#خنجر_لغضنفر
#البارت_الحادي_عشر_١١
#حنين_حاتم
اذهبي ولا تتعمقي بداخلي المضلم
فأنا لست انسان
انا ذلك الشر المطلق
هل لكِ ياسيدتي ان تتخيلي ان للشيطان قدمان وخنجر؟
ستضحكين وتهزئين
ولكن الشيطان لن يأتيك بوجه زغبيّ اسودً بشع
بل يأتي بهيئة كل ماتهواه نفسك
ابحري بأشرعة انسانيتك ومبادئك الفذة بعيدا عني
فأنا لست الشاطئ المناسب لترسى سفينتك عنده
انا لستُ موطناً آمن
أنا اغرق في عبثي كل يوم
حتى بتُ لا اراني
اعيش بطريقة لاتشبهني ابدا
في كل يوم ارمي بنفسي الى الهاوية
من انا والى اي منفى تأخذني احزاني
انا ضجر من ذكرياتي وأناسي
كان جل ذنبي اني ولدت هنا
لم اقترف جريمة بل جرائمهم اقترفتني
اعود من تلك اليالي متعب احمل على كاهلي كونا
كونا لم اخلق للعيش به
اهرب منه كل يوم
وبلاجدوى اعود اليه حاملا حفنة ذكريات كانت موت بلا تشهد
ارحلي فإنت فراشة مسكنها الأبدي زهور فواحة
وانا ارضُ بلا الوان
منطفئ
فمن الجرم ان تدفن روحك الجميلة في مقبرة قلبي
رفرفي بعيدا وارمي بمشاعرك على كاهل عابر سبيل
انفضيني من ذاكرتك كمن ينفض الغبار
رفرفي بعيدا وارحلي
ارحلي ارحلي ....
ام ابقَي
ابقي واغسليني بطهر مبادئك
اغسليني بتلك المبادء التي مذ رأيتها وانا اتألم اكثر من سابق عهدي
ماأنت يامرأءة
بل مرآة
مرآة رأيت فيها كل تلك الثقوب التي تملأ فضاء جسدي
رأيتني فيها قرية فقيرة اجتاحها السيل من اعالي الجبال
ولم يترك منها سوى حطام المنازل وجثث طافية
ابقي ولنلتأم معا
فأنا اعشق ضعفي امام ثباتك
منذ ان ولدت لم تهزني الاعصارات ولا الزلازل
ولكن هزمتي تلك العيون النرجسية الملتهبة
وتمكنت مني
فأصبحت محرابي وزادتني حيرةً وشجون
ستبقين ام سترحلين ؟
انا لا امك مايجعلك تودين الأستمرار معي
قرري ولا تخافي علي
انا شخص لايسقط بل يتخطى
فأعدك اني سأبقى كأثر ثقب رصاصة أو ندبة حرق أو ربما ذكرى كذريات حبسك
المهم انك لم ولن يتسنى لكَِ تجاوزي
فلو غادرتي
سأقضي عمرا احاول ان اجمع شتاتي من بعدك
وإن عجزت
فسأوصي ان يدفن جسدي البالي بتلك الرصعة التي طالما حلمت بتقبيلها
.
.
.
.
كان يقف امامي بتلك الصلابة المخيفة
والأزدواجية والفوضوية المرعبة
جسد متهالك وعينان يحملان تناقض الكون اجمع
لم يكن مجرد انسان
بل كان كل تلك الأشياء التي اهرب منها نهارا فتأتيني ليلا لتنام معي على نفس الوسادة
كان ذلك الكائن الذي يختبئ تحت سريري ينتضر الأضواء تنطفئ لكي يعبث برأسي
انتضر سماعها
ربما لن تثنيني عن قراري
ولكني كنت اتمنى سماعها برغبة لم تعتريني من قبل
اووَّتنطق بها
ام اغادر مع خيباتي
انا لست كأي انثى لكي اكتفي بتلك التلميحات التي تختبئ بوشاح الكرامة
انا اعضم من أن اكون حبا تخاف من البوح به
انا انتضر
وسأنتضر
متى اسمعها لكي ارضي غرور انثى
وعشقا طالما اخفيته
الى ان كسرت ثباتي انثى اخرى
فبقائي هنا يعني موتي
فلست من تقبل بأن تقاسمها بك ولو اشد الأناث قبحاً
سأذهب
وستذبح كلمة احبك
على قبلة الكبرياء ......كتاباتي حنين حاتم
...
