على سالفتي
تاني
بصوت مخنوك حجيت
شتاني شتانااني
عافني ودخل للحمام
طبيت للغرفة مخنوووكة
على صوت بجيي فزت زوري
بقت تهدي بية
شوية واجت بسعاد
تقربت يم زوري وتحاجيها
اني راح احجي لأنعام
ضربتها على متنها لاء لتحجين ماتأكدنا وعيب ترة ماترهم
لاء موعيب
لازم احجي لانعام لعد بس اني يحجن علية من جنت اطلع من غرفتي
ندارت الي متجاهلة زوري لتحاول تمنعها
وكالت
انعام
ماكو هاي لبنية سلامة
قبل متجين جانت بليل تجي تتخنس وتنام بفراشج ولفجر تكعد من وكت وتروح للمطبخ
شمدريج
اني شفتها مرة
وكلت لزوري وماصدكت بية
عاد اني شسويت
كمت وشلت لفراش لثخين وخليت هذا لخفيف حتة من تنام علي يضل لسبرنك يطلع صوت وتكعد زوري وتشوفها
بس انتي بيومها اجيتي وبقت هية تنام هناك بغرفتها
وهسة انتي ليش دتحجين موعيب
مالج دخل هاي اسرارها هية وزوجها
هااا لعد اني متكولن هيج
كبل كبيتن علية
بسعاد مالج دخل وهذا لكلام لتحجي كدام احد
خوش خوش
طلعت من يمنا ماعاجبها
ومشت لأيام يوم يشبه يوم كلشي ماجان يختلف غير لتاريخ
قيصر بهاي لفترة مختفي بلنهار مالة اي وجود
وبليل ينام بلأستقبال موبغرفتة
طبينة بسنة جديدة
وجان لازم اغير من وضعي
تعبت واني انتضر
تانيتة لضهر طبو هوة وجدة
من مشة لمحت بنطرون من جوة دشداشتة جان يبين بسبب خطواتة لسريعة
دخل للغرفة
تانيتة طلع
وكفت بباب لغرفة
ندار علية من طلع وعاينلي
تقربت الة
غضنفر لشوكت ابقة انتضر
ماضل شي
غير اعرف سبب هلتاخير شنو
تاني هانت
شنو هي لهانت
ماجاوبني وبيدة يأشر ليفوك
بصوت عالي نترت
اني تعبت تعبببت مااكدر اتحمل ولاعندي طاقة خلصت كل طاقتي من طبيت لبيتكم
لوثتوني وكلشي بية خربتو
ذرة لأمان لجانت باقيتلي من يوم مات بابا ضيعتوها
دموعي نزلن غصب عني ولكلمات تطلع مومن عقلي كأن ماجنت اعرف مصدرهن بشهكا حجيت
ماعرف لنوم
ماعرفة من يوم لطبيت وشفت ..
سكتت ماكدرت احجيها
وهسة تكلي تاني
اي شتاني شتاانيييييي
سنيني تخلص
شبابي يمر
عودي يذبل اكثر
صوتها من ورا تنتر بية
يااااع شني تصيحين على رجلي شني انتي ياهي وتعلين حسج علي
وبنتر عاط عليها
يمال لوجع
طبي جووووة مالج غرض
تقرب الي
عينة للحايط ماحطها بعيني
وبهمس ونفسة عالي كال
جنت اتقصى علومهم
ودريت راح يرحلوهم على امريكا ويستقرون
كلت ماتسوة تعبرين للمخيم وهناك بهذلة واول وتالي همة طالعين
وجنت متاني يطلعوهم واسفرج الهم
بس ماطول هيج تعبانة من عدنة
وبعد مابيج
وماطول عشرتنا مرة
يجرالج يلحضيرية
من باجر اشتغل على سالفتج
مشة خطوات وعافني بوسط دهشتي وخجلي من لعيون لتنضر الي بعتب
وكف وبدون ميندار كال
احنة مانجبر بنيادم على عشرتنا
لاتخافين ماتطول حسبة يومين تلاثة تلكين روحج بنص اهلج
نداريت وبساع اتدارة من نضراتهم
وبلغرفة ختلت
ايدي على اذاني حتة مااسمع صوتها
وهية تعد علية وتتجاوز وتصفني بابشع لصفات