-ليش ليييش
_لأن
راسة للسمة نرفع وحسرة طويلة نجرت وصوتة يهمس
_ربي هونها كلهن لتمن علية
دنك وعين علية وعين على محمد الي يندار النة كلسا وصميدع يلهي بلسوالف
_لأن
لأن يابت الحلال ابوج امنة نوصلج لبر لامان
وهذا
اشر على محمد وخنزر
_هذا مو بر امان
درت وجهي ومشيت
وبداخلي صوت يصرخ فات لأوان
لكَلبك ولكَلبي فاااات لأوان
خطوات بعثرتهن بهلأرض رغم بدي توكف الدنيا بهاي اللحضة
قبضة ايدة حييل عصرت معصمني وسحبني دارني الة
_غضنفر خليني اروح بداعة بيبي شكرية
_ ضلي بداعة زادنة وانة اردج مااكدر اخليج ترحين وي هذا انتي امانة
شبدر منة وهيج عجلتي لرحيل اسألج بلله
-مااكدر اتأقلم وعيب يومية مخابرة لولد ومزحمتة
-اني ضلتي هنا مالها كل داعي بعد
لابية على حياتكم ولا يربطني بيكم شي وعلى هلأساس ابقة
صوت صميدع الي تقرب يهمس
خوية ماتكسرين لشر وتضلين بينا بينما تفض سالفتنا ونزتج لأهلج
اكيد هسة ستقرو ونطلعج الهم ونمشي بمعاملتج
صوت غضنفر يهمس الة
اذا ستقرو ليش ماحاولو يتصلون بينة ويبلغونة
روحتج وي هذا الزلمة ماتفرق شي عن ضلتج هنا
بكل لأحوال انتي ماتدرين اهلج وين هسة
اي مكان التمس بي لأمان ارحم من بقائي بوسط هلرعب اني بشر وتكالبت علية لضروف اني بعدني مامستوعبة موت بابا واجتني هلمصايب كفخة ورة كفخة
اهلي لفاركتهم واني بعمري مابتت برة بيتنا
ثاراتكم وحدهن ونعناعة لحطن دابهن ودابي
بغصة همست وزادتها سللامة
صوتة يهمس
لاعبالج نحسبت علي مرة
هذا شي يخصك
توجهت بكلامي لصميدع
- اني غريبة وإن طالت مدة مكوثي
آن لأوان لرحيلي
واني ممنونة على كلشي سويتو الي
واعتذر على كل اذية تسببت بيها الكم
لا خوية على شني تعتذرين
مودعة بلله وتوصلين بلسلامة
مع لسلامة
مشيت خطوات وصوتة يهمس
ديري بالج على نفسج
وسبقني بخطوات تسالم وية محمد
عيني علي كأن يلتهم ايد محمد بقبضة ايدة
وصوتة يهمس الة
ها ابو جاسم كد لأمانة
ويرد علي صوت محمد
كَدها وكَدود
عينة تصد علية مشة من يم جامتي مر وهمس
ضيعتوها عشرتنا يمن ردناكم لكبرتنا
مشت لسيارة
عيوني علجامة
نداريت من كل لأتجاهات مثل لمخبلة
ادية على راسي واضرب حييل
اني شريد شرييييد
محمد ندار الي
_انعام تجين يمي
_خليني هنا مرتاحة
_شلونج ولج شصاير بيج
شمسوين بيج ذولة لوحوش
حتة لون بشرتج تعبان ومتغير
_لتبجين لتبجين خلص بعد مترجعين الهم خلصتي
كان يهدئني
بس ميتصور انو هاي جملتة جانت الصفعة الي وعتني على نفسي وقراري الي مااعرف نتائجة شنو
مشت بينة لسيارة وزادت سرعتها
جنت اتضاهر لنوم اخلص من اسألتة واخلص من وجهي الي موكادرة اسيطر على تعابيرة وبس دموع تنزل
من محطة لمحطة
هاي حياتي
نسلب لامان ونسيت لأستقرار
يومية بمكان
فززتني كلمات محمد اليهمس
انعام راح نوصل
سمعيني اريد احجي وياج
_لبيت لراح نروحلة بيت اختي
تدرين ابوي منعني عنج من يوم وفات ابوج وحبسكم
جيتي وتواصلي وياج وكلشي بلسر عنة
ولو يعرف يسوي لمستحيل حتة يمنعني
حاولت امتثل لطلبة وهوة يطلب مني انساج وبوصي امي تشوفلي بنت لحلال
حقهم اب وام خايفين علية
بس اني مااكدر
هنا تعيشين وهنا تغلغتي بروحي
ورغم حاولت اشيلج من فكري واخدع نفسي واعاشر غيرج
بس صعب ياانعام
جنت مثل لينحت بصخر
بلأخير ستسلمت
جنت مدنكة وماطلع مني حرف ولا اعرف شنو ممكن احجي واني بهلحال وهلحيرة والتناقض
صوتة يهمس
_اني ماخذج لبيت اختي
بينما تهدء لأوضاع وشوية اكدر اقنع لوالد ولوالدة ووراها نعقد ان شاء الله واجيبج لبيتنا عروسة
بس اني اريد اطلع لأهلي محمد منو كلك اريد اتزوج
_تطلعين ان شاء الله بس موقبل متصيرين حلالي
لو طلعتي معناها تضيعين مني
ضعتي مني مرة وماعندي ستعداد اضيعج بعد
محمد اني ماكدر على هيج خطوة بدون ولي امري افهمني ونفسيتي ممستعدة لهيج شي
جر حسرة
جنج ماهاوية انعام وكلي لدتكولي حجج
لصمت كان جوابي لوحيد
ماعندي طاقة
داخلي اهلكة لتفكير
وذيج لكلمات الي تركت سحرها بية
نزلنة
تلكتنا اختة الي فهمت من ترحيبها انو عدها خبر بجيتي ومفهمها كلشي
طبينة جوة
بيت زغير ميتجاوز ل٥٠ متر
استقبال وصالة وغرفة نوم
ومطبخ وصحيات
كلشي بي زغير وملموم
كعدنة بلأستقبال واختة تحجي هواي وفضولية
اني راسي تعبانة وصداع دمرني
اخذها للمطبخ ماعرف شنو يحجون بالي مو يمهم توقعت ديوصيها بية
اجة هوة
وهية راحت علتلفون مدري عليمن اتصلت
ورة ربع ساعة
دخل زوجها
طب سلم
وكعد كبالنة
نضراتة جان بيها نوع من لجرأة
مارتاحيت ابد لنضراتة
ونتابني لخوف من مجرد فكرة بقائي هنا ولبيت زغير وهاي لعيون المقرفة
اعاين على زوجتة بودها تكوم تاكلة
صاحتلة بلمطبخ مدري على شنو دزتة
طلع
شوية واجت
تصفك ايد بأيد وتوجهت لمحمد
_وك عيني محمد شفتة شلون يباوعلها
اني اخلص من لموضفات نوب اجيبلي علة للبيت
لا لا فدوة اخذ لبنية ولتورطني بيها
_متوهمة ام بيداء مولهلدرجة
-لاخوية اني رجلي نسونجي ولبنية مااعرفها شنو ماشنو
بلله لفت علي واخذتة مني
اصفة اني لا ابو علي ولا مسحاتة
اخذها شوف وين توديها اني عذرني خوية مااكدر
صوتي لهامس بحسرة ودموع
محمد اني عندي جوارين هنا راح اروح الهم
جريت جنطتي واريد اطلع وحتة ماعرف وين اروح ولا اندل امشي خطوة هنا
ايدة سحبتني
_وين انعام على بختج من اولها دموع
_اني تعبانة محمد وكلام اختك منطقي هي اعرف بزوجها وحقها لبنية مكالت شي غلط
تقربت الي
_دادة احنة نسوان ونفهم نضرة لرجال
عليج الله نضرتة الج عادية
_لا فعلا نضرتة الي وراها شي
_ها اها شوف بعينك هية لبنية نفسها ممرتاحة الة
خذها ولتورطني فدوة اروحلك كافي علية ضيم كلبي ولموضفات
ايدة تفرك شعرة بحيرة
ام بيداء ليش ماحجيتي من لأول اني عشمي ابقيها يمكم وجبت لبنية وورطتها وهسة هيج تكولين
والله ياخوية ماضنيت هيج تدنة نفسة حتة على لبنية الي داخلتلنا بصفتها خطيبتك
وهم تريد لصراحة ماتصورتها هيج حلوة
ولحل شنو
صوتها يهمس
خوية لحل تعقد عليها كدامة هيج يلله يقتنع ويبطل سوالفة
كمت على حيلي منتفضة
لاء اني ممستعدة لهيج شي ولا يمكن اتخذ هيج قرار بدون علم ماما
كلماتة تقدم مبررات وتهديني
انعام بكل لأحوال لازم اعقد عليج
مترهم ضلتج هنا بدون عقد
مع كل احترامي الج بس بدون عقد تبقين مباحة حتة لخطار ليجي يحط عينة عليج
بس لو عقدنة افكس عيونة اليتجرء بنضرة يمسج
اني مااريد اضغط عليج من حقج يكون هلقرار بعد تفكير ومشاورة اهلج
بس صدكيني من مصلحتج
بقيت رافضة
عافني كال مااضغط عليج ومااعرف شنو همس لاختة بلباب وطلع
هية بقت احسها متضايقة من بقائي واني هم تحسست حيل
هربت من ضيم ولكيت كبالي اضعافة
غربة وخوف وشعور بأنو وجودي حمل جبير على كاهل لبنية متكدر علي بس منحرجة من اخوها
بليل اجة زوجها
من قباحة نضراتة وجرائتهن حسيت نفسي اريد اختل بهدومي
مستقري هوة لأستقبال لان ماعدهم غرفة معزولة غير غرفة نومهم
زوجتة احس اعصابها تلفت
رغم يضحك وياها ويتشاقة بس احس كل فكرة ونضرة يمي
موساعات صارن علية سنين
وعيني علساعة واحسب شوكت يروحون ينامون
رغم ماطالع مني غير جفوف ايدية وقرص وجهي بس احس نضراتة تخترق ملابسي وتتفحص كل شبر بية
ماكو اصعب من هيج شعور
لخوف من انو تنعاد علية ذيج اليالي الي ماطلعت منهن لليوم
ولليوم تراودني كوابيسهن
لليوم انذلح بفراشي ليلية بسبب ذيج الأدين والمسات يمكن بخت بابا وقربة لربة ونيتة همة لجانو يشفعولي
بس ياترى شنو لراح يشفعلي هلمرة
جان اسمراني وعينة جاحضة بحيث حتلو ينضر نضرة طبيعية احسة خازر
شكلة يشبه الممثل المصري محمود المليجي
اذكر بمرة من لمرات شفتلة فيلم جان دورة بي مغتصب
بقت صورة لفيلم تعبث بمخيلتي وتزيد خوفي
ماعرف شوكت ستأذنت منهم وركضت علتلفون اتصل بمحمد
صوتها الي تحجي وتعاين الي بفرحة
ونضراتة الي ماعرف اذا جانت فعلا قبيحة لو خوفي خلاني اشوفها هيج
رد صوت امة
ها يمة ام بيدوئة شلونكم
همست الها
_امج
ركضت اخذتة مني