ساعة ب١٢ متمددة بفراشي وزوري تشخر
ندكت لباب ودخلت بيبي شكرية
تهمس الي يمة تعاي لية نعيمة
كمت الها اتلمس
لزمت اديها
شبيج بيبي
سحبتني للصالة
حطت بيدي كتاب
شنو هذا
يمة قويصر لساعة ماكو
واخاف اوعيهم واهبطم
تعاي اقريلي قرعان وخل اردد وراج
انة كل مرة من يتأخر يقرالي حنون الله يرحمة
وبس يقرالي جم اية ماحس الة قويصر طاب علية
بيبي خل نكعدهم ماترهم خاف صاير علي شي
حيل سحبتني
لا لا عوفيهم يمة مالج غرض اقريلي قرعان وهاهية
بقيت اقرة وهية تردد وراي شي صح وشي غلط
لتلفون دك
راحت جاوبت
وكالت يمة هاي وحدة تسأل على صيهود
راحت دكت لباب على غرفتة
بقت تدك هواي يلله طلع
اخذ لتلفون وجاوب
ماعرف شنو حجة
بس وجهة نحطف وبساع طبكة وركض على غرف خوانة دك لبيبان ووعاهم
ماعرف شنو يحجي وياهم وعينة علينة
دخلو بدلو وشوية وطلعو
من جوة دشاديشهم جنت اشوف لسلاح
مشو يتلفتون ويوصون ببيبي شكرية ماتكعد جدهم
ويكلولها خوالنة طابيلهم حرامية للبساتين ورايحين نفزع
قتنعت بكلامهم وبقت على نيتها تندعي لخوالهم والهم
بس اني بقيت بقلق وكلسا حسبة
ردت اكعده ماخلتني
ساعة بل٢ وقيصر ماكو
هنا فقدت اعصابها وبطنها نتفخت وكامت كوة تتنفس
كمت دكيت علي لباب
اكثر من دكة يلله طلع
عاينلها بس شاف حالها بساع ركض عليها
صوتهة تهمسلة بخنكة وكوة يطلع
يمة عوفني انة طحيل مايصيبني واطلع شوف اخيك وينة
مارد لساعة
وليش ماحجيتي
لشوكت تطمطميلة وتغطين على شيناتة
لمن يوكع لفاس بلراس
ولك جدة مووكت هلحجي دامش اخوك ميت حي مايندرى
على صوت حجيهم طلع جدهم
تقرب يسأل شكو
رد علي بستعجال
سلامتك جدتي متخربطة وراح اخذها طبابة
اشرلي جيبي عبايتها
ودخل للغرفة
إمتثلت لكلامة وجدهم يراقب
لبست عبايتها وكامت
وبجيب دشداشتة لمحت لمسدس
مشو واني وراهم
طلع هوة لليبرة وهية ندارت من صوب لزرع
كلتلي شوفي دش لحجرتة
طبيت لكيتة ماكو
رجعت طبت لغرفتها
بقيت يمها
ساعة تبجي ساعة تتنخة باهل لبيت
ساعة تكلي قريلي قرعان
طلع لفجر
كعد جدهم
يفزز بلولد ويصيج علبنات يسون ريوك
طلعت من لغرفة سألها شلونج
كواكة
نزل فدعم
بقة كلسا يدك لباب على غرفة غضنفر
طلعت سلامة وكالتلة ماهوة يمكن طالع
بعد ماكدرت بيبي تضم عليهم ومن خوفها عليهم حجت لسالفة
بقة جدهم يصيح ويلوم بيها
يدك لباب على غرف احفادة
تقربت الة وهمست
ماهمة ترة كلهم طلعو من اليل مدري منو اتصل بيهم
بعدة يصيح على نسوانهم يسال بيهن عليهم
ودك لتلفون
جاوب
ملامح وجهة بهتت
شفافة ترتجف
عيوني علي وكلبي يريد يطلع من ضلوعي
طاحت لسماعة من ايدة .....يتبع
مساء لعافية عليكم
عذروني من لتقصير
والله كوة كملتة دعواتكم الي امانة
ردتو صورة مشابهة لغضنفر وهاي همة دزوها الي واسو لحلوة صممتلنا عليها


تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!