عيني عليها من تحجي جانت قصيرة سمرة تنطي شبه لمحمد بس هية وجها دائري وبي اثار حبة بغداد شفافها رفيعة وبنيتها دبدوبة
_زينين زينين كلنا
نطيني محمد رايدتا بشغلة
نطتني لسماعة وهمست
_هذا محمد
اا الو
حجيت برجفة تفضح خوفي
_ها نعومة شلونج
خوما اكو شي
_ليش عفتني هنا محمد
_ردتج تشوفين بعينج وتصدكين وردتج تعرفين ماطولج مو بعصمة احد راح تلكين اقرب لناس تطمع بيج
_محمد تعال فدوة اني اخاف انام هنا
صوتة يهمس
_اجي انومج بحضني
-محمد شنو هلكلام
_خل يطلع لصبح واجي اعقد عليج
حتة احميج من كل عين
وبهيج اكدر اضمن وصولج لأهلج بسلامة
وهناك من ترحين ستشيري اهلج ووراها قرري اذا ترديني الحكج واذا لاء
اطلكج
اني مااضغط عليج بس واجبي حمايتج
صوتة يسالني
هاا
_يمعودة غفيتي وينج
_وياك وياك
_هذهو
-اي هذهو
جان يريد يسولف بس اني ترخصت ورحت
شفتهم كامو للغرفة
راحت بيداء جابت فراش الي والها
نمنة
بقت تسولف شوية على مدرستها وصديقاتها ووراها غفت
مانمت
هذي اليلة تحديدا جانت تشبه ليالي الحبس
ومااكثر اشباههن بلياليي
جنت متصورة اصعب حدث صارلي هوة موتة بابا
ماضنيت لدنية راح تبقة تشوتني يومية بملعب
يوم ثاني لصبح اجة من وكت ويا ولد ابن خالتة وشيخ
وعقد علية واختة نزعت حلقتها ولبستها الي
رغم رفضي بس هي الحت وكالت
_مترهم تبقة ايدج فارغة هاي هديتي الج اني عندي غيرها
بقة كاعد يمي
التمست بي فرحة مثل فرحة اطفال
بين وجهة الي يبث لسعادة ووجهي الكئيب الي ملامحة تحتضر
لكل لاحض هلشي
فسروها بحزني لكوني وحيدة واخطو هيج خطوة بدون اهلي
راح محمد وبقت اختة كلسا تتصل بأحد تطلب منهن يجيبن الي ملابس الوان
واجت تقنعني انزع لأسود
رفضت وكلتلها مبقة شي على دورة سنة بابا
عدة سبوع ولثاني اني يمهم
ام بيداء تحب لسوالف تكلي اجيتيني ونس جنت اكابل لحيطان ابو بيداء دوام وبيداء مدرسة
ماانكر ابو بيداء تغيرت نضراتة ومالة شغل بية ابد
بس شعور لخوف ولغربة ملازمني
كل يوم انحط بوسط ناس وانجبر اتعايش وياهم
صعب لتعود صعب
وخصوصا علية
ماما جانت تكول عني نحسة متنطين من نفسج مغرورة
بس بابا جان يكللها انعام تشبهني
تنتقي لناس وفق معايير
ومتفتح كلبها لأي احد
جان يكول عني خجولة
ماعرف اذا فعلا جنت نحسة أو خجولة مثل ميكول بابا
بس الي اعرفة اني اكره لأختلاط بكثرة
اميل للاجواء العائلية
مااحب كثرة لصداقات ولعلاقات
بيتوتية
هادئة وقليلة كلام
دائما كلامي يكون عبارة عن جملة تختصر هواي
اطبق حكمة خير لكلام ماقل ودل
بعيدة كل لبعد عن جلسات النساء والنفاق والاتكيت والتعامل بطبقية ومنطقية
احب لبساطة
واكره الناس اليتعاملون بمثالية
واقعية بتفكيري وقرارتي وواقعيتي خلتني امام هواي قرارات صعبة منافية لرغبات قلبي
ومن ضمنها طلعتي من يمهم
من زمان كان مقياسي لوحيد لصحة لقرارات من عدها هي اشارة وحدة
لمن احس كلبي رافض لقرار ومخنوكة بسببة اكون متأكدة انو هذا لقرار صح
اي قرار من اتخذة احس نغزة بكلبي ورجفة جسمي وضعف
اكول هذه لعلامات الي تدل على صحة قراري
ومضيت بهذا المبدأ الي مااعرف وين راح يوصلني
كل يوم اندعي ميطول بقائي هنا
ماانكر مرتاحة ماكو سلاح وخوف وعلى ساعة ينشال لبيت بينا وينركع ماكو ناس واكفتلي علكلمة وينتضرون اللحضة لمناسبة حتة يفترسون
بس لحضات وداعهم تعذبني يومية
اخر صورة اخر كلام اخر نضرة كلشي طبع ببالي
وكلماتة الي همسهن وهوة يتجاوزني بكل ثبات القن بسحرهن علية احس بقت هلجملة عالقة بمسمعي مااسمع غيرها
كاعدين عصرية نلف دولمة اني وام بيداء جانت تريد تروح لأهلها وخايفة ابقة وحدي وبنفس لوقت مااكدر اكون انانية
بيداء كبالنا تدرس
وابو بيداء طالع
دك لتلفون
كامت وهية تمسح اديها
لزمت لسماعة وتحجي
عينها توجهت الية
نضرة عينها توسعت وبتسامة شكت وجها
كمت على حيلي
اتقرب الها وهية تضحك وتكول اي اي احنا
اي هياتها يمي
تقربت الها وهمست
منو ام بيداء حيلي طاح
بضحك همست
هاي امج.
صوتي ليهمس الها بشهكة تجمع بيها كل مرار ذقتا بغيابهم
ماما هاي انتي
انتي بخير ماما
اي يبعد امج ونضرها لضعف من لبجي عليج
احنة بخير
انتي شلونج
بس صوت بجيي وشهكاتي ليجاوبها
تعبت ماما
تبهذلت ونذليت
عفتوني لوحدي
بوسط لموت
طلعت من لموت طبيت بموت
اريدكم ماما
مدااكدر بدونكم
تعبت والله تعبببت
موحمل كل هذا
بابا عافني وانتو عفتوني
على عيني عفتج والله يبعد امج
جافتني لعافية من يوم فراكج
ليش هين علية
شوفة عينج قشمروني وخلوني اعوفج
ماضنيت هيج يجلبون بيج
بس همزين طلعتي منهم
هانت احنة طلعنة وهسة خالج ديشتغل على معاملتج وان شاء الله نسحبج
الف لحمد لله اهم شي انتو مرتاحين
بس منيلج رقم بيت ام بيداء
اتصلنة ببيت لحجي ابو خليل وكالولي محمد ماخذج ونطونا رقم اهلة
دكيت عليهم وطلبت احجي ويا
وهوة نطاني رقم اختة وكالي عاقد عليج
زين سويتو احسن متبقين مطمع للكل
شوكت اجي يمكم
مبقة شي ان شاء الله
انغام شلونها
هاي يمي تتكمز تريد تحاجيج
جرت لسماعة من ايدها
وصوتها لباكي تحاجيني
انعام مشتاقتلج ولج والله مدااصدك راح تجين يمنا وننجمع
هنا رجعت للمدرسة
مدارسهم تخبل
شوارعهم تجنن
صوتها يرد بدموع بس مو احلة من كربلاء
كعدنا بشقة تخبل
بس ناقصها انتي وبابا
وراها ماكدرت تكمل
هية تبجي واني ابجي
صوت ماما يحاجيني
_بنيتي لقوية لبطلة
الي ماخذة كل صفاة ابوها
هانت ياماما لتبجين
راح تجينة بأسرع وقت ونرجع نلتم
هنا خالاتج وخوالج
عماتج هم مسافة عنة
هنا غربة وطن بس كلنا ملمومين
لعراق صار جحيم علينا
وخسرنا كلشي بي
_هنا فرفحت روح بابا وهمة يحرقو بلتيزاب
هنا اجمل ذكرياتنا
صوت بكائي يرد على بكائها
اخذت مني لتلفون ام بيداء
وبقت تسلم عليها وتحجي وياها
محور كلامها جان محمد وجانت تجس نبض امي بقبولها بي كنسيب او لاء
صوت ماما الي يتشكر منها خلاها تطمأن اكثر
سدتة وهية تحضني وتكلي
-كرت عينج بسماع صوتهم
وان شاء الله يلتم شملكم وتطلعين الهم
بس ها كون ماتنسين محمد
بتسمت ماعرف شنو اجاوبها
كرصت خدودي وتهمس
-فدوة للمستحية
لليل اجة محمد
وجهة مو على بعضة وحسيت علي ضايج
بقة تعلل يمنة وبل٩ راح
بلباب واكفين كل احنة وهوة يلبس بحذائة
بنضرات توجه الهم فهمت بأن يريدهم يطبون
لزم ايدي
ماعرف ليش جان بدي اسحبها بكل قوتي
بقة لازمها ويهمس
-انعام
راح ترحين
_اي
-وعلاقتنا
-انت كتلي اطلع وافكر هناك واستشير اهلي وارجعلك لخبر
_صحيح بس اني ماضنيت تحتاجين تفكير
من زمان اني ناوي اخطبخ وجنتي قابلة شنو تغير هسة ليش محتاجة تفكير واحسج مترددة
سؤالة كأن يعبث بنكراني لمشاعري وكلشي
شنو اجاوب واني نفسي مااعرف ليش
موطلعت من يمهم
موختاريت لبعد واماني وراحتي
موختاريت لقرار الي كنت متأكدة صح
ليش موكادرة اتقدم تجاه محمد
وشنو انتضر
صوتي يهمس الة بشفقة على حالة وخوفة لواضح على ملامحة
_اطمأن محمد اذا جنة مقسومين واحد للثاني اكيد راح ننجمع
بتسم
صوتة يهمس وهوة يبلع ريكة
-يااارب
سديت لباب ورا ودخلت جوة
وعدة فترة امي تتواصل وياي وخالاتي وبناتهن
انتضر لاجرائات
بعد مدة اتصلت ماما وهي تبشرني بتمام معاملتي
وتطلب مني اسافر لعمان بأسرع وقت
فرحتي بيومها ماتنوصف
بس جانت اكو غصة
على كلشي على ذكريات حصدتها بينهم بوسط لموت والمصير لمجهول
ماتصورت لوداع راح يكون مجحف لهلدرجة
وامنياتي بشوفة كشمش لاخر مرة جان الها نصيب جبير بلغصة لكاتمة نفسي
واكفة بلمطبخ اغسل مواعين وام بيداء بلحمام تسبح
حسيت علي دخل للمطبخ
تقرب الي
لخوف خلاني الزم لسجينة ورة ضهري
ببتسامة همس
عبرت عليج
شنو هي
شربتيها
هاي شدتحجي
عبرت عليج مال اني نسونجي وعيني عليج
والله عمي طلعت اني ممثل
هاي شدتحجي شبيك ابو بيداء
ماطول راح ترحين خل احجيلج
ترة اني لانسونجي ولابطيخ
محمد وام بيداء سوو هذا لفلم حتة يقنعج ويعقد عليج قبل مترحين
مستحييل
هههه بابا لنسونجي متوكف بعينة متزوجة لو بت بيت بس هاي خطة من استاذ محمد هوة واختة وجبروني اشاركهم نحرجت
وانت ليش دتكولي هذا الكلام هسة
هاي فوكاها
عافني ومشة
لخنكة الي ترست صدري تفوق كل احساس
شكد حسيت نفسي مغفلة
زوج
ضحكو علية كلهم
ردت اثأر لداخلي واستغلالهم خوفي وضعفي
ماحجيت ولا بينت الهم
وقررت وانتها
تانيت يحين موعد سفري
ودعتهم وتشكرت منهم ومابينت شي ابد
نضراتهم كلشي بيهم يطالب بأمل انو مااترك محمد
ركبت وتوجهت لعمان لوحدي
جانت رحلتي برية
متعبة بكل لمقاييس
لخوف من تشديد لضباط كان حابس نفسي
جنت خايفة ينعرف لماضي
جنت خايفة جدو ابو خليل يكون تارك ثغرة وانلزم واروح بشربة ماي
وكفت علشباك وتوالت علية لأسألة
سبب طلعتج
مريضة ورايحة اتعالج
اشو ممبين عليج
مرضي عضوي
الي رعبني اكثر من بدة يسألني عن ناس اني مااعرفهم ولا سامعة بأسمائهم
ضليت اجاوب بأي عن اي شي يسألوني عنة وتوقعت إما كاشفيني وجاي يحاولون يغلطوني أو هلأشخاص همة اقارب لبنية الي جوازي يحمل اسمها
علما نختم جوازي واني اجاوب اسألتهم اني مبتلعني لخوف ومنتهية
من ستلمت جوازي من لشباك كأن ستلمت تذكرة لدخول الجنة
وصلنة للحدود الأردنية
نزلت متفاجأة بلحدود والمكان صحراء كأن
وراها نقلتنا سيارات
لفجرية وصلنة نزلنة اني وعائلة صادقتهم بلطريق وسولفت الهم مقتطفات عني
واصرو ابقة وياهم ويحجزولي ويديرون بالهم علية
كلشي جان يصير وياي
جان يقيني انو هاي روح بابا ترعاني
بابا الي مات وهوة يوصي بينا
شوكت اوصل لبر لأمان وترتاح بقبرك
اجرنا بنفس لفندق تكلفتة جانت غالية علية
اقترحت امهم (ام نديمة) بأن اشارك لبنات بغرفتهم
حسيت بلأنزعاج واضح على ملامحهن
بس خجلهن منعهن انو يحجن
ماعندي غير حل
نمنة نفس لغرفة
جانن اسمائهن نديمة وسليمة
دبدوبات بيض اشكالهن يابانية
سرعان ما راح لأنزعاج من محياهن
وكدرت اكسب عطفهن من بديت اسرد جزء من معاناتي
وراها صارو يشاطروني بكلشي
اتصلت بماما وطمنتها
محمد ماتصلت بي
شي بداخلي كاره فعلتة
استغفالة الي
لليل ماكدرت
مهما يكون لناس آوني وساعدوني
اتصل جاوبتني ام بيداء
طمنتها وكالت من يجي محمد اخلي يتصل بيج
بعد ايام جانت مقابلتي رافقوني ام نديمة ونديمة
اسألة روتينية ومعلومات
موافقتهم على طلب ماما بلم لشمل اجت بأسرع وقت
تعاطفهم بقضايا الترحيل وبساع تم كلشي
وتحدد مود سفري
اما عائلة ام مديمة نرفضت معاملتهم لأسباب تخض عمل ابو نديمة رفضو لأفصاح عنها ونطوني اعذار واهية ماصدكتها
وراها ام نديمة شترتلي مجموعة ملابس وهدايا من لبنات
وداعي الهم جان يسودة الحزن ولأمتنان على كلشي قدمو الي
وجودهم وفر علية هواي
وودعوني بلمطار
وركبت طيارتي
من حطت اقدامي بيها اجهشت بللبكاء
واصبر روحي
راح اشوف ماما واهلي
صوت عقلي يقنعني
رحلة متعبة رغم طيران
من محطة لمحطة جانت لدموع متفاركني
واخيرا لامست اقدامي ارض لولاية الي يسكنوها لأهل ولأحباب
من وصلت الهم جنت خاوية
متعبة
محتاجة احضانهم ارتمي بيها
وانام نومة ابدية
عيوني تدورهم
صوت ماما تسلل الي من بين جموع لناس وضوضاء المكان بين مستقبل ومودع
نداريت
ماكدرت اتقدم الهم خطوة
كل السويتة كعدت على حيلي بلكاع وفرفحت بجي
رجليهم لهرولت الي ركض
جنت متربعة وابجي
تجمعت كل ذكرى الم حسيتها بفراقهم
غمضت عيوني واني اشوف ماما ترمي جسدها علية
وصراخها يتعالى
نعومة ماما نضر عيني
يبعد امج ماصدك دااشوفج
وانغام تحتضن ضهري وتبوس بية
ماعندي حتة حيل ارفع ادية واحضنهم
جنت بس اريد اشكي
صوتي يهمس ماما نضربت
ماما مانمت ليلة مرتاحة
نذليت بفراككم والله ماما
من بيت لبيت ماعندي مسكن
كلها تتعطف علية
مثل طفل كنت محتاجة ارمي كل همومي بحضنها
جنت محتاجة ارميهن حتة اكدر انهض واكوم
صوتها ليهدء بية
وبكفوفها حتضنت وجهي
بعد ماكو كل هذا ماما
ماعوفج بعد لو على موتي
كومي
كوموني وتتلاقفني احضان خالاتي وعماتي
الي يحبوني على لشبه لبية من بابا
بلشكل ولطباع
رحنة للبيت
كلهم يسكنون بنفس لحي
ماما وخالتي ام منصور يسكنن بنفس لعمارة
دخلت للشقة
جنت محتاجة انام
حتة مااكلت
مجرد سبحت ورميت بجسدي لمتعب بلسرير
ولاول مرة نمت بدون ماافز
جانت اول ليلة يطلع علية لفجر من دون كوابيس
صوت ماما تفززني واديها تتلمس وجهي بحنية
انعام
كعدي ماما من لعصر نايمة
فتحت عيوني واني اسحب اديها وابوسهن
بيش لساعة
ب٨
كمت على حيلي
كبالي انعام تضحك
تقربت الي وبيدها ورقة
طلعتها
جانت راسمتني
لرسمة متقنة وحيل تشبهني
معقولة هذا رسمج
اي هناك بلمخيم كتشفت موهبتي ونميتها
وصوت ماما الي ترتب بفراشي ترد علية بضحك
سكتي ماخلت واحد مارسمتة حتة لامن ماسلمو منها
صوت خالتي دخلت شايلة ماعون يحوي كيمر عراقي صنع ايدها
شوية ودخل وراها منصور
عيوني علي كبران ومتغير
نقطعنة عنهم سنين بسبب زعلهم وية بابا
الي جان حجة حتة يبتعدون عنة خوفا من نشاط بابا
كعدنا على صينية وحدة
لمة فاقدتها
وضحكة اعادت لنفسي اشياء هواي ضيعتهن
منصور ينكت وانغام تضحك
ماما وخالة يسولفن واني سارحة
لليل لتمو كلهم جانت امي عازمتهم
عماتي وخالاتي وخوالي واولادهم
وبضحكة وسالفة مرت لساعات
راحو كلمن لبيتة
دخلت للغرفة الي مخصصتها ماما الي ولأنعام
لشقة جانت صالة وداير مدايرها باقي الملحقات
لمطبخ مفتوح علصالة
وغرفتين وحدة يم لثانية وصحيات
تمددت بفراشي
صورتة ببالي
كلماتة بعدني اسمع نغمهن
عدت مدة ماما لكتلي شغل بروضة اطفال اهلية
لأجر زين ومرتاحة
اضيع من تفكيري بوسط هوسة لاطفال
تعلمت اللغة
ولوارد ليجينة من لدولة جان شايلنة
انغام تداوم
منصور يوصلها
كل جمعة يلتمون ببيتنا على عتبار انو ماما اكبرهم
وسط ذيج التجمعات جنت اشرد منهم
بوسط لضحكات لتتعالة
جان يفززني صوت احدهم يسألني انعام انتي ويانة
جنت اتصور نفسي ضاعت هناك
ولقائي باهلي يعيدها الي
بس ماضنيت انو تركتها هناك واجيت خالية
ومرت لأيام
جنت اشتاق الهم
كشمش وسوالفها زوري بسعاد وجفصاتها
بيبي شكرية وحتة هوة
ياترى تقبل سللامة بعد رحيلي
ياترى قيصر صحة
وهواااي اسألة جانت ببالي
بعد مدة اتصلت بأم بيداء
عتابها وملامتها وكلشي تجاهلتة
الى ان سحبت لتلفون مني امي
وحجت وهية تطمنها عني وتكللها
ان شاء الله نمشي بمعاملة محمد ونسحبة
صوتها يرد علي
والله خالة تمرض وينتضر اتصال منها صارلة كومة
وجاي يحاول جهدة يقنع بابا حتة يلحكها بأسرع وقت
صوتي بصياح
اني موغبية ترة كلشي عرفت
عرفت انتو ضحكتو علية بسالفة رجلج نسونجي حتة تجبروني اوافق
ستضعفتوني وستغليتو وضعي
جنتو تكدرون تساعدوني بدون هلانانية وتعتبروها صدقة عن عمركم
بس ليش هيح تصرفتو ليييش
صوتة يهمس الي
انانية ؟
لان ردتج الي
لأن ردت احميج ومااضيعج
جنت تكدر تحميني بدون هلمؤامرة
نسد لخط
وصوت ماما تنتر بية
ليش ولج
موعيب اكو وحدة هيج تحجي وية خطيبها
عفتها وطبيت جوة
تعبانة مخنوكة
شنو اريد شنوووو
مو ردت اطلع منهم وسعيت لهلشي بكل وسيلة وحطيت ايدي حتة بيد نعناعة حتة اطلع
شبية هسة
ليش احس بمشاعر مختلطة معقدة
سعيت هواااي حتة اوصل وبلنهاية وصلت منهكة
لدرجة انو ماعندي طاقة للفرح
اريد بس استريح من عناء رحلتي
جنت اتصور وصولي لهنا راح يكون لمطاف
ماضنيت غبائي وسذاجة تفكيري يحن لذيج لأيام
اخاف ابقى وحدي
اخاف من وحدتي
اخاف من روحي الي ماعادت روحي
اخاف من تفكيري الي اصبحت مالي سلطة علي
ليلية ياخذني لذيج لغرفة
لصوتة وهوة يلمح الي بحبة
لشكلة من يدخل للبيت متعوب
واخر كلمات كانن لسجن الي حبسني بزنزانتة لأبدية
اطلع برة اروح يم خالاتي
اني الي اكره الأختلاط وكثرة لناس
صرت الجأ الهم من نفسي
وبيوم وصلت بية احجي لانغام واشكيلها
صارت عادتي يومية اسولف الها
عنهم كلهم كلهم حتة حدهن حتة سللامة
ماما قدمت الي على دورة مال اعلام
وحطت ببالي فكرة انو ادرس اعلام واخوض هاي لتجربة
وافقت
صرت اعتنق ااي شي يخليني اهرب من نفسي
صارت ماما متعوفني وحدي ابد
حتة بليل نقلت سريرها يمنة وصارت تنام يمنا
هي تشتغل بمحل بيع احذية
غيرت وقت دوامها حتة تكون موجودة وقت رجعتي
صرت مااعندي ذرة فراغ لنفسي
لصبح دوامي بلدورة ينتهي بل٢
ولعصر حولت دوامي بلروضة مسائي
اكو دكتورات وموضفات دوامهن ٨ ساعات واكثر
لذا يبقون لاطفال عدنة لحد لعصر
رغم كل هذا مجرد مااصفن
الكة نفسي بنصهم
الكة عيونة تعاينلي بنضرات مافسرتها لليوم
الكة شفافة تهمس تراتيل عشق وهيام
ماعرف شلون جنت اتجاهلة
ام بيداء تتصل تسال عنة
واعرف بي كاعد يمها من تتصل
جنت ضايعة مااكدر احاجي محمد
لليوم ماتخذت قرار بشأن علاقتنا
ومضيت كل يوم اسأل نفسي
ليش بنص اهلي واحس نفسي ضايعة
ليش اريد اخبارة واتمنة لو بس احصلها
بعد تفكير طويل
قررت اتصل
ماعرف شنو احجي وشكول
لمهم اسمع صوتة
محتاجة صوتة
مثل مريض ويريد علاجة
دكيت لرقم وصوت انغام تهمس الي
- انعام هسة شتحجين لوطلعتلج هاي لمجلوبة حدهن
معليج لمهم اعرف خبر عنة
دك هواي
ماحس غير ماما تسحب لتلفون مني بكل قوتها
وحييل خضت جسمي
وبصوت عالي كأن تريد تصحيني من سباتي تصرخ
انعام رجعي لعقلج
تخبلتيييي
ماما هاي مو حياتنا
ولايمكن اسمح بيوم ترجعين لهاي لبيئة
موت ودم وثارات وفصليات ورهاين
انعام اصحي
باعي احنة وين
وشوفي انتي وين ضايعة بيا مستنقع
باعي لدنية وين وصلت وقارني بين حياتهم وحياتنا هنا
انعام ذيج لبيئة الها ناسها
الي مانخلق هناك لايمكن يكدر يعيش بينهم
شنو حب شنو شتياق شنو تعود
نداريت على انغام
انتي كلتيلها مووو
بدموع همست وهية تنزل راسها
والله هي قررتني وجبرتني احجي حلفتني بروح بابا
ماشي حسابنا بعدين
صوت ماما يصرخ بية
انعام بلنسبة للي صارلي ساعة احجي شو تجاهلتي كلامي ومحتارة تحاسبين انغام
ماما كل اكلتي صح
بغصة همست
بس غير لوعندي عقل ويستوعب
حييل صفكتني راشدي وصرخت
هذا كفيل يرجعلج عقلج
عافتني وطلعت من لشقة
حيل ضربت لباب
واسمع صوت كلامها وية خالتي وهي تشكيلها مني
دموعي تنزل
وصوتي يهمس لبواطني
شتردين انعام شترديييين
.
.
.
.
بعد مرور ٤ اشهر
لتلفون يرن
صوت يهمس
انعام اني محتاجتج انعام بس انتي تكدرين تخلصيني من لموت .....يتبغ
لوقت بين ل١٢ ولوحدة وهاي حدود امكانيتي اتمنة متضغطون علية لبارت ٤ الاف و٥٠٠ كلمة
واريد تفاعل بحيث من اشوفة اتشافا😍

تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!